𑐎𑐶𑐥𑐹 – 𑐎𑐶𑐥𑐹𑐫𑐵 𑐩𑑂𑐴𑐳𑐷𑐎𑐵 𑐣𑑂𑐴𑑂𑐫𑐧𑑂𑐰𑐫𑐾𑐐𑐸 𑐎𑐠𑑄 𑐔𑐷𑐴𑐵𑑅 𑐳𑑄𑐎𑐶𑐥𑐵 𑐢𑐾𑑄𑐢𑐾𑑄𑐧𑐮𑑂𑐮𑐵𑑅 𑐎𑐵𑐳𑐵 𑐖𑐸𑐂𑐐𑐸 𑐖𑐹𑐐𑐸 𑐡𑐸 𑑋 𑐎𑐶𑐥𑐹 𑐣𑐐𑐬𑐥𑐵𑐮𑐶𑐎𑐵𑐫𑐵 𑐐𑑂𑐰𑐳𑐵𑐮𑐫𑑂 𑐠𑑂𑐰 𑐢𑐾𑑄𑐢𑐾𑑄𑐧𑐮𑑂𑐮𑐵𑑅 𑐎𑐵𑐳𑐵 𑐖𑐸𑐂𑐟𑑂𑐫𑑄𑐐𑐸 𑐏𑑅 𑑋 𑐁𑐂𑐟𑐰𑐵𑑅 𑐣𑐾𑐥𑐵𑐮𑐨𑐵𑐲𑐵𑐫𑐵 𑐳𑑄𑐎𑐶𑐥𑐵𑐎𑑅𑐩𑐶𑐥𑐶𑐣𑐶 𑐨𑐾𑐮𑐵𑐫𑑂 𑐎𑐶𑐥𑐹𑐫𑐵 𑐩𑐾𑐫𑐬 𑐬𑐩𑐾𑐱 𑐩𑐴𑐬𑑂𑐖𑐣𑑄 𑐢𑐾𑑄𑐢𑐾𑑄𑐧𑐮𑑂𑐮𑐵𑑅𑐫𑐵 𑐑𑑀𑐲𑐞𑐵 𑐫𑐵𑐣𑐵𑐡𑐷𑐐𑐸 𑐏𑑅 𑑋

𑐨𑐾𑐮𑐵𑐫𑑂 𑐣𑑂𑐰𑐰𑐵𑐣𑐵𑐡𑐶𑐳𑐾𑑄 𑐰𑐫𑑂𑐎𑐮𑑄 𑐎𑐶𑐥𑐹𑐫𑐵 𑐂𑐟𑐶𑐴𑐵𑐳, 𑐣𑐏𑑅𑐔𑐏𑑅, 𑐳𑑄𑐳𑑂𑐎𑐺𑐟𑐶, 𑐳𑑄𑐳𑑂𑐎𑐵𑐬, 𑐖𑐵𑐟𑑂𑐬𑐵 𑐥𑐬𑑂𑐰, 𑐮𑐖𑐐𑐵𑑅 𑐁𑐡𑐶𑐂 𑐡𑐸𑐳𑐸𑐮𑐵𑐔𑑂𑐰𑑄𑐐𑐸 𑐧𑐵𑐏𑑄𑐫𑐵𑐟 𑐳𑑄𑐎𑐶𑐥𑐵𑐫𑐵 𑐩𑐵𑐢𑑂𑐫𑐩𑑄 𑐣𑑂𑐴𑑂𑐫𑐧𑑂𑐰𑐫𑐵𑑅 𑐎𑐶𑐥𑐹𑐫𑐵𑐟 𑐥𑐬𑑂𑐫𑐚𑐎𑐷𑐫 𑐎𑑂𑐲𑐾𑐟𑑂𑐬𑐫𑑂 𑐬𑐸𑐥𑐫𑑂 𑐥𑑂𑐬𑐔𑐵𑐬 𑐥𑑂𑐬𑐳𑐵𑐬 𑐫𑐵𑐫𑐾𑐐𑐸 𑐟𑐵𑑅 𑐟𑐫𑐵𑑅 𑐔𑐶𑐴𑐵𑑅 𑐳𑑄𑐎𑐶𑐥𑐵 𑐢𑐾𑑄𑐢𑐾𑑄𑐧𑐮𑑂𑐮𑐵𑑅 𑐫𑐵𑐫𑐾𑐟𑑂𑐫𑐣𑐵𑐐𑐸 𑐏𑑃 𑐢𑐫𑐵𑐡𑐷𑐐𑐸 𑐏𑑅 𑑋

𑐎𑐶𑐥𑐹 𑐔𑐶𑐴𑐵𑑅 𑐳𑑄𑐎𑐶𑐥𑐵 𑐢𑐾𑑄𑐢𑐾𑑄𑐧𑐮𑑂𑐮𑐵𑑅 𑐎𑐵𑐳𑐵𑐫𑐵 𑐎𑐖𑐶 𑐮𑐎𑑂𑐲𑑂𑐩𑐷𑐎𑐸𑐩𑐵𑐬 𑐩𑐴𑐬𑑂𑐖𑐣𑑄 𑐎𑐶𑐥𑐸𑐮𑐶𑐂 𑐳𑑄𑐎𑐶𑐥𑐵 𑐡𑐫𑐾𑐎𑐾𑐧𑐴𑑅𑐐𑐸 𑐫𑐎𑑂𑐰 𑐴𑐾 𑐖𑐵𑐟𑑂𑐬𑐵 𑐥𑐬𑑂𑐰, 𑐳𑑄𑐳𑑂𑐎𑐺𑐟𑐶, 𑐂𑐟𑐶𑐴𑐵𑐳𑐫𑐵 𑐣𑑂𑐫𑑃𑐎𑑄 𑐧𑐵𑐏𑑄, 𑐎𑐶𑐰𑑄𑐡𑐣𑑂𑐟𑐷 𑐡𑐸𑐐𑐸 𑐏𑑃 𑐣𑑂𑐴𑑂𑐫𑐠𑑃𑐳𑐾𑑄 𑐠𑐖𑑂𑐫𑐵𑑅𑐐𑐸 𑐧𑐵𑐏𑐣𑐫𑑂 𑐁𑐢𑐵𑐬𑐶𑐟 𑐖𑐸𑐫𑐵𑑅 𑐔𑐶𑐴𑐵𑑅 𑐳𑑄𑐎𑐶𑐥𑐵 𑐡𑐫𑐾𑐎𑐵𑑅 𑐢𑐾𑑄𑐢𑐾𑑄𑐧𑐮𑑂𑐮𑐵𑐏𑐫𑑂 𑐧𑑂𑐰𑐟𑐶 𑐎𑐵𑐫𑐾𑐦𑐂𑐐𑐸 𑐏𑑃 𑐎𑐣𑐵𑐡𑐶𑐮 𑑋 𑐰𑐫𑑂𑐎𑐮𑑄 𑐢𑐾𑑄𑐢𑐾𑑄𑐧𑐮𑑂𑐮𑐵𑐏𑐫𑑂 𑐧𑑂𑐰𑐟𑐶 𑐎𑐵𑐫𑐾𑐐𑐸 𑐣𑐶𑐫𑐩 𑐧𑐵𑐬𑐾 𑐣𑑄 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐷𑐐𑐸 𑐏𑑅 𑑋

𑐢𑐾𑑄𑐢𑐾𑑄𑐧𑐮𑑂𑐮𑐵𑑅𑐫𑐵 𑐩𑐹𑐩𑐹 𑐣𑐶𑐫𑐩 𑐎𑐠𑑄 𑐔𑐶𑐴𑐵𑑅 𑐳𑑄𑐎𑐶𑐥𑐵 𑐎𑐶𑐥𑐹𑐫𑐵 𑐩𑑂𑐴𑐳𑐷𑐎𑐵 𑐣𑑂𑐴𑑂𑐫𑐧𑑂𑐰𑐂𑐐𑐸 𑐖𑐸𑐂𑐩𑐵𑑅𑐳𑐵 𑐳𑑄𑐎𑐶𑐥𑐵 𑐀𑐥𑑂𑐰𑐮𑐫𑑂 𑐗𑐶𑑄𑐣𑑂𑐫𑐵𑐐𑐹 𑐩𑐶𑐣𑐾𑐚 𑐟𑐎𑐫𑐵 𑐖𑐸𑐂𑐩𑐵𑑅 𑑋 𑐨𑐾𑐮𑐵𑐫𑑂 𑐰𑐫𑑂𑐎𑐮𑑄 𑐳𑑄𑐎𑐶𑐥𑐵 𑐣𑐶𑑄𑐟𑐶𑑄 𑐁𑐰𑐱𑑂𑐫𑐎 𑐧𑐵𑐏𑑄 𑐧𑐵𑐬𑐾 𑐖𑐵𑐣𑐎𑐵𑐬𑐷 𑐧𑐶𑐂𑐐𑐸 𑐣𑐶𑑄𑐟𑐶 𑐜𑐵. 𑐔𑐣𑑂𑐡𑑂𑐬𑐩𑐵𑐣 𑐰𑐖𑑂𑐬𑐵𑐔𑐵𑐬𑑂𑐫, 𑐥𑑂𑐬𑐫𑐵𑐐𑐬𑐵𑐖 𑐥𑑂𑐬𑐢𑐵𑐣 𑐠𑐾𑑄𑐖𑑂𑐫𑐵𑑅𑐥𑐶𑑄 𑑄 𑐎𑐶𑐥𑐹𑐫𑐵 𑐳𑑄𑐳𑑂𑐎𑐺𑐟𑐶𑐰𑐶𑐡𑑂, 𑐂𑐟𑐶𑐴𑐵𑐳𑐎𑐵𑐬𑐥𑐶𑑄 𑐟𑐫𑐵𑐬 𑐡𑐸𑐐𑐸 𑐏𑑃 𑐢𑐫𑐵𑐡𑐷𑐐𑐸 𑐏𑑅 𑑋

𑐰𑐫𑑂𑐎𑐮𑑄 𑐎𑐶𑐥𑐹𑐫𑐵 𑐧𑐵𑐬𑐾 𑐣𑑂𑐫𑐣𑐾𑐎𑐣𑐾 𑐫𑐵𑐫𑐾𑐟 𑐰𑐫𑑂𑐎𑑅𑐥𑐶𑑄𑐟 𑐳𑑂𑐰𑐵𑐥𑐹 𑐟𑐫𑐾𑐦𑐂𑐐𑐸 𑐖𑐵𑐣𑐎𑐵𑐬𑐷 𑐣𑑄 𑐧𑐶𑐫𑐵𑐡𑐶𑐮 𑑋 𑐠𑐸𑐐𑐸 𑐢𑐾𑑄𑐢𑐾𑑄𑐧𑐮𑑂𑐮𑐵𑑅𑐫𑐵 𑐣𑐶𑑄𑐟𑐶𑑄 𑐣𑑂𑐴𑐵𑐥 𑐳𑐶𑐬𑐥𑐵𑑅 𑐕𑐐𑐹 𑐮𑐵𑐏 𑐟𑐎𑐵, 𑐮𑐶𑐄 𑑗𑑕 𑐡𑑂𑐰 𑐟𑐎𑐵, 𑐮𑐶𑐫𑐵𑑄𑐮𑐶𑐄 𑑕𑑐 𑐡𑑂𑐰 𑐟𑐎𑐵 𑐰 𑐣𑐶𑐐𑐹 𑐳𑑄𑐎𑐶𑐥𑐵𑐫𑐵𑐟 𑐴𑑅𑐥𑐵𑑅 𑐎𑐠𑑄 𑑒𑑕-𑑒𑑕𑐡𑑂𑐰𑑅 𑐟𑐎𑐵 𑐧𑐶𑐂𑐐𑐸 𑐏𑑃 𑐢𑐵𑑅𑐐𑐸 𑐡𑐸 𑑋 𑐀𑐠𑐾𑐴𑐾 𑐢𑐾𑑄𑐢𑐾𑑄𑐧𑐮𑑂𑐮𑐵𑐏𑐫𑑂 𑐡𑐸𑐠𑑂𑐫𑐵𑑅𑐐𑐸 𑐡𑐎𑑂𑐰𑑄 𑐳𑑄𑐎𑐶𑐥𑐵𑐫𑐵𑐟 𑐗𑐶𑐡𑑂𑐰𑑅–𑐗𑐶𑐡𑑂𑐰𑑅 𑐟𑐎𑐵 𑐣𑐐𑐬𑐥𑐵𑐮𑐶𑐎𑐵𑑄 𑐄𑐥𑐮𑐧𑑂𑐢 𑐫𑐵𑐎𑐷𑐐𑐸 𑐏𑑃 𑐣𑑄 𑐢𑐵𑑅𑐐𑐸 𑐡𑐸 𑑋