𑐎𑐶𑐔𑐮𑐫𑑂 𑐮𑐵𑑅𑐐𑐸 𑐳𑐩𑑂𑐥𑐡𑐵 – 𑐥𑑀𑐏𑐬𑐵𑐫𑐵 𑐣𑐾𑐰𑐵𑑅 𑐂𑐟𑐶𑐴𑐵𑐳

𑐥𑑀𑐏𑐬𑐵 𑐢𑐎𑐵𑑅 𑐣𑐵𑑄 𑐣𑑂𑐫𑐣𑐾 𑐏𑐟𑐸𑐰𑑄 𑐗𑐷𑐐𑐸 𑐩𑐟𑐶 𑐡𑐸𑐣𑐾 𑐤𑐵𑐥𑐵𑑄 𑐡𑐾𑐳𑐶𑐟 𑐔𑐵𑑅𑐴𑐶𑐮𑐾𑐐𑐸 𑐠𑐵𑐫𑑂, 𑐟𑐟𑑅𑐢𑐒𑑂𑐐𑐸 𑐟𑐵𑐮 𑐀𑐮𑐫𑑂 𑐀𑐢𑐸𑐣𑐶𑐎 𑐳𑐴𑐬𑐫𑐵 𑐮𑐹 𑐤𑑂𑐫𑑅𑐣𑐾 𑐰𑐂𑑋 𑐦𑐾𑐰𑐵 𑐟𑐵𑐮, 𑐧𑐾𑐐𑑂𑐣𑐵𑐳 𑐟𑐵𑐮, 𑐥𑑂𑐫𑐵𑐬𑐵𑐐𑑂𑐮𑐵𑐂𑐡𑐶𑐒, 𑐴𑐵𑐂𑐎𑐶𑐒 𑐀𑐮𑐫𑑂 𑐩𑐾𑐩𑐾𑐐𑐸𑑋 𑐡𑐾𑐧𑑂𑐰(𑐥𑑂𑐬𑐡𑐾𑐳) 𑐮𑑂𑐫𑐵𑑅 𑑔𑐫𑐵 𑐔𑐎𑐣𑐵𑐔𑑂𑐰𑐒𑑂𑐐𑐸 𑐳𑐴𑐬 𑐀𑐮𑐫𑑂 𑐣𑐸𑐐𑑅 𑐮𑑂𑐰𑐨 𑐰𑐣𑐶𑑄𑐐𑐸 𑐮𑐹, 𑐤𑑂𑐫𑐂𑐥𑐸𑐐𑐸 𑐖𑑂𑐫𑐵𑐏𑑃, 𑐠𑐶𑐠𑐶 𑐮𑐎𑐳 𑐢𑐎𑐵𑑅 𑐥𑑀𑐏𑐬𑐫𑐵𑐟𑑅 𑐪𑐳𑑂𑐫𑐹𑑋 𑐐𑐸𑐦𑐵 𑐣𑐶𑐳𑐾𑑄 𑐟𑐵𑐮𑐟, 𑐎𑐵𑐳𑐵 𑐪𑐶𑐟𑐾𑐐𑐸 𑐣𑐶𑐳𑐾𑑄 𑐔𑑂𑐰𑐵𑐥𑐸𑐐𑐸𑑃 𑐐𑐫𑐾𑐐𑐸, 𑐟𑑂𑐬𑐾𑐎𑐶𑐒, 𑐬𑐵𑐦𑑂𑐟𑐶𑐒, 𑐐𑑂𑐮𑐵𑐂𑐡𑐶𑐒 𑐣𑐶𑐳𑐾𑑄 𑐣𑐵𑐄𑐔𑐵 𑐐𑐫𑐾𑐐𑐸, 𑐥𑑀𑐏𑐬𑐫𑐵 𑐠𑑅𑐐𑐸 𑐴𑐾 𑐪𑐳𑐶𑐎𑐵 𑐖𑑂𑐰𑐣𑐵𑐔𑑂𑐰𑐒𑑂𑐐𑐸 𑐳𑐴𑐬 𑐏𑑅𑑋 𑐠𑐠𑐾 𑐠𑐶𑐠𑐶 𑐎𑐠𑑄 𑐣𑐸𑐐𑑅 𑐮𑑂𑐰𑐨𑑄 𑐎𑑂𑐫𑐒𑑂𑐎𑐷𑐐𑐸 𑐳𑐴𑐬 𑐥𑑀𑐏𑐬𑐵𑐫𑐵 𑐡𑐎𑑂𑐰𑐳𑐾 𑐥𑐸𑐮𑐵𑑄𑐐𑐸 𑐖𑑅, 𑐥𑐸𑐮𑐵𑑄 𑐧𑐖𑐵𑑅 𑐢𑐵𑑅𑐳𑐵 𑐎𑐶𑐔𑐮𑑄 𑐐𑐵𑐣𑐵𑐔𑑂𑐰𑐒𑑂𑐐𑐸 𑐡𑐸𑑋 𑐔𑐎𑐣𑐵𑑄𑐔𑑂𑐰𑐒𑑂𑐐𑐸 𑐁𑐢𑐸𑐣𑐶𑐎 𑐳𑐴𑐬𑐫𑐵 𑐡𑐸𑐣𑐾 𑐟𑐣𑐵𑐔𑑂𑐰𑐒𑑂𑐐𑐸 𑐥𑑀𑐏𑐬𑐫𑐵 𑐥𑐸𑐮𑐵𑑄 𑐧𑐖𑐵𑐬𑑄 𑐳𑑂𑐰𑐳𑑅𑐡𑑃 𑐤𑑂𑐫𑑅 𑐣𑐷𑐏𑐸𑐏𑐵 𑐕𑐾𑑃𑐫𑐵 𑐰 𑐖𑐸𑐖𑑄𑐫𑐵 𑐂𑐟𑐶𑐴𑐵𑐳 𑐎𑐣𑐶𑑄𑑋

𑐣𑐔𑑂𑐔𑐵𑐐𑐸 𑐐𑐵𑑅𑐡𑐾𑐫𑑂

𑐥𑑀𑐏𑐬𑐵 𑐐𑐵𑑅𑐡𑐾𑐫𑑂 𑐐𑐠𑐾 𑐄𑐟𑑂𑐥𑐟𑑂𑐟𑐶 𑐖𑐸𑐮 𑐢𑐵𑐂𑐐𑐸 𑐏𑑃 𑐫𑐎𑑂𑐰 𑐢𑐵𑐥𑐹𑐟 𑐡𑐸𑑋 𑐣𑑂𑐫𑐵𑐳𑑅 𑐡𑑃 𑐤𑑂𑐫𑑅 𑐟𑐶𑐣𑐶 𑐥𑑂𑐬𑐵𑐎𑐺𑐟𑐶𑐎 𑐥𑑂𑐬𑐎𑑀𑐥𑑄 𑐄𑐟𑑂𑐥𑐟𑑂𑐟𑐶 𑐖𑐹𑐐𑐸 𑐣𑐔𑑂𑐔𑐵𑐐𑐸 𑐐𑐵𑑅𑐡𑐾𑐫𑑂 𑐢𑐎𑐵𑑅 𑐥𑑀𑐏𑐬𑐵𑐫𑐵𑐟𑑅 𑐪𑐳𑑂𑐫𑐹𑑋 𑐩𑑀𑐣𑐶𑐎 𑐦𑑀𑐬𑑂𑐟 𑐢𑐵𑐂𑐪 𑐦𑑂𑐬𑐵𑐣𑑂𑐳𑐫𑐵 𑐕𑐟𑐵 𑐴𑐮𑐶𑑄𑐧𑑂𑐰𑐣𑐾𑐎𑐸𑐠𑐶𑐫𑐵 𑐧𑑂𑐰𑐣𑐵𑐩𑐶𑑄 𑐩𑐵𑐮𑐾𑐖𑑂𑐫𑐵 𑐫𑐵𑑅𑐐𑐸 𑐡𑐸𑑋 𑐰𑐫𑐾𑐎𑑅 𑐧𑑃𑐐𑑂𑐰𑐵𑐬𑐵 𑐧𑐵𑐬𑐾 𑐧𑑂𑐰𑐣𑐾𑐖𑑂𑐫𑐵(Geology), 𑐧𑑃𑐐𑑂𑐰𑐵𑐬𑐵 𑐰 𑐄𑐎𑐾𑐫𑐵 𑐳𑑄𑐬𑐔𑐣𑐵 𑐧𑐵𑐬𑐾 𑐧𑑂𑐰𑐣𑐾𑐖𑑂𑐫𑐵(Geomorphology) 𑐰 𑐧𑑃 𑐧𑐵𑐬𑐾 𑐧𑑂𑐰𑐣𑐾𑐖𑑂𑐫𑐵(Geography)𑐫𑐵 𑐏𑑂𑐫𑐮𑐫𑑂 𑐳𑑂𑐫𑐹𑐟𑐵𑑅𑐪 𑐩𑐣𑐹 𑐏𑑅𑑋 𑐰𑐫𑐾𑐎𑑅𑐫𑐵 𑐩𑐵𑐮𑐾𑐖𑑂𑐫𑐵 𑐎𑐠𑑄 𑐥𑑀𑐏𑐬𑐵𑐫𑐵 𑐄𑐟𑑂𑐥𑐟𑑂𑐟𑐶 𑐧𑐵𑐬𑐾 𑐠𑐠𑐾 𑐢𑐫𑐵𑐟𑑅𑐐𑐸 𑐡𑐸- “𑐣𑐾𑐥𑐵𑑅𑐫𑐵 𑐡𑐠𑐸 𑐥𑐵𑐏𑐾 𑐮𑐵𑑅𑐐𑐸 𑐥𑑀𑐏𑐬𑐵 𑐐𑐵𑑅𑐡𑐾𑐫𑑂 𑐴𑐮𑐶𑑄𑐫𑐵 𑐔𑑂𑐰𑐎𑐵𑐫𑑂 𑐮𑐵𑑅𑐐𑐸 𑐔𑑂𑐰𑐵𑐥𑐸𑐐𑐸𑑃𑐫𑐵 𑐄𑐟𑑂𑐥𑐟𑑂𑐟𑐶 𑐮𑐶𑐳𑐾𑑄 𑐳𑑂𑐰𑐵𑐥𑐹 𑐡𑐸𑑋 𑐠𑑂𑐰 𑐐𑐵𑑅𑐡𑐾𑐫𑑂‌𑐫𑐵 𑐣𑐸𑐐𑑅 𑐎𑑂𑐰𑐳𑐵𑐮𑐷𑐐𑐸 𑐔𑑂𑐰𑐵𑐥𑐸𑐐𑐸𑑃, 𑐤𑐳𑐶𑐎𑐵𑐥(gorges), 𑐐𑐸𑐦𑐵, 𑐟𑐵𑐮𑑄 𑐫𑐎𑑂𑐰 𑐡𑐾𑐖𑐮𑐵𑐩𑐶(tourists)𑐟 𑐰𑑅𑑋 𑐠𑑂𑐰 𑐐𑐵𑑅𑐡𑐾𑐫𑑂‌𑐫𑐵 𑐄𑐟𑑂𑐥𑐟𑑂𑐟𑐶 𑐐𑐸𑐂𑑃 𑐐𑐸𑐂𑑃 𑐣𑐶𑐄𑐐𑐸 𑐏𑑃 𑐏𑑅 𑐢𑐵𑑅𑐳𑐵 𑐠𑐸𑐎𑐾𑐫𑐵 𑐄𑐟𑑂𑐥𑐟𑑂𑐟𑐶 𑐖𑐹𑐐𑐸 𑐫𑐎𑑂𑐰 𑐩𑐡𑐸𑐣𑐶𑑋 𑐫𑐎𑑂𑐰 𑐃 𑐟𑐎𑑂𑐎 𑐠𑐣 𑐔𑑂𑐰𑐣𑐶𑐥𑐶𑐣𑑂𑐳𑑄 𑐥𑑀𑐏𑐬𑐵 𑐐𑐵𑑅 𑐣𑑄 𑐣𑐾𑐥𑐵𑑅 𑐐𑐵𑑅 𑐰 𑐎𑐱𑑂𑐩𑐷𑐬 𑐐𑐵𑑅 𑐠𑐾𑑄 𑐟𑐵𑐮 𑐟𑐖𑑂𑐫𑐵𑐣𑐵𑑄 𑐮𑑅 𑐥𑐶𑐴𑐵𑑃 𑐰𑐣𑐵𑑄 𑐡𑐹𑐐𑐸 𑐐𑐵𑑅𑐡𑐾𑐫𑑂 𑐢𑐎𑐵𑑅 𑐥𑐟𑑂𑐫𑐵𑑅 𑐫𑐵𑐣𑐵𑑄 𑐰𑐫𑐵𑐔𑑂𑐰𑐒𑑂𑐐𑐸 𑐏𑐣𑐾𑐡𑐸𑑋 𑐎𑑂𑐰𑐠𑐶𑐎𑑂𑐎 𑐳𑑂𑐰𑐮 𑐢𑐵𑑅𑐳𑐵 𑐥𑑀𑐏𑐬𑐵𑐫𑐵 𑐏𑐸𑐳𑐶𑑄 𑐳𑑂𑐰𑐫𑑄𑐎𑐵𑐟𑑅𑐐𑐸 𑐠𑐵𑐳𑐫𑑂 𑐫𑐎𑑂𑐰 𑐎𑑂𑐰𑐳𑐷𑐐𑐸 𑐏𑑃𑐟 𑐮𑐸𑐫𑐵𑑅𑐰𑑅𑑋 𑐄𑐎𑐾𑑄 𑐥𑑀𑐏𑐬𑐵𑐫𑑂 𑐟𑑅𑐔𑑂𑐰𑑅𑐐𑐸 𑐥𑑂𑐬𑐎𑑀𑐥𑐫𑐵 𑐎𑑂𑐰𑐳𑐷𑐐𑐸 𑐏𑑃𑐟 𑐮𑐸𑐫𑐵𑑅𑐰𑑅𑑋 𑐄𑐐𑐸 𑐎𑑂𑐰𑐳𑐶𑐣𑐵𑑄𑐔𑑂𑐰𑐒𑑂𑐐𑐸 𑐎𑑂𑐰𑐳𑐶𑐔𑐵 𑐢𑐫𑐵𑐐𑐸 𑐠𑐣𑐫𑐵 𑐄𑐟𑑂𑐥𑐟𑑂𑐟𑐶 𑐧𑐵𑐬𑐾 𑐠𑐸𑐂𑐎𑐾𑐐𑐸 𑐐𑐸𑐣 𑐏𑑅𑑋 𑐂𑐮𑐫𑑂 𑐧𑐶𑐮𑐫𑑂 𑐠𑐣𑐫𑐵 𑐔𑑂𑐰𑐵𑐥𑐸𑐐𑐸𑑃𑐫𑐵 𑐀𑐒𑑂𑐐𑑅𑐟 𑐮𑑂𑐰𑐵𑐂𑑋 𑐠𑑂𑐰 𑐧𑑃 𑐟𑑅𑐮𑐾 𑐨𑐸𑐏𑐵𑐫𑑂 𑐧𑑂𑐰𑐿𑐐𑐸 𑐎𑐔𑐵(tectonic plates) 𑐰 𑐤𑑂𑐫𑐵𑐣𑐵𑐔𑑂𑐰𑐒𑑂𑐐𑐸 𑐥𑑂𑐰𑑃𑐧𑑂𑐰(glacier)𑐫𑐵 𑐎𑐵𑐬𑐣𑑄 𑐖𑐸𑐂𑑋 ”

𑐳𑑂𑐰𑐳𑑅𑐡𑑃 𑐤𑑂𑐫𑑅 𑐔𑑂𑐫𑐵𑐤𑐸 𑐧𑐷𑐎𑐵𑑅 𑐣𑑂𑐫𑐵𑐳𑐾 𑐰𑐣𑐵𑑄

𑐥𑑀𑐏𑐬𑐵𑑄 𑐮𑑅 𑐥𑐶𑐴𑐵𑑃 𑐰𑐣𑐾 𑐤𑑂𑐫𑑅 𑐴𑐾 𑐄𑐎𑐾𑐫𑐵 𑐕𑐔𑐵𑐏𑐶𑐮𑐶𑑄 𑐟𑐶𑐧𑑂𑐧𑐟-𑐧𑐬𑑂𑐩𑐵 𑐴𑐵 𑐡𑐸𑐥𑐶𑑄 𑐩𑐣𑐹𑐟 𑐔𑑂𑐰𑐣𑐵𑐰𑐫𑐵𑐔𑑂𑐰𑐒𑑂𑐐𑐸 𑐏𑑅𑑋 𑐳𑐵𑐬𑐵𑐒𑐎𑑀𑐟 𑐥𑐵𑐏𑐾 𑐑𑐮𑐾𑐟𑐫𑐾𑐐𑐸 𑐬𑐵𑐖𑑂𑐫 𑐄𑐧𑐮𑐾 𑐡𑐫𑐾𑐢𑐸𑐒𑑂𑐎𑐮𑑋 𑑑𑑕 𑐳𑐡𑐶 𑐥𑐵𑐏𑐾 𑐩𑐣𑐹𑐟 𑐳𑐵 𑐗𑑂𑐰𑐫𑐾𑐟𑑅 𑐥𑑀𑐏𑐬𑐵𑐫𑑂 𑐎𑐸𑐴𑐵𑑃 𑐰𑐫𑐾𑐐𑐸 𑐫𑐵𑐟𑑋 𑐰 𑐂𑐮𑐫𑑂 𑐠𑑂𑐰 𑐠𑐵𑐳𑐫𑑂 𑐑𑐮𑐾 𑐰 𑐟𑐩𑐸(𑐐𑐸𑐬𑐸𑐒)𑐟𑐫𑐾𑐐𑐸 𑐬𑐵𑐖𑑂𑐫 𑐧𑑂𑐰𑐮𑐣𑐵𑑄𑐰𑐫𑐵𑐔𑑂𑐰𑐒𑑂𑐐𑐸 𑐏𑐣𑐾𑐡𑐸𑑋 𑐥𑑀𑐏𑐬𑐵𑐫𑐵 𑐂𑐟𑐶𑐴𑐵𑐳 𑐎𑐵𑐳𑑂𑐎𑐷 𑐬𑐵𑐖𑑂𑐫𑐫𑐵 𑐂𑐟𑐶𑐴𑐵𑐳 𑐮𑐶𑐳𑐾𑑄 𑐳𑑂𑐰𑐵𑐥𑐹 𑐡𑐸𑑋 𑑑𑑘 𑐳𑐡𑐶 𑐥𑐵𑐏𑐾 𑐱𑐵𑐴 𑐖𑐸𑐖𑐸𑐥𑐶𑐣𑑂𑐳𑑄 𑐎𑐵𑐳𑑂𑐎𑐷𑐫𑐵 𑐬𑐵𑐖𑐎𑐵𑐖 𑐑𑐮𑐾𑐟 𑐥𑐵𑐏𑐾𑑄 𑐮𑐵𑐎𑐵𑑅𑐎𑐵𑐮𑑋 𑐰 𑐂𑐮𑐫𑑂 𑐥𑑀𑐏𑐬𑐵 𑐐𑐵𑑅𑐡𑐾𑐫𑑂‌ 𑐩𑐣𑐹 𑐔𑑂𑐰𑐣𑐾𑐟𑑅 𑐩𑐖𑑂𑐫𑐹𑐣𑐶𑑋 𑐥𑑀𑐏𑐬𑐵 𑐐𑐵𑑅𑐡𑐾𑐫𑑂‌𑐫𑐵 𑐫𑐎𑑂𑐰 𑐠𑐵𑐳𑐫𑑂‌ 𑐍𑐮𑐖𑑂𑐰𑐬 𑐮𑐵𑐐𑐵𑑅 𑐏𑐰𑑋 𑑑𑑖 𑐳𑐡𑐶 𑐥𑐵𑐏𑐾 𑐥𑑀𑐏𑐬𑐫𑐵 𑐕𑐟𑐵 𑐣𑐶𑐟𑐵 𑐠𑐵𑐳𑐫𑑂‌ 𑐨𑐟𑐷 𑐨𑐟𑐷 𑐧𑐳𑑂𑐟𑐷 𑐡𑐫𑐵𑐰𑐮𑑋

𑐣𑐾𑐰𑐵𑑅𑐟 𑐠𑑂𑐫𑑄𑐧𑐮𑐾 𑐣𑐶𑐳𑐾𑑄 𑐥𑑀𑐏𑐬𑐵𑐫𑐵 𑐳𑐴𑐬𑐷 𑐂𑐟𑐶𑐴𑐵𑐳 𑐤𑑂𑐫𑐵𑑅𑐐𑐸 𑐏𑑅𑑋 𑑑𑑘 𑐳𑐡𑐶𑐫𑐵 𑐡𑐠𑐸 𑐥𑐵𑐏𑐾 𑐎𑐵𑐳𑑂𑐎𑐷𑐫𑐵 𑐖𑐸𑐖𑐸𑑄 𑐏𑑂𑐰𑐥𑐫𑐵 𑐣𑐾𑐰𑐵𑑅𑐟𑐫𑐾𑐟𑑅 𑐧𑑂𑐰𑐣𑑋 𑐎𑐵𑐳𑑂𑐎𑐷𑐫𑐵 𑐖𑐸𑐖𑐸𑑄 𑐥𑑀𑐏𑐬𑐵𑐫𑐵𑐟𑑅 𑐧𑐣𑐾𑐖𑑂𑐫𑐵 𑐫𑐵𑐫𑐾𑐐𑐸 𑐮𑐵𑐐𑐵𑑅 𑐡𑐫𑐾𑐐𑐸 𑐩𑐶𑐏𑐵𑑄 𑐏𑑂𑐰𑐥𑐫𑐵 𑐖𑐸𑐖𑐸 𑐬𑐞𑐖𑐷𑐟 𑐩𑐮𑑂𑐮𑐫𑐵𑐟𑑅 𑐢𑐫𑐵𑑅 𑐀𑐣𑑄 𑐣𑐷𑐏𑐸𑐏𑐵 𑐕𑐾𑑃 𑐥𑑀𑐏𑐬𑐵𑐫𑑂‌ 𑐕𑑂𑐰𑐮𑑋 𑐏𑑂𑐰𑐥𑑄 𑐥𑑀𑐏𑐬𑐵 𑐰𑐣𑐾𑐟𑑅 𑐔𑑂𑐫𑐵𑐤𑐸 𑐧𑐶𑐮𑑋 𑐠𑑂𑐰 𑐤𑐵𑐥𑐵𑑄 𑐏𑑂𑐰𑐥𑐡𑐾𑐳𑑄 𑐥𑑀𑐏𑐬𑐵𑐫𑑂‌ 𑐔𑑂𑐰𑑄𑐰𑑄𑐥𑐶𑑄 𑐣𑐾𑐰𑐵𑑅𑐟𑐫𑐾𑐟𑑅 “𑑒𑑖 𑐎𑐸𑐬𑐶𑐫𑐵” 𑐢𑐎𑐵𑑅 𑐢𑐵𑐂𑑋 𑐣𑐾𑐰𑐵𑑅𑐟 𑐮𑑂𑐰𑐴𑑄 𑐎𑐷𑐐𑐸, 𑐳𑐶𑑃𑐎𑑅𑐩𑐶, 𑐣𑑃𑐎𑑅𑐩𑐶, 𑐮𑐶𑐳𑐾𑑄 𑐥𑐸𑑄𑐖𑑂𑐫𑐵, 𑐡𑐣𑐾𑐖𑑂𑐫𑐵, 𑐡𑐣𑐾𑐥𑐴𑑅 𑐮𑐶𑐳𑐾𑑄 𑐠𑐶𑐠𑐶 𑐖𑑂𑐫𑐵𑐣𑐶𑑄𑐥𑐶𑑄 𑐖𑐸𑐫𑐵𑑅 𑐀𑐣𑐫𑐵 𑐧𑐖𑐵𑑅 𑐡𑐫𑐾𑐎𑐮𑑋 𑐐𑐞𑐾𑐱 𑐚𑑀𑐮, 𑐨𑐷𑐩𑐳𑐾𑐣 𑐚𑑀𑐮, 𑐨𑐿𑐬𑐰 𑐚𑑀𑐮- 𑐐𑐣𑐾𑐡𑑂𑐫𑑅 𑐟𑑂𑐰𑐵𑑅, 𑐨𑐶𑐣𑑂𑐡𑑂𑐫𑑅 𑐟𑑂𑐰𑐵𑑅, 𑐨𑐿𑐮𑑅 𑐟𑑂𑐰𑐵𑑅 𑐢𑐎𑐵𑑅 𑐤𑐵𑐥𑐵𑑄 𑐡𑐣𑑋 𑐀𑐣 𑐡𑐾𑐐𑑅 𑐡𑐣𑐵𑑄 𑐄𑐎𑐾𑐫𑐵 𑐁𑐢𑐵𑐬𑑄 𑐟𑑂𑐰𑐵𑑅𑐫𑐵 𑐣𑐵𑑄 𑐕𑐸𑐟𑑋 𑐥𑑀𑐏𑐬𑐵𑐫𑐵 𑐄𑐐𑐸 𑐴𑐾 𑐠𑐵𑐳𑐫𑑂 𑐧𑐖𑐵𑑅 𑐠𑐵𑐥𑑄 𑐫𑐵𑐫𑐾𑐐𑐸 𑐎𑐵𑐬𑐣 𑐕𑐸 𑐣𑑄 𑐢𑐵𑑅𑐳𑐵 𑐰 𑐠𑐵𑐳𑐫𑑂 𑐧𑐸𑑃𑐖𑑂𑐫𑐵 𑐫𑐵𑐫𑐾𑐟𑑅 𑐮𑑅 𑐡𑐸, 𑐧𑐸𑑃 𑐡𑐸 𑐀𑐮𑐫𑑂 𑐐𑐸𑑃 𑐣𑑄 𑐮𑐶𑐎𑑂𑐎 𑐮𑐵𑑅𑑋 𑐄𑐐𑐸 𑐥𑐵𑐏𑐾 𑐍𑐮𑐖𑑂𑐰𑐬 𑐥𑐸𑐒𑑂𑐎𑐷𑐥𑐶𑑄 𑐥𑐟𑐶 𑐣𑑄 𑐰𑐿𑐩𑐏𑐸𑑋 𑐣𑐾𑐰𑐵𑑅𑐟 𑐠𑑂𑐫𑑃𑐳𑐾 𑐣𑐾𑐰𑐵𑑅 𑐟𑐖𑐶𑐮𑐖𑐶 𑐣𑑄 𑐠𑑂𑐫𑐣 𑐥𑑀𑐏𑐬𑐵𑐫𑑂, 𑐐𑐹 𑐮𑐶𑐥𑐵 𑐃 𑐥𑐵𑐳𑐾𑑄 𑐀𑐣𑐫𑐵 𑐥𑐬𑐶𑐰𑐾𑐳 𑐎𑐠𑑄 𑐴𑐶𑐮𑐵𑐰𑐣𑑋

𑐧𑑂𑐫𑐵𑐥𑐵𑐬 𑐤𑑂𑐫𑐵𑐟, 𑐧𑑂𑐰𑐮𑐣

𑐥𑑀𑐏𑐬𑐵 𑐢𑐫𑐵𑐐𑐸 𑐟𑐶𑐧𑑂𑐧𑐟 𑐰𑐣𑐶𑑄𑐐𑐸 𑐮𑑃𑐫𑑂 𑐮𑐵𑑅𑐰𑑅𑐐𑐸 𑐠𑐵𑐫𑑂‌ 𑐖𑐸𑐮𑑋 𑐠𑐵𑐎 𑐏𑑀𑐮𑐵𑐫𑑂‌ 𑐔𑐶 𑐎𑐵𑑅𑐰𑐣𑐶𑑄𑐥𑐶𑑄 𑐥𑑀𑐏𑐬𑐵𑐫𑑂‌ 𑐡𑐶𑐣𑐵𑑄 𑐰𑐣𑐶𑑄𑐐𑐸 𑐫𑐵𑐣𑐵𑐴𑐮𑑋 𑐟𑐶𑐧𑑂𑐧𑐟𑐫𑐵 𑐩𑐳𑑂𑐮𑐵 𑐀𑐮𑐫𑑂 𑐰𑐵𑐳𑑅𑐑𑐵𑑃𑐫𑑂‌ 𑐥𑑀𑐏𑐬𑐵𑐫𑑂‌ 𑐴𑐫𑐵𑑅 𑐩𑐷𑐐𑐸 𑐫𑐵𑐣𑐵𑑄 𑐴𑐮𑑋 𑐥𑑀𑐏𑐬𑐵 𑐧𑐖𑐵𑑅 𑐠𑐵𑐥𑑄 𑐖𑐸𑐳𑐾𑑄 𑐣𑐾𑐥𑐵𑑅 𑐐𑐵𑑅 𑐮𑐶𑐳𑐾𑑄 𑐖𑐎𑑂𑐎 𑐩𑐏𑐸, 𑐨𑐿𑐬𑐴𑐰𑐵 𑐮𑐶𑐳𑐾𑑄 𑐣𑑄 𑐰𑑂𑐫𑐵𑐥𑐵𑐬 𑐳𑑂𑐰𑐵𑐥𑐹 𑐡𑐫𑐵𑐰𑐮𑑋 𑐂𑐟𑐶𑐴𑐵𑐳𑐫𑐵 𑐳𑑂𑐬𑑀𑐟𑑄 𑐣𑐾𑐰𑐵𑑅 𑐰𑑂𑐫𑐵𑐥𑐵𑐬𑐶𑐟 𑐨𑐵𑐬𑐟𑐫𑐵 𑐮𑐎𑐣𑐵𑐄 𑐰 𑐥𑐟𑐣𑐵 𑐳𑐴𑐬𑐫𑑂‌ 𑐣𑑄 𑐰𑑂𑐫𑐵𑐥𑐵𑐬 𑐫𑐵𑐫𑐾𑐟𑑅 𑐠𑑂𑐫𑐒𑑂𑐎𑐮 𑐢𑐎𑐵𑑅 𑐢𑐵𑐂𑑋

𑐧𑐸𑐮𑐸𑐴𑐸𑑃 𑐥𑑀𑐏𑐬𑐵 𑐧𑐖𑐵𑑅 𑐠𑑅𑐐𑐸 𑐟𑐸𑐟𑐶𑐂 𑐠𑑅 𑐴𑐾 𑐡𑐣𑐾𑐦𑐟𑑋 𑐀𑐣 𑐣𑐫𑐾𑐐𑐸 𑐟𑑂𑐰𑐣𑐾𑐐𑐸 𑐥𑐶𑐣𑐾𑑄 𑐴𑐫𑐾 𑐩𑑂𑐰𑐵𑑅𑐮𑐵𑑅𑐰𑐣𑑋 𑐀𑐣𑑄 𑐮𑐶𑐥𑐵 𑐧𑐖𑐵𑐬𑐫𑑂‌ 𑐤𑐶𑐫𑐵𑑄𑐤𑐶𑑄 𑐕𑑂𑐫𑐮𑐾𑐐𑐸 𑐖𑑂𑐰𑐮𑑄𑐟 𑐀𑐮𑐫𑑂‌ 𑐧𑐸𑑃𑐖𑑂𑐫𑐵 𑐫𑐵𑐫𑐾𑐟𑑅 𑐩𑐵𑑅𑐐𑐸 𑐖𑑂𑐰𑐮𑑄𑐟 𑐀𑐣 𑐴𑐾 𑐄𑐟𑑂𑐥𑐵𑐡𑐣 𑐫𑐵𑐣𑐵𑐴𑐮𑑋

𑐖𑐸𑐖𑑄

𑐠𑑁𑑄𑐫𑐵 𑐂𑐮𑐫𑑂‌ 𑐠𑐾𑑄 𑐴𑐵𑐂𑐰𑐾 𑐖𑐸𑐫𑐵𑑅 𑐳𑑅𑐟𑐶𑐎𑑂𑐎 𑐥𑑀𑐏𑐬𑐫𑐵 𑐰𑐣𑐶𑑄𑐐𑐸 𑐃 𑐩𑐏𑐸 𑐰𑑋 𑐩𑐮𑑂𑐮 𑐎𑐵𑐮𑐫𑑂‌ 𑐫𑐾𑑃𑐡𑐾𑐫𑑂‌𑐫𑐵 𑐥𑐳𑑂𑐔𑐶𑐩 𑐢𑑂𑐰𑐵𑐏𑐵 𑐢𑐫𑐵𑐐𑐸 𑐣𑑅𑐎𑑂𑐰𑐵𑑅 𑐏𑑅𑑋 𑐣𑑅𑐎𑑂𑐰𑐵𑑅 𑐮𑐵𑐫𑐎𑐹- 𑐣𑐸𑐰𑐵𑐎𑑀𑐚 𑐡𑐬𑐧𑐵𑐬𑑄 𑐄𑐧𑐮𑐾 𑐫𑐾𑑃𑐡𑐾𑐫𑑂‌ 𑐥𑐸𑐮𑐷𑑋 𑐣𑑅𑐎𑑂𑐰𑐵𑑅 𑐮𑐵𑐫𑐎𑐹 𑐰 𑐳𑐵𑑄𑐑𑐸 𑐧𑐖𑐵𑑅(𑐟𑑂𑐬𑐷𑐱𑐸𑐮𑐷 𑐧𑐖𑐵𑐬) 𑐣𑐾𑐰𑐵𑑅 𑐬𑐵𑐖𑑂𑐫 𑐰 𑐟𑐵𑐩𑐵𑐒 𑐬𑐵𑐖𑑂𑐫𑐫𑐵 𑐳𑐶 𑐠𑐾𑑄 𑐏𑐣𑐾𑐡𑐸𑑋

𑐫𑐾𑑃𑐫𑐵 𑐩𑐣𑑂𑐡𑑅 𑐦𑐮𑑂𑐔𑐵𑑄 𑐤𑑂𑐫𑐵𑐂𑐐𑐸 𑐖𑐸𑐖𑑄 𑐯𑐸𑐟𑐶 𑐖𑐸𑐫𑐵𑑅 𑐳𑐵𑑄𑐑𑐸 𑐧𑐖𑐵𑑅 𑐠𑑂𑐫𑐒𑑂𑐎𑐵𑑅 𑐣𑐾𑐰𑐵𑑅 𑐡𑐾𑐫𑑂‌ 𑐥𑐸𑐮𑐷𑑋 𑐀𑐣𑑄 𑐢𑐵𑐡𑐶𑐒 𑐧𑐾𑐳𑐷, 𑐁𑐬𑐸𑐑𑐵𑐟, 𑐥𑐵𑐮𑐸𑐒𑐟𑐵𑐬, 𑐎𑐸𑐣𑑂𑐕𑐵, 𑐏𑐵𑐮𑑂𑐟𑐾, 𑐡𑐾𑐄𑐬𑐵𑐮𑐷, 𑐳𑐶𑐳𑐸𑐰𑐵, 𑐰𑐶𑐖𑐫𑐥𑐸𑐬, 𑐎𑐸𑑃𑐜𑐴𑐮 𑐀𑐮𑐫𑑂 𑐥𑐸𑐮𑐵𑑄 𑐥𑑀𑐏𑐬𑐵 𑐠𑑂𑐫𑐒𑑂𑐎𑐷𑑋 𑐤𑐵𑐥𑐵 𑐥𑑀𑐏𑐬𑐫𑐵 𑐧𑐖𑐵𑑅 𑐀𑐒𑑂𑐐𑑂𑐬𑐾𑐖𑐷 𑐁𑐏𑑅 “𑐟𑐶” T 𑐧𑐵𑑄𑐮𑐹𑑋 𑐀𑐣𑑄 𑐄𑐏𑐾 𑐬𑐵𑐣𑐷𑐥𑑁𑐰𑐵, 𑐟𑐾𑐬𑑂𑐳𑐵𑐥𑐚𑑂𑐚𑐷 𑐰 𑐀𑐬𑑂𑐑𑑁𑑃 𑐥𑐵𑐏𑐾 𑐐𑐸𑐏𑐵 𑐗𑐶𑐏𑐵 𑐟𑐶 𑐕𑐾𑑃𑐟 𑐡𑐹𑑋

𑐠𑐶𑐠𑐶 𑐂𑐮𑐫𑑂 𑐠𑐶𑐠𑐶 𑐎𑐠𑑄 𑐠𑐵𑐫𑑂 𑐴𑑂𑐫𑐹𑐥𑐶𑑄

𑐔𑑂𑐰𑐣𑐾𑐟𑑅 𑐖𑑂𑐫𑐹𑐐𑐸 𑐠𑐵𑐫𑑂 𑐢𑐎𑐵𑑅 𑐳𑑂𑐫𑐹𑐧𑐮𑐫𑑂 𑐤𑐵𑐥𑐵𑑄 𑑒𑑖𑐏𑐵 𑐕𑐾𑑃 𑐰𑑅𑐥𑐶𑐣𑑂𑐳𑑄 𑐠𑑅𑐏𑐮𑑅𑐟 𑐳𑑅𑐟𑐮𑑋 𑐥𑑀𑐏𑐬𑐵𑐫𑑂 𑐣𑐾𑐰𑐵𑑅𑐟 𑐠𑐶𑐠𑐶 𑐂𑐮𑐫𑑂 𑐠𑐶𑐠𑐶 𑐎𑐵𑐬𑐣𑑄 𑐰𑑅𑐐𑐸 𑐏𑐣𑐾𑐡𑐸𑑋 𑐩𑐾𑐐𑐸 𑐗𑑂𑐰𑐮𑐫𑑂 𑐢𑐵𑑅𑐳𑐵 𑐐𑑂𑐰𑐬𑑂𑐏𑐵𑐮𑐶𑐟𑐫𑐾𑐳𑑄 𑐴𑐟𑐵𑑅 𑐫𑐵𑑅𑐧𑐮𑐫𑑂 𑐣𑐾𑐥𑐵𑑅 𑐐𑐵𑐮𑑄 𑐧𑐶𑐳𑐶𑑄𑐰𑑅𑐥𑐶𑑄 𑐣𑐾𑐰𑐵𑑅𑐟 𑐡𑐸𑑋 𑐐𑑂𑐰𑐬𑑂𑐏𑐵𑐮𑐶 𑐳𑐾𑐣𑐵𑑄 𑐳𑑂𑐫𑐵𑐂 𑐟𑑂𑐫𑐵𑐂 𑐢𑐎𑐵𑑅 𑐐𑑂𑐫𑐵𑐣𑐵𑑄 𑐣𑐾𑐰𑐵𑑅𑐟 𑐣𑐾𑐥𑐵𑐮 𑐩𑐣𑑂𑐡𑐮𑑄 𑐫𑐎𑑂𑐰 𑐠𑐵𑐳𑐫𑑂 𑐧𑐶𑐳𑑂𑐫𑐹𑑄 𑐰𑐣𑑋 𑐰 𑐗𑑂𑐰𑐮𑐫𑑂 𑐥𑑀𑐏𑐬𑐵 𑐠𑑂𑐫𑑄𑐥𑐶𑑄 𑐣𑑄 𑐫𑐎𑑂𑐰 𑐡𑐸𑑋 𑐏𑑂𑐰𑐥𑐫𑑂 𑐫𑐎𑑂𑐰 𑐕𑐾𑑃𑐏𑐵 𑐕𑑂𑐰𑐫𑐾𑐎𑐸𑐐𑐸 𑐀𑐮𑐫𑑂 𑐫𑐎𑑂𑐰 𑐴𑐶𑐩𑑂𑐳𑐵 𑐖𑐸𑐫𑐵𑐰𑐳𑐮𑐾𑑄 𑐧𑐶𑐳𑐶𑑄𑐰𑑄𑐥𑐶𑑄 𑐫𑐎𑑂𑐰 𑐡𑐹𑐐𑐸 𑐏𑑅𑑋

𑐥𑑀𑐏𑐬𑐵𑐫𑐵 𑐣𑐾𑐰𑐵𑑅𑐟 𑐀𑐥𑑂𑐰𑐮𑑄 𑐴𑐾 𑐏𑑂𑐰𑐥𑑄 𑐰𑑅𑐥𑐶𑑄 𑐏𑑅𑑋 𑐀𑐣𑑄 𑐕𑐸𑑄 𑐮𑑂𑐫𑐵𑐏𑐫𑑂 𑐫𑐾𑑃𑐫𑑂, 𑐫𑐮𑑄 𑐀𑐮𑐫𑑂 𑐨𑑀𑑄𑐟𑑄 𑐰𑑅𑐥𑐶𑑄 𑐣𑑄 𑐡𑐸𑑋

𑐣𑐾𑐰𑐵𑑅 𑐧𑐖𑐵𑑅 𑐰 𑐄𑐎𑐾𑐫𑐵 𑐡𑐣𑐾𑐥𑐴𑑅

𑐥𑑀𑐏𑐬𑐵𑐫𑐵 𑐧𑐖𑐵𑑅 𑐀𑐒𑑂𑐐𑑂𑐬𑐾𑐖𑐷 𑐨𑐵𑐳𑑄 T ‘𑐟𑐶’ 𑐁𑐏𑑅 𑐧𑐵𑑄𑐮𑐹𑑋 𑐠𑐣 𑐟𑑂𑐰𑐵𑑅/𑐟𑑂𑐰𑑅 𑐣𑑄 𑐡𑐸𑑋 𑐳𑐶𑐒𑑂𑐐𑐣𑐵𑐠, 𑐩𑑀𑐴𑐬𑐷𑐫𑐵 𑐟𑑂𑐰𑐵𑑅, 𑐨𑐿𑐬𑐰 𑐟𑑂𑐰𑐵𑑅, 𑐨𑐷𑐩𑐳𑐾𑐣 𑐟𑑂𑐰𑐵𑑅, 𑐐𑐞𑐾𑐱 𑐟𑑂𑐰𑐵𑑅, 𑐬𑐵𑐩𑐎𑐺𑐲𑑂𑐞 𑐟𑑂𑐰𑐵𑑅, 𑐧𑐐𑐵𑐮𑐾, 𑐳𑐶𑐩𑐮𑐔𑑁𑐬, 𑐛𑐵𑐜𑑀𑐥𑐳𑐮, 𑐟𑐾𑐬𑑂𑐳𑐵𑐥𑐚𑑂𑐚𑐷 𑐰 𑐳𑐵𑑃𑐑𑐸𑐩𑐸𑐏 𑐠𑐣𑐫𑐵 𑐥𑐸𑐮𑐵𑑄 𑐧𑐖𑐵𑑅𑐫𑐵 𑐟𑑂𑐰𑐵𑑅𑐟 𑐏𑑅𑑋

𑐕𑐾𑑃𑐫𑐵 𑐡𑐣𑐾𑐥𑐴𑑅

𑐣𑐾𑐥𑐵𑐮 𑐩𑐣𑑂𑐡𑐮𑑄 𑐟𑐵𑐥𑐵𑐎𑑂𑐎 𑐔𑑂𑐰𑑄𑐰𑐣𑐾𑐢𑐸𑐒𑑂𑐎𑐵𑑅, 𑐀𑐣 𑐠𑐾𑑄 𑐳𑑂𑐬𑑀𑐟 𑐳𑐵𑐢𑐣 𑐡𑐿𑐩𑐏𑐸𑐟𑑋 𑐀𑐠𑐾 𑐖𑐸𑐫𑐵𑑅 𑐥𑑀𑐏𑐬𑐵𑐫𑐵 𑐣𑐾𑐰𑐵𑑅𑐟𑐫𑐾𑐳𑑄 𑐠𑑅𑐐𑐸 𑐥𑐴𑐮𑑄 𑐕𑐾𑑃 𑐡𑐣𑐶𑑄𑑋 𑐥𑑀𑐏𑐬𑐵𑐫𑑂 𑐣𑐾𑐰𑐵𑑅 𑐕𑐾𑑃𑐟 𑐕𑐾𑐮𑐶𑐂 𑐮𑑀𑐴𑐟𑑄 𑐡𑐣𑐶𑑄𑑋 𑐠𑑂𑐰 𑐥𑐵𑐴𑐵𑐬𑐫𑐵 𑐠𑐶𑐠𑐶 𑐖𑐵𑐟𑐷𑐟𑐫𑐾𑐐𑐸 𑐕𑐾𑑃 𑐡𑐣𑐾𑐐𑐸 𑐥𑐴𑑅 𑐮𑐶𑐳𑐾𑑄 𑐖𑑂𑐰𑑅𑐮𑐵𑑅𑑋 𑐀𑐣𑑄 𑐩𑐵𑐟𑑄 𑐣𑐶𑐳𑐾𑑄 𑐢𑐵𑑅𑐳𑐵 𑐀𑑅𑐥𑐵𑑄 𑐡𑐣𑐶𑑄𑑋 𑐥𑑀𑐏𑐬𑐵𑐫𑑂 𑐀𑑅𑐥𑐵 𑐕𑐷 𑐟𑐳𑑂𑐎𑑄 𑐠𑐵𑐎𑐸𑑋 𑐣𑐾𑐰𑐵𑑅 𑐕𑐾𑑃𑐫𑑂 𑐩𑐵 𑐀𑑅𑐥𑐵, 𑐔𑐶𑐎𑑄 𑐀𑑅𑐥𑐵, 𑐡𑐵𑐔𑐶 𑐀𑑅𑐥𑐵, 𑐠𑐾𑑄 𑐠𑐶𑐠𑐶 𑐎𑐠𑑄𑐫𑐵 𑐀𑑅𑐥𑐵𑐟 𑐕𑑂𑐫𑑅𑑋 𑐥𑑀𑐏𑐬𑐵𑐫𑑂 𑐕𑐠𑐵𑐫𑑂 𑐖𑐎𑑂𑐎 𑐀𑑅𑐥𑐵 𑐕𑑂𑐫𑐹𑑋 𑐐𑐣 𑐢𑐵𑑅𑐳𑐵 𑐏𑑀𑑄𑐜𑐾 𑐥𑑀𑐏𑐬𑐷 𑐢𑐵𑑅𑐐𑐸 𑐥𑐸𑐏𑐸𑐮𑐶𑐂 𑐥𑐵𑐏𑐾𑑋

𑐤𑐵𑐥𑐵 𑐥𑑀𑐏𑐬𑐵𑐫𑑂 𑐣𑐾𑐰𑐵𑑅 𑐕𑐾𑑃 𑐡𑐣𑐾𑐟𑑅 𑐥𑑂𑐫𑐡𑑃 𑐣𑑂𑐫𑐵𑐡𑑃 𑐧𑑂𑐫𑐹𑑋 𑐳𑐶𑑃 𑐟𑐵𑐥𑐵𑐎𑑂𑐎𑑄 𑐴𑐫𑐾𑐩𑐵𑑅𑑋 𑐢𑐸𑑄𑐳𑐶𑑄 𑐕𑑂𑐫𑐮𑐷𑐐𑐸𑐮𑐶𑑄 𑐀𑐣 𑐮𑐶𑐎𑑂𑐎 𑐩𑐡𑐸𑑋 𑐢𑐸𑑄𑐳𑐶𑑃 𑐩𑐵𑐮𑐾𑐟𑑅 𑐴𑐾 𑐫𑐎𑑂𑐰 𑐧𑑂𑐫𑐹 𑐢𑐵𑑅𑐳𑐵 𑐩𑐵𑐮𑐵𑑅 𑐩𑐸𑐒𑑂𑐎𑐵𑑅 𑐀𑐮𑐫𑑂 𑐨𑐟𑐶𑐔𑐵𑑄 𑐡𑐔𑑂𑐕𑐶 𑐟𑐵𑐎𑑂𑐎 𑐢𑑂𑐫𑐵𑐔𑐮𑐫𑑂 𑐠𑐸𑐣𑐵𑑄𑐟𑐫𑐾𑐩𑐵𑑅𑑋 𑐀𑐫𑐾𑐣𑑄 𑐀𑐣𑐫𑐵 𑐕𑐾𑑃𑐫𑑂 𑐡𑐮𑐵𑐣 𑐟𑐫𑐵𑑅 𑐴𑐾 𑐡𑐣𑐵𑐟𑑅𑐐𑐸 𑐡𑐸𑑋 𑐀𑐣 𑐣𑑄 𑐳𑑄𑐗𑑂𑐫𑐵𑑅, 𑐟𑐶𑐎𑐶𑐗𑑂𑐫𑐵𑑅, 𑐮𑐶𑐳𑐾𑑄 𑐠𑐶𑐠𑐶 𑐗𑑂𑐫𑐵𑑅𑐟 𑐎𑐶𑐫𑐵𑐟𑑅𑐐𑐸 𑐡𑐸𑑋

𑐥𑐸𑐮𑐵𑑄 𑐥𑑀𑐏𑐬𑐵𑐫𑐵 𑐕𑐾𑑃𑐫𑐵 𑐥𑐮𑐶 ‘𑐗𑐶𑐒𑑂𑐐𑐟𑐾’ 𑐢𑐵𑑅𑐐𑐸 𑐮𑑀𑐴𑑄𑐥𑑁 𑐮𑐶𑐎𑐣𑐵𑑄 𑐡𑐫𑐾𑐎𑐷𑑋 𑐏𑐵𑐣𑐶𑑄 𑐟𑐟𑑅𑐐𑑂𑐰𑑅 𑐔𑐟𑑂𑐟𑐵𑐣 𑐮𑐶𑐎𑐵𑐫𑐾𑐢𑐸𑐒𑑂𑐎𑐵𑑅 𑐄𑐎𑐾𑑄 𑐥𑑁 𑐥𑑁 𑐫𑐵𑐣𑐵𑑄 𑐧𑑂𑐰𑐫𑐾𑐎𑐷 𑐀𑐮𑐫𑑂 𑐗𑐶𑐒𑑂𑐐𑐟𑐾 𑐢𑐵𑑅𑐐𑐸 𑐮𑑀𑐴𑑄 𑐡𑐿𑑋 𑐣𑐾𑐥𑐵𑐮 𑐩𑐣𑑂𑐡𑐮𑑄 𑐥𑐶𑐣𑐾 𑐰𑐣𑐵𑑄 𑐀𑐣𑐫𑐵 𑐠𑑅𑐐𑐸 𑐥𑐴𑐮𑑄 𑐫𑐵𑐫𑐾𑐐𑐸𑐮𑐷 𑐠𑑂𑐰 𑐣𑑄 𑐕𑐟𑐵 𑐡𑐳𑐸 𑐏𑑅𑑋 𑐥𑐸𑐮𑐵𑑄 𑐥𑑀𑐏𑐬𑐵𑐫𑑂 𑐧𑐴𑐵𑑅, 𑐧𑐴𑐷, 𑐮𑐵𑐕𑐶, 𑐣𑐣𑐶, 𑐔𑐸𑐎 𑐢𑐎𑐵𑑅 𑐩𑐡𑐸𑑋

𑐠𑐎𑐮𑐶 𑐣𑐵𑐐𑐬𑐶𑐎𑐥𑐶𑐣𑐾𑐐𑐸 𑐎𑐠𑑄 𑐀𑐣 𑐤𑐵𑐥𑐵 𑐫𑐎𑑂𑐰 𑐦𑐮𑑂𑐔𑐵𑐟 𑐢𑐵𑑅𑐳𑐵 𑐡𑐹 𑐴𑑄, 𑐟𑐬 𑐁𑑅 𑐰 𑐩𑐡𑐫𑐵𑐰𑐣𑐾𑐢𑐸𑐒𑑂𑐎𑐮, 𑐐𑐸𑐮𑐶𑐳𑑂𑐫𑐵𑑄 𑐣𑐷𑐖𑐶 𑐫𑐵𑐣𑐵𑐕𑑂𑐰𑐮𑑋 𑐣𑐾𑐥𑐵𑐮 𑐩𑐣𑑂𑐡𑐮𑐫𑑂 𑐠𑐾𑑄 𑐴𑐵𑐎𑐸𑐔𑐵𑑄 𑐩𑐏𑐸 𑐎𑐶 𑐳𑐶𑐄𑐔𑐵𑑄 𑐕𑐾𑑃 𑐡𑐣𑐶𑑄 𑐥𑑀𑐏𑐬𑐵𑐫𑑂𑑋 𑐳𑑂𑐠𑐵𑐣𑐷𑐫𑐎𑐬𑐞 𑐣𑑄 𑐫𑐵𑐳𑐾𑑄 𑐣𑐾𑐰𑐵𑑅 𑐳𑐩𑑂𑐥𑐡𑐵 𑐥𑑀𑐏𑐬𑐵𑐫𑑂 𑐠𑐠𑐾 𑐫𑐵𑐣𑐵𑑄 𑐧𑑂𑐰𑐮𑐣𑑋

𑐧𑐸𑑃

𑐄𑐐𑐸 𑐧𑐳𑑂𑐟𑐷 𑐥𑑂𑐫𑐏𑐾𑑄 𑐧𑐸𑑃 𑐴𑐾 𑐧𑐸𑑃 𑐡𑐹𑐐𑐸 𑐏𑑅𑑋 𑐁𑑅 𑐮𑐵 𑐧𑐸𑐮𑐸𑐴𑐸𑑃 𑐧𑐸𑑃 𑐩𑐡𑐫𑐵𑐰𑐣𑑋 𑐥𑑀𑐏𑐬𑐵𑐫𑑂 𑐫𑐎𑑂𑐰 𑐥𑑂𑐰𑑃 𑐰𑑅𑑋 𑐀𑐠𑐾 𑐖𑐸𑐫𑐵𑑅 𑐕𑐏𑐵 𑐕𑐾𑑃 𑐕𑐏𑐵 𑐖𑐵𑐴𑐵𑐣𑐫𑐵 𑐥𑑂𑐫𑐏𑐾𑑄 𑐴𑐾 𑐧𑐸𑑃 𑐡𑐿𑑋 𑐕𑐠𑐵𑐫𑑂 𑐧𑐸𑑃𑐂 𑐥𑑂𑐰𑑄 𑐧𑐵𑐮𑐶 𑐳𑑂𑐫𑐒𑑂𑐎𑐮 𑐢𑐵𑑅𑐳𑐵 𑐩𑐾𑐠𑐵𑐫𑑂 𑐥𑐵𑐏𑐾𑐫𑐵 𑐧𑐸𑑃𑐂 𑐧𑐵𑐮𑐶 𑐡𑐿 𑐢𑐿𑐐𑐸 𑐎𑐠𑑄 𑐠𑐠𑐾 𑐥𑑂𑐫𑐏𑐾𑑄 𑐧𑐸𑑃 𑐡𑐹𑐐𑐸 𑐏𑑅𑑋 𑐀𑐣 𑐴𑐵𑐎𑐣𑑄 𑐥𑑂𑐰𑑃 𑐰𑐮 𑐢𑐵𑑅𑐳𑐵 𑐕𑐏𑐾 𑐖𑐎𑑂𑐎 𑐰𑐿𑑋 𑐤𑐵𑐥𑐵 𑐥𑑀𑐏𑐬𑐵𑐫𑐵 𑐥𑑂𑐬𑐵𑐎𑐺𑐟𑐶𑐎 𑐳𑑁𑐣𑑂𑐡𑐬𑑂𑐫 𑐔𑑂𑐰𑐵𑐥𑐸𑐐𑐸𑑃 𑐖𑐎𑑂𑐎 𑐩𑐏𑐸, 𑐀𑐣 𑐩𑑂𑐰𑐵𑐫𑑂 𑐀𑐮𑐫𑑂 𑐳𑐸𑐣𑑂𑐟𑐮𑐵𑐳𑐶𑐩𑐵 𑐗𑑂𑐰𑑅𑐗𑑂𑐰𑐮𑑄 𑐡𑐫𑐵𑐔𑑂𑐰𑐒𑑂𑐐𑐸 𑐣𑑄 𑐕𑐟𑐵 𑐮𑐹 𑐡𑐹𑑋

𑐳𑐴𑐬 𑐔𑐎𑐣𑐾𑐐𑐸 𑐖𑑂𑐫𑐵

𑐍𑐮𑐖𑑂𑐰𑐬 𑐤𑐒𑑂𑐎𑐾 𑐤𑑂𑐫𑑅 𑐥𑑀𑐏𑐬𑐵𑐫𑐵 𑐮𑐶𑐎𑑂𑐎 𑐐𑐸𑑃𑐔𑑂𑐰𑐫𑑂 𑐖𑐎𑑂𑐎 𑐩𑐣𑐹𑐟 𑐧𑐳𑑂𑐟𑐷 𑐔𑑂𑐰𑐣𑐾𑐖𑑂𑐫𑐹𑐐𑐸 𑐠𑐵𑐫𑑂 𑐏𑐰𑑋 𑐩𑐣𑐹𑐟 𑐎𑐸𑐴𑐵𑑃 𑐰𑑅𑐳𑐵𑑄 𑐧𑐸𑑃𑐖𑑂𑐫𑐵 𑐫𑐵𑐫𑐾𑐟𑑅 𑐳𑐸𑐠𑐫𑑂 𑐰𑐫𑐵𑑅 𑐳𑐣𑑂𑐫𑐵𑑅𑐃 𑐖𑐸𑐂 𑐤𑑂𑐫𑑅 𑐴𑐵𑐎𑐣𑑄 𑐐𑐵𑐩𑐫𑑂 𑐮𑐶𑐴𑐵𑑃 𑐰𑐣𑐶𑑄𑑋 𑐍𑐮𑐖𑑂𑐰𑐬 𑐤𑐒𑑂𑐎𑐾𑐐𑐸 𑐰𑐵𑐳𑑅 𑐕𑑂𑐰𑐵𑐎𑐾𑐢𑐸𑐒𑑂𑐎𑐵𑑅 𑐥𑑀𑐏𑐬𑐵 𑐣𑑄 𑐩𑐣𑐹𑐟 𑐔𑑂𑐰𑐣𑐾𑐖𑑂𑐫𑐹𑐐𑐸 𑐠𑐵𑐫𑑂 𑐖𑐸𑐫𑐵𑐰𑐮𑑋 𑐰 𑐂𑐮𑐫𑑂 𑐟𑐎𑑂𑐎 𑐥𑑀𑐏𑐬𑐫𑐵 𑐢𑐫𑐵𑐐𑐸 𑐣𑐾𑐰𑐵𑑅𑐟𑐫𑐾𑐐𑐸 𑐧𑐖𑐵𑑅 𑐕𑐗𑑂𑐰𑑅 𑐀𑐮𑐫𑑂 𑐦𑐵𑐟𑑂𑐟 𑐦𑐸𑐟𑑂𑐟 𑐄𑐏𑐾 𑐠𑐸𑐏𑐾 𑐏𑐳-𑐁𑐬𑑂𑐫, 𑐟𑐩𑐸, 𑐩𑐐𑐬, 𑐐𑐵𑐂𑐣𑐾, 𑐡𑐩𑐿 𑐰 𑐎𑐵𑐩𑐶 𑐖𑐵𑐟𑐶𑐟𑐾𑐫𑑂𑐐𑐸 𑐕𑐾𑑃𑐏𑐵𑑋 𑐥𑑀𑐏𑐬𑐵 𑐧𑐖𑐵𑐬𑐫𑑂 𑐖𑐎𑑂𑐎 𑐗𑑂𑐰𑑅𑐕𑐶𑑄 𑐕𑐾𑑃 𑐀𑐮𑐫𑑂 𑐀𑐣𑑄 𑐟𑐳𑑂𑐎𑑄 𑐪𑑂𑐰𑑅 𑐖𑐸𑐂𑐎 𑐣𑐶𑐏𑐵 𑐳𑑂𑐰𑐏𑐵 𑐣𑐵𑐥𑑄 𑐣𑐵𑐥𑑄 𑐡𑐹𑐐𑐸 𑐕𑐾𑑃𑐏𑐵 𑐡𑐹𑑋 𑐥𑑀𑐏𑐬𑐫𑐵 𑐮𑐶𑐎𑑂𑐎 𑐢𑐵𑑅𑐳𑐵 𑐏𑑂𑐰𑐵𑐟𑐸𑐐𑐸 𑐟𑐩𑐸 𑐰 𑐩𑐐𑐬𑐟𑐫𑐾𑐐𑐸 𑐐𑐵𑑄 𑐡𑐸𑑋

𑐩𑐵𑐌𑐰𑐵𑐡𑐷 𑐡𑑂𑐰𑐣𑑂𑐡 𑐢𑐸𑐒𑑂𑐎𑐵𑑅 𑐐𑐸𑑃𑐔𑑂𑐰𑐫𑐵 𑐐𑐵𑐩𑐫𑑂 𑐔𑑂𑐰𑑄𑐥𑐶𑑄 𑐩𑐣𑐹𑐟 𑐳𑐸𑐬𑐕𑑂𑐫𑐫𑐵 𑐴𑐶𑐳𑐵𑐧𑑄 𑐥𑑀𑐏𑐬𑐵𑐫𑑂 𑐔𑑂𑐰𑑄𑐰𑐮𑑋 𑐀𑐣𑑄 𑐥𑐹𑐬𑑂𑐰-𑐥𑐳𑑂𑐔𑐶𑐩 𑐬𑐵𑐖𑐩𑐵𑐬𑑂𑐐 𑐡𑐫𑐾𑐎𑐸𑐳𑐾𑑄 𑐥𑑀𑐏𑐬𑐵𑐫𑐵 𑐳𑐴𑐬 𑐔𑐎𑐣𑐵𑑄 𑐰𑐮𑑋

“𑐏𑐸𑐂𑐡𑑃 𑐤𑑂𑐫𑑅 𑐟𑐵𑐎𑑄 𑐠𑐣 𑐧𑐖𑐵𑐬𑐫𑑂 𑐩𑐠𑑂𑐫𑐒𑑂𑐎 𑐥𑑀𑐏𑐬𑐵 𑐠𑑂𑐫𑐣 𑐢𑐵𑐂𑐩𑐏𑐸𑑋 𑐦𑐾𑐰𑐵 𑐟𑐵𑐮, 𑐴𑐾𑐩𑑂𑐖𑐵𑑄 𑐰𑑅𑐥𑐶𑐣𑑂𑐳𑑄 𑐣𑑄 𑐠𑐣 𑐧𑐖𑐵𑐬𑐫𑑂 𑐩𑐠𑑂𑐫𑑄𑐟𑐮𑐾 𑐥𑑀𑐏𑐬𑐵 𑐠𑑂𑐫𑐣 𑐩𑐢𑐵𑑅𑑋”, 𑐳𑐣𑐎𑐩𑐵𑐣 𑐧𑐵𑐟𑐵𑐖𑐸, 𑐨𑐷𑐩𑐳𑐾𑐣 𑐟𑑂𑐰𑐵𑐮𑐫𑑂 𑐔𑑂𑐰𑐣𑐶𑐪 𑐕𑐪𑑄 𑐎𑐣𑐵𑐡𑐶𑐮, “𑐰 𑐤𑐵𑐥𑐵 𑐠𑐎𑑂𑐰𑐵𑐟𑐫𑑂 𑐠𑑂𑐫𑑄𑐳𑐵𑑄 𑐎𑐵𑐠𑐩𑐵𑐣𑑂𑐡𑐸 𑐠𑑂𑐫𑐣 𑐢𑐵𑐂𑐩𑐏𑐸𑑋 𑐧𑐶𑐲𑑂𑐞𑐸𑐩𑐟𑐷 𑐏𑐸𑐳𑐶 𑐥𑐸𑐮𑐵𑑅 𑐰 𑐥𑐸𑐮𑐵𑑄 𑐧𑐳𑑂𑐟𑐷 𑐠𑑂𑐫𑐣 𑐎𑐶 𑐟𑐶𑐣𑐶 𑐎𑐵𑐠𑐩𑐵𑐣𑑂𑐡𑐸 𑐠𑑂𑐫𑐣 𑐢𑐵𑐂 𑐣𑐶, 𑐀𑐠𑐾 𑐴𑐾 𑐏𑑅 𑐠𑐣 𑐣𑑄 𑐤𑐵𑐥𑐵𑑋” – 𑐳𑐣𑐎𑐩𑐵𑐣 𑐧𑐵𑐟𑐵𑐖𑐸

𑐟𑐖𑐶𑐮𑐖𑐶

𑐖𑐵𑐟𑑂𑐬𑐵 𑐢𑐫𑐵𑐐𑐸 𑐣𑐾𑐰𑐵𑑅 𑐟𑐖𑐶𑐮𑐖𑐶𑐫𑐵 𑐟𑐢𑐒𑑂𑐐𑐸 𑐴𑐣𑐵𑐧𑐣𑐵 𑐏𑑅𑑋 𑐥𑑀𑐏𑐵𑐬𑐫𑐵 𑐣𑐾𑐰𑐵𑑅 𑐩𑐶𑐮𑑂𑐫𑐵𑑅(𑐖𑐣𑐳𑐒𑑂𑐏𑑂𑐫𑐵) 𑐡𑐸𑐣𑐾 𑐳𑐸 𑐐𑐣𑑄 𑐰𑐮 𑐢𑐿𑐐𑐸 𑐳𑐷𑐎𑐾𑐐𑐸 𑐩𑐵𑐢𑑂𑐫𑐩 𑐂𑐩𑑂𑐳𑑄 𑐴𑐣𑐶𑑄𑐐𑐸 𑐖𑐵𑐟𑑂𑐬𑐵 𑐏𑑅𑑋 𑐏𑑂𑐰𑐥𑑄 𑐰𑑄𑐥𑐶𑑄 𑐣𑐾𑐰𑐵𑑅𑐟 𑐫𑐎𑑂𑐰 𑐡𑐹𑐐𑐸 𑐖𑐸𑐫𑐵𑑅 𑐧𑐶𑐳𑑂𑐎𑐵𑑅 𑐖𑐵𑐟𑑂𑐬𑐵𑐳𑑄 𑐀𑐣 𑐏𑑅 𑐡𑐫𑐾𑐎𑐵𑑅 𑐧𑐳𑑂𑐟𑐷 𑐔𑐵𑑅𑐴𑐶𑐎𑐾𑐐𑐸, 𑐟𑑂𑐰𑐵𑐮𑐫𑑂 𑐟𑑂𑐰𑐵𑐮𑐫𑑂 𑐫𑐒𑑂𑐎𑐾𑐐𑐸, 𑐥𑐵𑐮𑐩𑑂𑐥𑐵𑑅 𑐥𑐸𑐖𑑂𑐫𑐵𑐫𑐾𑐐𑐸 𑐫𑐵𑑅𑑋 𑐫𑐾𑑃, 𑐫𑐮 𑐰 𑐨𑑀𑑄𑐟𑑄 𑐰𑑄𑐥𑐶𑑄 𑐣𑐾𑐰𑐵𑑅𑐟𑐫𑐾𑐳𑑄 𑐠𑑅𑐠𑑅𑐐𑐸 𑐖𑐵𑐟𑑂𑐬𑐵 𑐥𑐵𑐴𑐵𑑃 𑐔𑑅𑐴𑑂𑐬𑐾, 𑐧𑐸𑐒𑑂𑐐𑐡𑑂𑐫𑑅 𑐖𑐵𑐟𑑂𑐬𑐵 𑐰 𑐳𑑂𑐰𑐵𑐫𑐵𑑄 𑐥𑐸𑐤𑐶𑐳𑑄 𑐕𑐾𑑃 𑐡𑐸𑐣𑐾 𑐥𑐸𑐖𑑂𑐫𑐵𑐣𑐵𑑄 𑐨𑑂𑐰𑐫𑑂 𑐖𑑂𑐰𑐬𑐾𑐫𑐵𑐣𑐵𑑄 𑐴𑐣𑐾𑐐𑐸 𑐫𑐵𑑅𑑋 𑐄𑐎𑐾𑐫𑐵 𑐢𑐵𑑅𑐳𑐵 𑐏𑑅 𑐬𑐠 𑐕𑐸𑑄 𑐩𑐡𑐫𑐾𑐎𑐹𑑋
𑐥𑑀𑐏𑐬𑐵𑐫𑐵 𑐣𑐾𑐰𑐵𑑅𑐟𑐫𑐾𑐳𑑄 𑐣𑐾𑐥𑐵𑐮 𑐩𑐣𑑂𑐡𑐮𑐫𑐵 𑐣𑐾𑐰𑐵𑑅𑐟𑐫𑐾𑐳𑑄 𑐠𑐾𑑄 𑐣𑐏𑑅𑐔𑐏𑑅𑐟 𑐴𑑄𑑋 𑐟𑐬 𑐥𑑀𑐏𑐬𑐵𑐫𑑂 𑐫𑐎𑑂𑐰 𑐗𑑄𑐗𑑄 𑐢𑐵𑐫𑐾𑐎 𑐴𑐣𑐶𑑄 𑐩𑐏𑐸, 𑐀𑐮𑐫𑑂 𑐔𑐶𑐴𑐵𑐎𑐮𑑄 𑐳𑐶𑐢𑐫𑐾𑐎𑐵𑐕𑑂𑐰𑐿𑑋 𑐳𑐵𑐥𑐵𑐬𑐸, 𑐐𑐸𑐤𑐸 𑐥𑐸𑐤𑐶, 𑐦𑐸𑐎𑑂𑐎 𑐣𑐏𑑅 𑐔𑐶𑐴𑐵𑐎𑐮𑑄 𑐴𑐣𑐶𑑄𑑋 𑐫𑐎𑑂𑐰𑐳𑑂𑐫𑐵𑑄 𑐠𑑅𑐐𑐸 𑐟𑐖𑐶𑐮𑐖𑐶 𑐮𑑂𑐰𑑅𑐩𑐣𑐾 𑐢𑐸𑐒𑑂𑐎𑐹𑐥𑐶𑑄 𑐣𑑄 𑐡𑐸𑑋

𑑑𑑕𑑐𑐡𑑃 𑐤𑑂𑐫𑑅 𑐣𑐶𑐳𑐾𑑄 𑐢𑐸𑑃 𑐖𑐵𑐟𑑂𑐬𑐵(𑐧𑐵𑐑 𑐖𑐵𑐟𑑂𑐬𑐵) 𑐢𑐎𑐵𑑅 𑐣𑑄 𑐴𑐣𑐵𑐰𑐫𑐵𑐔𑑂𑐰𑐒𑑂𑐐𑐸 𑐡𑐸𑑋 𑐄𑐐𑐸 𑐖𑐵𑐟𑑂𑐬𑐵𑐫𑑂 𑐕𑐪 𑐢𑐸𑑃 𑐖𑐸𑐫𑐵𑑅 𑐀𑐮𑐫𑑂 𑐫𑐎𑑂𑐰 𑐩𑐣𑐹𑐟 𑐳𑐶𑐎𑐵𑐬 𑐪𑐶𑐟𑐶𑐥𑐶𑑄 𑐖𑐸𑐫𑐵𑑅 𑐰𑐿𑑋 𑐀𑐣𑑄 𑐧𑐵𑐖𑑄 𑐏𑐮𑑅𑐟 𑐣𑑄 𑐡𑐿𑑋 𑐀𑐮𑐫𑑂 𑐀𑐣 𑐏𑑂𑐫𑐵𑐮𑑅 𑐎𑑂𑐫𑐣𑐶𑑄𑐐𑐸 𑐫𑐵𑐂𑑋
𑐥𑑀𑐏𑐬𑐵𑐫𑑂 𑐮𑐵𑐏𑐫𑑂 𑐣𑑄 𑐴𑐸𑐂𑐎𑐹𑑋 𑐥𑑀𑐏𑐬𑐫𑐵 𑐠𑑅𑐐𑐸 𑐴𑐾 𑐮𑐵𑐏𑐫𑑂 𑐡𑐸𑑋 𑐤𑑂𑐫𑐂𑐥𑐸𑐐𑐸 𑐏𑑃 𑐕𑐸 𑐢𑐵𑑅𑐳𑐵 𑐠𑐣 𑐮𑐵𑐏𑐫𑑂 𑐥𑑂𑐫𑐵𑐏𑐣𑐫𑑂 𑐣𑐾𑐰𑐵𑑅𑐟𑐫𑐾𑐳𑑄 𑐣𑐾𑐰𑐵𑑅 𑐧𑐵𑐖𑑄 𑐠𑐵𑐂𑐩𑐏𑐸, 𑐡𑐩𑐵𑐂𑐟𑐫𑐾𑐳𑑄 𑐂𑐩𑐾𑐐𑐸 𑐴𑐾 𑐧𑐵𑐖𑑄 𑐠𑐵𑐂𑑋

𑐥𑑀𑐏𑐬𑐵𑐫𑐵 𑐳𑐩𑑂𑐥𑐡𑐵𑐫𑑂 𑐨𑐿𑐮𑑅 𑐥𑑂𑐫𑐵𑐏𑑄 𑐣𑑄 𑐮𑐵𑑅𑑋 𑐠𑐸𑐎𑐾𑐟𑑅 𑐐𑑄 𑐥𑑂𑐫𑐵𑐏𑑄 𑐣𑑄 𑐢𑐵𑐂𑑋 𑐠𑑂𑐰 𑐏𑐸𑐡𑑃𑐫𑑂 𑐕𑐎𑑅 𑐥𑐶𑐎𑐵𑐂𑑋 𑐡𑑂𑐫𑑅𑐥𑐸𑐔𑑅𑐫𑐵 𑐏𑑂𑐰𑐵𑑅𑐥𑐵𑑅 𑐟𑐫𑐵𑑅 𑐥𑑂𑐫𑐵𑐏𑑄 𑐴𑐸𑐮𑐷𑑋 𑐠𑑂𑐰 𑐏𑑂𑐰𑐵𑐥𑐵𑑅 𑐐𑐠𑐵𑑄𑐩𑐸𑐐𑑅𑐳𑑄 𑐥𑐶𑐟𑐧𑑂𑐰𑐂 𑐢𑐵𑑅𑐳𑐵 𑐩𑑀𑐴𑐣𑐶 𑐣𑐏𑑅 𑐮𑐶𑐥𑐵 𑐥𑑂𑐫𑐵𑐏𑑄 𑐥𑐶𑐠𑐣𑐶𑑄𑑋 𑐥𑑂𑐫𑐵𑐏𑑄 𑐣𑐾𑐰𑐵𑑅 𑐧𑐵𑐖𑑄𑐫𑐵 𑐠𑐶𑐠𑐶 𑐬𑐵𑐐 𑐎𑐠𑑄 𑐴𑐸𑐂𑐎𑐷𑑋

𑐐𑐸𑐠𑐶

𑐕𑐐𑐹 𑐂𑐮𑐫𑑂 𑐣𑐾𑐰𑐵𑑅𑐟𑐫𑐾𑐐𑐸 𑐧𑑅𑐮𑐵𑑅𑐐𑐸 𑐥𑐸𑐔𑑅𑐫𑐵 𑐎𑐠𑑄 𑐐𑐸𑐠𑐶 𑐡𑐫𑐵𑐔𑑂𑐰𑐒𑑂𑐐𑐸 𑐏𑑅𑑋 𑐣𑐾𑐰𑐵𑑅𑐟 𑐡𑐠𑐸𑐂 𑐩𑐶𑐥𑐸𑐔𑑅𑐫𑐵 𑐴𑐣𑐧𑐣𑐵 𑐰 𑐢𑑂𑐫𑐧𑐵𑐖𑑂𑐫𑐵𑐏𑑃𑐫𑐵 𑐴𑐣𑐵𑐧𑐣𑐵 𑐟𑐂𑐐𑐸 𑐳𑑄𑐳𑑂𑐠𑐵 𑐏𑑅 𑐐𑐸𑐠𑐶𑑋 𑐥𑑀𑐏𑐬𑐵𑐫𑐵 𑐣𑐾𑐰𑐵𑑅𑐟𑐫𑐾𑐐𑐸 𑐣𑑄 𑐐𑐸𑐠𑐶 𑐡𑐸𑑋 𑐤𑐵𑐥𑐵 𑐤𑐵𑐥𑐵 𑐥𑑀𑐏𑐬𑐵𑐫𑐵 𑐣𑐾𑐰𑐵𑑅𑐟 𑐦𑐸𑐎𑑂𑐎 𑐕𑐐𑐹 𑐴𑐾 𑐐𑐸𑐠𑐶 𑐡𑐸𑐣𑐾 𑐴𑐣𑐵𑐔𑑂𑐰𑑄𑐥𑐶𑑄 𑐏𑑅 𑐢𑐵𑑅𑐳𑐵 𑐧𑐸𑐮𑐸𑐴𑐸𑑃 𑐁𑑅 𑐮𑐶𑐥𑐵 𑐠𑑅𑐠𑑅𑐐𑐸 𑐳𑐩𑐸𑐡𑐵𑐫𑑄 𑐠𑑅𑐠𑑅𑐐𑐸 𑐐𑐸𑐠𑐶 𑐡𑐫𑐾𑐎𑐵𑐴𑑅𑐐𑐸 𑐏𑑅𑑋 𑐨𑐿𑐮𑑅 𑐥𑑂𑐫𑐵𑐏𑑄 𑐥𑐶𑐠𑐣𑐶𑐐𑐸, 𑐧𑐶𑐳𑑂𑐎𑐵𑑅 𑐖𑐵𑐟𑑂𑐬𑐵 𑐥𑐶𑐎𑐵𑐂𑐐𑐸 𑐣𑑄 𑐐𑐸𑐠𑐶𑐟 𑐡𑐸𑑋

𑐠𑑅𑐐𑐸 𑐴𑐵 𑐮𑐶𑐳𑐾𑑄 𑐳𑑂𑐰𑐵𑐥𑐹

𑐫𑐎𑑂𑐰 𑐃 𑐟𑐵𑐎𑑂𑐎 𑐥𑑀𑐏𑐬𑐫𑐵 𑐣𑐾𑐰𑐵𑑅𑐟𑐫𑐾𑐳𑑄 𑐏𑑂𑐰𑐥 𑐮𑐶𑐳𑐾𑑄 𑐳𑑂𑐰𑐵𑐥𑐹 𑐧𑑂𑐫𑐵𑐎𑐵𑑅 𑐴𑐾 𑐟𑐮 𑐰𑐵 𑐟𑐫𑐾𑐩𑐵𑐮𑑋 𑐐𑐸𑐨𑐵𑐖𑐸 𑐩𑐵𑐮 𑐢𑐵𑑅𑐳𑐵 𑐏𑑂𑐰𑐥𑑄 𑐴𑐾 𑐳𑑅𑐟𑐵𑑅𑐴𑐿𑑋 𑐤𑐵𑐥𑐵 𑐬𑐵𑐖𑐩𑐵𑐬𑑂𑐐 𑐡𑐫𑐾𑐎𑐾 𑐤𑑂𑐫𑑅 𑐔𑑂𑐫𑐵𑐤𑐸 𑐧𑐶𑐎𑑂𑐎 𑐣𑑂𑐫𑐵𑐳𑐾 𑐰𑐣𑐵𑑄 𑐴𑐾 𑐏𑑂𑐰𑐥𑑄 𑐐𑐸𑐨𑐵𑐖𑐸 𑐳𑑅𑐟𑐾𑐐𑐸 𑐫𑐵𑑅𑑋 𑐮𑐶𑐥𑐵 𑐦𑐫𑐏𑑅 𑐧𑑂𑐰𑑅𑐧𑐮𑐫𑑂 𑐦𑐫𑐏𑐟𑑄 𑐴𑐮𑑋 𑐥𑑀𑐏𑐬𑐵𑐫𑑂 𑐔𑑂𑐰𑑄𑐥𑐶𑑄 𑐣𑐾𑐰𑐵𑑅𑐟𑐫𑐾𑐳𑑄 𑐥𑑀𑐏𑐬𑐵𑐫𑑂 𑐴𑐾 𑐡𑐸𑐐𑐸 𑐡𑑂𑐫𑑅 𑐠𑐵𑐥𑑄 𑐫𑐵𑑅𑐐𑐸 𑑕𑑓𑐡𑑃 𑐖𑐎𑑂𑐎 𑐡𑐟𑑋 𑐰 𑐤𑑂𑐫𑑅 𑐡𑐾𑐄𑐥𑐸𑐖𑐵 𑐫𑐵𑐫𑐾𑐩𑐵𑑅𑐳𑐵 𑐏𑑂𑐰𑐥𑐫𑑂 𑐴𑐾 𑐥𑐸𑐖𑐵 𑐕𑑂𑐰𑐫𑐵𑐴𑐿𑐐𑐸 𑐔𑐮𑐣 𑐏𑐣𑐶𑑄𑑋 𑑕𑑓𑐡𑑃 𑐤𑑂𑐫𑑅 𑐖𑐎𑑂𑐎 𑐏𑑂𑐰𑐥𑐫𑐵 𑐐𑐸𑐨𑐵𑐖𑐸𑑄 𑐠𑐵𑐎𑐸𑐮 𑐠𑐣 𑐴𑐾 𑐫𑐵𑐣𑐵𑐡𑐶𑐳𑑃 𑐢𑐵𑑅𑐐𑐸𑐮𑐶𑑄 𑐥𑑀𑐏𑐬𑐵𑐫𑐵 𑐧𑐐𑐬 𑐢𑐵𑑅𑐐𑐸 𑐠𑐵𑐳𑐫𑑂 𑐡𑐸𑐐𑐸 𑐡𑑂𑐫𑑅 𑐠𑐵𑐥𑑄 𑐫𑐵𑐟𑑋 𑐥𑑀𑐏𑐬𑐵𑐫𑑂 𑐴𑐾 𑐡𑐸𑐐𑐸𑐡𑑂𑐫𑑅 𑐠𑐵𑐥𑑄 𑐫𑐵𑑅𑐥𑐶𑑄 𑐧𑐵𑐟𑐵𑐖𑐸 𑐏𑐮𑑅 𑐤𑐵𑐥𑐵𑑄 𑐏𑑅𑑋 𑐀𑐮𑐫𑑂 𑐧𑐸𑐮𑐸𑐴𑐸𑑃 𑐠𑐶𑐠𑐶 𑐳𑐩𑐸𑐡𑐵𑐫𑐟𑐫𑐾𑐳𑑄 𑐠𑐵𑐥𑑄 𑐫𑐵𑐣𑐵𑐴𑐮𑑋

𑐔𑐶𑐎𑐸𑐮𑐵 𑐤𑑂𑐫𑐵𑐂𑐠𑐾𑑄 𑐔𑑂𑐰𑐣𑐶𑑄𑐧𑐮𑐫𑑂 𑐏𑑂𑐰𑐥𑑄 𑐎𑐸𑐩𑐵𑑅𑐟 𑐰𑐫𑐵𑑅 𑐔𑐵𑐠𑐮 𑐡𑐫𑐾𑐎𑐵𑑅 𑐧𑐶𑐳𑑂𑐎𑐵𑑅 𑐖𑐵𑐟𑑂𑐬𑐵𑐫𑐵𑐟𑑅 𑐏𑑂𑐰𑐥𑐫𑑂 𑐮𑐶𑐴𑐵𑑃 𑐰𑐣𑐶𑑄𑐐𑐸 𑐣𑑄 𑐫𑐵𑑅𑑋

𑐠𑐬 𑐳𑐸𑐔𑑂𑐎𑐾𑐐𑐸

𑐥𑑀𑐏𑐬𑐵𑐫𑐵 𑐫𑐎𑑂𑐰 𑐣𑐾𑐰𑐵𑑅𑐟𑐫𑑂 𑐠𑑅𑐐𑐸 𑐠𑐬 𑐳𑐸𑐔𑑂𑐎𑐾𑐐𑐸 𑐫𑐵𑐣𑐵𑐴𑐫𑐵𑐔𑑂𑐰𑐒𑑂𑐐𑐸 𑐡𑐸𑑋 𑐳𑐎𑐳𑐶𑐣𑑄 𑐠𑑅𑐐𑐸 𑐠𑐬 𑐳𑐸𑐔𑑂𑐎𑐵𑑅 “𑐱𑑂𑐬𑐾𑐲𑑂𑐛” 𑐔𑑂𑐰𑐫𑐾𑐐𑐸 𑐫𑐵𑐣𑐵𑐴𑐫𑐵𑐔𑑂𑐰𑐒𑑂𑐐𑐸 𑐡𑐸𑑋 𑐕𑐟𑐵 𑐩𑐹 𑐎𑐵𑐬𑐣 𑐕𑐸 𑐣𑑄 𑐏𑐂 𑐢𑐵𑑅𑐳𑐵 𑐣𑐾𑐰𑐵𑑅𑐟 𑐟𑑅𑐮𑑂𑐫𑐵𑐏𑐫𑑂 𑐩𑐡𑐸𑐐𑐸 𑐠𑐵𑐳𑐫𑑂 𑐩𑐾𑐩𑐾𑐐𑐸 𑐖𑐵𑐟𑐷𑐫𑐵 𑐩𑐣𑐹𑐟𑐫𑐾𑐳𑑄 𑐣𑐾𑐰𑐵𑑅 𑐠𑐬 𑐮𑐳𑐷 𑐩𑐰𑑅𑐐𑐸 𑐐𑐠𑐾 𑐐𑐠𑐾 𑐠𑐾𑑄 𑐎𑐵𑐫𑐾𑐦𑐸 𑐢𑐎𑐵𑑅 𑐳𑐸𑐔𑑂𑐎𑐾𑐐𑐸𑑋 𑐣𑐾𑐥𑐵𑑅 𑐐𑐵𑐮𑐫𑑂 𑐠𑐾𑑄 𑐥𑑀𑐏𑐬𑐵𑐫𑑂 𑐣𑐾𑐰𑐵𑑅𑐟𑐫𑑂 𑐣𑑄 𑐠𑐶𑐠𑐶 𑐠𑐬𑐟 𑐡𑐸𑑋 𑐟𑐬 𑐁𑑅 𑐰𑐫𑐵𑑅 𑐁𑐥𑐮𑑄𑐳𑑂𑐫𑐵𑑄 𑐰 𑐳𑐸𑐔𑑂𑐎𑐵𑑅 “𑐱𑑂𑐬𑐾𑐲𑑂𑐛” 𑐔𑑂𑐰𑐫𑐾𑐐𑐸 𑐫𑐵𑐣𑐵𑐴𑐮𑑋

𑐨𑐵𑐫𑑂

𑐥𑑀𑐏𑐬𑐵𑐫𑑂 𑐯𑐵𑐂𑐐𑐸 𑐣𑐾𑐥𑐵𑐮𑐨𑐵𑐲𑐵 𑐏𑑂𑐰𑐥 𑐣𑐾𑐥𑐵𑐮𑐨𑐵𑐲𑐵𑐫𑐵 𑐴𑐾 𑐮𑐹 𑐏𑑅𑑋 𑐏𑑂𑐰𑐥𑑄 𑐰𑐣𑐵𑐔𑑂𑐰𑑄𑐥𑐶𑑄 𑐖𑐸𑐫𑐵𑑅 𑐥𑑀𑐏𑐬𑐵𑐫𑑂 𑐯𑐵𑐂𑐐𑐸 𑐨𑐵𑐫𑑂 𑐏𑑂𑐰𑐥 𑐨𑐵𑐫𑑂 𑐮𑐶𑐳𑐾𑑄 𑐮𑐶𑐎𑑂𑐎 𑐮𑐵𑑅𑑋 𑐀𑐫𑐾𑐣𑑄 𑐏𑑂𑐰𑐥𑑄 𑐟𑐵𑐥𑐵𑐎𑑂𑐎 𑐰𑑄𑐐𑐸 𑐳𑑂𑐰𑐳𑑅𑐡𑑃 𑐡𑐫𑐾𑐢𑐸𑐒𑑂𑐎𑐵𑑅 𑐀𑐣𑐫𑐵 𑐨𑐵𑐫𑑂 𑐕𑐸𑑄 𑐨𑐟𑐷 𑐥𑐵𑐣𑐵𑐰𑑄𑐐𑐸 𑐣𑑄 𑐏𑐣𑐾𑐡𑐸𑑋 𑐮𑐶𑐎𑑂𑐎 𑐏𑐫𑑂/𑐥𑐬𑑂𑐟𑑂𑐫𑐵 𑐨𑐵𑐫𑑂 𑐰 𑐟𑐩𑐸 𑐨𑐵𑐫𑑂 𑐯𑐵𑐂𑐥𑐶𑑄 𑐀𑐥𑑂𑐰𑑅 𑐡𑐹𑐐𑐸𑐮𑐶𑑄 𑐄𑐐𑐸 𑐨𑐵𑐫𑑂 𑐥𑐵𑐏𑐾𑑄 𑐣𑑄 𑐥𑑂𑐬𑐨𑐵𑐰 𑐮𑐵𑑅𑐐𑐸 𑐏𑐣𑐾𑐡𑐸𑑋

𑐤𑐵𑐥𑐵 𑐐𑐞𑐾𑐱 𑐟𑑂𑐰𑐵𑐮𑐫𑑂 𑐔𑑂𑐰𑑄𑐪, 𑐁𑑅 𑐣𑐵𑐐𑐝𑐸𑐒𑑂𑐐𑐵𑐫𑑂 𑐔𑑂𑐰𑐣𑐵𑐔𑑂𑐰𑑄𑐪 𑐥𑑂𑐬𑐎𑐵𑐱 𑐥𑐮𑐶𑐏𑐾𑐖𑐸𑐫𑐵 𑐮𑐸𑐩𑐣𑑂𑐟𑐶𑐂 𑐥𑑀𑐏𑐬𑐵𑐫𑑂 𑐰 𑐂𑐮𑐫𑑂 𑐦𑐸𑐎𑑂𑐎𑐳𑑂𑐫𑐵𑑄 𑐣𑐾𑐥𑐵𑐮𑐨𑐵𑐲𑐵 𑐧𑐵𑑄𑐮𑐵𑐎𑑂𑐎 𑐯𑐵𑐂𑐐𑐸 𑐏𑑅𑑋 𑐰 𑐂𑐮𑐫𑑂 𑐥𑑀𑐏𑐬𑐵 𑐧𑐖𑐵𑑅 𑐖𑐎𑑂𑐎 𑐡𑐣𑐶𑐧𑐮𑐫𑑂 𑐣𑐾𑐥𑐵𑐮𑐨𑐵𑐲𑐵 𑐴𑐾 𑐤𑐶𑐫𑐵𑐤𑐶𑐳𑑄 𑐯𑐵𑐂𑐐𑐸 𑐨𑐵𑐫𑑂 𑐏𑐫𑐵𑐔𑑂𑐰𑐣𑑋 𑐄𑐮𑐶 𑐖𑐎𑑂𑐎 𑐩𑐏𑐸 𑐩𑐾𑐩𑐾𑐐𑐸 𑐖𑐵𑐟𑐷𑐫𑐵 𑐩𑐣𑐹𑐟𑐫𑐾𑐳𑑄 𑐣𑐾𑐥𑐵𑐮𑐨𑐵𑐲𑐵 𑐯𑐵𑐫𑐾𑐳𑑅𑐐𑐸 𑐏𑐣𑐾𑐡𑐸𑑋 𑐁𑑅 𑐢𑐵𑑅𑐳𑐵 𑐠𑐎𑐮𑐶 𑐣𑐵𑐐𑐬𑐶𑐎𑐥𑐶𑑄 𑐟𑑂𑐰𑑅𑐟𑐵𑑅 𑐤𑐹𑐐𑐸 𑐥𑐸𑐳𑑂𑐟𑐵𑑄 𑐄𑐮𑐶 𑐨𑐵𑐫𑑂 𑐯𑐵𑐫𑐾 𑐩𑐳𑑅𑑋

𑐤𑐹 𑐥𑐸𑐳𑑂𑐟𑐵𑐫𑐵 𑐫𑐎𑑂𑐰𑐳𑑂𑐫𑐵𑑄 𑐣𑐾𑐥𑐵𑐮𑐨𑐵𑐲𑐵 𑐮𑑂𑐰𑑅𑐩𑐣𑐾 𑐢𑐸𑐒𑑂𑐎𑐮𑑋 𑐫𑐎𑑂𑐰𑐳𑑂𑐫𑐵𑑄 𑐠𑐹 𑐟𑐬 𑐮𑐶𑐥𑐸𑐂𑐎𑐾 𑐩𑐳𑑅𑑋 𑐠𑐣𑐫𑐵 𑐣𑐾𑐰𑐵𑑅 𑐩𑐶𑐮𑑂𑐫𑐵𑐏𑑄(𑐖𑐣𑐳𑐒𑑂𑐏𑑂𑐫𑐵𑑄) 𑐤𑐵𑐥𑐵𑐣𑐶𑐳𑐾𑑄 𑐏𑐫𑑂/𑐥𑐬𑑂𑐟𑑂𑐫𑐵 𑐨𑐵𑐫𑑂 𑐯𑐵𑐫𑐾𑐳𑑅𑑋 𑐀𑐗 𑐤𑐵𑐥𑐵 𑐫𑐎𑑂𑐰𑐳𑑂𑐫𑐵𑑄 𑐟𑐩𑐸 𑐨𑐵𑐫𑑂 𑐣𑑄 𑐯𑐵𑐫𑐾𑐳𑑅𑑋 𑐀𑐣 𑐮𑐶𑐎𑑂𑐎𑐫𑐵 𑐧𑐳𑑂𑐟𑐷𑐟 𑐦𑐸𑐎𑑂𑐎 𑐟𑐩𑐸 𑐖𑐵𑐟𑐷𑐟𑐫𑐾𑐐𑐸 𑐖𑐸𑐫𑐵𑑅 𑐂𑐥𑐶𑑄 𑐮𑐶𑐳𑐾𑑄 𑐏𑑃 𑐯𑐵𑐫𑐾𑐟𑑅 𑐫𑐎𑑂𑐰𑐳𑑂𑐫𑐵𑑄 𑐟𑐩𑐸 𑐨𑐵𑐫𑑂 𑐣𑑄 𑐳𑑅𑐐𑐸 𑐏𑑅𑑋

𑐥𑑀𑐏𑐬𑐵𑐫𑑂 𑐢𑐵𑑅𑐳𑐵 𑐣𑐾𑐥𑐵𑐮 𑐮𑐶𑐥𑐶 𑐀𑐨𑐶𑐮𑐾𑐏 𑐫𑐵𑐣𑐵𑐟𑑅𑐐𑐸 𑐩𑐡𑐸𑑋 𑐤𑐵𑐥𑐵 𑐧𑐖𑐵𑐬𑐫𑑂 𑐣𑐾𑐥𑐵𑐮𑐨𑐵𑐲𑐵 𑐴𑐾 𑐩𑐹𑐨𑐵𑐫𑑂 𑐖𑐹𑐐𑐸 𑐂𑐮𑐫𑑂 𑐣𑑄 𑐣𑐾𑐥𑐵𑐮 𑐮𑐶𑐥𑐶 𑐕𑑂𑐫𑐮𑐵𑑅 𑐣𑐾𑐥𑐵𑐮𑐨𑐵𑐲𑐵 𑐔𑑂𑐰𑐫𑐾𑐐𑐸 𑐔𑐮𑐣 𑐀𑐣 𑐢𑐵𑑅𑐳𑐵 𑐩𑐡𑐸 𑐏𑐣𑐶𑑄𑑋 𑐥𑑀𑐏𑐬𑐵𑐫𑑂 𑐣𑐾𑐥𑐵𑐮𑐨𑐵𑐲𑐵 𑐩𑑂𑐰𑐵𑐎𑐾𑐐𑐸 𑐎𑐸𑐟𑑅𑐟 𑐣𑑄 𑐖𑐹𑐐𑐸 𑐏𑑅𑑋 𑐣𑐾𑐰𑐵𑑅 𑐎𑐬𑑂𑐩𑐎𑐵𑐞𑑂𑐜 𑐧𑐵𑐬𑐾 𑐳𑑂𑐫𑐣𑐾𑐖𑑂𑐫𑐵 𑐰 𑐨𑐵𑐫𑑂 𑐳𑑂𑐫𑐣𑐾𑐖𑑂𑐫𑐵 𑐣𑑄 𑐠𑐶𑐠𑐶 𑐂𑐮𑐫𑑂 𑐐𑑂𑐰𑑅𑐳𑐵𑑅 𑐐𑑂𑐰𑑅𑑋

𑐮𑐔𑑂𑐕𑐶𑐂 𑐕𑐎𑑅 “𑐥𑑀𑐏𑐬𑐵𑐫𑐵 𑐨𑐶𑑄𑐟𑐸𑐣𑐵” 𑐢𑐵𑐂𑐐𑐸 𑐥𑑁 𑐥𑐶𑐎𑐵𑐫𑐾𑐐𑐸 𑐫𑐵𑑅𑑋

𑐥𑑀𑐏𑐬𑐵𑐫𑐵 𑐣𑐾𑐥𑐵𑐮𑐨𑐵𑐲𑐫𑐵 𑐕𑐸𑑄 𑐔𑐶𑐴𑐵𑐎𑑅𑐐𑐸 𑐳𑑄𑐎𑐶𑐥𑐵

𑐟𑐣𑐵𑐰𑐣𑐵𑐔𑑂𑐰𑐒𑑂𑐐𑐸 𑐳𑐩𑑂𑐥𑐡𑐵

𑐥𑐸𑐮𑐵𑑄 𑐥𑑀𑐏𑐬𑐵𑑄 𑐣𑐾𑐥𑐵𑐮𑐨𑐵𑐲𑐵 𑐖𑐎𑑂𑐎 𑐩𑐏𑐸 𑐟𑐬 𑐣𑐾𑐰𑐵𑑅 𑐥𑐴𑑅𑐫𑐵 𑐕𑐾𑑃𑐟 𑐣𑑄 𑐟𑐣𑐵𑐰𑐣𑐵𑐔𑑂𑐰𑐒𑑂𑐐𑐸 𑐡𑐸𑑋 𑐳𑑂𑐰𑐡𑑅𑐡𑑃 𑐤𑑂𑐫𑑅𑐫𑐵 𑐔𑑂𑐫𑐵𑐤𑐸 𑐧𑑂𑐫𑐹𑐐𑐸 𑐰 𑐖𑐸𑐖𑑄𑐫𑐵 𑐧𑐵𑐏𑑄 𑐎𑐣𑐶𑑄𑐐𑐸 𑐧𑐳𑑂𑐟𑐷 𑐧𑐸𑐮𑐸𑐴𑐸𑑃 𑐩𑐡𑐫𑐵𑐰𑐣𑐵𑐔𑑂𑐰𑐒𑑂𑐐𑐸 𑐡𑐸𑑋 𑐀𑐣 𑐣𑐾𑐰𑐵𑑅 𑐥𑐴𑑅𑐫𑐵 𑐕𑐾𑑃 𑐥𑑂𑐫𑐏𑐵 𑐣𑑂𑐫𑐵𑐏𑐵 𑐖𑐎𑑂𑐎 𑐮𑑂𑐫𑑄𑐡𑐣𑐶𑑋 𑐢𑑂𑐫𑐧𑐵 𑐩𑐡𑐹𑐐𑐸 𑐎𑐵𑐬𑐣𑑄 𑐫𑐎𑑂𑐰𑐳𑑂𑐫𑐵𑑄 𑐗𑐶𑐒𑑂𑐐𑐟𑐾𑑄 𑐔𑐶𑐣𑐵𑐟𑑅𑐐𑐸 𑐥𑐮𑐶 𑐖𑐳𑑂𑐟𑐵𑑄 𑐔𑐷𑐩𑐵𑐮𑑋 𑐧𑐵𑑄𑐮𑐵𑐎𑑂𑐎 𑐎𑐶𑐫𑐵𑐟𑑅𑐐𑐸 𑐗𑑂𑐫𑐵𑑅𑐟𑐫𑐾𑐟𑑅 𑐄𑐐𑐸 𑐎𑐠𑑄𑐫𑐵 𑐕𑐾𑑃 𑐩𑐡𑐫𑐵𑐰𑐮𑑋

𑐥𑐘𑑂𑐔𑐵𑐫𑐟 𑐳𑐬𑐎𑐵𑐬𑐫𑐵 𑐥𑐵𑐮𑐫𑑂 𑐠𑐖𑑂𑐫𑐵𑑅𑐐𑐸 𑐧𑐳𑑂𑐟𑐷𑐟 𑐪𑐵𑐮𑐵𑐳𑐵𑐮𑐵 𑐫𑐵𑐫𑐾𑐩𑐵𑑅 𑐢𑐎𑐵𑑅 𑐣𑐷𑐟𑐶 𑐮𑐵 𑐴𑑅𑐐𑐸 𑐏𑑅 𑐟𑐬 𑐄𑐎𑐾𑑄 𑐖𑑂𑐫𑐵 𑐩𑐧𑑂𑐫𑐹𑑋 𑐀𑐣𑐫𑐵 𑐣𑐾𑐰𑐵𑑅𑐟𑐫𑐾𑐐𑐸 𑐣𑐸𑐐𑐮𑐫𑑂 𑐳𑐩𑑂𑐥𑐡𑐵𑐫𑐵 𑐨𑐵𑐰𑐣𑐵 𑐧𑑂𑐰𑐮𑑄𑐐𑐸 𑐏𑐣𑐾𑐩𑐡𑐸 𑐢𑐵𑑅𑐳𑐵 𑐄𑐐𑐸 𑐎𑐠𑑄𑐫𑐵 𑐮𑐎𑐳 𑐣𑑄 𑐥𑐵𑐫𑐕𑐶 𑐩𑐖𑐸𑐮𑑋 𑐫𑐎𑑂𑐰𑐳𑑂𑐫𑐵𑑄 𑐢𑑂𑐫𑐧𑐵 𑐩𑐡𑐫𑐵𑑅 𑐀𑐮𑐫𑑂 𑐫𑐎𑑂𑐰𑐳𑑂𑐫𑐵𑑄 𑐰𑐶𑐎𑐵𑐳𑐫𑐵 𑐧𑐵𑐬𑐾 𑐰𑑂𑐫𑐵𑐥𑐎 𑐢𑐵𑐥𑐸𑐟𑐶𑑄 𑐫𑐵𑐣𑐵𑑄 𑐣𑐾𑐰𑐵𑑅 𑐕𑐾𑑃 𑐟𑐣𑐵𑑄𑐰𑐣𑐶𑐐𑐸 𑐗𑑂𑐰𑐮𑐫𑑂 𑐠𑑂𑐫𑐣𑑋

𑐎𑐶𑐥𑐵 𑐩𑐸𑐣𑐵

• 

• 

• 

• 

• 

• 

• 

• 

• 

• 

• 

• 

• 

• 

• 

• 

• 

• 

• 

• 

• 

• 

• 

• 

• 

• 

• 

• 

• 

• 

• 

• 

• 

• 

• 

• 

• 

• 

• 

• 

• 

• 

• 

• 

• 

• 

• 

• 

• 

• 

• 

• 

• 

𑐣𑑂𑐫𑐣𑐾𑐎𑐣𑐾 𑐳𑑅𑐳𑐷𑐎𑐾

𑐏𑑃𑐯𑐵𑐧𑑃𑐯𑐵:

𑑑.𑐥𑑂𑐬𑐎𑐵𑐱 𑐥𑐮𑐶𑐏𑐾, 𑑖𑑘: 𑐣𑐵𑐐𑐝𑐸𑐒𑑂𑐐𑐵, 𑐥𑑀𑐏𑐬𑐵 – 𑐣𑐾𑐰𑐵𑑅 𑐡𑐾𑐫𑑂 𑐡𑐧𑐹 𑐎𑐵𑐳𑑂𑐎𑐷
𑑒.𑐳𑐣𑐎𑐩𑐵𑐣 𑐧𑐵𑐟𑐵𑐖𑐸, 𑑗𑑖: 𑐨𑐷𑐩𑐳𑐾𑐣 𑐟𑑂𑐰𑐵𑑅, 𑐥𑑀𑐏𑐬𑐵

𑐔𑑂𑐰𑐳𑐸:

𑑑. 𑐥𑑀𑐏𑐬𑐵𑐫𑐵 𑐨𑐶𑑄𑐟𑐸𑐣𑐵- 𑐮𑐫𑐥𑑁(𑐡𑑃 𑑑𑑙, 𑐮𑑂𑐫𑐵𑑅 𑑑𑑙𑑐)
𑑒. 𑐥𑑂𑐬𑐵𑐎𑐺𑐟𑐶𑐎 𑐥𑑂𑐬𑐎𑑀𑐥𑐫𑐵 𑐮𑐶𑐔𑑂𑐰𑐮𑑄 𑐧𑐹𑐐𑐸 𑐥𑑀𑐏𑐬𑐵 𑐐𑐵𑑅𑐡𑐾𑐫𑑂 , 𑐩𑑀𑐣𑐶𑐎 𑐦𑐬𑑂𑐟, 𑐥𑐵𑐫𑑂‌𑐬𑐶𑐳 𑐴𑐮𑐶𑑄𑐧𑑂𑐰𑐣𑐾𑐎𑐸𑐠𑐶 (𑐀𑐒𑑂𑐐𑑂𑐬𑐾𑐖𑐷 𑐨𑐵𑐫𑑂‌𑐫𑐵 𑐔𑑂𑐰𑐳𑐸)
𑑓. 𑐨𑑁𑐟𑐶𑐎 𑐨𑐹𑐐𑑀𑐮𑐱𑐵𑐳𑑂𑐟𑑂𑐬𑐫𑑂 𑐴𑐬𑑂𑐎 𑐐𑐸𑐬𑐸𑐒𑐫𑐵 𑐫𑑀𑐐𑐡𑐵𑐣 (𑐀𑐒𑑂𑐐𑑂𑐬𑐾𑐖𑐷 𑐨𑐵𑐫𑑂‌𑐫𑐵 𑐔𑑂𑐰𑐳𑐸)
𑑔. 𑐳𑐴𑐬𑐷𑐎𑐬𑐞, 𑐳𑐬𑐎𑐵𑐬𑐫𑐵 𑐣𑐷𑐟𑐶 𑐀𑐮𑐫𑑂 𑐴𑑂𑐫𑐹𑐐𑐸 𑐥𑑀𑐏𑐬𑐫𑐵 𑐩𑐶𑐥𑐸𑐔𑑅 𑐰 𑐮𑐎𑐳 , 𑐖𑐐𑐣𑐵𑐠 𑐀𑐢𑐶𑐎𑐵𑐬𑐷 (𑐀𑐒𑑂𑐐𑑂𑐬𑐾𑐖𑐷 𑐨𑐵𑐫𑑂‌𑐫𑐵 𑐔𑑂𑐰𑐳𑐸)
𑑕. 𑐢𑐸𑑃 𑐖𑐵𑐟𑑂𑐬𑐵 , 𑐟𑐥 𑐣𑐾𑐥𑐵𑐮 (𑐀𑐒𑑂𑐐𑑂𑐬𑐾𑐖𑐷 𑐨𑐵𑐫𑑂‌𑐫𑐵 𑐔𑑂𑐰𑐳𑐸)
𑑖. 𑐨𑐿𑐮𑑅 𑐥𑑂𑐫𑐵𑐏𑑄 , 𑐳𑐒𑑂𑐐𑐾𑐳 𑐱𑑂𑐬𑐾𑐲𑑂𑐛 (𑐀𑐒𑑂𑐐𑑂𑐬𑐾𑐖𑐷 𑐨𑐵𑐫𑑂‌𑐫𑐵 𑐔𑑂𑐰𑐳𑐸)

 

Source : https://rukshanakapali.com/pokhara-newata/