𑐩𑐔𑐵 𑐨𑐬𑑂‍𑐣𑐵 𑐖𑐸𑐮 𑐎𑐶 𑐩𑐵𑑄𑐧𑑁 𑐝𑐸𑐎𑑂𑐎 !

-𑐳𑐸𑐬𑐾𑐱 𑐩𑐵𑐣𑐣𑑂𑐢𑐬

𑐳𑑂𑐰𑐣𑐶𑐐𑐮𑐫𑑂 𑐥𑑂𑐬𑐶–𑐳𑑂𑐎𑐹𑐮
𑐳𑐩𑐵𑐖𑐫𑑂 𑐖𑐸𑐫𑐵𑐔𑑂𑐰𑑄𑐐𑐸 𑐰𑐶𑐎𑐵𑐳𑐫𑐵 𑐐𑐟𑐶𑑄 𑐩𑐣𑐹𑐟𑐫𑑂𑐟 𑐱𑐶𑐎𑑂𑐲𑐵 𑐰 𑐳𑑂𑐰𑐵𑐳𑑂𑐠𑑂𑐫𑐥𑑂𑐬𑐟𑐶 𑐀𑐟𑐶𑐎𑑄 𑐖𑐵𑐐𑐬𑐸𑐎 𑐫𑐵𑐫𑐵𑑄 𑐴𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐠𑑅 𑐩𑐳𑑂𑐟𑐫𑑂 𑐱𑐶𑐎𑑂𑐲𑐵𑐡𑐷𑐎𑑂𑐲𑐵 𑐧𑐵𑑄𑐮𑐵𑐎 𑐖𑐸𑐂𑐩𑐵𑑅 𑐢𑐂𑐐𑐸 𑐏𑑃𑐫𑑂 𑐁𑑅 𑐴𑐬𑐾𑐎 𑐀𑐨𑐶𑐨𑐵𑐰𑐎 𑐳𑐔𑐾𑐟 𑐖𑐸𑐂𑐢𑐸𑑄𑐎𑐮 𑑋 𑐄𑐎𑐶𑐫𑐵 𑐴𑐾 𑐮𑐶𑐔𑑂𑐰𑑅 𑐎𑐠𑑄 𑐠𑑁𑑄𑐎𑐤𑐫𑑂 𑐩𑐳𑑂𑐟𑐫𑑂𑐟 𑐳𑑂𑐎𑐹𑐮 𑐰𑐣𑐾 𑐤𑑂𑐫𑑅 𑐴𑐾 𑐳𑑂𑐎𑐹𑐮𑐫𑐵 𑐮𑐵𑐐𑐶𑑄 𑐟𑐫𑐵𑐬 𑐫𑐵𑐂𑐐𑐸 ‘𑐥𑑂𑐬𑐶–𑐳𑑂𑐎𑐹𑐮’ 𑐟𑐐𑐶𑐩𑐫𑑂 𑐟𑐫𑐵𑑅 𑐁𑐏𑑅 𑐧𑑂𑐰𑑄𑐎𑐾𑐐𑐸 𑐔𑐮𑐣 𑐱𑐸𑐬𑐸 𑐖𑐸𑐫𑐵 𑐰𑑅𑐐𑐸 𑐡𑐸 𑑋

𑐠𑑁𑑄𑐎𑐤𑐫𑑂 𑐀𑐨𑐶𑐨𑐵𑐰𑐎𑐟𑐫𑑂 𑐦𑐸𑐬𑑂‍𑐳𑐡 𑐟𑐳𑐎𑑄 𑐎𑐩 𑑋 𑐟𑐬 𑐀𑐠𑐾 𑐮𑐶𑐩𑐮𑐵𑑅𑐐𑐸 𑐂𑐮𑐫𑑂 𑐣𑑄 𑐠𑑅 𑐩𑐳𑑂𑐟𑐫𑑂𑐳𑑄 𑐁𑐏𑑅 𑐧𑑂𑐰𑐣𑐾𑐐𑐸 𑐖𑐎 𑐩𑐏𑐸 𑐠𑑅𑐥𑐶𑑄𑐳𑑄 𑐳𑑂𑐫𑐣𑐾 𑐩𑐮𑐵𑑅𑐐𑐸 𑐩𑐾𑐩𑐾𑐐𑐸 𑐣𑑄 𑐁𑐥𑐵𑐮𑑄 𑐳𑐵𑐩𑐵𑐖𑐶𑐎–𑐳𑐵𑑄𑐳𑑂𑐎𑐺𑐟𑐶𑐎 𑐖𑑂𑐫𑐵𑐏𑑃𑐟 𑐳𑑂𑐫𑐣𑐵 𑐎𑐵𑐫𑐾𑐩𑐵 𑐢𑐎𑐵𑑅 𑐩𑐵𑑄𑐀𑐧𑐸𑐥𑐶𑑄 𑐦𑐫𑐵𑑄𑐦𑐕𑐶 𑐧𑐵𑑄𑐮𑐵𑑅𑐐𑐸 𑐥𑑂𑐬𑐶–𑐳𑑂𑐎𑐹𑐮 𑐧𑑂𑐰𑐣𑐾𑐎𑐸𑐠𑐶𑐟 𑐩𑐵𑑅 𑐖𑐸𑐫𑐵𑐔𑑂𑐰𑑄𑐐𑐸 𑐡𑐂 𑑋 𑐳𑑂𑐰𑐣𑐶𑐐𑐮𑐫𑑂 𑐀𑐥𑑂𑐰𑐫𑐵 𑐰𑑅𑐐𑐸 𑐖𑐣𑐳𑑄𑐏𑑂𑐫𑐵𑐫𑐵 𑐣𑐵𑐥𑐣𑐵𑐥𑑄 𑐠𑐖𑑂𑐫𑐵𑑅𑐐𑐸 𑐥𑑂𑐬𑐶–𑐳𑑂𑐎𑐹𑐮𑐟𑐫𑑂 𑐮𑑂𑐫𑐵𑑅 𑐣𑑄 𑐀𑐥𑑂𑐰𑐫𑐵𑑄 𑐟𑐸𑑄 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋

𑐠𑑁𑑄𑐎𑐤𑐫𑑂 𑐳𑑂𑐰𑐣𑐶𑐐𑑅 𑐡𑐸𑐣𑐾 𑐖𑐎 𑑑𑑓𑑐𑑐 𑐣𑐶𑐳𑐾𑑄 𑑑𑑔𑑐𑑐 𑐐𑐹 𑐟𑐎 𑐥𑑂𑐬𑐶–𑐳𑑂𑐎𑐹𑐮 𑐧𑑂𑐰𑐣𑐾𑐎𑐸𑐠𑐶𑐟 𑐔𑐵𑐮𑐵𑐔𑑂𑐰𑑄𑐐𑐸 𑐀𑐣𑐸𑐩𑐵𑐣 𑐡𑐸 𑑋 𑐀𑐖𑑂𑐫𑐵𑑅𑐐𑐸 𑐴𑐬𑐾𑐎 𑐥𑑂𑐬𑐶–𑐳𑑂𑐎𑐹𑐮𑐫𑑂 𑐍𑐳𑐟 𑑖𑑐 𑐪𑐫𑐵 𑐮𑑂𑐫𑐵𑐏𑑄 𑐰𑐶𑐡𑑂𑐫𑐵𑐬𑑂‍𑐠𑐷𑐟 𑐁𑐏𑑅 𑐧𑑂𑐰𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐥𑑂𑐬𑐶–𑐳𑑂𑐎𑐹𑐮 𑐧𑑂𑐰𑐣𑐷𑐥𑐶𑑄 𑐩𑐳𑑂𑐟𑐫𑑂𑐐𑐸 𑐱𑐿𑐎𑑂𑐲𑐶𑐎 𑐰𑐶𑐎𑐵𑐳 𑐖𑐎 𑐩𑐏𑐸 𑐧𑑁𑐡𑑂𑐢𑐶𑐎, 𑐱𑐵𑐬𑐷𑐬𑐶𑐎 𑐰 𑐩𑐵𑐣𑐳𑐶𑐎 𑐰𑐶𑐎𑐵𑐳 𑐳𑐩𑐾𑐟 𑐖𑐸𑐂𑐐𑐸 𑐰𑐶𑐱𑑂𑐰𑐵𑐳 𑐫𑐵𑐣𑐵 𑐟𑑅𑐐𑐸 𑐡𑐸 𑑋

𑐄𑐎𑐶𑑄 𑐀𑐣 𑐧𑐷𑐐𑐸 𑐱𑐶𑐎𑑂𑐲𑐵 𑐣𑑄 𑐠𑐸𑐎𑐷 𑐴𑐾 𑐎𑐾𑐣𑑂𑐡𑑂𑐬𑐶𑐟 𑐖𑐸𑐫𑐵𑐔𑑂𑐰𑑄𑐐𑐸 𑐡𑐂 𑑋 𑐠𑑅 𑐩𑐔𑐵𑐫𑐵𑐟 𑐕𑐐𑐹 𑐥𑑂𑐬𑐶–𑐳𑑂𑐎𑐹𑐮𑐫𑑂 𑐨𑐬𑑂‍𑐣𑐵 𑐫𑐵𑐣𑐵 𑐧𑐶𑐮 𑐀𑐣 𑐰𑐫𑐵𑐐𑐸 𑐳𑐩𑑂𑐥𑐹𑐬𑑂‍𑐞 𑐟𑐴𑐫𑐵 𑐰𑐶𑐎𑐵𑐳 𑐖𑐸𑐂 𑐢𑐎𑐵𑑅 𑐩𑐵𑑄𑐧𑑁𑐥𑐶𑑄 𑐝𑐸𑐎𑑂𑐎 𑐴𑐾 𑐖𑐸𑐫𑐵𑐔𑑂𑐰𑑄𑐐𑐸 𑐡𑐂 𑑋 𑐩𑐾𑐩𑐾𑐐𑐸 𑐳𑑂𑐎𑐹𑐮𑐫𑑂 𑐩𑐳𑑂𑐟𑐫𑑂𑐟 𑐎𑐾𑐰𑐮 𑐔𑑂𑐰𑐫𑐾–𑐧𑑂𑐰𑐣𑐾𑐐𑐸 𑐖𑐎 𑐳𑑂𑐫𑐣𑐾𑐐𑐸 𑐫𑐵𑐂 𑑋 𑐟𑐬 𑐥𑑂𑐬𑐶–𑐳𑑂𑐎𑐹𑐮𑐫𑑂 𑐔𑑂𑐰𑐫𑐾–𑐧𑑂𑐰𑐣𑐾𑐐𑐸 𑐖𑐎 𑐩𑐏𑐸 𑐩𑐳𑑂𑐟𑐫𑑂 𑐱𑐵𑐬𑐷𑐬𑐶𑐎 𑐰𑐶𑐎𑐵𑐳 𑐖𑐸𑐂𑐐𑐸 𑐐𑐟𑐶𑐰𑐶𑐢𑐶, 𑐩𑐵𑐣𑐳𑐶𑐎 𑐰𑐶𑐎𑐵𑐳 𑐖𑐸𑐂𑐐𑐸 𑐀𑐨𑑂𑐫𑐵𑐳 𑐰 𑐧𑑁𑐡𑑂𑐢𑐶𑐎 𑐰𑐶𑐎𑐵𑐳 𑐖𑐸𑐂𑐐𑐸 𑐟𑐬𑐶𑐎𑐵 𑐳𑐩𑐾𑐟 𑐳𑑂𑐫𑐣𑐵𑐔𑑂𑐰𑑄𑐐𑐸 𑐡𑐂 𑑋

𑐩𑐳𑑂𑐟𑐫𑑂𑐟 𑐩𑐳𑑂𑐟𑐫𑑂𑐐𑐸 𑐴𑐾 𑐨𑐵𑐳𑑄 𑐠𑐖𑑂𑐫𑐵𑑅𑐐𑐸 𑐖𑑂𑐘𑐵𑐣 𑐧𑐷𑐩𑐵𑑅𑐐𑐸 𑐖𑐸𑐫𑐵𑑅 𑐰 𑐀𑑅𑐥𑐸𑐐𑐸 𑐖𑑂𑐫𑐵 𑐢𑐵𑑅𑐳𑐵 𑐩𑐏𑐸 𑑋 𑐩𑐾𑐐𑐸 𑐏𑑃, 𑐀𑐨𑐶𑐨𑐵𑐰𑐎𑐟 𑐰𑑂𑐫𑐳𑑂𑐟 𑐖𑐸𑐫𑐵𑐔𑑂𑐰𑑄𑐐𑐸 𑐂𑐮𑐫𑑂 𑐟𑐎𑑄 𑐩𑐳𑑂𑐟𑐫𑑂 𑐳𑐸𑐬𑐎𑑂𑐲𑐵 𑐖𑐸𑐂𑐩𑐵 𑐢𑐂𑐐𑐸 𑐏𑑃𑐫𑑂 𑐣𑑄 𑐄𑐩𑐶 𑐢𑑂𑐫𑐵𑐣 𑐰𑐣𑐵𑐔𑑂𑐰𑑄𑐐𑐸 𑐡𑐂 𑑋 𑐠𑑂𑐰 𑐎𑐵𑐬𑐞𑑄 𑐩𑐔𑐵 𑐣𑐶𑐡𑑃 𑐡𑐫𑐾𑐰𑑄 𑐴𑐾 𑐰𑑂𑐫𑐳𑑂𑐟 𑐀𑐨𑐶𑐨𑐵𑐰𑐎𑐟 𑐧𑐵𑑄𑐮𑐵𑑅𑐐𑐸 𑐰𑐵 𑐡𑑄𑐐𑐸 𑐖𑐎 𑐩𑐏𑐸 𑐳𑐸𑐬𑐎𑑂𑐲𑐶𑐟 𑐣𑑄 𑐖𑐸𑐂𑐐𑐸 𑐥𑑂𑐬𑐶–𑐳𑑂𑐎𑐹𑐮 𑐩𑐵𑑅 𑐖𑐸𑐫𑐵𑐔𑑂𑐰𑑄𑐐𑐸 𑐡𑐂 𑑋

𑐬𑐶–𑐳𑑂𑐎𑐹𑐮 𑐩𑐳𑑂𑐟𑐫𑑂𑐐𑐸 𑐱𑐿𑐎𑑂𑐲𑐶𑐎, 𑐱𑐵𑐬𑐷𑐬𑐶𑐎, 𑐩𑐵𑐣𑐳𑐶𑐎, 𑐧𑑁𑐡𑑂𑐢𑐶𑐎 𑐁𑐡𑐶 𑐦𑐸𑐎𑑂𑐎 𑐴𑐾 𑐥𑐎𑑂𑐲𑐫𑐵 𑐰𑐶𑐎𑐵𑐳 𑐖𑐸𑐂𑐩𑐵 𑐢𑐂𑐐𑐸 𑐄𑐡𑑂𑐡𑐾𑐱𑑂𑐫𑑄 𑐔𑐵𑐫𑐾𑐎𑐷𑐐𑐸 𑐏𑑅 𑑋 𑐄𑐎𑐶𑑄 𑐥𑑂𑐬𑐶–𑐳𑑂𑐎𑐹𑐮 𑐔𑐵𑐫𑐾𑐎𑐾𑐧𑐮𑐫𑑂 𑐖𑐸𑐂𑐐𑐸 𑐮𑐵𑐐𑐟 𑐩𑐾𑐩𑐾𑐐𑐸 𑐳𑑂𑐎𑐹𑐮 𑐳𑑂𑐰𑐫𑐵𑑄 𑐀𑐥𑑂𑐰𑑅 𑐴𑐾 𑐡𑐸 𑑋 𑐠𑑁𑑄𑐎𑐤𑐫𑑂 𑐳𑑂𑐰𑐣𑐶𑐐𑑅𑐫𑐵 𑐦𑐸𑐎𑑂𑐎 𑐴𑐾 𑐥𑑂𑐬𑐶–𑐳𑑂𑐎𑐹𑐮𑐟 𑐀𑐠𑐾 𑐫𑐎𑑂𑐰 𑐮𑐵𑐐𑐟 𑐟𑐫𑐵𑑅 𑐴𑐾 𑐳𑐘𑑂𑐔𑐵𑐮𑐣 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋

𑐟𑐬 𑐬𑐵𑐖𑑂𑐫𑐥𑐵𑐏𑐾𑑄 𑐏𑐵𑐳 𑐔𑐶𑐄𑐟𑐵𑑅 𑐩𑐟𑑅𑐐𑐸 𑐰𑐶𑐲𑐫 𑐖𑐹𑐐𑐸𑐮𑐶𑑄 𑐠𑐸𑐎𑐷 𑐫𑐵𑐣𑐵𑐐𑐸 𑐮𑐐𑐵𑐣𑐷 𑐳𑐸𑐬𑐎𑑂𑐲𑐶𑐟 𑐴𑐾 𑐖𑐸𑐂 𑐢𑐎𑐵𑑅 𑐢𑐵𑐫𑐾 𑐩𑐦𑐸𑐐𑐸 𑐏𑑃 𑐥𑑂𑐬𑐶–𑐳𑑂𑐎𑐹𑐮𑐟𑐫𑑂𑐐𑐸 𑐳𑑄𑐐𑐛𑐣 ‘𑐁𑐥𑐾𑐣’ 𑐫𑐵 𑐣𑐵𑐫𑑅 𑐧𑐡𑑂𑐬𑐷 𑐡𑐴𑐵𑐮𑑄 𑐎𑐣𑐾𑐐𑐸 𑐫𑐵𑐣𑐵𑐡𑐷 𑑋 𑐰𑐫𑑂𑐎𑐮𑑄 𑐎𑐣𑐵𑐡𑐷 𑐎𑐠𑑄 𑐥𑑂𑐬𑐶–𑐳𑑂𑐎𑐹𑐮 𑐔𑐵𑐫𑐾𑐎𑐾𑐐𑐸 𑐏𑑅𑐳𑐵 𑐣𑐐𑐬𑐥𑐵𑐮𑐶𑐎𑐵𑐫𑑂 𑐡𑐬𑑂‍𑐟𑐵 𑐕𑐐𑐹 𑐫𑐵𑑅𑐳𑐵 𑐐𑐵𑑅 𑑋 𑐰𑐫𑐵𑑄 𑐮𑐶𑐥𑐵 𑐳𑐬𑐎𑐵𑐬𑑄 𑐣𑑄 𑐠𑐸𑐎𑐶𑐫𑐵𑐟 𑐰𑐵𑐳𑑂𑐟𑐵 𑐫𑐵𑑅 𑐰𑐂 𑐩𑐏𑐸 𑑋

𑐐𑐸𑐮𑐶𑐏𑐾 𑐥𑑂𑐬𑐶–𑐳𑑂𑐎𑐹𑐮𑐫𑑂 𑐧𑐵𑑄𑐮𑐵𑑅𑐐𑐸 𑐱𑐶𑐎𑑂𑐲𑐵𑐫𑐵 𑐣𑐵𑐩𑐫𑑂 𑐰𑐶𑐡𑐾𑐱𑐷 𑐎𑑀𑐬𑑂‍𑐱 𑐣𑑄 𑐧𑑂𑐰𑑄𑐎𑐵𑐔𑑂𑐰𑑄𑐐𑐸 𑐡𑐸 𑑋 𑐀𑐖𑑂𑐫𑐵𑑅𑐐𑐸 𑐎𑑀𑐬𑑂‍𑐱 𑐡𑐸𑐣𑐾 𑐮𑐵𑑅𑐐𑐸 𑐳𑐦𑐹 𑐰 𑐄𑐎𑐶𑐫𑐵 𑐥𑐵𑐛 𑐦𑐸𑐎𑑂𑐎 𑐴𑐾 𑐰𑐶𑐡𑐾𑐱𑐷 𑐥𑐺𑐲𑑂𑐛𑐨𑐹𑐩𑐶𑐫𑐵𑐐𑐸 𑐖𑐸𑐫𑐵𑐔𑑂𑐰𑐣𑐷 𑑋 𑐠𑐸𑐎𑐶𑑄 𑐫𑐵𑐣𑐵𑑅 𑐩𑐳𑑂𑐟𑐫𑑂𑐟 𑐠𑑅𑐐𑐸 𑐴𑐾 𑐡𑐾𑐱, 𑐠𑑅𑐐𑐸 𑐳𑑄𑐳𑑂𑐎𑐺𑐟𑐶, 𑐖𑐷𑐰𑐣𑐱𑐿𑐮𑐷 𑐧𑐵𑐬𑐾 𑐰𑑂𑐫𑐵𑐰𑐴𑐵𑐬𑐶𑐎 𑐖𑑂𑐘𑐵𑐣 𑐧𑐷 𑐦𑐂 𑐩𑐏𑐸 𑑋 𑐠𑑂𑐰 𑐧𑐵𑐬𑐾 𑐀𑐢𑑂𑐫𑐎𑑂𑐲 𑐡𑐵𑐴𑐵𑐮𑐫𑐵 𑐢𑐵𑐥𑐹 𑐡𑐸 – 𑐥𑑂𑐬𑐶𑐳𑑂𑐎𑐹𑐮 𑐢𑐂𑐐𑐸 𑐩𑐳𑑂𑐟𑐫𑑂 𑐩𑐵𑐣𑐳𑐶𑐎–𑐧𑑁𑐡𑑂𑐢𑐶𑐎 𑐰𑐶𑐎𑐵𑐳 𑐖𑐸𑐂𑐐𑐸 𑐠𑐵𑐫𑑂 𑐏𑑅 𑐄𑐎𑐶𑑄 𑐀𑐣 𑐠𑑅𑐐𑐸 𑐴𑐾 𑐡𑐾𑐱𑐫𑐵 𑐨𑐵𑐲𑐵 𑐳𑑄𑐳𑑂𑐎𑐺𑐟𑐶 𑐳𑑂𑐫𑐣𑐾𑐐𑐸 𑐖𑑂𑐫𑐵 𑐫𑐵𑐫𑐾𑐩𑐵𑑅 𑑋

𑐄𑐎𑐶𑑄 𑐁𑐩 𑐀𑐨𑐶𑐨𑐵𑐰𑐎𑐟𑐫𑑂𑐎𑐾 𑐣𑑄 𑐔𑐾𑐟𑐣𑐵𑐫𑐵 𑐰𑐶𑐎𑐵𑐳 𑐖𑐸𑐂 𑐮𑑂𑐫𑑄 𑐡𑐣𑐶 𑑋 𑐥𑑂𑐬𑐶–𑐳𑑂𑐎𑐹𑐮𑐫𑑂 𑐩𑐳𑑂𑐟𑐫𑑂𑐟 𑐁𑐏𑑅 𑐖𑐎 𑐩𑐏𑐸 𑐖𑐷𑐰𑐣𑐫𑑂 𑐩𑐡𑐫𑐾𑐎 𑐩𑐐𑐵𑑅𑐐𑐸 𑐩𑐾𑐩𑐾𑐐𑐸 𑐣𑑄 𑐁𑐥𑐵𑐮𑑄 𑐰𑐶𑐲𑐫𑐟 𑐳𑑂𑐫𑐣𑐷 𑑋 𑐄𑐎𑐶𑑄 𑐄𑐎𑐶𑐫𑐵 𑐮𑐵𑐐𑐶𑑄 𑐡𑐎𑑂𑐲 𑐰 𑐰𑐶𑐱𑐾𑐲 𑐟𑐵𑐮𑐶𑐩 𑐴𑐾 𑐎𑐫𑐵𑐟𑑅𑐥𑐶𑑄 𑐱𑐶𑐎𑑂𑐲𑐎𑐟 𑐁𑐰𑐱𑑂𑐫𑐎 𑐡𑐸 𑑋 𑐟𑐬 𑐗𑐷𑐠𑐵𑐫𑑂 𑐀𑐖𑑂𑐫𑐵𑑅𑐐𑐸 𑐖𑐣𑐱𑐎𑑂𑐟𑐶𑐫𑐵 𑐟𑑅𑐢𑑄𑐐𑐸 𑐀𑐨𑐵𑐰 𑐡𑐸 𑑋

𑐠𑐖𑑂𑐫𑐵𑑅𑐐𑐸 𑐖𑐣𑐱𑐎𑑂𑐟𑐶 𑐟𑐫𑐵𑐬 𑐫𑐵𑐫𑐾𑐐𑐸 𑐖𑑂𑐫𑐵𑐫𑑂 𑐬𑐵𑐖𑑂𑐫𑐥𑐵𑐏𑐾𑑄 𑐢𑑂𑐫𑐵𑐣 𑐧𑐷𑐩𑐵𑑅𑐐𑐸 𑐣𑑄 𑐀𑐢𑑂𑐫𑐎𑑂𑐲 𑐡𑐵𑐴𑐵𑐮𑐫𑐵 𑐩𑐵𑐐 𑐡𑐸 𑑋 𑐥𑑂𑐬𑐶–𑐳𑑂𑐎𑐹𑐮𑐟 𑐐𑐣 𑐐𑐣, 𑐐𑐸𑐮𑐶 𑐡𑐹𑐬𑐷 𑐡𑐸𑐣𑐾 𑐔𑐵𑐫𑐾𑐎𑐾 𑐡𑐂 𑐢𑐂𑐐𑐸 𑐕𑐐𑐹 𑐩𑑂𑐫𑐵𑐥𑐶𑐒 𑐳𑐩𑐾𑐟 𑐥𑐶𑐎𑐫𑐵 𑐧𑐷𑐩𑐵𑑅𑐐𑐸 𑐣𑑄 𑐰𑐫𑑂𑐎𑑅𑐫𑐵 𑐁𑐐𑑂𑐬𑐴 𑐡𑐸 𑑋 𑐖𑐣𑐳𑑄𑐏𑑂𑐫𑐵 𑐰𑐺𑐡𑑂𑐢𑐶𑑄 𑐫𑐵𑐣𑐵𑑅 𑐥𑑂𑐬𑐶–𑐳𑑂𑐎𑐹𑐮𑐟𑐫𑑂 𑐩𑐵𑐐 𑐣𑑄 𑐀𑐥𑑂𑐰𑐫𑐾𑐎𑐵𑐔𑑂𑐰𑑄𑐐𑐸 𑐡𑐸 𑑋 𑐟𑐬 𑐬𑐵𑐖𑑂𑐫𑐥𑐵𑐏𑐾𑑄 𑐕𑐸𑑄 𑐴𑐾 𑐳𑑄𑐬𑐎𑑂𑐲𑐞 𑐩𑐡𑐸𑐐𑐸 𑐖𑐸𑐫𑐵𑑅 𑐠𑐸𑐎𑐷 𑐫𑐵𑐂𑐐𑐸 𑐮𑐐𑐵𑐣𑐷 𑐳𑐸𑐬𑐎𑑂𑐲𑐶𑐟 𑐖𑐹 𑐣𑑄 𑐢𑐵𑐫𑐾 𑐩𑐕𑐶𑑄 𑑋

𑐠𑐠𑐾 𑐖𑐹𑐐𑐸 𑐎𑐵𑐬𑐞𑑄 𑐡𑐾𑐱𑐫𑑂 𑐡𑐸𑐐𑐸 𑐦𑐸𑐎𑑂𑐎 𑐴𑐾 𑐥𑑂𑐬𑐶–𑐳𑑂𑐎𑐹𑐮𑐟𑐫𑑂𑐐𑐸 𑐕𑐐𑐹 𑐳𑑄𑐐𑐛𑐣 𑐣𑑄 𑐡𑐫𑐾𑐎𑐹𑐐𑐸 𑐏𑑅 𑑋 𑐳𑑄𑐐𑐛𑐣 𑐡𑐸𑐳𑐵𑑄 𑐁𑑅 𑐟𑐎 𑐠𑐸𑐎𑐷 𑐦𑐸𑐎𑑂𑐎𑑄 𑐥𑑂𑐬𑐶–𑐳𑑂𑐎𑐹𑐮𑐟 𑐳𑐡𑐳𑑂𑐫 𑐖𑐹 𑐰𑑅𑐐𑐸 𑐢𑐵𑑅𑐳𑐵 𑐩𑐡𑐸𑐣𑐶 𑑋 𑐄𑐎𑐶𑑄 𑐥𑐾𑐱𑐵𑐐𑐟 𑐴𑐎𑐴𑐶𑐟 𑐳𑐸𑐬𑐎𑑂𑐲𑐶𑐟 𑐫𑐵𑐣𑐵 𑐟𑐫𑐾𑐐𑐸 𑐏𑑅𑐳𑐵 𑐳𑐎𑐮𑐾𑑄 𑐥𑑂𑐬𑐶–𑐳𑑂𑐎𑐹𑐮𑐟 𑐳𑑄𑐐𑐛𑐣𑐫𑑂 𑐁𑐰𑐡𑑂𑐢 𑐖𑐹 𑐰𑐫𑐾𑐩𑐵𑑅𑐐𑐸 𑐁𑐴𑑂𑐰𑐵𑐣 𑐣𑑄 𑐀𑐢𑑂𑐫𑐎𑑂𑐲 𑐡𑐵𑐴𑐵𑐮𑑄 𑐫𑐵𑐣𑐵𑐡𑐷 𑑋

𑐏𑐟𑐸𑑄 𑐩𑐵𑑄𑐀𑐧𑐸𑐥𑐶𑑄𑐳𑑄 𑐠𑑅 𑐩𑐳𑑂𑐟𑐫𑑂𑐟 𑐥𑑂𑐬𑐶–𑐳𑑂𑐎𑐹𑐮𑐫𑑂 𑐨𑐬𑑂‍𑐣𑐵 𑐫𑐵𑐫𑐾𑐐𑐸 𑐔𑐮𑐣 𑐀𑐥𑑂𑐰𑐫𑐵 𑐰𑑅𑐳𑐵𑑄 𑐀𑐣 𑐔𑑂𑐰𑐣𑐵𑑅 𑐠𑑅 𑐩𑐳𑑂𑐟𑐫𑑂𑐳𑑄 𑐰𑐵𑐳𑑂𑐟𑐰𑐫𑑂 𑐕𑐸 𑐕𑐸 𑐳𑐫𑐾𑐎𑐵 𑐎𑐵𑐫𑐾𑐩𑐵𑑅 𑐢𑐂𑐐𑐸 𑐏𑑃𑐫𑑂 𑐁𑐥𑐵𑐮𑑄 𑐀𑐨𑐶𑐨𑐵𑐰𑐎𑐟 𑐀𑐣𑐨𑐶𑐖𑑂𑐘 𑐴𑐾 𑐟𑐶𑐣𑐶 𑑋 𑐀𑐨𑐶𑐨𑐵𑐰𑐎𑐟𑐫𑑂 𑐠𑑂𑐰 𑐀𑐣𑐨𑐶𑐖𑑂𑐘𑐟𑐵𑐫𑐵 𑐮𑐧𑑅 𑐥𑑂𑐬𑐶–𑐳𑑂𑐎𑐹𑐮 𑐳𑐘𑑂𑐔𑐵𑐮𑐎𑐟𑐫𑑂𑐳𑑄 𑐎𑐫𑐵𑐔𑑂𑐰𑑄𑐐𑐸 𑐖𑐸𑐂𑐦𑐸 𑑋 𑐀𑐖𑑂𑐫𑐵𑑅𑐐𑐸 𑐏𑑃𑐫𑑂 𑐥𑑂𑐬𑐶–𑐳𑑂𑐎𑐹𑐮 𑐳𑐘𑑂𑐔𑐵𑐮𑐎𑐟 𑐠𑑅 𑐴𑐾 𑐂𑐩𑐵𑐣𑐡𑐵𑐬 𑐖𑐸𑐂𑐩𑐵𑑅 𑑋 𑐫𑐡𑐶 𑐡𑐎𑑂𑐲𑐟𑐵 𑐰 𑐳𑐷𑐥 𑐡𑐟 𑐢𑐵𑑅𑐳𑐵 𑐠𑑂𑐰 𑐣𑐾𑐥𑐵𑐮𑐫𑑂 𑐁𑑅 𑐢𑐩𑐵𑐢𑐩 𑐴𑐾 𑐧𑐝𑐾 𑐖𑐸𑐫𑐵 𑐰𑐣𑐷𑐐𑐸 𑐳𑐾𑐰𑐵𑐩𑐹𑐮𑐎 𑐰𑑂𑐫𑐰𑐳𑐵𑐫 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋