#𑐀𑐩𑐺𑐟𑐩𑐵𑐣 𑐱𑐵𑐎𑑂𑐫𑐨𑐶𑐎𑑂𑐲𑐸

𑐠𑑁𑑄 𑐠𑐵𑐫𑑂𑐠𑐵𑐳𑐫𑑂 𑐀𑐱𑐵𑐣𑑂𑐟𑐶𑑄 𑐠𑐵𑐫𑑂 𑐎𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐩𑐣𑐹 𑐩𑐣𑐹𑐫𑐵 𑐡𑐠𑐸𑐂 𑐠𑑅𑐠𑑅𑐐𑐸 𑐩𑐣𑐫𑑂 𑐔𑑂𑐰𑑄𑐐𑐸 𑐎𑐮𑐸𑐲𑐶𑐟 𑐨𑐵𑐰𑐣𑐵 𑐖𑐵𑐐𑐺𑐟 𑐖𑐹𑐐𑐸𑐫𑐵 𑐎𑐵𑐬𑐞𑑄 𑐠𑐠𑐾 𑐖𑐹𑐐𑐸 𑐏𑑅 𑑋 𑐠𑑂𑐰 𑐕𑐐𑐹 𑐟𑐺𑐲𑑂𑐞𑐵𑐫𑐵 𑐎𑐵𑐬𑐞𑑄 𑐖𑐹𑐐𑐸 𑐏𑑅 𑑋 𑐠𑑅 𑐖𑐎 𑐣𑐫𑐾𑐐𑐸, 𑐟𑑂𑐰𑐣𑐾𑐐𑐸, 𑐥𑐸𑐣𑐾𑐐𑐸 𑐰 𑐩𑑀𑐖𑐩𑐳𑑂𑐟𑐶 𑐫𑐵𑐫𑐾𑐐𑐸 𑐀𑐮𑐾 𑐠𑑅 𑐫𑐳𑐾𑑄 𑐳𑑂𑐰𑐟𑐣𑑂𑐟𑑂𑐬𑐟𑐵𑐥𑐹𑐬𑑂𑐰𑐎 𑐩𑑂𑐰𑐵𑐫𑐾𑐐𑐸 𑐩𑑂𑐰𑐵𑐫𑐾𑐐𑐸, 𑐩𑐣𑐹 𑐖𑐸𑐫𑐵𑑅 𑐳𑐸𑐏𑑄 𑐋𑐳 𑐁𑐬𑐵𑐩𑑄 𑐔𑑂𑐰𑐣𑐾𑐐𑐸 𑐣𑐶𑐣𑑂𑐴𑐸𑐫𑐵 𑐖𑐶𑐣𑑂𑐡𑐐𑐷 𑐴𑐣𑐾𑐐𑐸 𑐂𑐔𑑂𑐕𑐵𑑄 𑐠𑐠𑐾 𑐖𑐹𑐐𑐸 𑐏𑑅 𑑋

𑐳𑐷 𑐢𑐸𑐣𑐾𑐰𑑄 𑐀𑐖𑑂𑐫𑐵𑑅𑐐𑐸 𑐳𑐸𑐏𑐩𑐫 𑐖𑐷𑐰𑐣 𑐴𑐣𑐾 𑐏𑐣𑐷 𑐎𑐶 𑐏𑐣𑐷𑐩𑐏𑐸 𑐢𑐂𑐐𑐸 𑐠𑑁𑑄𑐫𑐵 𑐮𑑂𑐫𑐵𑐫𑑂𑐩𑑂𑐴 𑐥𑐸𑐳𑑂𑐟𑐵𑐫𑐵 𑐰𑐶𑐔𑐵𑑅 𑑋 𑐨𑑁𑐟𑐶𑐎 𑐳𑐸𑐏𑐫𑑂 𑐮𑐵𑐮𑐫𑐶𑐟 𑐖𑐸𑐫𑐵𑐔𑑂𑐰𑑄𑐥𑐶𑑄 𑐠𑑁𑑄𑐫𑐵 𑐥𑐸𑐳𑑂𑐟𑐵 𑐫𑐫𑑅𑐠𑐾 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐂𑐩𑐶𑐟 𑐮𑐖𑑂𑐫𑐵, 𑐨𑐫, 𑐮𑐶𑐥𑐵 𑐖𑐸𑐂𑐐𑐸 𑐕𑐸𑑄 𑐣𑑄 𑐎𑐠𑑄𑐫𑐵 𑐏𑑃𑐫𑐵𑐟 𑐎𑐫𑐵𑑅 𑐔𑐶𑐄𑐟𑐵𑑅 𑐩𑐡𑐸 𑑋 𑐂𑐩𑐶𑐟 𑐮𑐶𑐖𑑂𑐘𑐵𑑄 𑐧𑐷𑐥𑐶𑑄 𑐴𑐾 𑐩𑐹𑐬𑑂𑐏 𑐟𑐸𑐮𑑂𑐫 𑐖𑐸𑐂 𑑋 𑐖𑐧 𑐠𑑅𑐟 𑐴𑐾 𑐕𑐸𑑄 𑐳𑐩𑐳𑑂𑐫𑐵 𑐖𑐸𑐫𑐵𑑅 𑐥𑐱𑑂𑐟𑐵𑐫𑑂 𑐔𑐵𑐫𑐾𑐩𑐵𑐮𑐷 𑐀𑐧𑐮𑐫𑑂 𑐂𑐩𑐶 𑐣𑑂𑐴𑑂𑐫𑑅 𑐣𑑄 𑐰𑐂𑐩𑐏𑐸, 𑐣𑐫𑐾 𑐣𑑄 𑐫𑐂𑐩𑐏𑐸 𑑋

𑐰𑑄𑐠𑐵𑐫𑑂 𑐔𑑂𑐰𑑄𑐠𑐵𑐫𑑂 𑐰𑐣𑐾–𑐔𑑂𑐰𑐣𑐾 𑐦𑐂𑐩𑐏𑐸 𑑋 𑐩𑐣𑐫𑑂 𑐀𑐣𑐾𑐎 𑐟𑐬𑑂𑐎𑐣𑐵 𑐰𑐂 𑑋 𑐠𑑅𑐟 𑐣𑑂𑐴𑐵𑐥𑐵 𑐳𑐔𑐾𑐟 𑐫𑐵𑑅𑐥𑐶𑑄 𑐮𑐸𑐩𑐣𑐵 𑐰𑐂 𑑋 𑐀𑐣𑐾𑐎𑐎𑐠𑑄𑐫𑐵 𑐱𑐶𑐎𑑂𑐲𑐵 𑐧𑐶𑐄𑐐𑐸 𑐗𑐮𑐮𑐮 𑐮𑐸𑐩𑐣𑐵 𑐰𑐂 𑑋 𑐩𑐵𑐣𑐳𑐶𑐎 𑐬𑐸𑐥𑑄 𑐣𑑄 𑐟𑐣𑐵𑐰 𑐖𑐸𑐂 𑑋 𑐬𑑀𑐐𑐷 𑐖𑐸𑐂 𑑋 𑐣𑐶𑐣𑑂𑐴𑐸𑐫𑐵 𑐖𑐷𑐰𑐣 𑐳𑐸𑐏𑐥𑐹𑐬𑑂𑐰𑐎 𑐩𑑂𑐰𑐵𑐫𑐾𑐐𑐸 𑐩𑑂𑐴𑐐𑐳 𑐣𑑄 𑐔𑐸𑑄 𑐔𑐸𑑄 𑐖𑐸𑐂 𑑋𑐠𑑁𑑄𑐫𑐵 𑐂𑐮𑐫𑑂 𑐀𑐱𑐶𑐎𑑂𑐲𑐶𑐟 𑐢𑐂𑐥𑐶𑑄 𑐩𑑂𑐴𑑀 𑐴𑐾 𑐖𑐎 𑐡𑐸, 𑐟𑐬 𑐱𑐶𑐎𑑂𑐲𑐶𑐟 𑐏𑐫𑐵𑑄 𑐣𑑄 𑐰𑑂𑐫𑐵𑐰𑐴𑐵𑐬𑐶𑐎 𑐖𑐸𑐂 𑐩𑐦𑐫𑐵𑑅 𑐀𑐱𑐶𑐎𑑂𑐲𑐶𑐟 𑐟𑐸𑐮𑑂𑐫 𑐖𑐸𑐫𑐵𑐔𑑂𑐰𑑄𑐥𑐶𑑄 𑐣𑑄 𑐩𑐡𑐸𑐐𑐸 𑐩𑐏𑐸 𑑋

𑐱𑐶𑐎𑑂𑐲𑐶𑐟 𑐴𑐾 𑐢𑐵𑑅𑐥𑐶𑑄 𑐣𑑄 𑐣𑐿𑐟𑐶𑐎𑐟𑐵𑐰𑐶𑐴𑐷𑐣 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐔𑐵𑐴𑐾 𑐂𑐥𑐶𑑄 𑐐𑐸𑐬𑐸 𑐴𑐾 𑐠 𑐩𑐖𑐸𑐂𑐩𑐵 𑑋 𑐔𑐾𑐮𑐵 𑐖𑐹𑐥𑐶𑑄 𑐣𑑄 𑐨𑐐𑐰𑐵𑐣 𑐧𑐸𑐡𑑂𑐢𑑄 𑐎𑑂𑐫𑐣𑐵 𑐧𑐶𑐖𑑂𑐫𑐵𑑅𑐐𑐸 𑐳𑐸𑐏𑑄 𑐖𑐷𑐰𑐣 𑐴𑐣𑐾𑐐𑐸 𑐧𑐸𑐡𑑂𑐢 𑐢𑐬𑑂𑐩𑐫𑐵 𑐰𑑂𑐫𑐵𑐰𑐴𑐵𑐬𑐶𑐎 𑐱𑐶𑐎𑑂𑐲𑐵 𑐰 𑐖𑑂𑐘𑐵𑐣𑐫𑐵 𑐀𑐨𑐵𑐰𑑄 𑐰𑐵 𑐥𑐬𑐶𑐫𑐟𑑂𑐟𑐶 𑐱𑐶𑐎𑑂𑐲𑐵𑐫𑐵 𑐀𑐨𑐵𑐰𑑄 𑐫𑐵𑐣𑐵𑑅 𑐀𑐡𑐹𑐬𑐡𑐬𑑂𑐱𑐷𑐟𑐵 𑐏𑐣𑐾 𑐡𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐔𑐸𑐮𑐧𑐸𑐮𑐾, 𑐨𑐡𑑂𑐡𑐵, 𑐄𑐟𑑂𑐟𑐵𑐄𑐮𑑀 𑐰 𑐨𑑂𑐰𑐵𑐳𑐶 𑐥𑐴𑑅 𑐰𑐫𑐾𑐎 𑐦𑐾𑐳𑐣 𑐫𑐵𑐣𑐵𑑅 𑐩𑐶𑐳𑐵𑐟𑐫𑑂𑐳𑑄 𑐠𑑅𑐐𑐸 𑐴𑐾 𑐀𑐳𑑂𑐩𑐶𑐟𑐵 𑐮𑐸𑐚𑐾 𑐫𑐵𑐎𑐵𑐔𑑂𑐰𑐣𑐾𑐩𑐵𑑅𑐐𑐸 𑐡𑐸 𑑋

𑐩𑐵𑑄𑐀𑐧𑐸𑑄 𑐠𑑅 𑐩𑐳𑑂𑐟𑐫𑑂𑐟 𑐠𑐸𑐂𑐎𑐾 𑐩𑐵𑑅𑐠𑐵𑐫𑑂 𑐀𑑅𑐏𑐧𑐟𑑄 𑐂𑐥𑐶𑑄 𑐴𑐾 𑐩𑐏𑑂𑐏 𑐖𑐸𑐫𑐵𑑅 𑐮𑐫𑑂𑐟𑐵𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐠𑑅 𑐩𑑂𑐴𑑂𑐫𑐵𑐫𑑂𑐥𑐶𑑄, 𑐨𑑁𑐥𑐶𑑄𑐳𑑄 𑐫𑐵𑐣𑐵 𑐖𑐹𑐐𑐸 𑐦𑐾𑐳𑐣𑐫𑐵𑐟 𑐣𑐎𑐵𑐬𑐾 𑐩𑐫𑐵𑐳𑐾 𑐄𑐎𑐶𑐫𑐵𑐟 𑐟𑐶𑐧𑑅 𑐧𑐷𑐎𑐠𑑄 𑐴𑑁𑐳𑐮𑐵, 𑐥𑑂𑐬𑐵𑐠𑐩𑐶𑐎𑐟𑐵 𑐧𑐶𑐫𑐵𑑅 𑐠𑑅𑐥𑐶𑑄 𑐴𑐾 𑐮𑐶𑐄𑐮𑐶𑐄 𑐰𑐣𑐵𑐔𑑂𑐰𑑄𑐐𑐸 𑐰𑐵 𑐂𑐩𑐶𑐟 𑐳𑑂𑐰𑐟𑐣𑑂𑐟𑑂𑐬 𑐟𑑂𑐰𑑅𑐟𑐹𑐐𑐸𑐫𑐵 𑐎𑐵𑐬𑐞 𑐂𑐥𑐶𑑄 𑐀𑐣𑐾𑐎𑐠𑑄𑐫𑐵 𑐎𑐸𑐮𑐟𑐫𑑂 𑐦𑐳𑐾 𑐖𑐸𑐫𑐵 𑐰𑐣𑐵𑐔𑑂𑐰𑑄𑐐𑐸 𑐡𑐸 𑑋

𑐕𑐾𑑃𑐫𑑂 𑐮𑐶𑐧𑐵𑐎 𑐡𑐸𑐴𑐵𑑄 𑐰𑐫𑐾𑐐𑐸, 𑐳𑑂𑐎𑐸𑐮–𑐎𑐮𑐾𑐖 𑐰𑐣𑐾𑐐𑐸 𑐣𑐵𑐩𑐫𑑂 ‘𑐜𑐾𑐚𑐶𑑄𑐜 𑐳𑑂𑐥𑐚’ 𑐮𑐐𑐵𑐫𑐟 𑐩𑐾𑐩𑐾𑐐𑐸 𑐠𑐵𑐳𑐫𑑂 𑐟𑐎𑑄 ‘𑐫𑐸𑐣𑐶𑐦𑐬𑑂𑐩’ 𑐴𑐾 𑐥𑐸𑐣𑐵𑑅 𑐠𑑂𑐫𑐣𑐵𑐔𑑂𑐰𑐣𑐷 𑑋 𑐕𑐾𑑃𑐫𑑂 𑐩𑐠𑑂𑐫𑐣𑐷𑐐𑐸, 𑐡𑐸𑐴𑐵𑑄 𑐴𑐾 𑐰𑑅𑐳𑐵𑑄 𑐮𑐶𑐧𑐵𑐎 𑐰𑐂𑐐𑐸 𑐖𑐎 𑐩𑐏𑐸, 𑐡𑐸𑐬𑑂𑐑𑐚𑐣𑐵𑐫𑑂 𑐮𑐵𑐣𑐵𑐔𑑂𑐰𑐣𑐷𑐐𑐸, 𑐥𑑂𑐬𑐴𑐬𑐷𑐫𑐵 𑐮𑑂𑐴𑐵𑐟𑐫𑑂 𑐮𑐵𑐂𑐐𑐸 𑐰𑐵 𑐩𑑂𑐴𑑂𑐫𑐵𑐫𑑂 𑐩𑐔𑐵𑐫𑐵 𑐥𑑂𑐰𑐵𑐠𑐫𑑂 𑐡𑐸𑐐𑐸 𑐑𑐚𑐣𑐵 𑐖𑐸𑐮 𑐢𑐵𑑅𑐳𑐵 𑐩𑐵𑑄𑐀𑐧𑐸𑐫𑐵 𑐨𑐸𑐂𑐔𑑅𑐟𑐶 𑐴𑐵𑐫𑐵 𑐰𑐂 𑑋

𑐀𑐧𑐮𑐫𑑂 𑐂𑐩𑐶𑐟 𑐩𑐵𑐣𑐳𑐶𑐎 𑐬𑐸𑐥𑑄 𑐟𑐣𑐵𑐰 𑐣𑑄 𑐖𑐸𑐂 𑑋 𑐟𑐣𑐵𑐰𑑄 𑐩𑐸𑐎𑑂𑐟 𑐖𑐸𑐂𑐟 𑐜𑐵𑐎𑑂𑐚𑐬, 𑐰𑐿𑐡𑑂𑐫, 𑐖𑑂𑐫𑑀𑐟𑐶𑐫𑐵 𑐮𑐸𑐏𑐵 𑐢𑐶𑐄𑑃 𑐖𑐸𑐂 𑑋 𑐠𑐠𑐾 𑐖𑐸𑐂𑐧𑐮𑐫𑑂 𑐜𑐵𑐎𑑂𑐚𑐬, 𑐰𑐿𑐡𑑂𑐫𑐫𑐵 𑐄𑐥𑐔𑐵𑐬 𑐳𑐾𑐰𑐵 𑐎𑐵𑐫𑐾𑐐𑐸 𑐳𑑂𑐰𑐫𑐵𑑄 𑐣𑑄 𑐨𑐐𑐰𑐵𑐣 𑐧𑐸𑐡𑑂𑐢𑐫𑐵 𑐢𑐬𑑂𑐩, 𑐄𑐥𑐡𑐾𑐱, 𑐱𑐶𑐎𑑂𑐲𑐵 𑐥𑐵𑐮𑐣𑐵 𑐫𑐵𑐫𑐾 𑐦𑐟 𑐢𑐵𑑅𑐳𑐵 𑐕𑐸𑑄𑐎𑐠𑑄𑐫𑐵 𑐣𑑄 𑐰𑐵𑐳𑑅 𑐣𑐫𑐾𑐩𑑂𑐰𑐵𑑅 𑑋 𑐰𑐵𑐳𑑅 𑐳𑑂𑐰𑐫𑐵𑑄 𑐣𑑄 𑐳𑐩𑐵𑐖𑑄 𑐎𑐸𑑄𑐏𑐶𑐣𑐷𑐐𑐸 𑐰𑐵 𑐧𑐾𑐎𑑂𑐰𑑅 𑐩𑐶𑐏𑐵𑑄 𑐳𑑂𑐰𑐂𑐐𑐸 𑐨𑐫 𑐎𑐜𑐵 𑐖𑐸𑐂 𑑋

𑐖𑐷𑐰𑑄𑐎𑐵𑑅𑐕𑐶 𑐮𑑂𑐰𑑄𑐩𑐎𑐵𑑄 𑐮𑑂𑐰𑑅𑐩𑑄𑐎𑐾 𑐩𑐦𑐂𑐐𑐸 𑐔𑑀𑐚 𑐮𑐵𑐂 𑑋 𑐧𑐵𑑄𑐩𑐮𑐵𑑅𑐐𑐸 𑐮𑐶𑐔𑑂𑐰𑑅 𑐫𑐵𑐎𑐣𑑄 𑐣𑑂𑐫𑐣𑐵 𑐰𑐣𑐷, 𑐧𑐵𑑄𑐮𑐵𑑅𑐐𑐸 𑐮𑐶𑐔𑑂𑐰𑑅 𑐣𑑂𑐫𑑄𑐎𑐵 𑐰𑐣𑐾𑐟 𑐃 𑐎𑐵𑐂 𑑋 𑐟𑐬 𑐩𑐣𑐹 𑐖𑐸𑐫𑐵𑑅 𑐩𑑂𑐰𑐵𑐫𑐾𑐟 𑐥𑐮𑐵𑑅 𑐥𑐮𑐵𑑅𑐥𑐟𑐶𑐎𑑄 𑐡𑑂𑐰𑐣𑐷 𑐢𑐎𑐵𑑅 𑐳𑐔𑐾𑐟 𑐖𑐸𑐂𑐩𑐵𑑅 𑑋 𑐣𑐫𑐾𑐐𑐸, 𑐟𑑂𑐰𑐣𑐾𑐐𑐸, 𑐥𑐸𑐣𑐾𑐐𑐸, 𑐖𑐸𑐂𑐐𑐸 𑐠𑑅𑐫𑐳𑐾𑑄 𑐏𑐫𑐵𑑄 𑐣𑑄 𑐄𑐎𑐷 𑐣𑑄 𑐳𑐔𑐾𑐟 𑐖𑐸𑐂𑐩𑐵𑑅 𑑋 𑐠𑑅 𑐨𑐶𑑄𑐳𑐵 𑐖𑐐𑐟 𑐨𑐶𑑄, 𑐠𑑅 𑐩𑐨𑐶𑑄𑐳𑐵 𑐖𑐐𑐟 𑐩𑐨𑐶𑑄 𑐢𑐵𑐫𑐾𑐰𑑄 𑐖𑐎 𑐖𑐐𑐟 𑐨𑐶𑑄–𑐩𑐨𑐶𑑄 𑐖𑐸𑐂𑐩𑐏𑐸 𑑋

𑐏𑑂𑐫𑐵𑑅 𑐫𑐵𑐫𑐾𑐐𑐸 𑐩𑐣𑑄 𑐩𑑂𑐰𑐵𑑅𑐩𑐡𑐸𑐐𑐸 𑐏𑑃𑐫𑑂 𑐕𑐾𑑃𑐫𑑂 𑐮𑑂𑐰𑐵𑐥𑐸 𑐠𑐮𑐵 𑐧𑐷𑐥𑐶𑑄 𑐡𑐫𑐵𑐔𑑂𑐰𑐣𑐷 𑑋 𑐮𑑂𑐰𑐵𑐥𑐸 𑐴𑐾 𑐖𑐸𑐮 𑐢𑐵𑑅𑐳𑐵𑑄 𑐠𑐩𑑂𑐴𑑄 𑐴𑐾 𑐰𑐶𑐔𑐵𑑅 𑐫𑐵𑐫𑐾𑐩𑐵𑑅 𑑋 𑐳𑐸𑐣𑐵𑐣𑑄 𑐢𑐵𑐮 𑐢𑐵𑐫𑐾𑐰𑑄 𑐄𑐎𑐶𑐫𑐵 𑐮𑐶𑐄𑐮𑐶𑐄 𑐖𑐸𑐂𑐩𑐖𑐶𑐄 𑑋 𑐨𑐐𑐰𑐵𑐣 𑐧𑐸𑐡𑑂𑐢𑑄 𑐢𑐫𑐵𑐧𑐶𑐖𑑂𑐫𑐵𑑅𑐐𑐸 𑐡𑐸, ‘𑐥𑐬𑐩𑑂𑐥𑐬𑐵 𑐖𑐎 𑐢𑐫𑐵𑑄 𑐩𑐖𑐶𑐄 𑑋 𑐏𑑅, 𑐩𑐏𑐸 𑑋 𑐖𑐶𑐄, 𑐩𑐖𑐶𑐄 𑐠𑑅𑐐𑐸 𑐩𑐣𑑄 𑐧𑐵𑑄𑐮𑐵𑐎 𑐳𑑂𑐰𑐫𑐾𑐩𑐵𑑅 𑑋’ 𑐨𑐐𑐰𑐵𑐣 𑐧𑐸𑐡𑑂𑐢𑑄 𑐠𑑅𑐐𑐸 𑐴𑐾 𑐏𑑃𑐫𑐵𑐟 𑐣𑑄 𑐩𑐣𑐫𑑂 𑐡𑐸𑐣𑐾𑐣𑐶𑐳𑐾𑑄 𑐡𑐸𑐰𑐵𑐮𑐵 𑐳𑑂𑐰 𑐢𑐫𑐵𑐧𑐶𑐖𑑂𑐫𑐵𑑅𑐐𑐸 𑐡𑐸 𑑋

𑐳𑐸𑐣𑐵𑑄, 𑐳𑐸𑐫𑐵𑐟, 𑐐𑐧𑐮𑐾, 𑐐𑐣 𑐕𑐵𑐫𑑂 𑐎𑐣 𑑋 𑐳𑐟𑑂𑐫 𑐏𑑃 𑐏𑑅 𑐰𑐵 𑐩𑐏𑐸 𑐠𑐩𑑂𑐴𑑄 𑐕𑐸𑐚𑐾 𑐫𑐵𑐫𑐾𑐩𑐵𑑅 𑑋 𑐢𑐵𑐮 𑐢𑐵𑐫𑐾𑐰𑑄 𑐴𑐾 𑐕𑐎𑑂𑐰𑐮𑑄 𑐰𑐶𑐱𑑂𑐰𑐵𑐳 𑐫𑐵𑐫𑐾 𑐩𑐖𑐶𑐄 𑑋 𑐥𑐟𑑂𑐫𑐵𑑅 𑐫𑐵𑐫𑐾 𑐩𑐖𑐶𑐄 𑑋 𑐰𑐶𑐔𑐵𑑅 𑐴𑐾 𑐩𑐫𑐵𑐳𑐾 𑐕𑐎𑑂𑐰𑐮𑑄 𑐣𑐰𑐵𑐫𑐾 𑐣𑑄 𑐩𑐖𑐶𑐄 𑑋 𑐳𑑂𑐰𑐫𑐾𑐟 𑐴𑐾 𑐣𑑄 𑐟𑑂𑐰𑐵𑐮𑑂𑐮 𑐳𑑂𑐰𑐫𑐵𑐔𑑂𑐰𑐣𑐾 𑐩𑐖𑐶𑐄, 𑐥𑐸𑐮𑐸𑐎𑑂𑐎 𑐕𑐎𑑅 𑐳𑑂𑐰𑐫𑐾𑐩𑐵𑑅 𑑋 𑐣𑑂𑐫𑐣𑐾 𑐖𑐎 𑐢𑐫𑐵𑑄 𑐣𑑄 𑐩𑐖𑐶𑐄, 𑐢𑑂𑐰𑐵𑐠𑐸𑐂𑐎 𑐣𑑂𑐫𑐣𑐾𑐩𑐵𑑅 𑑋

𑐎𑐣𑐷𑐩𑑂𑐴𑐾𑐳𑐶𑐣𑑄 𑐕𑐐𑐹 𑐎𑐣𑐵𑐔𑑂𑐰𑐣𑐷, 𑐣𑑂𑐫𑐣𑐵𑐔𑑂𑐰𑑄𑐩𑑂𑐴𑐾𑐳𑐶𑐣𑑄 𑐩𑐾𑐐𑐸 𑐴𑐾 𑐠𑐸𑐂𑐎𑐵𑐔𑑂𑐰𑐣𑐷 𑑋 𑐠𑐸𑐎𑐶𑑄 𑐫𑐵𑐣𑐵𑑅 𑐣𑑄 𑐮𑑂𑐰𑐵𑐥𑐸 𑐖𑐸𑐂 𑑋𑐠𑐠𑐾 𑐩𑐖𑐸𑐂𑐩𑐵 𑐢𑐎𑐵𑑅 𑐴𑐾 𑐨𑐐𑐰𑐵𑐣 𑐧𑐸𑐡𑑂𑐢𑑄 𑐩𑐣𑐹 𑐩𑐵𑐟𑑂𑐬𑐫𑐵 𑐳𑐸𑐏 𑐱𑐵𑐣𑑂𑐟𑐶𑐫𑐵 𑐮𑐵𑐐𑐶 𑐀𑑅𑐥𑐸𑐐𑐸, 𑐥𑐵𑐮𑐣𑐵 𑐫𑐵𑐫𑐾 𑐦𑐂𑐐𑐸 𑐄𑐥𑐵𑐫 𑐥𑑄𑐔𑐱𑐷𑐮 𑐳𑐸𑐣𑐵𑑄 𑐥𑐵𑐮𑐣𑐵 𑐫𑐵𑐂 𑐰𑑄 𑐀𑐰𑐱𑑂𑐫 𑐳𑐸𑐏 𑐥𑑂𑐬𑐵𑐥𑑂𑐟 𑐫𑐵𑐂 𑐢𑐫𑐵𑐧𑐶𑐖𑑂𑐫𑐵𑑅𑐐𑐸 𑐡𑐸 𑑋

𑐳𑐸𑐣𑐵𑐣𑑄 𑐳𑐸𑐫𑐵𑐟𑑄 𑐡𑐸𑑅𑐏 𑐎𑐲𑑂𑐚 𑐩𑐧𑐷𑐐𑐸, 𑐳𑑂𑐫𑐵𑐫𑐾𑐐𑐸, 𑐥𑐵𑐮𑐾𑐐𑐸, 𑐣𑐸𑐐𑐮𑐫𑑂 𑐳𑑂𑐫𑐵𑐎𑑂𑐎 𑐎𑐜𑐵 𑐰𑐔𑐣 𑐩𑐮𑑂𑐴𑐵𑐫𑐾𑐐𑐸 𑐳𑐸𑐫𑐵𑐎𑐾𑑄 𑐩𑐣𑑂𑐫𑑃𑐳𑐾 𑐳𑐸𑐫𑐵𑐐𑐸𑑄 𑐕𑐸𑑄 𑐣𑑄 𑐳𑐵𑐩𑐵𑐣 𑐩𑐎𑐵𑐫𑐾𑐐𑐸, 𑐳𑐸𑐫𑐵𑑄 𑐎𑐮𑐵𑑅𑐫𑐵𑐟 𑐧𑐵𑑄𑐩𑐮𑐵𑑅𑐐𑐸 𑐩𑐶𑐏𑐵𑑄 𑐩𑐳𑑂𑐰𑐫𑐾𑐐𑐸, 𑐠𑑅𑐟 𑐩𑐵𑑅𑐐𑐸 𑐠𑐩𑑂𑐴𑑄 𑐴𑐾 𑐫𑐵𑐫𑐾𑐐𑐸, 𑐎𑐟𑑅𑐫𑐵 𑐖𑐷𑐰𑐣 𑐧𑐬𑑂𑐧𑐵𑐡 𑐩𑐫𑐵𑐫𑐾𑐐𑐸, 𑐩𑐶𑐳𑐵𑐩𑐶𑐖𑑄 𑐣𑐶𑐩𑑂𑐴𑐾𑐳𑐶𑐟𑑄 𑐮𑐵𑐐𑐹 𑐖𑐸𑐂𑐐𑐸 𑐣𑐶𑐫𑐩 𑐴𑐾 𑐥𑑄𑐔𑐱𑐷𑐮 𑐏𑑅 𑑋

𑐎𑐟𑑅 𑐰𑐵 𑐠𑑅𑐟 𑐴𑐵𑐣𑐷 𑐖𑐸𑐂𑐎 𑐩𑐏𑐸𑐐𑐸 𑐏𑑃 𑐩𑐮𑑂𑐴𑐵𑐫𑐾𑐐𑐸, 𑐧𑐬𑐸 𑐎𑐟𑑅𑐫𑐵𑐟 𑐴𑐵𑐣𑐷 𑐖𑐸𑐂𑐐𑐸𑐥𑐵𑐏𑐾𑑄 𑐧𑐔𑐾 𑐫𑐵𑐫𑐾𑐐𑐸, 𑐩𑐵𑐮 𑐢𑐵𑑅𑐳𑐵 𑐠𑐠𑐾 𑐫𑐵𑐫𑐾𑐧𑐮𑐫𑑂 𑐩𑐏𑐸𑐐𑐸 𑐏𑑃 𑐮𑑂𑐴𑐵𑐟 𑐢𑐵𑑅𑐳𑐵𑑄 𑐣𑑄 𑐥𑐸𑐞𑑂𑐫 𑐥𑑂𑐬𑐵𑐥𑑂𑐟 𑐖𑐸𑐂 𑑋 𑐀𑐩𑑂𑐩𑐮 𑐰𑐵 𑐣𑐱𑐵 𑐎𑐵𑐫𑐾 𑐫𑑅𑐐𑐸 𑐥𑐡𑐵𑐬𑑂𑐠 𑐣𑐮, 𑐟𑑂𑐰𑐣 𑐢𑐵𑐫𑐾𑐰𑑄 𑐠𑑅𑐐𑐸 𑐱𑐬𑐷𑐬𑐫𑐵𑐟 𑐴𑐾 𑐴𑐵𑐣𑐷 𑐖𑐸𑐂𑐎 𑐟𑑂𑐰𑐣𑐾 𑐩𑐖𑐶𑐄 𑑋 𑐟𑑂𑐰𑐣𑐾 𑐴𑐾 𑐩𑐵𑑅𑐳𑐵𑑄 𑐩𑐵𑐟𑑂𑐬𑐵𑐕𑐶 𑐖𑐎 𑐟𑑂𑐰𑐣𑐵𑑅 𑐩𑐣𑐫𑐵𑐟 𑐮𑐸𑐢𑑄𑐎𑐾𑐐𑐸 𑐳𑑂𑐰𑐫𑐾𑐩𑐵𑑅 𑑋 𑐀𑐥𑑂𑐰𑑅 𑐟𑑂𑐰𑐣 𑐢𑐵𑑅𑐳𑐵 𑐀𑐩𑐺𑐟 𑐴𑐾 𑐣𑑄 𑐰𑐶𑐲 𑐖𑐸𑐂 𑑋

𑐠𑐖𑑂𑐫𑐵𑑅𑐐𑐸 𑐱𑐷𑐮 𑐥𑐵𑐮𑐣𑐵 𑐫𑐵𑐫𑐾 𑐦𑐟 𑐢𑐵𑑅𑐳𑐵 𑐨𑐐𑐰𑐵𑐣 𑐧𑐸𑐡𑑂𑐢𑐫𑐵 𑐎𑐶𑐥𑐵 𑐰𑐵 𑐩𑐹𑐬𑑂𑐟𑐶𑐂 𑐳𑑂𑐰𑐵𑑄, 𑐳𑐶𑐣𑑂𑐴𑑅, 𑐖𑐵𑐎𑐶, 𑐩𑐬𑐶𑐔𑐬𑐶 𑐁𑐡𑐶 𑐟𑐫𑐵𑑅 𑐥𑐸𑐖𑐵 𑐫𑐵𑐣𑐵𑐔𑑂𑐰𑐣𑐾𑐩𑑂𑐰𑐵𑑅 𑑋 𑐧𑐸𑐡𑑂𑐢𑐫𑐵 𑐀𑐣𑐾𑐎 𑐄𑐥𑐡𑐾𑐱𑐫𑐵𑐟 𑐥𑐵𑐮𑐣𑐵 𑐖𑐎 𑐫𑐵𑐟 𑐢𑐵𑑅𑐳𑐵𑑄 𑐣𑑄 𑐰 𑐴𑐾 𑐣𑑄 𑐟𑑅𑐢𑑄𑐐𑐸 𑐢𑐬𑑂𑐩 𑐫𑐵𑐣𑐵𑐐𑐸𑐟𑐶 𑐐𑑂𑐫𑐣𑐷 𑑋 𑐀𑐠𑐾 𑐴𑐾 𑐁𑐬𑑂𑐫𑐀𑐲𑑂𑐚𑐵𑑄𑐐𑐶𑐎𑐩𑐵𑐬𑑂𑐐𑐫𑐵𑐟 𑐣𑐵𑐮𑐵𑑅 𑐣𑑂𑐴𑐶𑐠𑑄 𑐢𑐂𑐠𑐾𑑄 𑐥𑐵𑐮𑐣𑐵 𑐫𑐵𑐣𑐵𑐔𑑂𑐰𑐣 𑐢𑐵𑑅𑐳𑐵𑑄 𑐣𑑄 𑐡𑐸𑑅𑐏𑐫𑐵 𑐎𑐶𑐔𑑅 𑐟𑐎 𑐴𑐾 𑐳𑑂𑐰𑐫𑐾𑐩𑐵𑐮𑐷 𑐩𑐏𑐸 𑑋

𑐠𑐩𑑂𑐴𑑄 𑐐𑐠𑐾 𑐫𑐵𑑅𑐐𑐸 𑐏𑑅, 𑐀𑐠𑐾 𑐴𑐾 𑐮𑐶𑐔𑑂𑐰𑑅 𑐰𑑅𑐐𑐸𑐥𑐵𑐏𑐾 𑐢𑑂𑐫𑐵𑐣 𑐧𑐷𑐩𑐵𑑅 𑑋 𑐔𑐟𑐸𑐬𑐧𑑂𑐬𑐩𑑂𑐴 𑐰𑐶𑐴𑐵𑐬 𑐖𑑂𑐘𑐵𑐣𑐫𑐵𑐟 𑐣𑑄 𑐣𑑂𑐴𑐶𑐠𑑄 𑐗𑐷𑐳𑑄 𑐥𑐵𑐮𑐣𑐵 𑐫𑐵𑐣𑐵 𑐔𑑂𑐰𑐣 𑐢𑐵𑑅𑐳𑐵 𑐗𑐷 𑐠𑐰𑑄𑐠𑐰𑐫𑑂 𑐩𑐵𑐫𑐵 𑐡𑐫𑐵 𑐡𑐫𑐵𑐔𑑂𑐰𑐣𑐷 𑑋 𑐠𑐰𑑄𑐠𑐰𑐫𑑂 𑐩𑐶𑐮𑐾𑐔𑐮𑐾 𑐖𑐸𑐫𑐵𑐔𑑂𑐰𑐣𑐾 𑐦𑐂 𑑋 𑐳𑐸𑐏 𑐡𑐸𑑅𑐏 𑐳𑐩𑐟𑐵𑐨𑐵𑐰 𑐟𑐫𑐵𑑅 𑐡𑐸𑐩𑑂𑐴𑐾𑐳𑐶𑐫𑐵𑐐𑐸 𑐳𑑂𑐰𑐫𑐵𑑅 𑐣𑐸𑐐𑑅 𑐩𑐸𑐂𑐎𑐵 𑐔𑑂𑐰𑐣𑐾𑐐𑐸 𑐳𑑂𑐰𑐫𑐵𑑄 𑐠𑑅 𑐰𑐷𑐬𑑂𑐫𑐰𑐵𑐣 𑐖𑐸𑐫𑐵𑑅 𑐔𑑂𑐰𑐣 𑐢𑐵𑑅𑐳𑐵 𑐠𑐩𑑂𑐴𑑄 𑐣𑑄 𑐕𑐸𑑄 𑐫𑐵𑐣𑐵𑑅 𑐎𑑂𑐫𑐣𑐾 𑐦𑐂 𑑋

𑐟𑐬 𑐠𑑁𑑄𑐫𑐵 𑐂𑐮𑐫𑑂 𑐡𑐸𑐥𑐶𑐣𑐶 𑐐𑐵𑐎𑑂𑐎𑑄 𑐡𑐸, 𑐩𑐡𑐸𑐥𑐶𑐣𑐶 𑐡 𑐴𑐾 𑐩𑐡𑐸 𑑋 𑐡𑐟 𑐢𑐵𑐫𑐾𑐰𑑄 𑐡𑐸𑐩𑑂𑐴𑐾𑐳𑐶𑐣𑑄 𑐨𑑂𑐰𑐵𑐳𑐶 𑐥𑐴𑑅 𑐎𑑂𑐫𑐣𑐾 𑐩𑐖𑐶𑐄 𑑋 𑐎𑐟𑑅𑐫𑐵 𑐩𑐣 𑐳𑑂𑐫𑐣𑐷𑐎𑐠𑑄 𑐀𑐣𑐾𑐎 𑐏𑑃 𑐮𑑂𑐴𑐵𑐣𑐵𑑅 𑐴𑐶𑐧𑐵𑐫𑑂𑐔𑐧𑐵𑐫𑑂 𑐫𑐵𑐫𑐾𑐐𑐸 𑐳𑑂𑐰𑐫𑐾 𑐩𑐖𑐶𑐄 𑑋 𑐟𑐬 𑐠𑑁𑑄 𑐧𑐸𑐡𑑂𑐢 𑐱𑐶𑐎𑑂𑐲𑐵𑐫𑐵 𑐀𑐨𑐵𑐰𑑄 𑐡𑐸𑐥𑐶𑑄 𑐣𑑄 𑐡𑐸𑑅𑐏, 𑐩𑐡𑐸𑐥𑐶𑑄 𑐗𑐣𑑂 𑐴𑐾 𑐡𑐸𑑅𑐏 𑑋 𑐡𑐸𑐩𑑂𑐴𑐾𑐳𑐶𑐫𑐵 𑐩𑐵𑑅𑐠𑐵𑐫𑑂 𑐩𑐵𑑄𑐎𑐠𑑄 𑐕𑑂𑐫𑐮𑐾 𑐩𑐳𑐫𑐵𑑅, 𑐛𑐐𑐾 𑐖𑐸𑐂𑐎𑐵𑑅, 𑐣𑐎𑑂𑐎𑐮𑐶 𑐳𑐵𑐩𑐵𑐣 𑐰𑐵 𑐩𑑂𑐰𑐵𑑅𑐩𑐡𑐸𑐐𑐸 𑐗𑐩𑐾𑐮𑐵𑐫𑑂 𑐟𑐎𑑂𑐫𑐣𑐵𑑅 𑐡𑐸𑑅𑐏 𑐳𑐷𑐩𑐵𑐮𑐷 𑑋

𑐩𑐡𑐸𑐩𑑂𑐴𑐾𑐳𑐶𑐫𑐵 𑐕𑐨𑑂𑐰𑐵𑑅, 𑐕𑐥𑑂𑐫𑐾 𑐣𑐫𑐾 𑐩𑐏𑐣𑐵𑑅, 𑐕𑐖𑐸 𑐧𑐵𑑄𑐮𑐵𑑅𑐐𑐸 𑐥𑐸𑐣𑐾𑐐𑐸 𑐩𑐡𑐫𑐵𑑅, 𑐔𑑂𑐰𑐣𑐾𑐐𑐸 𑐠𑐵𑐫𑑂𑐧𑐵𑐫𑑂 𑐩𑐡𑐫𑐵𑑅 𑐀𑐣𑐾𑐎 𑐗𑐩𑐾𑐮𑐵𑐫𑑂 𑐟𑐎𑑂𑐫𑐣𑐵 𑐔𑑂𑐰𑐣𑐾𑐩𑐵𑐮𑐷 𑑋 𑐠𑐩𑑂𑐴𑑄 𑐰𑐶𑐔𑐵𑑅 𑐫𑐵𑑅𑐠𑐾𑑄𑐖𑑂𑐫𑐵𑑅𑐐𑐸 𑐖𑑂𑐫𑐵 𑐩𑐡𑐫𑐵𑑅 𑐣𑑄 𑐡𑐸𑑅𑐏 𑐳𑐶𑐫𑐵 𑐔𑑂𑐰𑐣𑐾𑐩𑐵𑐮𑐷 𑑋 𑐨𑐶𑑄 𑐖𑐹𑐳𑐵 𑐡𑑂𑐫𑐰𑑄 𑐫𑐵𑐣𑐵𑑅 𑐖𑐹𑐐𑐸 𑐢𑐎𑐵𑑅 𑐣𑐵𑑄 𑐎𑐵𑐂𑐩𑐏𑐸, 𑐩𑐨𑐶𑑄 𑐖𑐸𑐮, 𑐡𑐸𑑅𑐏𑐎𑐲𑑂𑐚 𑐖𑐸𑐮 𑐰𑐵 𑐳𑑂𑐫𑐣𑐎𑐶 𑐨𑐐𑐰𑐵𑐣𑑄 𑐫𑐵𑐣𑐵𑑅 𑐖𑐹𑐐𑐸 𑐢𑐎𑐵𑑅 𑐀𑐣𑐾𑐎𑐠𑑄 𑐢𑐫𑐵 𑐖𑐸𑐂𑐥𑐶𑑄 𑐗𑐷 𑑋

𑐳𑐬𑑂𑐐𑐟𑐫𑑂 𑐳𑑂𑐰𑐫𑐵𑑅 𑐃 𑐦𑐵𑐟 𑐢𑐵𑑅𑐳𑐵 𑐠𑑅𑐟 𑐴𑐾 𑐔𑐶𑐔𑐵𑑅 𑐰𑐂𑐠𑐾𑑄 𑐏𑑅 𑑋 𑐣𑐶𑐣𑑂𑐴𑐸𑐫𑐵 𑐖𑐷𑐰𑐣 𑐴𑐣𑐾𑐐𑐸 𑐣𑐶𑑄𑐟𑐶𑑄 𑐰𑐶𑐴𑐵𑐬, 𑐐𑐸𑐩𑑂𑐧𑐵, 𑐧𑑂𑐰𑐣𑐾𑐎𑐸𑐠𑐶 𑐁𑐡𑐶 𑐣𑑂𑐴𑑂𑐫𑐵𑐐𑐸 𑐠𑐵𑐳𑐫𑑂 𑐣𑑄 𑐧𑐸𑐡𑑂𑐢 𑐱𑐶𑐎𑑂𑐲𑐵 𑐀𑐢𑑂𑐫𑐫𑐣 𑐫𑐵𑐫𑐾𑐡𑐸 𑑋 𑐧𑐸𑐡𑑂𑐢 𑐢𑐬𑑂𑐩𑐫𑐵 𑐰𑑂𑐫𑐵𑐰𑐴𑐵𑐬𑐶𑐎 𑐱𑐶𑐎𑑂𑐲𑐵 𑐩𑐣𑐹 𑐩𑐵𑐟𑑂𑐬𑐫𑐵 𑐣𑐶𑑄𑐟𑐶𑑄 𑐀𑐟𑐶 𑐁𑐰𑐱𑑂𑐫𑐎 𑐖𑐹 𑑋 𑐣𑑂𑐴𑑂𑐫𑐵𑐎𑑂𑐰 𑐁𑐏𑑅 𑐧𑑂𑐰𑐣𑐵𑐟𑑅𑐳𑐵𑑄 𑐰𑑂𑐫𑐰𑐴𑐵𑐬𑐫𑑂 𑐔𑑂𑐰𑐣𑐾 𑐩𑐦𑐸𑐟 𑐢𑐵𑑅𑐳𑐵 𑐰 𑐧𑑂𑐰𑐣𑐵𑐟𑑅𑐐𑐸𑐫𑐵 𑐕𑐸𑑄 𑐀𑐬𑑂𑐠 𑐩𑐡𑐸 𑑋

𑐩𑐣𑐹 𑐖𑐸𑐫𑐵𑑅 𑐩𑑂𑐰𑐵𑐫𑐾𑐟, 𑐳𑐩𑐵𑐖𑐫𑑂 𑐨𑑂𑐫𑐮𑐫𑑂 𑐥𑐸𑐣𑐾𑐟 𑐩𑐵𑑄𑐀𑐧𑐸𑑄 𑐧𑑁𑐡𑑂𑐢 𑐰𑑂𑐫𑐰𑐴𑐵𑐬 𑐳𑐫𑐾𑐎𑐾 𑐳𑐷𑐎𑐾 𑐫𑐵𑐣𑐵 𑐟𑐮 𑐢𑐵𑑅𑐳𑐵 𑐠𑑅 𑐳𑐣𑑂𑐟𑐵𑐣𑐫𑐵𑐟 𑐨𑐶𑑄𑐐𑐸 𑐮𑑃𑐥𑐸𑐂 𑐫𑑄𑐎𑐾 𑐦𑐂, 𑐳𑐔𑐾𑐟 𑐫𑐵𑐣𑐵 𑐟𑐫𑐾 𑐦𑐂 𑑋 𑐠𑑅 𑐩𑐳𑑂𑐟𑐫𑑂𑐟 𑐣𑑄 𑐧𑐸𑐡𑑂𑐢 𑐱𑐶𑐎𑑂𑐲𑐵 𑐀𑐢𑑂𑐫𑐫𑐣 𑐫𑐵𑐎𑐾𑐐𑐸 𑐳𑑂𑐰𑐫𑐾𑐩𑐵𑑅 𑑋 𑐩𑐔𑐵𑑄𑐣𑐶𑐳𑐾𑑄 𑐧𑐸𑐡𑑂𑐢 𑐱𑐶𑐎𑑂𑐲𑐵 𑐀𑐢𑑂𑐫𑐫𑐣 𑐫𑐵𑐎𑐵𑑅 𑐰𑑂𑐫𑐵𑐰𑐴𑐵𑐬𑐶𑐎 𑐖𑑂𑐫𑐵𑐏𑑃𑐫𑑂 𑐕𑑂𑐫𑐮𑐾 𑐦𑐟 𑐢𑐵𑑅𑐳𑐵 𑐧𑐶𑐫𑐵𑐕𑑂𑐰𑐫𑐾𑐩𑐵𑐣𑐶𑐩𑑂𑐴 𑐩𑑂𑐴𑑂𑐫𑐵𑐫𑑂 𑐩𑐔𑐵𑐥𑐵𑐏𑐾𑑄 𑐩𑑂𑐰𑐵𑑅𑐩𑐡𑐸𑐐𑐸 𑐏𑑃 𑐣𑑂𑐫𑐣𑐵𑐔𑑂𑐰𑐣𑐾 𑐩𑐵𑐮𑐷𑐩𑐏𑐸 𑑋

𑐎𑐵𑐫𑐩𑐔𑐵 𑐖𑐹𑐳𑐵 𑐰𑐫𑐵𑐐𑐸𑐥𑐵𑐏𑐾𑑄 𑐂𑐴𑐶𑐥𑐵 𑐮𑐶𑐥𑐵 𑐧𑐵𑑄𑐩𑐮𑐵𑑅𑐐𑐸 𑐰𑑂𑐫𑐰𑐴𑐵𑐬 𑐫𑐵𑐎𑐵𑐔𑑂𑐰𑐣𑐾𑐩𑐵𑐮𑐷𑐩𑐏𑐸 𑑋 𑐡𑐸𑐬𑑂𑐰𑐔𑐣 𑐣𑑂𑐫𑐣𑐾 𑐩𑐵𑐮𑐷𑐩𑐏𑐸 𑑋 𑐩𑐵𑑄𑐀𑐧𑐸𑐫𑐵𑐟 𑐡𑑂𑐫𑑅 𑐨𑐵𑑅𑐥𑐵𑑅 𑐳𑐾𑐰𑐵 𑐚𑐴𑐮 𑐫𑐵𑐣𑐵𑐔𑑂𑐰𑐣𑐷𑐥𑐶𑑄 𑐖𑐸𑐂 𑑋 𑐠𑑁𑑄 𑐣𑐾𑐥𑐵𑑅𑐫𑐵 𑐴𑐶𑐮𑐵𑐰𑑄𑐐𑐸 𑐀𑐰𑑂𑐫𑐵𑐰𑐴𑐵𑐬𑐶𑐎 𑐱𑐶𑐎𑑂𑐲𑐵𑐫𑐵 𑐎𑐵𑐬𑐞𑑄 𑐩𑐵𑐫𑐵 𑐡𑐫𑐵 𑐩𑐡𑐫𑐵 𑐰𑑄𑐐𑐸, 𑐩𑐵𑑄𑐀𑐧𑐸𑐫𑐵 𑐐𑐸𑐞 𑐮𑑂𑐰𑑅𑐩𑑄𑐎𑐵 𑐕𑑂𑐰𑐂𑐥𑐶𑑄 𑐳𑑂𑐰𑐵𑐬𑑂𑐠𑐷 𑐳𑐣𑑂𑐟𑐵𑐣, 𑐨𑑁𑐟𑐶𑐎 𑐳𑐸𑐏𑐫𑐵 𑐮𑐵𑐮𑐳𑐵 𑐰 𑐟𑐺𑐲𑑂𑐞𑐵𑐫𑐵 𑐳𑐵𑐐𑐬𑐫𑑂 𑐠𑑅𑐟 𑐟𑑄𑐎𑐵𑐔𑑂𑐰𑑄𑐥𑐶𑑄 𑐮𑑂𑐫𑐵𑐳𑐾𑐮𑑂𑐫𑐵𑐫𑑂𑐩𑑂𑐴𑐟𑐫𑑂𑐳𑑄 𑐠𑑅 𑐩𑐵𑑄𑐀𑐧𑐸𑐫𑐵𑐟 𑐴𑑂𑐫𑐫𑐾𑐎𑐵𑑅 𑐂𑐩𑐶𑐐𑐸 𑐳𑐩𑑂𑐥𑐟𑑂𑐟𑐶 𑐠𑑅𑐐𑐸 𑐫𑐵𑐣𑐵 𑐎𑐫𑐵𑑅 𑐂𑐩𑐶𑐟 𑐦𑐮𑑂𑐔𑐵 𑐧𑐵𑐫𑑂 𑐫𑐵𑐫𑐾𑐐𑐸 𑐔𑐮𑐣 𑐖𑐸𑐫𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋

𑐀𑐥𑑂𑐰𑑅 𑐡𑐵𑑄 𑐎𑐩𑐾 𑐫𑐵𑐫𑐾𑐐𑐸, 𑐩𑑀𑐖𑐩𑐳𑑂𑐟𑐶𑐂 𑐔𑑂𑐰𑐣𑐾𑐐𑐸, 𑐠𑑅 𑐴𑐾 𑐩𑐵𑑄𑐀𑐧𑐸 𑐣𑑄 𑐠𑑅𑐥𑐶𑑄𑐟 𑐑𑐵𑐑𑑅 𑐖𑐹𑐐𑐸 𑐟𑐵𑐫𑐾𑐎𑐵𑑅 𑐂𑐩𑐶𑐟 𑐴𑑂𑐫𑐫𑐾𑐎𑐵 𑐰𑐺𑐡𑑂𑐢𑐵𑐱𑑂𑐬𑐩𑐫𑑂 𑐰𑐵𑐣𑐵 𑐠𑐎𑐾𑐐𑐸 𑐔𑐮𑐣 𑐣𑑄 𑐰𑐫𑐵𑐔𑑂𑐰𑑄𑐐𑐸 𑐏𑐣𑐾𑐡𑐸 𑑋 𑐠𑐖𑑂𑐫𑐵𑑅𑐐𑐸 𑐀𑐰𑐳𑑂𑐠𑐵𑐫𑑂 𑐣𑐾𑐥𑐵𑑅𑐫𑐵𑐟 𑐱𑐵𑐣𑐶𑐟𑐫𑐵 𑐟𑐥𑑀𑐨𑐹𑐩𑐶 𑐢𑐵𑐫𑐾𑐟 𑐟𑐎𑑄 𑐩𑐮𑑂𑐰𑐫𑐾𑐢𑐸𑑄𑐎𑐮 𑑋 𑐨𑐐𑐰𑐵𑐣 𑐧𑐸𑐡𑑂𑐢 𑐧𑐹𑐐𑐸 𑐡𑐾𑐫𑑂 𑐏𑐫𑐵𑐣𑑄 𑐰𑐳𑐥𑑀𑐮𑑄 𑐎𑑂𑐫𑐣𑐵𑐧𑐶𑐖𑑂𑐫𑐵𑑅𑐐𑐸 𑐱𑐵𑐣𑑂𑐟𑐶𑐫𑐵 𑐮𑑃𑐥𑐸 𑐣𑐵𑐮𑐵 𑐩𑐎𑐵𑐂𑐥𑐶𑑄 𑐣𑐾𑐥𑐵𑑅𑐩𑐶𑐟 𑐏𑐣𑐵𑑅 𑐰𑐶𑐡𑐾𑐱𑐷𑐟𑐟𑐎𑑄 𑐀𑐖𑐹 𑐔𑐵𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐳𑐸𑐣𑐵𑐣𑑄 𑐧𑐸𑐡𑑂𑐢 𑐢𑐬𑑂𑐩𑐫𑐵 𑐧𑐵𑐬𑐾 𑐣𑑂𑐫𑐣 𑐢𑐵𑑅𑐳𑐵𑑄 𑐣𑑄 𑐧𑐵𑑄𑐮𑐵𑐎 𑐎𑐣𑐾 𑐳𑑅𑐥𑐶𑑄 𑐩𑑂𑐴𑑀 𑐴𑐾 𑐖𑐎 𑐡𑐸 𑑋 𑐄𑐎𑐶𑑄 𑐩𑐣𑐹 𑐖𑐸𑐫𑐵𑑅 𑐩𑑂𑐰𑐵𑐫𑐾𑐐𑐸 𑐏𑑅𑐳𑐵 𑐧𑐸𑐡𑑂𑐢 𑐱𑐶𑐎𑑂𑐲𑐵 𑐣𑐵𑐮𑐵 𑐎𑐵𑐮 𑐢𑐵𑑅𑐳𑐵 𑐖𑐷𑐰𑐣𑐫𑑂 𑐀𑐰𑐱𑑂𑐫 𑐳𑐸𑐏𑐫𑐵 𑐎𑐶𑐔𑐮𑑄 𑐐𑐵𑐂 𑑋