𑐐𑐸𑐬𑐸𑐥𑐶𑑄𑐟 𑐴𑐣, 𑐖𑑂𑐫𑐵𑐥𑐸 𑐡𑐶𑐰𑐳𑐫𑐵 𑐥𑐵𑑅𑐧𑑂𑐰 𑐮𑑅𑐮𑑂𑐴𑐵𑐟

𑐫𑐾𑑃- 𑐐𑐸𑐬𑐸 𑐥𑐸𑐣𑑂𑐴𑐶 𑐮𑐳𑐟𑐵𑐫𑑂 𑐖𑑂𑐫𑐵𑐥𑐸 𑐳𑑄𑐳𑑂𑐎𑐺𑐟𑐶 𑐰𑐶𑐎𑐵𑐳 𑐎𑑀𑐲𑑄 𑐥𑐬𑐩𑑂𑐥𑐬𑐵𑐐𑐟 𑐏𑑂𑐰𑐷𑐳𑑂𑐰𑑄𑐐𑐹 𑐖𑑂𑐫𑐵𑐥𑐸 𑐟𑑂𑐰𑐵𑑅𑐫𑐵 𑐧𑐵𑐖𑑄 𑐐𑐸𑐬𑐸𑐥𑐶𑑄𑐟 𑐴𑐣𑐾𑐖𑑂𑐫𑐵 𑐣𑑄 𑐫𑐵𑑅𑐐𑐸 𑐡𑐸 𑑋 𑐧𑐵𑐖𑑄𑐐𑐸𑐬𑐸𑐥𑐶𑑄𑐟 𑐏𑑂𑐫𑐾𑑃 𑐳𑐐𑑄 𑐧𑐶𑐫𑐵𑑅 𑐳𑑂𑐰𑐵𑑄𑐩𑐵𑑅 𑐎𑑂𑐰𑐏𑐵𑐫𑐾𑐎𑐵 𑐴𑐣𑐾𑐖𑑂𑐫𑐵 𑐫𑐵𑑅𑐐𑐸 𑐏𑑅 𑑋 𑐧𑐵𑐖𑑄𑐐𑐸𑐬𑐸𑐥𑐶𑑄𑐟 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑐵 𑐄𑐥𑐩𑐾𑐫𑐬 𑐴𑐬𑐶𑐥𑑂𑐬𑐨𑐵 𑐏𑐜𑑂𑐐𑐷 𑐱𑑂𑐬𑐾𑐲𑑂𑐛𑑄 𑐳𑑂𑐰𑐵𑑄 𑐮𑑅𑐮𑑂𑐴𑐵𑐣𑐵𑐡𑐷𑐐𑐸 𑐏𑑅 𑑋

𑐩𑑄𑐐𑐮𑐰𑐵𑑅 𑐖𑐹𑐐𑐸 𑐠𑐸𑐐𑐸 𑐴𑐾 𑐖𑑂𑐫𑐵𑐗𑑂𑐰𑐮𑐫𑑂 𑐗𑐶𑑄𑐏𑐸𑐎𑑂𑐰𑑅𑐐𑐸 𑐖𑑂𑐫𑐵𑐥𑐸 𑐡𑐶𑐰𑐳 𑐴𑐣𑐾𑐐𑐸 𑐣𑐶𑑄𑐟𑐶𑑄 𑐥𑐵𑐧𑑂𑐰𑑅 𑐣𑑄 𑐮𑑅𑐮𑑂𑐴𑐵𑑅𑐐𑐸 𑐡𑐸 𑑋 𑐖𑑂𑐫𑐵𑐗𑑂𑐰𑐮𑐫𑑂 𑐩𑐹 𑐥𑐵𑐴𑐵𑑃 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑐵 𑐩𑐾𑐫𑐬 𑐰𑐶𑐡𑑂𑐫𑐵 𑐳𑐸𑐣𑑂𑐡𑐬 𑐱𑐵𑐎𑑂𑐫𑑄 𑐐𑑀𑐦𑑅 𑐟𑑂𑐰𑐵𑑅 𑐩𑐵𑐎𑑅 𑐐𑐮𑑂𑐮𑐷 𑐖𑑂𑐫𑐵𑐥𑐸 𑐳𑐩𑐵𑐖𑐫𑐵𑐟 𑐣𑐾.𑐳𑑄. 𑑑𑑑𑑔𑑐 𑐫𑐵 𑐖𑑂𑐫𑐵𑐥𑐸 𑐡𑐶𑐰𑐳 𑐴𑐣𑐾𑐐𑐸 𑐥𑐵𑑅𑐧𑑂𑐰𑑅 𑐮𑑅𑐮𑑂𑐴𑐵𑐣𑐵𑐡𑐶𑐮 𑑋 𑐖𑑂𑐫𑐵𑐗𑑂𑐰𑐮𑐫𑑂 𑐐𑑀𑐦𑑅 𑐟𑑂𑐰𑐵𑑅𑐫𑐵 𑐣𑐵𑐫𑑅 𑐐𑑀𑐰𑐶𑐣𑑂𑐡 𑐩𑐴𑐬𑑂𑐖𑐣𑐫𑐵𑐟 𑐥𑐵𑑅𑐧𑑂𑐰𑑅 𑐮𑑂𑐴𑐵𑑅𑐐𑐸 𑐏𑑅𑐳𑐵 𑐎𑑀𑐲𑐫𑐵 𑐣𑑂𑐰𑐎𑐸 𑐳𑐣𑑂𑐟 𑐩𑐴𑐬𑑂𑐖𑐣𑑄 𑐖𑑂𑐫𑐵𑐥𑐸 𑐡𑐶𑐰𑐳 𑐴𑐣𑐾𑐐𑐸 𑐣𑐶𑑄𑐟𑐶𑑄 𑐕𑐐𑐹 𑐮𑐵𑐏 𑐟𑐎𑐵𑐫𑐵 𑐔𑐾𑐎 𑐣𑑄 𑐮𑑅𑐮𑑂𑐴𑐵𑐣𑐵𑐡𑐶𑐮 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐣𑑂𑐰𑐰𑐵𑐳𑐾𑑄 𑐩𑐾𑐫𑐬 𑐱𑐵𑐎𑑂𑐫𑑄 𑐠𑐐𑐸𑐣𑐾 𑐣𑐶𑐳𑐾𑑄 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑑄 𑐧𑐵𑐖𑑄𑐐𑐸𑐬𑐸𑐥𑐶𑑄𑐟 𑐴𑐣𑐾𑐖𑑂𑐫𑐵 𑐳𑐸𑐬𑐸 𑐫𑐵𑐣𑐵𑐐𑐸 𑐮𑐸𑐩𑑄𑐎𑐸𑐳𑐾𑑄 𑐠𑑂𑐰 𑐖𑑂𑐫𑐵 𑐠𑐸𑐐𑐸𑐳𑐷 𑐣𑑄 𑐖𑐸𑐂𑐐𑐸 𑐰 𑐮𑐶𑐥𑐵 𑐣𑑄 𑐣𑐶𑐬𑐣𑑂𑐟𑐬 𑐣𑑂𑐴𑑂𑐫𑐵𑐂𑐐𑐸 𑐏𑑃 𑐢𑐫𑐵𑐡𑐶𑐮 𑑋 𑐮𑐶𑐳𑐾𑑄 𑐰𑐫𑑂𑐎𑐮𑑄 𑐳𑐬𑐎𑐵𑐬𑑄 𑐴𑑅𑐐𑐸 𑐐𑐸𑐠𑐶 𑐰𑐶𑐢𑐾𑐫𑐎 𑐮𑐶𑐟 𑐎𑐵𑐫𑐾𑐐𑐸 𑐣𑐶𑑄𑐟𑐶𑑄 𑐠𑐩𑑂𑐴𑑄 𑐣𑑄 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷 𑐮𑐶𑐳𑐾𑑄 𑐬𑐵𑐲𑑂𑐚𑑂𑐬𑐥𑐟𑐶𑐫𑐵𑐠𑐵𑐫𑑂 𑐟𑐎 𑐰𑐣𑐵𑑅 𑐥𑐴𑐮 𑐫𑐵𑐣𑐵𑐐𑐸 𑐏𑑃 𑐎𑐣𑐵𑐡𑐶𑐮 𑑋

𑐖𑑂𑐫𑐵𑐗𑑂𑐰𑑅𑐫𑐵 𑐳𑐨𑐵𑐥𑐟𑐶 𑐰 𑐰𑐶𑐎𑐵𑐳 𑐎𑑀𑐲𑐫𑐵 𑐣𑑂𑐰𑐎𑐸 𑐳𑐣𑑂𑐟 𑐩𑐴𑐬𑑂𑐖𑐣𑑄 𑐗𑐶𑑄𑐕𑐡𑑃 𑐣𑑂𑐴𑑂𑐫𑐰𑐣𑐶𑐳𑐾𑑄 𑐥𑐬𑐩𑑂𑐥𑐬𑐵𑐐𑐟 𑐖𑑂𑐫𑐵𑐥𑐸 𑐟𑑂𑐰𑐵𑑅𑐫𑐵 𑐐𑐸𑐬𑐸𑐥𑐶𑑄𑐟 𑐴𑐣𑐾𑐐𑐸𑐖𑑂𑐫𑐵 𑐳𑐸𑐬𑐸 𑐫𑐵𑐣𑐵𑐐𑐸 𑐏𑑃 𑐎𑐣𑐵𑐡𑐶𑐮 𑑋 𑐀𑐠𑐾𑐴𑐾 𑐰𑐫𑑂𑐎𑐮𑑄 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵, 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷 𑐥𑐵𑐏𑐾𑑄 𑐰𑑅𑐐𑐸 𑐐𑑂𑐰𑐵𑐴𑐵𑐮𑐶𑑄 𑑖𑑐 𑐮𑐵𑐏 𑐟𑐎𑐵𑐫𑐵 𑐎𑑀𑐲 𑐡𑐫𑐾𑐢𑐸𑑄𑐎𑐹𑐐𑐸 𑐏𑑃 𑐣𑑂𑐴𑑂𑐫𑐠𑐣𑐵𑐡𑐶𑐳𑐾𑑄 𑐁𑑅 𑐎𑑀𑐲𑑄 𑐠𑐷𑐠𑐷 𑐊𑐎𑐾𑐡𑐾𑐩𑐶𑐎 𑐖𑑂𑐫𑐵 𑐣𑑄 𑐫𑐵𑐣𑐵 𑐰𑐣𑐾𑐐𑐸 𑐏𑑃 𑐎𑐣𑐵𑐡𑐶𑐮 𑑋
𑐖𑑂𑐫𑐵𑐗𑑂𑐰𑐮𑐫𑑂 𑐄𑐥𑐩𑐾𑐫𑐬 𑐴𑐬𑐶𑐥𑑂𑐬𑐨𑐵 𑐏𑐜𑐐𑐷 𑐱𑑂𑐬𑐾𑐲𑑂𑐛𑐫𑐵 𑐮𑐶𑐳𑐾𑑄 𑐖𑑂𑐫𑐵𑐥𑐸 𑐩𑐴𑐵𑐐𑐸𑐠𑐶 𑐣𑐾𑐥𑐵𑑅𑐫𑐵 𑐎𑐾𑐣𑑂𑐡𑑂𑐬𑐷𑐫 𑐣𑐵𑐫𑑅 𑐬𑐵𑐖𑐨𑐵𑐂 𑐖𑐎𑑅𑐩𑐶, 𑐫𑐾𑑃 𑐩𑐴𑐵𑐣𑐐𑐬 𑐳𑐩𑐶𑐟𑐶𑐫𑐵 𑐎𑐵𑐬𑑂𑐫𑐰𑐵𑐴𑐎 𑐣𑐵𑐫𑑅 𑐣𑐵𑐣𑐷𑐴𑐶𑐬𑐵 𑐩𑐴𑐬𑑂𑐖𑐣𑐥𑐶𑑄𑐳𑑄 𑐣𑑄 𑐣𑑂𑐰𑐰𑐵𑐣𑐵𑐡𑐷𑐐𑐸 𑐏𑑅 𑑋