𑐤𑐵𑐥𑐵𑑄𑐪 𑐨𑐵𑐲𑐶𑐎 𑐱𑐴𑐷𑐡 𑐱𑐸𑐎𑑂𑐬𑐬𑐵𑐖 𑐖𑑀𑐱𑐷

𑐣𑐬𑐾𑐱𑐰𑐷𑐬 𑐱𑐵𑐎𑑂𑐫

𑐪𑐶𑐐𑑅 𑑒𑑑 𑐦𑐬𑐰𑐬𑐷 𑐎𑐸𑐤𑐸 𑐰𑐶𑐱𑑂𑐰 𑐩𑐵𑐟𑐺𑐨𑐵𑐲𑐵 𑐡𑐶𑐰𑐳 𑐣𑐾𑐥𑐵𑐮𑐫𑑂 𑐣𑑄 𑐠𑐷𑐠𑐷 𑐖𑑂𑐫𑐵𑐗𑑂𑐰𑑅𑐟 𑐫𑐵𑐣𑐵𑑅 𑐴𑐣𑐾 𑐎𑑂𑐰𑐔𑐵𑐫𑐾𑐎𑐹𑐐𑐸 𑐡𑐸 𑑋 𑐏𑐫𑑂𑐟 𑐮𑐵 𑐣𑐾𑐥𑐵𑐮𑐫𑑂 𑐁𑐥𑐵𑐮𑑄 𑐡𑐶𑐰𑐳𑐟 𑐴𑐣𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸, 𑐟𑐬 𑐰𑐶𑐱𑑂𑐰 𑐩𑐵𑐟𑐺𑐨𑐵𑐲𑐵 𑐡𑐶𑐰𑐳𑐫𑐵𑐟 𑐳𑐬𑐎𑐵𑐬𑐷 𑐣𑐶𑐎𑐵𑐫𑐟𑐫𑑂𑐐𑐸 𑐴𑐾 𑐳𑑄𑐮𑐐𑑂𑐣𑐟𑐵𑐫𑑂 𑐴𑐣𑐾𑐐𑐸 𑐖𑑂𑐫𑐵𑐗𑑂𑐰𑑅 𑐤𑑂𑐫𑐵𑑅𑐐𑐸 𑐫𑐎𑑂𑐰 𑐩𑐡𑐸𑐣𑐶 𑑋 𑑒𑑑 𑐦𑐬𑐰𑐬𑐷𑐫𑐵𑐟 𑐰𑐶𑐱𑑂𑐰 𑐩𑐵𑐟𑐺𑐨𑐵𑐲𑐵 𑐡𑐶𑐰𑐳 𑐎𑐠𑑄 𑐴𑐣𑐾𑐐𑐸 𑐣𑐶𑐬𑑂‍𑐞𑐫 𑐳𑑄𑐫𑐸𑐎𑑂𑐟 𑐬𑐵𑐲𑑂𑐚𑑂𑐬 𑐳𑑄𑐑𑑄 𑐑𑑀𑐲𑐞𑐵 𑐫𑐵𑐫𑐾𑐢𑐸𑑄𑐎𑐵𑑅 𑐄𑐎𑐶𑐫𑐵 𑐳𑐡𑐳𑑂𑐫 𑐬𑐵𑐲𑑂𑐚𑑂𑐬𑐟𑐫𑑂𑐳𑑄 𑐧𑐵𑐢𑑂𑐫𑐵𑐟𑑂𑐩𑐎 𑐳𑑂𑐠𑐶𑐟𑐶𑐂 𑐴𑐣𑐾𑐩𑐵𑑅𑐐𑐸 𑐀𑐰𑐳𑑂𑐠𑐵 𑐰𑑅𑐐𑐸 𑐏𑑅 𑑋

𑐣𑐾𑐥𑐵𑑅 𑐣𑑄 𑐠𑐸𑐎𑐶𑐫𑐵 𑐳𑐡𑐳𑑂𑐫 𑐬𑐵𑐲𑑂𑐚𑑂𑐬 𑐖𑐹𑐐𑐸 𑐎𑐵𑐬𑐞𑑄 𑐠𑐸𑐐𑐸 𑐡𑐶𑑄 𑐳𑐬𑐎𑐵𑐬𑐷𑐳𑑂𑐟𑐬𑑄 𑐴𑐣𑐾 𑐴𑐾 𑐩𑐵𑑅𑐐𑐸 𑐧𑐵𑐢𑑂𑐫𑐟𑐵 𑐡𑐸 𑑋 𑐩𑐏𑐸𑐳𑐵 𑐣𑐾𑐥𑐵𑑅 𑐠𑐾𑑄𑐖𑐵𑑅𑐐𑐸 𑐧𑐴𑐸𑐨𑐵𑐲𑐶𑐎 𑐡𑐾𑐱𑐫𑑂 𑐁𑐥𑐵𑐮𑑄 𑐩𑐵𑐟𑐺𑐨𑐵𑐲𑐵 𑐤𑐣𑐵 𑐰𑐣𑐾𑐢𑐸𑑄𑐎𑐹𑐐𑐸 𑐀𑐰𑐳𑑂𑐠𑐵 𑐡𑐸 𑑋 𑐄𑐎𑐶𑐳𑐣𑑄 𑐳𑐬𑐎𑐵𑐬𑐷 𑐣𑐷𑐟𑐶𑐫𑐵 𑐴𑐾 𑐎𑐵𑐬𑐞𑑄 𑐐𑐸𑐮𑐶𑐏𑐾 𑐩𑐵𑐟𑐺𑐨𑐵𑐲𑐵 𑐩𑑂𑐰𑐵𑐫𑐾 𑐴𑐾 𑐩𑐦𑐫𑐵𑐰𑑄𑐐𑐸 𑐣𑑄 𑐰𑐵𑐳𑑂𑐟𑐰𑐶𑐎𑐟𑐵 𑐏𑑅 𑑋
𑐣𑐾𑐥𑐵𑑅 𑐕𑐐𑐹 𑐰𑐶𑐰𑐶𑐢 𑐨𑐵𑐲𑐵𑐨𑐵𑐲𑐷𑐟𑐫𑑂𑐐𑐸 𑐀𑐣𑐾𑐎𑑁𑑄 𑐩𑐵𑐟𑐺𑐨𑐵𑐲𑐵 𑐡𑐸𑐐𑐸 𑐡𑐾𑐫𑑂 𑐏𑑅 𑑋

𑐣𑐾𑐥𑐵𑑅 𑐠𑐾𑑄𑐖𑑂𑐫𑐵𑑅𑐐𑐸 𑐔𑐷𑐢𑑄𑐐𑐸 𑐡𑐾𑐱𑐫𑑂 𑐣𑑄 𑐳𑐬𑐎𑐵𑐬𑐷𑐳𑑂𑐟𑐬𑑄 𑐴𑐾 𑐠𑐣 𑑑𑑒𑑓 𑐐𑐹 𑐨𑐵𑐲𑐵 𑐯𑐵𑐂𑐥𑐶𑑄 𑐩𑐣𑐹𑐟 𑐡𑐸 𑐢𑐫𑐵𑐐𑐸 𑐟𑐠𑑂𑐫𑐵𑐒𑑂𑐎 𑐥𑐶𑐟 𑐴𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐠𑐸𑐮𑐶 𑐰𑐶𑐰𑐶𑐢𑐟𑐵𑑄 𑐖𑐵𑑅𑐐𑐸 𑐨𑐵𑐲𑐶𑐎 𑐳𑑂𑐠𑐶𑐟𑐶𑐫𑐵𑐟 𑐠𑐣𑐫𑐵 𑐳𑐬𑐎𑐵𑐬𑑄 𑐐𑐧𑐮𑐾𑑄 𑐴𑐾 𑐨𑐵𑐲𑐵 𑐳𑑄𑐬𑐎𑑂𑐲𑐞𑐫𑐵 𑐣𑐶𑑄𑐟𑐶𑑄 𑐫𑑀𑐖𑐣𑐵 𑐡𑐫𑐾𑐎𑐵𑑅 𑐖𑑂𑐫𑐵 𑐫𑐵𑑅𑐐𑐸 𑐥𑑂𑐬𑐟𑐶𑐰𑐾𑐡𑐣 𑐏𑐣𑐾 𑐩𑐡𑐸 𑑋 𑐣𑐾𑐥𑐵𑑅𑐫𑐵 𑐨𑐵𑐲𑐶𑐎 𑐰𑐶𑐎𑐵𑐳 𑐰 𑐳𑑄𑐬𑐎𑑂𑐲𑐫𑐵𑐫𑐵 𑐂𑐟𑐶𑐴𑐵𑐳 𑐳𑑂𑐰𑐮 𑐢𑐵𑑅𑐳𑐵 𑐠𑐣 𑐟𑐶𑐧𑑂𑐧𑐟𑑀 𑐧𑐬𑑂‍𑐩𑐷, 𑐁𑐬𑑂‍𑐫 𑐰 𑐜𑑂𑐬𑐰𑐶𑐜 𑐥𑐬𑐶𑐰𑐵𑐬𑐫𑐵 𑐨𑐵𑐲𑐵 𑐕𑑂𑐫𑐮𑐵𑐧𑐸𑐮𑐵𑐫𑑂 𑐰𑐫𑐵𑐔𑑂𑐰𑑄𑐐𑐸 𑐏𑑄𑐎𑐾 𑐦𑐂 𑑋

𑐣𑐾𑐥𑐵𑑅𑐫𑐵 𑐂𑐟𑐶𑐴𑐵𑐳𑐫𑐵 𑐎𑐵𑐮𑐎𑑂𑐬𑐩𑐫𑑂 𑐀𑐣𑐾𑐎 𑐨𑐵𑐲𑐵 𑐥𑑂𑐬𑐫𑑀𑐐 𑐖𑐸𑐫𑐵𑐔𑑂𑐰𑑄𑐐𑐸 𑐏𑑄𑐎𑐾 𑐦𑐂 𑑋 𑐰𑐶𑐰𑐶𑐢 𑐨𑐵𑐲𑐵𑐨𑐵𑐲𑐷𑐟 𑐣𑐾𑐥𑐵𑑅 𑐣𑑂𑐫𑑄𑐎 𑐴𑐾 𑐡𑐸𑐐𑐸 𑐎𑐵𑐬𑐞𑑄 𑐠𑑅𑐥𑐶𑐣𑐶𑐐𑐸 𑐖𑐵𑐟𑐷𑐫 𑐨𑐵𑐲𑐵 𑐴𑐾 𑐄𑐩𑐶𑐐𑐸 𑐥𑐴𑐶𑐔𑐵𑐣 𑐖𑐸𑐫𑐵𑐔𑑂𑐰𑑄𑐐𑐸 𑐏𑑅 𑑋 𑐣𑐾𑐥𑐵𑑅 𑐐𑐵𑐮𑐫𑑂 𑐣𑐾𑐥𑐵𑐮𑐨𑐵𑐲𑐵 𑐕𑐐𑐹 𑐂𑐮𑐫𑑂 𑐬𑐵𑐖𑐎𑐷𑐫 𑐨𑐵𑐲𑐵, 𑐬𑐵𑐖𑑂𑐫 𑐨𑐵𑐲𑐵, 𑐖𑐣𑐨𑐵𑐲𑐵𑐎𑐠𑑄 𑐤𑑂𑐫𑐵𑐣𑐵𑐔𑑂𑐰𑑄𑐐𑐸 𑐏𑑅 𑑋 𑐠𑐸𑐐𑐸 𑐨𑐵𑐲𑐵𑐫𑐵 𑐳𑐩𑐺𑐡𑑂𑐢𑐶 𑐠𑐸𑐎𑐠𑑄 𑐣𑑄 𑐳𑐷𑐎𑐾 𑐦𑐂 𑐎𑐶 𑐣𑐾𑐥𑐵𑐮𑐫𑑂 𑐕𑑂𑐫𑐮𑐵𑐧𑐸𑐮𑐵𑐫𑑂 𑐰𑐫𑐵𑐔𑑂𑐰𑑄𑐐𑐸 𑐠𑐷𑐠𑐷 𑐨𑐵𑐲𑐵 𑐮𑐶𑐥𑐶𑐰𑐡𑑂𑐢 𑐫𑐵𑐫𑐾𑐟 𑐀𑐣𑐾𑐎 𑐮𑐶𑐥𑐶𑐫𑐵 𑐰𑐶𑐎𑐵𑐳 𑐖𑐹𑐐𑐸 𑐡𑐸 𑑋

𑐣𑐾𑐥𑐵𑑅𑐐𑐵𑑅𑐫𑐵 𑐖𑐣𑐨𑐵𑐲𑐵 𑐖𑐸𑐫𑐵𑐔𑑂𑐰𑑄𑐐𑐸 𑐳𑐩𑐺𑐡𑑂𑐢 𑐣𑐾𑐰𑐵𑑅 𑐨𑐵𑐫𑑂𑐫𑐵𑐟 𑐱𑐵𑐴 𑐖𑐸𑐖𑐸𑐟𑐫𑑂𑐳𑑄 𑐣𑐾𑐥𑐵𑑅𑐐𑐵𑑅 𑐯𑐵𑐟𑐫𑑂 𑐮𑐵𑐎𑐾𑐰𑑄 𑐀𑐣𑐾𑐎 𑐡𑐸𑐲𑑂𑐎𑐬𑑂‍𑐩 𑐫𑐵𑐣𑐵𑑅 𑐤𑑄𑐎𑐾𑐐𑐸 𑐖𑑂𑐫𑐵 𑐫𑐵𑐟 𑑋 𑐬𑐵𑐞𑐵𑐎𑐵𑐮𑐫𑑂 𑐠𑑅𑐥𑐶𑐣𑐶𑐐𑐸 𑐩𑐵𑐟𑐺𑐨𑐵𑐲𑐵𑑄 𑐳𑐵𑐴𑐶𑐟𑑂𑐫 𑐔𑑂𑐰𑐂𑐥𑐶𑑄 𑐰𑐵 𑐢𑐵𑐬𑑂‍𑐩𑐶𑐎 𑐳𑑂𑐟𑑂𑐬𑑀𑐟 𑐔𑑂𑐰𑐂𑐥𑐶𑑄𑐟 𑐟𑐎𑑄 𑐖𑐾𑐮 𑐣𑐾𑐮 𑐰 𑐳𑐬𑑂‍𑐰𑐳𑑂𑐰 𑐴𑐬𑐞 𑐫𑐵𑐣𑐵𑑅 𑐨𑐵𑐲𑐶𑐎 𑐡𑐩𑐣 𑐫𑐵𑐟 𑑋

𑐨𑐵𑐲𑐶𑐎 𑐡𑐩𑐣𑐫𑐵 𑐴𑐾 𑐣𑐶𑐫𑐟𑑂𑐟𑐶 𑐬𑐵𑐞𑐵 𑐱𑐵𑐳𑐎𑐟𑐫𑑂𑐳𑑄 𑐣𑐾𑐰𑐵𑑅𑐟𑐫𑑂𑐐𑐸 𑐩𑐵𑐟𑐺𑐨𑐵𑐲𑐵 𑐣𑐾𑐥𑐵𑐮𑐨𑐵𑐲𑐵𑑄 𑐔𑑂𑐰𑐫𑐵𑐟𑑅𑐐𑐸 𑐰 𑐣𑐾𑐥𑐵𑐮 𑐳𑑄𑐰𑐟𑑂 𑐤𑑂𑐫𑐠𑐣𑐵 𑐟𑑅𑐐𑐸 𑐎𑐵𑐬𑑀𑐰𑐵𑐬, 𑐎𑐵𑐮𑐧𑐶𑐣𑐫𑐵 𑐁𑐢𑐶𑐎𑐵𑐬𑐶𑐎 𑐨𑑂𑐰𑑄𑐫𑐵𑐟 𑐟𑐎𑑄 𑐎𑐵𑐣𑐸𑐣𑐷 𑐩𑐵𑐣𑑂𑐫𑐟𑐵 𑐩𑐧𑐷𑐐𑐸 𑐳𑐣𑐡 𑐖𑐵𑐬𑐷 𑐫𑐵𑐣𑐵𑑅 𑐨𑐵𑐲𑐶𑐎 𑐡𑐩𑐣𑐫𑐵𑐟 𑐣𑐶𑐬𑐣𑑂𑐟𑐬𑐟𑐵 𑐧𑐶𑐮 𑑋 𑐱𑐵𑐴 𑐖𑐸𑐖𑐸𑐟𑐫𑑂𑐐𑐸 𑐥𑐘𑑂𑐔𑐵𑐫𑐟𑐷 𑐱𑐵𑐳𑐣𑐫𑐵 𑐂𑐮𑐫𑑂 𑐣𑐾𑐥𑐵𑑅𑐫𑐵 𑐦𑐸𑐎𑑂𑐎 𑐴𑐾 𑐩𑐵𑐟𑐺𑐨𑐵𑐲𑐵 𑐩𑐡𑐫𑐾𑐎𑐵 𑐕𑑂𑐰𑐫𑐾𑐐𑐸 𑐬𑐵𑐖𑑂𑐫 𑐣𑐷𑐟𑐶 𑐡𑐫𑐾𑐎𑐵𑑅 𑐳𑐬𑐎𑐵𑐬𑐫𑐵 𑐎𑐵𑐩𑐎𑐵𑐖𑐫𑐵 𑐨𑐵𑐲𑐵 𑐡𑐾𑐰𑐣𑐵𑐐𑐬𑐶 𑐔𑑂𑐰𑐫𑐵𑐟𑑅𑐐𑐸 𑐣𑐾𑐥𑐵𑐮𑐷 𑐨𑐵𑐲𑐵 𑐖𑐸𑐂 𑐢𑐎𑐵𑑅 𑐳𑑄𑐰𑐶𑐢𑐵𑐣𑐫𑑂 𑐟𑐎𑑄 𑐤𑑂𑐫𑐠𑐣𑐵𑑅 𑐩𑐾𑐩𑐾𑐐𑐸 𑐨𑐵𑐲𑐵𑐫𑐵 𑐀𑐳𑑂𑐟𑐶𑐟𑑂𑐰𑐫𑐵𑐟 𑐥𑐹𑐬𑑂‍𑐞𑐬𑐸𑐥𑑄 𑐩𑐡𑐫𑐾𑐎𑐵 𑐕𑑂𑐰𑐫𑐾𑐐𑐸 𑐖𑑂𑐫𑐵 𑐖𑐸𑐮 𑑋

𑐩𑐵𑐟𑐺𑐨𑐵𑐲𑐵𑐫𑐵 𑐳𑑄𑐬𑐎𑑂𑐲𑐞 𑐰 𑐀𑐢𑐶𑐎𑐵𑐬𑐎𑐬𑑂‍𑐩𑐷𑐟𑐫𑑂𑐟 𑐳𑐵𑐩𑑂𑐥𑑂𑐬𑐡𑐵𑐫𑐶𑐎 𑐰 𑐰𑐶𑐏𑐞𑑂𑐜𑐣𑐰𑐵𑐡𑐷 𑐢𑐎𑐵𑑅 𑐖𑐾𑐮𑐫𑑂 𑐎𑐸𑐣𑐾𑐐𑐸 𑐖𑑂𑐫𑐵 𑐟𑐎𑑄 𑐖𑐹𑐰𑑄𑐐𑐸 𑐣𑐾𑐥𑐵𑑅𑐫𑐵 𑐂𑐟𑐶𑐴𑐵𑐳 𑐡𑐸 𑑋
𑐡𑐾𑐫𑑂𑐫𑐵 𑐦𑐸𑐎𑑂𑐎 𑐨𑐵𑐲𑐵𑐨𑐵𑐲𑐷𑐟𑐫𑑂𑐟 𑐳𑐩𑐵𑐣 𑐀𑐢𑐶𑐎𑐵𑐬 𑐬𑐵𑐖𑑂𑐫𑑄 𑐔𑐹𑐮𑐵𑐎𑐾𑐩𑐵𑑅 𑐢𑐎𑐵𑑅 𑐳𑑄𑐳𑑂𑐠𑐵𑐐𑐟𑐬𑐸𑐥𑑄 𑐴𑐾 𑐣𑐾𑐥𑐵𑐮𑐨𑐵𑐲𑐵 𑐩𑑄𑐎𑐵𑑅 𑐏𑐮𑑅 𑐣𑐷𑐳𑑂𑐰𑐣𑐵𑑅 𑐣𑐾𑐥𑐵𑐮 𑐳𑑄𑐰𑐟𑑂 𑑑𑑑𑑐𑑐 𑐣𑐶𑐳𑐾𑑄 𑐤𑑂𑐫𑐵𑑅𑐐𑐸 𑐏𑐣𑐾𑐡𑐸 𑑋

𑐟𑐬 𑐰𑑂𑐫𑐎𑑂𑐟𑐶𑐐𑐟 𑐎𑐸𑐟𑐮𑑄 𑐳𑑄𑐮𑐳𑑅𑐡𑑃 𑐤𑑂𑐫𑐰𑑄𑐣𑐶𑐳𑐾𑑄 𑐩𑐵𑑄𑐨𑐵𑐫𑑂𑐫𑐵 𑐰𑐶𑐎𑐵𑐳𑐫𑐵 𑐣𑐶𑑄𑐟𑐶𑑄 𑐣𑐾𑐥𑐵𑐮𑐨𑐵𑐲𑐵𑐫𑐵 𑐥𑑂𑐫𑑄𑐐𑑅𑐠𑐵𑑄 𑐣𑐶𑐲𑑂𑐛𑐵𑐣𑐣𑑂𑐡, 𑐳𑐶𑐡𑑂𑐢𑐶𑐡𑐵𑐳, 𑐫𑑀𑐐𑐰𑐷𑐬 𑐎𑐳𑐵𑑅 𑐰 𑐖𑐐𑐟𑐳𑐸𑐣𑑂𑐡𑐬 𑐩𑐮𑑂𑐮𑑄𑐣𑐶𑐳𑐾𑑄 𑐢𑐬𑑂‍𑐩𑐵𑐡𑐶𑐟𑑂𑐫 𑐢𑐬𑑂‍𑐩𑐵𑐔𑐵𑐬𑑂‍𑐫, 𑐔𑐶𑐟𑑂𑐟𑐢𑐬 ‘𑐴𑐺𑐡𑐫’, 𑐥𑑂𑐬𑐾𑐩𑐧𑐴𑐵𑐡𑐸𑐬 𑐎𑐳𑐵𑑅, 𑐥𑐡𑑂𑐩𑐬𑐟𑑂𑐣 𑐟𑐸𑐮𑐵𑐢𑐬𑐫𑐵 𑐫𑑀𑐐𑐡𑐵𑐣𑐫𑐵𑐟 𑐐𑐧𑐮𑐾𑑄 𑐮𑑂𑐰𑑅𑐩𑑄𑐎𑐾 𑐦𑐂 𑐩𑐏𑐸 𑑋

𑐳𑐣𑑂 𑑑𑑙𑑕𑑒 𑐳 𑐄𑐐𑐸 𑐃𑐫𑐵 𑐥𑐹𑐬𑑂‍𑐰 𑐥𑐵𑐎𑐶𑐳𑑂𑐟𑐵𑐣 𑐨𑐵𑐲𑐶𑐎 𑐀𑐢𑐶𑐎𑐵𑐬𑐫𑐵 𑐣𑐶𑑄𑐟𑐶𑑄 𑐖𑐹𑐐𑐸 𑐁𑐣𑑂𑐡𑑀𑐮𑐣 𑐰 𑐄𑐐𑐸 𑐁𑐣𑑂𑐡𑑀𑐮𑐣 𑐰𑐶𑐎𑐳𑐶𑐟 𑐖𑐸𑐫𑐵𑑅 𑐧𑑄𑐐𑐮𑐵𑐡𑐾𑐱𑐫𑐵 𑐣𑐶𑐬𑑂‍𑐩𑐵𑐞 𑐟𑐎𑐫𑐵 𑐂𑐟𑐶𑐴𑐵𑐳 𑐳𑑂𑐰𑐫𑐾𑐧𑐮𑐫𑑂 𑐨𑐵𑐲𑐵𑐫𑐵 𑐎𑐵𑐬𑐞𑑄 𑐴𑐾 𑐥𑐵𑐎𑐶𑐳𑑂𑐟𑐵𑐣 𑐎𑐸𑐔𑐵 𑐖𑐹𑐐𑐸 𑐰 𑐤𑐹𑐐𑐸 𑐡𑐾𑐫𑑂 𑐧𑑄𑐐𑐮𑐵𑐡𑐾𑐱 𑐄𑐡𑐫 𑐖𑐹𑐐𑐸 𑐏𑑄𑐎𑐾 𑐦𑐂 𑑋 𑐨𑐵𑐬𑐟𑑄 𑐎𑐸𑐔𑐵 𑐖𑐸𑐫𑐵𑐰𑑄𑐐𑐸 𑐥𑐵𑐎𑐶𑐳𑑂𑐟𑐵𑐣𑐫𑐵 𑐁𑐢𑐶𑐎𑐵𑐬𑐶𑐎 𑐨𑐵𑐲𑐵 𑐄𑐬𑑂‍𑐡𑐹 𑐖𑐸𑐂 𑐢𑐎𑐵𑑅 𑐀𑐣𑐫𑐵 𑐳𑐬𑐎𑐵𑐬𑑄 𑐑𑑀𑐲𑐞𑐵 𑐫𑐵𑐫𑐾𑐰𑑄 𑐥𑐹𑐬𑑂‍𑐰𑐷 𑐥𑐵𑐎𑐶𑐳𑑂𑐟𑐵𑐣𑐫𑑂 𑐡𑐸𑐥𑐶𑑄 𑐨𑐵𑐲𑐶𑐎 𑐀𑐢𑐶𑐎𑐵𑐬𑐎𑐬𑑂‍𑐩𑐷𑐟𑐫𑑂𑐳𑑄 𑐳𑐬𑐎𑐵𑐬𑐷 𑐣𑐶𑐬𑑂‍𑐞𑐫 𑐰𑐶𑐬𑐸𑐡𑑂𑐢 𑐁𑐣𑑂𑐡𑑀𑐮𑐣 𑐫𑐵𑑅𑐐𑐸 𑐏𑑅𑐳𑐵 𑐄𑐎𑐶𑐫𑐵 𑐴𑐾 𑐥𑐬𑐶𑐞𑐵𑐩𑑄 𑐨𑐵𑐲𑐶𑐎 𑐬𑐵𑐖𑑂𑐫 𑐧𑑄𑐐𑐮𑐵𑐡𑐾𑐱𑐫𑐵 𑐖𑐣𑑂𑐩 𑐖𑐹𑐐𑐸 𑐏𑑅 𑑋

𑐧𑑄𑐐𑐮𑐵𑐡𑐾𑐱𑐫𑑂 𑐁𑑅 𑐣𑑄 𑐨𑐵𑐲𑐶𑐎 𑐱𑐴𑐷𑐡 𑐢𑐎𑐵𑑅 𑐨𑐵𑐲𑐶𑐎 𑐀𑐨𑐶𑐫𑐣𑑂𑐟𑐵𑐟𑐫𑑂𑐟 𑐱𑐴𑐷𑐡𑐫𑐵 𑐳𑐩𑑂𑐩𑐵𑐣 𑐧𑐶𑐫𑐵𑑅 𑐁𑐡𑐬 𑐫𑐵𑐫𑐾𑐐𑐸 𑐫𑐵𑐣𑐵𑐔𑑂𑐰𑑄𑐐𑐸 𑐡𑐣𑐶 𑑋 𑐥𑐹𑐬𑑂‍𑐰𑐷 𑐥𑐵𑐎𑐶𑐳𑑂𑐟𑐵𑐣 𑐁𑑅 𑐧𑑄𑐐𑐮𑐵𑐡𑐾𑐱𑐫𑑂 𑐨𑐵𑐲𑐶𑐎 𑐁𑐣𑑂𑐡𑑀𑐮𑐣 𑐤𑑂𑐫𑐵𑑅𑐐𑐸 𑐡𑐶𑑄𑐫𑐵𑐟 𑐴𑐾 𑐎𑐫𑐵𑑅 𑐳𑑄𑐫𑐸𑐎𑑂𑐟 𑐬𑐵𑐲𑑂𑐚𑑂𑐬 𑐳𑑄𑐑𑑄 𑐳𑐣𑑂 𑑑𑑙𑑙𑑙 𑐫𑑂 𑐠𑐸𑐐𑐸 𑐡𑐶𑑄𑐫𑐵𑐟 𑐀𑐣𑑂𑐟𑐬𑑂‍𑐬𑐵𑐲𑑂𑐚𑑂𑐬𑐶𑐫 𑐩𑐵𑐟𑐺𑐨𑐵𑐲𑐵 𑐡𑐶𑐰𑐳 𑐎𑐠𑑄 𑐰𑐶𑐱𑑂𑐰𑐣𑑂𑐫𑑄𑐎𑑄 𑐴𑐣𑐾𑐐𑐸 𑐣𑐶𑐬𑑂‍𑐩𑐵𑐞 𑐖𑐹𑐐𑐸 𑐏𑑅 𑑋

𑐨𑐵𑐲𑐶𑐎 𑐀𑐢𑐶𑐎𑐵𑐬 𑐥𑑂𑐬𑐵𑐥𑑂𑐟𑐷𑐫𑐵 𑐣𑐶𑑄𑐟𑐶𑑄 𑐣𑐾𑐥𑐵𑐮𑐫𑑂 𑐣𑑄 𑐱𑐴𑐷𑐡 𑐖𑐹𑐥𑐶𑑄 𑐡𑐸 𑐢𑐫𑐵𑐐𑐸 𑐏𑑃𑐫𑑂 𑐁𑐥𑐵𑐮𑑄 𑐩𑐣𑐹𑐟 𑐀𑐣𑐨𑐶𑐖𑑂𑐘 𑐴𑐾 𑐟𑐶𑐣𑐶 𑑋 𑐬𑐵𑐞𑐵 𑐱𑐵𑐳𑐣𑐫𑐵 𑐂𑐮𑐫𑑂 𑐰𑐶.𑐳𑑄. 𑑑𑑙𑑙𑑗 𑐳 𑐥𑑂𑐫𑐪 𑐩𑐣𑐹𑐟𑐫𑑂𑐟 𑐬𑐵𑐞𑐵𑐟𑐫𑑂𑐐𑐸 𑐐𑐡𑑂𑐡𑐷 𑐟𑐵𑐎𑐾 𑐫𑐵𑑅𑐐𑐸 𑐢𑐎𑐵𑑅 𑐳𑐶𑐩𑐵𑐫𑑂 𑐫𑐏𑐵𑐣𑐵𑑅 𑐰 𑐐𑑀𑐮𑐷 𑐎𑐫𑐾𑐎𑐵𑑅 𑐳𑑂𑐫𑐵𑐣𑐵 𑐧𑐶𑐄𑐐𑐸 𑐏𑑅 𑑋 𑐄𑐎𑐷 𑐩𑐢𑑂𑐫𑐾 𑐡𑐱𑐬𑐠 𑐔𑐣𑑂𑐡, 𑐐𑑄𑐐𑐵𑐮𑐵𑐮 𑐰 𑐢𑐬𑑂‍𑐩𑐨𑐎𑑂𑐟𑐥𑐶𑑄 𑐬𑐵𑐖𑐣𑐷𑐟𑐶𑐎 𑐬𑐸𑐥𑑄 𑐴𑐾 𑐳𑐎𑑂𑐬𑐶𑐫 𑐖𑐸𑐫𑐵𑑅 𑐬𑐵𑐞𑐵 𑐱𑐵𑐳𑐣 𑐤𑑄𑐎𑐾𑐟 𑐰 𑐩𑐸𑐮𑐸𑐎𑐫𑑂 𑐥𑑂𑐬𑐖𑐵𑐟𑐣𑑂𑐟𑑂𑐬 𑐴𑐫𑐾𑐟 𑐐𑐟𑐶𑐰𑐶𑐢𑐶 𑐫𑐵𑐣𑐵 𑐖𑐹𑐥𑐶𑑄 𑐎𑑂𑐬𑐵𑐣𑑂𑐟𑐶𑐎𑐵𑐬𑐷𑐥𑐶𑑄 𑐏𑑅 𑑋

𑐄𑐩𑐶𑐐𑐸 𑐄𑐡𑑂𑐡𑐾𑐱𑑂𑐫 𑐬𑐵𑐖𑐣𑐷𑐟𑐶𑐎 𑐏𑑅 𑑋 𑐟𑐬 𑐱𑐸𑐎𑑂𑐬𑐬𑐵𑐖 𑐖𑑀𑐱𑐷 (𑐱𑐵𑐳𑑂𑐟𑑂𑐬𑐷) 𑐠𑑅𑐐𑐸 𑐩𑐵𑐟𑐺𑐨𑐵𑐲𑐵𑐫𑐵 𑐳𑑄𑐬𑐎𑑂𑐲𑐞 𑐰 𑐳𑑄𑐰𑐡𑑂𑐬𑑂‍𑐢𑐣𑐫𑐵 𑐣𑐶𑑄𑐟𑐶𑑄 𑐠𑑅𑐐𑐸 𑐩𑐵𑐟𑐺𑐨𑐵𑐲𑐵 𑐕𑑂𑐫𑐮𑐵𑑅 𑐬𑐵𑐞𑐵 𑐳𑐬𑐎𑐵𑐬𑐫𑐵 𑐰𑐶𑐬𑐸𑐡𑑂𑐢 𑐤𑑂𑐫𑐔𑐶𑐄𑐪 𑐎𑑂𑐬𑐵𑐣𑑂𑐟𑐶𑐎𑐵𑐬𑐷 𑐀𑐨𑐶𑐫𑐣𑑂𑐟𑐵 𑐏𑑅 𑑋 𑐱𑐸𑐎𑑂𑐬𑐬𑐵𑐖 𑐱𑐵𑐳𑑂𑐟𑑂𑐬𑐷 𑐕𑐸𑑄 𑐣𑑄 𑐬𑐵𑐖𑐣𑐷𑐟𑐶𑐎 𑐳𑑄𑐳𑑂𑐠𑐵𑐣𑐵𑐥 𑐳𑑂𑐰𑐵𑐥𑐹 𑐡𑐸𑐪 𑐎𑐵𑐬𑑂‍𑐫𑐎𑐬𑑂‍𑐟𑐵 𑐩𑐏𑐸 𑑋
𑐱𑐸𑐎𑑂𑐬𑐬𑐵𑐖 𑐱𑐵𑐳𑑂𑐟𑑂𑐬𑐷𑑄 𑐣𑐾𑐥𑐵𑐮𑐨𑐵𑐲𑐵 𑐰𑐶𑐎𑐵𑐳𑐫𑐵 𑐣𑐶𑑄𑐟𑐶𑑄 𑐀𑐣𑐾𑐎 𑐖𑑂𑐫𑐵 𑐫𑐵𑐣𑐵𑐰𑑄𑐐𑐸 𑐡𑐸 𑑋 𑐰𑐫𑑂𑐎𑐮𑑄 𑐩𑐳𑑂𑐟𑐫𑑂𑐐𑐸 𑐣𑐶𑑄𑐟𑐶𑑄 𑐳𑐦𑐹𑐟 𑐔𑑂𑐰𑐮 𑑋

𑐣𑐾𑐥𑐵𑐮𑐨𑐵𑐲𑐵 𑐳𑐩𑐺𑐡𑑂𑐢𑐶𑐫𑐵 𑐣𑐶𑑄𑐟𑐶𑑄 𑐣𑐾𑐥𑐵𑐮𑐨𑐵𑐲𑐵𑐫𑐵 𑐧𑑂𑐫𑐵𑐎𑐬𑐞 𑐳𑐦𑐹 𑐔𑑂𑐰𑐮 𑑋 𑐀𑐗 𑐄𑐐𑐸 𑐳𑐦𑐸𑐮𑐷 ‘𑐩𑐵𑑄𑐨𑐵𑐫𑑂𑐫𑐵 𑐩𑐴𑐵𑐳𑐵𑐐𑐬𑐫𑑂 𑐮𑐵𑐮 𑐎𑐵𑐫𑐾𑐩𑐳𑐳𑐵𑑄 𑐡𑐸𑐧𑐶𑐣𑐵’ 𑐢𑐫𑐵𑐐𑐸 𑐁𑐱𑐫𑐫𑐵 𑐏𑑃 𑐤𑑂𑐫𑐠𑐣𑐵𑐟𑑅𑐐𑐸 𑐡𑐸 𑑋 𑐱𑐸𑐎𑑂𑐬𑐬𑐵𑐖 𑐱𑐵𑐳𑑂𑐟𑑂𑐬𑐷𑐫𑐵𑐟 𑐖𑑂𑐫𑐵𑐣 𑐳𑐖𑐵𑑃𑐫 𑐧𑐷𑐐𑐸 𑐦𑐿𑐳𑐮𑐵 𑐔𑑂𑐰𑑅𑐪 𑐧𑐵𑐮𑐎𑐺𑐲𑑂𑐞 𑐱𑐩𑐱𑐾𑐬𑑄 (𑐳𑐩) 𑐱𑐸𑐎𑑂𑐬𑐬𑐵𑐖𑐫𑐵𑐟 𑐩𑐺𑐟𑑂𑐫𑐸 𑐡𑐞𑑂𑐜 𑐧𑐷𑐩𑐵𑑅𑐐𑐸 𑐫𑐎𑐶𑐣 𑐎𑐵𑐬𑐞 𑐤𑑂𑐫𑐠𑐣𑐾 𑐩𑐦𑐫𑐵𑑅 ‘𑐠𑑅𑐐𑐸 𑐩𑐵𑐟𑐺𑐨𑐵𑐲𑐵𑑄 𑐨𑐵𑐲𑐞 𑐫𑐵𑐣𑐵𑑅 𑐖𑐣𑐟𑐵𑐫𑐵𑐟 𑐄𑐎𑑂𑐳𑐾 𑐫𑐵𑑅𑐐𑐸’ 𑐢𑐎𑐵𑑅 𑐡𑑀𑐲𑐵𑐬𑑀𑐥𑐞 𑐫𑐵𑐣𑐵𑐟𑑅𑐐𑐸 𑐡𑐸 𑑋

𑐠𑐸𑐎𑐶𑑄 𑐣𑐶𑐱𑑂𑐔𑐶𑐟𑐎𑐠𑑄 𑐢𑐵𑐫𑐾𑐦𑐂 𑐎𑐶 𑐣𑐾𑐥𑐵𑑅𑐫𑐵 𑐨𑐵𑐲𑐶𑐎 𑐱𑐴𑐷𑐡 𑐥𑑄. 𑐱𑐸𑐎𑑂𑐬𑐬𑐵𑐖 𑐖𑑀𑐱𑐷 (𑐱𑐵𑐳𑑂𑐟𑑂𑐬𑐷) 𑐏𑑅 𑑋 𑐰𑐫𑑂𑐎𑑅𑐫𑐵𑐟 𑐠𑐸𑐐𑐸 𑐳𑐩𑑂𑐩𑐵𑐣𑐫𑑂 𑐣𑑄 𑐴𑐣𑐾𑐩𑐵𑑅𑐐𑐸 𑐁𑐰𑐱𑑂𑐫𑐎𑐟𑐵 𑐡𑐸 𑑋 𑐩𑐵𑐟𑐺𑐨𑐵𑐲𑐵 𑐬𑐎𑑂𑐲𑐵𑐫𑐵 𑐣𑐶𑑄𑐟𑐶𑑄 𑐖𑑂𑐫𑐵𑐣 𑐀𑐬𑑂‍𑐥𑐞 𑐫𑐵𑑅𑐪 𑐱𑐴𑐷𑐡𑐫𑐵𑐟 𑐩𑐵𑐟𑐺𑐨𑐵𑐲𑐵 𑐡𑐶𑐰𑐳 𑐎𑐸𑐤𑐸 𑐮𑐸𑑄𑐩𑐎𑐵𑑅 𑐰𑐫𑑂𑐎𑑅𑐫𑐵 𑐧𑐮𑐶𑐡𑐵𑐣𑐫𑐵𑐟 𑐎𑐡𑐬 𑐫𑐵𑐫𑐾𑐩𑐵𑑅𑐐𑐸 𑐡𑐸 𑑋 𑐣𑐾𑐥𑐵𑑅𑐫𑐵 𑐨𑐵𑐲𑐶𑐎 𑐱𑐴𑐷𑐡𑐫𑐵 𑐢𑐮𑐏𑐫𑑂 𑐤𑐵𑐥𑐵𑑄𑐐𑐸 𑐣𑐵𑑄 𑐰𑐫𑑂𑐎𑑅𑐫𑐵 𑐤𑑂𑐫𑐠𑐣𑐾𑐩𑐵𑑅𑐐𑐸 𑐡𑐸 𑑋