𑐏𑑅, 𑐖𑐶 𑐩𑐣𑐹 𑐏𑑅

– 𑐡𑐸𑐬𑑂𑐐𑐵𑐮𑐵𑐮 𑐱𑑂𑐬𑐾𑐲𑑂𑐛

𑐴𑐵𑐫𑑂 𑐕𑐸 𑐳𑑂𑐫𑐹 𑐠𑐸𑐮𑐶 𑐎𑐲𑑂𑐚𑑄 𑐟𑐷𑐐𑐸
𑐐𑐸𑐏𑐸𑐣𑐸𑐣𑐶𑐳𑐾𑑄 𑐖𑐶𑑄 𑐠:𑐟 𑐠𑐸𑐮
𑐖𑐶𑑄 𑐖𑐶𑐐𑐸 𑐣𑐶𑐩𑑂𑐟𑐶𑑄 𑐔𑐸𑐂𑐐𑐸 𑐟𑐸𑐟𑐶𑑄 𑐕𑐵𑐫𑑂
𑐠:𑐟𑑄 𑐟𑐸𑑄 𑐥𑐟𑐶𑐔𑐶𑑄𑐎 𑐣𑑂𑐴𑐸𑐮 ?

𑐠:, 𑐖𑐷𑐰𑐣 𑐳𑑄𑐑𑐬𑑂𑐲, 𑐥𑐟𑑂𑐫𑐵𑑅 𑐖𑐹
𑐟𑐬 𑐖𑐶 𑐖𑐶𑐴𑐾 𑐮𑐶𑐳𑑂𑐫 𑐮𑑂𑐰𑐵𑐫𑑂𑐩𑐵𑐮𑐷
𑐧𑐸𑐎𑐵 𑐖𑐶𑐟𑑅 𑐟𑐸𑑄 𑐳𑐟𑑂𑐫 𑐩𑐳𑑂𑐫𑐹 𑐠𑐫𑑂
𑐟𑑂𑐫𑐵𑐟 𑐢𑐎𑐵𑑅 𑐖𑐶 𑐢𑐵𑐫𑑂𑐩𑐵𑐮𑐷 𑑋

𑐴𑐵𑐫 !𑐕𑐸 𑐳𑑂𑐫𑐹 𑐖𑐶𑑄 𑐖𑐶𑐐𑐸 𑐴𑑂𑐩𑐫𑑂 𑐨𑐸𑐣𑑂𑐫𑐟
𑐖𑐶𑐐𑐸 𑐴𑐾 𑐕𑑂𑐫𑑄𑐐𑐹 𑐥𑐷𑐩𑐵𑐮𑐷
𑐩𑑂𑐰𑐵𑐫𑑂𑐐𑐸 𑐟𑑂𑐰𑐴𑑅 𑐖𑐎 𑐔𑐶𑐣𑑂𑐫 𑐳𑐫𑑂𑐎𑑂𑐫𑐟 𑐣𑑄
𑐠𑐸𑐮𑐶 𑐑𑐔𑑂𑐔𑐿𑐥𑐸𑐎 𑐳𑐷𑐩𑐮𑐷 𑑋

𑐐𑑆𑐸𑐩𑑂𑐩 𑐐𑐣𑑄 𑐴𑐾 𑐴𑑀-𑐴𑐷 𑐩𑐡𑐸𑐐𑐸
𑐀𑐴𑐴 ! 𑐐𑐖𑑂𑐫𑐵𑑅𑐐𑐸 𑐠𑑂𑐧 𑐧𑐣𑑂𑐡 𑐎𑑂𑐰𑐠𑐵
𑐫𑐸𑐎𑐶𑐫𑐵 𑐣𑐵𑑄 𑐴𑐾 𑐖𑐷𑐰𑐣 𑐏𑑅𑐳𑐵
𑐖𑐷𑐰𑐣 𑐠𑐾𑑄 𑐩𑐡𑐸 𑐩𑐾𑐐𑐸 𑐰𑑂𑐫𑐠𑐵 𑑋

𑐩𑐏𑐸, 𑐠𑑂𑐰 𑐏𑐴𑐾 𑐩𑐏𑐸, 𑐧𑐶𑐮𑐎𑐸𑐮 𑐀:𑐏:
𑐖𑐶𑐐𑐸 𑐡𑐸𑐩𑐶𑐏𑐵𑑄 𑐐𑐸𑐐𑐸 𑐖𑐷𑐰𑐣 𑐏𑑄
𑐀𑐣 𑐴𑐾 𑐠𑑂𑐫𑑄𑐎𑑂𑐫𑐟 𑐰𑐿𑐐𑐸 𑐖𑐶 𑐏𑑅 𑐐𑑀
𑐏𑐣𑑂𑐫 𑐴𑐾 𑐩𑐡𑐸 𑐠𑐾𑑄 𑐖𑐹𑐰𑐣 𑐗𑑄 𑑋

𑐁𑐳𑑂𑐫 𑐁𑐳𑑂𑐫 𑐀𑐫𑑂 𑐖𑐶𑐐𑐸 ‘𑐖𑐶’ 𑐕𑐎𑑅 𑐡𑑂𑐫𑐸
𑐰𑐣𑑂𑐫𑐩𑐟𑑂𑐫 ‘𑐰𑐣𑑂𑐫𑐩𑐵:’ 𑐢𑐵:𑐐𑐸 𑐣𑑂𑐫𑐣𑐵𑑅
𑐐𑐟𑐶𑐫𑐵 𑐣𑐵𑑄 𑐩𑐏𑐸 𑐎𑐾𑐧𑐮 𑐰𑐣𑑂𑐫𑐐𑐸
𑐰𑐣𑐵: 𑐩𑐠𑑂𑐫𑑄𑐳𑐵 , 𑐠𑑂𑐫𑐣𑑂𑐫𑐦𑐸 𑐡𑐶𑐣𑐵𑑅 𑑋

𑐀𑐴𑐴 ! 𑐩𑐣𑐹𑐫𑐵 𑐱𑐟𑑂𑐬𑐸 𑐩𑐣𑐹 𑐴𑐾
𑐠𑑂𑐰 𑐠𑐾𑑄 𑐎𑑂𑐰𑐴𑑂𑐫𑑄𑐐𑐸 𑐏𑑃 𑐩𑐾𑐐𑐸 𑐕𑐸 𑐡𑐿
𑐴𑐣𑑄 𑐠𑑂𑐰 𑐎𑑂𑐬𑐩 𑐴𑐾 𑐡𑐿𑐐𑐸 𑐳𑐡𑐵𑑄 𑐴𑑃
𑐗𑐹𑐛 𑐠𑑂𑐰 𑐠𑐾𑑄 𑐠𑐣 𑐩𑐾𑐐𑐸 𑐕𑐸 𑐡𑐿 ?

𑐗𑐹𑐛, 𑐗𑐹𑐛 𑐏𑑅 𑐗𑐹𑐛, 𑐀𑐰𑐱𑑂𑐫
𑐠𑑂𑐰 𑐏𑑃𑐫𑑂 𑐥𑐟𑑂𑐫𑐵𑑅 𑐴𑐾 𑐖𑐸𑐂 𑐩𑐏𑐸 𑐖𑐶
𑐖𑐷𑐰𑐣-𑐳𑐦𑐸𑐮𑐷 𑐔𑑂𑐰𑑄𑐐𑐸 𑐠𑑂𑐰 𑐡𑑂𑐫𑐵 𑐴𑐾
𑐗𑑂𑐫𑐵𑐬𑑂𑐬 𑐩𑐏𑐸𑐂𑐎𑑄 𑐳𑐷𑐩𑐏𑐸 𑐖𑐶𑑋

— 𑐫𑐵𑐎:𑐦𑐮𑐔𑐵𑑄