𑐫𑐾𑑃 – 𑐐𑑄𑐎𑐷 𑐢𑐸𑐳𑑂𑐰𑐵𑑄 𑐧𑐳𑐸𑐣𑑂𑐢𑐬𑐵 𑐥𑑂𑐬𑐟𑐶𑐲𑑂𑐛𑐵𑐣𑐥𑐵𑐏𑐾𑑄 𑐣𑐶𑐡𑑃𑐫𑑂 𑐕𑐎𑑂𑐰𑑅 𑐧𑐶𑐫𑐵 𑐰𑐫𑐵𑐔𑑂𑐰𑑄𑐐𑐸 𑐐𑑄𑐎𑐷–𑐢𑐸𑐳𑑂𑐰𑐵𑑄 𑐧𑐳𑐸𑐣𑑂𑐢𑐬𑐵 𑐳𑐶𑐬𑐥𑐵𑑅 𑐠𑐸𑐐𑐸𑐳𑐷 𑐄𑐥𑐣𑑂𑐫𑐵𑐳𑐎𑐵𑐬 𑐩𑐮𑑂𑐮 𑐎𑐾. 𑐳𑐸𑐣𑑂𑐡𑐬𑐫𑐵𑐟 𑐮𑑅𑐯𑐵𑑅𑐐𑐸 𑐡𑐸 𑑋 𑐥𑑂𑐬𑐟𑐶𑐲𑑂𑐛𑐵𑐣𑐫𑐵 𑐐𑑂𑐰𑐳𑐵𑐮𑐫𑑂 𑐪𑐶𑐐𑑅 𑐖𑐹𑐐𑐸 𑐕𑐐𑐹 𑐳𑐩𑐵𑐬𑑀𑐴𑐫𑑂 𑐖𑐣𑐎𑐰𑐶 𑐡𑐸𑐬𑑂‍𑐐𑐵𑐮𑐵𑐮 𑐱𑑂𑐬𑐾𑐲𑑂𑐛𑑄 𑑕𑑐 𑐡𑑂𑐰𑑅 𑐟𑐎𑐵𑐫𑐵 𑐄𑐐𑐸 𑐳𑐶𑐬𑐥𑐵𑑅 𑐮𑑅𑐯𑐵𑐣𑐵𑐡𑐷𑐐𑐸 𑐏𑑅 𑑋

𑐄𑐐𑐸 𑐴𑐾 𑐳𑐩𑐵𑐬𑑀𑐴𑐫𑑂 𑐖𑐣𑐐𑐵𑐫𑐎 𑐬𑐵𑐩𑐾𑐱𑐫𑐵𑐟 𑐠𑐸𑐐𑐸𑐳𑐷𑐫𑐵 𑐢𑐸𑐳𑑂𑐰𑐵𑑄 𑐳𑐵𑐫𑑂𑐩𑐶 𑐳𑐶𑐬𑑂‍𑐖𑐣𑐵 𑐳𑐩𑑂𑐩𑐵𑐣𑑄 𑐕𑐵𑐫𑑂𑐥𑐶𑐄𑐐𑐸 𑐏𑑅 𑑋 𑐖𑑂𑐫𑐵𑐗𑑂𑐰𑐮𑐫𑑂 𑐖𑐣𑐎𑐰𑐶 𑐡𑐸𑐬𑑂‍𑐐𑐵𑐮𑐵𑐮 𑐱𑑂𑐬𑐾𑐲𑑂𑐛𑑄 𑐠𑑅𑐐𑐸 𑐤𑐵𑐥𑐵𑑄𑐐𑐸 𑐎𑐺𑐟𑐶 𑐥𑐶𑐠𑐣𑐾𑐐𑐸 𑐣𑐶𑑄𑐟𑐶 𑐢𑐸𑐳𑑂𑐰𑐵𑑄 𑐳𑐵𑐫𑑂𑐩𑐶𑑄 𑐁𑐬𑑂‍𑐠𑐶𑐎 𑐐𑑂𑐰𑐵𑐴𑐵𑐮𑐶 𑐫𑐵𑐣𑐵𑐡𑐷𑐐𑐸 𑐏𑑃 𑐎𑐣𑐵𑐡𑐶𑐮 𑑋 𑐰𑐫𑑂𑐎𑐮𑑄 𑐕𑐪 𑐳𑐦𑐮 𑐔𑑂𑐰𑐩𑐶𑐫𑐵 𑐮𑐶𑐳𑐾𑑄 𑐢𑐸𑐳𑑂𑐰𑐵𑑄 𑐳𑐵𑐫𑑂𑐩𑐶 𑐟𑑅𑐦𑐵𑐐𑐸 𑐣𑐸𑐐𑑅 𑐡𑐸𑐪 𑐣𑐾𑐰𑐵𑑅 𑐰𑑂𑐫𑐎𑑂𑐟𑐶𑐟𑑂𑐰 𑐏𑑅 𑐢𑐎𑐵𑑅 𑐣𑑄 𑐢𑐫𑐵𑐡𑐶𑐮 𑑋

𑐳𑐩𑑂𑐩𑐵𑐣𑐶𑐟 𑐰𑑂𑐫𑐎𑑂𑐟𑐶𑐟𑑂𑐰 𑐬𑐵𑐩𑐾𑐱 𑐱𑑂𑐬𑐾𑐲𑑂𑐛𑑄 𑐣𑐾𑐥𑐵𑐮𑐷 𑐖𑐣𑐟𑐵 𑐳𑐩𑑂𑐩𑐵𑐣𑐶𑐟 𑐖𑐸𑐂𑐎𑐾𑐟 𑐠𑐖𑑂𑐫𑐵𑑅𑐐𑐸 𑐳𑐩𑑂𑐩𑐵𑐣𑑄 𑐐𑑂𑐰𑐵𑐴𑐵𑐮𑐶 𑐫𑐵𑐂 𑐢𑐫𑐵𑐡𑐶𑐮 𑑋 𑐄𑐥𑐣𑑂𑐫𑐵𑐳𑐎𑐵𑐬 𑐩𑐮𑑂𑐮 𑐎𑐾. 𑐳𑐸𑐣𑑂𑐡𑐬𑑄 𑐠𑐪𑑄 𑐥𑐾𑐱𑐵 𑐰𑐵 𑐣𑐱𑐵𑐫𑐵 𑐬𑐸𑐥𑐫𑑂 𑐩𑐏𑐸𑐳𑐾𑑄 𑐠𑑅𑐐𑐸 𑐣𑐾𑐰𑐵𑑅 𑐨𑐵𑐫𑑂𑐫𑐵𑐟 𑐣𑐾𑐥𑐵𑐮𑐷 𑐨𑐵𑐫𑑂 𑐩𑐢𑐵𑐳𑐾 𑐬𑐵𑐖𑑂𑐫𑑄 𑐫𑐵𑐣𑐵𑐟𑑅𑐐𑐸 𑐰𑐶𑐨𑐾𑐡𑐫𑐵 𑐰𑐶𑐬𑐸𑐡𑑂𑐢 𑐔𑑂𑐰𑐳𑐵 𑐤𑑂𑐫𑐵𑐎𑐵𑐔𑑂𑐰𑐣𑐵𑐐𑐸 𑐏𑑃 𑐎𑐣𑐵𑐡𑐶𑐮 𑑋

𑐐𑑄𑐎𑐷 𑐢𑐸𑐳𑑂𑐰𑐵𑑄 𑐧𑐳𑐸𑐣𑑂𑐢𑐬𑐵 𑐥𑑂𑐬𑐟𑐶𑐲𑑂𑐛𑐵𑐣𑐫𑐵 𑐣𑐵𑐫𑑅 𑐜𑐵. 𑐀𑐬𑐸𑐞 𑐳𑐵𑐫𑑂𑐩𑐶𑐫𑐵 𑐳𑐨𑐵𑐥𑐟𑐶𑐟𑑂𑐰𑐫𑑂 𑐖𑐹𑐐𑐸 𑐄𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐐𑐵𑐫𑐎 𑐬𑐵𑐩𑐾𑐱𑑄 𑐠𑐷𑐠𑐷 𑐥𑑂𑐬𑐐𑐟𑐶𑐱𑐷𑐮 𑐩𑑂𑐫𑐾𑑃 𑐣𑑂𑐫𑑄𑐎𑐵𑐡𑐷𑐐𑐸 𑐏𑑅 𑑋 𑐖𑑂𑐫𑐵𑐗𑑂𑐰𑐮𑐫𑑂 𑐳𑐩𑑂𑐩𑐵𑐣𑐶𑐟 𑐰𑑂𑐫𑐎𑑂𑐟𑐶 𑐬𑐵𑐩𑐾𑐱𑐫𑐵 𑐪𑐳𑐷𑐎𑐵 𑐴𑐬𑐶𑐥𑑂𑐬𑐳𑐵𑐡 𑐰𑐿𑐡𑑂𑐫 𑐰 𑐩𑐮𑑂𑐮𑐫𑐵 𑐪𑐳𑐷𑐎𑐵 𑐀𑐣𑐶𑐟𑐵 𑐟𑐸𑐮𑐵𑐢𑐬𑑄 𑐧𑐶𑐫𑐵𑐡𑐷𑐐𑐸 𑐏𑑅𑐳𑐵 𑐴𑐬𑐶𑐴𑐬 𑐱𑐬𑑂‍𑐩𑐵𑑄 𑐳𑐸𑐨𑐵𑐫𑑂 𑐡𑐾𑐕𑐵𑐣𑐵𑐡𑐷𑐐𑐸 𑐏𑑅 𑑋