𑐊𑐎𑐾𑐜𑐾𑐩𑐶𑐫𑐵 𑐳𑐬𑑂𑐖𑐎 𑐰 𑐳𑐺𑐖𑐣𑐵𑐫𑑂 𑐎𑐰𑐶 𑐫𑑀𑐐𑐾𑐣𑑂𑐡𑑂𑐬 𑐥𑑂𑐬𑐢𑐵𑐣

𑐣𑐾𑐥𑐵𑐮𑐨𑐵𑐲𑐵𑐫𑐵 𑐁𑐢𑐸𑐣𑐶𑐎 𑐎𑐰𑐶 𑐫𑑀𑐐𑐾𑐣𑑂𑐡𑑂𑐬 𑐥𑑂𑐬𑐢𑐵𑐣𑐫𑐵 𑐎𑐰𑐶𑐟𑐵, 𑐎𑐺𑐟𑐶𑐟𑑂𑐰 𑐰 𑐰𑑂𑐫𑐎𑑂𑐟𑐶𑐟𑑂𑐰𑐫𑐵𑐟 𑐎𑐫𑐵𑑅 𑐣𑐾𑐥𑐵𑐮𑐨𑐵𑐲𑐵 𑐊𑐎𑐾𑐜𑐾𑐩𑐶𑐥𑐵𑐏𑐾𑑄 𑐳𑐬𑑂𑐖𑐎 𑐰 𑐳𑐺𑐖𑐣𑐵 𑐖𑑂𑐫𑐵𑐗𑑂𑐰𑑅 𑐫𑐵𑐟 𑑋 𑐖𑑂𑐫𑐵𑐗𑑂𑐰𑐮𑐫𑑂 𑐎𑐰𑐶 𑐥𑑂𑐬𑐢𑐵𑐣𑐫𑐵 𑐎𑐵𑐰𑑂𑐫 𑐥𑑂𑐬𑐰𑐺𑐟𑑂𑐟𑐶𑐫𑐵𑐟 𑐎𑐫𑐵𑑅 𑐔𑐬𑑂𑐔𑐵 𑐫𑐵𑐫𑐾𑐐𑐸 𑐮𑐶𑐳𑐾𑑄 𑐰𑐫𑑂𑐎𑑅𑐫𑐵 𑐎𑐰𑐶𑐟𑐵 𑐰𑐵𑐔𑐣 𑐫𑐵𑐫𑐾𑐐𑐸 𑐖𑑂𑐫𑐵 𑐖𑐹𑐐𑐸 𑐏𑑅 𑑋

𑐎𑐰𑐶 𑐟𑑂𑐬𑐶𑐬𑐟𑑂𑐣 𑐱𑐵𑐎𑑂𑐫𑑄 𑐮𑐳𑐎𑐸𑐳 𑐫𑐵𑐳𑐾𑑄 𑐣𑑂𑐴𑑂𑐫𑐵𑐎𑐹𑐐𑐸 𑐄𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐥𑑂𑐬𑐵. 𑐥𑑂𑐬𑐾𑐩𑐱𑐵𑐣𑑂𑐟𑐶 𑐟𑐸𑐮𑐵𑐢𑐬𑑄 𑐎𑐰𑐶 𑐫𑑀𑐐𑐾𑐣𑑂𑐡𑑂𑐬 𑐥𑑂𑐬𑐢𑐵𑐣𑐫𑐵 𑐁𑑅 𑐟𑐎 𑐥𑐶𑐴𑐵𑑄 𑐰𑐫𑐾𑐢𑐸𑑄𑐎𑐹𑐐𑐸 𑐐𑐸𑑄𑐐𑐹 𑐎𑐰𑐶𑐟𑐵 𑐳𑑄𑐐𑑂𑐬𑐴𑑄 𑐣𑐾𑐥𑐵𑐮𑐨𑐵𑐲𑐵 𑐎𑐵𑐰𑑂𑐫 𑐏𑑂𑐫𑑅𑐫𑐵𑐟 𑐫𑐵𑑅𑐐𑐸 𑐫𑑀𑐐𑐡𑐵𑐣𑐫𑐵 𑐔𑐬𑑂𑐔𑐵 𑐫𑐵𑐣𑐵𑐡𑐷𑐐𑐸 𑐏𑑅 𑑋
𑐀𑐠𑐾 𑐴𑐾 𑐰𑐶𑐬𑐵𑐚 𑐐𑐸𑐠𑐶𑐫𑐵 𑐣𑐵𑐫𑑅 𑐩𑐴𑐾𑐣𑑂𑐡𑑂𑐬𑐐𑑀𑐥𑐵𑐮 𑐎𑐬𑑂𑐩𑐵𑐔𑐵𑐬𑑂𑐫𑑄 𑐎𑐰𑐶 𑐥𑑂𑐬𑐢𑐵𑐣𑑄 𑐎𑐰𑐶𑐟𑐵 𑐔𑑂𑐰𑐫𑐾𑐐𑐸 𑐖𑐎 𑐩𑐏𑐸, 𑐁𑐰𑐱𑑂𑐫𑐎 𑐖𑐹𑐐𑐸 𑐂𑐮𑐫𑑂 𑐥𑑂𑐫𑐵𑐏𑑄 𑐴𑐸𑐮𑐾𑐐𑐸 𑐰 𑐣𑐵𑐚𑐎𑐫𑑂 𑐩𑑂𑐴𑐶𑐟𑐾𑐐𑐸 𑐖𑑂𑐫𑐵 𑐳𑐩𑐾𑐟 𑐫𑐵𑑅𑐐𑐸 𑐥𑑂𑐬𑐱𑑄𑐐𑐟 𑐣𑑂𑐴𑑂𑐫𑐠𑐣𑐵𑐡𑐶𑐮 𑑋

𑐣𑐾𑐰𑐵𑑅 𑐣𑑂𑐴𑑂𑐫𑐮𑐸𑐰𑐵 𑐣𑐬𑐾𑐣𑑂𑐡𑑂𑐬𑐨𑐎𑑂𑐟 𑐴𑐵𑐜𑐵𑑄 𑐫𑑀𑐐𑐾𑐣𑑂𑐡𑑂𑐬 𑐥𑑂𑐬𑐢𑐵𑐣 𑐰𑑂𑐫𑐎𑑂𑐟𑐶𑐐𑐟 𑐬𑐸𑐥𑑄 𑐟𑐳𑐎𑑄 𑐎𑑀𑐩𑐮 𑐰 𑐱𑐵𑐮𑐷𑐣 𑐏𑑅𑐳𑐵𑑄 𑐎𑐵𑐰𑑂𑐫 𑐀𑐨𑐶𑐰𑑂𑐫𑐎𑑂𑐟𑐶𑐂 𑐢𑐵𑑅𑐳𑐵 𑐀𑐟𑐶𑐎𑑄 𑐎𑑂𑐬𑐵𑐣𑑂𑐟𑐶𑐎𑐵𑐬𑐷 𑐧𑐶𑐔𑐵𑑅 𑐀𑐨𑐶𑐰𑑂𑐫𑐎𑑂𑐟 𑐫𑐵𑐣𑐵𑐡𑐷 𑐢𑐫𑐵𑐡𑐶𑐮 𑑋

𑐣𑐾𑐥𑐵𑐮𑐨𑐵𑐲𑐵 𑐊𑐎𑐾𑐜𑐾𑐩𑐶𑐫𑐵 𑐳𑐡𑐳𑑂𑐫𑐳𑐔𑐶𑐰 𑐜𑐵. 𑐥𑐸𑐲𑑂𑐥𑐬𑐵𑐖 𑐬𑐵𑐖𑐎𑐬𑑂𑐞𑐶𑐎𑐵𑐬𑑄 𑐎𑐰𑐶 𑐥𑑂𑐬𑐢𑐵𑐣 𑐠𑐩𑑂𑐴𑑄 𑐎𑐰𑐶𑐟𑐵𑐫𑑂 𑐐𑐖𑑂𑐫𑐵𑑅𑐐𑐸 𑐧𑐶𑐔𑐵𑑅 𑐥𑑂𑐬𑐰𑐵𑐴 𑐫𑐵𑐂𑐐𑐸 𑐏𑑅 𑐖𑐷𑐰𑐣𑐫𑑂 𑐣𑑄 𑐰𑐴𑐾 𑐧𑐶𑐔𑐵𑑅 𑐖𑑂𑐰𑐣𑐵𑑅 𑐩𑑂𑐰𑐵𑐂𑐩𑑂𑐴 𑐰𑑂𑐫𑐎𑑂𑐟𑐶 𑐏𑑅 𑐢𑐫𑐵𑐡𑐶𑐮 𑑋 𑐖𑑂𑐫𑐵𑐗𑑂𑐰𑐮𑐫𑑂 𑐎𑐰𑐶 𑐫𑑀𑐐𑐾𑐣𑑂𑐡𑑂𑐬 𑐥𑑂𑐬𑐢𑐵𑐣𑑄 𑐠𑑅𑐐𑐸 𑐥𑐸𑐮𑐵𑑄𑐐𑐸 𑐕𑐸𑑄 𑐮𑐸𑐩𑑄𑐟𑐶 𑐎𑐣𑐵𑐡𑐶𑐳𑐾𑑄 𑐠𑐩𑑂𑐴𑑄 𑐔𑑂𑐰𑐫𑐵𑐡𑐷𑐐𑐸 𑐀𑐥𑑂𑐬𑐎𑐵𑐱𑐶𑐟 𑐎𑐰𑐶𑐟𑐵𑐟 𑐥𑐵𑐛 𑐫𑐵𑐣𑐵𑐡𑐷𑐐𑐸 𑐏𑑅 𑑋

𑐣𑐾𑐥𑐵𑐮𑐨𑐵𑐲𑐵 𑐊𑐎𑐾𑐜𑐾𑐩𑐶𑐫𑐵 𑐔𑐵𑐣𑑂𑐳𑐮𑐬 𑐫𑐖𑑂𑐘𑐬𑐟𑑂𑐣 𑐢𑐵𑐏𑑂𑐰𑐵𑐫𑐵 𑐳𑐨𑐵𑐥𑐟𑐶𑐟𑑂𑐰𑐫𑑂 𑐖𑐹𑐐𑐸 𑐄𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐐𑐵𑐫𑐎𑐥𑐶𑑄 𑐐𑐸𑐖𑑂𑐫𑐾 𑐩𑐵𑐮𑐵𑐎𑐵𑐬, 𑐳𑐟𑑂𑐫𑐣𑐵𑐬𑐵𑐫𑐞 𑐩𑐵𑐣𑐣𑑂𑐢𑐬, 𑐬𑐦𑐶𑐮𑐵 𑐩𑐴𑐬𑑂𑐖𑐣𑐥𑐶𑑄𑐳𑑄 𑐩𑑂𑐫𑐾 𑐣𑑂𑐫𑑄𑐎𑐵𑐡𑐷𑐐𑐸 𑐏𑑅𑐳𑐵 𑐎𑐰𑐶𑐥𑐶𑑄 𑐣𑐵𑐬𑐡 𑐰𑐖𑑂𑐬𑐵𑐔𑐵𑐬𑑂𑐫, 𑐳𑐸𑐬𑐾𑐱 𑐎𑐶𑐬𑐞, 𑐣𑐰𑐶𑐣 𑐥𑑂𑐬𑐎𑐵𑐱 𑐱𑑂𑐬𑐾𑐲𑑂𑐛 𑐰 𑐬𑐱𑑂𑐩𑐶 𑐣𑐵𑐥𑐶𑐟𑑄 𑐎𑐰𑐶 𑐥𑑂𑐬𑐢𑐵𑐣𑑄 𑐔𑑂𑐰𑐫𑐵𑐡𑐷𑐐𑐸 𑐎𑐰𑐶𑐟𑐵 𑐥𑐵𑐛 𑐫𑐵𑐣𑐵𑐡𑐷𑐐𑐸 𑐏𑑅 𑑋