𑐰𑐶𑐱𑑂𑐰𑐫𑐵 𑐣𑐾𑐰𑐵𑑅𑐟𑐫𑑂𑐟 𑐕𑐢𑐷 𑐫𑐵𑐂𑐐𑐸 𑐜𑐧𑑂𑐮𑐸𑐊𑐣𑐌

𑐜𑐧𑑂𑐮𑐸𑐊𑐣𑐌 𑐐𑐛𑐣𑐫𑐵 𑐥𑐺𑐲𑑂𑐛𑐨𑐹𑐩𑐶:

𑐮𑐖𑐐𑐵𑑅 𑐰𑐵 𑐁𑐏𑑅 𑐧𑑂𑐰𑐣𑐾𑐐𑐸 𑐰 𑐩𑐾𑐩𑐾𑐐𑐸 𑐴𑐸𑐣𑐶𑑄 𑐣𑐾𑐥𑐵𑐮𑑄 𑐥𑐶𑐣𑐾 𑐫𑐸𑐬𑑀𑐥𑐫𑐵 𑐠𑐷𑐠𑐷 𑐡𑐾𑐱, 𑐀𑐩𑐾𑐬𑐶𑐎𑐵, 𑐖𑐵𑐥𑐵𑐣, 𑐀𑐲𑑂𑐚𑑂𑐬𑐾𑐮𑐶𑐫𑐵 𑐁𑐡𑐶 𑐡𑐾𑐱𑐫𑑂 𑐣𑐾𑐰𑐵𑑅𑐟𑐫𑑂𑐐𑐸 𑐧𑐳𑑀𑐧𑐵𑐳 𑐖𑐸𑐫𑐵𑐰𑑅𑐐𑐸 𑐁𑐥𑐵𑑅 𑐃 𑐡𑐟 𑑋 𑐳𑐣𑑂 𑑑𑑙𑑙𑑐 𑐫𑐵 𑐡𑐱𑐎𑐫𑑂 𑐠𑑂𑐫𑑄𑐧𑐮𑐫𑑂 𑐠𑑂𑐰 𑐎𑑂𑐬𑐩 𑐀𑐗 𑐰𑑂𑐫𑐵𑐥𑐎 𑐖𑐹𑐰𑐣 𑑋 𑐐𑐣 𑐐𑐣 𑐡𑐾𑐱𑐫𑑂 𑐣𑐾𑐰𑐵𑑅𑐟𑐫𑑂 𑐮𑑂𑐫𑐵𑑅 𑐨𑐔𑐵 𑐀𑐥𑑂𑐰𑐫𑐵𑑅 𑐥𑐸𑐔𑑅 𑐏𑐵𑐫𑐾𑐐𑐸 𑐱𑐸𑐬𑐸 𑐖𑐸𑐮 𑐀𑐣 𑐀𑐣 𑐡𑐾𑐱𑐫𑑂 𑐀𑐩𑐶𑐳𑑄 𑐣𑐾𑐰𑐵𑑅 𑐏𑐮𑑅, 𑐥𑐸𑐔𑑅, 𑐐𑐸𑐠𑐶 𑐔𑐵𑐫𑐾𑐎𑐾𑐩𑐵𑑅𑐐𑐸 𑐩𑐴𑐳𑐸𑐳 𑐫𑐵𑐣𑐵𑑅 𑐴𑐬𑐾𑐎 𑐡𑐾𑐱𑐫𑑂 𑐣𑐾𑐰𑐵𑑅𑐟𑐫𑑂𑐐𑐸 𑐏𑐮𑑅, 𑐥𑐸𑐔𑑅, 𑐐𑐸𑐠𑐶 𑐰𑐵 𑐩𑐩𑐾𑐐𑐸 𑐣𑐵𑐩𑑄 𑐣𑐾𑐰𑐵𑑅 𑐳𑑄𑐑, 𑐳𑑄𑐳𑑂𑐠𑐵𑐟 𑐣𑐶𑐳𑑂𑐰𑐣𑐾𑐐𑐸 𑐖𑑂𑐫𑐵 𑐣𑑄 𑐤𑑂𑐫𑐖𑑂𑐫𑐵𑐎𑐵 𑐫𑑄𑐎𑐹𑐐𑐸 𑐏𑐣𑐾𑐡𑐸 𑑋 𑐣𑐾𑐰𑐵𑑅 𑐳𑑄𑐳𑑂𑐎𑐺𑐟𑐶 𑐮𑑂𑐫𑑄𑐎𑐾𑐐𑐸, 𑐣𑐾𑐰𑐵𑑅 𑐣𑐏𑑅𑐔𑐏𑑅 𑐴𑐣𑐾𑐐𑐸, 𑐣𑐾𑐰𑐵𑑅 𑐨𑑂𑐰𑐫𑑂 𑐣𑑂𑐫𑐵𑐫𑐾𑐎𑐾𑐐𑐸𑐮𑐷 𑐟𑐵𑑅𑐮𑐵𑐣𑐵 𑐰𑐣𑐵𑐔𑑂𑐰𑑄𑐐𑐸 𑐠𑐸𑐥𑐶𑑄 𑐣𑐾𑐰𑐵𑑅 𑐳𑑄𑐑 𑐳𑑄𑐳𑑂𑐠𑐵𑐟 𑐁𑐥𑐵𑐮𑑄 𑐡𑐫𑐵𑑅 𑐣𑑄 𑐠𑐷𑐠𑐷 𑐡𑐾𑐱𑐫𑑂 𑐠𑑂𑐫𑐣𑐵𑐔𑑂𑐰𑑄𑐥𑐶𑑄 𑐣𑐾𑐰𑐵𑑅𑐟𑐫𑑂 𑐡𑐠𑐸𑐂 𑐧𑐶𑐔𑐵𑑅 𑐎𑐵𑐮𑐧𑐶𑐮 𑐫𑐵𑐫𑐾𑐐𑐸 𑐕𑐐𑐹 𑐩𑑄𑐎𑐵𑑅 𑐳𑑄𑐖𑐵𑐮 𑐡𑐫𑐾𑐎𑐵𑑅 𑐀𑐩𑐶 𑐡𑐠𑐸𑐂 𑐠𑐰𑑄𑐠𑐰𑐫𑑂 𑐳𑑂𑐰𑐵𑐥𑐹 𑐟𑐫𑐵𑑅 𑐳𑐴𑐮𑐴 𑐫𑐵𑐫𑐾𑐐𑐸 𑐖𑑂𑐫𑐵 𑐢𑐵𑑅𑐳𑐵 𑐣𑐵𑐎𑑄 𑐖𑐸𑐂 𑐩𑐦𑐫𑐵𑐔𑑂𑐰𑑄𑐐𑐸 𑐏𑑅 𑑋 𑐠𑑂𑐰 𑐴𑐾 𑐀𑐨𑐵𑐰𑐫𑐵𑐟 𑐥𑐹𑐰𑑄𑐎𑐾𑐨𑐣𑑄 𑐰𑐮𑑂𑐬𑑂‍𑐐 𑐣𑐾𑐰𑐵 𑐀𑐬𑑂‍𑐐𑐣𑐵𑐂𑐖𑐾𑐱𑐣 (𑐴𑐮𑐶𑑄 𑐣𑐾𑐰𑐵𑑅 𑐡𑐧𑐹) 𑐣𑐶𑐳𑑂𑐰𑐣𑐾𑐐𑐸 𑐖𑑂𑐫𑐵 𑐖𑐹𑐐𑐸 𑐏𑑅 𑑋

𑐢𑐵𑐟𑑂𑐠𑐾𑑄 𑐮𑐵 𑐳𑐣𑑂 𑑑𑑙𑑙𑑖 𑐳 𑐀𑐩𑐾𑐬𑐶𑐎𑐵𑐫𑑂 𑐖𑐹𑐐𑐸 𑐣𑐾𑐥𑐵𑑅𑐩𑐶𑐟𑐫𑐐𑐸 𑐕𑐐𑐹 𑐩𑐸𑑃𑐖𑑂𑐫𑐵𑐫𑑂 𑐴𑐾 𑐣𑑄 𑐀𑐣𑑂𑐟𑐬𑑂‍𑐬𑐵𑐲𑑂𑐚𑑂𑐬𑐶𑐫 𑐣𑐾𑐰𑐵𑑅 𑐳𑐩𑑂𑐩𑐾𑐮𑐣𑐫𑐵 𑐣𑐶𑑄𑐟𑐶𑑄 𑐳𑑅 𑐥𑐶𑐡𑑄𑐐𑐸 𑐏𑑅 𑑋 𑐮𑐶𑐥𑐵 𑐰𑐣𑐵𑑅, 𑐀𑐩𑐾𑐬𑐶𑐎𑐵𑐫𑑂 𑐴𑐾 𑐡𑐷𑐥𑐶𑑄 𑐟𑑂𑐬𑐶𑐨𑐸𑐰𑐣 𑐟𑐸𑐮𑐵𑐢𑐬, 𑐡𑐫𑐵𑐬𑐟𑑂𑐣 𑐱𑐵𑐎𑑂𑐫, 𑐡𑐶𑐰𑑂𑐫 𑐴𑐵𑐜𑐵 𑐠𑐾𑑄𑐖𑑂𑐫𑐵𑑅𑐥𑐶𑑄 𑐣𑐾𑐥𑐵𑑅𑐩𑐶𑐟𑐫𑑂𑐳𑑄 𑐣𑐾𑐥𑐵𑐮𑐫𑑂 𑐔𑑂𑐰𑑄𑐥𑐶𑑄 𑐰 𑐰𑐶𑐡𑐾𑐱𑐫𑑂 𑐔𑑂𑐰𑑄𑐥𑐶𑑄 𑐩𑐣𑐹𑐟 𑐣𑐵𑐥 𑐳𑐴𑐮𑐴 𑐫𑐵𑐫𑐾𑐐𑐸 𑐖𑑂𑐫𑐵 𑐤𑑂𑐫𑐵𑐎𑐵𑐡𑐶𑐮 𑑋 𑐳𑐣𑑂 𑑒𑑐𑑐𑑐 𑐬𑐶𑐏𑐾 𑐴𑐾 𑐖𑐶𑐣𑐵𑐥𑑄 𑐣𑑄 𑐏𑑃𑑄𑐫𑑂 𑐟𑑂𑐬𑐶𑐨𑐸𑐰𑐣 𑐟𑐸𑐮𑐵𑐢𑐬𑐖𑐸𑑄 𑐃𑐩𑐾𑐮𑑄 𑐳𑑂𑐰𑐵𑐥𑐹 𑐟𑐫𑐵𑑅 𑐀𑐣𑑂𑐟𑐬𑑂‍𑐬𑐵𑐲𑑂𑐚𑑂𑐬𑐶𑐫 𑐣𑐾𑐰𑐵𑑅 𑐳𑐩𑑂𑐩𑐾𑐮𑐣 𑐫𑐵𑐫𑐾𑐐𑐸 𑐏𑑃𑐫 𑐕𑐸𑑄 𑐕𑐸𑑄 𑐳𑐴𑐮𑐴𑐫𑐵 𑐖𑑂𑐫𑐵 𑐫𑐵𑐣𑐵𑐡𑐷𑐐𑐸 𑐏𑑅 𑑋 𑐟𑐬 𑐰𑐫𑑂𑐎𑑅𑐥𑐶𑐣𑐶𑐐𑐸 𑐄𑐐𑐸 𑐎𑐸𑐟𑐮𑑄 𑐄𑐧𑐮𑐫𑑂 𑐳𑐵𑐎𑐵𑐬 𑐬𑐹𑐥 𑐎𑐫𑐵𑑅 𑐤𑑂𑐫𑐖𑑂𑐫𑐵𑐫𑐾 𑐩𑐦𑐸𑐟 𑑋 𑐮𑐶𑐥𑐵 𑐴𑐵𑐎𑐣𑑄 𑐳𑐣𑑂 𑑒𑑐𑑐𑑕 𑐬𑐶𑐏𑐾 𑐣𑐾𑐥𑐵𑑅𑐫𑐵 𑐩𑐴𑐾𑐱𑑂𑐰𑐬 𑐱𑑂𑐬𑐾𑐲𑑂𑐛𑐖𑐸𑑄 𑐣𑐾𑐰𑐵𑑅𑐟𑐫𑑂 𑐡𑐠𑐸𑐂 𑐤𑑂𑐫𑐖𑑂𑐫𑐵𑐎𑐵𑐡𑐷𑐐𑐸 𑐳𑐵𑐩𑐵𑐖𑐶𑐎 𑐳𑐘𑑂𑐖𑐵𑐮 𑐣𑐾𑐳𑑀𑐎𑐵 𑐃𑐩𑐾𑐮 𑐬𑐸𑐥, 𑐀𑐠𑐾𑐴𑐾 𑐠𑐷𑐠𑐷 𑐚𑐾𑐮𑐶 𑐎𑐣𑑂𑐦𑐬𑐾𑐣𑑂𑐳 𑐰 𑐳𑑂𑐎𑐵𑐂𑐥 𑐎𑐣𑑂𑐦𑐬𑐾𑐣𑑂𑐳𑐫𑐵 𑐩𑐵𑐢𑑂𑐫𑐩𑑄 𑐴𑐮𑐶𑐩𑐫𑑂 𑐣𑑂𑐫𑑄𑐎𑐫𑐵 𑐣𑐾𑐰𑐵𑑅𑐟𑐫𑑂 𑐡𑐠𑐸𑐂 𑐣𑐾𑐰𑐵𑑅𑐟𑐫𑑂𑐐𑐸 𑐕𑐐𑐹 𑐰𑐶𑐱𑑂𑐰 𑐳𑑄𑐐𑐛𑐣 𑐩𑐵𑑅𑐐𑐸 𑐏𑑃𑑄𑐫𑑂 𑐳𑐴𑐮𑐴 𑐧𑑂𑐫𑐵𑐎𑐾𑐐𑐸 𑐖𑑂𑐫𑐵 𑐤𑑂𑐫𑐖𑑂𑐫𑐵𑐣𑐵 𑐰𑐣 𑑋

𑐣𑐾𑐥𑐵𑐮𑐫𑑂 𑐴𑐾 𑐣𑑄 𑐩𑐴𑐾𑐱𑑂𑐰𑐬 𑐱𑑂𑐬𑐾𑐲𑑂𑐛, 𑐀𑐬𑑂‍𑐠 𑐟𑐸𑐮𑐵𑐢𑐬, 𑐣𑐬𑐾𑐱 𑐱𑐵𑐎𑑂𑐫 𑐨𑐵𑐖𑐸𑐥𑐶𑑄 𑐣𑑄 𑐠𑑅𑐥𑐶𑐣𑐶𑐐𑐸 𑐎𑐠𑑄 𑐖𑑂𑐫𑐵𑐏𑑃𑐟 𑐤𑑂𑐫𑐵𑐎𑐵𑐡𑐶𑐮 𑑋 𑐠𑐸𑐎𑐠𑑄 𑐴𑐾 𑐮𑐶𑐥𑐵 𑑒𑑐𑑑𑑐 𑐳𑐣𑑂𑐫𑐵 𑑒𑑑 𑐀𑐐𑐲𑑂𑐚 𑐎𑐸𑐤𑐸𑐫𑐵 𑐕𑐐𑐹 𑐩𑐸𑑃𑐖𑑂𑐫𑐵𑑄 𑐨𑐵𑐖𑐸 𑐡𑐫𑐵𑐬𑐟𑑂𑐣 𑐱𑐵𑐎𑑂𑐫𑐫𑐵𑐟 𑐰𑐮𑑂𑐬𑑂‍𑐜 𑐣𑐾𑐰𑐵𑑅 𑐀𑐬𑑂‍𑐐𑐣𑐵𑐂𑐖𑐾𑐱𑐣 (𑐴𑐮𑐶𑑄 𑐣𑐾𑐰𑐵𑑅 𑐡𑐧𑐹)𑐫𑐵 𑐳𑑄𑐫𑑀𑐖𑐎 𑐡𑐫𑐾𑐎𑐵𑑅 𑐟𑐡𑐬𑑂‍𑐠 𑐳𑐩𑐶𑐟𑐶 𑐣𑐷𑐳𑑂𑐰𑐣𑐾𑐐𑐸 𑐖𑑂𑐫𑐵 𑐖𑐸𑐮 𑑋 𑐠𑑂𑐰𑐫𑐵 𑐮𑐶𑐔𑑂𑐰𑑅 𑑒𑑐𑑑𑑑 𑐫𑐵 𑐀𑐎𑑂𑐚𑑀𑐰𑐬 𑑒𑑙, 𑑓𑑐 𑐰 𑑓𑑑 𑐳 𑐣𑐾𑐥𑐵𑐮 𑐳𑑄𑐰𑐟𑑂 𑑑𑑑𑑓𑑒 𑐫𑐵 𑐤𑐹𑐡𑑃𑐬𑐶𑐏𑐾 𑐳𑑂𑐰𑐤𑐸𑐫𑑄𑐎𑑄 𑐥𑐵𑐳𑐵 𑐥𑐸𑐔𑑅 𑐐𑐸𑐠𑐶 𑐫𑐸𑐎𑐾𑐫𑐵 𑐡𑐸𑐐𑑂𑐫𑑄𑐐𑐸 𑐐𑑂𑐰𑐵𑐴𑐵𑐮𑐶𑑄 𑐮𑐞𑑂𑐜𑐣𑐫𑑂 𑐤𑐵𑐥𑐵𑑄𑐐𑐸 𑐀𑐢𑐶𑐰𑐾𑐳𑐣 𑐟𑑅𑐖𑐶𑐎 𑐖𑐸𑐮 𑑋 𑐴𑐣𑐾𑐧𑐴𑐪 𑐱𑐟𑐵𑐧𑑂𑐡𑐶𑐥𑐸𑐬𑐸𑐲 𑐳𑐟𑑂𑐫𑐩𑑀𑐴𑐣 𑐖𑑀𑐱𑐷𑐫𑐵 𑐩𑐹𑐥𑐵𑐴𑐵𑑄𑐳𑐸𑐂 𑐖𑐹𑐐𑐸 𑐰𑐮𑑂𑐬𑑂‍𑐜 𑐣𑐾𑐰𑐵𑑅 𑐀𑐬𑑂‍𑐐𑐣𑐵𑐂𑐖𑐾𑐱𑐣𑐫𑐵 𑐠𑐸𑐐𑐸 𑐤𑐵𑐥𑐵𑑄𑐐𑐸 𑐀𑐢𑐶𑐰𑐾𑐳𑐣𑑄 𑐩𑐣𑐫𑑂 𑐩𑐟𑐫𑐵 𑐎𑐠𑑄 𑐖𑐶 𑐠𑐪𑑄 𑐴𑐾 𑐣𑐵𑐫𑑀𑐫𑐵 𑐨𑐵𑐮𑐵 𑐎𑐵𑐫𑐾 𑐩𑐵𑐮𑐵𑐰𑐣 𑑋

𑐰𑐶𑐢𑐵𑐣 𑐎𑐠𑑄 𑐳𑑂𑐰𑐡𑑃𑐫𑑂 𑐕𑐎𑑅 𑐀𑐢𑐶𑐰𑐾𑐳𑐣 𑐫𑐵𑐫𑐾𑐩𑐵𑑅𑐐𑐸 𑐏𑑅 𑑋 𑐣𑐶𑐎𑑀𑐐𑐸 𑐀𑐢𑐶𑐰𑐾𑐳𑐣 𑐣𑐾𑐥𑐵𑐮𑐫𑑂 𑐂𑐮𑐫𑑂 𑐴𑐾 𑐫𑐵𑐫𑐾 𑐎𑐠𑑄 𑐳𑐎𑐟𑐵𑑄 𑐟𑐫𑐵𑐬𑐷 𑐣𑑄 𑐤𑑂𑐫𑐖𑑂𑐫𑐵𑑅𑐐𑐸 𑐏 𑑋 𑐟𑐬 𑐣𑐾𑐥𑐵𑑅𑐫𑐵 𑐬𑐵𑐖𑐣𑐷𑐟𑐶𑐎 𑐀𑐰𑐳𑑂𑐠𑐵 𑐰 𑐰𑐫𑐵𑑄 𑐮𑐶𑐥𑐵 𑐟𑑅𑐨𑐸𑐏𑐵𑐔𑑄 𑐴𑑅𑐐𑐸 𑐡𑐸𑑅𑐏𑐡𑑂 𑐥𑐬𑐶𑐳𑑂𑐠𑐶𑐟𑐶𑑄 𑐫𑐵𑐣𑐵𑑅 𑐀𑐩𑐾𑐬𑐶𑐎𑐵𑐫𑐵 𑐩𑐾𑐬𑐶𑐮𑐵𑐫𑐞𑑂𑐜 𑐧𑐵𑐮𑑂𑐚𑐶𑐩𑑀𑐬𑐫𑑂 𑐣𑑂𑐫𑐵𑐫𑐾𑐎𑐾𑐐𑐸 𑐎𑑂𑐰𑑅𑐖𑐶𑐟 𑑋 𑐰𑐮𑑂𑐬𑑂‍𑐜 𑐣𑐾𑐰𑐵𑑅 𑐀𑐬𑑂‍𑐐𑐣𑐵𑐂𑐖𑐾𑐱𑐣𑐫𑐵 𑐀𑐩𑐾𑐬𑐶𑐎𑐵 𑐔𑑂𑐫𑐵𑐥𑑂𑐟𑐬 𑐀𑐮𑐾 𑐧𑐶𑐱𑐾𑐲 𑐫𑐵𑐣𑐵𑑅 𑐣𑐾𑐥𑐵𑑅 𑐥𑐵𑐳𑐵 𑐥𑐸𑐔𑑅 𑐀𑐩𑐾𑐬𑐶𑐎𑐵𑐫𑑂 𑐰 𑐣𑐾𑐰𑐵𑑅 𑐀𑐬𑑂‍𑐐𑐣𑐵𑐂𑐖𑐾𑐱𑐣 𑐀𑐦 𑐀𑐩𑐾𑐬𑐶𑐎𑐵 𑐠𑐾𑑄𑐖𑑂𑐫𑐵𑑅𑐐𑐸 𑐣𑐶𑐐𑐹 𑐥𑐸𑐮𑐵𑑄𑐐𑐸 𑐣𑐾𑐰𑐵𑑅 𑐳𑑄𑐳𑑂𑐠𑐵𑐟𑐫𑑂𑐐𑐸 𑐰𑑂𑐫𑐰𑐳𑑂𑐠𑐵𑐥𑐣𑐫𑑂 𑐀𑐩𑐾𑐬𑐶𑐎𑐵𑐫𑐵 𑐩𑐾𑐬𑐶𑐮𑐿𑐣𑑂𑐜𑐫𑐵 𑐧𑐵𑐮𑑂𑐟𑐶𑐩𑑀𑐬𑐫 𑐳𑐣𑑂 𑑒𑑐𑑑𑑖 𑐩𑐵𑐬𑑂‍𑐔𑐫𑐵 𑑒𑑕, 𑑒𑑖 𑐰 𑑒𑑗 𑐟𑐵𑐬𑐶𑐏𑐫𑑂 𑐟𑑅𑐖𑐶𑐎 𑐎𑑂𑐰𑐔𑐵𑑅𑐐𑐸 𑐖𑐸𑐮 𑑋 𑐄𑐐𑐸 𑐳𑐩𑑂𑐩𑐾𑐮𑐣𑑄 𑐨𑐵𑐖𑐸 𑐳𑐶𑐖𑐣 𑐱𑑂𑐬𑐾𑐲𑑂𑐛𑐫𑐵 𑐣𑐾𑐟𑐺𑐟𑑂𑐰𑐫𑑂 𑐤𑐹𑐐𑐸 𑐖𑑂𑐫𑐵𑐳𑐣𑐵 𑐥𑐸𑐔𑑅 𑐳𑑂𑐰𑐣𑐾𑐐𑐸 𑐖𑑂𑐫𑐵 𑐖𑐸𑐮 𑑋 𑐮𑐫𑐟𑐵𑐫𑐵 𑐏𑑃, 𑐳𑑂𑐰𑐎𑑅𑐐𑐸 𑐀𑐢𑐶𑐰𑐾𑐳𑐣 𑐠𑐸𑐥𑐵𑐮𑐫𑑂 𑐣𑐾𑐥𑐵𑐮𑐫𑑂 𑐴𑐾 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋

𑐜𑐧𑑂𑐮𑐸𑐊𑐣𑐌 𑐰𑐫𑐾𑐢𑐸𑑄𑐎𑐵𑑅𑐫𑐵 𑐴𑐶𑐄𑐥𑐵𑑅
𑐜𑐧𑑂𑐮𑐸𑐊𑐣𑐌𑐫𑐵 𑐣𑐷𑐳𑑂𑐰𑐣𑐵 𑐮𑐶𑐥𑐵 𑐣𑐾𑐥𑐵𑑅 𑐡𑐸𑐣𑐾 𑐰 𑐣𑐾𑐥𑐵𑐮𑑄 𑐥𑐶𑐣𑐾 𑐣𑑄 𑐣𑐾𑐰𑐵𑑅 𑐐𑐟𑐶𑐰𑐶𑐢𑐶𑐂 𑐁𑐥𑐵𑑅 𑐴𑐾 𑐄𑐟𑑂𑐳𑐵𑐴 𑐟𑐣𑐾𑐐𑐸 𑐖𑑂𑐫𑐵 𑐖𑐹𑐐𑐸 𑐩𑐴𑐳𑐸𑐳 𑐁𑐥𑐵𑑅𑐳𑑂𑐫𑐵𑑄 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐰𑐶𑐱𑐾𑐲 𑐫𑐵𑐣𑐵𑑅 𑐣𑐾𑐰𑐵𑑅 𑐀𑐢𑐶𑐎𑐵𑐬𑐫𑐵 𑐏𑑃𑐫𑑂 𑐳𑐔𑐾𑐟𑐣𑐵 𑐠𑐣𑐾𑐐𑐸𑐮𑐷 𑐣𑐾𑐥𑐵𑐮𑑄 𑐥𑐶𑐣𑐾 𑐴𑐮𑐶𑑄 𑐣𑐾𑐰𑐵𑑅 𑐡𑐧𑐸𑐮𑐶𑑄 𑐫𑐎𑑂𑐰 𑐴𑐾 𑐨𑐹𑐩𑐶𑐎𑐵 𑐪𑐶𑐟𑐹𑐐𑐸 𑐡𑐸 𑑋 𑐰𑐮𑑂𑐬𑑂‍𑐜 𑐣𑐾𑐰𑐵𑑅 𑐀𑐬𑑂‍𑐐𑐣𑐵𑐂𑐖𑐾𑐱𑐣 𑐢𑐵𑐟𑑂𑐠𑐾𑑄 𑐮𑐵 𑐣𑐾𑐥𑐵𑐮𑑄 𑐥𑐶𑐣𑐾 𑐠𑐷𑐠𑐷 𑐡𑐾𑐱𑐫𑑂 𑐠𑑂𑐫𑐣𑐵𑐔𑑂𑐰𑑄𑐥𑐶𑑄 𑐣𑐾𑐰𑐵𑑅𑐟𑐫𑑂𑐐𑐸 𑐩𑑄𑐎𑐵𑑅 𑐳𑑄𑐐𑐛𑐣 𑐏𑑅 𑑋 ‘𑐴𑐮𑐶𑑄 𑐣𑑂𑐫𑑄𑐎𑑄𑐫𑐵 𑐣𑐾𑐰𑐵𑑅 𑐕𑐥𑑂𑐥𑑃 𑐕𑐢𑐷 𑐖𑐸𑐫𑐾𑐣𑐸 𑐗𑐷𑐐𑐸 𑐨𑐵𑐫𑑂, 𑐟𑐖𑐶𑐮𑐖𑐶 𑐰 𑐪𑐳𑐶𑐎𑐵 𑐮𑑂𑐫𑑄𑐎𑐵 𑐟𑐫𑐾𑐣𑐸’ 𑐢𑐫𑐵𑐐𑐸 𑐩𑐹 𑐣𑐵𑐬𑐵 𑐖𑑂𑐰𑐣𑐵 𑐤𑑂𑐫𑐖𑑂𑐫𑐵𑐣𑐵𑐔𑑂𑐰𑑄𑐐𑐸 𑐰𑐮𑑂𑐬𑑂‍𑐜 𑐣𑐾𑐰𑐵𑑅 𑐀𑐬𑑂‍𑐐𑐣𑐵𑐂𑐖𑐾𑐱𑐣𑐫𑐵 𑐩𑐹 𑐖𑑂𑐫𑐵 𑐢𑐫𑐵𑐐𑐸 𑐰𑐶𑐱𑑂𑐰𑐣𑑂𑐫𑑄𑐎𑑄𑐫𑐵 𑐣𑐾𑐰𑐵𑑅𑐟 𑐮𑐶𑐳𑐾 𑐳𑑂𑐰𑐵𑐥𑐹 𑐎𑑂𑐰𑐵𑐟𑐸𑐎𑐵 𑐫𑑄𑐎𑐾𑐐𑐸 𑐰 𑐣𑐾𑐥𑐵𑐮𑐫𑑂 𑐣𑐾𑐰𑐵𑑅𑐟𑐫𑑂 𑐟𑐣𑐵𑐔𑑂𑐰𑑄𑐐𑐸 𑐀𑐢𑐶𑐎𑐵𑐬𑐫𑐵 𑐣𑐶𑐟𑐶𑑄 𑐮𑑂𑐰𑐵𑐣𑐵𑐔𑑂𑐰𑑄𑐥𑐶 𑐗𑐷 𑐣𑐾𑐰𑐵𑑅 𑐡𑐵𑐖𑐸𑐎𑐶𑐖𑐵 𑐟𑑅𑐎𑐾𑐴𑐾𑑄𑐥𑐶𑑄𑐟 𑐟𑐶𑐧𑑅, 𑐧𑐷𑐐𑐸 𑐴𑐥𑐵𑑅 𑐧𑐷𑐐𑐸 𑐰 𑐩𑐵𑑅𑐎𑐠𑑄 𑐐𑑂𑐰𑐵𑐴𑐵𑐮𑐶 𑐫𑐵𑐫𑐾𑐐𑐸 𑐏 𑑋

𑐤𑐵𑐥𑐵 𑐎𑐾𑐰𑐮 𑐣𑐏𑑅𑐔𑐏𑑅 𑐴𑐣𑐾𑐐𑐸 𑐰 𑐨𑑂𑐰𑐫𑑂 𑐣𑑂𑐫𑐵𑐫𑐾𑐎𑐾𑐐𑐸𑐮𑐷 𑐀𑐮𑐾 𑐣𑐾𑐥𑐵𑐮 𑐳𑑄𑐰𑐟𑑂𑐫𑐵 𑐤𑐹𑐡𑑃 𑐴𑐣𑐵𑑅 𑐪𑐥𑐹𑐖𑐵 𑐣𑑂𑐫𑐵𑐫𑐾𑐎𑐾𑐐𑐸𑐮𑐷 𑐴𑐾 𑐣𑐾𑐥𑐵𑐮𑑄 𑐥𑐶𑐣𑐾𑐫𑐵 𑐣𑐾𑐰𑐵𑑅 𑐳𑑄𑐐𑐛𑐣𑐟 𑐁𑐥𑐵𑑅 𑐎𑐾𑐣𑑂𑐡𑑂𑐬𑐶𑐟 𑐖𑐸𑐫𑐵𑐔𑑂𑐰𑑄𑐐𑐸𑐮𑐷 𑐰𑐮𑑂𑐬𑑂‍𑐜 𑐣𑐾𑐰𑐵𑑅 𑐀𑐬𑑂‍𑐐𑐣𑐵𑐂𑐖𑐾𑐱𑐣𑐫𑐵 𑐣𑐷𑐳𑑂𑐰𑐣𑐵𑑄 𑐣𑐾𑐰𑐵𑑅𑐟𑐫𑑂𑐳𑑄 𑐣𑐏𑑅𑐔𑐏𑑅 𑐖𑐎 𑐴𑐣𑐾𑐐𑐸 𑐩𑐫𑐵𑐳𑐾 𑐣𑐾𑐥𑐵𑐮𑐫𑑂 𑐣𑐾𑐰𑐵𑑅𑐟𑐫𑑂𑐟 𑐖𑐸𑐫𑐵𑐔𑑂𑐰𑑄𑐐𑐸 𑐖𑐵𑐟𑐷𑐫 𑐡𑐩𑐣, 𑐗𑐷𑐐𑐸 𑐨𑐵𑐲𑐵𑐫𑐵𑐟 𑐖𑐸𑐫𑐵𑐔𑑂𑐰𑑄𑐐𑐸 𑐡𑐩𑐣𑐫𑐵 𑐧𑐶𑐬𑑀𑐢𑐫𑑂 𑐣𑑄 𑐣𑐾𑐥𑐵𑐮𑑄 𑐥𑐶𑐣𑐾𑐫𑐵 𑐣𑐾𑐰𑐵𑑅𑐟𑐫𑑂𑐳𑑄 𑐳𑑅 𑐟𑐫𑐾𑐩𑐵𑑅 𑐢𑐫𑐵𑐐𑐸 𑐰𑐵𑑅𑐔𑐵𑐫𑐾𑐎𑐵 𑐴𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐣𑐾𑐰𑐵𑑅 𑐀𑐢𑐶𑐎𑐵𑐬𑐫𑐵 𑐏𑑃 𑐯𑐵𑐟 𑐎𑐶 𑐴𑐾 𑐠𑑂𑐰 𑐬𑐵𑐖𑐣𑐷𑐟𑐶𑐫𑐵 𑐏𑑃 𑐖𑐸𑐮 𑐢𑐎𑐵𑑅 𑐤𑐵𑐫 𑐎𑐫𑐾𑐎𑐸𑑄𑐎𑐶𑐥𑐶𑑄 𑐁𑑅 𑐣𑑄 𑐄𑐮𑐶𑐴𑑄 𑐡𑐣𑐶 𑑋 𑐣𑐾𑐥𑐵𑐮𑐫𑑂 𑐡𑐸𑐣𑐾 𑐰 𑐥𑐶𑐣𑐾 𑐣𑑄 𑑋 𑐟𑐬 𑐠𑐸𑐠𑐵𑐫𑑂 𑐰𑐫𑐵𑑅 𑐣𑐾𑐰𑐵𑑅𑐟𑐫𑑂𑐳𑑄 𑐠𑑅𑐥𑐶𑐣𑐶𑐐𑐸 𑐀𑐢𑐶𑐎𑐵𑐬𑐫𑐵 𑐣𑐶𑑄𑐟𑐶𑑄 𑐮𑑂𑐰𑐵𑐫𑐾𑐩𑐵𑑅 𑐴𑐵𑐮𑐾𑐩𑐵𑑅 𑐢𑐫𑐵𑐐𑐸 𑐏𑑃 𑐢𑑂𑐰𑐵𑐠𑐸𑐂𑐎𑐵 𑐴𑐫𑐵𑐔𑑂𑐰𑑄𑐐𑐸 𑐡𑐸 𑑋

𑐣𑐾𑐥𑐵𑐫𑐵 𑐤𑐹𑐐𑐸 𑐳𑑄𑐰𑐶𑐢𑐵𑐣𑐫𑐵 𑐩𑐳𑑂𑐫𑑁𑐡𑐵 𑐡𑐫𑐾𑐎𑐵𑑅 𑐳𑐸𑐗𑐵𑐰 𑐦𑑂𑐰𑑄𑐐𑐸 𑐂𑐮𑐫𑑂 𑐣𑐾𑐰𑐵𑑅 𑐴𑐎𑐴𑐶𑐟 𑐰 𑐨𑐵𑐲𑐶𑐎 𑐳𑐩𑐵𑐣 𑐀𑐢𑐶𑐎𑐵𑐬 𑐮𑐐𑐵𑐫𑐟 𑐣𑐾𑐥𑐵𑑅𑐫𑐵 𑐬𑐵𑐖𑐣𑐿𑐟𑐶𑐎 𑐥𑑂𑐬𑐞𑐵𑐮𑐷, 𑐱𑐵𑐳𑐎𑐷𑐫 𑐳𑑂𑐰𑐬𑐸𑐥, 𑐖𑐵𑐟𑐷𑐫 𑐳𑐨𑐵 𑐁𑐡𑐶 𑐦𑐸𑐎𑑂𑐎 𑐏𑑃 𑐡𑐸𑐠𑑂𑐫𑐵𑐎𑐵𑑅 𑐰𑐮𑑂𑐬𑑂‍𑐜 𑐣𑐾𑐰𑐵𑑅 𑐀𑐬𑑂‍𑐐𑐣𑐵𑐂𑐖𑐾𑐱𑐣𑐥𑐵𑐏𑐾𑑄 𑐳𑐸𑐗𑐵𑐰 𑐕𑑂𑐰𑐫𑐵𑐐𑐸 𑐣𑑄 𑐠𑐣 𑐮𑐸𑐩𑑄𑐎𑐾𑐧𑐴 𑐖𑐹 𑑋 𑐟𑐬 𑐡𑐸𑑅𑐏𑐫𑐵 𑐏𑑃,

𑐰𑐮𑑂𑐬𑑂‍𑐜 𑐣𑐾𑐰𑐵𑑅 𑐀𑐬𑑂‍𑐐𑐣𑐵𑐂𑐖𑐾𑐱𑐥𑐵𑐏𑐾𑑄 𑐧𑐶𑐫𑐵𑐐𑐸 𑐕𑐸𑑄 𑐣𑑄 𑐳𑐸𑐗𑐵𑐰 𑐤𑐹 𑐳𑑄𑐰𑐶𑐢𑐵𑐣𑐫𑑂 𑐡𑐸𑐠𑑂𑐫𑐵𑐎𑐾𑐐𑐸 𑐖𑑂𑐫𑐵 𑐩𑐫𑐵𑐟 𑑋
𑐠𑐸𑐠𑐵𑐫𑑂 𑐣𑐾𑐥𑐵𑑅 𑐐𑐵𑐮𑑄 𑐦𑐫𑐵𑑄𑐦𑐫𑐾 𑐩𑐦𑐂 𑐎𑐠𑑄 𑐁𑐥𑑂𑐬𑐰𑐵𑐳𑐷𑐟 𑐡𑐸𑐎𑐫𑐵𑑅 𑐄𑐥𑐟𑑂𑐫𑐎𑐵𑐫𑑂 𑐳𑐵𑐚𑐾𑐮𑐵𑐂𑐚 𑐳𑐶𑐚𑐶 𑐀𑐮𑐾 𑐫𑐾𑑃, 𑐫𑐮 𑐰 𑐏𑑂𑐰𑐥 𑐳𑑂𑐰𑑄𑐐𑐸𑐮𑐶𑑄 𑐱𑐴𑐬𑐟 𑐮𑑂𑐰𑐵𑐎𑐕𑑂𑐫𑐵𑐣𑐵𑑅 𑐩𑐾𑐐𑐵 𑐳𑐶𑐚𑐶 𑐡𑐫𑐾𑐎𑐵𑑅 𑐳𑑂𑐰𑐣𑐶𑐐𑑅𑐫𑐵 𑐖𑐣𑐳𑑄𑐏𑑂𑐫𑐵 𑐕𑐐𑐹 𑐎𑐬𑑀𑐜 𑐳𑑂𑐰𑐫𑐵𑑄 𑐔𑑂𑐰𑐫𑑂 𑐠𑑂𑐫𑑄𑐎𑐾𑐐𑐸 𑐐𑑂𑐰𑐳𑐵𑑅 𑐐𑑂𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐠𑑂𑐰 𑐩𑐾𑐐𑐵 𑐱𑐴𑐬 𑐳𑑂𑐫𑐵𑐚𑐾𑐮𑐵𑐂𑐚 𑐱𑐴𑐬𑐫𑐵 𑐐𑐸𑐬𑐸𑐫𑑀𑐖𑐣𑐵 𑐳𑐵𑐎𑐵𑐬 𑐖𑐸𑐮 𑐢𑐵𑑅𑐳𑐵 𑐁𑐥𑑂𑐬𑐰𑐵𑐳𑐷𑐟 𑐀𑐗 𑐟𑑅𑐢𑑄𑐐𑐸 𑐮𑑂𑐫𑐵𑐏𑐫𑑂 𑐣𑐾𑐥𑐵𑑅 𑐐𑐵𑐮𑐫𑑂 𑐡𑐸𑐴𑐵𑑄 𑐰𑐫𑐵𑑅 𑐠𑐣𑐫𑐵 𑐄𑐧𑑂𑐖𑐵𑐄 𑐨𑐹𑐩𑐶 𑐣𑑄 𑐳𑐏𑐵𑐥 𑐖𑐸𑐫𑐵𑑅 𑐥𑐹𑐬𑐵 𑐴𑐾 𑐎𑐸𑐬𑐸𑐥 𑐎𑑄𑐎𑑂𑐬𑐶𑐚 𑐖𑑄𑐐𑐮𑐫𑑂 𑐥𑐬𑐶𑐞𑐟 𑐖𑐹 𑐰𑐣𑐷 𑑋

𑐁𑑅 𑐟𑐎𑐫𑐵 𑐄𑐥𑐮𑐧𑑂𑐢𑐷 :

𑐰𑐮𑑂𑐬𑑂‍𑐜 𑐣𑐾𑐰𑐵𑑅 𑐀𑐬𑑂‍𑐐𑐣𑐵𑐂𑐖𑐾𑐱𑐣 𑐣𑐶𑐳𑑂𑐰𑐣𑐾 𑐢𑐸𑐣𑐾𑐰𑑄 𑐐𑐣 𑐐𑐣 𑐡𑐾𑐱𑐫𑑂 𑐣𑐾𑐰𑐵𑑅 𑐏𑐮𑑅, 𑐥𑐸𑐔𑑅, 𑐐𑐸𑐠𑐶, 𑐳𑐩𑐵𑐖 𑐰𑐵 𑐤𑑂𑐫𑐵𑐐𑐸 𑐴𑐾 𑐣𑐵𑐩𑐫𑑂 𑐕𑐸𑑄 𑐣𑐾𑐰𑐵𑑅 𑐳𑑄𑐳𑑂𑐠𑐵 𑐡𑐟 𑐢𑐵𑑅𑐳𑐵 𑐄𑐐𑐸 𑐳𑑄𑐳𑑂𑐠𑐵𑐫𑐵𑐟 𑐰𑐮𑑂𑐬𑑂‍𑐜 𑐣𑐾𑐰𑐵𑑅 𑐀𑐬𑑂‍𑐐𑐣𑐵𑐂𑐖𑐾𑐱𑐣𑐫𑐵 𑐡𑐸𑐖𑑅 𑐎𑐠𑑄 𑐡𑐸𑐟𑐶𑐣𑐵 𑐫𑑄𑐎𑐾𑐐𑐸 𑐟𑐵𑑅 𑐗𑐷𑐳𑑄 𑐟𑐫𑐵𑐐𑐸 𑐏𑑅 𑑋 𑐟𑐬 𑐮𑐶𑐥𑐵 𑐠𑐸𑐮𑐶 𑐖𑐎 𑐫𑐵𑐣𑐵𑑄 𑐰𑐮𑑂𑐬𑑂‍𑐜 𑐣𑐾𑐰𑐵𑑅 𑐀𑐬𑑂‍𑐐𑐣𑐵𑐂𑐖𑐾𑐱𑐣𑐫𑐵 𑐄𑐡𑑂𑐡𑐾𑐱𑑂𑐫 𑐎𑐠𑑄 𑐖𑑂𑐫𑐵 𑐳𑐣𑐾𑐟 𑐀𑑅𑐥𑐸𑐂 𑐩𑐏𑐸 𑐢𑐂𑐐𑐸 𑐣𑐶𑐱𑑂𑐎𑐬𑑂‍𑐲 𑐥𑐶𑐡𑑄𑐳𑐾𑐮𑐶𑑄 𑐴𑐬𑐾𑐎 𑐡𑐾𑐱𑐫𑑂 𑐰𑐮𑑂𑐬𑑂‍𑐜 𑐣𑐾𑐰𑐵𑑅 𑐀𑐬𑑂‍𑐐𑐣𑐵𑐂𑐖𑐾𑐱𑐣𑐫𑐵 𑐔𑑂𑐫𑐵𑐥𑑂𑐟𑐬 𑐫𑐵𑐣𑐾 𑐎𑐔𑐵 𑐣𑑄 𑐡𑐫𑐾𑐎𑐵 𑐫𑐣𑐾𑐐𑐸 𑐖𑑂𑐫𑐵 𑐤𑑂𑐫𑐖𑑂𑐫𑐵𑑅𑐰𑑄𑐐𑐸 𑐖𑐸𑐮 𑑋 𑐟𑐬 𑐠𑐸𑐎𑐷 𑐢𑐵𑑅𑐳𑐵 𑐁𑐱𑐵 𑐫𑐵𑐣𑐵 𑐎𑐠𑑄 𑐄𑐥𑐮𑐧𑑂𑐢𑐶 𑐯𑐵𑐟𑐫𑑂 𑐮𑐵𑐎𑐾 𑐦𑐫𑐵𑐦𑑂𑐰𑑄𑐐𑐸 𑐩𑐡𑐸 𑑋 𑐐𑐣 𑐐𑐣 𑐡𑐾𑐱𑐫𑑂 𑐁𑑅𑐟𑐮𑐾𑑄 𑐕𑐸𑑄 𑐣𑐾𑐰𑐵𑑅 𑐳𑑄𑐐𑐛𑐣 𑐩𑐡𑐸 𑐀𑐣 𑐀𑐣 𑐰𑐮𑑂𑐬𑑂‍𑐜 𑐣𑐾𑐰𑐵𑑅 𑐀𑐬𑑂‍𑐐𑐣𑐵𑐂𑐖𑐾𑐱𑐣𑐫𑐵 𑐎𑐔𑐵 𑐡𑐫𑐾𑐎𑐵 𑐰𑐣𑐾𑐟 𑐳𑐩𑐳𑑂𑐫𑐵 𑐩𑑄𑐟 𑑋 𑐟𑐬 𑐐𑐣 𑐐𑐣 𑐤𑐵𑐥𑐵 𑐴𑐾 𑐕𑐸𑑄 𑐣𑐾𑐰𑐵𑑅 𑐳𑑄𑐳𑑂𑐠𑐵𑐟 𑐡𑐫𑐾𑐢𑐸𑑄𑐎𑐮 𑐀𑐖𑑂𑐫𑐵𑑅𑐠𑐵𑐫𑑂 𑐀𑐣𑐫𑐵 𑐣𑐾𑐰𑐵𑑅 𑐳𑑄𑐳𑑂𑐠𑐵𑐟𑐮𑐶𑐳𑐾 𑐳𑐴𑐮𑐴 𑐫𑐵𑐣𑐵𑑅 𑐠𑐰𑑄𑐠𑐰𑐫 𑐕𑐸𑑄 𑐣𑑄 𑐎𑐠𑑄 𑐎𑐔𑐰𑑄 𑐥𑐶𑐩𑐡𑐣𑐷𑐐𑐸 𑐎𑐠𑑄 𑐤𑑂𑐫𑐖𑑂𑐫𑐵𑐫𑐾 𑐦𑐫𑐾𑐎𑐾𑐐𑐸 𑐕𑐐𑐹 𑐴𑐵𑐠𑑂𑐫𑐵 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋

𑐀𑐠𑐾𑐴𑐾 𑐣𑐾𑐥𑐵𑐮𑐫𑑂 𑐁𑐥𑐵𑐮𑑄 𑐣𑐾𑐰𑐵𑑅 𑐳𑑄𑐑 𑐳𑑄𑐳𑑂𑐠𑐵𑐟 𑐡𑐸 𑐰 𑐰𑐮𑑂𑐬𑑂‍𑐜 𑐣𑐾𑐰𑐵𑑅 𑐀𑐬𑑂‍𑐐𑐣𑐵𑐂𑐖𑐾𑐱𑐣 𑐩𑐸𑐮𑐟 𑐣𑐾𑐥𑐵𑐮𑑄 𑐥𑐶𑐣𑐾𑐫𑐵 𑐣𑐾𑐰𑐵𑑅𑐟𑐫𑑂 𑐳𑑄𑐳𑑂𑐠𑐵 𑐎𑐠𑑄 𑐖𑐹𑐐𑐸𑐮𑐶𑑄 𑐣𑐾𑐥𑐵𑑅𑐫𑐵 𑐣𑐾𑐰𑐵𑑅 𑐳𑑄𑐑 𑐳𑑄𑐳𑑂𑐠𑐵𑐟 𑐡𑐸𑐟𑐶𑐣𑐾𑐐𑐸 𑐰𑐵 𑐡𑐸𑐩𑐟𑐶𑐣𑐾𑐐𑐸 𑐢𑐫𑐵𑐐𑐸 𑐳𑐩𑐳𑑂𑐫𑐵 𑐣𑑄 𑐥𑐶𑐡𑑄𑐐𑐸 𑐖𑐸𑐮 𑑋 𑐕𑐮𑐦𑐮 𑐫𑐵𑐫𑐵𑑄 𑐰𑐣𑐵𑑅𑐮𑐶 𑐣𑐾𑐥𑐵𑐮𑐫𑑂 𑐣𑐾𑐥𑐵𑑅 𑐡𑐾𑐣𑑂𑐫𑑄𑐎𑑄𑐫𑐵 𑐣𑐾𑐰𑐵𑑅𑐟𑐫𑑂 𑐠𑐷𑐠𑐷 𑐥𑐸𑐔𑑅, 𑐏𑐮𑑅, 𑐳𑐩𑐵𑐖, 𑐐𑐸𑐠𑐶 𑐁𑐡𑐶𑐂 𑐁𑐧𑐡𑑂𑐢 𑐖𑐸𑐫𑐵𑐔𑑂𑐰𑑄𑐐𑐸 𑐣𑐵𑐥𑑄 𑐠𑑅𑐐𑐸 𑐴𑐾 𑐎𑐔𑐵𑐩𑐔𑐵 𑐠𑑂𑐫𑑄𑐎 𑐣𑑄 𑐡𑐫𑐵𑐔𑑂𑐰𑑄𑐐𑐸 𑐣𑐾𑐰𑐵𑑅𑐟𑐫𑑂 𑐕𑐐𑐹𑐫𑐵𑑄 𑐕𑐐𑐹 𑐖𑐎 𑐬𑐵𑐲𑑂𑐚𑑂𑐬𑐶𑐫 𑐳𑑄𑐐𑐛𑐣 𑐎𑐠𑑄 𑐪𑐳𑐷𑐎𑐵 𑐡𑐸𑐐𑐸 𑐣𑐾𑐰𑐵𑑅 𑐡𑐾𑐫 𑐡𑐧𑐹 𑐮𑐶𑐳𑐾𑑄 𑐖𑐎 𑐳𑑂𑐰𑐵𑐥𑐹 𑐟𑐫𑐵𑑅 𑐳𑐩𑐣𑑂𑐰𑐫 𑐫𑐵𑐣𑐵 𑐰𑐣𑐾𑐐𑐸 𑐎𑑂𑐰𑑅𑐖𑐶𑐟𑐳𑐵 𑐣𑐾𑐰𑐵𑑅 𑐡𑐾𑐫𑑂 𑐡𑐧𑐹𑐫𑐵 𑐴𑐾 𑐣𑑄 𑐐𑑂𑐰𑐵𑐴𑐵𑐮𑐶 𑐎𑐫𑐵𑑅 𑐣𑐾𑐥𑐵𑐮𑐫𑑂 𑐣𑑄 𑐰𑐬𑑂‍𑐮𑑂𑐜 𑐣𑐾𑐰𑐵 𑐀𑐬𑑂‍𑐐𑐣𑐵𑐂𑐖𑐾𑐱𑐣𑐫𑐵 𑐠𑑅𑐐𑐸 𑐴𑐾 𑐔𑑂𑐫𑐵𑐥𑑂𑐟𑐬 𑐡𑐫𑐾𑐎𑐾𑐐𑐸 𑐖𑑂𑐫𑐵 𑐣𑑄 𑐳𑐣𑑂 𑑒𑑐𑑑𑑒 𑐫𑐵 𑐀𑐐𑐳𑑂𑐚𑐫𑑂 𑐖𑐸𑐮 𑑋 𑐣𑐾𑐥𑐵𑐮, 𑐀𑐩𑐾𑐬𑐶𑐎𑐵, 𑐖𑐬𑑂‍𑐩𑐣, 𑐣𑐾𑐡𑐬𑐮𑐿𑐣𑑂𑐡, 𑐖𑐵𑐥𑐵𑐣, 𑐨𑐵𑐬𑐟, 𑐧𑐾𑐮𑐵𑐫𑐟𑐫𑑂 𑐔𑑂𑐫𑐵𑐥𑑂𑐟𑐬 𑐣𑐶𑐳𑑂𑐰𑐣𑐾 𑐖𑑂𑐫𑐵 𑐤𑐵𑐥𑐵 𑐴𑐾 𑐖𑐸𑐫𑐵𑐔𑑂𑐰𑐣𑐾 𑐢𑐸𑑄𑐎𑐮𑐳𑐵 𑐠𑐷𑐠𑐷 𑐀𑐬𑐰𑐷 𑐡𑐾𑐳𑐫𑑂 𑐩𑐢𑑂𑐫𑐥𑐹𑐬𑑂‍𑐰 𑐔𑑂𑐫𑐵𑐥𑑂𑐟𑐬 𑐰 𑐥𑑀𑐬𑑂‍𑐔𑐸𑐐𑐮𑐫𑑂 𑐣𑑄 𑐔𑑂𑐫𑐵𑐥𑑂𑐟𑐬 𑐣𑐶𑐳𑑂𑐰𑐣𑐾 𑐖𑑂𑐫𑐵 𑐖𑐹𑐐𑐸 𑐡𑐸 𑑋 𑐁𑐱𑐵 𑐫𑐵𑐣𑐵 𑐎𑐠𑑄 𑐫𑐎𑑂𑐰 𑐡𑐾𑐳𑐫𑑂 𑐢𑐵𑑅𑐳𑐵 𑐔𑑂𑐫𑐵𑐥𑑂𑐟𑐬𑐟 𑐡𑐫𑐾𑐎𑐾 𑐖𑑂𑐫𑐵 𑐖𑐸𑐂 𑐩𑐦𑐸𑐣𑐶 𑑋

𑐰𑐮𑑂𑐬𑑂‍𑐜 𑐣𑐾𑐰𑐵𑑅 𑐀𑐬𑑂‍𑐐𑐣𑐵𑐂𑐖𑐾𑐱𑐣𑑄 𑐣𑐾𑐰𑐵𑑅 𑐖𑑂𑐫𑐵𑐏𑑃𑐫𑑂 𑐁𑐬𑑂‍𑐠𑐶𑐎𑐬𑐸𑐥𑑄 𑐐𑑂𑐰𑐵𑐴𑐵𑐮𑐶 𑐫𑐵𑐫𑐾𑐐𑐸 𑐰 𑐣𑐾𑐰𑐵𑑅𑐟𑐫𑑂𑐟 𑐁𑐬𑑂‍𑐠𑐶𑐎𑐬𑐸𑐥𑑄 𑐳𑐎𑑂𑐲𑐩 𑐫𑐵𑐫𑐾𑐟 𑐨𑐹𑐩𑐶𑐎𑐵 𑐪𑐶𑐟𑐾𑐐𑐸 𑐣𑑄 𑐠𑑂𑐰𑐫𑐵 𑐕𑐐𑐹 𑐮𑐎𑑂𑐲 𑐏𑑅 𑑋 𑐰𑐮𑑂𑐬𑑂‍𑐜 𑐣𑐾𑐰𑐵𑑅 𑐀𑐬𑑂‍𑐐𑐣𑐵𑐂𑐖𑐾𑐱𑐣𑐥𑐵𑐏𑐾𑑄 𑐣𑐾𑐥𑐵𑑅𑐫𑐵 𑐣𑐾𑐰𑐵𑑅𑐟𑐫𑑂𑐳𑑄 𑐁𑐬𑑂‍𑐠𑐶𑐎𑐬𑐸𑐥𑑄 𑐣𑑄 𑐐𑑂𑐰𑐵𑐴𑐵𑐮𑐶 𑐫𑐵𑐫𑐾𑐟 𑐀𑐣𑐾𑐎𑐣 𑐂𑐣𑐵𑐥 𑐩𑐡𑐶𑐎𑑂𑐎 𑐴𑐾 𑐰𑐫𑐾𑐐𑐸 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐐𑐸𑐎𑐠𑑄 𑐣𑐾𑐥𑐵𑐮𑑄 𑐐𑑂𑐰𑐵𑐴𑐵𑐮𑐶𑐫𑐵 𑐀𑐥𑐾𑐎𑑂𑐲𑐵 𑐰𑐮𑑂𑐬𑑂‍𑐜 𑐣𑐾𑐰𑐵𑑅 𑐀𑐬𑑂‍𑐐𑐣𑐵𑐂𑐖𑐾𑐱𑐣𑐥𑐵𑐏𑐾𑑄 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑐄𑐮𑐶 𑐫𑐵𑐫𑐾 𑐩𑐦𑐫𑐵𑐔𑑂𑐰𑑄𑐐𑐸 𑐢𑐵𑑅𑐳𑐵 𑐫𑐠𑐵𑐬𑑂‍𑐠 𑐏𑑅 𑑋

𑐢𑐵𑐟𑑂𑐠𑐾𑑄𑐮𑐵 𑐠𑐷𑐠𑐷 𑐐𑑂𑐰𑐵𑐴𑐵𑐮𑐶𑐫𑐵 𑐀𑐥𑐾𑐎𑑂𑐲𑐵𑐫𑐵𑐟 𑐕𑐸𑑄 𑐣𑑄 𑐎𑐠𑑄 𑐳𑐩𑑂𑐧𑑀𑐢𑐣 𑐫𑐵𑐫𑐾𑐩𑐵𑑅 𑐢𑐎𑐵𑑅 𑐴𑐾 𑐰𑐮𑑂𑐬𑑂‍𑐜 𑐣𑐾𑐰𑐵𑑅 𑐀𑐬𑑂‍𑐐𑐣𑐵𑐂𑐖𑐾𑐱𑐣𑑄 ‘𑐰𑐮𑑂𑐬𑑂‍𑐜 𑐣𑐾𑐰𑐵𑑅 𑐦𑐣𑑂𑐜’ 𑐡𑐫𑐾𑐎𑐾𑐐𑐸 𑐀𑐰𑐢𑐵𑐬𑐞𑐵 𑐣𑑄 𑐰𑑅𑐐𑐸 𑐏𑑅 𑑋 𑐠𑑂𑐰 𑐖𑑂𑐫𑐵𑐫𑑂 𑐰𑐶𑐱𑐾𑐲𑐟𑑅 𑐰𑐮𑑂𑐬𑑂‍𑐜 𑐣𑐾𑐰𑐵𑑅 𑐀𑐬𑑂‍𑐐𑐣𑐵𑐂𑐖𑐾𑐱𑐣𑐫𑐵 𑐤𑐵𑐥𑐵𑑄𑐫𑐵 𑐣𑑀𑐎𑐸 𑐎𑐺𑐲𑑂𑐞 𑐔𑐏𑐸𑑄 𑐨𑐵𑐖𑐸𑑄 𑐀𑐰𑐢𑐵𑐬𑐞𑐵 𑐥𑐟𑑂𑐬 𑐣𑑄 𑐫𑐎𑑀 𑐤𑑂𑐫𑐰 𑐴𑐾 𑐡𑐫𑐾𑐎𑐵𑐡𑐷𑐐𑐸 𑐏𑑅 𑑋 𑐀𑐮𑐾 𑐰𑑄𑐐𑐸 𑑒𑑐𑑑𑑘 𑐫𑐵 𑐩𑐵𑐬𑑂‍𑐔 𑑒𑑘, 𑑒𑑙, 𑑓𑑐 𑐳 𑐫𑐾𑑃𑐫𑑂 𑐖𑐹𑐐𑐸 𑐴𑐮𑐶𑑄 𑐣𑐾𑐰𑐵𑑅 𑐳𑐩𑑂𑐩𑐾𑐮𑐣𑐫𑑂 𑐍𑐥𑐔𑐵𑐬𑐶𑐎 𑐬𑐸𑐥𑐫 𑐴𑐾 𑐎𑐵𑐬𑑂‍𑐫𑐥𑐟𑑂𑐬 𑐤𑑂𑐫𑐧𑑂𑐰𑐫𑐵𑑅 𑐕𑐸𑑄 𑐨𑐔𑐵 𑐢𑑂𑐫𑐧𑐵 𑐩𑐸𑐣𑐾 𑐖𑑂𑐫𑐵 𑐀𑐣 𑐴𑐾 𑐣𑑄 𑐫𑐵𑐣𑐵𑐡𑐶𑐐𑐸 𑐏𑑅 𑑋 𑐟𑐬 𑐰𑐮𑑂𑐬𑑂‍𑐜 𑐣𑐾𑐰𑐵𑑅 𑐦𑐣𑑂𑐜 𑐎𑑂𑐰𑐵𑐟𑐸𑐎 𑐤𑑂𑐫𑐵𑐫𑐾 𑐦𑐫𑐵𑐔𑑂𑐰𑑄𑐐𑐸 𑐩𑐡𑐸 𑑋 𑐠𑑂𑐰 𑐕𑐐𑐹 𑐣𑑄 𑐁𑑅 𑐴𑐵𑐠𑑂𑐫𑐵𑐫𑐵 𑐬𑐸𑐥𑐫𑑂 𑐡𑐸 𑑋

𑐣𑐾𑐥𑐵𑐮𑑄 𑐡𑐸𑐣𑐾 𑐥𑐶𑐣𑐾 𑐣𑐾𑐰𑐵𑑅 𑐖𑐵𑐟𑐶𑐫𑐵 𑐀𑐰𑐳𑑂𑐠𑐵 :
𑐣𑐾𑐥𑐵𑐮𑑄 𑐥𑐶𑐣𑐾 𑐣𑐾𑐰𑐵𑑅 𑐖𑐵𑐟𑐶𑐫𑐵 𑐮𑑂𑐫𑐵𑑅 𑐟𑐳𑐎𑑄 𑐪𑑀 𑑋 𑐐𑐠𑐾 𑐣𑐾𑐡𑐬𑐮𑐿𑐣𑑂𑐡𑐫𑐵 𑐏𑑃 𑐎𑐵𑐫𑐾, 𑐀𑐣 𑐳𑐕𑐶𑐪𑐫𑐵 𑐮𑑂𑐫𑐵𑐏𑐫 𑐴𑐾 𑐣𑐾𑐰𑐵𑑅𑐟 𑐩𑐡𑐸 𑑋 𑐖𑐬𑑂‍𑐩𑐣 𑐦𑑂𑐬𑐵𑐣𑑂𑐳 𑐟𑐟𑑅𑐢𑑄𑐐𑐸 𑐡𑐾𑐳 𑐖𑐸𑐫𑐵𑑅 𑐣𑑄 𑐀𑐣 𑐣𑐾𑐰𑐵𑑅𑐟𑐫𑑂 𑐮𑑂𑐫𑐵 𑐪𑑀 𑐖𑐎 𑐡𑐸 𑑋 𑐕𑐥𑐸𑐔𑑅 𑐕𑐠𑐵𑐫 𑐩𑐾𑐥𑐸𑐔 𑐩𑐾𑐠𑐵𑐫𑑂 𑐖𑐹𑐐𑐸𑐮𑐶𑑄 𑐳𑑄𑐐𑐛𑐶𑐟 𑐖𑐸𑐂𑐟 𑐣𑑄 𑐠𑐵𑐎𑐸 𑑋 𑐨𑐔𑐵 𑐁𑐥𑐵𑑅 𑐮𑑂𑐫𑐵𑐏𑐫𑑂 𑐣𑐾𑐰𑐵𑑅𑐟 𑐠𑑂𑐫𑐣𑐵𑐔𑑂𑐰𑑄𑐐𑐸 𑐢𑐫𑐵𑐐𑐸 𑐀𑐩𑐾𑐬𑐶𑐎𑐵 𑐰 𑐧𑐾𑐮𑐵𑐫𑐟 𑐀𑐣𑑄 𑐀𑐲𑑂𑐚𑑂𑐬𑐾𑐮𑐶𑐫𑐵 𑐴𑐾 𑐏𑑅 𑑋 𑐀𑐣 𑐣𑑄 𑐳𑐩𑐣𑑂𑐰𑐫 𑐎𑑂𑐰𑐵𑐟𑐸 𑐩𑐖𑐹 𑑋

𑐖𑐶𑑄 𑐣𑐾𑐥𑐵𑐮𑐷𑐟𑐫𑑂 𑐧𑐵𑐬𑐾 𑐀𑐣𑐸𑐳𑐣𑑂𑐢𑐵𑐣 𑐫𑐵𑐣𑐵𑐐𑐸 𑐡𑐾𑐫𑑂 𑐧𑐾𑐮𑐵𑐫𑐟𑐫𑑂 𑐠𑐷𑐠𑐷 𑐖𑐵𑐟𑐶𑐟 𑐕𑐐𑐹 𑐴𑐾 𑐖𑐵𑐟𑐷𑐫 𑐳𑑄𑐐𑐛𑐣𑐫𑑂 𑐁𑐰𑐡𑑂𑐢 𑐖𑐸𑐫𑐵𑑅 𑐩𑐵𑐮𑐷𑐧𑐮𑐫𑑂 𑐩𑐵𑑅𑐎𑐠𑑄 𑐕𑐠𑐵𑐫𑑂 𑐔𑑂𑐰𑐣𑐵𑑅 𑐖𑑂𑐫𑐵 𑐫𑐵𑐫𑐾𑐐𑐸𑐮𑐷 𑐟𑐳𑐎𑑄 𑐟𑐵𑐮𑐵𑐣𑐵𑐔𑑂𑐰𑑄𑐐𑐸 𑐖𑐶𑑄 𑐏𑐣𑐵 𑑋 𑐧𑐾𑐮𑐵𑐫𑐟𑐫𑑂 𑐣𑐾𑐰𑐵𑑅𑐟𑐫𑑂 𑐳𑑄𑐳𑑂𑐠𑐵 𑐥𑐵𑐳𑐵 𑐥𑐸𑐔𑑅 𑐐𑐸𑐠𑐶𑑄 𑐡𑐎𑐮𑐾 𑐤𑐵𑐥𑐵𑑄 𑐢𑐫𑐵𑐠𑐾𑑄 𑐣𑐾𑐰𑐵𑑅 𑐕𑐾𑑃 𑐢𑐳𑑂𑐰𑐵𑐎𑐾𑐐𑐸 𑐢𑐎𑐵𑑅 𑐑𑑀𑐲𑐞𑐵 𑐫𑐵𑐟 𑑋 𑐟𑐬 𑐁𑑅 𑐟𑐎 𑐟𑐵𑑅𑐩𑐮𑐵𑑅𑐣𑐶 𑑋 𑐮𑐶𑐥𑐵 𑐮𑐶𑐥𑐵 𑐖𑐎 𑐳𑑄𑐐𑐛𑐣 𑐡𑐫𑐾𑐎𑐹𑐥𑐶𑑄 𑐐𑐸𑐬𑐸𑑄𑐐 (𑐟𑐩𑐸), 𑐩𑐐𑐬, 𑐬𑐵𑐃𑐟𑐫𑑂𑐳𑑄 𑐠𑑅𑐥𑐶𑐣𑐶𑐐𑐸 𑐳𑑄𑐐𑐛𑐣𑐫𑐵 𑐣𑐵𑐩𑐫 𑐕𑐾𑑃 𑐡𑐫𑐾𑐎𑐾 𑐢𑐸𑑄𑐎𑐸𑐐𑐸 𑐡𑐸 𑑋

𑐳𑑄𑐳𑑂𑐎𑐺𑐟𑐶 𑐰𑐶𑐳𑑂𑐟𑐵𑐬 𑐖𑐸𑐮 𑐨𑐵𑐲𑐵 𑐩𑐖𑐸𑐮 :

𑐣𑐏𑑅𑐔𑐏𑑅 𑐴𑐣𑐾𑐐𑐸, 𑐢𑐬𑑂‍𑐩𑐎𑐬𑑂‍𑐩 𑐫𑐵𑐫𑐾𑐐𑐸, 𑐖𑐵𑐟𑑂𑐬𑐵 𑐥𑐬𑑂‍𑐰 𑐣𑑂𑐫𑐵𑐫𑐾𑐎𑐾𑐐𑐸, 𑐨𑑂𑐰𑐫𑑂 𑐣𑐫𑐾𑐐𑐸 𑐰 𑐎𑐮𑐵 𑐳𑐳𑑂𑐎𑐺𑐟𑐶𑐫𑐵 𑐏𑑃𑐫 𑐣𑐾𑐰𑐵𑑅𑐟 𑐣𑐾𑐥𑐵𑐮𑐫𑑂 𑐠𑐾𑑄 𑐴𑐾 𑐣𑐾𑐥𑐵𑐮𑑄 𑐥𑐶𑐣𑐾 𑐣𑑄 𑐕𑐥𑐮𑐵𑑅 𑐤𑑂𑐫𑑀𑐣𑐾 𑐴𑐾 𑐮𑐵𑑅 𑑋 𑐣𑐾𑐥𑐵𑐮𑑄 𑐥𑐶𑐣𑐾𑐫𑐵 𑐣𑐾𑐰𑐵𑑅 𑐳𑑄𑐑, 𑐳𑑄𑐳𑑂𑐠𑐵𑐟𑐫𑑂𑐳𑑄 𑐣𑐾𑐥𑐵𑐮 𑐳𑑄𑐰𑐟𑐫𑐵 𑐤𑐹𑐡𑑃 𑐴𑐣𑐾𑐐𑐸, 𑐳𑐵𑐩𑐸𑐴𑐶𑐎 𑐪𑐥𑐸𑐖𑐵 𑐣𑑂𑐫𑐵𑐫𑐾𑐎𑐾𑐐𑐸, 𑐮𑐵𑐏𑐾 𑐥𑑂𑐫𑐵𑐏𑑄 𑐴𑐸𑐂𑐎𑐾𑐐𑐸 𑐮𑐶𑐳𑐾𑑄 𑐠𑐷𑐠𑐷 𑐣𑐾𑐰𑐵𑑅 𑐣𑐏𑐔𑐏 𑐴𑐣𑐾𑐐𑐸, 𑐣𑐾𑐰𑐵𑑅 𑐨𑑀𑐫 𑐣𑑂𑐫𑐵𑐫𑐾𑐎𑐾𑐐𑐸 𑐮𑐶𑐳𑐾𑑄 𑐩𑐶𑐳𑐵 𑐩𑐔𑐵𑐟𑐫𑐟 𑐂𑐴𑐶 𑐫𑐵𑐫𑐾𑐐𑐸, 𑐧𑐵𑐬𑐵 𑐟𑐫𑐾𑐐𑐸 𑐰 𑐩𑐶𑐖𑑄 𑐩𑐔𑐵𑐟𑐫𑐟 𑐎𑐫𑐟𑐵 𑐥𑐹𑐖𑐵 𑐫𑐵𑐫𑐾𑐐𑐸 𑐣𑐵𑐥𑑄, 𑐳𑐟𑑂𑐫𑐣𑐵𑐬𑐵𑐫𑐞 𑐢𑐮𑑄 𑐡𑐣𑐾𑐐𑐸, 𑐳𑑂𑐰𑐳𑑂𑐠𑐵𑐣𑐷 𑐢𑐮𑑄 𑐡𑐣𑐾𑐐𑐸, 𑐡𑑂𑐫𑐥𑐶𑑄𑐟 𑐥𑐸𑐖𑐵𑐁𑐖𑐵 𑐫𑐵𑐫𑐾𑐐𑐸 𑐁𑐡𑐶 𑐠𑐾𑑄 𑐀𑐣𑐾𑐎𑐣 𑐢𑐵𑐬𑑂‍𑐩𑐶𑐎 𑐰 𑐳𑐵𑐩𑐵𑐖𑐶𑐎 𑐖𑑂𑐫𑐵𑐏𑑄𑐟 𑐫𑐵𑐣𑐵𑑅 𑐣𑐾𑐰𑐵𑑅 𑐟𑐖𑐶𑐮𑐖𑐶 𑐮𑑂𑐫𑑄𑐎𑐵 𑐟𑑅𑐐𑐸 𑐡𑐸 𑑋

𑐰𑑄𑐐𑐸 𑐕𑐸𑑄 𑐡𑑃 𑐠𑐸𑐏𑐾 𑐎𑐸𑐩𑐵𑐬𑐷 𑐟𑐫𑐵𑑅 𑐏𑑅 𑐳𑐵𑐮𑐾𑐐𑐸, 𑐥𑐸𑐮𑐸𑐎𑐶𑐳𑐶 𑐥𑑂𑐫𑐵𑐏𑑄 𑐴𑐸𑐂𑐎𑐾𑐐𑐸, 𑐳𑐵𑐫𑐵𑑅 𑐥𑐶𑐠𑐣𑐾𑐐𑐸, 𑐩𑐵𑐢𑐰 𑐣𑐵𑐬𑐵𑐫𑐞𑐫𑐵 𑐢𑐮𑑄 𑐡𑑄𑐎𑐾𑐐𑐸 𑐖𑑂𑐫𑐵 𑐣𑑄 𑐫𑐵𑐣𑐵 𑐴𑐫𑐵𑐔𑑂𑐰𑑄𑐐𑐸 𑐏𑐣𑐾𑐡𑐸 𑑋 𑐣𑐾𑐥𑐵𑐮𑑄 𑐥𑐶𑐣𑐾 𑐣𑑄 𑐣𑐾𑐰𑐵𑑅𑐟𑐫𑑂𑐳𑑄 𑐠𑐠𑐾 𑐠𑐥𑐶𑐣𑐶𑐐𑐸 𑐳𑑄𑐳𑑂𑐎𑐺𑐟𑐶 𑐳𑑄𑐳𑑂𑐎𑐵𑐬 𑐴𑐣𑐵 𑐰𑐫𑐵𑐔𑑀𑑄𑐐𑐸 𑐏𑑄𑐫 𑐣𑐾𑐰𑐵𑑅𑐟𑐫𑐳𑑄 𑐐𑑁𑐬𑐰 𑐴𑐾 𑐟𑐵𑐫𑐾𑐩𑐵𑑅 𑑋 𑐟𑐬 𑐡𑐸𑑅𑐏𑐫𑐵 𑐏𑑄𑑃 𑐬𑐵𑐖𑑂𑐫𑐫𑐵 𑐥𑐎𑑂𑐲𑐥𑐵𑐟𑐥𑐹𑐬𑑂‍𑐞 𑐣𑐷𑐟𑐶𑐫𑐵 𑐎𑐵𑐬𑐞𑑄 𑐣𑐾𑐰𑐵𑑅𑐟𑐫𑑂𑐟 𑐠𑑅𑐐𑐸 𑐠𑐵𑐳𑑄 𑐰𑐶𑐳𑑂𑐠𑐵𑐥𑐶𑐟 𑐫𑐵𑐣𑐵 𑐫𑑄𑐎𑐵𑐔𑑂𑐰𑑄𑐐𑐸 𑐡𑐸𑐳𑐵 𑐣𑐾𑐰𑐵𑑅𑐟𑐫𑐳𑑄 𑐣𑑄 𑐠𑑅𑐥𑐶𑐣𑐶𑐐𑐸 𑐩𑐵𑑄𑐨𑐵𑐫𑑂 𑐯𑐵𑐫𑐾𑐐𑐸 𑐟𑑂𑐰𑑅𑐟𑐵 𑐫𑑄𑐎𑐵𑐔𑑀𑑄𑐐𑐸 𑐡𑐸 𑑋

𑐣𑐾𑐥𑐵𑐮𑐫 𑐠𑐾𑑄 𑐳𑐬𑐎𑐵𑐬𑑄 𑐰𑐵 𑐳𑑂𑐎𑐸𑐮𑑄 𑐎𑐬𑑄 𑐎𑑂𑐫𑑄𑐎𑐵𑐔𑐵𑑄𑐐𑐸 𑐩𑐡𑐸𑐳𑐵𑑄 𑐣𑐾𑐥𑐵𑐮𑑄 𑐥𑐶𑐣𑐾 𑐰𑐫𑐵𑑅 𑐀𑐩𑐾𑐬𑐶𑐎𑐵 𑐧𑐾𑐮𑐵𑐫𑐟 𑐠𑐸𑐖𑐵𑐐𑐸 𑐡𑐾𑐳𑐫 𑐔𑑂𑐰𑐣𑐵𑑅 𑐣𑑄 𑐐𑐸𑐮𑐶𑑄 𑐣𑐾𑐰𑐵𑑅𑐟𑐫𑑂𑐳𑑄 𑐠𑑅 𑐩𑐳𑑂𑐟𑐫𑑂𑐟 𑐏𑐫𑑂 𑐨𑐵𑐫𑑂 𑐯𑐵𑐫𑐾𑐐𑐸 𑐯𑐵𑐎𑐾𑐐𑐸 𑐟𑐬 𑐣𑐾𑐰𑐵𑑅 𑐨𑐵𑐫 𑐩𑐯𑐵𑐫𑐾𑐐𑐸 𑐫𑐵𑐣𑐵𑐔𑑂𑐰𑑄𑐐𑐸 𑐢𑐵𑑅𑐳𑐵 𑐠𑐸𑐂𑐎𑐵𑑄 𑐠𑐸𑐂𑐎𑐾 𑐩𑐦𑐂𑐐𑐸 𑐏𑑃 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐠𑑂𑐰 𑐏𑑃𑐫𑑂 𑐰𑐮𑑂𑐬𑑂‍𑐜 𑐣𑐾𑐰𑐵𑑅 𑐀𑐬𑑂‍𑐐𑐣𑐵𑐂𑐖𑐾𑐱𑐣𑑄 𑐣𑐾𑐰𑐵𑑅𑐟𑐫𑑂 𑐖𑐵𑐟𑐷𑐫 𑐰 𑐨𑐵𑐲𑐷𑐫 𑐀𑐢𑐶𑐎𑐵𑐬𑐫𑐵 𑐣𑐶𑑄𑐟𑐶𑑄 𑐳𑑅 𑐟𑐫𑐾𑐟 𑐴𑐮𑐶𑑄𑐣𑑂𑐫𑑄𑐎𑑄𑐫𑐵 𑐣𑐾𑐰𑐵𑑅𑐟𑐫𑑂𑐟 𑐑𑑂𑐰𑐵𑐫𑐾𑐩𑐵𑑅𑐐𑐸 𑐏𑐣𑐾𑐡𑐸 𑑋
(𑐏𑑃𑐯𑐵𑐧𑐯𑐵𑐫𑐵 𑐮𑐶𑐢𑑄𑐳𑐵𑐫𑑂)