𑐫𑐾𑑃 – 𑐠𑐸𑐐𑐸𑐳𑐷 𑐩𑑀𑐴𑐣𑐶 𑐣𑐏𑑅𑐫𑐵 𑐂𑐮𑐫𑑂 𑐩𑐳𑑂𑐟𑐫𑑂 𑐡𑐠𑐸𑐂 𑐣𑐾𑐥𑐵𑐮𑐨𑐵𑐲𑐵 𑐔𑐶𑐣𑐵𑐏𑑃 𑐎𑐵𑐳𑐵 𑐖𑐸𑐂𑐐𑐸 𑐖𑐹𑐐𑐸 𑐡𑐸 𑑋 𑐐𑑂𑐮𑑀𑐧𑐮 𑐣𑐾𑐥𑐵𑑅 𑐣𑐾𑐚𑐰𑐬𑑂𑐎 𑐰 𑐣𑐾𑐰𑐵𑑅 𑐊𑐔𑐜𑐷 𑐚𑐾𑐮𑐶𑐨𑐶𑐖𑐣𑐫𑐵 𑐩𑑄𑐎𑐵𑑅 𑐐𑑂𑐰𑐳𑐵𑐮𑐫𑑂 𑐠𑐸𑐐𑐸𑐳𑐷 𑐩𑑀𑐴𑐣𑐶𑐫𑐵 𑐮𑐳𑐟𑐵𑐫𑑂 𑐮𑐵𑐎𑐵𑑅 𑐄𑐎𑐠𑑄 𑐩𑐳𑑂𑐟𑐫𑑂 𑐡𑐠𑐸𑐂 𑐔𑐶𑐣𑐵𑐏𑑃 𑐎𑐵𑐳𑐵 𑐖𑐸𑐂𑐟𑑂𑐫𑑄𑐐𑐸 𑐏𑑅 𑑋 𑐩𑐳𑑂𑐟𑐫𑑂𑐟 𑐨𑐵𑐲𑐵, 𑐎𑐮𑐵, 𑐳𑐵𑐴𑐶𑐟𑑂𑐫 𑐰 𑐳𑑄𑐳𑑂𑐎𑐺𑐟𑐶𑐫𑐵 𑐩𑐴𑐟𑑂𑐰 𑐠𑐸𑐂𑐎𑐾 𑐧𑐷𑐐𑐸 𑐄𑐡𑑂𑐡𑐾𑐱𑑂𑐫𑑄 𑐄𑐐𑐸 𑐖𑑂𑐫𑐵𑐗𑑂𑐰𑑅 𑐫𑐵𑐫𑐾𑐟𑑂𑐫𑑄𑐐𑐸 𑐏𑑅 𑑋

𑐄𑐐𑐸 𑐔𑐶𑐣𑐵𑐏𑑃 𑐎𑐵𑐳𑐵𑐫𑑂 𑐰𑐶𑐱𑑂𑐰𑐣𑑂𑐫𑑄𑐎𑑄𑐫𑐵 𑑑𑑓 𑐡𑑃 𑐎𑑂𑐰𑐫𑑂𑐫𑐵𑐥𑐶𑑄 𑐩𑐳𑑂𑐟𑐫𑑂𑐳𑑄 𑐧𑑂𑐰𑐟𑐶 𑐎𑐵𑐫𑐾 𑐦𑐂𑐐𑐸 𑐏𑑃 𑐐𑑂𑐰𑐳𑐵𑑅 𑐏𑐮𑐎𑑄 𑐖𑐵𑐣𑐎𑐵𑐬𑐷 𑐧𑐶𑐄𑐐𑐸 𑐡𑐸 𑑋 𑐖𑑂𑐫𑐵𑐗𑑂𑐰𑐮𑐫𑑂 𑐧𑑂𑐰𑐟𑐶 𑐎𑐵𑐫𑐾𑐟 𑐩𑐳𑑂𑐟𑐫𑑂𑐳𑑄 𑐔𑐶𑐣𑐵𑐏𑑃 𑐰𑐵𑐔𑐣 𑐫𑐵𑐣𑐵𑐔𑑂𑐰𑑄𑐐𑐸 𑐨𑐶𑐜𑐶𑐫𑑀 𑐎𑐫𑐵𑑅 𑐐𑑂𑐰𑐳𑐵𑑅 𑐏𑐮𑑅𑐫𑐵𑐟 𑐕𑑂𑐰𑐫𑐵 𑐴𑐫𑐾𑐩𑐵𑑅𑐐𑐸 𑐰𑑂𑐫𑐰𑐳𑑂𑐠𑐵 𑐫𑐵𑐣𑐵𑐟𑑅𑐐𑐸 𑐡𑐸𑐳𑐵 𑐄𑐎𑐠𑑄 𑐎𑐫𑐵𑐟𑑅𑐐𑐸 𑐨𑐶𑐜𑐶𑐫𑑀 𑐰𑐂𑐐𑐸 𑐳𑐾𑐥𑑂𑐚𑐾𑐩𑑂𑐧𑐬 𑑓𑑐 𑐟𑐵𑐬𑐶𑐏 𑐟𑐎𑐫𑐵 𑐡𑐸𑐣𑐾 𑐕𑑂𑐰𑐫𑐵 𑐴𑐫𑐾𑐟 𑐣𑑄 𑐐𑑂𑐰𑐳𑐵𑑅 𑐏𑐮𑐎𑑄 𑐂𑐣𑐵𑐥 𑐫𑐵𑑅𑐐𑐸 𑐡𑐸 𑑋

𑐩𑐔𑐵 𑐔𑐶𑐣𑐵𑐏𑑃 𑐎𑐵𑐳𑐵𑐫𑑂 𑐧𑑂𑐰𑐟𑐶 𑐎𑐵𑐂𑐥𑐶𑑄 𑐩𑐳𑑂𑐟𑐫𑑂𑐳𑑄 𑐣𑐾𑐰𑐵𑑅 𑐳𑑄𑐳𑑂𑐎𑐺𑐟𑐶 𑐥𑐶𑐖𑑂𑐰𑐂𑐎𑐠𑑄𑐫𑐵 𑐰𑐳𑐟𑐫𑑂 𑐣𑐾𑐥𑐵𑐮𑐨𑐵𑐲𑐵𑐫𑐵 𑑓𑑐 𑐣𑐶𑐳𑐾𑑄 𑑙𑑐 𑐏𑑃𑐐𑑂𑐰𑑅 𑐟𑐎𑐫𑐵 𑐡𑐸𑐣𑐾 𑐔𑐶𑐣𑐵𑐏𑑃 𑐰𑐵𑐔𑐣 𑐫𑐵𑐫𑐾 𑐦𑐂𑐐𑐸 𑐐𑑂𑐰𑐳𑐵𑑅 𑐏𑐮𑐎𑑄 𑐢𑐵𑑅𑐐𑐸 𑐡𑐸 𑑋 𑐎𑐵𑐳𑐵𑐫𑑂 𑐣𑑂𑐴𑐵𑐥 𑐖𑐹𑐩𑑂𑐴𑐾𑐳𑐶𑐟 𑐣𑐷𑐡𑑂𑐰𑑅, 𑐮𑐶𑐄 𑐮𑐵𑑅𑐩𑑂𑐴𑐾𑐳𑐶𑐟 𑐗𑐶𑑄𑐣𑑂𑐫𑐵𑐡𑑂𑐰𑑅, 𑐮𑐶𑐫𑐵𑑄𑐮𑐶𑐄𑐫𑐵𑐟 𑐗𑐶𑐡𑑂𑐰𑑅 𑐰 𑐳𑐵𑐩𑐵𑐖𑐶𑐎 𑐳𑑄𑐖𑐵𑐮𑐫𑑂 𑐡𑐎𑐮𑐫𑑂 𑐀𑐥𑑂𑐰𑑅 𑐮𑐵𑐂𑐎 𑐰 𑐩𑑀𑐳𑑂𑐚 𑐥𑐥𑐸𑐮𑐬 𑐨𑑂𑐫𑐸𑐀𑐬𑑂𑐳𑐫𑐵𑐟 𑐗𑐶𑐡𑑂𑐰𑑅 𑐰 𑐫𑐸𑐚𑑂𑐫𑐸𑐧𑐫𑑂 𑐳𑐧𑑂𑐳𑐎𑑂𑐬𑐵𑐂𑐧 𑐰 𑐩𑑀𑐳𑑂𑐚 𑐥𑐥𑐸𑐮𑐬 𑐨𑑂𑐫𑐹𑐫𑐵𑐟 𑐗𑐶𑐡𑑂𑐰𑑅 𑐟𑐎𑐵 𑐳𑐶𑐬𑐥𑐵𑑅 𑐧𑐷 𑑋