𑐔𑐶𑐟𑑂𑐬𑐎𑐵𑐬 𑐳𑐩𑐵𑐖 – 𑐥𑐹𑐬𑑂𑐞𑐩𑐵𑐣 𑐔𑐶𑐟𑑂𑐬𑐎𑐵𑐬

𑐔𑐶𑐟𑑂𑐬𑐎𑐵𑐬 𑐳𑐩𑐵𑐖

𑐔𑐶𑐟𑑂𑐬𑐎𑐵𑐬 (𑐥𑐸𑑄) 𑐳𑐩𑐸𑐡𑐵𑐫𑑂 𑐩𑑂𑐴𑐳𑐶𑐎𑐵

– 𑐥𑐹𑐬𑑂𑐞𑐩𑐵𑐣 𑐔𑐶𑐟𑑂𑐬𑐎𑐵𑐬

𑑑. 𑐩𑑂𑐴𑐳𑐶𑐎𑐵

𑐔𑐶𑐟𑑂𑐬𑐎𑐵𑐬 𑐖𑐵𑐟𑐷 𑐟 𑐣𑑂𑐴𑐵𑐥𑐵𑑄 𑐣𑐶𑐳𑐾𑑄 𑐥𑐬𑐩𑑂𑐥𑐬𑐵𑐐𑐟 𑐔𑐶𑐟𑑂𑐬𑐎𑐮𑐵𑐫𑐵 𑐮𑐖𑐐𑐵 (𑐥𑐾𑐱𑐵Occupation) 𑐖𑑂𑐰𑐣𑐵 𑐖𑐷𑐰𑐣 𑐴𑐣𑐵 𑐰𑐫𑐵 𑐔𑑂𑐰𑑄𑐥𑐷𑑄 𑐏𑑅 𑑋 𑐥𑐸𑑄 𑐢𑐂𑐥𑐶𑐳𑑄 𑐩𑐾𑐩𑐾𑐐𑐸 𑐣𑐾𑐰𑐵𑑅 𑐖𑐵𑐟𑐷𑐫𑐵 𑐣𑐵𑐥𑑄 𑐏𑐳 , 𑐐𑐸𑐬𑐸𑐒 𑐩𑐐𑐬 𑐁𑐡𑐶 𑐖𑐵𑐟𑐶𑐫𑐵 𑐡𑐱 𑐎𑐬𑑂𑐩 𑐏𑑄𑐎𑐾𑐟 𑐩𑐵𑑅𑐐𑐸 𑐥𑐸𑐖𑐵 𑐖𑑂𑐰𑐮𑑄 𑐣𑐵𑐥𑑄 𑐎𑐑𑐵𑐂𑐐𑐸 𑐔𑑂𑐰𑐖𑑂𑐫𑐵𑐫𑑂 𑐫𑑀𑐐𑐡𑐵𑐣 𑐰𑐶𑐫𑐵 𑐰𑐂𑐔𑑂𑐰𑑄𑐥𑐶𑑄 𑐏𑑅 𑑋 𑐡𑐾𑐐, 𑐩𑐛 𑐩𑐣𑑂𑐡𑐶𑐬, 𑐰𑐶𑐴𑐵𑐬, 𑐣𑐵𑐳 𑐡𑑂𑐫𑑀𑑅, 𑐁𑐐𑑄 𑐡𑑂𑐫𑑀, 𑐣𑐵𑐥𑑄 𑐡𑑂𑐫𑑀𑐥𑐶𑐣𑑂𑐟 𑐩𑐶𑐏𑐵 𑐎𑑄𑐎𑐾𑐐𑐸 𑐮𑑄𑐥𑐸 𑐕𑐵𑐫𑐾𑐐𑐸 𑐰 𑐳𑐵𑐩𑐵𑐖𑐶𑐎 𑐰𑑂𑐫𑐰𑐴𑐵𑐬𑐾 𑐩𑐵𑑅𑐐𑐸𑐟𑐎 𑐔𑑂𑐰𑐫𑐐𑐸 𑐖𑑂𑐫𑐵 𑐫𑐵𑐣𑐵 𑐔𑑂𑐰𑑄𑐥𑐶𑐣𑐟 𑐴𑐾 𑐥𑐸𑑄 (𑐔𑐶𑐟𑑂𑐬𑐎𑐵𑐬) 𑐢𑐵𑐂 𑑋
𑐬𑐟𑑂𑐣𑐎𑐵𑐖𑐷 𑐧𑐖𑑂𑐬𑐵𑐔𑐵𑐬𑑂𑐫𑐖𑑂𑐫𑐹𑑄 𑐥𑐶𑐎𑐵𑐐𑐸 𑐣𑐾𑐰𑐵𑑅 𑐳𑑄𑐳𑑂𑐎𑐵𑐬 𑐳𑑄𑐳𑑂𑐎𑐺𑐟𑐶𑐫𑐵 𑐟𑐵𑑅 𑐔𑐵 𑐢𑐿𑐐𑐸 𑐳𑐦𑐸𑐟𑐶 𑐣𑑄 𑐣𑑂𑐴𑐾𑐠𑐣𑐵 𑐰𑑅𑐐𑐸 𑐡𑐸 𑑋 𑐥𑐸𑐞𑑂𑐫𑐎𑐵𑐬𑐫𑐵 𑐀𑐥𑑂𑐬𑐨𑑄𑐱𑐫𑑂 𑐥𑐸𑑄 𑐖𑐹𑐰𑑄𑐐𑐸 𑐢𑐎𑐵 𑐣𑑄 𑐢𑐵 𑑋 𑐔𑐶𑐟𑑂𑐬𑐎𑐵𑐬 𑐥𑐸𑑄 𑐟𑐫𑐳𑑄 𑐫𑐵𑐣𑐵 𑐰𑐫𑐵 𑐔𑑂𑐰𑑄𑐐𑐸 𑐮𑐖𑐐𑐵𑑅 𑐎𑐠𑑄 𑐥𑐸𑐞𑑂𑐫 𑐎𑐵𑐬𑑂𑐫 𑐳 𑐣𑑂𑐴𑐫𑐵𑐰𑐮𑐾𑑄 𑐟𑐟𑑂𑐥𑐬 𑐖𑐸𑐫𑐵 𑐥𑐸𑐰𑑄𑐎𑐶𑐥𑐶𑑄 𑐖𑐹𑐐𑐸𑐮𑐷𑑄 𑐥𑐸𑑄 𑐢𑐵𑑅𑐐𑐸 𑐏𑑅 𑑋 𑐐𑐸𑐮𑐶𑐣𑑄 𑐡𑐾𑐐𑑅 𑐡𑐾𑐐𑐮𑐫𑑂 𑐰𑐶𑐖𑑂𑐫𑐵𑐣𑐵 𑐔𑑂𑐰𑑄𑐥𑐶𑑄 𑐡𑐾𑐰𑐡𑐾𑐰𑐷 𑐟𑐫𑑂𑐟 𑐮𑑂𑐬𑐩𑑂𑐥𑐸𑐮𑐶𑑄 𑐕𑐵𑐫𑐾𑐐𑐸 𑐖𑑂𑐫𑐵𑐫𑐵𑐣𑐵 𑐡𑐾𑐰𑐡𑐾𑐰𑐷 𑐥𑐶𑐣𑐷𑐐𑐸 𑐩𑐹𑐬𑑂𑐟𑐶 𑐥𑐸𑐰𑑄𑐎𑐾𑐫𑐵 𑐣𑐵𑐥𑐣𑐵𑐥𑑄 𑐥𑐹𑐖𑐵 𑐎𑑂𑐬𑐶𑐫𑐵𑐳 𑐕𑐾𑐫𑐾𑐮𑐾 𑐩𑐵𑑅𑐐𑐸 𑐐𑑄 𑐎𑐮𑐱, 𑐥𑐹𑐬𑑂𑐞𑐵𑐎𑐮𑐱, 𑐀𑐲𑑂𑐚𑐩𑑄𑐐𑐮 𑐥𑑁𑐨𑐵𑑅 𑐁𑐡𑐶 𑐔𑑂𑐰𑐫𑐵𑑅 𑐳𑐵𑐎𑐵𑐬 𑐬𑐸𑐥 𑐰𑐷𑐥𑐶𑑄 𑐖𑐹𑐐𑐸𑐮𑐶𑑄 𑐣𑑄 𑐠𑑂𑐰 𑐖𑐵𑐟𑐶𑐫𑐵𑐟 𑐥𑐸𑑄 𑐢𑐫𑐵𑐐𑐸 𑐳𑑄𑐖𑑂𑐘𑐵 𑐰𑐶𑐫𑐵 𑐔𑑂𑐰𑑄𑐐𑐸 𑐏𑑅 𑑋
𑐠𑑂𑐰𑑅 𑐴𑐾 𑐥𑐸𑑄 𑐟𑐫𑑂𑐐𑐸 𑐮𑐖𑐐𑐵𑐫𑐵 𑐴𑑂𑐫𑐹𑐥𑐵 𑐎𑐠𑑄 𑐠𑑁𑐎𑐣𑑂𑐴𑐫𑑂 𑐰𑐫𑐵 𑐳𑐩𑐳𑐵𑐩𑐫𑐶𑐎 𑐎𑐮𑐵 𑐩𑑀𑐜𑐬𑑂𑐣 𑐁𑐬𑑂𑐚 𑐣𑐵𑑄 𑐎𑑅𑐢𑐵𑐣𑐵 𑐰𑐫𑐵 𑐔𑑂𑐰𑑄𑐐𑐸 𑐡𑐸 𑑋 𑐔𑐶𑐟𑑂𑐬𑐎𑐵𑐬 (𑐥𑐸𑑄) 𑐟𑐫𑑂𑐳𑑄 𑐔𑑂𑐰𑐂𑐐𑐸 𑐔𑐶𑐟𑑂𑐬𑐎𑐮𑐵 𑐏𑑄𑐫𑑂 𑐠𑑅𑐐𑐸 𑐴𑐾 𑐩𑑁𑐮𑐶𑐎𑐥𑐣𑐵 𑐡𑐸 𑑋 𑐢𑐵𑐬𑑂𑐩𑐶𑐎 𑐖𑑂𑐫𑐵 𑐰 𑐳𑐵𑑄𑐳𑑂𑐎𑐺𑐟𑐶 𑐖𑑂𑐫𑐵𑐫𑐵𑐟 𑐳𑑂𑐰𑐵𑐥𑐹 𑐟𑐫𑐵 𑐠𑑅𑐐𑐸 𑐴𑐾 𑐩𑑁𑐮𑐶𑐎𑐟𑐵 𑐰𑐶𑐫𑐵 𑐔𑑂𑐰𑑄𑐥𑐶𑑄 𑐥𑐸𑐞𑑂𑐫𑐎𑐵𑐬 (𑐥𑐸𑑄) 𑐏𑑅 𑑋

𑑒. 𑐠𑐵𑐫𑑂𑐧𑐵𑐫𑑂 𑐰 𑐖𑐣𑐳𑑄𑐏𑑂𑐫𑐵𑑅

𑐔𑐶𑐟𑑂𑐬𑐎𑐵𑐬 𑐟 𑐏𑐵𑐳 𑐫𑐵𑐣𑐵 𑐳𑑂𑐰𑐵𑐣𑐶𑐐𑐫𑐵 𑐧𑐵𑐳𑐷 𑐟 𑐖𑐹𑐐𑐸𑐮𑐶𑑄 𑐫𑐾𑑃 , 𑐫𑐮, 𑐏𑑂𑐰𑐥, 𑐡𑐾𑐱𑐾 𑐔𑑂𑐰𑐣𑐵 𑐔𑑂𑐰𑑄𑐐𑐸 𑐡𑐸 𑑋 𑐰𑑄𑐱 𑐰 𑐥𑐸𑐳𑑂𑐟𑐵 𑐠𑐵𑐫𑑂 𑐴𑐶𑐮𑐵 𑐩𑐾𑐩𑐾 𑐠𑐵𑐫𑑂 𑐔𑑂𑐰𑑄 𑐰𑑄𑐥𑐶 𑐩𑐢𑑂𑐫𑐾 𑐣𑐸𑐰𑐵𑐎𑑀𑐚, 𑐢𑐵𑐡𑐶𑐒𑑂𑐐, 𑐧𑐣𑐾𑐥𑐵, 𑐢𑐸𑐮𑐶𑐏𑐾𑐮, 𑐴𑐾𑐚𑑁𑐜𑐵, 𑐥𑐵𑐮𑑂𑐥𑐵, 𑐣𑐵𑐬𑐵𑐫𑐞𑐑𑐵𑐚 𑐰 𑐔𑐶𑐟𑐮𑐵𑐒 𑐁𑐡𑐶 𑐠𑐵𑐳𑐾 𑐣𑑄 𑐔𑐶𑐟𑑂𑐬𑐎𑐵𑐬 𑐟𑐫𑑂𑐐𑐸 𑐧𑐳𑑀𑐧𑐵𑐳 𑐖𑐸𑐫𑐵 𑐔𑑂𑐰𑑄𑐐𑐸 𑐡𑐸 𑑋 𑐩𑑁𑐖𑐵 𑐡𑐸𑐥𑐶𑑄 𑐔𑐶𑐟𑑂𑐬𑐎𑐵𑐬 𑐟 𑐗𑐵𑐥𑐵, 𑐰𑐬𑑂𑐡𑐶𑐫𑐵, 𑐖𑐣𑐎𑐥𑐸𑐬 𑐰𑐷𑐬𑐐𑑄𑐖 𑐰 𑐰𑐶𑐬𑐵𑐚𑐣𑐐𑐬 𑐁𑐡𑐶 𑐠𑐵𑐳𑐾 𑐣𑑄 𑐔𑑂𑐰𑑄𑐥𑐶 𑐡𑐸 𑑋 𑐠𑐵𑐫𑑂 𑐰𑐵𑐫𑑂 𑐴𑐶𑐮𑐵 𑐰𑐣𑐵 𑐔𑑂𑐰𑑄𑐥𑐶 𑐔𑐶𑐟𑑂𑐬𑐎𑐵𑐬 (𑐥𑐸𑑄) 𑐟𑐫𑑂𑐳𑑄 𑐠𑐐𑐸 𑐥𑐬𑐩𑑂𑐥𑐬𑐵𑐐𑐟 𑐮𑐖𑐐𑐵 𑐖𑑂𑐰𑐣𑐵 𑐖𑑂𑐫𑐵 𑐫𑐵𑐣𑐵 𑐔𑑂𑐰𑑄𑐐𑐸 𑐢𑐵𑐳𑐵 𑐣𑑂𑐫𑐣𑐾 𑐩𑐡𑐸 𑑋
𑐥𑐸𑑄 𑐟𑐫𑑂𑐐𑐸 𑐖𑐣 𑐳𑑄𑐏𑑂𑐫𑐵 𑐠𑐸𑐮𑐶𑐴𑐾 𑐡𑐸 𑐢𑐿𑐐𑐸 𑐁𑐢𑐶𑐎𑐵𑐬𑐷𑐎 𑐟𑐠𑑂𑐫𑐵𑑃𑐒𑑂𑐎 𑐔𑐶𑐟𑑂𑐬𑐎𑐵𑐬 (𑐥𑐸𑑄) 𑐳𑐩𑐵𑐖𑑄 𑐣𑑄 𑐳𑐷𑐎𑐾𑐫𑐵 𑐮𑐵𑐐𑐶 𑐀𑐣𑐸𑐳𑐣𑑂𑐢𑐵𑐣 𑐴𑐾 𑐫𑐵𑐫 𑐩𑐵𑐣𑐷𑐐𑐸 𑐡𑐸 𑑋 𑐀𑐫𑑂𑐳𑐵𑑄 𑐳𑐩𑑂𑐥𑐬𑑂𑐎 𑐡𑐸𑑄 𑐎𑐠𑑄 𑐣𑑂𑐫𑐣𑐾 𑐎𑐣𑐾 𑐫𑐵𑐣𑐵𑐧𑐮𑐫𑑂 𑐎𑐬𑐶𑐰 𑑗𑑐𑑐𑑐(𑐣𑑂𑐴𑐫𑑂𑐡𑑀) 𑐟𑐶 𑐡𑐸𑐐𑐸 𑐏𑑄 𑐠𑐣 𑐣𑑂𑐴𑐠𑐣𑐵 𑐔𑑂𑐰𑐣𑐵 𑑋

 

𑑓. 𑐱𑐶𑐮𑑂𑐥 𑐥𑑂𑐬𑐰𑐶𑐢𑐶 𑐰 𑐮𑐖𑐐𑐵𑑅

𑐔𑐶𑐟𑑂𑐬𑐎𑐵𑐬 (𑐥𑐸𑑄) 𑐟𑐫𑑂𑐐𑐸 𑐱𑐶𑐮𑑂𑐥 𑐏𑐵𑐳 𑐫𑐵𑐣𑐵 𑐣𑐾𑐰𑐵 𑐖𑐵𑐟𑐶𑐫𑐵 𑐰𑐶𑐢𑐶 𑐰𑑂𑐫𑐰𑐴𑐵𑐬 𑐴𑐣𑐾𑐟 𑐩𑐵𑑅𑐐𑐸 𑐖𑑂𑐰𑐮𑑄𑐟 𑐩𑐢𑑂𑐫𑐾 𑐣𑐵𑐐 𑐔𑑂𑐰𑐫𑐐𑐸, 𑐮𑐎𑑂𑐲𑑂𑐩𑐷 𑐡𑑂𑐫𑑀, 𑐳𑐵𑐫𑐵 𑐰𑐂𑐧𑐮𑐾 𑐟𑐂𑐐𑐸 𑐏𑑂𑐰𑐵𑐥𑐵𑑅 𑐩𑑀𑐴𑐣𑐷𑐫𑐵 𑐨𑐐𑐰𑐟𑐷 𑐡𑐸𑐬𑑂𑐐𑐵 𑐨𑐰𑐵𑐣𑐷, 𑐳𑑀𑐣𑑂𑐟𑐷 𑐣𑐏𑑅𑐫𑐵 𑐮𑐎𑑂𑐲𑑂𑐩𑐷 𑐡𑑂𑐫𑑀 , 𑐂𑐴𑐶𑐥𑐵 𑐫𑐵𑐂𑐰𑐮𑐾 𑐮𑐸𑐏𑐵 𑐡𑐸𑐰𑐵 𑐔𑑂𑐰𑐫𑐾𑐐𑐸 𑐣𑑂𑐴𑐹𑐐𑐸 𑐕𑐾𑑄 𑐡𑐣𑐷𑐰𑐮𑐾 𑐱𑐵𑐣𑑂𑐟𑐷 𑐳𑑂𑐰𑐳𑑂𑐟𑐷𑐫𑐵 𑐥𑑂𑐬𑐟𑐶𑐎 𑐀𑐲𑑂𑐚 𑐩𑑄𑐐𑐮, 𑐳𑐮𑐵𑐥𑐵 𑐔𑑂𑐰𑐫𑐾𑐐𑐸, 𑐩𑐬𑐷𑐎𑐳𑐷 𑐔𑑂𑐰𑐫𑐐𑐸 𑐁𑐡𑐶 𑐔𑑂𑐰 𑐖𑑂𑐫𑐵𑐫𑑂 𑐠𑑅𑐐𑐸 𑐱𑐶𑐮𑑂𑐥 𑐎𑑂𑐫𑐣𑐵 𑐔𑑂𑐰𑑄𑐥𑐶𑑄 𑐏𑑅 𑑋 𑐠𑑁𑑄𑐎𑐣𑑂𑐴𑐾𑐫𑐵𑐐𑐸 𑐥𑑂𑐬𑐾𑐱 𑐴𑐾 𑐩𑐡𑐸𑐣𑐷 𑐰𑐮𑐾 𑐳𑐶𑑄𑐫𑐵𑐐𑐸 𑐠𑐵𑐳𑐵 𑐡𑐫𑐾𑐎𑐵 𑐠𑐷 𑐠𑐷 𑐬𑑄𑐐 𑐨𑐬𑐾𑐫𑐵𑐣𑐵 𑐔𑐶𑐟𑑂𑐬 𑐟 𑐥𑐶𑐎𑐫𑐵 𑐔𑑂𑐰𑑄𑐥𑐶𑑄 𑐏𑑅 𑑋 𑐨𑐹𑐐𑐬𑑂𑐨𑐶𑐎 𑐏𑐵𑐣𑐷 𑐥𑐵𑐏𑐾𑑄 𑐥𑐶𑐴𑐵𑑄 𑐰𑐐𑐸 𑐥𑑂𑐬𑐵𑐎𑐺𑐟𑐶𑐎 𑐬𑑄𑐐𑐫𑐵𑐟 𑐥𑐸𑐟𑑂 𑐰𑑄𑐎𑐵 𑐎𑐾𑐮𑐵𑑅 𑐥𑐎𑑂𑐎𑐵𑐐𑐸 𑐬𑑄𑐐 𑐟𑐫𑐵 𑐠𑐷 𑐠𑐷 𑐡𑑂𑐫𑑀 𑐟𑐫𑑂𑐐𑐸 𑐥𑑁𑐨𑐵 𑐔𑑂𑐰𑐫𑐾𑐐𑐸 𑐖𑑂𑐫𑐵 𑐫𑐵𑐣𑐵 𑐰𑐐𑐸 𑐡𑐸 𑑋 𑐠𑑁𑐎𑐣𑑂𑐴𑐾 𑐬𑐳𑐵𑐫𑐣𑐶𑐎 𑐩𑐶𑐱𑑂𑐬𑐞𑑄 𑐟𑐫𑐵𑐬𑐷 𑐬𑑄𑐐 𑐟 𑐰𑐫 𑐣𑑂𑐴𑑂𑐫𑑀 𑐠𑑅𑐥𑐶𑐣𑑂𑐳 𑐴𑐾 𑐬𑑄𑐐 𑐡𑐫𑑂𑐾𑐎𑐵 𑐥𑑁𑐨𑐵 𑐔𑑂𑐰𑐂𑐐𑐸 𑐏 𑑋 𑐠𑐖𑑂𑐫𑐵𑐐𑐸 𑐬𑑄𑐐𑑄 𑐔𑑂𑐰𑐫𑐵 𑐟𑑅𑐐𑐸 𑐔𑐶𑐟𑑂𑐬 𑐟 𑐦𑑀𑐴𑐬 𑐖𑐸𑐫𑐵 𑐧𑐵𑑃𑐩𑐮𑐵𑐣𑐵 𑐰𑑄𑐳𑐵 𑐮𑐏𑑄 𑐳𑐶𑐮𑐾𑐰𑐮𑐫𑑂 𑐫𑐔𑑂𑐔𑐸𑐳𑐾 𑐔𑑂𑐰𑐣𑐵 𑐰 𑑋 𑐠𑐸𑐎𑐶𑐫𑐵 𑐀𑐮𑐵𑐰𑐵 𑐏𑑂𑐰𑐵𑐥𑐵 𑐡𑐫𑐎𑐾𑐐𑐸, 𑐔𑑂𑐰𑐫𑐐𑐸 𑐖𑑂𑐫𑐵 𑐣𑑄 𑐦𑐸𑐎 𑐔𑐶𑐟𑑂𑐬𑐎𑐵𑐬 𑐟𑐫𑐳𑑄 𑐫𑐵𑐣𑐵 𑐰𑑅𑐐𑐸 𑐡𑐸 𑑋 𑐥𑐶𑐛 𑐥𑐶𑐛𑐫𑐵 𑐐𑑄 𑐥𑑂𑐫𑐵𑐏𑑄 𑐣𑐰𑐡𑐸𑐬𑑂𑐐𑐵 𑐡𑑂𑐫𑑀, 𑐮𑐵𑐏𑐾, 𑐟𑐵𑐣𑐵𑑄 𑐎𑐶𑐳𑐷 𑐁𑐡𑐶 𑐥𑐶𑐣𑐷 𑐏𑑂𑐰𑐵𑐥𑐵 𑐡𑐫𑐾𑐎𑐾𑐐𑐸 𑐰 𑐔𑑂𑐫𑐫𑑂𑐐𑐸 𑐖𑑂𑐫𑐵 𑐫𑐵𑐣𑐵 𑐰𑑅𑐐𑐸 𑐡𑐸 𑑋 𑐔𑐶𑐟𑑂𑐬 𑐮𑑂𑐴𑐵 𑐔𑐶𑐮𑑂𑐮𑐵 𑐔𑑂𑐰𑐫𑐾𑐐𑐸 𑐡𑑂𑐫𑑀𑐫𑐵𑐐𑐸 𑐏𑑂𑐰𑐵𑐥𑐵 (𑐣𑐰𑐡𑐸𑐬𑑂𑐐𑐵) 𑐡𑐫𑐎𑐶𑐰𑐮𑐾 𑐳𑐸𑐔𑐶𑐣𑐶𑐔𑐶 𑐫𑐵𑐣𑐵 𑐰𑐶𑐢𑐶 𑐥𑐸𑑄𑐰𑑄𑐎 𑐡𑐫𑐎𑐾 𑐩𑐵𑐐𑐸 𑐰 𑐔𑐶𑐟𑑂𑐬𑐎𑐵𑐬 𑐫𑐵𑐐𑐸 𑐖𑑂𑐫𑐵 𑐳𑐶𑐩𑐢𑐾𑐎𑑄 𑐥𑐸𑐖𑐵𑐫𑐵 𑐰𑐶𑐢𑐶 𑐥𑐸 𑐩𑐰𑐣𑐶𑐐𑐸 𑐁𑐐𑑄𑐡𑑂𑐫𑑀, 𑐣𑐵𑐳𑑅 𑐡𑑂𑐫𑑀 𑐔𑑂𑐰𑐫𑐧𑐮𑐾 𑐩𑐶𑐏𑐵 𑐩𑐎𑐾𑑄𑐎𑑄 𑐥𑐸 𑐩𑐰𑐣𑐷𑐐𑐸 (𑐥𑐹𑐬𑐵 𑐩𑐖𑑂𑐰𑐷𑐐𑐸) 𑐠𑑂𑐰𑐴𑐾 𑐥𑐸𑑄 𑐟𑐫𑐳𑑄 𑐔𑑂𑐰𑐖𑑂𑐫𑐵 𑐥𑐸 𑐰𑐎𑐷𑐐𑐸 𑐖𑐹𑐐𑐸𑐮𑐶𑑄 𑐠𑑂𑐰 𑐔𑑂𑐰𑐿𑐥𑐶𑐣𑑂𑐟 𑐥𑐸𑑄 𑐢𑐎𑐵 𑐢𑐵𑐂𑐐𑐸 𑐮𑑀𑐎 𑐫𑐸𑐎𑑂𑐟𑐶 𑐡𑐫𑐵 𑐔𑑂𑐰𑑄𑐐𑐸 𑐏𑑅 𑑋 𑐫𑐮𑐾, 𑐧𑐸𑑄𑐐𑐡𑑂𑐫𑑀, 𑐀𑐲𑑂𑐚𑐩𑐵𑐟𑑂𑐬𑐶𑐎𑐵, 𑐁𑐡𑐶 𑐐𑑄𑐥𑑂𑐫𑐵𑐏𑑄 𑐡𑑂𑐫𑑀 𑐟𑐫𑑂𑐐𑐸 𑐬𑑄𑐐 𑐟𑐫𑐵 𑐥𑐸𑑄 𑐰𑑄𑐎𑐾𑐐𑐸 𑐖𑑂𑐫𑐵 𑐣𑑄 𑐫𑐵𑐣𑐵 𑐰𑐫𑐵 𑐔𑑂𑐰𑑄𑐐𑐸 𑐏𑑅 𑑋 𑐠𑐸𑐎𑐶𑐫𑐵 𑐀𑐮𑐵𑐰𑐵 𑐦𑑀𑐚𑑀 𑐐𑑂𑐬𑐵𑐦𑐶 𑐰 𑐬𑐵𑐞𑐵 𑐎𑐵𑐮𑐶𑐣 𑐣𑐶𑐳𑐾 𑐬𑐵𑐖𑐥𑐬𑐶𑐰𑐵𑐬 𑐥𑐶𑐣𑐷𑐐𑐸 𑐮𑐵𑐂𑐦 𑐳𑐵𑐂𑐖𑐫𑐵 𑐦𑑀𑐚𑑀 𑐟 𑐔𑑂𑐰𑐫𑐾𑐐𑐸 , 𑐦𑑀𑐚𑑀 𑐏𑐶𑐔𑐾 𑐫𑐵𑐫𑐐𑐸 𑐁𑐡𑐶 𑐖𑑂𑐫𑐵 𑐫𑐵𑐣𑐵 𑐰𑐫𑐵 𑐔𑑂𑐰𑑄𑐐𑐸 𑐡𑐸 𑑋 𑐠𑐸𑐎𑐶𑐫𑐵 𑐣𑐵𑐥 𑐃 𑐎𑐠𑑄 𑐧𑐸𑑄𑐖𑑂𑐫𑐵, 𑐳𑐶𑐎𑑅𑐩𑐷, 𑐡𑐎𑑅𑐩𑐷, 𑐱𑐶𑐎𑑂𑐲𑐎, 𑐄𑐡𑑂𑐫𑐩𑐷, 𑐳𑐬𑐎𑐵𑐬𑐷 𑐳𑐾𑐰𑐵𑐫𑑂 , 𑐳𑑂𑐰𑐵𑐳𑑂𑐠𑑂𑐫 𑐳𑐾𑐰𑐵 𑐁𑐡𑐶 𑐰𑑂𑐫𑐰𑐴𑐵𑐬𑐶𑐎 𑐖𑐷𑐰𑐣𑐫𑐵𑐟 𑐩𑐵𑐐𑐸 𑐎𑐠𑑄𑐫𑐵 𑐠𑐷 𑐠𑐷 𑐖𑑂𑐫𑐵 𑐣𑑄 𑐫𑐵𑐣𑐵 𑐰𑐫𑐵 𑐔𑑂𑐰𑑄𑐐𑐸 𑐡𑐸 𑑋

𑑔. 𑐢𑐵𑐬𑑂𑐩𑐶𑐎 𑐰 𑐳𑐵𑑄𑐳𑑂𑐎𑐺𑐟𑐶𑐎𑑅

𑐔𑐶𑐟𑑂𑐬𑐎𑐵𑐬 (𑐥𑐸𑑄) 𑐟𑐫𑑂𑐐𑐸 𑐳𑐵𑐩𑐵𑐖𑐶𑐎 𑐎𑐺𑐫𑐵𑐎𑐮𑐵𑐥𑐫𑐵 𑐣𑐵𑐥 𑐣𑐵𑐥𑑄 𑐢𑐵𑐬𑑂𑐩𑐶𑐎 𑐥𑐬𑐩𑑂𑐥𑐬𑐵𑐫𑑂 𑐣𑑂𑐴𑐫𑐵𑐐𑐸 𑐥𑐸𑐖𑐵 𑐁𑐖𑐵𑐫𑑂 𑐥𑐸𑐬𑑀𑐴𑐶𑐟 𑐐𑐸𑐬𑐸𑐖𑑂𑐫𑐸𑐥𑐶𑑄 𑐟𑐫𑐵 𑐥𑐸𑐖𑐵 𑐫𑐵𑐫𑐾𑐐𑐸 𑐔𑐮𑐣 𑐡𑐸 𑑋 𑐥𑐸𑑄𑐟 𑐩𑐴𑐵𑐫𑐵𑐣 𑐰𑐖𑑂𑐬𑐫𑐵𑐣𑐫𑑂 𑐡𑐷𑐎𑑂𑐲𑐶𑐟 𑐖𑐸𑐫𑐵 𑐧𑑁𑐡𑑂𑐢 𑐢𑐬𑑂𑐩 𑐢𑐵𑐬𑐞 𑐫𑐵𑐣𑐵 𑐣𑐾𑐥𑐵 𑐡𑐾𑐫𑐵 𑐳𑑄𑐳𑑂𑐎𑐵𑐬 𑐰 𑐳𑐵𑑄𑐳𑑂𑐎𑐺𑐟𑐶𑐫𑐵𑐟 𑐟𑐾𑐰 𑐰𑐶𑐫𑐵 𑐰𑐫𑐵 𑐔𑑂𑐰𑑄𑐥𑐶𑑄 𑐏𑑅 𑑋
𑐥𑐸𑑄 𑐳𑐩𑐸𑐡𑐵𑐫𑐫𑐵 𑐠𑐷 𑐠𑐷 𑐎𑐠𑑄𑐫𑐵 𑐳𑑄𑐳𑑂𑐎𑐺𑐟𑐶 𑐳𑑄𑐳𑑂𑐎𑐵𑐬𑑄 𑐰 𑐢𑐬𑑂𑐩 𑐎𑐬𑑂𑐩𑐫𑐵 𑐳𑐩𑑂𑐥𑐹𑐬𑑂𑐞 𑐥𑐸𑐖𑐵𑐫𑑂 𑐐𑐸𑐨𑐵𑐖𑐸 𑐴𑐾 𑐩𑐵𑑅 𑑋 𑐥𑐬𑐖𑐵𑐟 𑐣𑐵𑐥 𑐂𑐴𑐶𑐥𑐵𑑄 𑐖𑐸𑐫𑐵 𑐳𑑄𑐳𑑂𑐎𑐵𑐬 𑐣𑑂𑐴𑑂𑐫𑐵𑐎𑐵 𑐔𑑂𑐰𑑄𑐥𑐶𑑄𑐳𑑄 𑐧𑑂𑐬𑐩𑑂𑐬𑑂𑐴𑐹 𑐥𑐸𑐬𑑀𑐴𑐶𑐟 𑐟𑐫𑐵 𑐣𑑄 𑐰𑐶𑐢𑐶 𑐰𑑂𑐫𑐰𑐴𑐵𑐬 𑐣𑑂𑐴𑑂𑐫𑐵𑐎𑐵 𑐔𑑂𑐰𑑄𑐥𑐶𑑄 𑐡𑐸 𑑋 𑐧𑑁𑐡𑑂𑐢 𑐢𑐬𑑂𑐩 𑐎𑑅𑐢𑐵𑐣𑐵 𑐧𑐖𑑂𑐬𑐵𑐔𑐵𑐬𑑂𑐫 𑐥𑐶𑑄 𑐥𑐸𑐬𑑀𑐴𑐶𑐟 𑐟𑐫𑐵 𑐎𑐬𑑂𑐩 𑐎𑐵𑐞𑑂𑐜 𑐫𑐵𑐣𑐵𑑅 𑐰𑐫𑐵 𑐔𑑂𑐰𑑄𑐳𑐵 𑐧𑐖𑑂𑐬𑐫𑐵𑐣𑐫𑐵 𑐣𑐵𑐥 𑐣𑐵𑐥𑑄 𑐠𑐾𑐬𑐰𑐵𑐡𑐫𑐵 𑐳𑐶𑐡𑑂𑐢𑐵𑐣𑑂𑐟 𑐎𑐠𑑄 𑐧𑑁𑐡𑑂𑐢 𑐰𑐶𑐴𑐵𑐬𑐾 𑐰𑐣𑐵 𑐨𑐶𑐔𑑂𑐎𑑂𑐲𑐸 𑐀𑐣𑐵𑐐𑐬𑐶𑐎𑐵 𑐥𑐶𑑄𑐠𑐵𑐫𑑂 𑐰𑐣𑐾𑐐𑐸 𑑋 𑐰 𑐂𑐴𑐶 𑐫𑐵𑐫𑐾𑐐𑐸 𑐧𑐵𑐴𑑂𑐬𑐵 𑐟𑐫𑑂𑐐𑐸 𑐁𑐡𑐶 𑐎𑐬𑑂𑐩 𑐟 𑐠𑐾𑐬𑐰𑐵𑐡 𑐧𑑁𑐡𑑂𑐢 𑐢𑐬𑑂𑐩 𑐀𑐣𑐸𑐳𑐵𑐬 𑐣𑑄 𑐣𑑂𑐴𑐫𑐵𑐎𑐵 𑐰𑐫𑐵 𑐔𑑂𑐰𑑄𑐐𑐸 𑐡𑐸 𑑋 𑐔𑐶𑐟𑑂𑐬𑐎𑐵𑐬 (𑐥𑐸𑑄) 𑐳𑐩𑐵𑐖𑑄 𑐣𑑄 𑐂𑐮𑐾𑐧𑑂𑐫𑐮𑐾 𑐧𑑁𑐡𑑂𑐢 𑐟𑐶𑐬𑑂𑐠 𑐫𑐵𑐟𑑂𑐬𑐵 𑐢𑐎𑐵 𑐧𑑁𑐡𑑂𑐢 𑐰𑐶𑐴𑐵𑐬𑐾 𑐫𑐵𑐟𑑂𑐬𑐵 𑐰𑐣𑐾𑐐𑐸 𑐣𑑄 𑐔𑐮𑐣 𑐖𑐸𑐫𑐵 𑐰𑑅𑐐𑐸 𑐡𑐸 𑑋
𑐔𑐶𑐟𑑂𑐬𑐎𑐵𑐬 (𑐥𑐸𑑄) 𑐟𑐫𑑂𑐳𑑄 𑐁𑐐𑑄 𑐝𑐎𑐷𑑄 𑐰 𑐰𑐖𑑂𑐬𑐫𑐵𑐣𑐫𑐵 𑐳𑑄𑐳𑑂𑐎𑐵𑐬 𑐳𑐩𑑂𑐰𑐣𑑂𑐢𑐶 𑐔𑐶𑐟𑑂𑐬𑐟 𑐔𑑂𑐰𑐂𑐐𑐸 𑐖𑐹𑐐𑐸𑐮𑐶𑑄 𑐴𑐾 𑐐𑐸𑐬𑐸𑐖𑐸 𑐥𑐶𑐳𑑄 𑐰𑐶𑐱𑐾𑐲 𑐎𑐠𑑄 𑐔𑐶𑐟𑑂𑐬𑐎𑐵𑐬 (𑐥𑐸𑑄) 𑐟𑐫𑑂𑐟 𑐡𑐶𑐎𑑂𑐲𑐶𑐟 𑐫𑐵𑐣𑐵 𑐡𑐾𑐏𑐵 𑐰𑐶𑐂𑐐𑐸 𑐔𑐮𑐣 𑐁𑐟𑐎𑐣𑑄 𑐣𑑂𑐴𑑂𑐫𑐵𑐣𑐵 𑐰𑐫𑐵 𑐔𑑂𑐰𑑄𑐐𑐸 𑐡𑐸 𑑋 𑐠𑐷 𑐠𑐷 𑐎𑐵𑐬𑐞𑐫𑐵𑐣𑐵 𑐠𑑂𑐰 𑐡𑐾𑐏𑐵 𑐎𑐵𑐫𑐾𑐐𑐸 𑐥𑑂𑐬𑐎𑑂𑐬𑐶𑐫𑐵𑐫𑑂 𑐎𑐩𑐶 𑐰𑐫𑐵 𑐔𑑂𑐰𑑄𑐐𑐸 𑐏𑐣𑐾𑐡𑐸 𑑋

𑑕. 𑐋𑐟𑐶𑐴𑐵𑐳𑐶𑐎 𑐥𑐺𑐲𑑂𑐛𑐨𑐹𑐩𑐶

𑐖𑐰 𑐣𑐾𑐥𑐵𑑅 𑐐𑐵𑐮𑐫𑑂 𑐣𑐾𑑄.𑐳𑑄. 𑑔𑑔𑑕 𑐥𑐵𑐏𑐾 𑐧𑐸𑐡𑑂𑐢 𑐢𑐬𑑂𑐩 𑐀𑐣𑑂𑐟𑐬𑑂𑐐𑐟𑐫𑐵 𑐧𑐖𑑂𑐬𑐫𑐵𑐣𑐷 𑐳𑐩𑑂𑐥𑑂𑐬𑐡𑐵𑐫𑐫𑐵 𑐨𑐶𑐎𑑂𑐲𑐸𑐟 𑐨𑐵𑐬𑐟 𑐥𑐵𑐏𑐾𑑄 𑐡𑐸𑐴𑐵𑑄 𑐰𑐮, 𑐀𑐣𑑄𑐮𑐶𑐥𑐵 𑐫𑐎𑑂𑐎𑑀 𑐢𑐿𑐠𑐾𑑄 𑐣𑐾𑐰𑐵 𑐟𑐫𑑂𑐐𑐸 𑐧𑐖𑑂𑐬𑐫𑐵𑐣 𑐳𑐶𑐡𑑂𑐢𑐵𑐣𑑂𑐟 𑐎𑐠𑑄 𑐥𑐸𑐖𑐵 𑐫𑐵𑐫𑐾𑐐𑐸 𑐔𑐮𑐣 𑐰 𑐧𑑁𑐡𑑂𑐢 𑐩𑐵𑐬𑑂𑐐𑐶𑐟 𑐧𑐖𑑂𑐬𑐫𑐵𑐣𑐷 𑐴𑐾 𑐖𑐸𑐫𑐵 𑐰𑐐𑐸 𑐏𑑅 𑑋 𑐠𑑂𑐰 𑐳𑐩𑐸𑐡𑐵𑐫𑐮𑐫𑑂 𑐣𑐾.𑐳𑑄. 𑑕𑑐𑑐 𑐥𑐵𑐏𑐾 𑐎𑐚𑑂𑐚𑐬 𑐴𑐶𑐣𑑂𑐡𑐸 𑐢𑐬𑑂𑐩𑐫𑐵 𑐀𑐣𑐸𑐫𑐵𑐫𑐷 𑐖𑐸𑐖𑐸 𑐖𑐫𑐳𑑂𑐠𑐶𑐟𑐶 𑐩𑐮𑑂𑐮𑑄 𑐨𑐵𑐬𑐟𑐫𑐵 𑐠𑐷 𑐠𑐷 𑐠𑐵𑐳𑑄 𑐧𑐩𑑂𑐬𑑂𑐴𑐹𑐟 𑐳𑐟𑐵𑑅 𑐂𑐩𑐶𑐐𑐸 𑐳𑐮𑑂𑐮𑐵 𑐎𑐠𑑄 𑐴𑐶𑐣𑑂𑐡𑐸 𑐢𑐬𑑂𑐩 𑐩𑐵𑐣𑐫𑑂 𑐫𑐵𑐫𑐾𑐩𑐵𑐐𑐸 𑐎𑐠𑑄 𑐡𑐰𑐵𑐰 𑐰𑐶𑐫𑐵 𑐎𑐬𑑄 𑐮𑐵𑐡𑑂𑐫𑑂 𑐫𑐵𑐣𑐵 𑐧𑐸𑐡𑑂𑐢 𑐢𑐬𑑂𑐩𑐫𑐵𑐟 𑐣𑑂𑐴𑑄𑐎𑐵 𑐕𑑂𑐰𑐫𑑂𑐐𑐸 𑐣𑐶𑐫𑐟𑑄 𑐨𑐶𑐎𑑂𑐲𑐸𑐟𑐫𑑂𑐟 𑐨𑐶𑐎𑑂𑐲𑐸 𑐖𑐸𑐂 𑐩𑐡𑐂𑐐𑐸 𑐎𑐵𑐣𑐹𑐣 𑐮𑐵𑐐𑐸 𑐫𑐵𑐣𑐵 𑐰𑐶𑐳𑐾𑑄𑐮𑐶 𑐰𑐴𑐾 𑐨𑐶𑐎𑑂𑐲𑐸𑐟 (𑐧𑐖𑑂𑐬𑐫𑐵𑐣𑐷) 𑐮𑐶𑐥𑐵 𑐧𑐖𑑂𑐬𑐵𑐔𑐵𑐬𑑂𑐫 𑐖𑐸𑐫𑐵 𑐰𑑄𑐐𑐸 𑐢𑐵𑐥𑐸 𑐡𑐸 𑑋 𑐄𑐩𑐶𑐐𑐸 𑐴𑐾 𑐥𑐸𑐬𑑂𑐏𑐵 𑐁𑑅𑐟𑐎 𑐣𑑄 𑐥𑐸𑑄 𑐳𑐩𑐸𑐡𑐵𑐫𑐫𑐵 𑐢𑐬𑑂𑐩 𑐐𑐸𑐬𑐸 𑐐𑐸𑐬𑐸𑐖𑐸 𑐥𑐸𑐬𑑀𑐴𑐶𑐟 𑐖𑐸𑐫𑐵 𑐥𑐸𑐖𑐵 𑐫𑐵𑐣𑐵 𑐰𑐫𑐵 𑐔𑑂𑐰𑑄𑐐𑐸 𑐡𑐸 𑑋
𑐐𑑀𑐥𑐵𑐮 𑐬𑐵𑐖 𑐰𑑄𑑄𑐱𑐵𑐰𑐮𑐷𑐫𑐵 𑐥𑑂𑐬𑐩𑐵𑐞 𑐎𑐠𑑄 𑐣𑐾𑐥𑐵𑐮 𑐳𑐩𑑂𑐰𑐟 𑑕𑑑𑑕 𑐩𑐵𑐑 𑐱𑐸𑐎𑑂𑐮 𑐡𑐱𑐩𑐷 𑐎𑐸𑐣𑑂𑐴𑐸 𑐖𑐵𑐟𑐷𑐫𑐵 𑐎𑐵𑐬𑑂𑐫 𑐰𑐶𑐨𑐵𑐖𑐣 𑐫𑐵𑐰𑐮𑐾 𑐩𑐣𑐹𑐟𑐫𑑂𑐳𑑄 𑐫𑐵𑐣𑐵 𑐰𑐫𑐵 𑐔𑑂𑐰𑑄𑐐𑐸 𑐖𑑂𑐫𑐵 𑐫𑐵 𑐁𑐢𑐵𑐬𑐫𑑂 𑐖𑐸𑐖𑐸 𑐖𑐫𑐳𑑂𑐠𑐶𑐟𑐷 𑐩𑐮𑑂𑐮𑑄 𑐥𑐸𑑄 𑐟𑐫𑑂𑐳𑑄 𑐎𑐶𑐥𑐵 (𑐟𑐳𑑂𑐰𑐷𑐬) 𑐔𑑂𑐰𑐫𑐾𑐐𑐸 𑐰𑐶𑐱𑐾𑐲 𑐫𑐵𑐣𑐵 𑐡𑑂𑐫𑑀 𑐰 𑐡𑑂𑐫𑑀𑐣𑐵𑐥 𑐳𑑂𑐰𑐵𑐥𑐹 𑐡𑐸𑐐𑐸 𑐢𑐵𑐬𑑂𑐩𑐶𑐎 𑐖𑑂𑐫𑐵 𑐏𑑄 𑐫𑐵𑐟 𑐩𑐵𑑅𑐐𑐸 𑐖𑑂𑐰𑐮𑑄 𑐔𑑂𑐰𑐫𑐵 𑐰𑑅𑐥𑐶 𑐏𑑅 𑐢𑐎𑐵 𑐰𑐶𑐨𑐵𑐖𑐣 𑐫𑐵𑐣𑐵 𑐧𑑂𑐫𑐹𑐐𑐸 𑐎𑐠𑐣 𑐡𑐸 𑑋 𑐠𑑂𑐰𑐴𑐾 𑐖𑑂𑐫𑐵𑐏𑑄𑐫𑐵 𑐁𑐢𑐵𑐬𑐫𑑂 𑐖𑐵𑐟 𑐡𑐫𑐾𑐎𑐹𑐐𑐸 𑐢𑐿𑐐𑐸 𑐎𑐠𑐣 𑐡𑐸 𑑋 𑐔𑐶𑐟𑑂𑐬 𑐔𑑂𑐰𑐂𑐥𑐶𑐣𑑂𑐟 “𑐥𑐸𑑄” 𑐢𑐿𑐐𑐸 𑐀𑐢𑐶𑐮𑐾𑐏 𑐱𑐶𑐮𑐵𑐮𑐾𑐏, 𑐠𑑂𑐫𑐵𑐳𑐦𑐸𑐟𑐶 𑐰 𑐩𑐾𑐩𑐾𑐐𑐸 𑐋𑐟𑐶𑐴𑐵𑐳𑐶𑐎 𑐡𑐱𑐹 𑐎𑐠𑑄 𑐣𑑂𑐴𑑂𑐫𑐠𑐣𑐵 𑐟𑑅𑐐𑐸 𑐡𑐸 𑑋 𑐄𑐎𑐶𑑄 𑐖𑐵𑐟𑐷𑐫𑐵 𑐰𑐶𑐨𑐵𑐖𑐣 𑐫𑐵𑐫𑐾 𑐫𑐎𑑂𑐎𑑀 𑐴𑐾 𑐣𑑂𑐴𑑂𑐫𑐾 𑐣𑐶𑐳𑐾𑑄 𑐔𑐶𑐟𑑂𑐬𑐎𑐵𑐬 (𑐥𑐸𑑄) 𑐟𑐫𑑂𑐳𑑄 𑐥𑑁𑐨𑐵 𑐔𑑂𑐰𑐫𑐵 𑐟𑐐𑐸 𑐥𑑂𑐬𑐩𑐵𑐞 “Art of Nepal Bishnu Mandal 1985” 𑐳𑐦𑐹𑐟𑐶𑑄 𑐥𑑂𑐬𑐩𑐵𑐞𑐶𑐟 𑐫𑐵𑐐𑐸 𑐡𑐸 𑑋

𑑖. 𑐔𑐶𑐟𑑂𑐬𑐎𑐵𑐬 𑐰 𑐔𑐶𑐟𑑂𑐬𑐎𑐮𑐵 𑐂𑐟𑐶𑐴𑐵𑐳
𑐔𑐶𑐟𑑂𑐬𑐎𑐵𑐬 (𑐥𑐸𑑄) 𑐟𑐫𑑂𑐐𑐸 𑐡𑐳𑐸 𑐐𑐰𑐮𑐾𑑄𑐣𑐶𑐳𑐾𑑄 𑐡𑐸 𑐢𑐿𑐐𑐸 𑐏𑑄 𑐥𑑂𑐬𑐲𑑂𑐚 𑐩𑐖𑐹𑐳𑐵𑑄 𑐮𑐶𑐔𑑂𑐕𑐰𑐶𑐎𑐵𑐮 𑐳𑑂𑐰𑐫𑐵𑑅𑐣𑑄 𑐣𑑂𑐴𑐫𑐰𑑄𑐣𑐶𑐳𑐾𑑄 𑐀𑐰𑐳𑑂𑐠𑐶𑐟 𑐖𑐹𑐐𑐸 𑐏𑐣𑐾𑐡𑐸 𑑋 𑐁𑐡𑐶𑐰𑐵𑐳𑐷 𑐖𑐣𑐖𑐵𑐟𑐷 𑐟 𑐣𑐵𑐥𑑄 𑐀𑐰𑐳𑑂𑐠𑐶𑐟 𑐡𑐸 𑐢𑐿𑐐𑐸 𑐣𑐾𑐥𑐵𑐫𑐵 𑐎𑐮𑐵 𑐎𑑁𑐱𑐮 𑐣𑐵𑐥 𑐣𑐵𑐥𑑄 𑐔𑐶𑐟𑑂𑐬𑐎𑐵𑐬 (𑐥𑐸𑑄) 𑐟 𑐣𑑂𑐴𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐏𑐣𑐾𑐡𑐸 𑑋 𑐔𑐶𑐣𑐷𑐫𑐵 𑐫𑐵𑐟𑑂𑐬𑐷 𑐴𑐰𑐾𑐣𑑂 𑐳𑐵𑐒𑑂𑐐𑐫𑐵 𑐢𑐵𑐥𑐹 𑐎𑐠𑑄 𑐮𑐶𑐔𑑂𑐕𑐰𑐷 𑐎𑐵𑐮𑐫𑑂 𑐡𑐫𑐾𑐎𑐹𑐐𑐸 𑐩𑐵𑐣 𑐨𑐰𑐣, 𑐎𑐿𑐮𑐵𑐱𑐎𑐹𑐚 𑐨𑐰𑐣 𑐰 𑐨𑐡𑑂 𑐣𑐶𑐰𑐵𑐳 𑐨𑐰𑐣 𑐁𑐡𑐶 𑐟𑐟𑑅𑐢𑑄𑐐𑐸 𑐬𑐵𑐖 𑐥𑑂𑐬𑐵𑐳𑐵𑐡𑐫𑑂 𑐫𑐎𑑂𑐰 𑐔𑐶𑐟𑑂𑐬 𑐰 𑐩𑐸𑐬𑑂𑐟𑐶 𑐮𑐸𑐫𑐵 𑐰𑑅𑐐𑐸 𑐏𑑄 𑐰𑐬𑑂𑐞𑐣 𑐫𑐵𑐣𑐵 𑐟𑑅𑐐𑐸 𑐡𑐸 𑑋
𑐗𑐶𑑄𑐳𑑂𑐰𑑄𑐐𑐹𑐐𑐸 𑐱𑐟𑐵𑐧𑑂𑐡𑐷 𑐀𑐬𑐣𑐶𑐎𑑀𑐫𑐵 𑐣𑐾𑐟𑐺𑐟𑑂𑐰𑐫𑑂 𑐣𑑂𑐫𑐵𑐳𑐩𑑂𑐴 𑐔𑐶𑐟𑑂𑐬𑐎𑐵𑐬 𑐰 𑐔𑐷𑐣 𑐰𑑄𑐐𑐸 𑐏𑑄 𑐄𑐮𑑂𑐮𑐾𑐏 𑐖𑐸𑐫𑐵 𑐔𑑂𑐰𑑄𑐐𑐸 𑐡𑐸 𑑋 𑐀𑐠𑐾𑐴𑐾 𑐔𑑂𑐫𑐵𑐐𑐹𑐐𑐸 𑐱𑐟𑐵𑐧𑑂𑐡𑐷 𑐥𑐵𑐏𑐾 𑐫𑐮𑐫𑑂 𑐎𑐬𑐸𑐞𑐵𑐩𑐫𑑂𑐫𑐵 𑐬𑐠𑐫𑐵 𑐑𑑅𑐔𑐵𑑅 𑐰 𑐑𑑅𑐩𑐵𑐮𑐫𑑂 𑐔𑐶𑐟𑑂𑐬 𑐔𑑂𑐰𑐫𑐾𑐐𑐸 𑐁𑐟𑐎 𑐣𑑄 𑐥𑑂𑐬𑐔𑐮𑐣 𑐡𑐸 𑑋 𑐄𑐖𑐸 𑐖𑑂𑐫𑐵 𑐠𑑁𑑄 𑐎𑐣𑑂𑐴𑐾𑐫𑐫𑐵𑐥𑐶𑑄 𑐔𑐶𑐟𑑂𑐬𑐎𑐵𑐬𑐟𑐫𑑂𑐳𑑄 𑐀𑐰𑐶𑐕𑐶𑐣𑑂𑐣 𑐬𑐸𑐥𑐫𑑂 𑐣𑑂𑐴𑐫𑐵𑐎𑐵 𑐰𑐫𑐵 𑐔𑑂𑐰𑑄𑐐𑐸𑐮𑐶𑑄 𑐠𑑂𑐰 𑐔𑐶𑐟𑑂𑐬𑐎𑐵𑐬 (𑐥𑐸𑑄) 𑐟 𑐄𑐰𑐮𑐾 𑐣𑐶𑐳𑐾𑑄 𑐫𑐵𑐐𑐸 𑐴𑐾 𑐰𑑄𑐱𑐖𑑄 𑐣𑑂𑐴𑐫𑐵𑐣𑐵 𑐰𑐫𑐵𑐔𑑂𑐰𑑄𑐥𑐷 𑐖𑐸𑐂𑐩𑐵𑑅 𑑋
𑐀𑐠𑐾𑐴𑐾 𑐦𑐬𑑂𑐥𑐶𑐒𑐫𑐵 𑐖𑐵𑐟𑑂𑐬𑐵𑐰𑐮𑐫𑑂 𑐟𑑂𑐫𑐥𑐫𑑂 𑐡𑐎𑑂𑐲𑐶𑐞 𑐎𑐵𑐮𑐷 𑐀𑐖𑐶𑐩𑐵𑐫𑐵 𑐎𑐶𑐥𑐵 𑐔𑑂𑐰𑐫𑐾𑐟 𑐣𑐵𑐫𑑂𑐏𑐶𑑄 𑐔𑑂𑐰𑐫𑐎𑐵𑑅 𑐀𑐣𑑄𑐣𑐶𑐳𑐾𑑄 𑐫𑐮𑐫𑐵 𑐔𑐶𑐟𑑂𑐬𑐎𑐵𑐬𑐟 𑐎𑐵𑑅𑐰𑐂𑐐𑐸 𑐔𑐮𑐣 𑐡𑐸 𑑋 𑐄𑐎𑐶𑑄 𑐄𑐐𑐸 𑐂𑐮𑐫𑑂 𑐔𑐶𑐟𑑂𑐬𑐎𑐵𑐬𑐥𑐶𑑄𑐟 𑐰𑐶𑐱𑐾𑐲 𑐎𑐡𑐬 𑐫𑐵𑐣𑐵 𑐟𑑅𑐐𑐸 𑐏𑐣𑐾 𑐡𑐸 𑑋
𑐗𑐶𑐣𑑂𑐕𑐐𑐸 𑐱𑐟𑐵𑐧𑑂𑐡𑐷𑐂 𑐮𑐸𑐫𑐵 𑐰𑑅𑐐𑐸 𑐕𑐐𑐸 𑐴𑐳𑑂𑐟 𑐮𑐶𑐏𑐶𑐟 𑐐𑑂𑐬𑐣𑑂𑐠 𑐴𑐾 𑐥𑑂𑐬𑐩𑐵𑐞𑐶𑐟 𑐎𑐠𑑄 𑐴𑐳𑑂𑐟 𑐳𑐶𑐡𑑂𑐢 𑐮𑑂𑐴𑐵𑐟𑑄 𑐔𑑂𑐰𑐫𑐵 𑐟𑑅𑐐𑐸 𑐥𑑂𑐬𑐖𑑂𑐘𑐵 𑐥𑐵𑐬𑐩𑐶𑑄𑐟𑐵𑐫𑐵 𑐀𑐟𑐶 𑐧𑐵𑑄𑐮𑐵𑐐𑐸 𑐔𑐶𑐟𑑂𑐬 𑐟 𑐏𑑅 𑑋 𑐀𑐠𑐾𑐴𑐾 𑑑𑑖/𑑑𑑗 𑐍𑑄 𑐱𑐟𑐵𑐧𑑂𑐡𑐷𑐫𑐵 𑐡𑐠𑐸𑐂 𑐮𑐹𑐐𑐸 𑐥𑑁𑐨𑐵 𑐔𑐶𑐟𑑂𑐬 𑐩𑐢𑑂𑐫𑐾 𑐖𑐣 𑐧𑐴𑐵𑐮𑐫𑑂 𑐡𑐫𑐵 𑐔𑑂𑐰𑑄𑐐𑐸 “𑐴𑐾 𑐧𑐖𑑂𑐬 ” 𑐔𑑂𑐰𑐫𑐵𑐟𑑅𑐐𑐸 𑐥𑑁𑐨𑐵𑑅 𑐕𑐐𑐸 𑐄𑐟𑑂𑐎𑐺𑐲𑑂𑐚 𑐣𑐩𑐸𑐣𑐵 𑐖𑐹 𑐰𑐐𑐸 𑐡𑐸 𑑋 𑐀𑐠𑐾𑐴𑐾 𑐏𑑂𑐰𑐥𑐫𑐵 𑐣𑑂𑐫𑐾𑐣𑑂𑐫𑐵𑐥𑐵𑑅 𑐗𑑂𑐫𑐵𑑅 𑐡𑐬𑐰𑐵𑐬𑐫𑐵 𑐔𑑀𑐎𑐫𑐵 𑐕𑐐𑐸 𑐀𑑄𑐐𑐮𑐫𑑂 𑐟𑐶𑐠𑐶𑐩𑐶𑐟𑐶 𑐩𑐡𑐸𑐐𑐸 𑐬𑐵𑐩𑐵𑐫𑐞𑐫𑐵 𑐎𑐶𑐥𑐵 𑐎𑐶𑐫𑐵 𑐟𑑅𑐐𑐸 𑐮𑐹𑐐𑐸 𑐡𑐸 𑑋 𑐖𑐫𑐳𑑂𑐠𑐶𑐟𑐷 𑐩𑐮𑑂𑐮𑐫𑐵 𑐥𑐵𑐮𑐫𑑂 𑐡𑐫𑐾𑐎𑐹𑐐𑐸 𑐎𑐸𑐩𑐵𑐬𑐷 𑐕𑐾𑑃𑐫𑐵 𑐀𑑄𑐐𑐮𑐫𑑂 𑐥𑐹𑐬𑑂𑐞 𑐎𑐡𑐫𑐵 𑐡𑐾𑐰𑐷 𑐡𑐾𑐰𑐟𑐵𑐫𑐵 𑐟𑐳𑑂𑐰𑐷𑐬 𑐎𑐶𑐥𑐵 𑐟 𑐔𑑂𑐰𑐫𑐵 𑐟𑑅𑐐𑐸 𑐡𑐸 𑑋 𑐀𑐠𑐾𑐴𑐾, 𑐳𑑂𑐰𑐫𑐩𑑂𑐨𑐹𑐫𑐵 𑐱𑐵𑐣𑑂𑐟𑐶𑐥𑐸𑐬𑐫𑑂 𑐡𑐸𑐣𑐾 𑐣𑑄 𑐀𑑄𑐐𑐮𑐫 𑐰𑐶𑐨𑐶𑐣𑑂𑐣 𑐡𑐾𑐰𑐷 𑐡𑐾𑐰𑐵𑐫𑐵 𑐔𑐶𑐟𑑂𑐬𑐟 𑐔𑑂𑐰𑐫𑐵 𑐟𑑅𑐐𑐸 𑐡𑐸 𑑋 𑐠𑑂𑐰𑐫𑐵𑐟 𑐩𑐵𑐞𑐶𑐎𑐩𑐵𑐣 𑐔𑐶𑐟𑑂𑐬𑐎𑐵𑐬𑑄 𑐖𑐶𑐞𑑀𑐡𑑂𑐢𑐵𑐬 𑐫𑐵𑑅𑐐𑐸 𑐖𑐸𑐫𑐵 𑐔𑑂𑐰𑐣 𑑋 𑐠𑑂𑐰𑐴𑐾 𑐣𑐶𑐐𑐸 𑐎𑐶𑐥𑐵𑐫𑐵 𑐖𑐶𑐞𑑀𑐡𑑂𑐢𑐵𑐬𑐫𑐵 𑐎𑑂𑐬𑐩 𑐔𑐶𑐟𑑂𑐬𑐎𑐵𑐬𑐥𑐶𑐳𑑄 𑐴𑐾 𑐖𑐵𑐬𑐷 𑐫𑐵𑐣𑐵 𑐔𑑂𑐰𑑄𑐐𑐸 𑐖𑐹𑐐𑐸𑐮𑐶𑑄 𑐄𑐎𑐷 𑐔𑑂𑐰𑐫𑐵 𑐟𑑅𑐐𑐸 𑐩𑐵𑐞𑐶𑐎𑐩𑐵𑐣 𑐔𑐶𑐟𑑂𑐬𑐎𑐵𑐬 𑐰 𑐮𑐎𑑂𑐲𑑂𑐩𑐷 𑐰𑐴𑐵𑐡𑐸𑐬 𑐔𑐶𑐟𑑂𑐬𑐎𑐵𑐬 𑐮𑐶𑐥𑐵𑐫𑐵 𑐥𑐶𑐝𑐶𑐫𑐵 𑐔𑐶𑐟𑑂𑐬𑐎𑐵𑐬𑐥𑐶𑑄 𑐏𑑅 𑐢𑐿𑐐𑐸 𑐟𑐠𑑂𑐫 𑐏𑑅 𑑋
𑐣𑑂𑐴𑐵𑐥𑐵 𑐣𑑂𑐴𑐵𑐥𑐵 𑐥𑑁𑐨𑐵𑑅 𑐔𑑂𑐰𑐂𑐧𑐮𑐫𑑂 𑐥𑑁𑐨𑐵𑑅 𑐔𑑂𑐰𑐂𑐩𑑂𑐴 𑐔𑐶𑐟𑑂𑐬𑐎𑐵𑐬𑐫𑐵 𑐣𑐵𑑄 𑐔𑑂𑐰𑐫𑐾𑐐𑐸 𑐔𑐮𑐣 𑐩𑐡𑐸 𑐧𑐬𑐸 𑐖𑐸𑐖𑐸𑐫𑐵 𑐣𑐵𑑄 𑐄𑐮𑑂𑐮𑐾𑐏 𑐫𑐵𑐂𑐐𑐸 𑐔𑐮𑐣 𑐡𑐸 𑑋 𑐥𑑁𑐨𑐵𑑅 𑐔𑑂𑐰𑐎𑐷𑐩𑑂𑐴𑐳𑐶𑐫𑐵 𑐖𑑅𑐥𑐶𑐣𑐷𑐐𑐸 𑐎𑐶𑐥𑐵 (𑐟𑐳𑑂𑐰𑐷𑐬) 𑐣𑑄 𑐔𑑂𑐰𑐎𑐷𑐐𑐸 𑐔𑐮𑐣 𑐡𑐸 𑑋 𑐄𑐎𑐶𑑄 𑐫𑐵𑐣𑐵 𑐮𑐿𑐣𑐳𑐶𑑄 𑐧𑐵𑐒𑑂𑐐𑐡𑐾𑐮𑐫𑐵𑐐𑐸 “𑐥𑑂𑐬𑐵𑐔𑐶𑐣 𑐣𑐾𑐥𑐵𑐮𑐷 𑐔𑐶𑐟𑑂𑐬𑐎𑐮𑐵 𑐢𑐂𑐐𑐸 𑐳𑐦𑐸𑐟𑐷 𑐣𑐾𑐥𑐵𑑅𑐫𑐵 𑐥𑑁𑐨𑐵𑑅 𑐎𑐶𑐥𑐵𑐫𑑂 𑐠𑑅𑐐𑐸 𑐴𑐾 𑐱𑐿𑐮𑐷 𑐡𑐸 𑐢𑐎𑐵𑑅 𑐣𑑂𑐴𑑂𑐫𑐠𑐣𑐵 𑐟𑑅𑐐𑐸 𑐡𑐸 𑑋
𑐖𑐫𑐡𑐾𑐰 (𑐥𑐸𑑄) 𑐣𑑄 𑐂.𑐳. 𑑑𑑔𑑒𑑐 (𑐣𑐾.𑐳𑑄. 𑑕𑑔𑑐) 𑐳𑐫𑑂 Dr. Pratapaditya Pal 𑐢𑐵𑐩𑑂𑐴𑑄 𑐔𑑂𑐰𑐫𑐵 𑐟𑑅𑐐𑐸 𑐳𑐦𑐸 “Art of Nepal Bishnu Mandal 1985 𑐮𑐫𑑂 𑐥𑑂𑐬𑐩𑐵𑐞𑐫𑐵 𑐬𑐸𑐥𑐫𑑂 𑐏𑐣𑐾 𑐡𑐸 𑑋 𑐥𑑁𑐨𑐵 𑐔𑑂𑐰𑐩𑑂𑐴𑐾 𑐳𑐶𑐐𑐸 𑐣𑐵𑑄 𑐡𑐸𑐐𑐸 𑐁 𑐟𑐎 𑐮𑐸𑐫𑐵 𑐰𑑅𑐐𑐸 𑐡𑐎𑑂𑐎𑐮𑐾 𑐥𑐸𑐮𑐵𑑄𑐐𑐸 𑐥𑑁𑐨𑐵 𑐳𑐵𑐫𑐡 𑐠𑑂𑐰 𑐴𑐾 𑐖𑐸𑐂𑐩𑐵𑑅 𑑋

𑐠𑑂𑐰 𑐥𑑁𑐨𑐵𑐮𑐫𑑂 𑐠𑐠𑐾 𑐔𑑂𑐰𑐫𑐵 𑐟𑑅𑐐𑐸 𑐡𑐸 𑑋

𑑑. 𑑉 𑐱𑑂𑐬𑐾𑐫𑐳𑑂𑐟𑐸 𑐳𑐩𑑂𑐰𑐟𑑂 𑑕𑑔𑑐 𑐨𑐵𑐡𑑂𑐬 𑐱𑐸𑐎𑑂𑐮 𑐔𑐟𑐸𑐬𑑂𑐡𑐳𑑂𑐠𑐵𑐣𑑂𑐟𑐷 𑐠𑑁𑑄 𑑋
𑐢𑐣𑐶𑐲𑑂𑐛𑐵 𑐣𑐎𑑂𑐲𑐟𑑂𑐬𑐾 𑐱𑐸𑐎𑑂𑐬𑐩𑑂 𑐫𑑀𑐐𑐾 𑐰𑐺𑐴𑐳𑑂𑐥𑐟𑐶 𑐰𑐵𑐳 𑐬𑐾 𑑋
𑐳𑐶𑑄𑐴 𑐬𑐵𑐱𑐷 𑐐𑐟𑐾 𑐳𑐰𑐷𑐟𑐵𑐬𑐷𑑅 𑐎𑐸𑐩𑑂𑐨 𑐬𑐵𑐱𑐷 𑐐𑐟𑐾 𑐔𑐣𑑂𑐡𑑂𑐬 𑐩𑐵𑐱𑐷𑑅 𑑋
𑐀𑐣𑐣𑑂𑐟 𑐥𑐟𑑂𑐟 𑐥𑑂𑐰𑐳𑑂𑐟𑐎 𑐥𑑂𑐬𑐟𑐶𑐨𑐵 𑐟𑑂𑐬𑐶𑐫𑐾 𑐰𑐶𑐢𑐶 𑐎𑑂𑐬𑐶𑐟𑐩𑑂 𑑋
𑐀𑐣𑐣𑑂𑐟 𑐧𑑂𑐬𑐟 𑐄𑐡𑑂𑐫𑐵𑐥𑐣 𑐳𑐩𑐥𑐸𑐣𑐾𑐡𑐩𑑂 𑐫𑑀𑐖𑑂𑐫𑐩𑐵𑐣 𑐱𑑂𑐬𑐷 𑐮𑑀𑐴𑐮𑐣𑐶𑐩𑑂𑐴 (𑐳𑑂𑐰𑐣𑐶𑐩𑑂𑐴)
𑐡𑑂𑐰𑐷 𑐖𑐰𑐬 𑐱𑑂𑐬𑐷 𑐟𑐾𑐖𑐬𑐵𑐩 𑐳𑑀𑐩 (𑐱𑑂𑐬𑐩𑐞) 𑐛𑐵

𑑒. (𑐳𑑂𑐫) 𑐨𑐵𑐖𑑂𑐫 𑐳𑐴 𑐨𑐵𑐟𑐺 𑐱𑑂𑐬𑐷 𑐖𑐫𑐟𑐬𑐵𑐩 𑐳𑑀𑐩 𑐳𑐬𑑂𑐩𑐳𑑂𑐫 𑐨𑐵𑐖𑑂𑐫
𑐳𑐴 𑐄𑐡𑑂𑐫𑐵𑐥𑐣 𑐳𑐩𑑂𑐥𑐹𑐬𑑂𑐞𑐡𑐩 𑐀𑐣𑐾𑐣 𑐄𑐡𑑂𑐫𑐵𑐥𑐣𑐾𑐣 (𑐖) 𑐣 𑐢𑐣 𑐰𑐺𑐡𑑂𑐢𑐶 𑐩𑐵𑐬
𑐀𑐣𑐣𑑂𑐟 𑐳𑐸𑐏 𑐥𑑂𑐬𑐵𑐥𑑂𑐟𑐶 𑐟𑐜𑐟𑐾𑐬 𑐰𑐶𑐲𑑂𑐞𑐸 𑐮𑑀𑐎 𑐣𑐶𑐰𑐵𑐳 𑐎𑐵𑐩, 𑐀𑐣𑐣𑑂𑐟 𑐧𑑂𑐬𑐟
𑐥𑑂𑐬𑐟𑐶𑐲𑑂𑐛𑐵 𑐳𑐩𑑂𑐥𑐹𑐬𑑂𑐞 𑐩𑐶𑐟𑐶 𑐂𑐡𑑄 𑐥𑐡 𑐮𑐾𑐎𑑂𑐲𑐶𑐟 𑐖𑐫 𑐟𑐾𑐖 𑐥𑐸𑐣𑐾𑐣 𑐡𑐱 𑐩𑐶𑑅
𑐡𑐶𑐣𑐾 𑐮𑐶𑐏𑐶𑐟 𑐩𑐶 𑑋𑑋 𑐳𑐸𑐩𑑅𑐩𑐳𑑂𑐟𑐸 𑐳𑐰𑑂𑐬𑑂𑐰𑐵𑐡𑐵 𑑋𑑋 𑐱𑐸𑐨 𑑋𑑋

𑐀𑐠𑐾 𑐴𑐾 𑐀𑐡𑑂𑐰𑐫𑐵𑐫 𑐬𑐵𑐖𑐵 𑐥𑐸𑑄 𑑋 𑐰 𑐄𑐡𑑂𑐬𑐫𑐬𑐵𑐩 𑐥𑐸𑑄 𑐢𑐂𑐥𑐶𑑄 𑐣𑐶𑐩𑑂𑐴𑐾𑐳𑐶𑐫𑐵𑑄 𑐖𑐵𑐣𑐵𑑅 (𑐂.𑐳𑑄. 𑑑𑑔𑑗𑑐) 𑐥𑐵𑐏𑐾 𑐔𑑂𑐰𑐫𑐵 𑐟𑑅𑐐𑐸 𑐥𑑁𑐨𑐵 𑐐𑐐𑐣 𑐳𑐶𑑄 𑐨𑐵𑐬𑑀 𑐡𑑀𑐮𑐏𑐵𑐫𑐵 𑐳𑐿𑐣𑐶𑐎 𑐥𑑂𑐬𑐩𑐸𑐏𑐫𑐵 𑐎𑐮𑐵𑑅𑐥𑐶𑑄 𑐀𑐳𑐾𑐣𑐷 𑐮𑐎𑑂𑐲𑑂𑐩𑐷 𑐰 𑐖𑐷𑐰𑐟𑐣 𑐥𑐶𑐣𑐷𑐐𑐸 𑐥𑑁𑐨𑐵 𑐣𑑄 𑐡𑐸𑐐𑐸 𑐖𑐸𑐮 𑐠𑑂𑐰 𑐏𑑄 Nepal old Images, New Insights edited by Pratapaditya Pal 𑐫𑐵𑐐𑐸 𑐳𑐦𑐸𑐮𑐫𑑂 𑐡𑐸𑐐𑐸 𑐥𑑁𑐨𑐵 𑐏𑑅 𑑋
𑐀𑐠𑐾𑐴𑐾 𑐩𑐾𑐩𑐾𑐐𑐸 𑐥𑑁𑐨𑐵𑐟 𑐣𑑄 (𑐥𑐸𑑄) 𑐟𑐫𑐳𑑄 𑐔𑑂𑐰𑐫𑐵 𑐟𑑅𑐐𑐸 𑐫𑐎𑑂𑐎𑑀 𑐡𑐸 𑑋

𑐥𑐸𑑄 𑐡𑐾𑐐𑑅

𑐫𑐾𑑃𑐫𑐵 𑐰𑐳𑐣𑑂𑐟𑐥𑐸𑐬𑐫𑑂 𑐎𑐸𑐩𑐵𑐬𑐷 𑐕𑐾𑑃𑐫𑐵 𑐮𑐶𑐎𑑂𑐎𑐳𑑄 𑐔𑑂𑐰𑑄𑐐𑐸 𑐡𑐾𑐐𑑅 𑐐𑐣 𑐡𑐕𑐶𑐫𑐵 𑐕𑐎𑑅 𑐫𑐾𑑃𑐡𑑂𑐫𑐵𑐥𑐸𑐣𑑂𑐴𑐷𑐫𑐵 𑐂𑐮𑐫𑑂 𑐕𑐰𑐵𑑅 𑐟𑐎 𑐎𑐸𑐩𑐵𑐬𑐷𑐫𑐵𑐟 𑐡𑐱 𑐀𑐰𑐟𑐵𑐬 𑐎𑑂𑐫𑐣𑐾𑐐𑐸 𑐣𑐶𑐩𑑂𑐟𑐶𑑄 𑐖𑐎 𑐕𑑂𑐫𑐮𑐵𑑅𑐟𑑅𑐐𑐸 𑐡𑐾𑐐𑑅 𑐴𑐾 “𑐥𑐸𑑄 𑐡𑐾𑐐𑑅” 𑑋 𑐥𑐸𑑄 𑐡𑐾𑐐𑑅𑐫𑐵𑐟 𑐡𑐱 𑐀𑐰𑐟𑐵𑐬 𑐡𑐾𑐰𑐮 𑐢𑐎𑐵𑑅 𑐣𑑄 𑐢𑐵𑑅 𑐠𑑂𑐰 𑐐𑐮𑐟 𑐏𑑅 𑑋 𑐣𑐾𑐥𑐵 𑐬𑐵𑐲𑑂𑐚𑑂𑐬𑐫𑐵 𑐰𑐶𑐱𑐶𑐲𑑂𑐚 𑐥𑐸𑑄 𑐖𑐵𑐟𑐫𑐵 𑐎𑐮𑐵𑐎𑐵𑐬𑐫𑐵 𑐣𑐵𑐩𑑄 𑐡𑐫𑐾𑐎𑐸𑐐𑐸 𑐡𑐾𑐐𑑅𑐫𑐵 𑐣𑐵𑑄 𑐥𑐸𑑄𑐡𑐾𑐐𑑅 𑐏𑑅 𑑋 𑐕𑐩𑑂𑐴 𑐥𑐸𑑄 𑐎𑐮𑐵𑐎𑐵𑐬𑑄 𑐔𑑂𑐰𑑅𑐐𑐸 𑐎𑐶𑐥𑐵𑐫𑐵 𑐧𑐵𑐬𑐾 𑐖𑐸𑐖𑐸𑑄 𑐀𑐣𑐿𑐟𑐶𑐎 𑐀𑐥𑐬𑐵𑐢𑐫𑐵 𑐳𑑄𑐖𑑂𑐘𑐵 𑐰𑐶𑐫𑐵𑑅 𑐁𑐖𑐶𑐰𑐣 𑐡𑐞𑑂𑐜 𑐳𑐖𑐵𑐫𑑄 𑐎𑐠𑑄 𑐰𑐫𑐵𑐟 𑐎𑐵𑐬𑐵𑐐𑐵𑐬𑐫𑑂 𑐎𑐸𑐣𑐵𑐰𑐶𑐮 𑑋 𑐮𑐶𑐥𑐵 𑐖𑐸𑐖𑐸𑑄 𑐰𑐵𑑅𑐔𑐵𑐫𑐾𑐎𑐵𑑅 𑐥𑐸𑑄 𑐎𑐮𑐵𑐎𑐵𑐬𑐫𑐵 𑐕𑐸𑑄 𑐡𑑂𑐰𑑄𑐐𑐸 𑐩𑐡𑐸 𑐢𑐎𑐵𑑅 𑐡𑐞𑑂𑐜 𑐳𑐖𑐵𑐫𑑂 𑐣𑑄 𑐩𑐸𑐎𑑂𑐟 𑐫𑐵𑐫𑐾𑐟 𑐳𑑂𑐰𑑅𑐰𑐮𑐫𑑂 𑐎𑐮𑐵𑐎𑐵𑐬 𑐎𑐵𑐬𑐵𑐐𑐵𑐬𑐾𑐴𑐾 𑐳𑐶𑐣𑐵 𑐔𑑂𑐰𑐣𑐾 𑐢𑐸𑑄𑐎𑐸𑐐𑐸𑐮𑐶𑑄 𑐖𑐸𑐖𑐸𑑄 𑐥𑐱𑑂𑐔𑐵𑐟𑐵𑐥 𑐫𑐵𑐣𑐵 𑐩𑐣𑐫𑑂 𑐱𑐵𑐣𑑂𑐟𑐶 𑐎𑐵𑐫𑐾𑐎𑐵 𑐣𑐶𑐩𑑂𑐟𑐶𑑄 𑐡𑐶𑐰𑑄𑐐𑐟 𑐎𑐮𑐵𑐎𑐵𑐬 𑐩𑑀𑐎𑑂𑐲 𑐮𑐵𑐫𑐾𑐩𑐵 𑐢𑐎𑐵𑑅 𑐰𑐴𑐾 𑐥𑐸𑑄𑐫𑐵 𑐣𑐵𑐩𑑂𑐫 𑐡𑐫𑐾𑐎𑐹𑐐𑐸 𑐠𑑂𑐰 𑐡𑐾𑐐𑑅𑐫𑐵 𑐣𑐵𑑄 𑐴𑐾 𑐥𑐸𑑄 𑐡𑐾𑐐𑑅” 𑐢𑐎𑐵𑑅 𑐰𑐶𑐱𑐶𑐲𑑂𑐚 𑐎𑐮𑐵𑐎𑐵𑐬 𑐖𑐵𑐟𑐶𑑄 𑐥𑐸𑑄𑐟𑐫𑑂𑐐𑐸 𑐣𑐵𑐩𑑄 𑐳𑑂𑐰𑑄𑐐𑐸 𑐥𑐸𑑄 𑐡𑐾𑐐𑑅𑐫𑐵 𑐰𑐵𑐳𑑂𑐟𑐰𑐶𑐎𑐟𑐵 𑐢𑐵𑐥𑐹 𑐁𑐟𑐎𑑄 𑐩𑑂𑐰𑐵𑐣𑐵 𑐔𑑂𑐰𑑄𑐐𑐸 𑐡𑐣𑐶 𑑋
𑐩𑐢𑑂𑐫𑐎𑐵𑐮𑐫𑑂 𑐰𑐵𑐳𑑂𑐟𑐸𑐎𑐮𑐵𑐫𑑂 𑐮𑐵𑐫𑑂𑐎𑐸 𑐰 𑐡𑑂𑐫𑑅𑐕𑐾𑑃𑐫𑑂 𑐖𑐎 𑐩𑐏𑐸 𑐴𑐬𑐾𑐎 𑐩𑐣𑐸𑐟𑐫𑑂𑐐𑐸 𑐥𑐸𑐮𑐵𑑄𑐐𑐸 𑐕𑐾𑑃𑐫𑑂 𑐕𑐾𑑃𑐫𑑂 𑐣𑑄 𑐎𑐠𑑄 𑐎𑐠𑑄𑐫𑐵 𑐡𑑂𑐫𑑅𑐟𑐫𑑂𑐐𑐸 𑐎𑐶𑐥𑐵𑐟 𑐔𑑂𑐰𑐂𑐐𑐸 𑐔𑐮𑐣 𑐡𑐸 𑑋 𑐡𑐳𑐶𑐫𑐵 𑐬𑐸𑐥𑐫𑑂 𑐁𑐟𑐎 𑐣𑑄 𑐫𑐮𑐫𑑂, 𑐏𑑂𑐰𑐥𑐫𑑂 𑐥𑐸𑐮𑐵𑑄 𑐥𑐸𑐮𑐵𑑄𑐐𑐸 𑐕𑐾𑑃𑐫𑑂 𑐠𑐖𑑂𑐫𑐵𑑅𑐐𑐸 𑐎𑐶𑐥𑐵𑐟 𑐟𑐫𑐵 𑐴𑐾 𑐟𑑅𑐐𑐸 𑐡𑐣𑐶 𑑋
𑐠𑑁𑐎𑐣𑑂𑐴𑐫𑑂 𑐣𑑄 𑐗𑐷𑐐𑐸 𑐳𑑄𑐳𑑂𑐎𑐵𑐬𑐫𑑂 𑐔𑐶𑐟𑑂𑐬𑐎𑐵𑐬𑐟𑐳𑐾𑑄 𑐎𑐠𑑄 𑐎𑐠𑑄𑐫𑐵 𑐎𑐶𑐥𑐵𑐟 𑐔𑑂𑐰𑐫𑐾 𑐩𑐵𑑅𑐐𑐸 𑐔𑐮𑐣 𑐡𑐣𑐶 𑑋 𑐡𑐳𑐎𑐬𑑂𑐩 𑐏𑑄𑐎𑐾 𑐩𑐵𑑅𑐐𑐸 𑐳𑑄𑐳𑑂𑐎𑐵𑐬𑐫𑐵 𑐦𑐸𑐎 𑐖𑑂𑐫𑐵𑑅 𑐔𑐶𑐟𑑂𑐬𑐎𑐵𑐬𑐟𑐳𑐾𑑄 𑐁𑐟𑐎 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐠𑐸𑐎𑐷 𑐗𑐷𑐐𑐸 𑐢𑐬𑑂𑐩 𑐎𑐠𑑄 𑐎𑐶𑐥𑐵 𑐟 𑐔𑑂𑐰𑐂𑐐𑐸 𑐖𑐹𑐐𑐸𑐮𑐶𑑄 𑐳𑐵𑐩𑐵𑐖𑐶𑐎 𑐣𑐵𑐥𑑄 𑐢𑐵𑐬𑑂𑐩𑐶𑐎 𑐥𑐬𑐩𑑂𑐥𑐬𑐵 𑐣𑐵𑐥𑑄 𑐎𑑂𑐰𑐵𑐟𑐸𑐐𑐸 𑐳𑑂𑐰𑐵𑐥𑐹 𑐡𑐸𑐐𑐸 𑐏𑐣𑐾 𑐡𑐸 𑑋 𑐠𑑂𑐰𑐴𑐾 𑐳𑐣𑑂𑐡𑐬𑑂𑐨𑐫𑑂 𑐀𑐩𑐬 𑐔𑐶𑐟𑑂𑐬𑐎𑐵𑐬𑑄 𑐠𑑅𑐐𑐸 𑐳𑐦𑐹 “𑐥𑐬𑐩𑑂𑐥𑐬𑐵𑐐𑐟 𑐬 𑐁𑐢𑐸𑐣𑐶𑐎 𑐔𑐶𑐟𑑂𑐬𑐎𑐮𑐵𑐎𑑀 𑐊𑐎 𑐗𑐮𑐎” 𑐫𑑂 𑐢𑐵𑐬𑑂𑐩𑐶𑐎 𑐥𑐬𑐩𑑂𑐥𑐬𑐵 𑐎𑐠𑑄 𑐗𑐷𑐐𑐸 𑐔𑐶𑐟𑑂𑐬𑐎𑐮𑐵𑐫𑐵 𑐰𑐶𑐎𑐵𑐳 𑐖𑐹𑐐𑐸 𑐏𑑄 𑐣𑑂𑐴𑑂𑐫𑐠𑐣𑐵 𑐡𑐷𑐐𑐸 𑐡𑐸 𑑋 𑐠𑑂𑐰 𑐋𑐟𑐶𑐴𑐵𑐳𑐶𑐎 𑐥𑐬𑐩𑑂𑐥𑐬𑐵𑐣𑐶𑐳𑐾𑑄 𑐣𑑂𑐴𑑂𑐫𑐵𑐣𑐵 𑐰𑐫𑐵 𑐔𑑂𑐰𑑄𑐐𑐸 𑐔𑐮𑐣𑐫𑐵𑐟 𑐡𑐸𑐐𑑂𑐫𑑄𑐎 𑐰𑐵𑐮𑐵 𑐳𑑂𑐰𑐟 𑐢𑐵𑑅𑐳𑐵 𑐥𑐸𑑄 𑐔𑐶𑐟𑑂𑐬𑐎𑐵𑐬𑐟𑐫𑑂𑐐𑐸 𑐀𑐳𑑂𑐟𑐶𑐟𑑂𑐰 𑐮𑐶𑐔𑑂𑐕𑐰𑐷𑐎𑐵𑐮 𑐣𑑂𑐴𑑂𑐫𑐰𑑄𑐣𑐶𑐳𑐾𑑄 𑐡𑐸𑐐𑐸 𑐀𑐣𑐸𑐩𑐵𑐣 𑐫𑐵𑐫𑐾𑐦𑐸 𑑋
𑐥𑐬𑐩𑑂𑐥𑐬𑐵𑐐𑐟 𑐢𑐵𑐬𑑂𑐩𑐶𑐎 𑐔𑐶𑐟𑑂𑐬𑐎𑐮𑐵
𑐫𑐾𑑃 𑐨𑐶𑐣𑑂𑐡𑑂𑐫𑑀𑐫𑐵 𑑑𑑒 𑐡𑑄𑐫𑐵 𑐕𑐎 𑐖𑑂𑐰𑐷𑐐𑐸 𑐩𑐾𑐮𑐵𑐫𑑂 𑐠𑐷 𑐠𑐷 𑐖𑐵𑐟𑐶 𑐠𑐷 𑐠𑐷 𑐎𑐠𑑄 𑐖𑑂𑐫𑐵𑑅𑐫𑐵𑐫𑑂 𑐢𑐸𑑄𑐎𑐵 𑐩𑐾𑐐𑐸 𑐥𑐸𑐖𑐵 𑐫𑐵𑐫𑐾 𑐣𑑂𑐴𑑂𑐫𑑀 (𑐥𑐸𑑄) 𑐣𑑄 𑐨𑐶𑐣𑑂𑐡𑑂𑐫𑑀𑐫𑐵𑐟 𑐩𑐶𑐏𑐵 𑐎𑑄𑐎𑐷 𑑋 𑐠𑑂𑐰 𑐩𑐶𑐏𑐵 𑐎𑑄𑐎𑐾𑐐𑐸 𑐖𑑂𑐫𑐵 𑐩𑐖𑑂𑐰𑐷𑐎𑑄 𑐩𑐾𑐐𑐸 𑐕𑐸𑑄 𑐴𑐾 𑐥𑐸𑐖𑐵 𑐖𑑂𑐰𑐷 𑐩𑐏𑐸𑐣𑐷 𑑋 𑐳𑐎𑑂𑐰𑐾 𑐧𑐖𑑂𑐬𑐫𑑀𑐐𑐶𑐣𑐷 𑐣𑑄 𑐥𑐸𑑄 𑐟𑐫𑑂𑐳𑑄 𑐴𑐾 𑐩𑐶𑐏𑐵 𑐎𑑄𑐎𑐾 𑐩𑐵𑑅 𑑋 𑐫𑐾𑑃 𑐥𑐔𑐮𑐷 𑐨𑐿𑐬𑐰𑐫𑐵 𑐖𑐵𑐟𑑂𑐬𑐵𑐫𑑂 𑐣𑑄 𑐥𑐸𑑄 𑐣𑑄 𑐩𑐶𑐏𑐵 𑐎𑑄𑐎𑐾 𑐢𑐸𑑄𑐎𑐵 𑐖𑐎 𑐥𑐸𑐖𑐵 𑐫𑐵𑐣𑐵 𑐖𑐵𑐟𑑂𑐬𑐵 𑐫𑐵𑐃 𑑋 𑐠𑐠𑐾 𑐫𑐎𑑂𑐎𑑀 𑐠𑐵𑐳𑐾 𑐥𑐸𑑄 𑐟𑐫𑑂𑐐𑐸 𑐖𑑂𑐫𑐵𑐣𑐵𑐥 𑐳𑑂𑐰𑐵𑐥𑐹 𑐡𑐸𑐐𑐸 𑐡𑑂𑐫𑑀 𑐡𑐾𑐐𑑅 𑐰 𑐖𑐵𑐟𑑂𑐬𑐵𑐟 𑐡𑐸 𑑋 𑐫𑐎𑑂𑐎𑑀 𑐣𑐾𑐰𑐵𑑅𑐟𑐫𑑂𑐐𑐸 𑐕𑐾𑑃𑐫𑐵 𑐠𑐷 𑐠𑐷 𑐥𑐸𑐣𑐫𑑂 𑐣𑑄 𑐥𑐸𑑄 𑐟𑐫𑑂𑐳𑑄 𑐴𑐾 𑐔𑑂𑐰𑐿𑐐𑐸 𑐔𑐶𑐚𑐮𑐵 𑐟𑐶𑐎𑐾𑐐𑐸 𑐥𑑂𑐬𑐔𑐮𑐣 𑐡𑐸 𑑋 𑐔𑐶𑐚𑐮𑐵 𑐟𑐶𑐎𑐾𑐐𑐸 𑐢𑐿𑐐𑐸 𑐴𑐾 𑐡𑐺𑐲𑑂𑐚𑐶 𑐎𑐣 𑐨𑐵𑐥𑐵 𑐥𑐸𑐖𑐵 𑐣𑑂𑐴𑑂𑐫𑐵𑐎𑐷 , 𑐔𑐶𑐚𑐮𑐵 𑐟𑐶𑐎𑐾𑐐𑐸 𑐢𑐿𑐐𑐸 𑐰𑐶𑐱𑑂𑐰𑐎𑐬𑑂𑐩 𑐏𑑄𑐎𑐾𑐐𑐸 𑐬𑐸𑐥𑐥𑐫𑑂 𑐎𑐵𑐃 𑑋 𑐠𑐸𑐎𑐠𑑄 𑐢𑐵𑐬𑑂𑐩𑐶𑐎 𑐎𑐠𑑄𑐫𑐵 𑐐𑐸𑐐𑐸 𑐣𑑄 𑐴𑑀𑐩, 𑐫𑐖𑑂𑐘, 𑐖𑐐𑑂𑐫 𑐫𑐵𑐫𑑂𑐐𑐸 𑐥𑐸𑐖𑐵 𑐁𑐖𑐵𑐫𑑂 𑐥𑐸𑑄 𑐟𑐫𑑂𑐳𑑄 𑐴𑐾 𑐔𑑂𑐰𑐂𑐐𑐸 𑐀𑐲𑑂𑐚 𑐩𑑄𑐐𑐮 𑐰𑐫𑐵 𑐮𑐶𑐎𑑂𑐎 𑐮𑐵𑐎𑑂𑐎 𑐔𑑂𑐰𑑄𑐐𑐸 𑐮𑐵𑐐𑐵𑐫𑑂 𑐟𑐎 𑐔𑐵𑐴𑐸𑐂𑐎𑐵 𑐟𑐶𑐣𑐷 𑐥𑐸𑐖𑐵 𑐣𑑂𑐴𑑂𑐫𑐵𑐎𑐷 𑑋 𑐀𑐲𑑂𑐚 𑐩𑑄𑐐𑐮𑑄 𑐔𑐵𑐴𑐸𑐂𑐎𑐾 𑐢𑐫𑐵𑐐𑐸 𑐱𑐸𑐡𑑂𑐢 𑐰𑐵 𑐥𑐰𑐶𑐟𑑂𑐬 𑐫𑐵𑐫𑐾𑐐𑐸 𑐏𑑅 𑐄𑐎𑐶𑑄 (𑐥𑐸𑑄) 𑐥𑐰𑐶𑐟𑑂𑐬 𑐱𑐸𑐡𑑂𑐢𑐫𑐵 𑐥𑐬𑑂𑐫𑐵𑐰𑐵𑐔𑐎 𑐏𑑅𑐳𑐵 𑐥𑐸𑑄 𑐥𑐰𑐶𑐟𑑂𑐬𑐟𑐵𑐫𑐵 𑐕𑐐𑐸 𑐥𑑂𑐬𑐟𑐶𑐎 𑐏𑑅 𑑋 𑐳𑐟𑑂𑐫 𑐣𑐵𑐬𑐵𑐫𑐞 𑐢𑐮𑑄 𑐡𑐣𑐾𑐰𑐮𑐫𑑂 𑐣𑑄 𑐥𑐸𑑄 𑐟𑐫𑑂𑐳𑑄 𑐴𑐾 𑐔𑑂𑐰𑑅𑐐𑐸 𑐐𑐬𑐸𑐜 𑐐𑐫𑐵 𑐔𑑂𑐰𑐩𑑂𑐴 𑐣𑐵𑐬𑐵𑐫𑐞𑐫𑐵 𑐎𑐶𑐥𑐵 𑐩𑐡𑐫𑑂𑐎𑑄 𑐢𑐮𑑄 𑐡𑐣𑐾𑐐𑐸 𑐥𑐸𑐰𑐣𑐷 𑐩𑐏𑐸 𑑋 𑐥𑐸𑑄 𑐟𑐫𑑂𑐳𑑄 𑐔𑑂𑐰𑑅𑐐𑐸 𑐳𑐟𑑂𑐫 𑐣𑐵𑐬𑐵𑐫𑐞𑐫𑐵 𑐎𑐶𑐥𑐵 𑐡𑐸𑐐𑐸 𑐎𑐵𑐥𑑅 𑐏𑐵𑐫𑑂 𑐢𑐸𑑄𑐎𑐵 𑐖𑐎 𑐢𑐮𑑄 𑐡𑐣𑐷 𑑋 𑐳𑐸𑐫𑐵𑐟𑑄 𑐖𑐮 𑐣𑐵𑐐𑑄 𑐣𑑂𑐫𑐵𑐟 𑐎𑐶 𑐥𑐸𑑄 𑐣𑑄 𑐴𑐾 𑐳𑐶𑑄𑐴𑐫𑐵 𑐎𑐶𑐥𑐵 𑐔𑑂𑐰𑐫𑐵 𑐥𑐸𑐂 𑐴𑐵𑐫𑑂𑐎𑐵 𑐳𑑂𑐰𑐣𑑂𑐴𑐸 𑐥𑑂𑐫𑐣𑑂𑐴𑐸 𑐮𑐶𑐥𑐵 𑐖𑐮 𑐣𑐵𑐐𑑄 𑐣𑑂𑐫𑐵𑐐𑐸 𑐎𑐿 𑐩𑐡𑐫𑐵 𑐰𑐣𑐷 𑑋 𑐁𑐐𑑄 𑐡𑐸𑐐𑐸 𑐠𑐵𑐳𑐾, 𑐡𑐸𑐴𑐵𑑃𑐰𑐣𑐾𑐐𑐸 𑐮𑐸𑐏𑐵𑐫𑑂 𑐣𑐶𑐐𑑅 𑐩𑐶𑐏𑐵 (𑐡𑐸𑐲𑑂𑐚𑐶) 𑐳𑐶𑐣𑑂𑐴 𑐕𑐥𑐟𑐵 𑐀𑐮𑐾 𑐏𑐜𑑂𑐐 𑐰 𑐥𑐵𑐟𑑂𑐬 𑐡𑐸𑐐𑐸 𑐢𑐎𑐶𑑄 𑐟𑐫𑑂𑐐𑐸𑐫𑐵 𑐁𑐐𑐩𑐫𑑂 𑐬𑐎𑑂𑐲𑐵, 𑐳𑐟𑐬𑑂𑐎𑐫𑐵 𑐔𑐶𑑄 𑐎𑐠𑑄 𑐎𑐵𑐬𑑂𑐫 𑑋 𑐠𑑂𑐰 𑐢𑐎𑐶𑑄 𑐣𑑄 𑐥𑐸𑑄 𑐣𑑄 𑐴𑐾 𑐔𑑂𑐰𑐂𑐐𑐸 𑐏𑑅 𑑋 𑐢𑐎𑐶𑑄 𑐔𑑂𑐰𑐫𑑂 𑐳𑐶𑐢𑐫𑑂𑐰𑑄 𑐏𑑂𑐫𑐾𑑄 𑐣𑑂𑐫𑐵 𑐡𑐸𑐐𑐸 𑐎𑐮𑑅 𑐖𑑂𑐰𑐣𑐵 𑐥𑐸𑐖𑐵 𑐫𑐵𑐣𑐵 𑐮𑑄𑐥𑐶𑐔𑐵 𑐕𑐵𑐫𑑂𑐩𑐵𑑅 𑑋 𑐮𑑄𑐥𑐶𑐔𑐵𑐫𑑂 𑐕𑐵𑐫𑐾 𑐢𑐸𑑄𑐎𑐵 𑐨𑐵𑐐𑑂𑐫𑑂𑐫𑐵𑐣𑐵 𑐟𑐶𑐣𑐷 𑐢𑐎𑐶𑑄 𑐥𑐶𑐟 𑐰𑐶𑐫𑐵 𑐕𑑂𑐰𑐿 𑑋 𑐠𑐸𑐎𑐠𑑄 𑐢𑐵𑐬𑑂𑐩𑐶𑐎 𑐡𑐸𑐲𑑂𑐚𑐶𑑄 𑐰𑐵𑐮𑐵 𑐳𑑂𑐰𑐫𑐾𑐰𑐮𑐾 𑐥𑐸𑑄 𑐖𑑂𑐫𑐵 𑐢𑐵𑐬𑑂𑐩𑐶𑐎 𑐁𑐳𑑂𑐠𑐵𑑄 𑐖𑐵𑑅𑐐𑐸 𑐕𑐐𑐸 𑐥𑐰𑐶𑐟𑑂𑐬𑐐𑐸 𑐖𑑂𑐫𑐵 𑐏𑑅 𑑋 𑐥𑐰𑐶𑐟𑑂𑐬 𑐢𑐿𑐐𑐸 𑐱𑐸𑐡𑑂𑐢 𑐖𑑂𑐫𑐵 𑐖𑐹𑐐𑐸𑐮𑐷𑑄 𑐴𑐾 –𑐥𑐸𑑄) 𑐖𑐵𑐟𑐷 𑐳𑐵𑑄𑐳𑑂𑐎𑐺𑐟𑐶𑐎 𑐰 𑐢𑐵𑐬𑑂𑐩𑐶𑐎 𑐩𑐵𑐣𑑂𑐫𑐟𑐵 𑐎𑐫𑐵 𑐰𑐐𑐸 𑐖𑐵𑐟𑐷 𑐏𑑅 𑑋 𑐠𑑂𑐰𑐫𑐵 𑐥𑑂𑐬𑐩𑐵𑐞 𑐎𑐠𑑄 𑐣𑐾𑐥𑐵𑐫𑐵 𑐡𑑂𑐫𑑀 𑐥𑑂𑐫𑐵𑐏𑐣𑐫𑑂 𑐫𑐾𑑃 𑐐𑐠𑐸 𑐥𑑂𑐫𑐵𑐏𑑄 𑐡𑐶𑐐𑐷 𑐥𑑂𑐫𑐵𑐏𑑄, 𑐣𑑂𑐫𑐟𑐩𑐡𑐸 𑐀𑐖𑐶𑐩𑐵𑐫𑐵 𑐥𑑂𑐫𑐵𑐏𑑄, 𑐐𑑄 𑐥𑑂𑐫𑐵𑐏𑑄 𑐁𑐡𑐶 𑐦𑐸𑐎𑑂𑐎 𑐥𑑂𑐫𑐵𑐏𑐣𑐫𑑂 𑐡𑐾𑐰 𑐡𑐾𑐰𑐟𑐵 𑐥𑐶𑐣𑐷𑐐𑐸 𑐏𑑂𑐰𑐵𑑅𑐥𑐵 𑐥𑐸𑑄𑐟𑐫𑑂𑐳𑑄 𑐴𑐾 𑐕𑑂𑐫𑐵𑐎𑐷𑐐𑐸 𑐏𑑅 𑑋 𑐏𑑂𑐰𑐥𑐫𑑂 𑐣𑐰𑐡𑐸𑐬𑑂𑐐𑐵𑐫𑐵 𑐏𑑂𑐰𑐵𑑅𑐥𑐵 𑐣𑑄 𑐥𑐸𑑄 𑐟𑐫𑑂𑐳𑑄 𑐴𑐾 𑐡𑐫𑐾𑐎𑐷𑐐𑐸 𑐏𑑅 𑑋 𑐏𑑂𑐰𑐵𑑅𑐥𑐵 𑐎𑐵𑐫𑑂𑐟 𑐡𑑂𑐫𑑀𑐥𑑂𑐫𑐵𑐏𑑄𑐫𑐵 𑐐𑑂𑐰𑐳𑐵𑑅 𑐐𑐸𑐛𑐷𑑄 𑐏𑑂𑐫𑐾𑑃 𑐣𑑂𑐫𑐵 𑐡𑐐𑐸𑐐𑐸 𑐎𑐮𑑅 𑐖𑑂𑐰𑐣𑐵 𑐥𑐸𑑄𑐫𑐵𑐟 𑐮𑑅𑐮𑑂𑐴𑐵𑐣𑐵 𑐧𑐶𑐂 𑑋 𑐀𑐮𑐾 𑐏𑑂𑐰𑐵𑑅𑐥𑐵 𑐡𑐫𑑂𑐎𑐹𑐩𑑂𑐴 𑐥𑐸𑑄 𑐣𑑄 𑐎𑐶𑐳𑐮𑐷 𑐕𑐵𑐫𑐵 𑐥𑐸𑐖𑐵 𑐫𑐵𑐣𑐵 𑐖𑐎 𑐏𑑂𑐰𑐵𑑅𑐥𑐵 𑐧𑐶𑐫𑐵 𑐕𑑂𑐰𑐿 𑑋 𑐥𑐸𑑄 𑐣𑑄 𑐥𑐸𑐩𑐖𑑂𑐫𑐵𑐎 𑐏𑑂𑐰𑐵𑐥𑐵𑐟𑐫𑑂 𑐳𑐶𑐡𑑂𑐢𑐶 𑐴𑐾 𑐮𑐵𑐃 𑐩𑐏𑐸𑐐𑐸 𑐖𑐹𑐐𑐸𑐮𑐷𑑄 𑐥𑐸𑑄 𑐣𑑄 𑐴𑐾 𑐥𑐸𑐰𑑄𑐎𑐾 𑐢𑐸𑑄𑐎𑐵 𑐖𑐎 𑐳𑐶𑐡𑑂𑐢𑐶𑐮𑐵𑐃𑐐𑐸 𑐏𑑄 𑐁𑐟𑐎 𑐣𑑄 𑐔𑐮𑐾 𑐴𑐾 𑐖𑐸𑐫𑐵 𑐔𑑂𑐰𑑄𑐐𑐸 𑐳𑐵𑑄𑐳𑑂𑐎𑐺𑐟𑐶𑐎 𑐥𑐬𑐩𑑂𑐥𑐬𑐵 𑐏𑑅 𑑋 𑐠𑑂𑐰 𑐦𑐸𑐎𑑂𑐎𑑄 𑐡𑐺𑐲𑑂𑐚𑐶𑑄 𑐳𑑂𑐰𑐫𑑂𑐧𑐮𑐾 𑐣𑐾𑐥𑐵𑐫𑐵 𑐂𑐟𑐶𑐴𑐵𑐳𑐾 𑐥𑐸𑑄 𑐖𑑂𑐫𑐵 𑐕𑐐𑐹 𑐩𑐴𑐟𑑂𑐰𑐥𑐹𑐬𑑂𑐞𑐐𑐸 𑐁𑐳𑑂𑐠𑐵𑐰𑐵𑐣 𑐖𑑂𑐫𑐵 𑐏𑑅 𑑋

𑐔𑐶𑐟𑑂𑐬𑐎𑐮𑐵𑐫𑐵 𑐧𑐶𑐎𑐵𑐳𑑅
𑐣𑐾𑐥𑐵𑑅𑐫𑐵 𑐔𑐶𑐟𑑂𑐬𑐎𑐮𑐵𑐫𑐵 𑐏𑑂𑐫𑐮𑐫𑑂 𑐬𑐵𑐞𑐵 𑐎𑐵𑐮𑐶𑐣 𑐔𑐶𑐟𑑂𑐬𑐎𑐮𑐵𑐫𑐵𑐟 𑐣𑑂𑐴𑑂𑐫𑐠𑐣𑐾𑐐𑐸 𑐣𑑄 𑐠𑐣 𑐳𑐵𑐣𑑂𑐡𑐬𑑂𑐨𑐶𑐎 𑐖𑐹 𑑋 𑐖𑑄𑐐 𑐧𑐴𑐵𑐡𑐸𑐬𑐫𑐵 𑐥𑐵𑐮𑐫𑑂 𑐫𑐵𑐩𑑂𑐴 𑐔𑐶𑐟𑑂𑐬𑐎𑐵𑐬 “𑐨𑐵𑐖𑐸 𑐩𑐔𑐵” (𑐨𑐵𑐖𑐸𑐩𑐵𑑄) 𑐕𑐩𑑂𑐴 𑐋𑐟𑐶𑐴𑐵𑐳𑐶𑐎 𑐔𑐶𑐟𑑂𑐬𑐎𑐵𑐬 𑐏𑑅 𑑋 𑐠𑑂𑐰 𑐏𑑄 𑐎𑐮𑐵𑐫𑐵 𑐁𑐮𑑀𑐔𑐎 𑐣𑐵𑐬𑐵𑐫𑐞 𑐧𑐴𑐵𑐡𑐸𑐬 𑐳𑐶𑑄𑐴 𑐣𑑄 𑐎𑐸𑐮𑐵 𑐡𑐷𑐐𑐸 𑐡𑐸 𑑋
𑐖𑑄𑐐 𑐧𑐴𑐵𑐡𑐸𑐬𑐫𑐵 𑐰𑐾𑐮𑐵𑐫𑐟 𑐨𑑂𑐬𑐩𑐞𑐫𑐵 𑐂𑐮𑐫𑑂 𑐰𑐫𑑂𑐎𑑅𑐣𑐵𑐥𑑄 𑐗𑐵𑐩𑑂𑐴 𑐨𑐵𑐖𑐸 𑐩𑐔𑐵 (𑐨𑐵𑐖𑐸𑐩𑐵𑐣) 𑐣𑑄 𑐔𑑂𑐰𑑅𑐐𑐸 𑐧𑐾𑐮𑐵𑐫𑐟𑐫𑐵 𑐩𑐴𑐵𑐬𑐵𑐣𑐷 𑐨𑐶𑐎𑑂𑐚𑑀𑐬𑐶𑐫𑐵𑐫𑐵 𑐎𑐶𑐥𑐵 𑐫𑐎𑑂𑐎𑑀 𑐴𑐾 𑐧𑐵𑑄𑐮𑐵𑐐𑐸 𑐏𑐣𑐵 𑐩𑐴𑐵𑐬𑐵𑐣𑐷 𑐨𑐶𑐎𑑂𑐠𑑀𑐬𑐶𑐫𑐵 𑐠𑑅𑐴𑐾 𑐟𑐳𑐎𑑄 𑐥𑑂𑐬𑐨𑐵𑐰𑐶𑐟 𑐖𑐹𑐐𑐸 𑐏𑑄 𑐣𑑂𑐴𑐵𑐥𑐵 𑐣𑑂𑐴𑐵𑐥𑐵 𑐫𑐵𑐥𑐶𑑄 𑐔𑐶𑐟𑑂𑐬𑐎𑐵𑐬𑐟𑐫𑑂𑐳𑑄 𑐢𑐵𑐂𑐐𑐸 𑐏𑑄 𑐫𑐎𑑂𑐎𑑀𑐳𑐶𑐣𑑄 𑐣𑑂𑐫𑑄𑐐𑐸 𑐏𑑄 𑐏𑑅 𑑋 𑐨𑐵𑐖𑐸 𑐩𑐔𑐵 𑐀𑐟𑑂𑐫𑐣𑑂𑐟 𑐴𑐾 𑐳𑐶𑐡𑑂𑐢𑐴𑐳𑑂𑐟 𑐔𑐶𑐟𑑂𑐬𑐫𑐵 𑐎𑐮𑐵𑐎𑐵𑐬 𑑙𑐧𑑂𑐔𑐟𑐲𑑂𑐎𑐟𑑐 𑐏𑑅𑐩𑑂𑐴 𑐖𑐸𑐫𑐵 𑐖𑑄𑐐 𑐧𑐴𑐵𑐡𑐸𑐬𑑄 𑐰𑐫𑐵 𑐧𑑂𑐫𑐟𑐶𑐎𑑂𑐟 𑐔𑐶𑐟𑑂𑐬 𑐔𑑂𑐰𑐫𑐐𑐸 𑐱𑐿𑐮𑐷 𑐳𑐸𑐢𑐵𑐬 𑐫𑐵𑐫𑐾𑐐𑐸 𑐳𑑂𑐰𑐟 𑑋 𑐧𑐵𑐮𑐎𑐺𑐲𑑂𑐞 𑐳𑐩𑑄 𑐠𑐠𑐾 𑐢𑐿 𑐡𑐷𑐐𑐸 𑐡𑐸 “𑐖𑑄𑐐 𑐧𑐴𑐵𑐡𑐸𑐬𑑄 𑐰𑐾𑐮𑐵𑐫𑐟𑑄 𑐮𑐶𑐴𑐵 𑐰𑐫𑑂 𑐢𑐸𑑄𑐎𑐵 𑐨𑐵𑐖𑐸𑐩𑐔𑐵 (𑐨𑐵𑐖𑐸𑐩𑐵𑐣 𑐔𑐶𑐟𑑂𑐬𑐎𑐵𑐬) 𑐫𑐵𑐟 𑐮𑐞𑑂𑐜𑐣 𑐰 𑐥𑑂𑐫𑐵𑐬𑐶𑐳𑐾 𑐏𑑄𑐐𑐸 𑐳𑑂𑐰𑐨𑐵𑐰𑐶𑐎 𑐔𑐶𑐟𑑂𑐬 𑐫𑐵𑐴𑐾 𑐝𑐵𑐔𑐵𑐫𑑂 𑐳𑑂𑐰𑐨𑐵𑐰𑐶𑐎 𑐔𑐶𑐟𑑂𑐬 𑐔𑑂𑐰𑐎𑐹𑐐𑐸 𑐡𑐸 𑑋” 𑐎𑐸𑐩𑐵𑐬𑐷 𑐕𑐾𑑃𑐫𑐵 𑐖𑐫 𑐥𑑂𑐬𑐎𑐵𑐱 𑐩𑐮𑑂𑐮𑐫𑐵 𑐀𑑄𑐐𑐮𑐾 𑐔𑑂𑐰𑐫𑐵𑐟𑑅𑐐𑐸 𑐰𑑂𑐫𑐎𑑂𑐟𑐶 𑐔𑐶𑐟𑑂𑐬𑑄 𑐩𑐮𑑂𑐮𑐎𑐵𑐮𑐶𑐣 𑐰𑑂𑐫𑐎𑑂𑐟𑐶 𑐔𑐶𑐟𑑂𑐬𑐫𑐵 𑐄𑐡𑐵𑐴𑐬𑐞 𑐥𑑂𑐬𑐳𑑂𑐟𑐸𑐟 𑐫𑐵𑐃 𑑋 𑐠𑑂𑐰𑐴𑐾 𑐔𑐶𑐟𑑂𑐬𑐫𑐵𑐟 𑐡𑐷𑐬𑑂𑐢𑐩𑐵𑐣 𑐔𑐶𑐟𑑂𑐬𑐎𑐵𑐬𑐫𑐵 𑐀𑐧𑐸 𑐮𑐎𑑂𑐲𑑂𑐩𑐷 𑐮𑐵𑐮𑑄 𑐔𑑂𑐰𑑅𑐐𑐸 𑐢𑐎𑐵 𑐢𑐵𑐃 𑑋 𑐣𑐾𑐥𑐵𑐮𑐷 𑐔𑐶𑐟𑑂𑐬𑐎𑐮𑐵 𑐏𑐫𑑂 𑐔𑐶𑐎𑑄 𑐬𑑄𑐐𑐫𑐵 𑐥𑑂𑐬𑐫𑑀𑐐 𑐥𑐹𑐬𑑂𑐞𑐩𑐵𑐣𑑄 (𑐨𑐵𑐖𑐸𑐩𑐔𑐵 𑐳𑑂𑐰𑑂𑐫𑐵 𑑕𑑓 𑐡𑑄 𑐮𑐶𑐥𑐵 𑐧𑐹𑐩𑑂𑐴) 𑐰𑐶𑐎𑐵𑐳 𑐫𑐵𑐐𑐸 𑐏𑑅 𑑋 𑐟𑐬 𑐖𑑄𑐐 𑐰𑐴𑐵𑐡𑐸𑐬𑐫𑐵 𑐦𑑂𑐬𑐵𑐣𑑂𑐳 𑐫𑐵𑐟𑑂𑐬𑐵𑐫𑐵 𑐀𑐰𑐳𑐬𑐾 “𑐮𑐵 𑐥𑑂𑐬𑐾𑐳” 𑐢𑐿𑐐𑐸 𑐳𑐩𑐵𑐔𑐵𑐬 𑐥𑐟𑑂𑐬𑐫𑑂 “𑐖𑑄𑐐 𑐰𑐴𑐵𑐡𑐸𑐬 𑐣𑐵𑐥𑑄 𑐣𑐾𑐥𑐵𑐮𑑄 𑐰𑐩𑑂𑐴 𑐡𑐬𑐰𑐵𑐬𑐫𑐵 𑐔𑐶𑐟𑑂𑐬𑐎𑐵𑐬 𑐂𑐣𑐵𑐩𑐾𑐮𑑄 𑐔𑐶𑐟𑑂𑐬 𑐔𑑂𑐰𑐂𑐩𑑂𑐴 𑐄𑐮𑑂𑐮𑐾𑐏 𑐖𑐸𑐐𑐸 𑐡𑐸 𑑋 𑐨𑐵𑐖𑐸 𑐧𑐵𑐮𑐎𑐺𑐲𑑂𑐞 𑐳𑐩𑑄𑐫𑐵 𑐎𑐠𑑄 “𑐧𑐾𑐮𑐵𑐫𑐟𑑄 𑐮𑐶𑑄𑐴𑐵 𑐰𑐫𑐵 𑐨𑐵𑐖𑐸𑐩𑐔𑐵 𑐢𑐎𑐵 𑐨𑐶𑐎𑑂𑐚𑑀𑐬𑐶𑐫𑐵 𑐰 𑐀𑐮𑑂𑐰𑐬𑑂𑐚𑐫𑐵 𑐔𑐶𑐟𑑂𑐬 𑐕𑐐𑐸 𑐴𑐾 𑐎𑑂𑐫𑐵𑐣𑑂𑐨𑐵𑐳𑐾 𑐔𑐶𑐎𑑄𑐬) 𑐐𑑄 𑐔𑑂𑐰𑐐𑐸 𑐡𑐸 𑑋 𑐨𑐵𑐖𑐸 𑐩𑐔𑐵𑐫𑐵𑐴𑐾 𑐥𑐵𑐮𑐫𑑂 𑐣𑐾𑐥𑐵𑐮𑐫𑑂 𑐁𑐢𑐸𑐣𑐶𑐎 𑐎𑐮𑐵𑐎𑐺𑐟𑐶𑐫𑐵 𑐥𑑂𑐬𑐡𑐬𑑂𑐱𑐣𑐷 𑐰 𑐔𑐶𑐎𑑄 𑐬𑑄𑐐 𑐡𑐸𑐴𑐵𑑄 𑐰𑑅𑐐𑐸 𑐖𑐹𑐐𑐸𑐮𑐷𑑄 𑐬𑐵𑐞𑐵 𑐎𑐵𑐮𑐫𑐵 𑐔𑐶𑐟𑑂𑐬𑐎𑐵𑐬 𑐰 𑐔𑐶𑐟𑑂𑐬𑐎𑐵𑐬 𑐰𑑄𑐱𑐖𑐫𑐵 𑐣𑑂𑐴𑐵𑐥𑐵𑐩𑑂𑐴 𑐁𑐢𑐸𑐣𑐶𑐎 𑐔𑐶𑐟𑑂𑐬𑐎𑐵𑐬 (𑐎𑐮𑐵𑐎𑐵𑐬) 𑐖𑐹𑐰𑑅𑐐𑐸 𑐏𑐣𑐾 𑐡𑐸 𑑋 𑐰𑐴𑐾 𑐨𑐵𑐖𑐸𑐩𑐔𑐵𑐫𑐵 𑐥𑑂𑐬𑐟𑐶𑐨𑐵𑑄 𑐫𑐵𑐣𑐵𑑅 𑐬𑐵𑐞𑐟𑐫𑐾𑐐𑐸 𑐡𑐬𑐰𑐵𑐬𑐾 𑐣𑑄 𑐁𑐥𑐵𑐮𑑄 𑐔𑐶𑐟𑑂𑐬𑐎𑐵𑐬 𑐥𑐶𑐣𑐷𑐐𑐸 𑐳𑐩𑑂𑐩𑐵𑐣 𑐖𑐹𑐐𑐸
𑐏𑐣𑐾𑐡𑐸 𑑋 𑐄𑐐𑐸 𑐃𑐫𑐵 𑐥𑑂𑐬𑐟𑐶𑐨𑐵 𑐡𑐸𑐥𑐶𑑄 𑐕𑐸𑑄 𑐕𑐸𑑄 𑐔𑐶𑐟𑑂𑐬𑐎𑐵𑐬 𑐟 𑐩𑐢𑑂𑐫𑐾 𑐠𑐥𑐶𑑄 𑐏𑑅 𑐢𑐷𑐖 𑐣𑐵𑐬𑐵𑐫𑐞 , 𑐖𑐷𑐟 𑐣𑐳𑐶𑑄𑐒𑑂𑐐 , 𑐬𑐵𑐖 𑐣𑐵𑐬𑐵𑐫𑐞 𑐳𑐶𑑄 𑐰𑐫𑐵𑐣𑑄 𑐮𑐶𑐥𑐵 𑐫𑐵𑐥𑐶𑑄 𑐮𑐎𑑂𑐲𑑂𑐩𑐷 𑐧𑐴𑐵𑐡𑐸𑐬, 𑐧𑐏𑐟𑐩𑐵𑐣, 𑐥𑐸𑐬𑑂𑐞𑐩𑐵𑐣, 𑐢𑐷𑐬𑐖𑐩𑐵𑐣 𑐁𑐡𑐶 𑐁𑐡𑐶 𑐥𑐶𑐳𑑄 𑐣𑑄 𑐠𑑅𑐐𑐸 𑐴𑐾 𑐎𑐮𑐵 𑐎𑑁𑐱𑐮 𑐣𑑂𑐴𑑂𑐫𑐧𑑂𑐰𑐫𑐵 𑐰𑑄𑐐𑐡𑐸 𑑋 𑐂𑐩𑐶𑐐𑐸 𑐮𑑅 𑐬𑑄𑐐, 𑐔𑐶𑐎𑑄 𑐬𑑄𑐐𑐫𑐵 𑐎𑐶𑐥𑐵𑐟 𑐠𑐣𑐫𑐵 𑐠𑐶𑑄 𑐠𑐶𑑄 𑐡𑐬𑐰𑐵𑐬, 𑐩𑐴𑐮, 𑐰 𑐴𑐣𑐸𑐩𑐵𑐣 𑐢𑑂𑐰𑐵𑐏𑐵𑐫𑑂 𑐳𑐶𑑄𑐴𑐡𑐬𑐰𑐵𑐬𑐫𑐵 𑐐𑑂𑐫𑐵𑐮𑐬𑐷 𑐧𑐿𑐛𑐎 𑐁𑐡𑐶 𑐠𑐵𑐳𑐾 𑐁𑐟𑐎 𑐣𑑄 𑐳𑐸𑐬𑐎𑑂𑐲𑐶𑐟 𑐖𑐸𑐫𑐵 𑐔𑑂𑐰𑑄𑐐𑐸 𑐡𑐣𑐶 𑑋

𑐃𑐎𑐠𑑄 𑐔𑐶𑐟𑑂𑐬𑐎𑐵𑐬𑐟𑑅
𑐔𑐶𑐟𑑂𑐬𑐎𑐮𑐵𑐫𑐵 𑐰𑐶𑐎𑐵𑐳𑐫𑑂 𑐰𑐵𑑅𑐔𑐵𑐫𑑂𑐎𑐵 𑐳𑑂𑐰𑐮 𑐢𑐵𑑅𑐳𑐵 𑐟𑐾𑐖 𑐰𑐴𑐵𑐡𑐸𑐬 𑐔𑐶𑐟𑑂𑐬𑐎𑐵𑐬 𑐥𑐵𑐏𑐾𑑄 𑐁𑐢𑐸𑐣𑐶𑐎 𑐎𑐮𑐵𑐫𑐵 𑐱𑐸𑐬𑐸 𑐖𑐸𑐐𑐸 𑐰 𑐰𑐫𑐎𑐮𑑄 𑐔𑐶𑐎𑑄 𑐬𑑄𑐐𑐫𑐵 𑐰𑐶𑐎𑐵𑐳𑐾 𑐰𑐶𑐱𑐾𑐲 𑐫𑑀𑐐𑐡𑐵𑐣 𑐧𑑂𑐫𑐹𑐐𑐸 𑐏𑐣𑐾 𑐡𑐸 𑑋
𑐰𑐫𑐎𑐣𑑄 𑐎𑐮𑐎𑐟𑑂𑐟𑐵𑐫𑑂 𑐀𑐢𑑂𑐫𑐫𑐣 𑐣𑑄 𑐫𑐵𑐣𑐵 𑐡𑐷𑐐𑐸 𑐏𑑅 𑑋 𑐟𑐾𑐖 𑐰𑐴𑐵𑐡𑐸𑐬 𑐔𑐶𑐟𑑂𑐬𑐎𑐵𑐬𑑄 𑐖𑐸𑐡𑑂𑐢 𑐎𑐮𑐵 𑐥𑐵𑐛𑐱𑐵𑐮𑐵𑐫𑐵 𑐣𑑂𑐴𑑂𑐫𑐮𑐸𑐰𑐵𑑅 𑐱𑐶𑐎𑑂𑐲𑐎 𑐟 𑐩𑐢𑑂𑐫𑐾 𑐕𑐩𑑂𑐴 𑐏𑑅 𑑋 𑐰𑐫𑑂𑐎𑐮𑑄 𑐳𑑂𑐫𑐣𑐵𑐡𑐷𑐥𑐶𑑄 𑐩𑐾𑐥𑐶𑑄 𑐣𑐵𑑄 𑐡𑑄𑐥𑐶𑑄 𑐎𑐮𑐵𑐎𑐵𑐬 𑐥𑐶𑑄 𑐏𑑅 𑐡𑐶𑐮 𑐰𑐴𑐵𑐡𑐸𑐬, 𑐀𑐩𑐬 𑐰𑐴𑐵𑐡𑐸𑐬 𑐳𑑂𑐰. 𑐩𑐣𑑀𑐴𑐬 𑐩𑐵𑐣 𑐥𑐸𑐣 𑐎𑐺𑐲𑑂𑐞 𑐰𑐴𑐵𑐡𑐸𑐬 𑐁𑐱𑐵𑐎𑐵𑐖𑐷, 𑐰𑐵𑐰𑐸𑐎𑐵𑐖𑐷, 𑐨𑐵𑐂𑐬𑐵𑐩, 𑐎𑐾𑐱𑐰, 𑐀𑐩𑐷𑐬 𑐩𑐵𑐣, 𑐐𑑀𑐥𑐵𑐮 𑐟𑐷𑐬𑑂𑐠𑐮𑐵𑐮 𑐰𑐳𑐣𑑂𑐟 𑐁𑐡𑐶 𑐔𑐶𑐟𑑂𑐬𑐎𑐵𑐬 𑐥𑐶𑐳𑑄 𑐠𑑅𑐐𑐸 𑐥𑑂𑐬𑐟𑐶𑐨𑐵 𑐎𑑂𑐫𑐣𑐵 𑐔𑑂𑐰𑐣𑐵 𑐡𑐷𑐐𑐸 𑐡𑐸 𑑋 𑐟𑐾𑐖 𑐰𑐴𑐵𑐡𑐸𑐬 𑐣𑑄 𑐡𑐬𑐰𑐵𑐬 𑐴𑐵𑐂 𑐳𑑂𑐎𑐹𑐮𑐫𑑂 𑐔𑐶𑐟𑑂𑐬𑐎𑐮𑐵 𑐳𑑂𑐫𑐣𑐾𑐐𑐸 𑐖𑑂𑐫𑐵 𑐣𑑄 𑐫𑐵𑐣𑐵𑐡𑐷𑐐𑐸 𑐏𑑅 𑑋 𑐰𑐫𑑂𑐎𑑅𑐫𑐵 𑐎𑐵𑐫𑑂 𑐩𑐡𑐣 𑐰 𑐩𑑂𑐴𑑂𑐫𑐵𑐫𑑂 𑐱𑐵𑐬𑐡𑐵 𑐔𑐶𑐟𑑂𑐬𑐎𑐵𑐬𑑄 𑐎𑐮𑐵 𑐎𑑂𑐲𑐾𑐟𑑂𑐬𑐫𑑂 𑐡𑐸𑐐𑑂𑐫𑑄𑐎 𑐮𑑂𑐴𑐵𑑅𑐟𑐫𑐵 𑐔𑑂𑐰𑐣𑐵 𑐡𑐷𑐐𑐸 𑐡𑐸 𑑋 𑐀𑐣𑑄 𑐮𑐶𑐥𑐵 𑐀𑐩𑐬 𑐔𑐶𑐟𑑂𑐬𑐎𑐵𑐬𑐫𑐵 𑐔𑐶𑐟𑑂𑐬𑐎𑐮𑐵 𑐎𑑁𑐱𑐮 𑐣𑑂𑐴𑑂𑐫𑐵𑐎𑐾𑐐𑐸𑐮𑐷 𑐟𑑅𑐢𑑄𑐐𑐸 𑐡𑐾𑐣 𑐡𑐸 𑑋
𑐀𑐩𑐬 𑐔𑐶𑐟𑑂𑐬𑐎𑐵𑐬𑐫𑐵 𑐳𑐩𑐎𑐵𑐮𑐶𑐣𑑄 𑐥𑐶𑑄 𑐩𑐢𑑂𑐫𑐾 𑐩𑐣𑑀𑐴𑐬𑐩𑐵𑐣 𑐥𑐸𑐣 𑐣𑑄 𑐕𑐩𑑂𑐴 𑐣𑐵𑑄 𑐡𑑄𑐩𑑂𑐴 𑐔𑐶𑐟𑑂𑐬𑐎𑐵𑐬 𑐏𑑅 𑑋
𑐥𑐸𑐮𑐵𑑄𑐥𑐶 𑐁𑐥𑐵𑐠𑐾𑑄 𑐔𑐶𑐟𑑂𑐬𑐎𑐵𑐬 𑐥𑐶𑐳𑑄 𑐥𑐬𑑄𑐥𑐬𑐵𑐐𑐟 𑐎𑐶𑐥𑐵 𑐰 𑐥𑑁𑐨𑐵𑑅𑐟 𑐔𑑂𑐰𑐫𑐵 𑐠𑑅𑐐𑐸 𑐮𑐖𑐐𑐵 𑐣𑑂𑐴𑑂𑐫𑐵𑐎𑐵 𑐰𑐫𑐵 𑐔𑑂𑐰𑑄𑐐𑐸 𑐡𑐸 𑑋 𑐠𑑂𑐰𑐴𑐾 𑐥𑐬𑐩𑑂𑐥𑐬𑐵𑐐𑐟 𑐔𑐶𑐟𑑂𑐬𑐎𑐮𑐵𑐫𑐵𑐟 𑐖𑐷𑐰𑐣𑑂𑐟 𑐰𑐷𑐐𑐸𑐫𑐵 𑐮𑐵𑐐𑐷𑑄 𑐥𑑂𑐬𑐾𑐩𑐩𑐵𑐣 𑐰 𑐀𑐩𑐷𑐬𑐩𑐵𑐣 𑐥𑐶𑐳𑑄 𑐥𑐬𑐩𑑂𑐥𑐬𑐵𑐐𑐟 𑐎𑐮𑐵𑐎𑐵𑐬 𑐳𑑄𑐑, 𑐣𑐾𑐥𑐵𑐮 𑐥𑐬𑐩𑑂𑐥𑐬𑐵𑐐𑐟 𑐁𑐬𑑂𑐚 𑐐𑑂𑐫𑐵𑐮𑐬𑐷 𑐔𑐵𑐫𑐾𑐎𑐵𑑅 𑐫𑑀𑐐𑐡𑐵𑐣 𑐰𑐷𑐐𑐸 𑐎𑐸𑐟𑑅 𑐖𑐸𑐫𑐵 𑐔𑑂𑐰𑑄𑐐𑐸 𑐡𑐸 𑑋 𑐀𑐠𑐾 𑐴𑐾 𑐥𑑁𑐨𑐵 𑐔𑑂𑐰𑐫𑐐𑐸𑐮𑐷 𑐮𑑀𑐎 𑐔𑐶𑐟𑑂𑐬𑐎𑐵𑐬 𑐫𑐵𑐐𑐸 𑐡𑐾𑐣𑑄 𑐣𑑄 𑐔𑑂𑐰 𑐕𑐵𑐫𑑂 𑐧𑐴 𑐖𑐹 𑑋 𑐣𑑂𑐴𑐹𑐐𑐸 𑐥𑐸𑐳𑑂𑐟𑐵𑐫𑐵 𑐔𑐶𑐟𑑂𑐬𑐎𑐵𑐬 (𑐥𑐸𑑄) 𑐟𑐫𑑂𑐳𑑄 𑐁 𑐫𑐵𑐣𑐵 𑐔𑑂𑐰𑑄𑐐𑐸 𑐔𑐶𑐟𑑂𑐬𑐎𑐮𑐵𑐫𑐵 𑐔𑑂𑐰𑐖𑑂𑐫𑐵 –– 𑐮𑐸𑐩𑑂𑐰𑐶𑐣𑐷 𑐠𑐷 𑐠𑐷 𑐐𑐸𑐩𑑂𑐧𑐵 𑐰𑐶𑐴𑐵𑐬 𑐰 𑐫𑐮𑐫𑐵 𑐎𑑂𑐰𑐵𑐥𑐵𑑅𑐡𑑂𑐫𑑅𑐫𑐵 𑐠𑐵𑐫𑑂 𑐳𑑂𑐰𑐫𑑂 𑐧𑐴 𑐖𑐹 𑑋
𑐔𑐶𑐟𑑂𑐬𑐎𑐵𑐬 𑐰𑑄𑐱𑐫𑑂 𑐩𑐶𑐳𑐵𑐥𑐶𑐣𑐷𑐐𑐸 𑐣𑑄 𑐁𑐥𑐵𑐮𑑄 𑐫𑑀𑐐𑐡𑐵𑐣 𑐡𑐸𑐐𑐸 𑐏𑐣𑐾 𑐡𑐸 𑑋 𑐀𑐗𑐮𑐵 𑐥𑐬𑐩𑑂𑐥𑐬𑐵𑐐𑐟 𑐎𑐮𑐵𑐫𑑂 𑐩𑐶𑐳𑐵𑐥𑐶𑐣𑐷𑐐𑐸 𑐮𑑂𑐴𑐵𑑅 𑐁𑐥𑐵𑐮𑑄 𑐖𑑂𑐫𑐮𑐵𑐰𑑄𑐐𑐸 𑐏𑑄 𑐡𑐸 𑑋 𑐮𑐎𑑂𑐲𑑂𑐩𑐷 𑐡𑑂𑐫𑑅 𑐣𑐵𑐐 𑐨𑐐𑐰𑐟𑐷 𑐡𑑂𑐫𑑅 𑐳𑐵𑐫𑐵𑐫𑐵 𑐏𑑂𑐰𑐵𑐥𑐵 𑐔𑑂𑐰𑐫𑐾𑐐𑐸𑐮𑐶 𑐕𑐾𑑃 𑐠𑑅𑐐𑐸 𑐩𑐵𑐐𑐸 𑐖𑑂𑐫𑐵 𑐫𑐵𑐣𑐵 𑐣𑑄 𑐔𑐶𑐟𑑂𑐬𑐎𑐮𑐵 𑐥𑐾𑐱𑐵𑐫𑑂 𑐩𑐶𑐳𑐵𑐥𑐶𑐳𑑄 𑐰𑑂𑐧𑐟𑐶 𑐎𑐫𑐵 𑐔𑑂𑐰𑑄𑐐𑐸 𑐡𑐸 𑑋 𑐮𑑂𑐴𑐵𑐟𑑄 𑐔𑑂𑐰𑐂𑐐𑐸 𑐔𑐶𑐟𑑂𑐬𑐫𑐵𑐟 𑐣𑑂𑐴𑐵𑐥𑐵𑑄𑐣𑐶𑐳𑐾𑑄 𑐩𑑁𑐮𑐶𑐎𑐟𑐵 𑐎𑐠𑑄 𑐩𑐴𑐟𑑂𑐰 𑐰𑐷𑐐𑐸𑐮𑐶𑑄 𑐴𑐾 𑐠𑑁𑑄𑐟𑑅𑐎 𑐣𑑄 𑐥𑑂𑐬𑐾𑐳𑑄 𑐰𑐵 𑐩𑐾𑐱𑐷𑐣𑐫𑑂 𑐕𑐵𑐥𑐲𑑂𑐫𑑂 𑐫𑐵𑐐𑐸 𑐔𑐶𑐟𑑂𑐬𑐫𑐵𑐟 𑐔𑑂𑐰𑐫𑐵 𑐴𑐳𑑂𑐟 𑐮𑐶𑐏𑐶𑐟 𑐔𑐶𑐟𑑂𑐬𑐫𑑂 𑐩𑐴𑐟𑑂𑐰 𑐡𑐸𑐐𑐸 𑐏𑑅 𑑋
𑐠𑐠𑐾 𑐔𑐶𑐟𑑂𑐬 𑐔𑑂𑐰𑐫𑐾𑐐𑐸 𑐖𑑂𑐫𑐵𑐫𑑂 𑐖𑐎 𑐩𑐏𑐸 𑐎𑑂𑐫𑐵𑐩𑐬𑐵𑑄 𑐟𑐳𑑂𑐰𑐷𑐬 𑐎𑐵𑐫𑐾𑐐𑐸 𑐖𑑂𑐫𑐵𑐫𑑂 𑐣𑑄 𑐥𑐸𑑄 𑐟 𑐐𑐵𑐎𑑂𑐎 𑐔𑑂𑐰𑐣𑑂𑐴𑑂𑐫𑐵𑐐𑐸 𑐏𑐣𑐾𑐡𑐸 𑑋 𑐠𑑂𑐰 𑐖𑑂𑐫𑐵𑑅 𑐡𑐎𑐮𑐫𑑂 𑐣𑑂𑐴𑐵𑐥𑐵𑑄 𑐥𑐹𑐬𑑂𑐞𑐩𑐵𑐣 𑐔𑐶𑐟𑑂𑐬𑐎𑐵𑐬𑑄 𑐫𑐵𑐣𑐵𑐡𑐶𑐐𑐸 𑐏𑑅 𑑋
𑐳𑑂𑐰𑐣𑐶𑐐𑑅𑐮𑐫𑑂 𑐣𑐏𑑅𑐔𑐏𑑅 𑐰 𑐠𑐶𑐠𑐶 𑐥𑐬𑑂𑐰𑐫𑑂 𑐫𑐾𑑄𑐫𑐵𑐥𑐶𑑄 𑐔𑐶𑐟𑑂𑐬𑐎𑐵𑐬 (𑐥𑐸𑑄) 𑐟𑐫𑑂𑐳𑑄 𑐔𑑂𑐰𑐫𑐾𑐩𑐵𑑅𑐐𑐸 𑐔𑑂𑐰𑐖𑑂𑐫𑐵

𑐑𑐮𑑅 𑐠𑐵𑐫𑑂 𑐡𑑂𑐫𑑀𑐫𑐵𑐐𑐸 𑐣𑐵𑑄 𑐟𑐶𑐠𑐷/𑐥𑐬𑑂𑐰 𑐔𑑂𑐰𑐖𑑂𑐫𑐵 𑐫𑐵𑐂𑐥𑐶𑑄
𑑑. 𑐖𑐣𑐩𑐴𑐵𑐡𑑂𑐫𑑀 𑐖𑐣𑐩𑐴𑐵𑐡𑑂𑐫𑑀 𑐔𑐿𑐟𑑂𑐬 𑐀𑐲𑑂𑐚𑐩𑐷 𑐬𑐠 𑐔𑑂𑐰𑐂𑐐𑐸 𑐎𑐾𑐮𑐩𑐸𑐐𑐸𑐠𑐷
𑑒. 𑐖𑐣𑐩𑐴𑐵𑐡𑑂𑐫𑑀 𑐖𑐣𑐩𑐴𑐵𑐡𑑂𑐫𑑀 𑐣𑑂𑐴𑐰𑑄𑐫𑐵𑐂𑐰𑐮𑐾 𑐮𑑄𑐥𑐸 𑐕𑐵𑐂𑐐𑐸 𑐡𑑂𑐫𑑀𑐔𑑂𑐰𑐂𑐐𑐸 𑐎𑐾𑐮𑐩𑐸𑐐𑐸𑐠𑐷
𑑓. 𑐰𑑄𑐐𑐮𑐾 𑐁𑐖𑐸𑐡𑑂𑐫𑑀 𑐫𑐾𑑃𑐣𑑂𑐢𑑂𑐫𑐵𑐥𑐸𑐣𑑂𑐴𑐶𑐡𑑂𑐰𑐵𑐡𑐱𑐷 𑐡𑑂𑐫𑑀𑐫𑐵𑐟 𑐔𑑂𑐰𑐂𑐐𑐸
𑐫𑐳𑐷𑑄 𑐠𑐣𑐷𑐰𑐮𑐾
𑑔. 𑐨𑐵𑐚𑐨𑐚𑐾𑐣𑐷 𑐩𑐦𑐟𑐵𑐡𑑂𑐫𑑀 𑐮𑑂𑐴𑐸𑐟𑐶𑐥𑐸𑐣𑑂𑐴𑐶 𑐕𑐣𑑂𑐴𑐹𑐣𑑂𑐴𑑂𑐫𑑀 𑐚𑐸𑑄𑐜𑐵𑐮𑐡𑐾𑐰𑐷 𑐩𑐦𑐟𑐵𑐡𑑂𑐫𑑀𑐫𑐵𑐩𑐵 ,,
𑑕. 𑐴𑐵𑐜𑐷 𑐐𑐵𑑄 𑐠𑐶𑐠𑐷𑐡𑑂𑐫𑑀𑐟 ,, 𑐩𑐶𑐏𑐵 𑐎𑑄𑐎𑐾𑐐𑐸 ,,
𑑖. 𑐰𑑄𑐐𑐮𑐾 𑐧𑐵𑐎𑐵 𑐨𑐿𑐬𑐰 𑐫𑐾𑑃𑐡𑑂𑐫𑐵𑐧𑐮𑐾 𑐩𑐵𑐳𑑄𑐐𑐮𑐷𑐫𑐵𑐥𑐶𑐳𑑄 𑐡𑑂𑐫𑑅 𑐔𑑂𑐰𑐂𑐐𑐸 ,,
𑑗. 𑐥𑐔𑐮𑐷 𑐥𑐔𑐮𑐷 𑐨𑐿𑐬𑐰 𑐩𑑀𑐴𑐣𑐷 𑐣𑑂𑐴𑑂𑐫𑑀 𑐳𑐦𑐵 𑐫𑐵𑐫𑐾𑐐𑐸 𑐰𑐚𑐸𑐏𑐮 𑐣𑑄
𑑘. 𑐩𑐬𑐸 𑐎𑐸𑐩𑐵𑐬𑐷 𑐬𑐠 𑐫𑐢𑑂𑐫𑐵𑑄𑐥𑐸𑐣𑑂𑐴𑐶 𑐣𑑂𑐴𑑂𑐫𑑀 𑐬𑐠 𑐔𑑂𑐰𑐂𑐐𑐸 𑐎𑐾𑐮𑐩𑐸 𑐐𑐸𑐠𑐶
𑐔𑐿𑐟𑑂𑐬 𑐀𑐲𑑂𑐚𑐩𑐷 𑐎𑐸𑐣𑑂𑐴𑐸
𑑙. 𑐴𑐣𑐸𑐩𑐵𑐣 𑐝𑑀𑐎𑐵 𑐴𑐵𑐠𑐵𑐡𑑂𑐫𑑀 𑐫𑐢𑑂𑐫𑐵𑑄𑐥𑐸𑐣𑑂𑐴𑐶 𑐎𑐾𑐮𑐩𑐸𑐫𑐵𑐥𑐶𑑄 (𑐀𑐩𑐷𑐬𑐩𑐵𑐣)
𑑑𑑐. 𑐨𑐡𑑂𑐬𑐎𑐵𑐮𑐷 𑐨𑐡𑑂𑐬𑐎𑐵𑐮𑐷𑐡𑑂𑐫𑑀 𑑑𑑒 𑐡𑑄𑐫𑐵 𑐕𑐎 𑐩𑐵𑐳𑑄𑐐𑐮𑐷𑐫𑐵 𑐔𑐶𑐟𑑂𑐬𑐎𑐵𑐬𑐟
𑑑𑑑. 𑐮𑐸𑐟𑐷 𑐮𑐸𑐟𑐶 𑐀𑐖𑐶𑐩𑐵 𑐧𑐵𑐮𑐵𑐔–𑐴𑐾 𑐩𑐶𑐏𑐵 𑐎𑑄𑐎𑐾𑐐𑐸
𑑑𑑒. 𑐴𑐮𑐔𑑀𑐎 𑐳𑐰𑐵𑐨𑐎𑑂𑐎𑐹 𑐫𑐢𑑂𑐫𑐵𑑄𑐥𑐸𑐣𑑂𑐴𑐶 𑐩𑐵𑐳𑑄𑐐𑐮𑐷 𑐟𑐾𑐖𑐰𑐴𑐵𑐡𑐸𑐬𑐥𑐶𑑄
𑐳𑑂𑐰𑐫𑐩𑑂𑐨𑐹
𑑑𑑓. 𑐖𑐫𑐧𑐵𑐐𑐾𑐱𑑂𑐰𑐬𑐷
𑑑𑑔. 𑐳𑑂𑐰𑐫𑐩𑑂𑐨𑐹
𑑑𑑕. 𑐐𑐠𑐸 𑐥𑑂𑐫𑐵𑐏𑑄 𑐫𑐵 𑐏𑑂𑐰𑐵𑐥𑐵 𑐟 𑐡𑐫𑐎𑐾𑐐𑐸
𑑑𑑖. 𑐖𑐫𑐰𑐵𑐐𑐾𑐱𑑂𑐰𑐬𑐷 𑐖𑐫𑐰𑐵𑐐𑐾𑐱𑑂𑐰𑐬𑐷 𑐗𑐶𑑄𑐣𑐶𑐡𑑄𑐫𑐵 𑐮𑐩𑑂𑐥𑐸 𑐕𑐵𑐫𑐾𑐐𑐸 𑐠𑑅𑐣𑐾𑐫𑐵 𑐥𑐸𑑄𑐟
𑑑𑑗. 𑐰𑐶𑐖𑐾𑐱𑑂𑐰𑐬𑐷 𑐰𑐶𑐖𑐾𑐱𑑂𑐰𑐬𑐷 𑐕𑐎𑑅 𑐨𑐶𑑄𑐡𑑂𑐫𑑅 𑐎𑑂𑐰𑑅𑐣𑐾𑐫𑐵 𑐥𑐸𑑄 𑐟

𑐡𑑂𑐫𑑅𑐟 𑐔𑑂𑐰𑐫𑐾𑐧𑐮𑐫𑑂 𑐩𑐹𑐏𑑂𑐫 𑐳𑐷𑐎𑐾 𑐩𑐵𑑅𑐐𑐸 𑐏𑑄𑐟 𑐩𑐢𑑂𑐫𑐾 𑐣𑑄 𑐡𑑂𑐫𑑅𑐫𑐵 𑐬𑑄𑐐, 𑐖𑑂𑐰𑑄𑐳𑐵, 𑐟𑐶𑐳𑐵 𑐰𑐳𑑅, 𑐢𑑂𑐫𑐵𑐣 (𑐁𑐂𑐎𑐣𑑀𑐐𑑂𑐬𑐵𑐦𑐶) 𑐁𑐡𑐶𑐫𑐵𑐟 𑐎𑐫𑐵𑑅 𑐳𑐵𑐥 𑐴𑐾 𑐧𑐶𑐔𑐵𑑅 𑐫𑐵𑐣𑐵𑑅 𑐖𑐎 𑐡𑑂𑐫𑑀 𑐟 𑐔𑑂𑐰𑐫𑐾𑐩𑐵𑑅𑐐𑐸 𑐏𑐣𑐾 𑐡𑐸 𑑋
𑐔𑐶𑐟𑑂𑐬𑐎𑐵𑐬 (𑐥𑐸𑑄) 𑐟𑐫𑐳𑑂𑑄 𑐎𑐬𑑂𑐩𑐎𑐵𑐞𑑂𑐜𑐫𑑂 𑐫𑐵𑐫𑑂𑐩𑐵𑐐𑐸 𑐔𑑂𑐰𑐖𑑂𑐫𑐵
𑑑) 𑐩𑐶𑐳𑐵𑐩𑐔𑐵 𑐃 (𑐰𑐾𑐮 𑐰𑐶𑐰𑐵𑐴)
𑐎) 𑐃 𑐫𑐵𑐂𑑃𑐩𑑂𑐴 𑐩𑐶𑐳𑐵𑐩𑐔𑐵𑐫𑐵𑐟 :- 𑐳𑐮𑐵𑐥𑐵𑑅 𑐰 𑐩𑑀𑐎𑐷 𑐔𑑂𑐰𑐫𑑂𑐩𑐵
𑐏) 𑐃 𑐩𑐸𑑄𑐎𑐾𑐥𑐶𑑄𑐟 :- 𑐧𑑂𑐬𑐩𑑂𑐴𑐵 𑐎𑑂𑐰𑑀𑑄, 𑐎𑐸𑐮𑐶𑐔𑐵 𑐖𑑂𑐰𑐮𑑄 𑐰 𑐀𑐲𑑂𑐚𑐩𑑄𑐐𑐮
𑑒) 𑐩𑐶𑐖𑑄𑐩𑐔𑐵 𑐎𑐫𑑂𑐟𑐵𑐥𑐸𑐖𑐵 (𑐧𑑂𑐬𑐟𑐧𑐣𑑂𑐢)
𑐎) 𑐧𑑁𑐡𑑂𑐢 𑐩𑐵𑐬𑑂𑐐 :- 𑐎𑐸𑐮𑐶𑐔𑐵 𑐖𑑂𑐰𑐮𑑄, 𑐥𑐸𑐮𑐸, 𑐐𑐞𑐾𑐡𑑂𑐫𑑀 , 𑐦𑐮𑐶𑑄𑐴𑐾 𑐰 𑐀𑐲𑑂𑐚𑐩𑑄𑐐𑐮
𑐏) 𑐴𑐶𑐣𑑂𑐡𑐸 𑐩𑐵𑐬𑑂𑐐 :- 𑐎𑐸𑐮𑐶𑐔𑐵 𑐖𑑂𑐰𑐮𑑄, 𑐧𑑂𑐬𑐩𑑂𑐴𑐵 𑐎𑑂𑐰𑑀𑑄, 𑐥𑐸𑐮𑐸, 𑐦𑐮𑐶𑐡𑑂𑐫𑑀 𑐰 𑐀𑐲𑑂𑐚𑐩𑑄𑐐𑐮
𑑓) 𑐃𑐴𑐶𑐥𑐵 :-𑐎) 𑐩𑐶𑐖𑑄 : 𑐀) 𑐧𑑁𑐡𑑂𑐢𑐩𑐵𑐬𑑂𑐐 : 𑐥𑑄𑐔𑐧𑐸𑐡𑑂𑐢 𑐮𑐸𑐏𑐵 𑐢𑑂𑐡𑐵 𑐔𑑂𑐰𑐫𑐐𑐸
𑐁) 𑐴𑐶𑐣𑑂𑐡𑐸 𑐩𑐵𑐬𑑂𑐐 :- 𑐩𑑄𑐔𑐩𑐴𑐾𑐱𑑂𑐰𑐬 𑐮𑐸𑐏𑐵𑐢𑑂𑐡𑐵 𑐔𑑂𑐰𑐫𑐐𑐸
𑐏) 𑐏𑐫𑑂𑐧𑐫𑑂 :- 𑐖𑑀𑐐𑐷𑐱𑐵𑐮𑐵𑐫𑑂 (𑐫𑐖𑑂𑐘𑐱𑐵𑐮𑐵) 𑐣𑑂𑐫𑐵𑐐𑑅 𑐑𑑅 𑐰 𑐫𑐖𑑂𑐘𑐱𑐵𑐮𑐵 𑐔𑑂𑐰𑐫𑑂𑐐𑐸 𑑋
𑑔) 𑐖𑑂𑐫𑐵 𑐖𑑄𑐎𑐹 :-
𑐎) 𑐧𑑁𑐡𑑂𑐢 𑐩𑐵𑐬𑑂𑐐 :- 𑐎𑐸𑐮𑐶𑐔𑐵 𑐖𑑂𑐰𑐮𑑄, 𑐔𑐟𑐸𑐬 𑐩𑐴𑐵𑐬𑐵𑐖, 𑐢𑑂𑐰𑐵𑐫𑑂, 𑐧𑑀 𑐳𑐮𑑅𑑋 𑐥𑐸𑐮𑐸,
𑐦𑐮𑐶𑐡𑑂𑐫𑑀, 𑐀𑐲𑑂𑐚𑐩𑑄𑐐𑐮 𑐰 𑐮𑐸𑐏𑐵𑐢𑑂𑐡𑐵 𑐔𑑂𑐰𑐫𑐐𑐸 , 𑐐𑐞𑐾𑐡𑑂𑐫𑑀 𑐎𑑂𑐰𑑀 𑑋
𑐏) 𑐴𑐶𑐣𑑂𑐡𑐸 𑐩𑐵𑐬𑑂𑐐 :- 𑐎𑐮𑐶𑐔𑐵 𑐖𑑂𑐰𑐮𑑄, 𑐔𑐟𑐸𑐬 𑐩𑐴𑐵𑐬𑐵𑐖, 𑐢𑑂𑐰𑐵𑐫𑑂, 𑐧𑑀𑐳𑐮 𑐥𑐸𑐮𑐸,
𑐦𑐮𑐶𑐡𑑂𑐫𑑀, 𑐀𑐲𑑂𑐚𑐩𑑄𑐐𑐮, 𑐧𑑂𑐬𑐩𑑂𑐴𑐵 𑐎𑑂𑐰𑑀 𑐰 𑐮𑐸𑐏𑐵 𑐢𑑂𑐡𑐵 𑐔𑑂𑐰𑐫𑐐𑐸
𑑕) 𑐕𑐾𑑃 𑐡𑐸𑐣𑐷𑐢𑐸𑑄𑐎𑐵 𑐕𑐾𑑃 𑐨𑐶𑑄𑐎𑐾𑐟 𑐧𑑁 𑐧𑐶𑐂𑐩𑐵 :
𑐎) 𑐧𑐵𑑃 𑐳𑑂𑐫𑐵𑐣𑐵 𑐧𑑁 𑐧𑐶𑐫𑐐𑐸 :- 𑐀𑐲𑑂𑐚𑐩𑐵𑐟𑑂𑐬𑐶𑐎𑐵 , 𑐀𑐲𑑂𑐚𑐩𑑄𑐐𑐮 , 𑐧𑑁𑐏𑑂𑐰𑐵, 𑐔𑐎𑑂𑐬𑐦𑑀,
𑐔𑐣𑑂𑐡𑑂𑐬, 𑐳𑐹𑐬𑑂𑐫, 𑐦𑐫𑑂𑐐𑑄
𑐏) 𑐮𑑅 𑐧𑑁 𑐧𑐶𑐫𑐐𑐸
𑐀) 𑐣𑑂𑐫𑐵𑐥𑐵 𑐟𑐷 𑐢𑐵𑐮𑐎𑐷 :- 𑐧𑑂𑐬𑐩𑑂𑐴𑐵𑐂𑐞𑐶, 𑐃𑐣𑑂𑐡𑑂𑐬𑐫𑐞𑐶, 𑐩𑐴𑐵𑐮𑐎𑑂𑐲𑑂𑐩𑐷 , 𑐧𑑁 𑐏𑑂𑐰𑐵,
𑐔𑐎𑑂𑐬𑐦𑑀, 𑐀𑐲𑑂𑐚𑐩𑑄𑐐𑐮, 𑐔𑐣𑑂𑐡𑑂𑐬 𑐳𑐸𑐬𑑂𑐫, 𑐰 𑐦𑐫𑑂 𑐐𑑄 𑑋
𑐁) 𑐳𑐵𑐢𑐵𑐬𑐞 :- 𑐧𑑁𑐏𑑂𑐰𑐵, 𑐔𑐎𑑂𑐬𑐦𑑀, 𑐀𑐲𑑂𑐚𑐩𑑄𑐐𑐮, 𑐦𑐫𑑂𑐐𑑄, 𑐔𑐣𑑂𑐡𑑂𑐬 𑐰 𑐳𑐸𑐬𑑂𑐫
𑐂) 𑐳𑑂𑐰𑐥𑐵 𑐟𑐷 𑐢𑐵𑐮𑐎𑐶 :- 𑐩𑐴𑐵𑐮𑐎𑑂𑐲𑑂𑐩𑐷, 𑐧𑑁 𑐏𑑂𑐰𑐵, 𑐔𑐎𑑂𑐬𑐦𑑀, 𑐀𑐲𑑂𑐚𑐩𑑄𑐐𑐮,
𑐔𑐣𑑂𑐡𑑂𑐬 𑐳𑐸𑐬𑑂𑐫 𑐰 𑐦𑐫𑑂𑐐𑑄
𑑖) 𑐡𑑂𑐫𑑀 𑐎𑐹𑐳𑐵𑑅 𑐡𑑂𑐫𑑀 𑐖𑐵𑐟𑑂𑐬𑐵𑐫𑑂 𑐎𑐸𑐃𑐎𑐾𑐐𑐸 𑐎𑐹𑐳𑐵 𑐔𑑂𑐰𑐫𑑂𑐐𑐸 𑑋
𑑗) 𑐧𑐸𑑃𑐐𑑅𑐡𑑂𑐫𑑀 𑐖𑐵𑐟𑑂𑐬𑐵𑐧𑐮𑐫𑑂 :- 𑐬𑐠𑐫𑑂 𑐕𑐵𑐂𑐐𑐸 𑐥𑐟𑐵𑐏𑐫𑑂 𑐔𑑂𑐰𑐫𑑂𑐐𑐸 𑑋
𑑘) 𑐡𑐾𑐐𑐮𑐫 𑐔𑑂𑐰𑐫𑑂𑐐𑐸 :- 𑐡𑐾𑐐𑑅𑐫𑐵 𑐟𑐸𑐟𑐵𑐳𑐷, 𑐎𑐹 𑐳𑐮 𑐰 𑐩𑐾𑐩𑐾𑐐𑐸 𑐔𑑂𑐰𑐫𑑂𑐐𑐸 𑑋
𑑙) 𑐐𑐬𑐸𑐜 𑐣𑐵𑐬𑐵𑐫𑐞 :-
𑐀) 𑐳𑐥𑑂𑐟𑐵𑐴 𑐫𑐵𑐫𑐟 𑐰
𑐁) 𑐣𑐰𑐵𑑄 𑐫𑐵𑐫𑐟 𑐫𑐵𑐂𑐩𑑂𑐴𑐳𑐶𑐫𑐵 𑐃𑐔𑑂𑐕𑐵 𑐎𑐠𑑄 𑐐𑐬𑐸𑐜 𑐐𑐫𑐵𑐔𑑂𑐰𑐩𑑂𑐴 𑐣𑐵𑐬𑐵𑐫𑐞 𑐡𑑂𑐫𑑀 ,
𑐖𑑀𑐳𑐵 𑐰 𑐩𑐾𑐩𑐾𑐐𑐸 𑐔𑑂𑐰𑐫𑑂𑐐𑐸 𑑋
𑑑𑑐) 𑐨𑐚𑑂𑐚𑐵𑐫𑑂 𑐩𑐶𑑄 𑐟𑐫𑐟𑑅 𑐩𑐶𑑄 𑐖𑑂𑐰𑐣𑐵 𑐧𑑂𑐰𑐫𑐵 𑐔𑑂𑐰𑐩𑑂𑐴 𑐴𑐣𑐸𑐩𑐵𑐣 𑐔𑑂𑐰𑐫𑑂𑐐𑐸 𑑋
𑑑𑑑) 𑐖𑐣𑐿 𑐎𑐿 𑐰𑐂𑐧𑐮𑐾 𑐔𑑂𑐰𑐫𑐐𑐸 :- 𑐖𑐣 𑐎𑐿 𑐳𑑂𑐰𑐫𑐵 𑐳𑐶𑐴𑑄 𑐔𑑂𑐰𑐫𑑂𑐐𑐸 𑑋
𑑑𑑒) 𑐢𑐎𑐶𑑄 :-
𑐎) 𑐥𑑂𑐫𑐵𑐏𑑄, 𑐧𑐵𑐖𑑄 𑐰 𑐖𑑂𑐫𑐵 𑐳𑑂𑐫𑐣𑐾𑐢𑐸𑑄𑐎𑐵 𑐥𑐶𑐚𑐣𑐾𑐰𑐮𑐾 – 𑐣𑐵𑐳𑑄 𑐢𑐎𑐷𑑄 𑐔𑑂𑐰𑐫𑑂𑐐𑐸
𑐏) 𑐁𑐐𑐣𑐫𑑂 𑐮𑑃𑐥𑐸 𑐕𑐵𑐫𑑂𑐐𑐸, 𑐴𑐶𑐣𑐾𑐐𑐸 𑐰 𑐣𑑂𑐴𑐹𑐐𑐸 𑐟𑐫𑐐𑐸𑐧𑐮𑐾 – 𑐁𑐐𑑄 𑐢𑐎𑐷 𑐔𑑂𑐰𑐐𑐸 𑑋
𑑑𑑓) 𑐡𑑂𑐫𑑀 𑐥𑑂𑐫𑐵𑐏𑑄 :- 𑐐𑐵𑐕𑐶𑐎𑐵 𑐔𑑂𑐰𑐫𑑂𑐐𑐸 𑑋
𑑑𑑔) 𑐏𑐥𑐶𑑄 𑐕𑐾𑑃𑐫𑐵 𑐨𑐿𑐮𑐡𑑂𑐫𑑅 – 𑐨𑐿𑐮𑐡𑑂𑐫𑑅 𑐔𑑂𑐰𑐫𑑂𑐐𑐸 𑑋
𑑑𑑕) 𑐳𑐸𑐱𑐵𑐴𑐵 𑐐𑐞𑐾𑐡𑑂𑐫𑑅 – 𑐐𑐞𑐾𑐡𑑂𑐫𑑅𑐫𑐵 𑐡𑐺𑐲𑑂𑐚𑐶 𑑋
𑑑𑑖) 𑐖𑐬𑐸 :– 𑐖𑐬𑐸𑑄 𑐔𑑂𑐰𑐫𑑂𑐐𑐸 𑑋

𑐣𑐏𑑅 𑐔𑐏𑑅 𑐰 𑐠𑐷 𑐠𑐷 𑐥𑐬𑑂𑐰𑐫𑑂 𑐫𑐮 𑐔𑐶𑐟𑑂𑐬𑐎𑐵𑐬𑐟𑐫𑐳𑑄 𑐫𑐵𑐫𑑂𑐩𑐵𑐐𑐸 𑐔𑑂𑐰𑐖𑑂𑐫𑐵
𑑑) 𑐡𑐶𑐮𑑂𑐮𑐵𑐐𑐵 𑑑𑑔 (𑐔𑑁𑐠𑐷) (𑐱𑑂𑐬𑐵𑐰𑐞 𑐎𑐺𑐲𑑂𑐞𑐥𑐎𑑂𑐲 𑐔𑐟𑐸𑐬𑑂𑐡𑐱𑐷) :– 𑐐𑐠𑐵𑑄𑐩𑐸𑐐𑑅 (𑐑𑐞𑑂𑐚𑐵𑐎𑐬𑑂𑐞)
(𑐰𑐶𑐰𑐬𑐞𑑅 𑐴𑐵𑐳𑐵𑐫𑑂 𑐣𑐾𑐥𑐵𑐮𑐷 𑐨𑑂𑐰𑑃 𑐚𑐶𑐎𑐵𑑅 𑐧𑑁𑐏𑑂𑐰𑐵 𑐔𑑂𑐰𑐫𑐵 𑐧𑐶𑐫𑐐𑐸 )
𑑒) 𑐐𑐸𑑃𑐮𑐵 𑐠𑑂𑐰 𑐥𑑄𑐔𑐩𑐷 (𑐱𑑂𑐬𑐵𑐰𑐞 𑐱𑐸𑐎𑑂𑐬𑐥𑐎𑑂𑐲 𑐥𑑄𑐔𑐩𑐶) :– 𑐣𑐵𑐐𑑅 𑐥𑑄𑐔𑐩𑐶
(𑐰𑐶𑐰𑐬𑐞 :- 𑐣𑐵𑐐 𑐔𑑂𑐰𑐫𑐵, 𑐣𑐵𑐐𑐩𑐶𑐐𑐸 𑐖𑑂𑐫𑐵)
𑑓) 𑐐𑐸𑑃𑐮𑐵𑐐𑐵 𑑑 (𑐥𑐵𑐬𑐸) ( 𑐨𑐵𑐡𑑂𑐬 𑐎𑐺𑐲𑑂𑐞𑐥𑐎𑑂𑐲 𑐥𑐬𑐾𑐰𑐵) :– 𑐳𑐵𑐥𑐵𑐬𑐸 (𑐐𑐵𑐃𑐖𑐵𑐟𑑂𑐬𑐵)
( 𑐰𑐶𑐰𑐬𑐞 :- 𑐳𑐵𑐏𑑂𑐰𑐵, 𑐥𑑄𑐏𑐵 𑐰 𑐢𑑂𑐰𑐵𑑃𑐫𑑂 𑐔𑑂𑐰𑐫𑐵 𑐩𑐶𑐐𑐸 𑐖𑑂𑐫𑐵 )
𑑔) 𑐎𑑁𑐮𑐵𑐠𑑂𑐰 𑑑 ( 𑐥𑐵𑐬𑐸 ) ( 𑐁𑐱𑑂𑐰𑐶𑐣 𑐱𑐸𑐮𑑂𑐎 𑐥𑐬𑐾𑐰𑐵) :- 𑐣𑐮𑑅𑐳𑑂𑐰𑐣𑐾𑐐𑐸 –𑐑𑐚𑑂𑐳𑑂𑐠𑐵𑐥𑐣𑐵
( 𑐰𑐶𑐰𑐬𑐞 :- 𑐣𑐮𑑅 𑐳𑑂𑐰𑐣𑐾𑐐𑐸 𑐣𑐶𑐳𑐾 𑐎𑑁𑐮𑐵𑐠𑑂𑐰 𑑗 (𑐳𑐥𑑂𑐟𑐩𑐶) 𑐟𑐎 𑐨𑐐𑐰𑐟𑐶 𑐰 𑐨𑐸𑐫𑐸 𑐦𑐬𑑂𑐳𑐶𑐂 𑐡𑐿𑐟𑑂𑐫𑐫𑐵 𑐏𑑂𑐰𑐵 𑐔𑑂𑐰𑐫𑑂𑐐𑐸 𑐰𑐵 𑐔𑑂𑐰𑐫𑐵 𑐧𑐶𑐫𑐐𑐸 𑑋
𑑕 𑐎𑑁𑐮𑐵𑐐𑐵 𑑓𑑐 (𑐍𑐳𑐷) (𑐎𑐵𑐬𑑂𑐟𑐶𑐎 𑐎𑐺𑐲𑑂𑐞𑐥𑐎𑑂𑐲 𑐍𑐱𑐷) :-– 𑐮𑐎𑑂𑐲𑑂𑐩𑐷 𑐥𑐸𑐖𑐵
( 𑐰𑐶𑐰𑐬𑐞 :- 𑐮𑐎𑑂𑐲𑑂𑐩𑐷 𑐡𑑂𑐫𑑀 𑐔𑑂𑐰𑐫𑐵 𑐩𑐶𑐫𑐐𑐸 𑐰 𑐎𑐶𑐖𑐵𑐥𑐸𑐖𑐵 𑐡𑑂𑐫𑑀 𑐔𑑂𑐰𑐫𑑂𑐐𑐸 𑐮𑑀𑐥 𑐖𑐸𑐂 𑐢𑐸𑑄𑐎𑐸𑐐𑐸 )
𑑖. 𑐔𑐶𑐮𑑂𑐮𑐵𑐠𑑂𑐰 𑑑𑑕 (𑐥𑐸𑐣𑑂𑐴𑐶) (𑐩𑑄𑐳𑐶𑐬 𑐱𑐸𑐮𑑂𑐎𑐥𑐎𑑂𑐲 𑐥𑐹𑐬𑑂𑐞𑐶𑐩𑐵) :- 𑐡𑐷𑐐𑐸 𑐥𑐸𑐖𑐵 –𑐫𑑀𑐩𑐴𑑂𑐬𑐶 𑐥𑐸𑐣𑑂𑐴𑐶)
( 𑐰𑐶𑐰𑐬𑐞 :- 𑐔𑐶𑐚𑑂𑐮𑐵 𑐔𑑂𑐰𑐫𑐵 𑐩𑐶𑐫𑐐𑐸 )
𑑗. 𑐧𑐕𑑂𑐮𑐵𑐠𑑂𑐰 𑑑 –𑐥𑐵𑐬𑐸) (𑐧𑐿𑐱𑐵𑐏 𑐱𑐸𑐮𑑂𑐎 𑐥𑐎𑑂𑐲 𑐥𑐬𑐾𑐰𑐵) :- 𑐧𑐸𑑃𑐐𑑅𑐡𑑂𑐫𑑀 𑐬𑐠𑐫𑑂 𑐧𑐶𑐖𑑂𑐫𑐵𑐂
( 𑐰𑐶𑐰𑐬𑐞 :- 𑐬𑐠𑐫𑑂 𑐟𑐳𑐵𑑄𑐣𑐶𑐸𑐾 𑐩𑑂𑐰𑐵𑐡𑐶 –𑐩𑐵𑑃𑐡𑐶) 𑐖𑑂𑐰𑐮𑑄 𑐔𑑂𑐰𑐫𑑂𑐐𑐸 𑐰 𑐧𑐶𑐫𑐐𑐸 𑑋
𑑘. 𑐧𑐕𑐮𑐵𑐐𑐵 𑐔𑑁𑐠𑐷 (𑑔) (𑐖𑐾𑐲𑑂𑐛 𑐎𑐺𑐲𑑂𑐞𑐥𑐎𑑂𑐲 𑐔𑑁𑐠𑐷) :- 𑐳𑐶𑐠𑐶 𑐣𑐏𑑅
( 𑐰𑐶𑐰𑐬𑐞 :- 𑐳𑐶𑐠𑐶 𑐡𑑂𑐫𑑀 𑐔𑑂𑐰𑐫𑑂𑐐𑐸 𑐰 𑐩𑐶𑐫𑐐𑐸 )
𑑙. 𑐥𑑀𑐴𑐾𑐮𑐵 𑐠𑑂𑐰 𑑑𑑕 (𑐥𑐹𑐬𑑂𑐞𑐶𑐩𑐵) (𑐥𑑁𑐲 𑐱𑐸𑐮𑑂𑐎𑐥𑐎𑑂𑐲 𑐥𑐹𑐬𑑂𑐞𑐶𑐩𑐵) :- 𑐩𑐵𑐴𑐵 𑐰𑐣𑐾𑐐𑐸 (𑐩𑐵𑐬 𑐧𑐣𑐾𑐐𑐸 )
( 𑐰𑐶𑐰𑐬𑐞 :- 𑐎𑐵𑐥𑑅𑐫𑐵 𑐢𑑂𑐰𑐵𑐫𑑂𑐮𑐫𑑂 𑐱𑐶𑐰 𑐳𑐩𑑂𑐧𑐣𑑂𑐢𑐷 𑐡𑑂𑐫𑑀 𑐔𑑂𑐰𑐫𑑂𑐐𑐸 )

𑐔𑐶𑐟𑑂𑐬𑐎𑐵𑐬 𑐟𑐫𑑂𑐳𑑄 𑐫𑐵𑐣𑐵 𑐔𑑂𑐰𑑄𑐐𑐹 𑐖𑑂𑐫𑐵𑑅𑐗𑑂𑐰𑑅

𑐢𑐮𑑅 𑐠𑐵𑐫𑑂 𑐡𑑂𑐫𑑀𑐫𑐵𑐐𑐸 𑐣𑐵𑑄 𑐟𑐶𑐠𑐶 𑐔𑐶𑐟𑑂𑐬𑐎𑐵𑐬 𑐎𑐰
𑑑) 𑐦𑑄𑐥𑐷 𑐡𑐎𑑂𑐲𑐶𑐞𑐎𑐵𑐮𑐷 𑐗𑐥𑐵𑑄 𑐔𑑂𑐰𑐫𑑂𑐐𑐸 𑐐𑐸𑑃𑐮𑐵𑐠𑑂𑐰 𑑑𑑔
(𑐱𑑂𑐬𑐵𑐰𑐞 𑐱𑐸𑐮𑑂𑐎 𑑑𑑔) 𑐴𑑁𑐐𑑅
𑑒) 𑐔𑑀𑐏𑑀𑐣𑐵 𑐀𑐲𑑂𑐚𑐩𑐵𑐟𑑂𑐬𑐶𑐎𑐵 𑐰 𑐳𑐶𑑄𑐴 𑐣𑐶𑐩𑑂𑐴 𑐔𑑂𑐰𑐫𑐐𑐸 𑐎𑑁𑐮𑐵𑐠𑑂𑐰 𑑑𑑒
(𑐁𑐱𑑂𑐰𑐶𑐣 𑐱𑐸𑐮𑑂𑐎 𑑑𑑒) ,,
𑑓) 𑐠𑐾𑐔𑑀 𑐐𑐠𑐹𑐥𑑂𑐫𑐵𑐏𑑄 (𑐀𑐲𑑂𑐚𑐩𑐵𑐟𑑂𑐬𑐶𑐎𑐵) 𑐏𑑂𑐰𑐵𑐥𑐵 𑐔𑑂𑐰𑐫𑑂𑐐𑐸 𑐎𑑁𑐮𑐵𑐠𑑂𑐰 𑑑𑑓
(𑐁𑐱𑑂𑐰𑐶𑐣 𑐱𑐸𑐮𑑂𑐎 𑑑𑑓𑑐 ,,
𑑔) 𑐔𑑀𑐨𑐵𑐬 𑐮𑑀𑐎𑐾𑐱𑑂𑐰𑐬 (𑐎𑐬𑐸𑐞𑐩𑐫) 𑐔𑑁𑐮𑐵𑐠𑑂𑐰 𑑑𑑕
(𑐔𑐿𑐟𑑂𑐬 𑐎𑐺𑐲𑑂𑐞 𑐍𑐳𑐷) ,,
𑑕) 𑐫𑐮 𑐧𑐸𑑃𑐐𑑅𑐡𑑂𑐫𑑀 𑐰 𑐔𑑀𑐎𑐨𑐵𑑅𑐡𑑂𑐫𑑀 “𑐣𑑂𑐴𑑂𑐰𑑄” 𑐔𑑁𑐮𑐵𑐠𑑂𑐰 𑑑
(𑐧𑐿𑐱𑐵𑐏 𑐎𑐺𑐲𑑂𑐞 𑐥𑐵𑐬𑐸) ,,
𑑖) 𑐫𑐮 𑐧𑐸𑑃𑐐𑑅𑐡𑑂𑐫𑑀 𑐬𑐠𑐫𑐵 𑐢𑑀𑐩𑐵𑐫 𑐰 𑐢𑑅𑐔𑐵𑐮𑐫𑑂 𑐔𑑂𑐰𑐫𑐐𑐸 𑐎𑐕𑑂𑐮𑐵𑐠𑑂𑐰 𑑑
(𑐧𑐿𑐱𑐵𑐏 𑐱𑐸𑐮𑑂𑐎 𑐥𑐵𑐬𑐸) ,,
𑑗) 𑐫𑐮 𑐔𑑀𑐎𑐨𑐵 𑐡𑑂𑐫𑑀𑐫𑐵 𑐬𑐠𑐫𑐵 𑐢𑑀𑐩𑐵𑐫𑑂 𑐰 𑐢𑑅𑐔𑐵𑐮𑐫𑑂 𑐔𑑂𑐰𑐫𑑂𑐐𑐸 𑐧𑐕𑐮𑐵𑐠𑑂𑐰 𑐔𑑁𑐠𑐷
(𑐧𑐿𑐱𑐵𑐏 𑐱𑐸𑐮𑑂𑐎 𑑔) ,,
𑑘) 𑐫𑐮 𑐩𑑄𑐐𑐮𑐫𑑂 𑐩𑐹𑐮 𑐔𑑀𑐎𑐫𑐵 𑐏𑐒𑑂𑐐𑐥𑐵𑐣𑐷 𑐔𑑂𑐰𑐫𑑂𑐐𑐸 –𑐏𑐰𑑄) ,,
𑑙) 𑐩𑑄𑐐𑑅 𑐨𑐶𑐣𑑂𑐡𑑂𑐫𑑀 𑐔𑑂𑐰𑐫𑑂𑐐𑐸 (𑐩𑑄𑐐) 𑐘𑑃𑐮𑐵𑐠𑑂𑐰 𑑑𑑑
(𑐨𑐵𑐡𑑂𑐬 𑐱𑐸𑐮𑑂𑐎 𑑑𑑑) 𑐕𑐸𑐳𑐶𑐎𑐵
𑑑𑑐) 𑐣𑐸𑐐𑑅 𑐨𑐶𑐣𑑂𑐡𑑂𑐫𑑀 𑐔𑑂𑐰𑐫𑑂𑐐𑐸 (𑐣𑐸𑐐) 𑐘𑑃𑐮𑐵𑐠𑑂𑐰 𑑑𑑑
(𑐨𑐵𑐡𑑂𑐬 𑐱𑐸𑐮𑑂𑐎 𑑑𑑑) 𑐣𑐸𑐐𑑅
𑑑𑑑) 𑐔𑑂𑐫𑐵𑐳 𑐔𑑂𑐫𑐵𑐳 𑐨𑐶𑐣𑑂𑐡𑑂𑐫𑑀 𑐔𑑂𑐰𑐫𑐐𑐸

𑐫𑐮𑐫𑐵 𑐎𑐬𑐸𑐞𑐵𑐩𑐫 𑐟𑐸𑐟𑑅 𑐧𑑂𑐰𑐣𑐷𑐐𑐸 𑐔𑐮𑐣
𑐰𑐸𑑄𑐐𑐫𑐵 𑐰𑐸𑑄𑐡𑑂𑐫 (𑐫𑐮𑐫𑐵 𑐎𑐬𑐸𑐞𑐵𑐩𑐫) 𑐧𑐕𑐮𑐵𑐠𑑂𑐰 𑐥𑐵𑐬𑐸 𑐎𑐸𑐣𑑂𑐴𑐸 𑐫𑐮𑐫𑑂 𑐬𑐠𑐫𑑂 𑐟𑐫𑐵 𑐎𑐣𑑂𑐴𑐾 𑐎𑐸𑐣𑑂𑐴𑐸 𑐣𑐳𑐾𑑄 𑐬𑐠𑑄 𑐎𑑂𑐰𑐩𑐎𑐵 𑐟𑐎 𑐰 𑐥𑑂𑐫𑐣𑑂𑐴𑐸 𑐧𑐶𑐔𑐵 𑐏𑐸𑐣𑑂𑐴𑐸 𑐫𑐮𑐫𑐵 𑐔𑐶𑐟𑑂𑐬𑐎𑐵𑐬 (𑐥𑐸𑑄) 𑐟𑐫𑑂 𑐣𑑂𑐴𑐶 𑐣𑑂𑐴𑐶 𑐎𑐬𑐸𑐞𑐵𑐩𑐫𑑂 𑐡𑑂𑐫𑑅𑐫𑐵 𑐟𑐸𑐟𑑅 𑐧𑑂𑐰𑐣𑐶𑐐𑐸 𑐔𑐮𑐣 𑐡𑐸 𑑋
𑑑) 𑐨𑐿𑐬𑐰 𑐏𑑂𑐰𑐵𑐥𑐵 (𑐴𑐵𑐬𑑂𑐏𑐵𑑄 𑐡𑑂𑐫𑑅) 𑐧𑑂𑐰𑐰𑐣𑐾𑐐𑐸
𑐧𑐸𑑄𑐐𑑅𑐡𑑂𑐫𑑅𑐫𑐵 𑐬𑐠 𑐳𑐵𑐮𑐵𑑅 𑐫𑐵𑑅 𑐣𑑂𑐫𑐵𑐫𑐾𑐰𑑄 𑐫𑐮𑐫𑐵 𑐮𑐐𑑄𑐏𑑂𑐫𑑅 𑐕𑑂𑐰𑐫𑑂𑐮𑐵 𑐧𑐹𑐏𑐸𑐣𑑂𑐴𑐸 𑐂𑐏𑐵𑐮𑐏𑐸𑐂
𑐨𑐿𑐬 𑐡𑑂𑐫𑑅 𑐫𑐵 𑐣𑐶𑐥𑐵 𑐏𑑂𑐰𑐵𑑅𑐥𑐵 𑐧𑑂𑐰𑐫𑐵 𑐐𑐸𑐬𑑂𑐖𑐸 𑐟𑐫𑐵 𑐥𑐸𑐖𑐵 𑐫𑐵𑐣𑐵 𑐕𑐾𑑄𑐖𑑅𑐥𑐶𑑄 𑐳𑐎𑐳𑐶𑐫𑐵𑑄 𑐳𑐩𑐫𑑂𑐧𑐖𑐶 𑐣𑐫𑐾𑐐𑐸 𑑋
𑑒) 𑐟𑐵𑐬𑐵 𑐧𑐳𑐸𑐣𑑂𑐢𑐬𑐵 𑐡𑑂𑐫𑑅 𑐧𑑂𑐰𑐰𑐣𑐾𑐐𑐸
𑐫𑐮 𑐥𑑄𑐔𑐡𑐵𑐣𑐏𑐸𑐣𑐸 𑐟𑐳𑑂𑐩𑐶, 𑐧𑐶𑐨, 𑐖𑐵𑐎𑐶, 𑐐𑑀𑐐𑐸 𑐩𑐵𑐫𑑂, 𑐰𑐵, 𑐳𑐶𑐳𑐵𑐥𑐸𑐳𑐵, 𑐁𑐡𑐶 𑐟𑐫𑐵 𑐥𑐸𑐖𑐵 𑐫𑐵𑐣𑐵 𑐡𑐱𑐩𑐶𑐏𑐸𑐣𑐸 𑐫𑐮𑐫𑐵 𑐎𑑂𑐰𑐵𑐧𑐴𑐵𑑅 (𑐴𑐶𑐬𑐞𑑂𑐫 𑐧𑐬𑑂𑐞 𑐩𑐴𑐵𑐰𑐶𑐴𑐵𑐬) 𑐮𑐫𑑂 𑐧𑑂𑐰𑐫𑐾 𑐫𑑄𑐎𑐷𑐐𑐸 𑑋 𑐄𑐧𑐮𑐫𑑂 𑐰𑐶𑐴𑐵𑐬𑑄 𑐗𑐷𑐐𑐸𑐴𑐾 𑐟𑐐𑑀𑐐𑐸 𑐐𑐸𑐮𑑂𑐥𑐵, 𑐩𑐵𑐣𑐵 𑐧𑐶𑐫𑐵 𑐴𑐂 𑑋 𑐰 𑐏𑐸𑐣𑑂𑐴𑐸 𑐫𑐮𑐫𑐵 𑐡𑐎𑑂𑐰 𑐰𑐶𑐴𑐵𑐬, 𑐧𑐴𑐵𑑅 𑐧𑐴𑐷 𑐰 𑐕𑐾𑐫𑑂𑐏𑐵𑑄𑐥𑐟𑐶𑑄 𑐣𑑄 𑐡𑑂𑐫𑑅 𑐧𑑂𑐰𑐫𑐾 𑐴𑐂𑐐𑐸 𑐥𑐬𑐩𑑂𑐥𑐬𑐵 𑐡𑐸 𑑋 𑐳𑐵𑐥𑐵𑐬𑐸𑐎𑐸𑐣𑐸 𑐄𑐐𑐸 𑐐𑐸𑐮𑑂𑐥𑐵 𑐰 𑐩𑐵𑐣𑐫𑑂 𑐖𑐵𑐎𑐶, 𑐰𑐵 𑐰 𑐟𑐵𑐫𑑂 𑐟𑐫𑐵 𑐕𑐵𑑅 𑐰𑐣𑐾𑐐𑐸 𑑋 𑐮𑐶𑐥𑐵 𑐨𑐶𑐣𑑂𑐡𑑂𑐫𑑅 𑐖𑐵𑐟𑑂𑐬𑐵𑐡𑐶𑑄𑐫𑐵 𑐳𑐸𑐠𑐫𑑂 𑐡𑑅 𑐡𑐸𑐎𑐵 𑐰𑐣𑐾𑐐𑐸 𑑋 𑐠𑑂𑐰 𑐟𑐖𑐶𑐮𑐖𑐶 𑐎𑑂𑐰𑐵𑐧𑐴𑐵𑑅𑐮𑐫𑑂 𑐐𑐸𑐧𑐮𑐫𑑂 𑐣𑐶𑐳𑐾𑑄 𑐣𑑂𑐴𑑂𑐫𑐵𑐎𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸 𑐢𑐂𑐐𑑂𑐸 𑐠𑑂𑐰 𑐧𑐶𑐴𑐵𑐬𑐫𑐵 𑐱𑐶𑐮𑐵𑐥𑐟𑑂𑐬𑐫, 𑐠𑑂𑐫𑐵𑐳𑑅 𑐳𑐥𑐹m 𑐰 𑐮𑐶𑐥𑐶 𑐳𑐥𑐹m𑐮𑐾 𑐣𑑂𑐴𑑂𑐫𑐧𑑂𑐰𑐫𑐵𑐟𑑅𑐐𑐸 𑐡𑐸 𑑋
𑑓. 𑐔𑑁 𑐕𑐵𑑅𑐰𑐣𑐾𑐐𑐸
𑐎𑐟𑐶𑐥𑐸𑐣𑑂𑐴𑐷𑐏𑐸𑐣𑑂𑐴𑐸 𑐳𑐸𑐠𑐫𑑂 𑐫𑐮𑐫𑐵 𑐣𑐵𑐐𑐧𑐴𑐵𑑅 𑐫𑐵 𑐡𑐎𑑂𑐲𑐶𑐞 𑐝𑑀𑐎𑐵𑑄 𑐡𑐸𑐴𑐵𑑄𑐰𑐣𑐵 𑐣𑑂𑐴𑑂𑐫𑑅𑐣𑐾𑐔𑑂𑐰𑑄𑐐𑐸 𑐥𑐸𑐬𑑂𑐏𑐵 𑐠𑐵𑐥𑐣𑐵 𑐫𑐵𑐣𑐵𑐠𑐸𑐎𑐸𑐐𑐸 𑐔𑐶𑐨𑐵𑑅 𑐳𑐦𑐵 𑐫𑐵𑐣𑐵 𑐄𑑄, 𑐔𑐸𑐣 𑐥𑐵𑐣𑐵 𑐳𑐸𑐠𑐫𑑂 𑐴𑐾 𑐥𑐸𑐖𑐵 𑐫𑐵𑐣𑐵 𑐔𑑁 𑐕𑐵𑐰𑐣𑐾𑐐𑐸, 𑐀𑐳𑑂𑐟𑐩𑐶𑐏𑐸𑐣𑑂𑐴𑐸 𑐔𑑁 𑐎𑑂𑐰𑐎𑐵𑐰𑐣𑐾𑐐𑐸 𑑋 𑐩𑐟𑑅𑐫𑐵 𑐧𑐮𑐫𑑂 𑐩𑐟𑐫𑐵𑑅 𑐦𑑅 𑐰𑐣𑐾𑐐𑐸 𑑋
𑑔. 𑐫𑐮𑐫𑐵 𑐎𑐵𑐟𑑂𑐟𑐶𑐎 𑐣𑐵𑐔 (𑐣𑐬𑐳𑐶𑑄𑐴 𑐥𑑂𑐫𑐵𑐏𑑄) 𑑅
𑐠𑑂𑐰 𑐥𑑂𑐫𑐵𑐏𑑄𑐮𑐫𑑂 𑐴𑐶𑐬𑐞𑑂𑐫𑐎𑐱𑑂𑐫𑐥𑐸 𑐖𑐸𑐫𑐵 𑐥𑑂𑐫𑐵𑐏𑑄 𑐴𑐸𑐮𑐶𑐩𑑂𑐴 𑐫𑐮𑐫𑐵 𑐥𑐸𑑄𑐟 𑐏𑑅 𑑋
𑐏𑑂𑐰𑐥𑐫𑐵 𑐔𑑂𑐰𑐖𑑂𑐫𑐵 – 𑐖𑐸𑐫𑐵 𑐔𑑂𑐰𑑄𑐐𑐸 𑐰𑑂𑐫𑐰𑐳𑑂𑐠𑐵
𑐏𑑂𑐰𑐥𑐫𑐵 𑐣𑐰𑐡𑐸𑐬𑑂𑐐𑐵 𑐡𑑂𑐫𑑀𑐫𑐵 𑐏𑑂𑐰𑐵𑐥𑐵 𑐡𑐫𑐾𑐎𑐾𑐐𑐸 𑐬𑑄𑐐 𑐟𑐫𑐾𑐐𑐸 𑐖𑑂𑐫𑐵 𑐎𑐵𑐐𑐾 𑐀𑐲𑑂𑐚𑐩𑐷 𑐎𑐸𑐣𑑂𑐴𑐸 𑐮𑐶𑐳𑐾𑑄 𑐱𑐸𑐬𑐸
𑐖𑐸𑐂 𑑋 𑐠𑐸𑐎𑐷 𑑑𑑓 𑐥𑐵 𑐏𑑂𑐰𑐵𑐥𑐵 𑐡𑐂 𑑋 𑑑 𑐩𑐴𑐵𑐡𑐾𑐰, 𑑒, 𑐐𑐞𑐾𑐱, 𑑓. 𑐧𑑂𑐬𑐩𑑂𑐴𑐵𑐫𑐞𑐷 𑑔. 𑐩𑐴𑑀𑐱𑑂𑐰𑐬𑐷 𑑕. 𑐎𑑁𑐩𑐵𑐬𑐷 𑑖. 𑐧𑐿𑐲𑑂𑐞𑐵𑐧𑐶 𑑗. 𑐧𑐵𑐬𑐵𑐴𑐶 𑑘. 𑐂𑐣𑑂𑐡𑑂𑐬𑐵𑐫𑐞𑐷 𑑙 𑐩𑐴𑐵𑐎𑐵𑐮𑐷 𑑑𑑐. 𑐳𑐶𑑄𑐑𑐶𑐣𑐷 𑑑𑑑. 𑐨𑐿𑐬𑐰 𑑑𑑒. 𑐧𑑂𑐫𑐵𑑄𑐢𑐶𑐣𑐷 𑑑𑑓. 𑐱𑑂𑐰𑐾𑐟 𑐨𑐿𑐬𑐰 𑑋 𑐧𑐵𑐔𑑂𑐕𑐷𑐫𑐵 𑐡𑐸𑐣𑐾 𑐦𑐸𑐎𑑄𑐖𑑂𑐫𑐵 𑐳𑐶𑐢𑐫𑐾𑐎𑐾𑐩𑐵𑑅 𑑋 𑐠𑑂𑐰 𑐏𑑂𑐰𑐵𑐥𑐵 𑐫𑐵𑐟 𑐩𑐴𑐵 𑐣𑐰𑐩𑐶 𑐎𑐸𑐣𑑂𑐴𑐸 𑑕 𑐟𑐵𑑅𑐂𑐮𑐾 𑐧𑑂𑐰𑐫𑐾𑐩𑐵 𑑋 𑐏𑑂𑐰𑐥𑐫𑐵𑐥𑐶𑑄 𑐡𑐎𑐾 𑐀𑐥𑑂𑐰 𑐳𑐶𑐣𑑄 𑐳𑑂𑐰𑑅 𑐰𑐂 𑑋 𑐔𑐵𑐣𑑂𑐴𑐾 𑑒 𑐧𑐖𑐾 𑐟𑐷 𑐡𑑂𑐫𑑀 𑐖𑐸𑐂𑐥𑐶𑑄 𑐐𑐠𑐸𑐟 𑐰 𑐣𑐵𑐫𑑂𑐏𑐶𑑄 𑐧𑐵𑐖𑐵 𑐎𑑄𑐧𑐵𑐖𑐵 (𑐳𑐵𑐫𑐩𑐷) 𑐣𑑄 𑐠𑐵𑐣𑐵 𑐩𑐳𑑂𑐫𑐵 𑐥𑑂𑐰𑐵 𑐔𑑂𑐫𑐵𑐵𑐎𑐵 𑐡𑑂𑐫𑑀 𑐎𑐵𑑅𑐰𑐂 𑑋 𑐂𑐩𑐶𑐳𑑄 𑐏𑐵𑑅𑐩𑑂𑐫𑐾𑐫𑐵 𑐕𑐸𑐫𑐵𑐮𑐵, 𑐎𑐔𑐶𑐮𑐵 𑐰 𑐳𑐩𑑂𑐫𑐾𑐧𑐖𑐶 𑐡𑑂𑐫𑑀𑐫𑐵𑐟 𑐕𑐵𑐣𑐵 𑐩𑐾𑐥𑐶𑑄𑐳𑑄 𑐳𑐸𑐣𑐵𑐣𑑄 𑐩𑐏𑑄𑐎 𑐡𑐺𑐲𑑂𑐚𑐶 𑐎𑑄𑐎𑐾𑐐𑐸 𑐖𑑂𑐫𑐵 𑐖𑐸𑐂 𑑋 𑐀𑐮𑐾 𑐰 𑐏𑑂𑐰𑐵𑐥𑐵𑐫𑐵𑐟 𑐔𑐶𑐟𑑂𑐬𑐎𑐵𑐬 (𑐥𑐸𑑄) 𑐫𑐵 𑐮𑑂𑐴𑐵𑐟𑑄 𑐮𑑅𑐮𑑂𑐴𑐵𑐣𑐵 𑐧𑐷𑐐𑐸 𑐖𑑂𑐫𑐵 𑐖𑐸𑐂 𑑋
𑐣𑐰𑐡𑐸𑐬𑑂𑐐𑐵 𑐡𑑂𑐫𑑀𑐫𑐵 𑐮𑐵𑐐𑐶 𑐨𑑂𑐰𑐟𑐫𑑂 (𑐎𑐵𑐐𑐖) 𑐔𑑂𑐰𑐫𑐵𑐐𑐸 𑐔𑐶𑐟𑐮𑑂𑐴𑐵, (𑐔𑐶𑐟𑑂𑐬𑐮𑐵𑐴𑐵) 𑐨𑐿𑐬𑐰, 𑐱𑑂𑐰𑐾𑐟 𑐨𑐿𑐬𑐰, 𑐳𑐶𑑄𑐴, 𑐡𑐸𑐩𑑂𑐴𑑅, 𑐎𑐸𑐩𑐵𑐬𑐷, 𑐩𑐴𑐵𑐮𑐎𑑂𑐲𑑂𑐩𑐷 𑐰 𑐠𑐶𑐠𑐶 𑐔𑐶𑐟𑑂𑐬 𑐟 𑐣𑑄 𑐰𑐷𑐩𑐵𑑅 𑑋
𑐫𑑀𑐩𑐝𑐷 𑐥𑐸𑐣𑑂𑐴𑐶 𑐳𑑀𑐣𑑂𑐴𑐸 𑐣𑑂𑐴𑑂𑐫𑑀 𑐡𑑂𑐰𑐵𑐡𑐳𑐷 𑐎𑐸𑐣𑑂𑐴𑐸 𑐔𑐵𑑄𑐐𑐸 𑐣𑐵𑐬𑐵𑐫𑐞 𑐡𑑂𑐫𑑀 𑐠𑐵𑐫𑑂 𑐩𑐴𑐵 𑐳𑑂𑐣𑐵𑐣 𑐫𑐵𑐂𑐐𑐸 𑐡𑐸 𑑋 𑐄𑐎𑐷𑐫𑐵 𑐮𑐵𑐐𑐷 𑐎𑑂𑐰𑐫 𑐔𑑂𑐰𑑄 𑐎𑐮𑐱 𑐟 𑐔𑑂𑐰𑐫𑐩𑐵𑑅 𑑋
𑐡𑐶𑐐 𑐎𑐮𑐱 𑑑𑑐 𑐀𑐲𑑂𑐚 𑐎𑐮𑐱 𑑘 𑐱𑐶𑐰 𑐱𑐎𑑂𑐟𑐶 𑑒
𑐐𑑂𑐬𑐴 𑐎𑐮𑐱 𑑙 𑐡𑑂𑐰𑐵𑐡𑐳 𑐣𑐵𑐬𑐵𑐫𑐞 𑑑𑑒 𑐳𑑂𑐣𑐵𑐣 𑐎𑐮𑐱 𑑔
𑐕𑐾𑐟𑑂𑐬 𑐫𑑀𑐐𑐶𑐣𑐷 𑑒 𑐳𑐬𑑂𑐫𑐵,𑐣𑐶𑐬𑑂𑐫𑐵 𑑒 𑐐𑐞 𑐐𑐸𑐬𑐸 𑑒
𑐰𑐾𑑄𑐡 𑑔 𑐥𑑂𑐬𑐞𑐶𑐟 𑐎𑐮𑐱 𑑑 𑐱𑑂𑐬𑐷𑐮𑐎𑑂𑐲𑑂𑐩𑐷 𑐫𑐎𑑂𑐲 𑐮𑐎𑑂𑐲𑐣𑐷 𑑔
𑐣𑐵𑐐 𑐎𑐮𑐱 𑑑 𑐨𑑂𑐰𑐫𑐟𑑂 𑐰 𑐨𑑂𑐰𑐷𑐂 𑐦𑐳𑐷 𑐨𑐿𑐬𑐧 𑐩𑐸𑐬𑑂𑐟𑐶–𑑒
𑐏𑑂𑐰𑐵𑐥𑐵 𑑑

𑐴𑑀𑐮𑐷 𑐥𑐹𑐣𑑂𑐴𑐷 𑐳𑑂𑐰𑐣𑑂𑐴𑐸 𑐣𑑂𑐴𑑂𑐫𑑀 𑐡𑑂𑐰𑐵𑐡𑐱𑐷 𑐎𑐸𑐣𑑂𑐴𑐸 𑐣𑐶𑐩𑑂𑐴𑐔𑐶𑐟𑑂𑐬𑐎𑐵𑐬 𑐟 𑐰𑐣𑐵 𑐨𑑀𑐚𑐫𑐵 𑐔𑐞𑑂𑐜𑐾𑐱𑑂𑐰𑐬𑐷 𑐡𑐾𑐐𑐮𑐫𑑂 𑐔𑑂𑐰𑑄𑐩𑑂𑐴 𑐨𑐿𑐬𑐧 𑐰𑐶𑐢𑐶 𑐎𑐠𑑄 𑐥𑐹𑐖𑐵 𑐫𑐵𑐣𑐵 𑐬𑑄𑐐𑐬𑑀𑐐𑐣 𑐫𑐵𑐫𑐾𑐩𑐵 𑑋 𑐥𑐸𑐣𑑂𑐴𑐷 𑐎𑐸𑐣𑑂𑐴𑐸 𑐫𑐵𑐟 𑐡𑑂𑐫𑑀 𑐫𑐵 𑐕𑑂𑐫𑑀𑑄 𑐕𑐐𑑅 𑐔𑑂𑐰𑐫𑐐𑐸 𑐰 𑐰𑐵𑑃𑐎𑐷 𑐖𑑂𑐫𑐵 𑐔𑑂𑐫𑐵𑐣𑑂𑐴𑐸𑐫𑐵 𑐡𑐸𑐣𑐾 𑐳𑐶𑐢𑐫𑐾𑐎𑐾𑐩𑐵 𑑋 𑐔𑑂𑐫𑐵𑐔𑐵𑐐𑐸𑐣𑑂𑐴𑐸 𑐔𑑂𑐰𑐣𑐵 𑐀𑐣𑐫𑐵 𑐥𑐸𑐖𑐵𑐬𑐷 (𑐁𑐔𑐵𑐖𑐸) 𑐥𑐶𑐣𑑂𑐟 𑐔𑐶𑐟𑑂𑐬𑐎𑐵𑐬 𑐥𑐵𑐏𑐾𑑄 𑐐𑑂𑐰𑑄𑐐𑑅 𑐳𑑂𑐫𑐵𑐣𑐵 𑐨𑑂𑐰𑐫𑑂 𑐣𑐎𑐾𑐩𑐵 𑑋 𑐐𑐸𑐣𑑂𑐴𑐸 𑐡𑐸 𑐏𑐸𑐣𑑂𑐴𑐸 𑐮𑐶𑐴𑐵𑑄 𑐰𑐫𑑂 𑐧𑐮𑐾 𑐁𑐔𑐵 𑐏𑑂𑐫𑑀 𑐢𑐵𑑅𑐐𑐸 𑐠𑐵𑐳𑐫𑑂 𑐮𑐶𑐦𑑅 𑐩𑐳𑑂𑐰𑐳𑐾 𑐧𑑁 𑐟𑐫𑐵 𑐰𑐂𑐐𑐸 𑐔𑐮𑐣 𑐁𑐟𑐎 𑐡𑐣𑐶 𑑋
𑐏𑑂𑐰𑐥𑐫𑐵 𑐰𑐶𑐳𑑂𑐎𑐵 𑐧𑐮𑐫 𑐥𑑂𑐫𑐵𑐴𑐵𑑄 𑐰𑐶𑐖𑑂𑐫𑐵𑐂𑐥𑐶𑑄 𑐥𑑂𑐬𑐟𑑂𑐫𑐾𑐎 𑐡𑑂𑐫𑑀𑐫𑐵 𑐂𑐮𑐵𑑄 𑐟𑐫𑑂𑐐𑐸 𑐔𑐮𑐣 𑐡𑐸 𑑋 𑐠𑑂𑐰 𑐂𑐮𑐵𑑄𑐏𑐫𑑂 𑐕𑐸 𑐡𑑂𑐫𑑀 𑐏𑑅 𑐰𑐴𑐾 𑐡𑑂𑐫𑑀 𑐔𑑂𑐰𑐂, 𑐀𑐮𑐾 𑐦𑐸𑐎𑑂𑐎 𑐡𑑂𑐫𑑀𑐫𑐵 𑐡𑑂𑐫𑑀 𑐎𑐸𑐳𑐵𑐫𑑂 𑐣𑑄 𑐃𑐎𑐠𑑄 𑐩𑐵𑐧𑐮𑐫𑑂 𑐥𑐸𑑄𑐟𑐫𑑂𑐳𑑄 𑐔𑑂𑐰𑐂 𑑋 𑐔𑐶𑐟𑑂𑐬𑐎𑐵𑐬 (𑐥𑐸𑑄) 𑐟𑐫𑑂𑐳𑑄 𑐏𑑂𑐰𑐥𑐫𑑂 𑐫𑐵𑐣𑐵 𑐰𑐫𑐵 𑐔𑑂𑐰𑑄𑐐𑐸 𑐔𑑂𑐰𑐖𑑂𑐫𑐵𑐫𑐵 𑐢𑐮𑑅 𑐠𑐸𑐎𑐠𑑄 𑐡𑐸 :-

𑐢𑐮𑑅 𑐠𑐵𑐫𑑂 𑐡𑑂𑐫𑑀𑐫𑐵𑐐𑐸 𑐣𑐵𑑄 𑐟𑐶𑐠𑐷 𑐥𑐬𑑂𑐰 𑐔𑐶𑐟𑑂𑐬𑐎𑐵𑐬 𑐟𑐫𑑂𑐳𑑄 𑐔𑑂𑐰𑐂𑐐𑐸
𑑑. 𑐚𑑁𑐩𑐝𑐷 𑐨𑐿𑐬𑐰 (𑐔𑐿𑐟𑑂𑐬𑐫𑐵 𑐥𑑂𑐫𑐵 𑐥𑐵𑐏𑐾) 𑐩𑐶𑐏𑐵 𑐔𑑂𑐰𑐫𑐐𑐸
𑐬𑐠 𑐫𑐵𑐟𑑂𑐬𑐵
𑑒. 𑐚𑑁𑐩𑐝𑐷 𑐨𑐡𑑂𑐬𑐎𑐵𑐮𑐷 𑐡𑑂𑐫𑑀𑐕𑐾𑑄 𑐬𑐠 𑐫𑐵𑐟𑑂𑐬𑐵 𑐬𑑄𑐐 𑐬𑑀𑐐𑐣 𑐫𑐵𑐫𑐾𑐐𑐸
(𑐠𑐸𑐎𑐶𑐫𑐵 𑐏𑐬𑑂𑐔 𑐏𑑂𑐰𑐥𑐫𑐵 𑐐𑐸𑐠𑐷 𑐏𑐬𑑂𑐔 𑐀𑐜𑐺𑐵𑑄 𑐫𑐵𑐂𑐐𑐸 𑐏𑑅)
𑑓. 𑐫𑑀𑐳𑐷𑑄 𑐏𑑂𑐫𑑀 𑐨𑐿𑐬𑐧 𑐩𑐹𑐬𑑂𑐟𑐶 𑐰𑐶𑐱𑑂𑐎𑐵 𑐰𑐮𑐫𑑂 𑐨𑐿𑐬𑐰 (𑐩𑐹𑐬𑑂𑐟𑐶) 𑐰
𑐥𑑄𑐔𑐬𑑄𑐐𑐷 𑐔𑑂𑐰𑐫𑐐𑐸
(𑐦𑐿 𑐧𑐵𑑃𑐴𑐵 𑐳𑑂𑐫𑐵𑐫𑐾𑐐𑐸) 𑐡𑐺𑐲𑑂𑐚𑐶 𑐏𑑄𑐎𑐾𑐐𑐸 𑐡𑐺𑐲𑑂𑐚𑐶 𑐔𑑂𑐰𑐫𑐾𑐐𑐸
(𑐐𑐸𑐠𑐶 𑐟𑐴𑐰𑐶𑐮 𑐀𑐜𑐺𑐵𑑄 𑑑𑑒 𑐴𑐾𑐫𑑄𑑂 𑐏𑐾𑑄𑐫𑑂 𑐰 𑐡𑐵𑑃 𑑔𑑐𑑋– 𑐰𑐷𑐐𑐸 𑐡𑐸)
𑑔. 𑐟𑐮𑐾𑐖𑐸 𑐟𑐮𑐾𑐖𑐸 𑐨𑐰𑐵𑐣𑐷 𑐳𑐶𑐛𑐷 𑐣𑐏𑑅 𑐳𑐶𑐛𑐶 𑐩𑐞𑑂𑐜𑑅 𑐔𑑂𑐰𑐫𑐐𑐸
(𑐠𑐸𑐎𑐶𑐫𑐵 𑐖𑑂𑐫𑐵𑐮𑐵 𑐧𑐖𑐶 𑐎𑐹𑐕𑐶𑑄 𑐖𑐵𑐎𑐶 𑐎𑐸𑐕𑐶𑑄 𑐧𑐶𑐂)
𑑕. 𑐧𑐣𑐾𑐥𑐵 𑐰 𑐏𑑂𑐰𑐥𑐫𑑂 𑐣𑐾𑐎𑐸𑐢𑐮𑑄 𑐡𑐫𑐾𑐎𑐹𑐳𑐵 𑐐𑐸𑑄𑐮𑐵 𑐧𑐮𑐫𑑂 𑑒𑑒 𑐎𑐮𑐳 𑐴𑐵𑐳𑐵, 𑐥𑐸𑐮𑐸 𑐰
𑐰𑐖𑑂𑐬𑐳𑐮𑐵𑐥𑐵𑑅,
𑐀𑐲𑑂𑐚 𑐩𑑄𑐐𑐮 𑐰 𑐣𑐵𑐐 𑐕𑐰𑑂𑐫𑑀 𑐣𑑄 𑐩𑐵
𑑖. 𑐧𑑀𑐜𑐾 𑐣𑐶𑐮 𑐧𑐵𑐬𑐵𑐴𑐶 𑐐𑐠𑐵𑑄𑐩𑐸𑐐 𑐔¥𑐴𑐾 𑐏𑑂𑐰𑐵𑐥𑐵 𑐡𑐫𑐎𑐵 𑐰𑐵 𑐏𑑂𑐰𑐵𑐥𑐵𑐟𑐾
(𑐐𑐞 𑐥𑑂𑐫𑐵𑐏𑑃) 𑐬𑑄𑐐 𑐬𑑀𑐐𑐣 𑐫𑐵𑐫𑐾𑐐𑐸
𑐠𑑂𑐰 𑐫𑐵𑐫𑐾 𑐩𑐵𑑅𑐩𑑂𑐴 𑐩𑐣𑑂𑐴𑐸 𑐣𑑄 𑐮𑐵𑐎𑐵𑑄 𑐩𑐣𑑂𑐴𑑂𑐫𑐵𑐳𑐾 𑐰𑐫𑐵 𑐳𑐵𑐥𑐵𑐬𑐸 𑐎𑐸𑐣𑑂𑐴𑐸 𑐢𑐸𑑄 𑐢𑐸𑑄𑐥𑐵𑐫𑑂 𑐔𑑂𑐫𑐵𑐎𑐵
𑐣𑐩𑐰𑐵𑐳𑐾 𑐰𑑂𑐫𑐵𑐳𑐷 𑐰𑐣𑐵 𑐠𑑅𑐐𑐸 𑐕𑐾 𑐫𑐾𑐎𑐷 (𑐠𑐸𑐎𑐶𑐫𑐵 𑐖𑑂𑐫𑐵𑐮𑐵 𑐂 𑐀𑐣𑐸𑐳𑐵𑐬 𑐎𑐵𑐃)
𑑗. 𑐣𑐰𑐡𑐸𑐬𑑂𑐐𑐵 𑐣𑐰𑐡𑐸𑐬𑑂𑐐𑐵 𑐐𑐠𑐵𑐩𑐸𑐐𑑅 𑐔¥𑐴𑐾 𑐏𑑂𑐰𑐵𑐥𑐵𑐫𑐵 𑐮𑐵𑐐𑐶 𑐥𑐸𑐖𑐵 𑐰𑐶𑐢𑐷
𑐫𑐵𑐣𑐵 𑐔𑐵 𑐦𑑂𑐫𑐵𑐫𑐾𑐐𑐸 𑑋
𑑘. 𑐡𑑂𑐫𑑀𑑄 𑐕𑐾𑑄 𑐟𑑂𑐬𑐶𑐥𑐸𑐬𑐵 𑐳𑐸𑐣𑑂𑐡𑐬𑐷 𑐫𑐣𑑂𑐫𑐵 𑐥𑐸𑐣𑑂𑐴𑐷 𑐴𑐵𑐎𑐸𑐐𑐸 𑐬𑑄𑐐 𑐰𑐵 𑐨𑐹𑐂 𑐳𑐶𑐣𑑂𑐴𑐏𑑄
𑐀𑐲𑑂𑐚 𑐩𑑄𑐐𑐮, 𑐎𑐮𑐱 𑐰
𑐩𑐶𑐏𑐵 𑐔𑑂𑐰𑐫𑐾𑐐𑐸 𑑋
𑑙. 𑐚𑑁 𑐩𑐢𑐷 𑐨𑐿𑐬𑐧𑐣𑐵𑐠 𑐫𑐵 𑐡𑐾𑐐𑑅 𑐔𑑁𑐠𑐷 𑐏𑐸𑐣𑑂𑐴𑐸 𑐥𑐸𑐮𑐸𑐫𑐵 𑐨𑐿𑐮𑑅 𑐡𑑂𑐫𑑀 𑐔𑑂𑐰𑐫𑐩𑐵
𑑑𑑐. 𑐮𑐵𑐎𑑀𑐮𑐵 𑐕𑐾𑑄,
𑐚𑑁𑐩𑐢𑐷 𑐨𑐿𑐬𑐰𑐫𑐵 𑐡𑐾𑐐𑑅 𑐥𑐸𑐮𑐸 𑐎𑐶𑐳𑐷 𑐔𑑂𑐰𑐫𑐾𑐐𑐸
(𑐠𑐸𑐎𑐶𑐫𑐵 𑐖𑑂𑐫𑐵𑐮𑐵 𑐏𑑂𑐰𑐥 𑐐𑐸𑐠𑐶 𑐏𑐬𑑂𑐔 𑐀𑐜𑐺𑐵𑑄 𑐳𑐬𑐸𑐰𑐵 𑐖𑐵𑐎𑐶 𑑙 𑐥𑐵𑐛𑐷 𑐰𑐵 𑐥𑐸𑐮𑐸 𑐎𑐶𑐳𑐷 𑐔𑑂𑐰𑑅𑐐𑐸 𑐫𑐵 𑐖𑑂𑐫𑐵𑐮𑐵 𑑑𑑐𑑐𑑋– 𑐧𑐷𑐐𑐸 𑑋 )
𑐔𑐠𑐵 𑐧𑐮𑐾 𑐳𑐶𑑄𑐴𑐰𑐵𑐴𑐣 𑐬𑐎𑑂𑐟 𑐰𑐬𑑂𑐞𑐩𑑂𑐴 𑐮𑐶𑐦𑑅 𑐳𑑂𑐰𑐫𑐵 𑐔𑑂𑐰𑑄𑐩𑑂𑐴 𑐔𑐠𑐵 𑐡𑑂𑐫𑑀 𑐩𑐷𑐐𑐸 𑐔𑐮𑐣 𑐏𑑂𑐰𑐥𑑂𑐫 𑐖𑐎 𑐡𑐸 𑑋
𑑑𑑑. 𑐴𑐣𑐸𑐩𑐵𑐣𑐑𑐵𑐚 𑐐𑑄𑐐𑐵 𑐰 𑐳𑑂𑐰𑐳𑑂𑐠𑐵𑐣𑐷 𑐩𑐶𑐮𑐵 𑐥𑐸𑐣𑑂𑐴𑐶÷𑐕𑑂𑐫𑐵𑐮𑐵 𑐥𑐸𑐣𑑂𑐴𑐶 𑐐𑑄𑐐𑐵 𑐕𑐩𑑂𑐴 𑐰
𑐐𑐬𑐸𑐜 𑐢𑑂𑐰𑐖𑐵 𑐣𑑄 𑐰𑐷𑐩𑐵 𑑋 𑐳𑑂𑐰𑐳𑑂𑐠𑐵𑐣𑐷 𑐕𑐩𑑂𑐴 𑐔𑑂𑐰𑐫𑐾𑐐𑐸 𑑋
𑑑𑑒. 𑐟𑐮𑐾𑐖𑐸 𑐟𑐮𑐾𑐖𑐸𑐫𑐵 𑐩𑐹 𑐔𑐸𑐎 𑐦𑐸𑐮𑐥𑐵𑐟𑐷 𑐕𑐣𑑂𑐴𑐸 𑐣𑑂𑐴𑑂𑐫𑑀 𑐣𑑂𑐫𑐵𑐩𑑂𑐴 𑐔𑐶𑐟𑑂𑐬𑐎𑐵𑐬 𑐣𑐵𑐂𑐎𑐾 𑐰
𑐖𑑂𑐫𑐵𑐥𑐵𑐮𑐵𑑅𑐟 𑐰𑐣𑐵𑑅
𑐬𑑄𑐐 𑐥𑐵𑐫𑐾𑐐𑐸 𑑋

𑐟𑐮𑐾𑐖𑐸 𑐨𑐰𑐵𑐣𑐷𑐫𑐵 𑐡𑐸𑐃 𑐩𑐵𑐖𑐸 𑐡𑑂𑐫𑑅𑐫𑐵 𑐠𑐵𑐫𑑂 𑐡𑐫𑑄𑑂 𑐡𑐱𑑄 𑐔𑐿𑐟𑑂𑐬 𑐩𑐳𑐵𑐣𑑂𑐟 𑐎𑐸𑐣𑑂𑐴𑐸 𑐔𑐵 𑐫𑐵𑐐𑐸 𑐐𑑂𑐰𑐖𑐵𑐫𑑂 𑐬𑑄𑐐 𑐥𑐵𑐣𑐵𑑅 𑐰𑐴𑐫𑐵𑐐𑐸 𑐨𑐸𑐃 (𑐡𑐾𑐩𑐵) 𑐣𑐵𑐐 𑐕𑐩𑑂𑐴 𑐔𑑂𑐰𑐫𑐾𑐩𑐵 𑑋 𑐰 𑐧𑐿𑐱𑐵𑐏 𑑑 𑐐𑐟𑐾 𑐣𑑂𑐴𑐹 𑐡𑑃 𑐎𑐸𑐣𑑂𑐴𑐸 𑐧𑑂𑐰𑐫𑐵 𑐟𑐂𑐐𑐸 𑐁𑐟𑐎𑑄 𑐔𑐮𑐣 𑐡𑐣𑐶 𑑋
𑐨𑐿𑐬𑐰 𑐐𑐸𑐠𑐶 𑐏𑑂𑐰𑐥𑑅 𑐥𑐵𑐏𑐾𑑄 𑐳𑐶𑐥𑐵𑐜𑑀𑐮 𑐐𑐵.𑐰𑐶.𑐳. 𑐳𑐵𑐣𑑂𑐟𑐵 𑐥𑑁𑑅 𑐦𑐮𑑂𑐔𑐵 𑐳𑐕𑐶𑐰 𑐣𑐷𑐡𑑄 𑐣𑑂𑐴𑑂𑐫𑑀 𑐡𑐫𑐾𑐎𑐵 𑐂𑐮𑐫𑑂 𑐰𑑂𑐫𑐮𑐫𑑂 𑐣𑑂𑐴𑐹𑐢𑐵 𑐖𑐸𑐫𑐵 𑐔𑑂𑐰𑑄𑐐𑐸 𑐡𑐸 𑑋
𑐣𑐾.𑐳𑑄. 𑑑𑑐𑑑𑑖 𑐥𑐵𑐏𑐾 𑐏𑑂𑐰𑐥𑑅 𑐟𑐸𑑄𑐕𑐾𑑃𑐫𑐵 𑐴𑐬𑑂𑐲𑐰𑐷 𑐔𑐶𑐟𑑂𑐬𑐎𑐵𑐬𑑄 𑐰𑐵𑐎𑐸𑐥𑐟𑐶 𑐣𑐵𑐬𑐵𑑄 𑐡𑑂𑐫𑑀𑐫𑐵 𑐡𑐐𑐮𑐫𑑂 𑐰 𑐨𑐶𑐣𑑂𑐡𑑂𑐫𑑀𑐫𑐵 𑐡𑐾𑐐𑐮𑐫𑑂 𑐟𑐵𑑅𑐴𑐵𑐎𑑅𑐐𑐸 𑐮𑐸𑑄 𑐳𑐶𑐫𑐵 𑐟𑑅𑐐𑐸 𑐥𑐟𑐵𑑅 𑐕𑐵𑐫𑐵 𑐟𑑅𑐐𑐸 𑐁𑐟𑐎 𑐣𑑄 𑐡𑐾𑐐𑐮𑐾 𑐱𑑀𑐨𑐵𑐫𑑂𑐩𑐵𑐣 𑐖𑐸𑐫𑐵 𑐔𑑂𑐰𑑄𑐐𑐸 𑐡𑐣𑐶 𑑋

𑐏𑑂𑐰𑐥𑐫𑑂 𑐎𑐬𑑂𑐩 𑐎𑐵𑐞𑑂𑐜𑐫𑐵 𑐔𑐶𑐟𑑂𑐬 𑐔𑑂𑐰𑐫𑐾𑐐𑐸 𑐖𑑂𑐫𑐵
𑑑. 𑐩𑐔𑐵 𑐧𑐸𑐂𑐰𑐮𑐾 𑐩𑐔𑐵 𑐎𑐠𑐶𑐏𑐫𑑂 𑐟𑐫𑐾𑐟 𑑅 𑐩𑐶𑐖𑑄 𑐩𑐔𑐵𑐫𑐵𑐟𑑅 𑐔𑐣𑑂𑐡𑑂𑐬 𑐰 𑐳𑐹𑐬𑑂𑐫
𑐩𑐶𑐳𑐵 𑐩𑐔𑐵𑐫𑐵𑐟 𑑅 𑐮𑐎𑑂𑐲𑑂𑐩𑐷 𑐳𑐬𑐳𑑂𑐰𑐟𑐷
𑐖𑐵𑐟𑑅 𑐏𑐫𑑂 𑐣𑑄 𑐩𑐔𑐵 𑐫𑐵 𑐮𑐎𑑂𑐲𑐞 𑐰𑐵 𑐬𑐵𑐱𑐷 𑐎𑐠𑑄 𑐡𑑂𑐫𑑀 𑐔𑑂𑐰𑐎𑐷𑐐𑐸 𑐔𑐮𑐣 𑐡𑐸 𑑋
𑑒. 𑐩𑐶𑐳𑐵 𑐫𑐵 𑐂𑐴𑐶 𑐧𑐾𑐮 𑐰𑐶𑐰𑐵𑐴
𑐧𑑁𑐡𑑂𑐢𑐩𑐵𑐬𑑂𑐐𑐷 𑐖𑐹𑐳𑐵 𑐱𑐶𑐰 𑐩𑐵𑐬𑑂𑐐𑐶 𑐖𑐹𑐳𑐵
𑐎𑐮𑐳 𑑑𑑗 𑐐𑑅 𑐟𑐐𑑀𑐐𑐸 𑐎𑐮𑐱 𑐏𑐫𑑂 𑐔𑐟𑐸𑐬𑐩𑐸𑐏𑐶 𑐰𑑂𑐬𑐩𑑂𑐴𑐵 𑑑
𑐡𑐶𑐐 𑐎𑐮𑐳 𑑑𑑐 𑐐𑐞𑐾𑐱 𑑑, 𑐀𑐲𑑂𑐚 𑐩𑑄𑐐𑐮 𑑗, 𑐥𑐵
𑐱𑑂𑐬𑐷 𑐮𑐎𑑂𑐲𑑂𑐩𑐷 𑐫𑐎𑑂𑐲 𑐫𑐎𑑂𑐲𑐣𑐷 𑑔 𑐱𑑂𑐬𑐷 𑐮𑐎𑑂𑐲𑑂𑐩𑐷 𑐫𑐎𑑂𑐲, 𑐫𑐎𑑂𑐲𑐣𑐷 𑑔 𑐥𑑂𑐬𑐞𑐷𑐟 𑑑
𑐣𑐵𑐐 𑐎𑐮𑐱 𑑑, 𑐐𑐞𑐾𑐱 𑐎𑐮𑐱 𑑑 (𑐂𑐣𑐵𑐫) 𑐣𑐵𑐐,𑐎𑐮𑐱 𑑑, 𑐨𑑂𑐰𑐟𑐫𑑂 𑐔𑑂𑐰𑑅𑐐𑐸 𑐀𑐲𑑂𑐚𑐩𑑄𑐐𑐮 𑑑 𑐖𑑀𑑅
𑐂𑐣𑑂𑐡𑑂𑐬 𑐎𑐮𑐱 𑐖𑐖𑑂𑐘𑐫𑐵 𑐮𑐵𑐐𑐶 𑐧𑐖𑑂𑐬 𑐀𑑄𑐎𑐶𑐟 𑐥𑐸𑐮𑐸 𑑑 𑐣𑐵𑐐 𑐕𑐟𑑂𑐬 𑑑, 𑐂𑐴𑐶 𑐩𑐔𑐵𑐫𑐵 𑐮𑐵𑐐𑐶 𑐳𑐮𑐵𑐥𑐵 𑑑
𑐳𑑂𑐰𑐵𑑄 𑐎𑐷𑐐𑑅 𑐟𑐫𑐟 𑐳𑑂𑐰𑐳𑑂𑐟𑐶 𑐔𑐶𑐟𑑂𑐬 𑐀𑑄𑐎𑐶𑐟 𑐴𑐵𑐳𑐵 𑐕𑐥𑐵 𑐳𑐵𑐥𑐵𑐏𑑂𑐰𑐵 𑑑
𑐳𑐮𑐵𑐥𑐵𑑅 𑐕𑑂𑐫𑑀𑐣𑐾 𑐟𑐫𑐟 𑐳𑐥𑐵𑐏𑑂𑐰𑐵 𑑑
𑐀𑐲𑑂𑐚 𑐩𑑄𑐐𑐮 𑑑 𑐖𑑀
𑑓. 𑐱𑐵𑐎𑑂𑐫 𑐐𑐸𑐨𑐵𑐖𑐸𑐫𑐵 𑐰𑐜𑐾 𑐕𑐸𑐂 𑐧𑐮𑐾 𑑅
𑐔𑑂𑐰𑐫 𑐔𑑂𑐰𑐫𑐵𑐐𑐸 𑑑𑑗 𑐎𑐮𑐱 𑐰 𑑕 𑐩𑑂𑐴 𑐣𑐵𑐐 𑐫𑐵 𑐎𑐮𑐳 𑐟𑐣𑐵 𑑒𑑒 𑐫𑐵𑐃 𑐰𑐮𑐫𑑂 (𑐰𑐶𑐴𑐵𑐬𑐾) 𑐣𑑄 𑐔𑐶𑐟𑑂𑐬 𑐔𑑂𑐰𑐎𑐷𑐐𑐸 𑑋 𑐁𑐐𑐩𑐫𑑂 𑐁𑐐𑑄 𑐢𑐎𑐶𑑄 𑐔𑑂𑐰𑐎𑐷𑐐𑐸 𑑋
𑑔. 𑐰𑑂𑐫𑐵𑐴𑐵 (𑐂𑐴𑐶𑐥𑐵𑑄) 𑐫𑐵𑐂𑐧𑐮𑐾𑑅
𑐰𑑁𑐡𑑂𑐢𑐩𑐵𑐬𑑂𑐐𑐷𑐟𑐫𑑂 𑐱𑐶𑐰𑐩𑐬𑑂𑐐𑐶 𑐟𑐫𑑂
𑐮𑐸𑐏𑐵𑐫 𑐥𑑄𑐔 𑐰𑐸𑐡𑑂𑐢 𑐔𑑂𑐰𑐎𑐷 𑐮𑐸𑐏𑐵𑐫 𑐐𑐞𑐾𑐱, 𑐎𑐸𑐩𑐵𑐬, 𑐰𑑂𑐬𑐩𑑂𑐴𑐵, 𑐰𑐶𑐲𑑂𑐞𑐸 𑐰 𑐩𑐴𑐵𑐡𑐾𑐰
𑐰𑐿𑐬𑑀𑐔𑐣 𑐀𑐎𑑂𑐲𑑀𑐨𑑂𑐫, 𑐀𑐩𑐶𑐟𑐵𑐨, 𑐀𑐩𑑀𑐑 𑐳𑐶𑐡𑑂𑐢𑐶, 𑐥𑐵𑐬𑑂𑐰𑐟𑐷 𑐔𑑂𑐰𑐎𑐷
𑐬𑐟𑑂𑐣 𑐳𑐩𑑂𑐨𑐰
𑐱𑐵𑐎𑑂𑐫, 𑐰𑐖𑑂𑐬𑐵𑐔𑐵𑐬𑑂𑐫 𑐰 𑐄𑐡𑐵𑐫 𑐟𑐫 𑐩𑐴𑑂𑐬𑐷𑐎𑐳𑐷 𑐔𑑂𑐰𑐎𑐶𑐐𑐸 𑐔𑐮𑐣 𑐡𑐸 𑐳𑑂𑐫 𑐳𑑂𑐫 𑐟𑐫𑑂 𑐩𑐡𑐸 𑑋
𑑕. 𑐖𑑂𑐫𑐵 𑐖𑑄𑐎𑑀 𑐫𑐵𑐂𑐰𑐮𑐾𑑅
𑐰𑑁𑐡𑑂𑐢𑐩𑐵𑐬𑑂𑐐𑐷 𑐱𑐶𑐰𑐩𑐵𑐬𑑂𑐐𑐷
𑐔𑑂𑐰𑐫 𑐣𑑂𑐴𑑂𑐫𑐾𑐠𑐣𑐵𑑄 𑐠𑐾 𑑒𑑒 𑐐𑑅 𑐎𑐮𑐱 𑐩𑐵 𑐡𑐶𑐐 𑐎𑐮𑐱 𑑑𑑐, 𑐐𑑂𑐬𑐴 𑐎𑐮𑐱 𑑙
𑐥𑑂𑐬𑐖𑑂𑐘𑐵𑐥𑐵𑐫𑑂 𑐢𑐾𑐐𑐸 𑐕𑐸𑐚𑐺𑐿 𑐎𑐮𑐳 𑐩𑐵 𑐀𑐲𑑂𑐚 𑐎𑐮𑐱 𑑘, 𑐳𑑂𑐠𑐵𑐣 𑐎𑐮𑐱 𑑔
𑐳𑑂𑐰𑐳𑑂𑐟𑐶 𑐡𑐸𑐐𑐸 𑐥𑐸𑐮𑐸, 𑐖𑑄𑐎𑑀 𑐏𑑅𑐫𑐵 𑐮𑐵𑐐𑐶 𑐳𑐟𑐢𑐵𑐬𑐵 𑐳𑐴𑐳𑑂𑐬𑐢𑐵𑐬𑐵 𑑒, 𑐱𑑂𑐬𑐷 𑐮𑐎𑑂𑐲𑑂𑐩𑐷 𑐫𑐎𑑂𑐲, 𑐫𑐎𑑂𑐲𑐣𑐷
𑐰𑑂𑐰𑐳𑐮 𑑒 𑐩𑑂𑐴 𑑋 𑑔, 𑐥𑑂𑐬𑐞𑐶𑐟, 𑑑 𑐣𑐵𑐐 𑐎𑐮𑐱 𑑑 𑐏𑑅𑐫𑐵 𑐮𑐵𑐐𑐶 𑐧𑑂𑐰𑐳𑐮 𑑒, 𑐀𑐲𑑂𑐚 𑐩𑑄𑐐𑐮 𑑑
𑑖. 𑐳𑐷𑐧𑐮𑐫𑑂 𑐩𑐵𑑅𑐐𑐸 𑐔𑑂𑐰𑐖𑑂𑐫𑐵
𑐧𑑁𑐡𑑂𑐢𑐩𑐵𑐬𑑂𑐐𑐷 𑐖𑐹𑐳𑐵 𑐱𑐶𑐰 𑐩𑐵𑐬𑑂𑐐𑐶 𑐖𑐹𑐳𑐵
𑐡𑐾𑐏𑐵 𑐡𑐸𑐥𑐶𑑄 𑐳𑐶𑐟 𑐢𑐵𑐳𑐵 𑐰𑐸𑐡𑑂𑐢, 𑐢𑐬𑑂𑐩 𑐰
𑐳𑑄𑐑 𑐰𑐖𑑂𑐬 𑐳𑑂𑐰𑐵𑑄, 𑐳𑐥𑐹m 𑐀𑑄𑐎𑐶𑐟 𑐀𑐏𑐸𑑄𑐔𑐵 𑐩𑑂𑐰𑐵𑑅
𑐡𑐸𑐐𑐸 𑐎𑐮𑐱 𑑋 𑐎𑐹𑐟𑐵𑑅𑐫𑐵 𑐮𑐵𑐐𑐶
𑐡𑐳𑐡𑐶𑐐 𑐔𑐶𑐟𑑂𑐬 𑐡𑐸𑐐𑐸 𑐢𑑂𑐰𑐖𑐵, 𑐀𑐲𑑂𑐚 𑐩𑑄𑐐𑐮 𑑋
𑑗. 𑐖𑑂𑐰𑐣𑐵 𑐎𑐿 ( 𑐖𑐣𑐿 𑐎𑐿)
𑐖𑑂𑐰𑐮𑐵 𑐣𑐵𑐐𑑄 𑐣𑑂𑐫𑐵𑐂 𑐎𑐿 𑐰𑐂𑐧𑐮𑐾 𑐠𑐵𑐫𑑂 𑐳𑑂𑐰𑐫𑐵 𑐳𑐶𑑄𑐴 𑐔𑑂𑐰𑐃 𑑋 𑐟𑐸𑐂𑐐𑐸, 𑐣𑑂𑐴𑑂𑐫𑐵𑐄𑑄𑐐𑐸 𑐰 𑐴𑐵𑐎𑐹𑐐𑐸 𑐬𑑄𑐐 𑐖𑐎 𑐔𑑂𑐰𑐂 𑑋 𑐔𑑂𑐰𑐫 𑐩𑐕𑐶𑑄 𑐠𑐵𑐫𑑂 𑐖𑐹𑐳𑐵 𑐨𑑂𑐰𑐟𑐫𑑂 𑐔𑑂𑐰𑐐𑐸 𑐳𑐶𑑄𑐴 𑐣𑑄 𑐟𑐶𑐎𑐾𑐐𑐸 𑐔𑐮𑐣 𑐡𑐸 𑑋
𑑘. 𑐳𑐥𑑂𑐟𑐵𑐴 𑐫𑐵𑐂𑐧𑐮𑐾 :-
𑐐𑐬𑐸𑐜 𑐢𑑂𑐰𑐖𑐵 𑐔𑑂𑐰𑐂, 𑐨𑐵𑐐𑐰𑐟 𑐥𑐸𑐬𑐵𑐞 𑐎𑑄𑐎𑐹𑐳𑐵 𑐨𑐐𑐰𑐟𑐶 𑐣𑑄 𑐔𑑂𑐰𑐫𑐐𑐸 𑐔𑐮𑐣 𑐡𑐸 𑑋 𑐟𑑅𑐖𑐷 𑐫𑐵𑐣𑐵 𑐩𑐞𑑂𑐜𑐥 𑐡𑐫𑐎𑐵 𑐫𑐵𑐂𑐐𑐸 𑐖𑐹𑐳𑐵 𑐎𑐵𑐥𑐟𑐫𑑂 𑐡𑐱 𑐡𑐷𑐐 𑐢𑑂𑐰𑐖𑐵 𑐰 𑐠𑐷 𑐠𑐷 𑐥𑑂𑐬𑐎𑐵𑐬𑐫𑐵 𑐎𑐮𑐳 𑐣𑑄 𑐩𑐵𑑅 𑑋 𑐎𑐖𑐷𑐫𑐵 𑐐𑐔𑑂𑐕𑐾 𑐀𑐣𑐸𑐳𑐵𑐬 𑐫𑐵𑐎𑐷 𑑋
𑑙. 𑐀𑐥𑑂𑐥𑐵 𑐨𑐟𑑂𑐟𑐵𑐫𑑂 𑐩𑐶 𑐟𑐫𑐟 :-
𑐴𑑂𑐫𑐵𑑄𑐐𑐸 𑐎𑐵𑐥𑐟𑐫𑑂 𑐩𑐶 𑐥𑑂𑐰𑐵 𑐖𑑂𑐰𑐣𑐵 𑐔𑑂𑐰𑑄𑐩𑑂𑐴 𑐴𑐣𑐸𑐩𑐵𑐣 𑐔𑑂𑐰𑐃 𑑋
𑑑𑑐. 𑐣𑑂𑐴𑐹𑐐𑐸 𑐕𑐾 𑐥𑐮𑐶𑐳𑑂𑐠𑐵 𑐰𑐵 𑐕𑐾𑑄 𑐱𑐸𑐡𑑂𑐢 𑐫𑐵𑐂𑐧𑐮𑐾 𑑋
𑐩𑐶𑐮𑐵 (𑐢𑐸𑐬𑐷) 𑐫𑐵 𑐮𑐵𑐐𑐶 𑐔𑐎𑑂𑐬 𑐔𑐷𑑄, 𑐀𑐲𑑂𑐚 𑐩𑑄𑐐𑐮, 𑐰 𑐧𑑁𑐏𑑂𑐰𑐵 𑐕𑐥𑐵 𑐩𑐵 𑑋
𑐂𑐮𑐾𑐰𑑂𑐫𑐮𑐾 𑐡𑑂𑐫𑑀 𑐡𑐾𑐐𑐮𑐾 𑐬𑑄𑐐 𑐬𑑀𑐐𑐣 𑐫𑐵𑐫𑐾𑐟 𑐔𑐶𑐟𑑂𑐬𑐎𑐵𑐬 (𑐥𑐸𑑄) 𑐟𑐫𑑂𑐳𑑄 𑐴𑐾 𑐫𑐵𑐣𑐵 𑐰𑐫𑐵 𑐔𑑂𑐰𑑄𑐐𑐸 𑐡𑐸 𑑋

𑐏𑑂𑐰𑐥 𑐡𑐾𑐱𑐫𑑂 𑐔𑐶𑐟𑑂𑐬𑐎𑐵𑐬 (𑐥𑐸𑑄) 𑐟𑐫𑐐𑐸 𑐰𑐬𑑂𑐐𑐶𑐎𑐬𑐞 𑐠𑐠𑐾 𑐡𑐸𑑅
(𑐎) 𑐕𑐾𑑄𑐏𑐵𑐫𑑂 𑐬𑑄𑐐 𑐬𑑀𑐐𑐣 𑐫𑐵𑐂𑐥𑐶𑑄
(𑐏) 𑐎𑐟𑐵𑑄𑐩𑐬𑐷 𑐫𑐵 𑐮𑐵𑐐𑐶 𑐔𑐶𑐔𑐶 𑐥𑐵𑑅𑐐𑐸 𑐏𑑂𑐰𑐵𑐥𑐵 𑐫𑐵 𑐖𑑂𑐫𑐵 𑐕𑐾𑑄 𑐔𑑂𑐰𑐣𑐵 𑐴𑐾 𑐫𑐵𑐂𑐥𑐶𑑄
(𑐐) 𑐕𑐾𑑄 𑐴𑐾 𑐔𑑂𑐰𑐣𑐵 𑐥𑑁𑐨𑐵 𑐔𑑂𑐰𑐂𑐥𑐶𑑄
(𑐑) 𑐔𑑂𑐰𑐖𑑂𑐫𑐵 𑐫𑐵𑐫𑑂 𑐩𑐳𑑅𑐥𑐶𑑄 𑐩𑐾𑐐𑐸 𑐖𑑂𑐫𑐵 𑐫𑐵𑐂𑐥𑐶𑑄
(𑐒) 𑐠𑐷 𑐠𑐷 𑐡𑐾𑐰𑐡𑐾𑐰𑐷 𑐥𑐶𑐣𑐶𑐐𑐸 𑐏𑑂𑐰𑐵𑐥𑐵 𑐡𑐫𑑂𑐎𑐶𑐥𑐷𑑄
(𑐔) 𑐁𑐥𑐵 𑐢𑐿 𑐠𑐾𑑄 (𑐥𑐸𑑄) 𑐟𑐫𑑂 𑐔𑑂𑐰 𑐖𑑂𑐫𑐵𑐫𑑂 𑐴𑐾 𑐠𑑅𑐐𑐸 𑐮𑐖𑐐𑐵 𑐫𑐵𑐣𑐵 𑐔𑑂𑐰𑑄𑐥𑐶𑑄 𑐡𑐸 𑑋
𑐥𑐸𑐮𑐵𑐥𑐶𑑄 𑐩𑐣𑑂𑐴𑐸𑐟𑐫𑑂 𑐣𑑂𑐴𑐵𑐥𑐵 (𑐎𑐬𑐶𑐰 𑑖𑑐 𑐰𑐬𑑂𑐲 𑐣𑑂𑐴𑑂𑐫𑑀) 𑐐𑐖𑐶𑐦𑐵 𑐩𑑂𑐴𑐶𑐟𑐷𑐐𑐸 𑐔𑐮𑐣 𑐡𑐸 𑑋 𑐠𑑂𑐰 𑐐𑐖𑐶𑐦𑐵 𑐔𑐵𑐎𑐮𑐵𑐃 (𑐕𑐾𑑄𑐐𑐸 𑐫𑐵𑐐𑐸 𑐡𑐫𑑂𑐎𑐷𑐐𑐸) 𑑋 𑐕𑐏𑑂𑐫 𑐥𑐚𑐶𑐺 𑐦𑐸𑐎𑑂𑐎 𑐐𑐾𑐬𑐸 (𑐔𑐶𑐎𑑄 𑐬𑑄𑐐) 𑐖𑐸𑐳𑐵 𑐩𑑂𑐫𑐾𑐏𑐾 𑐥𑐚𑐶𑐺 𑐔𑑂𑐰𑐎𑐹𑐩𑑂𑐴𑐾𑐳𑐶𑐫𑐵 𑐂𑐔𑑂𑐕𑐵 𑐎𑐠𑑄𑐫𑐵 𑐔𑐶𑑄, 𑐔𑐶𑐟𑑂𑐬 𑐔𑑂𑐰𑐫𑐐𑐸 𑐖𑐸𑐃 𑑋 𑐟𑐵𑐳 𑐩𑑂𑐴𑐶𑐟𑐾𑐐𑐸 𑐔𑐮𑐣 𑐰𑐫𑐵𑑅 𑐠𑑂𑐰𑐫𑐵 𑐔𑐮𑐣 𑐟𑐣𑐵 𑐰𑐣 𑑋 𑐠𑐠𑐾 𑐴𑐾 𑐣𑐵𑐐𑐥𑐵𑐳 𑐣𑑄 𑐔𑑂𑐰𑐫𑐐𑐸 𑐔𑐮𑐣 𑐟𑐣𑐵 𑐰𑐣 𑑋

𑐠𑐶𑐩𑐶𑐫𑐵 𑐔𑐶𑐟𑑂𑐬𑐎𑐵𑐬 (𑐥𑐸𑑄) 𑐟
𑐳𑑂𑐰𑐣𑐶𑐐𑐮𑐾 𑐡𑐸𑐣𑐾 𑐔𑑂𑐰𑑄𑐥𑐶 𑐔𑐶𑐟𑑂𑐬𑐎𑐵𑐬 (𑐥𑐸𑑄) 𑐟 𑐩𑐢𑑂𑐫𑐾 𑐠𑐶𑐩𑐶 𑐩𑐢𑑂𑐫𑐥𑐸𑐬𑐫𑑂 𑐣𑑄 𑐣𑑂𑐴𑐵𑐥𑐵𑑄 𑐣𑐶𑐳𑐾𑑄 𑐔𑑂𑐰𑐣𑐵 𑐠𑑅𑐐𑐸 𑐮𑐖𑐐𑐵 𑐣𑑂𑐴𑑂𑐫𑐵𑐎𑐵 𑐔𑑂𑐰𑑄𑐥𑐶 𑐫𑐎𑑂𑐎𑑀 𑐴𑐾 𑐡𑐸 𑑋 𑐁 𑐟𑐎 𑐣𑑄 𑐎𑑂𑐰𑐫𑑂 𑐔𑑂𑐰𑐫𑐵𑐐𑐸 𑐔𑑂𑐰 𑐖𑑂𑐫𑐵𑐟 𑐫𑐵𑐣𑐵 𑐔𑑂𑐰𑑄𑐐𑐸 𑐡𑐸 𑑋
𑐠𑐶𑐩𑐶𑐥𑐵𑐏𑐾𑑄 𑐫𑐵𑐫𑐾𑐩𑐵𑑅𑐐𑐸 𑐔𑑂𑐰𑐖𑑂𑐫𑐵 𑐟 𑐠𑐸𑐎𑐠𑑄 𑐡𑐸 𑑅
𑑑. 𑐩𑑀𑐴𑐷 𑐧𑐮𑐫𑑂 𑐎𑐸𑐩𑐵𑐬𑐷, 𑐎𑐵𑐮𑐷 𑐰 𑐨𑐿𑐬𑐰 𑐫𑐵𑐟 𑐮𑑄𑐥𑐸 𑐕𑐵𑐫𑐾𑐐𑐸,
𑑒. 𑐮𑐵𑐫𑐎𑐸𑐮𑐶 𑐩𑐹 𑐮𑐹𑐏𑐵𑐫𑑂, 𑐫𑐩𑐡𑐹𑐟, 𑐱𑐶𑐰 𑐡𑐹𑐟 𑐰 𑐀𑐲𑑂𑐚 𑐩𑑄𑐐𑐮 𑐔𑑂𑐰𑐫𑐾𑐐𑐸 𑐖𑑂𑐫𑐵,
𑑓. 𑐠𑐶𑐩𑐶𑐫𑐵 𑐮𑐸𑐎𑐣𑐵 𑐡𑑂𑐫𑑀 (𑐮𑑀𑐎𑐾𑐱𑑂𑐰𑐬) 𑐮𑑄𑐥𑐸 𑐕𑐵𑐫𑐾𑐐𑐸 𑐩𑐶𑐏𑐵 𑐎𑑄𑐎𑐾𑐐𑐸 𑐖𑑂𑐫𑐵 𑐫𑐵𑐂,
𑑔. 𑐡𑐾 𑐡𑐾𑐱𑐮𑐾 𑐔𑑂𑐰𑐫𑐾𑐐𑐸 𑐰 𑐢𑐵𑐬𑑂𑐩𑐶𑐎 𑐎𑑂𑐬𑐶𑐫𑐵 𑐎𑐬𑑂𑐩𑐫𑐵 𑐳𑐩𑑂𑐥𑐹𑐬𑑂𑐞 𑐔𑑂𑐰𑐖𑑂𑐫𑐵 𑐣𑑄 𑐁𑐟𑐎 𑐫𑐵𑐣𑐵 𑐰𑐫𑐵 𑐔𑑂𑐰𑑄𑐐𑐸 𑐡𑐸 𑑋

𑑗. 𑐔𑐶𑐟𑑂𑐬𑐎𑐵𑐬 (𑐥𑐸𑑄) 𑐟𑐫𑑂𑐐𑐸 𑐳𑐵𑐩𑐵𑐖𑐶𑐎 𑐰𑐶𑐢𑐶 𑐰𑑂𑐫𑐰𑐴𑐵𑐬𑐫𑐵 𑐢𑐮𑑅
𑐩𑐔𑐵 𑐥𑑂𑐰𑐵𑐠𑑂𑐫 𑐡𑐸𑐳𑐵𑑄𑐣𑐶𑐳𑐾𑑄 𑐩𑐳𑑂𑐟𑐫𑑂 𑐖𑑂𑐫𑐵𑐏𑑄𑐟𑐎
𑑑) 𑐂𑐴𑐷𑐥𑐵
𑑒) 𑐢𑑁𑐰𑐖𑐷 𑐣𑐎𑑅𑐰𑐣𑐾
𑑓) 𑐳𑐶𑐔𑐸𑐥𑐵𑐮𑐸 𑐎𑑄𑐎𑐾𑐕𑑂𑐰𑐫𑑂
𑑔) 𑐑𑑂𑐫𑑅𑐰𑐖𑐶 𑐣𑐎𑑅𑐰𑐣𑐾
𑑕) 𑐩𑐔𑐵𑐧𑐹 𑐧𑑂𑐫𑑄𑐎𑐾
𑑖) 𑐩𑐔𑐵𑐧𑐹 𑐳𑑂𑐰𑐰𑐣𑐾
𑑗) 𑐩𑐔𑐵𑐧𑐹 𑐮𑐴𑑂𑐫𑐹 𑐴𑐫𑐾𑐐𑐸
𑑘) 𑐮𑐴𑐶𑐴𑐫𑐵 𑐥𑑂𑐫𑐣𑑂𑐴𑐸 𑐡𑐫𑐎𑐵
𑑙) 𑐥𑑂𑐫𑐹𑐔𑐵𑑄 𑐣𑑂𑐴𑐫𑐵𑐎𑑅𑐰𑐫𑐾𑐐𑐸
𑑑𑑐) 𑐖𑐵 𑐣𑐎𑐾𑐐𑐸
𑑑𑑑) 𑐣𑐶𑐡𑑄 𑐧𑐸𑐣𑑂𑐴𑐶
𑑑𑑒) 𑐎𑐫𑑂𑐟𑐵 𑐥𑐸𑐖𑐵
𑑑𑑓) 𑐂𑐴𑐶 𑐫𑐵𑐫𑐾𑐐𑐸
𑑑𑑔) 𑐧𑐵𑐴𑑂𑐬𑐵𑑅𑐟𑐫𑑂𑐐𑐸
𑑑𑑕) 𑐧𑐵𑐴𑑂𑐬𑐵𑑅 𑐕𑐸𑐰𑐣𑐾𑐐𑐸
𑑑𑑖) 𑐧𑐵𑐴𑑂𑐬 𑐥𑐶𑐎𑐵𑐫𑐾 𑐏𑐸𑐣𑑂𑐴𑐸
𑑑𑑗) 𑐣𑑂𑐴𑐶𑐎𑑄 𑐎𑐵𑐫𑐾, 𑐡𑐾𑐏𑐵 𑐎𑐵𑐫𑐾
𑑑𑑘) 𑐧𑑂𑐫𑐵𑐴𑐵 𑐫𑐵𑐫𑐾𑐐𑐸
𑐎) 𑐐𑑂𑐰𑐫𑐾 𑐧𑐶𑐫𑐾
𑐏) 𑐎𑐮𑑂𑐫𑐵𑑄 𑐣𑑂𑐴𑐫𑐵𑐎𑑅𑐰𑐣𑐾
𑐐) 𑐨𑑁𑐩𑐔𑐵 𑐎𑐵𑑅𑐰𑐣𑐾
𑐑) 𑐨𑑁𑐩𑐔𑐵 𑐥𑐶𑐟𑐧𑐶𑐫𑐾
𑐒) 𑐨𑑁𑐩𑐔𑐵 𑐰𑑂𑐴𑑄𑐎𑐾
𑐔) 𑐣𑐶𑐢𑑂𑐫𑐵𑐨𑐹
𑐕) 𑐌𑑄𑐖𑐮𑐵 𑐰𑐣𑐾
𑐖) 𑐖𑐶𑐮𑐵𑐖𑑄 𑐡𑐸𑐔𑐵𑐫𑐎𑐾
𑐗) 𑐨𑑁𑐩𑐔𑐵 𑐎𑐵𑐫𑐾𑐎𑐾 𑐕𑑂𑐰𑐫𑐾
𑐘) 𑐳𑐩𑑂𑐢𑐷 𑐳𑑂𑐰𑐵𑐫𑐾𑐐𑐸
𑐚) 𑐠𑐵𑐫𑑂𑐥𑐵 𑐮𑐸𑐫𑐾 –𑐣𑐵𑐫𑑅 𑐮𑐸𑐫𑐾)
𑐛) 𑐧𑐸𑐝𑐵𑐧𑐸𑐝𑐷 𑐖𑐣𑑂𑐎𑑀

𑐳𑐷𑐢𑐸𑑄𑐎𑐵𑑅 𑐫𑐵𑐫𑐾 𑐩𑐵𑑅𑐐𑐸 𑐎𑑂𑐬𑐶𑐫𑐵
𑑑) 𑐳𑐶𑐠𑑄 𑐫𑐾𑑄𑐎𑐾𑐐𑐸
𑑒) 𑐔𑐶𑐥𑑄 𑐠𑐶𑐎𑑅 𑐰𑐫𑐾
𑑓) 𑐦𑐸𑐎𑐷 𑐰𑐵𑐎𑐵𑐫𑑂𑐥𑐶𑐳𑑄 𑐟𑐫𑐾𑐴𑐂𑐐𑐸
𑑔) 𑐰𑐶𑐔𑐵 𑐰𑐫𑐾
𑑕) 𑐮𑑀𑐔𑐵𑑅 𑐰𑐫𑐾
𑑖) 𑐮𑑀𑐔𑐵 𑐰𑐖𑐷𑐣𑐫𑐾
𑑗) 𑐣𑑂𑐴𑐾𑐣𑑂𑐴𑐸𑐩𑐵 𑐟𑐫𑐾
𑑘) 𑐡𑐹𑐧𑑂𑐫𑑄𑐎𑑅 𑐰𑐣𑐾
𑑙) 𑐑𑑅𑐳𑐹
𑑑𑑐) 𑐣𑐷 𑐥𑑂𑐫𑑄 𑐠𑐫𑑂𑐐𑐸 𑐧𑐬𑑂𑐏𑐶 𑐔𑑂𑐰𑐣𑐾𑐐𑐸 𑐦𑐸𑐎𑐾 𑐫𑐵𑐫𑐾𑐐𑐸
𑑑𑑑) 𑐮𑐟𑑂𑐫𑐵
𑑑𑑒) 𑐎𑐸𑐮𑐵𑐑 𑐫𑐵𑐫𑐾𑐐𑐸
𑑑𑑓) 𑐮𑐫𑑂𑐥𑑂𑐥𑑄 𑐠𑐫𑐾𑐐𑐸
𑑑𑑔) 𑐏𑐸𑐮𑐵 𑐟𑐶𑐠𑐶
𑑑𑑕) 𑐡𑐎𑐶𑐮𑐵 𑐟𑐶𑐠𑐶
𑑑𑑖) 𑐥𑐵𑐴𑐵𑑃 𑐧𑑂𑐰𑐣𑐾
𑑑𑑗) 𑐣𑐶𑐡𑑄𑐫𑐵 𑐟𑐶𑐠𑐶

𑐩𑐔𑐵 𑐥𑑂𑐰𑐵𑐠𑐫𑑂 𑐡𑐸𑐳𑐵𑐣𑐶𑐳𑐾𑑄 𑐫𑐵𑐂𑐐𑐸 𑐰𑑂𑐫𑐰𑐴𑐵𑐬
𑐳𑑄𑐳𑑂𑐎𑐺𑐟𑐶 𑐰 𑐳𑑄𑐳𑑂𑐎𑐵𑐬
𑐥𑐸𑑄 𑐳𑐩𑐸𑐡𑐵𑐫𑐮𑐫𑑂 𑐣𑑂𑐴𑐫𑐵𑐎𑐵𑐰𑐫𑐵𑐔𑑂𑐰𑑄𑐐𑐸 𑐠𑐷 𑐠𑐷 𑐎𑐠𑑄𑐫𑐵 𑐳𑑄𑐳𑑂𑐎𑐺𑐟𑐷 𑐰 𑐳𑑄𑐳𑑂𑐎𑐵𑐬 𑐕𑐳𑐶𑐎𑐠𑑄 𑐠𑐸𑐎𑐠𑑄 𑐡𑐸 :-

𑐢𑑁𑐧𑐖𑐶 𑐣𑐎𑐾𑐐𑐸
𑐩𑑂𑐴𑐫𑐵𑐫𑑂𑐩𑐔𑐵𑐫𑐵 𑐥𑑂𑐰𑐵𑐠𑐫𑑂 𑐡𑐫𑐵 𑐩𑐔𑐵 𑐧𑐸𑐂𑐐𑐸 𑐃 𑐣𑑂𑐴𑐫𑑅𑐣𑐾 𑐠𑑂𑐫𑐣 𑐎𑐶 𑐠𑑅 𑐕𑐾𑑄𑐫𑑂 𑐳𑐟𑐵 𑐰𑐵 𑐠𑑅𑐕𑐾𑑄𑐫𑑂 𑐰𑐂𑐧𑐮𑐾 𑐢𑑁𑐧𑐖𑐶 𑐣𑐎𑐾𑐐𑐸 𑐔𑐮𑐣 𑐡𑐸 𑑋 𑐥𑑂𑐰𑐵𑐠𑐫𑑂 𑐡𑐸𑐩𑑂𑐴 𑐩𑐶𑐳𑐵 𑐠𑑅𑐕𑐾𑑄𑐫𑑂 𑐔𑑂𑐰𑐣𑐵 𑐩𑐔𑐵 𑐧𑐸𑐂𑐎𑐾 𑐩𑐖𑑂𑐫𑐹𑐐𑐸 𑐔𑐮𑐣 𑐡𑐸 𑑋 𑐩𑐔𑐵 𑐧𑐸𑐂𑐐𑐸 𑐃 𑐖𑐸𑐂 𑐢𑐸𑑄𑐎𑐸𑐩𑑂𑐴 𑐰𑐵 𑐔𑑂𑐫𑐵𑐮𑐵 𑐦𑐸𑐣𑐵 𑐐𑐸𑐮𑐵𑐫𑑂 𑐎𑐾𑐣𑐾𑐰𑑄 𑐠𑑅𑐕𑐾𑐫𑑂𑐥𑐶𑑄𑐳 𑐢𑑁𑐧𑐖𑐶 𑐣𑐎𑑅 𑐰𑐣𑐾𑐐𑐸 𑐔𑐮𑐣 𑐣𑑄 𑐡𑐸 𑑋
𑐢𑑁𑐧𑐖𑐶 𑐣𑐎𑐷𑐐𑐸 𑐏𑐸𑐣𑑂𑐴𑐳 𑐖𑑂𑐰𑐮𑑄 𑐎𑑂𑐰𑐫𑑂 𑐣𑑂𑐴𑐫𑐠𑐣𑐵𑐐𑐸 𑐡𑐸 𑑅
𑐎) 𑐮𑐵𑐐𑑂𑐰 𑐏) 𑐮𑐥𑐷 𑐐) 𑐐𑑂𑐰𑐵𑑅 𑐑) 𑐩𑑀𑐳𑐶𑐥𑑂𑐰𑑅 𑐒) 𑐧𑐖𑐶
𑐔) 𑐩𑐬𑐶 𑐕) 𑐫𑑀𑐩𑐴𑑂𑐬𑐶 𑐖) 𑐳𑐶𑐳𑐵𑐧𑐸𑐳𑐵
𑐗) 𑐢𑑁 𑐰 𑐩𑑂𑐴𑐫𑐵𑐫𑑂𑐩𑐔𑐵𑐫𑐵𑐟 𑐫𑑅 𑐫𑑅 𑐐𑐸 𑐣𑐳𑐵

𑐳𑐶𑐔𑐸𑐥𑐵𑐮𑐸 𑐎𑑄𑐎𑐾𑐐𑐸
𑐩𑐔𑐵 𑐧𑐸𑐃𑐧𑐮𑐫𑑂 𑐩𑐵𑐎𑑂𑐰 𑐐𑑂𑐰𑐵𑐴𑐵𑐮𑐷 𑐡𑐶𑐡𑐷 𑐀𑐖𑐶𑑄 𑐫𑐵𑐂 𑑋 𑐡𑐶𑐡𑐷 𑐀𑐖𑐶𑐫𑐵𑐟 𑐣𑐾𑐰𑐵𑑅 𑐳𑐩𑐵𑐖𑐫𑑂 𑐕𑐩𑑂𑐴 𑐀𑐖𑐶𑐩𑐵𑐡𑑂𑐫𑑅𑐫𑐵 𑐥𑑂𑐬𑐟𑐶𑐎 𑐎𑐠𑑄 𑐴𑐣𑐵 𑐰𑐫𑐵 𑐔𑑂𑐰𑑄𑐐𑐸 𑐡𑐸 𑑋 𑐩𑐔𑐵 𑐧𑐸𑐂𑐰𑑄 𑐩𑐔𑐵𑐧𑐸𑐐𑐸 𑐕𑐾𑑃 𑐣𑑄 𑐩𑐶𑐳𑐵𑐫𑐵 𑐠𑑅 𑐕𑐾𑑃𑐫𑑂 𑐩𑐔𑐵𑐧𑐸𑐐𑐸 𑐢𑐿𑐐𑐸 𑐧𑐸𑑃𑐏𑑄 𑐎𑑄𑐎𑐾 𑐕𑑂𑐰𑐫𑐾𑐟 𑐳𑐶𑐳𑐵𑐥𑐵𑐮𑐸 𑐎𑑂𑐫𑑄𑐎𑐾𑐐𑐸 𑐢𑐵𑐂 𑑋 𑐮𑐩𑐶 𑐳𑐶𑐳𑐵𑐥𑐵𑐮𑐸 𑐖𑑂𑐰𑐮𑑄 𑐖𑑂𑐰𑐣𑐵 𑐩𑐶𑐳𑐵𑐫𑐵 𑐠𑑅𑐕𑐾𑑃𑐫𑑂 𑐎𑑂𑐫𑑄𑐰𑐣𑐾𑐐𑐸 𑐔𑐮𑐣 𑐡𑐸 𑑋 𑐳𑐶𑐳𑐵𑐥𑐵𑐮𑐸 𑐖𑑂𑐰𑐮𑑄 𑐎𑑂𑐰𑐫 𑐣𑑂𑐴𑐠𑐣𑐵𑐐𑐸 𑐡𑐸 𑑅
𑐎𑐵𑐫𑑂𑐧𑐹𑐳𑐵 𑐩𑑂𑐴𑐵𑐫𑑂𑐧𑐹𑐳𑐵
𑐎) 𑐔𑐵𑐎𑐸 𑑑 𑐐𑑂𑐰𑐵𑐬𑐵 𑐎) 𑐔𑐵𑐎𑐸 𑑑÷𑑒 𑐐𑑂𑐰𑐵𑐬𑐵
𑐏) 𑐃𑐩𑐹 𑑑 𑐩𑐵𑐣𑐵 𑐏) 𑐃𑐩𑐹 𑑑÷𑑒 𑐩𑐵𑐣𑐵
𑐐) 𑐔𑐶 𑑑 𑐩𑐣𑐵 𑐐) 𑐔𑐶 𑑑÷𑑒 𑐩𑐣𑐵
𑐑) 𑐥𑐵𑐮𑐸 𑑑 𑐎𑐵𑐫𑑄𑑂 (𑐟𑑅𑐎𑐵𑐐𑐸) 𑐑) 𑐥𑐵𑐮𑐸 𑑑÷𑑒 𑐎𑐵𑐫𑑂𑐐𑐸

𑐠𑑅 𑐕𑐾𑑃𑐫𑐥𑐶𑑄𑐳 𑐳𑐶𑐔𑐸𑐥𑐵𑐮𑐸 𑐖𑑂𑐰𑐮𑑄 𑐳𑑂𑐰𑐫𑐵 𑐎𑐵𑐫𑐾 𑐰𑐵 𑐩𑑂𑐴𑐫𑐵𑐫𑑂 𑐧𑐸𑐐𑐸 𑐳𑐶𑐂𑐎𑐵 𑐐𑐸𑐮𑐶 𑐳𑐶𑐔𑐸𑐥𑐵𑐮𑐸 𑐖𑑂𑐰𑐣𑐵𑐰𑐐𑐸 𑐏 𑐄𑐮𑐶 𑐴𑐾 𑐳𑐵𑐫𑐵 𑐕𑑂𑐰𑐫𑐾𑐩𑐵𑑅 𑑋 𑐩𑐔𑐵𑐧𑐸𑐐𑐹 𑐕𑐾𑑃 𑐰 𑐦𑐸𑐎𑐶 𑐏𑐮𑐎𑐫𑑂 𑐩𑐔𑐵 𑐧𑐹 𑐏𑐹𑐣𑑂𑐴𑐹 𑐣𑐶𑐳𑐾 𑐩𑐔𑐵 𑐧𑐹 𑐩𑐧𑑂𑐫𑐎𑐸𑐟𑐮𑐾 𑐕𑐾𑑃 𑐰 𑐩𑑂𑐴 𑐱𑐸𑐡𑑂𑐢 𑐩𑐖𑐸 𑐢𑐵𑐂 𑑋 𑐠𑐸𑐐𑐸 𑐃 𑐫𑐵𑐟 𑐖𑐫𑐰𑐶𑐮𑐶 𑐎𑑂𑐫𑑄 𑐢𑐵𑐫𑐾𑐐𑐸 𑐔𑐮𑐣 𑐡𑐸 𑑋
𑐫𑐾𑑃 𑐫𑐵 𑐔𑐮𑐣 𑐎𑐠𑑄 𑐖𑐷𑐦𑑀 𑑑 𑐐𑑅 𑐑𑑂𑐫𑑀 𑑑 𑐥𑐵𑐄 𑐣𑑄 𑐟𑐫𑐵 𑐫𑐾𑐎𑐾𑐐𑐸 𑐖𑐸𑐮 𑑋 𑐎𑐵𑐫𑑂 𑐧𑐸𑐳𑐵𑑄 𑐩𑑂𑐴𑐫𑐵𑐫 𑐧𑐸𑐳𑐵𑑄 𑐎𑐵𑐫𑑂 𑐧𑐸𑐐𑐸 𑐠𑐾𑑄 𑐟𑐫𑐾𑐩𑐵 𑐟𑐬 𑐩𑑂𑐴𑐫𑐵𑐫 𑐧𑐹𑐳𑐵 𑐔𑐵𑐎𑐸 𑐣𑐶𑐎𑐹𑑅 𑐠𑐮𑐵 𑐣𑐶𑐎𑐸𑐟𑐶𑑄 𑐟𑐫𑐵 𑐕𑑂𑐰𑐾𑐫𑑂𑐐𑐸 𑐔𑐮𑐣 𑐡𑐸 𑑋

𑐑𑑂𑐫𑑅𑐧𑐖𑐶 𑐣𑐎𑑅 𑐰𑐣𑐾𑐐𑐸
𑐩𑐔𑐵 𑐧𑐸𑐐𑐹𑐫𑐵 𑐕𑐣𑑂𑐴𑐹 𑐰𑐵 𑐣𑐶𑐣𑑂𑐴𑐹 𑐮𑐶𑐥𑐵 𑐠𑑅𑐕𑐾𑑄𑐥𑐵𑐏𑐾 𑐑𑑂𑐫𑑅 𑐰 𑐧𑐖𑐶 𑐖𑑂𑐰𑐣𑐵 𑐩𑐔𑐵𑐧𑐹 𑐳𑑂𑐰𑐰𑐣𑐾𑐐𑐸𑐫𑐵𑐟 𑐴𑐾 𑐑𑑂𑐫𑑅 𑐧𑐖𑐶 𑐣𑐎𑑅 𑐰𑐣𑐾𑐐𑐸 𑐢𑐵𑐃 𑑋 𑐑𑑂𑐫 𑐧𑐖𑐶 𑐣𑐎𑑅 𑐰𑐣𑐾𑐐𑐸 𑐖𑑂𑐫𑐵 𑐡𑐟𑐮𑐾 𑐦𑐟𑐮𑐾 𑐩𑐔𑐵 𑐧𑐹𑐩𑑂𑐴𑐾𑐳𑐶𑐫𑐵 𑐩𑐵𑑄 𑐴𑐾 𑐰𑐣𑐷𑐐𑐸 𑐔𑐮𑐣 𑐡𑐸 𑑋 𑐖𑑂𑐰𑐣𑐵 𑐰𑐣𑐾𑐐𑐸 𑐖𑑂𑐰𑐮𑑄 𑐎𑑂𑐰𑐫𑑂 𑐣𑑂𑐴𑐠𑐣𑐵𑐎𑐠𑑄 𑐡𑐸 𑑅
𑐎) 𑐑𑑂𑐫𑑅 𑐮𑐫𑑂 𑐳𑐶𑐫𑐵 𑐧𑐖𑐷 𑐏) 𑐳𑐾𑐎𑐶 𑐧𑐖𑐶 𑐐) 𑐑𑑂𑐫
𑐑) 𑐔𑐵𑐎𑐸 𑑑 𑐐𑑂𑐰𑐵𑐬𑐵
𑐂𑐩𑐶𑐟 𑐎𑑁𑐮𑐵 𑐫𑐵𑐎𑐵 𑐴𑐫𑑂 𑐩𑐵𑑅 𑑋

𑐥𑐶 𑐢𑑂𑐫𑑄𑐎𑐾𑐐𑐸
𑐩𑐔𑐵𑐧𑐹 𑐧𑑂𑐫𑑄𑐎𑐾 𑐕𑐣𑑂𑐴𑐹 𑐣𑑂𑐴𑐫𑑅 𑐩𑐔𑐵𑐫𑐵 𑐥𑐶 𑐢𑑂𑐫𑑄𑐎𑐾𑐐𑐸 𑐔𑐮𑐣 𑐡𑐸 𑑋 𑐠𑑂𑐰 𑐕𑐾𑑃𑐫𑑂 𑐩𑐔𑐵 𑐧𑐸𑐂𑐧𑐮𑐾 𑐖𑐎 𑐫𑐵𑐃 𑑋 𑐥𑐶 𑐢𑑂𑐫𑑄𑐎𑑅 𑐰𑐩𑑂𑐴𑑅𑐫𑐵𑐟 𑐡𑐳𑑂𑐟𑐸𑐬 𑐧𑐶𑐂𑐩𑐵𑑅 𑑋 𑐠𑑁𑑄 𑐎𑐣𑑂𑐴𑐫𑑂 𑐀𑐥𑑂𑐥𑑀 𑐀𑐳𑑂𑐥𑐟𑐵𑐮𑐫𑑂 𑐩𑐔𑐵 𑐧𑐸𑐂𑐎𑐾𑐐𑐸𑐮𑐷𑑄 𑐧𑐹𑐂𑐳𑐵𑐟𑐎𑐷 𑐴𑐾 𑐥𑐶 𑐢𑑂𑐫𑑄𑐎𑐾𑐂 𑑋

𑐩𑐔𑐵𑐧𑐹 𑐧𑑂𑐫𑑄𑐎𑐾𑐐𑐹
𑐩𑐔𑐵𑐧𑐹𑐐𑐸 𑐥𑑂𑐫𑐣𑑂𑐴𑐹 𑐰𑐵 𑐏𑐸𑐣𑑂𑐴𑐸 𑐡𑐫𑐾𑐎𑐵 𑐩𑐔𑐵𑐧𑐹 𑐧𑑂𑐫𑑄𑐎𑐾𑐐𑐸 𑐖𑑂𑐫𑐵 𑐫𑐵𑐂 𑑋 𑐠𑑂𑐰 𑐏𑐸𑐣𑑂𑐴𑐸 𑐕𑐾𑑄 𑐕𑐏𑐵 𑐣𑐷 𑐳𑐷 𑐫𑐵𑐣𑐵 𑐕𑐾𑑃 𑐖𑑅 𑐰 𑐦𑐸𑐎𑐶 𑐏𑐮𑑅 𑐧𑑁 𑐣𑑄 𑐳 𑐏𑐵𑐣𑐵 𑐮𑐸𑐳𑐶 𑐠𑐶𑐂𑐎𑐵 𑐰 𑐩𑐶𑐳𑐵𑐥𑐶𑐣𑐶 𑐮𑐸𑐳𑐶 𑐠𑐶𑐂𑐎𑐵 𑐳𑐎𑐳𑑂𑐫𑐵 𑐩𑑂𑐰𑑅𑐮𑑂𑐴𑐹𑐫𑐵 𑐣𑐶𑐳𑐷 𑐫𑐵𑐫𑐾𑐩𑐵 𑑋 𑐩𑐔𑐵𑐧𑐸𑐩𑑂𑐴𑐳𑐶𑐫𑐵 𑐠𑑅𑐕𑐾𑑃 𑐩𑐵𑑄𑐩𑑂𑐴 𑐎𑑂𑐰𑐫𑑂 𑐣𑑂𑐴𑐠𑐣𑐵𑐐𑐸 𑐧𑑂𑐫𑑄𑐎𑐾𑐐𑐸 𑐖𑑂𑐰𑐮𑑄 𑐖𑑂𑐰𑐣𑐵 𑐠𑑂𑐫𑑄𑐎𑐾𑐩𑐵 𑑅
𑐎) 𑐎𑑀𑐟𑑅 𑐏) 𑐩𑐔𑐵𑐫𑐵𑐟 𑐰𑐳𑑅 𑐐) 𑐩𑐔𑐵𑐫𑐵𑐟 𑐮𑐵𑐳𑐵, 𑐦𑐵𑑄𑐐𑐵, 𑐦𑐸𑐐𑑅
𑐑) 𑐩𑐔𑐵𑐎𑐠𑐶 𑐩𑐔𑐵𑐎𑐠𑐶 𑐔𑑂𑐰𑐎𑐵𑐫𑑂 𑐎𑐵𑐫𑑂𑐖𑐸𑐳𑐵 𑐔𑐣𑑂𑐡𑑂𑐬𑐳𑐹𑐬𑑂𑐫 𑐒) 𑐁𑐖𑐳𑐮𑐵
𑐩𑑂𑐴𑐫𑐵𑐫𑑂𑐖𑐸𑐳𑐵 𑐣𑑂𑐴𑐵𑐫𑐎 𑐳𑐶𑐣𑑂𑐴 𑐩𑐹 𑐔𑐶𑐟𑑂𑐬 𑐔𑑂𑐰𑐎𑐵 𑐣𑑂𑐴𑐫𑑂𑐰𑐳𑐵𑐫𑐵 𑐔) 𑐖𑐵𑑅 𑐣𑐎𑑂𑐫𑐸 𑐧𑐵𑐚𑐵
𑐬𑐸𑐥𑐾 𑐏𑐵𑐂𑐐𑐸 𑐔𑐮𑐣 𑐡𑐸 𑑋
𑐕) 𑐖𑐵𑐎𑐶 𑐖) 𑐟𑐶 𑐏𑑀𑐮𑐵 𑐗) 𑐔𑐶𑐎𑑄
𑐘) 𑐀𑑄𑐐𑐸 𑐚) 𑐮𑐸𑑃 𑐃𑐔𑐵 𑐛) 𑐰 𑐃𑐔𑐵
𑐜) 𑐩𑐵𑐩𑑂𑐴𑐾𑐳𑐶𑐟 𑐔𑐶𑐎𑐣𑐾 𑐔𑑂𑐰𑐣𑐾𑐐𑐸 𑐰𑐳𑑅 𑐝) 𑐳𑐐𑑄𑐮𑐫𑑂 𑐡𑐾𑐫𑑂𑐕𑐵𑐫𑐐𑐸 𑐰𑐳𑑅
𑐞) 𑐖𑐶𑐮𑐵𑐖𑑄 𑐫𑐵𑐟 𑐎𑐵𑐥 𑐟) 𑐩𑐾𑑄 𑐕𑑂𑐫𑑀𑑄 (𑐎𑐵𑐫𑑂𑐧𑐸𑐳𑐵 𑐕𑐐 𑐰 𑐩𑑂𑐴𑐵𑐫𑑂 𑐧𑐹𑐳𑐵 𑐧𑐵𑐐𑑅)
𑐠) 𑐨𑑂𑐰𑐫𑑂 𑐖𑑂𑐰𑐮𑑄 𑐰 𑐡) 𑐎𑑂𑐰𑐵𑐚𑐶𑐰𑐵𑐳𑑅 𑑑 𑐥𑐵𑐄

𑐣𑑂𑐴𑐹𑐐𑐸 𑐰𑐶𑐢𑐶 𑐰𑑂𑐫𑐰𑐴𑐵𑐬 𑐎𑐠𑑄 𑐩𑑂𑐫𑐾 𑐕𑑂𑐫𑑀𑑄 𑐫𑐾𑑄𑐎𑐾 𑐩𑑂𑐰𑐵𑐐𑐸 𑐖𑐸𑐐𑐸 𑐡𑐸 𑑋
𑐡𑐶𑐡𑐷 𑐀𑐖𑐶 𑐩𑐔𑐵𑐧𑐸𑐩𑑂𑐴 𑐡𑐾𑐣𑐵𑐔𑑂𑐰𑑄𑐐𑐸 𑐦𑐸𑐎𑑂𑐎 𑐳𑐸, 𑐳𑐸𑐔𑐸𑐎𑐵 𑐕𑑂𑐰𑐫𑐾𑐎𑐵 𑐕𑑂𑐰𑐂 𑑋 𑐩𑐔𑐵𑐧𑐸𑐩𑑂𑐴 𑐕𑐫𑑂𑐮𑐵 𑐔𑑂𑐰𑑄𑐐𑐸 𑐠𑐮𑐧𑐮, 𑐩𑐵𑐩𑑂𑐴 𑐰 𑐩𑐔𑐵𑐫𑐵𑐟 𑐩𑐶 𑐥𑑄𑐎𑐶𑐂 𑑋 𑐩𑐔𑐵𑐧𑐸𑐩𑑂𑐴𑐳𑐶𑐟 𑐩𑑀𑐮𑑂𑐴𑐸𑐎𑐵 𑐣𑑂𑐴𑐹𑐐𑐸 𑐰𑐳𑑅 (𑐠𑑅 𑐕𑐾𑑃 𑐣 𑐴𑐐𑐸) 𑐥𑐸𑑄𑐎𑐾𑐐𑐸 𑐖𑑂𑐫𑐵 𑐖𑐸𑐂 𑑋 𑐡𑐶𑐡𑐷 𑐀𑐖𑐶𑑄 𑐎𑐸𑐮𑐵𑐧𑑂𑐰 𑐳𑑂𑐰𑐣𑐵𑑅 𑐧𑑂𑐰 𑐳𑑂𑐰𑐧𑑂𑐰 𑐟𑐫𑐵 𑐕𑑂𑐰𑐵𑐳𑑅 𑐀𑐖𑐶𑐩𑐵 𑐥𑐹𑐖𑐵 𑐫𑐵𑐂 𑑋 𑐁𑐐𑑄 𑐧𑑂𑐰, 𑐖𑑂𑐫𑑀𑐣𑐵 𑐮𑐥𑑂𑐟𑐾 𑐰𑐵 𑐥𑐵𑑅 𑐮𑐥𑑂𑐟𑐾 𑑑𑑒 𑐧𑑂𑐰 𑐟𑐫𑐵 𑐥𑐶𑐣𑐾 𑐩𑐔𑐵𑐟𑐫𑑂𑐟 𑐃𑐣𑐵 𑐧𑐶𑐂 𑑋 𑐠𑑅𑐕𑐾𑑃 𑐣𑑄 𑐴𑐐𑐸 𑐎𑑀𑐟𑐮𑑄 𑐩𑐵𑐩𑑂𑐴, 𑐧𑑁𑐩𑑂𑐴, 𑐩𑐔𑐵𑐫𑐵𑐟 𑐕𑐾𑑃 𑐫𑐵 𑐠𑐵𑐎𑐸𑐮𑐶 𑐣𑐎𑐶𑐣𑑄 𑐥𑐹𑐖𑐵 𑐫𑐵𑐣𑐵 𑐢𑑁 𑐳𑐐𑑄 𑐧𑐶𑐂 𑑋 𑐡𑐶𑐡𑐷 𑐀𑐖𑐶𑑄 𑐧𑑁𑐩𑑂𑐴𑐳𑐶𑐟 𑐡𑐎𑑂𑐲𑐶𑐞𑐵 𑐕𑐵𑐫𑑂𑐎𑐵𑑅 𑐩𑐔𑐵 𑐮𑑅 𑐮𑑂𑐴𑐵𑐂 𑑋 𑐠𑐸𑐮𑐶 𑐳𑐶𑐢𑑂𑐫𑐰𑑄 𑐳𑐎𑐳𑐶𑐟𑑄 𑐎𑑁𑐮𑐵 𑐫𑐵𑐎𑐶𑐂 𑑋 𑐦𑐸𑐎𑐶𑐧𑐵𑐎𑐵𑐫𑑂 𑐣𑐵𑐥𑑄 𑐳𑐎𑐳𑐶𑐟𑑄 𑐨𑑂𑐰𑐫𑑂 𑐣𑐎𑐾𑐩𑐵𑑅 𑑋

𑐩𑐔𑐵𑐧𑐹 𑐳𑑂𑐰𑐰𑐣𑐾𑐐𑐸
𑐩𑐔𑐵𑐧𑐸 𑐗𑐶𑐣𑐶𑐣𑑂𑐴𑐹, 𑐧𑐵𑐕𑐶𑐟𑐶 𑐡𑐸𑐳𑐵𑑄𑐣𑐶𑐳𑐾 𑐠𑑅𑐕𑐾𑑄𑐫𑑂 𑐮𑐴𑐶𑐎, 𑐩𑐰𑐟𑐮𑐾 𑐩𑐶𑐖𑑄𑐫𑐵 𑐳𑑂𑐫𑐵𑐥𑐶 𑐠𑑅𑐠𑐶𑐟𑐶𑐥𑐶 𑐰 𑐩𑐔𑐵𑐧𑐹𑐩𑑂𑐴𑐾𑐳𑐶𑐫𑐵 𑐳𑑂𑐫𑐵𑐥𑐶𑑄 𑐠𑑅 𑐠𑐶𑐟𑐶𑐥𑐶𑑄 𑐩𑐔𑐵𑐫𑐵𑐟 𑐕𑐵𑐫𑐾𑐟 𑐖𑐵𑐎𑐶, 𑐡𑐎𑑂𑐲𑐶𑐞𑐵, 𑐔𑐶𑐎𑑄 𑐰 𑐩𑐔𑐵𑐧𑐸𑐩𑑂𑐴𑐾𑐳𑐶𑐟 𑐧𑐖𑐶, 𑐔𑐸𑑄𑐮𑐵, 𑐠𑑂𑐰, 𑐑𑑂𑐫𑑅 𑑑 𑐥𑐵𑐅 𑐔𑐵𑐎𑐸 𑐕𑐐𑑂𑐰𑐵𑐬𑐵, 𑐠𑑂𑐰𑑄 𑐕 𑐑𑑁, 𑐖𑐵 𑐣𑐫𑐾𑐐𑐸 𑐰𑐵𑐟𑐵𑐫𑑂 𑐖𑐵𑐎𑐶, 𑐩𑐬𑐶 𑐖𑑂𑐰𑐣𑐵 𑐩𑐔𑐵𑐧𑐹 𑐳𑑂𑐰𑐰𑐣𑐾𑐐𑐸 𑐔𑐮𑐣 𑐡𑐸 𑑋 𑐳𑑄𑐩𑑂𑐢𑐶 𑐏𑐮𑐫𑐵𑐟 𑐎𑑁𑐮𑐵 𑐫𑐵𑐎𑐵𑑅 𑐨𑑂𑐰𑐫𑑂 𑐣𑐎𑐵 𑐕𑑂𑐰𑐂𑐐𑐸 𑐔𑐮𑐣 𑐡𑐸 𑑋

𑐩𑐔𑐵𑐧𑐹 𑐮𑐴𑐶𑐎𑐾𑐐𑐸
𑐩𑐔𑐵𑐧𑐹𑐐𑐸 𑐧𑐵𑐕𑐶 𑐣𑐷𑐣𑑂𑐴𑐹𑐟𑐶 𑐡𑐫𑐾𑐎𑐵 𑐠𑑅𑐕𑐾𑐥𑐵𑐏𑐾𑑄 𑐎𑑂𑐰𑐫𑑂 𑐣𑑂𑐴𑑂𑐠𑐣𑐵𑐐𑐸 𑐖𑑂𑐰𑐮𑑄 𑐟𑐵𑐮𑐵𑐎𑐵 𑐩𑐔𑐵𑐧𑐹
𑐳𑑂𑐰𑐰𑐣𑐶 𑑋 𑐩𑐔𑐵𑐰𑐸 𑐮𑐔𑑂𑐕𑐶 𑐩𑐡𑐸𑐣𑐶𑐧𑐮𑐫𑑂 𑐩𑐔𑐵𑐧𑐸𑐩𑑂𑐴 𑐩𑑂𑐴𑐫𑐵𑐫𑑂𑐩𑐔𑐵𑐫𑐵𑐟 𑐠𑑅𑐕𑐾𑐫𑑂 𑐮𑐴𑐶𑐫𑑄𑐎𑐷 𑑋 𑐠𑑅𑐕𑐾𑐫𑑂 𑐮𑐎𑑂𑐲𑐷 𑐣𑐶𑐳𑐾𑑄 𑐣𑐶𑐮𑐵𑐟𑐎 𑐮𑐴𑐶𑐐𑐸 𑐔𑐮𑐣 𑐡𑐸 𑑋
𑐎) 𑐧𑐖𑐶 𑐏) 𑐔𑐸𑑄𑐮𑐵 𑐐) 𑐑𑑂𑐫𑑅 𑐑) 𑐔𑐵𑐎𑐸
𑐒) 𑐠𑑂𑐰𑑄 𑐔) 𑐖𑐵𑐎𑐶 𑐕) 𑐔𑐶𑐎𑑄
𑐩𑐵𑐖𑐸𑐩𑑂𑐴 𑐩𑐔𑐵𑐧𑐹𑐩𑑂𑐴 𑐨𑑁 𑐳𑑂𑐰𑐰𑐣𑐾𑐐𑐸
𑐠𑑅 𑐨𑑁 𑐠𑑅𑐕𑐾 𑐮𑐴𑐶𑐫𑑄𑐎𑐵 𑐥𑑂𑐫𑐣𑑂𑐴𑐹 𑐡𑐸 𑐏𑐸𑐣𑑂𑐴𑐸 𑐩𑐔𑐵𑐧𑐸𑐩𑑂𑐴 𑐨𑑁 𑐳𑑂𑐰𑐰𑐣𑐾𑐐𑐸 𑐔𑐮𑐣 𑐡𑐸 𑑋 𑐠𑑂𑐰 𑐏𑐸𑐣𑑂𑐴𑐸 𑐩𑐵𑐖𑐸𑐩𑑂𑐴 𑐎𑑂𑐰𑐫𑑂 𑐣𑑂𑐴𑐠𑐣𑐵𑐐𑐸 𑐖𑑂𑐰𑐮𑑄 𑐟𑐵𑐮𑐵𑐎𑐵 𑐖𑑂𑐰𑐣𑐵 𑐰𑐣𑐾𑐩𑐵 𑑋
𑐎) 𑐧𑐖𑐶 𑐏) 𑐔𑐸𑑄𑐮𑐵 𑐐) 𑐑𑑂𑐫
𑐑) 𑐔𑐵𑐎𑐸 𑐒) 𑐠𑑂𑐰𑑄 𑐔) 𑐖𑐵𑐎𑐶
𑐕) 𑐔𑐶𑐎𑑄 𑐖) 𑐢𑑁
𑐥𑑂𑐫𑐹𑐔𑐵 𑐣𑑂𑐴𑐔𑐵𑐎𑑅 𑐰𑐣𑐾𑐐𑐸
𑐠𑑅 𑐨𑑁 𑐠𑑅𑐕𑐾𑑃𑐫𑑂 𑐮𑐴𑐶𑐫𑐾𑑄𑐎𑐵 𑐧𑐵𑐕𑐶𑐟𑐶 𑐡𑐟𑐎𑐶 𑐠𑑅 𑐕𑐫𑑂𑐔𑐶𑐟 𑐮𑐸𑑃 𑐫𑐵𑐐𑐸 𑐥𑐶𑐄𑐔𑐵𑑄 𑐣𑑂𑐴𑐫𑐵𑐎𑑅 𑐰𑐣𑐾𑐐𑐸 𑐔𑐮𑐣 𑐡𑐸 𑑋
𑐣𑑂𑐴𑑂𑐫𑐵𑐥𑐣𑐫𑑂 𑐥𑑂𑐰𑐵𑑅 𑐏𑑄𑐎𑐶𑐐𑐸
𑐧𑐸𑐩𑑂𑐴 𑐩𑐔𑐵 𑐮𑑅𑐟𑑂𑐫𑐵 𑐣𑐶𑐳𑐾 𑐳𑑂𑐰𑐮𑐵𑑅𑐫𑐵 𑐡𑐸𑐣𑐾 𑐣𑑂𑐴𑐫𑐵𑐫𑑂𑐥𑐣𑐾 𑐥𑑂𑐰𑐵𑑅 𑐏𑑄𑐎𑐶 𑑋 𑐠𑑂𑐰 𑐩𑐶𑐖 𑐰 𑐩𑐶𑐳𑐵 𑐩𑐔𑐵 𑐖𑐸𑐳𑐵 𑐣𑑂𑐴𑐫𑐵𑐥𑐣𑐫𑑂 𑐥𑑂𑐰𑐵𑑅 𑐏𑑄𑐎𑐾𑐐𑐸 𑐔𑐮𑐣 𑐡𑐸 𑑋

𑐩𑐔𑐵 𑐖𑑄𑐎𑑂𑐰
𑐎𑐵𑐫𑑂𑐩𑐔𑐵 𑐖𑐹𑐳𑐵 𑐏𑐸𑐮𑐵𑑄 𑐰𑐵 𑐔𑑂𑐫𑐵𑐮𑐵𑑄, 𑐩𑑂𑐴𑐫𑐵𑐫𑑂𑐩𑐔𑐵 𑐖𑐹𑐳𑐵 𑐣𑑂𑐫𑐵𑐮𑐵𑑄 𑐰𑐵 𑐣𑑂𑐴𑐫𑑂𑐫𑐮𑐵𑑄 𑐩𑐔𑐵 𑐖𑑄𑐎𑑂𑐰 (𑐖𑐵 𑐣𑐎𑐾𑐐𑐸) 𑐫𑐵𑐃 𑐠𑑂𑐰 𑐏𑐸𑐣𑑂𑐴𑐹 𑐕𑐾 𑐕𑐏𑐵𑑄 𑐧𑑄 𑐠𑐶𑐮𑐵, 𑐦𑐸𑐎𑑂𑐎𑐳𑑂𑐫𑐵𑑄 𑐮𑐸𑐳𑐶 𑐠𑐶𑐃𑐎𑐵 𑐩𑑂𑐰𑑅 𑐮𑑂𑐴𑐹𑐂𑐫𑐵 𑐣𑐶𑐳𑐶 𑐫𑐵𑐂 𑑋 𑐠𑑅 𑐐𑐸𑐨𑐵𑐖𑐸𑑄 𑐥𑐹𑐖𑐵 𑐫𑐵𑐫𑐾 𑐳𑐶𑐢𑐫𑐾𑐎𑐵 𑐟𑐵𑐳𑐫𑐵 𑐮𑑄 𑐦𑐶𑐎𑐵𑑅, 𑐟𑐥𑐸𑐮𑐶𑑄 𑐥𑐸𑐂𑐎𑐵, 𑐟𑐸𑐟𑐶𑐃 𑐰𑐴𑐫𑐵 𑐎𑐮𑑂𑐮𑐶 𑐣𑑂𑐴𑐫𑐵𑐎𑐵, 𑐮𑑂𑐴𑐵𑐟𑐫𑑂 𑐥𑑄𑐔𑐬𑑄𑐐𑐫𑑂 𑐫𑐵 𑐔𑐸𑐮𑑂𑐫𑐵 𑐣𑑂𑐴𑐫𑐵𑐎𑐵, 𑐣𑑂𑐴𑐫𑐵𑐫𑑂𑐥𑐣𑐾 𑐮𑐸𑑃𑐫𑐵𑐐𑐸 𑐔𑐵𑑅𑐔𑐵 𑐳𑑂𑐰𑐶𑐂𑐎𑐵 𑐥𑐵𑐖𑐸𑑄 𑐩𑐔𑐵 𑐧𑐸𑐫𑐵 𑐐𑐞𑐾𑐡𑑂𑐫𑑅 𑐥𑐹𑐖𑐵 𑐫𑐵 𑐰𑐣𑐷 𑑋 𑐣𑐶𑐣𑐶𑐩𑑂𑐴𑑄 𑐐𑐞𑐾𑐡𑑂𑐫𑑅 𑐥𑐹𑐖𑐵 𑐫𑐵𑐂 𑑋 𑐕𑐾𑑃 𑐮𑐶𑐟 𑐴𑐫𑐵 𑐩𑐔𑐵𑐫𑐵𑐟 𑐢𑑁 𑐳𑑄𑐐, 𑐏𑐾𑑄 𑐳𑑄𑐐 𑐧𑐶𑐂 𑑋 𑐀𑐮𑐾 𑐠𑐵𑐫𑑂𑐧𑑂𑐰 𑐣𑑂𑐴𑐂𑐔𑑂𑐫𑐵𑐎𑐵𑑅 𑐥𑑄𑐔𑐐𑑂𑐬𑐵𑐳 𑐫𑐵𑐎𑐵𑑅 𑐠𑐵𑐫𑑂𑐧𑑂𑐰 𑐔𑐶𑐥𑑄 𑐠𑐶𑐎𑐶𑐂 𑑋 𑐠𑐵𑐎𑐸𑐮𑐶𑑄 𑐣𑐶𑐳𑐾𑑄 𑐕𑐳𑐷𑐎𑐠𑑄 𑐮𑐸𑑄𑐫𑐵 𑐀𑐳𑐬𑑂𑐦𑐷𑑄 𑐡𑐸𑐬𑐸 𑐖𑐵 (𑐏𑐷𑐬) 𑐟𑐸𑐫𑐵 𑐣𑐎𑐶𑐐𑐸 𑐔𑐮𑐣 𑐡𑐸 𑑋 𑐩𑐔𑐵𑐫𑐵𑐟 𑐡𑐸𑐬𑐸 𑐖𑐵𑑅 𑐣𑐎𑐾 𑐳𑐶𑐢𑐫𑑂𑐎𑐵 𑐳𑐎𑐳𑐶𑐫𑐵 𑐳𑐶𑐣𑑂𑐴 𑐟𑐶𑐣𑐵 𑐥𑐹𑐖𑐵 𑐡𑐶𑐎𑐶𑐂 𑑋 𑐳𑐎𑐳𑐶𑐟𑑄 𑐨𑑂𑐰𑐫𑑂 𑐣𑐎𑐷 𑑋
𑐩𑐔𑐵𑐫𑐵𑐟 𑐏𑑂𑐰𑐥𑐫𑑂 𑐫𑐵𑐎𑐾𑐐𑐸
𑐧𑐵𑑄𑐮𑐵𑑅𑐐𑐸 𑐮𑑂𑐰𑐐𑐸 𑐰 𑐄𑐥𑐫𑐸𑐎𑑂𑐟 𑐃 𑐳𑑂𑐰𑐫𑐵𑑅 𑐩𑐔𑐵𑐫𑐵𑐟 𑐏𑑂𑐰𑐥𑐫𑑂 𑐫𑐵𑐎𑐾𑐐𑐸 𑐣𑑄 𑐔𑐮𑐣 𑐡𑐸 𑑋 𑐠𑑂𑐰 𑐏𑑂𑐰𑐥𑐫𑑂 𑐫𑐵𑐎𑐾𑐐𑐸 𑐔𑐮𑐣 𑐥𑐬𑐩𑑂𑐥𑐬𑐵 𑐣𑐶𑐳𑐾𑑄 𑐡𑐸𑐐𑐸 𑐩𑐏𑐸𑐳𑐵𑑄 𑐮𑐶𑐥𑐵 𑐀𑐣𑐶𑐰𑐵𑐬𑑂𑐫 𑐬𑐸𑐥𑑄 𑐔𑐮𑐣 𑐫𑐵𑐣𑐵 𑐴𑐐𑐸 𑐏𑑅 𑑋 𑐠𑑂𑐰 𑐏𑑂𑐰𑐥𑐫𑑂 𑐩𑐫𑐵𑐎𑐮 𑐢𑐵𑐫𑑂𑐰 𑐩𑐳𑑂𑐟𑐫𑑂𑐎𑐾 𑐟𑑅𑐎𑐿 𑐰𑐂𑐐𑐸 𑐫𑐎𑑂𑐰 𑐳𑐩𑑂𑐨𑐵𑐰𑐣𑐵 𑐡𑐸 𑑋 𑐠𑑂𑐰 𑐩𑐳𑑂𑐟𑐫𑐟 𑐏𑑂𑐰𑐥𑐫𑑂 𑐫𑐵𑐎𑐶𑐃 𑐧𑐮𑐫𑑂 𑐕𑐐𑐸 𑐀𑐮𑐐 𑐴𑐾 𑐎𑐠𑑄 𑐥𑐹𑐖𑐵 𑐫𑐵𑐫𑐾𑐐𑐸 𑐔𑐮𑐣 𑐫𑐵𑐣𑐵 𑐟𑑅𑐐𑐸 𑐡𑐸 𑑋 𑐩𑐳𑑂𑐟𑐫𑐎𑐾 𑐟𑑅𑐎𑐿 𑐰𑐂𑐧𑐮𑐫𑑂 𑐀𑐠𑐾 𑐴𑐾 𑐥𑐹𑐖𑐵 𑐫𑐵𑐫𑐾𑐐𑐸 𑐔𑐮𑐣 𑐥𑐬𑐩𑑂𑐥𑐬𑐵 𑐣𑐶𑐳𑐾 𑐫𑐵𑐣𑐵 𑐟𑐐𑐸 𑐏𑑅 𑐄𑐐𑐸 𑐎𑐠𑑄𑐫𑐵 𑐥𑐹𑐖𑐵𑐫𑐟 𑐎𑐿𑐡𑑂𑐫𑑅 𑐥𑐹𑐖𑐵 𑐢𑐵𑐂 𑑋 𑐄𑐐𑐸 𑐎𑐿𑐡𑑂𑐫𑑅 𑐥𑐹𑐖𑐵 𑐫𑐵𑐃𑐧𑐮𑐫𑑂 𑐎𑐕𑑂𑐮𑐵 𑐩𑐵𑐖𑐸 𑐳𑐶𑐟𑐮𑐵 𑐩𑐵𑐖𑐸 𑐰 𑐧𑐕𑐮𑐵 𑐩𑐵𑐖𑐸 𑐣𑐵𑐫𑐵 𑐀𑐖𑐶𑐩𑐵 𑐡𑑂𑐫𑑅 𑐥𑐶𑐣𑑂𑐟 𑐥𑐹𑐖𑐵 𑐫𑐵𑐃𑐐𑐸 𑐏𑑅 𑑋 𑐀𑐠𑐾 𑐟𑑅 𑐎𑐿 𑐰𑐂𑐧𑐮𑐫𑑂 𑐎𑐿𑐡𑑂𑐫𑑅 𑐥𑐹𑐖𑐵 𑐫𑐵𑐫𑐾𑐐𑐸 𑐖𑑂𑐰𑐮𑑄 𑐎𑑂𑐰𑐫𑑂 𑐣𑑂𑐴𑐠𑐣𑐵 𑐎𑐠𑑄 𑐟𑐵𑑅 𑐮𑐵𑐎𑐾𑐩𑐵𑑅 𑑋
𑐎) 𑐐𑑂𑐰𑐦𑐸𑐎𑐷 𑐏) 𑐡𑐸𑐳𑐶𑐩𑐬𑐷 𑐐) 𑐎𑑀𑐮𑐳𑐶𑐫𑐵 𑐑) 𑐧𑑂𑐫𑐵𑑃𑐔𑐵 𑐳𑐸𑐏𑐸𑐮𑐵
𑐒) 𑐩𑐶𑐱𑑂𑐬𑐷 (𑐣𑐰𑐵) 𑐔) 𑐏𑐩𑐵𑐫𑐔𑐵 𑐑𑐵𑐫𑑂 𑐕) 𑐳𑐶𑐳𑐷𑐫𑐵 𑐮𑐥𑑂𑐟𑐾
𑐖) 𑐳𑐶𑐳𑐶𑐮𑐥𑑂𑐟𑐾𑐫𑐵 𑐥𑑄𑐏𑐵 𑐗) 𑐔𑐶𑐐𑑂𑐰𑑅 𑐎𑐫𑑂𑐐𑐸 𑐦𑑂𑐰𑐫𑐵 𑐘) 𑐮𑐿𑑄
𑐚) 𑐣𑐷𑐴𑑅 𑐛) 𑐣𑐷 𑐴𑐮𑐸
𑐳𑐶𑐳𑐿𑐫𑐵 𑐮𑐥𑑂𑐟𑐾 𑐔𑑂𑐰𑑅𑐠𑑂𑐫𑐵, 𑐥𑑂𑐰𑐠𑑂𑐫𑐵 𑐣𑐶𑐥𑐵 (𑐣𑐶𑐴𑑅) 𑐟𑐫𑐵 𑐟𑐶𑑄𑐎𑐠𑐶𑐃 𑐳𑑂𑐰𑐔𑐵𑐎𑐵 𑐔𑑂𑐰𑐫𑐣𑑄 𑐎𑑂𑐰𑐫𑐣𑑄 𑐎𑐔𑐶𑐎𑐵𑑄 𑐔𑐶𑐣𑐵𑐐𑐸 𑐥𑑄𑐏𑐵 𑐐𑐸𑐣𑑂𑐴𑐸 𑐡𑐸𑐎𑐸𑐣𑑂𑐴𑐹𑐫𑐵 𑐐𑐸𑐥𑐵𑑅 𑐗𑐶𑐣𑐶𑐣𑑂𑐴𑐸 𑐡𑐸𑐏𑐸𑐣𑑂𑐴𑐹𑐫𑐵 𑐨𑐶𑑄m𑐣𑐶𑐥𑐵 𑐖𑑂𑐰𑐮𑑄 𑐩𑐵𑑅 𑑋 𑐣𑐷𑐕𑐣𑑂𑐴𑐹 𑐡𑐸𑐎𑐸𑐣𑑂𑐴𑐸 𑐔𑐶𑐐𑑂𑐰 𑐎𑐫𑑂𑐐𑐸 𑐦𑑂𑐰𑐫𑐵 𑐰 𑐮𑐿𑑄 𑐳𑐶𑐳𑐵𑐧𑐸𑐳𑐵 𑐰𑑂𑐴𑐮𑐾 𑐩𑐵𑐐𑐸 𑐥𑐬𑐩𑑂𑐥𑐬𑐵𑑄 𑐣𑐶𑐳𑐾 𑐫𑐵𑐣𑐵𑐟𑑅𑐐𑐸 𑐏𑑅 𑑋 𑐠𑑁 𑐎𑐣𑑂𑐴𑐫𑑂 𑐩𑐳𑑂𑐟𑐫𑐟 𑐏𑑂𑐰𑐥𑐫𑑂𑐫𑐵𑐎𑐵𑑅 𑐀𑐠𑐾 𑐥𑐹𑐖𑐵 𑐫𑐵𑐫𑐾𑐐𑐸 𑐔𑐮𑐣 𑐣𑑂𑐴𑐣𑐵𑐰𑐣𑐾 𑐢𑐸𑑄𑐎𑐸𑐐𑐸 𑐡𑐸 𑑋

𑐣𑐶𑐡𑑄 𑐧𑐹𑐣𑑂𑐴𑐶
𑐩𑐔𑐵 𑐣𑐶𑐡𑑃 𑐡𑐫𑑂𑐰𑑄 𑐣𑐶𑐡𑑃 𑐧𑐸𑐡𑐶𑑄 𑐢𑐎𑐵 𑐩𑐔𑐵𑐫𑐵𑐟 𑐣𑐶𑐐𑑅 𑐫𑑀𑐩𑐬𑐷 𑐎𑑂𑐰𑐏𑐵𑐫𑑂𑐎𑐵 𑐧𑐸𑐡𑐶𑑄 𑐫𑐵𑐂 𑑋 𑐧𑐸𑐡𑐶𑑄 𑐏𑐸𑐣𑑂𑐴𑐹 𑐐𑐞𑐾𑐡𑑂𑐫𑑅, 𑐡𑐶𑐐𑐸𑐡𑑂𑐫𑑅 𑐀𑐖𑐶𑐩𑐵 𑐡𑑂𑐫𑑅 𑐰 𑐩𑐾𑐩𑐾𑐥𑐶𑑄 𑐡𑑂𑐫𑑅𑐥𑐶𑑄 𑐠𑐵𑐫𑑂 𑐥𑐹𑐖𑐵 𑐫𑐵𑐣𑐵𑑅 𑐕𑐾𑑄𑐫𑑂 𑐳𑐸𑐎𑐸𑐣𑑂𑐡𑐵 𑐔𑑂𑐫𑐵𑐎𑐵 𑐎𑐵𑐥 𑐰𑐵 𑐰𑐳 𑐡𑐾𑐕𑐵𑐫𑐵 𑐣𑑂𑐫𑐵, 𑐏𑑂𑐫𑐾𑑃 𑐰 𑐩𑐢𑐸𑐬𑐳𑑄 𑐳𑑄𑐐 𑐰𑐶𑐫𑐵 𑐰𑐸𑐡𑐶𑑄 𑐫𑐵𑐂 𑑋 𑐣𑐶𑐡𑑄 𑐏𑐸𑐣𑑂𑐴𑐸 𑐩𑐔𑐵𑐫𑐵𑐟 𑐣𑐶𑐐𑑅 𑐖𑐎 𑐫𑑀𑐩𑐬𑐷 𑐎𑑂𑐰𑐏𑐵𑐫𑐾𑐎𑐶𑐐𑐸 𑐏𑐳𑐵 𑐣 𑐳𑐕𑐶 𑐰 𑐔𑑂𑐫𑐵𑐐 𑐰𑐵 𑐣𑐷𑐥𑑂𑐫𑐐𑑄 𑐫𑑀𑐩𑐬𑐷 𑐰 𑐳𑐶𑐳𑐵𑐧𑐸𑐳𑐵 𑐩𑐔𑐵𑐫𑐵 𑐥𑐵𑐖𑐸 𑐥𑐶𑐣𑑂𑐠𑐵𑐫𑑂 𑐧𑐶𑐂 𑐫𑐎𑐾 𑐩𑐵𑑅𑐐𑐸 𑐔𑐮𑐣 𑐡𑐸 𑑋 𑐫𑑀𑐩𑐬𑐷 𑐧𑐶𑐃 𑐫𑐎𑐶𑐐𑐸 𑐃𑐮𑐫𑑂 𑐥𑐵𑐖𑐸 𑐥𑐵𑐏𑐾 𑐩𑐔𑐵𑐫𑐵𑐟 𑐰𑐳 𑐕𑐖𑐹 𑐧𑐶𑐂𑐩𑐵 𑑋 𑐀𑐠𑐾𑐴𑐾 𑐫𑑀𑐩𑐬𑐷 𑐥𑑂𑐫𑐐𑑅𑐮𑑄 𑐎𑑂𑐰𑐏𑐵𑐫𑐎𑐵 𑐥𑑂𑐫𑐡𑑄 𑐧𑐸𑐡𑐶𑑄 𑐣𑑄 𑐫𑐵𑐂 𑑋 𑐏𑐫𑑂𑐟𑐮𑐵 𑐗𑐶𑐣𑐶𑐡𑑄 𑐟𑐎 𑐣𑑄 𑐀𑐠𑐾𑐴𑐾 𑐫𑑀𑐩𑐬𑐷 𑐎𑑂𑐰𑐏𑐵𑐫𑑂𑐎𑐵 𑐧𑐸𑐡𑐶𑑄 𑐫𑐵𑐫𑐾𑐩𑐵 𑐢𑐵𑐂 𑑋 𑐡𑑂𑐫𑑅 𑐥𑐶𑑄 𑐥𑐹𑐖𑐵𑐫𑐵𑐣𑐵 𑐧𑐸𑐡𑐶𑑄 𑐫𑐵𑐫𑐾𑐐𑐸 𑐔𑐮𑐣 𑐢𑐵𑐳𑐵 𑐖𑐩𑑂𑐩𑐎𑐵𑐕𑐶𑑄 𑐰𑐵 𑐩𑑂𑐰𑐵𑐣𑐵 𑐔𑑂𑐰𑐟𑑄𑐮𑐾 𑐫𑐵𑐫𑐾𑐐𑐸 𑐔𑐮𑐣 𑐁𑑅 𑐟𑐎𑑂𑐎 𑐣𑑄 𑐡 𑐴𑐾 𑐡𑐣𑐶 𑑋
𑐣𑐶𑐡 𑐧𑐸𑐡𑐶𑑄 𑐫𑐵𑐂 𑐧𑐮𑐾 𑐁 𑐥𑐵𑐖𑐸𑐥𑐶𑑄𑐠𑐵𑐫𑑂𑐣𑑄 𑐫𑑀𑐩𑐬𑐷 𑐫𑑄𑐎𑐾𑐐𑐸 𑐰 𑐥𑐵𑐴𑐵𑑃 𑐳𑐟𑑂𑐫𑐾𑐐𑐸 𑐔𑐮𑐣 𑐩𑐫𑐵𑐟 𑑋

𑐧𑐸𑐳𑑄𑐏𑐵
𑐩𑐔𑐵 𑐣𑑂𑐴𑐫𑑂𑐡𑑃 𑐣𑐶𑐳𑐾 𑐗𑐶𑐡𑑄 𑐡𑐸𑐣𑐾 𑐫𑐵𑐂𑐐𑐸 𑐧𑐸𑐳𑐏𑐵 𑐏𑑅 𑐠𑑂𑐰 𑐧𑐸𑐳𑐵𑑃 𑐣𑐶𑐳𑐾𑐥𑐵 𑐩𑐔𑐵𑐳𑐾 𑐮𑐴𑐶𑐣𑐵 𑐟𑑅𑐐𑐸 𑐳𑑄 𑐏𑐵𑐎𑐶𑐐𑐸 𑐏𑑅 𑑋 𑐧𑐸𑐳𑑄 𑐏𑐵𑐎𑐶𑐐𑐸, 𑐏𑐸𑐣𑑂𑐴𑐸 𑐥𑐵𑐖𑐸𑐩𑑂𑐴𑐾𑐳𑑂𑐫𑐵 𑐮𑐸𑑃 𑐰 𑐰𑐴𑐫𑐵 𑐏𑑀𑐔𑐵 𑐳𑑄 𑐏𑐵𑐎𑐾 𑐨𑐵𑐫𑑂𑐫𑐵𑐣𑐵 𑐣𑑁𑐣𑑄 𑐳𑑄 𑐏𑐵𑐎𑐶𑐂 𑑋 𑐣𑐶𑐣𑐶𑐩𑑂𑐴𑐾𑐳𑑂𑐫𑐵 𑐳𑑄 𑐣𑑂𑐴𑐹𑐐𑐸 𑐎𑐵𑐥𑐟𑐫𑑂 𑐦𑐂 𑑋 𑐀𑐮𑐾 𑐩𑐔𑐵𑐫𑐵𑐟 𑐢𑑁, 𑐏𑑂𑐫𑐾𑑄, 𑐣𑑂𑐫𑐵 𑐰 (𑐩𑐢) 𑐩𑐢𑐬𑐳 𑐳𑑄𑐐 𑐧𑐶𑐂 𑑋 𑐠𑐸𑐮𑐶 𑐳𑐶𑐢𑐫𑑂𑐰𑑄 𑐥𑐵𑐖𑐸𑐩𑑂𑐴𑑄 𑐖𑑂𑐰𑐣𑐵𑐰𑐐𑐸 𑐰𑐳 𑐖𑐸𑐔𑑂𑐕𑐶 𑐩𑐔𑐵𑐫𑐵𑐟, 𑐩𑐵𑐩𑑂𑐴𑐾𑐳𑐶𑐟 𑐖𑐸𑐔𑑂𑐕𑐶 𑐰 𑐧𑑁𑐩𑑂𑐴𑐳𑐶𑐟 𑐎𑐵𑐥 𑐠𑑁 𑐎𑐣𑑂𑐴𑐾 𑐠𑑂𑐰 𑐔𑐮𑐣 𑐩𑐫𑐵𑐫𑑂 𑐢𑐸𑑄𑐎𑐮 𑑋

𑐎𑐫𑑂𑐟𑐵 𑐥𑐹𑐖𑐵
𑐩𑐶𑐖𑑄𑐩𑐔𑐵 𑐣𑑂𑐴𑐫𑑂𑐡𑑄 𑐣𑐶𑐳𑐾 𑐗𑐶𑑃𑐳𑑂𑐰𑐡𑑃 𑐡𑐸𑐣𑐾 𑐎𑐫𑑂𑐟𑐵𑐥𑐹𑐖𑐵 𑐫𑐵𑐂 𑑋 𑐎𑐫𑑂𑐟𑐵 𑐥𑐹𑐖𑐵 𑐫𑐵𑐫𑑂𑐐𑐸 𑐨𑐶𑑄𑐐𑐸 𑐡𑐶𑐣 𑐖𑑀𑐱𑐷𑐫𑐵 𑐠𑐵𑐫𑑂 𑐰𑐣𑐵 𑐳𑐵𑐂𑐟 𑐎𑐫𑐵 𑐖𑐎 𑐎𑐫𑑂𑐟𑐵 𑐥𑐹𑐖𑐵 𑐫𑐵𑐂 𑑋 𑐀𑐎𑑂𑐲𑐫𑑂 𑐟𑑂𑐬𑐶𑐟𑐷𑐫𑐵 𑐥𑐔𑐶 𑐩𑐮𑑂𑐴𑑅 𑐱𑑂𑐬𑐷𑐥𑑄𑐔𑐩𑐷 𑐔𑐵𑐮𑑄 𑐏𑐸𑐣𑑂𑐴𑐸 𑐫𑐵𑐫𑐾𑐟 𑐳𑐵𑐂𑐟 𑐳𑑂𑐰𑐫𑐾 𑐩𑑂𑐰𑐵 𑑋 𑐠𑑂𑐰 𑐏𑐸𑐣𑑂𑐴𑐸 𑐩𑐾𑐏𑐮𑐵 𑐧𑐣𑑂𑐢𑐣 𑐰𑐶𑐢𑐶 𑐀𑐣𑐸𑐳𑐵𑐬𑑄 𑐎𑐮𑐱𑐵𑐔𑐬𑐞 𑐥𑐹𑐖𑐵 𑐰 𑐴𑑀𑐩 𑐫𑐵𑐣𑐵 𑐥𑐹𑐖𑐵 𑐫𑐵𑐂 𑑋 𑐎𑐫𑑂𑐟𑐵𑐥𑐹𑐖𑐵 𑐏𑐸𑐣𑑂𑐴𑐸 𑐩𑐔𑐵𑐫𑐵 𑐥𑐵𑐖𑐸 𑐮𑑃𑐸 𑐏𑑂𑐰𑑅 𑐔𑐵𑑅𑑄 𑐰𑐴 𑐏𑑂𑐰 𑐔𑐵𑑄 𑐳𑑄 𑐏𑐵𑐫𑐎𑐾 𑐨𑐵𑐫𑑂𑐫𑐵𑐣𑐵 𑐁𑑄𑐐𑑂𑐳𑐵 𑐔𑐶𑑄 𑐟𑐫𑑂 𑐢𑐸𑑄𑐎𑐵 𑐳𑐸𑐔𑑂𑐔𑐸𑐎 𑐳𑑄 𑐏𑐵𑐎𑐶𑐂 𑑋 𑐩𑐔𑐵𑐫𑐵𑐟 𑐏𑐵𑐎𑐸𑐐𑐸 𑐳 𑐠𑐵𑐫𑐨𑐸 𑐩𑐔𑐵𑐫𑐵 𑐣𑐶𑐣𑐶𑑄 𑐖𑑂𑐰𑐣𑐵 𑐳𑑄 𑐦𑐫𑑂𑐎𑐵𑐫𑑂𑐩𑐵𑑅 𑑋 𑐳𑑄 𑐦𑐩𑑂𑐴 𑐣𑐶𑐣𑐶𑐫𑐵𑐟 𑐳𑑄 𑐦𑐃𑐐𑐸 𑐠𑐵𑐫𑑂𑐨𑐸𑐃 𑐣𑑂𑐴𑐹𑐐𑐸 𑐎𑐵𑐥 𑐕𑐎𑐹 𑐟𑐫𑐵 𑐧𑐶𑐂𑐩𑐵𑑅 𑑋 𑐀𑐣 𑐰𑐶𑐢𑐶 𑐎𑐠𑑄 𑐥𑐹𑐖𑐵𑐫𑐵𑐣𑐵 𑐩𑐔𑐵𑐫𑐵𑐟 𑐎𑐫𑑂𑐟𑐵 𑐔𑐶𑐎𑐶 (𑐎𑐫𑑂𑐟𑐵 𑐣𑑂𑐴𑐫𑐎𑐹 𑐰𑑂𑐴𑐣𑐵𑐟𑑅𑐐𑐸 𑐖𑐸𑐂𑐩𑐵) 𑑋 𑐰𑐣𑐵𑐣𑑂𑐟𑐬 𑐕𑑀𑐫𑑂𑐐𑐸 𑐴𑐶𑐳𑐵𑐰 𑐩𑑂𑐴𑐵𑐳𑐸𑐐𑐸 (𑐥𑐶𑐟𑐵𑐩𑑂𑐧𑐬) 𑐎𑐵𑐥𑐟 𑐢𑑀𑐟𑐶 𑐔𑐶𑐎𑐵 𑐔𑐮𑐵𑐫𑐵 𑐕𑑄𑐫𑑄𑐐𑐸, 𑐢𑐣𑐸𑐲, 𑐦𑐳𑐶 𑐎𑐠𑐶, 𑐣𑐳𑐵𑐩𑑂𑐴𑐶𑐔𑐵 𑐥𑐵𑐕𑐵𑐫𑐎𑐵 𑐏𑐬𑐸 𑐮𑐵𑐎𑐵 𑐣𑑂𑐴𑐫𑐵𑐎𑐵 𑐰𑐣𑐵𑐣𑑂𑐟𑐬 𑐰𑐣𑐷 𑐩𑑂𑐴𑐾𑐳𑐶𑐟 𑐳𑑂𑐰𑐵𑐩𑐵𑑅 𑐖𑐵𑐎𑐷, 𑐢𑑂𑐫𑐰𑐵, 𑐦𑐮𑐦𑐹𑐮 , 𑐐𑑂𑐰𑐵 𑐕𑐰𑐾𑐫𑑂 𑐟𑐫𑐵 𑐨𑐶𑐎𑑂𑐲𑐵 𑐡𑐵𑐣 𑐰𑐷 𑐢𑐸𑑄𑐎𑐵 𑐥𑐶𑐟 𑐕𑐰𑐂 𑑋 𑐐𑐣𑐾𑐡𑑂𑐫𑑅 𑐠𑐵𑐫𑑂 𑐫𑑄𑐎𑐵 𑐣𑑂𑐴𑐫𑐦𑑂𑐰 𑐳𑑂𑐰𑐵𑑄𑐦𑑂𑐰𑑅 𑐔𑑂𑐰𑐫𑐵 𑐐𑑂𑐰𑐵𑑅𑐴𑑅 𑐣𑑂𑐴𑑂𑐴𑐮𑐫 𑐐𑑂𑐰𑑅𑐐𑐸 𑐐𑑂𑐰𑐫𑑂 𑐰 𑐮𑐰𑑄 𑐟𑐫𑐵 𑐄𑐎𑐶 𑐩𑐔𑐵𑐫𑐵𑐟 𑐥𑐮𑐵 𑐕𑐶𑐎𑐵𑑅 𑐧𑐶𑐳𑐶𑐎𑐾 𑐕𑐰𑐃 𑑋 𑐩𑐔𑐵𑐫𑐵 𑐥𑐵𑐖𑐸𑑄 𑐖𑑂𑐰𑐣𑐵 𑐐𑐞𑐾𑐡𑑂𑐫𑑅 𑐨𑐵𑐐𑐶𑐫𑐵𑐎𑐵 𑐥𑐵𑐖𑐸𑑄 𑐢𑐶𑐰𑐵 𑐧𑐶𑐫𑐵 𑐮𑐶𑐐𑐣𑐵 𑐴𑐃 𑑋 𑐥𑐶𑐏𑐵 𑐮𑐸𑐏𑐵𑐳 𑐳𑐶𑐦𑑅 𑐮𑐸𑐣𑐵 𑐕𑐾 𑐡𑐸𑐎𑐵𑐃 𑑋 𑐩𑐔𑐵𑐫𑐵𑐟 𑐰𑐳 𑐥𑐸𑑄𑐎𑐵 𑐕𑐠𑐵𑐫𑑂 𑐦𑐾𑐟𑐸𑐎𑐵 𑐢𑑁 𑐳𑑄𑐐 𑐏𑐾𑑄 𑐳𑑄𑐐 𑐧𑐶𑐫𑐵 𑐥𑐹𑐖𑐵 𑐫𑐵𑐫𑐾 𑐳𑐶𑐢𑐫𑐾𑐰𑑄 𑐩𑐔𑐵𑐫𑐵 𑐥𑐵𑐖𑐸 𑐣𑐶𑐣𑐶 𑐥𑐵𑐏𑐾 𑐰𑐳𑑅 𑐧𑐶𑐫𑐵 𑐏𑐾𑑄 𑐢𑑁 𑐳𑐐𑑄
𑐧𑐶𑐂 𑑋 𑐀𑐮𑐾 𑐦𑐸𑐎𑐶𑐰𑐵𑐎𑐵𑐫𑑂 𑐩𑑂𑐴𑐵𑐫𑐩𑐔𑐵, 𑐨𑐶𑐣𑐵𑐩𑐔𑐵 𑐳𑐎𑐳𑐶𑐣 𑐟𑐥𑐸𑐮𑐶, 𑐎𑐵𑐥, 𑐧𑐾𑐟𑐵𑐮𑐶 𑐖𑑂𑐰𑐮𑑄 𑐢𑑁 𑐰 𑐏𑐾𑑃 𑐳𑐐𑑄 𑐧𑐶𑐂 𑑋 𑐠𑑂𑐰 𑐏𑐸𑐣𑑂𑐴𑐸 𑐥𑐵𑐖𑐸 𑐏𑐮𑑅, 𑐩𑑂𑐴𑐵𑐫𑐩𑐔𑐵, 𑐨𑐶𑐣𑐵𑐩𑐔𑐵 𑐰 𑐃𑐲𑑂𑐚𑐩𑐶𑐟𑑂𑐬 𑐳𑐎𑐳𑐶𑐟 𑐎𑑂𑐰𑐫𑑂 𑐣𑑂𑐴𑐠𑐣𑐵 𑐎𑐠𑑄 𑐔𑑂𑐫𑐵𑐟𑐵 𑐢𑐵𑐳𑐵𑑅 𑐏𑐵𑐣𑐵 𑐨𑑂𑐰𑐫𑑂 𑐣𑐎𑐶 𑑋
𑐎) 𑐥𑐵𑐮𑐸 𑐏) 𑐩𑐸𑐳𑑂𑐫𑐵 (𑐴𑐵𑐎𑐸) 𑐐) 𑐌 𑐑) 𑐥𑑅𑐩𑐵𑐫𑑂
𑐒) 𑐏𑐫𑑂𑐥𑐶 𑐔) 𑐔𑑂𑐫𑑂𑐥𑐶 𑐕) 𑐰𑐵𑐄𑑃𑐔𑐵 𑐖) 𑐮𑐵 (𑐡𑐵𑐫𑑂𑐎𑐸)
𑐠𑑂𑐰 𑐦𑐸𑐎𑑂𑐎 𑐖𑐰𑑄 𑐔𑐵𑑅𑐴𑐶𑐎𑐾𑐩𑐵 𑐩𑐳𑑂𑐫𑐵𑑄 𑐢𑐸𑑄𑐎𑐵 𑐰𑑅 𑐟𑐂𑐐𑐸 𑐫𑐮 𑐡𑐾𑐫𑐵 𑐔𑐮𑐣 𑐡𑐸 𑑋
𑐎𑐫𑑂𑐟𑐵𑐥𑐹𑐖𑐵 𑐏𑐸𑐣𑑂𑐴𑐸 𑐐𑐞𑐾𑐡𑑂𑐫𑑅 𑐠𑐵𑐫𑑂 𑐴𑑃𑐫𑑂, 𑐡𑐐𑐸, 𑐩𑐾𑑄, 𑐧𑐵𑑃, 𑐳𑑂𑐫𑐵𑐫𑐾𑐐𑐸 𑐣𑑄 𑐫𑐵 𑑋 𑐄𑐏𑐸𑐣𑑂𑐴𑐸 𑐧𑐴𑐣𑐶 𑐨𑑂𑐰𑐫𑑂 𑐳𑐶𑐢𑐫𑐾𑐎𑐵 𑐦𑐸𑐎𑐶𑐰𑐵𑐎𑐵𑐫𑑂 𑐰 𑐠𑑅 𑐕𑐾𑑃 𑐖𑑅 𑐔𑑂𑐰𑐣𑐵 𑐳𑐶𑐎𑐵𑐨𑐹 (𑐳𑐶 𑐳𑐐𑑄) 𑐫𑐵𑐫𑐾𑐩𑐵 𑑋
𑐐𑐸𑐩𑑂𑐴𑐾𑐳𑐶𑐫𑐵 𑐕𑐾𑑄 𑐴𑐾 𑐎𑐫𑑂𑐟𑐵𑐥𑐹𑐖𑐵 𑐫𑐵𑐣𑐵 𑐳𑐶𑐢𑐫𑑂𑐎𑐷𑐥𑐶𑑄 𑐣𑑄 𑐡𑐸 𑑋 𑐎𑐫𑑂𑐟𑐵𑐥𑐹𑐖𑐵𑐫𑐵𑐩𑑂𑐴 𑐩𑐔𑐵𑑄 𑐥𑑂𑐫𑐣𑑂𑐴𑐹 𑐟𑐎 𑐎𑐫𑑂𑐟𑐵 𑐟𑑂𑐰𑐟𑐾 𑐩𑐖𑑂𑐫𑐹 𑑋

𑐃𑐴𑐶 𑐫𑐵𑐫𑐾𑐐𑐸
𑐩𑑂𑐴𑐵𑐫𑐩𑐔𑐵 𑐣𑑂𑐫𑐵𑐡𑑃 𑐣𑐶𑐳𑐾𑑄 𑐣𑑂𑐴𑐫𑑂𑐡𑑃 𑐡𑐸𑐐𑐸 𑐂𑐮𑐾 𑐠𑐩𑑂𑐴𑑄 𑐴𑐾 𑐃 𑐩𑐸𑑄𑐎𑐵𑑅, 𑐃 𑐩𑐸𑐎𑐸𑐠𑐵𑐫𑑂 𑐰𑐵 𑐖𑑂𑐫𑐵𑐠𑐥𑐶𑑄 𑐖𑐎𑑂𑐰 𑐫𑐠𑐵𑐫𑑂 𑐃𑐴𑐶 𑐫𑐵𑐫𑐾 𑐫𑑄𑐎𑐶𑐐𑐸 𑐔𑐮𑐣 𑐡𑐸 𑑋 𑐃𑐴𑐶 𑐎𑐬𑑂𑐩 𑐏𑑄𑐎𑐵 𑐮𑐶𑐟 𑐴𑑅𑐥𑐶 𑐩𑐶𑐳𑐵𑐩𑐔𑐵𑐟𑐫𑑂𑐟 𑐕𑐾𑑄 𑐡𑐸𑐟𑑅𑐫𑑄𑐎𑐾 𑐣𑑂𑐴𑐫𑑅 𑐥𑐶𑑄𑐏𑐵𑐮𑐸𑐸𑐏𑐸𑐃 𑐦𑑄𑐧𑐵𑐬𑐵 𑐕𑐸𑐂 𑑋

𑐧𑐵𑐴𑑂𑐬𑐵𑑅 𑐟𑐫𑐾𑐐𑐸
𑐩𑐶𑐳𑐵𑐩𑐔𑐵 𑐣𑑂𑐴𑐫𑐡𑑃 𑐣𑐶𑐳𑐾 𑐗𑐶𑐳𑑂𑐰𑐡𑑃𑐫𑐵 𑐡𑐸𑐣𑐾 𑐧𑐵𑐴𑑂𑐬𑐵 𑐟𑐫𑐾𑐐𑐸 𑐔𑐮𑐣 𑐡𑐸 𑑋 𑐧𑐵𑐴𑑂𑐬𑐵 𑐟𑐫𑐾𑐟 𑐖𑑀𑐟𑐶𑐲 𑐎𑑂𑐫𑐣𑐵𑑅 𑐨𑐶𑑄𑐐𑐸 𑐳𑐵𑐃𑐟 𑐎𑐫𑐵 𑐟𑐫𑐩𑐵 𑑋 𑐧𑐵𑐴𑑂𑐬𑐵 𑐎𑑂𑐰𑐠𑐵𑐫𑑂 𑐣𑐶𑐨𑐵𑑅 𑐖𑐟𑐶 𑐡𑐸𑐴𑐵𑑃 𑐩𑐰𑑄𑐎 𑐗𑑂𑐫𑐵𑑅, 𑐰𑑂𑐴, 𑐥𑑂𑐰𑐵𑑅, 𑐟𑐶𑐂𑐩𑐵 𑑋 𑐨𑐶𑑄𑐐𑐸 𑐳𑐵𑐃𑐟 𑐏𑐸𑐣𑑂𑐴𑐸 𑐧𑐵𑐴𑑂𑐬𑐵 𑐟𑐿𑐩𑑂𑐴 𑐩𑐶𑐳𑐵𑐩𑐔𑐵𑐫𑐵𑐟 𑐢𑑁 𑐳𑐐𑑄 𑐧𑐶𑐫𑐵 𑐩𑐶𑐳𑐵 𑐩𑐔𑐵 𑐰 𑐧𑐵𑐴𑑂𑐬𑐵 𑐥𑐵𑐳𑐵 𑐣𑐵𑐥 𑐟𑐸𑑄 𑐧𑐵𑐴𑑂𑐬𑐵 𑐎𑑂𑐰𑐠𑐵𑐫𑑂 𑐎𑐸𑐣𑐶 𑑋 𑐠𑑂𑐰 𑐏𑐸𑐣𑑂𑐴𑐸 𑐣𑐶𑐳𑐾 𑐧𑐵𑐴𑑂𑐬𑐵 𑐥𑐶𑐩𑐎𑐵𑐟𑐮𑐾 𑐩𑐔𑐵𑑄 𑐩𑐶𑐖𑑄 𑐟𑐫𑑂𑐐𑐸 𑐏𑑂𑐰𑐵𑑅 𑐳𑑂𑐰𑐫𑐾 𑐩𑐖𑐶𑐅 𑐰 𑐥𑑂𑐫𑐣𑑂𑐴𑐹𑑄 𑐟𑐎 𑐔𑐶 𑐨𑑂𑐫𑐵𑑅 𑐣𑐫𑐾𑐩𑐖𑑂𑐫𑐹 𑑋

𑐎𑑂𑐰𑐔𑐶𑐎𑑄 𑐳𑐵𑐫𑐾𑐎𑐶𑐐𑐸
𑐧𑐵𑐴𑑂𑐬𑐵𑑅 𑐟𑐫𑐵𑑅 𑐥𑑂𑐫𑐣𑑂𑐴𑐹 𑐡𑐸 𑐏𑐸𑐣𑑂𑐴𑐸 𑐩𑐔𑐵𑐫𑐵𑐟 𑐩𑑀𑐮𑑂𑐴𑐹𑐎𑐵 𑐰𑐳𑑅 𑐴𑐶𑐂𑐎𑐵𑑅 (𑐦𑐾𑐬𑐾𑐫𑐵𑐣𑐵) 𑐎𑐥𑐵𑐫𑑂𑐫𑐵 𑐧𑐵𑐴𑑂𑐬𑐵 𑐏𑑂𑐫𑐵𑑅 𑐡𑑂𑐫𑑅 𑐣𑐶𑐐𑐸 𑐡𑐫𑐾𑐎𑐵 𑐀𑑄𑐒𑑂𑐐𑐮𑐾 𑐳𑐶𑐣𑑂𑐴, 𑐩𑑂𑐴𑐵𑐳𑐸 𑐳𑐶𑐣𑑂𑐴, 𑐀𑐖𑑅, 𑐎𑑀𑑄𑐏𑑀𑐮𑐵, 𑐔𑐶𑐎𑑄𑐏𑑀𑐮𑐵, 𑐣𑑂𑐴𑐵𑐫𑐎𑑄 𑐧𑐵𑐴𑑂𑐬𑐵 𑐎𑑂𑐰𑐠𑐵𑐫𑑂 𑐕𑐠𑐵𑐫𑑂 𑐢𑑂𑐫𑐵𑐎𑐹𑐔𑐵𑐫𑑂 𑐟𑐫𑐵 𑐥𑑂𑐫𑐣𑑂𑐴𑐹𑐫𑐵 𑐥𑑂𑐫𑐟𑐵𑐑𑐵𑐳𑐵 𑐎𑑂𑐰𑐫𑑂 𑐣𑑂𑐴𑐠𑐣𑐵 𑐎𑐠𑑄 𑐳𑑂𑐰𑐧𑑂𑐰 𑐟𑐂 𑐧𑐵𑐴𑑂𑐬𑐵𑑅 𑐔𑑀𑐩𑑂𑐴 𑐰𑐵 𑐧𑐵𑐴𑑂𑐬𑐵𑑅 𑐥𑐵𑐳𑐵𑐫𑐵𑐟 𑐎𑑂𑐰𑐔𑐶𑐎 𑐳𑐵𑐫𑐾𑐎𑐶𑐂 𑑋
𑐎) 𑐧𑐹𑐰 𑐏) 𑐁𑐮𑐸 𑐐) 𑐰𑐵𑐄𑑃𑐔𑐵 𑐑) 𑐎𑑅 𑐑𑐵𑐳𑐵
𑐧𑐵𑐴𑑂𑐬𑐵 𑐟𑐃𑐧𑐮𑐫𑑂 𑐕𑐾𑑃 𑐖𑑅 𑐰 𑐦𑐸𑐎𑐷 𑐏𑐮𑑅𑐥𑐶𑑄 𑐱𑐸𑐡𑑂𑐢 𑐩𑐖𑐸 𑐢𑐿𑐐𑐸 𑐢𑐵𑐥𑐸 𑐡𑐸 𑑋 𑐧𑐵𑐴𑑂𑐬𑐵 𑐥𑐶𑐩𑐎𑐵𑐟𑐮𑐾 𑐕𑐸𑑄 𑐴𑐾 𑐥𑐹𑐖𑐵 𑐔𑐮𑐫𑑂 𑐩𑐖𑐸 𑑋 𑐠𑑂𑐰 𑐂𑐮𑐾 𑐫𑐵𑐟 𑐏𑐫𑑂𑐰𑐶𑐮𑐶 𑐩𑐵𑐐𑐸 𑐢𑐵𑐂 𑑋 𑐥𑐹𑐖𑐵𑐫𑐵𑐫𑑂 𑐩𑐵𑑅𑐳𑐵 𑐩𑑂𑐴𑐵𑐫𑑂 𑐩𑐔𑐵𑐫𑐵𑐟 𑐫𑐵𑐎𑐷𑐂 𑑋

𑐕𑐸𑐳𑑂𑐫𑐵𑐩𑐸𑐳𑑂𑐫𑐵 𑐣𑐎𑑅 𑐰𑐣𑐾𑐐𑐸
𑐧𑐵𑐴𑑂𑐬𑐵𑐩𑐔𑐵𑐫𑐵𑐟 𑐎𑑂𑐰𑐔𑐶𑐎𑑄 𑐳𑐵𑐫𑐾𑐎𑐾 𑐢𑐸𑑄𑐎𑐵 𑐩𑐶𑐳𑐵𑐩𑐔𑐵𑐫𑐵 𑐥𑐵𑐖𑐸𑐥𑐶𑑄, 𑐣𑐶𑐣𑐶𑐥𑐶𑑄, 𑐟𑐟𑐵𑐥𑐶𑑄 𑐰 𑐳𑑂𑐫𑐵𑐥𑐶𑑄 𑐠𑑅𑐠𑐶𑐟𑐶𑐥𑐶𑐣𑑂𑐳𑑄 𑐕𑐸𑐳𑑂𑐫𑐵𑐩𑐸𑐳𑑂𑐫𑐵 𑐣𑐎𑑅 𑐰𑐣𑐾𑐐𑐸 𑐔𑐮𑐣 𑐡𑐸 𑑋 𑐕𑐸𑐳𑑂𑐫𑐵𑐩𑐸𑐳𑑂𑐫𑐵 𑐣𑐎𑑅 𑐰𑐥𑐶𑐳𑑄 𑐎𑑂𑐰𑐫𑑂 𑐣𑑂𑐴𑐠𑐣𑐵𑐐𑐸 𑐖𑑂𑐰𑐮𑑄 𑐖𑑂𑐰𑐣𑐵 𑐰𑐣𑐾𑐩𑐵𑑅 𑑋
𑐎) 𑐧𑐖𑐶 – 𑑔 𑐩𑐣𑐵 𑐏) 𑐕𑐸𑐳𑑂𑐫𑐵𑐩𑐸𑐳𑑂𑐫𑐵 – 𑑑 𑐦 𑐐) 𑐢𑑁 𑐕𑐐𑑅
𑐑) 𑐡𑐸𑐬𑐸 – 𑑑 𑐩𑐣𑐵 𑐒) 𑐧𑐬𑐵𑑄 – 𑑑 𑐩𑐣𑐵 𑐔) 𑐀𑐫𑑂𑐮𑐵 – 𑐩𑐣𑐵
𑐕) 𑐳𑐶𑐳𑐵𑐧𑐸𑐳𑐵 – 𑐧𑐏𑐟 𑐀𑐣𑐸𑐳𑐵𑐬 𑐳𑑀𑐫𑐵 𑐟𑐫𑑂𑐐𑐸 𑑋
𑐣𑑂𑐴𑐹𑐐𑐸 𑐣𑐶𑐫𑐩 𑐎𑐠𑑄 𑐥𑐵𑐖𑐸𑑅 𑐰 𑐣𑐶𑐣𑐶𑐏𑐮𑑅 𑐥𑐵𑐏𑐾𑑄 𑐖𑐎 𑐧𑐵𑐴𑑂𑐬𑐵 𑐕𑐹 𑐰𑐣𑐾𑐐𑐸 𑑋
𑐧𑐵𑐴𑑂𑐬𑐵 𑐟𑑅𑐐𑐸 𑐗𑐶𑐕𑐣𑑂𑐴𑐹 𑐟𑐎 𑐧𑐵𑐴𑑂𑐬𑐵 𑐎𑑂𑐰𑐠𑐵𑐫𑑂 𑐩𑐶𑐳𑐵𑐩𑐳𑑂𑐟 𑐥𑐵𑐳𑐵𑐥𑐶𑑄 𑐰𑐫𑐵𑑅 𑐩𑑂𑐫𑐾 𑐴𑐵𑐮𑐾𑐐𑐸, 𑐥𑑂𑐫𑐵𑐏𑑄 𑐴𑐸𑐮𑐾𑐐𑐸, 𑐩𑑂𑐴𑐶𑐟𑐾𑐐𑐸 𑐴𑐾 𑐖𑐎 𑐖𑐸𑐃 𑑋 𑐧𑐵𑐴𑑂𑐬𑐵𑑅 𑐎𑑂𑐰𑐠𑐵𑐫𑑂 𑐔𑑂𑐰𑐣𑐶𑑄𑐧𑐮𑐫𑑂 𑐩𑑂𑐴𑐶𑐟𑐾𑐐𑐸 𑐩𑐢𑑂𑐫𑐾 𑐔𑐵𑐐𑑅 𑐩𑐩𑑂𑐴𑐶𑐟𑐸𑐳𑐾 𑐩𑐐𑐵𑑅 𑐢𑐫𑐵𑐟𑑅𑐐𑐸 𑐡𑐸 𑑋

𑐧𑐵𑐴𑑂𑐬𑐵 𑐧𑑂𑐫𑑄𑐎𑐾𑐐𑐸 (𑐥𑐶𑐎𑐵𑐫𑐾𑐐𑐸)
𑐧𑐵𑐴𑑂𑐬𑐵𑑅 𑐟𑐫𑐵 𑐗𑐶𑑄𑐣𑐶𑐣𑑂𑐴𑐹 𑐡𑐸𑐏𑐸𑐣𑑂𑐴𑐸 𑐧𑐵𑐴𑑂𑐬𑐵 𑐧𑑂𑐫𑑄𑐎𑐾𑐐𑐸 𑐖𑑂𑐫𑐵 𑐖𑐸𑐂 𑑋 𑐠𑑂𑐰 𑐏𑐸𑐣𑑂𑐴𑐸 𑐕𑐾𑑄 𑐕𑐏𑐵 𑐧𑑄𑐠𑐶𑐣𑐵 𑐳𑐎𑐳𑐶𑐣𑑄 𑐮𑐸𑐳𑐶 𑐢𑑂𑐫𑑄𑐎𑐵, 𑐩𑑀𑐮𑑂𑐴𑐸𑐫𑐵, 𑐣𑐶𑐳𑐶 𑐫𑐵𑐂 𑑋 𑐧𑐵𑐴𑑂𑐬𑐵 𑐩𑐔𑐵𑐫𑐵𑐟 𑐳𑐸𑐠 𑐣𑑂𑐴𑐵𑐥𑐵 𑐩𑑀𑐮𑑂𑐴𑐸𑐎𑐵, 𑐮𑐸𑐳𑐶 𑐢𑑂𑐫𑐎𑐵, 𑐟𑐸𑐟𑐶𑐧𑐵𑐥𑐵 𑐀𑐮𑑅 𑐟𑐫𑐵 𑐧𑐵𑑄𑐮𑐵𑐐𑐸 𑐰𑐳𑐟𑑄 𑐥𑐸𑑄𑐎𑐶𑐂 𑑋 𑐧𑐵𑐴𑑂𑐬𑐵 𑐥𑐶𑐎𑐵𑐫𑐾𑐐𑐸 𑐳𑐵𑐃𑐟𑐫𑑂 𑐧𑐵𑐴𑑂𑐬𑐵 𑐩𑐔𑐵𑐫𑐵𑐟 𑐏𑑂𑐰𑐵𑑅 𑐟𑑂𑐰𑐥𑐸𑐫𑐾𑐎𑐵𑑅 𑐥𑐶𑐟𑐴𑐂 𑑋 𑐥𑐶𑐣𑐾 𑐧𑐵𑐟𑐵𑐫𑑂 𑐮𑑅 𑐟𑐫𑐵 𑐄𑐎𑐾 𑐏𑐣𑐾 𑐡𑐸𑐐𑐸 𑐳𑐸𑐡𑑂𑐬𑑂𑐫𑑅 𑐎𑑂𑐫𑐣𑐵 𑐄𑐮𑐵 𑐧𑐶𑐂 𑑋 𑐀𑐮𑐾 𑐐𑐸𑐬𑐸𑐖𑐸 𑐳𑐸𑐡𑑂𑐬𑑂𑐫𑑀 𑐥𑐹𑐖𑐵 𑐫𑐵𑐎𑐶𑐂 𑑋 𑐥𑐹𑐖𑐵 𑐳𑐶𑐢𑐫𑐾𑐎𑐵 𑐧𑐵𑐴𑑂𑐬𑐵 𑐩𑐔𑐵𑐫𑐵𑐟 𑐖𑑂𑐰𑐵𑐮𑐵 𑐣𑑂𑐴𑑂𑐫𑐵𑐎𑑄 𑐰 𑐳𑐶𑐣𑑂𑐴𑐩𑐹 𑐖𑑂𑐰𑑄𑐎𑐵 𑐎𑐸𑐮 𑐐𑐞𑐾𑐡𑑂𑐫𑑅 𑐥𑐹𑐖𑐵 𑐫𑐵𑑅 𑐰𑐣𑐶 𑑋 𑐐𑐞𑐾𑐡𑑂𑐫𑑅 𑐥𑐹𑐖𑐵𑐫𑐵𑐣𑐵 𑐮𑐶𑐴𑐵𑐰𑐾𑐫𑑂 𑐢𑐸𑑄𑐎𑐵 𑐧𑐵𑐴𑑂𑐬𑐵 𑐕𑐸𑐫𑐵 𑐢𑑁 𑐳𑐐𑑄 𑐰 𑐏𑐾𑑄 𑐳𑐐𑑄 𑐧𑐶𑐫𑐵 𑐠𑐵𑐫𑑂𑐨𑐹 𑐣𑐎𑐶𑐂 𑑋 𑐀𑐮𑐾 𑐩𑐔𑐵𑐫𑐵 𑐥𑐵𑐖𑐸 𑐰 𑐣𑐶𑐣𑐶 𑐥𑐶𑐣𑑂𑐳 𑐧𑐵𑐴𑑂𑐬𑐵 𑐕𑐸𑐎𑐵 𑐳𑐐𑑄 𑐧𑑂𑐫𑐹 𑐰𑐫𑐾𑐩𑐵𑑅 𑑋
𑐠𑑂𑐰 𑐏𑐸𑐣𑑂𑐴𑐹 𑐕𑐸𑐳𑑂𑐫𑐵𑐩𑐸𑐳𑑂𑐫𑐵 𑐣𑐎𑑅 𑐰𑐥𑐶𑑄, 𑐧𑐵𑐴𑑂𑐬𑐵 𑐎𑑂𑐰𑐠𑐵𑐫𑑂 𑐩𑑂𑐴𑐶𑐟𑐰𑐥𑐶𑑄𑐟 𑐩𑐶𑐳𑐵𑐩𑐔𑐵𑐟 𑐰 𑐦𑐸𑐎𑐶𑐧𑐵𑐎𑐵𑐫𑑂 𑐳𑐎𑐶𑐳𑐶𑐟 𑐗𑐶𑐟𑐵 (𑐏𑑂𑐰𑐥 𑐡𑐾𑐱𑐾 𑐗𑐶𑐣𑐶𑐟𑐵 𑐏𑐵𑐂𑐐𑐸 𑐔𑐮𑐣 𑐡𑐸) 𑐑𑐵𑐳𑐵 𑐟𑐫𑐵 𑐨𑑂𑐰𑐫𑑂 𑐣𑐎𑐾𑐩𑐵 𑑋 𑐗𑐶𑑄𑐥𑑂𑐫𑐟𑐵 𑐢𑐵𑐳𑐵𑐫𑐵 𑐢𑐮𑑅 𑐎𑑂𑐰𑐫 𑐣𑑂𑐴𑐾𑐠𑐣𑐵𑐐𑐸 𑐡𑐸 𑑋
𑐎) 𑐥𑐵𑐮𑐸 𑐏) 𑐩𑐸𑐳𑑂𑐫𑐵 𑐧𑐸𑐃 ( 𑐩𑐸𑐳𑑂𑐫𑐵 𑐦𑑀𑐫𑐵 𑐏𑑀𑐮𑐵 𑐮𑐶𑐎𑐫𑐵 𑐳𑐶𑐫𑐵 𑐟𑐐𑐸 𑐧𑐵𑐮𑐵)
𑐐) 𑐌 𑐗𑐶𑐣𑐶𑐎𑐹 𑐑) 𑐎𑐳𑐸𑐧𑐸𑐃 (𑐔𑐶𑐰 𑐎𑐾𑐅 𑐦𑑀𑐫𑐵 𑐏𑑂𑐰𑐮𑐵 𑐮𑐶𑐎𑐫𑐵 𑐳𑐶𑐫𑐵𑐟𑐐𑐸 𑐧𑐵𑐮𑐵)
𑐒) 𑐏𑐫𑑂𑐥𑐶 𑐔) 𑐔𑐫𑑂𑐥𑐶 𑐕) 𑐢𑑁 𑐑𑐵𑐳𑐵 (𑐮𑐿 𑐔𑐸𑐮𑐵 𑐢𑑁 𑐰𑐵𑐮𑐵𑐟𑐐𑐸)
𑐖) 𑐴𑐶𑑄𑐮𑐵 (𑐩𑐣𑐵𑐐𑐸 𑐕𑑀𑐫𑑂𑐮𑐵𑐫𑑂 𑐴𑐶𑑄 𑐟𑐫𑐵 𑐰𑐵𑐮𑐵 𑐟𑐐𑐸 𑐮𑐵)
𑐗) 𑐥𑑄𑐮𑐵 (𑐩𑐣𑐵 𑐕𑑀𑐫𑑂𑐮𑐵𑐫𑑂 𑐢𑑁 𑐥𑐵𑐄𑑄m 𑐟𑐫𑐵 𑐧𑐵𑐮𑐵𑐟𑐐𑐸 𑐮𑐵) 𑐘) 𑐩𑐸𑐮𑐵 (𑐟𑐏𑐵)
𑐚) 𑐳𑐾 𑐥𑐸𑐎𑐵 𑐛) 𑐐𑑀 𑐥𑐸𑐎𑐵 𑐜) 𑐏𑑂𑐫𑐾𑑃 𑐝) 𑐣𑑂𑐫𑐵𑑅
𑐣𑑂𑐴𑐸𑐐𑐸 𑐣𑐶𑐫𑐩 𑐎𑐠𑑄 𑐖𑑂𑐰𑐣𑐵 𑐰𑐣𑐾𑐐𑐸 𑐖𑑂𑐰𑐮𑑄 𑐰𑐵𑐎𑐶 𑐖𑐵𑐎𑐶 (𑐳𑐬𑑂𑐰𑐵 𑐎𑐷) 𑐰 𑐎𑐵𑐥 𑐕𑐎𑐹

𑐧𑐵𑐴𑑂𑐬𑐵𑑅𑐩𑐔𑐵 𑐳𑐶𑐟𑐢𑐵𑐳𑐵
𑐧𑐵𑐴𑑂𑐬𑐵 𑐟𑐫𑐵𑐟𑐩𑑂𑐴 𑐩𑐶𑐳𑐵𑐩𑐔𑐵 𑐕𑐸 𑐎𑐵𑐮𑐐𑐟𑐶𑑄 𑐳𑐶𑐣𑐵𑐰𑐣 𑐢𑐵𑐳𑐵 𑐩𑐶𑐳𑐵𑐥𑐶𑑄 𑐟𑐸𑑄 𑐖𑐵𑐣𑐵 𑐧𑐵𑐴𑑂𑐬𑐵 𑐎𑑂𑐰𑐠𑐵𑐫𑑂 𑐢𑐮𑐶𑑄 𑐴𑑀𑐏𑐣𑐵 𑐠𑑅 𑐠𑐵𑐫𑑂 𑐕𑐾𑐬𑐶𑐟𑐸𑑄 𑐐𑐵𑐬𑐾𑐫𑐵𑐣𑐵 𑐕𑐰𑐂𑐐𑐸 𑐔𑐮𑐣 𑐡𑐸 𑑋 𑐩𑐾𑐐𑐸 𑐕𑐸𑐴𑐾 𑐳𑑄𑐳𑑂𑐎𑐵𑐬 𑐫𑐵𑐫𑐾𑐩𑑂𑐰𑐵𑑅 𑑋 𑐧𑐵𑐴𑑂𑐬𑐵 𑐩𑐔𑐵 𑐄𑐳𑐵𑐫𑑄 𑐩𑐣𑑂𑐟 𑐢𑐵𑐳𑐵 𑐁 𑐩𑐾𑐐𑐸 𑐰𑑂𑐫𑐰𑐳𑑂𑐠𑐵 𑐫𑐵𑐎𑐠𑑄 𑐩𑐶𑐳𑐵𑐩𑑂𑐴 𑐜𑐵𑐎𑑂𑐚𑐬 𑐎𑐾𑐣𑐾𑐐𑐸 𑐰𑑂𑐫𑐰𑐳𑑂𑐠𑐵 𑐫𑐵𑐫𑐾𑐦𑐸 𑑋 𑐧𑐵𑐬𑐵 𑐎𑑀𑐛𑐵𑑄 𑐥𑐶𑐎𑐫𑐵 𑐮𑑂𑐰𑐾𑐮𑑄𑐎𑐵 𑐟𑐶𑐣𑐷 𑐴𑐵𑐣𑑄 𑐧𑐵𑐴𑑂𑐬𑐵 𑐟𑐂𑐐𑐸 𑐣𑑄 𑐫𑐵𑐫𑑂𑐦𑐸 𑑋

𑐣𑑂𑐴𑐶𑐎𑑄 𑐎𑐵𑐫𑐾𑐐𑐸
𑐎𑐵𑐫𑑂𑐩𑐔𑐵 𑐎𑐫𑑂𑐟𑐵𑐥𑐹𑐖𑐵 𑐰 𑐩𑑂𑐴𑐵𑐫𑐩𑐔𑐵 𑐧𑐵𑐴𑑂𑐬𑐵 𑐟𑐫𑐾 𑐢𑐸𑐣𑐾𑐰𑑄 𑐠𑑅 𑐐𑐸𑐨𑐵𑐖𑐸 𑐥𑐵𑐏𑐾𑑄 𑐣𑑂𑐴𑐶𑐎𑑄 𑐂𑐔𑑂𑐕𑐵 𑐀𑐰𑐳𑑂𑐟𑐬𑑄 𑐎𑐵𑐫𑐾𑐐𑐸 𑐔𑐮𑐣 𑐡𑐸 𑑋

𑐃𑐴𑐶𑐥𑐵𑑅
𑐎𑐵𑐫𑑂𑐩𑐔𑐵 𑐰𑐵 𑐩𑑂𑐴𑐵𑐫𑑂𑐩𑐔𑐵 𑐣𑑂𑐴𑐫𑐵𑐩𑑂𑐴 𑐴𑐾 𑐖𑐸𑐳𑐵𑑄 𑐗𑐶𑐔𑑂𑐫𑐵𑐡𑑄 𑐡𑐫𑐾𑐰𑑄 𑐧𑑂𑐫𑐵𑐴𑐵 𑐫𑐵𑐫𑐾𑐐𑐸 𑐃 𑐖𑐸𑐂 𑑋 𑐣𑑂𑐴𑐵𑐥𑐵 𑐣𑑂𑐴𑐵𑐥𑐵 𑐩𑐔𑐵𑐣𑐶𑐳𑐾𑑄 𑐧𑑂𑐫𑐵𑐴𑐵 𑐫𑐵𑐣𑐵 𑐧𑐶𑐃𑐐𑐸 𑐔𑐮𑐣 𑐣𑑄 𑐡𑐸 𑑋 𑐧𑑂𑐫𑐵𑐴𑐵𑐫𑐵 𑐣𑐶𑐟𑐶𑑄 𑐡𑐎𑑂𑐎𑐮𑐾 𑐣𑑂𑐴𑐵𑐥𑐵𑑄 𑐠𑑅𑐠𑐶𑐟𑐶, 𑐃𑐲𑑂𑐚𑐩𑐶𑐟𑑂𑐬 𑐰𑐵 𑐮𑐩𑐶𑑄 𑐥𑐵𑐏𑐾𑑄 𑐨𑑁𑐩𑐔𑐵 𑐩𑐵𑐮𑐾𑐐𑐸 𑐰𑐵 𑐔𑐸𑐮𑐵𑐎𑐾𑐐𑐸 𑐏𑑄 𑐖𑐸𑐂 𑑋 𑐮𑑂𑐰𑐩𑑂𑐴 𑐖𑑂𑐫𑐹𑐩𑑂𑐴 𑐠𑐾𑑄 𑐏𑐣𑐾𑐡𑐟𑑅 𑐢𑐵𑐳𑐵 𑐨𑑁𑐩𑐔𑐵 𑐖𑐸𑐂𑐩𑑂𑐴𑐾𑐳𑐶𑐐𑐸 𑐖𑐵𑐟𑑅 𑐴𑐫𑐵 𑐖𑑂𑐫𑑀𑐟𑐶𑐲𑐫𑐵𑐠𑐵𑐫𑑂 𑐖𑐵𑐟𑑅 𑐟𑐹 𑐩𑐟𑐹, 𑐖𑑂𑐫𑐹, 𑐩𑐖𑑂𑐫𑐹, 𑐎𑑂𑐫𑐣𑐵 𑐳𑑂𑐰𑐂 𑑋 𑐖𑐵𑐟𑐎𑑄 𑐟𑐸𑐐𑐸 𑐖𑐸𑐮 𑐢𑐵𑐳𑐵 𑐣𑐶𑐏𑑂𑐫𑑄, 𑐥𑐵𑐏𑐾𑑄 𑐣𑑄 𑐣𑑂𑐫𑐣𑐾𑐎𑐣𑐾 𑐫𑐵𑐣𑐵 𑐠𑑅𑐐𑐸 𑐖𑑂𑐫𑐹𑐐𑐸 𑐏𑑄 𑐎𑑂𑐰𑐕𑐶𑐂𑐟 𑐐𑑂𑐰𑐫𑑂 𑐧𑐶𑐂𑐐𑐸 𑐰𑐵 𑐎𑐵𑐫𑐾𑐐𑐸 𑐏𑑄 𑐎𑑂𑐰𑑅𑐕𑐶𑐂 𑑋 𑐁𑐫𑐵𑐐𑐸 𑐔𑐮𑐣 𑐎𑐠𑑄 𑐂𑐴𑐶𑐥𑐵 𑐥𑐎𑑂𑐎𑐵 𑐫𑐵𑐫𑑂𑐎𑐠𑑄 𑐨𑑁𑐩𑐔𑐵 𑐖𑐸𑐂𑐩𑑂𑐴𑐾𑐳𑐶𑐐𑐸 𑐕𑐾𑑃 𑐢𑑁 𑐕𑐐𑑅 𑐰𑐷𑐫𑐵 𑐳𑑂𑐰𑐵𑐥𑐸 𑐟𑐫𑐾𑐐𑐸 𑐫𑐵𑐂 𑑋 𑐐𑑂𑐰𑐾 𑐴𑐫𑑂𑐐𑐸 𑐏𑑄 𑐮𑐶𑐥𑐵 𑐎𑑀𑐕𑐷 𑑋

𑐐𑑂𑐰𑐫𑑂 𑐧𑐶𑐫𑐾𑐐𑐸
𑐩𑑂𑐴𑐵𑐫𑑂𑐩𑐔𑐵 𑐰 𑐎𑐵𑐫𑑂𑐩𑐔𑐵𑐫𑐵 𑐖𑐵𑐟𑑅 𑐎𑑂𑐫𑐣𑐵 𑐟𑐸𑐐𑐸 𑐖𑐸𑐮𑐢𑐵𑐳𑐵 𑐣𑑂𑐫𑐣𑐾𑐎𑐣𑐾𑐫𑐵𑐣𑐵 𑐃𑐴𑐶𑐥𑐵 𑐫𑐵𑐫𑐾𑐐𑐸 𑐎𑑂𑐰𑐕𑐶𑐂𑐐𑐸 𑐎𑐠𑑄 𑐐𑑂𑐰𑐫𑑂 𑐰𑐷𑐐𑐸 𑐖𑑂𑐫𑐵 𑐖𑐸𑐂 𑑋 𑐄𑐧𑐮𑐾 𑐳𑐸𑐎𑐸𑐣𑑂𑐡𑐵 𑐥𑐹𑐖𑐵𑐫𑐵𑐣𑐵 𑐨𑑁𑐩𑐔𑐵𑐫𑐵𑐟 𑐳𑐶𑐣𑑂𑐴 𑐟𑐶𑐎𑐵 𑐐𑑂𑐰𑐫𑑂 𑐧𑐶𑐂 𑑋 𑐐𑑂𑐰𑐫𑑂 𑐧𑐶𑐂 𑐢𑐸𑑄𑐎𑐵 𑐨𑑁𑐩𑐔𑐵 𑐩𑐶𑐖𑐩𑐔𑐵𑐫𑐵𑐐𑐸 𑐴𑐎𑐡𑐵𑐬 𑐖𑐸𑐳𑐵𑑄 𑐮𑐩𑐶𑑄𑐫𑐵 𑐖𑐶𑐩𑑂𑐩𑐵𑐫𑑂 𑐮𑐵𑐂 𑑋 𑐐𑑂𑐰𑐫𑑂 𑐧𑐶𑐃 𑐢𑐸𑑄𑐎𑐵 𑐣𑐶𑐳𑐾 𑐨𑑁𑐩𑐔𑐵 𑐎𑐵𑑅𑐩𑐰𑐟𑐮𑐾 𑐕𑐸𑑄 𑐐𑐟𑐶 𑐖𑐸𑐫𑐵 𑐳𑐶𑐟𑐢𑐵𑐳𑐵 𑐦𑐸𑐎𑑂𑐎 𑐳𑑄𑐳𑑂𑐎𑐵𑐬 𑐮𑐩𑐶𑑄 𑐫𑐵𑐫𑐾𑐩𑐵𑑅 𑑋 𑐄𑐎𑐶𑐫𑐵𑐟 𑐮𑑅𑐩𑐶 𑐡𑐸𑐏 𑐔𑑂𑐰𑐣𑐶𑐐𑐸 𑐢𑐵𑐃𑐐𑐸 𑐔𑐮𑐣 𑐡𑐸 𑑋
𑐐𑑂𑐰𑐫 𑐧𑐷𑐐𑐸 𑐏𑐸𑐣𑑂𑐴𑐸 𑐮𑑅𑐩𑐶𑑄 𑐎𑑂𑐰𑐫𑑂𑐫𑐵 𑐖𑑂𑐰𑐮𑑄 𑐖𑑂𑐰𑐣𑐵 𑐐𑑂𑐰𑐫𑑂 𑐧𑑂𑐫𑐹 𑐰𑐣𑐶 𑑋
𑐎) 𑐐𑑀 𑐐𑑂𑐰𑐫𑑂 𑑑𑑐 𑐐 (𑐗𑐶𑐐𑑅) 𑐏) 𑐢𑑁 𑑑 𑐐
𑐐𑑂𑐰𑐫𑑂 𑐰𑐶𑐫𑑄𑐎𑐷 𑐰𑐮𑐾 𑐖𑑂𑐰𑐣𑐵 𑐰𑐣𑐾𑐐𑐸 𑐖𑑂𑐰𑐮𑑄 ((𑐁 𑐫𑐵𑐐𑐸 𑐰𑐶𑐢𑐶 𑐎𑐠𑑄) 𑑅
𑐐𑑂𑐰𑐫 𑐧𑐵𑐟𑐵 𑑑 𑐐 𑐢𑑁 𑑑 𑐐
𑐮𑐵𑐥𑐵𑑅 𑑑𑐥𑐵 𑐳𑐶𑐳𑐵𑐧𑐸𑐳𑐵 𑑒 𑐐𑐸 𑐎𑐶𑐳𑑂𑐟𑐶
𑐠𑑂𑐰𑐥𑐵𑑅 𑑑 𑐥𑐵 𑐩𑐬𑐶𑐔𑐬𑐶 𑑒 𑐐𑐸 𑐎𑐶𑐳𑑂𑐟𑐶
𑐐𑑂𑐰𑐫𑑂 𑐳𑐵𑐰𑐮𑐾 𑐡𑐸𑐐𑐸 𑐢𑑂𑐫𑐰𑐵 𑐮𑐩𑐷𑑄 𑐮𑑂𑐫𑐵𑐏𑐣𑐵 𑐨𑐩𑑂𑐔𑐷𑐟 𑐧𑐶𑐂 𑑋

𑐥𑐫𑑂𑐣 𑐖𑐵 𑐣𑐎𑐷𑐐𑐸
𑐧𑐶𑐫𑐵 𑐕𑑂𑐰𑐂𑐩𑑂𑐴 𑐩𑑂𑐴𑐫𑐵𑐫𑑂 𑐩𑐔𑐵𑐫𑐵𑐟 𑐣𑐶𑐣𑐶 𑐥𑐵𑐖𑐸 𑐥𑐶𑑄𑐳 𑐥𑐫𑑂𑐣 𑐧𑐷 𑐣𑑂𑐴𑐫𑑀 𑐠𑑅𑐐𑐸 𑐕𑐾 𑐳𑐟𑐵 𑐥𑐫𑐣𑑄 𑐖𑐵 𑐣𑐎𑐾𑐐𑐸 𑐫𑐵𑐂 𑑋

𑐎𑐮𑑂𑐫𑐵 𑐣𑑂𑐴𑐫𑐵𑐎𑑅 𑐰𑐣𑐾𑐐𑐸
𑐨𑑁𑐩𑐔𑐵 𑐎𑐵𑑅𑐰𑐣𑐾 𑐔𑑂𑐫𑐵𑐣𑑂𑐴𑐹 𑐣𑑂𑐴𑐫𑑅 𑐧𑐵𑐖𑐸𑐩𑑂𑐴 𑐰 𑐮𑐩𑐶 𑐨𑑁𑐩𑐔𑐵𑐫𑐵 𑐕𑐾𑑃 𑐰𑐣𑐵 𑐎𑐮𑑂𑐫𑐵𑑄 𑐣𑑂𑐴𑑂𑐫𑐵𑐎𑑅 𑐰𑐣𑐾𑐐𑐸 𑐔𑐮𑐣 𑐡𑐸 𑑋 𑐠𑑂𑐰 𑐏𑐸𑐣𑑂𑐴𑐸 𑐎𑑂𑐰𑐫𑑂 𑐣𑑂𑐴𑐠𑐣𑐵 𑐎𑐠𑑄𑐫𑐵 𑐖𑑂𑐰𑐮𑑄 𑐖𑑂𑐰𑐣𑐵 𑐰𑐣𑐾𑐩𑐵𑑅
𑐎) 𑐎𑑀𑐟𑑅 𑑑 𑐖𑑂𑐰𑐮𑑄 𑐏) 𑐢𑑁 𑑑 𑐐
𑐏) 𑐩𑐬𑐶𑐎𑐳𑐶 𑑑 𑐐 𑐑) 𑐮𑐏𑐵 𑐳𑑂𑐰𑐬𑐸𑐥 𑐣𑐶𑐎𑑅 𑐩𑐴𑑂𑐬𑐶–𑐩𑐵𑐎𑑂𑐎𑑀 (𑐠𑑂𑐰 𑐩𑐬𑐶𑐎𑐳𑐶 𑐟𑐫𑐾𑐐𑐸)
𑐒) 𑐥𑑂𑐫𑐵 𑐣𑑂𑐫𑐵 𑑒 𑐩𑐣𑐵 𑐔) 𑐳𑑄 𑐣𑑂𑐫𑐵 𑑒 𑐩𑐣𑐵
𑐕) 𑐴𑐶𑑄 𑐮𑐵 𑑑𑑘 𑐎𑐸 𑐖) 𑐟𑐎𑐹 𑐮𑐵 𑑑𑑘 𑐎𑐸
𑐗) 𑐳𑐾𑑄 𑐮𑐵 𑑑𑑘 𑐎𑐸 𑐘) 𑐥𑑄 𑐮𑐵 𑑑𑑘 𑐎𑐸
𑐚) 𑐐𑑂𑐰𑑅 𑐮𑐵 𑑑𑑘 𑐎𑐸 𑐛) 𑐮 𑐥𑐶 𑑑𑑘 𑐐𑑂𑐰
𑐜) 𑐣𑑂𑐫𑐵 𑐩𑐴𑑂𑐬𑐶 𑑔 𑐩𑑂𑐴 𑐝) 𑐧𑑂𑐫𑐵𑑃𑐔𑐵𑐩𑐴𑑂𑐬𑐶 𑑔 𑐩𑑂𑐴
𑐞) 𑐳𑐟𑐦𑐮𑐶𑑄 𑐩𑐴𑑂𑐬𑐶 𑑔 𑐩𑑂𑐴 𑐟) 𑐟𑐟𑐵𑐐𑐸 𑐀𑐫𑑂𑐠𑐵𑐩𑐬𑐶 𑑒 𑐟𑐵
𑐠) 𑐩𑐳𑑂𑐮𑐵 𑐥𑑀 𑑑𑑘 𑐥𑑀 𑐡) 𑐐𑑂𑐰𑐵𑑅 𑑑𑑘 𑐧𑑂𑐫𑐾
𑐢) 𑐳𑐶𑐳𑐵𑐧𑐸𑐳𑐵 𑐠𑐐𑐸 𑐐𑐔𑑂𑐕𑐾𑐣𑐸𑐳𑐵𑐬 𑐣) 𑐧𑐖𑐶 𑑑 𑐦𑐵 𑐣𑐶𑐳𑐾𑑄 𑑕 𑐦𑐵
𑐥) 𑐏𑐾𑑄 𑑑𑑘 𑐐 𑐦) 𑐣𑑂𑐫𑐵𑑅 𑑒𑑐 𑐩𑑂𑐴
𑐧) 𑐠𑑂𑐰𑑅 𑑒 𑐑𑑁 𑐨) 𑐮𑐵 𑐎𑐰𑐵𑐦 𑑑 𑐡𑐾𑐩𑐵
𑐩) 𑐌 𑑑𑑘 𑐥𑐵 𑐫) 𑐖𑑀 𑐥𑐳𑑂𑐟𑐵𑑅 𑑑𑑘 𑐥𑐵
𑐬) 𑐀𑐠𑑂𑐫𑐵𑐩𑐴𑑂𑐬𑐷 𑑑𑑘 𑐟𑐵 𑐮) 𑐐𑐸𑐮𑐶𑐩𑐬𑐶 𑑑 𑐎𑐶𑐳𑑂𑐟𑐷
𑐰) 𑐟𑐸𑐩𑐵 𑑔 𑐥𑐸 𑐳) 𑐎𑐮𑑂𑐫𑐵 𑑑 𑐖𑑂𑐰𑑅

𑐠𑑂𑐰 𑐖𑑂𑐰𑐣𑐵 𑐰𑐐𑐸 𑐖𑑂𑐰𑐮𑑄 𑐦𑐸𑐎𑑂𑐎 𑐨𑑁𑐩𑐔𑐵𑐫𑐵 𑐕𑐾𑑄𑐫𑑂 𑐧𑑂𑐰𑐫𑐾𑐩𑐵 𑑋 𑐀𑐮𑐾 𑐧𑐵𑐖𑐸𑐩𑑂𑐴 𑐨𑑁𑐩𑐔𑐵𑐫𑐵𑐟 𑐎𑐮𑑂𑐫𑐵𑑄 𑐣𑑂𑐴𑐫𑐵𑐎𑐶𑐂 𑑋 𑐠𑑁𑑄𑐎𑐣𑑂𑐴𑐾 𑐎𑐮𑑂𑐫𑐵𑑄 𑐣𑑂𑐴𑑂𑐫𑐵𑐎 𑐰𑐣𑐾𑐐𑐸 𑐔𑐮𑐣 𑐩𑐫𑐵𑐫𑐾 𑐢𑐸𑑄𑐎𑐮 𑑋 𑐄𑐎𑐶𑑄 𑐐𑑂𑐰𑐾 𑐫𑑄𑐎𑐾𑐐𑐸 𑐢𑐫𑐵 𑐰𑑂𑐫𑐰𑐴𑐵𑐬 𑐕𑑂𑐫𑐮𑐵 𑐔𑑂𑐰𑑄𑐐𑐸 𑐖𑐸𑐮 𑑋 𑐔𑑂𑐰𑐾𑐫𑑂 𑐣𑑂𑐴𑑂𑐫𑐠𑐟𑑅𑐐𑐸 𑐖𑑂𑐰𑐮𑑄 𑐫𑑄𑐎𑐾𑐐𑐸 𑐩𑐫𑐵𑐫𑐾 𑐢𑐸𑑄𑐎𑐮 𑑋

𑐥𑐫𑑂𑐣𑐧𑐶𑐫𑐵 𑐨𑑂𑐰𑐫𑑂
𑐩𑑂𑐴𑐵𑐫𑑂𑐩𑐔𑐵 𑐧𑐶𑐫𑐵 𑐕𑑂𑐰𑐫𑑂 𑐕𑐣𑑂𑐴𑐹 𑐣𑑂𑐴𑑂𑐫 𑐥𑐫𑐣𑑄𑐧𑐶𑐫𑐵 𑐨𑑂𑐰𑐫𑑂 𑐣𑐎𑐷 𑑋 𑐨𑑂𑐰𑐫𑑂 𑐰𑑅 𑐥𑐶𑑄𑐳 𑐐𑑂𑐰𑐫𑑂 𑐦𑐫𑐵 𑐩𑑂𑐴𑐫𑐩𑐔𑐵𑐫𑐵𑐟 𑐎𑑂𑐰𑐳𑑅 𑐣𑑄 𑐧𑐶𑐂 𑑋 𑐐𑑂𑐰𑐾 𑐳𑐵𑐫𑐾𑐎𑐾 𑐧𑐮𑐫𑑂 𑐩𑐶𑐖𑑄𑐫𑐵 𑐕𑐾𑑄𑐥𑐵𑐏𑐾𑑄 𑐮𑐩𑐷𑑄 𑐐𑑂𑐰𑐾 𑐧𑐵𑐚𑐵 𑐰 𑐐𑑂𑐰𑐾 𑐴𑐂 𑑋 𑐐𑑂𑐰𑐾 𑐳𑐵𑐫𑑂𑐎𑐾 𑐣𑑂𑐴𑐫𑑀 𑐣𑐶𑐐÷𑐣𑐶𑐐 𑐐𑑂𑐰𑐾 𑐦𑑂𑐫𑐵𑐎𑐷 𑑋 𑐨𑐩𑐔𑐶𑐫𑐵𑐟 𑐐𑑂𑐰𑐾 𑑑𑑐 𑐐𑑅 𑐮𑑂𑐴𑐵𑐟𑐫𑑂 𑐟𑐫𑐎𑐵 𑐐𑑂𑐰𑐾 𑐳𑐵𑐫𑐎𑐷 𑑋 𑐳𑑂𑐫𑐵𑐥𑐶𑑄 𑐦𑐸𑐎𑐶 𑐧𑐵𑐎𑐵 𑐰 𑐂𑐲𑑂𑐚𑐩𑐶𑐟𑑂𑐬 𑐫𑐵𑐎𑐾 𑐐𑑂𑐰𑐾 𑐮𑐶𑐟 𑐩𑐎𑐵𑐫𑑂𑐐𑐸 𑐣𑑄 𑐫𑐵𑑅 𑑋 𑐥𑐵𑐖𑐸𑑄 𑐧𑐶𑐫𑐵 𑐕𑑂𑐰𑐂𑐩𑑂𑐴 𑐨𑐶𑐣𑐵𑐩𑐔𑐵𑐫𑐵𑐟 𑐔𑑂𑐰𑐮𑐫𑑂 𑐎𑑂𑐰𑐳𑑅 𑐧𑐶𑐂𑐩𑐵𑐐𑐸 𑐔𑐮𑐣 𑐡𑐸 𑑋 𑐳𑑂𑐫𑐵𑐥𑐶𑑄 𑐠𑑅𑐠𑐶𑐟𑐶 𑐰 𑐐𑐸𑐠𑐶𑐫𑐵𑐬𑐟𑐫𑑂𑐟 𑐖𑑂𑐫𑐵𑐫𑑂 𑐟𑐫𑐾𑐩𑐵𑐐𑐸 𑐔𑐮𑐣 𑐣𑑄 𑐣𑐸 𑑋 𑐀𑐠𑐾 𑐟𑑅𑐖𑐶𑐎 𑐨𑑂𑐰𑐫𑑂 𑐣𑑂𑐫𑐵𑐫𑐾𑐎𑐶𑐧𑐮𑐫𑑂 𑐩𑐹 𑐨𑑂𑐰𑐫𑑂 𑐕𑐸𑑄 𑐡𑐶 𑐣𑑂𑐴𑑂𑐫𑑅 𑐥𑐶𑐟𑐺𑐫𑐵 𑐣𑐵𑐩𑑄 𑐱𑑂𑐬𑐵𑐡𑑂𑐢 𑐫𑐵𑐫𑐾𑐩𑐵𑐐𑐸 𑐥𑐬𑐩𑑂𑐥𑐬𑐵 𑐡𑐸 𑑋 𑐟𑑅𑐖𑐶𑐎 𑐥𑐫𑑂𑐣𑐧𑐶𑐫𑐵 𑐨𑑂𑐰𑐫𑑂 𑐣𑑂𑐫𑐵𑐎𑐶 𑐧𑐮𑐫𑑂 𑐎𑑂𑐰𑐫𑑂 𑐣𑑂𑐴𑐠𑐣𑐵 𑐎𑐠𑑄 𑐗𑐶𑐔𑑂𑐫𑐵𑐟𑐵 𑐧𑑂𑐰𑐟𑐵𑑄 𑐏𑐵𑐫𑐾𑐩𑐵𑑅 𑑋
𑐎) 𑐥𑐵𑐮𑐸 𑐏) 𑐩𑐸𑐳𑑂𑐫𑐵𑐧𑐸𑐃 𑐐) 𑐌 𑐑) 𑐎𑐳𑐸𑐧𑐹𑐃 𑐒) 𑐏𑐫𑑂𑐥𑐶
𑐔) 𑐔𑐫𑑂𑐥𑐶 𑐕) 𑐢𑑁 𑐑𑐵𑐳𑐵 𑐖) 𑐴𑐶𑑄𑐮𑐵 𑐗) 𑐥𑑄𑐮𑐵 𑐘) 𑐩𑐹𑐮𑐵
𑐚) 𑐳𑐾 𑐥𑐸𑐎𑐵 𑐛) 𑐐𑑀𑐥𑐸𑐎𑐵 𑐜) 𑐏𑐾𑑄 𑐝) 𑐣𑑂𑐫𑐵 𑐞) 𑐐𑐸𑐮𑐶𑐩𑐬𑐶
𑐟) 𑐎𑑅𑐳𑐹 𑐠) 𑐮𑐵𑐥𑐶 𑐡) 𑐏𑑁𑐎𑑂𑐰𑐵 𑐑) 𑐎𑐵𑐮𑐵𑐎𑐸𑐮𑐸

𑐨𑑁𑐩𑐔𑐵 𑐎𑐵𑑅𑐰𑐣𑐾𑐐𑐸
𑐨𑑁𑐩𑐔𑐵 𑐎𑐵𑑅 𑐰𑐣𑐾 𑐏𑐸𑐣𑑂𑐴𑐸 𑐧𑑂𑐰𑐣𑐵𑐟𑐥𑐶𑑄 𑐠𑑅 𑐠𑐶𑐟𑐶, 𑐥𑐵𑐳𑐵𑐨𑐵𑐂 𑐳𑐎𑐮𑐫𑐵 𑐖𑐣𑑂𑐟 𑐩𑐸𑑄𑐎𑐶 𑑋 𑐖𑐣𑑂𑐟 𑐰𑐣𑐾𑐣𑑂𑐴𑐫𑑂 𑐳𑐎𑐳𑐶𑐟𑑄 𑐥𑐵𑑄𑐴𑐵 𑐫𑐵𑐎𑐵 𑐩𑑀𑐳𑐶𑐥𑑂𑐰𑑅 𑐧𑐶𑐫𑐵 𑐖𑐣𑑂𑐟 𑐣𑑂𑐴𑐵𑐎𑐷 𑑋 𑐖𑐣𑑂𑐟𑐫𑑂 𑐥𑑄𑐔 𑐧𑐵𑐖𑐵 𑐠𑐵𑐎𑐵 𑐩𑐸𑐏𑑅𑐳𑑂𑐰𑐵𑑄, 𑐳𑐸𑐎𑐸𑐣𑑂𑐡𑐵 𑐰 𑐖𑑀𑐎𑑀𑐟𑑅 𑐖𑑂𑐰𑑄𑐎𑐵 𑐕𑑂𑐰𑐂 𑑋 𑐖𑑀𑐎𑑀𑐟𑐳𑑄 𑐥𑐵𑐳𑑂𑐰𑐵𑑃, 𑐏𑐵𑐮𑐶 𑐐𑑂𑐰𑐵 𑐐𑑂𑐰𑐫𑑂 𑐔𑐸𑑄, 𑐢𑑁 𑐥𑐟𑐷, 𑐳𑐶𑐣𑑂𑐴 𑐩𑐹, 𑐥𑑀𑐟𑐵𑐫𑑂 𑐔𑐹𑑄, 𑐱𑑂𑐬𑐷 𑐏𑐞𑑂𑐜, 𑐡𑐫 𑐥𑑁, 𑐥𑐵𑐐𑑂𑐰𑐾, 𑐎𑐳𑑂𑐟𑐸𑐬𑐷 𑐧𑐶, 𑐥𑐸𑐟𑐸 𑐐𑑂𑐰𑐫𑑂, 𑐣𑑂𑐫𑐵𑐳 𑐑𑐵𑑅, 𑐳𑑂𑐰𑐵𑑃 𑐖𑐵𑐎𑐶 𑐟𑐫𑐵 𑐫𑑄𑐎𑐶 𑑋 𑐧𑑂𑐫𑐵𑑅𑐫𑐵 𑐥𑐵𑐏𑐾𑑄 𑐮𑐩𑐶𑐫𑐵𑐟 𑐰𑐳𑑅 𑐖𑐸𑐔𑑂𑐕𑐷 𑐧𑐷𑐩𑐵 𑑋 𑐰𑐴𑐾 𑐰𑐳𑑅 𑐥𑐸𑐣𑐵 𑐮𑐩𑐶 𑐖𑐣𑑂𑐟𑐫𑑂 𑐰𑐫𑐾𑐩𑐵 𑑋 𑐨𑑁𑐩𑐔𑐵𑐫𑐵 𑐕𑐾𑑄𑐫𑑂 𑐖𑐣𑑂𑐟 𑐠𑑂𑐫𑐣𑐾𑐰 𑐮𑐳𑐎𑐸𑐳𑐫𑐵𑐣𑐵 𑐡𑐸𑐎𑐵𑐂 𑑋 𑐀𑐣𑑄 𑐖𑐣𑑂𑐟 𑐰𑐥𑐶𑑄𑐟 𑐩𑑀𑐳𑐶𑐥𑑂𑐰𑑅 𑐐𑑂𑐰𑐵𑑅 𑐧𑐶𑐂𑐩𑐵 𑑋 𑐨𑑁𑐩𑐔𑐵𑐫𑐵 𑐕𑐾𑑄𑐫𑑂𑐔𑑂𑐰𑐣𑐾 𑐩𑐵𑐎𑑂𑐎𑑀 𑐔𑑂𑐰𑐣𑐵 𑐩𑐾𑐥𑐶𑑄 𑐖𑐣𑑂𑐟 𑐕𑐾𑑄 𑐮𑐶𑐴𑐵𑑄 𑐰𑐣𑐶 𑑋 𑐀𑐣 𑐔𑑂𑐰𑑄𑐥𑐶𑑄 𑐦𑐸𑐎𑑂𑐎𑐳𑐶𑐟 𑐥𑐵𑑄𑐴𑐵 𑐫𑐵𑐫𑐾𑐩𑐵 𑑋 𑐖𑐣𑑂𑐟𑐷 𑐰𑐥𑐶𑑄 𑐨𑐩𑑂𑐔𑐷𑐫𑐵 𑐕𑐾𑑄 𑐠𑑂𑐫𑐾𑐣𑐶 𑐠𑐾 𑐔𑑂𑐰𑐣 𑐢𑐵𑐫𑑂𑐰𑑄, 𑐖𑑀𑐎𑑀𑐟𑑅 𑐖𑑀𑐩𑑂𑐴, 𑐥𑑄𑐔 𑐧𑐵𑐖𑐵 , 𑐡𑐹 𑐖𑑂𑐰𑐣𑐶𑐥𑐶𑑄 𑐣𑑂𑐴𑐵𑐥𑐵 𑐮𑐵𑐎𑑂𑐎 𑐰𑐣𑐵 𑐮𑐸𑐏𑐵𑐫𑐵 𑐳𑐶𑐠𑐾 𑐡𑐸 𑐢𑑄𑐎𑑂𑐫 𑐩𑐵𑑅 𑑋 𑐀𑐮𑐾 𑐥𑑄𑐔 𑐧𑐵𑐖 𑐮𑐶𑐴𑐵𑑄 𑐰𑐣𑐵 𑐴𑐵𑐣 𑐖𑐣𑑂𑐟𑐷 𑐣𑐵𑐥𑑄 𑐰𑐂 𑑋

𑐩𑑂𑐴𑐵𑐫𑐩𑐔𑐵 𑐥𑐶𑐟 𑐧𑐶𑐂𑐐𑐸
𑐩𑑂𑐴𑐵𑐫𑐩𑐔𑐵 𑐥𑐶𑐟 𑐧𑐶𑐂𑐐𑐸 𑐏𑐸𑐣𑑂𑐴𑐸 𑐨𑑁𑐩𑐔𑐵 𑐖𑐸𑐂𑐩𑑂𑐴𑐾𑐳𑐶𑐟 𑐣𑐶𑐣𑐶, 𑐟𑑅𑐩𑐵 𑐰 𑐥𑐵𑐳𑐵𑐥𑐶𑑄 𑐔𑑂𑐰𑐣𑐵 𑐳𑐩𑐵
𑐫𑐵𑐎𑐶𑐂 𑑋 𑐠𑑂𑐰 𑐃𑐮𑐫𑑂 𑐠𑑅𑐐𑐸 𑐕𑐾𑑄 𑐟𑑂𑐰𑐟𑐵𑑅 𑐣𑑂𑐴𑐹𑐐𑐸 𑐕𑐾𑑄 𑐣𑑂𑐴𑐹𑐥𑐶𑑄 𑐩𑐣𑐸𑐟𑑅 𑐣𑐵𑐥 𑐰𑑂𑐴𑐣𑐵 𑐔𑑂𑐰𑐣𑐾𑐧𑐮𑐾 𑐀𑐣 𑐐𑐸𑐖𑑂𑐰𑐐𑐸 𑐎𑐠𑑄𑐫𑐵 𑐳𑐩𑑂𑐧𑐣𑑂𑐢 𑐰 𑐰𑑂𑐫𑐰𑐴𑐵𑐬 𑐖𑐸𑐂, 𑐨𑐵𑐟𑐣𑐵𑐥 𑐖𑐸𑐂𑐐𑐸 𑐐𑑀𑐥𑑂𑐫 𑐳𑐩𑑂𑐧𑐣𑑂𑐢 𑐥𑐵𑐏𑐾 𑐠𑑅𑐐𑐸 𑐖𑐷𑐰𑐣𑐫𑑂 𑐐𑐸𑐖𑑂𑐰𑐐𑐸 𑐎𑐠𑑄𑐫𑐵 𑐥𑑂𑐬𑐨𑐵𑐰 𑐮𑐵𑐃 𑐢𑐿𑐐𑐸 𑐰𑐶𑐲𑐫𑐮𑐫𑑂 𑐐𑑀𑐥𑑂𑐫 𑐱𑐶𑐎𑑂𑐲𑐵 𑐧𑐶𑐂 𑑋
𑐐𑐸𑐨𑐵𑐖𑐸𑑄 𑐳𑐸𑐎𑐸𑐣𑑂𑐡𑐵 𑐥𑐹𑐖𑐵𑐫𑐵𑐣𑐵 𑐨𑑁𑐩𑐔𑐵𑐫𑐵𑐟 𑐐𑑂𑐰𑐫𑑂 𑐳𑐵𑐫𑑂𑐎𑐾 𑐣𑑂𑐴𑑂𑐫𑑀 𑐡𑑂𑐫𑑅 𑐥𑐶𑐣𑑂𑐟 𑐣𑐶𑐐𑑂𑐰, 𑐣𑐶𑐐𑑂𑐰 𑐐𑑂𑐰𑐫𑑂 𑐦𑑂𑐫𑐵𑐫𑑂 𑐢𑐸𑐣𑐾𑐰𑑄 𑐦𑐸𑐎𑐶 𑐧𑐵𑐎𑐵 𑐥𑐶𑐣𑑂𑐟 𑐰 𑐕𑐾𑑄 𑐖𑑅 𑐥𑐶𑐣𑑂𑐟 𑐐𑑂𑐰𑐫𑑂 𑐎𑑀𑐎𑐵𑐮𑐷𑑄 𑐣𑐳𑐾 𑐳𑐵𑐫𑑂𑐎𑐷 𑐰 𑐎𑑂𑐰𑐳 𑐮𑐮𑑂𑐴𑐵𑐂 𑑋 𑐩𑐵𑐩𑑂𑐴 𑐰 𑐧𑑁𑐩𑑂𑐴 𑐳𑐶𑐣𑑄 𑐡𑐎𑐾 𑐮𑐶𑐥𑐵 𑐐𑑂𑐰𑐫𑑂 𑐳𑐵𑐂 𑑋 𑐐𑑂𑐰𑐫𑑂 𑐮𑐶𑐟 𑐩𑐧𑐷𑐐𑐸 𑐔𑐮𑐣 𑐡𑐸 𑐡𑐫𑑄 𑐥𑑁, 𑐥𑐵𑐐𑑂𑐰𑐾, 𑐎𑐳𑑂𑐟𑐸𑐬𑐷 𑐰𑐶, 𑐀𑐮𑐾 𑐢𑑁 𑐳𑐐𑑄, 𑐏𑐾𑑄 𑐳𑐐𑑄 𑐧𑐶𑐫𑐵 𑐠𑐵𑐫𑑂𑐨𑐹 𑐨𑑂𑐰𑐫 𑐣𑑂𑐴𑐫𑑂𑐔𑐵𑐎𑐶 𑑋 𑐠𑐵𑐫𑑂𑐨𑐹 𑐨𑑂𑐰𑐫𑑂 𑐣𑐎𑐾 𑐳𑐶𑐢𑐫𑐰𑐾 𑐕𑑂𑐰𑐵𑐳𑐫𑑂 𑐰𑐵𑐫𑑂𑐫𑑄𑐎𑐷 𑐨𑑁𑐩𑐔𑐵 𑐥𑐶𑐟 𑐧𑐶𑐣𑑂𑐴𑐫𑑂𑑅 𑐳𑑂𑐰𑐵𑐣𑐾 𑐦𑐸𑐳𑐫 𑐧𑑁 𑐰 𑐩𑐵𑐩𑑂𑐴𑐾𑐳𑐶𑐟 𑐐𑑂𑐰𑐫, 𑐥𑐸𑐟𑐸 𑐐𑑂𑐰𑐫𑑂 𑐳𑐵𑐫𑑂𑐐𑐸 𑐖𑑂𑐫𑐵 𑐫𑐵𑐂 𑑋 𑐨𑐩𑑂𑐔𑐵 𑐎𑑀𑐟 𑐴𑐫𑐵 𑐳𑑂𑐰𑐵𑐣𑐾 𑐧𑐵𑑅 𑐮𑐾 𑐠𑑂𑐫𑐣𑐾 𑐰𑑄 𑐣𑐶𑐩𑑂𑐴 𑐳𑐩𑑂𑐢𑐷 𑐳𑐩𑑂𑐢𑐷 𑐡𑐣𑐵 𑐡𑐫𑐥𑑁𑐮𑐾 𑐩𑑀𑐴 𑐳𑑀𑐩𑑂𑐴𑑅 𑐥𑐵𑐐𑑂𑐰𑐾, 𑐥𑐸𑐟𑐸𑐐𑑂𑐰𑐾, 𑐎𑐳𑑂𑐟𑐸𑐬𑐷 𑐥𑐸 𑐟𑐫𑐵 𑐡𑐾𑐥𑑁 𑐫𑐵 𑐎𑐸𑑄𑐎𑐸𑑄 𑐖𑑂𑐰𑐣𑐵 𑐳𑑂𑐰𑐔𑐵 𑐔𑐵𑐴𑐶𑐎𑐷 𑑋 𑐨𑑁𑐩𑐔𑐵 𑐧𑑁𑐩𑑂𑐴 𑐮𑐸𑐎𑐸𑑄 𑐕𑐶𑐣𑐵 𑐡𑐸𑑅𑐖𑐳𑐶 𑐳𑑂𑐰𑐎 𑐔𑐵𑐴𑐶𑐎𑐵 𑐡𑐸𑐮𑐶𑐃 𑐟𑐿 𑑋 𑐨𑑁𑐩𑐔𑐵𑐫𑐵 𑐟𑐸𑐟𑐶 𑐎𑑂𑐰𑐫𑑂 𑐮𑐶 𑐧𑐵𑐟𑐵 𑐰 𑐁𑐩𑐏𑑀𑐬𑐵 𑐡𑐂 𑑋 𑐧𑐵𑐖𑐸𑐩𑑂𑐴 𑐡𑐸 𑐦𑐵𑑄𑐐𑐵 𑐦𑐵𑐫𑐾𑐎𑐵𑑅 𑐨𑑁𑐩𑐔𑐵 𑐣𑑂𑐴𑐫𑐵𑐎𑐾 𑐢𑐸𑑄𑐎𑐵 𑐩𑐹 𑐐𑐞𑐾𑐡𑑂𑐫𑑅 𑐫𑐵 𑐣𑑂𑐴𑐫𑐣𑐾 𑐣𑐶𑐏𑑅𑐮𑐫𑐵 𑐐𑐸𑐨𑐵𑐖𑐸𑐥𑐶𑑄 𑐔𑑂𑐰𑐣𑐵𑑅 𑐧𑐶𑐔𑐵 𑐏𑑄 (𑐨𑑁𑐩𑐔𑐵 𑐏) 𑐮𑑂𑐴𑐵𑐂 𑑋
𑐡𑐸𑐮𑑂𑐫𑐵 (𑐨𑐮𑑂𑐫𑐵) 𑐟𑐫𑑂𑐳𑑄 𑐎𑑂𑐰𑐧𑐶𑐫𑐵 𑐮𑑃 𑐢𑐸𑐕𑐶 𑐥𑑄𑐔 𑐧𑐵𑐖𑐵 𑐠𑐵𑐣𑐵 𑐴𑐂 𑑋 𑐨𑑁𑐩𑐔𑐵 𑐧𑑂𑐫𑐵𑐴𑐵𑑅 𑐫𑐵𑐩𑑂𑐴𑐾𑐳𑐶𑐫𑐵 𑐕𑐾𑑄 𑐠𑑂𑐫𑐣𑐾𑐰𑑄 𑐥𑐶𑐏𑐵𑐮𑐏𑐸𑐃 𑐩𑐵𑐮𑐵 𑐮𑐵𑐫𑐵𑑅 𑐖𑑅 𑐏𑑅 𑐡𑐸𑐰𑐵 𑐮𑑂𑐫𑐵𑑅 𑐎𑐮𑐱 𑐳𑑂𑐰𑐣𑐵 𑐥𑑂𑐫𑐏𑑂𑐫𑑄𑐬 𑐔𑑂𑐰𑐎𑐵 𑐧𑐖𑐶 𑐧𑑂𑐰𑐴𑐮𑐵 𑐩𑐵𑐖𑐸𑐩𑑂𑐴𑐾𑐳𑐶𑐣𑑄 𑐢𑑁 𑐳𑐐𑑄 𑐧𑐶𑐫𑐵 𑐳𑐐𑑄 𑐳𑐶𑐣𑑂𑐴 𑐟𑐶𑐎𑐵 𑐳𑐶𑐦𑑄 𑐮𑐸𑐣𑐵 𑐴𑐠𑐵𑐄𑑅𑐠𑑂𑐰𑑄 𑐟𑐸𑐟𑐶 𑐳𑐶𑐂𑐎𑐵 𑐮𑐳𑐎𑐸𑐳 𑐫𑐵𑐣𑐵 𑐟𑐵𑑅𑐔𑐵 𑐖𑑂𑐰𑑄𑐎𑐵 𑐕𑐾𑑄 𑐡𑐸𑐎𑐵𑐂 𑑋 𑐠𑑂𑐰 𑐃𑐮𑐾 𑐥𑑄𑐔𑐧𑐵𑐖𑐵 𑐠𑐵𑐣𑐵 𑐮𑐳𑐎𑐸𑐳 𑐩𑐾, 𑐩𑑄𑐐𑐮 𑐩𑐾 𑐴𑐵𑐮𑐵 𑐱𑐸𑐨 𑐳𑐵𑐃𑐟 𑐎𑑂𑐫𑐣𑐷 𑑋

𑐰𑑂𑐴𑑄𑐎𑐾𑐐𑐸
𑐨𑑁𑐩𑐔𑐵 𑐮𑐳𑐎𑐸𑐳 𑐫𑐵𑐣𑐵 𑐡𑐸𑐟𑐫𑑄𑐎𑐾 𑐢𑐸𑑄𑐎𑐵 𑐎𑐵𑐫𑑂𑐩𑐔𑐵, 𑐨𑑁𑐩𑐔𑐵 𑐰 𑐎𑐸𑐩𑐵𑐬𑐥𑐶𑑄 𑐖𑐰𑑄 𑐏𑐰𑑄 𑐠𑐵𑐳𑐫𑑂 𑐦𑐾𑐟𑐸𑐎𑐵 𑐕𑐾𑑄 𑐖𑑅 𑐨𑑀𑐕𑐶𑑄 𑐳𑐶𑐟 𑐐𑑂𑐰𑐫𑑂 𑐳𑐵𑐫𑐾𑐎𑐷 𑑋 𑐰𑐫𑐵𑐮𑐶𑐥𑐵 𑐐𑐸𑐨𑐵𑐖𑐸𑑄 𑐩𑑄𑐟𑑂𑐬 𑐧𑑂𑐰𑐣𑐵𑑅 𑐰𑐶𑐢𑐶 𑐎𑐠𑑄 𑐎𑐵𑐫𑑂𑐩𑐔𑐵 𑐰 𑐨𑑁𑐩𑐔𑐵 𑐣𑐶𑐩𑑂𑐴𑐾𑐳𑐶𑐐𑐸 𑐕𑑂𑐫𑑀𑑄 𑐮𑑂𑐰𑐵𑐎𑐵𑑅 𑐳𑐶𑐦𑑄𑐮𑐸𑐣𑐵𑑅 𑐰𑑂𑐴𑑄𑐎𑐶𑐂 𑑋 𑐳𑐶𑐦𑑄𑐮𑐸𑐃 𑐢𑐸𑑄𑐎𑐵𑑅 𑐢𑑁 𑐳𑐐𑑄 , 𑐏𑐾𑑄 𑐳𑐐𑑄 𑐧𑐶𑐫𑐵 𑐠𑐵𑐫𑑂𑐨𑐹 𑐣𑐎𑐶 𑑋 𑐠𑑂𑐰 𑐫𑐵𑐟 𑐳𑐴 𑐨𑑀𑐖𑐣 𑐫𑐵𑐎𑑂𑐫𑐾𑐐𑐸 𑐢𑐵𑐃 𑑋 𑐳𑐴 𑐨𑑀𑐖𑐣 𑐫𑐵𑐎𑐷 𑐧𑐮𑐾 𑐕𑐳𑐶𑑄𑐣𑐳𑐾𑑄 𑐥𑐟𑐶𑐔𑐵𑑄 𑐨𑑀𑐖𑐣 𑐎𑐟𑐵𑐣𑐵 𑐣𑐫𑑂 𑐨𑐵𑐫𑑂 𑐫𑐵𑐎𑐷 𑑋 𑐠𑐵𑐫𑑂𑐨𑐸𑐃 𑐖𑑂𑐰𑐮𑑄𑐕𑐶 𑐑𑐵𑐳𑐵 𑐟𑐵𑑅 𑐮𑐵𑐎𑐵 𑐨𑑂𑐰𑐫𑑂𑐧𑑂𑐰 𑐕𑐵𑐫𑑂𑐥𑐶𑐫𑐵𑑅 𑐣𑑂𑐫𑐵𑐐𑑅 𑐳𑐮𑐶𑐏𑐫𑑂 𑐴𑐫𑐵𑐄𑐠𑑂𑐰𑑄, 𑐠𑑂𑐰𑑄, 𑐀𑐫𑑂𑐮𑐵, 𑐡𑐸𑐬𑐸 𑐮 𑐟𑐫𑐵 𑐩𑐫𑑂𑐮𑐫𑑂 𑐡𑐶𑐎𑐷𑐂 𑑋 𑐳𑐐𑑄 𑐳𑐶𑐣𑑂𑐴 𑐟𑐶𑐎𑐵𑑅 𑐐𑐸𑐨𑐵𑐖𑐸𑑄 𑐩𑑄𑐟𑑂𑐬 𑐧𑑂𑐰𑐣𑐵 𑐣𑐶𑐩𑑂𑐴𑐾𑐳𑐶𑐟 𑐕𑐐𑐸𑐴𑐾 𑐠𑐵𑐫𑑂𑐨𑐹 𑐣𑐎𑐶 𑑋 𑐮𑐶𑐥𑐵 𑐠𑐸𑐎𑐶𑐃 𑐳𑐵𑐫𑑂𑐩𑐵𑐎𑑂𑐰 𑐳𑐵𑐫𑐵𑑅 𑐢𑑁, 𑐳𑐶𑐳𑐵𑐧𑐸𑐳𑐵 𑐟𑐫𑐵 𑐠𑑂𑐰 𑐠𑐵𑐫𑑂𑐨𑐹 𑐕𑑂𑐰𑐵𑐳𑐫𑑂 𑐰𑐵𑐫𑑂𑐫𑑄𑐎𑐷 𑑋 𑐨𑑁𑐩𑐔𑐵 𑐰𑑂𑐴𑑄𑐎𑐾 𑐳𑐶𑐢𑐫𑐾𑐰𑑄 𑐧𑑂𑐫𑐵𑑅 𑐫𑐵𑐩𑑂𑐴𑐳𑐶𑐫𑐵 𑐥𑐵𑐖𑐸𑐩𑑂𑐴𑑄 𑐢𑑁 𑐰 𑐏𑐾𑑄 𑐳𑐐𑑄 𑐧𑐶𑐫𑐵 𑐰𑐳𑑅 𑐮𑐮𑑂𑐴𑐵𑐣𑐵𑑅 𑐕𑐾𑑄𑐫𑐵 𑐠𑐎𑐵𑐮𑐶𑐩𑑂𑐴𑐳𑐶𑐟 𑐧𑑂𑐫𑐟𑐵𑐮𑐶𑑄 𑐔𑐶𑐎𑐶 𑑋 𑐠𑐠𑐾𑐴𑐾 𑐳𑑂𑐫𑐵𑐥𑐶𑑄 𑐠𑑅 𑐠𑐶𑐟𑐶𑐥𑐶𑑄𑐳𑐣 𑐢𑑁 𑐰 𑐏𑐾𑑄 𑐳𑐐𑑄 𑐧𑐶𑐫𑐵 𑐰𑐳𑑅 𑐮𑐮𑑂𑐴𑐵𑐣𑐵 𑐰𑑂𑐫𑐟𑐵𑐮𑐷 𑐔𑐶𑐎𑐾𑐩𑐵𑑅 𑑋 𑐠𑑂𑐰 𑐖𑑂𑐫𑐵 𑐳𑐶𑐢𑐫𑐾𑐰𑑄 𑐦𑐸𑐎𑐶 𑐏𑐮𑑅 𑐥𑐶 𑐡𑐎𑑂𑐰 𑐩𑐸𑑄𑐎𑐵 𑐕𑐠𑐵𑐫𑑂 𑐔𑑂𑐰𑐣𑐵 𑐨𑑂𑐰𑐫𑑂 𑐣𑐎𑐾𑐩𑐵 𑑋 𑐠𑐸𑐮𑐶 𑐫𑐵𑐫 𑐢𑐸𑐣𑐾𑐰𑑄 𑐨𑑁𑐩𑐔𑐵 𑐦𑐸𑐎𑐶𑐖𑐫𑑂 𑐠𑑂𑐫𑐵𑐐𑐸 𑐖𑐸𑐮 𑑋

𑐧𑑂𑐫𑐵𑑅 𑐨𑑂𑐰𑐫𑑂
𑐨𑑁𑐩𑐔𑐵 𑐴𑐏𑐸𑐣𑑂𑐴𑐸 𑐰𑐵 𑐕𑐣𑑂𑐴𑐸 𑐣𑐶𑐣𑑂𑐴𑐸 𑐮𑐶𑐥𑐵 𑐠𑑅 𑐠𑐶𑐟𑐶 𑐰 𑐧𑑂𑐰𑐣𑐵𑐟𑐥𑐶𑑄 𑐳𑐎𑐮𑐳𑐶𑐟 𑐧𑑂𑐫𑐵 𑐨𑑂𑐰𑐫𑑂 𑐣𑐎𑐷 𑑋 𑐠𑑂𑐰 𑐧𑑂𑐫𑐵 𑐨𑑂𑐰𑐫𑑂 𑐗𑐶𑑄 𑐔𑑂𑐫𑐵𑐟𑐵 𑐧𑑂𑐰𑐟𑐵𑑄 𑐏𑐵𑐣𑐵 𑐨𑑂𑐰𑐫𑑂 𑐣𑐎𑐾𑐐𑐸 𑐔𑐮𑐣 𑐡𑐸 𑑋 𑐧𑑂𑐫𑐵𑑅 𑐨𑑂𑐰𑐫𑑂𑐫𑐵 𑐧𑑂𑐰𑐟𑐵𑑄 𑐎𑑂𑐰𑐫𑑂 𑐣𑑂𑐴𑐠𑐣𑐵 𑐎𑐠𑑄 𑐖𑐸𑐂𑐩𑐵𑑅 𑑋
𑐎) 𑐥𑐵𑐮𑐸 𑐏) 𑐩𑐸𑐳𑑂𑐫𑐵𑐧𑐸𑐃 𑐐) 𑐢𑑁 𑐌 𑐑) 𑐎𑐳𑐸𑐧𑐸𑐃 𑐒) 𑐏𑐫𑑂𑐥𑐶
𑐔) 𑐔𑐫𑑂𑐥𑐶 𑐕) 𑐢𑑁 𑐢𑐵𑐳𑐵 𑐖) 𑐡𑐸𑐮𑑂𑐮𑐵 𑐗) 𑐴𑐶𑑄𑐮𑐵 𑐘) 𑐥𑑄𑐮𑐵
𑐚) 𑐎𑐫𑑂𑐐𑐸𑐮𑐵 𑐛) 𑐳𑑅𑐥𑐸 𑐥𑑄𑐮𑐵 𑐜) 𑐴𑐵𑐩𑑀𑐮𑐵 𑐝) 𑐩𑐹𑐮𑐵 𑐞) 𑐳𑐾𑑄 𑐥𑐸𑐎𑐵
𑐟) 𑐐𑑀 𑐥𑐸𑐎𑐵 𑐠) 𑐏𑐾𑑄(𑐕𑐩𑐷) 𑐡) 𑐣𑑂𑐫𑐵 𑐢) 𑐀𑐫𑑂𑐮𑐵 𑐰 𑐖𑑀𑐥𑐳𑑂𑐟𑐵 𑐣) 𑐎𑑅𑐩𑐹
𑐥) 𑐮𑐵𑐥𑐶 𑐦) 𑐮𑐵𑐐𑑂𑐰 𑐧) 𑐐𑐸𑐮𑐶𑐩𑐬𑐶 𑐨) 𑐳𑑀 𑐥𑐸𑐎𑐵 𑐩) 𑐎𑐵𑐮𑐵𑐎𑐸𑐮𑐸
𑐫) 𑐏𑐰𑑁 𑐎𑐰𑐵𑑅

𑐠𑑂𑐰 𑐨𑑂𑐰𑐖𑐫𑑂 𑐢𑑁, 𑐳𑐶𑐳𑐵𑐧𑐸𑐳𑐵 𑐟𑐫𑑂 𑐢𑐸𑑄𑐎𑐵 𑐩𑐵𑐖𑐸𑐩𑑂𑐴𑑄 𑐀𑐫𑐮𑐵 𑐮𑐹 𑐰𑐣𑐶, 𑐧𑐵𑐖𑐸𑐩𑑂𑐴𑑄 𑐀𑐫𑐾𑑄𑐛𑐵𑐩𑐬𑐶 𑐧𑑂𑐫𑐹 𑐰𑐣𑐶 𑑋 𑐀𑐣𑑄𑐮𑐶𑐥𑐵 𑐣𑐶𑐣𑐶𑐩𑑂𑐴𑑄 𑐀𑐫𑑂𑐮𑐵 𑐮𑐹 𑐰𑐣𑐶 𑑋 𑐦𑐸𑐎𑐶𑐫𑐵 𑐠𑐵𑐎𑐸𑐮𑐶𑐩𑑂𑐴𑑄 𑐎𑐵𑐮𑐵𑐎𑐸𑐮𑐸 𑐟𑑅 𑐰𑐣𑐶 𑑋 𑐕𑐾𑑄𑐫𑐵 𑐠𑐵𑐎𑐸𑐮𑐶𑐩𑑂𑐴 𑐩𑐶𑐳𑐵𑑄 𑐀𑐫𑑂𑐮𑐵 𑐮𑐹 𑐰𑐣𑐶 𑑋 𑐦𑐸𑐎𑐶𑐥𑐶𑐣𑐶 𑐩𑐶𑐳𑐵𑐩𑑂𑐴 𑐏𑑂𑐰𑑁𑐎𑑂𑐰𑐵𑑅 𑐟𑑅 𑐰𑐣𑐶 𑑋 𑐨𑑁𑐩𑐔𑐵𑑄 𑐴𑐫𑐵𑑄𑐐𑐸 𑐠𑑂𑐰𑑄 𑐮𑐹 𑐰𑐣𑐶 𑑋 𑐀𑐫𑑂𑐮𑐵 𑐣𑑂𑐫𑐵𑑅𑐮𑐹 𑐰𑐣𑐾𑐐𑐸 𑐎𑐬 𑐡𑐸 𑑋 𑐀𑐫𑐠𑐵𑐩𑐬𑐶, 𑐮𑐵𑐥𑐶, 𑐮𑐵𑐐𑑂𑐰, 𑐎𑐵𑐰𑐵𑐎𑐸𑐮𑐸 𑐰𑐵 𑐏𑑀𑐎𑑂𑐰𑐵𑑅 𑐨𑑂𑐰𑐫𑑂 𑐣𑑅𑐥𑐶𑐐𑐸 𑐮𑑂𑐴𑐵𑐟𑐷 𑐧𑐶𑐫𑐾𑐐𑐸 𑐔𑐮𑐣 𑐡𑐸 𑑋 𑐨𑑂𑐰𑐖𑐫𑑂 𑐖𑐶𑐖𑐵𑐨𑐵𑐖𑐸𑐩𑑂𑐴𑑄 𑐢𑑁 𑐟𑐫𑑂𑐐𑐸 𑐔𑐮𑐣 𑐡𑐸 𑑋 𑐧𑑂𑐫𑐵 𑐨𑑂𑐰𑐫𑑂 𑐠𑑅 𑐠𑐶𑐟𑐶 𑐰 𑐐𑐸𑐠𑐶𑐫𑐵𑑅𑐬𑐟𑐫𑑂𑐳𑑄 𑐣𑑄 𑐐𑑂𑐰𑐫𑑂 𑐳𑐵𑐫𑐾𑐎𑐾𑐩𑐵 𑑋

𑐣𑐶𑐕𑐫𑐵 𑐨𑐹
𑐧𑑂𑐫𑐵𑑅 𑐨𑑂𑐰𑐫𑑂𑐫𑐵 𑐎𑐣𑑂𑐴𑐫𑑂 𑐏𑐸𑐣𑑂𑐴𑐸 𑐣𑐷 𑐕𑐫𑐵𑐫𑑂𑐐𑐸 𑐢𑐎𑐵 𑐐𑐸𑐨𑐵𑐖𑐸𑑄 𑐎𑐮𑐱𑐵𑐬𑑂𑐔𑐣 𑐥𑐹𑐖𑐵𑐫𑐵𑐣𑐵 𑐩𑐵𑐖𑐸𑐫𑐵 𑐖𑐰𑐫𑑂 𑐎𑐵𑐫𑑂𑐩𑐔𑐵 𑐏𑐰𑐫𑑂 𑐨𑑁𑐩𑐔𑐵 𑐔𑑂𑐰𑐣𑐵 𑐩𑐵𑐖𑐸𑐫𑐵 𑐔𑐶𑐥 𑐨𑑁𑐩𑐔𑐵𑐫𑐵𑐟 𑐣𑐎𑐷 𑑋 𑐠𑑂𑐰 𑐏𑐸𑐣𑑂𑐴𑐸 𑐕𑐾𑑄 𑐖𑑅 𑐦𑐸𑐎𑐶𑐧𑐵𑐎𑐵𑐫𑑂, 𑐩𑑂𑐴𑐫𑐵𑐫𑑂𑐩𑐔𑐵 𑐰 𑐨𑐶𑐣𑐩𑐔𑐵 𑐳𑐎𑐳𑐶𑐟𑑄 𑐨𑑂𑐰𑐫𑑂 𑐣𑐎𑐾𑐩𑐵𑑅 𑑋
𑐰𑑄𑐖𑐮𑐵 𑐰𑐣𑐾𑐐𑐸
𑐣𑐶𑐕𑐫𑐵 𑐨𑐹𑐫𑐵 𑐎𑐣𑑂𑐴𑐫𑑂 𑐏𑐸𑐣𑑂𑐴𑐸 𑐰𑐵 𑐩𑐹 𑐨𑑂𑐰𑐫𑑂𑐫𑐵 𑐎𑐣𑑂𑐴𑐫𑑂 𑐏𑐸𑐣𑑂𑐴𑐸 𑐰𑑄𑐖𑐮𑐵 𑐰𑐣𑐾𑐐𑐸 𑐔𑐮𑐣 𑐡𑐸 𑑋 𑐰𑑄𑐖𑐮𑐵 𑐥𑐸𑐖𑐵 𑐱𑑂𑐬𑐷 𑐰𑐶𑐡𑑂𑐫𑐵𑐢𑐵𑐬𑐷 𑐡𑐾𑐰𑐷 𑐰𑐵 𑐥𑐶𑐛 𑐡𑑂𑐫𑑅𑐠𑐵𑐫𑑂 𑐰𑐣𑐵 𑐰𑑄𑐖𑐮𑐵 𑐰𑐶𑐢𑐶 𑐎𑐠𑑄 𑐥𑐸𑐖𑐵 𑐫𑐵𑐣𑐵 𑐨𑐵𑐟𑐩𑑂𑐴𑑄 𑐎𑐮𑐵 𑐫𑐵𑐟 𑐣𑑂𑐫𑐵𑐥𑐸 𑐳𑐟𑐰𑐟 𑐥𑑂𑐫𑑄𑐎𑐵 𑐳𑐶𑐣𑑂𑐔𑐵 𑐦𑐵𑐫𑐾𑐎𑐶 𑑋 𑐠𑑂𑐰 𑐥𑐸𑐖𑐵 𑐳𑐶𑐢𑐫𑑂 𑐢𑐸𑑄𑐎𑐵 𑐳𑐎𑐳𑑂𑐫𑐵𑑄 𑐨𑑂𑐰𑐫𑑂 𑐣𑐫𑐵 𑐮𑐶𑐴𑐵𑑄 𑐰𑐃 𑑋 𑐥𑐬𑐩𑑂𑐥𑐬𑐵 𑐎𑐠𑑄 𑐨𑐵𑐟 𑐖𑐸𑐩𑑂𑐴𑐾𑐳𑐶𑐣𑑄 𑐨𑑁𑐩𑐔𑐵𑐫𑐵𑐟 𑐳𑐶𑐣𑑂𑐔𑐵 𑐳𑐶𑐣𑑂𑐴𑑅 𑐟𑐫𑐾𑐎𑐾𑐐𑐸 𑐖𑑂𑐫𑐵 𑐎𑑂𑐰𑐔𑐵𑐫𑐾𑐰𑑄 𑐟𑐶𑐣𑐶 𑐎𑐮𑐵 𑐰 𑐨𑐵𑐟𑐫𑐵 𑐣𑐵𑐟𑐵 𑐎𑑂𑐫𑐣𑐶 𑐢𑐿𑐐𑐸 𑐢𑐵𑐥𑐹 𑐡𑐸 𑑋

𑐩𑑂𑐴𑐫𑐵𑐫𑑂𑐩𑐔𑐵𑐫𑐵 𑐏𑑂𑐰𑐵 𑐳𑑂𑐰𑐰𑐣𑐾𑐐𑐸
𑐨𑑁𑐩𑐔𑐵 𑐡𑐸𑐎𑐫𑐵 𑐥𑑂𑐫𑐣𑑂𑐴𑐹 𑐏𑐸𑐣𑑂𑐴𑐹 𑐨𑑁𑐩𑐔𑐵𑐫𑐵 𑐠𑑅𑐕𑐾𑑄 𑐥𑐵𑐏𑐾𑑄 𑐩𑐶𑐖𑐥𑐶𑑄 𑐠𑑅 𑐠𑐶𑐟𑐶 𑐰 𑐥𑐵𑐳𑐵𑐥𑐶𑑄 𑐳𑐎𑐮𑐾𑑄 𑐧𑐶𑐫𑐵 𑐕𑑂𑐰𑐩𑑂𑐴 𑐩𑑂𑐴𑑂𑐫𑐵𑐫𑑂𑐫𑐵 𑐏𑑂𑐰𑐵𑑅𑐳𑑂𑐰𑑅 𑐰𑐂 𑑋 𑐏𑑂𑐰𑐵 𑐳𑑂𑐰𑐎𑐾𑐐𑐸 𑐠𑐵𑐫𑑂 𑐣𑐶𑐣𑐶𑐫𑐵 𑐕𑐾𑑄, 𑐖𑐸𑐂𑐩𑐵𑐐𑐸 𑐔𑐮𑐣 𑐡𑐸 𑑋 𑐏𑑂𑐰𑐵𑑅 𑐳𑑂𑐰𑑅𑐰𑐣𑐾𑐟 𑐎𑑂𑐰𑐫𑑂 𑐣𑑂𑐴𑐠𑐣𑐵 𑐎𑐠𑑄𑐫𑐵 𑐖𑑂𑐰𑐮𑑄 𑐖𑑂𑐰𑐣𑐵 𑐰𑐣𑐾𑐩𑐵𑑅 𑑋
𑐎) 𑐧𑐏𑐟 𑐳𑑂𑐰𑐫𑐵 𑐳𑐶𑐳𑐵𑐧𑐸𑐳𑐵 𑐎𑐶𑐳𑑂𑐟𑐶 𑐩𑐵𑐎𑑂𑐎𑑀 𑐏) 𑐩𑐬𑐶𑐟𑐵𑑅 𑐩𑐵𑐎𑑂𑐎𑑀
𑐐) 𑐩𑐳𑐮𑐵 𑐎𑐶𑐳𑑂𑐟𑐶 𑐩𑐵𑐎𑑂𑐎𑑀 𑐑) 𑐰𑐳 𑐖𑐸𑐕𑐶𑑄
𑐧𑑁𑐩𑑂𑐴𑑄 𑐠𑑅 𑐩𑑂𑐴𑐫𑐵𑐫𑑂𑐫𑐵𑐟 𑐢𑑂𑐫𑐰𑐵 𑐧𑐶𑐫𑐵 𑐏𑑂𑐰𑐵𑑅 𑐳𑑂𑐰𑐫𑐾 𑐢𑐸𑑄𑐎𑐵 𑐩𑐾𑐩𑐾𑐥𑐶𑐳𑑄 𑐣𑑄 𑐢𑑂𑐫𑐧𑐵 𑐮𑐮𑑂𑐴𑐵𑐣𑐵 𑐏𑑂𑐰𑐵𑑅
𑐳𑑂𑐰𑐂 𑑋 𑐠𑐸𑐮𑐶 𑐳𑐶𑐢𑐫𑐾𑐰𑑄 𑐳𑐎𑐳𑐶𑐟𑑄 𑐧𑑂𑐫𑐵𑑅 𑐫𑐵𑐩𑑂𑐴𑐫𑐵 𑐥𑐵𑐏𑐾𑑄 𑐥𑐵𑐴𑐵 𑐫𑐵𑐎𑐵 𑐖𑑀𑐥𑐳𑑂𑐟𑐵𑑅 𑐰𑐵 𑐀𑐫𑐾𑐠𑐵𑐩𑐬𑐶 𑐧𑐶 𑑋

𑐖𑐶𑐮𑐵𑐖𑑄 𑐡𑐸𑐔𑐵𑐫𑐾𑐎𑐾𑐐𑐸
𑐏𑑂𑐰𑐵𑑅 𑐳𑑂𑐰𑐫𑐵 𑐎𑐣𑑂𑐴𑐫𑑂 𑐏𑐸𑐣𑑂𑐴𑐸 𑐳𑐸𑐠𑑅 𑐣𑑂𑐴𑐵𑐥𑐵 𑐨𑑁𑐩𑐔𑐵 𑐰 𑐥𑐵𑐳𑐵 𑐔𑑂𑐰𑑄𑐩𑑂𑐴 𑐠𑑅𑐕𑐾𑑄 𑐮𑐶𑐴𑐵 𑐰𑐣𑐶 𑑋 𑐠𑑂𑐰 𑐏𑐸𑐣𑑂𑐴𑐸 𑐖𑐶𑐮𑐵𑐖𑑄 𑐡𑐸𑐔𑐵𑐫𑐾𑐎𑐾𑐐𑐸 𑐔𑐮𑐣 𑐡𑐸 𑑋 𑐖𑐶𑐮𑐵𑐖𑑄 𑐡𑐸𑐔𑐵𑐫𑐎𑐾 𑐏𑐸𑐣𑑂𑐴𑐹 𑐧𑐴𑐣𑐶 𑐖𑐶𑐮𑐵𑐖𑑄, 𑐮𑐩𑐶 𑐰 𑐕𑐩𑑂𑐴 𑐥𑐵𑐳𑐵 𑐳𑑂𑐰𑐩𑑂𑐴 𑐡𑐸𑐔𑐵𑐫𑐎𑐹 𑐕𑐾𑑄 𑐰𑐣𑐶 𑑋 𑐖𑐶𑐮𑐵𑐖𑑄 𑐣𑑄 𑐢𑑁𑐐𑑀 𑐕𑐐𑑅 𑐟𑐸𑐫𑐹𑐐𑐸 𑐬𑐸𑐩𑐵𑐮𑐾 𑐥𑑀𑐔𑐶𑐣𑐵 𑐳𑐳𑐮𑐾 𑐫𑑄𑐎𑐾𑐩𑐵 𑑋 𑐳𑑅𑐳𑐮𑐾 𑐖𑐶𑐮𑐵𑐖𑑄 𑐣𑑄 𑐳𑑅𑐳𑑅𑐫𑐵 𑐖𑑅𑐥𑐶 𑐰 𑐦𑐸𑐎𑐶 𑐏𑐮𑐥𑐶𑑄 𑐳𑐎𑐳𑐶𑐟 𑐐𑑂𑐰𑐫𑑂 𑐳𑐵𑐫𑐎𑐾𑐩𑐵𑑅 𑑋 𑐠𑑂𑐰𑐫𑐵 𑐳𑐶𑐧𑐾 𑐣𑑂𑐴𑐫𑑀 𑐣𑐶𑐐𑐐𑑂𑐰𑐾 𑐠𑑅 𑐩𑐵𑐣𑐾 𑐫𑐵𑐫𑐾𑐩𑐵𑑅𑐥𑐶 𑐡𑑂𑐫𑑀𑑅𑐟𑐫𑑂𑐟𑐣𑐶𑑄 𑐦𑑂𑐫𑐵𑐂 𑑋 𑐳𑑅𑐳𑑅 𑐀𑐧𑐸 𑐰 𑐩𑐵𑐩𑑂𑐴𑐫𑐵𑐟 𑐐𑑂𑐰𑐫𑑂 𑐳𑐵𑐫𑐾𑐐𑐸 𑐥𑐬𑐩𑑂𑐥𑐬𑐵 𑐡𑐸 𑑋 𑐐𑑂𑐰𑐫𑑂 𑐳𑐵𑐫𑐎𑐾𑐐𑐸 𑐖𑑂𑐫𑐵 𑐎𑑂𑐰𑐔𑐵𑐫𑑂𑐰𑑄 𑐖𑐶𑐮𑐵𑐖𑑄 𑐰 𑐩𑑂𑐴𑐫𑐵𑐫𑑂 𑐣𑐵𑐥 𑐦𑐾𑐟𑐸𑐎𑐵 𑐢𑑁 𑐰 𑐏𑐾𑑄 𑐳𑐐𑑄 𑐰𑐶𑐫𑐵 𑐖𑐶𑐮𑐵𑐖𑑄𑐫𑐵𑐟 𑐰𑐳𑑅 𑐖𑐸𑐕𑐶 𑐮𑐮𑑂𑐴𑐵𑐫𑑂𑐩𑐵 𑐀𑐣 𑐮𑐩𑐶, 𑐖𑐶𑐮𑐵𑐖𑑄 𑐰𑐵 𑐕𑐩𑑂𑐴 𑐥𑐵𑐳𑐵𑐫𑐵𑐟 𑐖𑑂𑐰𑐮𑑄𑐕𑐶 𑐟𑑅 𑐖𑐶𑐎 𑐠𑐶𑐠𑐶 𑐣𑐱𑐵 𑐰 𑐮𑐵 𑐫𑐵𑐐𑐸 𑐥𑐬𑐶𑐎𑐵𑐬 𑐟𑐵𑑅 𑐮𑐵𑐎𑐵 𑐨𑑂𑐰𑐫𑑂 𑐣𑐎𑐶 𑑋 𑐀𑐮𑐾 𑐐𑑂𑐰𑐵 𑐰 𑐩𑑀𑐳𑐶𑐥𑑂𑐰𑑅 𑐃𑐣𑐵 𑐧𑐶𑐂 𑑋 𑐠𑑂𑐰 𑐏𑐸𑐣𑑂𑐴𑐹 𑐣𑐶𑐳𑐾 𑐄𑐐𑐸 𑐕𑐾𑑄𑐫𑐵 𑐩𑑂𑐴𑑂𑐫𑐵𑐫𑑂 𑐥𑐵𑐏𑐾𑐩𑑂𑐴 𑐖𑐶𑐮𑐵𑐖𑑄 𑐢𑐿𑐐𑐸 𑐥𑐸𑐰𑐣𑐷 𑑋 𑐀𑐮𑐾 𑐖𑐶𑐮𑐵𑐖𑑄 𑐣𑐵𑐥 𑐩𑑂𑐴𑐵𑐫𑑂 𑐮𑐶𑑄𑐴𑐵 𑐰𑐣𑐷 𑑋

𑐎𑐵𑐫𑑂𑐫𑐵𑐟 𑐎𑑂𑐰𑐠𑐵 𑐧𑐶𑐫𑐾𑐐𑐸
𑐖𑐶𑐮𑐵𑐖𑑄 𑐡𑐸𑐔𑐵𑐫𑐾𑐎𑐵 𑐕𑐾𑑄 𑐮𑐶𑐴𑐵 𑐰𑐫𑐾𑐰𑑄 𑐩𑐵𑐩𑑂𑐴𑑄 𑐣𑐶𑐩𑐟𑐶𑐥𑐸𑐫𑐵𑐟 𑐎𑐶𑐳𑐮𑐷 𑐕𑐐 𑐐𑑂𑐰𑐾 𑐀𑐣𑑂𑐫𑐵𑐎𑐵 𑐳𑐸𑐨𑐵𑐫𑑂 𑐧𑐶𑐫𑐵 𑐎𑑂𑐰𑐠𑐵𑐫𑑂 𑐡𑐸𑐕𑑂𑐰𑐂 𑐠𑑂𑐰𑐫𑐵𑐟 𑐴𑐾 𑐎𑑂𑐰𑐠𑐵 𑐰𑐶𑐫𑐾𑐐𑐸 𑐢𑐿𑐐𑐸 𑐔𑐮𑐣 𑐡𑐸 𑑋

𑐨𑑁𑐩𑐔𑐵 𑐳𑑅𑐟𑑅 𑐰𑐣𑐾𑐐𑐸
𑐖𑐶𑐮𑐵𑐖𑑄 𑐡𑐸𑐔𑐵𑐫𑐾𑐎𑐵 𑐎𑐣𑑂𑐴𑐫𑑂𑐏𑐸𑐣𑑂𑐴𑐸 𑐳𑐸𑐠𑐫𑑂 𑐠𑑅𑐕𑐾𑑄 𑐣𑑄 𑐨𑑁𑐩𑐔𑐵 𑐎𑐵𑐫𑐾𑐎𑐾 𑐴𑐂 𑑋 𑐠𑑅𑐕𑐾𑑄 𑐨𑑁𑐩𑐔𑐵 𑐕𑑀𑐫𑐵 𑐧𑐶𑐂 𑑋 𑐨𑑁𑐩𑐔𑐵 𑐠𑑅𑐕𑐾 𑐰𑑄𑐐𑐸 𑐥𑑂𑐫𑐣𑑂𑐴𑐹 𑐏𑐸𑐣𑑂𑐴𑐹 𑐧𑐴𑐣𑐶 𑐮𑐩𑐶 𑐰 𑐎𑑂𑐰𑐫𑑂 𑐣𑑂𑐴𑑂𑐠𑐣𑐵 𑐎𑐠𑑄 𑐖𑑂𑐰𑐮𑑄 𑐖𑑂𑐰𑐣𑐵 𑐨𑑁𑐩𑐔𑐵 𑐳𑑅𑐟𑑅 𑐰𑐣𑐷 𑑋 𑐀𑐮𑐾 𑐟𑐶𑐣𑐶 𑐧𑑂𑐫𑐵𑑅𑐴𑐵 𑐫𑐵𑐫𑐾𑐐𑐸 𑐰𑐶𑐢𑐶 𑐎𑑂𑐰𑐔𑐵𑐃 𑑋 𑐮𑐩𑐶 𑐕 𑐨𑐵𑐐, 𑐣𑐶𑐣𑐶 𑐕 𑐨𑐵𑐐 𑐰 𑐳𑐩𑑂𑐢𑐶 𑐕 𑐨𑐵𑐐 𑐟𑐫𑐵 𑐧𑐷𑐩𑐵𑑅 𑑋
𑐎) 𑐮𑐵𑐥𑐵 𑑑 𑐥𑐵 𑐏) 𑐠𑑂𑐰𑑄 𑑑 𑐳𑑀𑐩𑐵

𑐣𑐵𑐫𑑅 𑐮𑐸𑐫𑐾𑐐𑐸
𑐠𑑅𑐐𑐸 𑐎𑐰 𑐦𑐸𑐎𑐶𑐖𑑅𑐫𑑂 𑐰𑐵 𑐡𑐶𑐐𑐸 𑐥𑐸𑐖𑐵 𑐏𑐮𑐎𑐫𑑂 𑐡𑐎𑐮𑐾 𑐠𑐖𑐶 𑐖𑐸𑐮𑐢𑐵𑑅𑐳𑐵 𑐰𑐵 𑐖𑐸𑐮 𑐢𑐵𑐫𑐾𑐰 𑐠𑐵𑐎𑐸𑐮𑐶 (𑐣𑐵𑐫𑑅) 𑐮𑐸𑐂𑐩𑐵𑐐𑐸 𑐔𑐮𑐣 𑐡𑐸 𑑋 𑐠𑐵𑐎𑐸𑐮𑐶 𑐮𑐸𑐂𑐧𑐮𑐫𑑂 𑐡𑐶𑐐𑐸𑐡𑑂𑐫𑑅𑐫𑐵 𑐏𑑂𑐫𑐮𑐫𑑂 𑐰𑐣𑐵 𑐐𑐸𑐨𑐵𑐖𑐸 𑐥𑐸𑐬𑑀𑐴𑐶𑐟 𑐟𑐫𑐵 𑐩𑐵𑐬𑐷 (𑐩𑐴𑐵𑐡𑐷𑐥) 𑐔𑑂𑐫𑐵𑐎𑐵 𑐟𑑅𑐖𑐶𑐎 𑐰𑐶𑐢𑐶 𑐥𑐹𑐰𑑄𑐎 𑐥𑐸𑐖𑐵 𑐫𑐵𑐫𑐾𑐩𑐵 𑑋 𑐠𑑅 𑐠𑐶𑐟𑐶𑐥𑐶𑐳𑑄 𑐧𑐵𑐬𑐵𑑄 𑐕𑐸𑐣𑐵𑑅 𑐢𑑁, 𑐏𑐾𑑄 𑐳𑐐𑑄𑐧𑐶𑐫𑐵 𑐧𑑂𑐫𑐟𑐵𑐮𑐶 𑐔𑐶𑐎𑐵 𑐰𑐶𑐢𑐶 𑐥𑐹𑐰𑑄𑐎 𑐥𑐸𑐖𑐵𑐫𑐵𑐣𑐵 𑐠𑐵𑐎𑐸𑐮𑐶 𑐮𑐸𑐂 𑑋 𑐠𑑂𑐰𑐧𑐮𑐾 𑐧𑑂𑐫𑐵𑑅𑐴𑐵 𑐳𑑂𑐰𑐵𑑅𑐥𑐶𑑄 𑐳𑐎𑐳𑐶𑐟𑑄 𑐨𑑂𑐰𑐫𑑂 𑐣𑐎𑐾𑐩𑐵 𑑋

𑐧𑐸𑐝𑐵𑐧𑐸𑐝𑐷 𑐖𑑄𑐎𑑀
𑐧𑐸𑐝𑐵𑐧𑐸𑐝𑐶 𑐟𑐫𑑂𑐟 𑐟𑐵𑑅 𑐁𑐫𑐸𑐫𑐵 𑐎𑐵𑐩𑐣𑐵 𑐫𑐵𑐣𑐵𑑅 𑐫𑐵𑐂𑐐𑐸 𑐎𑑂𑐬𑐶𑐫𑐵 𑐫𑐵𑐟 𑐧𑐸𑐝𑐵𑐧𑐸𑐝𑐷 𑐖𑑄𑐎𑑀 𑐢𑐵𑐂 𑑋 𑐖𑑄𑐎𑑀 𑐫𑐵 𑐎𑐸𑐣𑑂𑐴𑐸 𑐠𑑅 𑐩𑑂𑐴𑑂𑐫𑐵𑐫𑑂𑐩𑐔𑐵 𑐨𑐶𑐣𑐵 𑐩𑐔𑐵 𑐠𑑅 𑐠𑐶𑐟𑐶 𑐥𑐶𑐳𑑄 𑐖𑑄𑐎𑑀 𑐫𑐵𑐩𑑂𑐴𑐾𑐳𑐶𑐟 𑐮𑑄𑑅 𑐥𑐵𑑅 𑑑 𑐥𑐵𑑅 𑐧𑐶𑐫𑐵𑑅 𑐐𑐸𑐬𑐸𑐖𑐸 𑐣𑐶𑐳𑐾𑑄 𑐦𑐸𑐎𑐷 𑐰𑐵𑐎𑐵𑐫𑑂 𑐰 𑐎𑐵𑐫𑑂 𑐥𑐶𑐣𑑂𑐟 𑐰𑐾𑐟𑐵𑐮𑐶𑑄 𑐔𑐶𑐎𑐾𑐩𑐵𑑅 𑑋 𑐴𑐵𑐣𑑄 𑐳𑐎𑐳𑐶𑐟 𑐢𑑁 𑐰 𑐏𑐾𑑄 𑐳𑐐𑑄 𑐣𑑄 𑐧𑐶𑐫𑐾𑐩𑐵𑑅 𑑋 𑐨𑑂𑐰𑐾 𑐣𑐎𑐾𑐐𑐸 𑐧𑐶𑐴𑐵 𑐨𑑂𑐰𑐫𑑂 𑐠𑐾 𑐟𑑅𑐖𑐶𑐎 𑐫𑐵𑐂 𑑋 𑐠𑐸𑐐𑐸 𑐎𑑂𑐬𑐶𑐫𑐵 𑐳𑑂𑐰𑐎𑑂𑐰𑑅 𑐟𑐎𑑂𑐎 𑐨𑐷𑐩𑐬𑐠𑐵𑐬𑑀𑐴𑐞, 𑐡𑐾𑐰 𑐬𑐠𑐵𑐬𑑀𑐴𑐞 𑐰 𑐩𑐴𑐵𑐬𑐠𑐵𑐬𑑀𑐴𑐞 𑐢𑐎𑐵𑑅 𑐫𑐵𑐂 𑑋 𑐠𑑂𑐰 𑐏𑐸𑐣𑑂𑐴𑐹 𑐏𑐟𑐫𑑂 𑐟𑐫𑐵 𑐠𑑅𑐐𑐸 𑐃𑐮𑐵𑐎𑐵 𑐔𑐵𑐴𑐶𑐎𑐶 𑑋 𑐀𑐮𑐾 𑐠𑑅 𑐩𑑂𑐴𑐫𑐵𑐫𑑂𑐩𑐔𑐵, 𑐨𑐶𑐣𑐵𑐩𑐔𑐵, 𑐰 𑐦𑐸𑐎𑐶𑐰𑐵𑐎𑐵𑐫𑐵𑐟 𑐨𑑂𑐰𑐫𑑂 𑐣𑐎𑐶 𑑋

𑐨𑐷𑐩𑐬𑐠𑐵𑐬𑑀𑐴𑐞
𑐠𑐸𑐐𑐸 𑐎𑑂𑐬𑐶𑐫𑐵 𑐣𑑂𑐴𑐫𑑂 𑐣𑑂𑐴𑐾𑐫𑑂𑐡 (𑑗𑑗) 𑐣𑑂𑐴𑐾𑐫𑐮𑐵 (𑑗𑐮𑐵) 𑐰 𑐣𑑂𑐴𑐾𑐫𑑂𑐣𑑂𑐴𑐹 (𑑗 𑐡𑐶𑐣) 𑐡𑐸𑐎𑐸𑐣𑑂𑐴𑐸 (𑐡𑐫𑐎𑐵𑑅) 𑐫𑐵𑐃 𑑋 𑐠𑑂𑐰 𑐫𑐵𑐂𑐧𑐮𑐾 𑐔𑑂𑐰𑐫𑑂 𑐰𑐬𑑂𑐞𑐣 𑐫𑐵𑑅𑐐𑐸 𑐀𑐣𑐸𑐳𑐵𑐬 𑐴𑐾 𑐏𑑅 𑐟𑐬 𑐰𑐶𑐱𑐾𑐲 𑐎𑑂𑐬𑐶𑐫𑐵𑐫𑐵 𑐬𑐸𑐥𑐫𑑂 𑐐𑑂𑐬𑐴 𑐡𑐱𑐵 𑐱𑐵𑐣𑑂𑐟 𑐫𑐵𑐫𑑂𑐐𑐸 𑐢𑐎𑐵𑑅 𑐐𑑂𑐬𑐴𑐩𑐞𑑂𑐜𑐮 𑐡𑐬𑑂𑐱𑐣 𑐫𑐵𑐎𑐾𑐐𑐸 𑐫𑐵𑐃 𑑋

𑐡𑐾𑐰𑐬𑐠𑐵𑐬𑑀𑐴𑐞
𑐠𑐸𑐐𑐸 𑐎𑑂𑐬𑐶𑐫𑐵 𑐔𑐫𑑂 𑐔𑑂𑐫𑐵𑐡𑑃 (𑑘𑑘) 𑐔𑑂𑐫𑐵𑐮𑐵 (𑑘) 𑐰 𑐔𑑂𑐫𑐵𑐣𑑂𑐴𑐸 (𑑘) 𑐡𑐸 𑐏𑐸𑐣𑑂𑐴𑐸 𑐫𑐵𑐂 𑑋
𑐣𑐶𑐎𑑂𑐰𑐐𑐸 𑐖𑑄𑐎𑑀 𑐢𑐎𑐵 𑑑𑑐𑑐𑑐 𑐎𑑂𑐰 𑐔𑐣𑑂𑐡𑑂𑐬𑐩𑐵 𑐏𑐣𑐾𑐰𑑄 𑐎𑐳𑐷 𑐟𑐸𑑄 𑐔𑐣𑑂𑐡𑑂𑐬𑐩𑐵 𑐥𑐸𑐖𑐵 𑐫𑐵𑐣𑐵 𑐠𑑅 𑐩𑑂𑐴𑐫𑐵𑐫𑑂 𑐩𑐔𑐵 𑐨𑐶𑐣𑐵 𑐩𑐔𑐵 𑐰 𑐦𑐸𑐎𑐷 𑐧𑐵𑐎𑐵𑐫𑑂 𑐫𑐵𑐟 𑐳𑐟𑐵𑑅 𑐨𑑂𑐰𑐫𑑂 𑐣𑐎𑐷 𑑋 𑐨𑐷𑐩𑐬𑐠𑐵𑐬𑑀𑐴𑐞 𑐰 𑐡𑐾𑐰 𑐬𑐠𑐵𑐬𑑀𑐴𑐞 𑐫𑐵𑐂𑐧𑐮𑐾 𑐏𑐟𑐫𑑂 𑐟𑐫𑐵𑑅 𑐠𑑅𑐐𑐸 𑐟𑑂𑐰𑐵𑐫𑐵 𑐂𑐮𑐵𑐎𑐵𑐫𑑂 𑐔𑐵𑐴𑐶𑐎𑐵𑑅 𑐳𑐵𑐮𑐾𑐐𑐸 𑐫𑐵𑐂 𑑋 𑐠𑑂𑐰 𑐫𑐵𑐫𑑂𑐧𑐮𑐾 𑐧𑐳𑐸𑐣𑑂𑐢𑐬𑐵 𑐩𑐞𑑂𑐜𑐮 𑐡𑐬𑑂𑐱𑐣 𑐫𑐵𑐎𑐵𑑅 𑐀𑐲𑑂𑐚 𑐳𑐶𑐡𑑂𑐢𑐶𑐫𑐵 𑐎𑐵𑐩𑐣𑐵 𑐫𑐵𑐎𑐷 𑑋

𑐩𑐴𑐵𑐬𑐠𑐵𑐬𑑀𑐴𑐞
𑐠𑐸𑐐𑐸 𑐎𑑂𑐬𑐶𑐫𑐵 𑐐𑐸𑐂𑐐𑐸𑐡 (𑑙𑑙), 𑐐𑐸𑐮𑐵 (𑑙) 𑐰 𑐐𑐸𑐣𑑂𑐴𑐹 (𑑙) 𑐡𑐸𑐏𑐸𑐣𑑂𑐴𑐹 𑐫𑐵𑐂 𑑋 𑐠𑐸𑐐𑐸 𑐎𑑂𑐬𑐶𑐫𑐵𑐳 𑐖𑑄𑐎𑑀 𑐫𑐵𑐩𑑂𑐴𑐾𑐳𑐶𑐟 𑐬𑐠𑐫𑑂 𑐟𑐫𑐵𑑅 𑐎𑐵𑐫𑑂 𑐩𑑂𑐴𑐵𑐫𑑂 𑐥𑐶𑐳𑑄 𑐎𑑂𑐰𑐧𑐸𑐫𑐵𑑅 𑐳𑐵𑐮𑐵 𑐠𑑅𑐐𑐸 𑐟𑑂𑐰𑐵𑑅𑐫𑐵 𑐂𑐮𑐵𑐎𑐵 𑐔𑐵𑐴𑐷𑐎𑐵𑑅 𑐗𑑂𑐫𑐵𑐮𑑄 𑐠𑐎𑐵𑐫𑐾𑐐𑐸 𑐫𑐵𑐂 𑑋 𑐠𑑂𑐰 𑐫𑐵𑐣𑐵𑐫𑐵 𑐩𑐹𑐮 𑐟𑐵𑐟𑐸𑐣𑐵 𑐡𑐾𑐰𑐟𑐸𑐮𑑂𑐫 𑐖𑐸𑐮 𑐢𑐎𑐵 𑐨𑐵𑑅𑐥𑐷𑐐𑐸 𑐏𑑅 𑑋 𑐠𑐸𑐐𑐸 𑐎𑑂𑐬𑐶𑐫𑐵𑐳 𑐄𑐲𑑂𑐞𑐷𑐳 𑐰𑐷𑐖𑐫𑐵 𑐩𑐞𑑂𑐜𑐮 𑐡𑐬𑑂𑐱𑐣 𑐫𑐵𑐎𑐷 𑑋 𑐫𑐾𑑃, 𑐫𑐮 𑐰 𑐰𑐥 𑐡𑐾𑐱𑐾 𑐠𑑂𑐰 𑐎𑑂𑐬𑐶𑐫𑐵 𑐨𑐔𑐵 𑐥𑐵𑐫𑐾𑐦𑐹 𑑋

𑐳𑐷 𑐢𑐸𑑄𑐎𑐵 𑐫𑐵𑐂𑐐𑐸 𑐰𑑂𑐫𑐰𑐴𑐵𑐬
𑐳𑐷 𑐳𑑅 𑐎𑑄𑐎𑐾𑐐𑐸
𑐩𑐣𑐸 𑐳𑐷 𑐢𑐸𑑄𑐎𑐵 𑐳𑐷𑐩𑑂𑐴𑐳𑐶𑐫𑐵 𑐩𑑂𑐴𑐸𑐟𑐸𑐃 𑐮𑐹 𑐕𑐎𑐹 𑐟𑐫𑐵 𑐟𑑁 𑐏𑑀𑐮𑐵 𑐨𑐥𑐸𑐂𑐎𑐶𑑄 𑑋 𑐀𑐮𑐾 𑐎𑐵𑐥𑐟𑑄 𑐟𑑂𑐰𑐥𑐸𑐫𑐵 𑐧𑐶𑐂 𑑋 𑐳𑐶𑐩𑑂𑐴𑐫𑐵 𑐖𑐰𑑄𑐏𑐰𑑄, 𑐔𑑂𑐰𑐫𑑂 𑐎𑑂𑐰𑐫𑑂 𑐥𑐵𑐮𑑂𑐔𑐵𑐫𑑂 𑐔𑐶𑐎𑑄 𑐟𑐫𑐵 𑐳𑐶𑐎𑐶𑐩𑐟 𑐔𑑂𑐫𑐵𑐎𑐶 𑐩𑑂𑐴𑐫𑑂𑐡𑑂𑐫𑐣𑐾 𑐴𑐟𑐶𑐫𑐵𑑅 𑐖𑑂𑐫𑐵𑐨𑑅 𑐕𑐐𑐸 𑐟𑐫𑐵 𑐧𑐶𑐂 𑑋 𑐠𑐸𑐮𑐶 𑐫𑐵𑐫𑐾 𑐢𑐸𑐣𑐾𑐰𑑄 𑐕𑐾𑑄 𑐩𑐹 𑐮𑐸𑐏𑐵𑐫𑑂 𑐩𑐶𑐖𑐩𑑂𑐴 𑐳𑐶𑐳𑐵 𑐖𑐰𑐫𑑂 𑐰 𑐩𑐶𑐳𑐵𑐩 𑐳𑐶𑐳𑐵 𑐏𑑅𑐰𑐫𑑂 𑐐𑐸𑐠𑐶 𑐥𑐵𑑅 𑐮𑐵𑐩𑑂𑐴𑐳𑐶𑐣𑑄 𑐳𑐹 𑐎𑐮𑐶 𑐮𑐶𑐢𑑄𑐎𑐶 𑐀𑐣𑐮𑐶 𑐰 𑐦𑐸𑐎𑐶𑐧𑐵𑐎𑐵𑐫𑐾 𑐫𑐵𑐟 𑐳𑐶 𑐳𑑅 𑐎𑐎𑐾𑐕𑑂𑐰𑐂 𑑋 𑐳𑐷 𑐐𑐸𑐠𑐶𑑄 𑐳𑐷𑐩𑑂𑐴𑐫𑑂 𑐳𑐶𑐟 𑐡𑑂𑐫𑐰𑑄 𑐦𑐵𑐫𑐾𑐎𑐾𑑅 𑐰𑐂 𑑋

𑐦𑐵𑐐𑐵𑑄 𑐦𑐵𑐫𑐾𑐎𑐾𑐐𑐸
𑐳𑐷𑐩𑑂𑐴𑐫𑐵 𑐠𑑅𑐠𑐶𑐟𑐶 𑐩𑑂𑐴𑑂𑐫𑐵𑐫𑑂𑐩𑐔𑐵, 𑐨𑐶𑐣𑐵𑐩𑐔𑐵, 𑐳𑐩𑑂𑐢𑐶 𑐏𑐮𑑅 𑐥𑐶𑐣𑑂𑐳𑑄 𑐳𑐷 𑐳𑑅 𑐳𑐶𑐂𑐰 𑐦𑐵𑑄𑐐𑐵 𑐖𑑂𑐰𑐣𑐵 𑐏𑑂𑐰𑐫𑐵 𑐡𑐸𑐴𑐵𑑃 𑐰𑐫𑐵 𑐳𑐶𑐩𑑂𑐴𑐫𑐵 𑐩𑑂𑐴𑐫𑑂 𑐦𑐵𑑄𑐐𑐵 𑐦𑐵𑐫𑐎𑑅 𑐰𑐂 𑑋

𑐳𑐷𑐠𑑄 𑐫𑑄𑐎𑐾𑐐𑐸
𑐳𑐷𑐐𑐸 𑐏𑑄 𑐳𑐶𑐂𑐰𑑄 𑐳𑐎𑐮 𑐐𑐸𑐠𑐶𑐫𑐵𑐬 𑐳𑐶𑐐𑐸 𑐕𑐾𑑄 𑐰𑐵 𑐠𑐵𑐳𑐾 𑐰𑐫𑐵 𑐩𑐵𑐐𑐸 𑐖𑑂𑐰𑐮𑑄 𑐟𑐵𑑅 𑐮𑐵𑐎𑐶 𑑋 𑐐𑐸𑐠𑐶𑐫𑐵𑐬 𑐟𑐫𑑂𑐳𑑄 𑐳𑐶𑐩𑑂𑐴 𑐠𑐮𑐵𑐫𑑂 𑐎𑑀𑐮𑐵𑐫𑑂 (𑐡𑐸𑐎𑐵𑐥𑐶𑐎𑐵) 𑐫𑐵𑐂 𑑋 𑐄𑐧𑐮𑐾 𑐐𑐸𑐠𑐶𑐫𑐵𑐟𑐫𑑂𑐳𑑄 𑐳𑐶𑐩𑑂𑐴𑐫𑐵𑐐𑐸 𑐰𑐳 𑐟𑑀𑐎𑐵𑑅 𑐏𑑂𑐰𑐵𑐮𑐫𑑂 𑐎𑑀𑐔𑐶𑐎𑑄 𑐧𑐸𑐂𑐎𑐵, 𑐥𑐸𑐖𑐵𑐫𑐵𑐣𑐵, 𑐀𑐰𑐶𑐬𑑄 𑐂𑐮𑐶𑐂, 𑐳𑐶𑐩𑑂𑐴𑐫𑐵 𑐖𑐵𑐟𑑅 𑐰𑐫𑐵 𑐴𑐾 𑐎𑐥𑐵𑐮𑐾 𑐟𑐫𑐵 𑐎𑐔𑐶𑐎𑐵𑑄𑑅 𑐔𑐶𑐂, 𑐎𑐫𑑄𑑂 𑐏𑑀𑐮𑐵 𑐕𑐐𑐮𑑄 𑐩𑑂𑐴𑐹𑐟𑐸𑐂 𑐨𑑀𑐥𑐸𑐂𑐎𑐵𑑅 𑐟𑐸𑐫𑐹 𑐎𑐵𑐥𑐟𑑄 𑐨𑐹𑐣𑐷 𑐩𑐴𑐵𑐡𑐶𑐐𑐸 (𑐳𑑁 𑐧𑑄 𑐠𑐶𑐮𑐶𑐐𑐸) 𑐳𑑂𑐰𑐬𑐸𑐥 𑐕𑐾𑑄𑐫𑐵 𑐴𑐵𑐩𑐵–𑐩𑐶 𑐟𑐾𑐩𑑂𑐴𑐳𑐶𑐫𑐵 𑐎𑐮𑐵𑐣𑑄 𑐳𑑁 𑐧𑑄 𑐳𑐵𑐫𑐾𑐎𑐶 (𑐟𑐸𑐦𑐶 𑐳𑑁 𑐳𑑂𑐰𑐳𑑂𑐟𑐶 𑐧𑐵𑑃 𑐮𑐸𑐂𑐎) 𑐠𑐸𑐎𑐶𑐫𑐵 𑐡𑑂𑐫𑐣𑐾 𑐳𑐶𑐩𑑂𑐴 𑐟𑐂 𑑋 𑐀𑐮𑐾 𑐦𑐸𑐎𑐶𑐫𑐵 𑐩𑐶𑐳𑐵𑐥𑐶𑐳𑑄 𑐥𑐵𑐔𑐵 𑐳𑐸𑐎𑐸𑐮𑐶 𑐳𑐶𑐩𑑂𑐴𑐫𑐵 𑐰𑐳𑑅𑐟𑐸𑐦𑐶 𑐟𑐫𑐵 𑐕𑑂𑐰𑐵𑐳𑐫𑑂 𑐰𑐵𑐎𑐾𑐕𑑂𑐰𑐂 𑑋 𑐕𑑂𑐫𑐮𑐵 𑐟𑐐𑐸 𑐨𑐵𑐖𑐣𑐫𑑂 𑐳𑑁𑐥𑐵 𑐰 𑐳𑐶𑑄 𑐟𑐫𑐵 𑐳𑐶𑐎𑐶𑐩𑐟 𑐔𑑂𑐫𑐵𑐎𑐵𑑅 𑐥𑐵𑐏𑐵𑐎𑐹 𑐠𑐣𑐷 𑑋 𑐥𑐵𑐏𑐵𑐫𑑂 𑐰𑐵 𑐥𑐶𑐏𑐵𑐮𑐸𑐏𑐸𑐳 𑐎𑐔𑐶 𑐀𑐥𑑂𑐥𑐵 𑐳𑑂𑐰𑐥𑐵𑐫𑐵 𑐨𑐸𑐟𑐸 𑐡𑐫𑑂𑐎𑐵 𑐎𑐳𑐶𑐔𑐵𑐫𑑂 𑐖𑐵𑐎𑐷 𑐟𑐫𑐵 𑐖𑐵𑑅𑐠𑐸𑐂 𑐨𑐵𑐫𑑂𑐫𑐵𑐂 𑑋 𑐎𑐔𑐶𑐀𑐥𑑂𑐥𑐵 𑐥𑐔𑐶𑐣𑐵 𑐳𑐶𑐠 𑐫𑐿𑐎𑐾 𑐣𑑂𑐴𑐫𑑅 𑐕𑑂𑐰𑐵𑐳𑐾 𑐰𑐵𑐎𑐾𑐕𑑀𑐂 𑑋 𑐐𑐸𑐠𑐶𑐫𑐵𑐬 𑐟𑐫𑑂𑐳𑑄 𑐳𑐷𑐩𑑂𑐴 𑐎𑐸𑐟𑐵𑐮𑐫𑑂 𑐟𑐫𑐵 𑐳𑐶𑐠𑑄 𑐫𑑄𑐎𑐷 𑑋 𑐳𑐶𑐩𑑂𑐴𑑄 𑐥𑑄𑐔𑐩𑐾 𑐮𑐵𑐟𑐢𑐵𑐳𑐵 𑐐𑐸𑐨𑐵𑐖𑐸𑑄 𑐐𑑂𑐰𑐩𑑂𑐴 𑐥𑑄𑐔𑐩𑐾 𑐮𑐵𑐐𑐸 𑐏𑑅 𑐰𑐐𑑅 𑐴𑐾 𑐏𑐾𑑄 𑐐𑐬𑑂𑐨𑐾𑐫𑑂 𑐟𑐫𑐵 𑐎𑐸𑐱𑐫𑐵 𑐩𑐣𑐸 𑐡𑐫𑐎𑐵 𑐳𑐶𑐩𑑂𑐴 𑐣𑐵𑐥𑑄 𑐳𑐶𑐠𑑄 𑐫𑑄𑐎𑐾𑐩𑐵𑐐𑐸 𑐔𑐮𑐣 𑐡𑐸 𑑋 𑐩𑐶𑐖𑑄 𑐎𑐫𑑂𑐟𑐵𑐥𑐸𑐖𑐵 𑐩𑐫𑐵𑐣𑐶𑐩𑑂𑐴 𑐰 𑐩𑐶𑐳𑐵 𑐧𑐵𑐴𑑂𑐬𑐵𑑅 𑐩𑐟𑑅𑐣𑐶𑐩𑑂𑐴 𑐳𑐶𑐟 𑐢𑐵𑐳𑐵 𑐮𑑂𑐴𑐵𑑅 𑐠𑐳𑑅 𑐥𑐵𑐫𑑂𑐎𑐵 𑐳𑐶𑐩𑑂𑐴 𑐟𑐫𑐵 𑐳𑐶𑐠𑑄 𑐫𑐾𑑄𑐎𑐶 𑑋 𑐳𑐶𑐠𑑄 𑐫𑑄𑐎𑐶𑐰𑐮𑐫𑑂 𑐳𑐶𑐩𑑂𑐴𑐫𑐵 𑐣𑑂𑐴𑐫𑑅𑐣𑐾 𑐣𑑂𑐴𑐵𑐥𑐵𑑄 𑐳𑐸 𑐎𑐸𑐧𑑂𑐫𑐹𑐩𑑂𑐴 , 𑐢𑐵𑐬𑐞𑐷 𑐧𑑂𑐰𑐣𑐷𑐩𑑂𑐴 𑐐𑐸𑐨𑐵𑐖𑐸 𑐳𑐶𑐩𑑂𑐴𑐫𑐵 𑐮𑐶𑐄𑐣𑐾 𑐏𑑂𑐰𑐫𑐵 𑐰𑐣𑐶𑐥𑐶𑑄 𑐦𑐸𑐎𑐶𑐰𑐵𑐎𑐵𑐫𑑂𑐥𑐶𑑄, 𑐖𑐶𑐮𑐵𑐖𑑄𑐥𑐶𑑄, 𑐨𑐶𑐣𑑂𑐔𑐵𑐥𑐶𑑄, 𑐩𑐶𑑄 𑐟𑐃𑐩𑑂𑐴 𑐰 𑐐𑐸𑐠𑐶𑐫𑐵𑐬, 𑐂𑐲𑑂𑐚𑐩𑐶𑐟𑑂𑐬𑐥𑐷 𑐳𑐎𑐮𑐾𑑄 𑐳𑐣𑐵 𑐰𑐣𑐷 𑑋 𑐳𑐶𑐠𑑄 𑐫𑑄𑐎𑐾 𑐢𑐸𑐣𑐾𑐰 𑐨𑑁𑐩𑐔𑐵 𑐕𑑂𑐰𑐵𑐳𑐫𑑂 𑐥𑐶𑐔𑐵 𑐰𑐵𑐫𑐾 𑐫𑑄𑐎𑐷 𑑋

𑐩𑐶𑑄 𑐟𑐫𑐾𑐐𑐸
𑐳𑐶𑐠𑑄 𑐠𑑅𑐐𑐸 𑐃𑐮𑐵𑐎𑐵𑐫𑐵 𑐡𑐶𑐥𑐫𑑂 𑐡𑐶𑐎𑐶 𑑋 𑐳𑐶 𑐎𑑀𑐧𑑂𑐫𑐹𑐫𑐵𑐰𑐥𑐶𑐳𑑄 𑐳𑐶𑐩𑑂𑐴 𑐫𑐵𑐟 𑐮𑑅 𑐟𑑂𑐰𑑄𑐎𑐶 𑑋 𑐀𑐮𑐾 𑐏𑑂𑐰𑐫𑐵𑐰𑐥𑐶𑑄 𑐳𑐎𑐳𑐶𑐣𑑄 𑐮𑑅𑐟𑑂𑐰𑑄𑐎𑐶 𑑋 𑐮𑐶𑐥𑐵 𑐰𑐩𑑂𑐴 𑐳𑐶𑐩𑑂𑐴𑐳𑐶𑐫𑐵 𑐟𑐢𑐶𑐎𑐩𑑂𑐴𑑅 𑐎𑐵𑐫𑑂 𑐰𑐵 𑐫𑐵𑐎𑑅 𑐎𑐵𑐫𑑂 𑐰𑐵 𑐎𑐵𑐫𑑂 𑐩𑐡𑐸𑐳𑐵 𑐡𑐎𑐮𑐾 𑐳𑐟𑐷𑐐𑐸 𑐣𑐵𑐟𑐵 𑐎𑑂𑐫𑐩𑑂𑐴𑐳𑐶𑐣𑑄 𑐰 𑐩𑐳𑑂𑐟 𑐳𑐶𑐳𑐵 𑐕𑐾𑑄𑐫𑐵 𑐩𑐶𑐖𑐩𑑂𑐴 𑐴𑐵𑐩𑐵𑑅, 𑐎𑐮𑐵 𑐳𑐷𑐳𑐵 𑐨𑐵𑐟𑑄 𑐰𑐵 𑐡𑐎𑐮𑐾 𑐎𑑂𑐰𑐎𑐵𑐮𑐶𑐩𑑂𑐴 𑐎𑐵𑐫𑑂𑐣𑑄 𑐮𑐶𑐎𑑂𑐰𑐵𑐥𑑄 𑐠𑐫𑐵 𑐩𑐶𑑄 𑐟𑐫𑐵 𑐡𑐵𑐴 𑐳𑑄𑐳𑑂𑐎𑐵𑐬 𑐫𑐵𑐂 𑑋 𑐳𑐎𑐮𑐾𑑄 𑐮𑐶𑐴𑐵 𑐰𑐣𑐶 𑑋 𑐧𑐮𑐶𑐥𑐶𑐫𑐵 𑐖𑐎 𑐕𑐾𑑄 𑐡𑐸𑐴𑐵𑐰𑐣𑐷 𑐐𑐸𑐩𑑂𑐴𑐐𑐸𑐩𑑂𑐴𑐾𑐳𑑂𑐫𑐵𑑄 𑐏𑐸𑐳𑐶𑐟𑐸𑑄 𑐧𑐮𑐷 𑐥𑐷 𑑋

𑐣𑑁 𑐔𑐸𑐂𑐎𑐾𑐐𑐸
𑐳𑐶𑐩𑑂𑐴 𑐄𑐃 𑐳𑐶𑐢𑑅𑐐𑐸 𑐳𑐹𑐔𑑄 𑐐𑐸𑐠𑐶𑐫𑐵𑐬𑑄 𑐳𑐶 𑐕𑐾𑑄𑐫𑑂 𑐧𑑂𑐫𑐹 𑐰𑐣𑐶 𑑋 𑐀𑐮𑐾 𑐩𑐶 𑐟𑐩𑑂𑐴 𑐡𑐶𑐥𑐫𑑂 𑐰𑐣𑐵 𑐳𑐶𑐩𑑂𑐴𑐫𑑂𑐫𑐵 𑐣𑑁𑐫𑐵 𑐩𑐣𑐹 𑐖𑑂𑐫𑐵𑐣𑐵𑑅 𑐴𑐠𑑄𑐫𑐵 𑐩𑐶𑐏𑐵, 𑐎𑑁𑐫𑐵 𑐩𑑂𑐴𑐸𑐟𑐸 𑐟𑐫𑐵, 𑐟𑐶𑑄 𑐎𑐠𑐶 𑐳𑑂𑐰𑐥𑐸𑐫𑐵 𑐩𑐔𑐵𑐎𑐠𑐶 𑐡𑐫𑑂𑐎𑐵 𑐟𑐃, 𑐥𑐹𑐖𑐵𑐫𑐵𑐣𑐵 𑐦𑐸𑐎𑑂𑐎 𑐣𑑁 𑐩𑐸𑐣𑐵 𑐏𑐸𑐳𑐶𑐃 𑐔𑐸𑐂𑐎𑑅 𑐕𑑂𑐰𑐂 𑑋 𑐄𑐎𑐶𑐫𑐵𑐟 𑐴𑐾 𑐣𑑁 𑐔𑐸𑐂𑐎𑐾𑐐𑐸 𑐢𑐵𑐃 𑑋 𑐣𑑁 𑐔𑐸𑐂𑐎𑐵 𑐕𑐾𑑃 𑐮𑐶𑐴𑐵𑑃 𑐰𑐫𑐵 𑐕𑐾𑑄 𑐕𑐏𑐵 𑐧𑑄 𑐥𑐸𑐣𑐵 𑐢𑐹 𑐦𑐸𑐎𑑂𑐎 𑐥𑐶𑐏𑐵𑐮𑐸𑐏𑐸𑐃 𑐰𑐵𑑄𑐕𑑂𑐰𑐂 𑑋
𑐠𑑂𑐰 𑐏𑐸𑐣𑑂𑐴𑐸 𑐣𑐶𑐳𑐾𑑄 𑐗𑐶𑐣𑑂𑐴𑐹 𑐟𑐎 𑐕𑐾𑑃𑐫𑐵 𑐖𑑅 𑐰 𑐦𑐸𑐎𑐶𑐰𑐵𑐎𑐵𑐫𑑂 𑐏𑐮𑑅𑐥𑐶𑑄 𑐦𑐸𑐎𑑂𑐎 𑐡𑐸𑐏𑑄 𑐎𑑂𑐫𑑄𑐐𑐸 𑐰𑐵 𑐡𑐸𑐩𑐵𑑅𑐐𑐸 𑐖𑐸𑐂 𑑋 𑐳𑐶 𑐏𑐸𑐣𑑂𑐴𑐸 𑐣𑐶𑐳𑐾 𑐡𑐹𑐩𑐧𑑂𑐫𑑄𑐟𑐮𑐾 𑐡𑐹𑐩𑐵𑐥𑐶𑐳𑑄 𑐣𑑂𑐴𑐵𑐫𑐎𑑄 𑐳𑑂𑐰𑐫𑑂 𑐩𑐖𑑂𑐫𑐹𑐐𑐸 𑐔𑐮𑐣 𑐡𑐸 𑑋

𑐏𑐸𑐳𑐷𑐥𑑄 𑐮𑑂𑐴𑐸𑐫𑐾𑐐𑐸
𑐐𑐸𑐠𑐶𑐫𑐵𑐬𑐟𑐫𑑂𑐳𑑄 𑐳𑐶𑐩𑑂𑐴 𑐄𑐫𑐵 𑐣𑑁 𑐔𑐸𑐂𑐎𑐾 𑐧𑐶𑐫𑐵 𑐔𑐶𑐥𑑄 𑐠𑐶𑐂𑐐𑐸 𑐫𑐵𑐟 𑐏𑐸𑐳𑐷𑐥𑑄 𑐮𑑂𑐴𑐸𑐫𑐐𑐸 𑐢𑐎𑐵 𑐢𑐵𑐂 𑑋 𑐐𑐸𑐠𑐶𑐫𑐵𑐬 𑐥𑐶𑑄𑐟 𑐏𑐸𑐳𑐷𑐥𑑄 𑐮𑑂𑐴𑐸𑐎𑐾𑐟 𑐢𑐎𑐵 𑐳𑐶 𑐕𑐾 𑐥𑐵𑐏𑐾 𑐧𑐖𑐶 𑑔 𑐩𑐣𑐵, 𑐩𑐮𑐫𑑂 𑐔𑐶, 𑐥𑐵𑐮𑐸 𑐰 𑐐𑐔𑑂𑐕𑐾 𑐀𑐣𑐸𑐳𑐵𑐬 𑐢𑑂𑐫𑐧𑐵 𑐧𑐶𑐫𑐾𑐩𑐵 𑑋 𑐐𑐸𑐠𑐶 𑐥𑐵𑐮𑐵𑐫𑐵 𑐕𑐾𑑄𑐫𑑂 𑐥𑑂𑐫𑐟𑐵 𑐑𑐵𑐳𑐵 𑐏𑐵𑐣𑐵 𑐏𑐸𑐳𑐷𑐥𑑄 𑐮𑑂𑐴𑐸𑐂 𑑋 𑐳𑐶𑐩𑑂𑐴𑐾 𑐳𑐷𑐐𑐸 𑐩𑑂𑐴𑐸𑐟𑐸𑐃 𑐟𑐐𑐸𑐮𑐸𑑄 𑐫𑐵 𑐢𑑂𑐫𑐧𑐵 𑐖𑑂𑐫𑐵𑐣𑐵 𑐏𑐸𑐳𑐷𑐥𑑄 𑐮𑑂𑐴𑐸𑐂𑐐𑐸 𑐫𑐵𑐂 𑐮𑑂𑐫𑑄𑐐𑐸 𑐢𑑂𑐫𑐧𑐵 𑐐𑐸𑐠𑐷 𑐟𑐿𑐐𑐸 𑐣𑑄 𑐔𑐮𑐣 𑐡𑐸 𑑋

𑐔𑐶𑐥𑑄 𑐠𑐶𑐎𑐾𑐐𑐸
𑐳𑐶𑐩𑑂𑐴𑐫𑐵 𑐣𑑁 𑐔𑐸𑐂𑐎𑐾 𑐳𑐶𑐢𑑅𑐐𑐸 𑐏 𑐳𑐶𑐃𑐰 𑐳𑑂𑐫𑐵𑐥𑐶𑑄 𑐩𑑂𑐴𑐵𑐫𑐩𑐔𑐵, 𑐨𑐶𑐣𑐵𑐩𑐔𑐵 𑐰 𑐳𑐩𑑂𑐢𑐷 𑐏𑐮𑑅 𑐥𑐶𑐳𑑄 𑐎𑑂𑐰𑐫𑑂 𑐣𑑂𑐴𑐠𑐣𑐵𑐐𑐸 𑐖𑑂𑐰𑐮𑑄 𑐖𑑂𑐰𑐣𑐵 𑐳𑐶𑑄 𑐕𑐾𑑄𑐫𑑂 𑐰𑐣𑐶 𑑋 𑐳𑐷𑐐𑐸 𑐠𑐵𑐳𑐫𑑂 𑐧𑑂𑐰 𑐕𑐧𑑂𑐰 𑐟𑐫𑐵 𑐨𑑂𑐫𑐐𑑅𑐟𑑄 𑐟𑑂𑐰𑐥𑐸𑐫𑐵𑑅 𑐥𑐵𑐮𑑂𑐔𑐵𑐫𑑂 𑐃𑐟𑐵 𑐔𑐶𑐎𑑄 𑐟𑐫𑐵 𑐳𑐶𑐎𑐶𑐩𑐟 𑐕𑐥𑑂𑐰𑐵𑑅 𑐩𑐡𑐶𑐎𑑂𑐎 𑐔𑑂𑐫𑐵𑐎𑐵 𑐟𑐃 𑑋 𑐔𑐶𑐥𑑄 𑐠𑐶𑐂𑐎𑑅 𑐰𑐥𑐶𑑄 𑐦𑐸𑐎𑑂𑐎𑐳𑐶𑐣𑑄 𑐳𑐷 𑐨𑐵𑐐 𑐦𑑂𑐫𑐵𑐣𑐵 𑐖𑐎 𑐕𑐾𑑄 𑐖𑑅 𑐰 𑐦𑐸𑐎𑐶𑐰𑐵𑐎𑐵𑐫𑑂 𑐥𑐶𑐣𑑂𑐟 𑐔𑐶, 𑐥𑐵𑐮𑐸 𑐩𑐮𑐫𑑂, 𑐧𑐖𑐶, 𑐩𑐬𑐶 𑐰 𑐀𑐫𑑂𑐮𑐵 𑐧𑐶𑐫𑐵 𑐔𑐶𑐥𑑄 𑐠𑐶𑐎𑐶 𑑋
𑐎) 𑐔𑐶 𑐏) 𑐥𑐵𑐮𑐸 𑐐) 𑐩𑐮𑐫𑑂 𑐑) 𑐧𑐖𑐶 𑐒) 𑐩𑐬𑐶 𑐔) 𑐀𑐫𑑂𑐮𑐵

𑐦𑐸𑐎𑐶𑐧𑐵𑐎𑐵𑐫𑑂 𑐥𑐶𑑄𑐳 𑐟𑐫𑑂𑐴𑐂𑐐𑐸
𑐳𑐶 𑐕𑐾𑑄𑐫𑐵 𑐖𑑅𑐥𑐶𑐣𑑂𑐟 𑐐𑑂𑐰𑐵𑐴𑐵𑐮𑐷 𑐫𑐵𑐫𑐾𑐐𑐸 𑐎𑐠𑑄 𑐦𑐸𑐎𑐶𑐧𑐵𑐎𑐵𑐫𑑂 𑐥𑐶𑐳𑑄 𑐣𑑂𑐴𑐶 𑐣𑑂𑐴𑐶 𑐣𑐫𑐟𑐩𑐵𑐐𑐸 𑐖𑑂𑐰𑐮𑑄 𑐥𑐵𑐮𑑄𑐥𑐵 𑐫𑐵𑐣𑐵 𑐟𑐰𑐃 𑑋 𑐂𑐥𑐶𑐳𑑄 𑐎𑑂𑐰𑐫𑑂 𑐣𑑂𑐴𑐠𑐣𑐵𑐐𑐸 𑐣𑐳𑐵 𑐖𑑂𑐰𑐮𑑄 𑐟𑑅𑐰𑐂 𑑋
𑐎) 𑐖𑐵𑐎𑐶 𑐏) 𑐎𑐾𑐫𑑂𑑃 𑐐) 𑐟𑐬𑐎𑐵𑐬𑐷 𑐑) 𑐔𑐶𑐎𑑄 𑐒) 𑐔𑐶 𑐰 𑐩𑐾𑐩𑐾𑐐𑐸

𑐧𑐶𑐔𑐵 𑐰𑐣𑐾𑐐𑐸
𑐳𑐷𑐐𑐸𑐫𑐵 𑐎𑐣𑑂𑐴𑐫𑑂𑐏𑐸𑐣𑑂𑐴𑐸 𑐳𑐶 𑐕𑐾𑑄 𑐳𑐸𑐠𑐣𑑂𑐴𑐵𑐥𑐵𑑄 𑐠𑑅 𑐠𑐶𑐟𑐶, 𑐐𑐸𑐠𑐶𑐫𑐵𑑅 𑐰 𑐃𑐲𑑂𑐚𑐩𑐶𑐟𑑂𑐬 𑐩𑐶𑐖𑑄𑐥𑐶𑑄 𑐳𑐎𑐮𑐾 𑐧𑐶𑐔𑐵 𑐰𑐂 𑑋 𑐠𑑅 𑐐𑐸𑐨𑐵𑐖𑐸𑐫𑐵𑐟 𑐡𑐾𑐩𑐵𑐫𑑂 𑐖𑐵𑐎𑐷 (𑐎𑐶𑐨𑐹) 𑐰 𑐢𑐸𑐥𑐵𑐫𑑂 𑐰 𑐡𑐎𑑂𑐲𑐶𑐞𑐵 𑐣𑑂𑐴𑐣𑐾 𑐟𑐫𑐾𑐩𑐵 𑑋 𑐀𑐮𑐾 𑐐𑐸𑐨𑐵𑐖𑐸𑑄 𑐡𑐶𑐰𑑄𑐐𑐟 𑐳𑐸𑐐𑐟𑐶 𑐎𑐵𑐩𑐣𑐵 𑐫𑐵𑐳𑐾 𑐡𑐸𑐬𑑂𑐐𑐟𑐶𑐥𑐬𑐶𑐱𑑀𑐢 𑐢𑐵𑐬𑐞𑐷 𑐧𑑂𑐰𑐣𑐷 𑑋 𑐢𑐵𑐬𑐞𑐷 𑐧𑑂𑐰𑐣𑐾 𑐳𑐶𑐩𑐢𑑅𑐟𑐮𑐾 𑐧𑐶𑐔𑐵𑐰𑐥𑐶𑑄 𑐔𑑂𑐰𑐣𑐵 𑐔𑑂𑐰𑐣𑐾𑐩𑐵𑑅 𑑋 𑐢𑐵𑐬𑐞𑐷 𑐧𑑂𑐰𑐣𑐾 𑐳𑐶𑐢𑐮𑐎𑐷 𑐩𑐶𑑄𑐟𑐩𑑂𑐴𑑄 𑐰 𑐧𑐶𑐔𑐵 𑐧𑑂𑐰𑐩𑑂𑐴𑑄 (𑐧𑐶𑐔𑐵 𑐠𑐩𑑂𑐴𑑄) 𑐎𑐶𑐨𑐹 𑐐𑐸𑐬𑐸𑐖𑐸𑐫𑐵𑐟 𑐮𑐮𑑂𑐴𑐵𑐣𑐵 𑐡𑐎𑑂𑐲𑐶𑐞𑐵 𑐧𑐶𑐃𑐩𑐵 𑑋 𑐠𑑂𑐰 𑐧𑐶𑐔𑐵 𑐟𑐬𑐶𑐩𑑂𑐴 𑐳𑐷𑐳𑐵 𑐣𑐶𑐣𑑂𑐴𑐸 𑐰 𑐩𑐔𑐵 𑐳𑐶𑐳𑐵 𑐕𑐣𑑂𑐴𑐸 𑐖𑐎 𑐧𑐶𑐔𑐵 𑐧𑑂𑐰𑐣𑐶 𑑋

𑐳𑐶𑐎𑐶𑐫𑐵 𑐎𑑄𑐰𑐣𑐾𑐐𑐸
𑐳𑐶𑐐𑐸𑐫𑐵 𑐎𑐣𑑂𑐴𑐫𑑂𑐏𑐸𑐣𑑂𑐴𑐸 𑐦𑐸𑐎𑐶𑐖𑑅𑐟𑐫𑑂𑐳𑑄 𑐳𑐶𑐩𑑂𑐴𑐳𑐶𑐫𑐵 𑐠𑑅𑐠𑐶𑐟𑐶𑐥𑐶𑐣𑑂𑐠𑐵𑐫𑑂 𑐳𑐶𑐎𑐶𑐫𑐵 𑐎𑑄𑐰𑐣𑐶 𑑋 𑐠𑑂𑐰 𑐎𑑄𑐰𑐣𑐾𑐰𑐮𑐫𑑂 𑐳𑐟𑐶𑐥𑐶𑑄 𑐠𑑅 𑐠𑐶𑐟𑐶𑐥𑐶𑐣𑑂𑐟 “𑐦𑐮𑐵𑐣𑐵𑐩𑑂𑐴 𑐳𑐶𑐐𑐹𑐫𑐵 𑐥𑐶𑐣𑐵𑐎𑐫𑐵 𑐡𑐶𑐳𑑄” 𑐢𑐎𑐵 𑐢𑐵𑐫𑐾𑐩𑐵𑑅 𑑋 𑐠𑐸𑐮𑐶 𑐢𑐵𑐮𑐎𑐷 𑐧𑑂𑐫𑐵 𑐰𑐣𑐾𑐩𑐵 𑐢𑐎𑐵 𑐠𑐸𑐂𑐎𑐾𑐩𑐵𑑅 𑑋 𑐟𑐵𑑅𑐥𑐵𑐥𑐶𑑄 𑐠𑑅𑐠𑐶𑐟𑐶𑐥𑐶𑐣𑑂𑐟 “𑐦𑐮𑐵𑐣𑐵𑐩𑑂𑐴 𑐳𑐶𑐐𑐸𑐫𑐵 𑐥𑐶𑐣𑐵 𑐎𑐫𑐵𑐡𑐶𑐳𑑄 𑐧𑑂𑐫𑐵𑑅 𑐐𑐣𑐵 𑐴𑑅𑐐𑐸 𑐡𑐸 ” 𑐢𑐎𑐵 𑐢𑐵𑐫𑐾𑐩𑐵 𑑋 𑐠𑐸𑐎𑐶 𑐧𑑂𑐫𑐵𑑅 𑐰𑐣𑐾𑐩𑑂𑐰𑐵 𑐢𑐎𑐵 𑐠𑐸𑐂𑐎𑐾𑐩𑐵 𑑋 𑐩𑐬𑐶 𑐧𑐶𑐔𑐵 𑐖𑐎 𑐰𑑄𑐳𑐵 𑐐𑐵𑑅 𑑋 𑐳𑐷𑐕𑐾𑑄𑐫𑐵 𑐡𑐾𑑃 𑐟𑑂𑐰𑐣𑐵 𑐩𑐾𑐐𑐸 𑐡𑐾𑑄 𑐔𑑂𑐰𑐩𑑂𑐴 𑐠𑑅𑐠𑐶𑐟𑐶 𑐫𑐵𑐟 𑐰 𑐥𑐵𑐏𑐾 𑐳𑐶𑑄𑐎𑐎𑐾𑐟 “𑐳𑐶𑑄 𑐎𑐣𑐾𑐩𑐵𑐥𑐶𑑄 𑐠𑑅 𑐠𑐶𑐟𑐶𑐫𑐵 𑐢𑐮𑑅 𑐔𑑂𑐰𑐫𑐵 𑐎𑐔𑐶𑐎𑐵𑑅 𑐔𑐶𑐣𑐵 𑐕𑑂𑐰𑐫𑑂𑐩𑐵𑑅 𑑋 𑐳𑐶𑐎𑐶𑐫𑐵 𑐎𑑄𑐰𑐣𑐾𑐐𑐸 𑐖𑑂𑐫𑐵 𑐧𑐴𑐣𑐷 𑐖𑐵 𑐣𑐫𑐾𑐢𑐸𑑄𑐐𑐸 𑐃 𑐳𑑂𑐰𑐫𑐵 𑐖𑐎 𑐢𑐵𑐰𑐣𑐾𑐩𑐵𑑅 𑑋

𑐧𑑂𑐫𑐵𑑅 𑐰𑐣𑐾𑐐𑐸
𑐳𑐷𑐐𑐸𑐫𑐵 𑐥𑑂𑐫𑐣𑑂𑐴𑐹 𑐡𑐸𑐏𑐸𑐣𑑂𑐴𑐹 𑐳𑐶𑐕𑐾𑑄 𑐩𑑂𑐴𑐵𑐫𑑂𑐩𑐔𑐵, 𑐨𑐶𑐣𑐵𑐩𑐔𑐵, 𑐳𑐩𑑂𑐢𑐶 𑐏𑐮𑑅 𑐰 𑐳𑑂𑐫𑐵𑐥𑐶𑑄 𑐠𑑅 𑐠𑐶𑐟𑐶𑐫𑐵 𑐩𑐶𑐳𑐵𑐥𑐶𑐳𑑄 𑐎𑑂𑐰𑐫𑑂 𑐣𑑂𑐴𑐠𑐣𑐵 𑐎𑐠𑑄 𑐖𑑂𑐰𑐮𑑄 𑐖𑑂𑐰𑐣𑐵 𑐏𑑂𑐰𑐫𑐵 𑐧𑑂𑐫𑐵 𑐰𑐂 𑑋 𑐧𑑂𑐫𑐵𑑅 𑐦 𑐧𑑂𑐫𑐵𑑅 𑐰 𑐣𑐶𑐦 𑐧𑑂𑐫𑐵𑑅 𑐢𑐎𑐵 𑐣𑐶𑐐𑐸 𑐎𑐠𑑄𑐫𑐵 𑐡𑐸 𑑋 𑐣𑐶𑐦 𑐧𑑂𑐫𑐵𑑅 𑐳𑐟𑐶𑐥𑐶𑑄 𑐠𑑅𑐠𑐶𑐟𑐶 𑐰 𑐦𑑄 𑐧𑑂𑐫𑐵𑑅 𑐟𑐵𑑅𑐥𑐵𑐥𑐶𑑄 𑐠𑑅𑐠𑐶𑐟𑐶 𑐧𑑂𑐫𑐵 𑐰𑐃𑐐𑐸 𑐏 𑑋 𑐔𑐶𑐥𑑄 𑐠𑐶𑐎𑑅 𑐩𑐰𑐥𑐶𑑄 𑐖𑐸𑐳𑐵 𑐔𑐶𑐥𑑄 𑐠𑐶𑐎𑐾𑐐𑐸 𑐖𑑂𑐰𑐮𑑄 𑐣𑑄 𑐧𑑂𑐫𑐵𑑅 𑐰𑐣𑐾𑐐𑐸 𑐖𑑂𑐰𑐮𑐣𑐫𑑂 𑐳𑐵𑐫𑐵 𑐰𑐣𑐾𑐩𑐵𑑅 𑐧𑑂𑐫𑐵 𑐰𑐥𑐶𑑄 𑐳𑐎𑐳𑐶𑐐𑐸 𑐧𑑂𑐫𑐵𑑅 𑐩𑑂𑐴𑐫𑐵𑐫𑑂𑐩𑐔𑐵𑑄 𑐳𑐷 𑐧𑑂𑐰𑐫𑑂 𑐕𑐵𑐫𑐵 𑐖𑐎 𑐧𑑂𑐫𑐵𑑅 𑐰 𑐥𑐶𑐳𑑄 𑐴𑐾 𑐡𑐸𑐏𑑄 𑐎𑑂𑐫𑐥𑐶𑑄 𑐳𑐎𑐳𑐶𑐟 𑐔𑐶𑐥𑑄 𑐠𑐶𑐂𑐎𑐶 𑑋 𑐧𑑂𑐫𑐵𑑅 𑐰𑐐𑐸 𑐖𑑂𑐰𑐮𑑄 𑐨𑐶𑐣𑑂𑐔𑐵𑐥𑐶𑑄 𑐰𑐵 𑐖𑐶𑐮𑐵𑐖𑐥𑐶𑑄𑐳 𑐧𑑂𑐫𑐵𑑅 𑐥𑑂𑐰𑑄𑐎𑐾𑐐𑐸 𑐔𑐮𑐣 𑐡𑐸 𑑋
𑐎) 𑐧𑐖𑐶 𑐏) 𑐔𑐶 𑐐) 𑐥𑐵𑐮𑐸 𑐑) 𑐎𑐳𑐹 𑐌 𑐒) 𑐎𑐳𑐹 𑐀𑐔𑐵𑐬 𑐔) 𑐢𑑁

𑐮𑑀𑐔𑐵𑑅
𑐳𑐶𑐣𑐵 𑐣𑑂𑐫𑐵𑐣𑑂𑐴𑐹 𑐏𑐸𑐣𑑂𑐴𑐹 𑐮𑑀𑐔𑐵 𑐫𑐵𑐫𑐾𑐐𑐸 𑐔𑐮𑐣 𑐡𑐸 𑑋 𑐠𑑂𑐰 𑐏𑐸𑐣𑑂𑐴𑐹 𑐩𑑂𑐴𑐫𑐵𑐫𑑂𑐩𑐔𑐵𑑄 𑐳𑐶𑑄 𑐕𑐾𑑄 𑐥𑑂𑐫𑐟𑐵 𑐑𑐵𑐳𑐵𑑅 𑐖𑑂𑐰𑐬𑐾 𑐫𑐵𑐃 𑑋 𑐡𑐸𑐏𑑄 𑐔𑑂𑐰𑐥𑐶𑑄 𑐳𑐎𑐳𑐶𑐟 𑐥𑑂𑐫𑐟𑐵 𑐑𑐵𑐳𑐵 𑐟𑐫𑐵 𑐮𑑀𑐔𑐵 𑐣𑐎𑐶𑐃 𑑋 𑐠𑑂𑐰 𑐖𑑂𑐫𑐵 𑐣𑐶𑐨𑐵𑑅 𑐡𑑂𑐫𑑅 𑐩𑐧𑑂𑐫𑐹𑐰𑑄 𑐳𑐶𑐢𑐫𑐾𑐎𑐾𑐩𑐵𑑅 𑑋
𑐣𑑂𑐴𑐫𑑂𑐫𑐣𑐸𑐩𑐵
𑐳𑐶𑐐𑐸 𑐣𑑂𑐴𑐫𑑂𑐣𑐸 𑐏𑐸𑐣𑑂𑐴𑐹 𑐕𑐾𑑄 𑐕𑐏𑐵𑑄 𑐣𑐶 𑐫𑐵𑐣𑐵𑑅 𑐩𑑂𑐴𑐫𑐵𑐫𑑂𑐩𑐔𑐵 𑐩𑑀 𑐮𑑂𑐴𑐹𑐫𑐵 𑐳𑑄 𑐦𑑄 𑐦𑑄 𑐟𑐫𑐵 𑐳𑐶𑐕𑐾𑑄 𑐴𑐾 𑐖𑐵 𑐨𑑂𑐰𑐫𑑂 𑐖𑑂𑐰𑐮𑑄 𑐖𑑂𑐰𑐬𑐾𑐫𑐵𑐃 𑑋 𑐩𑑂𑐴𑐵𑐫𑑂𑐩𑐔𑐵𑑄 𑐥𑐶𑐏𑐵𑐮𑐏𑐸𑐃 𑐳𑐸 𑐮𑐵𑐫𑐵𑑅 𑐣𑑂𑐴𑐫𑐫𑑂𑐣𑐸𑐩𑐵 𑐧𑑂𑐰 (𑐖𑐵𑐨𑑂𑐰𑐫𑑂) 𑐧𑑂𑐰𑐂 𑑋 𑐟𑑂𑐰𑐵𑑅 𑐖𑑄 (𑐖𑑀𑐐𑐶𑐣𑐷) 𑐣𑑄 𑐣𑑂𑐴𑑂𑐫𑐫𑑂𑐣𑐸𑐩𑐵 𑐥𑐹𑐖𑐵 𑐫𑐵𑐂 𑑋 𑐀𑐮𑐾 𑐡𑐎𑑂𑐲𑐶𑐣𑐵𑑅 𑐎𑐫𑐵 𑐣𑑂𑐴𑑂𑐫𑐫𑑂𑐣𑐸𑐩𑐵 𑐧𑑂𑐰 𑐟𑑂𑐰𑐵𑑅 𑐖𑑄𑐴𑐾 𑐖𑑂𑐰𑐣𑐵 𑐰𑐣𑐶 𑑋 𑐣𑑂𑐴𑐫𑑂𑐣𑐸𑐩𑐵 𑐖𑑂𑐰𑐮𑑄 𑐩𑑂𑐴𑐵𑐫𑑂𑐩𑐔𑐵 𑐧𑐵𑐴𑐾𑐎 𑐡𑐸𑐏𑑄𑐎𑑂𑐫𑐥𑐶𑑄 𑐰 𑐩𑐾𑐩𑐾𑐥𑐶𑐣𑑂𑐳 𑐣𑑄 𑐠𑐶𑐂𑐩𑐖𑑂𑐫𑐹 𑑋 𑐠𑑂𑐰 𑐖𑑂𑐫𑐵𑑅 𑐳𑐶𑐢𑐫𑐰𑑄 𑐳𑐎𑐳𑑂𑐫𑐵𑑄 𑐖𑐵 𑐣𑐂 𑑋

𑐥𑐵𑐏𑐵𑐖𑐵
𑐣𑑂𑐴𑐫𑑂𑐣𑐸𑐩𑐵𑐏𑐸𑐣𑑂𑐴𑐸 𑐩𑑂𑐴𑐫𑐵𑐫𑑂𑐩𑐔𑐵 𑐖𑐵 𑐨𑑂𑐰𑐫𑑂 𑐖𑑂𑐰𑐬𑐾 𑐫𑐵𑐂 𑑋 𑐩𑑂𑐴𑑂𑐫𑐵𑐫𑑂𑐩𑐔𑐵𑑄 𑐳𑐶𑐐𑐸 𑐎𑑀𑐛𑐵𑐫𑑂 𑐳𑐕𑐶 𑐰 𑐔𑑂𑐫𑐵𑐥𑑂𑐰𑐵 𑐡𑐾𑐰𑐵 𑐔𑑂𑐫𑐵𑐎𑐷 𑑋 𑐮𑐥𑑂𑐟𑐾𑐫𑑂 𑐖𑐵 𑐧𑑂𑐰𑑅 𑐟𑐫𑐵 𑐧𑐵𑑃𑐮𑐵𑐎𑑂𑐎 𑐑𑐵𑐳𑐵 𑐟𑐵𑑅, 𑐩𑐬𑐶, 𑐠𑑂𑐰𑑄, 𑐀𑐫𑐮𑐵, 𑐮, 𑐡𑐸𑐬𑐸 𑐳𑐮𑐶𑐏𑐫𑑂 𑐟𑐂 𑑋 𑐧𑐴𑐣𑐶 𑐳𑐸𑑄 𑐮𑑄𑐫𑑂 𑐖𑐸 𑐩𑐡𑐫𑐾𑐰𑑄 𑐥𑐵𑐏𑐵𑐫𑐵 𑐎𑐸𑐣𑐫𑑂 𑐰𑐵 𑐥𑐶𑐏𑐵𑐮𑐏𑐸𑐃 𑐥𑐵𑐏𑐵𑐖𑐵 𑐟𑐂 𑑋 𑐠𑑂𑐰 𑐥𑐵𑐏𑐵𑐖𑐵 𑐖𑐶𑐮𑐵𑐖𑐥𑐶𑑄𑐳 𑐟𑐫𑑂𑐩𑐵𑐐𑐸 𑐔𑐮𑐣 𑐡𑐸 𑑋 𑐥𑐵𑐏𑐵𑐖𑐵 𑐏𑐵𑐫𑑂 𑐢𑐸𑐣𑐾𑐰 𑐩𑑂𑐴𑐫𑐵𑐫𑑂𑐩𑐔𑐵 𑐏𑑂𑐰𑐫𑐵 𑐕𑐾𑑄 𑐮𑐶𑐴𑐵 𑐰𑐣𑐶 𑑋 𑐄𑐐𑐸 𑐥𑐵𑐏𑐵𑐖𑐵 𑐎𑐣𑑂𑐴𑐫𑐫𑑂 𑐳𑐸𑐠 𑐣𑑂𑐴𑐵𑐥𑐵𑑄 𑐴𑐾 𑐏𑐸𑐳𑐶𑐃 𑐰𑐵𑐫𑑂𑐫𑑄𑐎𑐶 𑑋 𑐥𑐵𑐏𑐵𑐖𑐵 𑐖𑑂𑐰𑐮𑑄 𑐡𑐸𑐏𑑄 𑐔𑑂𑐰𑐥𑐶𑑄 𑐳𑐸𑐣𑐵𑐣𑑄 𑐠𑐶𑐂𑐩𑐖𑑂𑐫𑐹 𑑋
𑐡𑐸𑐧𑑂𑐫𑐎𑐾𑐐𑐸
𑐳𑐶𑐐𑐸𑐫𑐵 𑐗𑐶𑐣𑑂𑐴𑐹𑐏𑐸𑐣𑑂𑐴𑐹 𑐳𑐸𑐠𑐫𑑂 𑐩𑑂𑐴𑑂𑐫𑐵𑐫𑑂𑐩𑐔𑐵 𑐕𑐾𑑄 𑐕𑐏𑐵𑑄 𑐧𑑄 𑐠𑐶𑐮𑐶 𑐠𑑅𑐐𑐸 𑐃𑐮𑐵𑐎𑐵𑐫𑐵 𑐏𑐸𑐳𑐶 𑐡𑐸𑐏𑑄𑐎𑑂𑐫𑐥𑐶𑑄 𑐳𑐎𑐮𑐾 𑐰𑐣𑐶 𑑋 𑐡𑐸𑐧𑑂𑐰𑐫𑑄𑐎𑐾𑐐𑐸 𑐖𑑂𑐰𑐮𑑄 𑐩𑑂𑐴𑑂𑐫𑐵𑐫𑑂𑐩𑐔𑐵 𑐖𑑂𑐰𑐣𑐵 𑐩𑐶𑐳𑐵𑐥𑐶𑑄 𑐳𑐎𑐮𑐾 𑐏𑑂𑐰𑐫𑐵 𑐕𑐾𑑄 𑐣𑑄 𑐥𑐶𑐴𑐵𑐰𑐫𑐵 𑐡𑐸𑐧𑑂𑐫𑑄𑐎𑐶𑐐𑐸 𑐏𑐸𑐳𑐶 𑐰𑐣𑐶 𑑋 𑐡𑐸𑐏𑑄𑐔𑑂𑐰𑐥𑐶𑑄 𑐩𑐶𑐖𑐥𑐶𑐣𑑂𑐟 𑐳𑑄 𑐏𑐵𑐎𑐵𑑅 𑐮𑐸𑐳𑐶 𑐠𑐶𑐂𑐎𑐵 𑐩𑑀𑐮𑑂𑐴𑐸𑐂 𑑋 𑐩𑑂𑐴𑐫𑐵𑐫𑑂𑐩𑐔𑐵 𑐏𑐸𑐳𑐶 𑐟𑐸 𑐁𑐟𑐶 𑐡𑐵𑐫𑐾𑐎𑐶 𑑋 𑐳𑐎𑐳𑐶𑐫𑐵 𑐩𑑀𑐮𑑂𑐴𑐸𑐫𑐵 𑐁𑐟𑐶, 𑐀𑐩𑑂𑐧𑑅, 𑐴𑐵𑐩𑑀𑑅, 𑐎𑑀𑐔𑐶𑐎𑑄, 𑐏𑑁 𑐎𑐫𑐵 𑐳𑐶𑐣𑑂𑐎𑐵 𑐳𑑄 𑐕𑐾𑐣𑐵 𑐐𑐸𑐨𑐵𑐖𑐸𑑄 𑐧𑑂𑐫𑐹𑐐𑐸 𑐥𑑄𑐔𑐐𑐨𑑂𑐫 𑐎𑐫𑐵 𑐱𑐸𑐡𑑂𑐢 𑐫𑐵𑐂 𑑋 𑐀𑐮𑐾 𑐧𑐬𑑂𑐏𑐶 𑐔𑑂𑐰𑐣𑐾𑐩𑐵𑐥𑐶𑑄, 𑐦𑐸𑐎𑐳𑐶𑐣𑑄 𑐟𑐫𑐸𑐐𑐸 𑐰𑐳 𑐥𑐸𑐣𑐵 𑐕𑐾𑑄𑐫𑑂 𑐮𑐶𑐴𑐵 𑐰𑐂 𑑋 𑐮𑑄 𑐢𑐸𑐕𑐷 𑐏𑐸𑐳𑐷 𑐫𑐵 𑐖𑐮 𑐴𑐵𑑅 𑐴𑐵𑑅 𑐫𑐵𑐣𑐵 𑐰𑐂 𑑋 𑐕𑐾𑑄𑐫 𑐕𑐏𑐵𑑄 𑐏𑐸𑐳𑐶𑐫𑐵 𑐮𑑅 𑐴𑐵𑑅 𑐴𑐵𑑅 𑐫𑐵𑐣𑐵 𑐡𑐸𑐴𑐵𑐰𑐣𑐾𑐩𑐵𑑅 𑑋 𑐡𑐸𑐧𑑂𑐫𑑄𑐎𑐵 𑐮𑐶𑐴𑐵 𑐰𑐂𑐧𑐮𑐫𑑂 𑐮𑑄𑐫𑑂 𑐡𑐠𑐹𑐃 𑐖𑑂𑐰𑐮𑐵𑑄 𑐣𑑂𑐴𑐵𑐫𑐎𑑄 𑐳𑑂𑐰𑐫𑐾𑐐𑐸 𑐔𑐮𑐣 𑐡𑐸 𑑋 𑐖𑑂𑐰𑐮𑐵 𑐣𑑂𑐴𑐫𑐵𑐎𑑄 𑐳𑑂𑐰𑐫𑑂 𑐢𑐸𑐣 𑐢𑐵𑐫𑑂𑐰𑑄 𑐏𑐵𑑅𑐫𑐵 𑐣𑑂𑐴𑐵𑐫𑐎𑑄 𑐳𑑂𑐰𑐳𑐵𑑄 𑐖𑐶𑐮 𑑋 𑐕𑐾𑑄 𑐳𑐎𑐳𑑂𑐫𑐵𑑄 𑐔𑐶, 𑐥𑐵𑐮𑐸, 𑐩𑐮𑐫𑑂 𑐰 𑐀𑐫𑑂𑐮𑐵𑐏𑑄 𑐔𑐶𑐥 𑐠𑐶𑐂𑐩𑐵 𑐡𑐔𑑂𑐕𑐶 𑐟𑐎 𑐧𑐬𑑂𑐏𑐶 𑐔𑑂𑐰𑐣𑐾𑐩𑐵𑐐𑐸 𑐔𑐮𑐣 𑐥𑐬𑐩𑑂𑐥𑐬𑐵 𑐣𑐶𑐳𑐾 𑐫𑐵𑐣𑐵 𑐟𑐐𑐸𑐡𑐸 𑑋 𑐧𑐬𑑂𑐏𑐶 𑐰𑐳 𑐐𑐸𑐏𑐸𑐣𑑂𑐴𑐹 𑐰𑐵 𑐐𑐸𑐐𑐸 𑐧𑐵𑐬𑑄 𑐣𑑂𑐴𑐵𑐥𑐵𑑄 𑐴𑑂𑐫𑐹𑐐𑐸 𑐏𑑅 𑐰𑐴𑐾 𑐧𑐵𑐬𑐾 𑐖𑐎 𑐧𑐬𑑂𑐏𑐶 𑐰𑐳𑑅 𑐴𑐶𑐂𑐐𑐸 𑐔𑐮𑐣 𑐡𑐸 𑑋

𑐑𑑅𑐳𑐹
𑐳𑐷𑐐𑐸 𑐗𑐶𑐣𑐶𑐣𑑂𑐴𑐹 𑐏𑐸𑐣𑑂𑐴𑐹 𑐳𑐷𑐩𑑂𑐴𑐫𑐵 𑐣𑐵𑐩𑑄 𑐕𑐾𑑄 𑐖𑐖𑑂𑐘 (𑐴𑑀𑐩) 𑐫𑐵𑐣𑐵 𑐱𑐸𑐡𑑂𑐢 𑐫𑐵𑐫𑐾𑐐𑐸 𑐫𑐵𑐟 𑐴𑐾 𑐑𑑅𑐳𑐹 𑐫𑐵𑐫𑐾𑐐𑐸 𑐢𑐎𑐵
𑐢𑐵𑐂 𑑋 𑐠𑑂𑐰 𑐏𑐸𑐣𑑂𑐴𑐹 𑐕𑐾𑑄 𑐕𑐏𑐵𑑄 𑐣𑐶𑑄𑐫𑐵𑐣𑐵 𑐐𑐸𑐨𑐵𑐖𑐸 𑐎𑐮𑐱𑐵𑐬𑑂𑐔𑐣 𑐫𑐖𑑂𑐘 𑐰 𑐐𑑂𑐰𑐵𑑅𑐳𑑄 𑐎𑑂𑐬𑐶𑐫𑐵 𑐫𑐵𑐣𑐵 𑐳𑐎𑐳𑐶𑐟𑑄 𑐐𑑂𑐰𑐵𑑅 𑐳𑑂𑐰𑐵𑑃 𑐮𑑂𑐴𑐵𑑅 𑐥𑑄𑐎𑐵 𑐎𑑄𑐫𑑂 𑐮𑑅 𑐧𑐶𑐫𑐵 𑐱𑐸𑐡𑑂𑐢 𑐫𑐵𑐎𑐶 𑑋 𑐮𑑂𑐴𑐵 𑐱𑐸𑐡𑑂𑐢 𑐫𑐵𑐫𑐾𑐟 𑐩𑑂𑐴𑐫𑐵𑐫𑑂𑐩𑐔𑐵, 𑐨𑐶𑐣𑐵𑐩𑐔𑐵, 𑐡𑐸𑐏𑑄𑐔𑑂𑐰𑐥𑐶𑑄, 𑐦𑐸𑐎𑐶𑐧𑐵𑐎𑐵𑐫𑑂 𑐰 𑐐𑐸𑐠𑐶𑐫𑐵𑐬 𑐳𑐎𑐳𑐶𑐟 𑐮𑑂𑐴𑐵 𑐥𑑄𑐎𑐵 𑐎𑐫𑑂 𑐮𑑅 𑐧𑐶𑐫𑐵 𑐔𑑂𑐫𑐵𑐟𑐵 𑐑𑐵𑐳𑐵 𑐧𑑂𑐰𑐫𑐵 𑐨𑑂𑐰𑐫𑑂 𑐣𑐎𑐾𑐩𑐵𑑅 𑑋 𑐑𑑅𑐳𑐹 𑐨𑑂𑐰𑐫𑑂𑐫𑐵 𑐔𑑂𑐫𑐵𑐟𑐵 𑐑𑐵𑐳𑐵 𑐎𑑂𑐰𑐫𑑂 𑐣𑑂𑐴𑐠𑐣𑐵𑐐𑐸 𑐡𑐸 𑑋 𑐴𑑀𑐩 𑐫𑐵𑐐𑐸 𑐀𑐥𑑂𑐥𑐵 𑐣𑐶𑐨𑐵𑑅 𑐩𑐧𑑂𑐫𑐹𑐰𑑄 𑐕𑑂𑐰𑐵𑐳𑐫𑑂 𑐰𑐵𑐫𑑂 𑐫𑑄𑐎𑐾𑐩𑐵 𑑋 𑐮𑐟𑑂𑐫𑐵𑑅 𑐱𑑂𑐬𑐵𑐡𑑂𑐢 𑐳𑐶𑐩𑐑𑑅𑐟𑐮𑐾 𑐧𑐬𑑂𑐏𑐶 𑐔𑑂𑐰𑐥𑐶𑑄𑐳 𑐟𑐥𑐸𑐮𑐷 𑐥𑐸𑐂𑐩𑐖𑑂𑐫𑐸 𑐰 𑐮𑐵𑐎𑐵𑑄 𑐣𑑄 𑐣𑑂𑐴𑐫𑐵𑐫𑑂𑐩𑐖𑑂𑐫𑐹 𑑋
𑐎) 𑐔𑐶 𑐏) 𑐥𑐵𑐮𑐸 𑐐) 𑐩𑐸𑐳𑑂𑐫𑐵 𑐑) 𑐌 𑐒) 𑐎𑑅 𑐑𑐵𑐳𑐵
𑐔) 𑐔𑐫𑑂𑐥𑐶 𑐕) 𑐰𑐵𑐄𑑄𑐔𑐵 𑐖) 𑐕.𑐫𑐵𑐐𑐸𑐮𑐵 (𑐴𑐵𑐎𑐸 𑐕𑑂𑐰𑐫𑐮𑐵)

𑐣𑐷𑐥𑑂𑐫𑑄 𑐠𑐫𑐾𑐐𑐸
𑐳𑐷𑐐𑐸 𑐗𑐶𑐳𑑂𑐰𑐣𑑂𑐴𑐹 𑐏𑐸𑐣𑑂𑐴𑐹 𑐮𑐟𑑂𑐫𑐵 𑐱𑑂𑐬𑐵𑐡𑑂𑐢 𑐣𑑂𑐴𑐔𑑅 𑐎𑐫𑐵 𑐐𑐸𑐨𑐵𑐖𑐸 𑐰 𑐕𑐾𑑄 𑐖𑑅 𑐫𑐵 𑐏𑐮𑑅 𑐖𑐎 𑐔𑑂𑐰𑐣𑐵 𑐣𑐷𑐥𑑂𑐫𑑄 𑐠𑐫𑐾𑐐𑐸 𑐔𑐮𑐣 𑐡𑐸 𑑋 𑐠𑑂𑐰 𑐏𑐸𑐣𑑂𑐴𑐹 𑐐𑐸𑐨𑐵𑐖𑐸𑑄 𑐎𑐮𑐱𑐵𑐬𑑂𑐔𑐣 𑐰 𑐮𑑀𑐎𑑀𑐣𑑂𑐟𑐬 (𑐥𑐶𑐞𑑂𑐜) 𑐫𑐵𑐣𑐵 𑐦𑐸𑐎𑐶𑐧𑐵𑐎𑐵𑐫𑑂 𑐥𑐶𑐣𑑂𑐟 𑐰 𑐕𑐾𑑄 𑐖𑑅 𑐥𑐶𑐣𑑂𑐟 𑐟𑐥𑐸𑐮𑐶, 𑐰 𑐮𑐵𑐎𑐵𑑄 𑐣𑑂𑐴𑐫𑐵𑐫𑑂 𑐖𑐶𑐎𑐾𑐐𑐸 𑐫𑐵𑐃 𑑋 𑐄𑐎𑐶𑑄 𑐮𑐟𑑂𑐫𑐵 𑐟𑐎 𑐫𑐵𑐫𑐾𑐩𑐖𑑂𑐫𑐹𑐐𑐸 𑐳𑐵𑐢𑐵𑐬𑐞 𑐥𑐹𑐖𑐵 𑐰𑐵 𑐣𑐶𑐟𑑂𑐫 𑐥𑐹𑐖𑐵 𑐣𑑄 𑐫𑐵𑐫𑐾 𑐖𑐶𑐎𑐾𑐐𑐸 𑐏 𑑋 𑐦𑐸𑐥𑐶𑐧𑐵𑐎𑐵𑐫𑑂𑐥𑐶𑐣𑑂𑐟 𑐥𑐹𑐖𑐵 𑐦𑐸𑐎𑐫𑑂 𑐫𑐵𑐣𑐵 𑐧𑐶𑐃 𑐩𑐵𑐳𑐵 𑐖𑐎 𑐣𑐶𑐥𑑂𑐫𑑄 𑐠𑐫𑐾𑐐𑐸 𑐖𑑂𑐫𑐵 𑐫𑐵𑐃 𑑋

𑐥𑐶𑐳𑑂𑐎𑐶
𑐑𑑅𑐳𑐹 𑐳𑐶𑐢𑐫𑐾𑐰𑑄 𑐮𑐟𑑂𑐫𑐵 𑐱𑑂𑐬𑐵𑐡𑑂𑐢𑐫𑐵 𑐡𑐸𑐣𑐾 𑐳𑑂𑐫𑐵𑐥𑐶𑑄 𑐠𑑅𑐠𑐶𑐟𑐶 𑐥𑐵𑐏𑐾 𑐕𑐾𑑄 𑐖𑑅 𑐥𑐶𑐣𑑂𑐟 𑐨𑑂𑐰𑐫𑑂 𑐳𑐟𑐶𑐐𑐸𑐫𑐵𑐟 𑐥𑐶𑐳𑑂𑐎𑐶 𑐧𑑂𑐰𑐣𑐾𑐐𑐸 𑐢𑐎𑐵 𑐢𑐵𑐂 𑑋 𑐄𑐎𑐶𑑄 𑐩𑐶 𑐟𑐩𑑂𑐴 𑐰 𑐕𑐾𑑄 𑐖𑑅 𑐥𑐶𑐣𑑂𑐟 𑐧𑐴𑐣𑐷 𑐨𑑂𑐰𑐫𑑂 𑐕𑑅 𑐕𑐵 𑐣𑐎𑐾𑐐𑐸 𑐫𑐵𑐂 𑑋 𑐀𑐠𑐾 𑐥𑐶𑐳𑑂𑐎𑐶 𑐳𑐟𑐶𑐰𑐮𑐫𑑂 𑐦𑐫𑐵𑐦𑐎𑑂𑐰 𑐩𑐶 𑐟𑐩𑑂𑐴 𑐰𑐣𑐾𑐩𑐵 𑑋 𑐎𑐩𑐳𑐾𑐎𑐩 𑐕𑐎 𑐖𑐎𑑅 𑐖𑐸𑐳𑐵𑑄 𑐥𑐶𑐳𑑂𑐎𑐶 𑐨𑑂𑐰𑐫𑑂 𑐩𑐰𑑄𑐳𑐾 𑐩𑐐𑐵𑑅 𑐢𑐎𑐵 𑐢𑐵𑐂 𑑋

𑐮𑐟𑑂𑐫𑐵
𑐳𑐷𑐐𑐸 𑐥𑐶𑑅𑐣𑑂𑐫𑐵𑐣𑑂𑐴𑐹 𑐏𑐸𑐣𑑂𑐴𑐹 𑐮𑐟𑑂𑐫𑐵 𑐱𑑂𑐬𑐵𑐡𑑂𑐢 𑐫𑐵𑐫𑐾𑐐𑐸 𑐖𑑂𑐫𑐵 𑐖𑑂𑐰𑐷 𑑋 𑐠𑑂𑐰 𑐏𑐸𑐣𑑂𑐴𑐹 𑐧𑐖𑑂𑐬𑐫𑐵𑐣 𑐎𑐠𑑄 𑐐𑐸𑐨𑐵𑐖𑐸𑑄 𑐫𑐬𑑂𑐫𑐵𑐐𑐶𑐟𑐶 𑐴𑐵𑐮𑐵𑑅 𑐮𑑀𑐎𑑀𑐣𑑂𑐟𑐬 𑐥𑐶𑐞𑑂𑐜 –𑐖𑐵𑐥𑑂𑐫𑑄 𑐠𑐂 𑑋 𑐮𑐟𑑂𑐫𑐵 𑐏𑐸𑐣𑑂𑐴𑐹 𑐩𑑂𑐴𑐫𑐵𑐫𑑂𑐩𑐔𑐵 𑐥𑐶𑐳𑑄 𑐥𑑂𑐫𑐣𑐫𑑂 𑐕𑐵𑐫𑑂𑐎𑐾𑐐𑐸 𑐖𑑂𑐰𑐮𑑄 𑐳𑐸𑐠𑐫𑑂 𑐴𑐾 𑐮𑐟𑑂𑐫𑐵 𑐕𑐾𑑄 𑐟𑑅𑐰𑐣𑐾𑐐𑐸 𑐔𑐮𑐣 𑐡𑐸 𑑋 𑐥𑑂𑐫𑐣𑐫𑑂 𑐕𑐵𑐫𑐾𑐎𑐾𑐐𑐸 𑐖𑑂𑐰𑐮𑑄 𑐎𑑂𑐰𑐫𑑂 𑐣𑑂𑐴𑐠𑐣𑐵𑐐𑐸 𑐡𑐸 𑑋 𑐩𑐶 𑐟𑐩𑑂𑐴 𑐐𑐸𑐨𑐵𑐖𑐸𑐫𑐵𑐟 𑐳𑐶𑐩𑑂𑐴𑐫𑐵 𑐣𑐵𑐩𑑄 𑐠𑐐𑐸 𑐫𑐠𑐵 𑐱𑑂𑐬𑐡𑑂𑐢𑐵 𑐡𑐵𑐣 𑐧𑐶𑐂𑐩𑐵 𑑋 𑐠𑐸𑐎𑐶𑐃 𑐳𑐶𑐩𑑂𑐴𑑄 𑐕𑑂𑐫𑐮𑐶𑐐𑐸 𑐴𑐮𑑄𑐖𑑂𑐰𑐮𑑄 𑐡𑐂 𑑋 𑐠𑑂𑐰 𑐏𑐸𑐣𑑂𑐴𑐹 𑐦𑐸𑐎𑐶𑐧𑐵𑐎𑐵𑐫𑑂, 𑐩𑑂𑐴𑐫𑐵𑐫𑑂𑐩𑐔𑐵, 𑐨𑐶𑐣𑐵𑐩𑐔𑐵, 𑐳𑐩𑑂𑐢𑐶𑐏𑐮𑑅 𑐳𑐎𑐳𑐶𑐟 𑐨𑑂𑐰𑐫𑑂 𑐳𑐟𑐵 𑐣𑐎𑐾𑐩𑐵𑑅 𑑋 𑐮𑐟𑑂𑐫𑐵 𑐨𑑂𑐰𑐖𑐫𑑂 𑐢𑑁 𑐰 𑐳𑐶𑐳𑐵𑐧𑐸𑐳𑐵 𑐟𑐫𑑂 𑐢𑐸𑐣𑐾𑐰𑑄 𑐩𑐶 𑐟𑐩𑑂𑐴𑑄 𑐮𑐵𑐥𑐷 𑐧𑐶𑐫𑐵 𑐳𑑂𑐰𑐮𑐸 𑐀𑐫𑑂𑐮𑐵 𑐮𑐸𑐫𑐵 𑐨𑑂𑐰𑐫𑑂 𑐎𑑂𑐰𑐔𑐵𑐫𑐾𑐎𑐷 𑑋
𑐎) 𑐖𑐵𑐎𑐷 𑐏) 𑐟𑐕𑑂𑐰 𑐔𑐹𑑄 𑐐) 𑐢𑑁 𑐑) 𑐎𑐾𑐬𑐵
𑐒) 𑐏𑐵𑐖𑐵𑐩𑐬𑐶 𑐔) 𑐳𑑂𑐰𑐵𑑃 𑐕) 𑐐𑑂𑐰𑐵𑑅 𑐖) 𑐧𑐖𑐶 𑐗) 𑐱𑑂𑐬𑐵𑐡𑑂𑐢 𑐖𑑂𑐰𑐮𑑄

𑐮𑐫𑑂𑐥𑑂𑐫𑑄
𑐮𑐟𑑂𑐫𑐵𑐫𑐵 𑐎𑐣𑑂𑐴𑐫𑑂 𑐏𑐸𑐣𑑂𑐴𑐹 𑐣𑐶𑐳𑐾𑑄 𑐮𑐫𑑂𑐥𑑂𑐫𑑄 𑐠𑐫𑑂𑐐𑐸 𑐱𑐸𑐬𑐸 𑐖𑑂𑐰𑐷 𑑋 𑐐𑐸𑐩𑑂𑐴𑐐𑐸𑐩𑑂𑐴𑐾𑐳𑑂𑐫𑐵 𑐡𑑂𑐢𑐵𑐡𑐱 𑐟𑐶𑐬𑑂𑐠𑐳 𑐰𑐣𑐵 𑐐𑐸𑐩𑑂𑐴𑐾𑐳𑑂𑐫𑐵𑑄 𑐕𑐐𑐸 𑐖𑐎 𑐟𑐶𑐬𑑂𑐠𑐫𑑂 𑐰𑐣𑐵 𑐮𑐫𑑂 𑐥𑐟𑐶𑐎𑑄 𑐱𑑂𑐬𑐵𑐡𑑂𑐢 𑐫𑐵𑐰𑐣𑐷 𑑋 𑐠𑑂𑐰 𑐱𑑂𑐬𑐵𑐡𑑂𑐢 𑐮𑑁𑐎𑐶𑐎 𑐥𑐶𑐞𑑂𑐜 (𑐥𑑀𑐥𑑂𑐫𑑄 𑐟𑐕𑑀𑐔𑐹) 𑐠𑐂 𑑋 𑐡𑐎𑐮𑐫𑑂 𑐮𑐶𑐥𑐵 𑐣𑑂𑐫𑐏𑐹 𑐟𑐶𑐬𑑂𑐠𑐫𑑂 𑐰𑐣𑐵 𑐮𑐫𑑂𑐥𑑂𑐫𑑄 𑐠𑐫𑑂 𑐳𑐶𑐢𑐫𑐾𑐎𑐵 𑐫𑐮𑐫𑐵 𑐀𑐐𑐶𑐩𑐠𑑅 𑐳𑑄 𑐥𑐹𑐖𑐵𑐫𑐵𑐣𑐵 𑐨𑑂𑐰𑐫𑑂 𑐣𑐫𑐾𑐩𑐵𑑅 𑑋 𑐠𑐸𑐧𑐮𑐫𑑂 𑐳𑐸𑑄 𑐦𑐸𑐎𑐶𑐧𑐵𑐎𑐵𑐫𑑂 𑐳𑐟𑐵 𑐔𑑂𑐰𑐣𑐾𑐩𑑂𑐰𑐵 𑑋 𑐕𑐾𑑄 𑐖𑑅, 𑐩𑑂𑐴𑑂𑐫𑐵𑐫𑑂𑐩𑐔𑐵, 𑐰 𑐐𑐸𑐨𑐵𑐖𑐸 𑐖𑐎 𑐔𑑂𑐰𑐣𑐵 𑐫𑐵𑐳𑐵𑑄𑐐𑐵𑑅 𑑋 𑐟𑐶𑐬𑑂𑐠 𑐥𑐟𑐶𑐎𑑄 𑐕𑐟𑐵 𑐕𑐟𑐵 𑐡𑐵𑐣 𑐧𑐶𑐫𑐵 𑐰 𑐩𑑀𑐮𑑂𑐴𑐹𑐫𑐵 𑐱𑑂𑐬𑐵𑐡𑑂𑐢 𑐫𑐵𑐂 𑑋 𑐟𑐬 𑐠𑑂𑐰 𑐖𑑂𑐫𑐵 𑐎𑐬 𑐰𑐵 𑐩𑐫𑐵𑐳𑐾 𑐩𑐐𑐵𑐐𑐸 𑐔𑐮𑐣 𑐩𑐏𑐹 𑑋 𑐗𑐶𑐣𑐶𑐐𑐸 𑐟𑐶𑐬𑑂𑐠𑐫𑐵 𑐣𑐵𑑄, 𑐳𑑂𑐣𑐵𑐣 𑐫𑐵𑐫𑐾𑐐𑐸 𑐰 𑐡𑐵𑐣 𑐰𑐶𑐫𑐾𑐐𑐸 𑐢𑐮𑑅 𑐎𑑂𑐰𑐫𑑂 𑐣𑑂𑐴𑐠𑐣𑐵𑐐𑐸 𑐡𑐸 𑑋
𑐡𑑂𑐢𑐵𑐡𑑂𑐢𑐱 𑐟𑐶𑐬𑑂𑐠𑐳𑑄 𑐳𑑂𑐣𑐵𑐣 𑐬 𑐡𑐵𑐣 𑐫𑐵𑐫𑐾𑐐𑐸 𑐢𑐮𑑅
𑐟𑐶𑐬𑑂𑐠𑐫𑐵 𑐣𑐵𑑄 𑐳𑑂𑐣𑐵𑐣 𑐫𑐵𑐫𑐾𑐐𑐸 𑐰𑐳𑑂𑐟𑐸 𑐡𑐵𑐣 𑐰𑐶𑐫𑐾𑐐𑐸 𑐰𑐳𑑂𑐟𑐸
𑑑. 𑐥𑐹𑐞𑑂𑐫 𑐟𑐷𑐬𑑂𑐠 (𑐐𑑀𑐎𑐬𑑂𑐞) 𑐡𑑂𑐰𑐵𑐦𑑀 𑐳𑑂𑐰𑐵𑑃 𑐳𑐶𑐖𑐫𑐵 𑐮𑑅 𑐠𑐮
𑑒. 𑐱𑐵𑐣𑑂𑐟 𑐟𑐷𑐬𑑂𑐠 (𑐐𑐸𑐴𑑂𑐫𑐾𑐱𑑂𑐰𑐬𑐷) 𑐢𑐵𑐮𑐾 𑐥𑐟𑐶𑐳𑑂𑐰𑐵𑑃 𑐣𑑂𑐫𑐵𑐟𑐵 𑐰𑐶𑐰𑐴 𑐰 𑐎𑐵𑐥
𑑓. 𑐱𑑄𑐎𑐬 𑐟𑐷𑐬𑑂𑐠 (𑐱𑑄𑐏𑐩𑑀) 𑐮𑐰𑑄 𑐖𑐶𑐦𑑀 𑐳𑑂𑐰𑐵𑑃 𑐔𑐣𑑂𑐡𑑂𑐬𑐩𑐵 𑐡𑑂𑐫𑑅, 𑐜𑐸𑐒𑑂𑐐𑐵 𑐰 𑐜𑐸𑐒𑑂𑐐𑐵 𑐥𑐣𑑂𑐫𑐹
𑑔. 𑐬𑐵𑐖 𑐟𑐷𑐬𑑂𑐠 𑐂𑐟𑐵𑐠𑐶 𑐟𑐵𑐫𑐵𑐔𑐵 𑐎𑐸𑐳𑐵 𑐮𑐵𑐎𑐵𑑄 𑐟𑐸𑐟𑐵𑑄 𑐣𑐶𑐳𑑂𑐮𑐵
𑑕. 𑐩𑐣𑑀𑐬𑐠 𑐟𑐷𑐬𑑂𑐠 (𑐟𑑂𑐫𑐏𑐹 𑐡𑐸𑐰𑐵𑐣) 𑐣𑐳𑑂𑐰𑐵 𑐳𑐶𑐳𑐵 𑐎𑐸𑐮, 𑐐𑐸𑐮𑑂𑐥𑐵
𑑖. 𑐣𑐶𑐬𑑂𑐩𑐮 𑐟𑐷𑐬𑑂𑐠 (𑐨𑐔𑐵𑐏𑐸𑐳𑐶) 𑐎𑐮𑐾𑐴 𑐳𑑂𑐰𑐵𑑃 𑑑𑑐𑑘 𑐩𑐵𑐬𑑂𑐥𑐵 𑐰 𑐎𑐾𑐫𑑂𑐫𑐵 𑐡𑐾𑐩𑐵
𑑗) 𑐣𑐶𑐢𑐵𑐣 𑐟𑐷𑐬𑑂𑐠 (𑐮𑐏𑐸𑐟𑐷𑐬𑑂𑐠) 𑐀𑐖𑐹𑐳𑑂𑐰𑐵𑑃 𑐮𑐸𑑄𑐫𑐵 𑐔𑐎𑑂𑐎𑐷
𑑘. 𑐖𑑂𑐘𑐵𑐣 𑐟𑐷𑐬𑑂𑐠 (𑐎𑐴𑑂𑐬 𑐏𑐸𑐳𑐷) 𑐟𑐸𑐫𑐹 𑐳𑐶𑐟𑐸 𑐳𑐦𑐹 𑐰 𑐡𑐾𑐰𑐵
𑑙. 𑐔𑐶𑐣𑑂𑐟𑐵𑐩𑐞𑐶 𑐟𑐷𑐬𑑂𑐠 (𑐟𑑂𑐫𑐏𑐸 𑐡𑐸𑐰𑐵𑐣) 𑐥𑐘𑑂𑐔 𑐳𑐸𑐐𑐣𑑂𑐢 𑐣𑐰𑐬𑐟𑑂𑐣
𑑑𑑐. 𑐥𑑂𑐬𑐩𑑀𑐡 𑐟𑐷𑐬𑑂𑐠 (𑐡𑐵𑐣 𑐐𑐵𑑅) 𑐥𑐮𑐾𑐳𑑂𑐰𑐵𑑃 𑐥𑑄𑐔 𑐬𑑄𑐐𑐫𑐵 𑐎𑐵𑐥 𑐰 𑐖𑐵𑐎𑐷
𑑑𑑑. 𑐱𑐸𑐮𑐎𑑂𑐲𑐞 𑐟𑐷𑐬𑑂𑐠 (𑐨𑐵𑐖𑑄𑐐𑐵𑑅) 𑐢𑐐𑑅𑐳𑑂𑐰𑐵𑑃 𑐎𑐫𑑂 𑐏𑑀𑐮𑐵𑐫𑑂 𑐢𑑂𑐫𑑅
𑑑𑑒. 𑐖𑐫 𑐟𑐷𑐬𑑂𑐠 (𑐣𑑂𑐫𑐏𑐹) 𑐳𑐬𑑂𑐧𑑀𑐳𑐢𑐶 𑐳𑐬𑑂𑐧𑑀𑐳𑐢𑐶 𑐳𑐬𑑂𑐰𑐵𑐎𑐷

𑐏𑐸𑐮𑐵𑑅
𑐳𑐷𑐐𑐸 𑐏𑐸𑐮𑐵 𑐏𑐸𑐣𑑂𑐴𑐹 𑐮𑐟𑑂𑐫𑐵 𑐱𑑂𑐬𑐵𑐡 𑐠𑐾 𑐮𑑀𑐎𑑀𑐣𑑂𑐟𑐬 𑐥𑐶𑐞𑑂𑐜 –𑐖𑐵𑐥𑑂𑐫𑑄) 𑐠𑐃 𑑋 𑐠𑑂𑐰 𑐏𑐸𑐣𑑂𑐴𑐹 𑐩𑑂𑐴𑐫𑐵𑐫𑑂𑐩𑐔𑐵 𑐥𑑂𑐫𑑅 𑐠𑐫𑑂𑐐𑐸 𑐖𑑂𑐰𑐮𑑄 𑐳𑐸𑐠𑐫𑑂 𑐴𑐾 𑐟𑑅 𑐰𑐣𑐾𑐩𑐵𑑅 𑑋 𑐠𑑂𑐰 𑐏𑐸𑐣𑑂𑐴𑐹 𑐰𑐴𑐫𑐵 𑐜𑐸𑐒𑑂𑐐𑐵 𑐰 𑐰𑐳𑑂𑐟𑑂𑐬 𑐡𑐵𑐣 𑐫𑐵𑐫𑐾𑐩𑐵𑑅 𑑋 𑐏𑐸𑐮𑐵𑐧𑐮𑐾 𑐩𑑂𑐴𑐫𑐵𑐫𑑂𑐩𑐔𑐵, 𑐨𑐶𑐣𑐵𑐩𑐔𑐵, 𑐦𑐸𑐎𑐶𑐧𑐵𑐎𑐵𑐫𑑂 𑐳𑐎𑐳𑐶𑐟𑑄 𑐳𑐟𑐵 𑐨𑑂𑐰𑐫𑑂 𑐨𑑂𑐰𑐫𑑂 𑐣𑐎𑐾𑐩𑐵𑑅 𑑋
𑐡𑐎𑐶𑐮𑐵
𑐳𑐷𑐐𑐸 𑐡𑐕𑐶 𑐏𑐸𑐣𑑂𑐴𑐹 𑐫𑐵𑐫𑐾𑐐𑐸 𑐱𑑂𑐬𑐵𑐡𑑂𑐢𑐫𑐵𑐟 𑐡𑐎𑐶𑐮𑐵 𑐢𑐵𑐃 𑑋 𑐠𑑂𑐰 𑐏𑐸𑐣𑑂𑐴𑐹 𑐳𑐸𑐠𑐫𑑂 𑐩𑑂𑐴𑐫𑐵𑐫𑑂𑐩𑐔𑐵, 𑐨𑐶𑐣𑐵𑐩𑐔𑐵 𑐥𑐶𑐞𑑂𑐜 𑐖𑑂𑐰𑐮𑑄 (𑐥𑑂𑐫𑐣𑐫𑑂 𑐕𑐵𑐫𑑂𑐐𑐸 𑐖𑑂𑐰𑐮𑑄) 𑐟𑐰𑐫𑑂𑐩𑐵𑑅 𑑋 𑐀𑐠𑐾𑐴𑐾 𑐦𑐸𑐎𑐶𑐧𑐵𑐎𑐵𑐫𑑂, 𑐩𑑂𑐴𑐫𑐵𑐫𑑂𑐩𑐔𑐵, 𑐨𑐶𑐣𑐵𑐩𑐔𑐵, 𑐰 𑐐𑐸𑐠𑐶𑐫𑐵𑐬 𑐳𑐎𑐳𑐶𑐟𑑄 𑐨𑑂𑐰𑐫𑑂 𑐳𑐟𑐾𑐩𑐵𑑅 𑑋 𑐡𑐎𑐶𑐮𑐵 𑐮𑐟𑑂𑐫𑐵, 𑐏𑐸𑐮𑐵𑑄 𑐠𑐾𑑄 𑐮𑑀𑐎𑑀𑐣𑑂𑐟𑐬 𑐥𑐶𑐞𑑂𑐜 (𑐖𑑂𑐫𑐵𑐥𑑂𑐫𑑄) 𑐠𑐃 𑑋 𑐥𑐵𑐖𑐸 𑐏𑐮𑑅 𑐣𑑄 𑐧𑐬𑑂𑐏𑐶 𑐦𑐸𑐎𑐫𑑂 𑐫𑐵𑐫𑐾𑐟 𑐰𑐳 𑐖𑐸𑐕𑐶𑑄, 𑐳𑐐𑑄 𑐖𑑂𑐰𑐮𑑄 𑐡𑐎𑐶𑐮𑐵 𑐏𑐸𑐣𑑂𑐴𑐹 𑐴𑐫𑐾𑐩𑐵 𑑋 𑐀𑐠𑐾𑐴𑐾 𑐩𑑂𑐴𑐫𑐵𑐫𑑂𑐩𑐔𑐵, 𑐨𑐶𑐣𑐵𑐩𑐔𑐵𑐥𑐶𑐳𑑄 𑐟𑐥𑐸𑐮𑐶 𑐕𑐐𑑅 𑐰 𑐳𑐐𑑄 𑐖𑑂𑐰𑐮𑑄 𑐴𑐫𑐾𑐩𑐵𑑅 𑑋 𑐡𑐎𑐶𑐮𑐵 𑐳𑐶𑐢𑐫𑐰𑑄 𑐣𑑂𑐴𑐵𑐥𑐵 𑐥𑐵𑐖𑐸 𑐏𑐮 𑐣𑑄 𑐢𑑁 𑐰 𑐏𑐾𑑄 𑐳𑑄𑐐 𑐰𑐶𑐫𑐵, 𑐰𑐳 𑐰 𑐩𑑂𑐴𑐫𑐵𑐫𑑂𑐩𑐔𑐵, 𑐨𑐶𑐣𑐵𑐩𑐔𑐵 𑐥𑐶𑐣𑑂𑐳𑑄 𑐣𑑄 𑐢𑑁 𑐳𑐐𑑄 𑐧𑐶𑐫𑐵 𑐟𑐥𑐸𑐮𑐶 𑐮𑐮𑑂𑐴𑐵𑐣𑐵 𑐧𑐬𑑂𑐏𑐶 𑐦𑐸𑐎𑐫𑑂 𑐫𑐵𑐎𑐷𑐃 𑑋 𑐠𑑂𑐰 𑐏𑐸𑐣𑑂𑐴𑐹 𑐳𑐎𑐳𑐶𑐟 𑐔𑑂𑐫𑐵𑐟𑐵 𑐑𑐵𑐳𑐵 𑐧𑑂𑐰𑐫𑐵 𑐨𑑂𑐰𑐫𑑂 𑐣𑐎𑐾𑐩𑐵 𑑋
𑐥𑐵𑐴𑐵𑑄 𑐧𑑂𑐰𑐣𑐾
𑐳𑐷𑐐𑐸𑐫𑐵 𑐮𑐟𑑂𑐫𑐵, 𑐏𑐸𑐮𑐵 𑐰 𑐡𑐎𑐶𑐮𑐵 𑐱𑑂𑐬𑐵𑐡𑑂𑐢𑐫𑑂 𑐕𑐐𑐸 𑐱𑑂𑐬𑐵𑐡𑑂𑐢 𑐏𑐸𑐣𑑂𑐴𑐹 𑐥𑐵𑐴𑐵𑑃 𑐧𑑂𑐰𑐣𑐾𑐐𑐸 𑐔𑐮𑐣 𑐡𑐸 𑑋 𑐀𑐥𑑀𑐳𑐶𑐫𑐵 𑐮𑐟𑑂𑐫𑐵 𑐰𑐵 𑐏𑐸𑐮𑐵𑑄 𑐥𑐵𑐴𑐵𑑃 𑐧𑑂𑐰𑐣𑐶 𑑋 𑐠𑑂𑐰 𑐏𑐸𑐣𑑂𑐴𑐹 𑐦𑐸𑐎𑐶𑐧𑐵𑐎𑐵𑐫𑑂, 𑐠𑑅𑐠𑐶𑐟𑐶, 𑐩𑑂𑐴𑐫𑐵𑐫𑑂𑐩𑐔𑐵, 𑐨𑐶𑐣𑐵𑐩𑐔𑐵, 𑐧𑑂𑐫𑐵𑑅 𑐰𑐥𑐶𑑄, 𑐩𑐬𑐶 𑐧𑐶𑐔𑐵𑐰𑐥𑐶𑑄, 𑐐𑐸𑐠𑐶𑐫𑐵𑐬, 𑐳𑐷 𑐧𑐮𑐫𑑂 𑐐𑑂𑐰𑐵𑐴𑐵𑐮𑐷 𑐫𑐵𑐥𑐶𑑄, 𑐖𑐮𑐵𑐏𑐮𑐵𑑅 𑐰 𑐃𑐲𑑂𑐚 𑐩𑐶𑐟𑑂𑐬𑐥𑐶𑑄 𑐳𑐎𑐳𑐶𑐟𑑄 𑐨𑑂𑐰𑐫𑑂 𑐳𑐟𑐾𑐩𑐵𑑅 𑑋 𑐠𑑂𑐰 𑐏𑐸𑐣𑑂𑐴𑐹 𑐗𑐶𑐣𑐶𑐟𑐵 𑐧𑑂𑐰𑐟𑐵𑑄 𑐏𑐵𑐣𑐵 𑐳𑐎𑐳𑐶𑐟𑑄 𑐨𑑂𑐰𑐫𑑂 𑐣𑐎𑐾𑐩𑐵𑑅 𑑋
𑐣𑐶𑐡𑑄 𑐟𑐶𑐠𑐶
𑐳𑐷𑐣𑐵 𑐣𑐶𑐡𑑃 𑐏𑐸𑐣𑑂𑐴𑐹 𑐟𑐶𑐠𑐶 𑐱𑑂𑐬𑐵𑐡𑑂𑐢 𑐫𑐵𑐫𑐾𑐐𑐸 𑐔𑐮𑐣 𑐡𑐸 𑑋 𑐠𑑂𑐰 𑐏𑐸𑐣𑑂𑐴𑐹 𑐣𑑄 𑐩𑑂𑐴𑐫𑐵𑐫𑑂𑐩𑐔𑐵, 𑐨𑐶𑐣𑐵𑐩𑐔𑐵 𑐳𑐸𑐠𑐫𑑂 𑐥𑐶𑐞𑑂𑐜 𑐖𑑂𑐰𑐮𑑄 𑐟𑑅 𑐰𑐫𑐾𑐩𑐵𑑅 𑑋 𑐦𑐸𑐎𑐶 𑐩𑑂𑐴𑐫𑐵𑐫𑑂𑐩𑐔𑐵 𑐨𑐶𑐣𑐵𑐩𑐔𑐵 𑐳𑐎𑐳𑐶𑐟𑑄 𑐨𑑂𑐰𑐫𑑂 𑐳𑐟𑐾𑐩𑐵𑑅 𑑋 𑐮𑐟𑑂𑐫𑐵𑐧𑐮𑐾 𑐠𑐾𑑄 𑐮𑑀𑐎𑑀𑐣𑑂𑐟𑐬 𑐥𑐶𑐞𑑂𑐜 (𑐖𑐵𑐥𑑂𑐫𑑄) 𑐠𑐂 𑑋 𑐠𑑂𑐰 𑐏𑐸𑐣𑑂𑐴𑐸 𑐣𑑄 𑐳𑐎𑐳𑐶𑐟𑑄 𑐨𑑂𑐰𑐫𑑂 𑐣𑐎𑐾𑐩𑐵𑑅 𑑋
𑐧𑑁 𑐧𑐶𑐫𑐾𑐐𑐸
𑐣𑐶𑐡𑑃 𑐟𑐶𑐠𑐶 𑐳𑐶𑐢𑐫𑐾𑐰𑑄 𑐧𑐵𑑅 𑐳𑐷𑐐𑐸 𑐖𑐸𑐳𑐵 𑐐𑑀𑐎𑐬𑑂𑐞 𑐍𑐳𑐷 𑐧𑑁𑐫𑐵 𑐏𑑂𑐰𑐵𑑅 𑐳𑑂𑐰𑐫𑐾𑐐𑐸 𑐡𑐶𑑄𑐏𑐸𑐣𑑂𑐴𑐹 𑐐𑑀𑐎𑐬𑑂𑐞 𑐟𑐶𑐬𑑂𑐠𑐫𑑂 𑐰𑐵 𑐩𑐵𑑄 𑐳𑐶𑐐𑐸 𑐖𑐸𑐳𑐵 𑐩𑐵𑐟𑐺 𑐍𑐱𑐷 𑐩𑐵𑑃𑐫𑐵 𑐏𑑂𑐰𑐵𑑅 𑐳𑑂𑐰𑐫𑐾𑐐𑐸 𑐡𑐶𑑄𑐏𑐸𑐣𑑂𑐴𑐹 𑐩𑐵𑐟𑐵 𑐟𑐶𑐬𑑂𑐠𑐫𑑂 𑐰𑐣𑐵 𑐱𑑂𑐬𑐵𑐡𑑂𑐢 𑐫𑐵𑐣𑐵 𑐧𑑁 𑐰𑐵 𑐩𑐵𑑃𑐫𑐵 𑐣𑐵𑐩𑑄 𑐧𑑁 𑐧𑐶𑐫𑐐𑐸 𑐱𑐸𑐬𑐸 𑐫𑐵𑐂 𑑋
𑐟𑐶𑐠𑐶 𑐱𑑂𑐬𑐵𑐡𑑂𑐢
𑐳𑐷𑐐𑐸 𑐣𑐶𑐡𑑃 𑐟𑐶𑐠𑐶 𑐳𑐶𑐢𑐾𑐫𑐾𑐎𑐵 𑐡𑑄𑐫𑑂 𑐡𑐱𑑄 𑐳𑐶𑐐𑐸 𑐟𑐶𑐠𑐶 𑐏𑐸𑐣𑑂𑐴𑐹 𑐟𑐶𑐠𑐶 𑐱𑑂𑐬𑐵𑐡𑑂𑐢 𑐫𑐵𑐂𑐐𑐸 𑐔𑐮𑐣 𑐡𑐸 𑑋 𑐕𑐾𑑄𑐫𑑂 𑐱𑑂𑐬𑐵𑐡𑑂𑐢 𑐩𑐫𑐵𑐳𑐾 𑐟𑐶𑐬𑑂𑐠𑐫𑑂 𑐰𑐣𑐵 𑐣 𑐱𑑂𑐬𑐵𑐡𑑂𑐢 𑐫𑐵𑑅 𑑋 𑐕𑐸𑑄 𑐖𑐸𑐫𑐵 𑐱𑑂𑐬𑐵𑐡𑑂𑐢 𑐫𑐵𑐫𑐾 𑐩𑐦𑐸𑐳𑐵 𑐖𑐮 𑐡𑐵𑐣, 𑐣𑐶𑐳𑑂𑐮𑐵𑑅, 𑐰 𑐁𑐐𑑄 𑐥𑐹𑐖𑐵 𑐣𑑄 𑐫𑐵𑐫𑐾𑐐𑐸 𑐫𑐵 𑑋 𑐠𑑂𑐰 𑐏𑐸𑐣𑑂𑐴𑐹 𑐩𑑂𑐴𑑂𑐫𑐵𑐫𑑂𑐩𑐔𑐵, 𑐨𑐶𑐣𑐵𑐩𑐔𑐵 𑐥𑐶𑐞𑑂𑐜 𑐖𑑂𑐰𑐮𑑄 𑐳𑐸𑐠𑐫𑑂 𑐱𑑂𑐬𑐵𑐡𑑂𑐢 𑐏𑐸𑐣𑑂𑐴𑐹 𑐟𑐫𑑂 𑐴𑐫𑐾𑐩𑐵𑑅 𑑋 𑐟𑐶𑐠𑐶 𑐱𑑂𑐬𑐵𑐡𑑂𑐢 𑐏𑐸𑐣𑑂𑐴𑐹 𑐣𑑄 𑐮𑑀𑐎𑑀𑐟𑑂𑐬𑐬 𑐥𑐶𑐞𑑂𑐜 𑐠𑐫𑐵 𑐩𑑂𑐴𑑂𑐫𑐵𑐫𑑂𑐩𑐔𑐵, 𑐨𑐶𑐣𑐵𑐩𑐔𑐵, 𑐦𑐸𑐎𑐶𑑄 𑐳𑐎𑐳𑐶𑐟 𑐨𑑂𑐰𑐫𑑂 𑐳𑐟𑐾𑐩𑐵𑑅 𑑋

𑐳𑑀𑐴𑑂𑐬 𑐱𑑂𑐬𑐵𑐡𑑂𑐢
𑐡𑑄𑐫𑑂 𑐥𑐟𑐶𑐎𑑄 𑐘𑐮𑐵𑐐𑐵𑐫𑐵 𑐥𑑂𑐬𑐟𑐶𑐥𑐡𑐵 𑐣𑐶𑐳𑐾 𑐍𑐱𑐷 𑐏𑐸𑐣𑑂𑐴𑐹 𑐡𑐸𑐣𑐾 𑐳𑑀𑐴𑑂𑐬 𑐱𑑂𑐬𑐵𑐡𑑂𑐢 𑐫𑐵𑐫𑐾𑐐𑐸 𑐔𑐮𑐣 𑐡𑐸 𑑋 𑐠𑑂𑐰 𑐡𑐶𑑄 𑐡𑐸𑐣𑐾 𑐳𑐶𑐩𑑂𑐴𑐳𑐶𑐐𑐸 𑐟𑐶𑐠𑐶 𑐡𑐶𑑄 𑐎𑐠𑑄 𑐕𑐾𑑄𑐫𑑂 𑐰𑐵 𑐟𑐶𑐬𑑂𑐠𑐫𑑂 𑐮𑑀𑐎𑐣𑑂𑐟𑐬 𑐥𑐶𑐞𑑂𑐜 𑐠𑐂 𑑋 𑐠𑑂𑐰 𑐏𑐸𑐣𑑂𑐴𑐹 𑐳𑐶𑐃 𑐢𑐸𑑄𑐎𑐸𑐥𑐶 𑐖𑐸𑐖𑐸 𑐣𑐶𑐳𑐾 𑐕𑐾𑑄𑐫𑐵 𑐦𑐸𑐎𑑂𑐎 𑐖𑑅 𑐥𑐶𑐣𑐶𑐐𑐸 𑐣𑐵𑐩 𑐣𑑄 𑐥𑐶𑐞𑑂𑐜 𑐠𑐂 𑑋 𑐠𑑂𑐰 𑐏𑐸𑐣𑑂𑐴𑐹 𑐩𑑂𑐴𑐫𑐵𑐫𑑂𑐩𑐔𑐵 𑐰 𑐨𑐶𑐣𑐵𑐩𑐔𑐵 𑐥𑐶𑐞𑑂𑐜 𑐖𑑂𑐰𑐮𑑄 𑐳𑐸𑐠𑐫𑑂 𑐟𑑅 𑐰𑐫𑐾𑐩𑐵𑑅 𑑋 𑐩𑑂𑐴𑐫𑐵𑐫𑑂𑐩𑐔𑐵, 𑐨𑐶𑐣𑐵𑐩𑐔𑐵, 𑐦𑐸𑐎𑐶, 𑐠𑑅𑐠𑐶𑐟𑐶 𑐥𑐶𑑄 𑐳𑐎𑐳𑐶𑐟 𑐨𑑂𑐰𑐫𑑂 𑐳𑐟𑐾𑐩𑐵𑑅 𑑋
𑐰𑐶𑐢𑐶 𑐰𑑂𑐫𑐰𑐴𑐵𑐬 𑐫𑐵 𑐨𑑂𑐰𑐖𑐫𑑂 𑐰𑑂𑐧𑐟𑐵𑑄 𑐏𑐵𑐂𑐐𑐸 𑐟𑐵 (𑐥𑐬𑐶𑐎𑐵𑐬)

(𑐎) 𑐮𑑀𑐔𑐵𑑅 𑐫𑐵 𑐧𑑂𑐰 𑐑𑐵𑐳𑐵 𑐟𑐵
𑑑. 𑐔𑐶 𑐥𑐵𑐮𑐸 𑑒. 𑐔𑐫𑑂𑐥𑐶 (𑐥𑐵𑐮𑐸 𑐔𑐵𑑅 𑐕𑐔𑐵𑑅 𑐖𑐎 𑐟𑑅𑐳𑐵𑑄 𑐐𑐵𑑅 𑐎𑐸𑐔𑐵 𑐫𑐵𑐣𑐵 𑐩𑐟𑐫𑐾𑐐𑐸)
𑑓. 𑐎𑑅𑐳𑐸 𑐰 𑑔. 𑐎𑑄𑐑𑐵𑐳𑐵 𑐰 𑑕. 𑐰𑐵𑑃𑐄𑐔𑐵
(𑐏) 𑐑𑑅𑐳𑐹 𑐨𑑂𑐰𑐫𑑂𑐫𑐵 𑐧𑑂𑐰𑐟𑐵𑑄 𑐏𑐵𑐫𑐾𑐐𑐸 𑐥𑐬𑐶𑐎𑐵𑐬
𑑑. 𑐔𑐶 𑑒. 𑐥𑐵𑐮𑐸 𑑓. 𑐴𑐵𑐎𑐸𑐩𑐸𑐳𑑂𑐫𑐵 𑑔. 𑐎𑐳𑐹𑑅 𑐰
𑑕. 𑐎𑑄𑐑𑐵𑐳𑐵 𑑖. 𑐔𑐫𑑂𑐥𑐶 𑑗. 𑐰𑐵𑑃𑐄𑐔𑐵 𑑘. 𑐴𑐵𑐎𑐸 𑐕𑑂𑐰𑐫𑑂𑐮𑐵 𑑋 𑐀𑐠𑐰𑐵
(𑐔𑐶 𑐥𑐵𑐮𑐸 𑐕𑐠𑐵𑐫𑑂 𑐟𑑅𑐳𑐵 𑐩𑐳𑑂𑐫𑐵𑑄 𑐧𑐹𑐧 𑐕𑐟𑐵 𑐩𑐵𑑅)
(𑐐) 𑐱𑑂𑐬𑐵𑐡𑑂𑐢𑐫𑐵 𑐧𑑂𑐰𑐟𑐵𑑄 𑐏𑐵𑐫𑐾𑐐𑐸 𑐑𑐵𑐳𑐵𑐟𑐵
𑑑. 𑐥𑐵𑐮𑐸 𑑒. 𑐩𑐸𑐳𑑂𑐫𑐵 𑑓. 𑐰𑑅 𑑔. 𑐥𑑅𑐩𑐵𑐫𑑂
𑑕. 𑐏𑐫𑑂𑐥𑐶 𑑖. 𑐕𑑂𑐰𑐫𑑂𑐮𑐵 (𑐩𑐣𑐵𑐐𑐸 𑐕𑑂𑐰𑐫𑑂𑐮𑐵) 𑑗. 𑐰𑐵𑑃𑐄𑐔𑐵 𑑘. 𑐮𑐵
(𑐑) 𑐥𑐫𑑂𑐣𑑄 𑐰𑐶𑐫𑐾 (𑐂𑐴𑐶𑐥𑐵𑑅) 𑐫𑐵 𑐧𑑂𑐰 𑐑𑐵𑐳𑐵 𑐟𑐵
𑑑. 𑐥𑐵𑐮𑐸 𑑒. 𑐩𑐸𑐳𑑂𑐫𑐵 𑐧𑐸𑑄𑐂 𑑓. 𑐰𑑅 𑑔. 𑐎𑑅𑐳𑐸 𑐧𑐸𑑄𑐂
𑑕. 𑐏𑐫𑑂𑐥𑐶 𑑖. 𑐔𑐫𑑂𑐥𑐶
𑑗. 𑐢𑑁 𑐑𑐵𑐳𑐵 (𑐮𑐿𑑄 𑐔𑐸𑐮𑐵𑑅 𑐢𑑁𑐮𑐫𑑂 𑐰𑐵𑐮𑐾𑐐𑐸)
𑑘. 𑐴𑐶𑑄𑐮𑐵 (𑐮𑐵 𑐴𑐶𑑄𑐣𑑄 𑐰𑐵𑐮𑐾𑐐𑐸)
𑑙. 𑐥𑑄𑐮𑐵 ( 𑐮𑐵 𑐟𑑂𑐫𑐵𑐣𑐵𑑅 𑐳𑐸𑐰𑐶 𑐔𑐸𑑄 𑐢𑑁 𑐣𑑄 𑐰𑐵𑐮𑐾𑐐𑐸)
𑑑𑑐. 𑐩𑐹𑐮𑐵 (𑐟𑑅𑐏𑐵) 𑐰𑐵 𑐎𑑂𑐰𑐵𑐮𑐵
𑑑𑑑. 𑐳𑐾𑑄 𑐥𑐸𑐎𑐵, 𑐐𑑂𑐰𑑅𑐥𑐸𑐎𑐵 𑑑𑑒. 𑐏𑑂𑐫𑑃𑐫𑑂, 𑐣𑑂𑐫𑐵

(𑐒) 𑐠𑐵𑐫𑑂 𑐨𑐸𑐂 𑐧𑑂𑐰𑐫𑐾𑐐𑐸 𑐑𑐵𑐳𑐵 𑐟𑐵
𑑑. 𑐥𑐵𑐮𑐸 𑑒. 𑐩𑐸𑐳𑑂𑐫𑐵𑐧𑐸𑑄𑐂 𑑓. 𑐰𑑅 𑑔. 𑐎𑑅𑐳𑐸𑐧𑐸𑑄𑐂
𑑕. 𑐏𑐫𑑂𑐥𑐶 𑑖. 𑐔𑐫𑑂𑐥𑐶 𑑗. 𑐢𑑁 𑐑𑐵𑐳𑐵 𑑘. 𑐴𑐶𑑄𑐮𑐵
𑑙. 𑐥𑑄𑐮𑐵 𑑑𑑐. 𑐎𑑂𑐰𑐵𑑅𑐮𑐵 𑑑𑑑. 𑐐𑑂𑐰𑑅𑐥𑐸𑐎𑐵, 𑐳𑐾𑑄 𑐥𑐸𑐎𑐵 𑑑𑑒. 𑐏𑑂𑐫𑑄 𑐰 𑐣𑑂𑐫𑐵 𑑑𑑓. 𑐩𑐬𑐶 𑐕𑐟𑐵 𑑑𑑔. 𑐐𑑂𑐰𑐵𑑅 𑐩𑐳𑐮𑐵 𑑑𑑕. 𑐠𑑂𑐰𑑄 𑑑𑑖. 𑐀𑐫𑑂𑐮𑐵𑑅
𑑑𑑗. 𑐢𑑁 𑑑𑑘. 𑐡𑐸𑐬𑐸 𑑑𑑙. 𑐔𑐶𑐣𑐷 𑑒𑑐. 𑐳𑐶𑐳𑐵𑐧𑐸𑐳𑐵 (𑐡𑐶𑐐𑐸 𑐕𑐥𑐸 𑑑)

(𑐔) 𑐥𑐳𑑂𑐟𑐵 𑐨𑑂𑐰𑐫 𑐰 𑐧𑑂𑐫𑐵𑐴𑐵𑑅 𑐨𑑂𑐰𑐫𑑂𑐫𑐵 𑐑𑐵𑐳𑐵 𑐟𑐵
𑑑. 𑐥𑐵𑐮𑐸 𑑒. 𑐩𑐸𑐳𑑂𑐫𑐵𑐧𑐸𑐃 𑑓. 𑐢𑑁 𑐰𑑅 𑑔. 𑐎𑑅𑐳𑐹𑐧𑐸𑐃
𑑕. 𑐏𑐫𑑂𑐥𑐶 𑑖. 𑐔𑐫𑑂𑐥𑐶 𑑗. 𑐢𑑁 𑐑𑐵𑐳𑐵 𑑘. 𑐡𑐸𑐮𑑂𑐮𑐵 (𑐡𑐾𑐮𑑂𑐮𑐵)
𑑙. 𑐴𑐶𑑄𑐮𑐵 𑑑𑑐. 𑐥𑑄𑐮𑐵 𑑑𑑑. 𑐎𑐫𑑂𑐐𑐸 𑐮𑐵 𑑑𑑒. 𑐳𑑅𑐥𑐸 𑐥𑑄𑐮𑐵
𑑑𑑓. 𑐴𑐵𑐩𑑂𑐰𑑅𑐮𑐵 𑑑𑑔. 𑐩𑐹𑐮𑐵 (𑐟𑑅𑐏𑐵) 𑑑𑑕. 𑐳𑐾𑑄 𑐥𑐸𑐎𑐵 𑑑𑑖. 𑐐𑑂𑐰𑑅𑐥𑐸𑐎𑐵
𑑑𑑗. 𑐏𑑂𑐫𑑄𑐫𑑂 𑐕𑐨𑐶 𑑑𑑘. 𑐣𑑂𑐫𑐵

(𑐕) 𑐔𑐫𑑂𑐥𑑂𑐫𑐟𑐵 𑐑𑐵𑐳𑐵 (𑑘𑑔 𑐧𑑂𑐫𑐘𑑂𑐖𑐣) 𑐫𑐵 𑐑𑐵𑐳𑐵 𑐟𑐵 (𑐥𑐬𑐶𑐎𑐵𑐬)

𑐠𑐎𑐶𑐫𑐵 𑐢𑐮𑑅 𑐮𑑂𑐫𑐹𑐣𑐾 𑐀𑐣𑐸𑐱𑐸𑐔𑐷 𑐡𑐸 𑑋

𑐧𑑂𑐰𑐟𑐫𑐾 𑐧𑐮𑐫𑑂 𑐑𑐵𑐳𑐵 𑐟𑐵 𑐑𑐜𑐷𑐫𑐵 𑐩𑐸𑐮𑐸 𑐠𑐾𑑄 𑐡𑐾𑐥𑐵𑑄 –– 𑐖𑐰𑐫𑑂 𑐔𑐵𑑅𑐴𑐶𑐎𑐵 𑐟𑐫𑑂𑐩𑐵 𑑋
𑐰𑐶𑐢𑐶 𑐰𑑂𑐫𑐰𑐴𑐵𑐬 𑐴𑐣𑐾𑐧𑐮𑐫𑑂 𑐢𑑂𑐫𑐵𑐣𑐫𑑂 𑐟𑐫𑐾𑐩𑐵𑑅𑐐𑐸 𑐏𑑄
𑑑) 𑐗𑐷𑐐𑐸 𑐰𑐶𑐢𑐶 𑐰𑑂𑐫𑐰𑐴𑐵𑐬𑐫𑑂 𑐳𑐐𑑄 𑐫𑑄𑐎𑐾 𑐩𑐵𑑅𑐠𑐵𑐫𑑂 𑐕𑐾𑑃𑐖𑑅 𑐳𑑂𑐰𑐫𑐵𑑅 𑐗𑐶𑑄𑐖𑑂𑐫𑐵𑐐𑑅 𑐟𑐎 𑐖𑐎 𑐫𑑄𑐎𑐾𑐐𑐸 𑑋
𑑒) 𑐗𑐷𑐐𑐸 𑐳𑑄𑐳𑑂𑐎𑐺𑐟𑐶𑐫𑐵𑐟 𑐮𑐾𑐫𑑄𑐎𑐵 𑐟𑐫𑐾𑐟 𑐗𑐷𑐐𑑂𑐸 𑐰𑐶𑐢𑐶 𑐰𑑂𑐫𑐰𑐴𑐵𑐬 𑐎𑐠𑑄 𑐴𑐣𑐾𑐩𑐵𑑅𑐐𑐸 𑐨𑑂𑐰𑐫𑑂 𑐦𑐫𑐵𑑄𑐦𑐟𑑂𑐟𑐮𑐾 𑐧𑑂𑐰𑐟𑐵𑑄𑐏𑐵𑐣𑐵𑑅 𑐗𑑂𑐰𑑅𑐨𑑂𑐰𑐫𑑂 𑐣𑐎𑐾𑐐𑐸 𑑋 𑐄𑐐𑐸 𑐗𑑂𑐰𑑅𑐨𑑂𑐰𑐖𑐫𑑂 𑐗𑐷𑐐𑐸 𑐢𑐬𑑂𑐩 𑐳𑑄𑐳𑑂𑐎𑐺𑐟𑐶𑑄 𑐩𑐧𑑂𑐫𑐹𑐐𑐸 𑐣𑐳𑐵𑐖𑑂𑐰𑐮𑑄 𑐩𑐟𑐫𑐾𑐐𑐸 𑑋
𑑓) 𑐨𑑂𑐰𑐫𑑂 𑐳𑑅𑐟𑐾𑐧𑐮𑐫𑑂 𑐰𑑂𑐫𑐰𑐴𑐵𑐬𑑄 𑐎𑑂𑐰𑐔𑑂𑐫𑐹𑐥𑐶𑑄 𑐠𑑅𑐠𑐶𑐟𑐶𑐥𑐶𑑄 𑐟𑑂𑐰𑑅𑐟𑐵𑑅 𑐩𑐾𑐥𑐶𑑄 𑐂𑐲𑑂𑐚𑐩𑐶𑐟𑑂𑐬, 𑐥𑐵𑐳𑐵𑐥𑐶𑑄𑐟 𑐠𑑅𑐥𑐶𑐳𑑄 𑐳𑑂𑐰𑐫𑐵𑑅 𑐳𑑅𑐟𑐾𑐐𑐸 𑑋
𑑔) 𑐳𑐸𑐫𑐵𑑃 𑐰𑐶𑐢𑐶 𑐰𑑂𑐫𑐰𑐴𑐵𑐬𑐫𑐵 𑐕𑐸𑑄 𑐖𑑂𑐫𑐵𑐏𑑃 𑐫𑐵𑐫𑐾 𑐣𑑂𑐴𑑂𑐫𑑅 𑐳𑐮𑑂𑐮𑐵𑐴 𑐫𑐵𑐫𑐾𑐧𑐮𑐫𑑂 𑐳𑐩𑑂𑐧𑐣𑑂𑐢𑐶𑐟 𑐐𑐸𑐠𑐶 𑐰𑐵 𑐳𑐩𑐵𑐖𑐫𑐵 𑐥𑑂𑐬𑐟𑐶𑐣𑐶𑐢𑐶 𑐟𑐫𑐵𑑅 𑐳𑐴𑐮𑐴 𑐧𑑂𑐫𑐵𑐎𑐾𑐐𑐸 𑑋
𑑕) 𑐗𑐷𑐐 𑐳𑑄𑐳𑑂𑐎𑐺𑐟𑐶 𑐥𑐬𑐩𑑂𑐥𑐬𑐵 𑐳𑑄𑐬𑐎𑑂𑐲𑐞 𑐫𑐵𑐣𑐵𑐟𑐫𑐾𑐟 𑐦𑐫𑐵𑑄𑐦𑐟𑑂𑐟𑐮𑐾 𑐔𑐶𑐟𑑂𑐬𑐎𑐵𑐬 𑐳𑐩𑐸𑐡𑐵𑐫 𑐡𑐸𑐣𑐾 𑐂𑐴𑐶𑐥𑐵𑑅 𑐧𑑂𑐫𑐵𑐎𑐾𑐐𑐸 𑑋 𑐕𑐸𑑄 𑐖𑐸𑐫𑐵𑑅 𑐩𑐾𑐐𑐸 𑐖𑐵𑐟𑐫𑐵𑐥𑐶𑑄 𑐣𑐵𑐥 𑐂𑐴𑐶𑐥𑐵𑑅 𑐖𑐹𑐳𑐵 𑐗𑐷𑐐𑐸 𑐳𑐩𑐵𑐖𑐫𑑂 𑐡𑐸𑐣𑐾 𑐰𑐶𑐢𑐶 𑐰𑑂𑐫𑐰𑐴𑐵𑐬 𑐴𑐣𑐾𑐩𑐵𑐮𑐷𑐧𑐮𑐫𑑂 𑐗𑐷𑐐𑐸 𑐰𑐶𑐢𑐶 𑐰𑑂𑐫𑐰𑐴𑐵𑐬 𑐎𑐠𑑄 𑐴𑐣𑐾𑐩𑐵𑑅, 𑐩𑐾𑐐𑐸 𑐖𑐵𑐟𑐫𑑂 𑐰𑐶𑐢𑐶 𑐰𑑂𑐫𑐰𑐴𑐵𑐬 𑐴𑑄𑐰𑐣𑐾 𑐩𑐵𑐮𑐷𑐧𑐮𑐫𑑂 𑐂𑐩𑐶𑐐𑐸 𑐴𑐾 𑐎𑐠𑑄 𑐰𑐶𑐢𑐶 𑐰𑑂𑐫𑐰𑐴𑐵𑐬 𑐴𑑄 𑐰𑐣𑐾𑐐𑐸 𑐏𑑃𑐫𑑂 𑐥𑑄𑐐𑐮𑑅 𑐩𑐟𑐫𑐾𑐐𑐸 𑑋
𑑖) 𑐂𑐮𑐫𑑂 𑐧𑑂𑐫𑐮𑐫𑑂 𑐖𑑅𑐥𑐶𑑄𑐎𑐾 𑐳𑐸𑐗𑐵𑐰 𑐎𑐵𑐫𑐾𑐐𑐸 𑐖𑑂𑐫𑐵 𑐖𑐹𑐧𑐮𑐫𑑂 𑐀𑐢𑐶𑐎𑐵𑑄𑐱𑐳𑐶𑐣𑑄 𑐳𑐶𑐩𑐵𑐥𑐷𑐐𑐸 𑐖𑑂𑐫𑐵𑐫𑐵𑐟 𑐗𑐷𑐐𑐸 𑐳𑑄𑐳𑑂𑐎𑐵𑐬𑐫𑑂 𑐡𑐸𑐠𑑂𑐫𑐵𑐎𑐾𑐐𑐸 𑐧𑐵𑑄𑐮𑐵𑑅 𑐢𑐫𑐵𑐐𑐸 𑐧𑐶𑐔𑐵𑑅 𑐰𑑅𑐐𑐸 𑐖𑐹𑐐𑐸𑐮𑐶𑑄 𑐠𑑂𑐰𑐫𑐵𑐟 𑐗𑐷𑐐𑐸 𑐳𑑄𑐳𑑂𑐎𑐵𑐬𑐫𑑂 𑐡𑐸𑐠𑑂𑐫𑐵𑐎𑐾𑐐𑐸 𑑋 𑐩𑑂𑐴𑐟𑐶𑐣𑐶𑑄 𑐡𑐕𑐶𑐡 𑐕𑐎𑑅 𑐠𑑅𑐐𑐸 𑐴𑐾 𑐎𑐸𑐟𑐮𑑄 𑐰𑐵 ‘𑐳𑐩𑐵𑐖” 𑐫𑐵 𑐐𑑂𑐰𑐳𑐵𑐮𑐫𑑂 𑐖𑐸𑐂𑐐𑐸 𑐳𑐶𑐩𑐵𑐥𑐷𑐖𑑂𑐫𑐵𑐫𑑂 𑐧𑑂𑐰𑐟𑐶 𑐎𑐵𑐫𑐾𑐐𑐸 𑑋
𑑗) 𑐨𑑂𑐰𑐫𑑂 𑐰𑑅𑐥𑐶𑑄𑐎𑐾 𑐳𑐐𑑄 𑐡𑐵𑑄 𑐩𑐸𑐎𑐵𑑅 𑐣𑑄 𑐳𑐐𑑄 𑐧𑐶𑐂 𑐖𑑂𑐫𑐹 𑑋
𑑘) 𑐳𑐸𑐣𑐵𑐣𑑄 ‘𑐰𑐶𑐢𑐶 𑐰𑑂𑐫𑐰𑐴𑐵𑐬𑐫𑐵 𑐢𑐮𑑅’ 𑐴𑐵𑐔𑐵𑑄𑐐𑐵𑐮 𑐢𑐫𑐵𑐐𑐸 𑐳𑐩𑐵𑐖𑐫𑐵𑐟 𑐖𑐵𑐣𑐎𑐵𑐬𑐷 𑐰𑐮 𑐢𑐵𑑅𑐳𑐵 ‘𑐡𑐸𑑅𑐏 𑐥𑑂𑐰𑑄𑐎𑐵𑑅’ 𑐥𑑁 𑐔𑑂𑐰𑐫𑐾𑐐𑐸 𑐰 𑐳𑐩𑑂𑐧𑐣𑑂𑐢𑐶𑐟 𑐐𑐸𑐠𑐶𑐫𑐵𑐟 𑐖𑐵𑐣𑐎𑐵𑐬𑐷 𑐧𑐶𑐂𑐐𑐸 𑑋

𑐔𑐶𑐟𑑂𑐬𑐎𑐵𑐬 (𑐥𑐸𑑄) 𑐟𑐫𑑂𑐐𑐸 𑐐𑐸𑐠𑐶
𑐔𑐶𑐟𑑂𑐬𑐎𑐵𑐬 (𑐥𑐸𑑄) 𑐟𑐫 𑐣𑑄 𑐳𑐷 𑐐𑐸𑐠𑐷 ÷ 𑐳𑐣𑐵𑑅𑐐𑐸𑐠𑐷 𑐟 𑐡𑐫𑑂𑐎𑐵 𑐎𑑂𑐰𑐫 𑐣𑑂𑐴𑑂𑐫𑐾𑐠𑐣𑐵𑐐𑐸 𑐱𑐿𑐡𑑂𑐢𑐵𑐣𑑂𑐟𑐶𑐎 𑐥𑐎𑑂𑐲𑐎𑐫𑐵 𑐐𑐸𑐠𑐶𑐟 𑐳𑑂𑐰𑐣𑐵 𑐟𑑅𑐐𑐸 𑐡𑐸 𑑋
𑐎) 𑐩𑐖𑑂𑐫𑐹 𑐩𑐐𑐵𑑅𑐐𑐸 𑐂𑐮𑐫𑑂 𑐠𑑅𑐠𑐰𑐫𑑂 𑐐𑑂𑐰𑐵𑐴𑐵𑐮𑐶, 𑐟𑐶𑐰 𑐰𑐷𑐂𑐟 𑐠𑐷 𑐠𑐷 𑐐𑐸𑐠𑐶𑐟 𑐳𑑂𑐰𑐣𑐵 𑐟𑑅𑐐𑐸 𑑋
𑐏) 𑐢𑐵𑐬𑑂𑐩𑐶𑐎 𑐨𑐵𑐰𑐣𑐵 𑐣𑑂𑐴𑑂𑐫𑐵𑐧𑐮𑐾𑑄 𑐡𑐫𑐾𑐎𑐾𑐟 𑐮𑑄 𑐡𑐫𑐾𑐎𑐵 𑐟𑑅𑐐𑐸 𑑋
𑐐) 𑐡𑑂𑐫𑑀𑐫𑐵𑐟 𑐥𑐹𑐖𑐵 𑐫𑐵𑐫𑐾𑐐𑐸 𑐰 𑐳𑐩𑐵𑐖 𑐳𑐾𑐰𑐵 𑐫𑐵𑐫𑐾𑐐𑐸 𑐖𑑂𑐫𑐵 𑐟𑐵𑑅 𑐮𑐵𑐎𑐾𑐟
𑐑) 𑐐𑐸𑐠𑐶𑐫𑐵 𑐱𑑂𑐬𑐷 𑐳𑐩𑑂𑐥𑐟𑐶 𑐰𑐶𑐔𑐵𑑅 𑐫𑐵𑐣𑐵𑑅 𑐳𑐸𑐬𑐎𑑂𑐲𑐵 𑐫𑐵𑐣𑐵 𑐟𑐫𑐾𑐐𑐸 𑐐𑐸𑐠𑐶𑐫𑐵 𑐎𑐬𑑂𑐟𑐰𑑂𑐫 𑐏𑑅 𑑋
𑐒) 𑐐𑐸𑐠𑐶𑐂 𑐟𑑅𑐩𑐶, 𑐔𑐷𑐩𑐶, 𑐳𑑅𑐩𑑂𑐴 𑐩𑐳𑑅𑐩𑑂𑐴 𑐢𑐿𑐐𑐸 𑐨𑐾𑐡𑐨𑐵𑐰 𑐡𑐿 𑐩𑐏𑐸 𑑋
𑐔) 𑐠𑐖𑐶𑐥𑐶𑐣𑑂𑐟 𑐴𑐣𑐵 𑐠𑐎𑐵𑐮𑐶𑐫𑐵 𑐀𑐡𑐥𑐫𑑂 𑐔𑑂𑐰𑐣𑐾𑐐𑐸 𑑋
𑐕) 𑐣𑑂𑐴𑑂𑐫𑐵𑐐𑐸 𑐖𑑂𑐫𑐵 𑐣𑑄 𑐢𑐿𑐟𑑅𑐐𑐸 𑐡𑐶𑐣𑐾 𑐰 𑐢𑐵𑑅𑐐𑐸 𑐂𑐮𑐾 𑐫𑐵𑐫𑐾𑐩𑐵𑑅 𑐩𑐏𑐸𑐳𑐵 𑐰𑑄 𑐥𑐸𑐮𑐾𑐐𑐸 𑐰𑑂𑐫𑐰𑐳𑑂𑐠𑐵 𑐡𑐂 𑑋
𑐖) 𑐐𑐸𑐠𑐶𑐂 𑐐𑐸𑐠𑐶𑐫𑐵𑐬 𑐳𑐎𑐳𑐶𑐫𑐵𑑄 𑐄𑐮𑐶𑐴𑐾 𑐀𑐢𑐶𑐎𑐵𑐬 𑐡𑐂 𑑋 𑐐𑐸𑐠𑐶𑐂 𑐫𑐵𑐫𑐾 𑐩𑐵𑑅𑐐𑐸 𑐐𑑂𑐰𑐵𑐴𑐵𑐮𑐶 𑐖𑑂𑐫𑐵 𑐫𑐵𑐫𑐾𑐐𑐸 𑐐𑐸𑐠𑐶𑐫𑐵 𑐎𑐬𑑂𑐟𑐰𑑂𑐫 𑐏𑑅 𑑋
𑐗) 𑐐𑐸𑐠𑐶 𑐥𑐵𑑅𑐮𑐵𑑅𑐫𑐵𑐟 𑐁𑐬𑑂𑐠𑐶𑐎 𑐨𑐵𑐬 𑐩𑐰𑐶𑐂𑐐𑐸 𑐎𑐸𑐟𑑅𑐫𑐵𑐣𑐵 𑐁𑐫𑐳𑑂𑐟𑐵𑑄 𑐩𑐐𑐵𑐟 𑐢𑐵𑐳𑐵 𑐮𑑂𑐴𑐵𑐥𑑄 𑐮𑑂𑐴𑐵𑐣𑐵𑑅 𑐏𑐬𑑂𑐔 𑐫𑐵𑐫𑐾𑐩𑐵𑑅 𑑋

𑐳𑑂𑐰𑐣𑐷𑐐𑑅 𑐡𑐸𑐣𑐾 𑐡𑐸𑐐𑐸 𑐐𑐸𑐠𑐶𑐫𑐵 𑐣𑐵𑑄 𑐰 𑐠𑐵𑐫𑑂
𑐫𑐾𑑄 𑐫𑐮 𑐏𑑂𑐰𑐥 𑐠𑐶𑐩𑐷
𑑑. 𑐎𑑀𑐴𑐶𑐟𑐶 𑐎𑐰𑑅 𑐐𑐸𑐠𑐶 𑐣𑐸𑐐𑑅 𑐎𑐰𑑅 𑐐𑐸𑐠𑐶 𑐨𑐿𑐬𑐰 𑐐𑐸𑐠𑐶 𑐠𑐶𑐩𑐷 𑐎𑐰𑑅
𑑒. 𑐣𑑂𑐴𑐸𑐑𑑅 𑐎𑐰𑑅 𑐐𑐸𑐠𑐶 𑐴𑑁𑐐𑑅 𑐎𑐰𑑅 𑐐𑐸𑐠𑐶 𑐟𑑅𑐢𑑄 𑐐𑐸𑐠𑐶
𑑓. 𑐨𑐶𑐣𑑂𑐡𑑂𑐫𑑀 𑐟𑑅𑐧𑑂𑐰 𑐎𑐰𑑅 𑐐𑐸𑐠𑐶 𑐩𑐴𑐵𑐮𑐎𑑂𑐲𑑂𑐩𑐷 𑐐𑐸𑐠𑐶 𑐡𑐾𑐳𑐮𑐵 𑐐𑐸𑐠𑐶
𑑔. 𑐫𑐟𑑂𑐏𑐵 𑐎𑐰𑑅 𑐐𑐸𑐠𑐶 𑐔𑐣𑑂𑐡𑑂𑐬𑐩𑐴𑐵𑐬𑑀𑐱𑐞 𑐐𑐸𑐠𑐶
𑑕. 𑐰𑐚𑐸 𑐩𑐹𑐧𑐴𑐵 𑐎𑐰𑑅 𑐐𑐸𑐠𑐶 𑐰𑐵 𑐐𑐸𑐠𑐶
𑑖. 𑐩𑐵𑐰𑐟𑐶 𑐎𑐰𑑅 𑐐𑐸𑐠𑐶
𑑗. 𑐎𑐾𑐮 𑐩𑐸𑐐𑑅 𑐎𑐰𑑅 𑐐𑐸𑐠𑐶
𑑘. 𑐏𑐶𑑄𑐮 𑐎𑐰𑑅 𑐐𑐸𑐠𑐶
𑑙. 𑐳𑐶𑐑𑑅 𑐎𑐰𑑅 𑐐𑐸𑐠𑐶

𑐐𑐸𑐠𑐶 𑐳𑑂𑐠𑐵𑐥𑐣𑐵 𑐫𑐵𑐰𑐮𑐾 𑐐𑐣𑐫𑐵𑐥𑐶𑑄 (𑐥𑐸𑑄) 𑐟𑐫𑑂𑐳𑑄 𑐣𑐷𑐳𑑂𑐰𑑄𑐐𑐸 𑐏𑑅 𑑋 𑐰𑐫𑐵𑐟 𑐳𑑄𑐳𑑂𑐠𑐵𑐥𑐎𑐫𑐵 𑐬𑐸𑐥𑐫𑑂 𑐎𑐫𑐵 𑐰𑐴𑐾 𑐠𑐵𑐳𑑄 𑐐𑐸𑐠𑐶𑐫𑐵 𑐣𑐵𑑄 𑐟𑐫𑐵 𑐎𑐰𑑅 𑐢𑐎𑐵 𑐢𑐵𑐫𑐾𑐐𑐸 𑐥𑐬𑐩𑑂𑐥𑐬𑐵𑐐𑐟 𑐔𑐮𑐣 𑐡𑐸 𑑋
𑐳𑑄𑐮𑑂𑐴𑐹 𑐥𑐟𑐶𑑄 𑐥𑐵𑑅 𑐦𑐫𑐵 𑐣𑑂𑐫𑐵𑐫𑑂𑐎𑐶𑐐𑐸 𑐳𑑄𑐮𑑂𑐴𑐹 𑐐𑐸𑐠𑐶 𑐣𑑄 𑐡𑐸 𑑋 𑐠𑑂𑐰 𑐫𑐮𑐫𑑂 𑐖𑐎 𑐡𑐸𑐐𑐸 𑐏 𑑋 𑐡𑐾𑐳𑐣𑐵 𑐐𑐸𑐠𑐶, 𑐰𑐶𑐔𑐵𑑅 𑐐𑐸𑐠𑐶 𑐣𑑄 𑐳𑑂𑐰𑐣𑐵 𑐟𑑅𑐐𑐸 𑐡𑐸 𑑋
𑐳𑑂𑐰𑐣𑐶𑐐𑑅𑐫𑐵 𑐡𑐸𑐣𑐾 𑐔𑑂𑐰𑑄𑐥𑐶𑑄 𑐔𑐶𑐟𑑂𑐬𑐎𑐵𑐬 (𑐥𑐸𑑄) 𑐟𑐫𑑂 𑐠𑐷 𑐠𑐷 𑐠𑐵𑐳𑐾 𑐠𑑅𑐥𑐶𑐣𑐷 𑐡𑐶𑐐𑐡𑑂𑐫𑑅 𑐳𑑂𑐠𑐵𑐥𑐣𑐵 𑐫𑐵𑐣𑐵, 𑐡𑐶𑐐𑐸 𑐥𑐸𑐖𑐵 𑐣𑑂𑐫𑐵𑐫𑑂𑐎𑐾 𑐩𑐏𑑄𑐥𑐶𑑄𑐳𑑄 𑐳𑐶𑐠𑐶 𑐣𑐏𑑅 𑐎𑐸𑐣𑑂𑐴𑐸 𑐰𑐣𑐵 𑐥𑐸𑐖𑐵𑐫𑐵𑐃 𑑋 𑐣𑑂𑐴𑐹𑐩𑑂𑐴 𑐨𑑁𑐩𑐔𑐵 𑐰 𑐣𑑅𑐮𑐶 𑐩𑐔𑐵𑐟𑐫𑑂𑐟 𑐡𑐶𑐐𑐸 𑐡𑑂𑐫𑑅𑐫𑐵𑐠𑐵𑐫𑑂 𑐫𑑄𑐎𑐵 𑐎𑐶𑐳𑐮𑐷 𑐟𑐫𑐵 𑐡𑑂𑐫𑑅 𑐨𑐵𑐐𑑂𑐫𑐵𑐎𑐵 𑐟𑐶𑐣𑐷 𑐥𑐸𑐰𑑄𑐩𑑂𑐴 𑐥𑐬𑐶𑐰𑐵𑐬 𑐢𑐵𑐂𑐐𑐸 𑐔𑐮𑐣 𑐡𑐸 𑑋
𑐫𑐾𑑃 𑐔𑑂𑐰𑐥𑐶𑐣𑐷 𑐔𑐵𑐰𑐴𑐶, 𑐫𑐮𑐫𑑂 𑐔𑑂𑐰𑑄𑐥𑐶𑐣𑐷 𑐴𑐬𑐶𑐴𑐬 𑐨𑐰𑐣, 𑐠𑐵𑐥𑐵𑐠𑐮𑐷, 𑐏𑑂𑐰𑐥𑐫𑑂 𑐔𑑂𑐰𑑄𑐥𑐶𑐣𑐷 𑐳𑐶𑐡𑑂𑐢 𑐥𑐸𑐏𑐹 (𑐳𑐶𑐡𑑂𑐢𑐥𑑀𑐏𑐬𑐷) 𑐠𑐶𑐩𑐶 𑐔𑑂𑐰𑑄𑐥𑐶𑐣𑐷 𑐐𑐛𑑂𑐛𑐵𑐑𑐬 𑐁𑐡𑐶 𑐠𑐵𑐳𑐫𑑂 𑐡𑐶𑐐𑐸𑐡𑑂𑐫𑑅 𑐳𑑂𑐠𑐵𑐥𑐣𑐵 𑐫𑐵𑐣𑐵 𑐟𑑅𑐐𑐸 𑐡𑐸 𑑋 𑐣𑐎𑑂𑐰𑐵𑑅𑐡𑐾𑐮𑐾 𑐔𑑂𑐰𑑄𑐥𑐶𑐣𑐷 𑐡𑐾𑐰𑐷𑐑𑐵𑐚𑐫𑑂 𑐡𑐶𑐐𑐸 𑐥𑐸𑐖𑐵 𑐣𑑂𑐫𑐵𑐫𑐾𑐎𑐷𑐐𑐸 𑐏𑑅 𑑋 𑐥𑐬𑐩𑑂𑐥𑐬𑐵𑐐𑐟 𑐎𑐠𑑄 𑐥𑐮𑐶𑐳𑑂𑐠𑐵𑐫𑐵𑐣𑐵 𑐟𑑅𑐥𑐶 𑐡𑐶𑐐𑐸𑐡𑑂𑐫𑑅 𑐣𑑄 𑐩𑐕𑐶𑑄𑐐𑐸 𑐥𑐬𑐶𑐳𑑂𑐠𑐶𑐟𑐷𑐂 𑐰𑐫𑐵 𑐐𑐸𑐩𑑂𑐴𑐾 𑐐𑐸𑐩𑑂𑐴𑐾 𑐳𑐶𑐫𑐵𑑄 𑐠𑑅𑐫𑐵𑐟 𑐕𑐶𑑄 𑐎𑐠𑑄 𑐡𑐶𑐐𑐸𑐡𑑂𑐫𑑅 𑐳𑐵𑐮𑐵 𑐴𑐫𑐵 𑐳𑑂𑐠𑐵𑐣𑐵𑐣𑑂𑐟𑐬 𑐫𑐵𑐣𑐵 𑐟𑑅𑐐𑐸 𑐣𑑄 𑐡𑐸 𑑋

𑑘. 𑐔𑐶𑐟𑑂𑐬𑐎𑐵𑐬 (𑐥𑐸𑑄) 𑐟𑐾𑐫𑑂𑐳𑑄 𑐴𑐣𑐷𑐐𑐸 𑐠𑐷 𑐠𑐷 𑐣𑐏𑑅 𑐔𑐏𑑅

𑐔𑐶𑐟𑑂𑐬𑐎𑐵𑐬 (𑐥𑐸𑑄) 𑐟𑐫𑑂𑐳𑑄 𑐠𑐷𑐠𑐷 𑐣𑐏𑑅𑐔𑐏𑑅 𑐴𑐣𑐾𑐐𑐸 𑐫𑐵𑐣𑐵 𑐰𑐂 𑐔𑑂𑐰𑑄𑐐𑐸 𑐡𑐸 𑑋 𑐣𑐏𑑅 𑐟 𑐩𑐵𑐣𑐾 𑐫𑐵𑐫𑐾𑐐𑐸 𑐎𑐵𑐬𑐞, 𑐟𑐬𑐶𑐎𑐵, 𑐦𑐸𑐎𑑄 𑐠𑐣 𑐣𑑂𑐴𑑂𑐫𑐠𑐣𑐾𑐐𑐸 𑐁𑐰𑐱𑑂𑐫𑐎 𑐩𑐟𑐵𑐫𑐵 𑑋 𑐧𑐬𑐸 𑐠𑐶𑐠𑐶 𑐣𑐏𑑅𑐟 𑐣𑐵𑐥𑑄 𑐔𑐶𑐟𑑂𑐬𑐎𑐵𑐬 (𑐥𑐸.) 𑐟𑐫𑑂𑐐𑐸 𑐮𑐖𑐐𑐵 𑐣𑐵𑐥 𑐳𑑂𑐰𑐵𑐥𑐸 𑐡𑐸𑐐𑐸 𑐰 𑐳𑐎𑐮 𑐖𑐵𑐟𑐷𑐫𑐵 𑐣𑐏𑑅𑐔𑐏𑑅 𑐴𑐣𑐾𑐟 𑐐𑐸𑐎𑐠𑑄 𑐥𑐸𑑄𑐟 𑐣𑐵𑐥 𑐳𑑂𑐰𑐵𑐥𑐹 𑐡𑐸 𑐢𑐿𑐐𑐸 𑐏𑑄 𑐣𑑂𑐴𑑂𑐫𑐾𑐠𑐣𑐾 𑐧𑐴𑑅𑐖𑐹

𑑑. 𑐐𑐠𑐵𑐩𑐸𑐐 𑐔𑐬𑑂𑐴𑐾:-
𑐱𑑂𑐬𑐷𑐎𑐺𑐲𑑂𑐞 𑐔𑐬𑑂𑐴𑐾 𑐎𑐸𑐣𑑂𑐴𑐸 𑐨𑐹𑐟 𑐥𑐶𑐟𑐣𑐾𑐐𑐸 𑐖𑑂𑐫𑐵 𑐫𑐵𑐣𑐵 𑐳𑐩𑐫𑑂 𑐣𑐰𑐵𑑅 𑐣𑐏𑑅 𑐣𑑂𑐫𑐵𑐫𑐾𑐎𑐾𑐐𑐸 𑐐𑐠𑐵𑑄 𑐩𑐸𑐐𑑅 𑐣𑐏𑑅𑐫𑐵 𑐰𑐶𑐱𑐾𑐲𑐟𑐵 𑐏𑑅 𑑋 𑐠𑐸𑐎𑐸𑐣𑑂𑐴𑐹 𑐐𑐠𑐵𑐩𑐸𑐐𑐮𑐫𑑂 𑐟𑐶𑐎𑐾𑐩𑐵𑑅𑐐𑐸 𑐨𑐹𑐟 (𑐑𑐞𑑂𑐚𑐵𑐎𑐬𑑂𑐞) 𑐬𑐵𑐎𑑂𑐲𑐳 𑐫𑐵 𑐏𑑂𑐰𑐵𑐥𑐵 𑐔𑑂𑐰𑐫𑐵 𑐩𑐷𑐐𑐸 𑐔𑐮𑐣 𑐡𑐸 𑑋

𑑒. 𑐣𑐵𑐐 𑐥𑑄𑐔𑐩𑐷:-
𑐱𑑂𑐬𑐵𑐰𑐞 𑐱𑐸𑐎𑑂𑐮 𑐥𑐘𑑂𑐔𑐩𑐷 𑐎𑐸𑐣𑑂𑐴𑐸 𑐨𑑀𑑄𑐟𑐫𑑂 𑐔𑑂𑐰𑐫𑐵 𑐟𑑅𑐩𑑂𑐴 𑐣𑐵𑐐 𑐫𑐵𑐟 𑐠𑑅𑐠𑑅𑐐𑐸 𑐩𑐹𑐮𑐸𑐏𑐵𑐫𑐵 𑐦𑐸𑐳𑐫𑑂 𑐐𑑀𑐰𑐬𑑄 𑐟𑐶𑐎𑐵 𑐥𑐸𑐖𑐵 𑐫𑐵𑐂 𑑋 𑐔𑐶𑐟𑑂𑐬𑐎𑐵𑐬 (𑐥𑐸𑑄) 𑐟𑐫𑑂𑐳𑑄 𑐠𑑅𑐐𑐸 𑐮𑐖𑐐𑐵 𑐎𑐠𑑄 𑐨𑑀𑐟𑐫𑑂 𑐣𑐵𑐐 𑐔𑑂𑐰𑐫𑐵 𑐩𑐷𑐐𑐸 𑐔𑐮𑐣 𑐡𑐸 𑑋

𑑓. 𑐐𑐸𑑄𑐥𑐸𑐣𑑂𑐴𑐷:-
𑐐𑐸𑑄𑐮𑐵𑐠𑑂𑐰 𑐡𑑂𑐰𑐵𑐡𑐱𑐷 𑐎𑐸𑐣𑑂𑐴𑐸 𑐣𑐶𑐳𑐾𑑄 𑐠𑑂𑐰 𑐣𑐏𑑅 𑐐𑐸𑐣𑑂𑐴𑐸 𑐟𑐎 𑐣𑑂𑐫𑐵𑐫𑐾𑐎𑐷 𑑋 𑐣𑑂𑐴𑐵𑐥𑐵𑑄𑐐𑐸 𑐡𑐶𑐣 𑐎𑐸𑐣𑑂𑐴𑐸 𑐐𑐸𑐟𑐵 𑐎𑐶𑐳𑐶𑐩𑐫𑐵 𑐰𑐷𑐧, 𑐨𑐹𑐟𑐶, 𑐥𑑅𑐩𑐵𑐫𑑂, 𑐩𑐵𑐫𑑂, 𑐩𑐸𑐳𑑂𑐫𑐵, 𑐐𑑂𑐰𑑅𑐐𑐸, 𑐩𑐵𑐫𑑂, 𑐐𑑂𑐰𑑅𑐐𑐸 𑐳𑐶𑐩𑑂𑐥𑐸, 𑐩𑐳𑑂𑐫𑐵𑑄, 𑐔𑐣𑐵, 𑐔𑐶𑐐𑑂𑐰𑑅 𑐎𑐫𑑂𑐐𑐸 𑐁𑐡𑐶 𑐡𑐵𑐫𑐾𑐎𑐵𑑅 𑐎𑑂𑐰𑐵𑐟𑐷 𑐟𑑂𑐰𑐣𑐷 𑑋 𑐠𑑂𑐰 𑐎𑐸𑐣𑑂𑐴𑐸 𑐳𑑂𑐰𑐫𑐩𑑂𑐨𑐸𑐂 𑐰𑐣𑐾𑐐𑐸, 𑐰𑐵𑐴𑐵𑑅𑐰𑐴𑐷 𑐔𑐵𑐴𑑂𑐫𑐹 𑐰𑐣𑐾𑐐𑐸 𑐫𑐵 𑑋 𑐐𑐸𑑄 𑐥𑐸𑐣𑑂𑐴𑐶𑐧𑐮𑐫𑑂 𑐐𑐸𑐎𑑅𑐟𑐎 𑐣𑐫𑐵𑑅 𑐐𑐸𑐖𑐸, 𑐰𑐳𑑅 𑐟 𑐴𑐶𑐮𑐵 𑐰𑐸𑐮𑐵 𑐫𑐵𑐣𑐵𑑅 𑐥𑐸𑐣𑐷𑐐𑐸 𑐠𑑂𑐰 𑐣𑐏𑑅𑐫𑐵 𑐰𑐶𑐱𑐾𑐲𑐟𑐵 𑐏𑑅 𑑋

𑑔. 𑐳𑐵𑐥𑐵𑐬𑐸:-
𑐠𑑂𑐰 𑐡𑐶𑑄𑐏𑐸𑐣𑑂𑐴𑐸 𑐳𑐵𑐫𑐵𑑅 𑐕𑑂𑐰𑐫𑐾𑐩𑐵𑑅𑐐𑐸 𑐰 𑐧𑐴𑐷 𑐡𑑂𑐫𑑀 𑐳𑑂𑐰𑐫𑐾𑐐𑐸 𑐔𑐮𑐣 𑐡𑐸 𑑋 𑐳𑐵𑐫𑐵𑑅 𑐕𑐰𑑂𑐫𑐾𑐟 𑐩𑐵𑑅𑐐𑐸 𑐳𑐵𑐫𑐵𑐐𑐸 𑐏𑑂𑐰𑐵𑑅𑐥𑐵𑑅 𑐔𑐶𑐟𑑂𑐬𑐎𑐵𑐬 (𑐥𑐸𑑄) 𑐟𑐫𑑂𑐳𑑄 𑐔𑑂𑐰𑐂𑐐𑐸 𑐏𑑅 𑑋
𑐫𑐮𑐫𑑂 𑐳𑐵𑐫𑐵𑑅 𑐰𑐣𑐶𑐥𑐶𑑄 𑐳𑐎𑐮𑐾𑑄 𑐩𑑄𑐐𑐮 𑐰𑐖𑐵𑐬𑐫𑑂 𑐩𑐸𑐣𑐵𑑅 𑐕𑐎𑐮𑑄 𑐣𑐵𑐥𑑄 𑐰𑐣𑐷 𑑋 𑐏𑑂𑐰𑐥𑐫𑑂 𑐣𑑄 𑐳𑐎𑐮𑐾𑑄 𑐩𑐸𑐣𑐵 𑐡𑐾𑐱𑐫 𑐡𑐸𑐐𑐸 𑐰𑐵𑐖𑐵𑐐𑐵𑐖𑐵 𑐳𑐴𑐶𑐟 𑐣𑑄 𑐰𑐣𑐷 𑑋 𑐟𑐬 𑐣𑑂𑐴𑑂𑐫𑐵𑐥𑑄 𑐎𑐠𑐶𑐫𑐵 𑐏𑑅𑐔𑐵 𑐡𑐫𑐾𑐎𑐵 𑐡𑐶𑐰𑑄𑐐𑐟𑐫𑐵 𑐎𑐶𑐥𑐵 𑐑𑐵𑐣𑐵 “𑐑𑐶𑐣𑑂𑐟𑐵 𑐎𑐶𑐳𑐷 𑐟𑑂𑐰𑐵𑐎𑑂” 𑐢𑐂𑐐𑐸 𑐰𑐵𑐖𑑄 𑐠𑐵𑐣𑐵 𑐰𑐂𑐐𑐸 𑐏𑑂𑐰𑐥 𑐡𑐾 𑐫𑐵 𑐔𑐮𑐣 𑐏𑑅 𑑋

𑑕. 𑐥𑐘𑑂𑐖𑐬𑐵𑑄 (𑐥𑐘𑑂𑐔𑐡𑐵𑐣) 𑐰𑐷𑐐𑐸 𑐔𑐮𑐣:-
𑐳𑑂𑐰𑐣𑐶𑐐𑐮𑐾 𑐡𑐸𑐣𑐾 𑐫𑐾𑑃 𑐰 𑐏𑑂𑐰𑐥𑐫𑑂 𑐐𑐸𑑄𑐮𑐵𑐐𑐵 𑐟𑑂𑐬𑐶𑐫𑑀𑐡𑐱𑐷 𑐎𑐸𑐣𑑂𑐴𑐸 𑐰 𑐐𑐸𑐮𑐵𑐠𑑂𑐰 𑐀𑐲𑑂𑐚𑐩𑐶 𑐥𑑄𑐔𑐡𑐵𑐣 𑐡𑐶𑑄𑐏𑐸𑐣𑑂𑐴𑐸 𑐫𑐾𑐮 𑐠𑐷 𑐠𑐷 𑐡𑑂𑐫𑑀𑐟 𑐧𑑂𑐰𑐫𑐵 𑐥𑐸𑑄𑐟𑐫𑑂𑐳𑑄 𑐥𑑄𑐔𑐡𑐵𑐣 𑐰𑐷𑐐𑐸 𑐔𑐮𑐣 𑐣𑑂𑐴𑐫𑐵𑐎𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐥𑐘𑑂𑐔𑐡𑐵𑐣𑐫𑐵 𑐕𑐣𑑂𑐴𑐸 𑐣𑐴𑑂𑐫𑑅 𑐕𑐾𑑃 𑐕𑐏𑐵𑑄 𑐣𑐷 𑐳𑐷 𑐫𑐵𑐣𑐵𑑅 𑐡𑑂𑐫𑑅𑐧𑑂𑐰𑐂 𑑋

𑑖. 𑐰𑑁𑐫𑐵 𑐏𑑂𑐰𑐵𑑅 𑐳𑑂𑐰𑐫𑐾𑐐𑐸:-
𑐐𑐸𑑄𑐮𑐵𑐐𑐵𑑅 𑐍𑑄𑐳𑐷𑐎𑐸𑐣𑑂𑐴𑐸 𑐎𑐵𑐫𑑂 𑐩𑑂𑐴𑑂𑐫𑐵𑐫𑑂 𑐥𑐶𑐳𑑄 𑐰𑑁𑐫𑐵𑐟 𑐴𑐬𑑂𑐲𑐥𑐹𑐬𑑂𑐰𑐎 𑐩𑐵𑐣𑐾 𑐫𑐵𑐣𑐵, 𑐱𑑂𑐬𑐡𑑂𑐢𑐵𑐥𑐹𑐬𑑂𑐰𑐎 𑐂𑐔𑑂𑐕𑐵 𑐡𑐸𑐐𑐸 𑐣𑐎𑐾 𑐟𑑂𑐰𑑄𑐎𑐾 𑐫𑐵𑐣𑐵 𑐧𑑁𑐩𑑂𑐴𑑄 𑐠𑑅 𑐎𑐵𑐫𑑂 𑐩𑑂𑐴𑑂𑐫𑐵𑐫𑑂𑐥𑐶𑐣𑑂𑐟 𑐁𑐱𑐷𑐬𑑂𑐰𑐵𑐡 𑐰𑐶𑐂 𑑋 𑐧𑑁𑐩𑑂𑐴 𑐥𑐬𑐮𑑀𑐎 𑐖𑐸𑐂 𑐢𑐸𑑄𑐎𑐹𑐳𑐵 𑐡𑐶𑐰𑑄𑐐𑐟 𑐰𑑁𑐫𑐵 𑐣𑐵𑐩𑑄 𑐐𑑀𑐎𑐬𑑂𑐞 𑐟𑐷𑐬𑑂𑐠𑐫𑑂 𑐰𑐣𑐵 𑐳𑑂𑐣𑐵𑐣, 𑐡𑐵𑐣, 𑐣𑐶𑐳𑑂𑐮𑐵 𑐰𑐷𑐂𑐐𑐸 𑐫𑐵𑐂 𑑋

𑑗. 𑐥𑐵𑐬𑐸𑐨𑑂𑐰𑐫𑑂:–
𑐘𑐮𑐵 𑐠𑑂𑐰 𑐥𑑂𑐬𑐟𑐶𑐥𑐡𑐵 𑐀𑐬𑑂𑐠𑐵𑐟 𑐨𑐵𑐡𑑂𑐬 𑐱𑐸𑐎𑑂𑐮 𑐥𑐬𑐾𑐰𑐵𑐫𑐵𑐟 𑐐𑐸𑑄𑐮𑐵 𑐢𑐬𑑂𑐩 𑐎𑑂𑐰𑐔𑐵𑑅𑐐𑐸 𑐡𑐶𑐣𑐫𑑂 𑐖𑐸𑐂 𑑋 𑐮𑐔𑑂𑐕𑐶𑐫𑑄𑐎 𑐳𑑂𑐰𑐫𑐩𑑂𑐨𑐹 𑐩𑐴𑐵𑐔𑐿𑐟𑑂𑐫𑐫𑐵 𑐳𑐾𑐰𑐵 𑐫𑐵𑐣𑐵 𑐔𑑂𑐰𑑄𑐥𑐶𑑄 𑐐𑐸𑑄𑐮𑐵 𑐰𑐵𑐖𑑄 𑐏𑐮𑑅𑐟, 𑐡𑐵𑐦𑐵 𑐏𑑅𑐮𑐟 𑐰 𑐩𑐾𑐩𑐾𑐥𑐶𑑄, 𑐨𑐐𑐰𑐵𑐣 𑐧𑐸𑐡𑑂𑐢𑐫𑐵𑐟 𑐥𑐸𑐖𑐵 𑐫𑐵𑐣𑐵𑑅 𑐥𑐵𑐬𑐸𑐨𑑂𑐰𑐫𑑂 𑐣𑐂𑐐𑐸 𑐥𑐬𑐩𑑂𑐥𑐬𑐵 𑐡𑐸 𑑋 𑐠𑐸𑐎𑐠𑑄 𑐐𑐸𑑄𑐮𑐵 𑐮𑐔𑑂𑐕𑐶𑐫𑐵 𑐡𑐸𑐣𑐾 𑐧𑐸𑐡𑑂𑐢 𑐰𑑀𑐢𑐶𑐳𑐟𑑂𑐰 𑐥𑐶𑐣𑐷𑐐𑐸 𑐩𑐴𑐶𑐩𑐵 𑐳𑑂𑐟𑑀𑐟𑑂𑐬 𑐟𑐸𑐟𑑅 𑐣𑐵𑐩 𑐳𑑄𑐐𑐷𑐟𑐶 𑐁𑐡𑐶 𑐥𑐵𑐛 𑐫𑐵𑐣𑐵𑑅 𑐢𑐵𑐬𑑂𑐩𑐶𑐎 𑐳𑑄𑐳𑑂𑐎𑐵𑐬 𑐣𑑂𑐴𑑂𑐫𑐵𑐎𑐵 𑐔𑑂𑐰𑑄𑐐𑐸 𑐔𑐶𑐟𑑂𑐬𑐎𑐵𑐬 (𑐥𑐸𑑄) 𑐟𑐫𑑂𑐐𑐸 𑐣𑑄 𑐐𑐸𑐮𑐵 𑐢𑐬𑑂𑐩 𑐏𑑅 𑑋

𑑘. 𑐔𑐠𑐵𑑅 –
𑐨𑐵𑐡𑑂𑐬 𑐱𑐸𑐎𑑂𑐮 𑐔𑑁𑐠𑐷𑐎𑐸𑐣𑑂𑐴𑐸 𑐳𑑂𑐰𑐣𑐶𑐐𑐮𑐫𑑂 𑐔𑑂𑐰𑑄𑐥𑐶𑑄 𑐣𑐾𑐰𑐵𑐟𑐫𑑂𑐳𑑄 𑐰𑐴𑐣𑐷 𑐟𑐶𑐩𑐷𑐮𑐵𑐫𑐵 𑐥𑐸𑐖𑐵 𑐫𑐵𑐂 𑑋 𑐠𑐸𑐰𑐮𑐾 𑐣𑑂𑐴𑐹𑐐𑐸 𑐀𑐣𑑂𑐣, 𑐦𑐮𑐦𑐸𑐮 𑐟𑐸𑐩𑐵, 𑐥𑐵𑐮𑐸𑐩𑐵, 𑐕𑐸𑐳𑑂𑐫𑐵 𑐩𑐸𑐳𑑂𑐫𑐵, 𑐰𑐬𑐵𑑄, 𑐁𑐡𑐶 𑐰 𑐩𑐬𑐷𑐔𑐬𑐷 𑐕𑐵𑐣𑐵 𑐔𑐠𑐵 𑐡𑑂𑐫𑑅 (𑐐𑐞𑐾𑐡𑑂𑐫) 𑐢𑐎𑐵𑑅 𑐟𑐶𑐩𑐷𑐮𑐵𑐫𑐵𑐟 𑐥𑐸𑐖𑐵 𑐫𑐵𑐣𑐵 𑐨𑑂𑐰𑐫𑑂 𑐣𑐫𑐾𑐐𑐸 𑐔𑐮𑐣 𑐡𑐸 𑑋

𑑙. 𑐫𑐾𑑃𑐫𑐵 𑐥𑐸𑐣𑑂𑐴𑐶:–
𑐠𑐸𑐎𑐸𑐣𑑂𑐴𑐸 𑐕𑐾𑑃 𑐕𑐾𑑃 𑐡𑐮𑐸𑐔𑐵 𑐔𑑂𑐫𑐵𑐎𑐵𑑅 𑐫𑑄𑐩𑐵 𑐡𑑂𑐫𑑅 𑐥𑐸𑐖𑑂𑐫𑐵𑐣𑐵 𑐳𑐩𑐫𑑂 𑐣𑐏𑑅 𑐣𑑂𑐫𑐵𑐫𑐾𑐎𑐷 𑑋

𑑑𑑐. 𑐩𑑀𑐴𑐣𑐶:–
𑐠𑑂𑐰 𑐣𑐏𑑅𑐫𑐵 𑐡𑐎𑐮𑐾 𑐣𑑂𑐴𑐵𑐥𑐵𑐎𑐸𑐣𑑂𑐴𑐸 (𑐁𑐱𑑂𑐰𑐶𑐣 𑐱𑐸𑐎𑑂𑐮 𑐥𑑂𑐬𑐟𑐶𑐥𑐡𑐵) 𑐣𑑅𑐮𑐵 𑐳𑑂𑐰𑐣𑐾𑐐𑐸 (𑐑𑐚𑐳𑑂𑐠𑐵𑐥𑐣𑐵) 𑐖𑐸𑐂 𑑋 𑐩𑐴𑐵𑐀𑐲𑑂𑐚𑐩𑐷 𑐎𑐸𑐣𑑂𑐴𑐸 𑐳𑐎𑐮 𑐦𑐸𑐎𑐷 𑐡𑐵𑐖𑐸𑐎𑐶𑐖𑐵𑐥𑐶𑑄 𑐩𑐸𑐣𑐵𑑅 𑐠𑑅𑐠𑑅𑐐𑐸 𑐕𑐾𑑃𑐫𑑂 𑐡𑐸𑐐𑐸 𑐱𑐳𑑂𑐟𑑂𑐬, 𑐖𑐵𑐎𑐶 𑐰𑐵 𑐳𑐦𑐹 𑐢𑑅 𑐟𑐵𑐮𑑂𑐖𑐸 𑐖𑑂𑐫𑐵𑐨𑑅 𑐁𑐡𑐶 𑐳𑑂𑐰𑐣𑐵𑑅 𑐩𑑀𑐴𑐣𑐷 𑐥𑐸𑐖𑐵 𑐫𑐵𑐂 𑑋 𑐔𑐶𑐟𑑂𑐬𑐎𑐵𑑋𑐬 (𑐥𑐸𑑄) 𑐟𑐫𑑂 𑐔𑑂𑐰𑐖𑑂𑐫𑐵𑐫𑐵 𑐮𑐖𑐐𑐵 𑐫𑐵𑐣𑐵 𑐔𑑂𑐰𑑄𑐥𑐶𑐣𑐷 𑐨𑐐𑐰𑐟𑐶 𑐡𑑂𑐫𑑀𑑅 𑐩𑐷𑐐𑐸𑐫𑐵 𑐮𑐵𑐐𑐶 𑐟𑐣𑑂𑐴𑐹 𑐣𑑂𑐴𑐫𑑅 𑐣𑐶𑐳𑐾𑑄 𑐡𑐸𑐬𑑂𑐐𑐵 𑐨𑐰𑐵𑐣𑐷 𑐡𑑂𑐫𑑀 𑐔𑑂𑐰𑐫𑐐𑐸 𑐫𑐵𑐣𑐵 𑐔𑑂𑐰𑐣𑐷 𑑋 𑐳𑑂𑐰𑐣𑐾𑐩𑐵𑑅𑐐𑐸 𑐴𑐮𑑄𑐔𑑂𑐰𑐮𑑄𑐮𑐾 𑐥𑐸𑐖𑐵 𑐫𑐵𑐫𑐾 𑐣𑑂𑐴𑑂𑐫𑑀 𑐡𑑂𑐫𑑀𑐟𑐫𑑂𑐐𑐸 𑐩𑐶𑐏𑐵 𑐔𑑂𑐰𑐫𑑂𑐐𑐸 𑐥𑑂𑐬𑐟𑐶𑐎 𑐔𑐶𑐟𑑂𑐬𑐮𑐵𑐴𑐵 (𑐔𑐶𑐟𑑂𑐮𑐵) 𑐔𑑂𑐰𑐫𑐵 𑐟𑐶𑐎𑐾𑐩𑐵𑑅 𑑋 𑐠𑑂𑐰 𑐔𑐶𑐟𑑂𑐮𑐵 𑐟𑐶𑐎𑐾𑐐𑐸 𑐔𑐮𑐣 𑐩𑐾𑐩𑐾𑐐𑐸 𑐖𑐵𑐟 𑐥𑐶𑐣𑐷 𑐣𑑄 𑐫𑐵 𑑋 𑐩𑐴𑐵𑐣𑐰𑐩𑐷 𑐎𑐸𑐣𑑂𑐴𑐸 𑐠𑐵𑐫 𑐠𑐵𑐳𑐾 𑐔𑑂𑐰𑑄𑐥𑐶 𑐡𑑂𑐫𑑀 𑐟 𑐥𑐶𑐛, 𑐕𑐾𑑄𑐏𑐵𑐫𑑂 𑐔𑑂𑐰𑑄𑐥𑐶 𑐡𑑂𑐫𑑀 𑐟𑐫𑑂𑐟 𑐥𑐹𑐖𑐵 𑐥𑐵𑐛 𑐫𑐵𑐣𑐵 𑐥𑐱𑐸 𑐥𑑄𑐕𑐶 𑐨𑑀𑐐 𑐰𑐶𑐫𑐵 𑐰𑐴𑐣𑐷 𑐳𑐷 𑐎𑐫𑐵𑑅 𑐩𑐹 𑐨𑑂𑐰𑐫 𑐣𑐂 𑑋 𑐰𑐶𑐖𑐫𑐵 𑐡𑐱𑐩𑐷 𑐎𑐸𑐣𑑂𑐴𑐸 𑐳𑑂𑐰𑐵𑑄 𑐎𑑀𑐎𑐫𑐵 𑐩𑑀𑐴𑐣𑐷 𑐣𑐏𑑅 𑐳𑐶𑐢𑐫𑐾𑐎𑐷 𑑋

𑑑𑑑. 𑐳𑑂𑐰𑐣𑑂𑐟𑐶:–
𑐠𑑂𑐰 𑐣𑐏𑑅𑐫𑐵 𑐣𑑂𑐴𑐵𑐥𑐵𑑄𑐐𑐸 𑐡𑐶𑐣 𑐁𑐱𑑂𑐰𑐶𑐣 𑐎𑐺𑐲𑑂𑐞 𑐟𑑂𑐬𑐫𑑀𑐡𑐱𑐷 𑐎𑐸𑐣𑑂𑐴𑐸𑐮𑐵𑑅 𑑋 𑐣𑑂𑐴𑐵𑐥𑐵𑑄𑐐𑐸 𑐡𑐶𑐣 𑐏𑐶𑐔𑐵 𑐥𑐸𑐖𑐵, 𑐀𑐮𑐾 𑐎𑑀𑑅 𑐥𑐸𑐖𑐵 𑐢𑐎𑐵 𑐳𑐵𑐥𑐸𑐖𑐵 𑐰 𑐮𑐎𑑂𑐲𑑂𑐩𑐷 𑐥𑐸𑐖𑐵 𑐁𑐱𑑂𑐰𑐶𑐣 𑐎𑐺𑐲𑑂𑐞 𑐍𑐳𑐷 𑐎𑐸𑐣𑑂𑐴𑐸 𑐮𑐵𑑅 𑑋 𑐠𑑂𑐰 𑐣𑐏𑑅𑐫𑐵𑐟 𑐫𑐩 𑐥𑐘𑑂𑐔𑐎 𑐢𑐎𑐵 𑐣𑑄 𑐢𑐵𑐃 𑑋 𑐮𑐎𑑂𑐲𑑂𑐩𑐷 𑐥𑐸𑐖𑐵 𑐎𑐣𑑂𑐴𑐾 𑐎𑐸𑐣𑑂𑐴𑐸 𑐳𑐸𑐔𑐸𑐥𑐵𑐔𑐸 𑐳𑐦𑐵 𑐫𑐵𑐣𑐵 𑐰𑐴𑐣𑐷 𑐩𑑂𑐴 𑐥𑐸𑐖𑐵 𑐫𑐵𑐃 𑑋 𑐎𑐵𑐬𑑂𑐟𑐶𑐎 𑐱𑐸𑐎𑑂𑐮 𑐡𑑂𑐢𑐶𑐟𑐷𑐫𑐵 𑐎𑐸𑐣𑑂𑐴𑐸 𑐎𑐶𑐖𑐵 𑐥𑐸𑐖𑐵 𑐫𑐵𑐂 𑑋 𑐔𑐶𑐟𑑂𑐬𑐎𑐵𑐬 (𑐥𑐸𑑄) 𑐟𑐫𑑂 𑐠𑐸𑐰𑐮𑐾 𑐧𑐵𑑃 𑐧𑐵𑑃 𑐮𑐵𑐎𑑂𑐎 𑐮𑐎𑑂𑐲𑑂𑐩𑐷 𑐡𑑂𑐫𑑀 𑐔𑑂𑐰𑐫𑐵 𑐩𑐶𑐂𑐐𑐸 𑐏𑑅 𑑋

𑑑𑑒. 𑐫𑑅𑐩𑐬𑐶 𑐥𑐸𑐣𑑂𑐴𑐶:–
𑐠𑑂𑐰 𑐣𑐏𑑅 𑐩𑐵𑐬𑑂𑐐 𑐱𑐸𑐎𑑂𑐮 𑐥𑐸𑐣𑑂𑐴𑐶 𑐎𑐸𑐣𑑂𑐴𑐸 𑐣𑑂𑐴𑐹𑐐𑐸 𑐖𑐵𑐎𑐶 𑐔𑐸𑑄𑐫𑐵𑐟 𑐣𑑂𑐴𑐵𑐫𑐵, 𑐰𑐶𑐱𑐾𑐲 𑐥𑑂𑐬𑐎𑐵𑐬𑐫𑐵 𑐫𑑀𑐩𑐬𑐶𑐫𑐵 𑐡𑐸𑐣𑐾 𑐴𑐵𑐩𑑀 𑐔𑐵𑐎𑐸 𑐮𑑂𑐰𑐵𑐎𑐕𑑂𑐫𑐵𑐣𑐵 𑐟𑐫𑐵 𑐡𑐫𑐾𑐎𑐷 𑑋 𑐠𑑅 𑐂𑐲𑑂𑐚 𑐩𑐶𑐟𑑂𑐬 𑐥𑐶𑐣𑑂𑐟 𑐫𑑀𑐩𑐬𑐷 𑐂𑐣𑐷𑐐𑐸 𑐣𑑄 𑐔𑐮𑐣 𑐡𑐸 𑑋 𑐣𑑂𑐴𑐹𑐐𑐸 𑐰𑐵 𑐥𑐶𑐔𑐵𑐫𑑂 𑐟𑐫𑐵 𑐄𑐎𑐶𑐫𑐵 𑐡𑑂𑐫𑑅𑐣𑐾 𑐫𑑀𑐩𑐬𑐷 𑐟𑐠𑐵 𑐢𑐸𑐎𑐸𑐚𑐷 𑐳𑑂𑐰𑐣𑐶𑐐𑐸 𑐰 𑐥𑐾𑐣𑑂𑐴𑐸 𑐡𑐫𑐎𑐵 𑐫𑑀𑐩𑐬𑐷 𑐥𑐸𑐖𑐵 𑐫𑐵𑐣𑐵 𑐎𑑂𑐰𑐎𑐵𑐂𑐐𑐸 𑐔𑐮𑐣 𑐡𑐸 𑑋 𑐠𑐸𑐎𑐶𑐫𑐵 𑐥𑑂𑐬𑐨𑐵𑐰𑑄 𑐢𑐣𑐳𑐩𑑂𑐥𑐟𑐶 𑐰 𑐀𑐣𑑂𑐣 𑐰𑐺𑐡𑑂𑐢𑐶 𑐖𑑂𑐰𑐷 𑐢𑐂𑐐𑐸 𑐢𑐵𑐥𑐹 𑐡𑐸 𑑋

𑑑𑑓. 𑐑𑑂𑐫𑑅 𑐔𑐵𑐎𑐸 𑐳𑑄𑐮𑑂𑐴𑐸:–
𑐠𑑂𑐰 𑐣𑐏𑑅𑐫𑐵𑐟 𑐴𑐵𑐩𑑂𑐰𑑅 𑐳𑑄𑐮𑑂𑐴𑐸 𑐣𑑄 𑐢𑐵𑐃 𑑋 𑐩𑐵𑐑𑐫𑐵 𑐳𑑄𑐮𑑂𑐴𑐹 𑐎𑐸𑐣𑑂𑐴𑐸 𑐠𑑅 𑐠𑑅 𑐥𑐸𑐬𑑀𑐴𑐶𑐟𑐥𑐶𑑄𑐟 𑐑𑑂𑐫𑑅 𑐔𑐵𑐎𑐸 𑐟𑐫𑐵𑑅 𑐳𑐶𑐢𑐵 𑐡𑐵𑐣 𑐫𑐵𑐂 𑑋 𑐳𑐎𑐮𑐾𑑄 𑐩𑐸𑐣𑐵𑑅 𑐮𑐳𑐟𑐵𑑄 𑐳𑐵 𑐳𑐵𑐐𑐸 𑐣𑐳𑐵𑐟𑑂𑐰𑑄𑐳𑐵 𑐣𑐵𑐥𑑄 𑐟¥𑐴𑐸𑑄 𑐥𑐵𑐮𑐸 𑐥𑐸𑐎𑐵𑑅 𑐑𑑂𑐫𑑅 𑐔𑐵𑐎𑐸 𑐰 𑐴𑐵𑐩𑑂𑐰𑑅 𑐫𑐵𑐐𑐸 𑐟𑑁𑐮𑐵 𑐣𑑄 𑐟𑐫𑐵 𑐣𑐂 𑑋 𑐩𑐵𑑄𑐥𑐶𑐳𑑄 𑐠𑑂𑐰𑐏𑐸𑐣𑑂𑐴𑐸 𑐠𑑅 𑐩𑐔𑐵𑐏𑐵𑐔𑐵 𑐟𑐫𑑂𑐟 𑐕𑑂𑐫𑐾𑐣𑐫𑑂 𑐩𑐵𑐫𑑂 𑐔𑐶𑐎𑑄 𑐰𑐵 𑐴𑐵𑐩𑑀 𑐔𑐶𑐎𑑄 𑐟𑐫𑐵 𑐡𑐶𑐬𑑂𑐢𑐵𑐫𑐸 𑐫𑐵 𑐎𑐵𑐩𑐣𑐵 𑐫𑐵𑐂 𑑋

𑑑𑑔. 𑐳𑐶𑐮𑐵 𑐔𑐬𑑂𑐴𑐾:–
𑐦𑐵𑐐𑐸𑐣 𑐎𑐺𑐲𑑂𑐞𑐥𑐎𑑂𑐲 𑐔𑐟𑐸𑐬𑑂𑐡𑐱𑐷𑐎𑐸𑐣𑑂𑐴𑐸 𑐩𑐴𑐵𑐡𑑂𑐫𑑀𑐫𑐵𑐟 𑐟𑐳𑑄𑐎 𑐩𑐵𑐣𑐫𑑂 𑐫𑐵𑐣𑐵 𑐥𑐸𑐖𑐵 𑐫𑐵𑐂𑐐𑐸 𑐮𑐶𑑄 𑐠𑑂𑐰𑐫𑐵𑐟 𑐩𑐴𑐵𑐱𑐶𑐰 𑐬𑐵𑐟𑑂𑐬𑐷 𑐥𑐬𑑂𑐰 𑐣𑑄 𑐢𑐵𑑅 𑑋 𑐐𑐞𑐾𑐡𑑂𑐫 𑐫𑐵𑐠𑐵𑐫𑑂 𑐩𑐶 𑐔𑑂𑐫𑐵𑐎𑐵 𑐩𑐣𑐨𑑀𑐐, 𑐎𑑅𑐣𑐶 𑐩𑐸𑐳𑑂𑐫𑐵 𑐰𑐬𑐵𑑄 𑐁𑐡𑐶 𑐳𑐶𑐫𑐵 𑐖𑐵𑐐𑑂𑐬𑐵𑐩 𑐔𑑂𑐰𑐣𑐷 𑐥𑐶𑐳𑑄 𑐂𑐣𑐵 𑐣𑐂 𑑋 𑐠𑐸𑐰𑐮𑐾 𑐣𑑄 𑐩𑐴𑐵𑐡𑑂𑐫𑑀𑐫𑐵 𑐎𑐶𑐥𑐵 (𑐟𑐳𑑂𑐰𑐷𑐬) 𑐩𑐷𑐐𑐸 𑐔𑐮𑐣 𑐡𑐸 𑑋

𑑑𑑕. 𑐥𑐵𑐴𑐵𑑄 𑐔𑐬𑑂𑐴𑐾:–
𑐔𑐿𑐟𑑂𑐬 𑐎𑐺𑐲𑑂𑐞 𑐔𑐟𑐸𑐬𑑂𑐡𑐱𑐷 𑐎𑐸𑐣𑑂𑐴𑐸 𑐠𑑂𑐰 𑐣𑐏𑑅𑐫𑐵𑐟 𑐥𑐶𑐱𑐵𑐔 𑐔𑐟𑐸𑐬𑑂𑐡𑐱𑐷 𑐢𑐎𑐵 𑐣𑑄 𑐢𑐵𑑅 𑑋 𑐠𑑂𑐰 𑐣𑐏𑑅 𑐎𑐸𑐣𑑂𑐴𑐸 𑐮𑐸𑐎𑐩𑐵𑐡𑑂𑐫𑑅𑐫𑐵𑐟 𑐧𑐴𑐣𑐷 𑐥𑐸𑐖𑐵 𑐫𑐵𑐂 𑑋

𑑑𑑖. 𑐩𑐵𑑄𑐫𑐵 𑐏𑑂𑐰𑐵𑑅 𑐳𑑂𑐰𑐫𑐾𑐐𑐸:–
𑐧𑐿𑐱𑐵𑐏 𑐎𑐺𑐲𑑂𑐞 𑐔𑑁𑐮𑐵𑐐𑐵 𑐁𑐩𑐵 𑐰𑐳𑑂𑐫𑐵𑐎𑐸𑐣𑑂𑐴𑐸 𑐩𑐵𑑄𑐫𑐵 𑐏𑑂𑐰𑐵𑑅 𑐳𑑂𑐰𑐫𑐾𑐐𑐸 𑐍𑐱𑐷 𑐢𑐎𑐵𑑅 𑐢𑐵𑐂 𑑋 𑐣𑐾𑐰𑐵𑑅 𑐧𑑁𑐡𑑂𑐢 𑐡𑐺𑐲𑑂𑐚𑐶 𑐎𑐠𑑄 𑐠𑑅𑐟 𑐖𑐣𑑂𑐩 𑐰𑑂𑐫𑐹𑐩𑑂𑐴 𑐩𑐵𑑄𑐫𑐵 𑐎𑐺𑐟𑐖𑑂𑐘𑐟𑐵 𑐩𑐣𑑄 𑐮𑐸𑐩𑑄𑐎𑐵 𑐩𑐵𑐣–𑐳𑐩𑑂𑐩𑐵𑐣 𑐰𑐶𑐫𑐵 𑐱𑑂𑐬𑐡𑑂𑐢𑐵 𑐥𑐹𑐬𑑂𑐰𑐎 𑐂𑐔𑑂𑐕𑐵 𑐡𑐸𑐐𑐸 𑐣𑐎𑐾 𑐟𑑂𑐰𑑄𑐎𑐾 𑐫𑐵𑐣𑐵 𑐠𑑂𑐰 𑐣𑐏𑑅 𑐩𑐵𑐣𑐫𑑂 𑐫𑐵𑐃 𑑋 𑐩𑐵𑑄 𑐩𑐡𑐸𑐥𑐶𑐣𑐷 𑐩𑐵𑐟𑐵 𑐟𑐶𑐬𑑂𑐠 𑐰𑐣𑐵𑑅 𑐳𑑂𑐣𑐵𑐣 𑐫𑐵𑐣𑐵𑑅 𑐣𑐶𑐳𑐮𑐵𑑅 𑐰𑐶𑐫𑐵, 𑐱𑑂𑐬𑐵𑐡𑑂𑐢 𑐎𑐬𑑂𑐩 𑐫𑐵𑐂 𑑋

𑑑𑑗. 𑐳𑐶𑐠𑐶𑐣𑐏𑑅 –
𑐖𑐾𑐲𑑂𑐛 𑐩𑐴𑐶𑐣𑐵𑐫𑐵 𑐱𑐸𑐎𑑂𑐮 𑐥𑐎𑑂𑐲𑐫𑐵 𑐲𑐲𑑂𑐛𑐶 𑐎𑐸𑐣𑑂𑐴𑐸 𑐮𑐵𑑅𑐐𑐸 𑐣𑐏𑑅𑐫𑐵𑐟 𑐎𑐸𑐩𑐵𑐬 𑐲𑐲𑑂𑐛𑐷 𑐢𑐎𑐵 𑐣𑑄 𑐢𑐵𑑅 𑑋 𑐡𑐶𑐐𑐸 𑐥𑐸𑐖𑐵 𑐣𑑂𑐫𑐵𑐫𑐾𑐎𑐾 𑐩𑐏𑑄𑐥𑐶𑐳𑑄 𑐠𑑂𑐰 𑐳𑐶𑐠𑐶𑐣𑐏𑑅 𑐎𑐸𑐣𑑂𑐴𑐸 𑐡𑐶𑐐𑐸 𑐥𑐸𑐖𑐵 𑐧𑐮𑐫𑑂 𑐠𑐾𑑄 𑐗𑑅 𑐗𑑅 𑐢𑐵𑐫𑑂𑐎 𑐠𑑅 𑐠𑑅 𑐡𑐶𑐐𑐸 𑐡𑑂𑐫𑑅𑐫𑐵 𑐠𑐵𑐫𑑂 𑐥𑐸𑐖𑐵 𑐫𑐵𑐣𑐵 𑐨𑑂𑐰𑐫 𑐣𑐂 𑑋 𑐨𑑂𑐰𑐫𑑂𑐧𑐮𑐫𑑂 𑐥𑑂𑐫𑐟𑐵𑐖𑐶 𑐰– 𑐩𑐵𑐫𑑂 𑐰𑑅, 𑐩𑐹 𑐰𑑅, 𑐎𑐳𑐹 𑐰𑑅 𑐰 𑐩𑐸𑐳𑐹 𑐰𑑅 𑐟𑐫𑐵 𑐨𑑂𑐰𑐫 𑐣𑐂 𑑋 𑐠𑑂𑐰 𑐣𑐏𑑅 𑐡𑐕𑐶𑐫𑐵 𑐡𑐎𑐾𑐮𑐶𑐥𑐵𑐐𑐸 𑐣𑐏𑑅 𑐖𑐸𑐫𑐵 𑐩𑑂𑐴𑐫𑐵𑐫𑑂 𑐩𑐔𑐵 𑐣𑐏𑑅 𑐰𑐵 𑐥𑑄𑐫𑑂𑐟𑐵 𑐏𑐮𑑅 𑐣𑐏𑑅 𑐢𑐎𑐵 𑐣𑑄 𑐢𑐵𑐂 𑑋

𑑙. 𑐳𑐵𑐩𑐵𑐖𑐶𑐎 𑐴𑑂𑐫𑐹𑐥𑐵 𑐰 𑐄𑐎𑐶𑐫𑐵 𑐰𑐶𑐎𑐵𑐳
𑐔𑐶𑐟𑑂𑐬𑐎𑐵𑐬 (𑐥𑐸𑑄) 𑐳𑐩𑐸𑐡𑐵𑐫 𑐣𑑄 𑐠𑑅𑐐𑐸 𑐖𑐵𑐟𑐶𑐫𑐵 𑐖𑐎 𑐔𑑂𑐫𑐹𑐟𑐵𑑅 𑐩𑐎𑐵𑐳𑐾𑑄 𑐣𑐾𑐰𑐵𑑅 𑐟𑐫𑑂𑐐𑐸 𑐰𑐶𑐔𑐾 𑐩𑐾 𑐩𑐾 𑐐𑐸 𑐖𑐵𑐟 𑐳𑐩𑐸𑐡𑐵𑐫 𑐣𑐵𑐥 𑐳𑑂𑐰𑐵𑐥𑐹 𑐟𑐫𑐵 𑐐𑐠𑐾 𑐫𑐵𑐣𑐵 𑐳𑐵𑐩𑐵𑐖𑐶𑐎 𑐴𑑂𑐫𑐹𑐥𑐵𑑅 𑐴𑐫𑑂𑐦𑐿 𑐢𑐎𑐵 𑐔𑐶𑐟𑑂𑐬𑐎𑐵𑐬 (𑐥𑐸𑑄) 𑐳𑐩𑐵𑐖𑑄 𑐠𑐷 𑐠𑐷 𑐖𑐵𑐟𑐶 𑐟𑐫𑑂𑐐𑐸 𑐧𑐷𑐔𑐾 𑐀𑐣𑑂𑐟𑐬𑐎𑑂𑐬𑐶𑐫𑐵 𑐖𑑂𑐫𑐵𑐗𑑂𑐰𑑅 𑐐𑑂𑐰𑐳𑐵𑑅 𑐐𑑂𑐰𑐫𑐵 𑐡𑐎𑐮𑐾 𑐣𑑂𑐴𑐵𑐥𑐵𑑄𑐐𑐸 𑐎𑐸𑐟𑑅 𑐖𑐸𑐐𑐸 𑐡𑐸 𑑋 𑐠𑑂𑐰 𑐀𑐣𑑂𑐟𑐬𑐎𑑂𑐬𑐶𑐫𑐵𑐫𑑂 𑐗𑐶 𑐣𑐾𑐰𑐵𑑅𑐣𑐫𑑂𑐐𑐸 𑐳𑑄𑐳𑑂𑐎𑐺𑐟𑐶 𑐧𑑂𑐰𑐮𑑄𑐎𑐵 𑐟𑐫𑑂𑐟 𑐦𑐸𑐎𑑂𑐎 𑐣𑐾𑐰𑐵 𑐖𑐵𑐟𑐷 𑐩𑐶𑐮𑐾 𑐖𑐸𑐫𑐵 𑐕𑐐𑐸 𑐩𑑂𑐫𑐹𑐖𑐶𑐫𑐩𑐫𑐵 𑐳𑑂𑐠𑐵𑐥𑐣𑐵 𑐫𑐵𑐫𑑂 𑐡𑑅𑐳𑐵𑐖𑑂𑐫𑐹 𑐢𑐿𑐐𑐸 𑐥𑑂𑐬𑐳𑑂𑐟𑐵𑐰 𑐣𑑂𑐴𑑂𑐰𑐧𑑂𑐰𑐫𑑂𑐐𑐸 𑐡𑐸 𑑋
𑐫𑐮, 𑐏𑑂𑐰𑐥 𑐰 𑐫𑐾𑑃 𑐣𑑄 𑐠𑐵𑐫𑑂𑐰𑐵𑐫𑑂 𑐴𑐶𑐮𑐵 𑐳𑐕𑐶𑐡𑑄𑐟𑐶 𑐣𑑂𑐴𑑂𑐫𑑀𑐣𑐶𑐳𑐾𑑄 𑐣𑐎𑑂𑐰𑐵𑐡𑐾𑐮𑐾 𑐔𑑂𑐰𑑄𑐥𑐶 𑐔𑐶𑐟𑑂𑐬𑐎𑐵𑐬 (𑐥𑐸𑑄) 𑐟 𑐣𑐵𑐩𑑄 𑐖𑐎 𑐔𑐶𑐟𑑂𑐬𑐎𑐵𑐬𑐖𑐸𑐫𑐵 𑐩𑐾𑐩𑐾𑐐𑐸 𑐴𑐾 𑐮𑐖𑐐𑐵 𑐖𑑂𑐰𑐣𑐵 𑐔𑑂𑐰𑑄𑐐𑐸 𑐡𑐸 𑑋 𑐠𑑅𑐐𑐸 𑐰𑐶𑐢𑐶𑐰𑑂𑐫𑐰𑐴𑐵𑐬 𑐰 𑐥𑐬𑐩𑑂𑐥𑐬𑐵 𑐎𑐠𑑄 𑐥𑐸𑐖𑐵 𑐰𑐶𑐢𑐶 𑐔𑐮𑐫𑑂 𑐫𑐵𑐫𑐾𑐟 𑐧𑐖𑑂𑐬𑐫𑐵𑐣 𑐎𑐠𑑄 𑐫𑐵𑐫𑐾 𑐩𑐵𑑅𑐐𑐸 𑐎𑐩𑑄𑐎𑐵𑐞𑑂𑐜 𑐫𑐵𑐫𑐾𑐟 𑐐𑐸𑐬𑐸𑐖𑐸𑐥𑐶𑑄 𑐩𑐡𑐫𑐵 𑐴𑐶𑐣𑑂𑐡𑐹 𑐢𑐬𑑂𑐩 𑐥𑐬𑐩𑑂𑐥𑐬𑐵 𑐎𑐠𑑄 𑐰𑑂𑐬𑐩𑑂𑐴𑐹 𑐟 𑐥𑐸𑐬𑑀𑐴𑐶𑐟 𑐫𑐵𑐣𑐵 𑐖𑑂𑐫𑐵 𑐣𑑂𑐴𑑂𑐫𑐵𑐎𑐵 𑐔𑑂𑐰𑑄𑐐𑐸 𑐡𑐸 𑑋 𑐰𑐫𑐎𑑅𑐥𑐶𑐣𑐷 𑐮𑐖𑐐𑐵 𑐩𑐢𑑂𑐫𑐾 𑐣𑑂𑐫𑐵 𑐮𑐵𑐫𑐾𑐐𑐸 𑐣𑑄 𑐕𑐐𑐸 𑐏𑑅 𑑋 𑐣𑑂𑐴𑐹𑐐𑐸 𑐥𑐸𑐳𑑂𑐟𑐵𑐫𑐵𑐥𑐶𑑄 𑐩𑐣𑐹𑐟 𑐣𑐾𑐰𑐵 𑐨𑐵𑐫𑑂 𑐣𑑄 𑐮𑑂𑐴𑐵𑐫𑑂𑐐𑐸 𑐩𑐳𑐫𑐵 𑐔𑑂𑐰𑑄𑐐𑐸 𑐡𑐸 𑑋 𑐣𑐸𑐰𑐵𑐎𑑀𑐚 𑐰 𑐁𑐳𑐥𑐵𑐳 𑐠𑐵𑐳𑐾 𑑔𑑑 𑐥𑐬𑐶𑐰𑐵𑐬𑐫𑐵 𑑔𑑐𑑐 𑐟𑐶 𑐔𑐶𑐟𑑂𑐬𑐎𑐵𑐬 (𑐥𑐸𑑄) 𑐟 𑐡𑐸𑐐𑐸 𑐏𑐣𑐾 𑐡𑐸 𑑋 𑐟𑑂𑐬𑐶𑐱𑐸𑐮𑐷𑐫𑐵 𑐡𑐾𑐰𑐷𑐑𑐵𑐟𑐫𑑂 𑐖𑐮𑑂𑐥𑐵 𑐡𑐾𑐰𑐷𑐫𑐵 𑐠𑐵𑐫𑑂 𑐥𑐸𑑄 𑐟 𑐴𑐾 𑐡𑑂𑐫𑑅 𑐥𑐵𑐮𑐵𑑅 𑐖𑐸𑐫𑐵 𑐔𑑂𑐰𑑄𑐐𑐸 𑐣𑑄 𑐡𑐸 𑑋 𑐧𑑁𑐡𑑂𑐢 𑐥𑐬𑐩𑑂𑐥𑐬𑐵 𑐎𑐠𑑄 𑐢𑐵𑐬𑑂𑐩𑐶𑐎 𑐰 𑐳𑐵𑐩𑐵𑐖𑐶𑐎 𑐰𑐶𑐢𑐶 𑐰𑑂𑐫𑐰𑐴𑐵𑐬 𑐴𑐣𑐾𑐟 𑐰𑐖𑑂𑐬𑐫𑐵𑐣 𑐫𑐵 𑐰𑐖𑑂𑐬𑐵𑐔𑐵𑐬𑑂𑐫 𑐟 𑐐𑐸𑐬𑐸𑐖𑐹𑐫𑐵𑐣𑐵 𑐕𑑂𑐰𑐫𑐾𑐟 𑐎𑐸𑐟𑑅 𑐖𑐸𑐫𑐵 𑐔𑑂𑐰𑑄𑐳𑐵𑑄 𑐁𑐟𑐎 𑐟𑐵𑑅𑐮𑐵𑐎𑐾 𑐩𑐦𑐸𑐣𑐶 𑑋
𑐔𑐶𑐟𑑂𑐬𑐎𑐵𑐬 (𑐥𑐸𑑄) 𑐳𑐩𑐵𑐖𑑄 𑐣𑐎𑑂𑐰𑐵𑐡𑐾 𑐣𑐵𑐥 𑐳𑑂𑐰𑐵𑐥𑐹 𑐟𑐫𑐵 𑐠𑐷 𑐠𑐷 𑐖𑑂𑐫𑐵𑐗𑑂𑐰 𑐟 𑐣𑑂𑐴𑑂𑐫𑐵𑐎𑐵 𑐔𑑂𑐰𑑄𑐐𑐸 𑐰 𑐀𑐣𑐫𑐵𑐥𑐶𑑄 𑐔𑐶𑐟𑑂𑐬𑐎𑐵𑐬 (𑐥𑐸𑑄) 𑐟𑐫𑑂𑐐𑐸 𑐖𑐷𑐰𑐣𑐳𑑂𑐟𑐬 𑐧𑑂𑐰𑐮𑑄𑐎𑐾𑐫𑐵 𑐮𑐵𑐐𑐷 𑐳𑐩𑐵𑐖𑐫𑐵 𑐖𑑅 𑐰 𑐡𑐸𑐖𑑅𑐮𑐫𑑂 𑐡𑐸𑐠𑑂𑐫𑐎𑐵𑑅 𑐳𑐩𑐵𑐖𑑄 𑐦𑐸𑐐𑐸 𑐐𑑂𑐰𑐵𑐴𑐵𑐮𑐶 𑐫𑐵𑐫𑐾𑐐𑐸 𑐎𑐸𑐟𑑅 𑐖𑐸𑐫𑐵 𑐔𑑂𑐰𑑄𑐐𑐸 𑐡𑐸 𑑋 𑐧𑑁𑐡𑑂𑐢 𑐢𑐬𑑂𑐩𑐥𑑂𑐬𑐟𑐶 𑐁𑐳𑑂𑐠𑐵 𑐧𑑂𑐰𑐮𑑄𑐎𑐵 𑐫𑐾𑑄𑐎𑐾𑐐𑐸 𑐎𑐸𑐟𑑅 𑐣𑑄 𑐫𑐵𑐫𑐾 𑐩𑐵𑐣𑐶𑐐𑐸 𑐏𑐣𑐾 𑐡𑐸 𑑋

𑐔𑐶𑐟𑑂𑐬𑐎𑐵𑐬 (𑐥𑐸𑑄) 𑐳𑐩𑐵𑐖𑐫𑐵 𑐣𑑂𑐴𑐵𑐥𑐵𑐫𑐵 𑐣𑐵𑐫𑑅 𑐨𑐵𑐖𑐸 𑐧𑐏𑐟 𑐧𑐴𑐵𑐡𑐸𑐬 𑐫𑐵𑐐𑐸 𑐎𑐸𑐟𑑅 𑐣𑑄 𑐣𑐸𑐰𑐵𑐎𑑀𑐚 𑐧𑐚𑐵𑐬𑐾 𑐖𑐵𑐥𑐵𑐣𑐫𑐵 𑐴𑐶𑐬𑐵𑐟𑑂𑐳𑐸 𑐰𑐾𑐲𑑂𑐚 𑐢𑐿𑐐𑐸 𑐀𑐣𑑂𑐟𑐬𑐬𑑂𑐬𑐵𑐲𑑂𑐚𑑂𑐬𑐶𑐫 𑐬𑑀𑐚𑐬𑐷 𑐎𑑂𑐮𑐰𑐫𑐵 𑐐𑑂𑐰𑐴𑐵𑐮𑐷𑑄 𑐥𑑂𑐫𑐾𑐡𑑄 𑐣𑑂𑐴𑑂𑐫𑑀 𑐴𑐾 𑐴𑐶𑐩𑐵𑐮𑐫𑐣 𑐊𑐎𑐵𑐜𑐾𑐩𑐶 𑐂𑐒𑑂𑐐𑐮𑐶𑐳 𑐳𑑂𑐎𑐹𑐮 𑐫𑐵 𑐣𑐵𑐩𑑄 𑐔𑐶𑐟𑑂𑐬𑐎𑐵𑐬 (𑐥𑐸𑑄) 𑐳𑐩𑐵𑐖𑑄 𑐰𑑂𑐰𑐣𑐾𑐎𑐸𑐠𑐶 𑐳𑑂𑐠𑐵𑐥𑐣𑐵 𑐫𑐵𑐣𑐵 𑐁 𑐀𑐣 𑑑𑑒𑑗 𑐩𑑂𑐴 𑐰𑑂𑐰𑐣𑐶𑐥𑐶𑑄 𑐩𑐳𑑂𑐟 𑐡𑐸 𑑋 𑐠𑑂𑐰 𑐳𑑂𑐎𑐹𑐮 𑐫𑐵𑐟 𑐀𑐗 𑐧𑐵𑑃𑐮𑐵𑐎𑐾𑐟 𑐖𑐵𑐥𑐵𑐣𑐷 𑐴𑐶𑐬𑐵𑐟𑑂𑐳𑐸 𑐰𑐾𑐲𑑂𑐚 𑐬𑑀𑐚𑐬𑐷 𑐎𑑂𑐮𑐰 𑐰 𑐔𑐶𑐟𑑂𑐬𑐎𑐵𑐬 (𑐥𑐸𑑄) 𑐳𑐩𑐵𑐖𑐫𑐵 𑐰𑐷𑐔𑐫𑑂 𑐳𑐩𑑂𑐗𑑁𑐟𑐵 𑐖𑐹𑐐𑐸 𑐡𑐸 𑑋 𑐣𑐸𑐰𑐵𑐎𑑀𑐚 𑐄. 𑐧𑐵. 𑐳𑑄𑐑𑐫𑐵 𑐀𑐢𑑂𑐫𑐎𑑂𑐲 𑐳𑐩𑐵𑐖𑐳𑐾𑐰𑐷 𑐢𑐣 𑐣𑐵𑐬𑐵𑐫𑐞 𑐔𑐶𑐟𑑂𑐬𑐎𑐵𑐬𑑄 𑐠𑑂𑐰 𑐧𑑂𑐰𑐣𑐾𑐎𑐸𑐠𑐶 –𑐰𑐶𑐡𑑂𑐫𑐵𑐮𑐫) 𑐫𑐵𑐟 𑑑𑑘 𑐬𑑀𑐥𑐣𑐷 𑐖𑐐𑑂𑐐𑐵 𑐰𑐶𑐫𑐵 𑐡𑐶𑐂𑐐𑐸 𑐏𑑅 𑑋 𑐠𑑂𑐰 𑐧𑑂𑐰𑐣𑐵 𑐎𑐸𑐠𑐶𑐫𑐵 𑐮𑐵𑐐𑐶 𑐩𑐵𑑅𑐐𑐸 𑐦𑐬𑑂𑐣𑐶𑐔𑐬, 𑐎𑐩𑑂𑐥𑑂𑐫𑐹𑐚𑐬, 𑐱𑐿𑐎𑑂𑐲𑐶𑐎 𑐳𑐵𑐩𑐐𑑂𑐬𑐶 𑐰 𑐐𑑀𑐰𑐬 𑐐𑑂𑐫𑐵𑐳 𑐣𑐵𑐥𑑄 𑐡𑐫𑐎𑐾𑐐𑐸 𑐫𑐵𑐣𑐵 𑐧𑑂𑐫𑐰𑐳𑑂𑐠𑐵 𑐖𑐹𑐐𑐸 𑐡𑐸 𑑋 𑐰𑑂𑐰𑐣𑐵 𑐎𑐸𑐠𑐶𑐫𑐵 𑐰𑐵𑐎𑐶 𑐡𑐣𑐶𑐐𑐸 𑐖𑐐𑑂𑐐𑐵𑐫𑑂 𑐕𑐸𑑄 𑐖𑑂𑐫𑐵 𑐫𑐵𑐣𑐵 𑐁𑐬𑑂𑐠𑐶𑐎 𑐟𑐶𑐰 𑐡𑐫𑐾𑐎𑐾𑐐𑐸 𑐐𑑂𑐰𑐳𑐵 𑐐𑑂𑐰𑐫𑐾𑐐𑐸𑐣𑑄 𑐳𑑂𑐰𑐫𑐵 𑐔𑑂𑐰𑑄𑐐𑐸 𑐡𑐸 𑑋
𑐳𑑂𑐎𑐹𑐮 𑐳𑑄𑐔𑐵𑐮𑐣 𑐫𑐵 𑐰𑐶𑐱𑐾𑐲 𑐖𑑂𑐘𑐵𑐟𑐵 𑐰𑐣𑐳𑑂𑐠𑐮𑐷 𑐳𑑂𑐎𑐹𑐮𑐫𑐵 𑐳𑑄𑐳𑑂𑐠𑐵𑐥𑐎 𑐨𑐵𑐖𑐸 𑐮𑐎𑑂𑐲𑑂𑐩𑐞 𑐬𑐵𑐖𑐰𑑄𑐱𑐷 𑐣𑐵𑐥𑑄 𑐳𑑂𑐰𑐵𑐥𑐹 𑐟𑐫𑐵 𑐳𑑂𑐎𑐹𑐮𑐫𑐵𑐟 𑐥𑑂𑐬𑐨𑐵𑐰𑐎𑐵𑐬𑐷 𑐬𑐸𑐥𑑄 𑐣𑑂𑐴𑑂𑐫𑐵𑐎𑐾𑐟 𑐐𑑂𑐰𑐳𑐵𑑅 𑐐𑑂𑐰𑐫𑐵 𑐔𑑂𑐰𑑄𑐐𑐸 𑐣𑑄 𑐡𑐸 𑑋

𑐠𑑁𑑄𑐫𑐵 𑑒𑑑 𑐍 𑐱𑐟𑐵𑐰𑑂𑐡𑐶𑐫𑐵 𑐃, 𑐎𑐵𑐮 𑐰 𑐥𑐬𑐶𑐰𑐾𑐱𑐫 𑐕𑐸 𑐣𑑄 𑐮𑐖𑐐𑐵𑐫𑐵𑐟 𑐕𑐩𑑂𑐴𑐾𑐳𑐶𑐫𑐵𑐐𑐸 𑐊𑐎𑐵𑐢𑐶𑐎𑐵𑐬 (𑐫𑐎𑑅𑐟𑐶) 𑐎𑐵𑐫𑐩 𑐫𑐵𑐣𑐵 𑐟𑐫𑐾 𑐥𑐿m𑐐𑐸 𑐳𑐩𑑂𑐨𑐵𑐰𑐣𑐵 𑐩𑐡𑐸, 𑐣 𑐟 𑐳𑑂𑐠𑐶𑐟𑐶 𑐴𑐾 𑐡𑐸 𑑋 𑐠𑑂𑐰 𑐴𑐾 𑐎𑐵𑐬𑐞𑑄 𑐫𑐵𑐣𑐵 𑐔𑐶𑐟𑑂𑐬𑐎𑐵𑐬 (𑐥𑐸𑑄) 𑐟 𑐦𑐸𑐎𑑂𑐎 𑐔𑐶𑐟𑑂𑐬𑐎𑐮𑐵𑐫𑐵 𑐎𑑂𑐲𑐾𑐟𑑂𑐬𑐫 𑐖𑐎 𑐮𑐐𑐫 𑐩𑐖𑐹𑐳𑐾 𑐠𑑅𑐐𑐸 𑐂𑐔𑑂𑐕𑐵 𑐰 𑐎𑑂𑐲𑐩𑐟𑐵 𑐫𑐵 𑐰𑐶𑐱𑐾𑐲𑐟𑐵 𑐎𑐠𑑄 𑐩𑐩𑐾𑐐𑐸 𑐠𑐷𑐠𑐷 𑐮𑐖𑐐𑐵 𑐖𑑂𑐰𑐣𑐵𑑅 𑐣𑑂𑐴𑐫𑐵 𑐰𑐣𑐵 𑐔𑑂𑐰𑑄𑐥𑐶 𑐡𑐸 𑑋 𑐐𑐠𑐾 𑐎𑐶 𑐜𑐵𑐎𑑂𑐚𑐬, 𑐎𑐩𑑂𑐥𑐵𑐄𑐞𑑂𑐜𑐬, 𑐂𑐣𑑂𑐖𑐶𑐣𑐶𑐫𑐬, 𑐔𑐵𑐬𑑂𑐚𑐬 𑐊𑐎𑐵𑐄𑐣𑑂𑐚𑐾𑐣𑑂𑐚, 𑐦𑑀𑐚𑑀𑐐𑑂𑐬𑐵𑐦𑐶, 𑐥𑑂𑐬𑐾𑐱 𑐕𑐥𑐵𑐃 𑐳𑐩𑑂𑐰𑐣𑑂𑐢𑐶 𑐖𑑂𑐫𑐵𑐫, 𑐥𑐟𑑂𑐬𑐎𑐵𑐬𑐶𑐟𑐵, 𑐩𑑂𑐴𑐶𑐟𑐾 𑐎𑐵𑐳𑐵 (𑐏𑐾𑐮𑐎𑐹𑐡) 𑐫𑐵 𑐀𑐮𑐵𑐰𑐵 𑐬𑐵𑐖𑐣𑐷𑐟𑐶𑐎, 𑐢𑐵𑐬𑑂𑐩𑐶𑐎 𑐎𑑂𑐲𑐾𑐟𑑂𑐬𑐫𑑂, 𑐳𑐵𑐴𑐶𑐟𑑂𑐫 𑐎𑑂𑐲𑐾𑐟𑑂𑐬𑐫𑑂 𑐩𑑂𑐫𑐾 𑐴𑐵𑐮𑐾𑐐𑐸 (𑐳𑑄𑐐𑐷𑐟) 𑐎𑑂𑐲𑐾𑐟𑑂𑐬𑐫, 𑐎𑐩𑑂𑐥𑑂𑐫𑐹𑐚𑐬 𑐥𑑂𑐬𑐰𑐶𑐢𑐶 𑐁𑐡𑐶 𑐎𑑂𑐲𑐾𑐟𑑂𑐬𑐫𑑂 𑐫𑐎𑑂𑐎𑑀 𑐥𑐮𑐵 𑐣𑑂𑐴𑑂𑐫𑐵𑐎𑐵 𑐔𑑂𑐰𑑄𑐥𑐶 𑐡𑐸 𑑋 𑐀𑐠𑐾 𑐴𑐾 𑐱𑑂𑐬𑐷 𑑕 𑐫𑐵 𑐳𑐬𑐎𑐵𑐬𑐫𑐵 𑐥𑑂𑐬𑐱𑐵𑐳𑐣𑐶𑐎 𑐖𑑂𑐫𑐵𑐫, 𑐳𑑂𑐰𑐵𑐳𑑂𑐠𑑂𑐫, 𑐰 𑐱𑐶𑐎𑑂𑐲𑐵 𑐳𑐩𑑂𑐰𑐣𑑂𑐢𑐶 𑐔𑑂𑐰𑐫 𑐔𑑂𑐰𑐫𑐫𑐵 𑐣𑐶𑐬𑑂𑐞𑐵𑐫𑐎 𑐥𑐡𑐫𑑂 𑐟𑐎 𑐣𑑄 𑐠𑑂𑐫𑑄𑐥𑐶 𑐫𑐎𑑂𑐎𑑀 𑐡𑐸 𑑋 𑐮𑐸𑐩𑑄𑐎𑐾 𑐰𑐴 𑐖𑐹 𑐳𑐣𑑂 𑑑𑑙𑑙𑑔 𑐳 𑐳𑑂𑐰𑐶𑐚𑐖𑐬𑐮𑐵𑐫𑐞𑑂𑐜𑐫𑑂 𑐖𑐹𑐐𑐸 𑐰𑐶𑐱𑑂𑐰 𑐁𑐬𑑂𑐠𑐶𑐎 𑐩𑑄𑐔 𑐥𑐵𑐏𑐾𑑃 𑐰𑐵𑐟𑐵𑐰𑐬𑐞𑐰𑐶𑐡 𑐨𑐵𑐖𑐸 𑐀𑐣𑐶𑐮 𑐔𑐶𑐟𑑂𑐬𑐎𑐵𑐬𑐫𑐵𑐟 𑐰𑐵𑐟𑐵𑐰𑐬𑐞 𑐰𑐶𑐲𑐮𑐫𑑂 𑐠𑑅𑐐𑐸 𑐀𑐩𑐹𑐮𑑂𑐫 𑐫𑑀𑐐𑐡𑐵𑐣 𑐫𑐵𑐣𑐵 𑐡𑐶𑐂𑐐𑐸𑐮𑐶𑑄 𑐰𑐫𑐎 𑐫𑐵𑐟 𑐎𑐣𑑂𑐴𑐾𑐫𑐵𑐩𑑂𑐴 𑐰𑐶𑐱𑑂𑐰 𑐣𑐾𑐟𑐵 𑐢𑐎𑐵 𑐀𑐣𑑂𑐟𑐬𑑂𑐬𑐵𑐲𑑂𑐚𑑂𑐬𑐶𑐫 𑐳𑐶𑐬𑐥𑐵 𑐮𑑅 𑐮𑑂𑐴𑐵𑑅𑐐𑐸 𑐡𑐸 𑑋

𑐔𑐶𑐟𑑂𑐬𑐎𑐮𑐵 𑐮𑐖𑐐𑐵𑐫 𑐮𑐐𑐾𑐖𑐹𑐥𑐶𑑄 𑐕𑐐𑐸 𑐥𑐎𑑂𑐲 𑐡𑐸𑐳𑐵 𑐔𑐶𑐟𑑂𑐬𑐎𑐮𑐵 𑐰𑐵𑐴𑐾𑐎 𑐩𑐾𑐩𑐾𑐐𑐸 𑐠𑐷 𑐠𑐷 𑐮𑐖𑐐𑐵𑐫𑑂 𑐥𑐮𑐵𑑅 𑐣𑑂𑐴𑑂𑐫𑐵𑐎𑐵 𑐔𑑂𑐰𑑄𑐥𑐶 𑐔𑐶𑐟𑑂𑐬𑐎𑐵𑐬 (𑐥𑐸𑑄) 𑐟 –– 𑐠𑑂𑐰 𑐣𑐶𑐠𑐶 𑐥𑐎𑑂𑐲 𑐫𑐵𑐥𑐶𑑄 𑐔𑐶𑐟𑑂𑐬𑐎𑐵𑐬 (𑐥𑐸𑑄) 𑐟𑐫𑑂𑐟 𑐎𑑅𑐑𑐵𑐂𑐐𑐸 𑐗𑐷𑐐𑐸 𑐰𑐶𑐢𑐶 𑐰𑑂𑐫𑐰𑐴𑐵𑐬 𑐫𑐵𑐟 𑐣𑑄 𑐥𑐬𑐩𑑂𑐥𑐬𑐵𑐐𑐟 𑐟𑐖𑐶𑐮𑐖𑐶𑑄 𑐔𑐶𑐎𑐵𑑅 𑐳𑐸𑐬𑐎𑑂𑐲𑐶𑐟 𑐫𑐵𑐫𑐾𑐟 𑐣𑑂𑐴𑑂𑐫𑐵𑐐𑑂𑐐𑐸 𑐁𑐬𑑂𑐠𑐶𑐎 𑐳𑑂𑐟𑐬𑐫𑐵𑐩𑑂𑐴 𑐩𑐣𑑂𑐴𑐹 𑐣𑑄 𑐣𑑄 𑐰𑑂𑐫𑐰𑐴𑐵𑐬𑐫𑑂 𑐕𑑂𑐫𑐮𑐾 𑐦𑐫𑐾𑐎 𑐩𑐢𑑂𑐫𑐩𑐩𑐵𑐬𑑂𑐐 𑐖𑑂𑐰𑐣𑐵 𑐣𑑂𑐴𑑂𑐫𑐵 𑐰𑐣𑐾𑐩𑐵𑑅 𑑋 𑐠𑐸𑐎𑐠𑑄 𑐣𑑂𑐴𑐹𑐐𑐸 𑐥𑐸𑐳𑑂𑐟𑐵𑐫𑐵 𑐳𑐣𑑂𑐟𑐟𑐶 𑐣𑑄 𑐥𑐸𑐮𑐵𑑄𑐐𑐸 𑐳𑑄𑐳𑑂𑐎𑐺𑐟𑐶 𑐫𑐵𑐟 𑐑𑐫𑐥𑐸𑐣𑐵𑑅 𑐠𑑂𑐰 𑐥𑑂𑐬𑑀𑐦𑐵𑐂𑐮 𑐦𑐸𑐎𑑂𑐎 𑐟𑐴 𑐰 𑐟𑐥𑑂𑐎𑐵𑐫𑐵 𑐔𑐶𑐟𑑂𑐬𑐎𑐵𑐬 (𑐥𑐸𑑄) 𑐟𑐫𑑂𑐐𑐸 𑐁𑐟𑑂𑐩–𑐥𑐬𑐶𑐔𑐫 (𑐳𑑂𑐰–𑐥𑐬𑐶𑐔𑐫) 𑐰𑐶𑐃 𑐢𑐿𑐐𑐸 𑐩𑐣𑑄 𑐟𑐸𑐣𑐵 𑑋

𑐗𑐷𑐐𑐸 𑐳𑐵𑑄𑐳𑑂𑐎𑐺𑐟𑐶𑐎 𑐢𑐬𑑀𑐴𑐬𑐫𑐵𑐟 𑐢𑐳𑑂𑐰𑐵𑐎𑐵𑑅 𑐠𑑅𑐐𑐸 𑐮𑐖𑐐𑐵 𑐫𑐵𑐟 𑐳𑑄𑐬𑐎𑑂𑐲𑐞 𑐫𑐵𑐫𑐾𑐟 𑐠𑐸𑐎𑐾 𑐡𑐸𑐐𑑂𑐫𑑄𑐎 𑐳𑐣𑐶𑐥𑐶𑑄 𑐔𑐶𑐟𑑂𑐬𑐎𑐮𑐵𑐫𑐵 𑐎𑑂𑐲𑐾𑐟𑑂𑐬𑐫𑑂 𑐳𑐩𑐬𑑂𑐥𑐶𑐟 𑐖𑐸𑐫𑐵 𑐔𑑂𑐰𑑄𑐥𑐶 𑐔𑐶𑐟𑑂𑐬𑐎𑐵𑐬 (𑐥𑐸𑑄) 𑐟𑐫𑑂𑐟 𑐡𑐸𑐠𑑂𑐫𑐵𑐎𑐵 𑐰𑐶𑐱𑐾𑐲 𑐥𑐮𑐵𑑅 𑐣𑑂𑐴𑑂𑐫𑐵𑐎𑐾𑐩𑐵𑑅 𑑋 𑐀𑐮𑐾 𑐣𑐾𑐥𑐵𑐫𑐵 𑐳𑐵𑑄𑐳𑑂𑐎𑐺𑐟𑐶𑐎 𑐎𑑂𑐲𑐾𑐟𑑂𑐬𑐫𑑂 𑐟𑐶𑐰 𑐰𑐶𑐫𑐵 𑐔𑑂𑐰𑑄𑐥𑐶 𑐴𑐾 𑐣𑐾𑐥𑐵𑐫𑐵 𑐟𑐖𑐶𑐮𑐖𑐶 𑐩𑑂𑐰𑐵𑐎𑐵 𑐔𑑂𑐰𑑄𑐥𑐶 𑐏𑑅 𑐢𑐿𑐐𑐸 𑐏𑑄 𑐳𑐬𑐎𑐵𑐬𑐫𑐵𑐟 𑐰𑐵𑐔𑐵𑐫𑐾𑐎𑐾 𑐰𑐶𑐫𑐵, 𑐠𑐸𑐎𑐶𑐫𑐵 𑐳𑑄𑐔𑐵𑐮𑐣 𑐳𑑄𑐬𑐎𑑂𑐲𑐞 𑐰 𑐳𑐩𑑂𑐰𑐡𑑂𑐬𑑂𑐢𑐣 𑐫𑐵𑐫𑐾𑐟 𑐳𑐬𑐎𑐵𑐬 𑐥𑐵𑐏𑐾𑑄 𑐩𑐵𑑅𑐐𑐸 𑐳𑐴𑐫𑑀𑐐 𑐟𑐶𑐰 𑐰𑐶𑐂𑐎𑐾𑐐𑐸 𑐎𑐸𑐟𑑅 𑐫𑐵𑐫𑐾𑐩𑐵𑑅 𑑋
𑐔𑐶𑐟𑑂𑐬𑐎𑐮𑐵 𑐮𑐖𑐐𑐵𑐫𑐵𑐟 𑐠𑑁𑐎𑐣𑑂𑐴𑐾𑐫𑑂 𑐫𑐵𑐐𑐸 𑐨𑑁𑐟𑐶𑐎 𑐳𑐵𑐢𑐣 𑐫𑐵 𑐰𑐶𑐎𑐵𑐳 𑐰 𑐣𑑂𑐴𑐹 𑐣𑑂𑐴𑐹𑐐𑐸 𑐥𑑂𑐬𑐰𑐶𑐢𑐶 𑐡𑐸𑐠𑑂𑐫𑐵𑐎𑐵 𑐥𑑂𑐬𑐟𑐶𑐳𑑂𑐥𑐬𑑂𑐢𑐵𑐫𑑂 𑐰𑐣𑐵 𑐖𑐎 𑐣𑑂𑐴𑐹𑐣𑑂𑐴𑐹𑐐𑐸 𑐎𑐶𑐳𑐶𑐩𑑄 𑐖𑑂𑐫𑐵 𑐫𑐵𑐣𑐵 𑐫𑐾𑑄𑐎𑐾 𑐦𑐿 𑑋 𑐐𑐠𑐾𑐎𑐶 𑐠𑑁𑐎𑐣𑑂𑐴𑐾 flexography 𑐮𑑂𑐦𑐾𑐎𑑂𑐳𑑀𑐐𑑂𑐬𑐵𑐦 𑐫𑐵 𑐖𑑂𑐫𑐵𑑄 𑐟𑑅𑐟𑑅 𑐥𑐵𑑅𑐐𑐸 𑐰𑐶𑐖𑑂𑐘𑐵𑐥𑐣 𑐰𑑀𑐬𑑂𑐜 𑐟 𑐖𑑂𑐰𑐫𑐐𑐸 𑐥𑑂𑐬𑐰𑐶𑐢𑐶 𑐣𑑂𑐴𑑂𑐫𑑀 𑐮𑐵𑐣𑐵 𑐔𑑂𑐰𑑄𑐐𑐸 𑐡𑐸 𑑋 𑐠𑑂𑐰 𑐮𑐖𑐐𑐵 𑐔𑐶𑐟𑑂𑐬𑐎𑐵𑐬 (𑐥𑐸𑑄) 𑐟𑐫𑐳𑑄 𑐣𑑄 𑐖𑑂𑐰𑐣𑐾 𑐩𑐵𑑅𑐐𑐸 𑐣𑐶𑐟𑐵𑐣𑑂𑐟 𑐁𑐰𑐱𑑂𑐫𑐎 𑐖𑐹𑐐𑐸 𑐏𑐣𑐾 𑐡𑐸 𑑋 𑐥𑑁𑐨𑐵, 𑐥𑐬𑑄𑐥𑐬𑐵𑐐𑐟 𑐔𑐶𑐟𑑂𑐬𑐎𑐮𑐵 𑐫𑐵 𑐣𑐵𑐥 𑐣𑐵𑐥𑑄 𑐰𑑂𑐫𑐵𑐥𑐵𑐬𑐶𑐎 𑐔𑐶𑐟𑑂𑐬𑐎𑐮𑐵𑐫𑑂 𑐣𑑄 𑐠𑑅𑐐𑐸 𑐮𑑂𑐴𑐵 𑐟𑐫𑐾𑐟 𑐣𑑄 𑐥𑐮𑐵𑑅 𑐣𑑂𑐴𑑂𑐫𑐵𑐎𑐵 𑐰𑐣𑐾𑐩𑐵 𑑋 𑐠𑑅𑐐𑐸 𑐳𑐩𑐵𑐖𑐫𑐵 𑐧𑐸𑐡𑑂𑐢𑐶𑐖𑐶𑐰𑐷 𑐰𑐬𑑂𑐐𑐥𑐶𑐣𑑂𑐟 𑐣𑑄 𑐎𑑅𑐢𑐵𑐣𑐵 𑐳𑐩𑐵𑐖𑐫𑐵 𑐖𑑂𑐫𑐵𑐫𑑂 𑐥𑐬𑐶𑐔𑐵𑐮𑐣 𑐫𑐵𑐫𑐾 𑐦𑑅𑐳𑐵 𑐖𑐎 𑐰 𑐳𑑄𑐑 𑐳𑑄𑐳𑑂𑐠𑐵 𑐃 𑐎𑐵𑐮 𑐥𑐬𑐶𑐳𑑂𑐠𑐶𑐟𑐶 𑐣𑐵𑐥 𑐮𑑂𑐰𑐫𑑂𑐎 𑐣𑑂𑐴𑑂𑐫𑐵𑐫𑑂 𑐦𑐃 𑑋

𑐥𑑂𑐬𑑀𑐦𑐵𑐂𑐮𑐫𑐵 𑐮𑐶𑐢𑑄𑐳𑐵 𑐖𑑂𑐰𑐮𑑄
(Bibliography)

𑑑) 𑐔𑐶𑐟𑑂𑐬𑐎𑐵𑐬 𑐰 𑐔𑐶𑐟𑑂𑐬𑐎𑐮𑐵 𑐕𑐥𑐸𑐮𑐸 – 𑐰𑐳𑐣𑑂𑐟 𑐔𑐶𑐟𑑂𑐬𑐎𑐵𑐬𑐫𑐵 𑐀𑐣𑐸𑐳𑐣𑑂𑐢𑐵𑐣𑐵𑐟𑑂𑐩𑐎 𑐔𑑂𑐰𑐳𑐹
𑑒) 𑐔𑐶𑐟𑑂𑐬𑐎𑐵𑐬 (𑐥𑐸𑑄) 𑐳𑐩𑐵𑐖𑐫𑐵 𑐰𑐶𑐢𑐵𑐣
𑑓) Chitrakars the keepers of the Heritage of traditional art visit Nepal 98
𑑔) 𑐕𑐐𑐸 𑐥𑐰𑐶𑐟𑑂𑐬𑐐𑐸 𑐖𑐵𑐟 “𑐥𑐸𑐣 – 𑐥𑐸𑑄” – 𑐀𑐣𑐸𑐳𑐣𑑂𑐢𑐵𑐣𑐎𑐬𑑂𑐟𑐵 𑐕𑐟𑑂𑐬𑐰𑐴𑐵𑐡𑐸𑐬 𑐎𑐵𑐫𑐳𑑂𑐠𑐫𑐵 𑐀𑐣𑑂𑐰𑐾𑐲𑐞𑐵𑐟𑑂𑐩𑐎 𑐔𑑂𑐰𑐳𑐹 – 𑐥𑑂𑐫𑑄 𑐎𑑂𑐰𑑅𑐐𑐸 𑐮𑐸𑐩𑐣𑑂𑐟𑐷 𑐥𑑁 𑑋
𑑕) 𑐩𑐾𑐬𑑀 𑐥𑑂𑐬𑐟𑐶𑐲𑑂𑐛𑐵𑐣𑐎𑐵 𑐀𑐰𑐶𑐳𑑂𑐩𑐬𑐞𑐷𑐫 𑐎𑑂𑐲𑐞 𑐀𑐩𑐬 𑐔𑐶𑐟𑑂𑐬𑐎𑐵𑐬𑐫𑐵 𑐔𑑂𑐰𑐳𑐹
𑑖) 𑐨𑐵𑐖𑐸 𑐦𑐞𑐶𑐣𑑂𑐡𑑂𑐬 𑐬𑐟𑑂𑐣 𑐰𑐖𑑂𑐬𑐵𑐔𑐵𑐬𑑂𑐫𑐫𑐵 𑐐𑐸𑐠𑐶𑐰𑐵𑐬𑐾 𑐳𑑀𑐢 𑐎𑐵𑐬𑑂𑐫 𑐔𑑂𑐰𑐳𑐹
𑑗) 𑐎𑐮𑐵 𑐳𑑄𑐳𑑂𑐎𑐺𑐟𑐶𑐫𑐵 𑐰𑐶𑐡𑑂𑐢𑐵𑐣 𑐥𑑂𑐬𑑀. 𑐢𑐸𑐳𑑂𑐰𑐵𑑃 𑐳𑐵𑐫𑐩𑐶𑐫𑐵 𑐩𑐢𑐸𑐥𑐬𑑂𑐎𑐫𑐵 𑐔𑑂𑐰𑐳𑐹
𑑘) 𑐔𑐶𑐟𑑂𑐬𑐎𑐵𑐬 (𑐥𑐸𑑄) 𑐳𑐩𑐵𑐖𑐫𑐵 𑐥𑐬𑐩𑑂𑐥𑐬𑐵𑐐𑐟 𑐰𑐶𑐢𑐶 𑐰𑑂𑐫𑐰𑐴𑐵𑐬 𑐩𑑂𑐴𑐳𑐷𑐎𑐵
𑑙) 𑐖𑐫𑐳𑑂𑐠𑐶𑐟𑐶 𑐩𑐮𑑂𑐮𑐮𑐶𑐥𑐵𑐫𑐵 𑐔𑐶𑐟𑑂𑐬𑐎𑐵𑐬 𑐥𑐶𑐣𑐶𑐐𑐸 𑐥𑑁𑐨𑐵𑑅 𑐎𑐺𑐟𑐶 𑐰 𑐠𑐵𑐫𑑂𑐰𑐵𑐫𑑂 – 𑐬𑐵𑐲𑑂𑐚𑑂𑐬𑐶𑐫 𑐀𑐨𑐶𑐮𑐾𑐏𑐵𑐮𑐫𑐫𑐵 𑐮𑐶𑐥𑐶 𑐰𑐶𑐱𑐾𑐲𑐖𑑂𑐘 𑐨𑐵𑐖𑐸 𑐳𑐶𑐡𑑂𑐢𑐶𑐬𑐟𑑂𑐣 𑐱𑐵𑐎𑑂𑐫 𑐨𑐶𑐎𑑂𑐲𑐸𑐫𑐵 𑐀𑐣𑐸𑐳𑐣𑑂𑐢𑐵𑐣𑐵𑐟𑑂𑐩𑐎 𑐔𑑂𑐰𑐳𑐹– 𑐮𑐸𑐩𑐣𑑂𑐟𑐶 𑐥𑑁 𑐣𑐾.𑐳𑑄. 𑑑𑑑𑑒𑑕 𑐳𑐶𑐮𑑂𑐮𑐵𑐐𑐵 𑐡𑐱𑐩𑐶
𑑑𑑐) 𑐡𑑂𑐫𑑅𑐟𑐫𑐐𑐸 𑐮𑑄𑐥𑐸 𑐕𑐵𑐫𑐾𑐐𑐸 𑐖𑑂𑐫𑐵𑐗𑑂𑐰𑑅 – 𑐨𑐵𑐖𑐸 𑐥𑑂𑐬𑐾𑐩𑐮𑐵𑐮 𑐔𑐶𑐟𑑂𑐬𑐎𑐵𑐬𑐫𑐵 𑐮𑐸𑐩𑐣𑑂𑐟𑐶 𑐥𑑁𑐫𑐵 𑐔𑑂𑐰𑐳𑐹 – 𑐣𑐾.𑐳𑑄. 𑑑𑑑𑑒𑑕 𑐳𑐶𑐮𑑂𑐮𑐵𑐫𑐵 𑐡𑐱𑐩𑐷
𑑑𑑑) 𑐣𑐾𑐰𑐵𑑅 𑐳𑑄𑐳𑑂𑐎𑐵𑐬 𑐳𑑄𑐳𑑂𑐎𑐺𑐟𑐶𑐫𑐵 𑐟𑐵𑑅𑐔𑐵 𑐣𑐾.𑐳𑑄. 𑑑𑑑𑑐𑑙 𑐫𑐵 𑐥𑑂𑐬𑐎𑐵𑐱𑐣 (Cultural Heritage of the Newara) 𑐬𑐟𑑂𑐣𑐎𑐵𑐖𑐷 𑐰𑐖𑑂𑐬𑐵𑐔𑐵𑐬𑑂𑐫𑐫𑐵 𑐳𑐦𑐹
𑑑𑑒) 𑐣𑐾.𑐳𑑄. 𑑑𑑐𑑙𑑙 𑐰𑐶.𑐳𑑄. 𑑒𑑐𑑓𑑔 𑐳𑐵𑐮𑐾 𑐥𑐶𑐡𑑄𑐐𑐸 “𑐥𑐬𑐩𑑂𑐥𑐬𑐵𑐐𑐟 𑐟𑐠𑐵 𑐁𑐢𑐸𑐣𑐶𑐎 𑐔𑐶𑐟𑑂𑐬𑐎𑐮𑐵” 𑐔𑑂𑐰𑐩𑐶𑐟 – 𑐩𑐣𑐰𑐖𑑂𑐬 𑐰𑐖𑑂𑐬𑐵𑐔𑐵𑐬𑑂𑐫, 𑐄𑐟𑑂𑐟𑐩 𑐣𑐾𑐥𑐵𑐮𑐷 𑐰 𑐣𑐵𑐬𑐵𑐫𑐞 𑐰𑐴𑐵𑐡𑐸𑐬 𑐳𑐶𑑄𑐴
𑑑𑑓)Tej Bahadur Chitrakar “Icon of a Transition” by Madan Chitrakar.
𑑑𑑔) 𑐖𑐷𑐟 𑐰𑐴𑐵𑐡𑐸𑐬 𑐩𑐵𑐣𑐣𑑂𑐢𑐬𑑄 𑐔𑑂𑐰𑐫𑐵 𑐡𑐷𑐐𑐸 𑐳𑐦𑐹 “𑐰𑐶𑐬𑐶𑐘𑑂𑐔𑐶 𑐣𑐵𑐬𑐵𑐫𑐞” 𑐣𑐺𑐳𑐶𑑄𑐴 𑐥𑐺𑐲𑑂𑐛 𑑙𑑕
𑑑𑑕) 𑐥𑐸𑐲𑑂𑐥 𑐥𑐸𑑄 𑐣𑑄 𑐔𑑂𑐰𑐫𑐵 𑐡𑐷𑐐𑐸 𑐋𑐟𑐶𑐴𑐵𑐳𑐶𑐎 𑐥𑐺𑐲𑑂𑐛 𑐨𑐹𑐩𑐶𑐃 “𑐥𑐸𑑄 𑐡𑐾𑐐𑑅” 𑐰𑐵 𑐡𑐱 𑐀𑐰𑐟𑐵𑐬 𑐡𑐾𑐰𑐮 – 𑐮𑐸𑐩𑐣𑑂𑐟𑐶 𑐥𑑁 𑐣𑐾. 𑐳𑑄.𑑑𑑑𑑑𑑙 𑐔𑐶𑐮𑑂𑐮𑐵𑐠𑑂𑐰 𑐡𑑂𑐰𑐵𑐡𑐱𑐷
𑑑𑑖) 𑐳𑐸𑐰𑐬𑑂𑐞 𑐩𑐵𑐣 𑐔𑐶𑐟𑑂𑐬𑐎𑐵𑐬𑑄 𑐔𑑂𑐰𑐫𑐵 𑐡𑐷𑐐𑐸 𑐔𑐶𑐟𑑂𑐬𑐎𑐵𑐬 (𑐥𑐸𑑄) 𑐰 𑐩𑐾𑐐𑐸 𑐳𑐩𑐵𑐖𑐫𑐵 𑐟𑐖𑐶𑐮𑐖𑐶 𑑋
𑑑𑑗) 𑐔𑐶𑐟𑑂𑐬𑐎𑐵𑐬 (𑐥𑐸𑑄) 𑐳𑐩𑐵𑐖 𑐥𑐵𑐏𑐾𑑄 𑐡𑐫𑐾𑑄 𑐡𑐱𑑄 𑐥𑐶𑐡𑐣𑐵 𑐔𑑂𑐰𑑄𑐐𑐸 𑐠𑐶𑐠𑐶 𑐮𑐸𑐩𑐣𑑂𑐟𑐶 𑐥𑑁𑐫𑐵 𑐳𑑄𑐳𑑂𑐎𑐬𑐞 𑐟 𑑋

𑐀𑐣𑐸𑐳𑐹𑐔𑐷
𑐔𑐫𑑂𑐥𑑂𑐫𑐟𑐵 𑐑𑐵𑐳𑐵 (𑑘𑑔 𑐧𑑂𑐫𑐘𑑂𑐖𑐣)

𑑑. 𑐥𑐵𑐮𑐸 (𑐟𑐵𑐣𑐵𑐟𑑅𑐐𑐸 𑐥𑐵𑐮𑐸 𑐎𑐹)
𑑒. 𑐩𑑂𑐰𑐵𑑅𑐧𑐸𑐂 (𑐩𑐸𑐳𑑂𑐫𑐵 𑐰𑐵𑐮𑐵)
𑑓. 𑐰𑑅 (𑐰𑑅𑐮𑐫𑑂 𑐢𑑁 𑐧𑐸𑐮𑐾𑐐𑐸)
𑑔. 𑐎𑑅𑐳𑐹𑐧𑐸𑐂 (𑐩𑐵𑐫𑑂 𑐰𑐵𑐮𑐵)
𑑕. 𑐩𑐵𑐫𑑂𑐧𑐸𑐂 (𑐩𑐵𑐫𑑂 𑐰𑐵𑐮𑐵)
𑑖. 𑐏𑐫𑑂𑐥𑐶 (𑐦𑐳𑐶𑐫𑐵𑐐𑐸 𑐎𑐸𑐔𑐵𑐎𑐸𑐔𑐵)
𑑗. 𑐔𑐫𑑂𑐥𑐶 (𑐦𑐳𑐶𑐫𑐵𑐐𑐸 𑐎𑐸𑐔𑐵𑐎𑐸𑐔𑐵)
𑑘. 𑐔𑑅𑐐𑐸𑐮𑐶
𑑙. 𑐳𑐣𑐵𑑄𑐑𑐵𑐳𑐵 (𑐦𑐬𑑂𑐎 𑐦𑐶𑐣𑐵𑐟𑑅𑐐𑐸)
𑑑𑑐. 𑐢𑑁 𑐑𑐵𑐳𑐵 (𑐮𑐿𑑄 𑐔𑐸𑐮𑐵𑑅 𑐢𑑁𑐮𑐫𑑂 𑐰𑐵𑐮𑐾𑐐𑐸)
𑑑𑑑. 𑐥𑐵𑐮𑐸 𑐑𑐵𑐳𑐵 (𑐥𑐵𑐮𑐸 𑐔𑐸𑐮𑐵𑑅 𑐢𑑁𑐮𑐫𑑂 𑐰𑐵𑐮𑐾𑐐𑐸)
𑑑𑑒. 𑐎𑑅𑐳𑐹 𑐰𑑅
𑑑𑑓. 𑐮𑐵𑐐𑑂𑐰𑑅
𑑑𑑔. 𑐨𑐸𑐟𑐶𑐧𑐸𑐂 (𑐨𑐸𑐟𑐶 𑐰𑐵𑐮𑐵)
𑑑𑑕. 𑐮𑐵𑐥𑐶
𑑑𑑖. 𑐡𑐸𑐮𑐵 (𑐮𑐿 𑐢𑑂𑐫𑐣𑐵𑑅 𑐩𑐣𑐵𑑅 𑐴𑐮𑐹 𑐟𑐫𑐵𑑅 𑐰𑐵𑐮𑐾𑐐𑐸)
𑑑𑑗. 𑐴𑐶𑑄𑐮𑐵 (𑐴𑐶𑑄 𑐟𑐫𑐵𑑅 𑐰𑐵𑐮𑐾𑐐𑐸)
𑑑𑑘. 𑐥𑑄𑐮𑐵 (𑐕𑑂𑐰𑐫𑑂𑐮𑐵𑑅 𑐢𑑁 𑐰 𑐥𑐵𑐄𑑃 𑐟𑐫𑐵𑑅 𑐰𑐵𑐮𑐾𑐐𑐸)
𑑑𑑙. 𑐣𑑂𑐴𑑂𑐫𑐥𑐸 𑐥𑑄𑐮𑐵 (𑐰𑐵𑐄𑑃 𑐩𑑂𑐴𑐸𑐎𑑄 𑐢𑑁 𑐟𑐫𑐵𑑅 𑐰𑐵𑐮𑐾𑐐𑐸)
𑑒𑑐. 𑐏𑐵𑐂 𑐥𑑄𑐮𑐵 ( (𑐳𑑅𑐥𑐹 𑐟𑑂𑐫𑐵𑐣𑐵𑑅 𑐢𑑁𑐮𑐫𑑂 𑐰𑐵𑐮𑐾𑐐𑐸)
𑑒𑑑. 𑐳𑑅𑐥𑐹 𑐥𑑄𑐮𑐵 (𑐳𑑅𑐥𑐹 𑐟𑑂𑐫𑐵𑐣𑐵𑑅 𑐢𑑁𑐮𑐫𑑂 𑐰𑐵𑐮𑐾𑐐𑐸)
𑑒𑑒. 𑐖𑑃𑐮𑐵 𑐕𑐖𑑂𑐰𑑅 (𑐕𑐿𑐐𑐹 𑐣𑐶𑐎𑐹 𑐰𑐵𑐮𑐾𑐐𑐸)
𑑒𑑓. 𑐳𑐵𑐮𑐸 𑐕𑑂𑐰𑐫𑑂𑐮𑐵 (𑐕𑑂𑐰𑐫𑑂𑐮𑐵 𑐥𑑂𑐫𑐎𑐹 𑐟𑐫𑐾𑐐𑐸)
𑑒𑑔. 𑐕𑑂𑐫𑐵𑐮𑐵 (𑐳𑐶𑑄𑐎𑐾, 𑐳𑑅𑐥𑐸 𑐟𑐫𑐵𑑅 𑐡𑐫𑐾𑐎𑐾𑐐𑐸)
𑑒𑑕. 𑐧𑐸𑐮𑑂𑐮𑐵 (𑐎𑑅 𑐟𑐫𑐵𑑅 𑐡𑐫𑐾𑐎𑐾𑐐𑐸)
𑑒𑑖. 𑐏𑑀𑐥𑐸𑐮𑐵 𑐕𑐖𑑂𑐰𑑅 (𑐩𑐾𑐫𑑂𑐕𑑂𑐫𑑄𑐫𑐵 𑐨𑑁𑐏𑑂𑐰𑐵𑑅)
𑑒𑑗. 𑐢𑐣𑑂𑐰𑑄𑐟𑐬𑐷 (𑐳𑐬𑑂𑐰𑐾𑐲𑐢𑐶)
𑑒𑑘. 𑐳𑐸𑐥𑐵𑐮𑐸 (𑐐𑑄𑐐𑐸 𑐥𑐵𑐮𑐸)
𑑒𑑙. 𑐩𑐾𑐫𑑂𑐕𑑂𑐫𑑄 𑐥𑐸
𑑓𑑐. 𑐳𑐎𑐶 𑐩𑑂𑐴𑐸𑐎𑑄 (𑐀𑐖𑐶 𑐎𑑅 𑐟𑐫𑐵𑑅 𑐰𑐵𑐮𑐾𑐐𑐸)
𑑓𑑑. 𑐮𑐵 𑐧𑐖𑐶 (𑐮𑐵 𑐩𑐣𑐵𑑅 𑐥𑑅𑐎𑐵𑑄 𑐰𑐵𑐮𑐾𑐐𑐸)
𑑓𑑒. 𑐴𑐵𑐩𑑂𑐰𑑅 𑐮𑐵 (𑐮𑐵 𑐟𑑂𑐫𑐵𑐣𑐵𑑅 𑐴𑐵𑐩𑑂𑐰𑐮𑑄 𑐰𑐵𑐮𑐾𑐐𑐸)
𑑓𑑓. 𑐎𑐫𑑂𑐐𑐸 𑐮𑐵 (𑐮𑐵 𑐟𑑂𑐫𑐵𑐣𑐵𑑅 𑐎𑐫𑐾𑐐𑐸𑐮𑐫𑑂 𑐟𑐫𑐾𑐐𑐸)
𑑓𑑔. 𑐳𑑄𑐣𑑂𑐫𑐵 𑐏𑐸𑐣𑐵
𑑓𑑕. 𑐟𑐬𑐸𑑄 𑐔𑐩𑑂𑐫𑐵 (𑐟𑐬𑐸𑑄 𑐩𑐣𑐵𑑅 𑐡𑐫𑐾𑐎𑐾𑐐𑐸)
𑑓𑑖. 𑐮𑐃𑑄 𑐨𑐸𑐖𑐵 (𑐮𑐿𑑄𑐫𑐵 𑐨𑐸𑐖𑐾𑐮𑐷)
𑑓𑑗. 𑐳𑐶𑐄𑐮𑐵 𑐩𑑂𑐴𑐸𑑄𑐎 (𑐳𑐶𑐫𑐹 𑐩𑑂𑐴𑐸𑐎𑑄)
𑑓𑑘. 𑐰𑐵𑐄𑑃 𑐩𑑂𑐴𑐸𑐎𑑄
𑑓𑑙. 𑐎𑐸𑐣𑐸𑑅𑐧𑐸𑑃
𑑔𑑐. 𑐳𑐶𑐩𑐮𑐧𑐸𑑃
𑑔𑑑. 𑐢𑑁𑐧𑐸𑑃
𑑔𑑒. 𑐧𑑂𑐫𑐵𑑅 (𑐧𑐾𑐮)
𑑔𑑓. 𑐏𑐵𑐮𑐸 𑐟𑐸𑐎𑐵 (𑐏𑐵𑐮𑐸)
𑑔𑑔. 𑐕𑐶𑐎𑐶𑐕𑐶𑐎𑐶𑐧𑐸𑑃
𑑔𑑕. 𑐔𑐶𑐩𑑂𑐴𑐸𑐎𑑄
𑑔𑑖. 𑐢𑐵𑐮𑐾𑐧𑐸𑑃𑐫𑐵 𑐢𑐵𑐮𑐾
𑑔𑑗. 𑐎𑐶𑐩𑐶𑐮𑐵 (𑐔𑐸𑑃𑐮𑐵)
𑑔𑑘. 𑐢𑑁
𑑔𑑙. 𑐟𑑅𑐳𑐶 𑐎𑐸𑐔𑐵
𑑕𑑐. 𑐳𑐸𑐣𑑂𑐟𑐮𑐵
𑑕𑑑. 𑐟𑐸
𑑕𑑒. 𑐐𑑂𑐰𑑅 𑐥𑑅𑐩𑐵𑐫𑑂 (𑐐𑑂𑐰𑑅𑐐𑐸 𑐩𑐣𑐵𑐐𑐸 𑐥𑑅𑐩𑐵𑐫𑑂)
𑑕𑑓. 𑐐𑑂𑐰𑑅 𑐨𑐸𑐟𑐶 (𑐩𑐣𑐵𑐟𑑅𑐐𑐸)
𑑕𑑔. 𑐩𑐹 𑐰𑐵𑐮𑐵 (𑐩𑐹 𑐰𑐵𑐮𑐵𑐟𑑅𑐐𑐸)
𑑕𑑕. 𑐥𑐵𑐄𑑃 𑐴𑐶 (𑐴𑐶𑐎𑑂𑐰𑐵𑑅𑐮𑐫𑑂 𑐥𑐵𑐄𑑃 𑐟𑐫𑐵𑑅 𑐡𑐫𑐾𑐎𑐾𑐐𑐸)
𑑕𑑖. 𑐟𑐬𑐸𑐮
𑑕𑑗. 𑐔𑐵𑐎𑐸 𑐥𑐶𑐥𑐶 (𑐥𑐶𑐥𑐶 𑐏𑐸𑐣𑐵)
𑑕𑑘. 𑐮𑐂𑐳𑐶
𑑕𑑙. 𑐥𑐷 𑐐𑐸𑐮𑐶 (𑐥𑐶𑐥𑐶 𑐢𑐾)
𑑖𑑐. 𑐏𑐾𑑄 𑐰𑐵𑐮𑐵
𑑖𑑑. 𑐣𑑂𑐫𑐵 𑐥𑐸𑐎𑐵
𑑖𑑒. 𑐳𑑂𑐰𑑄𑑅𑐥𑐸𑐎𑐵
𑑖𑑓. 𑐳𑐾𑑄 𑐥𑐸𑐎𑐵
𑑖𑑔. 𑐐𑐸𑐮𑐶 𑐥𑐸𑐎𑐵
𑑖𑑕. 𑐩𑐹𑐮𑐵 (𑐟𑑅𑐏𑐵𑑅)
𑑖𑑖. 𑐋𑐠𑑂𑐫𑐵 𑐩¥𑐶𑐴
𑑖𑑗. 𑐫𑑅𑐩¥𑐶𑐴 (𑐮𑑀𑐴𑑃𑐔𑐵 𑐩𑐬𑐶)
𑑖𑑘. 𑐮𑑀𑑃 𑐩𑐬𑐶
𑑖𑑙. 𑐮𑐵𑐏𑐵 𑐩𑐬𑐶
𑑗𑑐. 𑐩𑐠 𑐩𑐬𑐶
𑑗𑑑. 𑐐𑐸𑐮 𑐩¥𑐶𑐴
𑑗𑑒. 𑐟𑑁𑐮𑐵 𑐐𑑂𑐰𑐵𑐬𑐵 (𑐴𑐵𑐩𑑂𑐰𑑅 𑐐𑑂𑐰𑐵𑐬𑐵)
𑑗𑑓. 𑐖𑑂𑐰𑑅 𑐥𑐳𑑂𑐟𑐵
𑑗𑑔. 𑐡𑐸𑐬𑐸 𑐩𑐬𑐶 (𑐳𑐵𑐫𑐵 𑐡𑐸𑐬𑐸𑐫𑐵𑐐𑐸 𑐧𑐫𑐸𑐟𑐶 𑐩𑐬𑐶)
𑑗𑑕. 𑐔𑐥𑑂𑐥𑐵 𑐐𑑂𑐰𑐵𑐬𑐵 𑐩𑐬𑐶
𑑗𑑖. 𑐟𑐸𑐎𑑄𑐔𑐵
𑑗𑑗. 𑐥𑐮𑑅𑐔𑐵
𑑗𑑘. 𑐥𑐵𑐄𑑃
𑑗𑑙. 𑐦𑐳𑐶𑐥𑐸 𑐰𑐵𑐮𑐵
𑑘𑑐. 𑐳𑐎𑐶 𑐨𑐸𑐖𑐾𑐮𑐷
𑑘𑑑. 𑐳𑐟𑐧𑐫𑑂𑐳𑐶
𑑘𑑒. 𑐨𑑀𑐔𑐵 𑐥𑐵𑐳𑐶 (𑐨𑑂𑐰𑐵𑐳𑐵 𑐥𑐵𑐳𑐶)
𑑘𑑓. 𑐔𑐟𑐵𑑄𑐩𑐬𑐶
𑑘𑑔. 𑐟𑐸𑐳𑐶𑐥𑐸 𑐰𑐵𑐮𑐵 𑑋