– 𑐬𑐾𑐏𑐵 𑐱𑐵𑐎𑑂𑐫

𑐩𑐵𑑄 𑐰𑐣𑐾 𑐣𑑂𑐴𑐶… 𑐢𑐎𑐵𑑅 𑐢𑐵𑑅𑐐𑐸 𑐳𑑅 𑐟𑐵𑐫𑐾𑐡𑐟 𑑋 𑐠𑑁𑑄 𑐫𑑅𑐩𑐴𑑂𑐬𑐶 𑐥𑐸𑐣𑑂𑐴𑐶…𑐠𑑅𑐐𑐸 𑐕𑐾𑑃𑐫𑑂 𑐴𑐾 𑐣𑐏𑑅 𑐢𑐎𑐵𑑅 𑐟𑐎𑑄 𑐩𑐳𑑂𑐫𑐹 𑐩𑐏𑐵𑑅 𑐖𑐸𑐂 𑐢𑐂𑐐𑐸 𑐩𑐟𑐶𑐂 𑑋 𑐟𑐟𑐵𑐖𑐸𑐫𑐵 𑐳𑑅 𑐦𑐳𑐫𑑂 𑐟𑐸𑑄 𑐟𑐣𑐵𑐰𑐣, 𑐩𑐵𑑄𑐫𑐵 𑐮𑐶𑐳𑑅 𑐖𑐶𑑄 𑐩𑐟𑐵𑑅 𑑋 𑐥𑐮𑐏𑑄 𑐴𑐾 𑐎𑑀𑐠𑐵𑐫𑑂 𑐗𑐵𑑅𑐩𑑂𑐴 𑐩𑐵𑑄𑐫𑐵𑐟 𑐏𑐣𑐵𑑅 𑑋 𑐥𑑂𑐫𑐥𑐸𑑄𑐎𑐵 𑐟𑑅𑐐𑐸 𑐩𑑂𑐴𑐸𑐟𑐸𑐳𑐶𑑄 𑐧𑐸𑐮𑐸𑐴𑑃 𑐢𑐎𑐶𑑄 𑐔𑐵𑐫𑐾𑐎𑐮 – 𑐠𑑁𑑄 𑐖𑐶𑐩𑐶 𑐠𑑅𑐕𑐾𑑃 𑐣𑐏𑐟𑑂𑐫𑐵 𑐢𑐵𑑅𑐮, 𑐗𑐷𑐠𑐵𑐫𑑂 𑐴𑐾 𑐣𑐏𑑅 𑐡𑐸 𑐣𑐶 𑐢𑐫𑐵𑑄 𑐖𑐶 𑐫𑑅𑐩𑐴𑑂𑐬𑐶 𑐡𑐫𑐾𑐎𑐾 𑐩𑐳𑑅 𑐢𑐎𑐵𑑅 𑐮𑐶𑐳𑑅 𑐧𑐶𑐮 𑑋 𑐕𑐸 𑐢𑐵𑐫𑐾𑐐𑐸 𑐐𑑂𑐰 ?

𑐩𑐵𑑄𑐫𑐵𑐐𑐸 𑐏𑑃 𑐣𑑂𑐫𑐣𑐵𑑅 𑐖𑐶𑐟𑑅 𑐂𑐣𑑂𑐣 𑐩𑐶𑐣 𑑋 𑐩𑐏𑐸, 𑐕𑐸 𑐖𑐹𑐐𑐸 𑐠𑑁𑑄𑐎𑐣𑑂𑐴𑐾𑐫𑐵𑐥𑐶𑑄 𑐨𑑁 𑐩𑐳𑑂𑐟𑐫𑑂𑐟 𑑋 𑐐𑐖𑑂𑐫𑐵𑐐𑐸 𑐏𑑃 𑐠𑑂𑐰 𑑋 𑐀𑐴𑑀 … 𑐕𑐸 𑐫𑑅𑐩𑐴𑑂𑐬𑐶 𑐡𑐫𑐾𑐎𑐾 𑐩𑐳𑑅 𑐢𑐎𑐵𑑅 𑐢𑐵𑐫𑐾𑐰𑑄 𑐴𑐾 𑐠𑑅𑐕𑐾𑑃𑐫𑑂 𑐰𑐣𑐾 𑐩𑐵𑑅𑐐𑐸 𑐮𑐵 ? 𑐴𑐵𑐣𑑄 𑐫𑑅𑐩𑐴𑑂𑐬𑐶 𑐡𑐫𑐾𑐎𑐾 𑐩𑐳𑑅𑐳𑐵 𑐩𑐾𑐐𑐸 𑐣𑐳𑐵 𑐖𑑂𑐰𑐬𑐾 𑐫𑐵𑐫𑐾 𑐩𑑂𑐰𑐵𑑅 𑐮𑐵 ? 𑐢𑐵𑐂 𑐣𑐵𑐥𑑄, 𑐴𑐵 𑐨𑐶𑑄𑐳𑐵 𑐢𑐎𑐵𑑅 𑐴𑑅 𑐣𑑄 𑐨𑐶𑐣𑐷 𑑋 𑐣𑐏𑑅 𑐴𑐾 𑐩𑐡𑐸𑐐𑐸 𑐕𑐾𑑃 𑐏𑑅𑐳𑐵 𑐮𑐵 𑐠𑑅𑐕𑐾𑑃𑐫𑑂 𑐔𑑂𑐰𑑄𑐥𑐶𑐣𑑂𑐳𑑄 𑐣𑑄 𑐰𑐵 𑐢𑐎𑐵𑑅 𑐳𑑅𑐟𑐾𑐐𑐸 𑐣𑑄 𑐥𑐵𑐫𑐕𑐶 𑐖𑐹 𑑋 𑐐𑑂𑐰, 𑐕𑐸 𑐕𑐸 𑐎𑐵 𑐣𑐵𑑄 𑐣𑐵𑑄 𑐬𑑄𑐐𑐷 𑐥𑑂𑐫𑐣𑐫𑑂 𑐏𑐶 𑐠𑐵𑑅 𑐢𑐵𑑅𑐐𑐸 𑐏𑑃 𑐴𑐾 𑐖𑐸𑐂𑐢𑐸𑑄𑐎𑐮 𑐎𑐵 𑑋

𑐬𑐵𑐖𑐣𑐷𑐟𑐶𑐂 𑐗𑐷 𑐣𑐾𑐰𑐵𑑅𑐟 𑐣𑑂𑐴𑑂𑐫𑑅𑐣𑐾 𑐩𑐮𑐵𑑅, 𑐟𑐬 𑐕𑐾𑑃𑐫𑑂 𑐕𑐾𑑃𑐫𑑂 𑐬𑐵𑐖𑐣𑐷𑐟𑐶 𑑋 𑐀𑐦𑐶𑐳𑐫𑑂 𑐧𑐶𑐡𑐵 𑐣𑑄 𑐠𑑅𑐕𑐾𑑃𑐫𑑂 𑐖𑑂𑐫𑐵, 𑐨𑑂𑐰𑐫𑑂, 𑐟𑐟𑐵𑐥𑐶𑑄 𑐣𑐵𑐥 𑐮𑐵𑐫𑐾𑐐𑐸 𑐁𑐡𑐶 𑐂𑐟𑑂𑐫𑐵𑐡𑐶 𑐖𑐹𑐳𑐵 𑐠𑑁𑑄𑐫𑐵 𑐠𑑁𑑄 𑐴𑐾 𑐧𑐶𑐡𑐵 𑐣𑑄 𑐡𑐂𑐐𑐸, 𑐩𑐏𑐸𑐳𑐵 𑐧𑐵𑑅𑐕𑐶 𑐣𑑂𑐴𑑂𑐫𑑅 𑐴𑐾 𑐧𑐶𑐡𑐵 𑐩𑐶𑐮𑐾 𑐫𑐵𑐫𑐾𑐩𑐵𑑅, 𑐩𑐏𑐸𑐳𑐵 𑐩𑐖𑑂𑐫𑐹 𑐢𑐎𑐵𑑅 𑐑𑑀𑐲𑐞𑐵 𑐫𑐵𑐂𑐐𑐸 𑑋 𑐐𑐸𑐮𑐶 𑐣𑑂𑐴𑐵𑐫𑑂 𑐢𑑂𑐫𑐣𑐵𑑅 𑐳𑐬𑑂𑐐𑑅 𑐳𑑂𑐰𑐫𑐾𑐦𑐸𑐥𑐶𑑄… 𑐖𑐶𑐥𑐶𑑄 𑐮𑐵 𑐁𑐏𑑅 𑐎𑐵𑑄 𑐢𑐎𑐵𑑅 𑐴𑐾 𑐔𑑂𑐰𑐣𑐶𑐐𑐸 𑐩𑐏𑐵𑑅 𑐖𑐸𑐂 𑑋

𑐀𑐠𑐾𑐮𑐵 𑐠𑑁𑑄𑐎𑐣𑑂𑐴𑐾𑐫𑐵 𑐣𑐾𑐥𑐵𑑅𑐫𑐵 𑐬𑐵𑐖𑐣𑐷𑐟𑐶𑑄 𑐕𑐾𑑃𑐏𑐵 𑐕𑐾𑑃𑐏𑐵 𑐥𑐟𑐶𑐎𑑄 𑐐𑐖𑑂𑐖𑐧 𑐕𑐵𑐥 𑐟𑐫𑐾𑐟 𑐳𑐦𑐮 𑐖𑐸𑐮 𑐢𑐵𑐫𑐾𑐩𑐵𑐮𑐶 𑐎𑐵 𑑋 𑐳𑐬𑐎𑐵𑐬𑐫𑐵 𑐣𑑄 𑐢𑐵𑐂𑐐𑐸 𑐕𑐐𑐹, 𑐫𑐵𑐂𑐐𑐸 𑐕𑐐𑐹 𑐣𑐶, 𑐏𑑅 𑐗𑐷𑐐𑐸 𑐕𑐾𑑃𑐫𑑂 𑐣𑑄 𑐬𑐵𑐖𑐣𑐷𑐟𑐶… 𑐧𑑂𑐫𑐵𑐴𑐵 𑐫𑐵𑐫𑐾 𑐣𑑂𑐴𑑂𑐫𑑅 𑐟𑐎 𑐗𑐷𑐐𑐸 𑐕𑐾𑑃, 𑐗𑐷𑐐𑐸 𑐥𑐬𑐶𑐰𑐵𑐬…𑐧𑑂𑐫𑐵𑐴𑐵 𑐫𑐵𑐣𑐵 𑐐𑐸𑐮𑐶𑑄𑐔𑐵 𑐩𑐡𑐂𑐧𑐮𑐫𑑂 𑐏𑑃 𑐨𑐵𑐫𑑂 𑐴𑐾 𑐥𑐵𑐣𑐵𑐰𑐣𑐷𑐐𑐸… 𑐖𑐶𑐩𑐶 𑐎𑐮𑐵𑑅 𑐀𑐮𑐾 𑐖𑐶𑐩𑐷𑐐𑐸 𑐥𑐬𑐶𑐰𑐵𑐬… 𑐎𑐵 𑐠𑐠𑐾 𑐩𑐏𑐸 𑐢𑐎𑐵𑑅 𑐳𑐸𑑄 𑐴𑐾 𑐩𑐵𑐂𑐎𑐵 𑐮𑐵𑐮𑑄 𑐢𑐵𑐫𑐾 𑐦𑐂𑐩𑐏𑐸 𑑋 𑐧𑑂𑐫𑐵𑐴𑐵 𑐩𑐖𑐹𑐣𑐷𑐥𑐶𑑄 𑐩𑐶𑐖𑑄𑐟 𑐰 𑐩𑐶𑐳𑑂𑐟 𑐣𑑄 𑐧𑑂𑐫𑐵𑐴𑐵 𑐖𑐸𑐂 𑐣𑑂𑐴𑑂𑐫𑑅 𑐟𑐎 𑐠𑐠𑐾 𑐫𑐵𑐫𑐾 𑐩𑐖𑑂𑐫𑐹 𑐀𑐠𑐾 𑐫𑐵𑐫𑐾𑐩𑐵𑑅, 𑐖𑐶𑑄 𑐖𑐹𑐳𑐵 𑐠𑐠𑐾 𑐐𑐧𑐮𑐾𑑄 𑐣𑑄 𑐫𑐵𑐫𑐾 𑐩𑐏𑐸, 𑐦𑐮𑐵𑐣𑐵, 𑐢𑐶𑐳𑑂𑐎𑐵𑐣𑐵𑐫𑐵 𑐎𑐵𑐫𑑂 𑐨𑑁𑐣𑑄 𑐫𑐵𑑅𑐐𑐸 𑐟𑐳𑐎𑑄 𑐩𑐶𑐮𑐾𑐩𑐖𑐹𑐐𑐸 𑐖𑑂𑐫𑐵 𑐏𑑅 𑐢𑐎𑐵𑑅 𑐠𑑅𑐐𑐸 𑐰𑐵𑐎𑑂 𑐱𑐎𑑂𑐟𑐶 𑐣𑑂𑐴𑑂𑐫𑐧𑑂𑐰𑐂𑐐𑐸 𑑋

𑐟𑐬 𑐖𑐧 𑐠𑑅 𑐴𑐾 𑐄𑐐𑐸 𑐨𑐸𑐩𑐶𑐎𑐵𑐫𑐵 𑐩𑐹 𑐣𑐵𑐫𑑅 𑐰 𑐣𑐎𑐶𑑄 𑐖𑐸𑐂, 𑐀𑐮𑐾 𑐂𑐩𑐶𑐳𑑄 𑐠𑑅𑐠𑐐𑐸 𑐥𑑂𑐬𑐟𑐶𑐨𑐵 𑐎𑑂𑐫𑐣𑐾𑐟 𑐴𑐵𑐣𑐠𑐵𑐥 𑐴𑐾 𑐫𑐵𑐂 𑐎𑐵, 𑐩𑐵𑐣𑑁𑑄 𑐳𑑄𑐳𑐵𑐬𑐫𑐵 𑐧𑐵𑑄𑐮𑐵𑑅𑐥𑐶𑑄 𑐥𑑂𑐫𑐵𑐏𑑃𑐩𑑂𑐰𑑅 𑐂𑐥𑐶𑑄 𑐴𑐾 𑐏𑑅 𑑋 𑐄𑐩𑐶𑐐𑐸 𑐀𑐨𑐶𑐣𑐫 𑐠𑐸𑐮𑐶 𑐳𑐱𑐎𑑂𑐟 𑐖𑐸𑐫𑐵𑑅 𑐰𑐂 𑐗𑐷𑐐𑐸 𑐳𑐩𑐵𑐖𑐫𑑂 𑑋 𑐠𑐸𑐮𑐶 𑐔𑐾𑐟𑐣𑐵𑐴𑐷𑐣 𑐖𑐸𑐫𑐵𑐧𑐶𑐂 𑐂𑐥𑐶𑑄, 𑐠𑑅𑐐𑐸 𑐳𑑂𑐰𑐵𑐬𑑂𑐠 𑐥𑐹𑐰𑑄𑐎𑐾𑐫𑐵 𑐣𑐶𑐟𑐶𑑄… 𑐩𑐳𑑂𑐫𑐹 𑐖𑐶𑑄 𑐰 𑐣𑐾𑐟𑐵 𑐦𑑂𑐫𑐟𑐸𑐂𑐐𑐸 𑐩𑐾𑐔𑐫𑑂 𑐰 𑐎𑐮𑐵𑑅 𑐨𑐵𑑅𑐟𑐫𑐵 𑐡𑐠𑐸𑐂𑐫𑐵 𑐕𑐸 𑐖𑐵𑐡𑐸 𑐡𑐂𑐐𑐸 𑐏𑑅 𑐰𑐵 𑐳𑐩𑑂𑐩𑑀𑐴𑐣 𑐱𑐎𑑂𑐟𑐶 𑐡𑐸 𑐐𑐸𑐎𑐶𑐂 𑐔𑑂𑐰𑐣𑐾𑐰𑑄 𑐴𑐾, 𑐠𑐰𑑄𑐠𑐰𑐫𑑂 𑐡𑐸𑐧𑐶𑐣𑐾𑐰𑑄 𑐴𑐾 𑐎𑑂𑐰𑑃𑐫𑑂 𑐩𑐡𑐸𑐐𑐸 𑐩𑑂𑐫𑐾, 𑐮𑑅 𑐩𑐡𑐸𑐐𑐸 𑐥𑐸𑐏𑐹𑐫𑐵 𑐣𑑂𑐫𑐵𑑃 𑐦𑐵𑐟𑐵𑐦𑐵𑐟𑐵 𑐥𑐹 𑐠𑐾𑑄 𑐥𑐸𑐮𑐾𑐳𑐂𑐐𑐸 𑑋

𑐩𑐶𑐖𑑄𑐟 𑐢𑐂𑐥𑐶𑑄 𑐣𑑄 𑐩𑐶𑐖𑑄𑐟 𑐴𑐾 𑐠𑐾𑑄 𑐔𑑂𑐰𑐣𑐵𑐰𑑅 𑑋 𑐕𑐩𑑂𑐴 𑐣𑐶𑐩𑑂𑐴 𑐮𑐵 𑐠𑐥𑐵𑐫𑐳𑐎𑑄 𑐎𑐮𑐵𑑅𑐫𑐵 𑐮𑑂𑐴𑐵𑐟𑐫𑑂 𑐥𑑂𑐫𑐵𑐏𑑄 𑐮𑑂𑐴𑐸𑐂𑐥𑐶𑑄 𑐡𑐸 𑐎𑐶 𑐀𑐴𑑀 𑐧𑐫𑐵𑐣 𑐫𑐵𑐣𑐵𑑅 𑐳𑐵𑐢𑑂𑐫 𑐴𑐾 𑐩𑐖𑐹 … 𑐗𑐣𑑂 𑐳𑐸𑑄 𑐥𑐵𑐳𑐵𑐥𑐶𑑄 𑐰𑐵 𑐠𑑅𑐠𑐶𑐟𑐶 𑐣𑑂𑐴𑑂𑐫𑑅𑐣𑐾 𑐡𑐫𑐾 𑐖𑐎 𑐩𑐵𑑅 𑐀𑐮𑐾 𑐮𑐵 𑐏𑐶𑐔𑐵 𑐣𑑂𑐫𑐵𑐳𑐶𑐔𑐵𑐫𑐵𑑅 𑐠𑑅𑐐𑐸 𑐣𑑂𑐴𑐶𑐥𑑄 𑐠𑐩𑑂𑐴𑑄 𑐰𑐵𑑄 𑐰𑐵𑑄 𑐣𑑂𑐫𑐵𑐣𑐵𑑅 𑐳𑐟𑐎𑐫𑑂 𑐔𑐵𑐩𑐵𑑅𑐟𑐸 𑐠𑐾𑑄 𑐔𑐵𑐩𑐵𑑅𑐟𑐸𑐫𑐵𑑅 𑐖𑐐–𑐴𑑃𑐳𑐵𑐂 𑐫𑐵𑐣𑐵𑐔𑑂𑐰𑐣𑐷𑐐𑐸 𑐎𑐵 𑐎𑐮𑐵𑑅𑐫𑐵 𑐧𑐫𑐵𑐣 𑐫𑐵𑐣𑐵𑑅 𑑋 𑐖𑐶𑐩𑐶 𑐐𑐺𑐴𑐩𑐣𑑂𑐟𑑂𑐬𑐷 𑐀𑐣, 𑐕𑐸 𑐫𑐵𑐫𑐾 𑐢𑐵𑐮, 𑐢𑐵𑑅𑐐𑐸 𑐫𑐵𑐫𑐾𑐩𑐵𑑅, 𑐩𑐏𑐸𑐳𑐵 𑐡𑐾𑐱 𑐔𑐮𑐾 𑐩𑐖𑐹… 𑐴𑐬𑐾 𑑋 𑐳𑐩𑐵𑐖𑐫𑑂 𑐩𑐶𑐳𑐵 𑐩𑐶𑐖𑑄𑐫𑐵 𑐠𑑅𑐠𑑅𑐐𑐸 𑐨𑐹𑐩𑐶𑐎𑐵 𑐡𑐸 𑑋 𑐳𑐩𑐵𑐣𑐟𑐵 𑐢𑐂𑐐𑐸 𑐕𑐐𑐹 𑐀𑐮𑐾 𑐎𑐮𑐵𑑅𑐔𑑂𑐫𑑅 𑐢𑐂𑐐𑐸 𑐩𑐾𑐐𑐸 𑑋 𑐎𑐮𑐵𑑅𑐫𑐵𑐟 𑐮𑐫𑐟𑐵𑐫𑐾𑐎𑐾𑐟 𑐕𑐾𑑃𑐫𑐵 𑐏𑑂𑐰𑐵𑑅𑐥𑐵𑑅 𑐳𑑂𑐫𑑄𑐎𑑅 𑐖𑐸𑐂𑐥𑐶𑐣𑑂𑐳𑑄 𑐕𑐸 𑐡𑐾𑐱 𑐡𑐫𑐾𑐎𑐷 𑐖𑐸𑐂 ? 𑐏𑑃 𑐣𑑂𑐫𑑃𑐣𑑂𑐫𑑄 𑐏𑑂𑐰𑐵𑑅𑐥𑐵𑐮𑐫𑑂 𑐳𑐵𑐂𑐖 𑐩𑐶𑐮𑐾 𑐫𑐵𑐣𑐵𑑅 𑐣𑑂𑐫𑐟𑐵𑐮𑐫𑑂 𑐔𑐵𑐬𑐵𑐎𑑂𑐎 𑐩𑐸𑐂𑐎𑐾 𑐩𑐵𑐳𑑂𑐟𑐶 𑐰𑐂𑐐𑐸 𑐖𑐶𑐟𑑅 𑑋

𑐏𑐸𑐬𑐸𑐎𑑂𑐎 𑐖𑐶 𑐖𑐶𑐩𑐶 𑐎𑐮𑐵𑑅𑐫𑐵 𑐜𑐧𑐜𑐧𑐫𑐵 𑐟𑐵𑐮𑐫𑑂 𑐥𑑂𑐫𑐵𑐏𑑃 𑐴𑐸𑐂𑐩𑑂𑐴 𑐩𑐵𑐎𑑅 𑐴𑐾 𑐏𑑅 𑐢𑐵𑑅𑐳𑐵𑑄 𑐖𑑂𑐫𑐹𑐐𑐸 𑐏𑑅 𑐣𑐶… 𑐐𑐠𑐾 𑐰𑐶𑐰𑐾𑐎𑐴𑐷𑐣 𑐖𑐸𑐂𑐩𑐵𑑅𑐐𑐸 𑑋 𑐩𑐏𑐸… 𑐎𑐮𑐵𑑅𑐫𑐵 𑐧𑐫𑐵𑐣 𑐴𑐾 𑐫𑐵𑐫𑐾𑐩𑐵𑐳𑑂𑐟𑐶 𑐰𑑅𑐳𑐵 𑐖𑐶𑐩𑐶 𑐖𑐴𑐵𑐣𑐫𑐵 𑐕𑐾𑑃𑐫𑑂 𑐖𑑂𑐫𑐵 𑐫𑐵𑐫𑐾𑐐𑐸𑐮𑐶 𑐢𑐵𑐫𑐾𑐠𑐵𑐫𑑂 𑐩𑐡𑐸 𑐳𑐎𑐟𑐵𑑄 𑐳𑑂𑐰𑐫𑐵𑑄 𑐰𑑂𑐫𑐰𑐴𑐵𑐬 𑐫𑐵𑐫𑐾 𑐳𑑅 𑐢𑐵𑑅𑐳𑐵 𑐐𑐵 𑐴𑐾 𑐐𑐵𑑅𑐣𑐶 𑑋 𑐕𑐸 𑐠𑐠𑐾 𑐢𑐵𑐮 𑐎𑐶 𑐕𑐸 𑐰𑐫𑐵 𑐎𑐫𑐟𑐵 𑐦𑑂𑐫𑐵𑐳𑐸𑐂𑐐𑐸 𑐮𑐵 ? 𑐎𑐮𑐵𑑅𑐫𑐵 𑐧𑐫𑐵𑐣 𑐮𑐵 𑐔𑐔𑑂𑐕𑐶𑐫𑐵 𑐡𑐸𑐣𑐾 𑐫𑐵𑑅𑐳𑐵𑑄 𑐖𑑂𑐫𑐹 𑐣𑐶 𑑋 𑐩𑐾𑐐𑐸 𑐏𑑃 𑐮𑐵 𑐕𑐏𑐾 𑐴𑐾 𑐟𑐶 𑐎𑐮𑐵𑑅𑐫𑐵 𑐩𑐶𑐏𑐵𑑄 𑐕𑐸 𑐎𑑂𑐫𑐣 𑐨𑐵𑑅𑐟𑑄 𑐰 𑐴𑐾 𑐖𑐎 𑐏𑑄𑐎𑐷𑐐𑐸, 𑐕𑐸 𑐢𑐵𑐮 𑐰 𑐴𑐾 𑐏𑑅 𑐢𑐎𑐵𑑅 𑐕𑑂𑐫𑑄 𑐮𑑂𑐴𑐸𑐎𑐸𑐮𑑂𑐴𑐸𑐎𑐸 𑐳𑑄𑐎𑐷𑐐𑐸 𑑋 𑐠𑐖𑑂𑐫𑐵𑑅𑐐𑐸 𑐏𑐣𑐷𑐧𑐮𑐫𑑂 𑐩𑐶𑐖𑑄𑐟𑐥𑑂𑐬𑐟𑐶 𑐴𑐾 𑐎𑐣𑑂𑐣𑐵𑐔𑐵𑐫𑐵 𑐰 𑐖𑐶𑐟𑑅 𑑋

𑐴𑐵𑐣𑑄 𑐩𑐶𑐳𑑂𑐟 𑐳𑑂𑐰 𑐮𑐾, 𑐨𑐵𑑅𑐟𑑄 𑐠𑐸𑐮𑐶 𑐳𑐎𑐳𑐶𑐐𑐸 𑐣𑑂𑐴𑑂𑐫𑑅𑐣𑐾 𑐕𑐸 𑐢𑐫𑐵𑐧𑐶𑐂, 𑐟𑑅𑐢𑑄𑐐𑐸 𑐳𑐵𑐩𑑂𑐬𑐵𑐖𑑂𑐫 𑐟𑑂𑐫𑐵𑐎𑐵 𑐠𑐾𑑄 𑐨𑐸𑐫𑐸 𑐣𑑂𑐴𑐵𑐫𑑂 𑐢𑐳𑑂𑐰𑐵𑐎𑐵𑑅 𑐣𑑂𑐴𑐶𑐮𑐵𑐔𑑂𑐰𑐣𑐷 𑐎𑐵, 𑐔𑑂𑐰𑑅 𑐣𑐶 𑐥𑑂𑐰𑑅 𑑋 𑐠𑐸𑐐𑐸 𑐕𑐸𑑄 𑐩𑐏𑐸, 𑐳𑐸𑐣𑐵𑑄 𑐣𑑄 𑐩𑐴𑐵𑐬𑐵𑐣𑐷 𑐖𑐸𑐂 𑐣𑑂𑐴𑑂𑐫𑐵𑐮𑐵 𑐢𑐎𑐵𑑅 𑐣𑑂𑐫𑑄𑐳𑐵 𑐖𑐶𑐩𑐶 𑐩𑐵𑑄𑐫𑐵𑐎𑐾 𑐕𑐎𑑅 𑐣𑐶 𑐣𑑂𑐫𑐣𑐾 𑐟𑐎𑑄 𑐢𑐵𑐂 𑐩𑐏𑐸 𑐖𑐸𑐂 𑑋

𑐏𑑅 𑐎𑐵 𑑋 𑐩𑑂𑐴𑐐𑐳 𑐳𑐎𑐳𑑂𑐫𑐵𑑄 𑐡𑐂, 𑐥𑐹𑐰𑑄𑐎𑐾 𑐣𑑄 𑐩𑐵𑐳𑑂𑐟𑐶𑐰𑐂, 𑐥𑐹𑐰𑑄𑐎𑐾 𑐣𑑄 𑐩𑐵𑑅 𑑋 𑐥𑐹𑐰𑑄𑐎𑐵𑐔𑑂𑐰𑑄𑐥𑐶𑑄 𑐣𑑄 𑐡𑐸 𑐣𑐶 𑑋 𑐖𑐷𑐰𑐣 𑐢𑐂𑐐𑐸 𑐠𑑂𑐰 𑐴𑐾 𑐮𑐵 𑐏𑑅 𑑋 𑐨𑐵𑑅𑐟 𑐢𑐎𑐵𑑅 𑐠𑑅 𑐣𑐵𑐮𑐵𑑅 𑐰𑐫𑐾𑐢𑐸𑑄𑐎𑐵𑑅 𑐣𑐶𑐩𑑂𑐴𑐟𑑂𑐫𑐥𑐹𑐫𑐵 𑐣𑑂𑐴𑐹𑐣𑑂𑐴𑐹𑐐𑐸 𑐩𑑂𑐴𑐐𑐳 𑐡𑐂 𑑋 𑐠𑑂𑐰 𑐴𑐾 𑐩𑑂𑐴𑐐𑐳 𑐥𑐹𑐰𑑄𑐎𑐾𑐟 𑐠𑑅𑐐𑐸 𑐟𑐵𑐮𑑄 𑐂𑐴𑐶𑐥𑐵 𑐖𑐷𑐰𑐣 𑐣𑑂𑐴𑑂𑐫𑐵𑐎𑐵𑐔𑑂𑐰𑐣𑐷 𑑋 𑐟𑐬 𑐕𑐵𑐫𑑂 𑐏𑑅 𑐩𑐳𑑂𑐫𑐹 𑐠𑑅𑐐𑐸 𑐩𑑂𑐴𑐐𑐳 𑐀𑐮𑐾 𑐖𑐷𑐰𑐣 𑐩𑑂𑐰𑐵𑐫𑐾𑐐𑐸 𑐗𑑂𑐰𑐮𑐫𑑂 𑐩𑐾𑐥𑐶𑐣𑐶𑐐𑐸 𑐨𑐵𑐰𑐣𑐵𑐫𑐵 𑐔𑑂𑐫𑐹𑐟𑐵𑑅 𑐰 𑐳𑐩𑑂𑐩𑐵𑐣 𑐫𑐵𑐫𑐾𑐐𑐸 𑐏𑑃𑐫𑑂 𑐩𑐣𑐹𑐟 𑐎𑐣𑑂𑐖𑐸𑐳 𑐖𑐸𑐂 𑑋 𑐧𑑂𑐫𑐵𑐴𑐵 𑐫𑐵𑐣𑐵𑑅 𑐨𑐵𑑅𑐟𑐫𑐵 𑐕𑐾𑑃𑐫𑑂 𑐰𑐫𑐾𑐢𑐸𑑄𑐳𑐾𑐮𑐶 𑐨𑐵𑑅𑐟 𑐕𑐩𑑂𑐴 𑐖𑐎 𑐠𑑅 𑐖𑐸𑐂𑐐𑐸 𑐮𑐵 𑐥𑐎𑑂𑐎𑐵𑑄 𑐴𑐾 𑐏𑐂𑐩𑐏𑐸 𑑋

𑐐𑐠𑐾 𑐩𑐠𑐸𑐐𑐸 𑐂𑐴𑐶𑐥𑐵 𑐎𑐮𑐵𑑅 𑐨𑐵𑑅𑐟𑐫𑐵 𑐡𑐠𑐸𑐫𑐵 𑐖𑐎 𑐳𑑂𑐰𑐵𑐥𑐸 𑐩𑐏𑐸, 𑐣𑐶𑐐𑐹 𑐥𑐬𑐶𑐰𑐵𑐬 𑐰𑐵 𑐢𑐵𑐫𑐾, 𑐰 𑐳𑐶𑐧𑐾𑑄 𑐣𑑄 𑐀𑐥𑑂𑐰 𑐠𑑅𑐠𑐶𑐟𑐶 𑐣𑐵𑐥𑐫𑐵 𑐳𑑂𑐰𑐵𑐥𑐹𑐫𑐵 𑐢𑐬𑑀𑐴𑐬 𑐏𑑅 𑐢𑐎𑐵𑑅 𑑋 𑐴𑐵𑐣𑑄 𑐩𑐳𑑂𑐫𑐹, 𑐩𑐠𑐹 𑐐𑐠𑐾 𑐢𑐵𑐫𑐾 ? 𑐠𑑅𑐕𑐾𑑃𑐫𑑂 𑐟𑐟𑐵𑐖𑐸 𑐰𑐵 𑐨𑑁𑐥𑐶𑐣𑑂𑐳 𑐠𑑅 𑐩𑐵𑑄𑐫𑐵𑐟 𑐰𑐵 𑐥𑐬𑐶𑐰𑐵𑐬𑐫𑐵𑐟 𑐕𑐸𑑄 𑐢𑐵𑑅𑐳𑐵 𑐰𑐵 𑐳𑐩𑑂𑐩𑐵𑐣𑐫𑑂 𑐎𑐩𑐶 𑐫𑐵𑑅𑐳𑐵 𑐩𑐫𑑅 𑑋 𑐟𑐬 𑐰 𑐴𑐾 𑐰𑑂𑐫𑐰𑐴𑐵𑐬 𑐠𑐩𑑂𑐴𑑄 𑐠𑑅 𑐨𑐵𑑅𑐟𑐫𑐵 𑐕𑐾𑑃𑐫𑑂 𑐫𑐵𑐫𑐾𑐧𑐮𑐾 𑐐𑐸𑐮𑐶 𑐣𑑂𑐴𑑂𑐫𑐵𑐂𑐥𑐸 𑐟𑐵𑐫𑐾𑐎𑐷 𑑋 𑐠𑑅 𑐣𑑄 𑐩𑐶𑐳𑐵, 𑐄𑐥𑐶𑑄 𑐣𑑄 𑐩𑐶𑐳𑑂𑐟 𑑋 𑐀𑐠𑐾 𑐴𑐾 𑐩𑐏𑐸 𑐮𑐵 𑐫𑑅 𑐩𑐫𑑅 𑐢𑐂𑐐𑐸 𑑋 𑐐𑐸𑐮𑐶 𑐫𑐵𑐄𑑃𑐎 𑐧𑐶𑐔𑐵𑑅 𑐩𑐹 𑐥𑐸𑐮𑐾𑐦𑐸𑐐𑐸 𑑋

𑐢𑐵𑑅𑐳𑐵 𑐢𑐵𑐮 𑐢𑐵𑐂 𑑋 𑐠𑑁𑑄𑐎𑐣𑑂𑐴𑐾𑐫𑐵 𑐩𑐣𑐹𑐟 𑐱𑐶𑐎𑑂𑐲𑐶𑐟 𑐳𑑅𑐳𑑂𑐫𑐹𑐥𑐶𑑄 𑐢𑐵𑐂 𑐟𑐬 𑐐𑑂𑐰, 𑐧𑐸𑐡𑑂𑐢𑐶 𑐢𑐵𑑅𑐳𑐵 𑐟𑑂𑐰𑐵𑐣𑐵𑐮𑐫𑑂 𑐟𑐎𑑂𑐫𑐣𑐵 𑐔𑑂𑐰𑐣 𑐠𑐾𑑄 𑐔𑑂𑐰𑑄 𑑋 𑐧𑐵𑑄𑐮𑐵𑐎 𑐠𑑂𑐫𑐣𑐾𑐩𑐵𑑅𑐠𑐵𑐫𑑂 𑐠𑑂𑐫𑑄𑐐𑐸 𑐩𑐟𑐵𑑅 𑑋 𑐣𑑂𑐴𑐵𑐥𑐵 𑐩𑐣𑐹𑐟 𑐎𑐩 𑐱𑐶𑐎𑑂𑐲𑐶𑐟, 𑐟𑐬 𑐰𑑂𑐫𑐰𑐴𑐵𑐬𑐫𑑂 𑐥𑐬𑐶𑐥𑐎𑑂𑐰𑐟𑐵 𑐡𑐸 𑑋 𑐳𑑄𑐳𑑂𑐎𑐵𑐬 𑐰 𑐴𑐣𑐵𑐧𑐣𑐵, 𑐟𑐖𑐶𑐮𑐖𑐶𑐫𑐵 𑐖𑑂𑐘𑐵𑑄 𑐐𑐵𑐎𑑂𑐎𑑄 𑐡𑐸 𑑋 𑐳𑐎𑐮𑐾𑑄 𑐕𑐾𑑃 𑐖𑑅𑐥𑐶𑑄 𑐕𑐐𑐹 𑐴𑐾 𑐥𑐬𑐶𑐰𑐵𑐬 𑐖𑐸𑐫𑐵𑑅 𑐔𑑂𑐰𑐣𑐷𑐐𑐸 𑑋  𑐩𑐶𑐳𑑂𑐟 𑐳𑐎𑐮𑐾𑑄 𑐕𑐠𑐵𑐳𑑄 𑐔𑑂𑐰𑐣𑐵𑑅 𑐩𑐶𑐮𑐾 𑐖𑐸𑐫𑐵 𑐖𑑂𑐫𑐵 𑐫𑐵𑐂 𑐳𑐵 𑐩𑐶𑐖𑑄𑐟 𑐦𑐸𑐎𑑂𑐎𑑄 𑐗𑐷 𑐢𑐂𑐐𑐸 𑐨𑐵𑐰𑐣𑐵 𑐟𑐫𑐵𑑅 𑐧𑐵𑐖𑑂𑐫𑐵𑐥𑐶𑐣𑐶 𑐖𑑂𑐫𑐵𑐫𑐵𑐟 𑐴𑐾 𑐥𑐸𑐬𑑂𑐏𑐵𑐫𑐵 𑐖𑑂𑐫𑐵 𑐢𑐎𑐵𑑅 𑐥𑐮𑐵𑑅 𑐣𑑂𑐴𑑂𑐫𑐵𑐎𑐷 𑑋 𑐁𑑅𑐫𑐵𑐥𑐶𑑄 𑐐𑐵𑐎𑑂𑐎𑑄 𑐱𑐶𑐎𑑂𑐲𑐶𑐟 𑐟𑐬 𑐰𑑂𑐫𑐵𑐰𑐴𑐵𑐬𑐶𑐎𑐟𑐵𑐫𑑂 𑐱𑐹𑐣𑑂𑐫 𑑋 𑐣𑑂𑐴𑐵𑐥𑐵𑑄 𑐗𑐷 𑐢𑐂𑐐𑐸 𑐏𑑃𑐐𑑂𑐰𑑅 𑐗𑑂𑐫𑐵𑐟𑐸, 𑐁𑑅 𑐖𑐶 𑐢𑐂𑐐𑐸 𑐏𑑃𑐐𑑂𑐰𑐮𑑄 𑐠𑑅𑐟 𑐟𑑂𑐫𑐫𑐾𑐎𑐵 𑐔𑑂𑐰𑐣𑐾𑐢𑐸𑑄𑐎𑐮 𑑋 𑐳𑐸𑐫𑐵𑐟 𑐡𑑀𑐲 ? 𑐠𑐠𑐾 𑐕𑐵𑐫𑑂 𑐖𑐸𑐮 ? 𑐣 𑐗𑐷 𑐳𑑂𑐰𑐫𑐵𑑅 𑐣𑑂𑐴𑐵𑐥𑐵𑐫𑐵 𑐥𑐸𑐳𑑂𑐟𑐵𑑄 𑐴𑐾 𑐗𑐷𑐟 𑐕𑐸𑑄 𑐧𑐶𑐂 𑐮𑑂𑐰𑑅𑐩𑑄𑐎𑐵 𑐰𑐣 𑐮𑐵 ? 𑐠𑐸𑐎𑐶𑐫𑐵 𑐡𑐸𑐣𑐾 𑐳𑐸𑐮𑐵𑐔𑑂𑐰𑑄𑐐𑐸 𑐩𑐹 𑐎𑐵𑐬𑐞 𑐠𑐸𑐂𑐎𑐾𑐟 𑐳𑑂𑐰𑐳𑑂𑐰𑑄 𑐖𑐶 𑐴𑐶𑐩𑐷 𑐔𑐵𑐂, 𑐖𑐶 𑐠𑑅 𑐴𑐾 𑐳𑑂𑐰, 𑐁𑐢𑐸𑐣𑐶𑐎 𑐢𑐫𑐵𑐟𑑅𑐐𑐸 𑐳𑐩𑐵𑐖𑐫𑑂 𑐩𑐣𑑂𑐴𑑂𑐫𑐣𑐵𑐰𑐣𑐷 𑑋

𑐐𑐸𑐮𑐶 𑐩𑐣𑐹 𑐄𑐮𑐶 𑐧𑐶𑐔𑐵𑐬𑐫𑐵 𑐢𑐵𑐬 𑐣𑑄 𑐦𑐬𑐎 𑐖𑐸𑐂𑐐𑐸 𑑋 𑐕𑐩𑑂𑐴𑐾𑐳𑐶𑐫𑐵 𑐧𑐶𑐔𑐵𑑅 𑐠𑐾𑑄 𑐩𑐾𑐩𑑂𑐴𑐳𑐶𑐐𑐸 𑐧𑐶𑐔𑐵𑑅 𑐖𑑂𑐰𑑅 𑐮𑐵𑐂𑐩𑐏𑐸 𑑋 𑐮𑐵𑐫𑐾𑐩𑐵𑑅 𑐢𑐂𑐐𑐸 𑐣𑑄 𑐩𑐡𑐸 𑑋 𑐟𑐬 𑐕𑐟𑐵 𑐏𑑃 𑐕𑐸 𑐏𑑅 𑐢𑐵𑑅𑐳𑐵 𑐰𑐶𑐔𑐵𑐬𑐫𑐵 𑐟𑐵𑐮𑐩𑐾𑐮 𑐩𑐖𑐸𑐮 𑐎𑐶 𑐴𑐾 𑐕𑐾𑑃 𑐨𑐹 𑐧𑐵𑐂𑐐𑐸 𑐏𑑅 𑑋 𑐩𑐣𑐹𑐟𑐫𑑂 𑐮𑑂𑐰𑑅𑐩𑐣𑐷𑐐𑐸 𑐏𑑅 𑐰𑐵 𑐩𑐳𑑂𑐫𑐹 𑐥𑐴𑑅 𑐫𑐵𑐂𑐐𑐸 𑐏𑑅 𑐰 𑐖𑐶𑑄 𑐠𑐸𑐂𑐎𑐾 𑐩𑐦𑐸 𑑋 𑐣𑑂𑐴𑑂𑐫𑐫𑐾𑐩𑐦𑐸𑐐𑐸 𑐣𑑃𑐫𑐵 𑐧𑐖𑐶 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑐕𑐾𑑃𑐏𑐵 𑐥𑐟𑐶𑐎𑑂𑐎𑑄 𑐧𑑂𑐰𑐮𑐣𑐵𑐔𑑂𑐰𑑄𑐐𑐸 𑐩𑐵𑐖𑐸 𑐰 𑐨𑑁𑐫𑐵 𑐡𑐠𑐸𑐂, 𑐩𑐵𑑄 𑐎𑐵𑐫𑑂 𑐡𑐠𑐸𑐂, 𑐡𑐵𑐖𑐸 𑐎𑐶𑐖𑐵𑐫𑐵 𑐡𑐠𑐸𑐫𑐵 𑐩𑐵𑐠𑑄 𑐩𑐰𑑄𑐐𑐸 𑐳𑑂𑐰𑐵𑐥𑐹 𑑋 𑐳𑑂𑐰𑐵𑐥𑐹 𑐩𑐵𑐠𑑄 𑐩𑐰𑐣 𑐎𑐶 𑐐𑐣 𑐳𑐩𑐵𑐖 𑐩𑐵𑐠𑑄 𑐰𑐣𑐷, 𑐀𑐮𑐾 𑐳𑐩𑐵𑐖 𑐩𑐵𑐠𑑄 𑐩𑐰𑐣 𑐎𑐶 𑐐𑐣 𑐡𑐾𑐫𑑂 𑐩𑐵𑐠𑑄 𑐰𑐣𑐷 𑑋

NepalBhasa

𑐣𑐾𑐰𑐵 -𑐩𑐵𑑄 𑐨𑐵𑐫𑑂