𑐖𑐵𑐎𑐶 𑐦𑐕𑐶𑐂 𑐕𑐩𑑂𑐰𑑅 𑐮𑐧𑑅 𑐣𑐫𑐾𑐐𑐸

𑐖𑐶𑐩𑐶 𑐩𑐵𑑄𑐫𑐵 𑐣𑐵𑑄 𑐩𑐵𑐣𑐎𑐸𑐩𑐵𑐬𑐷 𑐩𑐵𑐣𑐣𑑂𑐢𑐬 𑐀𑐮𑐾 𑐧𑐵𑑅𑐫𑐵 𑐣𑐵𑑄 𑐩𑑄𑐐𑐮𑐡𑐵𑐳 𑐩𑐵𑐣𑐣𑑂𑐢𑐬 𑐏𑑅 𑑋 𑐖𑐶𑐩𑐶 𑐧𑐵𑑅 𑐰 𑐖𑐶𑐐𑐸 𑐣𑐵𑑄 𑐕𑐐𑐹 𑐴𑐾 𑑋 𑐖𑐶𑐐𑐸 𑐣𑐵𑐩𑐫𑑂 𑐡𑐵𑐳 𑐖𑐎 𑐩𑐡𑐸 𑑋 𑐖𑐶 𑑑𑑙𑑙𑑖 𑐳𑐵𑐮 𑐖𑐾𑐛𑑄 𑐎𑐶𑐥𑐹𑐫𑐵 𑐎𑐸𑐟𑐸𑐳𑐵𑑅 𑐟𑑂𑐰𑐵𑐮𑐫𑑂 𑐧𑐹𑐐𑐸 𑑋 𑐖𑐶 𑐩𑐔𑐵𑐧𑐮𑐫𑑂 𑐀𑐥𑑂𑐰𑑅 𑐴𑐾 𑐩𑑂𑐴𑐶𑐟𑐾𑐐𑐸 𑐖𑐎 𑑋 𑐮𑐶𑐎𑑂𑐎𑐳𑑄 𑐔𑑂𑐰𑑄𑐐𑐸 𑐮𑐵𑐕𑐶 𑐟𑑂𑐰𑐵𑐮𑐫𑑂 𑐰𑐣𑐵𑑅 𑐥𑐵𑐳𑐵𑐥𑐶𑑄 𑐣𑐵𑐥𑑄 𑐐𑐸𑐔𑑂𑐔𑐵 𑐩𑑂𑐴𑐶𑐟𑑅 𑐰𑐣𑐾𑐐𑐸 𑑋 𑐨𑐐𑐰𑐵𑐣 𑐡𑑂𑐫𑑅 𑐡𑐸𑐠𑐵𑐫𑑂 𑐔𑑂𑐫𑐵𑐩𑑂𑐥𑐟𑐶 𑐣𑑄 𑐩𑑂𑐴𑐶𑐟𑐵 𑑋

𑐖𑐶𑐩𑐶𑐐𑐸 𑐟𑑂𑐰𑐵𑐮𑑄 𑑑𑑐–𑑑𑑕 𑐩𑐶𑐣𑐾𑐚 𑐟𑐶 𑐴𑐶𑐖𑐵𑐦𑐮𑑄 𑐎𑐸𑐴𑐵𑑄 𑐰𑐣 𑐎𑐶 𑐩𑐹𑐮 𑐏𑐸𑐳𑐶 𑐰𑐂 𑑋 𑐩𑐵𑐎𑑂𑐰𑑅𑐔𑐵 𑐎𑑂𑐰𑐫𑑂 𑐰 𑐩𑐹𑐮 𑐏𑐸𑐳𑐶𑐂 𑐣𑑂𑐫𑐵𑑅 𑐮𑐵𑑅 𑐰𑐣𑐾𑐐𑐸 𑑋 𑐏𑐸𑐸𑐳𑐶𑐫𑐵 𑐮𑑅 𑐟𑐳𑐎𑑄 𑐫𑐔𑑂𑐔𑐸𑐳𑐾 𑐔𑑂𑐰𑑄 𑑋 𑐥𑐵𑐳𑐵𑐥𑐶𑑄 𑐣𑐵𑐥 𑐰 𑐴𑐾 𑐏𑐸𑐳𑐶𑐂 𑐣𑑂𑐫𑐵 𑐰 𑐎𑑄𑐐𑐮𑐶 𑐮𑐵𑐫𑐾𑐐𑐸 𑑋 𑐎𑑄𑐐𑐮𑐶 𑐢𑐂𑐥𑐶𑑄 𑐗𑐶𑐥𑐵 𑐮𑑂𑐴𑐵𑑅𑐟𑐸𑐟𑐶 𑐡𑐸𑐥𑐶𑑄, 𑐗𑐚𑑂𑐚 𑐳𑑂𑐰𑐫𑐾𑐧𑐮𑐫𑑂 𑐣𑑂𑐫𑐵 𑐠𑐾𑑄 𑐔𑑂𑐰𑑄 ! 𑐎𑑄𑐐𑐮𑐶𑐟 𑐏𑐸𑐳𑐶 𑐳𑐶𑐠𑐫𑑂 𑐥𑑂𑐰𑐵𑐮𑐫𑑂 𑐥𑑂𑐰𑐵𑐮𑐫𑑂 𑐳𑐸𑐮𑐵𑐔𑑂𑐰𑐣𑐷 𑑋

𑐣𑑂𑐫𑐵 𑐮𑐵𑐫𑐾𑐐𑐸 𑐖𑐵𑑅 𑐩𑐡𑐸, 𑐄𑐎𑐶𑑄 𑐖𑐶𑐩𑐶𑐳𑑄 𑐣𑑂𑐴𑑂𑐫𑐵𑐧𑐮𑐾𑑄 𑐮𑑂𑐴𑐵𑐟𑑄 𑐴𑐾 𑐎𑑄𑐐𑐮𑐶 𑐳𑐵𑐮𑐵 𑐎𑐵𑐫𑐾𑐐𑐸, 𑐮𑑂𑐴𑐵𑑅𑐟𑐸𑐟𑐶 𑐟𑑂𑐰𑐠𑐸𑐮𑐵 𑐧𑐷𑐐𑐸 𑑋 𑐮𑑂𑐴𑐵𑑅𑐟𑐸𑐟𑐶 𑐟𑑂𑐰𑐠𑐸𑐮 𑐎𑐶 𑐎𑑄𑐐𑐮𑐶 𑐳𑐣𑐾 𑐦𑐂𑐩𑐏𑐸 𑑋 𑐀𑐮𑐾 𑐰 𑐡𑐎𑑂𑐰𑑄 𑐟𑐥𑐸𑐮𑐶𑐂 𑐩𑐸𑐣𑐵 𑐴𑐫𑐾𑐐𑐸 𑑋 𑐣𑑂𑐫𑐵 𑐣𑑄 𑐮𑑂𑐴𑐵𑐟𑑄 𑐴𑐾 𑐮𑐵𑐫𑐾𑐐𑐸, 𑐮𑐵𑐫𑐾𑐰𑑄 𑐠𑐸𑐏𑐾 𑐧𑑃𑐫𑑂 𑐮𑑂𑐰𑐴𑑄𑐟𑐫𑑂 𑐧𑐳𑑂𑐰𑐵𑐫𑐾𑐐𑐸, 𑐣𑑂𑐫𑐵 𑐳𑐶𑐟𑐎𑐶 𑐳𑐶𑐣𑑂𑐎𑐵𑐫𑑂 𑐩𑐵𑑅 𑐴𑐣𑐾𑐐𑐸 𑑋 𑐰 𑐣𑑂𑐫𑐵 𑐰 𑐎𑑄𑐐𑐮𑐶 𑐕𑐾𑑃𑐫𑑂 𑐖𑑂𑐰𑐣𑐵 𑐰𑐫𑐾𑐐𑐸 𑑋 𑐳𑐦𑐵 𑐫𑐵𑐫𑐾𑐐𑐸 𑑋

𑐎𑑄𑐐𑐮𑐶 𑐢𑐵𑑅𑐳𑐵 𑐮𑑂𑐰𑐴𑑄𑐩𑐵𑐫𑑂 𑐕𑐎𑑅 𑐕𑑂𑐫𑐵𑐫𑐾𑐐𑐸 𑐀𑐮𑐾 𑐟𑐶𑐣𑐶 𑐢𑐰𑑅𑐔𑐵𑐫𑑂 𑐥𑐸𑐎𑐾𑐐𑐸 𑑋𑐣𑑂𑐫𑐵 𑐰 𑐎𑑄𑐐𑐮𑐶 𑐥𑐸𑐎𑐵𑑅 𑐀𑐥𑑂𑐰𑑅𑐠𑐾𑑄 𑐧𑐖𑐶𑐣𑐵𑐥 𑐣𑐫𑐾𑐐𑐸 𑑋 𑐥𑐵𑐳𑐵𑐥𑐶𑑄 𑐣𑐵𑐥 𑐔𑑂𑐰𑐣𑐵𑑅 𑐣𑐫𑐾𑐐𑐸 𑑋 𑐐𑐧𑐮𑐾𑑄 𑐐𑐧𑐮𑐾𑑄 𑐬𑐧𑐬𑐫𑐵 𑐮𑐶𑐥𑑂𑐥𑐵 (𑐎𑐥𑑂𑐟𑐵𑐣𑐔𑐵) 𑐡𑐫𑐾𑐎𑐵𑑅 𑐎𑑂𑐫𑐧𑐫𑑂 𑐰𑐣𑐵𑑅 𑐔𑐏𑐸𑑄𑐔𑐵 𑐳𑑂𑐫𑐵𑐫𑐾𑐐𑐸 𑑋 𑐧𑐏𑐸𑑄 𑐣𑑄 𑐳𑑂𑐫𑐵𑐣𑐵 𑑋 𑐥𑐵 𑐥𑐸𑐫𑐵𑑅 𑐳𑐦𑐵 𑐫𑐵𑐣𑐵𑑅 𑐔𑐏𑐸𑑄𑐧𑐏𑐸𑑄𑐫𑐵 𑐟𑐬𑐎𑐵𑐬𑐶 𑐡𑐫𑐾𑐎𑐵𑑅 𑐣𑐫𑐾𑐐𑐸 𑑋

𑐥𑐵𑐳𑐵𑐥𑐶𑑄 𑐣𑐵𑐥 𑐖𑐵𑐣𑐵𑑅 𑐣𑑂𑐫𑐵 𑐰 𑐎𑑄𑐐𑐮𑐶 𑐮𑐵𑑅 𑐰𑐣𑐾𑐐𑐸 𑐰 𑐮𑐶𑐥𑑂𑐥𑐵 𑐖𑑂𑐰𑐣𑐵𑑅 𑐔𑐏𑐸𑑄𑐧𑐏𑐸𑑄 𑐳𑑂𑐫𑐵𑑅 𑐖𑐸𑐂𑐐𑐸 𑐖𑑂𑐫𑐵𑑄 𑐫𑐵𑐣𑐵𑑅 𑐩𑐔𑐵𑐧𑐮𑐫𑑂 𑐁𑐏𑑅 𑐧𑑂𑐰𑐣𑐾 𑐩𑐏𑐣 𑑋 𑐖𑐶 𑐫𑐵𑐎𑑅 𑐎𑐵𑐫, 𑐖𑐶 𑐟𑐟𑐵 𑐕𑐩𑑂𑐴 𑐰 𑐎𑐾𑐴𑐾𑑄 𑐕𑐩𑑂𑐴 𑐡𑐸, 𑐂𑐩𑐶𑐟 𑐣𑑄 𑐳𑑂𑐎𑐸𑐮𑐫𑑂 𑐧𑑂𑐰𑑄𑐎𑐾𑐩𑐕𑐰𑑅 𑑋 𑐖𑐶 𑑑𑑐 𑐡𑑃 𑐡𑐸𑐧𑐮𑐫𑑂 𑐳𑑂𑐎𑐸𑐮𑐫𑑂 𑐨𑐬𑑂𑐣𑐵 𑐫𑐵𑐣𑐵𑐧𑐶𑐮 𑑋 𑐧𑐵𑐑𑐨𑐿𑐬𑐰 𑐮𑐶𑐎𑑂𑐎 𑑒𑑐𑑐𑑘 𑐳𑐵𑐮𑐫𑑂 𑐔𑐵𑐫𑐾𑐎𑐹𑐐𑐸 𑐕𑐐𑐹 𑐥𑐵𑐛𑐱𑐵𑐮𑐵 𑐡𑐸 𑑋 𑐧𑐬𑑂𑐩𑐹 𑐧𑐵𑐖𑑂𑐫𑐵 𑐕𑐩𑑂𑐴 𑐁𑐏𑑅 𑐧𑑂𑐰𑑄𑐎𑐷𑐩𑑂𑐴 𑑋

𑐁𑐏𑑅 𑐧𑑂𑐰𑑄𑐰𑑅𑐥𑐶𑑄 𑐳𑐎𑐮𑐾𑑄 𑐴𑐾 𑐕𑐐𑐹 𑐴𑐾 𑐎𑑂𑐮𑐵𑐳𑐫𑑂 𑑋 𑐐𑑂𑐰𑐬𑐮𑐫𑑂 𑐟𑐸𑐫𑐸𑐐𑐸 𑐳𑐮𑐵𑐩𑑄 𑐁𑐏𑑅 𑐔𑑂𑐰𑐫𑐾𑐐𑐸 𑑋 𑐣𑐩𑑀𑐧𑐵𑐐𑐶𑐣𑐶𑐳𑐾𑑄 𑐀 𑐁 𑐂 𑐃… 𑐟 𑐁𑐏𑑅 𑐔𑑂𑐰𑐫𑐾𑐐𑐸 𑐳𑑂𑐫𑐣 𑑋 𑐮𑐶𑐥𑐵 𑐴𑐵𑐎𑐣𑑄 𑐩𑐾𑐐𑐸 𑐳𑑂𑐎𑐸𑐮 𑐔𑐵𑐮, 𑐀𑐣 𑐕𑐐𑐹 𑐎𑑂𑐮𑐵𑐳𑑄𑐣𑐶𑐳𑐾𑑄 𑐔𑑂𑐫𑐵𑐐𑐹 𑐎𑑂𑐮𑐵𑐳𑐟𑐎 𑐧𑑂𑐰𑐣𑐵 𑑋 𑐫𑐾𑑃𑐫𑑂𑐣𑐶𑐳𑐾𑑄 𑐩𑐵𑐳𑑂𑐟𑐬 𑐰𑐫𑐵𑑅 𑐁𑐏𑑅 𑐧𑑂𑐰𑑄𑐎𑑅 𑐰𑐂𑐐𑐸 𑑋 𑐎𑑂𑐮𑐵𑐳𑐫𑑂 𑐩𑐶𑐳𑐵𑐥𑐶𑑄 𑐣𑐶𑐩𑑂𑐴 𑐳𑑂𑐰𑐩𑑂𑐴 𑐴𑐾 𑐖𑐎 𑐡𑐸 𑑋 𑐩𑐶𑐖𑑄𑐟 𑐢𑐵𑑅𑐳𑐵 𑐫𑐎𑑂𑐰 𑐡𑐸 𑑋

𑐖𑐶𑐩𑐶 𑐠𑐵𑐣𑐵 𑐎𑐵𑐥𑑅𑐫𑐵 𑐟𑐥𑐵𑑅𑐮𑑄 𑐳𑐸𑐬𑐸𑐰𑐵𑑅 𑐣𑑂𑐴𑑂𑐫𑐵𑐫𑐾𑐐𑐸, 𑐟𑐥𑐸𑐮𑐶𑑄 𑐥𑐸𑐂𑐐𑐸 𑑋 𑐮𑐵𑐎𑐵𑑄 𑐣𑑂𑐴𑑂𑐫𑐵𑐫𑐾𑐐𑐸 𑐔𑐮𑐣 𑐩𑐡𑐸 𑐟𑐬 𑐮𑐶𑐥𑐵 𑐳𑑂𑐎𑐸𑐮 𑐰𑐣𑐵𑐧𑐮𑐫𑑂 𑐟𑐶𑐣𑐶 𑐟𑐶𑐣𑐳𑐹𑐖 𑐮𑐵𑐎𑐵𑑄 𑐣𑑂𑐴𑑂𑐫𑐵𑐣𑐵 𑑋 𑐕𑐾𑑃𑐫𑑂 𑐎𑐵𑐥𑑅 𑐠𑐵𑐫𑐾𑐐𑐸 𑐟𑐵𑑄𑐐𑐵 𑐡𑐸, 𑐩𑐵𑐩𑑂𑐴𑑄 𑐎𑐵𑐥𑑅 𑐠𑐵𑐂 𑑋 𑐕𑐾𑑃𑐫𑑂 𑐎𑐸𑐟𑐶 𑐣𑑄 𑐰𑐵𑐣𑐵 𑑋 𑐖𑐶𑑄 𑐣𑑄 𑐀𑐖𑐶, 𑐩𑐵𑑄, 𑐎𑐾𑐴𑐾𑑄𑐣𑐵𑐥 𑐎𑐸𑐟𑐶 𑐰𑐵𑐫𑐾 𑐣𑑄 𑑋 𑐕𑐰𑐵𑑅𑐟𑐎 𑐐𑐵𑐎𑑂𑐎 𑐎𑐸𑐟𑐶 𑐰𑐵𑐫𑐾𑐐𑐸 𑑋 𑐣𑑂𑐴𑐶𑑄𑐣𑑂𑐴𑐶𑑄 𑐎𑐸𑐟𑐶 𑐩𑐰𑐵𑐣𑐵 𑑋

𑐎𑐸𑐟𑐶 𑐰𑐵𑐣𑐵𑑅 𑐥𑐶𑐎𑐫𑐵𑐐𑐸 𑐖𑐵𑐎𑐶 𑐕𑐾𑑃𑐫𑑂 𑐣𑐫𑐾𑐟 𑐮𑑂𑐫𑑄𑐎𑐵𑑅 𑐩𑐾𑐐𑐸 𑐧𑑀𑐬𑐵𑐫𑑂 𑐎𑐸𑐧𑐶𑐫𑐵𑑅 𑐖𑐶𑑄 𑐫𑐾𑑃𑐫𑐵 𑐔𑐶𑐎𑑄𑐩𑐸𑐐𑑅 𑐐𑐮𑑂𑐮𑐶𑐂 𑐩𑐶𑐄 𑐰𑐣𑐾𑐐𑐸 𑑋 𑐖𑐵𑐎𑐶 𑐦𑐕𑐶𑐫𑐵 𑐣𑑂𑐫𑐵𑐩𑑂𑐰𑑅 𑐟𑐹, 𑐳𑑂𑐰𑐬𑑂𑐎𑐵𑑄 𑐩𑐷𑐐𑐸 𑑋 𑑑𑑒 𑐥𑐵𑐠𑐶 𑐟𑐎 𑐩𑐶𑐫𑐵 𑐰𑐫𑐾𑐐𑐸 𑑋 𑐦𑐕𑐶𑐫𑐵 𑐕𑐩𑑂𑐰𑑅 𑐮𑐧𑑅 𑐣𑐫𑐾𑐐𑐸 𑑋 𑐨𑐶𑐩𑐝𑐸𑑄𑐐𑐵 𑐰 𑐦𑐫𑑂𑐏𑐵𑐫𑐵 𑐜𑐵𑑃𑐜𑐵𑐫𑑂 𑐩𑑀𑐴𑐣𑐶 𑐣𑑂𑐴𑑂𑐫𑑅 𑐳𑑃𑐫𑑂𑐟𑐫𑑂𑐳𑑄 𑐩𑐷 𑐴𑐂𑐐𑐸 𑐖𑐵𑐎𑐶 𑐣𑑂𑐫𑐵𑐣𑐵𑑅 𑐣𑑄 𑐫𑐾𑑃 𑐰𑐣𑐵𑑅 𑐩𑐶𑐄 𑐰𑐣𑐵 𑑋

𑐀𑐠𑐾 𑐩𑐶𑐄 𑐰𑐣𑐾𑐧𑐮𑐫𑑂 𑐣𑑂𑐴𑐵𑐥𑐵𑑄 𑐖𑐵 𑐣𑐫𑐵𑑅 𑐣𑑂𑐫𑐵𑐳𑐶 𑐰𑐣𑐾𑐐𑐸, 𑐁𑑅 𑐠𑐾𑑄 𑐩𑑀𑐚𑐬 𑐩𑐡𑐸𑐣𑐶 𑑋 𑐧𑐵𑑅𑐣𑑄 𑐔𑐶𑐟𑑂𑐮𑐵𑐒, 𑐨𑐿𑑄𑐳𑐾𑑄 𑐡𑐸𑐬𑐸, 𑐏𑑁𑐔𑐵 𑐎𑐫𑐵 𑐴𑐂, 𑐖𑐶𑐩𑐶𑐠𑐵𑐫𑑂 𑐳𑐵𑐮𑐫𑑂 𑐎𑐵𑐎𑐵𑑅 𑐔𑐶𑐎𑑄 𑐥𑐶𑐎𑐵𑐂, 𑐔𑐶𑐎𑑄 𑐣𑑄 𑐩𑐶𑐫𑐵 𑑋 𑐎𑐶𑐥𑐸𑐮𑐶𑐂 𑐣𑐫𑐵𑑃𑐧𑐖𑐵𑐬𑑄 𑐥𑐱𑑂𑐔𑐶𑐩 𑐰𑐣𑐾𑐧𑐮𑐫𑑂 𑐗𑑂𑐰𑑅𑐮𑐶𑐎𑑂𑐎 𑐥𑑂𑐫𑑄𑐐𑐹 𑐥𑐸𑐏𑐹 𑐡𑐸, 𑐩𑐨𑐶𑑄 𑐥𑐸𑐏𑐹, 𑐨𑐶𑑄 𑐥𑐸𑐏𑐹 𑐀𑐮𑐾 𑐳𑐵𑐐𑐮𑐫𑑂 𑐔𑑂𑐰𑑄𑐐𑐸 𑐮𑐧 𑐥𑐸𑐏𑐹 𑐰 𑐢𑐸𑑄𑐎𑐵𑑅𑐫𑐵 𑐔𑐶𑐢𑑄 𑐥𑐸𑐏𑐹 𑑋 𑐡𑐹 𑐧𑑂𑐫𑑄𑐎𑐾𑐐𑐸 𑐥𑐸𑐏𑐹 𑐏𑑅 𑑋

𑐣𑑂𑐴𑐵𑐥𑐵 𑐀𑐣 𑐖𑑀𑐐𑐶𑐟𑐫𑑂𑐳𑑄 𑐮𑐴𑐶𑐣𑐵𑐟𑑅𑐥𑐶𑑄 𑐦𑐵 𑐖𑑂𑐰𑐫𑐾 𑐴𑐂𑐐𑐸, 𑐟𑐳𑐎𑑄 𑐦𑑀𑐴𑐬 𑑋 𑐥𑑄𑐔𑐵𑐫𑐟𑐎𑐵𑐮𑐫𑑂 𑐥𑑂𑐬𑐢𑐵𑐣𑐥𑑄𑐔 𑐖𑐹𑐥𑐶𑑄𑐳𑑄 𑐰 𑐥𑐸𑐏𑐹 𑐩𑐶𑐫𑐵𑐧𑐶𑐮 𑑋 𑐰 𑐢𑑂𑐫𑐧𑐵𑑄 𑐢𑐮𑑂𑐥𑐵𑐫𑑂 𑐳𑑂𑐎𑐸𑐮 𑐕𑐐𑐹 𑐡𑐫𑐾𑐎𑐮 𑑋 𑐁𑑅 𑐔𑐶𑐢𑑄 𑐥𑐸𑐏𑐹 𑐩𑑄𑐟, 𑐕𑐾𑑃 𑐥𑑂𑐫𑐏𑐵 𑐡𑐟 𑑋 𑐁𑑅 𑐣𑑄 𑐀𑐣 𑐩𑐣𑐹𑐟 𑐡𑐹 𑐹𑐧𑑂𑐫𑑄𑐎𑑅 𑐰𑑅𑐣𑐶, 𑐳𑐶𑐩𑐵 𑐕𑐩𑐵 𑐢𑐵𑑅𑐳𑐵 𑐁𑐟𑐎 𑐣𑑄 𑐡𑐣𑐶 𑐀𑐣 𑑋𑐳𑐵𑐐𑐮𑐫𑑂 𑐥𑐸𑐏𑐹𑐫𑐵 𑐮𑐶𑐎𑑂𑐎 𑐳𑑀¥𑐴𑐏𑐸𑐚𑑂𑐚𑐾 𑐦𑐮𑑂𑐔𑐵 𑐕𑐐𑐹 𑐡𑐸, 𑐰 𑐦𑐮𑑂𑐔𑐵𑐫𑑂 𑐮𑑅 𑐠𑐮 𑐡𑐫𑐾𑐎𑐵𑐟𑑅𑐐𑐸 𑐡𑐸, 𑐩𑐵𑐟𑐵𑐟𑐶𑐬𑑂𑐠 𑐰𑐣𑐵𑐰𑑅𑐥𑐶𑑄𑐟 𑐰 𑐠𑐮𑐫𑑂 𑐔𑑂𑐰𑑄𑐐𑐸 𑐮𑑅 𑐟𑑂𑐰𑑄𑐎𑐷𑐐𑐸 𑐔𑐮𑐣 𑐡𑐸 𑑋

𑐣𑑂𑐴𑐵𑐥𑐵 𑐣𑑂𑐴𑐵𑐥𑐵 𑐰 𑐳𑑂𑐰𑑄𑐐𑐹 𑐥𑐸𑐏𑐸𑐮𑐶𑐂 𑐴𑑂𑐫𑐵𑐄𑑃𑐥𑐶𑑄, 𑐟𑐸𑐫𑐸𑐥𑐶𑑄 𑐣𑑂𑐫𑐵 𑐮𑐴𑐶𑐣𑐵𑑅 𑐩𑐷𑐐𑐸 𑐰𑑂𑐫𑐰𑐳𑑂𑐠𑐵 𑐣𑑄 𑐡𑐸𑐐𑐸, 𑐮𑐶𑐥𑐵 𑐝𑐮 𑐣𑐶𑐎𑐵𑐳 𑐡𑐫𑐾𑐎𑐹𑐧𑐮𑐫𑑂 𑐥𑐸𑐏𑐹𑐟 𑐳𑐸𑐣𑐵𑐰𑐣 𑑋 𑐎𑐶𑐥𑐸𑐮𑐶𑐂 𑐮𑑅𑐫𑐵 𑐡𑐸𑑅𑐏 𑐩𑐡𑐸, 𑐴𑐶𑐟𑐶 𑐡𑐸, 𑐟𑐸𑑄 𑐡𑐸, 𑐟𑐬 𑐰𑐶𑐖𑐸𑐮𑐷 𑐩𑐟 𑐖𑐎 𑐩𑐡𑐸 𑑋 𑐖𑐶 𑐧𑑂𑐫𑐵𑐴𑐵 𑐫𑐵𑐫𑐾 𑐣𑑂𑐴𑑂𑐫𑑅 𑐖𑐎 𑐩𑐟 𑐰𑑅𑐐𑐸 𑑋 𑑑𑑖 𑐳𑐵𑐮𑐫𑑂 𑐟𑑀𑐏𑐵𑐫𑑂 𑐔𑑂𑐰𑑄𑐩𑑂𑐴 𑐬𑐟𑑂𑐣𑐡𑐾𑐰𑐷 𑐩𑐵𑐣𑐣𑑂𑐢𑐬𑐣𑐵𑐥 𑐖𑐶𑐐𑐸 𑐧𑑂𑐫𑐵𑐴𑐵 𑐖𑐸𑐮 𑑋 𑐖𑐣𑑂𑐟𑐶 𑐰𑑅𑐥𑐶𑑄𑐟 𑐚𑑂𑐬𑐎𑐫𑑂 𑐟𑐫𑐵𑑅 𑐩𑐵𑐩𑑂𑐴𑑄 𑐨𑐩𑑂𑐔𑐵 𑐎𑐵𑑅 𑐰𑐣 𑑋

𑐀𑐮𑐾 𑐨𑐩𑑂𑐔𑐶𑐟 𑐐𑑂𑐰𑑄𑐐𑑅𑐧𑐸𑑃𑐂𑐟𑐎 𑐡𑐹𑐮𑐶𑐂 𑐟𑐫𑐵𑐴𑐮 , 𑐀𑐣𑑄 𑐴𑐵𑐎𑐣𑑄 𑐚𑑂𑐬𑐎𑐫𑑂 𑐟𑐫𑐵𑑅 𑐴𑐮 𑑋 𑐀𑐧𑐮𑐫𑑂 𑐨𑐩𑑂𑐔𑐶𑐟 𑐣𑐶𑐟𑑀𑐮𑐵𑐫𑐵 𑐳𑐶𑐏𑑅𑐩𑐵𑑅 𑐰 𑐩𑐸𑐣𑑂𑐡𑑂𑐬𑐶𑐔𑐵𑑅 𑐧𑐶𑐫𑐵𑐐𑐸 𑑋 𑐀𑐧𑐮𑐫𑑂 𑐮𑐸𑑃 𑐕𑐟𑑀𑐮𑐵𑐫𑐵 𑐳𑐕𑐶 𑐟𑐎𑐵 𑐖𑐎 𑐟𑐬 𑐩𑐵𑑄𑐥𑐶𑑄 𑐣𑐸𑐐𑑅 𑐳𑑂𑐫𑐵𑑅 𑑋 𑐮𑐸𑑃 𑐩𑐣𑑂𑐫𑐵𑐳𑐾 𑐠𑑅𑐥𑐶𑐣𑐶𑐐𑐸 𑐴𑐾 𑐥𑐸𑐮𑐵𑑄𑐐𑐸 𑐟𑐶𑐳𑐵 𑐳𑑂𑐫𑑄𑐎𑐵𑑅 𑐨𑐩𑑂𑐔𑐶𑐟 𑐳𑐶𑐏𑑅 𑐰 𑐩𑐸𑐣𑑂𑐡𑑂𑐬𑐶𑐔𑐵𑑅 𑐡𑐫𑐾𑐎𑐵𑐧𑐶𑐮 𑑋
𑐖𑐶 𑐧𑑂𑐫𑐵𑐴𑐵 𑐫𑐵𑐫𑐾 𑐣𑑂𑐴𑑂𑐫𑑅 𑑑÷𑑒 𑐳𑐵𑐮𑐫𑑂 𑐧𑐵𑑅𑐣𑑄 𑐳𑐮𑑂𑐫𑐵𑐣𑐠𑐵𑐣𑐫𑐵 𑑕 𑐬𑑀𑐥𑐣𑐷 𑐖𑐐𑑂𑐐𑐵 𑐣𑑂𑐴𑐫𑑂𑐳𑐮𑑄 𑐣𑑂𑐫𑐵𑐟, 𑐕𑐸𑑄 𑐮𑐵 𑐮𑐶𑐥𑐵 𑐗𑐶𑑄𑐥𑑂𑐫𑐳𑐮𑑄 𑐩𑐶𑐮 𑑋

𑐰𑐴𑐫𑐵 𑐜𑐧𑐮 𑐢𑑂𑐫𑐧𑐵 𑐧𑑀𑐬𑐵𑐫𑑂 𑐟𑐫𑐵𑑅 𑐖𑑂𑐫𑐵𑐥𑐸 𑐕𑐩𑑂𑐴𑐾𑐳𑐶𑐟 𑐎𑐸𑐧𑐶𑐎𑐵𑑅 𑐴𑐮 𑑋 𑐰𑐵 𑐥𑐷𑐐𑐸 𑐧𑐸𑑃 𑐣𑑄 𑐧𑐵𑑅 𑐣𑑄 𑐩𑐶𑐫𑐵𑐧𑐶𑐮, 𑐀𑐮𑐾 𑐮𑐵 𑐧𑐸𑑃𑐂 𑐰𑐵 𑐣𑑄 𑐥𑐷 𑐩𑑂𑐰𑐵𑑅𑐮 𑑋 𑐩𑐵𑐩𑑄 𑐳𑐸𑐠𑐫𑑂 𑐡𑐸𑐳𑐶𑐫𑐵 𑐎𑑂𑐰𑐵𑐟𑐶 𑐡𑐫𑐾𑐎𑐵𑑅 𑐟𑑂𑐰𑑄𑐎𑐷, 𑐔𑑂𑐫𑐵 𑐟𑑂𑐰𑐣𑐾𑐐𑐸 𑐔𑐮𑐣 𑐩𑐡𑐸 𑑋 𑐖𑐵 𑐣𑐵𑐥 𑐩𑐵𑐫𑐾𑐎𑐾𑑃 𑐰 𑐀𑐔𑐵𑐬 𑑋 𑐮𑐵 𑐣𑐫𑐾𑐟 𑐮𑐵 𑐩𑑀𑐴𑐣𑐶 𑐰𑐫𑐾𑐎𑐾𑐩𑐵𑐣𑐶 𑑋 𑐎𑐶𑐥𑐸𑐮𑐶𑐂 𑐖𑐵𑐟𑑂𑐬𑐵𑐧𑐮𑐫𑑂 𑐏𑐜𑑂𑐐 𑐖𑑂𑐰𑐣𑐷𑐩𑑂𑐴 𑐖𑐶𑐩𑐶 𑐟𑐸𑐂𑐳𑐶𑑄 𑐧𑐵𑐖𑑂𑐫𑐵, 𑐖𑐵𑐟𑑂𑐬𑐵𑐧𑐮𑐫𑑂 𑐎𑐶𑐥𑐹 𑐡𑐾𑐫𑑂 𑐔𑐵𑑅𑐴𑐶𑐮𑐷𑐩𑑂𑐴, 𑐖𑐸𑐖𑐸 𑐠𑐾𑑄 𑐖𑐸𑐫𑐵𑐔𑑂𑐰𑑄𑐩𑑂𑐴 𑑋

𑐟𑐸𑐂𑐳𑐶𑑄 𑐡𑑂𑐰𑐵𑐬𑐾 𑐢𑐵𑐂 𑐧𑐵𑐖𑑂𑐫𑐵𑐫𑐵𑐟 𑑋 𑐣𑑂𑐴𑐵𑐥𑐵 𑐩𑐵𑐎𑑂𑐰𑑅𑐔𑐵 𑐜𑐵𑑃𑐜𑐵𑐫𑑂 𑐦𑐎𑐷𑐬 𑐕𑐩𑑂𑐴𑐾𑐳𑐶𑐫𑐵𑑄 𑐎𑑅𑐣𑐶 𑐥𑐷𑐐𑐸 𑐖𑑂𑐫𑐵 𑐫𑐵𑐣𑐵𑐔𑑂𑐰𑑄𑐐𑐸, 𑐮𑐶𑐥𑐵 𑐧𑐵𑑄𑐖𑑂𑐫𑐵𑑄 𑐀𑐣 𑐎𑑅𑐣𑐶 𑐥𑐷𑐎𑐾 𑐩𑐧𑐶𑐮 𑑋
𑐎𑐶𑐥𑐸𑐮𑐶𑐂 𑐔𑑂𑐰𑑄𑐥𑐶𑑄𑐎𑐾 𑐣𑑂𑐴𑐵𑐥𑐵 𑐫𑐎𑑂𑐰𑐳𑐶𑐎𑐾 𑐟𑑅𑐎𑐿 𑐰𑑅 𑑋 𑑕÷𑑖 𑐳𑐵𑐮𑐥𑐵𑐏𑐾 𑐧𑐵𑑅𑐣𑑄 𑐖𑐶𑐟𑑅 𑐳𑐶𑑄𑐴𑐡𑐬𑐰𑐵𑐬 𑐡𑐸𑐣𑐾 𑐟𑐎 𑐣𑑂𑐫𑐵𑐳𑐶 𑐫𑑄𑐎𑐵𑑅 𑐏𑑀𑐥 𑐎𑐵𑐫𑐾𑐎𑐹𑐐𑐸 𑑋 𑐀𑐧𑐮𑐫𑑂 𑐩𑐳𑑂𑐟𑐫𑑂𑐟 𑐏𑑀𑐥 𑐎𑐵𑐫𑐾𑐎𑐾𑐟 𑐀𑐣 𑐴𑐾 𑐫𑑄𑐎𑐾𑐩𑐵𑑅 𑑋 𑐟𑑅𑐎𑐿 𑐫𑐎𑑂𑐰𑐳𑐶𑐟 𑐰𑐮, 𑐟𑑅𑐎𑐿 𑐰𑐫𑐵𑑅 𑐎𑐶𑐥𑐸𑐮𑐶𑐂 𑐩𑐣𑐹𑐟 𑐫𑐎𑑂𑐰 𑐳𑐶𑐟 𑑋 𑐟𑑅𑐎𑐿 𑐰𑐫𑐵𑑅 𑐩𑐳𑐷𑐥𑐶𑑄 𑐫𑐎𑑂𑐰 𑐕𑑂𑐫𑐵𑐎𑑅 𑐖𑐸𑐮 𑑋

–𑐱𑐱𑐶𑐎𑐮𑐵 𑐩𑐵𑐣𑐣𑑂𑐢𑐬