𑐮𑑂𑐰𑐴𑑄𑐥𑑁 𑐀𑐨𑐶𑐮𑑂𑐮𑐾𑐏𑐫𑐵 𑐰𑐶𑐲𑐫𑐧𑐳𑑂𑐟𑐸

𑐣𑑂𑐴𑑂𑐫𑐧𑑂𑐰𑑅𑐩𑑂𑐴𑑅 𑐧𑐖𑑂𑐬𑐩𑐸𑐣𑐶 𑐧𑐖𑑂𑐬𑐵𑐔𑐵𑐬𑑂𑐫

𑐔𑐷𑐣 𑐳𑑄𑐫𑑂‌ 𑐨𑐵𑐫𑐾𑐫𑐵 𑐣𑑂𑐫𑐵𑐳𑑅𑐐𑐹 𑐨𑐵𑐲𑐵 𑐨𑐵𑐲𑐶𑐎𑐵𑐩𑐢𑑂𑐫𑐾 𑐠𑑅𑐐𑐸 𑐴𑐾 𑐮𑐶𑐏𑐶𑐟 𑐥𑐬𑐩𑑂𑐥𑐬𑐵 𑐡𑐸𑐐𑐸 𑐣𑑂𑐫𑐵𑐐𑐹𑐐𑐸 𑐠𑐵𑐫𑑂𑐫𑐵 𑐨𑐵𑐲𑐵 𑐎𑐠𑑄 𑐣𑐾𑐥𑐵𑐮𑐨𑐵𑐲𑐵𑐫𑐵𑐟 𑐎𑐫𑐵𑐟𑑅𑐐𑐸 𑐡𑐸 𑑋 𑐩𑐮𑑂𑐮 𑐖𑐸𑐖𑐸𑐥𑐶𑐣𑑂𑐳𑑄 𑐣𑐾𑐥𑐵𑐮 𑐩𑐞𑑂𑐜𑐮 𑐡𑐸𑐣𑐾 𑐱𑐵𑐳𑐣 𑐣𑑂𑐴𑑂𑐫𑐵𑐎𑐾 𑐣𑑂𑐴𑑂𑐫𑑀 𑐐𑑀𑐥𑐵𑐮, 𑐩𑐴𑐶𑐲𑐥𑐵𑐮, 𑐎𑐶𑐬𑐵𑑃𑐟, 𑐮𑐶𑐔𑑂𑐕𑐰𑐷𑐟𑐫𑐾𑐳𑑄 𑐱𑐵𑐳𑐣 𑐣𑑂𑐴𑐫𑐵𑐎𑐾 𑐢𑐸𑑄𑐎𑐹𑐐𑐸 𑐏𑑃 𑐐𑑀𑐥𑐵𑐮𑐬𑐵𑐖 𑐰𑑄𑐱𑐵𑐰𑐮𑐷𑐳𑑄 𑐣𑑂𑐴𑑂𑐫𑐧𑑂𑐰𑐫𑐵 𑐟𑑅𑐐𑐸 𑐡𑐸 𑑋 𑐠𑐸𑐐𑐸 𑐩𑐮𑑂𑐮 𑐱𑐵𑐳𑐣 𑐳𑑂𑐰𑐫𑐵𑑄 𑐣𑑂𑐴𑑂𑐫𑑀 𑐣𑐾𑐥𑐵𑐮𑐩𑐞𑑂𑐜𑐮𑐫𑑂‌ 𑐬𑐵𑐖𑐨𑐵𑐲𑐵 𑐎𑐠𑑄 𑐳𑑄𑐳𑑂𑐎𑐺𑐟 𑐨𑐵𑐲𑐵𑑄 𑐠𑐵𑐫𑑂‌ 𑐎𑐫𑐵𑐔𑑂𑐰𑑄𑐐𑐸 𑐏𑑃 𑐠𑐷𑐠𑐷 𑐀𑐨𑐶𑐮𑐾𑐏 𑐥𑐵𑐏𑐾𑑄 𑐥𑑂𑐬𑐩𑐵𑐞𑐶𑐟 𑐖𑐹𑐐𑐸 𑐡𑐸 𑑋 𑐠𑑂𑐰𑐴𑐾 𑐱𑐵𑐳𑐣 𑐥𑐬𑐶𑐰𑐬𑑂𑐟𑐣𑐫𑐵 𑐁𑐢𑐵𑐬 𑐂𑐟𑐶𑐴𑐵𑐳𑐫𑐵𑐟 𑐣𑑄 𑐰𑐶𑐨𑐵𑐖𑐣 𑐫𑐵𑐫𑐾𑐐𑐸 𑐖𑑂𑐫𑐵 𑐖𑐸𑐮 𑑋 𑐣𑐾𑐥𑐵𑐮 𑐳𑐩𑑂𑐰𑐟 𑐱𑐸𑐬𑐸 𑐖𑐸𑐂 𑐳𑑂𑐰𑐫𑐵𑑄 𑐣𑑂𑐴𑑂𑐫𑑀𑐫𑐵𑐟 𑐥𑑂𑐬𑐵𑐔𑐷𑐣 𑐎𑐵𑐮, 𑐣𑐾.𑐳𑑄. 𑐱𑐸𑐬𑐸𑐣𑐶𑐳𑐾𑑄 𑐥𑐺𑐠𑑂𑐰𑐷𑐣𑐵𑐬𑐵𑐫𑐞 𑐱𑐵𑐴 𑐣𑑄 𑐣𑐾𑐥𑐵𑐮 𑐊𑐎𑐷𑐎𑐬𑐞 𑐫𑐵𑑅𑐐𑐸 𑐃𑐟𑐎𑐫𑐵𑐟 𑐩𑐢𑑂𑐫𑐎𑐵𑐮 𑐰 𑐱𑐵𑐴 𑐰𑑄𑐱𑐫𑐵 𑐱𑐸𑐬𑐸𑐣𑐶𑐳𑐾𑑄 𑐠𑑁𑑄𑐟𑐎 𑐫𑐵 𑐃𑐫𑐵𑐟 𑐁𑐢𑐸𑐣𑐶𑐎 𑐎𑐵𑐮 𑐢𑐎𑐵𑑅 𑐢𑐵𑐫𑐾𑐐𑐸 𑐫𑐵𑐟 𑑋

𑐕𑐸𑑄 𑐣𑑄 𑐂𑐟𑐶𑐴𑐵𑐳𑐫𑐵𑐟 𑐥𑑂𑐬𑐩𑐵𑐞𑐶𑐟 𑐫𑐵𑐫𑐾𑐐𑐸 𑐁𑐢𑐵𑐬 𑐢𑐿𑐐𑐸 𑐴𑐾 𑐄𑐐𑐸 𑐂𑐮𑐫𑑂‌ 𑐟𑐫𑐵: 𑐰𑑄𑐐𑐸 𑐀𑐨𑐶𑐮𑐾𑐏 𑐏𑑅 𑑋 𑐄𑐐𑐸 𑐂𑐮𑐫𑑂‌ 𑐔𑑂𑐰𑐫𑐵𑐰𑑄𑐐𑐸 𑐳𑐦𑐹𑐟 𑐏𑑅 𑑋 𑐠𑑂𑐰𑐴𑐾 𑐖𑑂𑐰𑐮𑑄𑐫𑐵 𑐩𑐵𑐢𑑂𑐫𑐩𑑄 𑐄𑐐𑐸 𑐂𑐮𑐫𑑂‌ 𑐖𑐸𑐫𑐵𑐰𑑄𑐐𑐸 𑐑𑐚𑐣𑐵𑐫𑐵𑐟 𑐩𑐵𑐮𑐾𑐐𑐸 𑐁𑐢𑐵𑐬 𑐏𑑅 𑑋 𑐠𑑁𑑄𑐟𑐎𑐫𑐵 𑐀𑐢𑑂𑐫𑐫𑐣 𑐀𑐣𑐸𑐳𑐣𑑂𑐢𑐵𑐣𑐥𑐵𑐏𑐾𑑄 𑐡𑐎𑐮𑐫𑑂‌ 𑐣𑑂𑐴𑐵𑐥𑐵𑑄 𑐣𑐾𑐥𑐵𑐮𑐫 𑐮𑐸𑐫𑐵𑑅 𑐰𑑅𑐐𑐸 𑐮𑑂𑐰𑐴𑑄𑐥𑑁 𑐃.𑐥𑐹. 𑑒𑑕𑑕 𑐣𑐶𑐐𑑂𑐮𑐶𑐴𑐰𑐵𑐫𑑂‌ 𑐀𑐱𑑀𑐎 𑐀𑐨𑐶𑐮𑐾𑐏 𑐏𑑅 𑐣𑐾𑐥𑐵𑐮𑐩𑐞𑑂𑐜𑐮 𑐡𑐸𑐣𑐾 𑐮𑐸𑐫𑐵𑐰𑑅𑐐𑐸 𑐣𑑂𑐴𑐵𑐥𑐵𑑄𑐐𑐸 𑐀𑐨𑐶𑐮𑐾𑐏 𑐢𑐿𑐐𑐸 𑐖𑐫 𑐰𑐬𑑂𑐩𑐵𑐫𑐵 𑐣𑐵𑑄 𑐄𑐮𑑂𑐮𑐾𑐏 𑐖𑐹𑐐𑐸 𑐱𑐎 𑐳𑐩𑑂𑐰𑐟 𑑑𑑐𑑗 (𑐃.𑐳𑑄. 𑑑𑑘𑑕) 𑐫𑐵 𑐖𑐹𑐐𑐸 𑐡𑐸 𑑋 𑐠𑑂𑐰𑐫𑐵𑑄 𑐃.𑐳𑑄. 𑑔𑑕𑑙 𑐥𑐱𑐸𑐥𑐟𑐶𑐫𑐵 𑐀𑐨𑐶𑐮𑐾𑐏 𑐃.𑐳𑑄. 𑑔𑑖𑑔 𑐔𑐵𑑄𑐐𑐸 𑐣𑐵𑐬𑐵𑐫𑐞𑐫𑑂‌ 𑐩𑐵𑐣𑐡𑐾𑐰 𑐟𑐫𑐵: 𑐰𑑄𑐐𑐸 𑐰𑐶𑐖𑐫 𑐳𑑂𑐟𑐩𑑂𑐨𑑄 𑐏𑑅 𑑋 𑐮𑐶𑐔𑑂𑐕𑐰𑐷 𑐱𑐵𑐳𑐣𑐫𑐵 𑐃 𑐡𑐸𑐣𑐾 𑐎𑐬𑐷𑐧 𑑒𑑕𑑐 𑐐𑐹 𑐀𑐨𑐶𑐮𑐾𑐏 𑐮𑐸𑐫𑐵: 𑐰𑑅𑐐𑐸 𑐡𑐸 𑑋 𑐰 𑐦𑐸𑐎𑑂𑐎 𑐄𑐐𑐸 𑐃𑐫𑐵 𑐬𑐵𑐖𑐨𑐵𑐲𑐵 𑐳𑑄𑐳𑑂𑐎𑐺𑐟𑑄 𑐔𑑂𑐰𑐫𑐵𑐟𑑅𑐐𑐸 𑐡𑐸𑐳𑐵 𑐎𑐬𑐷𑐧 𑑒𑑕𑑐 𑐏𑑃𑐐𑑂𑐰: 𑐀𑐳𑑄𑐳𑑂𑐎𑐺𑐟 𑐏𑐣𑐾𑐡𑐸 𑑋 𑐐𑐸𑐐𑐸 𑐏𑑃𑐐𑑂𑐰:𑐟 𑐄𑐐𑐸 𑐃𑐫𑐵 𑐖𑐣𑐨𑐵𑐲𑐵 𑐏𑑃𑐐𑑂𑐰𑑅 𑐖𑐸𑐂𑐩𑐵: 𑐢𑐿𑐐𑐸 𑐏𑑃 𑐜𑐵. 𑐎𑐩𑐮 𑐥𑑂𑐬𑐎𑐵𑐱 𑐩𑐮𑑂𑐮𑐖𑐸 𑐣𑑂𑐴𑐫𑐧𑑂𑐰𑐫𑐵 𑐡𑐷𑐐𑐸 𑐡𑐸 𑑋

𑐣𑐾𑐥𑐵𑐮𑐩𑐞𑑂𑐜𑐮 𑐡𑐸𑐣𑐾 𑐣𑐾𑐥𑐵𑐮𑐨𑐵𑐲𑑄 𑐔𑑂𑐰𑐫𑐵𑐟𑑅𑐐𑐸 𑐣𑑂𑐴𑐵𑐥𑐵𑑄𑐐𑐸 𑐮𑑂𑐰𑐴𑑄𑐥𑑁 𑐳𑐎𑑂𑐰 𑐧𑐖𑑂𑐬𑐫𑑀𑐐𑐶𑐣𑐷𑐫𑐵 𑐳𑑂𑐟𑐩𑑂𑐨𑐫𑑂‌ 𑐎𑐶𑐫𑐵𑐟𑑅𑐐𑐸 𑐬𑐸𑐡𑑂𑐬𑐡𑐾𑐰𑐫𑐵 𑐣𑐾.𑐳𑑄. 𑑒𑑙𑑓 𑐏𑑅 𑐢𑐿𑐐𑐸 𑐠𑑁𑑄𑐟𑐎𑐫𑐵 𑐀𑐢𑑂𑐫𑐫𑐣𑑄 𑐎𑑂𑐫𑑄𑐐𑐸 𑐡𑐸 𑑋 𑐣𑐾.𑐳𑑄. 𑑒𑑙𑑓 𑐮𑐶𑐥𑐵 𑐣𑐾𑐥𑐵𑐮𑐩𑐞𑑂𑐜𑐮 𑐡𑐸𑐣𑐾 𑐳𑐮𑑄𑐳𑑅 𑐮𑑂𑐰𑐴𑑄𑐥𑑁𑐟 𑐮𑐸𑐫𑐵𑑅 𑐰𑑅𑐐𑐸 𑐡𑐸 𑑋 𑐳𑑄𑐔𑐵𑐬 𑐩𑐵𑐢𑑂𑐫𑐩𑐫𑐵 𑐀𑐨𑐵𑐰 𑐰 𑐢𑐵𑐬𑑂𑐩𑐶𑐎 𑐁𑐳𑑂𑐠𑐵𑑄 𑐖𑐣𑐩𑐵𑐣𑐳𑐫𑑂‌ 𑐠𑐵𑐫𑑂‌ 𑐎𑐫𑐵𑑅𑐔𑑂𑐰𑑄𑐐𑐸 𑐎𑐵𑐬𑐞 𑐳𑐸𑑄 𑐣𑑄 𑐩𑐣𑐹𑐟𑐫𑐾𑐳𑑄 𑐳𑐵𑐩𑐵𑐖𑐶𑐎 𑐬𑐵𑐖𑐣𑐿𑐟𑐶𑐎 𑐰 𑐢𑐵𑐬𑑂𑐩𑐶𑐎 𑐖𑑂𑐫𑐵 𑐫𑐵𑐫𑐾𑐧𑐮𑐫𑑂‌ 𑐮𑑂𑐰𑐴𑑄𑐥𑑁 𑐎𑐶𑐫𑐵𑑅𑐟𑐫𑑂‌𑐐𑐸 𑐥𑐬𑐩𑑂𑐥𑐬𑐵 𑐣𑑂𑐴𑑂𑐫𑐵𑐎𑐵𑑅 𑐠𑐣 𑐐𑐸𑐐𑐹 𑐥𑐬𑐩𑑂𑐥𑐬𑐵 𑐠𑑁𑑄𑐟𑐎 𑐣𑑄 𑐣𑑂𑐴𑑂𑐫𑐵𑐣𑐵 𑐴𑐾 𑐔𑑂𑐰𑑄𑐐𑐸 𑐡𑐣𑐶 𑑋

𑐠𑐸𑐐𑐸 𑐩𑐮𑑂𑐮 𑐂𑐮𑐫𑑂‌ 𑐣𑐾𑐥𑐵𑐮𑐨𑐵𑐲𑑄 𑐣𑐷𑐳𑑂𑐰𑐣𑐵 𑐟𑑅𑐐𑐸 𑐮𑑂𑐰𑐴𑑄𑐥𑑁, 𑐃 𑐰 𑐥𑐬𑐶𑐳𑑂𑐠𑐶𑐟𑐶 𑐎𑐠𑑄 𑐦𑐬𑐎 𑐰𑐶𑐲𑐫𑐰𑐳𑑂𑐟𑐸 𑐄𑐮𑑂𑐮𑐾𑐏 𑐖𑐸𑐐𑐵𑐔𑑂𑐰𑑄𑐐𑐸 𑐡𑐸 𑑋 𑐠𑑂𑐰𑐴𑐾 𑐮𑑂𑐰𑐴𑑄𑐥𑑁𑐮𑐫𑑂‌ 𑐄𑐮𑑂𑐮𑐾𑐏 𑐖𑐸𑐫𑐵𑐔𑑂𑐰𑑄𑐐𑐸 𑐰𑐶𑐲𑐫𑐰𑐳𑑂𑐟𑐸 𑐠𑐣 𑐣𑑂𑐴𑑂𑐫𑐧𑑂𑐰𑐫𑐵 𑐔𑑂𑐰𑐣𑐵 𑑋 𑐮𑑂𑐰𑐴𑑄𑐥𑑁𑐮𑐫𑑂‌ 𑐄𑐮𑑂𑐮𑐾𑐏 𑐖𑐸𑐫𑐵𑐔𑑂𑐰𑑄𑐐𑐸 𑐰𑐶𑐲𑐫𑐰𑐳𑑂𑐟𑐸 𑐀𑐥𑑂𑐰𑑅 𑐢𑐵𑐬𑑂𑐩𑐶𑐎 𑐥𑑂𑐬𑐰𑐺𑐟𑑂𑐟𑐶𑐫𑐵 𑐏𑐣𑐾𑐡𑐸𑐳𑐵𑑄 𑐣𑑄 𑐳𑐵𑐩𑐵𑐖𑐶𑐎, 𑐁𑐬𑑂𑐠𑐶𑐎, 𑐬𑐵𑐖𑐣𑐿𑐟𑐶𑐎, 𑐎𑐵𑐣𑐹𑐣 𑐁𑐡𑐶 𑐏𑐣𑐾𑐡𑐸 𑑋

𑐢𑐣𑐧𑐖 𑐧𑐖𑐵𑐔𑐵𑐬𑑂𑐫𑐖𑐸𑑄 𑐳𑑄𑐎𑐮𑐣 𑐫𑐵𑐣𑐵𑑅𑐡𑐷𑐐𑐸 𑐩𑐢𑑂𑐫𑐎𑐵𑐮𑐷𑐣 𑐀𑐨𑐶𑐮𑐾𑐏 𑐡𑐸𑐣𑐾𑐫𑐵 𑐀𑐨𑐶𑐮𑐾𑐏𑐟 𑐀𑐢𑑂𑐫𑐫𑐣 𑐫𑐵𑐣𑐵𑑅 𑐳𑑂𑐰𑐫𑐾𑐧𑐮𑐫𑑂‌ 𑐀𑐥𑑂𑐰: 𑐫𑐵𑐣𑐵𑑅 𑐢𑐵𑐬𑑂𑐩𑐶𑐎 𑐰𑐶𑐲𑐫𑐰𑐳𑑂𑐟𑐸 𑐄𑐮𑑂𑐮𑐾𑐏 𑐖𑐸𑐫𑐵𑐔𑑂𑐰𑑄𑐐𑐸 𑐏𑐣𑐾𑐡𑐸 𑑋 𑐢𑐵𑐬𑑂𑐩𑐶𑐎 𑐰𑐶𑐲𑐫𑐰𑐳𑑂𑐟𑐸 𑐢𑐵𑐫𑐾𑐧𑐮𑐫𑑂‌ 𑐡𑑂𑐫𑑅 𑐥𑐮𑐶𑐳𑑂𑐠𑐵 𑐫𑐵𑐫𑐾𑐐𑐸, 𑐖𑐷𑐬𑑂𑐞𑑀𑐡𑑂𑐰𑐵𑐬 𑐫𑐵𑐫𑐾𑐐𑐸, 𑐳𑐟𑑅 𑐡𑐫𑐾𑐎𑐾𑐐𑐸, 𑐡𑑂𑐫𑑅𑐫𑐵 𑐣𑑂𑐴𑑂𑐫𑑀𑐣𑐾 𑐎𑐶𑐳𑐶, 𑐳𑐶𑑄𑐴, 𑐟𑑂𑐰𑐮𑑄, 𑐂𑐮𑐵𑑄 𑐟𑐫𑐾𑐐𑐸, 𑐡𑑂𑐫𑑅𑐫𑐵 𑐣𑑂𑐴𑑂𑐫𑑀𑐣𑐾 𑐔𑐵𑐎: 𑐩𑐟: 𑐔𑑂𑐫𑐵𑐎𑐾𑐐𑐸, 𑐀𑐥𑐳𑑃𑑄 𑐔𑑂𑐰𑑄𑐥𑐶𑐣𑑂𑐟 𑐥𑐵𑐮𑑄 𑐫𑐵𑐎𑐾𑐐𑐸, 𑐡𑐔𑑂𑐕𑐶𑐫𑐵 𑐕𑐎𑑅 𑐫𑐖𑑂𑐘, 𑐴𑑀𑐩 𑐧𑑀𑐳𑑄𑐔𑐵 𑐫𑐵𑐫𑐾𑐐𑐸, 𑐐𑑄 𑐟𑐫𑐾𑐐𑐸, 𑐖𑑀𑐐𑐷𑐟𑐫𑐾𑐟 𑐨𑑂𑐰𑐫 𑐣𑐎𑐾𑐐𑐸 𑐁𑐡𑐶 𑐏𑑃𑐫𑐵 𑐄𑐮𑑂𑐮𑐾𑐏 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸𑐳𑐵 𑐀𑐨𑐶𑐮𑐾𑐏𑐫𑑂‌ 𑐳𑐵𑐩𑐵𑐖𑐶𑐎 𑐰𑐶𑐲𑐫𑐰𑐳𑑂𑐟𑐸𑐫𑐵𑐟 𑐣𑑄 𑐠𑐵𑐫𑑂‌ 𑐧𑐶𑐫𑐵𑑅 𑐟𑑅𑐐𑐸 𑐏𑐣𑐾𑐡𑐸 𑑋 𑐳𑐵𑐩𑐵𑐖𑐶𑐎 𑐰𑐶𑐲𑐫𑐰𑐳𑑂𑐟𑐸 𑐢𑐵𑐫𑐾𑐧𑐮𑐫𑑂 𑐖𑐣𑐟𑐵𑐫𑐵𑐟 𑐩𑐡𑐫𑐾𑐎 𑐩𑐐𑐵𑑅𑐐𑐸 𑐴𑐶𑐟𑐶 𑐟𑐫𑐾𑐐𑐸, 𑐥𑐸𑐏𑐸 𑐡𑐫𑐾𑐎𑐾𑐐𑐸, 𑐖:𑐢𑐸𑑄 𑐟𑐫𑐾𑐐𑐸, 𑐳𑐟: 𑐦𑐮𑑂𑐔𑐵𑐫𑐵 𑐣𑑂𑐴𑐫𑑀𑐣𑐾 𑐰𑐵, 𑐕𑑀, 𑐳𑐸, 𑐕𑑂𑐰𑐵𑐮𑐶 𑐥𑐵𑐫𑐾𑐐𑐸 𑐰𑑂𑐫𑐰𑐳𑑂𑐠𑐵 𑐣𑐵𑐥𑑄 𑐳𑐵𑐩𑐵𑐖𑐶𑐎 𑐩𑐬𑑂𑐫𑐵𑐡𑐵 𑐰 𑐥𑐬𑐩𑑂𑐥𑐬𑐵𑐫𑐵𑐟 𑐮𑑂𑐫𑑄𑐎𑐵𑑅 𑐟𑐫𑐾𑐐𑐸 𑐮𑐵𑐐𑐶 𑐥𑑂𑐬𑐖𑐵 𑐰 𑐖𑐸𑐖𑐸𑐥𑐶𑑄 𑐥𑐵𑐏𑐾𑑄 𑐖𑐐𑑂𑐐𑐵 𑐎𑑂𑐫𑐧 𑐡𑐵𑐣 𑐧𑐶𑐫𑐵𑑅 𑐄𑐐𑐸 𑐧𑐸𑑃 𑐎𑑂𑐫𑐧𑐫𑐵 𑐁𑐫𑐳𑑂𑐟𑐵𑐥𑐵𑐏𑐾𑑄 𑐰𑑅𑐐𑐸 𑐀𑐣𑑂𑐣𑐥𑐵𑐏𑐾𑑄 𑐡𑐔𑑂𑐕𑐶𑐫𑐵 𑐕𑐎: 𑐐𑐸𑐠𑐶 𑐣𑑂𑐫𑐵𑐫𑐾𑐎𑐾𑐐𑐸 𑐳𑑂𑐫𑐣𑐵𑑅𑐔𑑂𑐰𑑄𑐐𑐸 𑐡𑑂𑐫𑑅 𑐳𑐟𑑅 𑐦𑐮𑑂𑐔𑐵 𑐁𑐡𑐶 𑐩𑐬𑑂𑐩𑐟 𑐫𑐵𑐫𑐾𑐐𑐸 𑑋 𑐳𑐩𑐫 𑐥𑐬𑐶𑐳𑑂𑐠𑐶𑐟𑐶𑐫𑐵𑐟 𑐢𑑂𑐫𑐵𑐣 𑐧𑐶𑐫𑐵𑑅 𑐥𑐬𑐩𑑂𑐥𑐬𑐵𑐫𑐵𑐟 𑐮𑑂𑐫𑑄𑐎𑐵𑑅 𑐟𑐫𑐾𑐫𑐸 𑐮𑐵𑐐𑐶 𑐖𑐐𑑂𑐐𑐵 𑐩𑐶𑐮 𑐢𑐵𑑅𑐳𑐵 𑐰 𑐰𑑅𑐐𑐸 𑐢𑐾𑐧𑐵𑑄 𑐖𑑂𑐫𑐵 𑐫𑐵𑐫𑐾 𑐩𑐵𑑅𑐐𑐸 𑐰 𑐐𑐸𑐠𑐶𑐫𑐵𑐬𑐫𑐵𑐎𑐾 𑐮𑑂𑐴𑐵𑐥॑ 𑐎𑐵𑐫𑐾𑐐𑐸, 𑐮𑐔𑑂𑐕𑐶𑐫𑐵 𑐕𑐎𑑅 𑐳𑑃𑐮𑑂𑐴𑐸 𑐨𑑂𑐰𑐫𑑂‌ 𑐣𑑂𑐫𑐵𑐫𑐾𑐎𑐾𑐐𑐸, 𑐡𑑂𑐫𑑅𑐫𑐵 𑐣𑑂𑐴𑑂𑐫𑑀𑐣𑐾 𑐳𑐬𑐳𑐦𑐵𑐂 𑐫𑐵𑐫𑐾𑐐𑐸 𑐳𑑃𑐏𑑂𑐰𑐵𑑅 𑐥𑐵𑐫𑐾𑐐𑐸 𑐑𑑂𑐫𑑅 𑐔𑐶𑐎𑑄 𑐣𑑂𑐫𑐵𑐣𑐵𑑅 𑐩𑐟 𑐕𑑂𑐰𑐫𑐾𑐎𑐾𑐐𑐸 𑐁𑐡𑐶 𑐳𑐵𑐩𑐵𑐖𑐶𑐎 𑐥𑐬𑐩𑑂𑐥𑐬𑐵 𑐣𑑂𑐴𑑂𑐫𑐧𑑂𑐰𑐫𑐵 𑐟𑑅𑐐𑐸 𑐏𑐣𑐾𑐡𑐸 𑑋 𑐕𑐸𑑄 𑐣𑑄 𑐳𑐵𑐩𑐵𑐖𑐶𑐎 𑐥𑐬𑐩𑑂𑐥𑐬𑐵𑐫𑑂‌ 𑐀𑐰𑐬𑑀𑐢 𑐰𑐫𑐾𑐰𑑄 𑐳𑑅 𑐳𑑂𑐫𑐹𑐥𑐶𑑄 𑐖𑑂𑐫𑑀𑐟𑐶𑐲𑐥𑐶𑐣𑑂𑐟 𑐳𑐮𑑂𑐮𑐵 𑐫𑐵𑐣𑐵𑑅 𑐳𑐵𑐩𑐵𑐖𑐶𑐎 𑐣𑐶𑐫𑐩𑐫𑐵 𑐄𑐮𑑂𑐮𑐾𑐏 𑐫𑐵𑐫𑐾𑐐𑐸 𑐐𑐠𑐾𑐎𑐶 𑐳𑐸𑑄 𑐩𑐣𑐹 𑐳𑐶𑐟 𑐢𑐵𑑅𑐳𑐵 𑐐𑑂𑐰𑐣𑑂𑐴𑐸𑐧𑐵𑐬𑐾 𑐫𑐵𑐫𑐾𑐐𑐸 𑐥𑐶𑐣𑐾 𑐔𑑂𑐰𑑄𑐥𑐶𑑄 𑐳𑐶𑐟𑐎𑐶 𑐡𑐸𑐣𑐾 𑐔𑑂𑐰𑑄𑐥𑐶𑑄 𑐳𑐶𑐟𑐎𑐶𑑄 𑐀𑐖𑐵𑐐𑐸 𑐂𑐮𑐫𑑂‌ 𑐳𑐵𑐩𑐵𑐖𑐶𑐎 𑐥𑐬𑐩𑑂𑐥𑐬𑐵 𑐐𑐸𑐎𑐠𑑄 𑐴𑐣𑐾𑐐𑐸 𑐢𑐿𑐐𑐸 𑐣𑑄 𑐄𑐮𑑂𑐮𑐾𑐏 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋

𑐀𑐠𑐾𑐴𑐾 𑐬𑐵𑐖𑐣𑐿𑐟𑐶𑐎 𑐧𑐶𑐲𑐫𑐰𑐳𑑂𑐟𑐸 𑐣𑑄 𑐏𑐣𑐾𑐡𑐸 𑐟𑐬 𑐢𑐵𑐬𑑂𑐩𑐶𑐎 𑐰𑐶𑐲𑐫𑐰𑐳𑑂𑐟𑐸 𑐳𑑂𑐰𑐫𑐵𑑄 𑐩𑑂𑐴𑑀𑐖𑐎 𑐏𑐣𑐾𑐡𑐸 𑑋 𑐡𑐾𑐱 𑐳𑐸𑐬𑐎𑑂𑐲𑐶𑐟 𑐫𑐵𑐫𑐾𑐐𑐸 𑐩𑐸𑐏𑑂𑐫 𑐟𑐟𑑂𑐰 𑐢𑐿𑐐𑐸 𑐳𑐸𑐰𑑂𑐫𑐰𑐳𑑂𑐠𑐶𑐟 𑐬𑐵𑐖𑑂𑐫 𑐳𑑄𑐔𑐵𑐮𑐣, 𑐱𑐎𑑂𑐟𑐶𑐱𑐵𑐮𑐷 𑐥𑑂𑐬𑐱𑐵𑐳𑐣, 𑐡𑐾𑐫𑐵 𑐎𑐶𑐮𑑂𑐮𑐵 𑐁𑐡𑐶 𑐏𑑅 𑑋 𑐄𑐎𑐶𑑄 𑐬𑐵𑐖𑑂𑐫𑐫𑐵 𑐎𑐶𑐮𑑂𑐮𑐵 𑐡𑐔𑑂𑐕𑐶𑐫𑐵 𑐕𑐎𑑅 𑐩𑐬𑑂𑐩𑐟 𑐫𑐵𑐫𑐾𑐩𑐵𑑅𑐐𑐸 𑐰𑐣 𑐐𑐝 (𑐰𑐣 𑐎𑐶𑐮𑑂𑐮𑐵) 𑐁𑐡𑐶𑐫𑐵 𑐳𑐸𑐬𑐎𑑂𑐲𑐶𑐟 𑐫𑐵𑐫𑐾𑐩𑐵𑑅𑐐𑐸, 𑐳𑐸𑐣𑐵𑐣𑑄 𑐐𑐝𑐫𑐵 𑐖𑑄𑐐𑐮 𑐣𑐲𑑂𑐚 𑐫𑐵𑐫𑐾 𑐩𑐡𑐿𑐐𑐸 𑐟𑐬 𑐰𑐶𑐲𑐫 𑐥𑐬𑐶𑐳𑑂𑐠𑐶𑐟𑐶 𑐳𑐵𑐩𑐵𑐖𑐶𑐎 𑐩𑐬𑑂𑐫𑐵𑐡𑐵𑐫𑐵𑐟 𑐢𑑂𑐫𑐵𑐣 𑐟𑐫𑐵𑑅 𑐕𑐸𑑄 𑐐𑐠𑐾𑑄 𑐐𑐸𑐠𑐶 𑐣𑑂𑐫𑐵𑐫𑐾𑐎𑐾𑐞𑐸 𑐂𑐮𑐫𑑂‌ 𑐟𑑀𑐎𑐾 𑐫𑐵𑐣𑐵𑑅 𑐟𑑅𑐐𑐸 𑐐𑐸𑐠𑐶𑑄 𑐢𑐵𑑅𑐳𑐵 𑐢𑑂𑐫𑐣𑐾 𑐡𑐿𑐐𑐸 𑐢𑐎𑐵𑑅 𑐳𑐵𑐩𑐵𑐖𑐶𑐎 𑐥𑐬𑐩𑑂𑐥𑐬𑐵 𑐰 𑐬𑐵𑐖𑐣𑐿𑐟𑐶𑐎 𑐰𑐵 𑐬𑐵𑐖𑑂𑐫𑐫𑐵 𑐳𑐸𑐬𑐎𑑂𑐲𑐵𑐫𑐵 𑐰𑐶𑐲𑐫𑐫𑑂‌ 𑐢𑑂𑐫𑐵𑐣 𑐧𑐶𑐫𑐵 𑐔𑑂𑐰𑐫𑐵𑐟𑑅𑐐𑐸 𑐏𑐣𑐾𑐡𑐸 𑑋 𑐂𑐟𑐶𑐴𑐵𑐳𑐫𑑂‌ 𑐰𑐣𑐐𑐬𑑂𑐡𑐥𑐵𑐏𑐾𑑄 𑐖𑐣𑐟𑐵𑐫𑐵𑐟 𑐂𑐮𑐫𑑂‌ 𑐧𑑂𑐫𑐮𑐫𑑂‌ 𑐳𑐸𑐬𑐎𑑂𑐲𑐶𑐟 𑐫𑐵𑐣𑐵𑑅 𑐟𑑅𑐐𑐸 𑐗𑐷𑐳𑑄 𑐳𑑂𑐫𑐹 𑑋 𑐩𑐮𑑂𑐮 𑐂𑐮𑐫𑑂‌ 𑐧𑐬𑑀𑐧𑐬 𑐮𑐶𑐎𑑂𑐎 𑐔𑑂𑐰𑑄𑐐𑐸 𑐰𑐵 𑐟𑐵𑐥𑐵𑑅𑐐𑐸 𑐬𑐵𑐖𑑂𑐫𑑄 𑐫𑐸𑐡𑑂𑐢 𑐫𑐵𑐂𑐐𑐸 𑐂𑐮𑐫𑑂‌ 𑐥𑑂𑐬𑐖𑐵𑐥𑐶𑐣𑑂𑐳𑑄 𑐠𑑅𑐐𑐸 𑐳𑐸𑐬𑐎𑑂𑐲𑐶𑐟𑐫𑐵 𑐮𑐵𑐐𑐶𑑄 𑐖𑑄𑐐𑐮𑐫𑑂‌ 𑐡𑐸𑐣𑐾 𑐀𑐣𑑂𑐣 𑐳𑐬𑐳𑐵𑐩𑐵𑐣 𑐳𑐸𑐔𑐸𑐎𑐾𑐐𑐸 𑐫𑐵𑐣𑐵𑑅 𑐰𑑅𑐐𑐸𑐡𑐸𑑋

𑐀𑐠𑐾𑐴𑐾 𑐮𑑂𑐰𑐴𑑄𑐥𑑁𑐮𑐫𑑂‌ 𑐥𑑂𑐬𑐖𑐵𑐥𑐶𑐣𑑂𑐳𑑄 𑐕𑐸 𑐕𑐸 𑐫𑐵𑐫𑐾 𑐖𑑂𑐫𑐹 𑐕𑐸 𑐕𑐸 𑐫𑐵𑐫𑐾 𑐩𑐖𑑂𑐫𑐹 𑐢𑐿𑐐𑐸 𑐏𑑃𑐫𑐵 𑐄𑐮𑑂𑐮𑐾𑐏 𑐫𑐵𑐫𑐾𑐐𑐸 𑑋 𑐀𑐥𑐬𑐵𑐢𑐶𑐎 𑐖𑑂𑐫𑐵 𑐫𑐵𑑅𑐥𑐶𑑄 𑐩𑐣𑐹𑐟𑐫𑐾𑐟 𑐕𑐸 𑐕𑐸 𑐡𑐞𑑂𑐜 𑐫𑐵𑐫𑐾𑐐𑐸, 𑐐𑐸𑐮𑐶 𑐧𑑄 𑐥𑐸𑐂𑐎𑐾𑐐𑐸, 𑐧𑑄 𑐳𑐸𑐣𑐵𑑄 𑐎𑐵𑐫𑐾𑐐𑐸, 𑐳𑐸𑐣𑐵𑑄 𑐳𑐸𑐣𑐵𑑄 𑐕𑐸 𑐕𑐸 𑐠𑐵𑐫𑑂‌ 𑐰𑐳𑑂𑐟𑐸 𑐄𑐥𑐫𑑀𑐐 𑐫𑐵𑐫𑐾 𑐡𑐿𑐐𑐸 𑐢𑐿𑐐𑐸 𑐎𑐵𑐣𑐹𑐣𑐷 𑐳𑐸𑐔 𑐣𑑄 𑐄𑐮𑑂𑐮𑐾𑐏 𑐫𑐵𑐣𑐵𑑅 𑐟𑑅𑐐𑐸 𑐏𑐣𑐾𑐡𑐸 𑑋

𑐀𑐠𑐾𑐴𑐾 𑐂𑐟𑐶𑐴𑐵𑐳𑐫𑐵 𑐰𑐶𑐲𑐫𑐰𑐳𑑂𑐟𑐸 𑐄𑐮𑑂𑐮𑐾𑐏 𑐫𑐵𑐫𑐾𑐐𑐸 𑐄𑐐𑐸 𑐂𑐮𑐐𑑂‌ 𑐖𑐸𑐫𑐵𑐔𑑂𑐰𑑄𑐐𑐸, 𑐖𑐸𑐫𑐵𑐰𑑄𑐐𑐸 𑐩𑐴𑐟𑑂𑐰𑐥𑐹𑐬𑑂𑐞 𑐑𑐚𑐣𑐵 𑐄𑐮𑑂𑐮𑐾𑐏 𑐫𑐵𑐫𑐾𑐐𑐸 𑐡𑑂𑐫𑑅𑐫𑐵 𑐧𑐵𑐬𑐾 𑐥𑑁𑐬𑐵𑐞𑐶𑐎 𑐐𑑂𑐬𑐟𑑂𑐠 𑐰𑐵 𑐥𑐸𑐬𑐵𑐞, 𑐢𑐵𑐬𑑂𑐩𑐶𑐎 𑐐𑑂𑐬𑐣𑑂𑐠𑐫𑐵 𑐑𑐚𑐣𑐵 𑐄𑐮𑑂𑐮𑐾𑐏 𑐫𑐵𑐐𑐾𑐐𑐸 𑐥𑐬𑐩𑑂𑐥𑐬𑐵 𑐏𑐣𑐾𑐡𑐸 𑑋

𑐮𑑂𑐰𑐴𑑄𑐥𑑁 𑐀𑐬𑑂𑐠𑐵𑐟 𑐀𑐨𑐶𑐮𑐾𑐏 𑐖𑐸𑐖𑐸 𑐰 𑐥𑑂𑐬𑐖𑑂𑐘𑐵 𑐣𑐶𑐠𑑂𑐰𑑅𑐥𑐵𑐏𑐾𑑄 𑐟𑑅𑐐𑐸 𑐏𑐣𑐾𑐡𑐸𑐳𑐵 𑐥𑑂𑐬𑐖𑐵𑐥𑐶𑐣𑑂𑐳𑑄 𑐟𑑅𑐐𑐸 𑐀𑐨𑐶𑐮𑐾𑐏𑐫𑑂‌ 𑐖𑐸𑐖𑐸𑐫𑐵 𑐣𑐵𑑄 𑐄𑐮𑑂𑐮𑐾𑐏 𑐫𑐵𑐫𑐾𑐐𑐸 𑐥𑐬𑐩𑑂𑐥𑐬𑐵 𑐣𑑄 𑐡𑐸𑐳𑐵 𑐖𑐸𑐖𑐸𑐥𑐶𑑄 𑐥𑐵𑐏𑐾𑑄 𑐟:𑐐𑐸 𑐀𑐨𑐶𑐮𑐾𑐏𑐫𑑂‌ 𑐥𑑂𑐬𑐖𑐵𑐫𑐵 𑐳𑐸𑐏 𑐳𑐩𑐺𑐡𑑂𑐢𑐶 𑐁𑐫𑐸 𑐳𑐣𑑂𑐟𑐵𑐣𑐫𑐵 𑐎𑐵𑐩𑐣𑐵 𑐫𑐵𑐫𑐾𑐐𑐸 𑐥𑐬𑐩𑑂𑐥𑐬𑐵 𑐡𑐸𑐳𑐵 𑐠𑐖𑐵𑐐𑐸 𑐖𑑂𑐫𑐵 𑐳𑑂𑐠𑐵𑐣𑐷𑐫 𑐀𑐢𑐶𑐎𑐵𑐬 𑐥𑑂𑐬𑐵𑐥𑑂𑐟 𑐖𑐹𑐥𑐶𑑄 𑐨𑐵𑐬𑐡𑐵𑐬𑐥𑐶𑑄𑐥𑐵𑐏𑐾𑑄 𑐣𑑄 𑐟𑑅𑐐𑐸 𑐏𑐣𑐾𑐡𑐸 𑑋

𑐀𑐨𑐶𑐮𑐾𑐏𑐫𑑂‌ 𑐬𑐵𑐖𑐰𑐬𑑂𑐞𑐣 𑐫𑐵𑐫𑐾𑐐𑐸 𑐥𑐬𑐩𑑂𑐥𑐬𑐵 𑐡𑐸 𑑋 𑐬𑐵𑐖𑑂𑐫𑐫𑑂‌ 𑐡𑐸𑐣𑐾 𑐖𑐸𑐫𑐵𑐔𑑂𑐰𑑄𑐐𑐸, 𑐖𑐸𑐖𑐸𑐫𑐵 𑐱𑐎𑑂𑐟𑐶, 𑐫𑐱, 𑐎𑐺𑐟𑐶 𑐰 𑐖𑐸𑐖𑐸𑑄 𑐫𑐵𑐣𑐵𑑅 𑐰𑑄𑐐𑐸 𑐩𑐴𑐟𑑂𑐰𑐥𑐹𑐬𑑂𑐞 𑐑𑐚𑐣𑐵 𑐰 𑐖𑐸𑐖𑐸𑐫𑐵 𑐱𑐎𑑂𑐟𑐶, 𑐖𑑂𑐫𑐵 𑐄𑐮𑑂𑐮𑐾𑐏 𑐫𑐵𑑅𑐐𑐸 𑐏𑐣𑐾𑐡𑐸 𑑋

𑐀𑐠𑐾𑐴𑐾 𑐀𑐥𑐬𑐵𑐢 𑐣𑐶𑐫𑐣𑑂𑐟𑑂𑐬𑐞 𑐫𑐵𑐫𑐾𑐐𑐸 𑐎𑐠𑑄 𑐣𑑄 𑐳𑐸𑑄 𑐣𑑄 𑐩𑐣𑐸𑐏𑑄 𑐀𑐥𑐬𑐵𑐢 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸𑐳𑐵 𑐄𑐩𑑂𑐴 𑐩𑐣𑐹𑐫𑐵𑐟 𑐳𑐵𑐩𑐵𑐖𑐶𑐎 𑐧𑐴𑐶𑐲𑑂𑐎𑐵𑐬 𑐫𑐵𑐫𑐾𑐐𑐸, 𑐡𑐾𑐱 𑐣𑐶𑐎𑐵𑐮𑐵 𑐫𑐵𑐫𑐾𑐐𑐸, 𑐢𑐵𑐬𑑂𑐩𑐶𑐎 𑐏𑑂𑐫𑐵𑐔𑑂𑐰: 𑐎𑐠𑑄 𑐣𑐶𑐳𑐣𑑂𑐟𑐵𑐣 𑐖𑐸𑐂𑐐𑐸, 𑐥𑐘𑑂𑐔𑐩𑐴𑐵𑐥𑐵𑐥 𑐮𑐵𑐂𑐐𑐸, 𑐖𑐸𑐐𑐵𑑃𑐖𑐸𑐐 𑐟𑐎 𑐣𑐬𑑂𑐎𑐫𑐵 𑐧𑐵𑐳 𑐮𑐵𑐂𑐐𑐸 𑐁𑐡𑐶 𑐰𑐶𑐲𑐫 𑐀𑐨𑐶𑐮𑐾𑐏𑐫𑐵 𑐰𑐶𑐲𑐫 𑐰𑐳𑑂𑐟𑐸 𑐎𑐠𑑄 𑐏𑐣𑐾𑐡𑐸 𑑋 𑐀𑐠𑐾𑐴𑐾 𑐬𑐵𑐖𑐡𑑂𑐬𑑀𑐴𑐫𑐵 𑐖𑑂𑐫𑐵 𑐫𑐵𑐂𑐥𑐶𑐣𑑂𑐟 𑐖𑐣𑐟𑐵𑐟𑐫𑐳𑑄 𑐖𑐣𑐎𑐵𑐬𑐰𑐵𑐴𑐷 𑐫𑐵𑐫𑐾 𑐦𑐿𑐐𑐸 𑐳𑐹𑐔𑐣𑐵 𑐟𑐎 𑐣𑑄 𑐀𑐨𑐶𑐮𑐾𑐏𑐫𑑂‌ 𑐟𑐫𑐾𑐐𑐸, 𑐀𑐠𑐾𑐴𑐾 𑐖𑐸𑐖𑐸𑐫𑐵𑐟 𑐣𑐶𑐩𑐣𑑂𑐟𑑂𑐬𑐞𑐵 𑐧𑐶𑐂𑐟 𑐡𑐫𑐾𑐎𑐵: 𑐟𑑅𑐐𑐸 𑐳𑐶𑑄𑐴𑐵𑐳𑐣 𑐧𑐵𑐮𑑄 𑐎𑐵𑐫𑐾𑐦𑐿𑐐𑐸 𑐏𑑃𑐟 𑐣𑑄 𑐀𑐨𑐶𑐮𑐾𑐏𑐫𑑂‌ 𑐏𑐣𑐾 𑐡𑐸𑐐𑐸𑐮𑐶𑑄 𑐄𑐐𑐸 𑐂𑐮𑐫𑑂‌ 𑐴𑐬𑐾𑐎 𑐎𑐠𑑄𑐫𑐵 𑐳𑐹𑐔𑑄, 𑐰𑐶𑐖𑑂𑐘𑐵𑐥𑐣, 𑐎𑐵𑐣𑐹𑐣 𑐀𑐣𑐸𑐱𑐵𑐳𑐣 𑐁𑐡𑐶 𑐖𑐣 𑐳𑐬𑑀𑐎𑐵𑐬𑐫𑐵 𑐏𑑃𑐟 𑐦𑐸𑐎𑑂𑐎𑑄 𑐄𑐮𑑂𑐮𑐾𑐏 𑐫𑐵𑐣𑐵𑑅 𑐳𑑄𑐰𑐶𑐢𑐵𑐣𑐫𑐵 𑐖𑑂𑐫𑐵 𑐟𑐎𑑄 𑐀𑐨𑐶𑐮𑐾𑐏𑐥𑐵𑐏𑐾𑑄 𑐖𑐸𑐫𑐵𑐔𑑂𑐰𑑄𑐐𑐸 𑐳𑑂𑐥𑐲𑑂𑐚 𑐖𑐹 𑑋

𑐠𑐸𑐐𑐸 𑐀𑐨𑐶𑐮𑐾𑐏𑐫𑐵 𑐰𑐶𑐲𑐫𑐧𑐳𑑂𑐟𑐸𑐫𑐵 𑐳𑐩𑐐𑑂𑐬 𑐬𑐹𑐥𑑄 𑐢𑐵𑐫𑐾𑐐𑐸 𑐏𑑅𑐳𑐵

𑐎) 𑐢𑐵𑐬𑑂𑐩𑐶𑐎
𑐏) 𑐳𑐵𑐩𑐵𑐖𑐶𑐎
𑐐) 𑐬𑐵𑐖𑐣𑐿𑐟𑐶𑐎
𑐑) 𑐎𑐵𑐣𑐹𑐣
𑐒) 𑐂𑐟𑐶𑐴𑐵𑐳
𑐔) 𑐬𑐵𑐖𑐰𑐬𑑂𑐞𑐣 𑐁𑐡𑐶 𑐎𑐠𑑄 𑐰𑐶𑐨𑐵𑐖𑐣 𑐫𑐵𑐫𑐾𑐕𑐶𑑄 𑑋

𑐀𑐥𑑂𑐰: 𑐫𑐵𑐣𑐵 𑐠𑐖𑐵𑐐𑐸 𑐀𑐨𑐶𑐮𑐾𑐏𑐟 𑐕𑐸𑑄 𑐣𑑄 𑐢𑐵𑐬𑑂𑐩𑐶𑐎 𑐄𑐟𑑂𑐳𑐰𑐫𑑂‌ 𑐟𑑅𑐐𑐸 𑐏𑐣𑐾𑐡𑐸𑐳𑐵 𑐥𑐬𑐶𑐰𑐵𑐬 𑐡𑐸𑐣𑐾 𑐳𑐸𑑄 𑐣𑑄 𑐩𑐣𑐹𑐟 𑐳𑐷𑐧𑐮𑐫𑑂‌ 𑐳𑐷𑐩𑑂𑐴 𑐩𑐣𑐹𑐫𑐵 𑐁𑐟𑑂𑐩𑐵 𑐱𑐵𑐣𑑂𑐟𑐶𑐫𑐵 𑐎𑐵𑐩𑐣𑐵 𑐫𑐵𑐣𑐵 𑐟𑐫𑐵𑐟𑑅𑐐𑐸 𑐏𑐣𑐾𑐡𑐸 𑑋 𑐀𑐨𑐶𑐮𑐾𑐏 𑐟𑐂𑐧𑐮𑐫𑑂‌ 𑐄𑐐𑐸 𑐖𑑂𑐫𑐵 𑐖𑐹𑐐𑐸 𑐳𑐩𑑂𑐰𑐟 𑐟𑐶𑐠𑐶 𑐎𑐠𑑄 𑐣𑐎𑑂𑐲𑐟𑑂𑐬, 𑐫𑑀𑐐, 𑐎𑐬𑐞, 𑐧𑐵𑐬, 𑐩𑐴𑐶𑐣𑐵 𑐰 𑐟𑑅𑐩𑑂𑐴𑑂‌ 𑐩𑐣𑐹𑐫𑐵 𑐣𑐵𑑄 𑐐𑑀𑐟𑑂𑐬 𑐰 𑐣𑑂𑐴𑐵𑐥𑐵𑐫𑐵 𑐥𑐸𑐳𑑂𑐟𑐵 𑐰 𑐮𑐶𑐥𑐵𑐫𑐵 𑐥𑐸𑐳𑑂𑐟𑐵𑐥𑐶𑐣𑐶𑐐𑐸 𑐣𑐵𑑄 𑐣𑑄 𑐄𑐮𑑂𑐮𑐾𑐏 𑐫𑐵𑐫𑐾𑐐𑐸 𑐥𑐬𑐩𑑂𑐥𑐬𑐵 𑐡𑐸 𑑋

𑐮𑑂𑐰𑐴𑑄𑐥𑐵𑐿 𑐀𑐨𑐶𑐮𑐾𑐏𑐫𑐵 𑐰𑐶𑐲𑐫𑐰𑐳𑑂𑐟𑐸 – 𑐧𑐸𑑃𑐡𑐵𑐐𑐟 𑐬𑐸𑐥𑑄 𑐎𑑂𑐰𑐫𑑂 𑐣𑑂𑐴𑑂𑐫𑐧𑑂𑐰𑐫𑐵 𑐔𑑂𑐰𑐣𑐵

𑑑 𑐡𑑂𑐫𑑅 𑐳𑐟𑑅, 𑐐𑐖𑐹, 𑐩𑐞𑑂𑐜, 𑐎𑐶𑐳𑐶, 𑐳𑐶𑑄𑐴, 𑐟𑑀𑐮𑑄, 𑐂𑐮𑐵𑑄 𑐟𑐫𑐾𑐐𑐸

𑑒. 𑐳𑐏𑑂𑐰𑐵𑑅 𑐥𑐵𑐫𑐾𑐐𑐸, 𑐔𑐵𑐎𑑅𑐩𑐟 𑐔𑑂𑐫𑐵𑐎𑐾𑐐𑐸, 𑐥𑐵𑐮𑑄 𑐫𑐵𑐎𑐾𑐐𑐸, 𑐨𑑂𑐰𑐫𑑂‌ 𑐣𑑂𑐫𑐵𑐫𑐾𑐎𑐾𑐐𑐸, 𑐳𑐮𑑂𑐴𑐸𑑄 𑐨𑑂𑐰𑐫𑑂‌ 𑐣𑑂𑐫𑐵𑐫𑐾𑐎𑐾𑐐𑐸

𑑓. 𑐡𑐔𑑂𑐕𑐶𑐫𑐵 𑐕𑐎: 𑐣𑑂𑐫𑐵𑐫𑐾𑐎𑐷𑐐𑐸 𑐖𑐵𑐟𑑂𑐬𑐵 𑐰 𑐣𑐏𑑅 𑐧𑐮𑐫𑑂‌ 𑐧𑐵𑐖𑐵 𑐏𑐮𑑅 𑐟𑐫𑐳𑑄 𑐧𑐵𑐖𑐵 𑐠𑐵: 𑐰𑐫𑑂𑐬𑐾𑐐𑐸

𑑔. 𑐐𑐸𑐠𑐶 𑐣𑑂𑐫𑐵𑐂𑐐𑐸 𑐃 𑐧𑐵𑐴𑐾𑐎 𑐩𑐾𑐐𑐸 𑐂𑐮𑐫𑑂‌ 𑐖𑑄𑐐𑐮𑐫𑐵 𑐳𑐶𑐩𑐵 𑐢𑑂𑐫𑐣𑐾 𑐩𑐡𑐿𑐐𑐸

𑑕, 𑐡𑑂𑐫𑑄𑑅 𑐳𑐟𑑅 𑐟𑐸𑑄 𑐴𑐶𑐟𑐶𑐂 𑐦𑑀𑐴𑐬 𑐩𑐫𑐵𑐫𑐾𑐐𑐸

𑑖. 𑐡𑐵𑐣 𑐧𑐶𑐫𑐵𑑅 𑐟𑑅𑐐𑐸 𑐎𑑂𑐫𑐧 𑐧𑐸𑑃 𑐖𑑂𑐫𑐵𑐣𑐵 𑐟𑑅𑐥𑐶𑐣𑑂𑐳𑑄 𑐠𑑅𑐟 𑐧𑐶𑐫𑐵𑐟𑑅𑐐𑐸 𑐡𑐵𑐫𑐶𑐟𑑂𑐰 𑐥𑐹𑐰𑑄𑐎𑐾 𑐩𑐵𑑅𑐐𑐸

𑑗. 𑐳𑐵𑐩𑐵𑐖𑐶𑐎 𑐰 𑐢𑐵𑐬𑑂𑐩𑐶𑐎 𑐖𑑂𑐫𑐵 𑐫𑐵𑐐𑐾𑐟 𑐟𑑂𑐰𑐵𑐮𑐫𑑂‌ 𑐔𑑂𑐰𑑄𑐥𑐶𑑄 𑐩𑐣𑐹𑐟𑐫𑐾𑐳𑑄 𑐠𑑅𑐎𑐾 𑐡𑐸𑐐𑐸 𑐀𑐣𑑂𑐣 𑐢𑐾𑐧𑐵 𑐴𑐵𑐥𑑄 𑐧𑐶𑐫𑐵𑑅 𑐣𑑂𑐴𑑂𑐫𑐵𑐎𑐾𑐐𑐸

𑑘,𑐕𑐐𑐹 𑐬𑐵𑐖𑑂𑐫 𑐩𑐾𑐐𑐸 𑐬𑐵𑐖𑑂𑐫 𑐡𑐠𑐸𑐂 𑐮𑑂𑐰𑐵𑐥𑐸 𑐖𑐸𑐂𑐧𑐮𑐫𑑂‌ 𑐟𑑂𑐫𑐵𑑅𑐥𑐶𑐣𑑂𑐳𑑄 𑐠𑑅𑐐𑐸 𑐰𑐶𑐖𑐫𑐫𑐵 𑐰𑐬𑑂𑐞𑐣 𑐰 𑐬𑐵𑐖𑑂𑐫 𑐧𑐶𑐳𑑂𑐟𑐵𑐬 𑐫𑐵𑐫𑐾 𑐦𑐫𑐾𑐩𑐵 𑐢𑐎𑐵𑑅 𑐱𑐎𑑂𑐟𑐶𑐫𑐵 𑐁𑐬𑐵𑐢𑐣𑐵 𑐫𑐵𑐫𑐾𑐐𑐸

𑑙. 𑐀𑐣𑐶𑐎𑐵𑐮 𑐰 𑐡𑐿𑐰𑐷 𑐥𑑂𑐬𑐎𑑀𑐥 𑐖𑐸𑐂𑐐𑐸 𑐂𑐮𑐫𑑂‌ 𑐬𑐵𑐖𑑂𑐫 𑐰 𑐥𑑂𑐬𑐖𑐵𑐫𑐵 𑐬𑐎𑑂𑐲𑐵𑐫𑐵 𑐎𑐵𑐩𑐣𑐵 𑐫𑐵𑐫𑐾𑐐𑐸

𑑑𑑐. 𑐳𑐵𑐩𑐵𑐖𑐶𑐎 𑐳𑐩𑐳𑑂𑐫𑐵𑐟 𑐰𑐂𑐐𑐸 𑐂𑐮𑐫𑑂‌ 𑐄𑐐𑐸 𑐳𑐩𑐳𑑂𑐫𑐵 𑐮𑐶𑐥𑐵 𑐖𑐸𑐮𑐎𑐶 𑐐𑐸𑐎𑐠𑑄 𑐫𑐵𑐫𑐾𑐐𑐸 𑐢𑐎𑐵: 𑐳𑐹𑐔𑑄 𑐖𑐵𑐴𑐾𑐬 𑐫𑐵𑐫𑐾𑐐𑐸

𑑑𑑑. 𑐳𑐵𑐩𑐵𑐖𑐶𑐎, 𑐬𑐵𑐖𑐣𑐿𑐟𑐶𑐎 𑐰 𑐢𑐵𑐬𑑂𑐩𑐶𑐎 𑐖𑑂𑐫𑐵𑐫𑑂‌ 𑐄𑐮𑑂𑐮𑑄𑐑𑐣 𑐫𑐵𑑅𑐩𑑂𑐴 𑐩𑐣𑐹𑐫𑐵𑐟 𑐕𑐸 𑐡𑐞𑑂𑐜 𑐧𑐶𑐂𑐐𑐸 𑐢𑐿𑐐𑐸 𑐄𑐮𑑂𑐮𑐾𑐏 𑐫𑐵𑐫𑐾𑐐𑐸

𑑑𑑒. 𑐥𑑂𑐬𑐖𑐵𑐥𑐵𑐏𑐾𑑄 𑐟:𑐐𑐸 𑐀𑐨𑐶𑐮𑐾𑐏𑐫𑑂‌ 𑐖𑐸𑐖𑐸𑐫𑐵 𑐫𑐱 𑐎𑐺𑐟𑐶 𑐧 𑐬𑐵𑐖𑑂𑐫 𑐰 𑐖𑐸𑐖𑐸𑐫𑐵 𑐰𑐬𑑂𑐞𑐣 𑐫𑐵𑐫𑐾𑐐𑐸

𑑑𑑓. 𑐂𑐮𑐫𑑂‌ 𑐧𑑂𑐫𑐮𑐐𑑂‌ 𑐖𑐸𑐫𑐵:𑐰𑑄𑐐𑐸 𑐩𑐴𑐟𑑂𑐰𑐥𑐹𑐬𑑂𑐞 𑐑𑐚𑐣𑐵 𑐰𑐬𑑂𑐞𑐣 𑐫𑐵𑐫𑐾𑐐𑐸

𑑑𑑔, 𑐥𑐸𑐬𑐵𑐞 𑐧 𑐢𑐵𑐬𑑂𑐩𑐶𑐎 𑐐𑑂𑐬𑐣𑑂𑐠𑐫𑐵 𑐀𑐰𑐡𑐵𑐣 𑐰 𑐱𑑂𑐮𑑀𑐎 𑐔𑑂𑐰𑐫𑐾𑐐𑐸

𑑑𑑑. 𑐢𑐵𑐬𑑂𑐩𑐶𑐎 𑐩𑐴𑐟𑑂𑐰𑐫𑐵 𑐰𑐳𑑂𑐟𑐸 𑐳𑑂𑐫𑑄𑐎𑐩𑑂𑐴 𑐩𑐣𑐹𑐫𑐵𑐟 𑐢𑐵𑐬𑑂𑐩𑐶𑐎 𑐏𑑂𑐫𑐵𑐔𑑂𑐰:𑐫𑐵 𑐰𑐬𑑂𑐞𑐣 𑐫𑐵𑐫𑐾𑐐𑐸

𑑑𑑖. 𑐬𑐵𑐖𑐣𑐿𑐟𑐶𑐎 𑐀𑐥𑐬𑐵𑐢 𑐫𑐵𑑅𑐩𑑂𑐴 𑐩𑐣𑐹𑐫𑐵𑐟 𑐳𑐵𑐩𑐵𑐖𑐶𑐎 𑐧𑐴𑐶𑐳𑑂𑐎𑐵𑐬 𑐰 𑐳𑐸𑑄 𑐩𑐣𑐹𑐟𑐫𑑂‌𑐳𑑄 𑐖𑑂𑐰𑐣𑐵 𑐴𑐫𑐾𑐐𑐸 𑐬𑐵𑐖𑐁𑐖𑑂𑐘𑐵 𑐰𑐬𑑂𑐞𑐣 𑐫𑐵𑐫𑐾𑐐𑐸

𑑑𑑗. 𑐬𑐵𑐖𑑂𑐫𑐫𑑂‌ 𑐳𑐩𑐳𑑂𑐫𑐵 𑐰𑐂𑑂𑐐𑐸 𑐂𑐮𑐫𑑂‌ 𑐖𑐣𑐟𑐵𑐟𑐫𑐳𑑄 𑐐𑑂𑐰𑐵𑐴𑐵𑐮𑐶 𑐫𑐵𑐫𑐾𑐩𑐵𑑅𑐐𑐸 𑐡𑐵𑐫𑐶𑐟𑑂𑐰 𑐧𑑀𑐢 𑐫𑐵𑐎𑐾𑐐𑐸

𑑑𑑘. 𑐬𑐵𑐖𑑂𑐫𑐫𑐵 𑐳𑐸𑐬𑐎𑑂𑐲𑐵 𑐰 𑐥𑑂𑐬𑐟𑐶𑐳𑑂𑐠𑐵𑐥𑐵 𑐖𑑂𑐫𑐵𑐫𑑂 𑐳𑐶𑐣𑐵𑑅 𑐰𑑄𑐥𑐶𑑄 𑐩𑐣𑐹𑐟𑐫𑐾𑐐𑐸 𑐴𑑁𑐳𑐮𑐵 𑐧𑐶𑐂 𑐎𑐠𑑄 𑐖𑐸𑐖𑐸𑑄 𑐐𑑂𑐰𑐵𑐴𑐵𑐮𑐶 𑐫𑐵𑐣𑐵: 𑐂𑐩𑐶𑐐𑐸 𑐣𑐵𑐩𑑄 𑐡𑑂𑐫𑑅 𑐳𑑂𑐠𑐵𑐥𑐣𑐵 𑐐𑐵𑐫𑐾𑐐𑐸

𑑑𑑙, 𑐥𑑂𑐬𑐖𑐵𑐫𑐵 𑐣𑑂𑐫𑐵𑐫 𑐣𑐶𑐳𑐵𑐦𑐫𑐵 𑐮𑐵𑐐𑐶 𑐳𑐵𑐩𑐵𑐖𑐶𑐎 𑐩𑐴𑐟𑑂𑐰 𑐡𑐸𑐐𑐸 𑐕𑐸𑑄 𑐣𑑄 𑐰𑐳𑑂𑐟𑐸 𑐐𑐸𑐎𑐠𑑄 𑐕𑑂𑐫𑐮𑐾𑐐𑐸 𑐢𑐿𑐐𑐸 𑐄𑐮𑑂𑐮𑐾𑐏 𑐫𑐵𑐫𑐾𑐐𑐸

𑑒𑑐. 𑐳𑐵𑑄𑐳𑑂𑐎𑐺𑐟𑐶𑐎 . 𑐖𑐵𑐟𑑂𑐬𑐵 𑐣𑐏𑑅 𑐧𑐮𑐫𑑂‌ 𑐩𑐵𑑅𑐐𑐸 𑐰𑐳𑑂𑐟𑐸 𑐰𑐵 𑐖𑑂𑐰𑐮𑑄𑐫𑐵 𑐢𑐮𑑅 𑐄𑐮𑑂𑐮𑐾𑐏 𑐫𑐵𑐫𑐾𑐐𑐸

𑑒𑑑. 𑐳𑐸 𑐳𑐸 𑐩𑐣𑐸𑐏𑑄 𑐕𑐸 𑐕𑐸 𑐖𑑂𑐫𑐵 𑐐𑐸𑐧𑐮𑐫𑑂‌ 𑐫𑐵𑐐𑐾𑐐𑐸 𑐢𑐎𑐵𑑅 𑐳𑐩𑑂𑐧𑐣𑑂𑐢𑐶𑐟 𑐩𑐣𑐹𑐫𑐵 𑐣𑐵𑑄 𑐄𑐮𑑂𑐮𑐾𑐏 𑐫𑐵𑐫𑐾𑐐𑐸

𑑒𑑒. 𑐠𑑅𑐩𑑂𑐴𑑄 𑐫𑐵𑐣𑐵𑐐𑐸 𑐖𑑂𑐫𑐵𑐫𑐵 𑐎𑐵𑐬𑐞 𑐕𑐸 𑐏𑑅 𑐁𑐳𑐫 𑐄𑐮𑑂𑐮𑐾𑐏 𑐫𑐵𑐫𑐾𑐐𑐸

𑑒𑑓. 𑐕𑐸𑑄 𑐣𑑄 𑐐𑐸𑐠𑐶 𑐰𑐵 𑐖𑐵𑐟𑑂𑐬𑐵𑐫𑐵 𑐣𑐶𑐫𑐩 𑐄𑐮𑑂𑐮𑐾𑐏 𑐫𑐵𑐫𑐾𑐐𑐸

𑑒𑑔. 𑐳𑐩𑐵𑐖 𑐰𑐵 𑐐𑐸𑐛𑐷 𑐡𑐸𑐣𑐾 𑐫𑐵𑐫𑐾𑐩𑐵𑑅𑐐𑐸 𑐥𑐹𑐖𑐵 𑐰𑐶𑐢𑐶 𑐧𑑂𑐰𑐫𑐾𑐞𑐸

𑑒𑑕. 𑐠𑑅𑐐𑐸 𑐐𑐸𑐛𑐷 𑐄𑐥𑐮𑐧𑑂𑐢 𑐖𑐹𑐐𑐸 𑐕𑐸𑑄 𑐣𑑄 𑐰𑐳𑑂𑐟𑐸 𑐣𑑂𑐫𑐫𑐵𑑅 𑐎𑐵𑐫𑐾𑐦𑐸 𑐢𑐎𑐵𑑅 𑐰𑐶𑐖𑑂𑐘𑐵𑐥𑐣 𑐫𑐵𑐫𑐾𑐐𑐸

𑑒𑑖. 𑐠𑑅𑐩𑑂𑐴𑑄 𑐥𑐮𑐶𑐳𑑂𑐠𑐵 𑐫𑐵𑐣𑐵𑐩𑑂𑐴 𑐡𑑂𑐫𑑅𑐫𑐵 𑐬𑐸𑐥 𑐰 𑐱𑐎𑑂𑐟𑐶 𑐰𑐬𑑂𑐞𑐣 𑐫𑐵𑐫𑐾𑐐𑐸
𑑒𑑗. 𑐕𑐸𑑄 𑐣𑑄 𑐀𑐥𑐬𑐵𑐢𑐫𑐵 𑐖𑑂𑐫𑐵𑐏𑑃𑐥𑑂‌ 𑐀𑐥𑐬𑐵𑐢𑐫𑐵 𑐥𑑂𑐬𑐎𑐺𑐟𑐶 𑐳𑑂𑐰𑐫𑐵𑑅 𑐳𑐸𑑄 𑐩𑐣𑐸𑐏𑑄 𑐡𑐞𑑂𑐜 𑐎𑐵𑐫𑐾𑐐𑐸 𑐢𑐿𑐐𑐸 𑐄𑐮𑑂𑐮𑐾𑐏 𑐫𑐵𑐫𑐾𑐐𑐸

𑑒𑑘. 𑐀𑐥𑑂𑐰: 𑐫𑐵𑐣𑐵 𑐳𑐵𑐩𑐵𑐖𑐶𑐎 𑐖𑑂𑐫𑐵𑐏𑑃𑐫𑑂‌ 𑐀𑐰𑐬𑑀𑐢 𑐴𑐫𑐵𑑅 𑐐𑑂𑐰𑐵𑐴𑐵𑐮𑐶 𑐩𑐫𑐵𑐟 𑐢𑐵𑑅𑐳𑐵 𑐳𑐵𑐩𑐵𑐖𑐶𑐎 𑐳𑑂𑐟𑐬𑑄 𑐣𑐶𑐳𑐵𑐦 𑐰 𑐡𑐞𑑂𑐜 𑐧𑐶𑐂𑐐𑐸 𑐳𑐸𑐣𑐵𑐣𑑄 𑐳𑐴𑐵𑐣𑐸𑐨𑐹𑐟𑐶 𑐟𑐫𑐵: 𑐟𑑂𑐰𑑅𑐟𑐵 𑐕𑑂𑐰𑐫𑐾 𑐡𑐂𑐩𑐏𑐸

𑑒𑑙. 𑐐𑐸𑐠𑐶𑐫𑐵 𑐖𑐐𑑂𑐐𑐵 𑐩𑐷 𑐩𑐵𑐮𑐾𑐐𑐸 𑐀𑐰𑐳𑑂𑐠𑐵𑐫𑑂‌ 𑐰 𑐥𑐵𑐏𑐾𑑄 𑐰𑑅𑐐𑐸 𑐢𑐾𑐧𑐵 𑐐𑐸𑐎𑐠𑑄 𑐕𑑂𑐫𑐮𑐾𑐐𑐸 𑐢𑐿𑐐𑐸 𑐰𑐬𑑂𑐞𑐣

𑑓𑑐. 𑐕𑐸𑑄 𑐣 𑐥𑐬𑐩𑑂𑐥𑐬𑐵 𑐳𑐸𑑄 𑐩𑐣𑐹 𑐳𑐷𑐰𑑄 𑐡𑐶𑐎𑐾 𑐩𑐖𑑂𑐫𑐹, 𑐧𑐵𑐖𑐵 𑐠𑐵𑐫𑐾𑐐𑐸 𑐬𑑀𑐎𑐾 𑐖𑐸𑐂𑐩𑐏𑐸 𑐢𑐎𑐵𑑅 𑐳𑐹𑐔𑑄 𑐣𑑂𑐴𑑂𑐫𑐧𑑂𑐰𑐫𑐾𑐐𑐸

𑑓𑑑. 𑐕𑐸𑑄 𑐣𑑄 𑐀𑐨𑐶𑐮𑐾𑐏 𑐰𑐵 𑐡𑑂𑐫𑑅 𑐳𑐟𑑅 𑐁𑐡𑐶 𑐳𑑂𑐫𑑄𑐎𑐹𑐩𑑂𑐴 𑐩𑐣𑐹𑐫𑐵𑐟 𑐥𑐘𑑂𑐔𑐩𑐴𑐵𑐥𑐵𑐥, 𑐣𑐶𑐳𑐣𑑂𑐟𑐵𑐣 𑐖𑐸𑐂𑐐𑐸 𑐖𑐸𑐐𑐵𑑃𑐖𑐸𑐐 𑐣𑐬𑐎𑐫𑑂‌ 𑐮𑐵𑐂𑐐𑐸 𑐳𑐬𑐵𑑅 𑐧𑐶𑐫𑐵𑐟𑑅𑐐𑐸 𑐡𑐸𑐳𑐵 𑐨𑐶𑑄𑐐𑐸 𑐧𑐵𑑄𑐮𑐵𑐐𑐸 𑐰 𑐳𑑄𑐬𑐎𑑂𑐲𑐞 𑐫𑐵𑑅𑐩𑑂𑐴 𑐩𑐣𑐹𑐫𑐵𑐟 𑐳𑐣𑑂𑐟𑐵𑐣, 𑐁𑐫 𑐰𑐺𑐡𑑂𑐢𑐶 𑐰 𑐮𑐴𑐶𑐣𑐵 𑐟:𑐩𑑂𑐴 𑐳𑐵𑑄 𑐫𑐎𑑂𑐰 𑐡𑐸𑐬𑐸 𑐧𑐶𑐂𑐩𑐵 𑐢𑐿𑐐𑐸 𑐎𑐵𑐩𑐣𑐵 𑐫𑐵𑐫𑐾𑐐𑐸 𑐁𑐡𑐶 𑑋