𑐫𑐾𑑃 – 𑐣𑐾𑐥𑐵𑐮𑐨𑐵𑐲𑐵 𑐊𑐎𑐾𑐡𑐩𑐶𑐫𑐵 𑐐𑑂𑐰𑐳𑐵𑐮𑐫𑑂 𑐣𑐾𑐥𑐵𑐮𑐨𑐵𑐲𑐵𑐫𑐵 𑐳𑐦𑐹 𑐧𑑂𑐰𑐖𑑂𑐫𑐵 𑐖𑐸𑐂𑐐𑐸 𑐖𑐹𑐐𑐸 𑐡𑐸 𑑋 𑐠𑑂𑐰 𑐰𑐴𑐾 𑐰𑐂𑐐𑐸 𑐐𑐸𑑄𑐮𑐵𑐠𑑂𑐰 𑐣𑐰𑐩𑐶𑐣𑐶𑐳𑐾𑑄 𑐊𑐎𑐵𑐡𑐱𑐶𑐟𑐎 𑐳𑑂𑐰𑐣𑑂𑐴𑐸𑐫𑑄𑐎𑑄 𑐖𑐸𑐂𑐐𑐸 𑐄𑐐𑐸 𑐳𑐦𑐹 𑐧𑑂𑐰𑐖𑑂𑐫𑐵 𑐫𑐮𑐫𑐵 𑐄𑐐𑑂𑐬𑐔𑐞𑑂𑐜𑐷 (𑐟𑐩𑐎𑑅)𑐡𑑂𑐫𑑅𑐫𑐵 𑐥𑐬𑐶𑐳𑐬𑐫𑑂 𑐖𑐸𑐂 𑑋 𑐠𑐸𑐐𑐸𑐳𑐷 𑐖𑐸𑐂𑐐𑐸 𑐳𑐦𑐹 𑐧𑑂𑐰𑐖𑑂𑐫𑐵𑐫𑐵 𑐴𑐾 𑐗𑑂𑐰𑐮𑐫𑑂 𑐳𑑂𑐰𑐣𑑂𑐴𑐸𑐫𑑄𑐎𑑄 𑐰𑐶𑐱𑐾𑐲 𑐁𑐎𑐬𑑂𑐲𑐞𑐎𑐠𑑄 𑐠𑐷𑐠𑐷 𑐖𑑂𑐫𑐵𑐗𑑂𑐰𑑅 𑐖𑐸𑐂𑐐𑐸 𑐊𑐎𑐾𑐡𑐩𑐶𑑄 𑐖𑐵𑐣𑐎𑐵𑐬𑐷 𑐧𑐶𑐄𑐐𑐸 𑐡𑐸 𑑋

𑐧𑑂𑐰𑐖𑑂𑐫𑐵𑐫𑐵 𑐣𑑂𑐴𑐵𑐥𑐵𑑄𑐐𑐸 𑐡𑐶𑑄 𑐄𑐮𑐾𑐖𑑂𑐫𑐵𑐮𑐶𑐳𑐾𑑄 ‘𑐣𑐾𑐰𑐵𑑅 𑐥𑑂𑐬𑐖𑑂𑐘𑐵’ 𑐖𑐬𑑂𑐣𑐮𑐫𑐵 𑐳𑑂𑐰𑑄𑐐𑐹𑐐𑐸 𑐮𑑂𑐫𑐵𑑅𑐫𑐵 𑐣𑑄 𑐥𑐶𑐟𑐧𑑂𑐰𑐖𑑂𑐫𑐵 𑐖𑐸𑐂 𑑋 𑐠𑐸𑐐𑐸𑐳𑐷𑐫𑐵 𑐮𑑂𑐫𑐵𑑅 𑐣𑐾𑐥𑐵𑐮𑑄 𑐥𑐶𑐣𑐾 𑐔𑑂𑐰𑑄𑐥𑐶𑑄 𑐣𑐾𑐰𑐵𑑅𑐮𑐶𑐳𑐾𑑄 𑐰𑐶𑐡𑐾𑐱𑐷 𑐰𑐶𑐡𑑂𑐰𑐵𑐣𑐥𑐶𑑄𑐳𑑄 𑐣𑐾𑐰𑐵𑑅𑐟𑐫𑑂 𑐧𑐵𑐬𑐾 𑐔𑑂𑐰𑐫𑐵𑐟𑑅𑐐𑐸 𑐔𑑂𑐰𑐳𑐸 𑐡𑐸𑐠𑑂𑐫𑐵𑐎𑐵𑑅 𑐄𑐐𑐸 𑐖𑐬𑑂𑐣𑐮 𑐥𑐶𑐠𑐣𑐾𑐟𑑂𑐫𑑄𑐐𑐸 𑐏𑑅 𑑋

𑐀𑐠𑐾 𑐴𑐾 𑐧𑑂𑐰𑐖𑑂𑐫𑐵𑐫𑐵 𑐣𑐶𑐣𑑂𑐴𑐸𑐫𑐵 𑐣𑑂𑐴𑐶𑐎𑐸𑐣𑑂𑐴𑐸 𑐣𑐾𑐥𑐵𑐮 𑐮𑐶𑐥𑐶 𑐐𑐸𑐠𑐶𑐫𑐵 𑐐𑑂𑐰𑐳𑐵𑐮𑐫𑑂 𑐣𑐾𑐥𑐵𑐮 𑐮𑐶𑐥𑐶𑐫𑐵 𑐧𑑂𑐰𑐖𑑂𑐫𑐵 𑐫𑐵𑐫𑐾𑐐𑐸 𑐖𑑂𑐫𑐵𑐗𑑂𑐰𑑅 𑐟𑐫𑐵𑐟𑑅𑐐𑐸 𑐡𑐸𑐳𑐵 𑐮𑐶𑐥𑐵𑑄𑐐𑐸 𑐣𑑂𑐴𑐶𑐎𑐸𑐣𑑂𑐴𑐸 𑐳𑑄𑐎𑐶𑐥𑐵𑐎𑑅𑐩𑐶, 𑐎𑐮𑐵𑐎𑐵𑐬, 𑐥𑑂𑐬𑐵𑐰𑐶𑐢𑐶𑐎 𑐰 𑐄𑐡𑑂𑐫𑑀𑐐𑐷, 𑐰𑑂𑐫𑐵𑐥𑐵𑐬𑐷𑐳𑐴𑐶𑐟𑐫𑐵 𑐄𑐥𑐳𑑂𑐠𑐶𑐟𑐶𑐂 𑐣𑐾𑐥𑐵𑐮𑐨𑐵𑐲𑐵𑐫𑐵 𑐳𑑄𑐎𑐶𑐥𑐵 𑐧𑐵𑐬𑐾 𑐰𑐶𑐔𑐵𑐬 𑐐𑑀𑐲𑑂𑐛𑐶 𑐣𑑄 𑐫𑐵𑐂𑐐𑐸 𑐖𑐹𑐐𑐸 𑐡𑐸 𑑋 𑐮𑐶𑐳𑐾𑑄 𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫𑐫𑐵 𑐰𑐶𑐲𑐫𑐫𑑂 𑐣𑑄 𑐀𑐣𑑂𑐟𑐎𑑂𑐬𑑂𑐬𑐶𑐫𑐵 𑐖𑑂𑐫𑐵𑐗𑑂𑐰𑑅 𑐖𑐸𑐂𑐐𑐸 𑐊𑐎𑐾𑐡𑐾𑐩𑐶𑐫𑐵 𑐡𑐸𑐖𑑅 𑐮𑐶𑐳𑐾𑑄 𑐧𑑂𑐰𑐖𑑂𑐫𑐵 𑐄𑐥𑐎𑐩𑐶𑐚𑐷𑐫𑐵 𑐎𑐖𑐶 𑐰𑐶𑐖𑐫𑐬𑐟𑑂𑐣 𑐀𑐳𑑄𑐧𑐬𑐾𑑄 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐷𑐐𑐸 𑐡𑐸 𑑋

𑐧𑑂𑐰𑐖𑑂𑐫𑐵𑐫𑑂 𑐳𑑂𑐚𑐮 𑐟𑐫𑐾𑐐𑐸 𑐩𑑄 𑐡𑐸𑐥𑐶𑑄𑐳𑑄 𑐠𑑂𑐰 𑐴𑐾 𑐰𑐂𑐐𑐸 𑐡𑐶𑐮𑑂𑐮𑐵𑐐𑐵 𑐁𑐩𑐵𑐂𑐟𑐎𑐫𑐵 𑐡𑐸𑐣𑐾 𑐳𑑂𑐰𑐵𑐥𑐹 𑐟𑐫𑐵𑑅 𑐠𑑅𑐐𑐸 𑐠𑐵𑐫𑑂 𑐳𑐸𑐬𑐎𑑂𑐲𑐶𑐟 𑐫𑐵𑐣𑐵𑐡𑐷𑐟 𑐣𑑄 𑐐𑑂𑐰𑐳𑐵𑑅 𑐏𑐮𑐎𑑄 𑐂𑐣𑐵𑐥 𑐫𑐵𑑅𑐐𑐸 𑐡𑐸 𑑋 𑐰𑑄𑐐𑐸 𑐥𑑂𑐫𑐡𑑃 𑐣𑑂𑐴𑑂𑐫𑐰𑑄𑐣𑐶𑐳𑐾𑑄 𑐊𑐎𑐾𑐡𑐩𑐶𑑄 𑐠𑐸𑐎𑐠𑑄𑐫𑐵 𑐧𑑂𑐰𑐖𑑂𑐫𑐵 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐏𑑅𑐳𑐵 𑐠𑐸𑐐𑐸𑐳𑐷 𑐖𑐸𑐂𑐐𑐸 𑐧𑑂𑐰𑐖𑑂𑐫𑐵𑐫𑑂 𑐳𑑂𑐚𑐮𑐫𑐵 𑐣𑐶𑑄𑐟𑐶𑑄 𑐐𑐸𑐐𑐸𑑄 𑐱𑐸𑐮𑑂𑐎 𑐮𑐐𑐾 𑐩𑐖𑐸𑐂𑐐𑐸 𑐊𑐎𑐾𑐡𑐩𑐶𑑄 𑐖𑐵𑐣𑐎𑐵𑐬𑐷 𑐧𑐶𑐄𑐐𑐸 𑐡𑐸 𑑋

𑐧𑑂𑐰𑐖𑑂𑐫𑐵 𑐟𑐵𑑅𑐮𑐵𑐎𑐾𑐫𑐵 𑐣𑐶𑑄𑐟𑐶𑑄 𑐀𑐳𑑄𑐧𑐬𑐾𑐫𑐵 𑐳𑑄𑐫𑑀𑐖𑐎𑐟𑑂𑐰𑐫𑑂 𑐕𑐐𑐹 𑐄𑐥𑐎𑐩𑐶𑐚𑐷 𑐣𑑄 𑐣𑐷𑐳𑑂𑐰𑑄𑐐𑐸 𑐡𑐸𑐳𑐵 𑐄𑐎𑐷 𑐱𑐵𑐣𑑂𑐟𑐬𑐵𑐖 𑐱𑐵𑐎𑑂𑐫, 𑐥𑐰𑐶𑐟𑑂𑐬 𑐎𑐳𑐵𑑅, 𑐬𑐵𑐖𑐷𑐰 𑐬𑐵𑐖𑑀𑐥𑐵𑐢𑑂𑐫𑐵𑐫, 𑐳𑐸𑐬𑐖𑐰𑐷𑐬 𑐰𑐖𑑂𑐬𑐵𑐔𑐵𑐬𑑂𑐫, 𑐣𑐺𑐥𑐾𑐣𑑂𑐡𑑂𑐬𑐮𑐵𑐮 𑐱𑑂𑐬𑐾𑐲𑑂𑐛, 𑐩𑐶𑐣𑐵 𑐰𑐖𑑂𑐬𑐵𑐔𑐵𑐬𑑂𑐫 𑐰 𑐬𑐵𑐖𑐸𑐬𑐵𑐖𑐡𑐾𑐰 𑐰𑐖𑑂𑐬𑐵𑐔𑐵𑐬𑑂𑐫 𑐡𑐸𑐖𑑅𑐎𑐠𑑄 𑐮𑑂𑐫𑐫𑐵𑐐𑐸 𑐊𑐎𑐾𑐡𑐩𑐶𑐫𑐵 𑐳𑐡𑐳𑑂𑐫 𑐳𑐔𑐶𑐰 𑐩𑐮𑑂𑐮 𑐎𑐾. 𑐳𑐸𑐣𑑂𑐡𑐬𑑄 𑐎𑐣𑐵𑐡𑐶𑐮 𑑋