𑐡𑐫𑐵 𑐱𑐵𑐎𑑂𑐫 – 𑐔𑑂𑐰𑐩𑐶 𑐴𑐮𑐶𑑄 𑐣𑐾𑐰𑐵𑑅 𑐡𑐧𑐹𑐫𑐵 𑐳𑑄𑐬𑐎𑑂𑐲𑐎 𑐏𑑅

𑐣𑑂𑐴𑐹𑐐𑐸 𑐳𑑄𑐰𑐶𑐢𑐵𑐣 𑑒𑑐𑑗𑑒 𑐕𑑂𑐫𑐮𑐾𑐢𑐸𑑄𑐎𑐵𑑅 𑐳𑑂𑐠𑐵𑐣𑐷𑐫 𑐟𑐴𑐫𑐵 𑐣𑑂𑐴𑐵𑐥𑐵𑑄𑐐𑐸 𑐣𑐶𑐬𑑂𑐰𑐵𑐔𑐣𑐮𑐶𑐥𑐵 𑐣𑐷𑐳𑑂𑐰𑑄𑐐𑐸 𑐳𑑂𑐠𑐵𑐣𑐷𑐫 𑐳𑐬𑐎𑐵𑐬𑐫𑐵 𑐳𑐎𑑂𑐬𑐶𑐫𑐟𑐵𑐫𑑂 𑐎𑐵.𑐩.𑐥𑐵.𑐫𑐵 𑐣𑑂𑐴𑐹𑐩𑑂𑐴 𑐣𑐵𑐫𑑅𑐨𑐵𑐖𑐸 𑐰𑐶𑐡𑑂𑐫𑐵 𑐳𑐸𑐣𑑂𑐡𑐬 𑐱𑐵𑐎𑑂𑐫𑐫𑐵 𑐣𑐾𑐟𑐺𑐟𑑂𑐰𑐫𑑂 𑐣𑑂𑐴𑐹𑐐𑐸 𑐱𑐶𑐎𑑂𑐲𑐵 𑐥𑑂𑐬𑐞𑐵𑐮𑐷 𑐮𑐵𑐐𑐸 𑐫𑐵𑐎𑐾𑐐𑐸 𑐣𑐶𑐬𑑂𑐞𑐫𑐎𑐠𑑄 𑐳𑑂𑐠𑐵𑐣𑐶𑐫 𑐰𑐶𑐲𑐫 𑐧𑑂𑐰𑑄𑐎𑐾𑐐𑐸 𑐧𑑂𑐫𑐰𑐳𑑂𑐠𑐵 𑐖𑐹𑐐𑐸 𑐔𑑂𑐰𑐕𑐵𑐫𑐾𑐧𑐴𑑅𑐐𑐸 𑐖𑑂𑐫𑐵 𑐏𑑅 𑑋 𑐣𑑂𑐴𑐵𑐥𑐵 𑐳𑑂𑐠𑐵𑐣𑐷𑐫 𑐟𑐴𑐮𑐫𑑂 𑐣𑐾𑐥𑐵𑐮𑐨𑐵𑐲𑐵 𑐕𑑂𑐫𑐮𑐾𑐐𑐸 𑐣𑐶𑐬𑑂𑐞𑐫𑐫𑐵𑐟 𑐳𑐬𑑂𑐰𑑀𑐔𑑂𑐔𑐫𑑂 𑐩𑐸𑐡𑑂𑐡𑐵 𑐟𑑅𑐥𑐶𑑄 𑐣𑑂𑐫𑐵𑐩𑑂𑐴 𑐎𑐥𑐸𑐟 𑐰 𑐎𑐸𑐮𑐵𑑄𑐐𑐵𑐬 𑐳𑐴𑐶𑐟 𑐬𑑀𑐎 𑐟𑑅𑐥𑐶𑑄 𑐣𑑂𑐫𑐵𑐫𑐵𑐢𑐶𑐱𑐥𑐶𑑄𑐟𑑄 𑐣𑑂𑐴𑐵𑐳𑑄 𑐣𑑂𑐴𑐫𑑂𑐎𑐸 𑐮𑑅 𑐟𑑂𑐰𑑄𑐎𑐾 𑐧𑐷𑐎𑐠𑑄 𑐠𑑂𑐰 𑐣𑐶𑐬𑑂𑐞𑐫 𑐕𑐐𑐹 𑐄𑐩𑐶𑐐𑐸 𑐣𑐶𑑄𑐟𑐶𑑄 𑐣𑑂𑐴𑐵𑐫𑑂 𑐟𑑂𑐰𑐵𑑅𑐡𑑅𑐐𑐸 𑐮𑐸 𑐖𑐸𑐂𑐦𑐸 𑑋 𑐎𑐵.𑐩.𑐥𑐵. 𑐮𑐵𑐐𑐵𑐡𑐸𑐣𑐾 𑐡𑐬𑑂𑐟𑐵 𑐖𑐸𑐫𑐵𑐔𑑂𑐰𑑄𑐐𑐸 𑐐𑐸𑐮𑐶 𑐣𑑄 𑐳𑑂𑐎𑐸𑐮, 𑐳𑐬𑐎𑐵𑐬𑐷 𑐧𑐵𑐫𑑂 𑐐𑐿𑐬𑐳𑐬𑐎𑐵𑐬𑐷 𑐳𑑂𑐎𑐸𑐮𑐫𑑂 ‘𑐫𑐾𑑃𑐡𑐾𑐫𑑂 𑐩𑑂𑐴𑐳𑐷𑐎𑐾’ 𑐣𑐵𑐩𑑄 𑐥𑐶𑐴𑐵𑑄 𑐰𑐫𑐵𑐔𑑂𑐰𑑄𑐐𑐸 𑑑–𑑘 𑐟𑐐𑐶𑑄𑐟𑐎𑐫𑐵 𑐳𑐦𑐸 𑐕𑑂𑐫𑐮𑐾𑐩𑐵𑑅 𑐢𑐎𑐵𑑅 𑐮𑐵𑐐𑐸 𑐫𑐵𑐎𑐾 𑐧𑐷𑐐𑐸 𑐀𑐟𑐶𑐎𑑄 𑐔𑑂𑐰𑐕𑐵𑐫𑐾𑐧𑐴𑑅𑐐𑐸 𑐖𑑂𑐫𑐵 𑐏𑑅 𑑋

𑐣𑐾𑐥𑐵𑐮𑐨𑐵𑐲𑐵 𑐣𑑂𑐴𑐣𑐵 𑐰𑐣𑐾𑐟𑑂𑐫𑑄𑐐𑐸 𑐂𑐮𑐫𑑂 𑐳𑑂𑐠𑐵𑐣𑐷𑐫 𑐰𑐶𑐲𑐫 𑐢𑐎𑐵𑑅 𑐟𑑂𑐰𑐴𑑅 𑐟𑐫𑐵𑑅 𑐨𑐵𑐲𑐵 𑐧𑑂𑐰𑑄𑐎𑐾𑐐𑐸 𑐥𑐮𑐵𑑅 𑐁𑐰𑑄𑐮𑐶 𑐳𑐸𑐣𑐵𑐣𑑄 𑐮𑐶𑐎𑐵𑐫𑐾 𑐩𑐦𑐫𑐾𑐎 𑐥𑐬𑐣𑑂𑐟𑐸𑐟𑐎 𑐣𑑂𑐴𑑂𑐫𑐵𑐣𑐵𑐔𑑂𑐰𑐣𑐷 𑐢𑐫𑐵𑐐𑐸 𑐩𑐣𑑄𑐟𑐸𑐣𑐾 𑑋 𑐄𑐐𑐸 𑐃𑐫𑐵 𑐳𑐎𑐮 𑐣𑐐𑐬𑐳𑐨𑐵𑐫𑐵 𑐡𑐸𑐖𑑅𑐥𑐶𑑄 𑐳𑐎𑐮𑐾𑑄 𑐢𑐣𑑂𑐫𑐰𑐵𑐡𑐫𑐵 𑐥𑐵𑐟𑑂𑐬 𑐏𑑅 𑑋 𑐫𑐎𑑂𑐰 𑐫𑐎𑑂𑐰 𑐳𑐸𑐨𑐵𑐫𑑂 𑐧𑐶𑐫𑐵𑑅 𑐰𑐫𑑂𑐎𑑅𑐥𑐶𑐣𑐶𑐐𑐸 𑐣𑐵𑑄 𑐣𑑂𑐴𑑂𑐫𑐵𑐧𑐮𑐾𑑄 𑐰𑐜𑐵𑐰𑐵𑐳𑐶𑐥𑐶𑑄𑐳𑑄 𑐮𑐸𑐩𑑄𑐎𑐵 𑐔𑑂𑐰𑐣𑐾𑐩𑐵𑑅 𑑋

𑐠𑐸𑐐𑐸 𑐔𑑂𑐰𑐳𑐸𑐫𑐵 𑐩𑐹 𑐁𑐖𑑂𑐖𑐸 𑐢𑐫𑐵𑐐𑐸 ‘𑐫𑐾𑑃𑐡𑐾𑐫𑑂 𑐩𑑂𑐴𑐳𑐷𑐎𑐾’ 𑑑 – 𑑘 𑐟𑐐𑐶𑑄 𑐟𑐎𑐫𑐵 𑐳𑐥𑐹m 𑐡𑐸𑐰𑐵𑐮𑐵𑑅 𑐠𑑅𑐐𑐸 𑐣𑐸𑐐𑑅𑐏𑑃 𑐥𑑂𑐰𑑄𑐎𑐾𑐐𑐸 𑐏𑑅 𑑋 𑐠𑐸𑐐𑐸 𑐔𑑂𑐫𑐵𑐐𑐸𑐮𑐶𑑄 𑐳𑐥𑐹m 𑐐𑐸𑐐𑐮 𑐚𑑂𑐬𑐵𑐣𑑂𑐳𑑂𑐮𑐾𑐱𑐣 𑐥𑐸𑐔𑑅𑐫𑐵 𑐳𑑂𑐫𑐮𑑂𑐮𑐵𑑅𑐩𑑂𑐴 𑐡𑐸𑐖𑑅 𑐥𑐵𑐳𑐵 𑐰𑐶𑐡𑑂𑐫𑐵 𑐡𑐮𑐶𑐥𑐵𑐏𑐾𑑄 𑐖𑐶𑐐𑐸 𑐮𑑂𑐴𑐵𑐟𑐷 𑐮𑐵𑑅𑐐𑐸 𑐏𑑅 𑑋 𑐰𑐫𑑂𑐎𑑅𑐫𑐵𑐟 𑐫𑐎𑑂𑐰 𑐫𑐎𑑂𑐰 𑐳𑐸𑐨𑐵𑐫𑑂 𑑋 𑐐𑐸𑐐𑐮 𑐚𑑂𑐬𑐵𑐣𑑂𑐳𑑂𑐮𑐾𑐱𑐣 𑐥𑐸𑐔𑑅𑐫𑐵 𑐳𑐎𑐮 𑐥𑐵𑐳𑐵𑐥𑐶𑑄 𑐁𑐮𑐸𑐥𑐵𑐮𑐸 𑐣𑐳𑐵𑐕𑐾𑑃𑐫𑑂 𑐍𑐥𑐔𑐵𑐬𑐶𑐎 𑐖𑑂𑐫𑐵𑐗𑑂𑐰𑑅 𑐫𑐵𑐣𑐵𑑅 𑐮𑑅𑐮𑑂𑐴𑐵𑐣𑐵𑐡𑐷𑐐𑐸𑐮𑐶𑑄 𑐄𑐐𑐸 𑐥𑐸𑐔𑐮𑐫𑑂 𑐧𑑂𑐰𑐟𑐶 𑐎𑐫𑐵𑐡𑐷𑐥𑐶𑑄 𑐰𑐶𑐐𑐾𑐣 𑐟𑐸𑐮𑐵𑐢𑐬, 𑐥𑑁𑐨𑐵𑑅 𑐳𑐵𑐫𑑂𑐩𑐶, 𑐳𑐸𑐬𑐾𑐣𑑂𑐡𑑂𑐬𑐨𑐎𑑂𑐟 𑐱𑑂𑐬𑐾𑐲𑑂𑐛, 𑐣𑐷𑐟𑐸 𑐜𑑄𑐐𑑀𑐮, 𑐮𑐸𑐩𑐸 𑐱𑑂𑐬𑐾𑐲𑑂𑐛 𑐰 𑐰𑐶𑐡𑑂𑐫𑐵 𑐡𑐮𑐶𑐥𑐶𑑄𑐟 𑐁𑐥𑐵𑐮𑑄 𑐳𑐸𑐨𑐵𑐫𑑂 𑐧𑐶𑐫𑐵𑐔𑑂𑐰𑐣𑐵 𑑋 𑐰𑐫𑑂𑐎𑑅𑐥𑐶𑐣𑐶𑐐𑐸 𑐱𑑂𑐬𑐡𑑂𑐢𑐵𑑄 𑐨𑐫𑑂𑐧𑑂𑐫𑐹𑐐𑐸 𑐖𑑂𑐫𑐵𑐗𑑂𑐰𑑅 𑐣𑑂𑐴𑑂𑐫𑐵𑐧𑐮𑐾𑑄 𑐮𑐸𑐩𑑄𑐎𑐵𑐔𑑂𑐰𑐣𑐾 𑑋 𑐰𑐫𑑂𑐎𑑅𑐥𑐶𑐣𑐶𑐐𑐸 𑐨𑐵𑐲𑐵, 𑐳𑐵𑐴𑐶𑐟𑑂𑐫, 𑐳𑑄𑐳𑑂𑐎𑐺𑐟𑐶 𑐣𑐵𑐥𑑄 𑐣𑐾𑐰𑐵𑑅 𑐩𑑂𑐴𑐳𑐷𑐎𑐵𑐫𑐵𑐟 𑐐𑐠𑐾 𑐫𑐵𑐣𑐵𑑅 𑐮𑑂𑐫𑑄𑐎𑐵𑐟𑐫𑐾 𑐢𑐫𑐵𑐐𑐸 𑐡𑐸𑐐𑑂𑐫𑑄𑐐𑐸 𑐩𑐟𑐶𑐣𑐵 𑐐𑐸𑐧𑐮𑐾𑑄 𑐳𑐸𑐥𑐵𑑅 𑐩𑐰𑐣𑐾𑐩𑐵 𑑋 𑐀𑐮𑐾 𑐣𑑂𑐴𑐹𑐥𑐸𑐳𑑂𑐟𑐵𑐥𑐶𑑄𑐟 𑐣𑑄 𑐐𑑂𑐰𑐵𑐎𑐵 𑐫𑑄𑐎𑐾𑐐𑐸 𑐖𑑂𑐫𑐵𑐫𑑂 𑐧𑑅 𑐧𑐶𑐫𑐵𑐔𑑂𑐰𑐣𑐾 𑐦𑐫𑐾𑐩𑐵 𑑋

𑐦𑐸𑐎𑑂𑐎𑑄 𑐳𑐦𑐸 𑐳𑐬𑐳𑐬𑐟𑐶 𑐳𑑂𑐰𑐫𑐵𑐧𑐮𑐫𑑂 𑐳𑐦𑐸 𑐟𑐫𑐵𑐬 𑐫𑐵𑐫𑐾𑐟 𑐕𑐩𑑂𑐴 𑐧𑑂𑐫𑐎𑑂𑐟𑐶 𑐩𑐏𑐸, 𑐥𑐸𑐔𑑅 𑐴𑐾 𑐡𑐸𑐐𑐸 𑐖𑐸𑐫𑐵𑐔𑑂𑐰𑐣 𑑋 𑐰𑐫𑑂𑐎𑑅𑐥𑐶𑑄 𑐏𑑅– 𑐬𑐵𑐩𑐥𑑂𑐬𑐳𑐵𑐡 𑐳𑐸𑐰𑐾𑐡𑐷, 𑐟𑐵𑐬𑐵𑐥𑐟𑐶 𑐏𑐬𑐾𑐮, 𑐩𑑀𑐟𑐶𑐬𑐵𑐖 𑐏𑐣𑐵𑐮, 𑐰𑐬𑐸𑐞𑐥𑑂𑐬𑐳𑐵𑐡 𑐱𑑂𑐬𑐾𑐲𑑂𑐛, 𑐥𑑂𑐬𑐵. 𑐜𑐵. 𑐔𑐸𑐣𑑂𑐡𑐵 𑐧𑐖𑑂𑐬𑐵𑐔𑐵𑐬𑑂𑐫, 𑐥𑑂𑐬𑐵. 𑐩𑐡𑐣𑐬𑐟𑑂𑐣 𑐩𑐵𑐣𑐣𑑂𑐢𑐬, 𑐳.𑐥𑑂𑐬𑐵. 𑐥𑐸𑐲𑑂𑐥 𑐣𑐵𑐬𑐵𑐫𑐞 𑐩𑐵𑐣𑐣𑑂𑐢𑐬, 𑐣𑐣𑑂𑐡𑐎𑐵𑐖𑐷 𑐱𑑂𑐬𑐾𑐲𑑂𑐛, 𑐎𑐵𑐫 𑐧𑐴𑐵𑐡𑐸𑐬 𑐣𑐾𑐥𑐵𑐮𑐷, 𑐬𑐵𑐎𑐾𑐱 𑐱𑑂𑐬𑐾𑐲𑑂𑐛, 𑐳𑐣 𑐳𑐵𑐫𑑂𑐩𑐶, 𑐳𑐶𑐮𑑂𑐨𑐵 𑐥𑑂𑐬𑐢𑐵𑐣, 𑐳𑐸𑐣𑐶𑐟𑐵 𑐩𑐵𑐣𑐣𑑂𑐢𑐬, 𑐳𑐬𑐳𑑂𑐰𑐟𑐷 𑐟𑐸𑐮𑐵𑐢𑐬, 𑐳𑐺𑐖𑐣𑐵 𑐱𑐵𑐎𑑂𑐫𑐫𑐵 𑐣𑐵𑐥𑐣𑐵𑐥𑑄 𑐳𑐸𑐬𑐾𑐱 𑐎𑐶𑐬𑐞, 𑐀𑐬𑑂𑐰𑐶𑐣𑑂𑐡𑑂𑐬𑐩𑐵𑐣 𑐳𑐶𑑄𑐴, 𑐊𑐎𑐵𑐬𑐵𑐩 𑐳𑐶𑑄, 𑐬𑐾𑐏𑐵 𑐱𑐵𑐎𑑂𑐫 𑐰 𑐬𑐾𑐏𑐵𑐡𑐾𑐰𑐷 𑐱𑑂𑐬𑐾𑐲𑑂𑐛𑐥𑐶𑐣𑐶𑐐𑐸 𑐀𑐮𑐾 𑐮𑐶𑐥𑐵𑑄𑐐𑐸 𑐟𑐐𑐶𑑄𑐫𑐵 𑐳𑐦𑐸𑐟𑐷 𑐐𑐸𑐴𑑂𑐫𑐾𑐱𑑂𑐰𑐬𑐷 𑐱𑑂𑐬𑐾𑐲𑑂𑐛𑐥𑐶𑐣𑐶𑐐𑐸 𑐣𑑄 𑐐𑑂𑐰𑐵𑐴𑐵𑐮𑐶 𑐡𑐸𑐐𑐸 𑐖𑐸𑐫𑐵𑐔𑑂𑐰𑐣 𑑋 𑐰𑐫𑑂𑐎𑑅𑐥𑐶𑑄 𑐳𑐎𑐳𑐶𑐣𑑄 𑐠𑑅𑐠𑑅𑐐𑐸 𑐠𑐵𑐳𑑄 𑐧𑐶𑐫𑐵𑐡𑐷𑐐𑐸 𑐴𑑅𑐥𑐵𑐮𑑄 𑐴𑐾 𑐠𑐸𑐐𑐸 𑐳𑐦𑐸 𑐥𑐶𑐡𑑄𑐐𑐸 𑐏𑑅 𑐢𑐫𑐵𑐐𑐸 𑐏𑑃 𑐗𑐷𑐳𑑄 𑐮𑐸𑐩𑑄𑐎𑐾 𑐩𑐵𑑅 𑑋 𑐰𑐫𑑂𑐎𑑅𑐥𑐶𑑄 𑐳𑐎𑐮𑐾𑑄 𑐳𑐸𑐨𑐵𑐫𑑂𑐫𑐵 𑐥𑐵𑐟𑑂𑐬 𑐨𑐵𑑅𑐥𑐶𑐫𑐵 𑐔𑑂𑐰𑐣𑐵 𑑋 𑐳𑑂𑐠𑐵𑐣𑐷𑐫 𑐰𑐶𑐲𑐫𑐫𑐵 𑐣𑐵𑐩𑑄 𑐣𑐾𑐥𑐵𑐮𑐨𑐵𑐲𑐵 𑐧𑑂𑐰𑑄𑐎𑐾𑐐𑐸 𑐥𑐮𑐵𑑅 𑐮𑑂𑐴𑑂𑐰𑐣𑐵𑐡𑐷𑐥𑐶𑐣𑐶𑐐𑐸 𑐣𑐵𑑄 𑐣𑑂𑐴𑑂𑐫𑐵𑐧𑐮𑐾𑑄 𑐮𑐸𑐩𑑄𑐎𑐵 𑐔𑑂𑐰𑐣𑐾𑐩𑐵𑑅 𑑋

𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑑄 𑐴𑐾 𑐳𑐬𑑂𑐰𑐵𑐢𑐶𑐎𑐵𑐬 𑐎𑐫𑐵𑑅 𑐥𑐶𑐠𑑄𑐐𑐸 𑐳𑐥𑐹m𑐫𑐵 𑐎𑐥𑐶𑐬𑐵𑐂𑐚𑐫𑐵 𑐀𑐣𑐸𑐩𑐟𑐶 𑐩𑐎𑐵𑐳𑐾 𑐴𑐵𑐣𑑄 𑐥𑐶𑐠𑐣𑐾 𑐩𑐖𑑂𑐫𑐹𑐐𑐸 𑐳𑐸𑐔𑑄 𑐧𑐶𑐫𑐵𑐟𑑅𑐐𑐸𑐮𑐶𑑄 𑐧𑐖𑐵𑐬𑐫𑑂 𑐩𑐵𑑅𑐎𑐠𑑄 𑐎𑑂𑐲𑐟𑐶𑐥𑐹𑐬𑑂𑐟𑐶 𑐫𑐵𑐫𑐾 𑐩𑐦𑐟𑐎𑐶 𑐣𑐎𑑂𑐎𑐮 𑐥𑐶𑐎𑐵𑐫𑐾 𑐩𑐡𑐫𑐾𑐩𑐵 𑐢𑐎𑐵𑑅 𑐫𑐵𑑅𑐐𑐸 𑐡𑐸𑐐𑑂𑐫𑑄𑐐𑐸 𑐧𑐶𑐔𑐵𑑅𑐫𑐵 𑐮𑐶𑐔𑑂𑐰𑑅 𑐏𑑅 𑑋 𑐣𑑂𑐴𑐹𑐐𑐸 𑐱𑐶𑐎𑑂𑐲𑐵 𑐣𑐷𑐟𑐶𑐎𑐠𑑄 𑐠𑑂𑐰 𑐳𑐥𑐹m𑐫𑐵 𑐟𑐐𑐶𑑄 𑑑–𑑘 𑐟𑐎 𑐖𑐎 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑐵 𑐀𑐢𑐶𑐣𑐫𑑂 𑐡𑐸𑐐𑐸 𑐀𑐢𑐶𑐎𑐵𑐬 𑐕𑑂𑐫𑐮𑐵𑑅 𑐮𑐵𑐐𑐸 𑐫𑐵𑑅𑐐𑐸 𑐖𑐸𑐫𑐵𑐔𑑂𑐰𑐣 𑑋 𑐠𑑂𑐰𑐫𑐵𑑄 𑐔𑑂𑐰𑐫𑑂𑐫𑐵 𑐟𑐐𑐶𑐩𑐫𑑂 𑐣𑑄 𑐕𑑂𑐫𑐮𑐾𑐐𑐸 𑐣𑐶𑑄𑐟𑐶𑑄 𑐥𑐴𑐮 𑐫𑐵𑐂𑐥𑐶𑑄 𑐕𑐠𑑂𑐰𑑅 𑐣𑐾𑐥𑐵𑐮𑐨𑐵𑐲𑐵 𑐴𑑂𑐫𑑅𑐩𑐶𑐥𑐶𑑄 𑐣𑑂𑐴𑑂𑐫𑐔𑐶𑐮𑐵𑐔𑑂𑐰𑑄𑐐𑐸 𑐡𑐫𑐾𑐩𑐵𑑅 𑐢𑐎𑐵𑑅 𑐩𑐣𑑄𑐟𑐸𑐣𑐵 𑑋 𑐏 𑐮𑐵, 𑐔𑑂𑐰𑐫𑑂𑐫𑐵 𑐟𑐐𑐶𑑄 𑐳𑑂𑐠𑐵𑐣𑐷𑐫 𑐳𑐬𑐎𑐵𑐬𑐫𑐵 𑐮𑐵𑐐𑐵 𑐡𑐸𑐣𑐾 𑐩𑐮𑐵𑑅𑐐𑐸𑐮𑐶𑑄 𑐥𑑂𑐬𑐡𑐾𑐱 𑐧𑐵𑐫𑑂 𑐎𑐾𑐣𑑂𑐡𑑂𑐬𑐷𑐫 𑐳𑐬𑐎𑐵𑐬𑐫𑐵 𑐏𑐵𑐥𑐵 𑐑𑑂𑐰𑐵𑐬𑐵𑐑𑑂𑐰𑐵𑐬𑐵 𑐫𑐵𑐫𑐾𑐩𑐵𑑅𑐐𑐸 𑐀𑐰𑐳𑑂𑐠𑐵 𑐰𑐫𑐾𑐦𑐸 𑑋 𑐟𑐬 𑐏𑐵𑐥𑐵 𑐏𑐣𑐷𑐥𑐶𑑄 𑐴𑐾 𑐩𑐵𑐮𑐾𑐟 𑐳𑐩𑐳𑑂𑐫𑐵 𑐰𑐫𑐾𑐦𑐸 𑑋 𑐗𑐷 𑐳𑐖𑐐 𑐖𑐸𑐫𑐵𑐔𑑂𑐰𑐣𑐾 𑐩𑐵𑑅 𑑋 𑐠𑐸𑐐𑐸 𑐱𑐶𑐎𑑂𑐲𑐵 𑑑 – 𑑑𑑒 𑐟𑐎 𑐮𑐵𑐐𑐸 𑐫𑐵𑐫𑐾𑐐𑐸𑐮𑐷 𑐱𑐶𑐎𑑂𑐲𑐵 𑐩𑐣𑑂𑐟𑑂𑐬𑐵𑐮𑐫 𑐐𑐸𑐮𑐶 𑐟𑐎 𑐳𑐎𑐵𑐬𑐵𑐟𑑂𑐩𑐎 𑐖𑐸𑐂, 𑐁𑑅 𑐴𑐾 𑐀𑐣𑐸𑐩𑐵𑐣 𑐫𑐵𑐫𑐾 𑐀𑑅𑐥𑐸 𑐩𑐖𑐹 𑑋

𑐩𑐵𑐣𑐣𑐷𑐫 𑐬𑐵𑐖𑐾𑐣𑑂𑐡𑑂𑐬 𑐥𑑂𑐬𑐳𑐵𑐡 𑐱𑑂𑐬𑐾𑐲𑑂𑐛𑐫𑐵 𑐥𑐴𑐮𑐫𑑂 𑐡𑐾𑐱𑐫𑐵 𑐱𑐶𑐎𑑂𑐲𑐵 𑐥𑑂𑐬𑐞𑐵𑐮𑐷𑐂 𑐬𑐵𑐲𑑂𑐚𑑂𑐬𑐶𑐫 𑐥𑐵𑐛𑑂𑐫𑐎𑑂𑐬𑐩 𑑒𑑐𑑗𑑖 𑐀𑐣𑑂𑐟𑐬𑑂𑐐𑐟 𑐳𑑂𑐠𑐵𑐣𑐷𑐫 𑐥𑐵𑐛𑑂𑐫𑐎𑑂𑐬𑐩 𑐧𑑂𑐰𑑄𑐎𑐾𑐦𑐂𑐐𑐸 𑐎𑐵𑐣𑐹𑐣𑐫𑐵 𑐑𑑀𑐲𑐞𑐵 𑐫𑐵𑐫𑐾𑐢𑐸𑑄𑐎𑐵𑑅 𑐮𑐵𑐐𑐸 𑐫𑐵𑑅𑐐𑐸 𑐠𑐸𑐐𑐸 𑐱𑐶𑐎𑑂𑐲𑐵 𑐣𑐷𑐟𑐶𑑄 𑐫𑐾𑑃 𑐡𑐾𑐳𑐫𑑂 𑐔𑑂𑐰𑐣𑐵𑐔𑑂𑐰𑑄𑐥𑐶𑑄 𑐩𑐳𑑂𑐟 𑐦𑐸𑐎𑑂𑐎𑐳𑐶𑐟 𑐠𑑅𑐐𑐸 𑐨𑐵𑐫𑑂 𑐧𑑂𑐰𑐣𑐾𑐐𑐸𑐥𑐵𑐏𑐾𑑄 𑐧𑐣𑑂𑐔𑐶𑐟 𑐫𑐵𑐫𑐾 𑐩𑐖𑑂𑐫𑐹𑐐𑐸 𑐏𑑃 𑐠𑐣 𑐮𑐸𑐩𑑄𑐎𑐾𑐧𑐴𑑅𑐖𑐹 𑑋 𑐐𑐿𑐬 𑐣𑐾𑐰𑐵𑑅 𑐖𑐸𑐫𑐵𑑅 𑐣𑑄 𑐣𑐾𑐰𑐵𑑅𑐟𑐫𑑂 𑐧𑐵𑐬𑐾 𑐕𑐵𑐫𑑂 𑐧𑑂𑐰𑐣𑐾𑐩𑐵𑐮 𑐢𑐎𑐵𑑅 𑐥𑐔𑐶𑑄 𑐢𑐳𑑂𑐰𑐵𑐎𑐷𑐥𑐶𑑄 𑐡𑐫𑐾𑐦𑐸, 𑐟𑐬 𑐄𑐩𑐶𑐟 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐡𑐸𑐣𑐾 𑐖𑐷𑐰𑐣 𑐣𑐶𑐬𑑂𑐰𑐵𑐴 𑐫𑐵𑐫𑐾𑐐𑐸 𑐩𑐟𑐶 𑐡𑑅𑐳𑐵 𑐳𑑂𑐠𑐵𑐣𑐷𑐫 𑐰𑐶𑐲𑐫𑐥𑐵𑐏𑐾𑑄 𑐠𑑅 𑐩𑐳𑑂𑐟𑐫𑑂𑐟 𑐕𑐏𑐾 𑐟𑐫𑐾 𑐩𑐖𑑂𑐫𑐹𑐐𑐸 𑐟𑐬𑑂𑐎𑐳𑑄𑐐𑐟 𑐏𑑃 𑐣𑑂𑐴𑑂𑐫𑑅𑐣𑐾 𑐟𑐫𑐵𑑅 𑐩𑑂𑐴𑐸𑐟𑐸𑐥𑑂𑐰𑐵𑑅 𑐟𑐷 𑐦𑐂𑐐𑐸 𑐟𑐵𑐬𑑂𑐎𑐶𑐎 𑐮𑐶𑐳𑑅 𑐗𑐷𑐳𑑄 𑐧𑐶𑐫𑐵𑐔𑑂𑐰𑐣𑐾𑐩𑐵𑑅 𑑋

𑐰𑐶𑐎𑐳𑐶𑐟 𑐬𑐵𑐲𑑂𑐚𑑂𑐬𑐫𑐵 𑐱𑐶𑐎𑑂𑐲𑐵𑐣𑐷𑐟𑐶𑐎𑐠𑑄 𑐩𑐵𑐢𑑂𑐫𑐩 𑐨𑐵𑐫𑑂 𑐰 𑐋𑐔𑑂𑐕𑐶𑐎 𑐨𑐵𑐫𑑂 𑐢𑐎𑐵𑑅 𑐥𑑂𑐬𑐵𑐰𑐢𑐵𑐣 𑐡𑐫𑐾𑐎𑐵 𑐟𑑅𑐐𑐸 𑐡𑐂 𑑋 𑐄𑐎𑐶𑑄 𑐴𑐾 𑐣𑑂𑐫𑐵𑐫𑐥𑐵𑐮𑐶𑐎𑐵𑐫𑑂 𑐠𑑅𑐩𑑂𑐴𑑄 𑐳𑑅𑐐𑐸 𑐨𑐵𑐫𑑂 𑐣𑑂𑐰𑐰𑐵𑐫𑐾 𑐡𑐂𑐐𑐸 𑐰𑑂𑐫𑐰𑐳𑑂𑐠𑐵 𑐣𑑂𑐴𑑂𑐫𑐵𑐠𑐵𑐳𑑄 𑐡𑐫𑐵𑐔𑑂𑐰𑐣𑐷 𑑋 𑐣𑐾𑐥𑐵𑐮𑐫𑑂 𑐳𑐮𑑄𑐳𑑅 𑐡𑑃 𑐣𑑂𑐴𑑂𑐫𑐰𑑄𑐣𑐶𑐳𑐾𑑄 𑐨𑐵𑐲𑐵 𑐏𑑂𑐫𑐮𑐫𑑂 𑐖𑐸𑐫𑐵𑐔𑑂𑐰𑑄𑐐𑐸 𑐡𑐩𑐣𑐫𑐵 𑐴𑐸𑐣𑐶𑑄 𑐗𑐷𑐎𑐾 𑐠𑑅𑐐𑐸 𑐀𑐢𑐶𑐎𑐵𑐬 𑐩𑐵𑑅 𑐢𑐎𑐵𑑅 𑐢𑐵𑐫𑐾𑐟 𑐟𑐎𑑄 𑐔𑐾𑐟𑐣𑐵 𑐱𑐹𑐣𑑂𑐫 𑐖𑐸𑐂𑐐𑐸 𑐱𑐶𑐎𑑂𑐲𑐵 𑐣𑐷𑐟𑐶𑑄 𑐐𑑅𑐥𑑅 𑐟𑐶𑐫𑐵𑐔𑑂𑐰𑑄𑐐𑐸 𑐡𑐸, 𑐠𑑂𑐰𑐥𑐵𑐏𑐾𑑄 𑐗𑐷 𑐳𑐎𑐮𑐾𑑄 𑐳𑐖𑐐 𑐖𑐸𑐂𑐩𑐵𑑅 𑑋 𑐐𑐿𑐬 𑐣𑐾𑐰𑐵𑑅𑐟𑐫𑑂𑐳𑑄 𑐣𑐾𑐰𑐵𑑅𑐨𑐵𑐫𑑂 𑐮𑑂𑐴𑐵𑐣𑐵𑐎𑑂𑐫𑑄𑐐𑐸 𑐳𑑂𑐰𑐫𑐾𑐡𑑅𑐳𑐵 𑐖𑐎 𑐩𑐶𑐜𑐶𑐫𑐵𑐎𑑅𑐩𑐶𑐟𑐫𑑂𑐳𑑄 𑐣𑐾𑐰𑐵𑑅 𑐏𑑃𑐐𑑂𑐰𑑅 𑐐𑐠𑐾 𑐄𑐔𑑂𑐔𑐵𑐬𑐞 𑐫𑐵𑐫𑐾𑐦𑐂 𑐢𑐎𑐵𑑅 𑐳𑑂𑐰𑐫𑐾𑐏𑐣𑐷 𑑋 ‘𑐫𑐾𑑃𑐫𑐵𑑅’𑐟𑐎𑑄 𑐣𑑂𑐰𑐰𑐵𑐫𑐾 𑐩𑐳𑑅𑐥𑐶𑑄 𑐩𑐶𑐜𑐶𑐫𑐵𑐎𑑅𑐩𑐶𑐟𑐳𑐾𑑄 𑐣𑐾𑐰𑐵𑑅𑐟𑐫𑑂𑐟 𑐴𑐶𑐧𑐵𑐫𑑂 𑐔𑐧𑐵𑐫𑑂 𑐫𑐵𑐫𑐾𑐎 𑐟𑐸𑐔𑑂𑐕 𑐩𑐣𑐳𑑂𑐠𑐶𑐟𑐶 𑐧𑑂𑐰𑐮𑑄𑐎𑐷𑐐𑐸 𑐱𑐶𑐎𑑂𑐲𑐵 𑐣𑐷𑐟𑐶 𑐡𑐟𑐮𑐾 𑐡𑐾𑐫𑑂𑐫𑐵 𑐩𑐣𑐹𑐟 𑐳𑑂𑐰𑐟𑐣𑑂𑐟𑑂𑐬 𑐢𑐵𑐫𑐾𑐟 𑐀𑐗 𑐣𑑄 𑐠𑐵𑐎𑐸𑐂 𑐟𑐶𑐣𑐶 𑑋 𑐠𑑂𑐰 𑐳𑐩𑐳𑑂𑐫𑐵 𑐮𑐶𑐥𑐵 𑐮𑐶𑐥𑐵 𑐩𑐰𑐫𑐾𑐩𑐵 𑐢𑐎𑐵𑑅 𑐗𑐷𑐳𑑄 𑐩𑐣𑑄𑐟𑐸𑐣𑐾 𑑋

𑐕𑐐𑐹𑐐𑐸 𑐟𑐐𑐶𑑄𑐫𑐵 𑐧𑑂𑐰𑐣𑐾𑐖𑑂𑐰𑐮𑑄 𑐳𑑂𑐰𑐫𑐵𑐧𑐮𑐫𑑂 𑐨𑐵𑐲𑐵, 𑐣𑐏𑑅𑐔𑐏𑑅, 𑐨𑐾𑐲𑐨𑐹𑐲𑐵, 𑐣𑑂𑐴𑐶𑐫𑐵 𑐣𑑂𑐴𑐶𑐠𑑄𑐫𑐵 𑐣𑐳𑐵𑐟𑑂𑐰𑑃𑐳𑐵, 𑐎𑑂𑐰𑐠𑐵𑐫𑑂 𑐡𑐂𑐐𑐸 𑐖𑑂𑐰𑐮𑑄, 𑐩𑐳𑑂𑐟𑐫𑑂 𑐮𑑄, 𑐳𑑄𑐳𑑂𑐎𑐵𑐬, 𑐳𑐩𑑂𑐥𑐡𑐵, 𑐱𑐷𑐥 𑐎𑐮𑐵 𑐎𑑁𑐱𑐮, 𑐧𑑂𑐫𑐰𑐳𑐵𑐫, 𑐎𑐸𑐩𑐵𑐬 𑐰 𑐎𑐸𑐩𑐵𑐬𑐷 𑐥𑐸𑐖𑐵, 𑐳𑑂𑐰𑐵𑐳𑑂𑐠𑑂𑐫, 𑐳𑐸𑐔𑐸𑐎𑐸𑐔𑐸, 𑐎𑐵𑐳𑐵 𑐰 𑐡𑐎𑐮𑐫𑑂 𑐮𑐶𑐥𑐵 𑐧𑑂𑐫𑐎𑑂𑐟𑐶 𑐩𑑂𑐴𑐳𑐷𑐎𑐵 𑐀𑐮𑐾 𑐣𑐾𑐰𑐵𑑅 𑐁𑐏𑑅 𑐔𑑂𑐰𑐫𑐾 𑐳𑐫𑐾𑐎𑐾𑐐𑐸 𑐟𑐬𑐶𑐎𑐵 𑐣𑑂𑐴𑑂𑐫𑐧𑑂𑐰𑐫𑐵 𑐟𑑅𑐐𑐸 𑐡𑐸 𑑋 𑐥𑑂𑐬𑐟𑑂𑐫𑐾𑐎 𑐧𑑂𑐰𑐫𑑂 𑐣𑐾𑐰𑐵𑑅 𑐏𑑃𑐐𑑂𑐰𑑅𑐫𑐵𑐟 𑐖𑐣𑐳𑐵𑐢𑐵𑐬𑐞𑐫𑐵𑐟 𑐢𑑂𑐰𑐵𑐠𑐸𑐂𑐎𑐾𑐎𑐠𑑄 𑐏𑐫𑑂𑐨𑐵𑐳𑑄 𑐣𑑄 𑐀𑐬𑑂𑐠 𑐕𑑂𑐫𑐵𑐣𑐵𑐟𑑅𑐐𑐸 𑐧𑐵𑑄𑐮𑐵𑑅 𑐖𑐹 𑑋 𑐩𑐳𑑂𑐟𑐳𑐾𑑄 𑐣𑐾𑐰𑐵𑑅 𑐏𑑃𑐐𑑂𑐰𑑅 𑐐𑐸𑐮𑐶𑐟𑐎 𑐣𑑂𑐰𑐰𑐵𑐫𑐾𑐦𑐸 𑐠𑑂𑐰 𑐴𑐵𑐠𑑂𑐫𑐵 𑐖𑐸𑐂𑐦𑐸 𑑋 𑐣𑐾𑐰𑐵𑑅 𑐨𑐵𑐫𑑂 𑐳𑐫𑐾𑐎𑐵𑑅 𑐖𑐵𑐐𑐶𑐬 𑐣𑐫𑐾𑐡𑐂𑐩𑐏𑐸 𑐢𑐫𑐵𑐐𑐸 𑐩𑐣𑐳𑑂𑐠𑐶𑐟𑐶 𑐡𑐸𑐥𑐶𑑄𑐳𑑄 𑐮𑐵 𑐠𑑂𑐰 𑐥𑐮𑐵𑑅𑐫𑐵𑐟 𑐧𑑂𑐫𑐎𑑂𑐰𑑅𑐩𑐶𑐏𑐵𑑄 𑐳𑑂𑐰𑐂𑐐𑐸 𑐳𑑂𑐰𑐨𑐵𑐰𑐶𑐎 𑐴𑐾 𑐖𑐸𑐂, 𑐟𑐬 𑐩𑐳𑑂𑐟 𑐟𑑅𑐢𑐷 𑐖𑐸𑐂𑐢𑐸𑑄𑐎𑐵𑑅 𑐩𑐵𑑄𑐧𑑁𑐥𑐶𑑄𑐳𑑄 𑐳𑑂𑐫𑐣𑐵 𑐩𑐧𑑂𑐫𑐹 𑐢𑐎𑐵𑑅 𑐣𑑂𑐰𑐵𑐣𑐵𑑅 𑐢𑐵𑐂𑐧𑐮𑐫𑑂 𑐟𑐶𑐣𑐶 𑐳𑐶𑐫𑐵𑐰𑐂–”It was too late” 𑐢𑐎𑐵𑑅 𑑋 𑐳𑑂𑐎𑐸𑐮𑐫𑐵 𑐱𑐶𑐎𑑂𑐲𑐎𑐟 𑐣𑑂𑐴𑑂𑐫𑐮𑑄 𑐔𑐵𑐮𑐎𑐶 𑐖𑐎 𑐩𑐳𑑂𑐟𑐫𑑂𑐳𑑄 𑐫𑐵𑐎𑐣𑑄 𑐳𑐫𑐾𑐎𑐷, 𑐄𑐩𑐶𑐟 𑐕𑐸 𑐳𑑂𑐫𑐣 𑐰 𑐴𑐾 𑐳𑐫𑐾𑐎𑐵 𑐎𑐵𑐂𑐐𑐸 𑐏𑑅 𑑋

𑐕𑐐𑐹 𑐟𑐐𑐶𑑄𑐣𑐶𑐳𑐾𑑄 𑐴𑐾 𑐰𑑂𑐫𑐎𑑂𑐟𑐶 𑐩𑑂𑐴𑐳𑐷𑐎𑐵 𑐢𑐎𑐵𑑅 𑐠𑐷𑐠𑐷 𑐏𑑂𑐫𑑅𑐫𑐵𑐥𑐶𑑄 𑐣𑐾𑐰𑐵𑑅 𑐰𑑂𑐫𑐎𑑂𑐟𑐶𑐟𑑂𑐰 𑐩𑑂𑐴𑐳𑐷𑐎𑐾 𑐧𑐷𑐐𑐸 𑐁𑐖𑐸 𑐖𑑂𑐰𑐣𑐵𑑅 𑐡𑐸𑐠𑑂𑐫𑐵𑐎𑐵𑐟𑑅𑐥𑐶𑑄 𑐠𑐸𑐎𑐠𑑄 𑐡𑐸– 𑐩𑐵𑐳𑑂𑐚𑐬 𑐖𑐐𑐟 𑐳𑐸𑐣𑑂𑐡𑐬 𑐩𑐮𑑂𑐮, 𑐔𑐣𑑂𑐡𑑂𑐬𑐩𑐵𑐣 𑐩𑐵𑐳𑑂𑐎𑐾, 𑐳𑑄𑐐𑐷𑐣𑐵 𑐰𑐿𑐡𑑂𑐫, 𑐀𑐩𑐬 𑐔𑐶𑐟𑑂𑐬𑐎𑐵𑐬, 𑐰𑐿𑐎𑐸𑐞𑑂𑐛 𑐩𑐵𑐣𑐣𑑂𑐢𑐬, 𑐔𑐣𑑂𑐡𑑂𑐬𑐎𑐵𑐣𑑂𑐟𑐵 𑐖𑑀𑐱𑐷, 𑐔𑐶𑐟𑑂𑐟𑐢𑐬 𑐴𑐺𑐡𑐫, 𑐩𑑀𑐟𑐶𑐮𑐎𑑂𑐲𑑂𑐩𑐷 𑐄𑐥𑐵𑐳𑐶𑐎𑐵, 𑐳𑐶𑐡𑑂𑐢𑐶𑐔𑐬𑐞 𑐱𑑂𑐬𑐾𑐲𑑂𑐛, 𑐨𑐺𑐐𑐸𑐬𑐵𑐩 𑐱𑑂𑐬𑐾𑐲𑑂𑐛, 𑐱𑑄𑐏𑐢𑐬 𑐳𑐵𑐏𑑂𑐰𑐵𑑅, 𑐢𑐸𑑃𑐳𑑂𑐰𑐵𑑄 𑐳𑐵𑐫𑑂𑐩𑐶, 𑐣𑐵𑐬𑐵𑐫𑐞 𑐐𑑀𑐥𑐵𑐮, 𑐢𑐩𑑂𑐩𑐵𑐰𑐟𑐷, 𑐎𑐺𑐲𑑂𑐞𑐨𑐵𑐂 𑐩𑐴𑐬𑑂𑐖𑐣, 𑐳𑐟𑑂𑐫𑐩𑑀𑐴𑐣 𑐖𑑀𑐱𑐷, 𑐱𑐸𑐎𑑂𑐬𑐬𑐵𑐖 𑐱𑐵𑐳𑑂𑐟𑑂𑐬𑐷, 𑐩𑐵𑐞𑐶𑐎 𑐩𑐵𑐣 𑐔𑐶𑐟𑑂𑐬𑐎𑐵𑐬, 𑐩𑐡𑐣𑐎𑐺𑐲𑑂𑐞 𑐱𑑂𑐬𑐾𑐲𑑂𑐛, 𑐰𑐶𑐡𑑂𑐫𑐵𑐰𑐟𑐷 𑐎𑐳𑐵𑑅, 𑐳𑐶𑐡𑑂𑐢𑐶𑐡𑐵𑐳 𑐩𑐴𑐵𑐖𑐸, 𑐩𑐴𑐾𑐣𑑂𑐡𑑂𑐬 𑐩𑐮𑑂𑐮, 𑐐𑑄𑐐𑐵𑐮𑐵𑐮 𑐱𑑂𑐬𑐾𑐲𑑂𑐛, 𑐡𑐫𑐵𑐰𑐷𑐬 𑐳𑐶𑑄𑐴 𑐎𑐳𑐵𑑅, 𑐢𑐬𑑂𑐩𑐵𑐡𑐶𑐟𑑂𑐫 𑐢𑐬𑑂𑐩𑐵𑐔𑐵𑐬𑑂𑐫, 𑐥𑐡𑑂𑐩𑐬𑐟𑑂𑐣 𑐟𑐸𑐮𑐵𑐢𑐬, 𑐢𑐬𑑂𑐩𑐨𑐎𑑂𑐟 𑐩𑐵𑐠𑐾𑐩𑐵, 𑐳𑐶𑐡𑑂𑐢𑐶𑐩𑐸𑐣𑐶 𑐱𑐵𑐎𑑂𑐫, 𑐥𑑂𑐬𑐾𑐩𑐧𑐴𑐵𑐡𑐸𑐬 𑐎𑑄𑐳𑐵𑐎𑐵𑐬, 𑐣𑐶𑐲𑑂𑐛𑐵𑐣𑐣𑑂𑐡 𑐧𑐖𑑂𑐬𑐵𑐔𑐵𑐬𑑂𑐫, 𑐜𑐵. 𑐔𑐸𑐣𑑂𑐡𑐵 𑐧𑐖𑑂𑐬𑐵𑐔𑐵𑐬𑑂𑐫, 𑐔𑐶𑐣𑐶𑐎𑐵𑐖𑐷 𑐟𑐵𑐩𑑂𑐬𑐵𑐎𑐵𑐬, 𑐳𑐶𑐡𑑂𑐢𑐶𑐣𑐬𑐳𑐶𑑄𑐴 𑐩𑐮𑑂𑐮, 𑐖𑐐𑐟 𑐥𑑂𑐬𑐎𑐵𑐱 𑐩𑐮𑑂𑐮, 𑐎𑐾𑐱𑐰 𑐄𑐡𑐵𑐳 𑐁𑐡𑐶 𑐰𑑂𑐫𑐎𑑂𑐟𑐶𑐥𑐶𑑄𑐟 𑐠𑐷𑐠𑐷 𑐟𑐐𑐶𑐩𑐫𑑂 𑐩𑑂𑐴𑐳𑐷𑐎𑐾 𑐧𑐷𑐎𑐠𑑄 𑐡𑐸𑐠𑑂𑐫𑐵𑐎𑐵𑐟𑑅𑐐𑐸 𑐔𑑂𑐰𑐕𑐵𑐫𑐾𑐧𑐴𑑅𑐖𑐹 𑑋 𑐰𑐫𑑂𑐎𑑅𑐥𑐶𑐣𑐶𑐐𑐸 𑐡𑐾𑐣𑑄 𑐴𑐾 𑐣𑐾𑐥𑐵𑑅 𑐩𑑂𑐴𑐳𑐶𑐫𑐵𑐔𑑂𑐰𑑄𑐐𑐸 𑐏𑑅 𑑋

𑐕𑐐𑐹𑐣𑐶𑐳𑐾𑑄 𑐣𑑂𑐴𑐫𑑂𑐐𑐹 𑐟𑐐𑐶𑑄𑐟𑐎 𑐰 𑐴𑐾 𑐰𑐶𑐲𑐫𑐰𑐳𑑂𑐟𑐸 𑐡𑐸𑐠𑑂𑐫𑐵𑐎𑐵𑑅 𑐰𑐶𑐰𑐶𑐢𑐟𑐵 𑐣𑑂𑐴𑑂𑐫𑐧𑑂𑐰𑐫𑐵𑐟𑑅𑐐𑐸 𑐣𑑄 𑐮𑐸𑐩𑑄𑐎𑐾𑐧𑐴𑑅𑐖𑐹 𑑋 𑐁𑑅 𑐔𑑂𑐫𑐵𑐐𑐹 𑐟𑐐𑐶𑑄𑐫𑐵 𑐳𑐦𑐸 𑐕𑐎𑑅 𑐧𑐶𑐳𑑂𑐎𑑄𑐎𑐠𑑄 𑐡𑐸𑐰𑐵𑐮𑐵 𑐳𑑂𑐰𑐫𑐾 𑑋 𑐕𑐐𑐹 𑐟𑐐𑐶𑑄𑐣𑐶𑐳𑐾𑑄 𑐣𑐶𑐬𑐣𑑂𑐟𑐬 𑐬𑐹𑐥𑑄 𑐧𑑂𑐰𑐣𑐵𑑅 𑐠𑐴𑐵𑑄 𑐰𑐣𑐷𑐥𑐶𑑄 𑐩𑐳𑑂𑐟𑐳𑐾𑑄 𑐔𑑂𑐫𑐵𑐐𑐹 𑐟𑐐𑐶𑐩𑐫𑑂 𑐠𑑂𑐫𑐣𑐎𑐶 𑐀𑐰𑐱𑑂𑐫 𑐣𑑄 𑐣𑐾𑐰𑐵𑑅𑐨𑐵𑐫𑑂 𑐟𑐖𑐶𑐮𑐖𑐶𑐫𑐵 𑐩𑑂𑐴𑐳𑐷𑐎𑐵 𑐧𑐵𑐬𑐾 𑐫𑐎𑑂𑐰𑑄 𑐏𑑃 𑐳𑐷𑐎𑐾𑐢𑐸𑑄𑐎𑐮 𑐖𑐸𑐂 𑐢𑐫𑐵𑐐𑐸 𑐀𑐣𑐸𑐩𑐵𑐣 𑐫𑐵𑐫𑐾𑐦𑐸 𑑋 𑐄𑐎𑐶𑑄 𑐠𑑂𑐰 𑐢𑐸𑑄𑐎𑐵𑑅 𑐐𑐸𑑄𑐐𑐹 𑐰 𑐗𑐶𑐐𑐹 𑐀𑐮𑐾 𑐥𑑂𑐮𑐳 𑐚𑐹 𑐠𑑂𑐫𑐣𑐷𑐧𑐮𑐫𑑂 𑐨𑐵𑐲𑐵 𑐖𑐎 𑐩𑐏𑐸, 𑐳𑐵𑐴𑐶𑐟𑑂𑐫𑐫𑐵 𑐣𑑄 𑐫𑐎𑑂𑐰𑑄 𑐏𑑃 𑐳𑐷𑐎𑐾 𑐢𑐸𑑄𑐎𑐷𑐐𑐸 𑐏𑐣𑐵𑐔𑑂𑐰𑐣𑐵 𑑋 𑐔𑑂𑐫𑐵𑐐𑐹 𑐟𑐐𑐶𑑄𑐫𑐵 𑐰𑐶𑐲𑐫𑐰𑐳𑑂𑐟𑐸 𑐣𑑂𑐴𑑂𑐫𑐧𑑂𑐰𑐫𑐾𑐎𑐠𑑄 𑐡𑐎𑐮𑐫𑑂 𑐣𑑂𑐴𑐵𑐥𑐵𑑄 𑐨𑐵𑐲𑐵𑐫𑐵𑐟 𑐎𑐫𑐵𑐟𑑅𑐐𑐸 𑐡𑐸 𑑋 𑐔𑑂𑐫𑐵𑐐𑐹 𑐟𑐐𑐶𑑄 𑐠𑑂𑐫𑐣𑐾𑐢𑐸𑑄𑐎𑐵𑑅 𑐂𑐩𑐶𑐳𑑄 𑐐𑐸𑐮𑐶𑐟𑐎 𑐣𑑂𑐰𑐰𑐵𑐫𑐾 𑐦𑐿, 𑐥𑑂𑐬𑐫𑑀𑐐𑐵𑐟𑑂𑐩𑐎 𑐱𑐿𑐎𑑂𑐲𑐶𑐎 𑐥𑐵𑐛 𑐡𑐸𑐠𑑂𑐫𑐵𑐎𑐵 𑐟𑑅𑐐𑐸 𑐢𑐵𑑅𑐳𑐵 𑐩𑐏𑐣𑐵 𑑋 𑐨𑐵𑐫𑑂 𑐢𑐫𑐵𑐐𑐸 𑐕𑑂𑐫𑐮𑐵𑐫𑑄𑐎𑐾 𑐩𑐵𑑅, 𑐀𑐮𑐾 𑐟𑐶𑐣𑐶 𑐟𑐵𑑅 𑐃𑐟𑐎 𑐮𑐸𑐩𑐣𑐵𑐔𑑂𑐰𑐣𑐷 𑑋 𑐠𑑁𑑄𑐎𑐣𑑂𑐴𑐫𑑂 𑐰𑐶𑐖𑑂𑐘𑐵𑐣 𑐰 𑐥𑑂𑐬𑐰𑐶𑐢𑐶𑐫𑐵 𑐁𑐢𑐵𑐬𑐫𑑂 𑐩𑐳𑑂𑐟 𑐧𑑂𑐰𑐮𑐣𑐵 𑐔𑑂𑐰𑑄𑐐𑐸𑐮𑐶𑑄 𑐕𑐸𑑄 𑐕𑐸𑑄 𑐰𑐶𑐲𑐫 𑐄𑐎𑐶𑐫𑐵𑐟 𑐣𑑄 𑐎𑑅𑐑𑐵𑐣𑐵𑑅 𑐰𑐣𑐾𑐡𑑅𑐳𑐵 𑐖𑑂𑐫𑐹 𑐠𑐾𑑄 𑐔𑑂𑐰𑑄 𑑋First hand Knowledge 𑐎𑐠𑑄 𑐰𑐶𑐖𑑂𑐘𑐵𑐣𑐫𑐵 𑐏𑑃 𑐣𑑄 𑐩𑐳𑑂𑐟𑐳𑐾𑑄 𑐠𑑅𑐐𑐸 𑐨𑐵𑐳𑑄 𑐳𑐷𑐎𑐾 𑐦𑐂 𑑋

𑐁𑑅 𑐨𑐵𑐲𑐵𑐫𑐵 𑐏𑑂𑐫𑑅𑐫𑐵𑐟 𑐕𑐎𑑅 𑐡𑐸𑐰𑐵𑐮𑐵 𑐳𑑂𑐰𑐫𑐾 𑑋 𑐔𑑂𑐫𑐵𑐐𑐹 𑐟𑐐𑐶𑐩𑐫𑑂 𑐨𑐵𑐲𑐵 𑐏𑑂𑐫𑑅𑐡𑐸𑐣𑐾 𑐰𑐶𑐨𑐎𑑂𑐟𑐶𑐫𑐵𑐟 𑐣𑑂𑐴𑑂𑐫𑐧𑑂𑐰𑐫𑐵 𑐟𑑅𑐐𑐸 𑐡𑐸 𑑋 𑐟𑐬 𑐩𑐸𑐎𑑂𑐎𑑄 𑐴𑐾 𑐳𑐬𑐮𑐎𑐠𑑄 𑐥𑐬𑐶𑐩𑐵𑐬𑑂𑐖𑐣 𑐫𑐵𑐫𑐾𑐩𑐵𑑅 𑐠𑐾𑑄 𑐖𑐶𑐟𑑅 𑐟𑐵𑑅 𑑋 𑐕𑐵𑐫𑑂𑐢𑐵𑑅𑐳𑐵, 𑐣𑑂𑐴𑐫𑑂𑐐𑐹 𑐟𑐐𑐶𑐩𑐫𑑂 𑐎𑐵𑐬𑐎 𑐢𑐎𑐵𑑅 𑐧𑑂𑐫𑐵𑐎𑐬𑐞𑐫𑐵 𑐏𑑃 𑐡𑐸𑐠𑑂𑐫𑐵𑐎𑐵𑑅 𑐔𑑂𑐫𑐵𑐐𑐹 𑐟𑐐𑐶𑐩𑐫𑑂 𑐰𑐶𑐨𑐎𑑂𑐟𑐶 𑐢𑐎𑐵𑑅 𑐡𑐸𑐠𑑂𑐫𑐵𑐎𑐵 𑐟𑑅𑐐𑐸 𑐡𑐸 𑑋 𑐰𑐵𑐳𑑂𑐟𑐰𑐫𑑂 𑐨𑐵𑐲𑐵 𑐰𑐶𑐖𑑂𑐘𑐵𑐣𑐎𑐠𑑄 𑐎𑐵𑐬𑐎, 𑐰𑐶𑐨𑐎𑑂𑐟𑐶 𑐰 𑐥𑑂𑐬𑐟𑑂𑐫𑐫 (𑐮𑐶𑐟𑑃𑐳𑐵) 𑐕𑐐𑐹 𑐴𑐾 𑐏𑑅 𑑋 𑐣𑑂𑐴𑐵𑐥𑐵𑑄 𑐣𑐵𑑄 (𑐣𑐵𑐩) 𑐰 𑐣𑐵𑐥 𑐳𑑂𑐰𑐵𑐣𑐵𑐰𑐂𑐐𑐸 𑐥𑐸𑐮𑐶𑐒𑑂𑐐 (𑐧𑐵𑐖𑐵𑑅), 𑐩𑐵𑐖𑐵𑑅 𑐰 𑐕𑐸𑐚𑐾 𑐩𑐖𑐸𑐂𑐎 𑐣𑐵𑐩 𑐏𑑃𑐐𑑂𑐰𑑅 𑐣𑐶𑑄 𑐩𑑂𑐴𑐳𑐷𑐎𑐾 𑐧𑐷𑐩𑐵𑑅 𑐠𑐾𑑄 𑐟𑐵𑑅 𑑋 𑐄𑐎𑐷 𑐳𑑂𑐰𑐵𑐣𑐵𑐰𑐂𑐐𑐸 𑐧𑐔𑐣 𑐟𑑅𑐧𑐔𑑄 𑐰 𑐔𑐶𑐧𑐔𑑄 (Singular, Plural) 𑐀𑐮𑐾 𑐣𑐵𑑄𑐣𑐵𑐥 𑐳𑑂𑐰𑐵𑐣𑐵𑐰𑐂𑐐𑐸 𑐩𑑂𑐴 𑐰 𑐐𑐸 𑐥𑑂𑐬𑐟𑑂𑐫𑐫𑐫𑐵𑐟 𑐢𑑂𑐰𑐵𑐠𑐸𑐂𑐎𑐵𑑅 𑐖𑐎 𑐎𑐵𑐬𑐎𑐫𑐵 𑐏𑑃 𑐣𑑂𑐴𑑂𑐫𑐠𑐣𑐾 𑐡𑑅𑐳𑐵 𑐨𑐵𑐫𑑂𑐫𑐵 𑐩𑐹 𑐳𑐷𑐎𑐾 𑐦𑐂 𑐠𑐾𑑄 𑐟𑐵𑑅 𑑋 𑐎𑐵𑐬𑐎 𑐢𑐫𑐵𑐐𑐸 𑐀𑐬𑑂𑐠𑐎𑐠𑑄 𑐖𑐸𑐂, 𑐰𑐶𑐨𑐎𑑂𑐟𑐶 𑐳𑑄𑐬𑐔𑐣𑐵𑐎𑐠𑑄 𑐳𑑂𑐰𑐵𑐣𑐵 𑐔𑑂𑐰𑐣𑐷𑐳𑐵 𑐮𑐶𑐟𑑃𑐳𑐵 (𑐥𑑂𑐬𑐟𑑂𑐫𑐫) 𑐳𑑂𑐰𑐵𑐣𑐵𑑅 𑐏𑑃𑐥𑐸𑐫𑐵 𑐀𑐬𑑂𑐠 𑐥𑐹𑐰𑑄𑐎𑐷 𑑋 𑐠𑑂𑐰 𑐨𑐵𑐲𑐵 𑐳𑐶𑐡𑑂𑐢𑐵𑐣𑑂𑐟𑐫𑐵 𑐎𑐠𑑄 𑐣𑑂𑐴𑑂𑐫𑐵𑐐𑐸 𑐨𑐵𑐲𑐵𑐫𑑂 𑐣𑑄 𑐡𑐫𑐵𑐔𑑂𑐰𑐣𑐷 𑑋

𑐳𑐸𑐣𑐵𑑄, 𑐳𑐸𑐫𑐵𑐟, 𑐐𑐣, 𑐐𑐠𑐾, 𑐕𑐸𑐎𑐶𑑄, 𑐐𑐸𑐧𑐮𑐫𑑂 𑐢𑐫𑐵𑐐𑐸 𑐏𑑃 𑐳𑐷𑐎𑐾𑐟 𑐎𑐵𑐬𑐎 𑐰 𑐰𑐶𑐨𑐎𑑂𑐟𑐶 𑐕𑑂𑐫𑐮𑐾𑐐𑐸 𑐫𑐵𑐂 𑑋 𑐀𑑄𑐐𑑂𑐬𑐾𑐖𑐷 𑐨𑐵𑐲𑐵𑐫𑑂 𑐥𑑂𑐬𑐟𑑂𑐫𑐫 𑐳𑑂𑐰𑐵𑐣𑐵𑑅 𑐰𑐶𑐨𑐎𑑂𑐟𑐶 𑐰𑐂𑐐𑐸𑐫𑐵𑐟 𑐄𑐥𑐳𑐬𑑂𑐐(Preposition)𑐎𑐠𑑄 𑐎𑐫𑐵𑐟𑑅𑐐𑐸 𑐡𑐸 𑑋 𑐟𑐬 𑐊𑐱𑐶𑐫𑐵𑐮𑐷 𑐨𑐵𑐳𑐫𑑂 𑐊𑐫𑐎𑐟 𑐊𑐫𑐎𑐲𑑂𑐟𑐲𑑂𑐫𑐮 𑐎𑐠𑑄 𑐡𑐸𑐠𑑂𑐫𑐵𑐎𑐵 𑐟𑑅𑐐𑐸 𑐡𑐸 𑑋 𑐄𑐎𑐶𑑄– 𑐖𑐶, 𑐖𑐶𑑄, 𑐖𑐶𑐟𑑅, 𑐖𑐶𑐎𑐾𑐫𑑂, 𑐖𑐶𑐐𑐸, 𑐖𑐶𑐩𑑂𑐴, 𑐖𑐶𑐠𑐵𑐫𑑂 𑐁𑐡𑐶 𑐩𑑂𑐴𑐳𑐷𑐎𑐵𑑅 𑐖𑐎 𑐩𑐾𑐩𑐾𑐐𑐸 𑐏𑑃 𑐳𑑂𑐰𑐵𑐣𑐵𑐫𑑄𑐎𑐾 𑐡𑑅𑐳𑐵 𑐀𑑅𑐥𑐸𑐎 𑐠𑐸𑐂𑐎𑐵 𑐎𑐵𑐂 𑐠𑐾𑑄 𑐟𑐵𑑅 𑑋 𑐰𑐫𑐵 𑐩𑑂𑐴𑑂𑐫𑐵𑐔𑑄 (𑐩𑑂𑐴𑑂𑐫𑐵𑐫𑑂) 𑐔𑐩𑑂𑐔𑐵𑑄 𑐖𑐶𑐐𑐸 𑐕𑐾𑑃𑐫𑑂 𑐖𑐵 𑐣𑐮– 𑐠𑐾𑑄 𑐖𑐵𑑅𑐐𑐸 𑐳𑐬𑐮 𑐏𑑃𑐥𑐸𑐥𑐵𑐏𑐾𑑄 𑐨𑐵𑐲𑐵𑐫𑐵 𑐩𑐹 𑐩𑐹 𑐏𑑃 𑐳𑐷𑐎𑐵 𑐎𑐵𑐫𑐾𑐦𑐂 𑐠𑐾𑑄 𑐟𑐵𑑅 𑑋

𑐠𑑂𑐰 𑐏𑑃𑐥𑐸𑐫𑐵𑐟 𑐩𑐾𑐩𑐾𑐐𑐸 𑐨𑐵𑐳𑐫𑑂 𑐣𑑄 𑐀𑐣𑐸𑐰𑐵𑐡 𑐫𑐵𑐣𑐵𑐟𑐮𑐎𑐶 𑐳𑑂𑐫𑐣𑐵𑐩𑐶 𑐰 𑐧𑑂𑐰𑐣𑐵𑐩𑐶 𑐣𑐶𑐏𑐮𑑅𑐳𑐶𑐣𑑄 𑐫𑐵𑐄𑑃𑐎 𑐠𑐸𑐂𑐎𑐵 𑐎𑐵𑐂 𑐢𑐫𑐵𑐐𑐸 𑐖𑐶𑐐𑐸 𑐰𑐶𑐱𑑂𑐰𑐵𑐳 𑐡𑐸 𑑋 𑐄𑐎𑐶𑑄 𑐣𑐵𑑄 𑐣𑐵𑐥 𑐳𑑂𑐰𑐵𑐣𑐵𑐰𑐂𑐐𑐸 𑐮𑐶𑐟𑑃𑐳𑐵 𑐣𑑂𑐴𑑂𑐫𑐧𑑂𑐰𑐫𑐵𑑅 𑐫𑐵𑐳𑐸 (𑐎𑑂𑐬𑐶𑐫𑐵)𑐥𑐵𑐏𑐾𑑄 𑐠𑑅–𑐎𑐟𑑅𑐫𑐵 (𑐁𑐟𑑂𑐩 𑐰 𑐥𑐬) 𑐦𑐬𑐎𑐥𑐣 𑐣𑐾𑐥𑐵𑐮𑐨𑐵𑐲𑐵𑐫𑐵 𑐰𑐶𑐱𑐾𑐲𑐟𑐵 𑐏𑑅 𑑋 𑐏𑐫𑑂 𑐨𑐵𑐳𑐫𑑂 𑐠𑐾𑑄 𑐥𑐸𑐬𑐸𑐲𑐎𑐠𑑄 𑐎𑑂𑐬𑐶𑐫𑐵 𑐏𑑃𑐐𑑂𑐰𑐮𑐫𑑂 𑐮𑐶𑐟𑑃𑐳𑐵 𑐴𑐶𑐮𑐷 𑐩𑐏𑐸 𑑋 𑐀𑐠𑐾 𑐴𑐾 𑐔𑑂𑐫𑐵𑐐𑐹 𑐟𑐐𑐶𑑄𑐫𑐵 𑐣𑐶𑑄𑐟𑐶𑑄 𑐟𑐵𑐖𑐶𑐐𑑂𑐰𑑅 𑐰 𑐰𑐶𑐱𑐾𑐲𑐞 𑐣𑑄 𑐄𑐮𑐶 𑐴𑐾 𑐩𑐴𑐟𑑂𑐰𑑄 𑐖𑐵𑑅 𑑋 𑐨𑐵𑐲𑐵𑐫𑐵 𑐏𑑃 𑐮𑑂𑐴𑐵𑐫𑐾𑐧𑐮𑐫𑑂 𑐧𑑂𑐫𑐵𑐰𑐴𑐵𑐬𑐶𑐎𑐎𑐠𑑄 𑐡𑐳𑐸 𑐧𑐶𑐫𑐵𑑅 𑐢𑑂𑐰𑐵𑐠𑐸𑐂𑐎𑐾 𑐩𑐵𑑅 𑐠𑐾𑑄 𑐟𑐵𑑅 𑑋 𑐩𑐸𑐎𑑂𑐎𑑄 𑐳𑐦𑐸 𑐰 𑐰𑐶𑐲𑐫𑐰𑐳𑑂𑐟𑐸 𑐂𑐧𑑂𑐫𑑅𑐎𑐠𑑄 𑐥𑐵𑐫𑑂𑐕𑐶 𑐖𑐹𑐐𑐸 𑐟𑐵𑐫𑐾𑐎𑐵 𑐔𑑂𑐰𑐣𑐵 𑑋

𑐮𑐶𑐔𑑂𑐰𑑅𑐎𑐠𑑄 𑐢𑐵𑐫𑐾𑐐𑐸 𑐏𑑅𑐳𑐵 𑐫𑐾𑑃𑐡𑐾𑐫𑑂 𑐩𑑂𑐴𑐳𑐷𑐎𑐾– 𑐫𑐾𑑃𑐫𑑂 𑐖𑐎 𑐮𑐶𑐩𑐎𑐸𑑄𑐎𑐹𑐳𑐾 𑐡𑐾𑐫𑑂𑐣𑑂𑐫𑑄𑐎 𑐕𑑂𑐫𑐮𑐾𑐦𑐂𑐎𑐠𑑄 𑐕𑑂𑐫𑐮𑐵𑐫𑑄𑐎𑐾𑐟 𑐰𑐺𑐴𑐟 𑐬𑐹𑐥𑐫𑐵 𑐳𑐦𑐸 𑐟𑐫𑐵𑐬 𑐫𑐵𑐫𑐾𑐩𑐵𑑅𑐐𑐸 𑐏𑑃 𑐮𑐸𑐩𑑄𑐎𑐵𑑅 𑐣𑑂𑐴𑐹𑐐𑐸 𑐳𑑄𑐳𑑂𑐎𑐬𑐞 𑐫𑐵𑐎𑐣𑑄 𑐥𑐶𑐴𑐵𑑄 𑐰𑐂 𑐢𑐎𑐵𑑅 𑐩𑐣𑑄𑐟𑐸𑐣𑐵 𑑋

𑐱𑐸𑐨𑐩𑑂 𑑋