𑐣𑐾𑐰𑐵: 𑐀𑐣𑐮𑐵𑐂𑐣 𑐣𑑂𑐫𑐸𑐖 | 𑑒𑑐𑑗𑑗 𑐧𑐿𑐱𑐵𑐏 𑑒𑑓, 𑐩𑑄𑐐𑐮𑐧𑐵𑐬 𑑑𑑒:𑑕𑑕:𑑐𑑘

𑐬𑐟𑑂𑐣𑐬𑐵𑐖𑑂𑐫𑐮𑐎𑑂𑐲𑑂𑐩𑐷 𑐎𑑂𑐫𑐵𑐩𑑂𑐥𑐳 (𑐁𑐬.𑐁𑐬)𑐫𑑂 𑐠𑑁𑑄𑐎𑐣𑑂𑐴𑐫𑑂 𑐧𑐶.𑐊. 𑐣𑑂𑐴𑐵𑐥𑐵𑑄𑐐𑐸 𑐡𑑃𑐫𑑂 𑐀𑐢𑑂𑐫𑐫𑐣 𑐫𑐵𑐣𑐵𑐔𑑂𑐰𑑄𑐥𑐶𑑄 𑐧𑑂𑐰𑐣𑐵𑐩𑐶𑐥𑐶𑐣𑐶𑐐𑐸 𑐨𑐵𑐲𑐵 𑐰𑐶𑐖𑑂𑐘𑐵𑐣 𑐰 𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫 𑐂𑐟𑐶𑐴𑐵𑐳 𑐰𑐶𑐲𑐫𑐳 𑐀𑐣𑐮𑐵𑐂𑐣 𑐎𑐎𑑂𑐲𑐵 𑐣𑑂𑐴𑑂𑐫𑐵𑑅𑐐𑐸 𑐡𑐸 𑑋

𑐮𑐎𑐜𑐵𑐄𑐣 𑐖𑐸𑐂𑐰𑑄 𑐴𑐾 𑐎𑐎𑑂𑐲𑐵 𑐣𑐶𑐬𑐣𑑂𑐟𑐬 𑐬𑐸𑐥𑑄 𑐣𑑂𑐴𑑂𑐫𑐵𑐎𑐵𑑅 𑐰𑐫𑐵𑐔𑑂𑐰𑑄𑐐𑐸 𑐠𑐸𑐐𑐸 𑐀𑐣𑐮𑐵𑐂𑐣 𑐎𑐎𑑂𑐲𑐵 𑐳𑐩𑑂𑐨𑐰𑐟𑑅 𑐡𑐾𑐳𑐫𑑂 𑐮𑐎𑐜𑐵𑐄𑐣 𑐑𑑀𑐲𑐞𑐵 𑐢𑐸𑑄𑐎𑐵𑑅 𑐠𑑂𑐰𑐴𑐾 𑐮𑐎𑐜𑐵𑐄𑐣 𑐥𑑂𑐬𑐨𑐵𑐰𑐶𑐟 𑐣𑑂𑐴𑐵𑐥𑐵𑑄𑐐𑐸 𑐀𑐣𑐮𑐵𑐂𑐣 𑐎𑐎𑑂𑐲𑐵 𑐏𑑅 𑐢𑐎𑐵𑑅 𑐕𑐸𑑄 𑐩𑐥𑐵𑑅 𑑋

𑐣𑐾𑐥𑐵𑐮𑐨𑐵𑐲𑐵 𑐀𑐢𑑂𑐫𑐫𑐣𑐬𑐟 𑐧𑑂𑐰𑐣𑐵𑐩𑐶𑐥𑐶𑑄𑐳𑑄 𑐀𑐣𑐮𑐵𑐂𑐣 𑐎𑐎𑑂𑐲𑐵𑐥𑐵𑐏𑐾𑑄 𑐠𑑅𑐥𑐶𑐣𑑂𑐳𑑄 𑐥𑑂𑐬𑐨𑐵𑐰𑐎𑐵𑐬𑐷 𑐬𑐸𑐥𑑄 𑐁𑐏𑑅 𑐧𑑂𑐰𑐣𑐾𑐏𑑄𑐐𑐸 𑐖𑐵𑐣𑐎𑐵𑐬𑐷 𑐧𑑂𑐫𑐹𑐐𑐸 𑐡𑐸 𑑋

𑐧𑑂𑐰𑐣𑐵𑐩𑐶 𑐱𑑀𑐨𑐵 𑐜𑑄𑐐𑑀𑐮𑐫𑐵 𑐎𑐠𑑄, 𑐀𑐣𑐮𑐵𑐂𑐣 𑐎𑐎𑑂𑐲𑐵 𑐎𑐫𑐵𑐧𑐮𑐾 𑐮𑐎𑐜𑐵𑐄𑐣𑐫𑐵 𑐃𑐫𑐵 𑐳𑐡𑐸𑐥𑐫𑑀𑐐 𑐖𑐹𑐐𑐸 𑐡𑐸 𑑋 𑐎𑐮𑐾𑐖 𑐎𑐎𑑂𑐲𑐵 𑐎𑐵𑐫𑐾 𑐩𑐮𑐵𑑅𑐥𑐶𑑄 𑐥𑐵𑐳𑐵𑐥𑐶𑐣𑐶𑐐𑐸 𑐣𑐶𑐟𑐶𑑄 𑐥𑑂𑐬𑐨𑐵𑐰𑐎𑐵𑐬𑐷 𑐖𑐹𑐐𑐸 𑐡𑐸 𑑋 𑐟𑑂𑐬𑐶𑐨𑐸𑐰𑐣 𑐰𑐶𑐱𑑂𑐰𑐰𑐶𑐡𑑂𑐫𑐵𑐮𑐫𑑄 𑐀𑐣𑐮𑐵𑐂𑐣 𑐎𑐎𑑂𑐲𑐵 𑐎𑐵𑐫𑐾𑐟 𑐳𑐸𑐔𑑄 𑐥𑐶𑐟𑐧𑐶𑐂 𑐣𑑂𑐴𑑂𑐫𑑅 𑐴𑐾 𑐠𑑅𑐥𑐶𑑄𑐳𑑄 𑐮𑐎𑐜𑐵𑐄𑐣 𑐖𑐸𑐂𑐏𑐟𑑄 𑐱𑐶𑐎𑑂𑐲𑐎𑐥𑐶𑑄𑐣𑐵𑐥 𑐳𑐩𑐣𑑂𑐰𑐫 𑐫𑐵𑐣𑐵𑑅 𑐬𑐟𑑂𑐣𑐬𑐵𑐖𑑂𑐫𑐮𑐎𑑂𑐲𑑂𑐩𑐷 𑐎𑑂𑐫𑐵𑐩𑑂𑐥𑐳 𑐧𑐶.𑐊. 𑐣𑑂𑐴𑐵𑐥𑐵𑑄𑐐𑐸 𑐡𑑃𑐫𑐵 𑐣𑐾𑐥𑐵𑐮𑐨𑐵𑐲𑐵𑐫𑐵 𑐀𑐣𑐮𑐵𑐂𑐣 𑐎𑐎𑑂𑐲𑐵 𑐳𑑄𑐔𑐵𑐮𑐣 𑐫𑐵𑐣𑐵𑑅𑐐𑐸 𑐣𑑂𑐴𑑂𑐫𑐠𑐣𑐵𑐡𑐶𑐮 𑑋

𑐎𑐎𑑂𑐲𑐵 𑐳𑐘𑑂𑐔𑐵𑐮𑐣𑐫𑐵 𑐣𑐶𑐟𑐶𑑄 𑐱𑐶𑐎𑑂𑐲𑐎𑐥𑐶𑑄𑐳𑑄 𑐀𑐣𑐮𑐵𑐂𑐣𑐥𑐵𑐏𑐾𑑄 𑐳𑐸𑐠𑐵𑑄𑐮𑐵𑐎𑑂𑐎 𑐎𑐎𑑂𑐲𑐵 𑐎𑐫𑐵𑑅 𑐰𑐫𑐵𑐔𑑂𑐰𑑄𑐐𑐸𑐮𑐶𑑄 𑐟𑐳𑐎𑑄 𑐧𑐵𑑄𑐮𑐵𑑅𑐐𑐸 𑐏𑑃𑐫𑐵 𑐖𑐵𑐣𑐎𑐵𑐬𑐷 𑐧𑑂𑐫𑐹𑐐𑐸 𑐡𑐸 𑑋

𑐠𑐸𑐐𑐸 𑐀𑐣𑐮𑐵𑐂𑐣 𑐎𑐎𑑂𑐲𑐵 𑐱𑐶𑐎𑑂𑐲𑐵 𑐩𑐣𑑂𑐟𑑂𑐬𑐵𑐮𑐫𑑄 𑐀𑐣𑐮𑐵𑐂𑐣 𑐎𑐎𑑂𑐲𑐵 𑐎𑐵𑐫𑐾𑐐𑐸 𑐳𑐸𑐔𑑄 𑐥𑐶𑐟𑐧𑐷 𑐣𑑂𑐴𑑂𑐫𑑅 𑐴𑐾 𑐧𑑂𑐰𑐣𑐵𑐩𑐶𑐥𑐶𑑄𑐳𑑄 𑐱𑐶𑐎𑑂𑐲𑐎𑐥𑐶𑑄𑐮𑐶𑐳𑐾𑑄 𑐳𑐴𑐮𑐴 𑐫𑐵𑐣𑐵𑑅 𑐳𑐸𑐠𑑄𑐫𑑂 𑐐𑐸𑐟𑐵 𑐂𑐮𑑄𑐣𑐶𑐳𑐾𑑄 𑑑𑑐𑑅𑑓𑑐 𑐟𑐵𑑅 𑐃𑐟𑐎 𑐣𑑂𑐴𑑂𑐫𑐵𑐣𑐵𑑅 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋

𑐣𑐾𑐥𑐵𑐮𑐨𑐵𑐲𑐵 𑐎𑐎𑑂𑐲𑐵 𑐀𑐣𑐮𑐵𑐂𑐣𑐥𑐵𑐏𑐾𑑄 𑐱𑐶𑐎𑑂𑐲𑐎 𑐀𑐣𑐸𑐥𑐳𑐶𑑄 𑐳𑐸𑐰𑐵𑐮𑑄 𑐨𑐵𑐲𑐵 𑐰𑐶𑐖𑑂𑐘𑐵𑐣 𑐰 𑐱𑐶𑐎𑑂𑐲𑐶𑐎𑐵 𑐡𑐶𑐥𑐣𑐵 𑐱𑐬𑑂𑐩𑐵𑑄 𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫 𑐂𑐟𑐶𑐴𑐵𑐳𑐫𑐵 𑐀𑐢𑑂𑐫𑐵𑐥𑐣 𑐫𑐵𑐣𑐵𑑅 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋

𑐱𑐶𑐎𑑂𑐲𑐎 𑐀𑐣𑐸𑐥𑐳𑐶𑑄 𑐳𑐸𑐰𑐵𑐮𑐫𑐵𑐎𑐠𑑄, 𑐧𑑂𑐰𑐣𑐵𑐩𑐶𑐥𑐶𑐣𑐶𑐐𑐸 𑐎𑐸𑐟𑐮𑑄 𑐠𑑂𑐰𑐴𑐾 𑐎𑐎𑑂𑐲𑐵 𑐳𑐘𑑂𑐔𑐵𑐮𑐣 𑐖𑐹𑐐𑐸 𑐏𑑅 𑑋 𑐳𑑄𑐳𑐵𑐬 𑐴𑐾 𑐎𑑀𑐬𑑀𑐣𑐵𑐫𑐵 𑐩𑐴𑐵𑐥𑑂𑐬𑐎𑑀𑐥𑐫𑐵 𑐴𑐸𑐣𑐶𑑄 𑐩𑐣𑐹𑐟𑐫𑑂𑐳𑑄 𑐕𑐾𑑃𑐫𑑂 𑐟𑐸𑑄 𑐮𑐎𑐜𑐵𑐄𑐣𑐫𑑂 𑐔𑑂𑐰𑐣𑐾𑐩𑐵𑑅𑐧𑐮𑐾 𑐀𑐣𑐶𑐱𑑂𑐔𑐶𑐟𑐎𑐵𑐮𑐟𑐎 𑐎𑐎𑑂𑐲𑐵 𑐳𑐘𑑂𑐔𑐵𑐮𑐣 𑐧𑐣𑑂𑐡 𑐖𑐹𑐧𑐮𑐾 𑐱𑐶𑐎𑑂𑐲𑐞 𑐳𑐶𑐎𑐵𑐂𑐮𑐫𑑂 𑐣𑐎𑐬𑐵𑐟𑑂𑐩𑐎 𑐮𑐶𑐔𑑂𑐰𑑅 𑐮𑐵𑐂𑐐𑐸 𑐴𑐸𑐣𑐶𑑄 𑐣𑑂𑐴𑐶𑐠𑑄 𑐕𑐾𑑃𑐫𑑂 𑐀𑐠𑐾𑐟𑐸𑑄 𑐔𑑂𑐰𑐣𑐾𑐩𑐵𑐮𑐷𑐧𑐮𑐾 𑐩𑐵𑐣𑐳𑐶𑐎 𑐟𑐣𑐵𑐰 𑐖𑐸𑐂𑐐𑐸𑐮𑐶𑑄 𑐠𑐸𑐐𑐸 𑐎𑐎𑑂𑐲𑐵 𑐳𑐘𑑂𑐔𑐵𑐮𑐣𑐥𑐵𑐏𑐾𑑄 𑐮𑐎𑐜𑐵𑐄𑐣 𑐥𑐵𑐏𑐾𑑄 𑐩𑐸𑐎𑑂𑐟𑐶 𑐰 𑐱𑐶𑐎𑑂𑐲𑐵 𑐣𑑄 𑐎𑐵𑐫𑐾𑐏𑐣𑐵𑑅 𑐔𑑂𑐰𑑄𑐐𑐸 𑐡𑐸 𑑋 𑐠𑐸𑐐𑐸 𑐎𑐎𑑂𑐲𑐵𑐥𑐵𑐏𑐾𑑄 𑐧𑑂𑐰𑐣𑐵𑐩𑐶𑐥𑐶𑑄 𑐮𑐵𑐨𑐵𑐣𑑂𑐰𑐶𑐟 𑐖𑐹𑐐𑐸𑐮𑐶𑑄 𑐁𑐟𑑂𑐩𑐳𑐣𑑂𑐟𑐸𑐲𑑂𑐚𑐶 𑐥𑑂𑐬𑐵𑐥𑑂𑐟 𑐖𑐹𑐐𑐸 𑐡𑐸 𑑋

–𑐬𑐶𑐡𑐾𑐣 𑐩𑐴𑐬𑑂𑐖𑐣, 𑐎𑐶𑐥𑐹

source : newaonlinenews