𑐤𑐹𑐐𑐸 𑐱𑐿𑐎𑑂𑐲𑐶𑐎 𑐳𑐟𑑂𑐬 𑐳𑐸𑐬𑐸 𑐖𑐹𑐐𑐸 𑐡𑐸 𑑋 𑐠𑐷𑐠𑐷 𑐎𑐠𑑄 𑐀𑐨𑐶𑐨𑐵𑐰𑐎𑐟𑐫𑑂𑐳𑑄 𑐰𑐶𑐡𑑂𑐫𑐵𑐬𑑂‍𑐠𑐷 𑐨𑐬𑑂‍𑐣𑐵 𑐫𑐵𑐫𑐾𑐐𑐸 𑐎𑑂𑐬𑐩 𑐖𑐵𑐬𑐷 𑐴𑐾 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐠𑑂𑐰 𑐗𑑂𑐰𑐮𑐫𑑂 𑐤𑐹𑐐𑐸 𑐱𑐿𑐎𑑂𑐲𑐶𑐎 𑐳𑐟𑑂𑐬𑐫𑑂 𑐁𑑅 𑐳𑑂𑐠𑐵𑐣𑐷𑐫 𑐥𑐵𑐛𑑂𑐫𑐎𑑂𑐬𑐩 𑐮𑐵𑐐𑐹 𑐫𑐵𑐫𑐾𑐐𑐸 𑐏𑑃 𑐣𑑄 𑐠𑑅𑐐𑐸 𑐴𑐾 𑐎𑐠𑑄 𑐤𑑂𑐫𑑅𑐣𑐾 𑐰𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐠𑑂𑐰 𑐱𑐿𑐎𑑂𑐲𑐶𑐎 𑐳𑐟𑑂𑐬𑐫𑑂 𑐳𑑂𑐰𑐣𑐶𑐐𑑅 𑐡𑐸𑐣𑐾 𑐡𑐎𑐮𑐫𑑂 𑐤𑐵𑐥𑐵𑑄 𑐏𑑂𑐰𑐥 𑐣𑐐𑐬𑐥𑐵𑐮𑐶𑐎𑐵𑑄 𑐳𑑂𑐠𑐵𑐣𑐷𑐫 𑐬𑐸𑐥𑑄 𑐟𑐫𑐵𑐬 𑐫𑐵𑑅𑐐𑐸 𑐳𑑂𑐠𑐵𑐣𑐷𑐫 𑐥𑐵𑐛𑑂𑐫𑐎𑑂𑐬𑐩𑐫𑐵𑐟 𑐮𑐵𑐐𑐹 𑐫𑐵𑐣𑐵𑑅 𑐣𑐩𑐹𑐣𑐵 𑐖𑑂𑐫𑐵 𑐫𑐵𑐣𑐵𑐎𑑂𑐫𑑄𑐐𑐸 𑐡𑐸 𑑋

𑐰𑑄𑐐𑐸 𑐡𑑃𑐫𑑂 𑐕𑐸𑑄 𑐨𑐔𑐵 𑐮𑐶𑐥𑐵 𑐮𑐵𑑅𑐳𑐵𑑄 𑐳𑑂𑐠𑐵𑐣𑐷𑐫 𑐥𑐵𑐛𑑂𑐫𑐎𑑂𑐬𑐩 𑐟𑐫𑐵𑐬 𑐫𑐵𑐣𑐵𑑅 𑐎𑐎𑑂𑐲𑐵 𑑑 𑐰 𑑖 𑐎𑐎𑑂𑐲𑐵𑐫𑑂 𑐳𑑂𑐠𑐵𑐣𑐷𑐫 𑐥𑐵𑐛𑑂𑐫𑐎𑑂𑐬𑐩 𑐮𑐵𑐐𑐹 𑐫𑐵𑑅𑐐𑐸 𑐏𑑂𑐰𑐥 𑐣𑐐𑐬𑐥𑐵𑐮𑐶𑐎𑐵𑑄 𑐁𑑅 𑐠𑐸𑐐𑐸𑐳𑐷 𑐠𑐥 𑑒 𑐎𑐎𑑂𑐲𑐵 𑐰 𑑗 𑐎𑐎𑑂𑐲𑐵𑐫𑑂 𑐣𑑄 𑐳𑑂𑐠𑐵𑐣𑐷𑐫 𑐥𑐵𑐛𑑂𑐫𑐎𑑂𑐬𑐩 𑐮𑐵𑑅𑐐𑐸 𑐫𑐵𑑅𑐐𑐸 𑐡𑐸 𑑋 𑐠𑐠𑐾 𑐴𑐾 𑑑 𑐎𑐎𑑂𑐲𑐵𑐣𑐶𑐳𑐾𑑄 𑑑𑑐 𑐎𑐎𑑂𑐲𑐵 𑐠𑑂𑐫𑑄𑐎 𑐴𑐾 𑐳𑑂𑐠𑐵𑐣𑐷𑐫 𑐥𑐵𑐛𑑂𑐫𑐎𑑂𑐬𑐩 𑐮𑐵𑐐𑐸 𑐫𑐵𑐣𑐵𑑅 𑐰𑑂𑐫𑐰𑐳𑑂𑐠𑐶𑐟 𑐬𑐸𑐥𑑄 𑐥𑐛𑐣𑐥𑐵𑐛𑐣 𑐫𑐵𑐎𑐾𑐐𑐸 𑐏𑑂𑐰𑐥 𑐣𑐐𑐬𑐥𑐵𑐮𑐶𑐎𑐵𑑄 𑐫𑑀𑐖𑐣𑐵 𑐡𑐫𑐾𑐎𑐹𑐐𑐸 𑐡𑐸 𑑋

𑐰𑐬𑑂‍𑐟𑐩𑐵𑐣 𑐂𑐮𑐫𑑂 𑐦𑐸𑐎𑑂𑐎 𑐴𑐾 𑐡𑐾𑐳𑑄 𑐳𑑂𑐠𑐵𑐣𑐷𑐫 𑐥𑐵𑐛𑑂𑐫𑐎𑑂𑐬𑐩𑐫𑐵𑐟 𑐧𑑅 𑐧𑐶𑐫𑐵𑑅 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐠𑑂𑐰 𑐗𑑂𑐰𑐮𑐫𑑂 𑑒𑑐𑑗𑑔 𑐳𑐵𑐮𑑄 𑐣𑐶𑐬𑑂‍𑐰𑐵𑐔𑐶𑐟 𑐖𑐣𑐥𑑂𑐬𑐟𑐶𑐣𑐶𑐢𑐶𑐟𑐫𑑂𑐳𑑄 𑐳𑑄𑐑𑐷𑐫𑐟𑐵𑐫𑐵 𑐧𑑅 𑐎𑐫𑐵𑑅 𑐳𑑂𑐠𑐵𑐣𑐷𑐫 𑐥𑐵𑐛𑑂𑐫𑐎𑑂𑐬𑐩 𑐟𑐫𑐵𑐬 𑐫𑐵𑐣𑐵𑑅 𑐧𑑂𑐰𑑄𑐎𑐾 𑐦𑐂𑐐𑐸 𑐳𑐸𑐰𑐶𑐢𑐵 𑐡𑐫𑐾𑐰𑑄 𑐏𑑂𑐰𑐥𑐫𑑂 𑐠𑑂𑐰 𑐖𑑂𑐫𑐵 𑐳𑐩𑑂𑐨𑐰 𑐖𑐹𑐰𑑄𑐐𑐸 𑐏𑑅 𑑋𑐗𑐷𑐠𑐵𑐫𑑂 𑐠𑐷𑐠𑐷 𑐎𑐠𑑄𑐫𑐵 𑐳𑐘𑑂𑐔𑐵𑐬 𑐩𑐵𑐢𑑂𑐫𑐩 𑐰 𑐣𑐾𑐚𑐰𑐬𑑂‍𑐎𑐶𑐒 𑐧𑐮𑑂𑐮𑐵𑐣𑐵 𑐰𑐣𑐵𑐔𑑂𑐰𑑄𑐐𑐸 𑐎𑐵𑐬𑐞𑑄 𑐬𑐵𑐲𑑂𑐚𑑂𑐬𑐶𑐫 𑐰 𑐀𑐣𑑂𑐟𑐬𑑂‍𑐬𑐵𑐲𑑂𑐚𑑂𑐬𑐶𑐫 𑐱𑐶𑐎𑑂𑐲𑐵𑐫𑐵 𑐰𑐶𑐎𑐵𑐳 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋

𑐀𑐠𑐾 𑐏𑑅𑐳𑐵𑑄 𑐠𑑂𑐰 𑐂𑐮𑐫𑑂 𑐳𑑂𑐠𑐵𑐣𑐷𑐫 𑐖𑑂𑐘𑐵𑐣 𑐩𑑄𑐟 𑐢𑐵𑑅𑐳𑐵 𑐩𑐣𑐹𑐫𑐵 𑐔𑑁𑐟𑐬𑑂‍𑐦𑐷 𑐰𑐶𑐎𑐵𑐳 𑐳𑐩𑑂𑐨𑐰 𑐖𑐸𑐂𑐩𑐏𑐸 𑑋 𑐠𑑁𑑄 𑐰𑐶𑐱𑑂𑐰𑐰𑑂𑐫𑐵𑐥𑐷 𑐬𑐸𑐥𑑄 𑐳𑑂𑐠𑐵𑐣𑐷𑐫 𑐥𑐵𑐛𑑂𑐫𑐎𑑂𑐬𑐩𑐫𑐵𑐟 𑐰𑐶𑐱𑐾𑐲 𑐬𑐸𑐥𑑄 𑐧𑑅 𑐧𑐶𑐫𑐵𑐴𑑅𑐐𑐸 𑐎𑐵𑐬𑐞 𑐣𑑄 𑐠𑑂𑐰 𑐴𑐾 𑐏𑑅 𑑋 𑐳𑑂𑐠𑐵𑐣𑐷𑐫 𑐖𑑂𑐘𑐵𑐣, 𑐱𑐷𑐥 𑐰 𑐀𑐢𑑂𑐫𑐫𑐣𑐫𑐵𑐟 𑐱𑐸𑐎𑑂𑐲𑑂𑐩 𑐀𑐢𑑂𑐫𑐫𑐣𑐫𑐵 𑐰𑐶𑐲𑐫 𑐡𑐫𑐾𑐎𑐵𑑅 𑐩𑐣𑐹𑐟𑐫𑑂𑐟 𑐬𑑀𑐖𑐐𑐵𑐬 𑐫𑐵𑐫𑐾𑐦𑐂𑐐𑐸 𑐁𑐥𑐵𑐮𑑄 𑐁𑐢𑐵𑐬 𑐟𑐫𑐵𑐬 𑐖𑐸𑐫𑐵𑐔𑑂𑐰𑐣𑐷 𑑋

𑐠𑐣𑐫𑐵 𑐏𑐵𑐣𑐷, 𑐄𑐟𑑂𑐥𑐵𑐡𑐣, 𑐧𑐶𑐟𑐬𑐞 𑐰 𑐩𑐾𑐴𑐣𑐟𑐷 𑐖𑐣𑐟𑐵𑐫𑐵 𑐱𑐷𑐥𑐫𑐵𑐟 𑐢𑑂𑐫𑐵𑐣𑐫𑑂 𑐟𑐫𑐵𑑅 𑐳𑑂𑐰𑐫𑐾𑐐𑐸 𑐏𑑅𑐳𑐵 𑐠𑐵𑐫𑑂 𑐠𑐵𑐳𑐫𑑂 𑐕𑐐𑐹 𑐕𑐐𑐹 𑐄𑐟𑑂𑐥𑐵𑐡𑐣, 𑐕𑐐𑐹 𑐕𑐐𑐹 𑐰𑐶𑐱𑐾𑐲𑐟𑐵 𑐏𑐣𑐾 𑐡𑐫𑐵𑐔𑑂𑐰𑑄 𑑋 𑐠𑑂𑐰 𑐁𑑅𑐫𑐵 𑐖𑐎 𑐏𑑃 𑐩𑐏𑐸 𑑋 𑐖𑐸𑐖𑐸 𑐢𑑁𑐫𑐵 𑐮𑐵𑐐𑐶𑑄 𑐏𑑂𑐰𑐥 𑐡𑐾𑐫𑑂 𑐟𑐵𑑅 𑐃 𑐣𑐶𑐳𑐾𑑄 𑐴𑐾 𑐣𑐵𑑄 𑐖𑐵𑑅 𑑋 𑐔𑐵𑐎𑐹𑐫𑐵 𑐣𑐶𑑄𑐟𑐶𑑄 𑐟𑑀𑐏𑐵 𑐫𑐎𑑂𑐰𑑅 𑐴𑐾 𑐥𑑂𑐬𑐳𑐶𑐡𑑂𑐢 𑑋 𑐎𑐬𑐸𑐰𑐵𑐫𑐵 𑐮𑐵𑐐𑐶𑑄 𑐥𑐵𑐮𑑂𑐥𑐵, 𑐔𑐸𑐥𑐷𑐫𑐵 𑐮𑐵𑐐𑐶𑑄 𑐏𑑀𑐚𑐵𑐒 𑐀𑐮𑐾 𑐝𑐵𑐎𑐵𑐫𑐵 𑐣𑐶𑑄𑐟𑐶𑑄 𑐥𑐵𑐮𑑂𑐥𑐵 𑐡𑐾𑐫𑑂 𑐄𑐮𑐶 𑐴𑐾 𑐣𑐵𑑄 𑐔𑐮𑐾 𑐖𑐹 𑑋

𑐠𑑂𑐰 𑐳𑑂𑐠𑐵𑐣𑐷𑐫 𑐱𑐷𑐥, 𑐖𑑂𑐘𑐵𑐣 𑐰 𑐄𑐡𑑂𑐫𑑀𑐐𑐫𑐵 𑐰𑐶𑐱𑐾𑐲𑐟𑐵 𑐏𑑅 𑑋 𑐳𑑂𑐠𑐵𑐣𑐷𑐫 𑐥𑐵𑐛𑑂𑐫𑐳𑐵𑐩𑐐𑑂𑐬𑐷 𑐩𑐡𑐸𑐐𑐸 𑐎𑐵𑐬𑐞𑑄 𑐳𑑂𑐠𑐵𑐣𑐷𑐫 𑐥𑐵𑐛𑑂𑐫𑐎𑑂𑐬𑐩 𑐟𑐫𑐵𑐬 𑐖𑐹𑐳𑐵𑑄 𑐱𑐶𑐎𑑂𑐲𑐎 𑐱𑐶𑐎𑑂𑐲𑐶𑐎𑐵𑐟𑐫𑑂𑐟 𑐕𑐸 𑐳𑑂𑐰𑐫𑐵𑑅 𑐧𑑂𑐰𑑄𑐎𑐾𑐐𑐸 𑐢𑐂𑐐𑐸 𑐳𑐩𑐳𑑂𑐫𑐵 𑐡𑐸 𑑋 𑐟𑐬 𑐠𑑅𑐥𑐶𑑄𑐳𑑄 𑐴𑐾 𑐰𑑂𑐫𑐰𑐴𑐵𑐬𑐶𑐎 𑐬𑐸𑐥𑑄 𑐎𑐩𑐾 𑐫𑐵𑐣𑐵𑐐𑐸 𑐖𑑂𑐘𑐵𑐣, 𑐱𑐷𑐥 𑐰 𑐡𑐏𑐮𑐟𑐵 𑐴𑐾 𑐳𑑂𑐠𑐵𑐣𑐷𑐫 𑐥𑐵𑐛𑑂𑐫𑐎𑑂𑐬𑐩 𑐳𑐬𑐴 𑐖𑐹𑐐𑐸 𑐮𑑂𑐫𑐵𑐏𑑄 𑐠𑑂𑐰𑐴𑐾 𑐁𑐢𑐵𑐬 𑐏𑑅 𑑋

𑐳𑑂𑐠𑐵𑐣𑐷𑐫 𑐱𑐶𑐎𑑂𑐲𑐵 𑐥𑑂𑐬𑐡𑐵𑐣 𑐫𑐵𑐫𑐾𑐐𑐸 𑐮𑐵𑐐𑐶𑑄 𑐥𑐵𑐛𑑂𑐫𑐎𑑂𑐬𑐩 𑐳𑑂𑐰𑐫𑐵𑑄 𑐣𑑄 𑐥𑐵𑐛𑑂𑐫𑐳𑐵𑐩𑐐𑑂𑐬𑐷 𑐴𑐾 𑐡𑐎𑑂𑐎𑐮𑐫𑑂 𑐩𑐴𑐟𑑂𑐰𑐥𑐹𑐬𑑂‍𑐞 𑐏𑑃 𑐏𑑅 𑑋 𑐥𑐵𑐛𑑂𑐫𑐎𑑂𑐬𑐩 𑐳𑑂𑐰𑐫𑐵𑑅 𑐧𑑂𑐰𑑄𑐎𑐾𑐐𑐸 𑐳𑑂𑐰𑐫𑐵𑑄 𑐣𑑄 𑐀𑐨𑑂𑐫𑐵𑐳 𑐰 𑐳𑐵𑐢𑐣𑐵 𑐫𑐵𑐣𑐵𑑅 𑐳𑐫𑐾𑐎𑐾𑐐𑐸 𑐴𑐾 𑐳𑑂𑐠𑐵𑐣𑐷𑐫 𑐖𑑂𑐘𑐵𑐣 𑐥𑑂𑐬𑐵𑐥𑑂𑐟 𑐫𑐵𑐫𑐾𑐐𑐸 𑐄𑐔𑐶𑐟 𑐄𑐥𑐵𑐫 𑐏𑑅 𑑋 𑐠𑐣 𑐴𑐾 𑐄𑐥𑐮𑐧𑑂𑐢 𑐣𑑂𑐫𑐫𑑂𑐣𑑂𑐫𑐵𑐥𑐵 𑐗𑑂𑐫𑐵𑑅, 𑐣𑑂𑐫𑐵𑐟𑐵𑐥𑑁, 𑐮𑐸𑑃 𑐢𑑂𑐰𑐵𑐏𑐵𑐫𑐵 𑐧𑐵𑐬𑐾 𑐳𑐦𑐸𑐟𑐶𑐂 𑐕𑐸𑑄 𑐄𑐮𑑂𑐮𑐾𑐏 𑐫𑐵𑐣𑐵 𑐔𑑂𑐰𑐣𑐾𑐐𑐸 𑐳𑑂𑐰𑐫𑐵𑑄 𑐳𑑂𑐠𑐮𑐐𑐟 𑐣𑐶𑐬𑐷𑐎𑑂𑐲𑐞 𑐫𑐵𑐎𑐵𑑅 𑐀𑐢𑑂𑐫𑐵𑐥𑐎𑑄 𑐄𑐎𑐶𑐫𑐵 𑐧𑐵𑐬𑐾 𑐀𑐣 𑐴𑐾 𑐧𑑂𑐫𑐵𑐏𑑂𑐫𑐵 𑐧𑐫𑐵𑐣 𑐫𑐵𑐣𑐵 𑐎𑑂𑐫𑐣𑐾𑐐𑐸 𑐖𑐸𑐮 𑐢𑐵𑑅𑐳𑐵 𑐰 𑐠𑐾𑑄𑐖𑑂𑐫𑐵𑑅𑐐𑐸 𑐧𑐵𑑄𑐮𑐵𑑅𑐐𑐸 𑐰 𑐨𑐶𑑄𑐐𑐸 𑐱𑐶𑐎𑑂𑐲𑐵 𑐕𑐸 𑐴𑐾 𑐖𑐸𑐂𑐦𑐂 ?

𑐥𑐵𑐛𑑂𑐫𑐎𑑂𑐬𑐩𑐫𑐵 𑐁𑐢𑐵𑐬𑐫𑑂 𑐖𑐎 𑐧𑑂𑐰𑑄𑐎𑐾𑐐𑐸 𑐫𑐵𑐟 𑐢𑐵𑑅𑐳𑐵 𑐳𑐩𑐐𑑂𑐬 𑐰𑐶𑐎𑐵𑐳 𑐖𑐸𑐂 𑐦𑐂𑐩𑐏𑐸 𑑋 𑐧𑐺𑐴𑐟 𑐖𑑂𑐘𑐵𑐣 𑐡𑐸𑐪 𑐳𑑂𑐠𑐵𑐣𑐷𑐫 𑐱𑐶𑐎𑑂𑐲𑐎𑐫𑐵𑐟 𑐴𑐾 𑐄𑐐𑐸 𑐰𑐶𑐲𑐫𑐫𑐵 𑐱𑐶𑐎𑑂𑐲𑐎 𑐰𑐵 𑐱𑐶𑐎𑑂𑐲𑐶𑐎𑐵 𑐡𑐫𑐾𑐎𑐵𑑅 𑐧𑑂𑐰𑑄𑐎𑐾 𑐧𑐶𑐂𑐐𑐸 𑐫𑐵𑐟 𑐢𑐵𑑅𑐳𑐵 𑐰 𑐠𑐾𑑄 𑐧𑐵𑑄𑐮𑐵𑑅𑐐𑐸 𑐖𑑂𑐫𑐵 𑐩𑐾𑐐𑐸 𑐖𑐸𑐂𑐩𑐏𑐸 𑑋 𑐁𑑅 𑐮𑐶𑐥𑐵 𑐮𑐶𑐥𑐵 𑐩𑐾𑐩𑐾𑐐𑐸 𑐰𑐶𑐲𑐫 𑐣𑑄 𑐥𑐵𑐛𑑂𑐫𑐎𑑂𑐬𑐩𑐫𑐵 𑐁𑐢𑐵𑐬𑐫𑑂 𑐖𑐎 𑐩𑐏𑐸𑐳𑐾𑑄 𑐥𑐵𑐛𑑂𑐫𑐳𑐵𑐩𑐐𑑂𑐬𑐷𑐫𑐵𑐟 𑐴𑐾 𑐧𑑅 𑐧𑐶𑐫𑐵𑑅 𑐫𑑄𑐎𑐾𑐩𑐵𑑅 𑑋

𑐁𑐢𑐵𑐬𑐨𑐹𑐟 𑐳𑐴𑐫𑑀𑐐𑐷 𑐳𑐵𑐩𑐐𑑂𑐬𑐷𑐟 𑐥𑐵𑐛𑑂𑐫𑐎𑑂𑐬𑐩 𑐩𑐏𑐸 𑑋 𑐀𑐠𑐾 𑐏𑑅𑐳𑐵𑑄 𑐧𑐵𑑄𑐮𑐵𑐎 𑐠𑐸𑐂𑐎𑐾𑐟 𑐄𑐎𑐶𑑄 𑐐𑑂𑐰𑐵𑐴𑐵𑐮𑐶 𑐫𑐵𑑅 𑑋𑐏𑑂𑐰𑐥 𑐣𑐐𑐬𑐥𑐵𑐮𑐶𑐎𑐵𑑄 𑐫𑐡𑐶 𑐳𑑂𑐠𑐵𑐣𑐷𑐫 𑐥𑐵𑐛𑑂𑐫𑐎𑑂𑐬𑐩 𑐡𑐫𑐾𑐎𑐮 𑐢𑐵𑑅𑐳𑐵 𑐄𑐎𑐷 𑐀𑐣 𑐧𑑂𑐰𑐂𑐐𑐸 𑐴𑐮𑐶𑐩𑐮𑐶 𑐧𑑂𑐰𑐖𑑂𑐫𑐵 𑐰𑐵 𑐳𑐎𑐶𑐩𑐶𑐮𑐵 𑐥𑐸𑐤𑐶𑐫𑐵 𑐧𑐵𑐬𑐾 𑐄𑐮𑑂𑐮𑐾𑐏 𑐩𑐫𑐵𑐳𑐾𑑄 𑐩𑐖𑐶𑐮 𑑋 𑐳𑐎𑐶𑐩𑐶𑐮𑐵 𑐥𑐸𑐤𑐶𑐫𑐵 𑐱𑐵𑐧𑑂𑐡𑐶𑐎 𑐀𑐬𑑂‍𑐠 𑐀𑐣 𑐰𑐫𑐾𑐩𑐵𑐮 𑑋 𑐀𑐠𑐾𑐴𑐾 𑐫𑑅𑐩𑐬𑐷 𑐥𑐸𑐤𑐶𑐫𑐵 𑐧𑐵𑐬𑐾 𑐥𑐵𑐛 𑐳𑐩𑐵𑐰𑐾𑐱 𑐫𑐵𑐫𑐾𑐐𑐸𑐮𑐶𑐳𑐾𑑄 𑐄𑐎𑐶𑐫𑐵 𑐱𑐵𑐧𑑂𑐡𑐶𑐎 𑐀𑐬𑑂‍𑐠 𑐰 𑐫𑑅𑐩𑐬𑐷 𑐡𑐫𑐾𑐎𑐾𑐧𑐮𑐫𑑂 𑐰𑐶𑐱𑐾𑐲 𑐎𑐠𑑄 𑐩𑐵𑐫𑑅 𑐧𑐵𑐫𑑅 𑐢𑐎𑐵𑑅 𑐩𑐶𑐖𑑄 𑐫𑑅𑐩𑐬𑐷 𑐰 𑐩𑐶𑐳𑐵 𑐫𑑅𑐩𑐬𑐷 𑐡𑐫𑐾𑐎𑐾𑐐𑐸 𑐳𑑂𑐫𑐣𑐾 𑐴𑐾 𑐩𑐵𑐮 𑑋

𑐣𑐵𑐥𑑄 𑐟𑑂𑐫𑐕𑐶𑑄𑐟𑑂𑐫𑑅𑐫𑐵 𑐰𑐶𑐱𑐾𑐲𑐟𑐵 𑐕𑐸 𑐏𑑅 𑐰 𑐏𑑂𑐰𑐥𑐫𑑂 𑐴𑐵𑐮𑐷𑐐𑐸 𑐟𑑂𑐫𑐕𑐶𑑄𑐟𑑂𑐫𑑅 𑐩𑑂𑐫𑐾 𑐐𑐖𑑂𑐫𑐵𑑅𑐐𑐸 𑐏𑑅 𑐢𑐂𑐐𑐸 𑐧𑐵𑑄𑐮𑐵𑐎 𑐄𑐮𑑂𑐮𑐾𑐏 𑐫𑐵𑐫𑐾𑐩𑐵𑐮 𑑋 𑐣𑐵𑐥𑑄 𑐴𑐵𑐎𑐸𑐰𑐵 𑐟𑐫𑐵𑑅 𑐧𑐸𑐬𑐵𑑄𑐖𑑂𑐫𑐵 𑐫𑐵𑐂𑐐𑐸 𑐣𑐾𑐰𑐵𑑅 𑐖𑑂𑐫𑐵𑐥𑐸 𑐳𑐩𑐸𑐡𑐵𑐫𑐫𑐵 𑐥𑐸𑐮𑐵𑑄𑐐𑐸 𑐳𑑄𑐳𑑂𑐎𑐺𑐟𑐶𑐫𑐵 𑐧𑐵𑐬𑐾 𑐥𑑂𑐬𑐟𑑂𑐫𑐎𑑂𑐲 𑐣𑐶𑐐𑐬𑐵𑐣𑐷 𑐫𑐵𑐎𑐾𑐩𑐵𑐮 𑑋 𑐥𑐵𑐛𑑂𑐫𑐎𑑂𑐬𑐩𑐫𑑂 𑐠𑐖𑑂𑐫𑐵𑑅𑐐𑐸 𑐰𑐶𑐲𑐫𑐫𑐵𑐟 𑐀𑐣𑐶𑐰𑐵𑐬𑑂‍𑐫 𑐎𑐠𑑄 𑐡𑐸𑐠𑑂𑐫𑐵𑐎𑐾𑐩𑐵𑐮 𑑋 𑐴𑐵𑐎𑐸𑐰𑐵𑐫𑐵 𑐥𑑂𑐬𑐫𑑀𑐐, 𑐴𑐵𑐎𑐸𑐰𑐵𑐫𑐵 𑐰𑐶𑐱𑐾𑐲𑐟𑐵 𑐰 𑐀𑐣 𑐴𑐵𑐮𑐷𑐐𑐸 ‘𑐰𑐵𑐏𑐵𑐳𑐾…’ 𑐩𑑂𑐫𑐾𑐫𑐵 𑐀𑐬𑑂‍𑐠 𑐠𑐸𑐂𑐎𑐾𑐩𑐵𑐮 𑑋

𑐩𑐔𑐵 𑐧𑑂𑐫𑑄𑐎𑐾𑐐𑐸 𑐰𑐵 𑐖𑐫𑑂𑐐𑐸𑐮𑐶 𑐧𑑂𑐫𑑄𑐎𑐾𑐐𑐸 𑐰𑐶𑐲𑐫𑐫𑑂 𑐥𑐵𑐛𑑂𑐫𑐎𑑂𑐬𑐩𑐫𑑂 𑐡𑐸𑐠𑑂𑐫𑐵𑐎𑐾𑐩𑐵𑐮 𑑋 𑐀𑐧𑐮𑐫𑑂 𑐣𑐂𑐐𑐸 𑐰𑐶𑐱𑐾𑐲 𑐎𑐠𑑄𑐫𑐵 𑐣𑐳𑐵 𑐂𑐳𑐶𑐔𑐵, 𑐎𑐵𑑃𑐫𑑂𑐨𑐹𑐫𑐵 𑐣𑑄 𑐖𑑂𑐘𑐵𑐣 𑐧𑐶𑐫𑐾𑐩𑐵𑐮 𑑋 𑐐𑐠𑐵𑑄𑐩𑐸𑐐𑑅 𑐔𑑅𑐴𑑂𑐬𑐾𑐫𑐵 𑐰𑐶𑐱𑐾𑐲𑐟𑐵 𑐠𑐸𑐂𑐐𑐸 𑐥𑐵𑐛 𑐡𑐸𑐠𑑂𑐫𑐵𑐎𑐾𑐩𑐵𑐮 𑑋 𑐦𑑀𑐴𑐬 𑐔𑐸𑐂𑐎𑐾𑐩𑐵𑑅𑐐𑐸 𑐰 𑐰𑐵𑐫𑐸 𑐥𑑂𑐬𑐡𑐸𑐲𑐞 𑐪𑑀 𑐫𑐵𑐫𑐾𑐟 𑐕𑐸 𑐫𑐵𑐫𑐾𑐩𑐵𑑅 𑐢𑐂𑐐𑐸 𑐖𑑂𑐘𑐵𑐣 𑐄𑐐𑐸 𑐔𑑅𑐴𑑂𑐬𑐾𑐮𑐶𑐳𑐾 𑐳𑑂𑐰𑐵𑐣𑐵𑐔𑑂𑐰𑑄𑐐𑐸 𑐏𑑃 𑐎𑐣𑐾𑐩𑐵𑐮 𑑋

𑐰𑐶𑐱𑑂𑐰𑐧𑑂𑐫𑐵𑐥𑐷 𑐬𑐸𑐥𑑄 𑐔𑐮𑐾 𑐖𑐸𑐫𑐵𑐰𑑅𑐐𑐸 𑐪𑐥𑐹𑐖𑐵, 𑐎𑐶𑐖𑐵𑐥𑐹𑐖𑐵 𑐰 𑐳𑑂𑐰𑐳𑑂𑐠 𑐖𑐷𑐰𑐣𑐫𑐵 𑐩𑐴𑐟𑑂𑐰𑐫𑐵𑐟 𑐣𑐾𑐰𑐵𑑅 𑐳𑐩𑐵𑐖𑑄 𑐤𑐵𑐥𑐵𑑄𑐣𑐶𑐳𑐾𑑄 𑐐𑐸𑐎𑐠𑑄 𑐖𑑂𑐘𑐵𑐣 𑐰 𑐱𑐶𑐎𑑂𑐲𑐵 𑐎𑐫𑐵𑐔𑑂𑐰𑑄𑐐𑐸 𑐡𑐸 𑐢𑐂𑐐𑐸 𑐠𑐸𑐂𑐎𑐾𑐐𑐸 𑐖𑑂𑐫𑐵 𑐥𑐵𑐛𑑂𑐫𑐎𑑂𑐬𑐩 𑐩𑐵𑐬𑑂‍𑐦𑐟𑑂 𑐤𑐹𑐐𑐸 𑐥𑐸𑐳𑑂𑐟𑐵𑐫𑐵𑐟 𑐧𑐶𑐂𑐦𑐟 𑐢𑐵𑑅𑐳𑐵 𑐠𑑅𑐐𑐸 𑐥𑐸𑐬𑑂‍𑐏𑐵 𑐥𑑂𑐬𑐟𑐶 𑐐𑑁𑐬𑐰 𑐫𑐵𑐫𑐾𑐳𑐂 𑑋 𑐣𑐵𑐥𑑄 𑐏𑑂𑐰𑐥𑐫𑐵 𑐖𑐸𑐖𑐸 𑐢𑑁, 𑐥𑑀𑐲𑑂𑐚𑐎𑐵𑐬𑐷, 𑐐𑐸𑐮𑑂𑐥𑐵𑐏 𑐰 𑐠𑐣𑐫𑐵 𑐩𑐶𑐳𑑂𑐟𑐫𑑂 𑐥𑐸𑐣𑐷𑐐𑐸 𑐴𑐵𑐎𑐸 𑐥𑐟𑐵𑐳𑐶𑐫𑐵 𑐧𑐵𑐬𑐾 𑐰𑐶𑐱𑐾𑐲 𑐎𑐠𑑄 𑐥𑐵𑐛𑑂𑐫𑐎𑑂𑐬𑐩𑐫𑑂 𑐡𑐸𑐠𑑂𑐫𑐵𑐎𑐵𑑅 𑐄𑐎𑐶𑑄 𑐖𑐸𑐂𑐐𑐸 𑐦𑐵𑐂𑐡𑐵, 𑐳𑑂𑐰𑐵𑐳𑑂𑐠𑑂𑐫𑐫𑐵 𑐮𑐵𑐐𑐶𑑄 𑐣𑐫𑐾𑐐𑐸, 𑐥𑐸𑐣𑐾𑐐𑐸𑐫𑐵 𑐩𑐴𑐟𑑂𑐰 𑐠𑐸𑐂𑐎𑐾 𑐦𑐟 𑐢𑐵𑑅𑐳𑐵 𑐁𑑅 𑐠𑐾𑑄 𑐦𑐾𑐱𑐣𑐫𑐵 𑐣𑐵𑐩𑐫𑑂 𑐳𑑂𑐰𑐂𑐥𑐶𑑄𑐳𑑄 𑐩𑐶𑐏𑐵 𑐟𑐶𑐳𑐶𑐣𑐵 𑐖𑐸𑐂𑐩𑐵𑐮𑐶𑐐𑐸 𑐀𑐰𑐳𑑂𑐠𑐵 𑐰𑐂𑐩𑐏𑐸 𑐖𑐸𑐂 𑑋

𑐥𑐵𑐛𑑂𑐫𑐎𑑂𑐬𑐩𑐫𑑂 𑐖𑐎 𑐳𑐷𑐩𑐶𑐟 𑐩𑐖𑐹𑐳𑐾 𑐠𑑅𑐥𑐶𑐳𑑄 𑐳𑐫𑐾𑐎𑐵𑐐𑐸 𑐳𑐶𑐂𑐎𑐵𑐐𑐸 𑐖𑑂𑐘𑐵𑐣 𑐰 𑐱𑐷𑐥𑐫𑐵 𑐏𑑃 𑐰𑐶𑐡𑑂𑐫𑐵𑐬𑑂‍𑐠𑐷𑐟𑐫𑑂𑐟 𑐳𑑂𑐠𑐮𑐐𑐟 𑐬𑐸𑐥𑑄 𑐰𑐵 𑐪𑐶𑐟𑐎𑐸𑑄 𑐪𑐶𑐟𑐎𑐸𑑄 𑐳𑑂𑐫𑐣𑐾 𑐦𑐟 𑐢𑐵𑑅𑐳𑐵 𑐰 𑐳𑐡𑐵𑑄 𑐮𑑂𑐫𑐣𑐵𑐔𑑂𑐰𑐣𑐷 𑑋 𑐠𑐣 𑐴𑐾 𑐄𑐥𑐮𑐧𑑂𑐢 𑐔𑐵𑐫𑐵 𑐨𑐵𑐬𑐵 𑐕𑐶𑐂𑐐𑐸 𑐥𑐬𑐩𑑂𑐥𑐬𑐵𑐐𑐟 𑐔𑐵𑐖𑑂𑐫𑐵 𑐣𑐵𑐥𑑄 𑐳𑐶𑑃𑐫𑐵 𑐧𑐸𑐚𑑂𑐚𑐵 𑐎𑐶𑐂𑐐𑐸 𑐎𑐵𑐂𑐡𑐵 𑐰 𑐳𑐶𑐖𑑅 𑐑𑑅, 𑐮𑐷 𑐑𑑅 𑐰 𑐩𑐾𑐩𑐾𑐐𑐸 𑐱𑐷𑐥𑐫𑐵 𑐥𑑂𑐬𑐰𑐡𑑂𑐬𑑂‍𑐢𑐣 𑐫𑐵𑐂 𑐎𑐠𑑄𑐫𑐵 𑐖𑑂𑐘𑐵𑐣 𑐄𑐩𑐶𑐟 𑐧𑐷𑐦𑐟 𑐢𑐵𑑅𑐳𑐵 𑐳𑑂𑐠𑐵𑐣𑐷𑐫 𑐥𑐵𑐛𑑂𑐫𑐎𑑂𑐬𑐩 𑐳𑐦𑐮 𑐖𑐸𑐂 𑑋

𑐁𑑅 𑐣𑐎𑐟𑐶𑐣𑐶 𑐖𑐎 𑐎𑑂𑐰𑐔𑐵𑑅𑐐𑐸 𑐧𑐶𑐳𑑂𑐎𑐵𑑅 𑐖𑐵𑐟𑑂𑐬𑐵 𑐠𑐾𑑄𑐖𑑂𑐫𑐵𑑅𑐐𑐸 𑐟𑑅𑐖𑐶𑐐𑐸 𑐖𑐵𑐟𑑂𑐬𑐵, 𑐪𑐥𑐹𑐖𑐵 𑐠𑐾𑑄𑐖𑑂𑐫𑐵𑑅𑐐𑐸 𑐥𑐬𑐩𑑂𑐥𑐬𑐵 𑐟𑐵𑑅 𑐃 𑐟𑐎 𑐴𑐣𑐾 𑐢𑐸𑑄𑐎𑐹𑐥𑐶𑑄 𑐗𑐷 𑐥𑐸𑐬𑑂‍𑐏𑐵𑐟 𑐴𑐾 𑐖𑑂𑐘𑐵𑐣𑐫𑐵 𑐱𑑂𑐬𑑀𑐟 𑐰𑑂𑐫𑐎𑑂𑐟𑐶𑐟 𑐏𑑅 𑑋 𑐩𑐵𑐑 𑑑 𑐐𑐟𑐾 𑐠𑐠𑐸𑐧𑐴𑐷𑐫𑐵 𑐧𑐸𑐬𑐵𑑄𑐏𑑂𑐫𑐮𑐫𑑂 𑐖𑐸𑐂𑐐𑐸 𑐏𑑂𑐰𑐥𑐫𑐵 𑐳𑐩𑑂𑐫𑐎 𑐡𑐵𑐣, 𑐳𑐵𑐥𑐵𑐬𑐸, 𑐨𑐿𑐮𑑅𑐏𑑅 𑐳𑐵𑐮𑐾𑐐𑐸 𑐥𑐬𑐩𑑂𑐥𑐬𑐵, 𑐐𑐠𑐵𑑄𑐩𑐸𑐐𑑅 𑐠𑐾𑑄𑐖𑑂𑐫𑐵𑑅𑐐𑐸 𑐏𑑂𑐰𑐥𑐫𑐵 𑐩𑑁𑐮𑐶𑐎 𑐰𑐶𑐱𑐾𑐲𑐟𑐵 𑐀𑐗 𑐀𑐥𑑂𑐰𑑅 𑐥𑑂𑐬𑐔𑐵𑐬 𑐫𑐵𑐫𑐾 𑐦𑐟 𑐢𑐵𑑅𑐳𑐵 𑐖𑐎 𑐗𑐷𑐐𑐸 𑐐𑑁𑐬𑐰 𑐠𑐴𑐵𑑄 𑐰𑐣𑐷 𑑋

𑐠𑑂𑐰 𑐏𑑃𑐫𑑂 𑐁𑑅 𑐏𑑂𑐰𑐥 𑐣𑐐𑐬𑐥𑐵𑐮𑐶𑐎𑐵𑑄 𑐢𑑂𑐫𑐵𑐣 𑐟𑐫𑐾𑐩𑐵𑑅𑐐𑐸 𑐏𑐣𑐾𑐡𑐸 𑑋 𑐏𑑂𑐰𑐥𑐫𑐵 𑐟𑐮𑐾𑐖𑐸, 𑐣𑐰𑐡𑐸𑐬𑑂‍𑐐𑐵 𑐰 𑐠𑐷𑐠𑐷 𑐧𑐴𑐵𑑅𑐧𑐴𑐷𑐫𑐵 𑐧𑐵𑐬𑐾 𑐀𑐮𑐐 𑐀𑐮𑐐 𑐳𑐴𑐵𑐫𑐎 𑐳𑐵𑐩𑐐𑑂𑐬𑐷 𑐳𑐴𑐶𑐟 𑐥𑐵𑐛𑑂𑐫𑐎𑑂𑐬𑐩 𑐟𑐫𑐵𑐬 𑐫𑐵𑐫𑐾 𑐦𑐟 𑐢𑐵𑑅𑐳𑐵 𑐗𑐷𑐐𑐸 𑐥𑐸𑐬𑑂‍𑐏𑐵𑑄 𑐡𑐫𑐾𑐎𑐹𑐐𑐸 𑐳𑐩𑑂𑐥𑐟𑑂𑐟𑐶 𑐗𑐷𑐐𑐸 𑐎𑐮𑐵 𑐰 𑐳𑑄𑐳𑑂𑐎𑐺𑐟𑐶 𑐢𑐂𑐐𑐸 𑐏𑑂𑐰𑐥 𑐣𑐐𑐬𑐥𑐵𑐮𑐶𑐎𑐵𑐫𑐵 𑐣𑐵𑐬𑐵 𑐀𑐗 𑐳𑐵𑐬𑑂‍𑐠𑐎 𑐖𑐸𑐂𑐐𑐸 𑐏𑐣𑐾𑐡𑐸 𑑋