𑐧𑐵𑐏𑑄 – 𑐎𑐣𑑂𑐴𑐫𑑂‌𑐫𑐵 𑐳𑐸𑐠

𑐣𑐵𑐬𑐡 𑐰𑐖𑑂𑐬𑐵𑐔𑐵𑐬𑑂𑐫

𑐚𑐾𑐧𑐸𑐮 𑑋
𑐚𑐾𑐧𑐸𑐮𑐫𑐵 𑐡𑑂𑐫𑑅𑐣𑐾 𑐕𑐥𑐵𑑅 𑐎𑐶𑐥𑐵 𑑋
𑐎𑐶𑐥𑐵𑐫𑐵 𑐣𑑂𑐴𑑂𑐫𑑅𑐣𑐾 𑐔𑑂𑐫𑐵𑐣𑐵𑐔𑑂𑐰𑐣 𑐕𑐥𑑂𑐰𑐵𑑅 𑐡𑐾𑐰𑐵 𑑋
𑐔𑐸𑐥𑐔𑐵𑐥 𑑋 𑐔𑐸𑐥𑐔𑐵𑐥 𑑋 𑐔𑐸𑐥𑐔𑐵𑐥 𑑋

xxx

𑐥𑐶𑐣𑐾 –

𑐟𑐟𑑅𑐢𑑄𑐐𑐸 𑐢𑐵𑐎𑐸𑐦𑐫𑑂 𑐰𑐮 𑑋 𑐢𑐸𑐦𑑂𑐰𑑅 𑐡𑐣 𑑋 𑐰𑐵 𑐰𑐮 𑑋 𑐥𑑂𑐰𑑃 𑐰𑐮 𑑋 𑐳𑐶𑐣𑑂𑐡𑐸𑐬 𑐖𑐵𑐟𑑂𑐬𑐵 𑐖𑐸𑐮 ….𑐐𑐠𑐾 𑐩𑑂𑐴𑐶𑐐𑑅 𑐩𑑂𑐴𑐷𑐐 𑐣𑑄 𑐖𑐹 𑑋

𑐟𑐬,

𑐠𑑂𑐰 𑐦𑐸𑐎𑑂𑐎𑑄 𑐏𑑄 𑐧𑐾𑐏𑐧𑐬 𑑋 𑐣𑐶𑐳𑑂𑐟𑐧𑑂𑐢 𑐩𑑁𑐣 𑑋 𑐠𑑂𑐰 𑐎𑑂𑐰𑐠𑐵 𑑋

𑐎𑑂𑐰𑐠𑐵𑐫𑑂 𑐩𑐣𑐹𑐟 𑐡𑐸 𑑋 𑐟𑐬 𑐳𑐎𑐮𑐾𑑄 𑐳𑐎𑐮𑐾𑑄 𑐳𑐸𑐩𑑂𑐎 𑐳𑐸𑐩𑑂𑐎 𑑋 𑐎𑐸𑐥𑑂𑐥 𑑋 𑐩𑑁𑐣 𑑋 𑐕𑐩𑑂𑐴 𑐮𑐶𑐳𑐾 𑐩𑐾𑐩𑑂𑐴 𑐟𑐵𑐟𑐵𑐥𑐵𑐎𑑂𑐎 𑑋 𑐕𑐏𑐾 𑐕𑐏𑐾 𑑋 𑐧𑐶𑐳𑑂𑐎𑑄 𑐧𑐶𑐳𑑂𑐎𑑄 𑑋

𑐦𑐸𑐎𑑂𑐎𑐳𑐶𑐫𑐵 𑐩𑐶𑐏𑐵 𑐩𑐶𑐏𑐵𑐫𑑂 𑐖𑐵𑐫𑐾𑐎 𑐖𑐵𑐫𑐾𑐎 𑐏𑑂𑐰𑐧𑐶 𑐡𑐸 𑑋 𑐣𑐸𑐐𑐮𑐫𑑂 𑐟𑐫𑐵𑑄𑐟𑐫𑐾𑐠𑐵𑐫𑑂 𑐩𑐡𑐫𑐾𑐎 𑐥𑐷𑐜𑐵 𑐡𑐸 𑑋 𑐐𑑂𑐫𑐵𑑅 𑐔𑐶𑐎𑐸 𑐣𑑄 𑐡𑐸 𑑋 𑐀𑐮𑐾 𑐳𑐎𑐮𑐾𑑄 𑐳𑐎𑐮𑐾𑑄 𑐁𑐟𑑄𑐎𑐶𑐟 𑐣𑑄 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋

𑐎𑑂𑐰𑐠𑐵 𑐱𑐹𑐣𑑂𑐫 𑐏𑑅 𑑋 𑐕𑐟𑐶𑑄 𑐴𑐵𑑅𑐳𑑅 𑐩𑐡𑐸 𑑋 𑐟𑐬 𑐣𑑄 𑐀𑐣 𑐳𑐸𑐣𑐵𑐩𑐶 𑐧𑐵𑑅 𑐰𑐿𑐔𑑂𑐰𑑄𑐐𑐸 𑐡𑐸 𑑋 𑐡𑐶𑐐𑐶𑐡𑐶𑐐𑐶 𑐨𑑂𑐰𑐏𑐵𑐫𑑂 𑐧𑑂𑐰𑐿𑐔𑑂𑐰𑑄𑐐𑐸 𑐡𑐸 𑑋 𑐣𑑂𑐫𑑄𑐎 𑐣𑐸𑐐𑐮𑐫𑑂 𑐣𑐸𑐐𑐮𑐫𑑂 𑐎𑑀𑐮𑐵𑐴𑐮 𑐣𑑂𑐫𑐣𑐵𑐔𑑂𑐰𑑄𑐐𑐸 𑐡𑐸 𑑋

𑐁𑑅 𑐕𑐸 𑐖𑐸𑐂𑐐𑐸 𑐏𑑅 ?  𑐐𑐠𑐾 𑐖𑐸𑐂𑐐𑐸 𑐏𑑅 ? 𑐫𑐵𑐫𑐾𑐐𑐸 𑐕𑐸 𑐏𑑅 𑐁𑑅 ? 𑐳𑐸𑐣𑐵𑑄 𑐣𑑄 𑐕𑐸𑑄 𑐢𑐵𑐫𑐾𑐦𑐸𑐐𑐸 𑐩𑐡𑐸 𑑋 𑐳𑐸𑐫𑐵𑐐𑐸 𑐣𑑄 𑐧𑐸𑐡𑑂𑐢𑐶𑑄 𑐕𑐸𑑄 𑐖𑑂𑐫𑐵 𑐫𑐵𑐣𑐵𑐔𑑂𑐰𑑄𑐐𑐸 𑐩𑐡𑐸 𑑋

𑐳𑐎𑐮𑐾𑑄 𑐳𑐎𑐮𑐾𑑄 𑐖𑐶𑐮𑑂𑐮 𑐖𑐶𑐮𑑂𑐮 𑑋 𑐰𑐵𑐟𑐵𑑄 𑐰𑐵𑐟𑐵𑑄 𑑋

𑐔𑐸𑐥𑐔𑐵𑐥 𑑋 𑐔𑐸𑐥𑐔𑐵𑐥 𑑋 𑐔𑐸𑐥𑐔𑐵𑐥 𑑋

xxx

𑐏𑑅 𑑋 𑐳𑐎𑐳𑐶𑐣𑑄 𑐳𑑂𑐫𑐹 𑑋 𑐰𑑅𑐥𑐶𑑄 𑐰𑐣𑐾𑐩𑐵𑑅 𑑋 𑐟𑐬, 𑐠𑐣 𑐰𑑄𑐩𑑂𑐴 𑐀𑐖𑐸𑐔𑐵𑐫𑐵 𑐥𑐸𑐎𑑂𑐎 𑐰𑐣 𑑋 𑐩𑐣𑑄 𑐩𑐏𑐣𑐵 𑐎𑐠𑑄 𑐰𑐣 𑑋

𑐳𑐾𑐣𑐵𑑄 𑐢𑐹𑐥𑑂𑐰𑑅 𑐔𑐶𑐣𑐾 𑐠𑐾𑑄 𑐥𑑂𑐮𑐵𑐲𑑂𑐚𑐶𑐎𑐮𑐫𑑂 𑐳𑐷𑐩𑑂𑐴 𑐥𑑂𑐰𑑅 𑐔𑐶𑐣𑐵𑑅 𑐩𑐳𑐵𑐣𑐫𑑂 𑐄𑐂𑐟 𑐖𑑂𑐰𑐣𑐵 𑐰𑐣 𑑋

𑐎𑐸𑐟𑐵𑑅 𑑋 𑐳𑐷 𑐧𑐵𑐖𑑄 𑑋 𑐳𑐣𑐵𑑄 𑐰𑐣𑐾𑐐𑐸 𑑋 𑐧𑐶𑐔𑐵𑑅 𑐦𑐫𑑂𑐐𑐸 𑑋 𑐮𑑂𑐰𑑅𑐔𑐵𑑅 𑑋 𑐩𑑂𑐴𑑂𑐫𑐵𑐫𑑂‌𑐩𑐳𑑂𑐟 𑐏𑑂𑐰𑐫𑐵𑑅 𑐰𑐫𑐾𑐐𑐸 𑑋 𑐣𑑂𑐴𑐫𑑂𑐣𑐸𑐩𑐵 𑐟𑐫𑐾𑐐𑐸 𑑋 𑐱𑑂𑐬𑐵𑐡𑑂𑐢 𑐁𑐡𑐶 𑐂𑐟𑑂𑐫𑐵𑐡𑐶 𑐳𑐎𑐟𑐵𑑄 𑐳𑐎𑐟𑐵𑑄 𑐠𑑂𑐰 𑐩𑐴𑐵𑐩𑐵𑐬𑐷𑐫𑐵 𑐏𑐸𑐳𑐶𑑄 𑐔𑐸𑐂𑐎𑐵 𑐫𑐣 𑑋

xxx

𑐚𑐾𑐧𑐸𑐮 𑑋
𑐚𑐾𑐧𑐸𑐮𑐫𑐵 𑐡𑑂𑐫𑑅𑐣𑐾 𑐕𑐥𑐵𑑅 𑐎𑐶𑐥𑐵 𑑋
𑐎𑐶𑐥𑐵𑐫𑐵 𑐣𑑂𑐴𑑂𑐫𑑅𑐣𑐾 𑐔𑑂𑐫𑐵𑐣𑐵𑐔𑑂𑐰𑐣 𑐡𑐾𑐰𑐵 𑐕𑐥𑑂𑐰𑐵𑑅 𑑋
𑐦𑐶𑐬𑐦𑐶𑐬 𑐦𑐶𑐬𑐦𑐶𑐬, 𑐦𑐳𑑄 𑐳𑑄𑐎𑐵𑐔𑑂𑐰𑐣 𑐔𑑂𑐫𑐵𑐣𑐵𑐔𑑂𑐰𑑄𑐐𑐸 𑐡𑐾𑐰𑐵 𑑋

𑐧𑐵𑐔𑐵 𑐦𑐥𑐸𑐮𑐾 𑐢𑐸𑑄𑐎𑐮 𑑋 𑐳𑐸𑐫𑐵𑑄 𑐩𑐶𑐏𑐵𑐫𑑂 𑐣𑑂𑐴𑑂𑐫𑑅 𑐩𑐡𑐸 𑑋 𑐦𑐸𑐎𑐳𑐶𑐫𑐵 𑐩𑐶𑐏𑐵 𑐢𑑂𑐰𑐵𑐏𑐵 𑐔𑐵𑑅 𑐠𑐾𑑄 𑐔𑐵𑐮𑐵𑐔𑑂𑐰𑑄𑐐𑐸 𑐡𑐸 𑑋

𑐳𑐎𑐮𑐾𑑄 𑐴𑐾 𑐟𑑂𑐬𑐳𑐶𑐟 𑐰 𑐁𑐟𑑄𑐎𑐶𑐟 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐩𑐳𑑂𑐫𑐹, 𑐎𑐣𑑂𑐴𑐫𑑂‌𑐫𑐵 𑐳𑐸𑐠𑑄 𑐳𑐸𑐫𑐵 𑐳𑐸𑐫𑐵 𑐥𑐶𑐳𑐶𑐁𑐬 𑐬𑐶𑐥𑑀𑐬𑑂𑐚 𑐥𑑀𑐖𑐶𑐚𑐶𑐨 𑐖𑑂𑐰𑐣𑐵𑑅 𑐰𑐿𑐐𑐸 𑐏𑑅 ?

–𑑐–