𑐠𑐶𑐩𑐶- 𑐱𑐟𑐵𑐧𑑂𑐡𑐷𑐥𑐸𑐬𑐸𑐲 𑐳𑐟𑑂𑐫𑐩𑑀𑐴𑐣 𑐖𑑀𑐱𑐷𑑄 𑐰𑐬𑑂𑐟𑐩𑐵𑐣 𑐳𑑂𑐠𑐶𑐟𑐶 𑐎𑐵𑐫𑐩 𑐴𑐾 𑐖𑐸𑐫𑐵𑐔𑑂𑐰𑐣 𑐢𑐵𑑅𑐳𑐵 𑐣𑐾𑐥𑐵𑐮𑐨𑐵𑐲𑐵 𑐁𑑅 𑐩𑐺𑐟 𑐖𑐸𑐂𑐐𑐸 𑐳𑑄𑐎𑐾𑐟 𑐏𑐣𑐾 𑐡𑐸𑐐𑐸 𑐏𑑃 𑐎𑐣𑐵𑐡𑐷𑐐𑐸 𑐡𑐸 𑑋 𑐩𑐢𑑂𑐫𑐥𑐸𑐬 𑐠𑐶𑐩𑐶𑐂 ‘𑐡𑐧𑐸𑐮𑐶 𑐣𑐾𑐥𑐵𑐮’ 𑐣𑐵𑑄𑐐𑐸 𑐳𑑄𑐳𑑂𑐠𑐵𑑄 𑐮𑐕𑐶𑐫𑑄𑐎𑑄 𑐫𑐵𑑅𑐐𑐸 𑐨𑐵𑐬𑐟𑐷𑐫 𑐣𑐾𑐰𑐵𑑅𑐟𑐫𑑂𑐟 𑐣𑐾𑐥𑐵𑐮𑐨𑐵𑐲𑐵, 𑐣𑐾𑐥𑐵𑐮 𑐮𑐶𑐥𑐶 𑐰 𑐣𑐾𑐥𑐵𑐮 𑐳𑑄𑐳𑑂𑐎𑐺𑐟𑐶 𑐳𑑂𑐫𑐣𑐾𑐎𑐣𑐾 𑐖𑑂𑐫𑐵𑐫𑐵 𑐥𑑂𑐬𑐟𑐶𑐰𑐾𑐡𑐣𑐵𑐟𑑂𑐩𑐎 𑐳𑑂𑐩𑐵𑐬𑐶𑐎𑐵 𑐰𑐶𑐩𑑀𑐔𑐣 𑐰 𑐴𑐣𑐾 𑐖𑑂𑐫𑐵𑐗𑑂𑐰𑐮𑐫𑑂 𑐩𑐹𑐥𑐵𑐴𑐵𑑄 𑐎𑐠𑑄 𑐣𑑂𑐰𑐰𑐵𑐳𑐾𑑄 𑐰𑐫𑑂𑐎𑐮𑑄 𑐠𑑂𑐰 𑐏𑑃 𑐎𑐣𑐵𑐡𑐷𑐐𑐸 𑐏𑑅 𑑋

𑐨𑐵𑐖𑐸 𑐖𑑀𑐱𑐷𑑄 𑐳𑑄𑐳𑑂𑐎𑐺𑐟 𑐨𑐵𑐲𑐵𑐫𑑂 𑐣𑑄 𑐩𑐴𑐵𑐎𑐵𑐰𑑂𑐫 𑐡𑐸, 𑐄𑐥𑐵𑐢𑑂𑐫𑐵𑐫 𑐩𑐴𑐵𑐄𑐥𑐵𑐢𑑂𑐫𑐵𑐫 𑐡𑐸 𑐟𑐬 𑐨𑐵𑐲𑐵 𑐮𑑂𑐴𑐵𑐂𑐥𑐶𑑄 𑐳𑐸𑑄 𑐴𑐾 𑐩𑐡𑐸𑐐𑐸 𑐎𑐵𑐬𑐞𑑄 𑐰 𑐨𑐵𑐫𑑂 𑐩𑐺𑐟 𑐨𑐵𑐲𑐵 𑐖𑐹𑐐𑐸 𑐏𑑅 𑐢𑐵𑐳𑐾𑑄 𑐖𑐣𑐐𑐞𑐣𑐵 𑐎𑐠𑑄 𑐣𑐾𑐰𑐵𑑅𑐟𑐫𑑂𑐳𑑄 𑐗𑐣𑑂 𑐗𑐣𑑂 𑐨𑐵𑐲𑐵 𑐟𑑂𑐰𑑅𑐟𑐵 𑐰𑐣𑐵𑐔𑑂𑐰𑑄𑐐𑐸𑐮𑐶𑑄 𑐣𑐾𑐥𑐵𑐮𑐨𑐵𑐲𑐵 𑐣𑑄 𑐩𑐺𑐟𑐨𑐵𑐲𑐵 𑐖𑐹𑐰𑐣𑐾𑐦𑐸 𑐢𑐫𑐵𑐡𑐶𑐮 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐰𑐫𑑂𑐎𑐮𑑄 𑐏𑑂𑐰𑐥𑐫𑐵 𑐟𑐶𑐮𑐎𑐥𑑂𑐬𑐎𑐵𑐱 𑐎𑐵𑐫𑐳𑑂𑐠𑐫𑐵𑐟 𑐴𑐶𑐬𑐵𑐣𑐬𑐳𑐶𑑄 𑐮𑐸𑐩𑐣𑑂𑐟𑐶 𑐳𑐵𑐴𑐶𑐟𑑂𑐫𑐶𑐎 𑐳𑐩𑑂𑐩𑐵𑐣, 𑐩𑐢𑑂𑐫𑐥𑐸𑐬 𑐠𑐶𑐩𑐶𑐫𑐵 𑐎𑐺𑐲𑑂𑐞𑐮𑐵𑐮 𑐐𑑀𑐖𑐵𑐱𑑂𑐬𑐾𑐲𑑂𑐛𑐫𑐵𑐟 𑐁𑐱𑐵𑐣𑐬𑐳𑐶𑑄 𑐮𑐸𑐩𑐣𑑂𑐟𑐶 𑐳𑐩𑑂𑐥𑐡𑐵 𑐳𑑄𑐬𑐎𑑂𑐲𑐞 𑐳𑐩𑑂𑐩𑐵𑐣, 𑐎𑐶𑐥𑐹𑐫𑐵 𑐧𑐷𑐬𑐥𑑂𑐬𑐳𑐵𑐡 𑐨𑐣𑑂𑐳𑐵𑐬𑐷𑐫𑐵𑐟 𑐟𑐾𑐖𑐎𑐺𑐲𑑂𑐞 𑐮𑐸𑐩𑐣𑑂𑐟𑐶 𑐳𑑄𑐐𑐷𑐟 𑐳𑐩𑑂𑐩𑐵𑐣, 𑐫𑐾𑑃𑐫𑐵 𑐱𑐬𑐡 𑐎𑐳𑐵𑑅𑐫𑐵𑐟 𑐴𑐬𑐶𑐎𑐺𑐲𑑂𑐞 𑐮𑐸𑐩𑐣𑑂𑐟𑐶 𑐮𑐶𑐥𑐶 𑐀𑐨𑐶𑐮𑐾𑐏 𑐳𑐩𑑂𑐩𑐵𑐣 𑐰 𑐫𑐮𑐫𑐵 𑐔𑐣𑑂𑐡𑑂𑐬𑐩𑐵𑐫𑐵 𑐧𑐖𑑂𑐬𑐵𑐔𑐵𑐬𑑂𑐫 ‘𑐳𑐸𑐬𑑂𑐖’𑐫𑐵𑐟 𑐣𑐵𑐣𑐶𑐩𑐿𑑄𑐫𑐵 𑐮𑐸𑐩𑐣𑑂𑐟𑐶 𑐮𑑂𑐰𑐴𑑄𑐩𑐹𑐬𑑂𑐟𑐶 𑐳𑐩𑑂𑐩𑐵𑐣 𑐮𑑅𑐮𑑂𑐴𑐵𑐣𑐵𑐡𑐷𑐐𑐸 𑐏𑑅 𑑋 𑐡𑐵𑐟𑐵𑐟𑐥𑐵𑐏𑐾𑑄 𑐄𑐩𑐶𑐟 𑐗𑐶𑐡𑑂𑐰𑑅 𑐗𑐶𑐡𑑂𑐰𑑅 𑐟𑐎𑐵 𑐡𑐵𑑄 𑐳𑐶𑐬𑐥𑐵 𑐣𑑄 𑐮𑑅𑐮𑑂𑐴𑐵𑐣𑐵𑐡𑐷𑐐𑐸 𑐏𑑅 𑑋 𑐖𑑂𑐫𑐵𑐗𑑂𑐰𑐮𑐫𑑂 𑐰𑐶𑐱𑐾𑐲 𑐥𑐵𑐴𑐵𑑄 𑐩𑐢𑑂𑐫𑐥𑐸𑐬 𑐠𑐶𑐩𑐶 𑐣𑐥𑐵𑐫𑐵 𑐩𑐾𑐫𑐬 𑐩𑐡𑐣𑐳𑐸𑐣𑑂𑐡𑐬 𑐱𑑂𑐬𑐾𑐲𑑂𑐛𑑄 𑐡𑑀𑐳𑐮𑑂𑐮𑐵𑑄 𑐣𑑂𑐫𑐫𑐾𑐎𑐵 𑐳𑐩𑑂𑐩𑐵𑐣 𑐫𑐵𑐣𑐵𑐡𑐷𑐐𑐸 𑐏𑑅 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐏𑑂𑐰𑐥𑐫𑐵 𑐣𑑂𑐴𑐹 𑐥𑑂𑐬𑐟𑐶𑐨𑐵 𑐩𑑂𑐰𑐵𑐴𑐵𑐮𑐶 𑐧𑐵𑐡𑐎 𑐩𑐫𑑂𑐖𑐸 𑐬𑑀𑐱𑐶𑐎𑐵 𑐖𑐢𑐵𑐬𑐷 𑐰 𑐩𑐢𑑂𑐫𑐥𑐸𑐬𑐫𑐵 𑐮𑐶𑐥𑐶 𑐰𑐶𑐱𑐾𑐲𑐖𑑂𑐘 𑐧𑐶𑐎𑐷 𑐧𑐖𑑂𑐬𑐵𑐔𑐵𑐬𑑂𑐫𑐫𑐵𑐟 𑐣𑑄 𑐥𑑂𑐬𑐟𑐶𑐨𑐵 𑐳𑐶𑐬𑐥𑐵 𑐮𑑅𑐮𑑂𑐴𑐵𑑅𑐐𑐸 𑐏𑑅 𑑋 𑐰𑐶𑐱𑐾𑐲 𑐥𑐵𑐴𑐵𑑄 𑐠𑐶𑐩𑐶 𑐣𑐥𑐵𑐫𑐵 𑐩𑐾𑐫𑐬 𑐩𑐡𑐣𑐳𑐸𑐣𑑂𑐡𑐬 𑐱𑑂𑐬𑐾𑐲𑑂𑐛𑑄 𑐠𑐶𑐩𑐶𑐫𑐵 𑐠𑐷𑐠𑐷𑑄 𑐗𑐶𑐐𑐹 𑐣𑐣𑐶 𑐰𑐣𑐾𑐐𑐸 𑐐𑐮𑑂𑐮𑐶 𑐟𑐧𑑂𑐫𑐵 𑐫𑐵𑐣𑐵𑑅 𑐁𑑅 𑐗𑐶𑐐𑐹 𑐣𑐣𑐶𑐫𑐵 𑐕𑐐𑐹 𑐰𑐶𑐱𑐾𑐲 𑐳𑐩𑑂𑐥𑐡𑐵𑐳𑑂𑐠𑐮 𑐣𑐶𑐬𑑂𑐩𑐵𑐞 𑐫𑐵𑐫𑐾𑐟𑑂𑐫𑐣𑐵𑐐𑐸 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐶𑐮 𑑋 𑐣𑐾𑐰𑐵𑑅 𑐐𑐸𑐠𑐶 𑐫𑐾𑑃𑐫𑐵 𑐀𑐢𑑂𑐫𑐎𑑂𑐲 𑐥𑐰𑐶𑐟𑑂𑐬 𑐧𑐖𑑂𑐬𑐵𑐔𑐵𑐬𑑂𑐫𑑄 𑐳𑐬𑐎𑐵𑐬𑑄 𑐐𑐸𑐠𑐶 𑐰𑐶𑐢𑐾𑐫𑐎 𑐴𑐫𑐵𑑅 𑐣𑐾𑐰𑐵𑑅 𑐳𑑄𑐳𑑂𑐎𑐺𑐟𑐶 𑐳𑐏𑐵𑐥 𑐫𑐵𑐫𑐾𑐟𑑂𑐫𑑄𑐐𑐸 𑐡𑑂𑐰𑐥𑑄 𑐧𑐶𑐫𑐵𑐡𑐶𑐮 𑑋
𑐂𑐣𑑂𑐖𑐶𑐣𑐶𑐫𑐬 𑐳𑐣𑑂𑐟𑑀𑐲 𑐥𑑂𑐬𑐖𑐵𑐥𑐟𑐶𑐫𑐵 𑐳𑐨𑐵𑐥𑐟𑐶𑐟𑑂𑐰𑐫𑑂 𑐳𑐸𑐬𑐾𑐣𑑂𑐡𑑂𑐬𑐧𑐶𑐎𑑂𑐬𑐩 𑐥𑑂𑐬𑐖𑐵𑐥𑐟𑐶𑑄 𑐮𑐳𑐎𑐸𑐳 𑐫𑐵𑐣𑐵𑑅 𑐣𑑂𑐴𑑂𑐫𑐵𑐎𑐹𑐐𑐸 𑐄𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐳𑑄𑐳𑑂𑐠𑐵𑐫𑐵 𑐳𑑄𑐬𑐎𑑂𑐲𑐎 𑐐𑐞𑐾𑐱𑐬𑐵𑐩 𑐮𑐵𑐕𑐶𑑄 𑐳𑐩𑑂𑐩𑐵𑐣 𑐰 𑐥𑑂𑐬𑐟𑐶𑐨𑐵 𑐳𑐶𑐬𑐥𑐵𑐫𑐵 𑐧𑐵𑐬𑐾 𑐠𑑅𑐐𑐸 𑐣𑐸𑐐𑑅𑐏𑑃 𑐎𑐣𑐵𑐡𑐷𑐐𑐸 𑐏𑑅 𑑋