𑐣𑑂𑐴𑑂𑐫𑐖𑑂𑐫𑐵 𑐏𑐮𑑅𑐫𑐵 𑑖𑑑 𑐎𑑂𑐰𑑅𑐐𑐸 𑐰𑐵𑐬𑑂𑐲𑐶𑐎𑑀𑐟𑑂𑐳𑐰

𑐣𑑂𑐴𑑂𑐫𑐖𑑂𑐫𑐵𑑅 𑐏𑐮𑑅 𑐠𑐶𑐩𑐶𑐫𑐵 𑑖𑑑 𑐎𑑂𑐰𑑅𑐐𑐸 𑐧𑐸𑐡𑐶𑑄 𑐠𑐷𑐠𑐷 𑐖𑑂𑐫𑐵𑐗𑑂𑐰𑑅𑐫𑐵𑐳𑐾𑑄 𑐴𑐣 𑑋 𑐩𑐢𑑂𑐫𑐥𑐸𑐬 𑐠𑐶𑐩𑐶 𑐣𑐐𑐬𑐫𑐵 𑐴𑐾 𑐕𑐐𑐹 𑐖𑐎 𑐋𑐟𑐶𑐴𑐵𑐳𑐶𑐎 𑐳𑑄𑐳𑑂𑐠𑐵 𑐏𑐮𑑅𑐫𑐵 𑑖𑑑 𑐎𑑂𑐰𑑅𑐐𑐸 𑐰𑐵𑐬𑑂𑐲𑐶𑐎𑑀𑐟𑑂𑐳𑐰𑐫𑐵 𑐮𑐳𑐟𑐵𑐫𑑂 𑐳𑐵𑐴𑐶𑐟𑑂𑐫𑐶𑐎 𑐰 𑐳𑐵𑑄𑐳𑑂𑐎𑐺𑐟𑐶𑐎 𑐖𑑂𑐫𑐵𑐗𑑂𑐰𑑅 𑐫𑐵𑐳𑐾𑑄 𑐴𑑄𑐐𑐸 𑐏𑑅 𑑋

𑐏𑐮𑑅𑐫𑐵 𑐣𑐵𑐫𑑅 𑐡𑐵𑐩𑑀𑐡𑐬 𑐱𑑂𑐬𑐾𑐲𑑂𑐛𑐫𑐵 𑐳𑐨𑐵𑐥𑐟𑐶𑐟𑑂𑐰𑐫𑑂 𑐠𑐣𑐫𑐵 𑐋𑐟𑐶𑐴𑐵𑐳𑐶𑐎 𑐣𑐶𑐐𑐹 𑐥𑐸𑐏𑐸𑐮𑐶𑐂 𑐖𑐹𑐐𑐸 𑐖𑑂𑐫𑐵𑐗𑑂𑐰𑑅𑐫𑐵 𑐄𑐮𑐾𑐖𑑂𑐫𑐵 𑐩𑐹𑐥𑐵𑐴𑐵𑑄𑐎𑐠𑑄 𑐗𑐵𑐫𑐵𑐡𑐷𑐩𑑂𑐴 𑐣𑐾𑐰𑐵𑑅 𑐁𑐣𑑂𑐡𑑀𑐮𑐣𑐫𑐵 𑐣𑑂𑐴𑑂𑐫𑐮𑐸𑐰𑐵, 𑐣𑐾𑐰𑐵𑑅 𑐡𑐾𑐫𑑂 𑐡𑐧𑐹𑐫𑐵 𑐳𑑄𑐬𑐎𑑂𑐲𑐎𑐮𑐶𑐳𑐾𑑄 𑐣𑐾𑐥𑐵𑐮𑐨𑐵𑐲𑐵 𑐊𑐎𑐾𑐡𑐾𑐩𑐶𑐫𑐵 𑐄𑐥𑐎𑐸𑐮𑐥𑐟𑐶 𑐩𑐮𑑂𑐮 𑐎𑐾. 𑐳𑐸𑐣𑑂𑐡𑐬𑑄 𑐟𑑂𑐰𑐵𑑅𑐡𑐾𑐰𑐵𑐫𑑂 𑐩𑐟 𑐔𑑂𑐫𑐵𑐎𑐵𑑅 𑐫𑐵𑐣𑐵𑐡𑐷𑐐𑐸 𑐏𑑅 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐣𑐰𑐵𑐳𑐾𑑄 𑐩𑐹𑐥𑐵𑐴𑐵𑑄 𑐩𑐮𑑂𑐮 𑐎𑐾. 𑐳𑐸𑐣𑑂𑐡𑐬𑑄 𑐢𑐫𑐵𑐡𑐶𑐮, ‘𑐗𑐷𑐥𑐶𑑄 𑐨𑐵𑐲𑐵, 𑐎𑐮𑐵, 𑐳𑑄𑐳𑑂𑐎𑐺𑐟𑐶 𑐰 𑐳𑐵𑑄𑐳𑑂𑐎𑐺𑐟𑐶𑐎 𑐬𑐸𑐥𑑄 𑐟𑑅𑐩𑐶 𑐖𑐹𑐐𑐸𑐮𑐶𑐂 𑐴𑐾 𑐀𑐗𑑄 𑐣𑑂𑐴𑐵𑐫𑑂 𑐢𑐳𑑂𑐰𑐵𑐎𑐵𑐔𑑂𑐰𑐣𑐵 𑑋 𑐗𑐷 𑐣𑐷𑐟𑐶 𑐣𑐶𑐬𑑂𑐩𑐵𑐞 𑐫𑐵𑐫𑐾𑐐𑐸 𑐠𑐵𑐳𑐫𑑂 𑐟𑐎 𑐠𑑂𑐫𑑄𑐎𑐾𑐐𑐸𑐮𑐶𑑄 𑐣𑑂𑐴𑑂𑐫𑐵𑐧𑐮𑐾𑑄 𑐮𑐶𑐄𑐣𑐾 𑐴𑐾 𑐮𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐗𑐷𑐳𑑄 𑐗𑐷𑐐𑐸 𑐨𑐵𑐲𑐵, 𑐖𑐵𑐟𑐶, 𑐳𑑄𑐳𑑂𑐎𑐺𑐟𑐶 𑐰 𑐥𑐴𑐶𑐔𑐵𑐣𑐫𑐵 𑐣𑐶𑑄𑐟𑐶𑑄 𑐁𑐥𑐵𑐮𑑄 𑐁𑐣𑑂𑐡𑑀𑐮𑐣 𑐫𑐵𑐫𑐾𑐢𑐸𑑄𑐐𑐸 𑐡𑐸, 𑐀𑐫𑑂𑐣𑑄 𑐗𑐷 𑐣𑑂𑐴𑑂𑐫𑐵𑐧𑐮𑐾𑑄 𑐮𑐶𑐄𑐣𑐾 𑐴𑐾 𑐮𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋’

‘𑐗𑐷𑐳𑑄 𑐡𑑃𑐫𑑂𑐡𑐳𑑄 𑐠𑐸𑐎𑐠𑑄𑐫𑐵 𑐳𑐵𑑄𑐳𑑂𑐎𑐺𑐟𑐶𑐎 𑐖𑑂𑐫𑐵𑐗𑑂𑐰𑑅, 𑐳𑐵𑐴𑐶𑐟𑑂𑐫𑐶𑐎 𑐖𑑂𑐫𑐵𑐗𑑂𑐰𑑅 𑐫𑐵𑐣𑐵𑑅 𑐖𑐣𑐔𑐾𑐟𑐣𑐵 𑐠𑐣𑐾𑐐𑐸 𑐣𑐵𑐥𑑄 𑐨𑑂𑐰𑐫𑑂 𑐣𑐫𑐾𑐐𑐸 𑐰 𑐥𑑂𑐫𑐵𑐏𑑄 𑐴𑐸𑐮𑐾𑐐𑐸 𑐖𑑂𑐫𑐵 𑐫𑐵𑐣𑐵𑐔𑑂𑐰𑐣𑐵 𑑋 𑐕𑐸 𑐗𑐷𑐐𑐸 𑐳𑐩𑐳𑑂𑐫𑐵 𑐠𑐖𑑂𑐫𑐵𑑅𑐐𑐸 𑐴𑐾 𑐖𑐎 𑐖𑑂𑐫𑐵 𑐫𑐵𑐫𑐾𑐰𑑄 𑐳𑐩𑐵𑐢𑐵𑐣 𑐖𑐸𑐂𑐐𑐸 𑐏𑑅 𑐮𑐵 ?’ 𑐰𑐫𑑂𑐎𑐮𑑄 𑐠𑑅𑐐𑐸 𑐀𑐳𑐣𑑂𑐟𑐸𑐥𑐲𑑂𑐚𑐶 𑐥𑑂𑐰𑑄𑐎𑐵𑐡𑐶𑐮 𑑋

𑐮𑐶𑐳𑐾𑑄 𑐰𑐫𑑂𑐎𑐮𑑄 𑐁𑑅 𑐥𑑂𑐬𑐟𑑂𑐫𑐾𑐎 𑐕𑐾𑑃𑐏𑐵𑑄 𑐨𑐵𑐫𑑂 𑐣𑐰𑐵𑐫𑐾𑐐𑐸 𑐰 𑐳𑑂𑐫𑐣𑐾𑐎𑐣𑐾 𑐫𑐵𑐣𑐵 𑐰𑐣𑐾𑐐𑐸 𑐣𑐵𑐥𑑄 𑐠𑑅𑐐𑐸 𑐀𑐢𑐶𑐎𑐵𑐬𑐫𑐵 𑐳𑐡𑐸𑐥𑐫𑑀𑐐 𑐫𑐵𑐫𑐾 𑐳𑐫𑐾𑐎𑐵 𑐰𑐣𑐾𑐩𑐵𑑅𑐐𑐸 𑐏𑑃𑐫𑑂 𑐣𑑄 𑐧𑑅 𑐧𑐶𑐫𑐵𑐡𑐶𑐮 𑑋
𑐖𑑂𑐫𑐵𑐗𑑂𑐰𑐮𑐫𑑂 𑐧𑐵𑐐𑐩𑐟𑐶 𑐥𑑂𑐬𑐡𑐾𑐱 𑐳𑐵𑑄𑐳𑐡 𑐬𑐵𑐖𑐾𑐣𑑂𑐡𑑂𑐬𑐩𑐵𑐣 𑐱𑑂𑐬𑐾𑐲𑑂𑐛, 𑐩𑐢𑑂𑐫𑐥𑐸𑐬 𑐠𑐶𑐩𑐶 𑐣𑐐𑐬𑐥𑐵𑐮𑐶𑐎𑐵𑐫𑐵 𑐣𑐶𑐰𑐬𑑂𑐟𑐩𑐵𑐣 𑐥𑑂𑐬𑐩𑐸𑐏 𑐩𑐡𑐣𑐳𑐸𑐣𑑂𑐡𑐬 𑐱𑑂𑐬𑐾𑐲𑑂𑐛𑑄 𑐨𑐶𑑄𑐟𑐸𑐣𑐵 𑐣𑑂𑐰𑐔𑐸 𑐟𑐫𑐵𑐡𑐷𑐐𑐸 𑐏𑑅 𑑋
𑐰𑐶𑐬𑐵𑐚 𑐐𑐸𑐠𑐶𑐫𑐵 𑐥𑐸𑐮𑐵𑑄𑐩𑑂𑐴 𑐣𑐵𑐫𑑅𑐮𑐶𑐳𑐾𑑄 𑐳𑐵𑐴𑐶𑐟𑑂𑐫𑐎𑐵𑐬 𑐟𑑂𑐬𑐶𑐬𑐟𑑂𑐣 𑐱𑐵𑐎𑑂𑐫, 𑐐𑐸𑐠𑐶𑐫𑐵 𑐣𑑂𑐰𑐎𑐸 𑐩𑐴𑐾𑐣𑑂𑐡𑑂𑐬 𑐎𑐵𑐫𑐳𑑂𑐠𑐮𑐶𑐳𑐾𑑄 𑐌𑐩 𑐣𑐬𑐴𑐬𑐷 𑐳𑐵𑐴𑐸 𑐱𑑂𑐬𑐾𑐲𑑂𑐛, 𑐣𑐰𑐶𑐣𑐥𑑂𑐬𑐎𑐵𑐱 𑐱𑑂𑐬𑐾𑐲𑑂𑐛, 𑐰𑐳𑐣𑑂𑐟 𑐣𑐎𑑅𑐩𑐶, 𑐟𑐾𑐖𑐎𑐺𑐲𑑂𑐞 𑐱𑑂𑐬𑐾𑐲𑑂𑐛, 𑐥𑑂𑐬𑐡𑐷𑐥 𑐖𑐵𑐩𑐣𑑅 𑐱𑑂𑐬𑐾𑐲𑑂𑐛𑑄 𑐔𑐶𑐣𑐵𑐏𑑃 𑐧𑑂𑐰𑐣𑐵𑑅 𑐣𑑂𑐫𑑄𑐎𑐵𑐡𑐷𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐴𑐸𑐮𑐵𑐥𑑂𑐫𑐵𑐏𑑄 𑐰 𑐳𑐵𑑄𑐐𑐷𑐟𑐶𑐎 𑐥𑑂𑐬𑐳𑑂𑐟𑐸𑐟𑐶 𑐣𑑄 𑐣𑑂𑐴𑑂𑐫𑐧𑑂𑐰𑑅𑐐𑐸 𑐏𑑅 𑑋

𑐩𑐢𑑂𑐫𑐥𑐸𑐬 𑐠𑐶𑐩𑐶𑐂 𑐣𑐾𑐥𑐵𑐮 𑐎𑐩𑑂𑐫𑐸𑐣𑐶𑐲𑑂𑐚 𑐥𑐵𑐬𑑂𑐚𑐷𑐫𑐵 𑐳𑑄𑐳𑑂𑐠𑐵𑐥𑐎 𑐧𑐿𑐎𑐸𑐞𑑂𑐛𑐴𑐬𑐷 𑐳𑐵𑐴𑐸 𑐱𑑂𑐬𑐾𑐲𑑂𑐛𑑄 𑐣𑐶𑐬𑑄𑐎𑐸𑐱 𑐟𑐵𑐣𑐵𑐱𑐵𑐴𑐷 𑐥𑑄𑐔𑐵𑐫𑐟𑐷 𑐰𑑂𑐫𑐰𑐳𑑂𑐠𑐵 𑐰𑐶𑐬𑐸𑐡𑑂𑐢 𑐳𑑅 𑐠𑐣𑐾𑐟 𑐣𑐾.𑐳𑑄. 𑑑𑑐𑑘𑑒 𑐳𑐵𑐮𑐫𑑂 𑐣𑐷𑐳𑑂𑐰𑐣𑐵𑐡𑐷𑐐𑐸 𑐏𑐮𑑅𑐥𑐵𑐏𑐾𑑄 𑐰𑑄𑐐𑐸 𑐏𑐸𑐐𑐹 𑐡𑐱𑐎 𑐣𑑂𑐴𑑂𑐫𑐰𑑄𑐣𑐶𑐳𑐾𑑄 𑐣𑐶𑐬𑐣𑑂𑐟𑐬 𑐬𑐸𑐥𑑄 𑐥𑑂𑐬𑐐𑐟𑐶𑐱𑐷𑐮 𑐳𑐵𑐴𑐶𑐟𑑂𑐫𑐶𑐎 𑐰 𑐳𑐵𑑄𑐳𑑂𑐎𑐺𑐟𑐶𑐎 𑐖𑑂𑐫𑐵𑐗𑑂𑐰𑑅 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋