𑐮𑐮𑐶𑐟𑐰𑐶𑐳𑑂𑐟𑐬𑐫𑐵𑐟 𑐎𑐫𑐵𑑅 𑐔𑑂𑐰𑑅𑐐𑐸 𑐱𑑀𑐢𑐫𑐵 𑐳𑐦𑐹 𑐥𑐶𑐡𑐣

𑐋𑐟𑐶𑐴𑐵𑐳𑐶𑐎 𑐧𑑁𑐡𑑂𑐢 𑐐𑑂𑐬𑐣𑑂𑐠 𑐮𑐮𑐶𑐟𑐰𑐶𑐳𑑂𑐟𑐬𑐫𑐵𑐟 𑐎𑐫𑐵𑑅 𑐱𑑀𑐢𑐐𑑂𑐬𑐣𑑂𑐠 𑐫𑐵𑑅𑐐𑐸 𑐳𑐦𑐹 ‘𑐮𑐮𑐶𑐟𑐰𑐶𑐳𑑂𑐟𑐬 𑐱𑑀𑐢𑐐𑑂𑐬𑐣𑑂𑐠’ 𑐕𑐐𑐹 𑐖𑑂𑐫𑐵𑐗𑑂𑐰𑑅𑐫𑐵 𑐡𑐠𑐸𑐂 𑐥𑐶𑐟𑐧𑑂𑐰𑐖𑑂𑐫𑐵 𑐫𑐵𑑅𑐐𑐸 𑐡𑐸 𑑋 𑐃𑐮𑑀𑐴𑑄 𑐥𑑂𑐬𑐎𑐵𑐱𑐣𑐫𑐵 𑐮𑐸𑐏𑐵𑑄 𑐥𑐶𑐡𑑄𑐐𑐸 𑐄𑐐𑐸 𑐳𑐦𑐹 𑐣𑐬𑐾𑐱𑐰𑐷𑐬 𑐱𑐵𑐎𑑂𑐫𑑄 𑐔𑑂𑐰𑐫𑐵𑐡𑐷𑐐𑐸 𑐏𑑅 𑑋

𑐁𑐣𑐣𑑂𑐡𑐎𑐸𑐚𑐷 𑐰𑐶𑐴𑐵𑐬𑐫𑑂 𑐖𑐹𑐐𑐸 𑐕𑐐𑐹 𑐖𑑂𑐫𑐵𑐗𑑂𑐰𑑅𑐫𑐵 𑐡𑐠𑐸𑐂 𑐮𑐮𑐶𑐟𑐰𑐶𑐳𑑂𑐟𑐬𑐫𑐵𑐟 𑐎𑐫𑐵𑑅 𑐱𑑀𑐢𑐐𑑂𑐬𑐣𑑂𑐠 𑐫𑐵𑑅𑐐𑐸 𑐳𑐦𑐹𑐫𑐵 𑐰𑐶𑐴𑐵𑐬𑐫𑐵 𑐥𑑂𑐬𑐩𑐸𑐏 𑐨𑐶𑐎𑑂𑐲𑐸 𑐢𑐩𑑂𑐩𑐩𑐹𑐬𑑂𑐟𑐶 𑐩𑐴𑐵𑐳𑑂𑐠𑐰𑐶𑐬, 𑐨𑐶𑐎𑑂𑐲𑐸 𑐥𑐘𑑂𑐘𑐵𑐩𑐹𑐬𑑂𑐟𑐶, 𑐨𑐶𑐎𑑂𑐲𑐸 𑐥𑐶𑐫𑐡𑐳𑑂𑐳𑐷, 𑐮𑑀𑐚𑑂𑐳 𑐬𑐶𑐳𑐬𑑂𑐔 𑐳𑐾𑐣𑑂𑐚𑐬𑐫𑐵 𑐀𑐢𑑂𑐫𑐎𑑂𑐲 𑐥𑑂𑐬𑐵. 𑐜𑐵. 𑐳𑐸𑐬𑐾𑐣𑑂𑐡𑑂𑐬𑐩𑐵𑐣 𑐰𑐖𑑂𑐬𑐵𑐔𑐵𑐬𑑂𑐫, 𑐥𑑂𑐬𑐎𑐵𑐱𑐣𑐫𑐵 𑐳𑑄𑐬𑐎𑑂𑐲𑐎 𑐢𑐬𑑂𑐩𑐰𑐷𑐬 𑐱𑐵𑐎𑑂𑐫, 𑐳𑐦𑐹𑐫𑐵 𑐡𑐵𑐟𑐵 𑐥𑐡𑑂𑐩𑐵𑐡𑐾𑐰𑐷 𑐱𑐵𑐎𑑂𑐫 𑐰 𑐔𑑂𑐰𑐩𑐶 𑐱𑐵𑐎𑑂𑐫𑑄 𑐩𑑄𑐎𑐵𑑅𑐎𑐠𑑄 𑐰𑐶𑐩𑑀𑐔𑐣 𑐫𑐵𑐣𑐵𑐡𑐷𑐐𑐸 𑐏𑑅 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐰𑐶𑐴𑐵𑐬 𑐥𑑂𑐬𑐩𑐸𑐏 𑐨𑐶𑐎𑑂𑐲𑐸 𑐢𑐩𑑂𑐩𑐩𑐹𑐬𑑂𑐟𑐶 𑐩𑐴𑐵𑐳𑑂𑐠𑐰𑐶𑐬𑑄 𑐧𑐸𑐡𑑂𑐢 𑐢𑐬𑑂𑐩 𑐳𑐩𑑂𑐧𑐣𑑂𑐢𑐷 𑐴𑐬𑐾𑐎 𑐳𑐦𑐸𑐟𑐶𑑄 𑐧𑐶𑐫𑐵𑐔𑑂𑐰𑐣𑐷𑐐𑐸 𑐖𑑂𑐘𑐵𑐣𑐫𑐵𑐟 𑐠𑑅𑐐𑐸 𑐖𑐷𑐰𑐣𑐫𑑂 𑐣𑑄 𑐰𑑂𑐫𑐵𑐰𑐴𑐵𑐬𑐶𑐎 𑐬𑐸𑐥𑑄 𑐕𑑂𑐫𑐮𑐾 𑐦𑐫𑐾𑐎𑐾𑐩𑐵𑑅 𑐢𑐫𑐵𑐧𑐶𑐖𑑂𑐫𑐵𑐳𑐾 𑐮𑐮𑐶𑐟𑐰𑐶𑐳𑑂𑐟𑐬 𑐐𑑂𑐬𑐣𑑂𑐠𑐫𑐵 𑐱𑑀𑐢𑐫𑐵 𑐩𑐴𑐟𑑂𑐰𑐫𑐵𑐫𑐵 𑐰𑐶𑐲𑐫𑐫𑐵𑐟 𑐔𑐬𑑂𑐔𑐵 𑐫𑐵𑐣𑐵𑐧𑐶𑐖𑑂𑐫𑐵𑐟 𑑋

𑐔𑑂𑐰𑐩𑐶 𑐱𑐵𑐎𑑂𑐫𑑄 𑐧𑐸𑐡𑑂𑐢 𑐢𑐬𑑂𑐩𑐫𑑂 𑐳𑑂𑐣𑐵𑐟𑐎𑑀𑐟𑑂𑐟𑐬 𑐀𑐢𑑂𑐫𑐫𑐣𑐫𑐵 𑐗𑑂𑐰𑐮𑐫𑑂 ‘𑐮𑐮𑐶𑐟𑐰𑐶𑐳𑑂𑐟𑐬 𑐊𑐎 𑐟𑐸𑐮𑐣𑐵𑐟𑑂𑐩𑐎 𑐀𑑂𑐬𑐢𑑂𑐫𑐫𑐣’ 𑐰𑐶𑐲𑐫𑐫𑑂 𑐱𑑀𑐢 𑐔𑑂𑐰𑐫𑐵𑐐𑐸 𑐰 𑐄𑐎𑐶𑐫𑐵𑐟 𑐴𑐾 𑐳𑐦𑐹𑐫𑐵 𑐁𑐎𑐵𑐬 𑐧𑐶𑐫𑐵𑐐𑐸 𑐏𑑃 𑐎𑐣𑐵𑐡𑐶𑐮 𑑋 𑐮𑐶𑐳𑐾𑑄 𑐰𑐫𑑂𑐎𑐮𑑄 𑐧𑑁𑐡𑑂𑐢 𑐐𑑂𑐬𑐣𑑂𑐠𑐟 𑐨𑐵𑐬𑐟𑐫𑐵 𑐣𑐵𑐮𑐵𑐣𑑂𑐡𑐵 𑐰𑐶𑐱𑑂𑐰𑐰𑐶𑐡𑑂𑐫𑐵𑐮𑐫𑐫𑑂 𑐩𑐶𑑄 𑐣𑐫𑐾𑐢𑐸𑑄𑐎𑐵𑑅 𑐣𑐾𑐥𑐵𑐮𑐫𑑂 𑐖𑐎 𑐮𑑂𑐫𑐣𑐵𑐔𑑂𑐰𑑄𑐐𑐸 𑐏𑑃 𑐎𑐣𑐵𑐡𑐶𑐳𑐾𑑄 𑐠𑐸𑐐𑐸 𑐐𑑂𑐬𑐣𑑂𑐠𑐫𑐵𑐟 𑐴𑐵𑐎𑐣𑑄 𑐰𑐶𑐱𑑂𑐰𑐫𑑂 𑐥𑑂𑐬𑐔𑐵𑐬𑐫𑑂 𑐴𑐫𑐾𑐐𑐸 𑐮𑑂𑐫𑐵𑐏𑑄 𑐱𑑀𑐢 𑐔𑑂𑐰𑐫𑐵𑐐𑐸 𑐏𑑅 𑐢𑐫𑐵𑐡𑐶𑐮 𑑋 𑐖𑑂𑐫𑐵𑐗𑑂𑐰𑐮𑐫𑑂 𑐡𑐵𑐟𑐵 𑐱𑐵𑐎𑑂𑐫, 𑐳𑐾𑐣𑑂𑐚𑐬𑐫𑐵 𑐀𑐢𑑂𑐫𑐎𑑂𑐲 𑐥𑑂𑐬𑐵. 𑐜𑐵. 𑐰𑐖𑑂𑐬𑐵𑐔𑐵𑐬𑑂𑐫 𑐮𑐐𑐵𑐫𑐟𑑄 𑐳𑐦𑐹𑐫𑐵 𑐠𑐷𑐠𑐷 𑐥𑐎𑑂𑐲𑐫𑐵𑐟 𑐎𑐫𑐵𑑅 𑐣𑐸𑐐𑑅𑐏𑑃 𑐟𑐫𑐵𑐡𑐷𑐐𑐸 𑐏𑑅 𑑋

𑐣𑐾𑐥𑐵𑑅𑐫𑐵 𑐧𑑁𑐡𑑂𑐢 𑐏𑑂𑐫𑐮𑐫𑑂 𑐧𑐶𑐳𑑂𑐎𑑄 𑐩𑐴𑐟𑑂𑐰 𑐖𑐵𑑅𑐐𑐸 𑐮𑐮𑐶𑐟𑐰𑐶𑐳𑑂𑐟𑐬 𑐕𑐩𑑂𑐴 𑐴𑐾 𑐩𑐣𑐸𑐏𑑄 𑐕𑐎𑑂𑐰𑐮𑑄 𑐔𑑂𑐰𑑅𑐐𑐸 𑐩𑐏𑐸, 𑐠𑑂𑐰 𑐠𑐷𑐠𑐷 𑐂𑐮𑐫𑑂 𑐠𑐷𑐠𑐷 𑐰𑑂𑐫𑐎𑑂𑐟𑐶𑐥𑐶𑑄𑐳𑑄 𑐔𑑂𑐰𑑅𑐐𑐸 𑐐𑑂𑐬𑐣𑑂𑐠 𑐏𑑅 𑑋 𑐀𑐠𑐾 𑐴𑐾 𑐳𑐶𑐡𑑂𑐢𑐵𑐬𑑂𑐠 𑐐𑑁𑐟𑐩 𑐧𑐸𑐡𑑂𑐢 𑐖𑐐𑐟 𑐄𑐡𑑂𑐢𑐵𑐬 𑐰 𑐥𑑂𑐬𑐵𑐞𑐷 𑐴𑐶𑐟𑐫𑐵 𑐣𑐶𑑄𑐟𑐶𑑄 𑐟𑐸𑐳𑐶𑐟𑐵𑐨𑐸𑐰𑐣𑑄 𑐥𑐺𑐠𑑂𑐰𑐷𑐮𑑀𑐎𑐫𑑂 𑐡𑐶𑐰𑑂𑐫𑑀𑐥𑐫𑐡𑐾𑐱 𑐧𑐷𑐟 𑐟𑐸𑐫𑐸𑐩𑑂𑐴 𑐎𑐶𑐳𑐶𑐩𑑂𑐴𑐫𑑂 𑐔𑑂𑐰𑐣𑐵𑑅 𑐎𑐸𑐴𑐵𑑄 𑐧𑐶𑐖𑑂𑐫𑐵𑑅𑐐𑐸 𑐰 𑐰𑐣𑐵𑐬𑐳𑐫𑑂 𑐣𑑂𑐴𑐵𑐵𑐥𑐵𑑄𑐐𑐸 𑐢𑐬𑑂𑐩𑐔𑐎𑑂𑐬 𑐥𑑂𑐬𑐰𑐬𑑂𑐟𑐣 𑐧𑐶𑐫𑐵𑐟𑑅𑐐𑐸 𑐠𑐾𑑄𑐖𑑂𑐫𑐵𑑅𑐐𑐸 𑐏𑑃 𑐣𑑂𑐴𑑂𑐫𑐠𑐣𑐵𑐟𑑅𑐐𑐸 𑐡𑐸 𑑋