𑐩𑐣𑑂𑐟𑑂𑐬𑐷𑑄 𑐨𑐬𑑂‍𑐣𑐵 𑐮𑐵 𑐫𑐵𑐟, 𑐟𑐬 𑐩𑐔𑐵𑐟 𑐳𑑂𑐎𑐹𑐮 𑐩𑐰𑑄

𑐣𑐾𑐰𑐵: 𑐀𑐣𑐮𑐵𑐂𑐣 𑐣𑑂𑐫𑐸𑐖 | 𑑒𑑐𑑗𑑕 𑐱𑑂𑐬𑐵𑐰𑐞 𑑑, 𑐩𑑄𑐐𑐮𑐧𑐵𑐬 𑑐𑑙:𑑔𑑓:𑑕𑑔

𑐩𑐣𑑂𑐟𑑂𑐬𑐷 𑐰 𑐩𑐸𑐏𑑂𑐫𑐩𑐣𑑂𑐟𑑂𑐬𑐷𑐥𑐶𑐣𑑂𑐳𑑄 𑐴𑐾 𑐨𑐬𑑂‍𑐣𑐵 𑐫𑐵𑑅𑐥𑐶𑑄 𑐩𑐔𑐵𑐟 𑐳𑑂𑐎𑐹𑐮 𑐩𑐰𑑄𑐐𑐸 𑐏𑐧𑐬 𑐰𑑅𑐐𑐸 𑐡𑐸 𑑋

𑐤𑐹𑐡𑑃𑐫𑐵 𑐮𑐳𑐟𑐵𑐫 𑐮𑐵𑐎𑐵𑑅 𑐐𑑂𑐰𑐳𑐵𑑅 𑐐𑑂𑐰𑑅𑐐𑐸 𑐬𑐵𑐬𑐵 𑐩𑐴𑑀𑐟𑑂𑐳𑐰 𑐄𑐮𑐾𑐖𑑂𑐫𑐵 𑐫𑐵𑐫𑐾𑐟 𑐩𑐸𑐐𑐸 𑐠𑑂𑐫𑑄𑐎𑐹𑐪 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷𑐮𑐶𑐳𑐾𑑄 𑐩𑐣𑑂𑐟𑑂𑐬𑐷, 𑐩𑐸𑐏𑑂𑐫𑐩𑐣𑑂𑐟𑑂𑐬𑐷 𑐰 𑐣𑐾𑐟𑐵𑐥𑐶𑐣𑐶𑐐𑐸 𑐁𑐥𑐵𑐮𑑄 𑐄𑐥𑐳𑑂𑐠𑐶𑐟𑐶 𑐡𑐹𑐐𑐸 𑐡𑐸 𑑋

𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷𑑄 𑐳𑑂𑐠𑐵𑐣𑐷𑐫 𑐛𑐶𑐣𑑂𑐮𑐾 𑐳𑑂𑐫𑐵𑐒𑑂𑐴𑐸 𑐟𑐵𑐩𑐵𑐒𑐫𑐵𑐟 𑐰 𑐠𑑅 𑐖𑐴𑐵𑐣 𑐬𑐵𑐢𑐶𑐎𑐵 𑐱𑐵𑐎𑑂𑐫𑑄 𑐳𑑂𑐠𑐵𑐣𑐷𑐫 𑐕𑐶𑐬𑐶𑐒 𑐕𑐾𑐩𑑂𑐖𑑀𑐒 𑐮𑐵𑐩𑐵𑐫𑐵𑐟 𑐳𑑂𑐠𑐵𑐣𑐷𑐫 𑐧𑐸𑐡𑑂𑐢 𑐩𑐵𑐰𑐶𑐂 𑑑 𑐎𑐎𑑂𑐲𑐵𑐫𑑂 𑐨𑐬𑑂‍𑐣𑐵 𑐫𑐵𑐎𑐹𑐐𑐸 𑐏𑑅 𑑋 𑐣𑐶𑐪𑑄 𑐰𑐶𑐡𑑂𑐫𑐵𑐬𑑂‍𑐠𑐷𑐥𑐶𑐣𑑂𑐳𑑄 𑐁𑑅 𑐧𑑂𑐰𑐣𑐵𑐔𑑂𑐰𑑄𑐐𑐸 𑐡𑐸 𑑋

𑐟𑐬, 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷𑐫𑐵 𑐥𑐸𑐔𑑅 𑐫𑐾𑑃𑐫𑑂 𑐮𑐶𑐴𑐵𑑃 𑐰𑐫𑐾𑐢𑐸𑑄𑐎𑐵𑑅 𑐀𑐨𑐶𑐨𑐵𑐰𑐎 𑐰 𑐳𑑂𑐎𑐹𑐮𑐮𑐶𑐳𑐾 𑐕𑐸𑑄 𑐳𑐩𑑂𑐥𑐬𑑂‍𑐎 𑐩𑐡𑐸 𑑋

𑐄𑐮𑐾𑐖𑑂𑐫𑐵 𑐖𑑂𑐫𑐵𑐗𑑂𑐰𑐮𑐫𑑂 𑐴𑐾 𑐱𑐶𑐎𑑂𑐲𑐵𑐩𑐣𑑂𑐟𑑂𑐬𑐷 𑐐𑐶𑐬𑐶𑐬𑐵𑐖𑐩𑐞𑐶 𑐥𑑀𑐏𑐬𑐾𑐮𑑄 𑐳𑑂𑐠𑐵𑐣𑐷𑐫 𑐩𑐔𑐵 𑐎𑐬𑑂‍𑐩𑐵 𑐫𑑀𑐘𑑂𑐖𑐣 𑐮𑐵𑐩𑐵𑐫𑐵𑐟 𑑑 𑐎𑐎𑑂𑐲𑐵𑐫𑑂 𑐨𑐬𑑂‍𑐣𑐵 𑐫𑐵𑐎𑐹𑐐𑐸 𑐏𑑅 𑑋 𑐟𑐬, 𑐄𑐪 𑐰𑐶𑐡𑑂𑐫𑐵𑐬𑑂‍𑐠𑐷 𑐨𑐬𑑂‍𑐣𑐵𑐫𑐵 𑐡𑐶𑑄𑐣𑐶𑐳𑐾𑑄 𑐁𑑅𑐟 𑐳𑐩𑑂𑐥𑐬𑑂‍𑐎𑐫𑑂 𑐩𑐡𑐸𑐣𑐶 𑑋

𑐥𑑂𑐬𑐡𑐾𑐱 𑑒 𑐫𑐵 𑐩𑐸𑐏𑑂𑐫𑐩𑐣𑑂𑐟𑑂𑐬𑐷 𑐩𑑀𑐴𑐩𑑂𑐩𑐡 𑐮𑐵𑐮𑐧𑐵𑐧𑐸 𑐬𑐵𑐄𑐟𑑄 𑐥𑐬𑑂‍𑐳𑐵𑐫𑐵 𑑒 𑐰 𑐳𑐶𑐬𑐴𑐵 𑐰 𑐢𑐣𑐸𑐲𑐵𑐫𑐵 𑐕𑐪 𑐕𑐪 𑐫𑐵𑐣𑐵𑑅 𑐥𑑂𑐫𑐪 𑐩𑐔𑐵𑐥𑐶𑐣𑐶𑐐𑐸 𑐀𑐨𑐶𑐨𑐵𑐰𑐎𑐟𑑂𑐰 𑐐𑑂𑐬𑐴𑐞 𑐫𑐵𑐫𑐾𑐐𑐸 𑐑𑑀𑐲𑐞𑐵 𑐫𑐵𑑅𑐐𑐸 𑐏𑑅 𑑋 𑐟𑐬, 𑐁𑑅 𑐩𑐸𑐏𑑂𑐫𑐩𑐣𑑂𑐟𑑂𑐬𑐷 𑐬𑐵𑐄𑐟𑑄 𑐳𑑂𑐰𑐪 𑐩𑐔𑐵𑐟𑐫𑑂𑐐𑐸 𑐖𑐎 𑐀𑐨𑐶𑐨𑐵𑐰𑐎𑐟𑑂𑐰 𑐎𑐫𑐵𑐐𑐸 𑐡𑐵𑐧𑐷 𑐫𑐵𑐣𑐵𑐡𑐷 𑑋

𑐢𑐣𑐸𑐲𑐵𑐫𑐵 𑐩𑐶𑐠𑐶𑐮𑐵 𑐧𑐶𑐴𑐵𑐬𑐷 𑐣𑐐𑐬𑐥𑐵𑐮𑐶𑐎𑐵 𑑕 𑐥𑐬𑐟𑐷 𑐟𑑂𑐰𑐵𑑅𑐫𑐵 𑐣𑑂𑐫𑐵𑐡𑑃 𑐡𑐸𑐪 𑐩𑐔𑐵 𑐬𑐵𑐢𑐶𑐎𑐵 𑐡𑐵𑐳𑐫𑐵𑐟 𑐩𑐸𑐏𑑂𑐫𑐩𑐣𑑂𑐟𑑂𑐬𑐷 𑐬𑐵𑐄𑐟𑑄 𑐮𑑂𑐰𑑅𑐩𑑄𑐎𑐹𑐐𑐸 𑐡𑐸 𑑋

(𑐠𑑁𑑄 𑐣𑐾.𑐳𑑄. 𑑑𑑑𑑓𑑘 𑐡𑐶𑐮𑑂𑐮𑐵𑐠𑑂𑐰 𑐥𑑄𑐔𑐩𑐶 𑐩𑑄𑐐𑐮𑐰𑐵𑑅 𑐣𑐫𑐵𑑃 𑐥𑐟𑑂𑐬𑐶𑐎𑐵 𑐤𑐶𑐥𑐟𑐶𑐂 𑐥𑐶𑐡𑑄𑐐𑐸 𑐧𑐸𑐏𑑃)