𑐫𑐾𑑃 – 𑐳𑑂𑐎𑐸𑐮𑐫𑑂 𑐁𑐏𑑅 𑐧𑑂𑐰𑐣𑐷𑐥𑐶𑑄 𑐔𑐶𑐔𑐶𑐢𑐶𑐎𑑅𑐥𑐶𑑄 𑐩𑐳𑑂𑐟𑐫𑑂𑐟 𑐀𑐢𑑂𑐫𑐫𑐣𑐫𑑂 𑐐𑑂𑐰𑐵𑐴𑐵𑐮𑐶 𑐫𑐵𑐫𑐾𑐐𑐸 𑐮𑑂𑐫𑐵𑐏𑑄 ‘𑐳𑑂𑐩𑐵𑐬𑑂𑐚𑐬 𑐩𑑀𑐧𑐵𑐂𑐮 𑐊𑐥’ 𑐳𑐵𑐬𑑂𑐰𑐖𑐣𑐶𑐎 𑐫𑐵𑑅𑐐𑐸 𑐡𑐸 𑑋 𑐩𑑂𑐫𑐵𑐎𑑂𑐳 𑐎𑐣𑐾𑐎𑑂𑐚 𑐥𑑂𑐬𑐵.𑐮𑐶𑑄 𑐳𑑄𑐔𑐵𑐮𑐣𑐫𑑂 𑐴𑑅𑐐𑐸 𑐄𑐐𑐸 𑐩𑑀𑐧𑐵𑐂𑐮 𑐊𑐥 𑐕𑐐𑐹 𑐖𑑂𑐫𑐵𑐗𑑂𑐰𑑅𑐫𑐵 𑐡𑐠𑐸𑐂 𑐣𑐵𑑄𑐖𑐵𑑅𑐥𑐶𑑄 𑐴𑐵𑐳𑑂𑐫 𑐎𑐮𑐵𑐎𑐵𑐬𑐡𑑂𑐰𑐫 𑐩𑐡𑐣𑐎𑐺𑐲𑑂𑐞 𑐱𑑂𑐬𑐾𑐲𑑂𑐛 𑐰 𑐴𑐬𑐶𑐰𑑄𑐱 𑐁𑐔𑐵𑐬𑑂𑐫𑑄 𑐳𑐵𑐬𑑂𑐰𑐖𑐣𑐶𑐎 𑐫𑐵𑐣𑐵𑐡𑐷𑐐𑐸 𑐏𑑅 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐣𑐰𑐵𑐳𑐾𑑄 𑐩𑐴 𑐖𑑀𑐜𑐷𑑄 𑐠𑑅𑐥𑐶𑑄 𑐳𑑂𑐎𑐸𑐮𑐫𑑂 𑐁𑐏𑑅 𑐧𑑂𑐰𑐣𑐵𑐔𑑂𑐰𑑄𑐐𑐸 𑐂𑐮𑐫𑑂 𑐀𑐖𑑂𑐫𑐵𑑅𑐐𑐸 𑐥𑑂𑐬𑐰𑐶𑐢𑐶 𑐩𑐡𑐸𑐐𑐸𑐮𑐶𑑄 𑐁𑐏𑑅 𑐧𑑂𑐰𑐣𑐾𑐟 𑐴𑐾 𑐟𑐳𑐎𑑄 𑐠𑐵𑐎𑐹𑐐𑐸 𑐢𑐵𑐳𑐾𑑄 𑐠𑑁𑑄𑐎𑐣𑑂𑐴𑐫𑑂 𑐥𑑂𑐬𑐰𑐶𑐢𑐶𑐫𑐵 𑐎𑐵𑐬𑐞𑑄 𑐰𑐶𑐡𑑂𑐫𑐵𑐬𑑂𑐠𑐷𑐟𑐫𑑂𑐟 𑐁𑐏𑑅 𑐧𑑂𑐰𑐣𑐾𑐐𑐸𑐮𑐶𑐂 𑐟𑐳𑐎𑑄 𑐳𑐴𑐖 𑐖𑐹𑐰𑐣𑐵𑐔𑑂𑐰𑑄𑐐𑐸 𑐢𑐵𑐬𑐞𑐵 𑐟𑐫𑐵𑐡𑐶𑐮 𑑋 𑐩𑑂𑐫𑐵𑐎𑑂𑐳 𑐎𑐣𑐾𑐎𑑂𑐚𑐫𑐵 𑐥𑑂𑐬𑐩𑐸𑐏 𑐎𑐵𑐬𑑂𑐫𑐎𑐵𑐬𑐷 𑐀𑐢𑐶𑐎𑐺𑐟 𑐖𑐷𑐟 𑐬𑐵𑐐𑐧𑑄 𑐥𑑂𑐫𑑄𑐐𑐹𑐣𑐶𑐳𑐾𑑄 𑐐𑐸𑑄𑐐𑐹 𑐟𑐐𑐶𑑄𑐟𑐎𑐫𑐵 𑐰𑐶𑐡𑑂𑐫𑐵𑐬𑑂𑐠𑐷𑐫𑐵𑐟 𑐮𑐎𑑂𑐲𑐶𑐟 𑐫𑐵𑐣𑐵𑑅 𑐥𑐵𑐛𑑂𑑂𑐫𑐎𑑂𑐬𑐩𑐎𑐠𑑄 𑐴𑐾 𑐄𑐐𑐸 𑐊𑐥 𑐟𑐫𑐵𑐬 𑐫𑐵𑐣𑐵𑐐𑐸 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐶𑐮 𑑋

𑐄𑐐𑐸 𑐊𑐥𑐥𑐵𑐏𑐾𑑄 𑐀𑐣𑐮𑐵𑐂𑐣 𑐰 𑐀𑐦𑐮𑐵𑐣𑐂 𑐣𑐶𑐐𑐸𑐮𑐶𑑄 𑐩𑐵𑐢𑑂𑐫𑐩𑑄 𑐰𑐶𑐡𑑂𑐫𑐵𑐬𑑂𑐠𑐷𑐟𑐫𑑂𑐳𑑄 𑐀𑐢𑑂𑐫𑐫𑐣 𑐫𑐵𑐫𑐾 𑐦𑐂 𑐢𑐵𑐳𑐾𑑄 𑐰𑐫𑑂𑐎𑐮𑑄 𑐕𑐩𑑂𑐴 𑐰𑐶𑐡𑑂𑐫𑐵𑐬𑑂𑐠𑐷𑑄 𑐣𑑂𑐫𑐵𑐡𑑂𑐰𑑅 𑐟𑐎𑐵 𑐱𑐸𑐮𑑂𑐎 𑐥𑐸𑐮𑐵𑑅 𑐊𑐥𑐫𑐵 𑐳𑐾𑐰𑐵 𑐎𑐵𑐫𑐾 𑐦𑐂𑐐𑐸 𑐣𑑄 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐶𑐮 𑑋 𑐀𑐠𑐾 𑐴𑐾 𑐡𑐾𑐫𑑂𑐣𑑂𑐫𑑄𑐎𑑄𑐫𑐵 𑐜𑐶𑐮𑐬𑐥𑐵𑐏𑐾𑑄 𑐡𑐎𑑂𑐰𑑄 𑐳𑑂𑐎𑐸𑐮𑐟𑐎 𑐄𑐐𑐸 𑐊𑐥𑐳𑐫𑐵𑐟 𑐠𑑂𑐫𑑄𑐎𑐾𑐐𑐸 𑐫𑑀𑐖𑐣𑐵 𑐡𑐸𑐐𑐸 𑐣𑑄 𑐰𑐫𑑂𑐎𑐮𑑄 𑐢𑐫𑐵𑐡𑐶𑐮 𑑋

𑐳𑑄𑐳𑑂𑐠𑐵𑐫𑐵 𑐣𑐶𑐬𑑂𑐡𑐾𑐱𑐎 𑐬𑐵𑐖𑐾𑐱 𑐟𑐸𑐮𑐵𑐢𑐬𑑄 𑐄𑐐𑐸 𑐊𑐥 𑐫𑐸𑐬𑑀𑐥, 𑐀𑐳𑑂𑐚𑑂𑐬𑐾𑐮𑐶𑐫𑐵, 𑐀𑐩𑐾𑐬𑐶𑐎𑐵𑐫𑑂 𑐠𑐾𑑄 𑐣𑐾𑐥𑐵𑐮𑐫𑑂 𑐣𑑄 𑐳𑑂𑐎𑐸𑐮𑐫𑐵 𑐰𑐶𑐡𑑂𑐫𑐵𑐬𑑂𑐠𑐷𑐟𑐫𑑂𑐟 𑐀𑐢𑑂𑐫𑐫𑐣𑐫𑑂 𑐐𑑂𑐰𑐵𑐴𑐵𑐮𑐶 𑐖𑐸𑐂𑐐𑐸 𑐰𑐶𑐱𑑂𑐰𑐵𑐳 𑐥𑑂𑐰𑑄𑐎𑐵𑐡𑐶𑐮 𑑋 𑐳𑑄𑐳𑑂𑐠𑐵𑐫𑐵 𑐥𑑂𑐬𑐧𑐣𑑂𑐢 𑐣𑐶𑐬𑑂𑐡𑐾𑐱𑐎 𑐬𑐷𑐣𑐵 𑐰𑐖𑑂𑐬𑐵𑐔𑐵𑐬𑑂𑐫𑑄 𑐩𑑂𑐫𑐵𑐎𑑂𑐳 𑐎𑐣𑐾𑐎𑑂𑐚 𑐚𑐶𑐩𑑄 𑐠𑑁𑐫𑐵 𑐜𑐶𑐖𑐶𑐚𑐮 𑐥𑑂𑐬𑐰𑐶𑐢𑐶𑐫𑐵 𑐫𑐸𑐐𑐫𑐵𑐟 𑐮𑑂𑐰𑐫𑐾𑐎 𑐊𑐥 𑐡𑐫𑐾𑐎𑐵𑑅 𑐣𑐾𑐥𑐵𑑅𑐫𑐵 𑐱𑐶𑐎𑑂𑐲𑐵 𑐏𑑂𑐫𑑅𑐫𑐵𑐟 𑐳𑐴𑐖 𑐫𑐵𑐫𑐾𑐐𑐸 𑐎𑐸𑐟𑑅 𑐫𑐵𑐣𑐵𑐔𑑂𑐰𑐣𑐵𑐐𑐸 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐶𑐮 𑑋

𑐄𑐐𑐸 𑐳𑑄𑐳𑑂𑐠𑐵𑐫𑐵 𑐥𑐸𑐔𑐮𑑄 𑐠𑑂𑐰 𑐳𑑂𑐰𑐫𑐵𑑄 𑐣𑑂𑐴𑑂𑐫𑑅 ‘𑐩𑑂𑐫𑐵𑐎𑑂𑐳 𑐎𑐣𑐾𑐎𑑂𑐚 𑐂𑐁𑐬𑐥𑐷’ 𑐣𑐵𑑄𑐫𑐵 𑐩𑑀𑐧𑐵𑐂𑐮 𑐊𑐥𑐥𑐵𑐏𑐾𑑄 𑐣𑐾𑐥𑐵𑑅 𑐰 𑐨𑐵𑐬𑐟𑐫𑐵 𑐥𑑂𑐫𑐳𑑅 𑐳𑑂𑐰𑐫𑐵𑑄 𑐀𑐥𑑂𑐰𑑅 𑐳𑑂𑐎𑐸𑐮 𑐰 𑐣𑐶𑐐𑐹 𑐮𑐵𑐏 𑐣𑑂𑐫𑐫𑑂𑐣𑑂𑐴𑐫𑑂𑐡𑑂𑐰𑐮𑑄 𑐩𑐮𑑂𑐫𑐵𑐎 𑐰𑐶𑐡𑑂𑐫𑐵𑐬𑑂𑐠𑐷𑐫𑐵𑐟 𑐁𑐰𑐡𑑂𑐢 𑐫𑐵𑐣𑐵𑑅 𑐳𑐾𑐰𑐵 𑐧𑐶𑐫𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋