𑐴𑐬𑐾𑐎 𑐩𑐶𑐣𑐾𑐚 𑐩𑐵𑑄𑐨𑐵𑐫𑑂𑐫𑐵 𑐧𑐶𑐔𑐵𑑅 𑐫𑐵𑐂𑐩𑑂𑐴 𑐩𑐴𑐵𑐎𑐰𑐶 𑐖𑑀𑐱𑐷

𑐫𑐾𑑃 – 𑐩𑐴𑐵𑐎𑐰𑐶 𑐐𑐶𑐬𑐶𑐖𑐵 𑐥𑑂𑐬𑐳𑐵𑐡 𑐖𑑀𑐱𑐷𑐫𑐵 𑐰𑑂𑐫𑐎𑑂𑐟𑐶𑐟𑑂𑐰 𑐰 𑐎𑐺𑐟𑐶𑐟𑑂𑐰𑐫𑐵𑐟 𑐎𑐫𑐵𑑅 𑐣𑐾𑐥𑐵𑐮 𑐥𑑂𑐬𑐖𑑂𑐘𑐵 𑐥𑑂𑐬𑐟𑐶𑐲𑑂𑐛𑐵𑐣𑑄 𑐧𑐶𑐔𑐵𑑅 𑐐𑑀𑐲𑑂𑐛𑐷 𑐫𑐵𑐟 𑑋 𑐩𑐴𑐵𑐎𑐰𑐶 𑐖𑑀𑐱𑐷𑐫𑐵 𑑘𑑓 𑐎𑑂𑐰𑑅𑐐𑐸 𑐧𑐸𑐣𑑂𑐴𑐶𑐫𑐵 𑐮𑐳𑐟𑐵𑐫𑑂 𑐮𑐵𑐎𑐵𑑅 𑐥𑑂𑐬𑐟𑐶𑐲𑑂𑐛𑐵𑐣𑑄 ‘𑐩𑐴𑐵𑐎𑐰𑐶 𑐐𑐶𑐬𑐶𑐖𑐵𑐥𑑂𑐬𑐳𑐵𑐡 𑐖𑑀𑐱𑐷𑐎𑑀 𑐰𑑂𑐫𑐎𑑂𑐟𑐶𑐟𑑂𑐰 𑐬 𑐎𑐺𑐟𑐶𑐟𑑂𑐰𑐎𑐵 𑐰𑐶𑐰𑐶𑐢 𑐁𑐫𑐵𑐩’ 𑐰𑐶𑐲𑐫𑐫𑑂 𑐧𑐶𑐔𑐵𑑅 𑐐𑑀𑐲𑑂𑐛𑐷 𑐫𑐵𑑅𑐐𑐸 𑐏𑑅 𑑋

𑐐𑑀𑐲𑑂𑐛𑐷𑐂 𑐳𑐵𑐴𑐶𑐟𑑂𑐫𑐎𑐵𑐬 𑐱𑐬𑐡 𑐎𑐳𑐵𑑅𑐣𑑄 𑐖𑑂𑐫𑐵𑐥𑑁 𑐣𑑂𑐴𑑂𑐫𑐧𑑂𑐰𑐫𑐵𑐡𑐶𑐳𑐾𑑄 𑐩𑐴𑐵𑐎𑐰𑐶 𑐖𑑀𑐱𑐷 𑐣𑐾𑐥𑐵𑐮𑐨𑐵𑐲𑐵 𑐄𑐣𑑂𑐣𑐟𑐶𑐫𑐵 𑐣𑐶𑑄𑐟𑐶𑑄 𑐴𑐾 𑐖𑐣𑑂𑐩𑐾 𑐖𑐹𑐩𑑂𑐴 𑐮𑐾𑐏𑐎 𑐏𑑅 𑐢𑐫𑐵𑐡𑐶𑐮 𑑋 𑐰𑐫𑑂𑐎𑑅 𑐠𑑅𑐐𑐸 𑐩𑐵𑑄𑐨𑐵𑐫𑑂 𑐳𑐩𑑂𑐰𑐡𑑂𑐬𑑂𑐢𑐣 𑐰 𑐄𑐣𑑂𑐣𑐟𑐶𑐫𑐵 𑐣𑐶𑑄𑐟𑐶𑑄 𑐴𑐬𑐾𑐎 𑐩𑐶𑐣𑐾𑐚 𑐴𑐾 𑐔𑐶𑐣𑑂𑐟𑐶𑐟 𑐰 𑐳𑐔𑐾𑐟 𑐡𑐸𑐩𑑂𑐴 𑐏𑑅 𑐢𑐵𑐳𑐾𑑄 𑐰𑐫𑑂𑐎𑐮𑑄 𑐣𑑂𑐴𑑂𑐫𑐵𑐩𑑂𑐴 𑐴𑐾 𑐩𑐣𑐹 𑐣𑐵𑐥𑐮𑐵𑑅𑐳𑐵𑑄 𑐩𑐵𑑄𑐨𑐵𑐫𑑂 𑐟𑑂𑐰𑑅𑐟𑐾 𑐩𑐖𑐶𑐄𑐐𑐸 𑐢𑐎𑐵𑑅 𑐏𑑃 𑐮𑑂𑐴𑐵𑐣𑐵𑐡𑐷 𑐢𑐎𑐵𑑅 𑐣𑑄 𑐎𑐣𑐵𑐡𑐶𑐮 𑑋

𑐖𑑂𑐫𑐵𑐥𑐟𑐷 𑐚𑐶𑐥𑑂𑐥𑐞𑐷 𑐫𑐵𑐳𑐾𑑄 𑐳𑐩𑐵𑐮𑑀𑐔𑐎 𑐥𑐹𑐬𑑂𑐞 𑐟𑐵𑐩𑑂𑐬𑐵𑐎𑐵𑐬𑑄 𑐩𑐴𑐵𑐎𑐰𑐶 𑐖𑑀𑐱𑐷 𑐣𑐾𑐥𑐵𑐮𑐨𑐵𑐲𑐵𑑄 𑐡𑐎𑐮𑐫𑑂 𑐀𑐥𑑂𑐰𑑅 𑐳𑐦𑐹 𑐔𑑂𑐰𑑅𑐩𑑂𑐴 𑐰𑑂𑐫𑐎𑑂𑐟𑐶𑐟𑑂𑐰 𑐏𑑅 𑐢𑐫𑐵𑐡𑐶𑐮 𑑋 𑑔𑑙 𑐡𑑃𑐫𑐵 𑐩𑑂𑐴𑑀 𑐄𑐩𑐾𑐬𑐫𑑂 𑐴𑐾 𑐩𑐡𑐸𑐩𑑂𑐴 𑐖𑑀𑐱𑐷𑑄 𑐠𑑅𑐐𑐸 𑐳𑑂𑐰𑑄𑐐𑐹 𑐡𑐱𑐎𑐫𑐵 𑐳𑐵𑐴𑐶𑐟𑑂𑐫𑐶𑐎 𑐫𑐵𑐟𑑂𑐬𑐵𑐫𑑂 𑑗𑑐𑐐𑐸𑐮𑐶𑑄 𑐩𑐮𑑂𑐫𑐵𑐎 𑐳𑐦𑐹 𑐔𑑂𑐰𑐫𑐵𑐡𑐷𑐐𑐸 𑐏𑑃 𑐰𑐫𑑂𑐎𑐮𑑄 𑐢𑐫𑐵𑐡𑐶𑐮 𑑋 𑐰𑐫𑑂𑐎𑑅 𑐔𑑂𑐰𑐫𑐾𑐟 𑐩𑐹𑐜 𑐩𑐏𑐸, 𑐥𑑂𑐬𑐳𑑂𑐟𑐵𑐰 𑐰𑑅𑐳𑐵 𑐐𑐵𑑅 𑐢𑐫𑐵𑐡𑐷𑐩𑑂𑐴 𑐏𑑅 𑐢𑐵𑐳𑐾𑑄 𑐟𑐵𑐩𑑂𑐬𑐵𑐎𑐵𑐬𑑄 𑐢𑐫𑐵𑐡𑐶𑐮, ‘𑐥𑐵𑐳𑐵𑐥𑐶𑑄𑐳𑑄 𑐰𑐫𑑂𑐎𑑅– 𑐫𑐵𑐟 𑐩𑐴𑐵𑐎𑐵𑐰𑑂𑐫 𑐕𑐐𑐹 𑐔𑑂𑐰𑐫𑐾𑐩𑐵𑐮 𑐢𑐎𑐵𑑅 𑐥𑑂𑐬𑐳𑑂𑐟𑐵𑐰 𑐟𑐫𑐵𑐡𑐶𑐮, 𑐡𑐕𑐶 𑐮𑐶𑐥𑐵 𑐴𑐾 𑐰𑐫𑑂𑐎𑐮𑑄 ‘𑐮𑑂𑐰𑐴𑑄𑐩𑐵’ 𑐔𑑂𑐰𑐫𑐵𑑅 𑐮𑑅𑐮𑑂𑐴𑐵𑐣𑐵𑐡𑐶𑐮 𑑋’

𑐖𑑂𑐫𑐵𑐗𑑂𑐰𑐮𑐫𑑂 𑐣𑑂𑐰𑐰𑐵𑐣𑐵𑐡𑐶𑐳𑐾𑑄 𑐏𑐳 𑐣𑐾𑐥𑐵𑐮𑐷 𑐨𑐵𑐫𑑂𑐫𑐵 𑐳𑐵𑐴𑐶𑐟𑑂𑐫𑐎𑐵𑐬 𑐣𑐵𑐬𑐵𑐫𑐞 𑐝𑐎𑐵𑐮𑑄 𑐠𑐩𑑂𑐴𑑄 𑐩𑐴𑐵𑐎𑐰𑐶 𑐮𑐶𑐳𑐾 𑐫𑐎𑑂𑐰 𑐳𑑄𑐐𑐟 𑐫𑐵𑐫𑐾𑐩𑐏𑑄𑐳𑐵𑑄 𑐰𑐫𑑂𑐎𑑅 𑐕𑐩𑑂𑐴 𑐔𑑂𑐰𑐣𑑂𑐴𑑂𑐫𑐵𑑅𑐩𑑂𑐴 𑐥𑑂𑐬𑐐𑐟𑐶𑐰𑐵𑐡𑐷 𑐔𑑂𑐰𑐩𑐶 𑐏𑑅 𑐰 𑐰𑐫𑑂𑐎𑑅𑐫𑐵 𑐳𑐦𑐹𑐟 𑐩𑐾𑐩𑐾𑐐𑐸 𑐨𑐵𑐳𑑄 𑐣𑑄 𑐀𑐣𑐸𑐰𑐵𑐡 𑐫𑐵𑐣𑐵𑑅 𑐳𑐎𑐮𑐾𑑄 𑐣𑐾𑐥𑐵𑑅𑐩𑐶𑐟𑐫𑑂𑐟 𑐎𑐣𑐾𑐩𑐵𑑅𑐐𑐸 𑐧𑐶𑐔𑐵𑑅 𑐟𑐫𑐵𑐡𑐶𑐮 𑑋
𑐥𑑂𑐬𑐟𑐶𑐲𑑂𑐛𑐵𑐣𑐫𑐵 𑐄𑐥𑐎𑐸𑐮𑐥𑐟𑐶 𑐖𑐐𑐩𑐵𑐣 𑐐𑐸𑐬𑐸𑐒𑐫𑐵 𑐳𑐨𑐵𑐥𑐟𑐶𑐟𑑂𑐰𑐫𑑂 𑐖𑐹𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐎𑐸𑐮𑐥𑐟𑐶 𑐐𑑄𑐐𑐵𑐥𑑂𑐬𑐳𑐵𑐡 𑐄𑐥𑑂𑐬𑐾𑐟𑐷 𑐩𑐹𑐥𑐵𑐴𑐵𑑄 𑐎𑐠𑑄 𑐗𑐵𑑅𑐐𑐸 𑐏𑑅 𑑋 𑐥𑑂𑐬𑐟𑐶𑐲𑑂𑐛𑐵𑐣𑐫𑐵 𑐩𑐵𑐟𑐺𑐨𑐵𑐲𑐵 𑐰𑐶𑐨𑐵𑐐𑐫𑐵 𑐥𑑂𑐬𑐩𑐸𑐏 𑐥𑑂𑐬𑐵𑐖𑑂𑐘 𑐮𑐎𑑂𑐲𑑂𑐩𑐷 𑐩𑐵𑐮𑐷𑐫𑐵 𑐳𑑄𑐫𑑀𑐖𑐣𑐫𑑂 𑐖𑐹𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐩𑐹𑐥𑐵𑐴𑐵𑑄 𑐄𑐥𑑂𑐬𑐾𑐟𑐷𑑄 𑐩𑐴𑐵𑐎𑐰𑐶 𑐖𑑀𑐱𑐷𑐫𑐵 𑐏𑐞𑑂𑐜𑐎𑐵𑐰𑑂𑐫 ‘𑐴𑐾𑐮𑑂𑐔𑐵’𑐫𑐵 𑐰𑐶𑐩𑑀𑐔𑐣 𑐣𑑄 𑐫𑐵𑐣𑐵𑐡𑐷𑐐𑐸 𑐏𑑅 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐎𑐶𑐬𑐞 𑐳𑐵𑐫𑐩𑐶𑑄 𑐩𑐴𑐵𑐎𑐰𑐶𑐫𑐵 𑐩𑑂𑐫𑐾𑑃 𑐣𑑂𑐫𑑄𑐎𑐵𑐡𑐷𑐐𑐸 𑐏𑑅𑐳𑐵 𑐎𑐰𑐶𑐥𑐶𑑄 𑐎𑐺𑐲𑑂𑐞𑐨𑐎𑑂𑐟 𑐧𑑀𑐜𑐾, 𑐣𑐵𑐬𑐡 𑐰𑐖𑑂𑐬𑐵𑐔𑐵𑐬𑑂𑐫, 𑐬𑐖𑐣𑐷 𑐩𑐶𑐮𑐵, 𑐬𑐩𑐾𑐱𑐎𑐵𑐖𑐷 𑐳𑑂𑐠𑐵𑐥𑐶𑐟 𑐰 𑐳𑐸𑐬𑐖𑐰𑐷𑐬 𑐰𑐖𑑂𑐬𑐵𑐔𑐵𑐬𑑂𑐫𑑄 𑐩𑐴𑐵𑐎𑐰𑐶 𑐖𑑀𑐱𑐷𑑄 𑐔𑑂𑐰𑐫𑐵𑐡𑐷𑐐𑐸 𑐎𑐰𑐶𑐟𑐵 𑐰𑐵𑐔𑐣 𑐫𑐵𑐣𑐵𑐡𑐷𑐐𑐸 𑐏𑑅 𑑋

𑐠𑑂𑐰𑐴𑐾 𑐖𑑂𑐫𑐵𑐗𑑂𑐰𑐮𑐫𑑂 𑐳𑐩𑐵𑐖𑐳𑐾𑐰𑐷 𑐬𑐵𑐖𑐡𑐵𑐳 𑐱𑑂𑐬𑐾𑐲𑑂𑐛𑑄 𑐰𑐶𑐬𑐵𑐚 𑐳𑐵𑐴𑐶𑐟𑑂𑐫 𑐐𑐸𑐠𑐶𑐫𑐵 𑐕𑐾𑑃 𑐡𑐣𑐾𑐟 𑐩𑐴𑐵𑐎𑐰𑐶𑐫𑐵 𑑘𑑓 𑐡𑑃 𑐧𑐸𑐣𑑂𑐴𑐶𑐫𑐵 𑐮𑑂𑐫𑐵𑑅 𑐎𑐠𑑄 𑑘𑑓 𑐴𑐖𑐵𑐬 𑐟𑐎𑐵 𑐡𑐵𑑄 𑐐𑑂𑐰𑐵𑐴𑐵𑐮𑐶 𑐮𑑅𑐮𑑂𑐴𑐵𑐣𑐵𑐡𑐶𑐮 𑑋