𑐣𑐾𑐰𑐵𑑅𑐟𑐫𑑂 𑐩𑑂𑐴𑐳𑐷𑐎𑐵 𑐣𑑂𑐴𑑂𑐫𑐧𑑂𑐰𑐂𑐐𑐸 𑐳𑐦𑐹 𑐣𑐾𑐰𑐵𑑅 𑐳𑐵𑑄𑐳𑑂𑐎𑐺𑐟𑐶𑐎 𑐖𑑂𑐘𑐵𑐣𑐎𑑀𑐱 𑐥𑐶𑐡𑐣

𑐣𑐾𑐰𑐵𑑅𑐟𑐫𑑂 𑐧𑐵𑐬𑐾 𑐥𑐹𑐰𑑄𑐎 𑐩𑑂𑐴𑐳𑐷𑐎𑐵 𑐡𑐸𑐐𑐸 𑐳𑐦𑐹 ‘𑐣𑐾𑐰𑐵𑑅 𑐳𑐵𑑄𑐳𑑂𑐎𑐺𑐟𑐶𑐎 𑐖𑑂𑐘𑐵𑐣𑐎𑑀𑐱’ 𑐫𑐵 𑐥𑐶𑐟𑐧𑑂𑐰𑐖𑑂𑐫𑐵 𑐖𑐹𑐐𑐸 𑐡𑐸 𑑋 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑐵 𑐐𑑂𑐰𑐵𑐴𑐵𑐮𑐶𑑄 𑐣𑐾𑐥𑐵𑐮𑐨𑐵𑐲𑐵 𑐊𑐎𑐾𑐡𑐾𑐩𑐶𑑄 𑐥𑐶𑐠𑑄𑐐𑐸 𑐠𑐸𑐐𑐸 𑐖𑑂𑐘𑐵𑐣𑐎𑑀𑐱𑐫𑐵 𑐰𑐶𑐩𑑀𑐔𑐣 𑐩𑑂𑐴𑐶𑐐𑑅 𑐫𑐾𑑃𑐫𑐵 𑐬𑐵𑐲𑑂𑐚𑑂𑐬𑐶𑐫 𑐣𑐵𑐔𑐑𑐬𑐫𑑂 𑐖𑐹𑐐𑐸 𑐟𑑅𑐖𑐶𑐐𑐸 𑐖𑑂𑐫𑐵𑐗𑑂𑐰𑑅𑐫𑐵 𑐡𑐠𑐸𑐂 𑐰𑐬𑐶𑐲𑑂𑐛 𑐳𑐵𑐴𑐶𑐟𑑂𑐫𑐎𑐵𑐬, 𑐩𑐹𑐬𑑂𑐟𑐶𑐎𑐵𑐬, 𑐳𑑄𑐐𑐷𑐟𑐎𑑅𑐩𑐶, 𑐳𑑄𑐳𑑂𑐎𑐺𑐟𑐶𑐰𑐶𑐡𑑂𑐥𑐶𑑄𑐳𑑄 𑐩𑑄𑐎𑐵𑑅 𑐎𑐠𑑄 𑐫𑐵𑐣𑐵𑐡𑐶𑐮 𑑋 𑐖𑑂𑐫𑐵𑐗𑑂𑐰𑐮𑐫𑑂 𑐗𑐵𑐫𑐵𑐡𑐷𑐥𑐶𑑄 𑐩𑐹𑐥𑐵𑐴𑐵𑐥𑐶𑑄𑐳𑑄 𑐳𑐦𑐹 𑐣𑑂𑐴𑑂𑐫𑑅𑐣𑐾 𑐔𑑂𑐰𑑄𑐐𑐸 𑐩𑐣𑑂𑐡𑑅 𑐥𑐸𑐖𑑂𑐫𑐵𑐣𑐵𑑅, 𑐳𑐦𑐹𑐫𑐵𑐟 𑐖𑐖𑑄𑐎𑐵 𑐎𑑂𑐰𑐏𑐵𑐫𑐾𑐎𑐵𑑅 𑐖𑑂𑐘𑐵𑐣𑐎𑑀𑐱 𑐳𑐦𑐹𑐫𑐵 𑐥𑐶𑐟𑐧𑑂𑐰𑐖𑑂𑐫𑐵 𑐫𑐵𑐣𑐵𑐡𑐷𑐐𑐸 𑐏𑑅 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐰𑐫𑑀𑐰𑐺𑐡𑑂𑐢𑐥𑐶𑑄 𑐖𑐣𑐎𑐰𑐶 𑐡𑐸𑐬𑑂𑐐𑐵𑐮𑐵𑐮 𑐱𑑂𑐬𑐾𑐲𑑂𑐛, 𑐎𑑂𑐬𑑀𑐢𑐎𑐮𑐵 𑐱𑐶𑐬𑑀𑐩𑐞𑐶 𑐎𑐵𑐮𑐸 𑐎𑐸𑐩𑑂𑐴𑐵𑑅, 𑐳𑑄𑐳𑑂𑐎𑐺𑐟𑐶𑐰𑐶𑐡𑑂 𑐫𑐖𑑂𑐘𑐩𑐵𑐣𑐥𑐟𑐶 𑐰𑐖𑑂𑐬𑐵𑐔𑐵𑐬𑑂𑐫, 𑐳𑐵𑐴𑐶𑐟𑑂𑐫𑐎𑐵𑐬 𑐳𑐸𑐰𑐬𑑂𑐞𑐎𑐾𑐱𑐬𑐷 𑐔𑐶𑐟𑑂𑐬𑐎𑐵𑐬, 𑐳𑑄𑐐𑐷𑐟𑐎𑑅𑐩𑐶 𑐱𑑂𑐬𑐷𑐐𑑀𑐥𑐵𑐮 𑐥𑑂𑐬𑐖𑐵𑐥𑐟𑐶𑐥𑐶𑑄𑐳𑑄 𑐳𑐦𑐹𑐫𑐵 𑐄𑐮𑐾𑐖𑑂𑐫𑐵 𑐫𑐵𑐣𑐵𑐡𑐷𑐐𑐸 𑐏𑑅 𑑋 𑐣𑐾𑐰𑐵𑑅𑐟𑐫𑑂 𑐧𑐵𑐬𑐾 𑐰𑐺𑐴𑐡𑑂 𑐬𑐸𑐥𑑄 𑐩𑑂𑐴𑐳𑐷𑐎𑐵 𑐧𑐷𑐐𑐸 𑐠𑑂𑐰 𑐳𑐦𑐹 ‘𑐣𑐾𑐰𑐵𑑅 𑐩𑑂𑐴𑐳𑐷𑐎𑐵’, ‘𑐳𑑄𑐳𑑂𑐎𑐺𑐟𑐶 𑐰 𑐳𑐩𑑂𑐥𑐡𑐵’, ‘𑐨𑐵𑐲𑐵, 𑐮𑐶𑐥𑐶 𑐰 𑐳𑐵𑐴𑐶𑐟𑑂𑐫’, ‘𑐩𑑂𑐫𑐾, 𑐧𑐵𑐖𑑄 𑐰 𑐥𑑂𑐫𑐵𑐏𑑄’ 𑐰 ‘𑐱𑐶𑐮𑑂𑐥, 𑐥𑑂𑐬𑐰𑐶𑐢𑐶 𑐰 𑐖𑑂𑐘𑐵𑐣’ 𑐫𑐵𑐣𑐵𑑅 𑐣𑑂𑐫𑐵𑐐𑐹 𑐧𑑂𑐰𑐫𑑂 𑐥𑐶𑐡𑑄𑐐𑐸 𑐏𑑅 𑑋 ‘𑐣𑐾𑐰𑐵𑑅 𑐩𑑂𑐴𑐳𑐷𑐎𑐵’𑐫𑐵 𑐰𑐶𑐩𑑀𑐔𑐣 𑐖𑐣𑐎𑐰𑐶 𑐱𑑂𑐬𑐾𑐲𑑂𑐛, ‘𑐨𑐵𑐲𑐵, ‘𑐳𑑄𑐳𑑂𑐎𑐺𑐟𑐶 𑐰 𑐳𑐩𑑂𑐥𑐡𑐵’𑐫𑐵 𑐰𑐶𑐩𑑀𑐔𑐣 𑐳𑑄𑐳𑑂𑐎𑐺𑐟𑐶𑐰𑐶𑐡 𑐰𑐖𑑂𑐬𑐵𑐔𑐵𑐬𑑂𑐫𑑄 ‘𑐨𑐵𑐲𑐵, 𑐮𑐶𑐥𑐶 𑐰 𑐳𑐵𑐴𑐶𑐟𑑂𑐫’ 𑐳𑐵𑐴𑐶𑐟𑑂𑐫𑐎𑐵𑐬 𑐔𑐶𑐟𑑂𑐬𑐎𑐵𑐬, ‘𑐩𑑂𑐫𑐾 𑐧𑐵𑐖𑑄 𑐰 𑐥𑑂𑐫𑐵𑐏𑑄’ 𑐰𑐬𑐶𑐲𑑂𑐛 𑐳𑑄𑐐𑐷𑐟𑐎𑑅𑐩𑐶 𑐱𑑂𑐬𑐷𑐐𑑀𑐥𑐵𑐮 𑐥𑑂𑐬𑐖𑐵𑐥𑐟𑐶 𑐰 ‘𑐱𑐶𑐮𑑂𑐥, 𑐥𑑂𑐬𑐰𑐶𑐢𑐶 𑐰 𑐖𑑂𑐘𑐵𑐣’ 𑐎𑑂𑐬𑑀𑐢𑐎𑐮𑐵 𑐱𑐶𑐬𑑀𑐩𑐞𑐶 𑐎𑐸𑐩𑑂𑐴𑐵𑑅 𑐣𑑄 𑐰𑐶𑐩𑑀𑐔𑐣 𑐫𑐵𑐣𑐵𑐡𑐷𑐐𑐸 𑐏𑑅 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐣𑑂𑐰𑐰𑐵𑐣𑐵𑐡𑐶𑐳𑐾𑑄 𑐖𑑂𑐘𑐵𑐣𑐎𑑀𑐱𑐫𑐵 𑐥𑐬𑐶𑐎𑐮𑑂𑐥𑐣𑐵𑐎𑐵𑐬 𑐰 𑐣𑐾𑐥𑐵𑐮𑐨𑐵𑐲𑐵 𑐊𑐎𑐾𑐡𑐾𑐩𑐶𑐫𑐵 𑐨𑐵𑐂𑐳 𑐔𑐵𑐣𑑂𑐳𑐮𑐬 𑐩𑐮𑑂𑐮 𑐎𑐾 𑐳𑐸𑐣𑑂𑐡𑐬𑑄 𑐠𑑂𑐰 𑐳𑐦𑐹 𑐣𑐾𑐰𑐵𑑅 𑐨𑐵𑐳𑑄 𑐔𑑂𑐰𑐫𑐵𑐟𑑅𑐐𑐸 𑐩𑐵𑐟𑑂𑐬 𑐁𑐏𑑅𑐐𑑂𑐰𑑅𑐫𑐵 𑐳𑐦𑐹 𑐖𑐎 𑐩𑐏𑐸, 𑐠𑑂𑐰 𑐣𑐾𑐰𑐵𑑅𑐟𑐫𑑂 𑐰𑐺𑐴𑐟𑑂 𑐬𑐸𑐥𑑄 𑐩𑑂𑐴𑐳𑐷𑐎𑐵 𑐧𑐷𑐐𑐸 𑐳𑐦𑐹 𑐏𑑅 𑐢𑐫𑐵𑐡𑐶𑐮 𑑋 𑐰𑐫𑑂𑐎𑐮𑑄 𑐢𑐫𑐵𑐡𑐶𑐮, ‘𑐠𑑂𑐰 𑐳𑐦𑐹 𑐩𑐵𑐟𑑂𑐬 𑐣𑐾𑐰𑐵𑑅 𑐨𑐵𑐳𑑄 𑐔𑑂𑐰𑐫𑐵𑐟𑑅𑐐𑐸 𑐁𑐏𑑅𑐐𑑂𑐰𑑅 𑐖𑐎 𑐩𑐏𑐸, 𑐠𑑂𑐰 𑐖𑑂𑐘𑐵𑐣𑐎𑑀𑐱𑐥𑐵𑐏𑐾𑑄 𑐣𑐾𑐰𑐵𑑅𑐟 𑐢𑐫𑐵𑐥𑐶𑑄 𑐳𑐸 𑐏𑑅, 𑐐𑐣𑑄 𑐰𑑅𑐐𑐸 𑐏𑑅, 𑐣𑐾𑐰𑐵𑑅𑐟𑐫𑑂 𑐳𑑄𑐳𑑂𑐎𑐺𑐟𑐶, 𑐖𑐵𑐟𑑂𑐬𑐵 𑐥𑐬𑑂𑐰 𑐕𑐸 𑐏𑑅, 𑐐𑐸𑐧𑐮𑐫𑑂 𑐖𑐸𑐂, 𑐣𑐾𑐰𑐵𑑅𑐟𑐫𑑂 𑐨𑐵𑐲𑐵, 𑐮𑐶𑐥𑐶, 𑐳𑐵𑐴𑐶𑐟𑑂𑐫 𑐕𑐸 𑐕𑐸 𑐡𑐸, 𑐐𑐠𑐾 𑐡𑐸; 𑐣𑐾𑐰𑐵𑑅𑐟𑐫𑑂 𑐩𑑂𑐫𑐾, 𑐧𑐵𑐖𑑄, 𑐳𑑄𑐐𑐷𑐟 𑐐𑐖𑑂𑐫𑐵𑑅𑐐𑐖𑑂𑐫𑐵𑑅𑐐𑐸 𑐡𑐸, 𑐣𑐾𑐰𑐵𑑅𑐟𑐫𑑂 𑐥𑐩𑑂𑐥𑐬𑐵𑐐𑐟 𑐱𑐶𑐮𑑂𑐥, 𑐥𑑂𑐬𑐰𑐶𑐢𑐷 𑐕𑐸 𑐏𑑅 𑐢𑐫𑐵𑐐𑐸 𑐦𑐸𑐎𑑂𑐎 𑐏𑑃 𑐳𑐷𑐎𑐾𑐦𑐂 𑑋 𑐄𑐎𑐶𑑄 𑐠𑑂𑐰 𑐕𑐐𑐹 𑐳𑐦𑐹 𑐖𑐎 𑐩𑐏𑐸, 𑐣𑐾𑐰𑐵𑑅𑐟𑐫𑑂 𑐁𑐟𑑂𑐩𑐵 𑐏𑑅 𑑋 𑐣𑐾𑐰𑐵𑑅𑐟𑐫𑑂 𑐁𑐟𑑂𑐩𑐵 𑐠𑐾𑑄 𑐖𑐹𑐐𑐸𑐮𑐶𑑄 𑐣𑐾𑐰𑐵𑑅𑐟𑐫𑑂 𑐩𑑂𑐴𑐥𑐸𑐖𑐵 𑐫𑐵𑐂𑐧𑐮𑐫𑑂 𑐠𑐾𑑄 𑐳𑐦𑐹𑐫𑐵𑐟 𑐣𑑄 𑐩𑐣𑑂𑐡𑑅 𑐡𑐫𑐾𑐎𑐵𑑅 𑐥𑐸𑐖𑑂𑐫𑐵𑐣𑐵𑑅 𑐥𑐶𑐟𑐧𑑂𑐰𑐖𑑂𑐫𑐵 𑐫𑐵𑐣𑐵𑐐𑐸 𑐏𑑅 𑑋’

𑐖𑑂𑐫𑐵𑐗𑑂𑐰𑐮𑐫𑑂 𑐖𑐣𑐎𑐰𑐶 𑐡𑐸𑐬𑑂𑐐𑐵𑐮𑐵𑐮 𑐱𑑂𑐬𑐾𑐲𑑂𑐛, 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑐵 𑐳𑑄𑐳𑑂𑐎𑐺𑐟𑐶 𑐟𑐠𑐵 𑐥𑐬𑑂𑐫𑐚𑐣 𑐰𑐶𑐨𑐵𑐐𑐫𑐵 𑐳𑑄𑐫𑑀𑐖𑐎 𑐰 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵 𑑘 𑐰𑐜𑐵𑐫𑐵 𑐀𑐢𑑂𑐫𑐎𑑂𑐲 𑐁𑐱𑐵𑐩𑐵𑐣 𑐳𑑄𑐐𑐟𑐥𑐶𑑄𑐳𑑄 𑐨𑐶𑑄𑐟𑐸𑐣𑐵 𑐡𑐾𑐕𑐵𑐫𑐵𑐡𑐷𑐐𑐸 𑐏𑑅 𑑋 𑐀𑐠𑐾𑐴𑐾 𑐖𑑂𑐫𑐵𑐗𑑂𑐰𑐮𑐫𑑂 𑐳𑐨𑐵𑐥𑐟𑐶𑐫𑐵 𑐠𑐵𑐳𑑄 𑐣𑑂𑐰𑐰𑐵𑐳𑐾𑑄 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑐵 𑐄𑐥𑐩𑐾𑐫𑐬 𑐳𑐸𑐣𑐶𑐟𑐵 𑐜𑑄𑐐𑑀𑐮 𑐠𑐥𑐵𑐫𑑂𑐳𑐎𑑄 𑐟𑑅𑐖𑐶𑐐𑐸 𑐳𑐦𑐹 𑐥𑐶𑐠𑐣𑐾𑐐𑐸 𑐖𑑂𑐫𑐵𑐫𑑂 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑑄 𑐳𑐴𑐎𑐵𑐬𑑂𑐫 𑐫𑐵𑐫𑐾𑐏𑑄𑐐𑐸 𑐏𑑃𑐫𑑂 𑐮𑐳𑐟𑐵 𑐥𑑂𑐰𑑄𑐎𑐸𑐳𑐾𑑄 𑐠𑐸𑐐𑐸 𑐳𑐦𑐹 𑐀𑑄𑐐𑑂𑐬𑐾𑐖𑐷 𑐰 𑐏𑐳 𑐣𑐾𑐥𑐵𑐮𑐷𑐨𑐵𑐳𑑄 𑐀𑐣𑐸𑐰𑐵𑐡 𑐫𑐵𑐣𑐵𑑅 𑐥𑐶𑐠𑐣𑐾𑐐𑐸 𑐣𑐶𑑄𑐟𑐶𑑄 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑑄 𑐐𑑂𑐰𑐵𑐴𑐵𑐮𑐶 𑐫𑐵𑐂𑐐𑐸 𑐏𑑃 𑐢𑐫𑐵𑐡𑐷𑐐𑐸 𑐏𑑅 𑑋

𑐣𑑂𑐫𑐵𑐐𑐹 𑐧𑑂𑐰𑐫𑑂 𑐥𑐶𑐡𑑄𑐐𑐸 𑐠𑑂𑐰 𑐖𑑂𑐘𑐵𑐣𑐎𑑀𑐱𑐫𑐵 𑐣𑑂𑐫𑐵𑐐𑐸𑐮𑐶𑑄 𑐳𑐦𑐹 𑐫𑐵𑐣𑐵𑑅 𑐠𑑂𑐫𑑄𑐩𑐠𑑂𑐫𑑄 𑐣𑐷𑐔𑑂𑐫𑐵𑐳𑑅 𑐥𑐺𑐲𑑂𑐛 𑐡𑐸 𑑋 𑐖𑑂𑐘𑐵𑐣𑐎𑑀𑐱𑐫𑐵 ‘𑐣𑐾𑐰𑐵𑑅 𑐩𑑂𑐴𑐳𑐷𑐎𑐵’ 𑐧𑑂𑐰𑐫𑐵 𑐳𑑄𑐫𑑀𑐖𑐣 𑐱𑐵𑐎𑑂𑐫 𑐳𑐸𑐬𑐾𑐣, ‘𑐳𑑄𑐳𑑂𑐎𑐺𑐟𑐶 𑐰 𑐳𑐩𑑂𑐥𑐡𑐵’𑐫𑐵 𑐳𑑄𑐫𑑀𑐖𑐣 𑐜𑐵. 𑐔𑐸𑐣𑑂𑐡𑐵 𑐰𑐖𑑂𑐬𑐵𑐔𑐵𑐬𑑂𑐫, ‘𑐨𑐵𑐲𑐵, 𑐮𑐶𑐥𑐶 𑐰 𑐳𑐵𑐴𑐶𑐟𑑂𑐫’𑐫𑐵 𑐳𑑄𑐫𑑀𑐖𑐣 𑐥𑑂𑐬𑐵. 𑐥𑑂𑐬𑐾𑐩𑐱𑐵𑐣𑑂𑐟𑐶 𑐟𑐸𑐮𑐵𑐢𑐬, ‘𑐩𑑂𑐫𑐾, 𑐧𑐵𑐖𑑄 𑐰 𑐥𑑂𑐫𑐵𑐏𑑄’𑐫𑐵 𑐳𑑄𑐫𑑀𑐖𑐣 𑐟𑑂𑐬𑐶𑐬𑐟𑑂𑐣 𑐩𑐵𑐣𑐣𑑂𑐢𑐬 𑐰 ‘𑐱𑐶𑐮𑑂𑐥, 𑐥𑑂𑐬𑐰𑐶𑐖𑑂𑐘𑐶 𑐰 𑐖𑑂𑐘𑐵𑐣’𑐫𑐵 𑐳𑑄𑐫𑑀𑐖𑐣 𑐰𑐶𑐱𑑂𑐰 𑐱𑐵𑐎𑑂𑐫𑑄 𑐫𑐵𑐣𑐵𑐡𑐷𑐐𑐸 𑐏𑑅 𑑋
𑐖𑑂𑐫𑐵𑐗𑑂𑐰𑐮𑐫𑑂 𑐳𑐦𑐹 𑐥𑐶𑐠𑐣𑐾𑐟 𑐐𑑂𑐰𑐵𑐴𑐵𑐮𑐶 𑐫𑐵𑐣𑐵𑐡𑐷𑐥𑐶𑑄 𑐳𑐎𑐳𑐶𑐟𑑄 𑐊𑐎𑐾𑐡𑐾𑐩𑐶𑐫𑐵 𑐳𑐡𑐳𑑂𑐫 𑐳𑐔𑐶𑐰 𑐥𑐸𑐲𑑂𑐥𑐬𑐵𑐖 𑐬𑐵𑐖𑐎𑐬𑑂𑐞𑐶𑐎𑐵𑐬𑑄 𑐳𑐸𑐨𑐵𑐫𑑂 𑐡𑐾𑐕𑐵𑐫𑐵𑐡𑐷𑐐𑐸 𑐏𑑅 𑑋