𑐣𑐾𑐰𑐵: 𑐀𑐣𑐮𑐵𑐂𑐣 𑐣𑑂𑐫𑐸𑐖 – 𑐮𑐮𑐾𑐣𑑂𑐡𑑂𑐬 𑐱𑐵𑐎𑑂𑐫 | 𑑒𑑐𑑗𑑕 𑐩𑐵𑐑 𑑑𑑗, 𑐧𑐶𑐴𑐶𑐧𑐵𑐬 𑑑𑑑:𑑔𑑐:𑑕𑑗

𑐎𑐶𑐥𑐹 𑐮𑐵𑐐𑐵𑐫𑐵 𑐧𑐬𑐶𑐲𑑂𑐛 𑐳𑑂𑐰𑐵𑐳𑑂𑐠𑑂𑐫𑐳𑐾𑐰𑐷, 𑐱𑐶𑐎𑑂𑐲𑐵𑐥𑑂𑐬𑐾𑐩𑐶, 𑐳𑐩𑐵𑐖𑐳𑐾𑐰𑐷 𑐮𑐶𑐳𑐾𑑄 𑐎𑐶𑐥𑐹𑐫𑐵 𑐳𑐴𑐶𑐡 𑐳𑑂𑐩𑐵𑐬𑐎 𑐎𑐮𑐾𑐖𑐫𑐵 𑐳𑑄𑐳𑑂𑐠𑐵𑐥𑐎 𑐣𑐵𑐫𑑅 𑐩𑐡𑐸𑐪 𑐬𑐸𑐡𑑂𑐬𑐧𑐴𑐵𑐡𑐸𑐬 𑐥𑑂𑐬𑐢𑐵𑐣 (𑐧𑑂𑐬𑐪𑐸𑐎𑐵𑐖𑐷)𑐫𑐵 𑐮𑐸𑐩𑐣𑑂𑐟𑐶𑐂 𑐎𑐶𑐥𑐹 𑐮𑐵𑐐𑐵𑐫𑑂 𑐠𑐷𑐠𑐷 𑐳𑐵𑐩𑐵𑐖𑐶𑐎𑐮𑐶𑐳𑐾𑑄 𑐩𑐾𑐩𑐾𑐐𑐸 𑐔𑑂𑐰𑐕𑐵𑐫𑐾𑐧𑐴𑑅𑐐𑐸 𑐖𑑂𑐫𑐵 𑐫𑐵𑐫𑐾𑐐𑐸 𑐣𑐶𑐟𑐶𑑄 𑐬𑐸𑐡𑑂𑐬𑐧𑐴𑐵𑐡𑐸𑐬 𑐳𑑂𑐩𑐺𑐟𑐶 𑐥𑑂𑐬𑐟𑐶𑐲𑑂𑐛𑐵𑐣 𑐣𑐷𑐳𑑂𑐰𑐣𑐵𑐟𑑅𑐐𑐸 𑐡𑐸 𑑋

𑐠𑐸𑐐𑐸 𑐥𑑂𑐬𑐟𑐶𑐲𑑂𑐛𑐵𑐣𑑄 𑐡𑑃𑐫𑑂 𑐡𑐳𑑄 𑐠𑐷𑐠𑐷 𑐖𑑂𑐫𑐵𑐗𑑂𑐰𑑅 𑐤𑑂𑐫𑐵𑐎𑐵𑑅 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐠𑑂𑐰𑐴𑐾 𑐗𑑂𑐰𑐮𑐫𑑂 𑐄𑐐𑐸 𑐬𑐸𑐡𑑂𑐬𑐧𑐴𑐵𑐡𑐸𑐬 𑐳𑑂𑐩𑐺𑐟𑐶 𑐥𑑂𑐬𑐟𑐶𑐲𑑂𑐛𑐵𑐣𑑄 𑐱𑐶𑐎𑑂𑐲𑐵 𑐎𑑂𑐲𑐾𑐟𑑂𑐬𑐫𑑂 𑐧𑐶𑐧𑐶𑐊𑐳 𑐳𑑂𑐣𑐵𑐟𑐎 𑐟𑐴 𑐰𑑂𑐫𑐰𑐳𑑂𑐠𑐵𑐥𑐣 𑐳𑑄𑐎𑐵𑐫𑑂 𑐳𑐬𑑂‍𑐰𑑀𑐎𑐺𑐲𑑂𑐚 𑐖𑐹𑐥𑐶𑑄 𑐰𑐶𑐡𑑂𑐫𑐵𑐬𑑂‍𑐠𑐷𑐥𑐶𑐣𑑂𑐟 𑐴𑑅𑐥𑐵𑑅 𑐰 𑐟𑐶𑐧𑑅 𑐧𑐶𑐂𑐐𑐸 𑐣𑐶𑐟𑐶𑑄 𑐥𑐮𑐶𑐳𑑂𑐠𑐵 𑐫𑐵𑐣𑐵𑐟𑑅𑐐𑐸 ‘𑐬𑐸𑐡𑑂𑐬 𑐳𑑂𑐩𑐺𑐟𑐶 𑐥𑐸𑐬𑐳𑑂𑐎𑐵𑐬’ 𑐠𑐸𑐐𑐸𑐳𑐷 𑑒𑑐𑑗𑑕 𑐧𑑂𑐫𑐵𑐔𑐫𑐵 𑐰𑐶𑐡𑑂𑐫𑐵𑐬𑑂‍𑐠𑐷 𑐳𑐴𑐶𑐡 𑐳𑑂𑐩𑐵𑐬𑐎 𑐎𑐮𑐾𑐖𑐫𑐵 𑐰𑐶𑐡𑑂𑐫𑐵𑐬𑑂‍𑐠𑐷 𑐟𑐾𑐖𑐾𑐣𑑂𑐡𑑂𑐬 𑐖𑐶𑐳𑐷𑐫𑐵𑐟 𑐣𑐐𑐡 𑐣𑑂𑐫𑐵𑐡𑑂𑐰𑑅 𑐟𑐎𑐵 𑐮𑐶𑐳𑐾𑑄 𑐄𑐐𑐸 𑐥𑐸𑐬𑐳𑑂𑐎𑐵𑐬 𑐮𑑅𑐯𑐵𑑅𑐐𑐸 𑐡𑐸 𑑋

𑐳𑐴𑐶𑐡 𑐳𑑂𑐩𑐵𑐬𑐎 𑐎𑐮𑐾𑐖𑐫𑐵 𑑒𑑘 𑐎𑑂𑐰𑑅𑐐𑐸 𑐰𑐵𑐬𑑂‍𑐲𑐶𑐎 𑐖𑑂𑐫𑐵𑐗𑑂𑐰𑑅 𑐩𑐵𑐑 𑑑𑑖 𑐐𑐟𑐾 𑐧𑐸𑐢𑐰𑐵𑑅 𑐳𑐴𑐶𑐡 𑐡𑐶𑐰𑐳𑐫𑐵 𑐡𑐶𑑄 𑐖𑐹𑐐𑐸 𑐏𑑅 𑑋 𑐄𑐐𑐸 𑐴𑐾 𑐖𑑂𑐫𑐵𑐗𑑂𑐰𑐮𑐫𑑂 𑐬𑐸𑐡𑑂𑐬𑐧𑐴𑐵𑐡𑐸𑐬 𑐳𑑂𑐩𑐺𑐟𑐶 𑐥𑑂𑐬𑐟𑐶𑐲𑑂𑐛𑐵𑐣𑑄 ‘𑐬𑐸𑐡𑑂𑐬 𑐳𑑂𑐩𑐺𑐟𑐶 𑐥𑐸𑐬𑐳𑑂𑐎𑐵𑐬’ 𑐖𑐶𑐳𑐷𑐫𑐵𑐟 𑐮𑑅𑐯𑐵𑑅𑐐𑐸 𑐏𑑅 𑑋

𑐬𑐸𑐡𑑂𑐬 𑐳𑑂𑐩𑐺𑐟𑐶 𑐥𑐸𑐬𑐳𑑂𑐎𑐵𑐬 𑐰𑑄𑐐𑐸 𑑒𑑐𑑗𑑑 𑐳𑐵𑐮𑐣𑐶𑐳𑐾𑑄 𑐮𑑅𑐯𑐵𑐣𑐵𑑅 𑐰𑐫𑐵𑐔𑑂𑐰𑑄𑐐𑐸 𑐖𑐵𑐣𑐎𑐵𑐬𑐷 𑐥𑑂𑐬𑐟𑐶𑐲𑑂𑐛𑐵𑐣𑐫𑐵 𑐳𑑄𑐳𑑂𑐠𑐵𑐥𑐎 𑐣𑐵𑐫𑑅 𑐬𑐰𑐶𑐣𑑂𑐡𑑂𑐬𑐧𑐴𑐵𑐡𑐸𑐬 𑐥𑑂𑐬𑐢𑐵𑐣𑑄 𑐣𑐾𑐰𑐵𑑅 𑐀𑐣𑐮𑐵𑐂𑐣𑐣𑑂𑐫𑐹𑐖𑐫𑐵𑐟 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐷𑐐𑐸 𑐡𑐸 𑑋

𑐥𑑂𑐬𑐟𑐶𑐲𑑂𑐛𑐵𑐣𑐫𑐵 𑐳𑑄𑐳𑑂𑐠𑐵𑐥𑐎 𑐣𑐵𑐫𑑅 𑐨𑐵𑐖𑐸 𑐥𑑂𑐬𑐢𑐵𑐣𑑄 𑐬𑐸𑐡𑑂𑐬𑐧𑐴𑐵𑐡𑐸𑐬 𑐳𑑂𑐩𑐺𑐟𑐶 𑐥𑑂𑐬𑐟𑐶𑐲𑑂𑐛𑐵𑐣𑐫𑐵 𑐮𑐸𑐏𑐵𑑄 𑐠𑐷𑐠𑐷 𑐖𑑂𑐫𑐵𑐗𑑂𑐰𑑅 𑐤𑑂𑐫𑐵𑐎𑐵𑑅 𑐰𑐣𑐾𑐐𑐸 𑐰 𑐫𑐵𑐫𑐾𑐩𑐵𑐣𑐷𑐐𑐸 𑐁𑐥𑐵𑐮𑑄 𑐡𑐣𑐷𑐐𑐸 𑐏𑑃 𑐤𑑂𑐫𑐠𑐣𑐵𑐡𑐶𑐳𑐾𑑄 𑐥𑑂𑐬𑐟𑐶𑐲𑑂𑐛𑐵𑐣𑑄 𑐳𑑂𑐰𑐵𑐳𑑂𑐠𑑂𑐫, 𑐱𑐶𑐎𑑂𑐲𑐵𑐮𑐶𑐳𑐾𑑄 𑐁𑐥𑐵𑐮𑑄 𑐩𑐾𑐩𑐾𑐐𑐸 𑐳𑐵𑐩𑐵𑐖𑐶𑐎 𑐖𑑂𑐫𑐵 𑐣𑐶𑐬𑐣𑑂𑐟𑐬 𑐬𑐸𑐥𑑄 𑐤𑑂𑐫𑐵𑐎𑐵𑑅 𑐰𑐣𑐾𑐐𑐸 𑐧𑐔𑑄 𑐧𑐶𑐫𑐵𑐡𑐷𑐐𑐸 𑐡𑐸 𑑋

𑐮𑐸𑐩𑑄𑐎𑐾𑐧𑐴𑑅𑐖𑐹, 𑐟𑐵𑑅𑐃 𑐤𑑂𑐫𑐰𑑅𑐣𑐶𑐳𑐾𑑄 𑐩𑐡𑐸𑐪 𑐬𑐸𑐡𑑂𑐬𑐧𑐴𑐵𑐡𑐸𑐬 𑐥𑑂𑐬𑐢𑐵𑐣 (𑐧𑑂𑐬𑐪𑐸𑐎𑐵𑐖𑐷)𑐥𑐵𑐏𑐾𑑄 𑐎𑐶𑐥𑐹 𑐮𑐵𑐐𑐵𑐫𑐵 𑐖𑐣𑐟𑐵𑐫𑐵 𑐖𑐎 𑐩𑐏𑐸, 𑐎𑐶𑐥𑐹 𑐮𑐵𑐐𑐵𑑄 𑐥𑐶𑐣𑐾𑐫𑐵 𑐖𑐣𑐟𑐵𑐫𑐵𑐟 𑐣𑑄 𑐡𑐸𑐐𑑂𑐫𑑄𑐎 𑐳𑑂𑐰𑐵𑐳𑑂𑐠𑑂𑐫 𑐳𑐾𑐰𑐵 𑐧𑐶𑐫𑐵𑑅 𑐰𑐫𑐵𑐔𑑂𑐰𑐣𑐵𑐡𑐷𑐐𑐸 𑐏𑑅 𑑋 𑐕𑐸𑑄 𑐡𑑃 𑐤𑑂𑐫𑑅 𑐰𑐫𑑂𑐎𑑅 𑐥𑑂𑐬𑐢𑐵𑐣 𑐩𑐡𑐸𑐐𑐸 𑐏𑑅 𑑋

𑐎𑐶𑐥𑐹𑐧𑐵𑐳𑐷𑐫𑐵 𑐥𑐸𑐮𑐵𑑄𑐥𑐶𑑄 𑐖𑐣𑐳𑐵𑐢𑐵𑐬𑐞𑐥𑐶𑐣𑑂𑐳𑑄 𑐧𑑂𑐬𑐪𑐸𑐎𑐵𑐖𑐷 𑐕𑐪 𑐩𑐡𑐸𑐐𑐸𑐮𑐶𑑄 𑐠𑑅𑐥𑐶𑐣𑐶𑐐𑐸 𑐄𑐳𑐵𑑃𑐫𑑂 𑐧𑐵𑑄𑐮𑐵𑐎𑑂𑐎 𑐥𑐬𑐷𑐎𑑂𑐲𑐞 𑐫𑐵𑐫𑐾𑐩𑐏𑑄𑐐𑐸 𑐰 𑐧𑑂𑐬𑐪𑐸𑐎𑐵𑐖𑐷 𑐩𑐡𑐸𑐐𑐸𑐮𑐶𑑄 𑐠𑑅𑐥𑐶𑑄 𑐣𑑄 𑐮𑑂𑐰𑐐𑐶 𑐖𑐸𑐸𑐸𑐖𑐸𑑄 𑐰𑐣𑐵𑐔𑑂𑐰𑑄𑐐𑐸 𑐣𑐸𑐐𑑅𑐏𑑃 𑐥𑑂𑐰𑑄𑐎𑐷𑐥𑐶𑑄 𑐣𑑄 𑐁𑐥𑐵𑐮𑑄 𑐡𑐸 𑑋

𑐰𑐫𑑂𑐎𑑅 𑐬𑐸𑐡𑑂𑐬𑐧𑐴𑐵𑐡𑐸𑐬 𑐥𑑂𑐬𑐢𑐵𑐣 𑐤𑐵𑐥𑐵𑑄 𑐥𑑄𑐔𑐵𑐫𑐟𑐎𑐵𑐮𑐫𑑂 𑐮𑐵𑐫𑐎𑐸 𑐟𑑂𑐰𑐵𑑅𑐫𑐵 𑐥𑑂𑐬𑐢𑐵𑐣𑐥𑐘𑑂𑐔 𑐏𑑅𑐳𑐵 𑐥𑑂𑐬𑐖𑐵𑐟𑐣𑑂𑐟𑑂𑐬 𑐰𑐫𑐾𑐢𑐸𑑄𑐎𑐵𑑅 𑐄𑐐𑐸 𑐮𑐵𑐫𑐎𑐸 𑐐𑐵𑐰𑐶𑐳𑐫𑐵 𑐐𑐵𑐰𑐶𑐳 𑐣𑐵𑐫𑑅 𑐣𑑄 𑐖𑐸𑐫𑐵𑐡𑐷𑐪 𑐰𑑂𑐫𑐎𑑂𑐟𑐶𑐟𑑂𑐰 𑐏𑑅 𑑋

𑐄𑐐𑐸 𑐬𑐸𑐡𑑂𑐬𑐧𑐴𑐵𑐡𑐸𑐬 𑐳𑑂𑐩𑐺𑐟𑐶 𑐥𑐸𑐬𑐳𑑂𑐎𑐵𑐬 𑐮𑑅𑐯𑐵𑐫𑐾𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐫𑐾𑑃 𑑑𑑐 𑐣𑐩𑑂𑐧𑐬 𑐎𑑂𑐲𑐾𑐟𑑂𑐬𑐫𑐵 𑐣𑐾𑐥𑐵𑐮𑐷 𑐎𑐵𑑄𑐐𑑂𑐬𑐾𑐳𑐫𑐵 𑐳𑐵𑑄𑐳𑐡 𑐬𑐵𑐖𑐣𑐎𑐸𑐩𑐵𑐬 𑐎𑐾𑐳𑐷𑐮𑐶𑐳𑐾𑑄 𑐣𑐾𑐎𑐥𑐵𑐫𑐵 𑐱𑐩𑑂𑐨𑐸𑐬𑐵𑐩 𑐩𑐴𑐬𑑂‍𑐖𑐣 𑐩𑐵𑐣𑑂𑐕𑐾, 𑐣𑐾𑐥𑐵𑐮𑐷 𑐎𑐵𑑄𑐐𑑂𑐬𑐾𑐳𑐫𑐵 𑐬𑐵𑐖𑐎𑐸𑐩𑐵𑐬 𑐣𑐎𑑅𑐩𑐶, 𑐬𑐵𑐩𑐩𑐵𑐣 𑐳𑐶𑑄𑐴𑐮𑐶𑐳𑐾𑑄 𑐠𑐷𑐠𑐷 𑐰𑑂𑐫𑐎𑑂𑐟𑐶𑐟𑑂𑐰𑐥𑐶𑐣𑐶𑐐𑐸 𑐄𑐥𑐳𑑂𑐠𑐶𑐟𑐶 𑐡𑐹𑐐𑐸 𑐏𑑅 𑑋