𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫 𑐏𑑂𑐫𑑅𑐫𑐵 𑐰𑐶𑐎𑐵𑐳, 𑐥𑑂𑐬𑐔𑐵𑐬𑐥𑑂𑐬𑐳𑐵𑐬, 𑐥𑐸𑐮𑐵𑑄𑐥𑐶𑑄 𑐰 𑐣𑑂𑐴𑐹𑐥𑐸𑐳𑑂𑐟𑐵𑐫𑐵 𑐳𑐵𑐴𑐶𑐟𑑂𑐫𑐎𑐵𑐬 𑐕𑐐𑐹 𑐴𑐾 𑐠𑐵𑐳𑐫𑑂 𑐴𑐫𑐵𑑅 𑐳𑐵𑐴𑐶𑐟𑑂𑐫𑐫𑐵 𑐏𑑂𑐫𑑅𑐫𑐵𑐟 𑐀𑐗 𑐔𑐎𑑄𑐎𑐵 𑐫𑑄𑐎𑐾𑐐𑐸, 𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫 𑐏𑑂𑐫𑑅𑐫𑐵 𑐩𑑂𑐴𑐶𑐐𑑅 𑐰 𑐠𑑁𑑄𑐫𑐵 𑐀𑐰𑐳𑑂𑐠𑐵 𑐀𑐮𑐾 𑐎𑐣𑑂𑐴𑐫𑑂𑐫𑐵 𑐡𑐶𑐣𑐫𑑂 𑐫𑐵𑐫𑐾𑐩𑐵𑑅𑐐𑐸 𑐖𑑂𑐫𑐵, 𑐳𑐩𑐳𑑂𑐫𑐵, 𑐀𑐰𑐳𑐬, 𑐔𑐸𑐣𑑁𑐟𑐶, 𑐠𑐷𑐠𑐷 𑐏𑑂𑐫𑐮𑑄 𑐠𑐸𑐎𑐶𑐫𑐵 𑐰𑐶𑐎𑐵𑐳𑐫𑐵 𑐣𑐶𑑄𑐟𑐶𑑄 𑐩𑑂𑐴𑐶𑐟𑐵𑐔𑑂𑐰𑑄𑐐𑐸 𑐨𑐹𑐩𑐶𑐎𑐵 𑐮𑐐𑐵𑐫𑐟 𑐁𑐥𑐵𑐮𑑄 𑐰𑐶𑐲𑐫𑐫𑑂 𑐣𑑂𑐴𑐶𑐕𑐶𑐫𑑄𑐎𑑄 𑐳𑐴𑐮𑐴 𑐫𑐵𑐫𑐾𑐐𑐸, 𑐔𑑂𑐰𑐳𑐸 𑐧𑑂𑐰𑐣𑐾𑐐𑐸 𑐰 𑐣𑑂𑐫𑐣𑐾𑐐𑐸, 𑐳𑐵𑐴𑐶𑐟𑑂𑐫𑐶𑐎 𑐳𑐦𑐹 𑐥𑐶𑐟𑐧𑑂𑐰𑐖𑑂𑐫𑐵 𑐰 𑐳𑐦𑐹 𑐣𑑂𑐫𑐵𑐫𑐾𑐐𑐸 𑐰 𑐩𑐹𑐮𑐟𑑅 𑐕𑐐𑐹 𑐴𑐾 𑐠𑐵𑐳𑐫𑑂 𑐳𑐵𑐴𑐶𑐟𑑂𑐫𑐫𑐵 𑐠𑐷𑐠𑐷 𑐳𑐰𑐵𑑅 𑐎𑐵𑐫𑐾𑐐𑐸 𑐮𑑂𑐫𑐵𑐏𑑄 𑐰𑑄𑐐𑐸 𑐳𑑂𑐰𑐡𑑃 𑐣𑑂𑐴𑑂𑐫𑐰𑑄𑐣𑐶𑐳𑐾𑑄 𑐣𑑂𑐴𑑂𑐫𑐵𑐣𑐵𑐔𑑂𑐰𑑄𑐐𑐸 𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫 𑐣𑐏𑑅𑐫𑐵 𑐳𑑂𑐰𑑄𑐐𑐹𑐐𑐸 𑐳𑑄𑐳𑑂𑐎𑐬𑐞 𑐣𑐎𑐟𑐶𑐣𑐶 𑐴𑐾 𑐎𑑂𑐰𑐔𑐵𑐮 𑑋

𑐳𑐣𑑂𑐢𑑂𑐫𑐵 𑐚𑐵𑐂𑐩𑑂𑐳 𑐥𑐶𑐠𑐣𑐵 𑐥𑑂𑐬𑐵.𑐮𑐶.𑐫𑐵 𑐮𑐸𑐏𑐵𑑄 𑐥𑐶𑐡𑐣𑐵𑐔𑑂𑐰𑑄𑐐𑐸 ‘𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳’ 𑐣𑑂𑐴𑐶𑐥𑑁𑐫𑐵 𑐐𑑂𑐰𑐳𑐵𑐮𑐫𑑂 𑐠𑐣𑐶𑑄 𑐣𑐶𑐡𑑃 𑐣𑑂𑐴𑑂𑐫𑑅 𑐫𑐮𑐫𑐵 𑐎𑐾𑐱𑐰𑐣𑐵𑐬𑐵𑐫𑐞 𑐔𑐸𑐎𑐫𑑂 𑐖𑐹𑐐𑐸 𑐣𑑂𑐴𑐵𑐥𑐵𑑄𑐐𑐸 𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫 𑐣𑐏𑑅𑐫𑐵 𑐰𑐵𑐒𑑂𑐩𑐫 𑐱𑐟𑐵𑐧𑑂𑐡𑐷𑐥𑐸𑐬𑐸𑐲 𑐳𑐟𑑂𑐫𑐩𑑀𑐴𑐣 𑐖𑑀𑐱𑐷𑑄 𑐄𑐮𑐾𑐖𑑂𑐫𑐵 𑐫𑐵𑐣𑐵𑐡𑐷𑐐𑐸 𑐏𑑅 𑑋 𑐀𑐧𑐮𑐫𑑂 𑐣𑐾𑐥𑐵𑐮𑐨𑐵𑐲𑐵 𑐁𑐣𑑂𑐡𑑀𑐮𑐣𑐫𑐵 𑐣𑑂𑐴𑑂𑐫𑐮𑐸𑐰𑐵 𑐩𑐮𑑂𑐮 𑐎𑐾. 𑐳𑐸𑐣𑑂𑐡𑐬𑐫𑐵 𑐄𑐥𑐣𑑂𑐫𑐵𑐳 ‘𑐡 𑐥𑑀𑐲𑑂𑐚𑐬’ 𑐰 𑐎𑐰𑐶 𑐰𑐳𑐣𑑂𑐟 𑐔𑑁𑐢𑐬𑐷𑐫𑐵 𑐣𑐾𑐥𑐵𑐮𑐨𑐵𑐲𑐵𑑄 𑐀𑐣𑐸𑐡𑐶𑐟 𑐔𑐶𑐣𑐵𑐏𑑃 𑐳𑐦𑐹 ‘𑐰𑐳𑐣𑑂𑐟’𑐫𑐵 𑐥𑐶𑐟𑐧𑑂𑐰𑐖𑑂𑐫𑐵 𑐖𑐹𑐐𑐸 𑐏𑑅 𑑋

𑐀𑐣𑑄𑐮𑐶 𑐠𑐐𑐸𑐣𑐾 𑐣𑐶𑐎𑑂𑐰𑑅𑐐𑐸 𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫 𑐣𑐏𑑅 𑐫𑐮𑐫𑐵 𑐎𑐾𑐱𑐰𑐣𑐵𑐬𑐵𑐫𑐞 𑐔𑐸𑐎 𑐡𑐸𑐣𑐾 𑐔𑑂𑐰𑑄𑐐𑐸 𑐨𑐣𑑂𑐡𑐵𑑅 𑐎𑑂𑐫𑐧𑐫𑑂 𑐖𑐹𑐐𑐸 𑐏𑑅𑐳𑐵 𑐄𑐮𑐾𑐖𑑂𑐫𑐵 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑐵 𑐥𑑂𑐬𑐩𑐸𑐏 𑐰𑐶𑐡𑑂𑐫𑐵𑐳𑐸𑐣𑑂𑐡𑐬 𑐱𑐵𑐎𑑂𑐫 𑐰 𑐫𑐮 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑐵 𑐥𑑂𑐬𑐩𑐸𑐏 𑐔𑐶𑐬𑐶𑐧𑐵𑐧𑐸 𑐩𑐴𑐬𑑂𑐖𑐣𑑄 𑐩𑑄𑐎𑐵𑑅𑐎𑐠𑑄 𑐫𑐵𑐣𑐵𑐡𑐷𑐐𑐸 𑐏𑑅 𑑋 𑐣𑐶𑐎𑑂𑐰𑑅𑐐𑐸 𑐳𑐵𑐴𑐶𑐟𑑂𑐫 𑐣𑐏𑐟𑐫𑑂 𑐧𑐵𑐏𑑄 𑐔𑑂𑐰𑐩𑐶𑐮𑐶𑐳𑐾𑑄 𑐐𑐖𑐮𑐎𑐵𑐬 𑐨𑐹𑐲𑐞𑐥𑑂𑐬𑐳𑐵𑐡 𑐱𑑂𑐬𑐾𑐲𑑂𑐛𑐫𑐵 ‘𑑑𑑐𑑑 𑐕𑐣𑑂𑐡 𑐰 𑑑𑑐𑑑 𑐐𑐖𑐮’, 𑐣𑐶𑐫𑐵𑐟𑑂𑐬𑐵𑐎𑐵𑐬 𑐬𑐵𑐖𑐾𑐣 𑐩𑐵𑐣𑐣𑑂𑐢𑐬𑐫𑐵 𑐄𑐥𑐣𑑂𑐫𑐵𑐳 ‘𑐴𑐮𑐴𑐮 𑐧𑐸𑑄𑐐𑐡𑑂𑐫𑑅’ 𑐰 𑐳𑐩𑐵𑐮𑑀𑐔𑐎 𑐮𑐶𑐳𑐾 𑐎𑑀𑐱𑐎𑐵𑐬 𑐂𑐣𑑂𑐡𑑂𑐬 𑐩𑐵𑐮𑐷𑐫𑐵 ‘𑐣𑐾𑐥𑐵𑐮𑐨𑐵𑐲𑐵𑐫𑐵 𑐫𑐵𑐳𑐸𑐢𑐸𑐎𑐹’ 𑐫𑐵𑐣𑐵𑑅 𑐳𑑂𑐰𑑄𑐐𑐹 𑐳𑐦𑐹 𑐥𑐶𑐟𑐧𑑂𑐰𑐖𑑂𑐫𑐵 𑐖𑐹𑐐𑐸 𑐏𑑅 𑑋

𑐳𑑂𑐰𑐎𑑂𑐰𑑅𑐐𑐸 𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫 𑐣𑐏𑑅 𑐐𑑂𑐰𑐳𑐵𑑅𑐏𑐮𑑅 ‘𑐳𑐣𑑂𑐢𑑂𑐫𑐵 𑐚𑐵𑐂𑐩𑑂𑐳 𑐥𑐶𑐠𑐣𑐵 𑐥𑑂𑐬𑐵.𑐮𑐶.’𑐮𑐶𑐳𑐾𑑄 𑐐𑑂𑐰𑐳𑐵𑑅𑐏𑐮𑑅𑐫𑐵 𑐣𑐵𑐫𑑅 𑐬𑐩𑐾𑐱𑐎𑐵𑐖𑐷 𑐳𑑂𑐠𑐵𑐥𑐶𑐟𑐫𑐵 𑐳𑐨𑐵𑐥𑐟𑐶𑐟𑑂𑐰𑐫𑑂 𑐣𑑂𑐴𑑂𑐫𑐵𑑅𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 ‘𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳’ 𑐣𑑂𑐴𑐶𑐥𑑁𑐫𑐵 𑐳𑐩𑑂𑐥𑐵𑐡𑐎𑐣𑐵𑐥𑑄 𑐐𑑂𑐰𑐳𑐵𑑅𑐏𑐮𑑅𑐫𑐵 𑐣𑑂𑐰𑐎𑐸 𑐳𑐸𑐬𑐾𑐱 𑐩𑐵𑐣𑐣𑑂𑐢𑐬𑑄 𑐮𑐳𑐎𑐸𑐳 𑐫𑐵𑐣𑐵𑐡𑐷𑐐𑐸 𑐏𑑅 𑑋
𑐠𑐸𑐐𑐸𑐳𑐷 𑐳𑑂𑐰𑐎𑑂𑐰𑑅𑐐𑐸 𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫 𑐣𑐏𑐟𑐫𑑂 𑐏𑐸𑐩𑑂𑐴 𑐳𑑂𑐬𑐲𑑂𑐚𑐵𑐫𑐵 𑐣𑑂𑐴𑐫𑑂𑐐𑐹 𑐎𑐺𑐟𑐶 𑐕𑐐𑐹 𑐴𑐾 𑐡𑐧𑐸𑐮𑐶𑐂 𑐥𑐶𑐟𑐧𑑂𑐰𑐖𑑂𑐫𑐵 𑐖𑐹𑐐𑐸 𑐖𑐸𑐮 𑑋

𑐣𑐾𑐥𑐵𑐮𑐨𑐵𑐲𑐵𑐫𑐵 𑐰𑐬𑐶𑐲𑑂𑐛 𑐁𑐏𑑂𑐫𑐵𑐣𑐎𑐵𑐬 𑐩𑐠𑐸𑐬𑐵 𑐳𑐵𑐫𑑂𑐩𑐶𑐫𑐵 𑐁𑐟𑑂𑐩𑐎𑐠𑐵 𑐳𑐦𑐹 ‘𑐳𑐵𑐫𑑂𑐩𑐶, 𑐖𑐶 𑐩𑐠𑐸𑐬𑐵’, 𑐰𑐬𑐶𑐲𑑂𑐛 𑐐𑐖𑐮𑐎𑐵𑐬 𑐨𑐹𑐲𑐞𑐥𑑂𑐬𑐳𑐵𑐡 𑐱𑑂𑐬𑐾𑐲𑑂𑐛𑐫𑐵 𑐐𑐖𑐮 𑐩𑐸𑐣𑐵 𑐳𑐦𑐹 ‘𑐣𑐸𑐐𑑅𑐫𑐵 𑐐𑐸𑐣𑐸𑐐𑐸𑐣𑐸’ 𑐣𑐾𑐥𑐵𑐮𑐨𑐵𑐲𑐵𑐫𑐵 𑐣𑑂𑐴𑐵𑐥𑐵𑑄𑐩𑑂𑐴 𑐖𑐵𑐳𑐸𑐳𑐷 𑐄𑐥𑐣𑑂𑐫𑐵𑐳𑐎𑐵𑐬 𑐬𑐵𑐖 𑐳𑐵𑐫𑑂𑐩𑐶𑐫𑐵 𑐖𑐵𑐳𑐸𑐳𑐷 𑐄𑐥𑐣𑑂𑐫𑐵𑐳 ‘𑐟𑐸𑐫𑐸𑐐𑐸 𑐀𑐖𑑅’, 𑐳𑐵𑐴𑐶𑐟𑑂𑐫𑐎𑐵𑐬𑐮𑐶𑐳𑐾𑑄 𑐁𑐢𑐸𑐣𑐶𑐎 𑐎𑐰𑐶 𑐬𑐵𑐖𑐾𑐣𑑂𑐡𑑂𑐬𑐎𑐸𑐩𑐵𑐬 𑐩𑐴𑐬𑑂𑐖𑐣 ‘𑐥𑐸𑐟𑐵’𑐫𑐵 ‘𑐐𑐖𑐮𑐫𑐵 𑐳𑐶𑐡𑑂𑐢𑐵𑐣𑑂𑐟 𑐰 𑐣𑐾𑐥𑐵𑐮𑐨𑐵𑐲𑐵𑐫𑑂 𑐐𑐖𑐮’ 𑐰 𑐐𑐖𑐮 𑐩𑐸𑐣𑐵 𑐳𑐦𑐹 ‘𑐳𑐸𑐠𑐫𑐵 𑐮𑐶𑐳𑑅’, ‘𑐎𑐰𑐶 𑐧𑐵𑐳𑐸𑐡𑐾𑐰 𑐀𑐢𑐶𑐎𑐵𑐬𑐷𑐫𑐵 𑐣𑐾𑐥𑐵𑐮𑐨𑐵𑐲𑐵𑑄 𑐀𑐣𑐸𑐡𑐶𑐟 𑐔𑐶𑐣𑐵𑐏𑑃 𑐩𑐸𑐣𑐵 𑐳𑐦𑐹 ‘𑐫𑐸𑐬𑑀 𑐳𑑂𑐥𑐬𑑂𑐱’ 𑐰 𑐳𑐵𑐴𑐶𑐟𑑂𑐫𑐎𑐵𑐬 𑐄𑐡𑑂𑐢𑐰 𑐩𑐵𑐳𑑂𑐎𑐾𑐫𑐵 𑐣𑐶𑐫𑐵𑐟𑑂𑐬𑐵 𑐳𑐦𑐹 ‘𑐕𑐐𑐹 𑐣𑐣𑑂𑐡 𑐡𑐾𑐱𑐫𑑂 ….’ 𑐖𑑂𑐫𑐵𑐗𑑂𑐰𑐮𑐫𑑂 𑐥𑐵𑐴𑐵𑑄𑐎𑐠𑑄 𑐗𑐵𑐫𑐵𑐡𑐷𑐥𑐶𑑄 𑐕𑐳𑐶𑐎𑐠𑑄 𑐫𑐾𑑃 𑐩𑐣𑐥𑐵𑐫𑐵 𑐩𑐾𑐫𑐬 𑐱𑐵𑐎𑑂𑐫, 𑐣𑐾𑐥𑐵𑐮𑐨𑐵𑐲𑐵 𑐩𑑄𑐎𑐵𑑅 𑐏𑐮𑑅𑐫𑐵 𑐣𑐵𑐫𑑅 𑐮𑐶𑐳𑐾𑑄 𑐖𑐣𑐎𑐰𑐶 𑐡𑐸𑐬𑑂𑐐𑐵𑐮𑐵𑐮 𑐱𑑂𑐬𑐾𑐲𑑂𑐛, 𑐣𑐾𑐥𑐵𑐮𑐨𑐵𑐲𑐵 𑐊𑐎𑐾𑐡𑐾𑐩𑐶𑐫𑐵 𑐔𑐵𑐣𑑂𑐳𑐮𑐬 𑐔𑐶𑐟𑑂𑐟𑐬𑐘𑑂𑐖𑐣 𑐣𑐾𑐥𑐵𑐮𑐷, 𑐎𑐶𑐥𑐹 𑐣𑐐𑐬𑐥𑐵𑐮𑐶𑐎𑐵𑐫𑐵 𑐩𑐾𑐫𑐬 𑐬𑐩𑐾𑐱 𑐩𑐴𑐬𑑂𑐖𑐣, 𑐣𑐾𑐰𑐵𑑅 𑐣𑑂𑐴𑑂𑐫𑐮𑐸𑐰𑐵𑐮𑐶𑐳𑐾𑑄 𑐄𑐥𑐣𑑂𑐫𑐵𑐳𑐎𑐵𑐬 𑐩𑐮𑑂𑐮 𑐎𑐾. 𑐳𑐸𑐣𑑂𑐡𑐬𑑄 𑐥𑐶𑐟𑐧𑑂𑐰𑐖𑑂𑐫𑐵 𑐫𑐵𑐣𑐵𑐡𑐷𑐐𑐸 𑐏𑑅 𑑋

𑐥𑐶𑐟𑐧𑑂𑐰𑐖𑑂𑐫𑐵 𑐖𑐹𑐐𑐸 𑐣𑑂𑐴𑐫𑑂𑐐𑐸𑐮𑐶𑑄 𑐳𑐦𑐹𑐫𑐵 𑐳𑐩𑐷𑐎𑑂𑐲𑐵 𑐩𑐮𑑂𑐮 𑐎𑐾. 𑐳𑐸𑐣𑑂𑐡𑐬𑑄 𑐫𑐵𑐣𑐵𑐡𑐶𑐮 𑑋𑐄𑐮𑐾𑐖𑑂𑐫𑐵𑐗𑑂𑐰𑑅 𑐰 𑐳𑐦𑐹𑐫𑐵 𑐥𑐶𑐟𑐧𑑂𑐰𑐖𑑂𑐫𑐵 𑐮𑐶𑐥𑐵 𑐳𑐦𑐸𑐮𑐶𑐂 𑐳𑑂𑐬𑐲𑑂𑐚𑐵𑐥𑐶𑐣𑐶𑐐𑐸 𑐮𑑂𑐴𑐵𑑅𑐔𑐶𑑄 𑐟𑐫𑐾𑐐𑐸 𑐖𑑂𑐫𑐵𑐗𑑂𑐰𑑅 𑐣𑑂𑐴𑑂𑐫𑐵𑑅𑐐𑐸 𑐏𑑅𑐳𑐵 𑐀𑐣𑑄𑐮𑐶 𑐳𑐵𑐴𑐶𑐟𑑂𑐫 𑐣𑐏𑑅𑐫𑐵 𑐥𑑂𑐬𑐩𑐸𑐏 𑐁𑐎𑐬𑑂𑐲𑐞𑐩𑐢𑑂𑐫𑐾 𑐕𑐐𑐹 𑐥𑐸𑐔𑑅 𑐳𑐴𑐮𑐴 𑐀𑐣𑑂𑐟𑐬𑑂𑐐𑐟 𑐣𑑂𑐴𑐵𑐥𑐵𑑄𑐐𑐸 𑐣𑑂𑐴𑐶 ‘𑐣𑐾𑐥𑐵𑐮 𑐮𑐶𑐥𑐶𑐫𑐵 𑐥𑐸𑐣𑐬𑐸𑐟𑑂𑐠𑐵𑐣’ 𑐰𑐶𑐲𑐫𑐫𑑂 𑐀𑐣𑑂𑐟𑐎𑑂𑐬𑑂𑐬𑐶𑐫𑐵 𑐖𑐹𑐐𑐸 𑐏𑑅 𑑋

𑐣𑐶𑐬𑑂𑐩𑐮 𑐰𑐖𑑂𑐬𑐵𑐔𑐵𑐬𑑂𑐫 𑐳𑐴𑐖𑐎𑐬𑑂𑐟𑐵 𑐖𑐸𑐫𑐵𑐡𑐷𑐐𑐸 𑐳𑐴𑐮𑐴÷𑐀𑐣𑑂𑐟𑐎𑑂𑐬𑑂𑐬𑐶𑐫𑐵𑐫𑑂 𑐣𑐾𑐥𑐵𑐮 𑐮𑐶𑐥𑐶 𑐐𑐸𑐠𑐶𑐫𑐵 𑐣𑐵𑐫𑑅 𑐣𑐶𑐬𑐘𑑂𑐖𑐣 𑐟𑐧𑑅, 𑐣𑐾𑐥𑐵𑐮 𑐮𑐶𑐥𑐶𑐫𑐵 𑐀𑐨𑐶𑐫𑐣𑑂𑐟𑐵 𑐳𑐸𑐣𑐶𑐟𑐵 𑐜𑑄𑐐𑑀𑐮, 𑐣𑐾𑐥𑐵𑐮 𑐮𑐶𑐥𑐶 𑐳𑐦𑑂𑐚 𑐰𑐾𑐫𑐬 𑐜𑐾𑐨𑐮𑐥𑐬 𑐳𑐸𑐫𑑀𑐐𑑂𑐫𑐬𑐟𑑂𑐣 𑐟𑐵𑐩𑑂𑐬𑐵𑐎𑐵𑐬 𑐰 𑐦𑐣𑑂𑐚𑑀𑐐𑑂𑐬𑐵𑐦𑐬 𑐁𑐣𑐣𑑂𑐡 𑐩𑐴𑐬𑑂𑐖𑐣𑑄 𑐣𑐾𑐥𑐵𑐮 𑐮𑐶𑐥𑐶𑐫𑐵 𑐥𑑂𑐬𑐔𑐵𑐬 𑐥𑑂𑐬𑐳𑐵𑐬, 𑐣𑑂𑐴𑐹 𑐥𑐸𑐳𑑂𑐟𑐵𑐫𑑂 𑐥𑐸𑐳𑑂𑐟𑐵𑐣𑑂𑐟𑐬𑐞, 𑐨𑐵𑐰𑐷 𑐫𑑀𑐖𑐣𑐵 𑐁𑐡𑐶 𑐰𑐶𑐲𑐫𑐫𑑂 𑐠𑑅𑐠𑑅𑐐𑐸 𑐰𑐶𑐔𑐵𑑅 𑐣𑑂𑐴𑑂𑐫𑐧𑑂𑐰𑐫𑐵𑐡𑐷𑐐𑐸 𑐏𑑅 𑑋

𑐰𑐫𑐵𑑄 𑐮𑐶𑐥𑐵 𑐩𑐾𑐐𑐸 𑐳𑐾𑐱𑐣𑐫𑑂 𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫 𑐏𑑂𑐫𑑅𑐫𑐵 𑐰𑐬𑐶𑐲𑑂𑐛, 𑐣𑐵𑑄𑐖𑐵𑑅𑐥𑐶𑑄 𑐰 𑐣𑑂𑐴𑐹𑐥𑐶𑑄 𑐫𑐵𑐣𑐵𑑅 𑐗𑐶𑑄𑐣𑑂𑐫𑐵𑐩𑑂𑐴 𑐳𑑂𑐬𑐲𑑂𑐚𑐵𑐥𑐶𑑄𑐳𑑄 𑐔𑐶𑐣𑐵𑐏𑑃, 𑐧𑐵𑐏𑑄, 𑐐𑐖𑐮, 𑐔𑑂𑐰𑐏𑑃 𑐮𑐐𑐵𑐫𑐟𑐫𑐵 𑐳𑐵𑐴𑐶𑐟𑑂𑐫𑐶𑐎 𑐬𑐔𑐣𑐵 𑐧𑑂𑐰𑐣𑐵𑑅 𑐣𑑂𑐫𑑄𑐎𑐵𑐡𑐶𑐮 𑑋 𑐣𑑂𑐴𑐵𑐥𑐵𑑄𑐐𑐸 𑐣𑑂𑐴𑐶 𑐖𑐣𑐎𑐰𑐶 𑐡𑐸𑐬𑑂𑐐𑐵𑐮𑐵𑐮 𑐱𑑂𑐬𑐾𑐲𑑂𑐛𑐮𑐶𑐳𑐾𑑄 𑐳𑐵𑐴𑐶𑐟𑑂𑐫𑐎𑐵𑐬𑐥𑐶𑑄 𑐌𑐩𑐣𑐬𑐴𑐬𑐶 𑐱𑑂𑐬𑐾𑐲𑑂𑐛, 𑐧𑐵𑐳𑐸𑐡𑐾𑐰 𑐀𑐢𑐶𑐎𑐵𑐬𑐷, 𑐮𑐎𑑂𑐲𑑂𑐩𑐷 𑐩𑐵𑐮𑐷, 𑐳𑐸𑐢𑐷𑐬 𑐏𑑂𑐰𑐧𑐶, 𑐳𑐸𑐱𑐷𑐮 𑐬𑐵𑐖𑑀𑐥𑐵𑐢𑑂𑐫𑐵𑐫, 𑐬𑐵𑐖 𑐳𑐵𑐫𑑂𑐩𑐶, 𑐬𑐾𑐏𑐵 𑐱𑐵𑐎𑑂𑐫, 𑐡𑐶𑐰𑑂𑐫𑐵 𑐟𑐵𑐩𑑂𑐬𑐵𑐎𑐵𑐬, 𑐬𑑀𑐣𑐶𑐎𑐵 𑐱𑑂𑐬𑐾𑐲𑑂𑐛, 𑐡𑐶𑐮𑐷𑐥 𑐱𑐵𑐴𑐷, 𑐳𑐮𑐶𑐣𑐵 𑐩𑐴𑐬𑑂𑐖𑐣, 𑐮𑐎𑑂𑐲𑑂𑐩𑐷𑐎𑐸𑐩𑐵𑐬 𑐩𑐴𑐬𑑂𑐖𑐣 𑐰 𑐩𑐴𑐾𑐱𑐩𑐵𑐣 𑐜𑑄𑐐𑑀𑐮𑑄 𑐠𑑅𑐠𑑅𑐐𑐸 𑐬𑐔𑐣𑐵 𑐥𑐵𑐛 𑐫𑐵𑐣𑐵𑐡𑐷𑐐𑐸 𑐏𑑅 𑑋

𑐣𑑂𑐴𑐵𑐥𑐵𑑄𑐐𑐸 𑐣𑑂𑐴𑐶𑐫𑐵 𑐳𑐵𑐴𑐶𑐟𑑂𑐫 𑐣𑐏𑑅𑐫𑐵 𑐡𑐎𑐮𑐫𑑂 𑐮𑐶𑐥𑐵𑑄𑐐𑐸 𑐧𑑂𑐰𑐫𑑂 𑐳𑐵𑑄𑐐𑐷𑐟𑐶𑐎 𑐖𑑂𑐫𑐵𑐗𑑂𑐰𑐮𑐫𑑂 𑐣𑐾𑐥𑐵𑐮𑐨𑐵𑐲𑐵𑐫𑐵 𑐣𑐵𑑄𑐖𑐵𑑅𑐥𑐶𑑄 𑐩𑑂𑐫𑐾𑑃 𑐴𑐵𑐮𑐵𑐩𑐶𑐥𑐶𑑄 𑐬𑑀𑐖𑐷 𑐜𑑄𑐐𑑀𑐮 𑐱𑑂𑐬𑐾𑐲𑑂𑐛, 𑐬𑐵𑐣𑐷𑐱𑑀𑐨𑐵 𑐩𑐴𑐬𑑂𑐖𑐣𑑄 𑐣𑐾𑐥𑐵𑐮𑐨𑐵𑐲𑐵𑐫𑐵 𑐮𑑀𑐎𑑄𑐴𑑂𑐰𑐵𑑅𑐐𑐸 𑐩𑑂𑐫𑐾𑑃 𑐣𑑂𑐫𑑄𑐎𑐵𑐡𑐷𑐐𑐸 𑐏𑑅𑐳𑐵 𑐣𑐾𑐥𑐵𑐮𑐨𑐵𑐲𑐵 𑐁𑐣𑑂𑐡𑑀𑐮𑐣𑐫𑐵 𑐣𑐵𑑄𑐖𑐵𑑅𑐩𑑂𑐴 𑐣𑑂𑐴𑑂𑐫𑐮𑐸𑐰𑐵𑐮𑐶𑐳𑐾𑑄 𑐳𑐵𑐴𑐶𑐟𑑂𑐫𑐎𑐵𑐬 𑐥𑐡𑑂𑐩𑐬𑐟𑑂𑐣 𑐟𑐸𑐮𑐵𑐢𑐬𑑄 𑐔𑑂𑐰𑐫𑐵𑐡𑐷𑐐𑐸, 𑐣𑐵𑑄𑐖𑐵𑑅𑐩𑑂𑐴 𑐣𑐶𑐬𑑂𑐡𑐾𑐱𑐎 𑐬𑐩𑐾𑐱𑐎𑐵𑐖𑐷 𑐳𑑂𑐠𑐵𑐥𑐶𑐟𑑄 𑐣𑐶𑐬𑑂𑐡𑐾𑐱𑐣 𑐫𑐵𑐣𑐵𑐡𑐷𑐐𑐸 𑐱𑐬𑐡 𑐎𑐳𑐵𑑅 𑐰 𑐎𑐬𑑂𑐞 𑐰𑐖𑑂𑐬𑐵𑐔𑐵𑐬𑑂𑐫𑑄 𑐩𑑂𑐴𑐶𑐟𑐵𑐡𑐷𑐐𑐸 𑐏𑑂𑐫𑐵𑐮𑑅 ‘𑐴𑐸𑐥𑑂𑐥–𑐳𑑂𑐫𑐵𑐥𑑂𑐥’ 𑐰 𑐰𑐶𑐖𑐫 𑐩𑐵𑐣𑐣𑑂𑐢𑐬 ‘𑐳𑑂𑐩𑐵𑐂𑐮𑐶𑑄𑐐 𑐦𑐾𑐳𑑄’ 𑐔𑑂𑐰𑐫𑐵𑐡𑐷𑐐𑐸 𑐀𑐰𑐶𑐣𑐵𑐱𑑄 𑐣𑐶𑐬𑑂𑐡𑐾𑐱𑐣 𑐫𑐵𑐣𑐵𑐡𑐷𑐐𑐸 𑐨𑐶𑐩𑐳𑐾𑐣 𑐬𑐶𑐳𑐵𑐮, 𑐀𑐣𑑂𑐣𑐥𑐹𑐬𑑂𑐞𑐾𑐱𑑂𑐰𑐬𑐷 𑐱𑑂𑐬𑐾𑐲𑑂𑐛, 𑐴𑐬𑐶𑐩𑐵𑐣 𑐡𑐶𑐰𑐵𑐎𑐬, 𑐬𑐵𑐖𑐾𑐱 𑐱𑑂𑐬𑐾𑐲𑑂𑐛, 𑐣𑐵𑐣𑐷𑐩𑐿𑐫𑐵𑑃 𑐥𑑂𑐬𑐖𑐵𑐥𑐟𑐶𑑄 𑐩𑑂𑐴𑐶𑐟𑐵𑐡𑐷𑐐𑐸 𑐏𑑂𑐫𑐵𑐮𑑅 ‘𑐥𑐬𑐵𑐎𑐩𑑂𑐥’ 𑐎𑑂𑐫𑐣𑐾𑐖𑑂𑐫𑐵 𑐖𑐹𑐐𑐸 𑐏𑑅 𑑋

𑐀𑐠𑐾 𑐴𑐾 𑐩𑐾𑐚𑑂𑐬𑑀 𑐊𑐦𑐊𑐩𑐫𑐵 𑐳𑑄𑐔𑐵𑐬𑐎𑑅𑐩𑐶 𑐧𑐿𑐎𑐸𑐞𑑂𑐛 𑐨𑐞𑑂𑐜𑐵𑐬𑐷𑑄 𑐥𑐸𑐮𑐵𑑄𑐩𑑂𑐴 𑐖𑐸𑐖𑐸 𑐖𑑂𑐘𑐵𑐣𑐾𑐣𑑂𑐡𑑂𑐬, 𑐣𑐾𑐎𑐥𑐵𑐫𑐵 𑐀𑐢𑑂𑐫𑐎𑑂𑐲 𑐥𑐸𑐲𑑂𑐥𑐎𑐩𑐮 𑐡𑐵𑐴𑐵𑐮 𑐥𑑂𑐬𑐔𑐞𑑂𑐜 𑐰 𑐎𑐵𑑄𑐐𑑂𑐬𑐾𑐳 𑐳𑐨𑐵𑐥𑐟𑐶 𑐱𑐾𑐬𑐧𑐴𑐵𑐡𑐸𑐬 𑐡𑐾𑐄𑐰𑐵𑑄 𑐣𑐾𑐰𑐵𑑅 𑐨𑐵𑐳𑑄 𑐣𑐰𑐵𑐟 𑐢𑐵𑑅𑐳𑐵 𑐐𑐸𑐎𑐠𑑄 𑐣𑐰𑐵𑐂 𑐢𑐎𑐵𑑅 𑐎𑑂𑐫𑐵𑐬𑐶𑐎𑐾𑐔𑐬 𑐣𑑂𑐴𑑂𑐫𑐧𑑂𑐰𑐫𑐵𑐡𑐷𑐐𑐸 𑐏𑑅 𑑋 𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫 𑐣𑐏𑑅𑐫𑐵 𑐣𑐶𑐣𑑂𑐴𑐸𑐫𑐵 𑐣𑑂𑐴𑐶𑐫𑐵 𑐖𑑂𑐫𑐵𑐗𑑂𑐰𑑅 𑐣𑐾𑐥𑐵𑐮𑐨𑐵𑐲𑐵𑐫𑐵 𑐁𑐏𑑂𑐫𑐵𑐣𑐎𑐵𑐬 𑐩𑐠𑐸𑐬𑐵 𑐳𑐵𑐫𑑂𑐩𑐶𑐮𑐳𑐾 𑐰𑐫𑑂𑐎𑑅𑐫𑐵 𑐳𑐵𑐴𑐶𑐟𑑂𑐫𑐶𑐎 𑐫𑐵𑐟𑑂𑐬𑐵𑐫𑐵 𑐧𑐵𑐬𑐾 𑐣𑑂𑐫𑐣𑐾𑐎𑐣𑐾 𑐫𑐵𑐳𑐾𑑄 𑐣𑑂𑐴𑑂𑐫𑐵𑑅𑐐𑐸 𑐏𑑅 𑑋

𑐥𑐟𑑂𑐬𑐎𑐵𑐬𑐮𑐶𑐳𑐾𑑄 𑐳𑐵𑐴𑐶𑐟𑑂𑐫𑐎𑐵𑐬 𑐬𑐵𑐖𑐾𑐣 𑐩𑐵𑐣𑐣𑑂𑐢𑐬𑑄 𑐣𑑂𑐴𑑂𑐫𑐵𑐎𑐵𑐡𑐷𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐰𑐫𑑂𑐎𑑅𑐫𑐵 𑐳𑐵𑐴𑐶𑐟𑑂𑐫𑐶𑐎 𑐫𑐵𑐟𑑂𑐬𑐵𑐫𑐵 𑐁𑐬𑑀𑐴 𑐀𑐰𑐬𑑀𑐴𑐫𑐵 𑐧𑐵𑐬𑐾 𑐀𑐣𑑂𑐟𑐬𑑄𑐐 𑐏𑑃 𑐖𑐹𑐐𑐸 𑐏𑑅 𑑋
𑐰𑐫𑐵𑑄 𑐮𑐶𑐥𑐵 ‘𑐨𑐵𑐲𑐵 𑐳𑐵𑐴𑐶𑐟𑑂𑐫𑐫𑐵 𑐰𑐶𑐎𑐵𑐳𑐫𑑂 𑐳𑑄𑐎𑐶𑐥𑐵𑐫𑐵 𑐨𑐹𑐩𑐶𑐎𑐵’ 𑐰𑐶𑐲𑐫𑐫𑐵𑐟 𑐎𑐫𑐵𑑅 𑐥𑐸𑐔𑑅 𑐳𑐴𑐮𑐴 𑐖𑐹𑐐𑐸 𑐏𑑅 𑑋 𑐮𑑂𑐫𑐵𑐫𑑂𑐩𑑂𑐴𑐩𑑂𑐴 𑐔𑐷𑐴𑐵𑑅 𑐳𑑄𑐎𑐶𑐥𑐵 𑐣𑐶𑐬𑑂𑐡𑐾𑐱𑐎 𑐬𑐵𑐎𑐾𑐱 𑐩𑐴𑐬𑑂𑐖𑐣 𑐩𑐢𑑂𑐫𑐳𑑂𑐠𑐎𑐬𑑂𑐟𑐵 𑐖𑐸𑐫𑐵𑐡𑐷𑐐𑐸 𑐳𑐴𑐮𑐴𑐫𑑂 𑐰𑐬𑐶𑐲𑑂𑐛 𑐳𑐶𑐣𑐾 𑐥𑐟𑑂𑐬𑐎𑐵𑐬 𑐰𑐶𑐖𑐫𑐬𑐟𑑂𑐣 𑐀𑐳𑑄𑐧𑐬𑐾, 𑐣𑐵𑑄𑐖𑐵𑑅𑐩𑑂𑐴 𑐣𑐶𑐬𑑂𑐡𑐾𑐱𑐎 𑐁𑐬𑑂𑐫𑐩 𑐣𑐎𑑅𑐩𑐶, 𑐧𑐴𑐸𑐔𑐬𑑂𑐔𑐶𑐟 𑐳𑑄𑐎𑐶𑐥𑐵 𑐔𑑂𑐰𑐵𑐥𑐸 𑐦𑐫𑑂𑐫𑐵 𑐣𑐶𑐬𑑂𑐩𑐵𑐟𑐵 𑐌𑐩𑐔𑐬𑐞 𑐀𑐩𑐵𑐟𑑂𑐫 𑐰 𑐣𑐾𑐰𑐵𑑅 𑐣𑐵𑐥𑑄 𑐏𑐫𑑂 𑐨𑐵𑐫𑑂𑐫𑐵 𑐳𑑄𑐎𑐶𑐥𑐵𑐫𑐵 𑐣𑐵𑑄𑐖𑐵𑑅𑐩𑑂𑐴 𑐣𑐵𑐫𑐶𑐎𑐵 𑐁𑐱𑐶𑐲𑑂𑐩𑐵 𑐣𑐎𑑅𑐩𑐶𑑄 𑐧𑑂𑐰𑐟𑐶 𑐎𑐫𑐵𑐡𑐷𑐐𑐸 𑐏𑑅 𑑋

𑐣𑐶𑐣𑑂𑐴𑐸𑐫𑐵 𑐣𑑂𑐴𑐶𑐫𑐵 𑐔𑑂𑐰𑐳𑐸 𑐧𑑂𑐰𑐣𑐾 𑐖𑑂𑐫𑐵𑐗𑑂𑐰𑐮𑐫𑑂 𑐰𑐬𑐶𑐲𑑂𑐛 𑐐𑐖𑐮𑐎𑐵𑐬𑐮𑐶𑐳𑐾𑑄 𑐧𑐵𑐏𑑄 𑐔𑑂𑐰𑐩𑐶 𑐨𑐹𑐲𑐞𑐥𑑂𑐬𑐳𑐵𑐡 𑐱𑑂𑐬𑐾𑐲𑑂𑐛, 𑐎𑐶𑐥𑐹 𑐣𑐐𑐬𑐥𑐵𑐮𑐶𑐎𑐵𑐫𑐵 𑐩𑐾𑐫𑐬 𑐬𑐩𑐱 𑐩𑐴𑐬𑑂𑐖𑐣𑐮𑐶𑐳𑐾𑑄 𑐳𑐵𑐴𑐶𑐟𑑂𑐫𑐎𑐵𑐬𑐥𑐶𑑄 𑐜𑐵. 𑐥𑐸𑐲𑑂𑐥𑐬𑐵𑐖 𑐬𑐵𑐖𑐎𑐬𑑂𑐞𑐶𑐎𑐵𑐬, 𑐳𑑂𑐣𑐾𑐴 𑐳𑐵𑐫𑑂𑐩𑐶, 𑐩𑐴𑐾𑐣𑑂𑐡𑑂𑐬𑐐𑑀𑐥𑐵𑐮 𑐎𑐬𑑂𑐩𑐵𑐔𑐵𑐬𑑂𑐫, 𑐬𑐖𑐣𑐷 𑐩𑐶𑐮𑐵, 𑐬𑐵𑐩𑐾𑐱𑑂𑐰𑐬 𑐩𑐶𑐱𑑂𑐬𑐞 𑐱𑑂𑐬𑐾𑐲𑑂𑐛, 𑐬𑐵𑐖𑐾𑐣𑑂𑐡𑑂𑐬𑐎𑐸𑐩𑐵𑐬 ‘𑐥𑐸𑐟𑐵’, 𑐎𑐺𑐲𑑂𑐞𑐨𑐎𑑂𑐟 𑐧𑑀𑐜𑐾, 𑐬𑐶𑐟𑐵 𑐩𑐴𑐬𑑂𑐖𑐣, 𑐬𑐵𑐩𑐐𑑀𑐥𑐵𑐮 𑐁𑐱𑐸𑐟𑑀𑐲, 𑐳𑐸𑐖𑐶𑐟𑐵 𑐩𑐵𑑅𑐖𑐸, 𑐖𑑂𑐘𑐵𑐣𑐷𑐬𑐵𑐖𑐵 𑐩𑐵𑐣𑐣𑑂𑐢𑐬, 𑐩𑐷𑐣𑐵 𑐰𑐖𑑂𑐬𑐵𑐔𑐵𑐬𑑂𑐫, 𑐡𑐱𑐬𑐵𑐖 𑐱𑐵𑐎𑑂𑐫, 𑐬𑐩𑐾𑐱 𑐩𑐵𑐣𑐣𑑂𑐢𑐬, 𑐱𑑀𑐨𑐵 𑐩𑐴𑐬𑑂𑐖𑐣, 𑐬𑐾𑐞𑐸 𑐱𑑂𑐬𑐾𑐲𑑂𑐛, 𑐳𑐵𑐬𑐳 𑐔𑐬𑐷, 𑐴𑐾𑐩𑐣𑑂𑐟𑐶𑐎𑐵 𑐁𑐬𑐊𑐮 𑐥𑐵𑐮𑐶𑐏𑐾 𑐮𑐐𑐵𑐫𑐟𑐫𑐵 𑐥𑐸𑐮𑐵𑑄𑐥𑐶𑑄 𑐰 𑐣𑑂𑐴𑐹𑐥𑐶𑑄 𑐬𑐔𑐣𑐵𑐎𑐵𑐬𑑄 𑐳𑐵𑐴𑐶𑐟𑑂𑐫 𑐥𑐵𑐛 𑐫𑐵𑐣𑐵𑐡𑐷𑐐𑐸 𑐏𑑅 𑑋

𑐣𑐶𑐣𑑂𑐴𑐸𑐫𑐵 𑐣𑑂𑐴𑐶𑐫𑐵 𑐡𑐎𑐮𑐫𑑂 𑐮𑐶𑐥𑐵 𑐣𑑂𑐴𑑂𑐫𑐎𑐸𑐣𑑂𑐴𑐸 𑐩𑑂𑐫𑐾𑑃 𑐣𑑂𑐫𑑄𑐎𑐵𑐡𑐷𑐥𑐶𑑄 𑐣𑐶𑐩𑑂𑐴 𑐎𑐮𑐵𑐎𑐵𑐬𑐮𑐶𑐳𑐾𑑄 𑐫𑐩𑐣 𑐱𑑂𑐬𑐾𑐲𑑂𑐛, 𑐣𑑂𑐴𑑂𑐫𑐎𑐸𑐣𑑂𑐴𑐸𑐫𑐵 𑐣𑐶𑐥𑐸 𑐏𑑂𑐫𑐵𑐮𑑅𑐮𑐶𑐳𑐾𑑄 𑐣𑐵𑑄𑐖𑐵𑑅𑐩𑑂𑐴 𑐣𑐶𑐬𑑂𑐡𑐾𑐱𑐎, 𑐔𑑂𑐰𑐩𑐶, 𑐎𑐮𑐵𑐎𑐵𑐬 𑐬𑐵𑐩𑐎𑐺𑐲𑑂𑐞 𑐏𑐜𑑂𑐐𑐷𑑄 𑐔𑑂𑐰𑐫𑐵𑑅 𑐣𑐶𑐬𑑂𑐡𑐾𑐱𑐣 𑐫𑐵𑐣𑐵𑐡𑐷𑐐𑐸 𑐰 𑐰𑐫𑑂𑐎𑑅 𑐠𑑅𑐮𑐶𑐳𑐾𑑄 𑐬𑐖𑐣𑐷 𑐏𑐜𑑂𑐐𑐷, 𑐬𑐵𑐖𑐣 𑐱𑐵𑐴𑐷 𑐰 𑐬𑐸𑐥𑐾𑐣𑑂𑐡𑑂𑐬 𑐱𑑂𑐬𑐾𑐲𑑂𑐛 𑐠𑐎𑑂𑐰𑐵𑐩𑐶𑑄 𑐩𑑂𑐴𑐶𑐟𑐵𑐡𑐷𑐐𑐸 𑐏𑑂𑐫𑐵𑐮𑑅 ‘𑐫𑐩𑐬𑐵𑐖𑐫𑐵 𑐩𑐩𑑅’𑐣𑐵𑐥𑑄 𑐰 𑐎𑑂𑐫𑐵𑐬𑐶𑐎𑐾𑐔𑐬 𑐣𑑂𑐴𑑂𑐫𑐧𑑂𑐰𑑅𑐐𑐸 𑐏𑑅 𑑋

𑐣𑐶𑐣𑑂𑐴𑐸𑐫𑐵 𑐣𑑂𑐴𑐶𑐫𑐵 𑐖𑑂𑐫𑐵𑐗𑑂𑐰𑐮𑐫𑑂 𑐴𑐾 𑐣𑐎𑐟𑐶𑐣𑐶 𑐖𑐎 𑐎𑑂𑐰𑐔𑐵𑑅𑐐𑐸 ‘𑐣𑐾𑐥𑐵𑐮𑐨𑐵𑐲𑐵 𑐔𑐷𑐴𑐵𑑅 𑐳𑑄𑐎𑐶𑐥𑐵 𑐎𑐵𑐳𑐵’𑐫𑑂 𑐄𑐟𑑂𑐎𑐺𑐲𑑂𑐚 𑐖𑐸𑐫𑐵𑐡𑐷𑐥𑐶𑑄 𑐰 𑐧𑑂𑐰𑐟𑐶 𑐎𑐫𑐵𑐡𑐷𑐥𑐶𑑄 𑐳𑐎𑐳𑐶𑐟𑑄 𑐳𑐴𑐬𑐷 𑐰𑐶𑐎𑐵𑐳 𑐬𑐵𑐖𑑂𑐫𑐩𑐣𑑂𑐟𑑂𑐬𑐷 𑐬𑐵𑐩𑐰𑐷𑐬 𑐩𑐵𑐣𑐣𑑂𑐢𑐬𑑄 𑐡𑐳𑐶𑐥𑑁, 𑐳𑐶𑐬𑐥𑐵𑑅𑐮𑐶𑐳𑐾𑑄 𑐡𑐵𑑄 𑐮𑑅𑐮𑑂𑐴𑐵𑐣𑐵𑐡𑐷𑐐𑐸 𑐏𑑅 𑑋
#𑐣𑑂𑐴𑑂𑐫𑐧𑑂𑐰𑑅𑐩𑑂𑐴 : 𑐄𑐡𑐾𑐣 𑐣𑑂𑐴𑐹𑐳𑐵𑐫𑑂𑐩𑐶