𑐳𑐵𑐎𑐸𑐬𑐵 𑐳𑑂𑐰𑐵𑑄 𑐴𑑂𑐰𑑅𑐧𑐮𑐾

𑐳𑐸𑐮𑑀𑐔𑐣𑐵 𑐩𑐵𑐣𑐣𑑂𑐢𑐬 𑐢𑐶𑐟𑐵𑐮

𑐰 𑐠𑐵𑐳𑐫𑑂 𑐠𑑂𑐫𑐣𑐾𑐰𑑄 𑐗𑐳𑑄𑐐 𑐣𑐸𑐐𑐮𑐫𑑂 𑐠𑑅𑐠𑐩𑑂𑐴𑑄 𑐕𑐎𑑂𑐰𑐮𑑄 𑐴𑐾 𑐕𑐐𑐹 𑐩𑐺𑐟𑑂𑐫𑐸𑐧𑑀𑐢 𑐡𑐣𑐵𑐰𑐂 –“𑐀𑐴𑑀, 𑐕𑐣𑑂𑐴𑐸 𑐮𑐵 𑐖𑐶 𑐣𑑄 𑐮𑐵 𑐳𑐷𑐩𑐵𑐣𑐶 ! ”
𑐰 𑐠𑐵𑐳𑐫𑑂 𑐖𑐶𑑄 𑐥𑐮𑐵𑑅 𑐣𑑂𑐴𑑂𑐫𑐵𑐎𑐵𑐐𑐸 𑐠𑑂𑐰 𑐠𑐵𑐫𑑂 𑐟𑐳𑐎𑑄 𑐣𑑂𑐴𑐹𑐐𑐸 𑐠𑐵𑐫𑑂 𑐏𑑅 𑐖𑐶𑐐𑐸 𑐣𑐶𑐟𑐶𑑄 𑑋 𑐡𑐎𑑂𑐎𑐮𑐾 𑐣𑑂𑐴𑐵𑐥𑐵𑑄 𑐠𑑂𑐰 𑐠𑐵𑐳𑐫𑑂 𑐥𑐮𑐵𑑅 𑐟𑑅𑐳𑐵𑑄𑐣𑐶𑐳𑐾𑑄 𑐴𑐾 𑐴𑐬𑐾𑐎 𑐥𑐚𑐎 𑐰 𑐠𑐵𑐳𑐫𑑂 𑐠𑑂𑐫𑐣𑐾𑐰𑑄 𑐴𑐵𑐎𑐣𑑄 𑐴𑐵𑐎𑐣𑑄 𑐄𑐎𑐠𑑄 𑐴𑐾 𑐖𑐶𑐐𑐸 𑐣𑐸𑐐𑑅𑐫𑐵𑐟 𑐠𑐵𑐬𑐵 𑐣𑑂𑐴𑐸𑐂𑐎𑐵𑐧𑐷 –“𑐩𑐣𑐹 𑐁𑐏𑐶𑐬 𑐕𑐣𑑂𑐴𑐸 𑐳𑐷𑐟 𑐴𑐾 𑐮𑐵 𑐖𑐣𑑂𑐩𑐾 𑐖𑐸𑐂𑐐𑐸 𑐖𑐸𑐫𑐵𑐔𑑂𑐰𑐣 𑑋” 𑐠𑑂𑐰 𑐏𑑃 𑐣𑐸𑐐𑐮𑐫𑑂 𑐰𑐵𑐰𑐵𑑄 𑐖𑐶 𑐫𑐵𑐎𑑅𑐔𑐵 𑐥𑐮𑐵𑑅 𑐣𑑂𑐴𑑂𑐫𑐵𑐎𑐾 𑑋

𑐖𑐶 𑐮𑐵 𑐰 𑐠𑐵𑐳𑐫𑑂 𑐫𑐵𑐟𑑂𑐬𑐵 𑐫𑐵𑐫𑐾𑐟 𑐰𑐣𑐵𑐩𑑂𑐴, 𑐫𑐵𑐟𑑂𑐬𑐵𑐫𑐵 𑐮𑐧𑑅 𑐢𑐿𑐐𑐸 𑐣𑑄 𑐮𑐵 𑐣𑑂𑐴𑐹𑐣𑑂𑐴𑐹𑐐𑐸 𑐀𑐣𑐸𑐨𑐰 𑐰 𑐀𑐣𑐸𑐨𑐹𑐟𑐶 𑐴𑐾 𑐏𑑅 𑑋 𑐠𑑂𑐰 𑐢𑐿𑐐𑐸 𑐳𑐸𑐏𑐫𑐵 𑐂𑐮𑐫𑑂, 𑐣𑑂𑐴𑑂𑐫𑐵𑐂𑐥𑐸𑐫𑐵𑐔𑑂𑐰𑑄𑐐𑐸 𑐂𑐮𑐫𑑂 𑐴𑐟𑑂𑐥𑐟𑐶𑑄 𑐠𑑅𑐠𑐩𑑂𑐴𑑄 𑐟𑐸𑑄 𑐰𑐂𑐩𑐏𑐸 𑑋 𑐖𑐶𑐐𑐸 𑐣𑐶𑐟𑐶𑑄 𑐫𑐵𑐟𑑂𑐬𑐵 𑐢𑐿𑐐𑐸 𑐕𑐐𑐹 𑐟𑐳𑐎𑑄 𑐫𑑅𑐐𑐸 𑐰𑐶𑐲𑐫, 𑐀𑐮𑐾 𑐫𑐵𑐟𑑂𑐬𑐵𑐫𑐵 𑐂𑐮𑐫𑑂 𑐢𑐵𑑅𑐳𑐵 𑐖𑐶 𑐠𑑅𑐐𑐸 𑐡𑐸𑑅𑐏 𑐖𑐎 𑐩𑐏𑐸, 𑐠𑑅𑐠𑐩𑑂𑐴𑑄 𑐴𑐾 𑐮𑑂𑐰𑑅𑐩𑑄𑐠𑐾𑑄 𑐖𑐸𑐂𑐫𑑅 𑑋 𑐟𑐬 𑐠𑑂𑐰 𑐠𑐵𑐫𑑂𑐫𑐵 𑐫𑐵𑐟𑑂𑐬𑐵𑐫𑑂 𑐢𑐵𑑅𑐳𑐵 𑐖𑐶𑑄 𑐩𑑂𑐴𑐴𑐾 𑐩𑐳𑑂𑐫𑐹𑐥𑐶𑑄 𑐟𑐬 𑐕𑐎𑑅 𑐩𑐣𑐹 𑐖𑐸𑐂 𑐢𑐸𑑄𑐎𑐵𑑅 𑐮𑑂𑐰𑐴𑐟𑐫𑑂 𑐥𑐬𑐶𑐰𑐬𑑂𑐟𑐣 𑐖𑐸𑐂𑐢𑐸𑑄𑐎𑐹𑐥𑐶𑑄 𑐣𑐵𑐥𑐣𑐵𑐥𑑄 𑐖𑐶 𑐠𑑅 𑐣𑑄 𑐮𑑂𑐰𑐵𑐎𑑅𑐧𑐵𑐎𑑅 𑐖𑑂𑐫𑐵𑑅𑐠𑐾𑑄 𑐖𑐸𑐫𑐵𑑅 𑐣𑐸𑐐𑑅 𑐠𑐸𑑄𑐠𑐸𑑄 𑐡𑐶𑐣𑐵𑐰𑐮 𑑋 𑐖𑐶 𑐩𑑂𑐰𑐵𑐣𑐵𑐔𑑂𑐰𑐣𑐵𑐩𑑂𑐴 𑐩𑐣𑐹𑐫𑐵𑐟 𑐣𑑄 𑐠𑐠𑐾 𑐩𑐺𑐟𑑂𑐫𑐸𑐣𑐵𑐥 𑐮𑑂𑐰𑐵𑐎𑐕𑑂𑐫𑐵𑐫𑐾𑐦𑐹𑐐𑐸 𑐱𑐎𑑂𑐟𑐶 𑐖𑑂𑐰𑐣𑐵𑐔𑑂𑐰𑑄𑐩𑑂𑐴 𑐠𑐵𑐫𑑂 𑐏𑑅 –𑐖𑐵𑐥𑐵𑐣𑐫𑐵 𑐕𑐐𑐹 𑐳𑐩𑐵𑐢𑐶 𑐏𑑂𑐫𑑅 (𑐳𑐷𑐐𑐵𑑅) 𑑋

𑐚𑑀𑐎𑐶𑐫𑑀𑐫𑐵 𑐕𑐩𑑂𑐴 𑐥𑐵𑐳𑐵 𑐳𑐸𑐳𑐸𑐩𑐸 𑐁𑐰𑑀𑐎𑐶𑐫𑐵 𑐕𑐾𑑃𑐫𑐵 𑐳𑐟𑑂𑐟𑐶𑐎𑑂𑐎𑐔𑑂𑐰𑑄𑐐𑐸 𑐕𑐐𑐹 𑐮𑐸𑐩𑐣𑑂𑐟𑐶𑐏𑑂𑐫𑑅, 𑐥𑐵𑐳𑐵𑐫𑐵 𑐕𑐾𑑃𑐫𑑂 𑐔𑑂𑐰𑑄𑐟𑐮𑐾 𑐟𑑅𑐎𑑅𑐩𑐕𑐶 𑐴𑐾 𑐠𑑂𑐰 𑐠𑐵𑐳𑑄 𑐌𑐴𑑀𑐬𑐡𑑀𑐴𑑀𑐬 𑐖𑐸𑐂𑐩𑐵𑐮 𑑋 𑐖𑐶𑐐𑐸 𑐠𑑂𑐰 𑐖𑐵𑐥𑐵𑐣𑐫𑐵 𑐫𑐵𑐟𑑂𑐬𑐵𑐫𑑂𑑂 𑐟𑐳𑐎𑑄 𑐠𑐶𑐎𑐾𑐐𑐸 𑐚𑑀𑐎𑐶𑐫𑑀𑐫𑐵 𑐴𑑀𑐚𑐮𑐫𑑂 𑐔𑑂𑐰𑐣𑐾𑐩𑑂𑐰𑐵𑐫𑐾𑐎 𑐢𑐎𑐵𑑅 𑐰𑐂𑐐𑐸 𑐴𑐾 𑐦𑑂𑐮𑑂𑐫𑐵𑐚𑐫𑑂 𑐔𑑂𑐰𑐣𑐾𑐟 𑐖𑐶𑐟𑑅 𑐂𑐣𑐵𑐥 𑐫𑐵𑐟 𑑋 𑐖𑐶𑑄 𑐣𑑄 𑐡𑐸𑐣𑐸𑐐𑐮𑑄𑐣𑐶𑐳𑐾𑑄 𑐥𑐵𑐳𑐵𑐫𑐵𑐟 𑐳𑐸𑐨𑐵𑐫𑑂 𑐡𑐾𑐕𑐵𑐣𑐵𑑅 𑐥𑐵𑐳𑐵𑑄 𑐧𑑂𑐫𑐹𑐐𑐸 𑐠𑐵𑐳𑐫𑑂 𑐔𑑂𑐰𑐣𑐵 𑑋 𑐀𑐮𑐾 𑐰 𑐴𑐾 𑐠𑐵𑐳𑑄 𑐚𑑀𑐎𑐶𑐫𑑀𑐫𑐵 𑐩𑐾𑐩𑐾𑐐𑐸 𑐠𑐵𑐫𑑂 𑐔𑐵𑑅𑐴𑐶𑐮𑐾𑐟 𑐰 𑐖𑑂𑐫𑐵𑐏𑑃𑐫𑑂 𑐖𑐸𑐂𑐟 𑐣𑑂𑐴𑐶𑐕𑐶 𑐡𑐸𑐴𑐵𑑄 𑐥𑐶𑐴𑐵𑑄 𑐖𑐸𑐂𑐩𑐵𑑅 𑑋 𑐡𑐎𑐮𑐾 𑐣𑑂𑐴𑐵𑐥𑐵 𑐥𑐵𑐳𑐵𑑄 𑐖𑐶𑐟𑑅 𑐠𑑂𑐰 𑐠𑐵𑐳𑑄 𑐫𑑄𑐎𑐹𑐧𑐮𑐾 𑐠𑑂𑐰 𑐠𑐵𑐫𑑂𑐫𑐵 𑐧𑐵𑐬𑐾 𑐕𑐎𑐹𑐔𑐵 𑐥𑐬𑐶𑐔𑐫 𑐣𑑄 𑐫𑐵𑐣𑐵𑐧𑐶𑐮 –“𑐠𑑂𑐰 𑐖𑐶𑐩𑐶 𑐥𑐸𑐬𑑂𑐏𑐵𑐫𑐵 𑐮𑐸𑐩𑐣𑑂𑐟𑐶𑐏𑑂𑐫𑑅 𑐏𑑅, 𑐖𑐵𑐥𑐵𑐣𑐫𑐵 𑐔𑐮𑐣𑐎𑐠𑑄 𑐩𑐣𑐹 𑐳𑐷𑐢𑐸𑑄𑐎𑐵𑑅, 𑐳𑐷𑐥𑐶𑑄 𑐩𑐣𑐹𑐫𑐵 𑐣𑐵𑐩𑐫𑑂 𑐮𑑂𑐰𑐴𑐟𑐫𑑂 𑐮𑐸𑐩𑐣𑑂𑐟𑐶 𑐔𑑂𑐰𑐫𑐵𑐟𑑅𑐥𑐶𑑄 𑐐𑐸𑐧𑐮𑐾𑑄 𑐣𑑄 𑐩𑐳𑐷𑐩𑐵 𑐀𑐬𑑂𑐠𑐵𑐟𑑂 𑐠𑑂𑐰 𑐳𑑄𑐳𑐵𑐬𑑄 𑐟𑐣𑐵𑐩𑐰𑐣𑐾𑐩𑐵 𑐢𑐎𑐵𑑅 𑐠𑐣 𑐮𑑂𑐰𑐴𑑄𑐫𑐵 𑐐𑑂𑐰𑐬𑑅 𑐡𑐫𑐾𑐎𑐵 𑐠𑐣𑐵𑐧𑐷 𑑋 𑐄𑐎𑐶𑑄 𑐠𑑂𑐰 𑐗𑑂𑐰𑑅𑐗𑑂𑐰𑑅 𑐮𑑂𑐰𑐴𑑄𑐥𑑁𑐟 𑐳𑐎𑐮𑐾𑑄 𑐖𑐶𑐩𑐶 𑐥𑐹𑐬𑑂𑐏𑐵𑐟 𑐏𑑅, 𑐎𑐵 𑐳𑑂𑐰 𑐂𑐥𑐶𑑄 𑐳𑐷𑐢𑐸𑑄𑐎𑐵𑑅 𑐣𑑄 𑐩𑑂𑐰𑐵𑐣𑐵𑐔𑑂𑐰𑑄𑐐𑐸 𑐡𑐸 !”

𑐥𑐵𑐳𑐵𑐫𑐵 𑐏𑑃 𑐣𑑂𑐫𑐣𑐵𑑅 𑐖𑐶𑑄 𑐀𑐣 𑐥𑑂𑐫𑐏𑑂𑐫𑐾𑐬 𑐩𑐶𑐏𑐵 𑐧𑑂𑐰𑐫𑐵 –𑐗𑑂𑐰𑑅𑐗𑑂𑐰𑑅 𑐮𑑂𑐰𑐴𑑄𑐫𑐵 𑐐𑑂𑐰𑐬𑑅𑐟 ! 𑐐𑐸𑐐𑐸𑑄 𑐟𑐥𑐵𑑅𑐐𑐸, 𑐐𑐸𑐐𑐸𑑄 𑐔𑐷𑐥𑐵𑑅 𑑋 𑐦𑐸𑐎𑑂𑐎 𑐮𑑂𑐰𑐴𑑄 𑐡𑑂𑐫𑑅𑐣𑐾 𑐔𑐶𑐣𑐷𑐫𑐵 𑐁𑐏𑑅 𑐰 𑐖𑐵𑐥𑐵𑐣𑐷 𑐁𑐏𑐮𑑄 𑐳𑐷𑐩𑑂𑐴𑐾𑐳𑐶𑐫𑐵 𑐣𑐵𑑄 𑐰 𑐩𑐾𑐩𑐾𑐐𑐸 𑐔𑑂𑐰𑐫𑐵𑐟𑑅𑐐𑐸 𑐡𑐸 𑑋 𑐔𑑂𑐰𑐫𑐵𑐟𑑅𑐐𑐸 𑐁𑐏𑑅𑐟 𑐦𑐸𑐎𑑂𑐎𑑄 𑐖𑐶𑑄 𑐩𑑂𑐴𑐩𑐳𑑂𑐫𑐹 𑑋 𑐟𑐬 𑐀𑐣 𑐢𑐳𑑂𑐰𑐵𑐎𑐵𑐟𑑅𑐐𑐸 𑐮𑐸𑐩𑐣𑑂𑐟𑐶 𑐐𑑂𑐰𑐬𑑅𑐟 𑐐𑐸𑐐𑐸𑑄 𑐔𑐷𑐥𑐵𑑅, 𑐐𑐸𑐐𑐸𑑄𑐮𑐷 𑐡𑐾𑐐𑑅𑐔𑐵 𑐡𑐫𑐾𑐎𑐵𑑅 𑐧𑐵𑑄𑐮𑐵𑐎𑐵𑐟𑑅𑐐𑐸 𑐡𑐸 𑑋 𑐐𑐸𑐐𑐸𑑄 𑐀𑐠𑐾𑑄 𑐠𑐠𑐾𑑄 𑐖𑐎 𑐡𑐶𑐎𑐵𑐟𑑅𑐐𑐸 𑐡𑐸 𑑋 𑐐𑐸𑐐𑐸𑑄𑐮𑐷 𑐨𑐟𑐶𑐔𑐵 𑐀𑐥𑑂𑐰𑑅 𑐴𑐾 𑐠𑐵𑐫𑑂 𑐎𑐫𑐵𑐟𑑅𑐐𑐸 𑐡𑐸 𑑋 𑐐𑐸𑐐𑐸𑑄 𑐮𑐵 𑐗𑑂𑐰𑑅𑐗𑑂𑐰𑑅𑐮𑐵𑐎𑑂𑐎 𑐩𑐕𑐶𑑄𑐥𑐴𑑅 𑐰𑐫𑑂𑐎 𑐠𑐠𑑂𑐫𑐵𑑅𑐎𑑂𑐰𑐠𑑂𑐫𑐵𑑅 𑐫𑐟𑑂𑐠𑐾𑑄 𑐳𑐷𑐡𑐸 𑑋 𑐩𑑂𑐰𑐵𑐟𑑂𑐟𑐮𑐾 𑐖𑐎 𑐩𑐏𑐸, 𑐩𑐣𑐹𑐹 𑐢𑐿𑐥𑐶𑑄 𑐳𑐷𑐢𑐸𑑄𑐎𑐵𑑅 𑐣𑑄 𑐰𑐬𑑂𑐐 𑐢𑐿𑐐𑐸 𑐡𑐿𑐐𑐸 𑐖𑐸𑐫𑐵𑐔𑑂𑐰𑐣 𑑋 𑐩𑑂𑐴𑐸𑐟𑐸𑑄 𑐕𑐸𑑄 𑐣𑐩𑐰𑐵𑐣𑐵, 𑐥𑐵𑐳𑐵𑐫𑐵 𑐏𑑃𑐫𑑂 𑐕𑑂𑐫𑑄 𑐖𑐎 𑐳𑑄𑐎𑐵𑑅 𑐣𑑂𑐫𑐣𑐵 𑑋 𑐥𑐵𑐳𑐵𑑄 𑐩𑐾𑐩𑐾𑐐𑐸 𑐏𑑃 𑐣𑑄 𑐎𑐣𑐵𑐫𑑄𑐎𑐮 –“𑐕𑑄 𑐳𑑂𑐫𑐹𑐹 𑐮𑐵 𑐚𑑀𑐎𑐶𑐫𑑀𑐾𑐫𑐵 𑐠𑐵𑐫𑑂 𑐢𑐿𑐐𑐸 𑐳𑑄𑐳𑐵𑐬𑐫𑑂 𑐡𑐎𑑂𑐎𑐮𑐾 𑐠𑐶𑐎𑐾𑐐𑐸 𑐠𑐵𑐫𑑂 𑑋 𑐳𑐷𑐢𑐸𑑄𑐎𑐵𑑅 𑐠𑑂𑐰 𑐠𑐵𑐳𑐫𑑂 𑐠𑑅𑐐𑐸 𑐮𑐸𑐩𑐣𑑂𑐟𑐶 𑐠𑐠𑐾 𑐮𑑂𑐫𑑄𑐎𑐵𑑅 𑐠𑐎𑐾𑐟 𑐣𑑄, 𑐩𑑂𑐰𑐵𑐣𑐵𑑅 𑐔𑑂𑐰𑑄𑐧𑐮𑐾 𑐴𑐾 𑐠𑐵𑐫𑑂 𑐣𑑂𑐫𑐵𑐣𑐵𑐟𑐫𑐾 𑐦𑐫𑐾𑐎𑐾𑐩𑐵𑑅 𑐩𑐏𑐸𑐳𑐵 𑐳𑐷𑐢𑐸𑑄𑐎𑐵𑑅 𑐥𑐬𑐶𑐰𑐵𑐬𑐫𑐵𑐟 𑐟𑐳𑐎𑑄 𑐨𑐵𑐬 𑐖𑐸𑐂 𑑋” 𑐏𑑃 𑐣𑑂𑐫𑐣𑑂𑐫𑑄 –“𑐩𑐣𑐹𑐫𑐵𑐟 𑐳𑐷 𑐖𑐎 𑐣𑑄 𑐐𑐣 𑐀𑑅𑐥𑐸 𑐢𑐎𑐵𑑅, 𑐩𑑂𑐰𑐵𑐟𑑂𑐟𑐮𑐾 𑐣𑑄 𑐳𑑄𑐑𑐬𑑂𑐲, 𑐳𑐷𑐟 𑐣𑑄 𑐳𑐷𑐳𑐶𑐧𑐾𑑄 𑐣𑑂𑐴𑑂𑐫𑑅 𑐳𑐷𑐢𑐸𑑄𑐎𑐵𑑅𑐫𑐵𑐟 𑐣𑑂𑐴𑐵𑐥𑐵𑑄 𑐠𑐵𑐫𑑂 𑐣𑑂𑐫𑐵𑐣𑐵𑐟𑐫𑐾 𑐦𑐫𑐾𑐎𑐾𑐩𑐵𑑅𑐐𑐸 … 𑑋” 𑐖𑐶𑐐𑐸 𑐣𑐸𑐐𑐮𑐫𑑂 𑐠𑐸𑐎𑐠𑑄 𑐏𑑃 𑐰𑐵𑐮𑐵𑐰𑐵𑐮𑐵 𑐳𑐣 𑑋 𑐗𑐣𑑂𑐗𑐣𑑂 𑐎𑑂𑐰𑐠𑐷𑐎 𑐰 𑐠𑐵𑐫𑑂𑐫𑐵𑐟 𑐳𑑂𑐰𑐫𑐾𑐩𑐵𑐳𑑂𑐟𑐾 𑐰𑐮 𑐥𑑂𑐫𑐏𑐾𑐬𑑄 𑑋

𑐎𑐵𑐔𑐵𑐎𑑂𑐎 𑐳𑑂𑐰𑐫𑐾𑐧𑐮𑐾 𑐰 𑐠𑐵𑐫𑑂 𑐕𑐐𑐹 𑐥𑐵𑐬𑑂𑐎𑐠𑐾𑑄 𑐔𑑂𑐰𑑄 𑑋 𑐕𑐔𑐵𑐏𑐾𑐬𑑄 𑐗𑑂𑐰𑑅𑐗𑑂𑐰𑑅 𑐠𑐷𑐠𑐷 𑐬𑑄𑐐𑐫𑐵 𑐧𑐵𑐧𑐵𑑄𑐮𑐵𑑅𑐐𑐸 𑐳𑑂𑐰𑐵𑑄 𑐴𑑂𑐰𑐫𑐾𑐎𑐵𑐟𑑅𑐐𑐸 𑐡𑐸 𑑋 𑐀𑐠𑐾 𑐴𑐾 𑐰𑐵𑐄𑑃𑐳𑐾 𑐔𑑂𑐰𑑄𑐎 𑐗𑑂𑐰𑑅𑐗𑑂𑐰𑑅 𑐳𑐶𑐩𑐵𑐟 𑐥𑐶𑐣𑐵𑐟𑑅𑐐𑐸 𑐡𑐸 𑑋 𑐰𑐴𑐾 𑐗𑑂𑐰𑑅𑐗𑑂𑐰𑑅 𑐳𑐶𑐩𑐵𑐟 𑐎𑑂𑐫𑐣𑐵𑑅 𑐥𑐵𑐳𑐵𑑄 𑐩𑐾𑐩𑐾𑐐𑐸 𑐏𑑃 𑐣𑑄 𑐎𑐣𑐵𑐫𑑄𑐎𑐮 –“𑐠𑑂𑐰 𑐳𑐶𑐩𑐵𑐟 𑐦𑐸𑐎𑑂𑐎𑑄 𑐳𑐵𑐎𑐸𑐬𑐵 𑐳𑑂𑐰𑐵𑑄𑐩𑐵𑐟 𑐏𑑅 𑑋 𑐕 𑐟𑐳𑐎𑑄 𑐨𑐵𑐐𑑂𑐫𑐩𑐵𑐣𑐶, 𑐟𑐳𑐎𑑄 𑐥𑐵𑐫𑑂𑐕𑐶𑐐𑐸 𑐂𑐮𑐫𑑂 𑐖𑐵𑐥𑐵𑐣 𑐰𑐮, 𑐕 𑐳𑐵𑐎𑐸𑐬𑐵 𑐳𑑂𑐰𑐵𑑄 𑐴𑑂𑐰𑑅𑐐𑐸 𑐏𑐣𑐷𑐐𑐸 𑐖𑐸𑐮 𑑋 𑐳𑐵𑐎𑐸𑐬𑐵 𑐳𑑂𑐰𑐵𑑄 𑐫𑐵𑐎𑐣𑑄 𑐴𑐾 𑐴𑑂𑐰𑐂𑐣 … 𑑋”
𑐣𑐎𑐟𑐶𑐣𑐶𑐫𑐵 𑐩𑐺𑐟𑑂𑐫𑐸𑐧𑑀𑐢 𑐀𑐮𑐾 𑐰𑐬𑑂𑐐 𑐰𑐶𑐨𑐾𑐡 𑐁𑐡𑐶 𑐏𑑃 𑐣𑐸𑐐𑐮𑐫𑑂 𑐥𑑂𑐫𑐥𑐸𑐣𑐵𑐰𑑅𑐐𑐸 𑐥𑐷𑐜𑐵𑐫𑐵𑐟 𑐠𑑂𑐰 𑐰𑐂𑐐𑐸 𑐏𑑄 𑐖𑐶𑐟𑑅 𑐳𑐶𑐔𑑂𑐔𑐸𑐎 𑐩𑐮𑐩 𑐟𑐂𑐧𑑂𑐫𑐹𑐠𑐾𑑄 𑐖𑐸𑐮 𑑋
“𑐀𑐴𑑀 𑐳𑐵𑐎𑐸𑐬𑐵 𑐴𑑂𑐰𑐂𑐣 𑐮𑐵 𑐢𑐵𑐟𑑂𑐠𑐾𑑄 ?” 𑐖𑐶 𑐟𑐳𑐎𑑄 𑐮𑐫𑑂𑐟𑐵𑐫𑐵 𑑋

𑐳𑐵𑐎𑐸𑐬𑐵 𑐳𑑂𑐰𑐵𑑄𑐫𑐵𑐟 𑐠𑑅𑐐𑐸 𑐴𑐾 𑐩𑐶𑐏𑐵𑑄 𑐳𑑂𑐰𑐫𑐾𑐩𑐏𑑄𑐣𑐶𑐳𑐵𑑄 𑐖𑐵𑐥𑐵𑐣𑐷 𑐥𑐵𑐳𑐵𑐥𑐶𑐳𑑄 𑐖𑐶𑐟𑑅 𑐳𑐵𑐎𑐸𑐬𑐵𑐫𑐵 𑐧𑐵𑐬𑐾 𑐫𑐎𑑂𑐰 𑐏𑑃 𑐎𑐣𑐾𑐢𑐸𑑄𑐎𑐹𑐐𑐸 𑐡𑐸 𑑋 𑐖𑐵𑐥𑐵𑐣𑐷𑐟𑐫𑑂𑐐𑐸 𑐣𑐶𑐟𑐶𑑄 𑐳𑐵𑐎𑐸𑐬𑐵 𑐟𑐳𑐎𑑄 𑐫𑑅𑐐𑐸 𑐳𑑂𑐰𑐵𑑄, 𑐖𑐵𑐥𑐵𑐣 𑐰𑐣𑐾𑐐𑐸 𑐏𑑃 𑐖𑐸𑐂𑐰𑑄 𑐴𑐾 –𑐖𑐵𑐥𑐵𑐣𑐫𑐵 𑐡𑐎𑐮𑐾 𑐣𑐵𑑄𑐡𑑄𑐐𑐸 𑐳𑑂𑐰𑐵𑑄, 𑐳𑐎𑐳𑐶𑐫𑐵𑑄 𑐫𑑅𑐐𑐸 𑐳𑑂𑐰𑐵𑑄 𑐳𑐵𑐎𑐸𑐬𑐵 𑐣𑑄 𑐳𑑂𑐰𑐫𑐾𑐏𑐣𑐾𑐩𑐵 𑐢𑐿𑐐𑐸 𑐕𑐐𑐹 𑐟𑑅𑐢𑑄𑐐𑐸 𑐂𑐔𑑂𑐕𑐵 𑐣𑑄 𑐩𑐔𑐵𑐫𑑂𑐎 𑐧𑑂𑐰𑐮𑐣 𑑋 𑐠𑑁𑑄 𑐢𑐵𑐟𑑂𑐠𑐾𑑄 𑐴𑐾 𑐖𑐶𑐣𑐵𑐥𑑄 𑐖𑑂𑐰𑐣𑐵𑐰𑐂𑐐𑐸 𑐠𑑂𑐰 𑐕𑐐𑐹 𑐂𑐔𑑂𑐕𑐵 𑐥𑐹𑐰𑐣𑐷𑐣 𑐰𑐵 𑐥𑐹𑐰𑐣𑐷𑐐𑐸 𑐖𑐸𑐮 𑑋 𑐄𑐎𑐶𑑄 𑐖𑐶 𑐡𑐸𑐣𑐸𑐐𑐮𑑄𑐣𑐶𑐳𑐾𑑄 𑐮𑐫𑑂𑐟𑐵𑐫𑐵 𑑋 𑐀𑐮𑐾 𑐖𑐶𑑄 𑐳𑐵𑐎𑐸𑐬𑐵𑐫𑐵 𑐩𑑂𑐰𑐵𑑅𑐥𑐶𑑄 𑐳𑐶𑐩𑐵𑐟 𑐥𑐵𑐏𑐾 𑐩𑐶𑐏𑐵 𑐧𑑂𑐰𑐫𑐵𑐫𑑄𑐎𑐵 –“𑐖𑐶𑐟𑑅 𑐩𑐺𑐟𑑂𑐫𑐸𑐳𑐶𑐧𑐾𑑄 𑐖𑐷𑐰𑐣 𑐫𑑅 𑑋 𑐩𑐺𑐟𑑂𑐫𑐸 𑐮𑐵 𑐩𑐺𑐟𑑂𑐫𑐸 𑐴𑐾 𑐖𑐸𑐮, 𑐖𑐷𑐰𑐣𑐫𑑂 𑐕𑐸 𑐳𑐫𑐾𑐎𑐾 𑐳𑐷𑐎𑐾𑐫𑐵 𑐣𑐶𑐟𑐶𑑄𑑄 𑐠𑑂𑐰 𑐮𑑂𑐰𑐴𑑄 𑐖𑐸𑐂𑐢𑐸𑑄𑐎𑐹𑐥𑐶𑑄 𑐳𑑂𑐰𑐫𑐵𑑅 𑐠𑑂𑐰 𑐏𑑂𑐰𑐵𑐄𑑃𑐐𑐸 𑐔𑑂𑐰𑐵𑐥𑐸 𑐐𑐵𑑅𑐠𑐵𑐫𑑂 𑐣𑑄 𑐴𑑂𑐰𑐫𑐾𑐟 𑐳𑐣𑐵𑐔𑑂𑐰𑑄𑐥𑐶𑑄 𑐩𑑂𑐰𑐵𑑅𑐥𑐶𑑄 𑐳𑐶𑐩𑐵𑐟 𑐥𑐵𑐏𑐾𑑄 𑐳𑐫𑐾𑐎𑐾𑐩𑐵𑑅 𑑋 𑐩𑑂𑐰𑐵𑐫𑐾 𑐢𑐿𑐐𑐸 𑐣𑑄 𑐀𑑅𑐥𑐸 𑐩𑐖𑐹 𑑋”

𑐳𑐣𑑂 𑑑𑑙𑑙𑑐 𑐫𑐵 𑐩𑐵𑐬𑑂𑐔𑐫𑑂 𑐖𑐶 𑐀𑐣 𑐠𑑂𑐫𑑄𑐐𑐸 𑐏𑑅 𑑋 𑐖𑐵𑐥𑐵𑐣𑐫𑐵 𑐩𑐵𑐬𑑂𑐔 𑐀𑐥𑑂𑐬𑐶𑐮 𑐢𑐿𑐐𑐸 𑐟𑐳𑐎𑑄 𑐔𑐶𑐎𑐸𑐂𑐐𑐸 𑐃 𑐏𑑅 𑑋 𑐟𑐳𑐎𑑄 𑐔𑐶𑐎𑐸𑐸𑐫𑐵𑐔𑑂𑐰𑑄𑐧𑐮𑐾, 𑐩𑐣𑐹𑐟𑐫𑑂 𑐟𑐟𑑅𑐥𑐵𑑅𑐐𑐸 𑐎𑑀𑐚 𑐖𑑂𑐫𑐵𑐎𑐾𑐚 𑐦𑐶𑐣𑐵𑑅 𑐣𑑄 𑐔𑐶𑐎𑐸𑐐𑐸𑐮𑐶𑑄 𑐀𑐮𑑂𑐕𑐶 𑐔𑐵𑐫𑐵𑐔𑑂𑐰𑑄𑐧𑐮𑐾 𑐣𑑄 𑐰 𑐳𑐵𑐎𑐸𑐬𑐵𑐫𑐵 𑐩𑐵𑑄𑐟 𑐰𑐵𑐄𑑃𑐳𑐾 𑐔𑑄𑐔𑑄 𑐢𑐵𑑅 𑑋 𑐕𑐟𑐶𑑄 𑐀𑐮𑑂𑐕𑐶 𑐩𑐔𑐵𑑅 𑑋

𑐣𑐶𑐎𑑅 𑐥𑑂𑐫𑐎𑑅𑐟𑐶 𑐰 𑐠𑐵𑐳𑑄 𑐖𑐸𑐂𑐰𑑄 𑐴𑐾 𑐳𑐶𑐩𑐵𑐫𑑂 𑐖𑐶 𑐁𑐱𑐵 𑐫𑐵𑐣𑐵𑐠𑐾𑑄 𑐗𑑂𑐰𑐵𑑅𑐗𑑂𑐰𑐵𑑅 𑐳𑑂𑐰𑐵𑑄𑐫𑐵 𑐧𑐸𑑃 𑐏𑐣𑐾𑐡𑐫𑐵𑐰𑐮 𑑋 𑐖𑐶𑑄 𑐰 𑐧𑐸𑑃𑐂 𑐩𑐶𑐏𑐵 𑐡𑐶𑐎𑐵𑑅 𑐠𑐳𑑂𑐰𑐳𑑂𑐰𑑄 𑐥𑐮𑐵𑑅 𑐣𑑂𑐴𑑂𑐫𑐵𑐎𑐾 𑑋 𑐔𑑄𑐔𑑄𑐢𑐵𑑅𑐐𑐸 𑐳𑐶𑐩𑐵 𑐳𑑂𑐰𑐳𑑂𑐰𑑄 𑐖𑐶𑐐𑐸𑐸 𑐣𑐸𑐐𑑅 𑐣𑑄 𑐔𑑄𑐔𑑄𑐢𑐵𑐂 –𑐂𑐩𑐶𑐳𑑄 𑐖𑐷𑐰𑐣𑐫𑐵 𑐧𑐵𑐬𑐾 𑐣𑑂𑐴𑐹𑐐𑐸 𑐏𑑃 𑐎𑐣𑐾𑐟𑑂𑐫𑑄𑐐𑐸 𑐏𑑅𑐮𑐵 𑐢𑐿𑐠𑐾𑑄 𑐟𑐵𑐫𑐵𑐰𑐂 𑑋 𑐀𑐮𑐾 𑐖𑐶𑑄 𑐰 𑐩𑐺𑐟𑑂𑐫𑐸𑐧𑑀𑐢𑐫𑐵𑐟 𑐮𑑂𑐰𑑅𑐩𑑄𑐎𑐵𑐕𑑂𑐰𑐫𑐾 𑑋 𑐖𑐶𑐐𑐸 𑐣𑐸𑐐𑑅𑐡𑐸𑐣𑐾 𑐏𑑂𑐰𑐵𑐄𑑃𑐳𑐾 𑐔𑑂𑐰𑐵𑐥𑐸𑐠𑐾𑑄 𑐖𑐵𑑅𑐐𑐸 𑐔𑐶𑐎𑐸𑐫𑐵𑐟 𑐰𑐵𑑄𑐕𑑂𑐰𑐫𑐵𑑅 𑐰 𑐠𑐵𑐳𑐫𑑂 𑐧𑐳𑐣𑑂𑐟 𑐧𑐸𑐫𑐵𑐰𑑅𑐠𑐾𑑄 𑐣𑑂𑐴𑑂𑐫𑐵𑐂𑐥𑐸𑐫𑐵𑐰𑐮 𑑋 𑐖𑐶𑐐𑐸 𑐣𑐸𑐐𑐮𑐫𑑂 𑐧𑐮𑑄 𑐧𑐮𑑄 𑐧𑐸𑐫𑐵𑐰𑑅𑐐𑐸 𑐰 𑐨𑐵𑐰𑐣𑐵𑐫𑐵 𑐮𑐏𑑄 𑐳𑐵𑐎𑐸𑐬𑐵 𑐳𑑂𑐰𑐵𑑄𑐟 𑐫𑐵𑐎𑐣𑑄 𑐫𑐵𑐎𑐣𑑄 𑐴𑑂𑐰𑐫𑐾𑐩𑐵 𑐢𑐎𑐵𑑅 𑐦𑐸𑐎𑑂𑐎 𑐩𑐵𑐫𑑂 𑐮𑑅 𑐧𑐶𑐫𑐵𑐫𑑄𑐎𑐾 𑑋

“𑐳𑐵𑐎𑐸𑐬𑐵 !”

𑐁𑐴𑐵, 𑐐𑐸𑐮𑐶 𑐧𑐵𑑄𑐮𑐵𑑅𑐐𑐸 𑐫𑐂𑐥𑐸𑐐𑐸 𑐣𑐵𑑄 ! 𑐣𑐾𑐰𑐵𑑅𑐨𑐵𑐲𑑄 𑐀𑐬𑑂𑐠𑐵𑐟𑑂 𑐖𑐶𑐐𑐸 𑐩𑐵𑑄𑐨𑐵𑐲𑑄 𑐠𑑂𑐰 𑐳𑑂𑐰𑐵𑑄𑐫𑐵𑐟 𑐕𑐸 𑐢𑐵𑐫𑐾𑐐𑐸 𑐏𑑅 𑐖𑐶𑐟𑑅 𑐎𑐵𑐔𑐵𑐎𑑂𑐎 𑐣𑐸𑐐𑐮𑐫𑑂 𑐩𑐰𑑅 𑑋
𑐖𑐵𑐥𑐵𑐣𑐫𑑂 𑐠𑐾𑑄 𑐗𑐷𑐠𑐵𑐫𑑂 𑐄𑐮𑐶 𑐠𑑂𑐰 𑐳𑑂𑐰𑐵𑑄𑐫𑐵𑐟 𑐩𑐴𑐟𑑂𑐰 𑐧𑑂𑐫𑐹𑐠𑐾𑑄 𑐣𑑄 𑐩𑐔𑑂𑐰𑑄 𑑋 𑐕𑐸 𑐳𑑂𑐰𑐵𑑄𑐫𑐵𑐟 𑐐𑐸𑐮𑐶 𑐩𑐴𑐟𑑂𑐰 𑐧𑐷𑐐𑐸 𑐏𑑅 𑐰𑐮𑐵 𑐡𑐾𑐱𑐫𑐵 𑐠𑑅𑐠𑑅𑐐𑐸 𑐳𑑄𑐳𑑂𑐎𑐺𑐟𑐶𑐣𑐵𑐥 𑐣𑑄 𑐳𑑂𑐰𑐵𑐣𑐵𑑅 𑐳𑑂𑐰𑐫𑐾𑐩𑐵𑑅 𑑋 “𑐮𑐵𑐮𑐷𑐐𑐸𑐬𑐵𑑃𑐳”𑐫𑐵𑐟 𑐣𑐾𑐥𑐵𑑅𑐩𑐶𑐟𑐫𑑂𑐳𑑄 𑐠𑑅𑐐𑐸 𑐬𑐵𑐲𑑂𑐚𑑂𑐬𑐶𑐫 𑐳𑑂𑐰𑐵𑑄 𑐢𑐵𑑅𑐳𑐵𑑄 𑐠𑑂𑐰 𑐳𑑂𑐰𑐵𑑄𑐫𑐵𑐟 𑐄𑐮𑐶 𑐩𑐴𑐟𑑂𑐰 𑐧𑐶𑐫𑐵𑑅 𑐦𑐸𑐎𑑂𑐎 𑐣𑐾𑐥𑐵𑑅𑐩𑐶𑐟𑐫𑑂𑐳𑑄 𑐳𑑂𑐰𑐫𑐾𑐦𑐹𑐐𑐸 𑐏𑐣𑐾𑐩𑐡𑐸 𑑋 𑐐𑐸𑐮𑐶𑐳𑐶𑐎𑐾 𑐮𑐵 𑐠𑑅𑐐𑐸 𑐬𑐵𑐲𑑂𑐚𑑂𑐬𑐶𑐫 𑐳𑑂𑐰𑐵𑑄 𑐧𑐵𑐬𑐾 𑐕𑐸𑑄 𑐴𑐾 𑐖𑐵𑐣𑐎𑐵𑐬𑐷 𑐟𑐎𑑄 𑐩𑐡𑐸, 𑐄𑐎𑐶𑑄 𑐄𑐎𑐶𑐫𑐵 𑐕𑐸𑑄 𑐩𑐟𑐮𑐧 𑐴𑐾 𑐩𑐡𑐸 𑑋

𑐬𑐵𑐲𑑂𑐚𑑂𑐬𑐶𑐫𑐟𑐵 𑐢𑐿𑐐𑐸 𑐴𑐬𑐾𑐎 𑐡𑐾𑐱𑐫𑐵 𑐣𑐶𑐟𑐶𑑄 𑐠𑑅𑐠𑑅𑐐𑐸 𑐥𑐬𑐶𑐔𑐫 𑐏𑑅 𑑋 𑐄𑐎𑐶𑐫𑐵𑐟 𑐠𑑅𑐟 𑐠𑐩𑑂𑐴𑑄 𑐳𑐩𑑂𑐩𑐵𑐣 𑐣𑑄 𑐫𑐵𑐫𑐾 𑐦𑐫𑐾𑐎𑐾𑐩𑐵𑑅 𑑋 𑐳𑐵𑐎𑐸𑐬𑐵 𑐳𑑂𑐰𑐵𑑄 𑐖𑐵𑐥𑐵𑐣𑐫𑐵 𑐬𑐵𑐲𑑂𑐚𑑂𑐬𑐶𑐫 𑐳𑑂𑐰𑐵𑑄 𑐏𑑅, 𑐄𑐎𑐶𑑄 𑐂𑐥𑐶𑑄 𑐠𑑂𑐰 𑐳𑑂𑐰𑐵𑑄𑐥𑑂𑐬𑐟𑐶 𑐟𑐳𑐎𑑄 𑐳𑐰𑐾𑐡𑐣𑐱𑐷𑐮 𑑋 𑐳𑐵𑐎𑐸𑐬𑐵𑐫𑐵 𑐩𑐵𑑄𑐟 𑐳𑑂𑐰𑐳𑑂𑐰𑑄 𑐖𑐶 𑐣𑑄 𑐳𑑄𑐰𑐾𑐡𑐱𑐷𑐮 𑑋 𑐖𑐶 𑐩𑐺𑐟𑑂𑐫𑐸 𑐰 𑐖𑐷𑐰𑐣𑐣𑐵𑐥 𑐣𑑄 𑐳𑑄𑐰𑐾𑐡𑐣𑐱𑐷𑐮 𑑋

𑐔𑐎𑑄𑐐𑐸 𑐮𑐸𑐩𑐣𑑂𑐟𑐶𑐏𑑂𑐫𑑅𑐫𑐵 𑐡𑐠𑐸𑐂 𑐔𑐶𑐎𑐶𑐔𑐵𑐧𑑂𑐫𑐵𑐐𑐸 𑐮𑑃 𑑋 𑐖𑑅𑐏𑑅 𑐦𑐸𑐎𑑄 𑐗𑑂𑐰𑑅𑐗𑑂𑐰𑑅𑐮𑐵𑐎𑑂𑐎 𑐮𑑂𑐰𑐴𑑄𑐫𑐵 𑐮𑐸𑐩𑐣𑑂𑐟𑐶 𑐐𑑂𑐰𑐬𑑅𑐟 𑐩𑑁𑐣 𑐬𑐸𑐥𑑄 𑐡𑐣𑐵𑐔𑑂𑐰𑑄𑐐𑐸 𑐡𑐸𑐳𑐵 𑐣𑐵𑐥𑐣𑐵𑐥𑑄 𑐳𑐵𑐎𑐸𑐬𑐵 𑐩𑐵𑑄𑐟 𑐗𑑂𑐰𑑅𑐗𑑂𑐰𑑅𑐮𑐵𑐎𑑂𑐎 𑐁𑐎𑐵𑐱𑐫𑑂 𑐠𑑅𑐐𑐸 𑐬𑐸𑐥 𑐰 𑐎𑑂𑐲𑐩𑐟𑐵 𑐧𑑂𑐰𑐫𑐵𑑅 𑐡𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐰𑐴𑐾 𑐠𑐵𑐳𑐫𑑂 𑐩𑐺𑐟𑑂𑐫𑐸 𑐡𑐸𑐳𑐵 𑐰𑐴𑐾 𑐠𑐵𑐳𑐫𑑂 𑐖𑐷𑐰𑐣 𑐣𑑄 𑐡𑐸 𑑋

𑐰𑐴𑐾 𑐠𑐵𑐳𑑄 𑐫𑐵𑐎𑑅𑐔𑐵 𑐥𑐮𑐵𑑅 𑐣𑑂𑐴𑑂𑐫𑐵𑐎𑐵𑐔𑑂𑐰𑐣𑐾𑐧𑐮𑐾 𑐐𑐸𑐧𑐮𑐾𑑄 𑐮𑐵 𑐣𑐸𑐐𑑅 𑐥𑐶𑐥𑐶𑐣𑑂𑐴𑐸𑐫𑐵 𑐰𑐫𑐾𑐫𑑅 𑑋 𑐮𑑂𑐰𑐴𑑄 𑐖𑐸𑐂𑐢𑐸𑑄𑐎𑐹𑐥𑐶𑑄 𑐳𑐷𑐥𑐶𑑄 𑐴𑐵𑐎𑐣𑑄 𑐡𑐣𑐵𑐰𑐂 𑐮𑐵 𑐢𑐎𑐵𑑅 𑐐𑑂𑐫𑐵𑐣𑐵𑑅 𑐩𑐏𑐸, 𑐧𑐬𑐸 𑐂𑐩𑐶𑐟 𑐳𑑂𑐰𑐫𑐵𑑅 𑐂𑐥𑐶𑑄𑐠𑐾𑑄 𑐠𑑅𑐣𑑄 𑐕𑐎𑑅 𑐳𑐷𑐩𑐵𑐣𑐶 𑐢𑐿𑐐𑐸 𑐩𑐺𑐟𑑂𑐫𑐸𑐰𑑀𑐢𑑄 𑐣𑐸𑐐𑑅 𑐠𑐸𑑄𑐡𑐷𑐐𑐸 𑐏𑑅 𑑋 𑐫𑐵𑐟𑑂𑐬𑐵𑐫𑑂 𑐣𑑂𑐴𑑂𑐫𑐵𑐂𑐥𑐸𑐎𑐾𑐟 𑐰𑐂𑐩𑑂𑐴 𑐖𑐶, 𑐟𑐬 𑐫𑐵𑐟𑑂𑐬𑐵𑐫𑐵 𑐎𑑂𑐬𑐩𑐫𑑂 𑐴𑐾 𑐠𑑂𑐰 𑐠𑐵𑐳𑑄 𑐥𑐮𑐵𑑅 𑐣𑑂𑐴𑑂𑐫𑐵𑐎𑐾𑐧𑐮𑐾 𑐩𑐺𑐟𑑂𑐫𑐸𑐸𑐧𑑀𑐢𑑄 𑐖𑐶𑐟𑑅 𑐧𑐸𑐮𑐸𑐴𑐸𑑃 𑐳𑑂𑐰𑐟𑐵𑐎𑑂𑐎 𑐔𑐶𑐣𑐵𑐧𑑂𑐫𑐹𑐠𑐾𑑄 𑐟𑐵𑐫𑐵𑐰𑐂 𑑋 𑐠𑑂𑐰𑐥𑐵𑐏𑐾𑑄 𑐩𑐸𑐎𑑂𑐟 𑐖𑐸𑐂𑐟 𑐫𑐵𑐎𑐣𑑄 𑐫𑐵𑐎𑐣𑑄 𑐥𑐮𑐵𑑅 𑐣𑑂𑐴𑑂𑐫𑐵𑐎𑐾𑐟 𑐳𑑂𑐰𑐫𑐾 𑐗𑐣𑑂 𑐖𑐎 𑐥𑐮𑐵𑑅 𑐟𑐟𑑅𑐩𑐟𑑅 𑐎𑑂𑐫𑐣𑐷 𑑋 𑐰 𑐂𑐮𑐫𑑂 𑐖𑐶𑐟𑑅 𑐳𑐸𑐫𑐵𑐐𑐸𑑄 𑐐𑑂𑐰𑐴𑐵𑐮𑐶 𑐩𑐵𑑅 𑑋 𑐐𑑂𑐰𑐴𑐵𑐮𑐶 𑐦𑑂𑐰𑐣𑐾𑐟 𑐖𑐶𑑄 𑐄𑐏𑐾𑑄𑐠𑐸𑐏𑐾𑑄 𑐩𑐶𑐏𑐵 𑐧𑑂𑐰𑐫𑐾𑐎𑐾 –𑐐𑐸𑐧𑐮𑐾𑑄 𑐐𑐸𑐧𑐮𑐾𑑄 𑐳𑐸𑑄 𑐖𑐵𑐥𑐵𑐣𑐷𑐟 𑐣𑐵𑐥𑐮𑐵𑐂 𑑋 𑐩𑐶𑐏𑐵 𑐮𑑂𑐰𑐵𑑅𑐳𑐵𑑄 𑐩𑐣𑐹 𑐩𑑂𑐴𑐩𑐳𑑂𑐫𑐹 𑐠𑑅𑐐𑐸 𑐴𑐾 𑐱𑐹𑐬𑐫𑑂 𑐥𑐮𑐵𑑅 𑐣𑑂𑐴𑑂𑐫𑐵𑐎𑐷 𑑋 𑐟𑐬 𑐠𑑂𑐰 𑐂𑐮𑐫𑑂 𑐖𑐶𑐟𑑅 𑐐𑑂𑐰𑐴𑐵𑐮𑐶 𑐫𑐵𑐂𑐩𑑂𑐴 𑐢𑐿𑐩𑑂𑐴 𑐰𑐴𑐾 𑐩𑐺𑐺𑐟𑑂𑐫𑐸 𑐣𑐵𑐥𑐣𑐵𑐥𑑄 𑐡𑐣𑐵𑐔𑑂𑐰𑑄𑐥𑐶𑑄 𑐳𑐵𑐎𑐸𑐬𑐵𑐫𑐵 𑐩𑐵𑑄𑐟 𑐏𑑅 𑑋 𑐩𑐺𑐟𑑂𑐫𑐸𑐣𑐵𑐥 𑐐𑑂𑐫𑐵𑐣𑐵𑑅 𑐣𑐸𑐐𑑅 𑐂𑐟𑑅𑐩𑐟𑑅 𑐎𑑂𑐫𑐣𑐢𑐵𑑅𑐳𑐵 𑐖𑐶𑑄 𑐰𑐴𑐾 𑐖𑐷𑐰𑐣𑐣𑐵𑐥 𑐩𑑂𑐰𑐵𑐣𑐵𑐔𑑂𑐰𑑄𑐥𑐶 𑐰 𑐴𑑂𑐰𑐫𑐾𑐟𑑂𑐫𑑄𑐥𑐶𑑄 𑐳𑐵𑐎𑐸𑐬𑐵 𑐳𑑂𑐰𑐵𑑄𑐟 𑐣𑐵𑐥 𑐐𑑂𑐰𑐴𑐵𑐮𑐶 𑐦𑑂𑐰𑐣𑐾 𑑋 𑐄𑐎𑐶𑑄 𑐰 𑐮𑑂𑐰𑐴𑑄𑐥𑑁 𑐥𑐵𑐏𑐾 𑐩𑐶𑐏𑐵 𑐩𑐧𑑂𑐰𑐳𑐾, 𑐳𑑂𑐰𑐵𑑄𑐩𑐵𑐫𑑂 𑐠𑐳𑑂𑐰𑐳𑑂𑐰𑑄 𑐖𑐶𑑄 𑐰 𑐠𑐵𑐫 𑐥𑐸𑐮𑐵𑐰𑐣𑐾 𑑋 “𑐖𑐶𑐟𑑅 𑐩𑐺𑐟𑑂𑐫𑐸𑐳𑐶𑐧𑐾𑑄 𑐖𑐷𑐰𑐣 𑐫𑑅” 𑐢𑐎𑐵𑑅 𑐩𑐣𑑄𑐩𑐣𑑄 𑐩𑑄𑐟𑑂𑐬 𑐧𑑂𑐰𑐣𑐾𑐠𑐾𑑄 𑐧𑑂𑐰𑐣𑐵𑑅 𑐠𑑅𑐠𑐩𑑂𑐴𑑄𑐟𑐸𑑄 𑐟𑑂𑐫𑐵𑐎𑐵𑑅 𑐥𑐮𑐵𑑅 𑐣𑑂𑐴𑑂𑐫𑐵𑐎𑐵𑐫𑑄𑐎𑐾 𑐀𑐮𑐾 𑐩𑐺𑐟𑑂𑐫𑐸𑐫𑐵𑐟 𑐎𑑂𑐫𑐮𑐵𑐫𑑄𑐎𑐾 𑑋 𑐳𑐵𑐎𑐸𑐬𑐵𑐫𑐵 𑐩𑐵𑑄 𑐗𑐣𑑂𑐗𑐣𑑂 𑐔𑑄𑐔𑑄𑐢𑐵𑐫𑐵𑐰𑐮 𑑋 𑐗𑐸𑐥𑑂𑐥𑐵𑐗𑐸𑐥𑑂𑐥𑐵 𑐏𑐣𑐾𑐡𑐫𑐵𑐰𑑅𑐐𑐸 𑐳𑑂𑐰𑐵𑑄𑐫𑐵 𑐧𑐸𑑃𑐟 𑐀𑐥𑑂𑐬𑐶𑐮 𑐠𑑂𑐫𑑄𑐧𑐮𑐾 𑐢𑐩𑐵𑐢𑐩 𑐐𑐣𑑄 𑐟𑐸𑐂𑐳𑐾 𑐐𑐣𑑄 𑐨𑐔𑐵𑐨𑐔𑐵 𑐐𑐸𑐮𑐵𑐦𑐶 𑐬𑑄𑐐𑐫𑐵 𑐳𑑂𑐰𑐵𑑃𑐩𑐵𑐫𑑂 𑐥𑐬𑐶𑐰𑐬𑑂𑐟𑐣 𑐖𑐹𑐐𑐸 𑐏𑐣𑐾𑐡𑐂𑐰𑐮 𑑋

“𑐁𑐴𑐵, 𑐎𑐵 𑐳𑑂𑐰𑐵𑑄 𑐴𑑂𑐰𑐮, 𑐳𑐵𑐎𑐸𑐬𑐵 𑐳𑑂𑐰𑐵𑑄 𑐴𑑂𑐰𑐮 !!”

𑐖𑐶 𑐫𑐵𑐎𑑅𑐔𑐵 𑐴𑐵𑐮𑐵𑐐𑐸 𑐖𑐶𑑄 𑐩𑐔𑐵𑑅 𑑋 𑐖𑐶𑐐𑐸 𑐣𑐸𑐐𑐮𑐫𑑂 𑐮𑐫𑑂𑐟𑐵𑑅 𑐨𑐫𑑂𑐨𑐫𑑂 𑐧𑐶𑐫𑐵𑐰𑐮 𑑋 𑐖𑐶𑐐𑐸 𑐖𑐵𑐥𑐵𑐣 𑐨𑑂𑐬𑐩𑐞𑐫𑐵 𑐳𑐵𑐬𑑂𑐠𑐎𑐟𑐵 𑐡𑐿𑐐𑐸 𑐖𑐸𑐮 𑑋 𑐠𑑂𑐰 𑐮𑐫𑑂𑐟𑐵𑑅 𑐖𑐶𑐐𑐸 𑐩𑐾𑐩𑐾𑐐𑐸 𑐮𑐫𑑂𑐟𑐵𑑅 𑐳𑐶𑐧𑐾𑑄 𑐥𑐵𑑅 𑑋 𑐕𑐸𑑄 𑐣𑑄 𑐎𑑂𑐲𑐞𑐶𑐎 𑐳𑐦𑐮𑐟𑐵𑑄 𑐥𑐶𑐡𑐣𑐷𑐐𑐸 𑐮𑐫𑑂𑐟𑐵𑑅 𑐠𑐾𑑄 𑐖𑐎 𑐩𑐏𑐸 𑐠𑑂𑐰 𑑋 𑐖𑐷𑐰𑐣 𑐰 𑐩𑐺𑐟𑑂𑐫𑐸𑐰𑑀𑐢𑐫𑐵 𑐡𑐠𑐸𑑄 𑐥𑐶𑐖𑑂𑐰𑑅𑐐𑐸 𑐮𑐫𑑂𑐟𑐵𑑅 𑐏𑑅 𑑋 𑐄𑐎𑐶 𑐠𑑂𑐰 𑐮𑐫𑑂𑐟𑐵𑑅 𑐖𑐶𑐐𑐸 𑐣𑐶𑐟𑐶𑑄 𑐟𑐳𑐎𑑄 𑐀𑐩𑐹𑐮𑑂𑐫 𑑋

𑐳𑐵𑐎𑐸𑐬𑐵𑐫𑐵 𑐣𑐵𑑄 𑐖𑐎 𑐧𑐵𑑄𑐮𑐵𑑅𑐐𑐸 𑐩𑐏𑐸, 𑐳𑑂𑐰𑐵𑑄𑐫𑐵 𑐬𑐸𑐥 𑐣𑑄 𑐄𑐮𑐶 𑐴𑐾 𑐧𑐵𑑄𑐮𑐵𑑅 𑑋 𑐳𑑂𑐰𑐵𑑄 𑐴𑑂𑐰𑐫𑐾𑐰𑑄 𑐳𑐶𑐩𑐵 𑐕𑐩𑐵𑑄 𑐗𑑅𑐗𑑅 𑐢𑐵𑑅 𑑋 𑐗𑑅𑐗𑑅𑐢𑐵𑑅𑐐𑐸 𑐳𑐵𑐎𑐸𑐬𑐵𑐩𑐵𑐟𑐳𑐾𑑄 𑐰𑐵 𑐳𑐩𑐵𑐢𑐶 𑐳𑑂𑐠𑐮𑐫𑐵𑐟 𑐣𑑄 𑐣𑑂𑐴𑑂𑐫𑐵𑐂𑐥𑐸𑐎𑐵𑐧𑐶𑐮, 𑐫𑐂𑐥𑐸𑐎𑐵𑐧𑐶𑐮 𑑋 𑐴𑑂𑐰𑐂𑐔𑑂𑐔𑑄𑐐𑐸 𑐳𑑂𑐰𑐵𑑄𑐫𑐵𑐟 𑐳𑑂𑐰𑐳𑑂𑐰𑑄 𑐮𑑃𑐫𑑂 𑐥𑐮𑐵𑑅 𑐣𑑂𑐴𑑂𑐫𑐵𑐎𑐾𑐧𑐮𑐾 𑐖𑐶𑐐𑐸 𑐩𑐣 𑐣𑑄 𑐳𑑂𑐰𑐵𑑄𑐠𑐾𑑄 𑐴𑐾 𑐫𑐵𑐄𑑃𑐳𑐾 𑐔𑑂𑐰𑐣𑐵𑐰𑐣𑐷 𑑋 𑐮𑑂𑐰𑐴𑑄𑐠𑐾𑑄 𑐕𑐵𑑅𑐐𑐸 𑐎𑐛𑑀𑐬𑐐𑐸 𑐩𑐺𑐟𑑂𑐫𑐸𑐰𑑀𑐢𑑄 𑐖𑐶𑐐𑐸 𑐣𑐸𑐐𑑅 𑐕𑑂𑐫𑐵𑐣𑐵𑐟𑐫𑐾𑐢𑐸𑑄𑐎𑐹𑐐𑐸 𑐠𑐵𑐳𑐫𑑂 𑐀𑐖𑑂𑐫𑐵𑑅𑐐𑐸 𑐳𑐸𑐣𑑂𑐡𑐬𑐐𑐸 𑐖𑐷𑐰𑐣 𑐳𑑂𑐰𑐵𑑄𑐣𑐸𑐐𑐮𑐫𑑂 𑐡𑐸𑐣𑐾 𑐴𑐾 𑐴𑑂𑐰𑐫𑐵𑐔𑑂𑐰𑑄𑐐𑐸 𑐖𑐶𑑄 𑐀𑐣𑐸𑐨𑐹𑐟 𑐫𑐵𑐫𑐾 𑑋 𑐖𑐶 𑐠𑑅𑐠𑐩𑑂𑐴𑑄 𑐮𑐫𑑂𑐟𑐵𑐫𑑂 –𑐖𑐶 𑐐𑐸𑐮𑐶 𑐨𑐵𑐐𑑂𑐫𑐩𑐵𑐣𑐶 ! 𑐖𑐶𑐎𑐾 𑐠𑐖𑑂𑐫𑐵𑑅𑐐𑐸 𑐀𑐩𑐹𑐮𑑂𑐫𑐐𑐸 𑐖𑐷𑐰𑐣 𑐡𑐸, 𑐖𑐶𑐟𑑅 𑐖𑐷𑐰𑐣 𑐫𑑅, 𑐩𑐺𑐟𑑂𑐫𑐸 𑐩𑐫𑑅 ! 𑐖𑐶𑐟𑑅 𑐳𑑂𑐰𑐵𑑄 𑐫𑑅, 𑐮𑑂𑐰𑐴𑑄 𑐩𑐫𑑅 !!

𑐖𑐶 𑐖𑐵𑐥𑐵𑐣𑐫𑑂 𑐔𑐵𑑅𑐴𑐶𑐮𑐵𑑅 𑐖𑐶𑐐𑐸 𑐣𑐸𑐐𑐮𑐫𑑂 𑐐𑐖𑑂𑐫𑐵𑑅𑐐𑐸 𑐀𑐣𑐸𑐨𑐸𑐟𑐶𑐟 𑐡𑐣𑐵𑐰𑐮 𑐢𑐿𑐐𑐸 𑐏𑑃 𑐳𑐸𑐣𑐵𑑄 𑐳𑑂𑐫𑐹 𑐢𑐎𑐵𑑅 ! 𑐖𑐵𑐥𑐵𑐣𑐫𑐵 𑐣𑐶𑐟𑐶𑑄 𑐖𑐶 𑐕𑐩𑑂𑐴 𑐰𑐶𑐡𑐾𑐱𑐷 𑑋 𑐖𑐵𑐥𑐵𑐣𑐷 𑐨𑐵𑐫𑑂 𑐣𑑄 𑐖𑐶𑐟𑑅 𑐧𑐵𑑄𑐮𑐵𑐎 𑐩𑐰𑑅 𑑋 𑐄𑐎𑐶𑑄 𑐥𑐵𑐳𑐵𑐥𑐶𑑄𑐣𑐵𑐥 𑐖𑐶𑑄 𑐠𑑅𑐐𑐸 𑐏𑑃 𑐀𑐨𑐶𑐰𑑂𑐫𑐎𑑂𑐟 𑐫𑐵𑑅𑐳𑐵𑑄 𑐢𑐵𑐟𑑂𑐠𑐾𑑄𑐐𑐸 𑐣𑐸𑐐𑑅 𑐧𑑂𑐰𑐫𑐵𑑅 𑐖𑐶𑑄 𑐎𑑂𑐫𑐣𑐾𑐩𑐦𑐸 𑑋 𑐥𑐵𑐳𑐵𑐥𑐶𑐳𑑄 𑐖𑐶𑐟𑑅 𑐀𑐣 𑐫𑐎𑑂𑐰 𑐫𑐎𑑂𑐰 𑐩𑐵𑐫𑐵 𑐧𑑂𑐫𑐹𑐳𑐵𑑄 𑐣𑑄 𑐄𑐮𑐶 𑐖𑐶 𑐮𑐸𑐩𑐢𑑄 𑑋 𑐳𑐵𑐎𑐸𑐬𑐵 𑐠𑐵𑐫𑑂𑐠𑐵𑐳𑐫𑑂 𑐴𑑂𑐰𑐫𑐵 𑐎𑑂𑐫𑐣𑐾𑐰𑑄 𑐢𑐵𑑅𑐳𑐵 𑐖𑐶𑐟𑑅 𑐩𑐾𑐥𑐶𑑄 𑐳𑐸𑑄 𑐴𑐾 𑐥𑐵𑐳𑐵𑐥𑐶𑑄 𑐩𑑂𑐰𑐵𑑅𑐠𑐾𑑄 𑐖𑐸𑐫𑐵𑐰𑐮 𑑋 𑐮𑑃𑐫𑑂 𑐫𑐵𑐎𑑅𑐔𑐵 𑐰𑐫𑐾𑐰𑐣𑐾𑐧𑐮𑐾 𑐰 𑐴𑐾 𑐳𑑂𑐰𑐵𑑄 𑐳𑑂𑐰𑐳𑑂𑐰𑑄 𑐖𑐶 𑐮𑐸𑐢𑐣𑐵𑐰𑐮 𑑋

𑐳𑐵𑐎𑐸𑐬𑐵 …. 𑐳𑐵𑐎𑐸𑐬𑐵 …. 𑑋

𑐩𑐣𑐹𑐟𑐳𑐾𑑄 𑐣𑑂𑐴𑑂𑐫𑐵𑐠𑐵𑐳𑑄 𑐨𑐸𑐣𑐸𑐨𑐸𑐣𑐸 𑐣𑐰𑐵𑐣𑐵𑐔𑑂𑐰𑑄𑐠𑐾𑑄 𑐖𑐶𑐟𑑅 𑐟𑐵𑐫𑐵𑐰𑐮 𑑋 𑐧𑐳 𑐐𑐫𑑂𑐧𑐮𑐾 𑐖𑐸𑐂𑐩𑐵 𑐰𑐵 𑐚𑑂𑐬𑐾𑐣𑐫𑑂 𑐔𑑂𑐰𑐣𑐾𑐧𑐮𑐾 𑐀𑐠𑐾 𑐴𑐾 𑐧𑐴𑐣𑐷 𑐧𑐴𑐣𑐷 𑐚𑐶.𑐨𑐶. 𑐳𑑂𑐰𑐫𑐾𑐧𑐮𑐾 𑐣𑑄 𑐣𑑂𑐴𑑂𑐫𑐵𑐠𑐵𑐳𑑄 𑐳𑐵𑐎𑐸𑐬𑐵 𑐳𑑂𑐰𑐵𑑄𑐫𑐵 𑐴𑐾 𑐔𑐬𑑂𑐔𑐵 𑐖𑐸𑐫𑐵𑐔𑑂𑐰𑑄𑐐𑐸 𑐫𑐟𑑂𑐠𑐾𑑄 𑐳𑐷𑐡𑐂 𑑋 𑐰𑐶𑐨𑐶𑐣𑑂𑐣 𑐥𑐵𑐬𑑂𑐎𑐟 𑐥𑐵𑐏𑐾 𑐣𑑄 𑐩𑐣𑐹𑐟 𑐴𑐹𑐮𑐴𑐹𑐮 𑐖𑐸𑐫𑐵𑐰𑐮 𑑋 𑐠𑐵𑐫𑑂𑐠𑐵𑐳𑐫𑑂 𑐳𑐵𑐎𑐸𑐬𑐵𑐫𑐵 𑐔𑐬𑑂𑐔𑐵, 𑐣𑑂𑐴𑑂𑐫𑐵𑐠𑐵𑐫𑑂 𑐣𑑄 𑐳𑐵𑐎𑐸𑐬𑐵𑐩𑐵𑐫𑑂 𑐳𑐵𑐎𑐸𑐬𑐵 𑐳𑑂𑐰𑐵𑑄 𑐴𑑂𑐰𑐂𑐰𑐮 𑑋

𑐳𑐩𑐵𑐢𑐷𑐳𑑂𑐠𑐮𑐫𑑂 𑐠𑐾𑑄 𑐴𑐾 𑐩𑐾𑐩𑐾𑐐𑐸 𑐰𑐶𑐨𑐶𑐣𑑂𑐣 𑐥𑐵𑐬𑑂𑐎𑐫𑑂 𑐣𑑄 𑐳𑐵𑐎𑐸𑐬𑐵 𑐳𑑂𑐰𑐵𑑄 𑐢𑐩𑐵𑐢𑐩 𑐴𑑂𑐰𑐮 𑑋 𑐖𑐵𑐥𑐵𑐣𑐷𑐟𑐫𑑂𑐐𑐸 𑐩𑐾𑐮𑐵, 𑐴𑑂𑐰𑑅𑐐𑐸 𑐳𑐵𑐎𑐸𑐬𑐵 𑐳𑑂𑐰𑐫𑐾𑐟 𑐩𑐣𑐹𑐟 𑐣𑑂𑐴𑑂𑐫𑐵𑐠𑐵𑐳𑑄 𑐴𑐹𑐮𑐴𑐹𑐮 𑐏𑐣𑐾𑐡𑐫𑐵𑐰𑐮 𑑋

𑐳𑐵𑐎𑐸𑐬𑐵 𑐮𑐵 𑐂𑐩𑐶𑐐𑐸 𑐣𑐶𑐟𑐶𑑄 𑐖𑑂𑐫𑐵𑐣 𑐥𑑂𑐬𑐵𑐞 𑑋 𑐳𑐵𑐎𑐸𑐬𑐵𑐩𑐵𑐫𑐵 𑐎𑑂𑐰𑐫𑑂 𑐔𑑂𑐰𑐣𑐵𑑅 𑐂𑐥𑐶𑑄 𑐮𑐳𑐟𑐵𑑄 𑐰𑑃𑐫𑑂 𑐔𑐵𑐂, 𑐩𑑂𑐫𑐾 𑐴𑐵𑐮𑐷 𑐥𑑂𑐫𑐵𑐏𑑄 𑐴𑐸𑐮𑐷 𑑋 𑐮𑑂𑐴𑐵𑐟𑐫𑑂 𑐀𑐫𑑂𑐮𑐵𑑅 𑐧𑐵𑐟𑑂𑐔𑐵 𑐰 𑐐𑐶𑐮𑐵𑐳 𑐖𑑂𑐰𑐣𑐵𑑅 𑐢𑐾𑐢𑐾𑐔𑐸𑐂 𑑋

𑐴𑐟𑑂𑐥𑐟𑐶𑑄 𑐠𑑅𑐐𑐸 𑐣𑐸𑐐𑑅 𑐄𑐮𑐵𑑅 𑐩𑐎𑑂𑐫𑐣𑐷𑐥𑐶𑑄 𑐖𑐵𑐥𑐵𑐣𑐷𑐟, 𑐏𑑂𑐰𑐵𑑅 𑐳𑑂𑐰𑐫𑐾𑐰𑑄 𑐂𑐩𑐶𑐟 𑐩𑑂𑐴𑐳𑐷𑐎𑐾 𑐠𑐵𑐎𑐸 𑑋 𑐟𑐬 𑐠𑑂𑐰 𑐂𑐮𑐫𑑂 𑐂𑐩𑐶𑐐𑐸 𑐰𑐵𑐳𑑂𑐟𑐰𑐶𑐎 𑐬𑐸𑐥 𑐠𑑅𑐠𑐩𑑂𑐴𑑄 𑐥𑐶𑐖𑑂𑐰𑐫𑐾𑐎𑐷 𑑋 𑐢𑐵𑐟𑑂𑐠𑐾𑑄𑐫𑐵 𑐩𑐣𑐹 𑐖𑐸𑐫𑐵𑑅 𑐎𑑂𑐫𑐣𑐷 –𑐩𑐣𑐹𑐫𑐵𑐎𑐾 𑐰𑐂𑐐𑐸 𑐨𑐵𑐰𑐣𑐵, 𑐳𑑄𑐰𑐾𑐡𑐣𑐵 𑐰 𑐩𑐾𑐩𑐾𑐐𑐸 𑐎𑐩𑐖𑑀𑐬𑐷𑐟 𑐳𑐵𑐎𑐸𑐬𑐵𑐫𑐵 𑐣𑑂𑐴𑑂𑐫𑑅𑐣𑐾 𑐠𑑅𑐠𑐩𑑂𑐴𑑄 𑐥𑑂𑐰𑑄𑐎𑐷 𑑋 𑐣𑑂𑐴𑐶𑐮𑐾𑐩𑐵𑐳𑑂𑐟𑐾𑐰𑑅𑐳𑐵 𑐣𑑂𑐴𑐶𑐮𑐷, 𑐏𑑂𑐰𑐫𑐾𑐩𑐵𑐳𑑂𑐟𑐾𑐰𑑅𑐳𑐵 𑐏𑑂𑐰𑐂 𑑋 𑐠𑑅 𑐣𑑄 𑐳𑐵𑐎𑐸𑐬𑐵 𑐳𑑂𑐰𑐵𑑄 𑐴𑑂𑐰𑑅𑐠𑐾𑑄 𑐴𑐾 𑐴𑑂𑐰𑐫𑐾𑐟 𑐳𑑂𑐰𑐂 𑑋 𑐳𑐵𑐎𑐸𑐬𑐵𑐣𑐵𑐥 𑐴𑐾 𑐠𑑅𑐠𑑅𑐐𑐸 𑐖𑐷𑐰𑐣 𑐮𑐣𑐵𑐳𑑂𑐰𑐂 –𑐖𑐷𑐰𑐣 𑐢𑐿𑐐𑐸 𑐣𑑄 𑐳𑑂𑐰𑐵𑑄𑐠𑐾𑑄 𑐏𑑅 𑐢𑐎𑐵𑑅 𑐖𑐷𑐰𑐣𑐫𑐵 𑐳𑐟𑑂𑐫𑐟𑐵 𑐰𑐵𑑅𑐔𑐵𑐫𑑂𑐎𑐷 𑐩𑐴𑐟𑑂𑐰 𑐧𑐷 𑑋 𑐴𑑂𑐰𑑅𑐐𑐸 𑐳𑐵𑐎𑐸𑐬𑐵 𑐳𑑂𑐰𑐵𑑄 𑐳𑑂𑐰𑐫𑐾𑐟 𑐖𑐶𑐟𑑅 𑐫𑐎𑑂𑐰 𑐥𑐵𑐳𑐵𑐥𑐶𑑄𑐳𑑄 𑐂𑐣𑐵𑐥 𑐫𑐵𑐟, 𑐠𑐵𑐫𑑂 𑐠𑐵𑐳𑐫𑑂 𑐧𑑂𑐰𑐣𑐵𑐫𑑄𑐎𑐮 𑑋 𑐥𑐵𑐳𑐵𑐥𑐶𑑄 𑐣𑐵𑐥𑐣𑐵𑐥𑑄 𑐖𑐶 𑐣𑑄 𑐄𑐮𑐶 𑐴𑐾 𑐮𑐫𑑂𑐟𑐵𑐫𑐵 𑑋 𑐳𑐵𑐎𑐸𑐬𑐵 𑐣𑑂𑐴𑑂𑐫𑐵𑐠𑐵𑐫𑑂 𑐳𑑂𑐰 𑐰𑐴𑐾 𑐳𑐸𑐣𑑂𑐡𑐬𑐟𑐵, 𑐀𑐠𑐾𑑄 𑐴𑐾 𑐧𑐵𑑄𑐮𑐵𑑅 𑑋 𑐖𑐷𑐰𑐣 𑐣𑑄 𑐐𑐸𑐮𑐶 𑐣𑑂𑐴𑑂𑐫𑐵𑐂𑐥𑐸𑐳𑑂𑐳𑐾 𑐔𑑂𑐰𑑄 𑑋

𑐖𑐷𑐰𑐣 𑐢𑐿𑐐𑐸 𑐴𑑂𑐰𑐫𑐾𑐟 𑐮𑐵 𑐏𑑅, 𑐦𑐟𑑂𑐟𑐮𑐾 𑐴𑑂𑐰𑐂𑐧𑑂𑐫𑐸 𑑋 𑐴𑑂𑐰𑐂𑐔𑑂𑐰𑑄𑐐𑐸 𑐳𑑂𑐰𑐵𑑄𑐟 𑐳𑑂𑐰𑐳𑑂𑐰𑑄 𑐖𑐶 𑐠𑑅𑐠𑐩𑑂𑐴𑑄 𑐣𑑄 𑐀𑐫𑑂𑐮𑐵𑐏𑑄 𑐎𑐵𑑅𑐩𑑂𑐴𑐠𑐾𑑄 𑐩𑐾𑐩𑐾𑐐𑐸 𑐳𑐎𑐟𑐵𑑄 𑐏𑑃 𑐮𑑂𑐰𑑅𑐩𑑄, 𑐣𑑂𑐴𑑂𑐫𑐵𑐠𑐵𑐳𑑄 𑐳𑐵𑐎𑐸𑐬𑐵𑐫𑐵 𑐳𑐵𑐎𑐸𑐬𑐵 𑐖𑐎 𑐏𑐣𑐵 𑑋 𑐖𑐶 𑐰 𑐠𑐵𑐫𑑂𑐫𑐵 𑐕𑐩𑑂𑐴 𑐖𑐵𑐥𑐵𑐣𑐷𑐫𑐵𑐎𑐾 𑐰𑐂𑐐𑐸 𑐴𑐬𑐾𑐎 𑐏𑐵𑐮𑐫𑐵 𑐩𑐵𑐣𑐰𑐳𑑄𑐰𑐾𑐡𑐣𑐵 𑐖𑐶𑐐𑐸 𑐩𑐣𑐫𑑂 𑐣𑑄 𑐄𑐠𑐾𑑄 𑐴𑐾 𑐡𑐵𑐳𑐷 𑐰𑐂𑐔𑑂𑐰𑐣 𑑋 𑐳𑐵𑐎𑐸𑐬𑐵𑐥𑑂𑐬𑐟𑐶 𑐕𑐸𑑄 𑐨𑐟𑐶 𑐴𑐾 𑐥𑐵𑑅𑐐𑐸 𑐨𑐵𑐰𑐣𑐵 𑐡𑐣𑐵 𑐩𑐰𑑅 𑑋 𑐳𑐵𑐎𑐸𑐬𑐵 𑐖𑐶𑐐𑐸 𑐡𑐸𑐣𑐸𑐐𑐮𑑄 𑐖𑐎 𑐫𑐫𑐾𑐎𑐹𑐐𑐸 𑐩𑐏𑐸 –𑐖𑐶𑐐𑐸 𑐫𑐵𑐟𑑂𑐬𑐵𑐫𑑂 𑐕𑐥𑑂𑐥𑑄 𑐳𑐸𑐣𑑂𑐡𑐬𑐟𑐵 𑐰 𑐳𑐵𑐬𑑂𑐠𑐎𑐟𑐵 𑐟𑐣𑐵𑑅 𑐖𑐶𑐐𑐸 𑐖𑐵𑐥𑐵𑐣 𑐫𑐵𑐟𑑂𑐬𑐵𑐫𑐵𑐟 𑐴𑐾 𑐟𑑅𑐖𑐶𑐎𑐵 𑐧𑐶𑐮 𑑋 “𑐢𑐣𑑂𑐫 𑐳𑐵𑐎𑐸𑐬𑐵 𑐕𑑄𑐟 𑐖𑐶𑑄 𑐐𑐸𑐧𑐮𑐾𑑄 𑐮𑑂𑐰𑑅𑐩𑑄𑐎𑐾 𑐦𑐿𑐩𑐏𑐸𑐟 !” 𑐣𑐸𑐐𑐮𑑄 𑐳𑐸𑐨𑐵𑐫𑑂 𑐧𑐷 𑑋

“𑐳𑐵𑐎𑐸𑐬𑐵 … 𑐳𑐵𑐎𑐸𑐬𑐵
𑐫𑐵𑐂𑐫𑑅 𑐣𑑀 𑐳𑑀𑐬𑐵 𑐰𑐵
𑐩𑐶𑐩𑐵 𑐟𑐵𑐳𑐸 𑐎𑐵𑐐𑐶𑐬𑐷 …”