𑐫𑐾𑑃 𑐩𑐴𑐵𑐣𑐐𑐬𑐣𑑂𑐫𑑄𑐎𑑄 𑑘 𑐟𑐐𑐶𑑄𑐫𑐵 𑐣𑐾𑐥𑐵𑐮𑐨𑐵𑐲𑐵 𑐥𑐬𑐷𑐎𑑂𑐲𑐵

𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐥𑐵𑐏𑐾𑑄 𑐮𑐵𑐐𑐹 𑐫𑐵𑑅𑐐𑐸 𑐣𑐾𑐥𑐵𑐮𑐨𑐵𑐲𑐵 𑐰𑐶𑐲𑐫𑐫𑑂 𑐩𑑂𑐴𑐶𑐐𑑅 𑐩𑐴𑐵𑐣𑐐𑐬𑐣𑑂𑐫𑑄𑐎𑑄 𑐕𑐣𑑂𑐴𑐸𑑄 𑐴𑐾 𑑘 𑐟𑐐𑐶𑐩𑐫𑑂 𑐖𑐵𑑃𑐔 𑐎𑐵𑐫𑐾𑐐𑐸 𑐖𑑂𑐫𑐵 𑐖𑐸𑐮 𑑋 𑐫𑐾𑑃 𑐩𑐣𑐥𑐵 𑐡𑐸𑐣𑐾 𑐮𑐵𑑅𑐐𑐸 𑐎𑐬𑐶𑐧 𑑖𑑐𑑐 𑐐𑐹 𑐳𑑄𑐐𑐛𑐶𑐟 (𑐣𑐶𑐖𑐷) 𑐰 𑑙𑑖 𑐐𑐹 𑐳𑐵𑐩𑐸𑐡𑐵𑐫𑐶𑐎 (𑐳𑐬𑐎𑐵𑐬𑐷) 𑐳𑑂𑐎𑐸𑐮𑐫𑐵 𑐟𑐐𑐶𑑄 𑑘 𑐫𑑂 𑐩𑑂𑐴𑐶𑐐𑑅 𑐩𑐣𑐥𑐵𑐫𑐵 𑐱𑐶𑐎𑑂𑐲𑐵 𑐰𑐶𑐨𑐵𑐐𑑄 𑐴𑐾 𑐖𑐵𑑃𑐔 𑐎𑐵𑑅𑐐𑐸 𑐏𑑅 𑑋

𑐫𑐾𑑃 𑐩𑐴𑐵𑐣𑐐𑐬𑐣𑑂𑐫𑑄𑐎𑑄 𑑘 𑐟𑐐𑐶𑑄𑐫𑐵 𑐦𑐸𑐎𑑂𑐎𑑄 𑐰𑐶𑐲𑐫𑐫𑐵 𑐖𑐵𑑃𑐔 𑐩𑐣𑐥𑐵𑐫𑐵 𑐱𑐶𑐎𑑂𑐲𑐵 𑐎𑐵𑐬𑑂𑐫𑐵𑐮𑐫𑐥𑐵𑐏𑐾𑑄 𑐎𑐵𑐂𑐐𑐸 𑐏𑑅 𑑋 𑐠𑐸𑐎𑐶𑐫𑐵 𑐮𑐵𑐐𑐶𑑄 𑐣𑑂𑐴𑑂𑐫𑐳𑑅𑐥𑑁 𑐟𑐫𑐵𑐬 𑐫𑐵𑐫𑐾𑐐𑐸𑐣𑐶𑐳𑐾𑑄 𑐮𑐶𑐔𑑂𑐰𑑅 𑐥𑐶𑐟 𑐧𑐷𑐐𑐸 𑐖𑑂𑐫𑐵 𑐟𑐎𑑄 𑐱𑐶𑐎𑑂𑐲𑐵 𑐎𑐵𑐬𑑂𑐫𑐵𑐮𑐫𑑄 𑐫𑐵𑐂 𑑋 𑐀𑐠𑐾 𑐏𑑅𑐳𑐵𑑄 𑐣𑐾𑐥𑐵𑐮𑐨𑐵𑐲𑐵 𑐕𑐐𑐹 𑐰𑐶𑐲𑐫𑐫𑐵 𑐖𑐵𑑃𑐔 𑐢𑐵𑑅𑐳𑐵 𑐳𑐩𑑂𑐧𑐣𑑂𑐢𑐶𑐟 𑐳𑑂𑐎𑐸𑐮𑐟𑐫𑑂𑐳𑑄 𑐴𑐾 𑐠𑑅𑐠𑑅 𑐎𑐠𑑄 𑐎𑐵𑐫𑐾𑐐𑐸 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐏𑑅 𑑋 𑐟𑐬 𑐩𑑂𑐴𑐶𑐐𑑅 𑐢𑐵𑑅𑐳𑐵 𑐣𑐾𑐥𑐵𑐮𑐨𑐵𑐲𑐵𑐫𑐵 𑐣𑑂𑐴𑑂𑐫𑐳𑑅𑐥𑑁 𑐣𑑄 𑐱𑐶𑐎𑑂𑐲𑐵 𑐎𑐵𑐬𑑂𑐫𑐵𑐮𑐫𑑄 𑐴𑐾 𑐟𑐫𑐵𑐬 𑐫𑐵𑐣𑐵𑑅 𑐳𑑂𑐎𑐸𑐮 𑐳𑑂𑐎𑐸𑐮𑐫𑑂 𑐕𑑂𑐰𑑅𑐐𑐸 𑐏𑑅 𑑋 𑐁𑑅 𑐠𑐸𑐎𑐶𑐫𑐵 𑐮𑐶𑐔𑑂𑐰𑑅 𑐣𑑄 𑐱𑐶𑐎𑑂𑐲𑐵 𑐎𑐵𑐬𑑂𑐫𑐵𑐮𑐫𑑄 𑐴𑐾 𑐳𑐵𑐬𑑂𑐰𑐖𑐣𑐶𑐎 𑐫𑐵𑐂 𑑋

𑐩𑑂𑐴𑐶𑐐𑑅 𑐱𑐶𑐎𑑂𑐲𑐵 𑐎𑐵𑐬𑑂𑐫𑐵𑐮𑐫𑐥𑐵𑐏𑐾𑑄 𑐣𑐾𑐥𑐵𑐮𑐨𑐵𑐲𑐵 𑐰𑐶𑐲𑐫𑐫𑐵 𑐖𑐵𑑃𑐔 𑐖𑐸𑐫𑐵𑐔𑑂𑐰𑑄𑐐𑐸 𑐣𑐶𑐖𑐷 𑐳𑑂𑐎𑐸𑐮𑐫𑑂 𑐀𑐣𑐸𑐐𑐩𑐣 𑐫𑐵𑐎𑐾𑐐𑐸 𑐖𑑂𑐫𑐵 𑐣𑑄 𑐖𑐹𑐐𑐸 𑐏𑑅 𑑋 𑐣𑐶𑐖𑐷 𑐳𑑂𑐎𑐸𑐮𑐟𑐫𑑂𑐳𑑄 𑐣𑐾𑐥𑐵𑐮𑐨𑐵𑐲𑐵𑐫𑐵 𑐖𑐵𑑃𑐔 𑐎𑐫𑐵𑐔𑑂𑐰𑑄𑐐𑐸 𑐡𑐸 𑐰𑐵 𑐩𑐡𑐸, 𑐩𑐾𑐐𑐸 𑐰𑐶𑐲𑐫𑐫𑐵 𑐖𑐵𑑃𑐔 𑐎𑐫𑐵𑑅 𑐣𑑄 𑐣𑐾𑐥𑐵𑐮𑐨𑐵𑐲𑐵 𑐔𑑂𑐰𑐎𑐾𑐐𑐸 𑐫𑐵𑐣𑐵𑐔𑑂𑐰𑑄𑐐𑐸 𑐏𑑅 𑐮𑐵 𑐢𑐎𑐵𑑅 𑐳𑐷𑐎𑐾𑐟 𑐄𑐐𑐸 𑐀𑐣𑐸𑐐𑐩𑐣 𑐫𑐵𑐎𑐾𑐐𑐸 𑐖𑑂𑐫𑐵 𑐖𑐹𑐐𑐸 𑐏𑑅 𑑋

𑐀𑐣𑐸𑐐𑐩𑐣 𑐖𑐹𑐐𑐸 𑐦𑐸𑐎𑑂𑐎 𑐢𑐂𑐠𑐾𑑄 𑐳𑑂𑐎𑐸𑐮𑐫𑑂 𑐣𑐾𑐥𑐵𑐮𑐨𑐵𑐲𑐵𑐫𑐵 𑐖𑐵𑑃𑐔 𑐰𑐶𑐢𑐶𑐥𑐹𑐬𑑂𑐰𑐎 𑐎𑐫𑐵𑐔𑑂𑐰𑑄𑐐𑐸 𑐮𑐹𑐐𑐸 𑐏𑑃 𑐢𑐵𑑅𑐐𑐸 𑐡𑐸 𑑋 𑐐𑐸𑐮𑐶𑐏𑐾 𑐳𑑂𑐎𑐸𑐮𑐫𑑂 𑐱𑐶𑐎𑑂𑐲𑐎 𑐩𑐡𑐫𑐵𑑅 𑐣𑐾𑐥𑐵𑐮𑐨𑐵𑐲𑐵𑐫𑐵 𑐎𑐎𑑂𑐲𑐵 𑐩𑐖𑐹𑐐𑐸 𑐏𑑅𑐳𑐵𑑄 𑐖𑐵𑑃𑐔𑐫𑐵 𑐂𑐮𑐫𑑂 𑐢𑐵𑑅𑐳𑐵 𑐰𑐶𑐱𑐾𑐲 𑐎𑐎𑑂𑐲𑐵 𑐎𑐫𑐵𑑅 𑐖𑐹𑐳𑐵𑑄 𑐟𑐫𑐵𑐬𑐷 𑐫𑐵𑐣𑐵𑑅 𑐖𑐵𑑃𑐔 𑐎𑐵𑑅𑐐𑐸 𑐣𑑄 𑐮𑐹𑐐𑐸 𑐡𑐸 𑑋

𑐐𑐸𑐮𑐶𑑄 𑐳𑑂𑐎𑐸𑐮𑐫𑑂 𑐀𑐣𑐸𑐐𑐩𑐣𑐎𑐬𑑂𑐟𑐵𑐟𑐮𑐶𑐳𑐾 𑐏𑑃 𑐮𑑂𑐴𑐵𑐳𑐾𑑄 𑐖𑐵𑑃𑐔 𑐧𑐶𑐫𑐵𑐔𑑂𑐰𑑄𑐥𑐶𑑄 𑑘 𑐟𑐐𑐶𑑄𑐫𑐵 𑐰𑐶𑐡𑑂𑐫𑐵𑐬𑑂𑐠𑐷𑐟𑐫𑑂𑐳𑑄 𑐣𑑂𑐴𑑂𑐫𑐳𑑅𑐥𑑁 𑐏𑐵𑐳 𑐠𑐵𑐎𑐸 𑐩𑐖𑐹𑐐𑐸 𑐰 𑐠𑑅𑐥𑐶𑑄𑐳𑑄 𑐫𑐵𑐄𑑃𑐎 𑐮𑐶𑐳𑑅 𑐔𑑂𑐰𑐫𑐾𑐦𑐸 𑐢𑐎𑐵𑑅 𑐥𑑂𑐬𑐟𑐶𑐎𑑂𑐬𑐶𑐫𑐵 𑐧𑐶𑐄𑐐𑐸 𑐏𑑃 𑐣𑑄 𑐳𑐷𑐡𑐸𑐐𑐸 𑐡𑐸 𑑋