𑐣𑐾𑐰𑐵𑑅 𑐥𑐟𑑂𑐬𑐎𑐵𑐬 𑐬𑐵𑐲𑑂𑐚𑑂𑐬𑐶𑐫 𑐡𑐧𑐸𑐮𑐶𑑄 𑐳𑑂𑐰𑐩𑑂𑐴 𑐩𑐶𑐳𑐵 𑐥𑐟𑑂𑐬𑐎𑐵𑐬𑐥𑐶𑑄𑐟 𑐳𑐵𑐢𑐣𑐵 𑐩𑐶𑐳𑐵 𑐥𑐟𑑂𑐬𑐎𑐵𑐬𑐶𑐟𑐵 𑐳𑐩𑑂𑐩𑐵𑐣 𑐮𑑅𑐮𑑂𑐴𑐵𑑅𑐐𑐸 𑐡𑐸 𑑋 𑑑𑑑𑑓 𑐎𑑂𑐰𑑅𑐐𑐸 𑐀𑐣𑑂𑐟𑐬𑑂𑐬𑐵𑐲𑑂𑐚𑑂𑐬𑐶𑐫 𑐣𑐵𑐬𑐷 𑐡𑐶𑐰𑐳𑐫𑐵 𑐮𑐳𑐟𑐵𑐫𑑂 𑐡𑐧𑐹𑐥𑐵𑐏𑐾𑑄 𑐐𑑂𑐰𑐳𑐵𑑅 𑐐𑑂𑐰𑑅𑐐𑐸 ‘𑐳𑑄𑐔𑐵𑐬 𑐏𑑂𑐫𑐮𑐫𑑂 𑐩𑐶𑐳𑐵 𑐳𑐱𑐎𑑂𑐟𑐶𑐎𑐬𑐞’ 𑐰𑐶𑐲𑐫𑐫𑑂 𑐖𑐹𑐐𑐸 𑐀𑐣𑑂𑐟𑐎𑑂𑐬𑑂𑐬𑐶𑐫𑐵 𑐖𑑂𑐫𑐵𑐗𑑂𑐰𑐮𑐫𑑂 𑐄𑐐𑐸 𑐳𑐩𑑂𑐩𑐵𑐣 𑐮𑑅𑐮𑑂𑐴𑐵𑑅𑐐𑐸 𑐏𑑅 𑑋

𑐩𑐹𑐥𑐵𑐴𑐵𑑄𑐎𑐠𑑄 𑐗𑐵𑐫𑐵𑐡𑐷𑐩𑑂𑐴 𑐫𑐮 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑐵 𑐄𑐥𑐥𑑂𑐬𑐩𑐸𑐏 𑐩𑐘𑑂𑐖𑐬𑐷 𑐱𑐵𑐎𑑂𑐫 (𑐁𑐳𑑂𑐠𑐵𑑄) 𑐐𑑀𑐬𑐏𑐵𑐥𑐟𑑂𑐬 𑐣𑑂𑐴𑐶𑐥𑑁𑐫𑐵 𑐦𑑀𑐚𑑀 𑐥𑐟𑑂𑐬𑐎𑐵𑐬 𑐎𑐰𑐶𑐟𑐵 𑐠𑐵𑐥𑐵, 𑐣𑐾𑐥𑐵𑐮 𑐚𑐾𑐮𑐶𑐨𑐶𑐖𑐣𑐫𑐵 𑐀𑐘𑑂𑐖𑐣𑐵 𑐱𑐶𑐮𑑂𑐥𑐎𑐵𑐬 𑐰 𑐠𑐵𑐴𑐵 𑐊𑐦𑐊𑐩𑐫𑐵 𑐳𑐣𑑂𑐔𑐸𑐎𑐸𑐩𑐵𑐬𑐷 𑐮𑐵𑐩𑐵𑐫𑐵𑐟 𑐴𑐣𑐵𑐥𑑁 𑐡𑐾𑐕𑐵𑐣𑐵𑐡𑐷𑐐𑐸 𑐏𑑅 𑑋 𑐠𑐣𑐫𑐵 𑐥𑐹𑐔𑑂𑐰𑐳𑑂𑐠𑐶𑐟 𑐀𑐎𑑂𑐲𑐾𑐫𑐱𑑂𑐰𑐬 𑐩𑐴𑐵𑐰𑐶𑐴𑐵𑐬𑐫𑑂 𑐖𑐹𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐡𑐧𑐹𑐫𑐵 𑐣𑑂𑐰𑐎𑐸𑐮𑐶𑐳𑐾𑑄 𑐩𑐶𑐳𑐵 𑐎𑐰𑑅𑐫𑐵 𑐳𑑄𑐫𑑀𑐖𑐎 𑐬𑐔𑐣𑐵 𑐱𑑂𑐬𑐾𑐲𑑂𑐛𑑄 𑐳𑑂𑐰𑐵𑑄𑐩𑐵𑑅 𑐎𑑂𑐰𑐏𑐵𑐫𑐾𑐎𑐵𑐡𑐷𑐐𑐸 𑐏𑑅𑐳𑐵 𑐣𑐾𑐥𑐵𑐮 𑐁𑐡𑐶𑐰𑐵𑐳𑐷 𑐖𑐣𑐖𑐵𑐟𑐶 𑐥𑐟𑑂𑐬𑐎𑐵𑐬 𑐩𑐴𑐵𑐳𑑄𑐑 (𑐦𑑀𑐣𑐶𑐖)𑐫𑐵 𑐀𑐢𑑂𑐫𑐎𑑂𑐲 𑐐𑐖𑐸𑐬𑐢𑐣 𑐬𑐵𑐃 𑐡𑑀𑐳𑐮𑑂𑐮𑐵 𑐣𑑂𑐫𑐫𑐾𑐎𑐵𑐡𑐷𑐐𑐸 𑐏𑑅 𑑋

𑐄𑐐𑐸 𑐂𑐮𑐫𑑂 𑐰𑐬𑐶𑐲𑑂𑐛 𑐳𑐵𑐴𑐶𑐟𑑂𑐫𑐎𑐵𑐬𑐮𑐶𑐳𑐾𑑄 𑐥𑑂𑐬𑐖𑑂𑐘𑐵 𑐥𑑂𑐬𑐟𑐶𑐲𑑂𑐛𑐵𑐣𑐫𑐵 𑐥𑐸𑐮𑐵𑑄𑐩𑑂𑐴 𑐡𑐸𑐖𑑅 𑐳𑐸𑐮𑑀𑐔𑐣𑐵 𑐩𑐵𑐣𑐣𑑂𑐢𑐬 𑐢𑐶𑐟𑐵𑐮𑑄 𑐣𑐾𑐥𑐵𑑅𑐫𑐵 𑐥𑐟𑑂𑐬𑐎𑐵𑐬𑐎𑐠𑑄 𑐎𑐫𑐵𑐟𑑅𑐩𑑂𑐴 𑐳𑐵𑐢𑐣𑐵 𑐥𑑂𑐬𑐢𑐵𑐣 𑐀𑐢𑐶𑐎𑐵𑐬𑐷𑐫𑐵 𑐠𑐷𑐠𑐷 𑐥𑐎𑑂𑐲𑐫𑐵𑐟 𑐎𑐫𑐵𑑅 𑐠𑑅𑐐𑐸 𑐣𑐸𑐐𑑅𑐏𑑃 𑐟𑐫𑐵𑐡𑐷𑐐𑐸 𑐏𑑅 𑑋 𑐮𑐶𑐳𑐾𑑄 𑐰𑐫𑑂𑐎𑐮𑑄 𑐠𑐷𑐠𑐷 𑐨𑐵𑐫𑑂𑐫𑐵 𑐳𑐵𑐴𑐶𑐟𑑂𑐫 𑐏𑑂𑐫𑑅𑐫𑐵 𑐩𑐶𑐳𑐵𑐟𑐫𑑂 𑐰𑑂𑐫𑐎𑑂𑐟𑐶𑐟𑑂𑐰 𑐰 𑐫𑑀𑐐𑐡𑐵𑐣𑐫𑐵𑐟 𑐎𑐫𑐵𑑅 𑐳𑑄𑐔𑐵𑐬𑐩𑐵𑐢𑑂𑐫𑐩𑑄 𑐄𑐔𑐶𑐟 𑐥𑑂𑐬𑐵𑐠𑐩𑐶𑐎𑐟𑐵 𑐧𑐶𑐫𑐵𑑅 𑐠𑐵𑐫𑑂 𑐧𑐷𑐟 𑐣𑑄 𑐂𑐣𑐵𑐥 𑐫𑐵𑐣𑐵𑐡𑐶𑐮 𑑋

𑐦𑑀𑐣𑐶𑐖𑐫𑐵 𑐀𑐢𑑂𑐫𑐎𑑂𑐲 𑐬𑐵𑐃𑑄 𑐣𑐾𑐥𑐵𑑅𑐫𑐵 𑐳𑑄𑐔𑐵𑐬𑐩𑐵𑐢𑑂𑐫𑐩𑐫𑐵𑐟 𑐳𑐩𑐵𑐰𑐾𑐱𑐷 𑐫𑐵𑐫𑐾𑐟, 𑐩𑐵𑐟𑐺𑐨𑐵𑐲𑐵 𑐥𑐟𑑂𑐬𑐎𑐵𑐬𑐶𑐟𑐵𑐫𑐵 𑐰𑐶𑐎𑐵𑐳 𑐫𑐵𑐫𑐾𑐟 𑐬𑐵𑐖𑑂𑐫 𑐥𑐎𑑂𑐲𑐮𑐶𑐳𑐾𑑄 𑐳𑑂𑐠𑐵𑐣𑐷𑐫 𑐳𑐬𑐎𑐵𑐬𑑄 𑐣𑑄 𑐛𑑀𑐳 𑐬𑐸𑐥𑑄 𑐖𑑂𑐫𑐵 𑐣𑑂𑐴𑑂𑐫𑐵𑐎𑐾𑐩𑐵𑑅𑐐𑐸 𑐁𑐰𑐱𑑂𑐫𑐎 𑐡𑐸 𑐢𑐫𑐵𑐡𑐶𑐮 𑑋

𑐎𑑂𑐬𑐶𑐫𑐵𑐱𑐷𑐮 𑐥𑐟𑑂𑐬𑐎𑐵𑐬 𑐩𑐘𑑂𑐔𑐫𑐵 𑐀𑐢𑑂𑐫𑐎𑑂𑐲 𑐳𑑄𑐐𑐷𑐟𑐵 𑐮𑐵𑐩𑐵𑑄 𑐁𑐡𑐶𑐰𑐵𑐳𑐷 𑐖𑐣𑐖𑐵𑐟𑐶 𑐩𑐶𑐳𑐵 𑐥𑐟𑑂𑐬𑐎𑐵𑐬𑐟𑐫𑑂𑐳𑑄 𑐣𑑄 𑐣𑐾𑐥𑐵𑑅𑐫𑐵 𑐟𑐟𑑅𑐢𑑄𑐐𑐸 𑐳𑑄𑐔𑐵𑐬𑐩𑐵𑐢𑑂𑐫𑐩𑐫𑑂 𑐟𑐎 𑐖𑑂𑐫𑐵 𑐫𑐵𑐫𑐾𑐐𑐸 𑐴𑐿𑐳𑐶𑐫𑐟 𑐡𑐫𑐾𑐎𑐾𑐩𑐵𑑅𑐐𑐸 𑐰 𑐄𑐎𑐶𑐫𑐵 𑐣𑐶𑑄𑐟𑐶𑑄 𑐁𑐰𑐱𑑂𑐫𑐎 𑐖𑑂𑐘𑐵𑐣, 𑐳𑐷𑐥, 𑐟𑐵𑐮𑐶𑐩 𑐰 𑐎𑑂𑐲𑐩𑐟𑐵 𑐀𑐨𑐶𑐰𑐺𑐡𑑂𑐢𑐶𑐫𑐵 𑐣𑐶𑑄𑐟𑐶𑑄 𑐟𑐵𑐮𑐶𑐩𑐟 𑐳𑑄𑐔𑐵𑐮𑐣 𑐫𑐵𑐣𑐵 𑐰𑐣𑐾𑐩𑐵𑑅𑐐𑐸 𑐏𑑃𑐫𑑂 𑐧𑑅 𑐧𑐶𑐫𑐵𑐡𑐶𑐮 𑑋

𑐡𑐧𑐹𑐫𑐵 𑐎𑐾𑐣𑑂𑐡𑑂𑐬𑐷𑐫 𑐣𑐵𑐫𑑅 𑐣𑐺𑐥𑐾𑐣𑑂𑐡𑑂𑐬𑐮𑐵𑐮 𑐱𑑂𑐬𑐾𑐲𑑂𑐛, 𑐩𑐹𑐕𑑂𑐫𑐵𑐘𑑂𑐖𑐾 𑐎𑐾𑐎𑐾 𑐩𑐵𑐣𑐣𑑂𑐢𑐬, 𑐳𑐩𑑂𑐩𑐵𑐣𑐶𑐟 𑐰𑑂𑐫𑐎𑑂𑐟𑐶𑐟𑑂𑐰 𑐮𑐵𑐩𑐵, 𑐖𑑂𑐫𑐵𑐗𑑂𑐰𑑅𑐫𑐵 𑐳𑑄𑐫𑑀𑐖𑐎 𑐬𑐔𑐣𑐵 𑐱𑑂𑐬𑐾𑐲𑑂𑐛𑑄 𑐬𑐵𑐖𑑂𑐫𑐫𑐵 𑐴𑐬𑐾𑐎 𑐣𑐶𑐎𑐵𑐫𑐫𑑂 𑐩𑐶𑐳𑐵𑐟𑐫𑑂 𑐳𑐩𑐵𑐣𑐸𑐥𑐵𑐟𑐶𑐎 𑐥𑑂𑐬𑐟𑐶𑐣𑐶𑐢𑐶𑐟𑑂𑐰 𑐖𑐸𑐂𑐩𑐵𑑅𑐐𑐸 𑐰 𑐥𑐟𑑂𑐬𑐎𑐵𑐬𑐶𑐟𑐵 𑐏𑑂𑐫𑑅𑐫𑐵 𑐨𑐹𑐩𑐶𑐎𑐵 𑐣𑑄 𑐥𑑂𑐬𑐨𑐵𑐰𑐎𑐵𑐬𑐷 𑐖𑐸𑐂𑐩𑐵𑑅𑐐𑐸 𑐏𑑃𑐫𑑂 𑐠𑑅𑐠𑑅𑐐𑐸 𑐣𑐸𑐐𑑅𑐏𑑃 𑐟𑐫𑐵𑐡𑐷𑐐𑐸 𑐏𑑅 𑑋