–𑐰𑐶𑐣𑐫 𑐬𑐵𑐖𑑀𑐥𑐵𑐢𑑂𑐫𑐵𑐫

– 𑐬𑐾𑐬𑐰𑐵 / 𑐊𑐦.𑐊𑐩. 𑐔𑐵𑐫𑐾𑐎𑐵𑑅 𑐟𑑅𑐐𑐸𑐩𑐕𑐶 𑐳𑑂𑐚𑐾𑐱𑐣 𑐴𑐵𑐫𑐾𑐎𑐵, 𑐐𑐣𑑄 𑐣 𑐠𑑅𑐐𑐸 𑐨𑐵𑐫𑑂𑐫𑐵 𑐖𑑂𑐫𑐵𑐗𑑂𑐰𑑅𑐟 𑐠𑑂𑐰𑐫𑐵𑐔𑑂𑐰𑑄𑐐𑐸 𑐖𑐶𑑄 𑐟𑐵𑐫𑐾𑐎𑐾 𑐩𑐦𑐸 𑑋

– 𑐚𑐶𑐨𑐷 𑐔𑐵𑐫𑐾𑐎𑐵, 𑐔𑑂𑐫𑐵𑐣𑐮𑐟 𑐴𑐶𑐮𑐵𑑅 𑐴𑐶𑐮𑐵𑑅 𑐳𑑂𑐰𑐫𑐵𑑄 𑐀𑐣 𑐣𑑄 𑐐𑐣𑑄 𑐠𑑅𑐐𑐸 𑐨𑐵𑐫𑑂𑐫𑐵 𑐖𑑂𑐫𑐵𑐗𑑂𑐰𑑅𑐟 𑐰𑐫𑐵𑐔𑑂𑐰𑑄𑐐𑐸 𑐖𑐶𑑄 𑐏𑑄𑐎𑐾 𑐩𑐦𑐸 𑑋

𑐧𑐬𑐸 𑐧𑐶𑐡𑐾𑐱𑐷 𑐨𑐵𑐫𑑂 𑐴𑐶𑐣𑑂𑐡𑐷 𑐨𑐵𑐫𑑂𑐫𑐵 𑐫𑐎𑑂𑐰𑑅 𑐴𑐾 𑐖𑑂𑐫𑐵𑐗𑑂𑐰𑑅÷𑐳𑑄𑐎𑐶𑐥𑐵𑑅÷𑐩𑑂𑐫𑐾𑐟 𑐠𑑂𑐰𑐫𑐵𑐔𑑂𑐰𑑄𑐐𑐸 𑐏𑐣𑐵 𑑋 𑐳𑑂𑐰𑐡𑐾𑐱𑐫𑑂 𑐴𑐾 𑐔𑑂𑐰𑐣𑐵 𑐣𑑄, 𑐡𑐾𑐳𑐫𑐵 𑐣𑐸𑐐𑐮𑐫𑑂 𑐔𑑂𑐰𑐣𑐵 𑐣𑑄 𑐠𑐣𑐫𑐵 𑐨𑐵𑐫𑑂 𑐮𑐸𑐂𑐎𑐾 𑐩𑐦𑐸 𑐖𑐶𑑄 𑑋

– 𑐎𑑂𑐫𑐵𑐩𑑂𑐥𑐳 𑐰𑐣𑐵 𑑋 𑐀𑐣 𑐣𑑄 𑐠𑑅𑐐𑐸 𑐨𑐵𑐲𑑄 𑐐𑐸𑐐𑐸𑑄 𑐣 𑐧𑐶𑐲𑐫 𑐧𑑂𑐰𑑄𑐎𑐾𑐐𑐸 𑐩𑐫𑐵𑑅 𑑋

– 𑐳𑑂𑐎𑐸𑐮 𑐰𑐣𑐵 𑑋 𑐀𑐣 𑐣𑑄 𑐠𑑅𑐐𑐸 𑐨𑐵𑐫𑑂𑐫𑐵𑐟 𑐕𑐏𑐾 𑐟𑐫𑐵 𑐩𑐾𑐐𑐸 𑐨𑐵𑐲𑑄 𑐧𑑂𑐰𑑄𑐎𑐾𑐩𑐵𑑅𑐐𑐸 𑐖𑐶𑐐𑐸 𑐧𑐵𑐢𑑂𑐫𑐟𑐵 𑑋

𑐖𑐶𑑄 𑐠𑑅𑐐𑐸 𑐨𑐵𑐲𑑄 𑐏𑑃 𑐮𑑂𑐴𑐵𑐫𑐾 𑐩𑐏𑑄𑐐𑐸 𑐟𑑅𑐣𑑂𑐴𑐸 𑐡𑐫𑐾𑐢𑐸𑑄𑐎𑐮 𑑋 𑐖𑐶𑐟𑑅 𑐠𑑅𑐐𑐸 𑐨𑐵𑐲𑑄 𑐏𑑃 𑐮𑑂𑐴𑐵𑐫𑐾 𑐩𑐵𑐳𑑂𑐟𑐶 𑐰𑑅 𑑋 𑐠𑑅𑐐𑐸 𑐨𑐵𑐲𑑄 𑐣𑑂𑐰𑑅𑐰𑐵𑐫𑐾 𑐩𑐵𑐳𑑂𑐟𑐶 𑐰𑑅 𑑋 𑐖𑐶𑐐𑐸 𑐩𑑂𑐴𑐸𑐟𑐸 𑐠𑑅𑐐𑐸 𑐨𑐵𑐲𑑄 𑐏𑑃 𑐮𑑂𑐴𑐵𑐫𑐾𑐟 𑐟𑐳𑐎𑑄 𑐄𑐮𑐸𑐄𑐮𑐸 𑐩𑐶𑐣𑐵𑐔𑑂𑐰𑐣 𑐟𑐬 𑐠𑑅𑐐 𑐨𑐵𑐲𑑄 𑐏𑑃 𑐮𑑂𑐴𑐵𑐂𑐩𑑂𑐴 𑐖𑐶𑐐𑐸 𑐮𑐶𑐎𑑂𑐎 𑐳𑐸𑑄 𑐩𑐡𑐸 𑑋 𑐖𑐶𑐟𑑅 𑐟𑐳𑐎𑑄 𑐄𑐎𑐸𑐳𑐩𑐸𑐎𑐸𑐳 𑐖𑐸𑐮 𑑋 𑐠𑐧𑑂𑐮𑐾 𑐴𑐾 𑐕𑐎𑑂𑐰𑑅 𑐥𑐵𑐳𑐵 𑐬𑐵𑐩𑐖𑐣𑐩𑑄 𑐢𑐵𑑅𑐐𑐸 𑐮𑐸𑐩𑐣𑐵 𑐰𑐮 𑑋

‘𑐀𑐬𑐾 𑐥𑐵𑐳𑐵 ! 𑐩𑐮𑐵𑐃 𑐣𑐶 𑐧𑐾𑐮𑐵𑐧𑐾𑐮𑐵𑐩𑐵 𑐴𑐵𑑄 𑐫𑐳𑑂𑐟𑐿 𑐨𑐂𑐮𑐶𑐣𑑂𑐕 𑑋 𑐟𑐧 𑐡𑐸𑐂𑐔𑐵𑐬 𑐡𑐶𑐣 𑐧𑐶𑐡𑐵𑐰𑐶𑐡𑐵 𑐮𑐶𑐂 𑐐𑐵𑑃𑐰 𑐐𑐂𑐮𑐶𑐣𑑂𑐕𑐸 𑑋 𑐀𑐣𑐶 𑐁𑐦𑑂𑐣𑑀 𑐨𑐵𑐲𑐵𑐎𑑀 𑐟𑐶𑐬𑑂𑐏𑐵 𑐩𑐾𑐚𑐵𑐃 𑐮𑐶𑐣𑑂𑐕𑐸 𑐴𑐵𑑄 𑑋’

𑐬𑐵𑐩𑐖𑐣𑐩 𑐮𑐵 𑐠𑑅𑐐𑐸 𑐩𑐵𑑄 𑐨𑐵𑐫𑑂𑐫𑐵 𑐥𑑂𑐫𑐵𑑅𑐔𑐵 𑐮𑑄𑐎𑐾𑐟 𑐠𑑅𑐐𑐸 𑐐𑐵𑑄 𑐰𑐣𑐷, 𑐟𑐬 𑐖𑐶 𑐠𑑅𑐐𑐸 𑐨𑐵𑐫𑑂𑐫𑐵 𑐥𑑂𑐫𑐵𑑅𑐔𑐵 𑐮𑑄𑐎𑐾𑐟 𑐐𑐣 𑐰𑐣𑐾𑐐𑐸 ? 𑐖𑐶 𑐧𑐹𑐐𑐸 𑐴𑐾 𑐠𑐣 𑑋 𑐖𑐶 𑐧𑑂𑐰𑐮𑑄𑐐𑐸 𑐴𑐾 𑐠𑐣 𑑋 𑐥𑐸𑐬𑑂𑐏𑑁𑑄𑐣𑐶𑐳𑐾𑑄 𑐠𑐣 𑐴𑐾 𑐔𑑂𑐰𑐣𑐵𑐔𑑂𑐰𑐣𑐵𑐥𑐶𑑄 𑐐𑐣 𑐰𑐣𑐾𑐐𑐸 ? 𑐠𑑂𑐰 𑐥𑑂𑐫𑐵𑑅𑐔𑐵 𑐮𑑄𑐎𑐾𑐟 𑐐𑐣 𑐰𑐣𑐾𑐐𑐸 ? 𑐳𑐸𑐎𑐶𑐮𑐵𑐩𑐸𑐎𑐶𑐮𑐵 𑐱𑐴𑐬𑐷𑐫𑐵 𑐟 𑐔𑑂𑐰𑐣𑐶𑐐𑐸 𑐠𑐵𑐫𑑂 𑐠𑑂𑐰 𑑋 𑐐𑐵𑐩𑑄 𑐰𑑅𑐥𑐶𑑄 𑐣𑐰𑐱𑐴𑐬𑐶𑐫𑐵𑐥𑐵𑐏𑐾𑑄 𑐧𑐮𑐵𑐟𑑂𑐎𑐺𑐟 𑐱𑐴𑐬𑐫𑐵 𑐧𑐵𑐳𑐶𑐣𑑂𑐡𑐵 𑐖𑐶 𑐮𑐵 𑑋 𑐠𑐠𑐾 𑐥𑑂𑐫𑐵𑐔𑐵𑑅 𑐮𑑄𑐎𑐾 𑐠𑐵𑐫𑑂 𑐩𑐡𑐸 𑐖𑐶𑐐𑐸 𑑋 𑐐𑐣 𑐰𑐣𑐾 ? 𑐐𑐣 𑐰𑐣𑐾 ?

𑐧𑐶𑐬𑐎𑑂𑐟 𑐖𑐸𑐫𑐵 𑐦𑐾𑐳𑐧𑐸𑐎 𑐔𑐵𑐫𑐾𑐎𑐵 𑐀𑐣 𑐖𑐎 𑐖𑐹𑐳𑐵𑑄 𑐮𑐸𑐢𑑄𑐎𑐾 𑐢𑐎𑐵𑑅 𑑋 𑐟𑐬 𑐀𑐣 𑐣 𑐠𑑅𑐐𑐸 𑐨𑐵𑐫𑑂 𑐮𑐸𑐂𑐎𑐾 𑐴𑐾 𑐠𑐵𑐎𑐸 𑑋 𑐀𑐮𑐾 𑐠𑑅𑐩𑑂𑐴𑑄 𑐴𑐾 𑐕𑐐𑐹 𑐳𑑂𑐚𑐵𑐚𑐳 𑐔𑑂𑐰𑐫𑐵 𑑋

‘𑐠𑑁𑑄 𑐦𑐾𑐧𑑂𑐬𑐸𑐀𑐬𑐷 𑑒𑑒 𑐟𑐵𑐬𑐶𑐏, 𑐴𑐮𑐶𑑄 𑐩𑐵𑑄𑐨𑐵𑐫𑑂 𑐡𑐶𑐰𑐳𑐫𑐵 𑐮𑐳𑐟𑐵𑐫𑑂 𑐳𑐎𑐮 𑐩𑐵𑑄 𑐨𑐵𑐫𑑂𑐫𑐵𑐟 𑐩𑐟𑐶𑐣𑐵 𑐫𑐵𑐣𑐵𑐡𑐷𑐥𑐶𑐣𑑂𑐟 𑐨𑐶𑑄𑐟𑐸𑐣𑐵 𑑋 𑐩𑐵𑑄 𑐨𑐵𑐫𑑂𑐫𑐵𑐟 𑐩𑐟𑐶𑐣𑐵 𑐫𑐵𑐫𑑂 𑑋 𑐠𑑁𑑄 𑐕𑐣𑑂𑐴𑐸 𑐮𑐵 𑐠𑑅𑐐𑐸 𑐩𑐵𑑄 𑐨𑐵𑐲𑑄 𑐠𑐣 𑐠𑑅𑐐𑐸 𑐣𑐸𑐐𑑅 𑐏𑑃 𑐔𑑂𑐰𑐫𑐵 𑐳𑑂𑐚𑐵𑐚𑐳𑑂 𑐟𑐫𑐵𑐡𑐶𑐳𑑃 𑑋’

𑐔𑑂𑐰𑐫𑐾 𑐳𑐶𑐢𑐫𑐾𑐎𑐵 𑐥𑑀𑐲𑑂𑐚 𑐫𑐵𑐣𑐵 𑑋 𑐥𑑀𑐲𑑂𑐚 𑐫𑐵𑐫𑐾𑐢𑐸𑐣𑐾𑐰𑑄 𑐴𑐾 𑐕𑐩𑑂𑐴 𑐣𑐾𑐰𑐵𑑅 𑐠𑐬 𑐡𑐸𑐩𑑂𑐴 𑐥𑐵𑐳𑐵𑑄 𑐎𑐩𑐾𑐣𑑂𑐚 𑐫𑐵𑐣𑐵𑐴𑐮–
‘𑐎𑐺𑐥𑐫𑐵 𑐣𑐾𑐰𑐵𑐬𑐷 𑐣𑐧𑐸𑐗𑑂𑐣𑐾 𑐴𑐸𑐣𑐵𑐮𑐾 𑐣𑐾𑐥𑐵𑐮𑐷𑐩𑐵 𑐮𑐾𑐏𑑂𑐣𑐸 𑐨𑐊 𑐁𑐨𑐵𑐬𑐷 𑐴𑐸𑐣𑐾 𑐠𑐶𑐊𑑃 𑑋’

𑐰 𑐣𑐾𑐰𑐵𑑅 𑐥𑐵𑐳𑐵𑐫𑐵 𑐎𑐩𑐾𑐣𑑂𑐚 𑐧𑑂𑐰𑐣𑐵𑑅 𑐖𑐶 𑐔𑐶 𑐣𑑄𑐩𑑂𑐴 𑐏𑐵𑑅𑐠𑐾𑑄 𑐨𑐸𑐐𑑂𑐮𑐸𑑄 𑐔𑑂𑐰𑐣𑐵𑐔𑑂𑐰𑐣𑐵 𑑋

𑐔𑐶𑐧𑐵𑐏𑑃