𑐣𑐾𑐰𑐵𑑅 𑐴𑐣𑐵 𑐳𑐶𑐬𑐥𑐵𑑅 𑐮𑑅𑐮𑑂𑐴𑐵𑐟

𑐨𑐵𑐲𑐵 𑐳𑐵𑐴𑐶𑐟𑑂𑐫 𑐩𑐸𑑃𑐖𑑂𑐫𑐵 𑐏𑐮𑑅 𑐳𑐎𑑂𑐰𑐫𑐵 𑐐𑑂𑐰𑐳𑐵𑐮𑐫𑑂 𑐖𑐹𑐐𑐸 𑐕𑐐𑐹 𑐖𑑂𑐫𑐵𑐗𑑂𑐰𑑅𑐫𑐵 𑐡𑐠𑐸𑐂 𑐣𑐾𑐥𑐵𑐮𑐨𑐵𑐲𑐵𑐫𑐵 𑐳𑑂𑐰𑐩𑑂𑐴 𑐰𑐬𑐶𑐲𑑂𑐛 𑐳𑐵𑐴𑐶𑐟𑑂𑐫𑐎𑐵𑐬𑐥𑐶𑑄𑐟 𑐣𑐾𑐰𑐵𑑅 𑐴𑐣𑐵 𑐳𑐶𑐬𑐥𑐵𑑅 𑐮𑑅𑐮𑑂𑐴𑐵𑑅𑐐𑐸 𑐡𑐸 𑑋 𑐰𑑄𑐐𑐸 𑐱𑐣𑐶𑐰𑐵𑑅 𑐳𑐎𑑂𑐰𑐫𑑂 𑐖𑐹𑐐𑐸 𑐕𑐐𑐹 𑐖𑑂𑐫𑐵𑐗𑑂𑐰𑑅𑐫𑐵 𑐡𑐠𑐸𑐂 𑐄𑐐𑐸 𑐳𑐶𑐬𑐥𑐵𑑅 𑐮𑑅𑐮𑑂𑐴𑐵𑑅𑐐𑐸 𑐏𑑅 𑑋 𑐄𑐐𑐸 𑐴𑐾 𑐖𑑂𑐫𑐵𑐗𑑂𑐰𑐮𑐫𑑂 𑐣𑐶𑐩𑑂𑐴 𑐳𑐵𑐴𑐶𑐟𑑂𑐫𑐎𑐵𑐬𑐫𑐵 𑐥𑑂𑐫𑑄𑐐𑐹 𑐳𑐦𑐹 𑐣𑑄 𑐥𑐶𑐟𑐧𑑂𑐰𑐖𑑂𑐫𑐵 𑐫𑐵𑑅𑐐𑐸 𑐏𑑅 𑑋

𑐏𑐮𑑅𑐫𑐵 𑐣𑐵𑐫𑑅 𑐬𑐘𑑂𑐖𑐣 𑐱𑑂𑐬𑐾𑐲𑑂𑐛𑐫𑐵 𑐳𑐨𑐵𑐥𑐟𑐶𑐟𑑂𑐰𑐫𑑂 𑐣𑑂𑐴𑑂𑐫𑐵𑑅𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐩𑐹𑐥𑐵𑐴𑐵𑑄𑐎𑐠𑑄 𑐖𑐣𑐎𑐰𑐶 𑐡𑐸𑐬𑑂𑐐𑐵𑐮𑐵𑐮 𑐱𑑂𑐬𑐾𑐲𑑂𑐛 𑐗𑐵𑐫𑐵𑐡𑐷𑐐𑐸 𑐏𑑅 𑑋 𑐏𑐮𑑅𑐥𑐵𑐏𑐾𑑄 𑐧𑐶𑐫𑐵 𑐰𑐫𑐵𑐔𑑂𑐰𑑄𑐐𑐸 𑐠𑐸𑐐𑐸 𑐳𑐶𑐬𑐥𑐵𑑅 𑐟𑐵𑑅𑐃 𑐣𑑂𑐴𑑂𑐫𑑅𑐣𑐶𑐳𑐾𑑄 𑐡𑐶𑐣𑐵𑐔𑑂𑐰𑑄𑐐𑐸 𑐏𑑅𑐳𑐵 𑐠𑐸𑐐𑐸𑐳𑐷 𑐕𑐎𑑂𑐰𑐮𑑄 𑐳𑑂𑐰𑐩𑑂𑐴 𑐳𑐵𑐴𑐶𑐟𑑂𑐫𑐎𑐵𑐬𑐥𑐶𑑄𑐟 𑐮𑑅𑐮𑑂𑐴𑐵𑑅𑐐𑐸 𑐏𑑅 𑑋 𑐖𑑂𑐫𑐵𑐗𑑂𑐰𑐮𑐫𑑂 𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫𑐫𑐵 𑐣𑐵𑑄𑐖𑐵𑑅𑐩𑑂𑐴 𑐰𑐬𑐶𑐲𑑂𑐛 𑐁𑐏𑑂𑐫𑐵𑐣𑐎𑐵𑐬 𑐩𑐠𑐸𑐬𑐵 𑐳𑐵𑐫𑑂𑐩𑐶, 𑐰𑐬𑐶𑐲𑑂𑐛 𑐁𑐢𑐸𑐣𑐶𑐎 𑐎𑐰𑐶 𑐜𑐵. 𑐫𑑀𑐐𑐾𑐣𑑂𑐡𑑂𑐬 𑐥𑑂𑐬𑐢𑐵𑐣 𑐰 𑐰𑐬𑐶𑐲𑑂𑐛 𑐳𑐩𑐵𑐮𑑀𑐔𑐎 𑐣𑐵𑐥𑑄 𑐧𑐵𑐏𑑄 𑐔𑑂𑐰𑐩𑐶 𑐣𑐬𑑂𑐩𑐡𑐾𑐱𑑂𑐰𑐬𑐩𑐵𑐣 𑐥𑑂𑐬𑐢𑐵𑐣𑐫𑐵𑐟 𑐄𑐐𑐸 𑐳𑐶𑐬𑐥𑐵𑑅 𑐮𑑅𑐮𑑂𑐴𑐵𑑅𑐐𑐸 𑐏𑑅 𑑋

𑐥𑐸𑐬𑐳𑑂𑐎𑐵𑐬𑐥𑐵𑐏𑐾𑑄 𑐳𑐩𑑂𑐩𑐵𑐣𑐶𑐟 𑐰𑑂𑐫𑐎𑑂𑐟𑐶𑐟𑑂𑐰𑐥𑐶𑑄𑐟 𑐩𑐹𑐥𑐵𑐴𑐵𑑄 𑐖𑐣𑐎𑐰𑐶 𑐱𑑂𑐬𑐾𑐲𑑂𑐛𑑄 𑐴𑐣𑐵𑐥𑑁 𑐰 𑐳𑐶𑐬𑐥𑐵𑑅𑐫𑐵 𑐡𑐵𑐟𑐵𑐩𑐢𑑂𑐫𑐾 𑐕𑐩𑑂𑐴 𑐬𑐵𑐖𑐡𑐵𑐳 𑐱𑑂𑐬𑐾𑐲𑑂𑐛𑑄 𑐡𑑀𑐳𑐮𑑂𑐮𑐵𑑄 𑐣𑑂𑐫𑐫𑐾𑐎𑐵𑐡𑐷𑐐𑐸 𑐏𑑅𑐳𑐵 𑐏𑐮𑑅𑐫𑐵 𑐣𑐵𑐫𑑅 𑐱𑑂𑐬𑐾𑐲𑑂𑐛𑑄 𑐥𑐸𑐬𑐳𑑂𑐎𑐵𑐬 𑐰𑐵𑐥𑐟𑐫𑐵 𑐣𑐷𑐡𑑂𑐰𑑅 𑐟𑐎𑐵 𑐡𑐵𑑄 𑐮𑑅𑐮𑑂𑐴𑐵𑐣𑐵𑐡𑐷𑐐𑐸 𑐏𑑅 𑑋

𑐣𑐾𑐥𑐵𑐮 𑐳𑑄𑐰𑐟𑑂 𑑑𑑑𑑑𑑕 𑐣𑐶𑐳𑐾𑑄 𑐣𑐾𑐥𑐵𑐮 𑐳𑑄𑐰𑐟𑑂 𑑑𑑑𑑓𑑐 𑐟𑐎 𑐣𑐶𑐬𑐣𑑂𑐟𑐬 𑐬𑐸𑐥𑑄 𑐧𑐶𑐫𑐵 𑐰𑐫𑐵𑐔𑑂𑐰𑑄𑐐𑐸 𑐠𑐸𑐐𑐸 𑐳𑐶𑐬𑐥𑐵𑑅 𑐣𑐾𑐥𑐵𑐮 𑐳𑑄𑐰𑐟𑑂 𑑑𑑑𑑓𑑑 𑐣𑐶𑐳𑐾𑑄 𑐢𑐵𑑅𑐳𑐵 𑐡𑐶𑐣𑐵𑐔𑑂𑐰𑑄𑐐𑐸 𑐏𑑅 𑑋 𑐱𑐸𑐬𑐸 𑐗𑐶𑐡𑑂𑐰𑑅 𑐟𑐎𑐵𑐫𑐵 𑐠𑐸𑐐𑐸 𑐳𑐶𑐬𑐥𑐵𑑅 𑐠𑐸𑐐𑐸𑐳𑐷𑐣𑐶𑐳𑐾𑑄 𑐣𑐷𑐡𑑂𑐰𑑅 𑐫𑐵𑑅𑐐𑐸 𑐏𑑅 𑑋 𑐖𑑂𑐫𑐵𑐗𑑂𑐰𑐮𑐫𑑂 𑐠𑐸𑐐𑐸𑐳𑐷𑐣𑐶𑐳𑐾𑑄 𑐠𑐸𑐐𑐸 𑐳𑐶𑐬𑐥𑐵𑑅 𑐴𑐵𑐎𑐣𑑄 𑐣𑐶𑐬𑐣𑑂𑐟𑐬 𑐬𑐸𑐥𑑄 𑐧𑐶𑐫𑐵 𑐰𑐣𑐾𑐐𑐸 𑐣𑑄 𑐖𑐵𑐣𑐎𑐵𑐬𑐷 𑐧𑐶𑐄𑐐𑐸 𑐏𑑅 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐥𑐸𑐬𑐳𑑂𑐎𑐺𑐟 𑐰𑑂𑐫𑐎𑑂𑐟𑐶𑐟𑑂𑐰𑐥𑐶𑑄 𑐁𑐏𑑂𑐣𑐎𑐵𑐬 𑐳𑐵𑐫𑑂𑐩𑐶𑐫𑐵 𑐩𑑂𑐴𑐳𑐷𑐎𑐵 𑐩𑐹𑐮𑑂𑐫𑐵𑑄𑐎𑐣 𑐳𑐩𑐶𑐟𑐶𑐫𑐵 𑐡𑐸𑐖𑑅 𑐥𑑂𑐬𑐵. 𑐥𑐾𑑂𑐬𑐩𑐱𑐵𑐣𑑂𑐟𑐶 𑐟𑐸𑐮𑐵𑐢𑐬 𑐰 𑐥𑑂𑐬𑐢𑐵𑐣𑐡𑑂𑐰𑐫 𑐫𑐵 𑐩𑑂𑐴𑐳𑐷𑐎𑐵 𑐳𑐩𑐵𑐮𑑀𑐔𑐎 𑐣𑐵𑐥𑑄 𑐔𑑂𑐰𑐩𑐶 𑐥𑐹𑐬𑑂𑐞𑐎𑐵𑐖𑐷 𑐟𑐵𑐩𑑂𑐬𑐵𑐎𑐵𑐬𑑄 𑐧𑐶𑐫𑐵𑐡𑐷𑐐𑐸 𑐏𑑅 𑑋
𑐄𑐐𑐸 𑐴𑐾 𑐖𑑂𑐫𑐵𑐗𑑂𑐰𑐮𑐫𑑂 𑐏𑐮𑑅𑐫𑐵 𑐡𑐸𑐖𑑅𑐮𑐶𑐳𑐾𑑄 𑐳𑐵𑐴𑐶𑐟𑑂𑐫𑐎𑐵𑐬 𑐰 𑐔𑑂𑐰𑐩𑐶 𑐜𑐵. 𑐧𑐵𑐮𑐐𑑀𑐥𑐵𑐮 𑐱𑑂𑐬𑐾𑐲𑑂𑐛𑑄 𑐔𑑂𑐰𑐫𑐵𑐡𑐷𑐐𑐸 𑐣𑐶𑐐𑐹 𑐳𑐦𑐹 ‘𑐖𑐶𑐐𑐸 𑐡𑐵𑐥𑐸 𑑅 𑐖𑐶𑐐𑐸 𑐢𑐵𑐥𑐹’ 𑐰 ‘𑐣𑐾𑐥𑐵𑐮𑐫𑑂 𑐖𑐵𑐟𑐷𑐫 𑐥𑐴𑐶𑐔𑐵𑐣 𑐰 𑐨𑐵𑐲𑐶𑐎 𑐳𑐩𑐵𑐣 𑐀𑐢𑐶𑐎𑐵𑐬𑐫𑐵 𑐣𑑂𑐴𑑂𑐫𑐳𑑅’ 𑐰𑐫𑑂𑐎𑑅𑐫𑐵 𑐖𑐴𑐵𑐣𑐮𑐶𑐳𑐾𑑄 𑐳𑐵𑐴𑐶𑐟𑑂𑐫𑐎𑐵𑐬 𑐱𑑂𑐬𑐷𑐮𑐎𑑂𑐲𑑂𑐩𑐷 𑐱𑑂𑐬𑐾𑐲𑑂𑐛𑑄 𑐔𑑂𑐰𑐫𑐵𑐡𑐷𑐐𑐸 𑐣𑐶𑐐𑐹 𑐳𑐦𑐹 𑐊𑐮𑑂𑐦𑑂𑐫𑐳 (𑐔𑐶𑐣𑐵𑐏𑑃 𑐩𑐸𑐣𑐵 𑐳𑐦𑐹) 𑐰 𑐖𑐷𑐰𑐣𑐫𑐵 𑐮𑑃𑐥𑐸𑐂 (𑐧𑐵𑐏𑑄 𑐩𑐸𑐣𑐵 𑐳𑐦𑐹)𑐫𑐵 𑐣𑑄 𑐥𑐶𑐟𑐧𑑂𑐰𑐖𑑂𑐫𑐵 𑐫𑐵𑑅𑐐𑐸 𑐏𑑅 𑑋 𑐠𑐸𑐥𑐶𑑄 𑐳𑐦𑐹 𑐩𑐹𑐥𑐵𑐴𑐵𑑄 𑐖𑐣𑐎𑐰𑐶 𑐡𑐸𑐬𑑂𑐐𑐵𑐮𑐵𑐮 𑐱𑑂𑐬𑐾𑐲𑑂𑐛 𑐰 𑐣𑐾𑐰𑐵𑑅 𑐣𑑂𑐴𑑂𑐫𑐮𑐸𑐰𑐵, 𑐳𑐩𑐵𑐮𑑀𑐔𑐎 𑐣𑐵𑐥𑑄 𑐣𑐾𑐥𑐵𑐮𑐨𑐵𑐲𑐵 𑐊𑐎𑐾𑐡𑐾𑐩𑐶𑐫𑐵 𑐨𑐵𑐂𑐳 𑐔𑐵𑐣𑑂𑐳𑐮𑐬 𑐩𑐮𑑂𑐮 𑐎𑐾. 𑐳𑐸𑐣𑑂𑐡𑐬𑑄 𑐩𑑄𑐎𑐵𑑅𑐎𑐠𑑄 𑐥𑐶𑐟𑐧𑑂𑐰𑐖𑑂𑐫𑐵 𑐫𑐵𑐣𑐵𑐡𑐷𑐐𑐸 𑐏𑑅 𑑋

𑐥𑐶𑐟𑐧𑑂𑐰𑐖𑑂𑐫𑐵 𑐖𑐹𑐐𑐸 𑐳𑐦𑐹𑐫𑐵𑐟 𑐎𑐫𑐵𑑅 𑐰𑐶𑐱𑐾𑐲 𑐥𑐵𑐴𑐵𑑄 𑐩𑐮𑑂𑐮 𑐎𑐾. 𑐳𑐸𑐣𑑂𑐡𑐬 𑐰 𑐜𑐵. 𑐖𑑂𑐫𑑀𑐟𑐶𑐥𑑂𑐬𑐨𑐵 𑐟𑐸𑐮𑐵𑐢𑐬𑑄 𑐳𑐩𑐷𑐎𑑂𑐲𑐵 𑐫𑐵𑐣𑐵𑐡𑐷𑐐𑐸 𑐏𑑅 𑑋 𑐳𑐦𑐹𑐫𑐵𑐟 𑐎𑐫𑐵𑑅 𑐔𑑂𑐰𑐩𑐶 𑐜𑐵. 𑐱𑑂𑐬𑐾𑐲𑑂𑐛𑑄 𑐣𑑄 𑐠𑑅𑐐𑐸 𑐣𑐸𑐐𑑅𑐏𑑃 𑐟𑐫𑐵𑐡𑐷𑐐𑐸 𑐏𑑅𑐳𑐵 𑐳𑐎𑑂𑐰𑐫𑐵 𑐨𑐵𑐲𑐵𑐴𑑂𑐫𑐩𑐶 𑐬𑐵𑐖𑐡𑐵𑐳 𑐱𑑂𑐬𑐾𑐲𑑂𑐛, 𑐣𑐾𑐥𑐵𑐮 𑐥𑑂𑐬𑐖𑑂𑐘𑐵 𑐥𑑂𑐬𑐟𑐶𑐲𑑂𑐛𑐵𑐣𑐫𑐵 𑐥𑑂𑐬𑐵𑐖𑑂𑐘 𑐮𑐎𑑂𑐲𑑂𑐩𑐷 𑐩𑐵𑐮𑐷𑑄 𑐣𑑄 𑐠𑑅𑐠𑑅𑐐𑐸 𑐣𑐸𑐐𑑅𑐏𑑃 𑐟𑐫𑐵𑐡𑐷𑐐𑐸 𑐏𑑅 𑑋  𑐀𑐠𑐾 𑐴𑐾 𑐖𑑂𑐫𑐵𑐗𑑂𑐰𑐮𑐫𑑂 𑐏𑐮𑑅𑐫𑐵 𑐡𑐸𑐖𑑅 𑐃. 𑐱𑑂𑐫𑐵𑐩 𑐱𑑂𑐬𑐾𑐲𑑂𑐛𑑄 𑐣𑑄 𑐠𑑅𑐐𑐸 𑐣𑐸𑐐𑑅𑐏𑑃 𑐟𑐫𑐵𑐡𑐶𑐳𑐾𑑄 𑐳𑐶𑐬𑐥𑐵𑑅𑐫𑐵 𑐣𑐶𑐬𑐣𑑂𑐟𑐬𑐟𑐵 𑐧𑐷𑐟 𑐀𑐎𑑂𑐲𑐫 𑐎𑑀𑐲𑐫𑐵 𑐣𑐶𑑄𑐟𑐶𑑄 𑐣𑑂𑐫𑐵𑐐𑐹 𑐮𑐏 𑐟𑐎𑐵 𑐡𑐵𑑄𑐫𑐵 𑐔𑐾𑐎 𑐣𑑄 𑐮𑑅𑐮𑑂𑐴𑐵𑐣𑐵𑐡𑐷𑐐𑐸 𑐏𑑅 𑑋

𑐏𑐮𑑅𑐫𑐵 𑐡𑐸𑐖𑑅 𑐖𑑂𑐘𑐵𑐣𑐾𑐣𑑂𑐡𑑂𑐬𑐮𑐵𑐮 𑐳𑐶𑑄𑐴 𑐮𑐳𑐎𑐸𑐳 𑐫𑐵𑐣𑐵𑐡𑐷𑐐𑐸 𑐄𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐁𑐏𑑂𑐫𑐵𑐣𑐎𑐵𑐬 𑐳𑐵𑐫𑑂𑐩𑐶𑑄 𑐠𑐣𑐶𑑄 𑐣𑐶𑐡𑑃 𑐣𑑂𑐴𑑂𑐫𑑅 𑐄𑐥𑐣𑑂𑐫𑐵𑐳𑐫𑐵 𑐏𑑂𑐫𑐮𑐫𑑂 𑐣𑑂𑐴𑐹𑐥𑐶𑑄 𑐩𑐶𑐳𑐵𑐥𑐶𑑄 𑐥𑐶𑐟 𑐴𑐫𑐾𑐐𑐸 𑐮𑑂𑐫𑐵𑐏𑑄 𑐐𑑂𑐰𑐳𑐵𑑅 𑐐𑑂𑐰𑑅𑐐𑐸 𑐄𑐥𑐣𑑂𑐫𑐵𑐳 𑐔𑑂𑐰𑐖𑑂𑐫𑐵 𑐢𑐾𑑄𑐢𑐾𑑄𑐧𑐮𑑂𑐮𑐵𑑅 𑐎𑐵𑐳𑐵𑐫𑑂 𑐄𑐟𑑂𑐎𑐺𑐲𑑂𑐚 𑐖𑐸𑐫𑐵𑐡𑐷𑐩𑑂𑐴 𑐳𑐵𑐴𑐶𑐟𑑂𑐫𑐎𑐵𑐬 𑐱𑑂𑐬𑐷𑐮𑐎𑑂𑐲𑑂𑐩𑐷 𑐱𑑂𑐬𑐾𑐲𑑂𑐛𑐫𑐵𑐟 𑐴𑐣𑐵𑐥𑑁𑐮𑐶𑐳𑐾𑑄 𑐣𑐷𑐣𑑂𑐫𑐵𑐡𑑂𑐰𑑅 𑐟𑐎𑐵 𑐡𑐵𑑄 𑐣𑑄 𑐳𑐶𑐬𑐥𑐵𑑅 𑐣𑑄 𑐮𑑅𑐮𑑂𑐴𑐵𑐣𑐵𑐡𑐷𑐐𑐸 𑐏𑑅 𑑋