𑐣𑐾𑐰𑐵𑑅 𑐦𑐶𑐮𑑂𑐩𑐫𑐵 𑐐𑐟𑐶𑐰𑐶𑐢𑐶 𑐠𑑁𑑄𑐎𑐤𑐫𑑂 𑐀𑐥𑑂𑐰𑐫𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐣𑐾𑐰𑐵𑑅 𑐦𑐶𑐮𑑂𑐩 𑐳𑑂𑐰𑐂𑐥𑐶𑑄 𑐣𑑄 𑐀𑐥𑑂𑐰𑐫𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐠𑑁𑑄𑐎𑐤𑐫𑑂 𑐎𑑂𑐫𑐣𑐵 𑐰𑐫𑐵𑐔𑑂𑐰𑑄𑐐𑐸 𑐣𑐾𑐰𑐵𑑅 𑐦𑐶𑐮𑑂𑐩𑐫𑑂 𑐰𑐵𑐫𑐵 𑐡𑐸𑐣𑐾 𑐖𑐵𑐎𑐶 𑐡𑐸, 𑐳𑑂𑐰𑐫𑑂𑐣𑐐𑐸, 𑐧𑐳𑐣𑑂𑐟 𑐆𑐟𑐸 𑐠𑐾𑑄𑐖𑑂𑐫𑐵𑑅𑐐𑐸 𑐣𑐾𑐰𑐵𑑅 𑐦𑐶𑐮𑑂𑐩 𑐳𑑂𑐰𑑅𑐰𑑅𑐥𑐶𑑄 𑐳𑑂𑐰𑐎𑐸𑐩𑐶𑐫𑐵 𑐮𑑂𑐫𑐵𑐏𑑄 𑐎𑑂𑐫𑑃 𑐎𑐶 𑐠𑑁𑑄𑐎𑐤𑐫𑑂 𑐳𑑂𑐰𑐎𑐸𑐩𑐶 𑐡𑐠𑐸𑐂 𑐣𑐾𑐰𑐵𑑅 𑐦𑐶𑐮𑑂𑐩 𑐳𑑂𑐰𑐫𑐾𑐐𑐸 𑐔𑐵𑐴𑐣𑐵 𑐤𑐶𑐫𑐵𑐤𑐶𑐠𑑄 𑐀𑐥𑑂𑐰𑐫𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐠𑑂𑐰 𑐃 𑐢𑐂𑐐𑐸 𑐳𑐸𑐔𑐣𑐵 𑐥𑑂𑐬𑐰𑐶𑐢𑐷 (𑐂𑐣𑑂𑐦𑐬𑑂‍𑐩𑐾𑐱𑐣 𑐚𑐾𑐎𑑂𑐣𑑀𑐮𑑀𑐖𑐷)𑐫𑐵 𑐃 𑐏𑑅 𑑋 𑐠𑐸𑐎𑐶𑐫𑐵 𑐮𑐧𑑅 𑐎𑐫𑐵𑐔𑑂𑐰𑑄𑐥𑐶𑑄 𑐫𑐎𑑂𑐰 𑐡𑐸 𑑋 𑐰𑐶𑐱𑐾𑐲 𑐫𑐵𑐣𑐵𑑅 𑐦𑐶𑐮𑑂𑐩 𑐰 𑐩𑐣𑑀𑐬𑐘𑑂𑐖𑐣 𑐏𑑂𑐫𑑅𑐫𑐵 𑐣𑐶𑑄𑐟𑐶𑑄 𑐮𑐵 𑐳𑐸𑐔𑐣𑐵 𑐥𑑂𑐬𑐰𑐶𑐢𑐷 𑐢𑐂𑐐𑐸 𑐕𑐐𑐹 𑐩𑐖𑐶𑐩𑐐𑐵𑑅𑐐𑐸 𑐥𑑂𑐬𑐰𑐶𑐢𑐷 𑐖𑐸𑐂 𑐢𑐸𑑄𑐎𑐮 𑑋 𑐳𑑄𑐳𑐵𑐬𑐫𑐵 𑐤𑑂𑐫𑐵𑐐𑐸 𑐣𑑄 𑐡𑐾𑐱𑐫𑐵 𑐦𑐶𑐮𑑂𑐩𑑄 𑐠𑑂𑐰 𑐥𑑂𑐬𑐰𑐶𑐢𑐷𑐫𑐵 𑐮𑐧𑑅 𑐎𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐫𑐸𑐚𑑂𑐫𑐸𑐧 𑐠𑐸𑐎𑐶𑐫𑐵 𑐡𑐳𑐸 𑐏𑑅 𑑋 𑐗𑐷𑐐𑐸 𑐠𑐾𑑄𑐖𑑂𑐫𑐵𑑅𑐐𑐸 𑐔𑐶𑐢𑑄𑐐𑐸 𑐧𑐖𑐵𑑅 𑐡𑐸𑐐𑐸 𑐠𑐵𑐳𑐫𑑂 𑐫𑐸𑐚𑑂𑐫𑐸𑐧𑐮𑐐𑐵𑐫𑐟 𑐳𑐸𑐔𑐣𑐵 𑐥𑑂𑐬𑐰𑐶𑐢𑐷𑐫𑐵 𑐩𑐾𑐩𑐾𑐐𑐸 𑐥𑑂𑐬𑐰𑐶𑐢𑐷𑐥𑐵𑐏𑐾𑑄 𑐮𑐧𑑅 𑐎𑐫𑐵𑐔𑑂𑐰𑑄𑐐𑐸 𑐩𑐡𑐸 𑑋 𑐣𑐾𑐥𑐵𑐮𑐫𑑂 𑐏𑐳 𑐣𑐾𑐥𑐵𑐮𑐷 𑐦𑐶𑐮𑑂𑐩 𑐰 𑐩𑐣𑑀𑐬𑐘𑑂𑐖𑐣 𑐏𑑂𑐫𑐮𑑄 𑐠𑐠𑐾 𑐮𑐧𑑅 𑐎𑐫𑐵𑐔𑑂𑐰𑑄𑐐𑐸 𑐡𑐸, 𑐟𑐬 𑐣𑐾𑐰𑐵𑑅 𑐦𑐶𑐮𑑂𑐩𑑄 𑐢𑐵𑑅𑐳𑐵 𑐠𑐸𑐏𑐾𑐥𑐵𑐏𑐾𑐫𑐵 𑐮𑐧𑑅 𑐎𑐵𑐫𑐾 𑐦𑐫𑐵𑐔𑑂𑐰𑑄𑐐𑐸 𑐩𑐡𑐸 𑑋

𑐰𑐶𑐩𑐵𑐣𑐫𑑂 𑐣𑐾𑐰𑐵𑑅 𑐦𑐶𑐮𑑂𑐩
𑐳𑐸𑐔𑐣𑐵 𑐥𑑂𑐬𑐰𑐶𑐢𑐷𑐫𑐵 𑐴𑐾 𑐕𑐐𑐹 𑐠𑐵𑐫𑑂 𑐎𑐠𑑄 𑐠𑑁𑑄𑐎𑐤𑐫𑑂 𑐮𑐒𑑂𑐐 𑐬𑐸𑐚𑐫𑐵 𑐰𑐶𑐩𑐵𑐣𑐫𑑂 𑐫𑐵𑐟𑑂𑐬𑐸𑐫𑐵 𑐣𑐶𑑄𑐟𑐶𑑄 𑐩𑐣𑑀𑐬𑐘𑑂𑐖𑐣𑐫𑐵 𑐠𑐷𑐠𑐷 𑐴𑐮𑑄𑐖𑑂𑐰𑐮𑑄 𑐟𑐫𑐵𑐟𑑅𑐐𑐸 𑐡𑐂 𑑋 𑐁𑑅 𑐰𑐫𑐵 𑐣𑐾𑐥𑐵𑑅𑐫𑐵 𑐠𑑅𑐐𑐸 𑐴𑐾 𑐰𑐶𑐩𑐵𑐣 𑐎𑐩𑑂𑐥𑐣𑐷 𑐣𑐾𑐥𑐵𑐮 𑐰𑐵𑐫𑐸𑐳𑐾𑐰𑐵𑑄 𑐣𑑄 𑐣𑐶𑐐𑑅 𑐣𑐶𑐐𑑅 𑐰𑐵𑐂𑐜𑐧𑐜𑐷 𑐰𑐶𑐩𑐵𑐣 𑐣𑐾𑐥𑐵𑑅 𑐡𑐸𑐟 𑐴𑐫𑐾𑐢𑐸𑑄𑐎𑐮𑐳𑐵 𑐀𑐐𑐳𑑂𑐚𑐫𑐵 𑑑 𑐟𑐵𑐬𑐷𑐏𑐣𑐶𑐳𑐾𑑄 𑐳𑐾𑐰𑐵 𑐣𑑄 𑐱𑐸𑐬𑐸 𑐫𑐵𑐫𑐾 𑐢𑐸𑑄𑐎𑐮 𑑋 𑐠𑐖𑑂𑐫𑐵𑑅𑐐𑐸 𑐮𑐒𑑂𑐐 𑐬𑐸𑐚𑐫𑐵 𑐰𑐶𑐩𑐵𑐣𑐫𑑂 𑐁𑑅 𑐣𑐾𑐥𑐵𑑅𑐫𑐵 𑐦𑐶𑐮𑑂𑐩 𑐎𑑂𑐫𑐣𑐾𑐐𑐸 𑐣𑐶𑐬𑑂‍𑐞𑐫 𑐖𑐹𑐎𑐠𑑄 𑐣𑐾𑐥𑐵𑑅𑐫𑐵 𑐁𑐡𑐶𑐧𑐵𑐳𑐷 𑐖𑐣𑐖𑐵𑐟𑐶 𑐩𑐵𑐟𑐺𑐨𑐵𑐲𑐷 𑐦𑐶𑐮𑑂𑐩 𑐡𑐫𑐎𑐷𑐥𑐶𑐣𑐶𑐐𑐸 𑐩𑑄𑐎𑐵𑑅 𑐳𑑄𑐳𑑂𑐠𑐵 𑐁𑐡𑐷𑐧𑐵𑐳𑐷 𑐖𑐣𑐖𑐵𑐟𑐶 𑐔𑐮𑐔𑐶𑐟𑑂𑐬 𑐩𑐴𑐵𑐳𑑄𑐑𑐫𑐵 𑐎𑐸𑐟𑐮𑑄 𑐣𑐾𑐥𑐵𑐮 𑐰𑐵𑐫𑐸𑐳𑐾𑐰𑐵𑐫𑐵 𑐰𑐶𑐩𑐵𑐣𑐫𑑂 𑐁𑐡𑐶𑐧𑐵𑐳𑐷 𑐖𑐣𑐖𑐵𑐟𑐶 𑐨𑐵𑐫𑑂𑐫𑐵 𑐦𑐶𑐮𑑂𑐩 𑐣𑑄 𑐎𑑂𑐫𑐣𑐾𑐐𑐸 𑐎𑑂𑐰𑑅𑐕𑐷𑐢𑐸𑑄𑐎𑐹𑐐𑐸 𑐀𑐰𑐳𑑂𑐠𑐵 𑐡𑐸 𑑋 𑐄𑐎𑐶𑐫𑐵 𑐣𑐶𑑄𑐟𑐶𑑄 𑐦𑐶𑐮𑑂𑐩 𑐡𑐸𑐟𑐶𑐣𑐾𑐟 𑐩𑐴𑐵𑐳𑑄𑐑𑑄 𑐠𑑅𑐐𑐸 𑐦𑐾𑐳𑐧𑐸𑐎𑑄 𑐳𑐸𑐔𑑄 𑐣𑑄 𑐥𑐶𑐟𑐧𑐶𑐮 𑑋 𑐄𑐐𑐸 𑐳𑐸𑐔𑑄 𑐣𑐾𑐰𑐵𑑅 𑐦𑐶𑐮𑑂𑐩𑐎𑑅𑐩𑐶𑐟𑐎 𑐠𑑂𑐫𑑄𑐎𑐾𑐐𑐸 𑐎𑐸𑐟𑑅 𑐎𑐠𑑄 𑐐𑐸𑐮𑐶𑐏𑐾 𑐣𑐾𑐰𑐵𑑅 𑐦𑐶𑐮𑑂𑐩𑐎𑑅𑐩𑐶𑐥𑐶𑐣𑐶𑐐𑐸 𑐦𑐾𑐳𑐧𑐸𑐎𑐫𑑂 𑐚𑑂𑐫𑐵𑐐 𑐣𑑄 𑐖𑐸𑐮 𑑋 𑐮𑑂𑐫𑐵𑐳𑐾–𑐮𑑂𑐫𑐵𑐫𑑂𑐪𑐟𑐫𑑂𑐐𑐸 𑐦𑑀𑐚𑑀 𑐰𑐵 𑐩𑐾𑐩𑐾𑐐𑐸 𑐦𑑀𑐚𑑀 𑐚𑑂𑐫𑐵𑐐 𑐖𑐸𑐂𑐧𑐮𑐫𑑂 𑐰𑐵 𑐦𑐾𑐳𑐧𑐸𑐎𑐫𑑂 𑐥𑑀𑐳𑑂𑐚 𑐖𑐸𑐂𑐧𑐮𑐫𑑂 𑐳𑐮𑑄𑐳𑑅 𑐮𑐵𑐂𑐎 𑐰 𑐎𑐩𑐾𑐞𑑂𑐚 𑐡𑐂𑐐𑐸 𑐏𑑅𑐳𑐵 𑐣𑐾𑐰𑐵𑑅 𑐦𑐶𑐮𑑂𑐩𑐫𑐵𑐟 𑐴𑐾 𑐮𑐧𑑅 𑐡𑐂𑐐𑐸 𑐳𑐸𑐔𑐣𑐫𑑂 𑐮𑐵𑐂𑐎 𑐰 𑐎𑐩𑐾𑐞𑑂𑐚 𑐄𑐮𑐶 𑐏𑐣𑐾𑐩𑐡𑐸 𑑋 𑐄𑐮𑐶𑐖𑐎 𑐩𑐏𑐳𑐾 𑐣𑐾𑐰𑐵𑑅 𑐦𑐶𑐮𑑂𑐩𑐎𑑅𑐩𑐶𑐥𑐶𑑄𑐳𑑄 𑐠𑐸𑐎𑐶𑐫𑐵𑐧𑐵𑐬𑐾 𑐕𑐸𑑄 𑐣𑑄 𑐎𑐠𑑄𑐫𑐵 𑐣𑑂𑐫𑐣𑐾𑐎𑐣𑐾 𑐫𑐵𑑅𑐐𑐸 𑐟𑐎𑑄 𑐏𑐣𑐾𑐩𑐡𑐸 𑑋 𑐣𑐾𑐰𑐵𑑅 𑐦𑐶𑐮𑑂𑐩𑐎𑑅𑐩𑐶𑐥𑐶𑐣𑐶𑐐𑐸 𑐴𑐎𑐴𑐶𑐟𑐫𑐵 𑐣𑐶𑑄𑐟𑐶𑑄 𑐣𑐷𑐳𑑂𑐰𑐣𑐵𑐟𑑅𑐐𑐸 𑐳𑑄𑐳𑑂𑐠𑐵𑐟 𑐣𑐾𑐰𑐵𑑅 𑐦𑐶𑐮𑑂𑐩 𑐳𑑀𑐳𑐵𑐂𑐚𑐷 𑐰 𑐣𑐾𑐥𑐵𑐮𑐨𑐵𑐲𑐵 𑐳𑑄𑐎𑐶𑐥𑐵 𑐳𑐩𑐵𑐖𑑄 𑐠𑐸𑐏𑐾𑐥𑐵𑐏𑐾 𑐐𑐖𑑂𑐫𑐵𑑅𑐐𑐸 𑐥𑐮𑐵𑑅 𑐯𑑂𑐰𑐣 𑐢𑐂𑐐𑐸 𑐏𑑃 𑐣𑑄 𑐳𑐷𑐩𑐡𑐸 𑑋

“𑐖𑐾𑐞𑑂𑐚𑐮𑐩𑐵𑐊𑐣”𑐫𑑂 𑐴𑐶𑐬𑑀 𑐳𑐸 𑐖𑐸𑐂 ?
𑐣𑐾𑐰𑐵𑑅 𑐦𑐶𑐮𑑂𑐩𑐫𑐵 𑐔𑐬𑑂‍𑐔𑐵 𑐫𑐵𑐫𑐾𑐧𑐮𑐫𑑂 𑐕𑐸𑑄 𑐃 𑐤𑑂𑐫𑐰𑑄𑐣𑐶𑐳𑐾𑑄 𑐧𑐫𑑂𑐧𑐫𑑂 𑐖𑐸𑐫𑐵𑐔𑑂𑐰𑑄𑐐𑐸 𑐦𑐶𑐮𑑂𑐩 𑐢𑐂𑐐𑐸 “𑐖𑐾𑐞𑑂𑐚𑐮𑐩𑐵𑐊𑐣”𑐕𑐐𑐹 𑐣𑑄 𑐏𑑅 𑑋 𑐣𑐾𑐰𑐵𑑅 𑐦𑐶𑐮𑑂𑐩 𑐰 𑐎𑐮𑐵𑐎𑐵𑐬𑐶𑐟𑐵 𑐏𑑂𑐫𑐮𑐫𑑂 𑐠𑐷𑐠𑐷 𑐄𑐥𑐎𑐵𑐬𑐷 𑐖𑑂𑐫𑐵 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐳𑐸𑐏𑐵𑐰𑐟𑐶 𑐩𑐮𑑂𑐚𑐶 𑐥𑑂𑐬𑑀𑐜𑐎𑑂𑐱𑐣𑑄 𑐡𑐫𑐾𑐎𑐾𑐟𑑂𑐫𑑄𑐐𑐸 𑐠𑑂𑐰 𑐦𑐶𑐮𑑂𑐩𑐫𑐵 𑐣𑐶𑐬𑑂‍𑐡𑐾𑐱𑐎 𑐳𑐸𑐬𑐾𑐣𑑂𑐡𑑂𑐬 𑐟𑐸𑐮𑐵𑐢𑐬 𑐏𑑅 𑑋 𑐠𑐐𑐸𑐣𑐾 𑐴𑐾 𑐑𑑀𑐲𑐞𑐵 𑐖𑐹𑐐𑐸 𑐠𑑂𑐰 𑐦𑐶𑐮𑑂𑐩𑐫𑑂 𑐳𑐣𑐶𑐱 𑐱𑐵𑐎𑑂𑐫 𑐴𑐶𑐬𑑀 𑐖𑐸𑐂𑐐𑐸 𑐏𑑃 𑐖𑐹𑐐𑐸 𑐏𑑅𑐳𑐵 𑐴𑐶𑐬𑑀𑐂𑐣𑐫𑑂 𑐁𑐱𑐶𑐲𑑂𑐩𑐵 𑐣𑐎𑑅𑐩𑐶, 𑐳𑐮𑑀𑐣𑐵 𑐧𑐖𑑂𑐬𑐵𑐔𑐵𑐬𑑂‍𑐫 𑐰 𑐂𑐎𑑂𑐬𑐶𑐣𑐵 𑐧𑐮𑐫𑐵 𑐣𑐵𑑄 𑐥𑐶𑐟𑐧𑐶𑐄𑐐𑐸 𑐏𑑅 𑑋

𑐄𑐐𑐸 𑐂𑐮𑐫𑑂 𑐱𑐸𑐚𑐶𑑄𑐐 𑐱𑐸𑐬𑐸 𑐖𑐸𑐂𑐐𑐸 𑐂𑐮𑐫𑑂 “𑐖𑐾𑐞𑑂𑐚𑐮𑐩𑐵𑐊𑐣”𑐫𑐵 𑐴𑐶𑐬𑑀 𑐳𑐣𑐶𑐱 𑐱𑐵𑐎𑑂𑐫 𑐣𑐾𑐰𑐵𑑅 𑐦𑐶𑐮𑑂𑐩 𑐏𑑂𑐫𑐮𑐫𑑂 𑐳𑑂𑐰𑑄𑐐𑐹 𑐎𑐬𑑀𑐜 𑐟𑐎𑐵 𑐮𑐵𑐫𑑂 𑐟𑐫𑐵𑑅 𑐳𑐸𑐥𑐬 𑐧𑐷𑐐 𑐧𑐖𑐾𑐚 𑐦𑐶𑐮𑑂𑐩𑐫𑐵 𑐬𑐸𑐥𑐫𑑂 𑐧𑐫𑑂𑐧𑐫𑑂 𑐖𑐹𑐐𑐸 “𑐔𑑂𑐰𑐵𑐥𑐸𑐦𑐫𑑂”𑐫𑐵 𑐱𑐸𑐚𑐶𑑄𑐐𑐫𑑂 𑐟𑐎𑑂𑐫𑐣𑐵𑑅 “𑐖𑐾𑐞𑑂𑐚𑐮𑐩𑐵𑐊𑐣”𑐫𑐵 𑐣𑐶𑑄𑐟𑐶𑑄 𑐃 𑐦𑑂𑐫𑐵𑐫𑐾 𑐩𑐦𑐸𑐐𑐸𑐮𑐶𑑄 𑐱𑐸𑐚𑐶𑑄𑐐 𑐤𑑂𑐫𑐵𑐫𑐾𑐩𑐦𑐸𑐐𑐸 𑐏𑑅 𑑋 𑐟𑐵𑑅 𑐃𑐟𑐎 𑐣𑑄 𑐳𑐣𑐶𑐱 𑐱𑐵𑐎𑑂𑐫𑑄 𑐃 𑐦𑑂𑐫𑐵𑐫𑐾𑐩𑐦𑐫𑐵𑑅 𑐡𑐶𑐣𑐵𑐔𑑂𑐰𑑄𑐐𑐸 “𑐖𑐾𑐞𑑂𑐚𑐮𑐩𑐵𑐊𑐣” 𑐫𑐵 𑐱𑐸𑐚𑐶𑑄𑐐 𑐁𑑅 𑐢𑐵𑑅𑐳𑐵 𑐫𑐵𑐎𑐣𑑄 𑐖𑐸𑐂𑐟𑑂𑐫𑑄𑐐𑐸 𑐡𑐸 𑐢𑐂𑐐𑐸 𑐴𑐸𑐂𑐣𑐵𑐨𑐸𑐂𑐣𑐵 𑐥𑐶𑐴𑐵𑑄 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋
𑐠𑐠𑐾 𑐫𑐵𑐎𑐣𑑄 𑐱𑐸𑐚𑐶𑑄𑐐 𑐖𑐸𑐂𑐣 𑐢𑐎𑐵𑑅 𑐔𑐬𑑂‍𑐔𑐵 𑐖𑐸𑐫𑐵𑐔𑑂𑐰𑑄𑐐𑐸 “𑐖𑐾𑐞𑑂𑐚𑐮𑐩𑐵𑐊𑐣” 𑐦𑐶𑐮𑑂𑐩𑐫𑑂 𑐴𑐶𑐬𑑀 𑐳𑐸 𑐖𑐸𑐂 𑐮𑐾 𑐢𑐂𑐐𑐸 𑐤𑑂𑐫𑐳𑑅 𑐧𑑂𑐰𑐮𑐣𑐷𑐐𑐸 𑐳𑑂𑐰𑐵𑐨𑐵𑐰𑐶𑐎 𑐴𑐾 𑐏𑑅 𑑋 𑐀𑐮𑐾 𑐠𑐸𑐎𑐷 𑐴𑐶𑐬𑑀 𑐖𑐸𑐫𑐵𑑅 𑐪𑐶𑐟𑐷𑐪𑐾𑐳𑐶𑐫𑐵 𑐣𑐵𑑄 𑐳𑐶𑐮 𑐎𑐶 𑐤𑑂𑐫𑐵𑐪𑑄 𑐕𑐎𑑂𑐰𑑅 𑐀𑐖𑐹 𑐔𑐵𑐫𑐾𑐦𑐸 𑑋 𑐕𑐵𑐫𑑂𑐢𑐵𑑅𑐳𑐵𑑄 𑐰 𑐴𑐶𑐬𑑀 𑐖𑐸𑐫𑐵𑑅 𑐪𑐶𑐟𑐷𑐪 𑐎𑐮𑐵𑐎𑐵𑐬𑐫𑐵 𑐣𑐵𑑄 𑐴𑐾 𑐀𑐖𑑂𑐫𑐵𑑅𑐐𑐸 𑐏𑑅 𑐎𑐶 𑐣𑑂𑐫𑐣 𑐎𑐶 𑐀𑐖𑐹 𑐩𑐔𑐵𑐂 𑐴𑐾 𑐩𑐏𑐸 𑑋 𑐄𑐪 𑐴𑐶𑐬𑑀 𑐩𑐾𑐪 𑐳𑐸𑑄 𑐴𑐾 𑐩𑐏𑐳𑐾 𑐣𑐾𑐥𑐵𑑅𑐫𑐵 𑐏𑑂𑐫𑐵𑐮𑐶𑐖𑐸𑐖𑐸 𑐎𑐠𑑄 𑐣𑐵𑑄𑐖𑐵𑑅𑐪 𑐩𑐡𑐣𑐎𑐺𑐲𑑂𑐞 𑐱𑑂𑐬𑐾𑐲𑑂𑐛𑐫𑐵 𑐎𑐵𑐫 𑐫𑐩𑐣 𑐱𑑂𑐬𑐾𑐲𑑂𑐛 𑐏𑑅 𑑋

𑐀𑐧𑐸 𑐩𑐡𑐣𑐎𑐺𑐲𑑂𑐞 𑐱𑑂𑐬𑐾𑐲𑑂𑐛𑐫𑐵 𑐥𑐵𑐮𑐶𑐏𑑂𑐰𑐵𑑃𑐫𑑂 𑐮𑐶𑐣𑐵𑑅 𑐏𑑂𑐫𑐵𑐮𑐶𑐤𑐶𑐮𑐵 𑐏𑑂𑐫𑐮𑐫𑑂 𑐥𑐮𑐵𑑅 𑐤𑑂𑐫𑐵𑐎𑐵𑐔𑑂𑐰𑑄𑐪 𑐫𑐩𑐣 𑐱𑑂𑐬𑐾𑐲𑑂𑐛𑐫𑐵 𑐣𑐾𑐥𑐵𑐮𑐨𑐵𑐲𑐵𑑄 𑐕𑐸𑑄 𑐃 𑐤𑑂𑐫𑑅𑐟𑐶𑐣𑐶 𑐰𑐮𑑂𑐬𑑂‍𑐜𑐎𑐥 𑐦𑐸𑐚𑐧𑐮 𑐎𑐵𑐳𑐵𑐫𑐵𑐟 𑐎𑐫𑐵𑑅 𑐣𑐾𑐰𑐵𑑅 𑐩𑑂𑐫𑐾𑑃𑐫𑐵 𑐩𑑂𑐫𑐸𑐖𑐶𑐎 𑐨𑐶𑐜𑐶𑐫𑑀 𑐥𑐶𑐡𑑄𑐐𑐸 𑐏𑑅𑐳𑐵 𑐄𑐐𑐸 𑐨𑐶𑐜𑐶𑐫𑑀 𑐁𑐥𑐵𑐮𑑄 𑐮𑑀𑐎𑑄 𑐣𑑄 𑐴𑑂𑐰𑐵𑑅𑐐𑐸 𑐏𑑅 𑑋 𑐤𑐵𑐥𑐵 𑐑𑑀𑐲𑐞𑐵 𑐖𑐹𑐧𑐮𑐫𑑂 𑐁𑐱𑐶𑐲𑑂𑐩𑐵, 𑐳𑐮𑑀𑐣𑐵 𑐰 𑐂𑐎𑑂𑐬𑐶𑐣𑐵 𑐣𑐵𑐥𑑄 𑐫𑐵𑐣𑐵𑑅 𑐳𑑂𑐰𑐪 𑐳𑑂𑐰𑐪 𑐴𑐶𑐬𑑀𑐂𑐣𑐫𑐵 𑐣𑐵𑑄 𑐥𑐶𑐴𑐵𑑄 𑐰𑑅𑐐𑐸 𑐏𑑅𑐳𑐵 𑐁𑑅 𑐴𑐶𑐬𑑀𑐂𑐣 𑐳𑐸 𑐖𑐸𑐂𑐐𑐸 𑐏𑑅 𑐢𑐂𑐐𑐸 𑐏𑑃 𑐢𑐵𑑅𑐳𑐵 𑐳𑐷𑐩𑐡𑐸𑐣𑐶 𑑋

“𑐩𑐵𑑄” 𑐦𑐶𑐮𑑂𑐩𑐫𑑂 𑐣𑑄 𑐎𑐮𑐵𑐎𑐵𑐬 𑐴𑐶𑐮𑐷𑐐𑐸
“𑐖𑐾𑐞𑑂𑐚𑐮𑐩𑐵𑐊𑐣” 𑐦𑐶𑐮𑑂𑐩𑐫𑑂 𑐎𑐮𑐵𑐎𑐵𑐬 𑐴𑐶𑐮𑐷𑐐𑐸 𑐏𑑃 𑐥𑐶𑐴𑐵𑑄 𑐰𑑅𑐠𑐾𑑄 𑐴𑐾 𑐟𑐸𑑄 𑐣𑐶𑐬𑑂‍𑐡𑐾𑐱𑐎 𑐳𑐸𑐬𑐾𑐱 𑐏𑐜𑑂𑐐𑐷𑐫𑐵 “𑐩𑐵𑑄” 𑐣𑐵𑑄𑐫𑐵𑐐𑐸 𑐳𑑄𑐎𑐶𑐥𑐵𑐫𑑂 𑐣𑑄 𑐕𑐪 𑐎𑐮𑐵𑐎𑐵𑐬 𑐴𑐶𑐮𑐷𑐐𑐸 𑐴𑐸𑐂𑐣𑐵𑐨𑐸𑐂𑐣𑐵 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐠𑐐𑐸𑐣𑐾 𑐴𑐾 𑐟𑑅𑐖𑐶𑐎 𑐨𑐶𑑄𑐳𑐵𑐂𑐟 𑐔𑐹𑐮𑐵𑐎𑐹𑐐𑐸 “𑐩𑐵𑑄”𑐫𑐵 𑐕𑐤𑐸𑐫𑐵 𑐱𑐸𑐸𑐚𑐶𑑄𑐐 𑐠𑐐𑐸𑐣𑐾𑐫𑐵 𑐳𑐵𑐫𑐵𑑅𑐧𑐮𑐫𑑂 𑐴𑐾 𑐎𑑂𑐰𑐔𑐵𑐫𑐾𑐎𑐾 𑐢𑐸𑑄𑐎𑐮 𑑋 𑐦𑐶𑐮𑑂𑐩𑐫𑐵 𑐧𑐵𑐏𑑄 𑐎𑐠𑑄 𑐕𑐾𑑃𑐖𑑅 𑐩𑐡𑐫𑐾 𑐢𑐸𑑄𑐎𑐵𑑅 𑐳𑐵𑐫𑐵𑑅𑐧𑐮𑐫𑑂 𑐳𑐵 𑐕𑑂𑐰𑐫𑐾𑐩𑐵𑑅𑐐𑐸 𑐰 𑐄𑐎𑐷 𑐦𑐶𑐮𑑂𑐩𑐫𑑂 𑐩𑐵𑑄 𑐖𑐸𑐫𑐵𑑅 𑐪𑐶𑐟𑐵𑐔𑑂𑐰𑑄𑐪 𑐳𑐵𑐴𑐶𑐟𑑂𑐫𑐎𑐵𑐬 𑐱𑐱𑐷𑐎𑐮𑐵 𑐩𑐵𑐣𑐣𑑂𑐢𑐬𑑄 𑐧𑑂𑐰𑐟𑐶 𑐎𑐵𑑅𑐐𑐸 𑐏𑑅𑐳𑐵 𑐰𑐫𑑂𑐎𑑅 𑐣𑐵𑐥𑐣𑐵𑐥 𑐩𑐵𑑄𑐫𑐵 𑐩𑐔𑐵 𑐖𑐸𑐫𑐵𑑅 𑐪𑐶𑐟𑐵𑐔𑑂𑐰𑑄𑐥𑐶𑑄 𑐩𑐔𑐵 𑐎𑐮𑐵𑐎𑐵𑐬𑐥𑐶𑑄𑐳𑑄 𑐧𑑂𑐰𑐟𑐶 𑐎𑐵𑑅𑐐𑐸 𑐏𑑅 𑑋

𑐠𑑂𑐰 𑐱𑐸𑐚𑐶𑑄𑐐 𑐖𑐹𑐐𑐸 𑐣𑑄 𑐠𑑁𑑄 𑐢𑐵𑐢𑐵𑑄 𑐎𑐤𑐫𑑂 𑐢𑐵𑐢𑐵𑑄 𑐡𑐕𑐶 𑐡𑐂𑐣𑐳𑐵 𑐁𑑅 𑐟𑐎 𑐄𑐐𑐸 𑐱𑐸𑐚𑐶𑑄𑐐 𑐢𑐸𑑄𑐎𑐵 “𑐩𑐵𑑄” 𑐦𑐶𑐮𑑂𑐩𑐫𑐵 𑐩𑐾𑐐𑐸 𑐱𑐸𑐚𑐶𑑄𑐐 𑐖𑐹𑐐𑐸 𑐩𑐡𑐸𑐣𑐶 𑑋 𑐧𑐬𑐸 𑐱𑐸𑐚𑐶𑑄𑐐𑐫𑐵 𑐟𑐫𑐵𑐬𑐷 𑐎𑐠𑑄 𑐬𑐶𑐴𑐬𑑂‍𑐳𑐮 𑐢𑐵𑑅𑐳𑐵 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐠𑐸𑐎𑐠𑑄 𑐡𑐶𑐣𑐵𑐔𑑂𑐰𑑄𑐐𑐸 “𑐩𑐵𑑄” 𑐫𑐵 𑐱𑐸𑐚𑐶𑑄𑐐 𑐣𑑄 𑐁𑑅 𑐫𑐵𑐎𑐣𑑄 𑐴𑐾 𑐖𑐸𑐂𑐐𑐸 𑐏𑑃 𑐡𑐸𑐳𑐵 𑐠𑐸𑐎𑐷 𑐣𑑄 𑐕𑐪 𑐎𑐮𑐵𑐎𑐵𑐬 𑐴𑐶𑐮𑐷𑐐𑐸 𑐏𑑃 𑐡𑐸 𑑋 𑐠𑑁𑑄𑐎𑐤𑐫𑑂 𑐖𑐸𑐫𑐵𑐔𑑂𑐰𑑄𑐐𑐸 𑐴𑐸𑐂𑐣𑐵𑐨𑐸𑐂𑐣𑐵 𑐎𑐠𑑄 “𑐩𑐵𑑄” 𑐦𑐶𑐮𑑂𑐩𑐫𑑂 𑐚𑐶𑐣𑐊𑐖 𑐴𑐶𑐬𑑀𑐫𑐵 𑐬𑑀𑐮 𑐪𑐶𑐟𑐾𑐫𑐵 𑐣𑐶𑑄𑐟𑐶𑑄 𑐳𑑄𑐐𑐷𑐟𑐎𑑅𑐩𑐶 𑐧𑐵𑐮𑐎𑐺𑐲𑑂𑐞 𑐧𑑄𑐱𑐷𑐫𑐵 𑐗𑐶𑑄𑐥𑑂𑐫𑐡𑑃 𑐗𑐶𑑄𑐣𑑂𑐫𑐵𑐡𑑃 𑐟𑐶𑐣𑐶 𑐡𑐸𑐪 𑐎𑐵𑐫 𑐧𑐶𑐥𑑂𑐮𑐰 𑐏𑐜𑑂𑐐𑐷𑐮𑐶𑐳𑐾 𑐳𑑂𑐰𑐵𑐥𑐹 𑐟𑑅𑐐𑐸 𑐏𑑃 𑐥𑐶𑐴𑐵𑑄 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋

𑐁𑑅 𑐧𑐶𑐥𑑂𑐮𑐰𑐫𑐵𑐟 “𑐩𑐵𑑄” 𑐦𑐶𑐮𑑂𑐩𑐫𑑂 𑐕𑐸 𑐬𑑀𑐮𑐫𑑂 𑐤𑑂𑐫𑐧𑑂𑐰𑐂𑐐𑐸 𑐏𑑅 𑐰 𑐳𑐸𑐫𑐵 𑐠𑐵𑐳𑐫𑑂 𑐟𑐫𑐾𑐟𑑂𑐫𑑄𑐐𑐸 𑐏𑑅 𑐢𑐂𑐐𑐸 𑐏𑑃 𑐁𑑅𑐫𑐵𑐟 𑐳𑐳𑑂𑐥𑐾𑐣𑑂𑐳 𑐴𑐾 𑐟𑐶𑐣𑐶 𑑋 𑐀𑐠𑐾 𑐴𑐾 𑐟𑐸𑑄 𑐠𑑂𑐰 𑐦𑐶𑐮𑑂𑐩𑐫𑐵 𑐕𑐪 𑐴𑐶𑐬𑑀 𑐎𑐶𑐱𑑀𑐬 𑐏𑐜𑑂𑐐𑐷𑐮𑐶𑐳𑐾 𑐴𑐶𑐬𑑀𑐂𑐣 𑐎𑐠𑑄 𑐎𑑂𑐰𑑅𑐕𑐶𑐣𑐵𑐟𑑅𑐪 𑐨𑐶𑐣𑑂𑐟𑐸𑐣𑐵 𑐖𑑀𑐱𑐷 𑐣𑑄 𑐠𑑁𑑄𑐎𑐤𑐫𑑂 𑐰𑐶𑐡𑐾𑐱𑐫𑑂 𑐴𑐾 𑐀𑐥𑑂𑐰𑑅 𑐔𑑂𑐰𑐣𑐾𑐐𑐸 𑐫𑐵𑐣𑐵𑐔𑑂𑐰𑑄𑐐𑐸𑐮𑐶𑑄 𑐁𑑅 𑐴𑐶𑐬𑑀𑐂𑐣𑐫𑐵 𑐏𑑃 𑐕𑐸 𑐖𑐸𑐂𑐐𑐸 𑐏𑑅 𑐢𑐂𑐐𑐸 𑐏𑑃 𑐣𑑄 𑐔𑐶𑐄𑐟𑐵𑑅𑐫𑐵 𑐰𑐶𑐲𑐫 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋

“𑐑𑑀𑐲𑐎” 𑐫𑑂 𑐣𑑄 𑐴𑐶𑐮𑐶𑐐𑐸
𑐎𑐮𑐵𑐎𑐵𑐬𑐫𑐵 𑐴𑐶𑐮𑐵𑐧𑐸𑐮𑐵𑐫𑐵 𑐔𑐬𑑂‍𑐔𑐵𑐫𑑂 𑐮𑐵𑐣𑐵𑐔𑑂𑐰𑑄𑐐𑐸 𑐩𑐾𑐐𑐸 𑐕𑐐𑐹 𑐦𑐶𑐮𑑂𑐩 “𑐑𑑀𑐲𑐎” 𑐣𑑄 𑐏𑑅 𑑋 𑐳𑐘𑑂𑐔𑐵𑐬𑐎𑑅𑐩𑐶 𑐎𑐠𑑄 𑐣𑐵𑑄𑐖𑐵𑑅𑐪 𑐡𑐬𑑂‍𑐱𑐣𑐧𑐷𑐬 𑐱𑐵𑐎𑑂𑐫𑐫𑐵 𑐔𑑂𑐰𑐳𑐵𑑄 𑐧𑐸𑐡𑑂𑐢𑐎𑐵𑐮𑐶𑐣 𑐧𑐵𑐏𑐣𑐫𑑂 𑐔𑑂𑐰𑑅𑐐𑐸 𑐠𑑂𑐰 “𑐑𑑀𑐲𑐎”𑐫𑐵 𑐣𑐶𑐬𑑂‍𑐩𑐵𑐟𑐵 𑐬𑑀𑐱𑐣 𑐧𑐖𑑂𑐬𑐵𑐔𑐵𑐬𑑂‍𑐫 𑐏𑑅𑐳𑐵 𑐠𑐸𑐎𑐶𑐫𑐵 𑐣𑐶𑐬𑑂‍𑐡𑐾𑐱𑐎 𑐀𑐩𑐺𑐟𑐔𑐣𑑂𑐡𑑂𑐬 𑐱𑑂𑐬𑐾𑐲𑑂𑐛 𑐏𑑅 𑑋

𑐏𑐫𑑂𑐟 𑐮𑐵 𑐣𑐶𑐡𑑃𑐟𑐶 𑐤𑑂𑐫𑑅 𑐴𑐾 𑐑𑑀𑐲𑐞𑐵 𑐖𑐹𑐐𑐸 𑐠𑑂𑐰 “𑐑𑑀𑐲𑐎” 𑐦𑐶𑐮𑑂𑐩𑐫𑐵 𑐎𑐮𑐵𑐎𑐵𑐬𑐫𑐵 𑐣𑐵𑑄 𑐁𑑅 𑐟𑐎 𑐐𑐣𑑄 𑐥𑐶𑐡𑑄𑐐𑐸 𑐩𑐡𑐸𑐣𑐶 𑐟𑐬 𑐡𑐸𑐸𑐣𑐾𑑄𑐡𑐸𑐣𑐾𑑄 𑐳𑐷𑐡𑐸𑐎𑐠𑑄 𑐠𑐸𑐎𑐷 𑐣𑐾𑐥𑐵𑑅𑐫𑐵 𑐦𑐶𑐮𑑂𑐩 𑐏𑑂𑐫𑑅𑐫𑐵 𑐮𑑀𑐎𑑄𑐴𑑂𑐰𑐵𑑅𑐪 𑐴𑐶𑐬𑑀 𑐎𑐬𑑂‍𑐩𑐵𑐫𑐵𑐟 𑐴𑐶𑐬𑑀 𑐎𑐠𑑄 𑐪𑐶𑐟𑐎𑐾𑐐𑐸 𑐎𑐸𑐟𑑅 𑐖𑐸𑐫𑐵𑐔𑑂𑐰𑑄𑐐𑐸 𑐏𑑅 𑑋 𑐀𑐮𑐾 𑐠𑑂𑐰 “𑐑𑑀𑐲𑐎” 𑐦𑐶𑐮𑑂𑐩𑐫𑑂 𑐎𑐬𑑂‍𑐩𑐵𑐮𑐶𑐳𑐾 𑐴𑐶𑐬𑑀𑐂𑐣 𑐎𑐠𑑄 𑐁𑐱𑐶𑐲𑑂𑐩𑐵 𑐣𑐎𑑅𑐩𑐶𑐫𑐵𑐟 𑐎𑐵𑐫𑐾𑐐𑐸 𑐩𑐟𑐶 𑐟𑐫𑐵𑐟𑑅𑐐𑐸 𑐏𑑅, 𑐟𑐬 𑐁𑑅 𑐰𑐫𑐵𑑅 𑐁𑐱𑐶𑐲𑑂𑐩𑐵 𑐣𑑄 𑐂𑐴𑐶𑐥𑐵 𑐫𑐵𑐣𑐵𑑅 𑐀𑐩𑐾𑐬𑐶𑐎𑐵𑐫𑑂 𑐟𑐶𑐥𑐹 𑐖𑐷𑐰𑐣 𑐴𑐣𑐾𑐟 𑐰𑑄𑐧𑐮𑐫𑑂 “𑐑𑑀𑐲𑐎”𑐫𑑂 𑐴𑐶𑐬𑑀𑐂𑐣𑐫𑐵 𑐣𑑄 𑐳𑐩𑐳𑑂𑐫𑐵 𑐰𑑅𑐐𑐸 𑐡𑐸 𑑋 𑐁𑑅 𑐠𑑂𑐰 𑐦𑐶𑐮𑑂𑐩𑐫𑑂 𑐴𑐶𑐬𑑀 𑐴𑐶𑐬𑑀𑐂𑐣 𑐳𑐸 𑐖𑐸𑐂𑐐𑐸 𑐏𑑅 𑐢𑐂𑐐𑐸 𑐏𑑃 𑐮𑐶𑐥𑐵 𑐴𑐾 𑐖𑐎 𑐳𑐷𑐡𑐂 𑑋

𑐁𑐱𑐶𑐲𑑂𑐩𑐵𑐫𑐵 𑐎𑐬𑑂‍𑐩𑐵𑐮𑐶𑐳𑐾 𑐪𑐶𑐟𑐾𑐐𑐸 𑐂𑐔𑑂𑐕𑐵

𑐣𑐾𑐥𑐵𑐮𑐨𑐵𑐲𑐵𑐫𑐵 𑐦𑐶𑐮𑑂𑐩 𑐏𑑂𑐫𑐮𑐫𑑂 𑐀𑐟𑐶𑐎𑑄 𑐮𑑀𑐎𑑄𑐴𑑂𑐰𑐵𑑅𑐪 𑐴𑐶𑐬𑑀𑐂𑐣 𑐁𑐱𑐶𑐲𑑂𑐩𑐵 𑐣𑐎𑑅𑐩𑐶𑐫𑐵 𑐣𑐾𑐥𑐵𑑅𑐫𑐵 𑐴𑐾 𑐮𑑀𑐎𑑄𑐴𑑂𑐰𑐵𑑅𑐪 𑐴𑐶𑐬𑑀 𑐎𑐬𑑂‍𑐩𑐵𑐮𑐶𑐳𑐾 𑐕𑐐𑐹 𑐦𑐶𑐮𑑂𑐩 𑐪𑐶𑐟𑐾𑐐𑐸 𑐂𑐔𑑂𑐕𑐵 𑐡𑐸𑐐𑐸 𑐖𑐸𑐫𑐵𑐔𑑂𑐰𑐣 𑑋 𑐎𑐬𑑂‍𑐩𑐵𑑄 “𑐥𑐚𑐵𑐔𑐵𑐬𑐵” 𑐰 “𑐎𑐺𑐲𑐵 𑐐𑑁𑐟𑐩𑐷” 𑐣𑐵𑑄𑐫𑐵𑐐𑐸 𑐣𑐶𑐐𑐹 𑐣𑐾𑐰𑐵𑑅 𑐦𑐶𑐮𑑂𑐩𑐫𑑂 𑐠𑑅𑐳𑐶𑐧𑐾𑑄 𑐠𑐎𑐵𑐮𑐶𑐪 𑐩𑐾𑐮𑐶𑐣𑐵 𑐩𑐵𑐣𑐣𑑂𑐢𑐬𑐮𑐶𑐳𑐾 𑐴𑐶𑐬𑑀 𑐖𑐸𑐫𑐵𑑅 𑐪𑐶𑐟𑐾𑐢𑐸𑑄𑐎𑐹𑐐𑐸 𑐡𑐸 𑑋 𑐟𑐬 𑐁𑐱𑐶𑐲𑑂𑐩𑐵𑐫𑐵 𑐂𑐔𑑂𑐕𑐵 𑐢𑐵𑑅𑐳𑐵 𑐎𑐬𑑂‍𑐩𑐵𑑄 𑐣𑐾𑐰𑐵𑑅 𑐦𑐶𑐮𑑂𑐩 𑐪𑐶𑐟𑐾𑐐𑐸𑐮𑐶𑐂 𑐣𑐸𑐐𑑅 𑐄𑐮𑐶 𑐎𑑂𑐰𑐩𑐳𑐵𑐫𑐾𑐎𑐹𑐐𑐸𑐮𑐶𑑄 𑐥𑐸𑐰𑐣𑐾 𑐩𑐦𑐸𑐟 𑑋 𑐁𑐱𑐶𑐲𑑂𑐩𑐵𑑄 𑐎𑐬𑑂‍𑐩𑐵𑐮𑐶𑐳𑐾 𑐦𑐶𑐮𑑂𑐩 𑐪𑐶𑐟𑐾 𑐢𑐎𑐵𑑅 𑐂𑐔𑑂𑐕𑐵 𑐥𑐸𑐰𑑄𑐎𑐾𑐐𑐸 𑐎𑐸𑐟𑑅 “𑐑𑑀𑐲𑐎”𑐫𑑂 𑐖𑐎 𑐖𑐹𑐐𑐸 𑐩𑐏𑐸 , 𑐩𑐾𑐐𑐸 𑐕𑐐𑐹 𑐦𑐶𑐮𑑂𑐩𑐫𑐵 𑐣𑐶𑑄𑐟𑐶𑑄 𑐣𑑄 𑐖𑐹𑐐𑐸 𑐡𑐸 𑑋 𑐄𑐐𑐸 𑐦𑐶𑐮𑑂𑐩𑐫𑐵 𑐣𑐵𑑄 “𑐁𑑅 𑐕𑐸 𑐫𑐵𑐫𑐾” 𑐏𑑅 𑑋 𑐣𑑂𑐫𑐫𑑂𑐐𑐹 𑐮𑐏 𑐟𑐸𑐂𑐎 𑐡𑐫𑐾𑐎𑐾𑐐𑐸 𑐢𑐎𑐵𑑅 𑐑𑑀𑐲𑐞𑐵 𑐫𑐵𑑅𑐐𑐸 𑐧𑐷𑐐 𑐧𑐖𑐾𑐚 𑐦𑐶𑐮𑑂𑐩 “𑐁𑑅 𑐕𑐸 𑐫𑐵𑐫𑐾” 𑐫𑐵 𑐣𑐶𑐬𑑂‍𑐡𑐾𑐱𑐎 𑐳𑐩𑐷𑐬 𑐧𑐮𑐵𑐩𑐶 𑐏𑑅 𑑋

𑐠𑑂𑐰 “𑐁𑑅 𑐕𑐸 𑐫𑐵𑐫𑐾” 𑐦𑐶𑐮𑑂𑐩𑐫𑑂 𑐣𑑄 𑐎𑐬𑑂‍𑐩𑐵𑐫𑐵𑐟 𑐴𑐶𑐬𑑀 𑐰 𑐁𑐱𑐶𑐲𑑂𑐩𑐵𑐫𑐵𑐟 𑐴𑐶𑐬𑑀𑐂𑐣 𑐎𑐫𑐵𑑅 𑐦𑐶𑐮𑑂𑐩 𑐡𑐫𑐾𑐎𑐾𑐐𑐸 𑐐𑑂𑐰𑐳𑐵𑑅 𑐐𑑂𑐰𑑅𑐐𑐸 𑐏𑑅 𑑋 𑐄𑐎𑐶𑐫𑐵 𑐣𑐶𑑄𑐟𑐶𑑄 𑐎𑐬𑑂‍𑐩𑐵𑐮𑐶𑐳𑐾 𑐳𑑂𑐰𑐵𑐥𑐹 𑐣𑑄 𑐟𑑅𑐐𑐸 𑐏𑑅 𑑋 𑐟𑐬 𑐣𑐶𑐬𑑂‍𑐩𑐵𑐞 𑐥𑐎𑑂𑐲 𑐰 𑐎𑐬𑑂‍𑐩𑐵 𑐡𑐠𑐸𑐂 𑐏𑑃𑐯𑐵𑐧𑐯𑐵 𑐟𑐵𑑅𑐮𑐵𑐫𑐾𑐩𑐦𑐸𑐟 𑑋 𑐀𑐮𑐾 𑐁𑐱𑐶𑐲𑑂𑐩𑐵𑐫𑐵 𑐎𑐬𑑂‍𑐩𑐵𑐮𑐶𑐳𑐾 𑐴𑐶𑐬𑑀𑐂𑐣 𑐖𑐸𑐫𑐵𑑅 𑐦𑐶𑐮𑑂𑐩 𑐪𑐶𑐟𑐾𑐐𑐸 𑐂𑐔𑑂𑐕𑐵 𑐴𑐵𑐎𑐣𑑄 𑐥𑐹𑐩𑐰𑐣 𑑋 𑐁𑑅 𑐠𑑂𑐰 𑐦𑐶𑐮𑑂𑐩𑐫𑑂 𑐎𑐬𑑂‍𑐩𑐵 𑐴𑐶𑐬𑑀 𑐖𑐸𑐫𑐵𑑅 𑐪𑐶𑐟𑐾 𑐴𑐾 𑐢𑐵𑑅𑐳𑐵𑑄 𑐁𑐱𑐶𑐲𑑂𑐩𑐵𑑄 𑐂𑐴𑐶𑐥𑐵 𑐮𑐶𑐥𑐵 𑐁𑑅 𑐟𑐶𑐥𑐸 𑐖𑐷𑐰𑐣𑐫𑑂 𑐴𑐾 𑐠𑑅𑐟 𑐥𑐵𑐫𑐾𑐐𑐸 𑐎𑑂𑐰𑑅𑐕𑐶𑐣𑐵𑑅 𑐦𑐶𑐮𑑂𑐩 𑐩𑐪𑐶𑐟𑐾𑐐𑐸 𑐢𑐎𑐵𑑅 𑐣𑐶𑐬𑑂‍𑐞𑐫 𑐫𑐵𑐫𑐾 𑐢𑐸𑑄𑐎𑐹𑐐𑐸𑐮𑐶𑑄 𑐁𑐱𑐶𑐲𑑂𑐩𑐵 𑐰 𑐎𑐬𑑂‍𑐩𑐵𑐫𑐵 𑐖𑑀𑐜𑐷 𑐦𑐶𑐮𑑂𑐩𑐫𑑂 𑐗𑐷𑐳𑑄 𑐳𑑂𑐰𑐫𑐾 𑐩𑐏𑐣𑐷𑐐𑐸 𑐖𑐹𑐐𑐸 𑐡𑐸 𑑋