#𑐣𑐰𑐷𑐣 𑐔𑐶𑐟𑑂𑐬𑐎𑐵𑐬

𑐠𑐸𑐐𑐸𑐳𑐷𑐫𑐵 𑐖𑐶𑐐𑐸 𑐀𑐩𑐾𑐬𑐶𑐎𑐵 𑐨𑑂𑐬𑐩𑐞 𑐣𑐶𑐐𑐹 𑐎𑐵𑐬𑐞𑑄 𑐀𑐰𑐳𑑂𑐩𑐬𑐞𑐷𑐫 𑐖𑐸𑐮 𑑋 𑐕𑐐𑐹 𑐮𑐵 𑐀𑐩𑐾𑐬𑐶𑐎𑐵𑐫𑑂 𑐧𑐶𑐔𑐵𑑅 𑐴𑐾 𑐩𑐫𑐵𑐣𑐵 𑐎𑐠𑑄 𑐁𑐎𑐵𑐗𑐵𑐎𑐵𑑄 𑐧𑑂𑐬𑐾𑐩 𑐴𑑂𑐫𑐵𑐩𑐬𑐾𑐖 𑐖𑐸𑐫𑐵𑑅 𑐖𑐶 𑐄𑐳𑐵𑑃𑐫𑑂 𑐩𑑄𑐟 𑑋 𑐁𑑅 𑐣𑐾𑐥𑐵𑑅 𑐮𑐶𑐴𑐵𑑄 𑐰𑐫𑐵𑑅 𑐄𑐎𑐶𑐫𑐵 𑐄𑐥𑐔𑐵𑐬 𑐫𑐵𑐣𑐵𑐔𑑂𑐰𑐣𑐵𑐐𑐸 𑐡𑐸 𑑋 𑐣𑐵𑐥𑐣𑐵𑐥𑑄 𑐕𑐾𑑃𑐫𑑂 𑐴𑐾 𑐔𑑂𑐰𑐣𑐵𑑅 𑐣𑑄 𑐳𑐵𑐴𑐶𑐟𑑂𑐫𑐶𑐎 𑐖𑑂𑐫𑐵 𑐫𑐵𑐣𑐵𑑄 𑐟𑐸𑑄 𑐔𑑂𑐰𑐣𑐵𑐐𑐸 𑐡𑐸 𑑋 𑐩𑐾𑐐𑐸 𑐏𑑃, 𑐠𑐸𑐐𑐸𑐳𑐷 𑐀𑐩𑐾𑐬𑐶𑐎𑐵𑐫𑑂 𑐖𑐶𑑄 𑐁𑐥𑐵𑐮𑑄 𑐀𑐩𑐾𑐬𑐶𑐎𑐷 𑐳𑐵𑐴𑐶𑐟𑑂𑐫𑐎𑐵𑐬𑐥𑐶𑑄 𑐣𑐵𑐥𑐮𑐵𑐣𑐵𑑅 𑐄𑐥𑐶𑑄𑐮𑐶𑐳𑐾 𑐀𑐣𑑂𑐟𑐎𑑂𑐬𑑂𑐬𑐶𑐫𑐵 𑐫𑐵𑐫𑐾 𑐏𑐣 𑑋

𑐀𑐩𑐾𑐬𑐶𑐎𑐷 𑐳𑐵𑐴𑐶𑐟𑑂𑐫 𑐖𑐎 𑐩𑐏𑐸 𑐀𑐣 𑐔𑑂𑐰𑑄𑐥𑐶𑑄 𑐳𑐵𑐴𑐶𑐟𑑂𑐫𑐎𑐵𑐬𑐟𑐮𑐶𑐳𑐾 𑐥𑑂𑐬𑐟𑑂𑐫𑐎𑑂𑐲 𑐳𑐵𑐎𑑂𑐲𑐵𑐟𑑂𑐎𑐵𑐬 𑐟𑐎𑑄 𑐫𑐵𑐫𑐾 𑐏𑐣 𑑋 𑐱𑐬𑐷𑐬𑑄 𑐳𑐵𑐠 𑐧𑐶𑐄𑐐𑐸 𑐖𑐹𑐳𑐵 𑐠𑑂𑐰 𑐳𑐵𑐴𑐶𑐟𑑂𑐫𑐶𑐎 𑐫𑐵𑐟𑑂𑐬𑐵 𑐀𑐗 𑐣𑑂𑐴𑑂𑐫𑐵𑑅 𑐰𑐣𑐷𑐐𑐸 𑐏𑐂 𑑋 𑐀𑐠𑐾 𑐣𑑄 𑐐𑐸𑐮𑐶 𑐳𑐵𑐴𑐶𑐟𑑂𑐫𑐎𑐵𑐬𑐥𑐶𑑄 𑐣𑐵𑐥𑐮𑐵𑐫𑐾 𑐏𑐣, 𑐰 𑐢𑐵𑑅𑐳𑐵 𑐀𑐰𑐳𑑂𑐩𑐬𑐞𑐷𑐫 𑐴𑐾 𑐖𑐹𑐐𑐸 𑐡𑐸 𑑋

𑐀𑐣 𑐖𑐶𑑄 𑐥𑑂𑐬𑐟𑑂𑐫𑐎𑑂𑐲 𑐣𑐵𑐥𑐮𑐵𑐣𑐵𑑅 𑐀𑐣𑑂𑐟𑐬𑐳𑑄𑐰𑐵𑐡 𑐫𑐵𑐫𑐾 𑐏𑑄𑐥𑐶𑑄 𑐳𑐵𑐴𑐶𑐟𑑂𑐫𑐎𑐵𑐬𑐥𑐶𑑄 𑐰𑐶𑐱𑐾𑐲 𑐫𑐵𑐣𑐵𑑅 𑐮𑐶𑐣𑐾𑐚 𑐬𑐾𑐣𑐷–𑐐𑑂𑐬𑐵𑐞𑑂𑐜𑐰𑐾𑐮 (Lynette Reini-Grandell), 𑐎𑑂𑐫𑐵𑐠𑐬𑐶𑐣 𑐎𑐾𑐳𑐬 (Kathryn Kysar), 𑐴𑐰𑐵𑐣𑐵 𑐳𑐸𑐮𑐶𑐨𑐵𑐣 𑐖𑐵𑐣𑑂𑐖𑐾𑐖 (Hawona Sullivan Janzen), 𑐁𑐬𑑀𑐣 𑐎𑐾𑐬 (Aaron Kerr), 𑐳𑑂𑐚𑐾𑐣𑐮𑐷 𑐎𑐸𑐳𑐸𑐣𑑀𑐎𑐷 (Stanley Kusunoki), 𑐥𑐾𑐂𑐖 𑐬𑐾𑐴𑐮 (Paige Riehl), 𑐖𑐵𑐳𑑂𑐩𑐶𑐣 𑐬𑐾 𑐖𑐶𑐐𑐖𑐬 Jasmin Rae Ziegler, 𑐬𑐵𑐔𑐾𑐮 𑐩𑑂𑐫𑐵𑐎𑐜𑑀𑐣𑐵𑐮𑑂𑐜 (Rachel MacDonald) 𑐖𑐶𑐩 𑐩𑑀𑐬 (Jim More) 𑐁𑐡𑐶 𑐏𑑅 𑑋

𑐠𑐸𑐥𑐶𑑄 𑐦𑐸𑐎𑑂𑐎 𑐖𑐶 𑐰𑐣𑐵𑐐𑐸 𑐩𑐶𑐣𑑀𑐳𑑀𑐚𑑂𑐚𑐵 𑐬𑐵𑐖𑑂𑐫𑐫𑑂 𑐔𑑂𑐰𑑄𑐥𑐶𑑄 𑐳𑐵𑐴𑐶𑐟𑑂𑐫𑐎𑐵𑐬𑐟 𑐏𑑅 𑑋 𑐀𑐩𑐾𑐬𑐶𑐎𑐵𑐫𑐵 𑐩𑐾𑐩𑐾𑐐𑐸 𑐬𑐵𑐖𑑂𑐫𑐫𑑂 𑐔𑑂𑐰𑑄𑐥𑐶𑑄 𑐳𑐵𑐴𑐶𑐟𑑂𑐫𑐎𑐵𑐬𑐟 𑐣𑐵𑐥𑐮𑐵𑐣𑐵𑐐𑐸 𑐩𑐡𑐸𑐣𑐶 𑑋 𑐀𑐠𑐾 𑐏𑑅𑐳𑐵𑑄 𑐀𑐩𑐾𑐬𑐶𑐎𑐵𑐫𑐵 𑐩𑐾𑐩𑐾𑐐𑐸 𑐬𑐵𑐖𑑂𑐫𑐫𑑂 𑐔𑑂𑐰𑑄𑐥𑐶𑑄 𑐳𑐵𑐴𑐶𑐟𑑂𑐫𑐎𑐵𑐬 𑐰 𑐄𑐩𑐶𑐳𑑄 𑐔𑑂𑐰𑐂𑐐𑐸 𑐳𑐵𑐴𑐶𑐟𑑂𑐫𑐫𑐵 𑐢𑐵𑐬 𑐕𑐐𑐹 𑐴𑐾 𑐖𑐸𑐂𑐩𑐵𑑅 𑐢𑐎𑐵𑑅 𑐀𑐣𑐸𑐩𑐵𑐣 𑐫𑐵𑐫𑐾𑐦𑐸 𑑋
𑐀𑐩𑐾𑐬𑐶𑐎𑐵𑐫𑑂 𑐣𑑄 𑐳𑐵𑐴𑐶𑐟𑑂𑐫𑐎𑐵𑐬𑐟 𑐦𑐸𑐎𑑂𑐎 𑐔𑑂𑐰 𑐖𑐎 𑐔𑑂𑐰𑐫𑐵𑑅 𑐩𑑂𑐰𑐵𑐣𑐵𑐔𑑂𑐰𑐣𑐷𑐥𑐶𑑄 𑐩𑐏𑐸 𑑋

𑐄𑐥𑐶𑑄 𑐣𑑄 𑐐𑐸𑐮𑐶𑑄 𑐱𑐶𑐎𑑂𑐲𑐞 𑐳𑑄𑐳𑑂𑐠𑐵𑐫𑑂 𑐁𑐏𑑅 𑐧𑑂𑐰𑑄𑐎𑐷𑐥𑐶𑑄, 𑐐𑐸𑐮𑐶𑑄 𑐩𑐾𑐩𑐾𑐐𑐸 𑐴𑐾 𑐖𑑂𑐫𑐵 𑐫𑐵𑐂𑐥𑐶𑑄 𑐡𑐸 𑑋 𑐖𑐶𑑄 𑐣𑐵𑐥𑐮𑐵𑐣𑐵𑐥𑐶𑑄 𑐩𑐢𑑂𑐫𑐾 𑐎𑑂𑐫𑐵𑐠𑐬𑐶𑐣𑐫𑐵 𑐣𑐶𑐐𑐹 𑐳𑐦𑐹 𑐥𑐶𑐴𑐵𑑄 𑐰𑐫𑐾𑐢𑐸𑑄𑐎𑐮 𑑋 𑐰𑐫𑑂𑐎𑑅 𑐩𑐹𑐮𑐟𑑅 𑐳𑐵𑐴𑐶𑐟𑑂𑐫 𑐖𑐎 𑐔𑑂𑐰𑐂𑐩𑑂𑐴 𑐏𑑅 𑑋 𑐐𑐧𑐮𑐾𑑄 𑐐𑐧𑐮𑐾𑑄 𑐳𑐩𑐷𑐎𑑂𑐲𑐵 𑐣𑑄 𑐫𑐵𑐣𑐵𑐡𑐷 𑑋 𑐀𑐣𑑀𑐎𑐵 𑐬𑐵𑐩𑐳𑐾 𑐎𑐩𑑂𑐫𑐸𑐣𑐶𑐚𑐷 𑐎𑐮𑐾𑐖𑐫𑑂 𑐰𑐫𑑂𑐎𑐮𑑄 𑐳𑐵𑐴𑐶𑐟𑑂𑐫 𑐧𑑂𑐰𑑄𑐎𑐾𑐐𑐸 𑐫𑐵𑐣𑐵𑐡𑐷 𑑋 𑐎𑑂𑐫𑐵𑐠𑐬𑐶𑐣𑐫𑐵 𑐣𑐶𑐐𑐹 𑐳𑐦𑐹 𑐀𑐩𑐾𑐬𑐶𑐎𑐵𑐫𑑂 𑐟𑐳𑐎𑑄 𑐮𑑀𑐎𑑄𑐴𑑂𑐰𑐵𑑅𑐐𑐸 𑐖𑐸𑐫𑐵𑐔𑑂𑐰𑐣 𑑋

𑐀𑐠𑐾𑐴𑐾 𑐳𑑂𑐚𑐾𑐣𑐮𑐾 𑐎𑐸𑐳𑐸𑐣𑑀𑐎𑐷 𑐣𑑄 𑐳𑑂𑐎𑐹𑐮𑐫𑑂 𑐴𑐾 𑐧𑑂𑐰𑑄𑐎𑐷𑐩𑑂𑐴 𑐏𑑅 𑑋 𑐰𑐫𑑂𑐎𑑅𑐫𑐵 𑐣𑑄 𑐣𑐶𑐐𑐹 𑐳𑐦𑐹 𑐥𑐶𑐴𑐵𑑄 𑐰𑐫𑐾𑐢𑐸𑑄𑐎𑐹𑐐𑐸 𑐡𑐸 𑑋 𑐰𑐫𑑂𑐎𑑅 𑐣𑑄 𑐀𑐣 𑐟𑐳𑐎𑑄 𑐮𑑀𑐎𑑄𑐴𑑂𑐰𑐵𑑅𑐐𑐸 𑐳𑐵𑐴𑐶𑐟𑑂𑐫𑐎𑐵𑐬 𑐏𑑅 𑑋 𑐠𑑂𑐰 𑐳𑐵𑐴𑐶𑐟𑑂𑐫𑐎𑐵𑐬𑐟 𑐣𑑄 𑐰𑐵𑐳𑑂𑐟𑐰𑐫𑑂 𑐴𑑀𑐮𑐚𑐵𑐂𑐩𑐬 𑐩𑐏𑐸 𑑋 𑐟𑐬 𑐠𑑅𑐎𑐾 𑐡𑐸𑐐𑐸 𑐃 𑐳𑐵𑐴𑐶𑐟𑑂𑐫 𑐳𑐶𑐬𑑂𑐖𑐣𑐵 𑐫𑐵𑐣𑐵𑑅 𑐴𑐾 𑐦𑐸𑐎𑐵𑐔𑑂𑐰𑐣𑐷 𑑋 𑐴𑐬𑐾𑐎 𑐱𑐸𑐎𑑂𑐬𑐰𑐵𑑅 𑐰 𑐱𑐣𑐶𑐰𑐵𑑅 𑐠𑑅𑐠𑑅 𑐩𑐸𑐣𑐵𑑅 𑐕𑐸𑑄 𑐎𑐶 𑐕𑐸𑑄 𑐖𑑂𑐫𑐵𑐗𑑂𑐰𑑅 𑐫𑐵𑐣𑐵𑐔𑑂𑐰𑐣𑐷 𑑋

𑐐𑐧𑐮𑐾𑑄 𑐎𑐰𑐶𑐟𑐵 𑐥𑐵𑐛 𑐫𑐵𑐂𑐳𑐵 𑐐𑐧𑐮𑐾𑑄 𑐳𑐩𑐷𑐎𑑂𑐲𑐵 𑐣𑑄 𑐫𑐵𑐣𑐵𑐔𑑂𑐰𑐣𑐷 𑑋 𑐄𑐩𑐶 𑐣𑑄 𑐠𑑅𑐠𑑅𑐐𑐸 𑐴𑐾 𑐳𑐵𑐴𑐶𑐟𑑂𑐫 𑐥𑐸𑐔𑑅𑐟 𑐡𑐸 𑑋 𑐄𑐎𑐷 𑐡𑐸𑐖𑑅𑐟 𑐮𑐵 𑐡𑐂 𑐩𑐏𑐸 𑐟𑐬 𑐀𑐖𑑂𑐫𑐵𑑅𑐐𑐸 𑐳𑐵𑐴𑐶𑐟𑑂𑐫𑐶𑐎 𑐥𑐸𑐔𑑅𑐟 𑐢𑐵𑑅𑐳𑐵 𑐫𑐎𑑂𑐰 𑐡𑐸 𑑋 𑐀𑐖𑑂𑐫𑐵𑑅𑐐𑐸 𑐳𑐵𑐴𑐶𑐟𑑂𑐫𑐶𑐎 𑐳𑑄𑐳𑑂𑐠𑐵𑐟 𑐏𑐵𑐳 𑐟𑑅𑐢𑑄 𑐖𑐸𑐂 𑑋 𑐠𑑅𑐠𑑅 𑐩𑐶𑐮𑐾 𑐖𑐸𑐫𑐵𑑅 𑐳𑐵𑐴𑐶𑐟𑑂𑐫𑐶𑐎 𑐖𑑂𑐫𑐵𑐗𑑂𑐰𑑅𑐟 𑐣𑑂𑐴𑑂𑐫𑐵𑐎𑐵𑐔𑑂𑐰𑑄𑐐𑐸 𑐡𑐂 𑑋 𑐣𑐶𑐫𑐩𑐶𑐟 𑐳𑐵𑐴𑐶𑐟𑑂𑐫𑐶𑐎 𑐖𑑂𑐫𑐵𑐗𑑂𑐰𑑅 𑐢𑐵𑑅𑐳𑐵 𑐫𑐵𑐣𑐵 𑐴𑐾 𑐔𑑂𑐰𑐣𑐷 𑑋

𑐀𑐣 𑐳𑐦𑐹 𑐰𑐶𑐩𑑀𑐔𑐣 𑐫𑐵𑐂𑐐𑐸 𑐳𑐩𑐵𑐬𑑀𑐴 𑐣𑑄 𑐗𑐷𑐐𑐸 𑐮𑐵𑐐𑐶𑑄 𑐀𑐖𑐹𑐔𑐵𑐫𑐵𑐥𑐸 𑑋 𑐳𑐦𑐹 𑐰𑐶𑐩𑑀𑐔𑐣 𑐖𑐸𑐂𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐀𑐠𑐾 𑐴𑐾 𑑓𑑐÷𑑓𑑕 𑐩𑑂𑐴 𑐟𑐶 𑐳𑐵𑐴𑐶𑐟𑑂𑐫𑐥𑑂𑐬𑐾𑐩𑐶𑐟 𑐩𑐸𑐣𑐷 𑑋 𑐖𑑂𑐫𑐵𑐗𑑂𑐰𑑅 𑐟𑑅𑐢𑑄𑐎 𑐫𑐵𑐂 𑐩𑐏𑐸 𑑋 𑐖𑑂𑐫𑐵𑐗𑑂𑐰𑑅𑐫𑐵 𑐮𑐵𑐐𑐶𑑄 𑐡𑐧𑐹 𑐡𑐂 𑐟𑐬 𑐡𑐧𑐸𑐮𑐷 𑐳𑐨𑐵𑐥𑐟𑐶, 𑐳𑑂𑐰𑐵𑐐𑐟 𑐨𑐵𑐲𑐞 𑐫𑐵𑐂𑐩𑑂𑐴, 𑐳𑐸𑐨𑐵𑐫𑑂 𑐧𑐷𑐩𑑂𑐴 𑐢𑐎𑐵𑑅 𑐩𑐣𑐹 𑐢𑐵𑑅𑐳𑐵 𑐡𑐂 𑐩𑐏𑐸 𑑋 𑐄𑐡𑑂𑐑𑑀𑐲 𑐖𑐸𑐂𑐰𑑄 𑐖𑑂𑐫𑐵𑐗𑑂𑐰𑑅 𑐱𑐸𑐬𑐸 𑐫𑐵𑐣𑐵𑐕𑑂𑐰𑐂 𑑋

𑐳𑐦𑐹 𑐢𑐵𑑅𑐳𑐵 𑐐𑐧𑐮𑐾𑑄 𑐔𑑂𑐰𑐩𑐶 𑐠𑐩𑑂𑐴𑑄 𑐴𑐾 𑐫𑐵𑐂 𑐰𑐵 𑐀𑐣 𑐡𑐸𑐥𑐶𑑄 𑐩𑐢𑑂𑐫𑐾 𑐡𑐎𑐮𑐾 𑐠𑐵𑐎𑐸𑐮𑐶𑐩𑑂𑐴𑐾𑐳𑑂𑐫𑐵𑑄 𑐰𑐶𑐩𑑀𑐔𑐣 𑐫𑐵𑐣𑐵𑐔𑑂𑐰𑐣𑐷 𑑋 𑐀𑐖𑑂𑐫𑐵𑑅𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐣𑑄 𑐡𑐧𑐸𑐮𑐷 𑐳𑐸𑐫𑐵𑐟𑑄 𑐟𑐂 𑐩𑐏𑐸 𑑋 𑐖𑑂𑐫𑐵𑐗𑑂𑐰𑐮𑐫𑑂 𑐠𑑂𑐫𑑄𑐥𑐶𑑄 𑐦𑐸𑐎𑑂𑐎 𑐀𑐜𑐶𑐫𑐣𑑂𑐳 𑐴𑐾 𑐖𑐸𑐂 𑑋 𑐳𑐵𑐴𑐶𑐟𑑂𑐫 𑐔𑑂𑐰𑐂𑐥𑐶𑑄 𑐢𑐵𑑅𑐳𑐵 𑐠𑑅𑐐𑐸 𑐰𑐶𑐲𑐫𑐫𑑂 𑐀𑐥𑑂𑐰𑑅 𑐡𑐏𑑂𑐏𑐮 𑐡𑐸𑐥𑐶𑑄 𑐴𑐾 𑐖𑐸𑐫𑐵𑐔𑑂𑐰𑐣𑐷 𑑋 𑐄𑐥𑐶𑑄 𑐀𑐥𑑂𑐰𑑅 𑐫𑐵𑐣𑐵𑑅 𑐳𑐵𑐴𑐶𑐟𑑂𑐫 𑐴𑐾 𑐧𑑂𑐰𑐣𑐷𑐥𑐶𑑄 𑐖𑐸𑐂 𑑋

𑐔𑑂𑐰𑐫𑐾𑐐𑐸 𑐧𑐵𑐴𑐾𑐎 𑐩𑐾𑐐𑐸 𑐕𑐸𑑄 𑐖𑑂𑐫𑐵 𑐫𑐵𑐂𑐥𑐶𑑄 𑐏𑑅𑐳𑐵 𑐄𑐩𑐶𑐐𑐸 𑐖𑑂𑐫𑐵 𑐣𑑄 𑐳𑐵𑐴𑐶𑐟𑑂𑐫𑐮𑐶𑐳𑐾 𑐴𑐾 𑐳𑐬𑑀𑐎𑐵𑐬 𑐡𑐸𑐐𑐸 𑐰𑐶𑐲𑐫 𑐖𑐸𑐫𑐵𑐔𑑂𑐰𑐣𑐷 𑑋 𑐖𑑂𑐫𑐵 𑐣𑑄 𑐳𑐵𑐴𑐶𑐟𑑂𑐫𑐮𑐶𑐳𑐾 𑐴𑐾 𑐖𑐸𑐂𑐧𑐮𑐫𑑂 𑐄𑐥𑐶𑑄 𑐀𑐗 𑐏𑐵𑐬𑐾 𑐖𑐹𑐥𑐶𑑄 𑐮𑐵𑐣𑐵𑐔𑑂𑐰𑐣 𑑋 𑐄𑐩𑐶 𑐳𑐦𑐹 𑐰𑐶𑐩𑑀𑐔𑐣𑐫𑐵 𑐖𑑂𑐫𑐵 𑐫𑐵𑐂𑐧𑐮𑐫𑑂 𑐟𑐳𑐎𑑄 𑐳𑐵𑐢𑐵𑐬𑐞 𑐖𑑂𑐫𑐵𑐗𑑂𑐰𑑅 𑐖𑐸𑐂 𑑋 𑐖𑑂𑐫𑐵𑐗𑑂𑐰𑑅𑐫𑐵 𑐧𑑂𑐰𑐣𑐵𑐥𑑁 𑐃𑐩𑐾𑐮𑐥𑐵𑐏𑐾𑑄 𑐕𑑂𑐰𑐫𑐵 𑐴𑐂 𑑋 𑐀𑐥𑑂𑐰𑑅 𑐁𑐬𑑂𑐚 𑐐𑑂𑐫𑐵𑐮𑐬𑐷𑐂 𑐳𑐦𑐹 𑐰𑐶𑐩𑑀𑐔𑐣𑐫𑐵 𑐖𑑂𑐫𑐵𑐗𑑂𑐰𑑅 𑐖𑐸𑐂 𑑋

𑐰𑐶𑐩𑑀𑐔𑐣 𑐖𑑂𑐫𑐵𑐗𑑂𑐰𑐮𑐫𑑂 𑐰𑐵𑐂𑐣𑐫𑐵 𑐰𑑂𑐫𑐰𑐳𑑂𑐠𑐵 𑐫𑐵𑐣𑐵 𑐟𑐂 𑑋 𑐧𑐶𑐳𑑂𑐎𑐸𑐚 𑐣𑐎𑐷 𑑋 𑐰𑐶𑐩𑑀𑐔𑐶𑐟 𑐎𑐶𑐟𑐵𑐧𑐫𑐵 𑐡𑐵𑑄 𑐕𑐸𑐚 𑐖𑐸𑐂 𑑋 𑐳𑐦𑐹 𑐰𑐶𑐩𑑀𑐔𑐣 𑐀𑐥𑑂𑐰𑑅 𑐫𑐵𑐣𑐵𑑅 𑐖𑑂𑐫𑐵𑐗𑑂𑐰𑐮𑐫𑑂 𑐠𑑂𑐫𑐣𑐷𑐩𑑂𑐴 𑐡𑐎𑐮𑐫𑑂 𑐖𑑂𑐫𑐵𑐠𑐩𑑂𑐴 𑐳𑐵𑐴𑐶𑐟𑑂𑐫𑐎𑐵𑐬𑐫𑐵 𑐮𑑂𑐴𑐵𑐟𑐶𑑄 𑐫𑐵𑐎𑐷𑐐𑐸 𑐔𑐮𑐣 𑐡𑐸 𑑋 𑐐𑐣𑑄 𑐐𑐣𑑄 𑐔𑐵𑐴𑐶𑑃 𑐳𑐦𑐹𑐫𑐵 𑐔𑑂𑐰𑐩𑐶 𑐠𑐩𑑂𑐴𑑄 𑐴𑐾 𑐠𑑅𑐐𑐸 𑐳𑐦𑐹 𑐰𑐶𑐩𑑀𑐔𑐣 𑐣𑑄 𑐫𑐵𑑅 𑑋
𑐳𑐵𑐴𑐶𑐟𑑂𑐫𑐎𑐵𑐬𑐟𑐫𑑂 𑐡𑐠𑐸𑐂 𑐳𑐵𑐴𑐶𑐟𑑂𑐫𑐶𑐎 𑐖𑑂𑐫𑐵𑐗𑑂𑐰𑑅𑐟 𑐣𑐶𑐫𑐩𑐶𑐟 𑐴𑐾 𑐖𑐹 𑑋

𑐏𑐵𑐳 𑐫𑐵𑐣𑐵𑑅 𑐱𑐣𑐶𑐰𑐵𑑅 𑐁𑐂𑐟𑐰𑐵𑑅 𑐖𑐸𑐮 𑐎𑐶 𑐖𑑂𑐫𑐵𑐗𑑂𑐰𑑅 𑐫𑐵𑐂 𑑋 𑐬𑐔𑐣𑐵 𑐰𑐵𑐔𑐣 𑐫𑐵𑐂𑐧𑐮𑐫𑑂 𑐡𑐧𑐸𑐮𑐷 𑐫𑐵𑐎𑑅𑐔𑐵 𑐴𑐾 𑐖𑐎 𑐠𑐣𑐾𑐐𑐸 𑐔𑐮𑐣 𑑋 𑐎𑐰𑐶𑐟𑐵 𑐔𑐵𑐴𑐶𑑃 𑐀𑐥𑑂𑐰𑑅𑐳𑐶𑐎𑐾 𑐎𑐞𑑂𑐛 𑐴𑐾 𑐰𑑅 𑑋 𑐄𑐩𑐶𑐳𑑄 𑐨𑑂𑐰𑑄 𑐰𑐵 𑐳𑐦𑐹 𑐩𑐳𑑂𑐰𑐳𑐾 𑐴𑐾 𑐰𑐵𑐔𑐣 𑐫𑐵𑐂 𑑋 𑐳𑐵𑐴𑐶𑐟𑑂𑐫 𑐳𑐩𑑂𑐧𑐣𑑂𑐢𑐷 𑐖𑑂𑐫𑐵 𑐫𑐵𑐂𑐐𑐸 𑐳𑐵𑐴𑐶𑐟𑑂𑐫𑐶𑐎 𑐳𑑄𑐑 𑐳𑑄𑐳𑑂𑐠𑐵𑐟 𑐣𑑄 𑐫𑐎𑑂𑐰 𑐡𑐸 𑑋 𑐦𑐸𑐎𑑂𑐎 𑐢𑐂𑐠𑐾𑑄 𑐳𑐵𑐴𑐶𑐟𑑂𑐫𑐎𑐵𑐬𑐟 𑐕𑐐𑐹 𑐣 𑐕𑐐𑐹 𑐳𑑄𑐳𑑂𑐠𑐵𑐫𑐵 𑐡𑐸𑐖𑑅 𑐖𑐸𑐫𑐵 𑐴𑐾 𑐔𑑂𑐰𑐣𑐷 𑑋

𑐀𑐫𑑂𑐣𑑄 𑐐𑐸𑐮𑐶𑑄 𑐮𑐵 𑐳𑐦𑐹 𑐥𑐳𑐮𑑂𑐫𑐵𑐟𑐫𑑂𑐳𑑄 𑐴𑐾 𑐎𑐰𑐶𑐟𑐵 𑐰𑐵𑐔𑐣 𑐖𑑂𑐫𑐵𑐗𑑂𑐰𑑅 𑐣𑑄 𑐫𑐵𑐣𑐵 𑐧𑐷 𑑋 𑐥𑐳𑐮𑐫𑑂 𑐳𑐵𑐴𑐶𑐟𑑂𑐫𑐎𑐵𑐬𑐟 𑐩𑐸𑑄𑐎𑐵𑑅 𑐎𑐰𑐶𑐟𑐵 𑐰𑐵𑐔𑐣 𑐫𑐵𑐣𑐵𑐔𑑂𑐰𑐣𑐷 𑑋 𑐎𑐰𑐶𑐟𑐵 𑐰𑐵𑐔𑐣𑐫𑐵 𑐩𑐾𑐐𑐸 𑐰𑐶𑐱𑐾𑐲𑐟𑐵 𑐢𑐂𑐐𑐸 𑐄𑐎𑐷 𑐳𑑄𑐐𑐷𑐟 𑐟𑐫𑐾𑐐𑐸 𑐔𑐮𑐣 𑐏𑑅 𑐐𑐸𑐐𑐸 𑐗𑐷𑐠𑐵𑐫𑑂 𑐩𑐖𑐹 𑑋 𑐎𑐰𑐶𑐟𑐵 𑐰𑐵𑐔𑐣 𑐱𑐸𑐬𑐸 𑐖𑐸𑐮 𑐎𑐶 𑐄𑐎𑐶𑐫𑐵𑐟 𑐮𑑂𑐰𑑅𑐐𑐸 𑐥𑐵𑐱𑑂𑐬𑑂𑐰 𑐳𑑄𑐐𑐷𑐟 𑐟𑐫𑐾𑐢𑐸𑑄𑐎𑐷 𑑋 𑐠𑑂𑐰 𑐳𑑄𑐐𑐷𑐟 𑐟𑐫𑐾𑐟 𑐄𑐮𑐶 𑐃 𑐣𑑄 𑐎𑐵𑐂𑐐𑐸 𑐩𑐏𑐸 𑑋

𑐖𑑂𑐫𑐵𑐗𑑂𑐰𑑅 𑐖𑐸𑐫𑐵𑐔𑑂𑐰𑑄𑐐𑐸 𑐠𑐵𑐳𑐫𑑂 𑐴𑐾 𑐳𑑄𑐐𑐷𑐟 𑐟𑐂𑐥𑐶𑑄𑐳𑑄 𑐔𑑂𑐰𑐩𑐶𑐫𑐵 𑐎𑐰𑐶𑐟𑐵 𑐕𑐎𑑂𑐰𑑅 𑐎𑐫𑐵𑑅 𑐳𑑂𑐰𑐂 𑑋 𑐣𑐶𑐩𑑂𑐴𑐾𑐳𑐶𑐫𑐵 𑐡𑐠𑐸𑐂 𑐕𑐗𑐵𑑅 𑐳𑐮𑑂𑐮𑐵𑐴 𑐫𑐵𑐂 𑑋 𑐰𑐫𑐵𑑄 𑐮𑐶𑐥𑐵 𑐎𑐰𑐶𑐟𑐵 𑐥𑐵𑐛 𑐖𑐸𑐂𑐰𑑄 𑐳𑑄𑐐𑐷𑐟 𑐠𑐵𑐣𑐵 𑐴𑐂 𑑋 𑐐𑐸𑐮𑐶𑑄 𑐮𑐵 𑐎𑐰𑐶𑐟𑐵 𑐔𑑂𑐰𑐂𑐩𑑂𑐴 𑐎𑐰𑐶 𑐴𑐾 𑐳𑑄𑐐𑐷𑐟𑐎𑐵𑐬 𑐣𑑄 𑐖𑐸𑐫𑐵𑐔𑑂𑐰𑐣𑐷 𑐐𑐠𑐾 𑐎𑐶 𑐎𑐰𑐶 𑐖𑐷𑐩 𑐩𑑀𑐬 𑑋 𑐰𑐫𑑂𑐎𑑅 𑐕𑐩𑑂𑐴 𑐳𑑄𑐐𑐷𑐟𑐎𑐵𑐬 𑐣𑑄 𑐖𑐸𑐫𑐵𑐔𑑂𑐰𑐣 𑑋 𑐰𑐫𑑂𑐎𑑅𑐫𑐵𑐟 𑐀𑐩𑐾𑐬𑐶𑐎𑐷 𑐳𑐬𑐎𑐵𑐬𑑄 𑐨𑐶𑐫𑐟𑐣𑐵𑐩 𑐰𑐵𑐬𑐫𑑂 𑐴𑐸𑑃 𑐢𑐵𑑅𑐐𑐸 𑐖𑐸𑐫𑐵𑐔𑑂𑐰𑐣, 𑐰𑐫𑑂𑐎𑑅 𑐩𑐰𑑄𑐐𑐸 𑐮𑐵𑐣𑐵𑐔𑑂𑐰𑐣 𑑋

𑐄𑐩𑐶𑐳𑑄 𑐔𑑂𑐰𑐂𑐐𑐸 𑐎𑐰𑐶𑐟𑐵𑐫𑐵 𑐰𑐶𑐲𑐫𑐰𑐳𑑂𑐟𑐸 𑐢𑐵𑑅𑐳𑐵 𑐀𑐥𑑂𑐰𑑅 𑐬𑐵𑐖𑐣𑐷𑐟𑐶 𑐴𑐾 𑐏𑑅 𑑋 𑐠𑑂𑐰 𑐧𑐵𑐴𑐾𑐎 𑐳𑐵𑐩𑐵𑐖𑐶𑐎 𑐥𑐬𑐶𑐰𑐾𑐱, 𑐖𑐣𑐔𑐾𑐟𑐣𑐵 𑐧𑑂𑐰𑐮𑑄𑐎𑐾𑐐𑐸 𑐎𑐠𑑄𑐫𑐵 𑐣𑑄 𑐎𑐰𑐶𑐟𑐵 𑐔𑑂𑐰𑑅 𑑋 𑐰𑐶𑐩𑑂𑐧, 𑐥𑑂𑐬𑐟𑐷𑐎 𑐁𑐡𑐶 𑐠𑐾𑑄𑐖𑑂𑐫𑐵𑑅𑐐𑐸 𑐳𑐿𑐡𑑂𑐢𑐵𑐣𑑂𑐟𑐶𑐎 𑐥𑐎𑑂𑐲𑐫𑐵𑐟 𑐣𑑄 𑐟𑐳𑐎𑑄 𑐢𑑂𑐫𑐵𑐣 𑐧𑐶𑐄 𑑋 𑐎𑐰𑐶𑐟𑐵 𑐮𑐵 𑐀𑐥𑑂𑐰𑑅 𑐐𑐡𑑂𑐫 𑐴𑐾 𑐏𑑅 𑑋 𑐥𑐡𑑂𑐫𑑄 𑐧𑑂𑐰𑑄𑐥𑐶𑑄 𑐰𑐵 𑐔𑑂𑐰𑑅𑐥𑐶𑑄 𑐳𑐸𑑄 𑐩𑐏𑐣𑐵 𑑋 𑐕𑐐𑐹 𑐂𑐮𑐫𑑂 𑐮𑑂𑐫𑐵𑐫𑑂𑐩 𑐎𑐰𑐶𑐟𑐵𑐫𑐵 𑐣𑑄 𑐮𑐴𑐬 𑐰𑑅𑐐𑐸 𑐏𑑅 𑑋

𑐠𑑁𑑄𑐎𑐣𑑂𑐴𑐫𑑂 𑐠𑐸𑐎𑐶𑐫𑐵 𑐔𑐮𑐣 𑐄𑐮𑐶 𑐩𑐡𑐫𑐵 𑐰𑐣 𑑋 𑐀𑐩𑐾𑐬𑐶𑐎𑐵𑐫𑐵 𑐳𑐵𑐴𑐶𑐟𑑂𑐫 𑐧𑐵𑐬𑐾 𑐳𑑄𑐳𑐵𑐬𑑄 𑐳𑐷𑐎𑐾𑐐𑐸 𑐫𑐵𑑅𑐳𑐵𑑄 𑐀𑐩𑐾𑐬𑐶𑐎𑐷 𑐳𑐵𑐴𑐶𑐟𑑂𑐫𑐎𑐵𑐬𑐟𑐫𑑂𑐳𑑄 𑐢𑐵𑑅𑐳𑐵 𑐰𑐶𑐡𑐾𑐱𑐷 𑐳𑐵𑐴𑐶𑐟𑑂𑐫 𑐧𑐵𑐬𑐾 𑐄𑐮𑐶 𑐔𑐶𑐄𑐟𑐵𑑅 𑐩𑐟𑑅 𑑋 𑐣𑐾𑐥𑐵𑑅𑐫𑐵 𑐳𑐵𑐴𑐶𑐟𑑂𑐫 𑐧𑐵𑐬𑐾 𑐳𑐷𑐐𑐸 𑐮𑐵 𑐗𑐣𑑂 𑐏𑑃 𑐴𑐾 𑐩𑑄𑐟 𑑋 𑐄𑐩𑐶𑐳𑑄 𑐣𑐾𑐥𑐵𑑅 𑐧𑐵𑐬𑐾 𑐨𑐔𑐵 𑐳𑐷𑐎𑐹𑐐𑐸 𑐢𑐂𑐐𑐸 𑐴𑐾 𑐨𑐸𑐏𑐵𑐫𑑂 𑐧𑑂𑐰𑑅𑐧𑐮𑐫𑑂 𑐏𑑅 𑑋 𑐀𑐖𑑂𑐫𑐵𑑅𑐠𑐵𑐫𑑂 𑐖𑐶𑑄 𑐄𑐩𑐶𑐟 𑐀𑑄𑐐𑑂𑐬𑐾𑐖𑐷𑑄 𑐄𑐮𑑂𑐠𑐵 𑐖𑐸𑐫𑐵𑑅 𑐥𑐶𑐴𑐵𑑄 𑐰𑑅𑐐𑐸 𑐣𑐾𑐥𑐵𑐮𑐨𑐵𑐲𑐵𑐫𑐵 𑐎𑐰𑐶𑐟𑐵 𑐳𑐦𑐹 ‘𑐬𑐶𑐧𑐾𑐮𑐶𑐒 𑐩𑐬𑑂𑐣𑐶𑐒’ 𑐕𑐐𑐹 𑐕𑐐𑐹 𑐧𑐶𑐫𑐵 𑑋

𑐄𑐐𑐸 𑐳𑐦𑐹 𑐧𑑂𑐰𑐣𑐾𑐢𑐸𑑄𑐎𑐵𑑅 𑐄𑐩𑐶𑐳𑑄 𑐣𑐾𑐥𑐵𑐮𑐨𑐵𑐲𑐵𑐫𑐵 𑐎𑐰𑐶𑐟𑐵𑐫𑑂 𑐮𑐵 𑐫𑐎𑑂𑐰 𑐴𑐾 𑐰𑐶𑐡𑑂𑐬𑑀𑐴 𑐏𑐣𑐾𑐡𑐸 𑐢𑐎𑐵𑑅 𑐥𑑂𑐬𑐟𑐶𑐎𑑂𑐬𑐶𑐫𑐵 𑐧𑐶𑐮 𑑋 𑐖𑐶𑑄 𑐢𑐫𑐵, ‘𑐣𑐾𑐥𑐵𑐮𑐨𑐵𑐲𑐵 𑐰 𑐣𑐾𑐰𑐵𑑅 𑐖𑐵𑐟𑐶 𑐣𑐾𑐥𑐵𑑅𑐫𑐵 𑐕𑐐𑐹 𑐄𑐟𑑂𑐥𑐷𑐜𑐶𑐟 𑐖𑐵𑐟𑐶 𑐏𑑅, 𑐄𑐎𑐶𑑄 𑐄𑐩𑐶𑐐𑐸 𑐎𑐰𑐶𑐟𑐵𑐫𑑂 𑐰𑐶𑐡𑑂𑐬𑑀𑐴 𑐥𑐶𑐴𑐵𑑄 𑐰𑑅𑐐𑐸 𑐏𑑅 𑑋’𑐄𑐩𑐶𑐳𑑄 𑐣𑐾𑐥𑐵𑐮𑐷 𑐳𑐵𑐴𑐶𑐟𑑂𑐫 𑐧𑐵𑐬𑐾 𑐥𑐚𑐎𑑂𑐎 𑐴𑐾 𑐩𑐳𑐶𑐄𑐳𑐵𑑄 𑐨𑐵𑐬𑐟𑐷𑐫 𑐳𑐵𑐴𑐶𑐟𑑂𑐫 𑐧𑐵𑐬𑐾 𑐢𑐵𑑅𑐳𑐵 𑐕𑐸𑑄 𑐨𑐔𑐵 𑐳𑐶𑐄𑐐𑐸 𑐏𑐣𑐾𑐡𑐸 𑑋

𑐨𑐵𑐬𑐟𑐷𑐫 𑐳𑐵𑐴𑐶𑐟𑑂𑐫 𑐀𑑄𑐐𑑂𑐬𑐾𑐖𑐷𑑄 𑐣𑑄 𑐥𑐶𑐴𑐵𑑄 𑐰𑐂𑐐𑐸 𑐖𑐸𑐫𑐵𑑅 𑐳𑐶𑐄𑐐𑐸 𑐖𑐸𑐂𑐩𑐵𑑅 𑑋 𑐳𑐦𑐹 𑐥𑑂𑐬𑐎𑐵𑐱𑐣𑐫𑐵 𑐀𑐰𑐳𑑂𑐠𑐵 𑐢𑐵𑑅𑐳𑐵 𑐗𑐷𑐠𑐵𑐫𑑂 𑐠𑐾𑑄 𑐴𑐾 𑐏𑑅 𑑋 𑐳𑐦𑐹 𑐥𑐶𑐎𑐵𑐂 𑐟𑐬 𑐩𑐷 𑐠𑐵𑐎𑐸 𑑋 𑐄𑐎𑐶𑑄 𑐎𑐶𑐟𑐵𑐧 𑐥𑐶𑐴𑐵𑑄 𑐰𑐫𑐾𑐰𑑄 𑐀𑐥𑑂𑐰𑑅 𑐫𑐵𑐣𑐵𑑅 𑐳𑐶𑐟𑐶𑐎𑑄 𑐴𑐾 𑐧𑐷 𑑋 𑐡𑐎𑐮𑐫𑑂 𑐩𑐷𑐟 𑐠𑐵𑐎𑐸𑐐𑐸 𑐎𑐰𑐶𑐟𑐵 𑐏𑑅 𑑋 𑐀𑐥𑐵𑐫𑑂𑐢𑑄𑐐𑐸 𑐡𑐾𑐱𑐫𑑂 𑐎𑐰𑐶𑐟𑐵 𑐳𑐦𑐹 𑐥𑐶𑐴𑐵𑑄 𑐰𑑅𑐳𑐵 𑐩𑐸𑐎𑑂𑐎𑑄 𑑕𑑐𑑐 𑐥𑐵𑑅 𑐖𑐎 𑐕𑐵𑐥𑐾 𑐫𑐵𑐂 𑑋

𑐰 𑐣𑑄 𑐕𑐎𑑂𑐰𑐮𑑄 𑐰𑐣𑐷 𑐩𑐏𑐸 𑑋 𑐧𑐬𑐸 𑐄𑐥𑐣𑑂𑐫𑐵𑐳 𑐢𑐵𑑅𑐳𑐵 𑐫𑐎𑑂𑐰 𑐔𑐹 𑑋 𑐩𑐾𑐏𑐾 𑐥𑐟𑑂𑐬𑐶𑐎𑐵𑐫𑑂 𑐎𑐰𑐶𑐟𑐵 𑐕𑐵𑐥𑐾 𑐫𑐵𑐎𑐾𑐟 𑐢𑐵𑑅𑐳𑐵 𑐠𑐵𑐎𑐸 𑑋 𑐎𑐰𑐶𑐟𑐵 𑐕𑐵𑐥𑐾 𑐫𑐵𑐎𑐾𑐟 𑐢𑑂𑐫𑐧𑐵 𑐥𑐸𑐮𑐾𑐩𑐵𑑅 𑑋 𑐥𑐟𑑂𑐬𑐶𑐎𑐵 𑐩𑐣𑐹𑐟𑐫𑑂𑐳𑑄 𑐣𑑂𑐫𑐵𑐂 𑐩𑐏𑐸 𑐄𑐎𑐶𑑄 𑐎𑐰𑐶𑑄 𑐴𑐾 𑐢𑑂𑐫𑐧𑐵 𑐧𑐶𑐫𑐵𑑅 𑐥𑐟𑑂𑐬𑐶𑐎𑐵 𑐔𑐮𑐾 𑐫𑐵𑐎𑐾𑐩𑐵𑑅𑐐𑐸 𑐖𑐸𑐫𑐵𑐔𑑂𑐰𑐣 𑑋 𑐎𑐰𑐶𑐟𑐵 𑐕𑐵𑐥𑐾 𑐫𑐵𑐂𑐐𑐸 𑐥𑐟𑑂𑐬𑐶𑐎𑐵𑐫𑐵 𑐳𑐩𑑂𑐥𑐵𑐡𑐎𑐟 𑐢𑐵𑑅𑐳𑐵 𑐟𑐳𑐎𑑄 𑐎𑐜𑐵 𑐖𑐸𑐂𑐐𑐸 𑐖𑐸𑐫𑐵𑐔𑑂𑐰𑐣 𑑋

𑐟𑐵𑑅𑐃 𑐟𑐎 𑐀𑐢𑑂𑐫𑐫𑐣 𑐫𑐵𑐫𑐾𑐢𑐸𑑄𑐎𑐵𑑅 𑐖𑐎 𑐎𑐰𑐶𑐟𑐵 𑐕𑐵𑐥𑐾 𑐫𑐵𑐫𑐾𑐐𑐸 𑐖𑐸𑐮 𑐢𑐎𑐵𑑅 𑐏𑐧𑐬 𑐧𑐷 𑑋 𑐏𑐧𑐬 𑐰𑐫𑐾𑐰𑑄 𑐢𑑂𑐫𑐧𑐵 𑐣𑐶𑑄 𑐟𑐫𑐵𑐬 𑐫𑐵𑐫𑐾𑐩𑐵𑑅 𑑋 𑐥𑐟𑑂𑐬𑐶𑐎𑐵𑐫𑑂 𑐬𑐔𑐣𑐵 𑐕𑑂𑐰𑐫𑐾𑐧𑐮𑐫𑑂 𑐀𑐠𑐾𑑄 𑐩𑐾𑐮 𑐖𑐎 𑐫𑐵𑐣𑐵𑑄 𑐩𑐐𑐵𑑅 𑑋 𑐥𑐶𑐎𑐵𑐫𑐾𑐟 𑐕𑐐𑐹 𑐀𑐮𑐐𑑂𑐐 𑐦𑐬𑑂𑐩𑐵𑐚 𑐴𑐾 𑐡𑐫𑐾𑐎𑐵𑑅 𑐕𑑂𑐰𑐫𑐾𑐩𑐵𑑅 𑑋 𑐳𑐩𑑂𑐥𑐵𑐡𑐎𑐫𑐵𑐟 𑐔𑐶𑐟𑑂𑐟 𑐧𑐸𑐗𑐾 𑐖𑐹𑐳𑐵 𑐖𑐎 𑐏𑐧𑐬 𑐫𑐵𑐂 𑑋 𑐖𑐶𑐐𑐸 𑐴𑐾 𑐎𑐰𑐶𑐟𑐵 𑐎𑐵𑐫𑐾𑐢𑐸𑑄𑐎𑐵𑑅 𑐢𑑂𑐫𑐧𑐵 𑐣𑑄 𑐩𑐵𑑅 𑐢𑐵𑐮 𑑋

𑐳𑐵𑐴𑐶𑐟𑑂𑐫𑐶𑐎 𑐥𑐟𑑂𑐬𑐶𑐎𑐵 𑐄𑐩𑐶𑐳𑑄 𑐩𑐣𑑂𑐫𑐵𑑅𑐐𑐸 𑐖𑐸𑐫𑐵𑐔𑑂𑐰𑐣 𑑋 𑐀𑐫𑑂 𑐖𑐸𑐫𑐵𑑅 𑐕𑐏𑐾 𑐐𑑂𑐰𑐵𑐴𑐵𑐮𑐶 𑐎𑐫𑐵𑑅 𑐖𑐹𑐳𑐵𑑄 𑐰𑑂𑐫𑐰𑐳𑑂𑐠𑐵𑐥𑐣 𑐫𑐵𑐣𑐵𑐟𑑅𑐐𑐸 𑐮𑐵𑐣𑐵𑐔𑑂𑐰𑐣 𑑋 𑐀𑐩𑐾𑐬𑐶𑐎𑐷 𑐎𑐰𑐶 𑐳𑐵𑐴𑐶𑐟𑑂𑐫𑐎𑐵𑐬𑐟 𑐟𑐳𑐎𑑄 𑐰𑐶𑐡𑑂𑐰𑐵𑐣 𑐖𑐸𑐫𑐵𑐔𑑂𑐰𑐣𑐷, 𑐀𑐠𑐾 𑐏𑑅𑐳𑐵𑑄 𑐄𑐥𑐶𑑄 𑐑𑐩𑐞𑑂𑐜𑐷 𑐢𑐵𑑅𑐳𑐵 𑐩𑐖𑐹 𑑋 𑐩𑐾𑐥𑐶𑑄 𑐀𑐩𑐾𑐬𑐶𑐎𑐷 𑐣𑐵𑐐𑐬𑐶𑐎 𑐳𑑂𑐰𑐫𑐵𑑄 𑐄𑐥𑐶𑑄 𑐱𑐶𑐲𑑂𑐚 𑐴𑐾 𑐖𑐸𑐂 𑑋