𑐳𑐬𑐎𑐵𑐬𑐷 𑐳𑑂𑐎𑐹𑐮𑑄 𑐕𑐸𑑄 𑐣𑑄 𑐱𑐸𑐮𑑂𑐎 𑐎𑐵𑐫𑐾𑐩𑐖𑑂𑐫𑐹 : 𑐱𑐶𑐎𑑂𑐲𑐵𑐩𑐣𑑂𑐟𑑂𑐬𑐷 𑐥𑑀𑐏𑐬𑐾𑐮


𑐳𑐬𑐎𑐵𑐬𑐷 𑐳𑑂𑐎𑐹𑐮𑑄 𑐕𑐸𑑄 𑐣𑑄 𑐱𑐸𑐮𑑂𑐎 𑐎𑐵𑐫𑐾𑐩𑐖𑑂𑐫𑐹 : 𑐱𑐶𑐎𑑂𑐲𑐵𑐩𑐣𑑂𑐟𑑂𑐬𑐷 𑐥𑑀𑐏𑐬𑐾𑐮

𑐣𑐾𑐰𑐵: 𑐀𑐣𑐮𑐵𑐂𑐣 𑐣𑑂𑐫𑐸𑐖 – 𑐮𑐮𑐾𑐣𑑂𑐡𑑂𑐬 𑐱𑐵𑐎𑑂𑐫 | 𑑒𑑐𑑗𑑖 𑐧𑐿𑐱𑐵𑐏 𑑓𑑐, 𑐳𑑀𑐩𑐧𑐵𑐬 𑑑𑑖:𑑔𑑑:𑑐𑑔

“𑐁𑐢𑐵𑐬𑐨𑐹𑐟 𑐱𑐶𑐎𑑂𑐲𑐵 𑐩𑐎𑐵𑐂𑐥𑐶𑐣𑑂𑐳𑑄 𑐬𑐵𑐖𑑂𑐫𑐫𑐵 𑐳𑐸𑐰𑐶𑐢𑐵 𑐟𑐎𑑄 𑐎𑐵𑐫𑐾 𑐏𑐣𑐷𑐩𑐏𑐸 𑑋 𑐄𑐮𑐶 𑐖𑐎 𑐩𑐏𑐸, 𑐂𑐩𑐶𑐳𑑄 𑐧𑐿𑑄𑐎 𑐏𑐵𑐟𑐵 𑐟𑐎𑑄 𑐔𑐵𑐫𑐾𑐎𑐾 𑐡𑐂𑐩𑐏𑐸 𑑋”

𑐱𑐶𑐎𑑂𑐲𑐵𑐩𑐣𑑂𑐟𑑂𑐬𑐷 𑐐𑐶𑐬𑐶𑐬𑐵𑐖𑐩𑐞𑐶 𑐥𑑀𑐏𑐬𑐾𑐮𑑄 𑐳𑐵𑐩𑐸𑐡𑐵𑐫𑐶𑐎 𑐰𑐶𑐡𑑂𑐫𑐵𑐮𑐫𑑄 𑐕𑐸𑑄 𑐣𑑄 𑐱𑐷𑐬𑑂𑐲𑐎𑐫𑑂 𑐱𑐸𑐮𑑂𑐎 𑐎𑐵𑐫𑐾𑐩𑐖𑑂𑐫𑐹𑐐𑐸 𑐏𑑃 𑐎𑐣𑐵𑐡𑐷𑐐𑐸 𑐡𑐸 𑑋 𑐰𑐫𑑂𑐎𑐮𑑄 𑐗𑐵𑐥𑐵𑐫𑐵 𑐳𑐬𑐎𑐵𑐬𑐷 𑐳𑑂𑐎𑐹𑐮𑑄 𑐱𑐸𑐮𑑂𑐎 𑐎𑐵𑑅𑐐𑐸 𑐰𑐶𑐲𑐫 𑐖𑐵𑐣𑐎𑐵𑐬𑐷 𑐰𑑅𑐐𑐸 𑐢𑐵𑐳𑐾𑑄 𑐩𑐎𑐵𑐫𑐾𑐟 𑐳𑐔𑐾𑐟 𑐫𑐵𑐎𑐹𑐐𑐸 𑐡𑐸 𑑋

𑐳𑑀𑐩𑐰𑐵𑑅 𑐳𑐸𑐠𑐫𑑂 𑐥𑑂𑐬𑐾𑐳 𑐳𑑄𑐐𑐛𑐣 𑐗𑐵𑐥𑐵𑑄 𑐐𑑂𑐰𑐳𑐵𑑅 𑐐𑑂𑐰𑑅𑐐𑐸 𑐥𑐟𑑂𑐬𑐎𑐵𑐬 𑐳𑐩𑑂𑐩𑐾𑐮𑐣𑐫𑑂 𑐱𑐶𑐎𑑂𑐲𑐵𑐩𑐣𑑂𑐟𑑂𑐬𑐷 𑐥𑑀𑐏𑐬𑐾𑐮𑑄 𑐱𑐶𑐎𑑂𑐲𑐵 𑐎𑑂𑐲𑐾𑐟𑑂𑐬𑐫𑐵 𑐴𑐶𑐄𑐥𑐵𑑅𑐫𑐵 𑐣𑐶𑐟𑐶𑑄 𑐫𑐵𑐎𑐣𑑄 𑐴 𑐱𑐶𑐎𑑂𑐲𑐵 𑐣𑐷𑐟𑐶 𑐎𑑂𑐰𑐔𑐵𑐫𑐾𑐎𑐾𑐐𑐸 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐷𑐐𑐸 𑐡𑐸 𑑋 𑐩𑐣𑑂𑐟𑑂𑐬𑐷 𑐥𑑀𑐏𑐬𑐾𑐮𑑄 𑐤𑐵𑐥𑐵𑑄𑐐𑐸 𑐡𑑃𑐫𑑂 𑐱𑐶𑐎𑑂𑐲𑐵𑐫𑐵 𑐣𑐶𑐟𑐶𑑄 𑐁𑐢𑐵𑐬 𑐡𑑃 𑐖𑐹𑐐𑐸 𑐢𑐫𑐵𑐡𑐷𑐐𑐸 𑐡𑐸 𑑋 𑐁𑑅 𑐠𑐸𑐐𑐸 𑐡𑑃 𑐱𑐶𑐎𑑂𑐲𑐵𑐫𑑂 𑐖𑑂𑐫𑐵 𑐎𑑂𑐫𑐣𑐾𑐐𑐸 𑐰𑐫𑑂𑐎𑑅𑐫𑐵 𑐢𑐵𑐥𑐹 𑐡𑐸 𑑋

𑐱𑐶𑐎𑑂𑐲𑐵𑐫𑐵𑐟 𑐄𑐟𑑂𑐥𑐵𑐡𑐣𑐮𑐶𑐳𑐾 𑐳𑑂𑐰𑐵𑐫𑐾𑐩𑐵𑑅𑐐𑐸 𑐩𑐣𑑂𑐟𑑂𑐬𑐷 𑐥𑑀𑐏𑐬𑐾𑐮𑑄 𑐠𑑅𑐐𑐸 𑐣𑐸𑐐𑑅𑐏𑑃 𑐟𑐫𑐾𑐐𑐸 𑐗𑑂𑐰𑐮𑐫𑑂 𑐎𑐣𑐵𑐡𑐷𑐐𑐸 𑐡𑐸 𑑋 𑐰𑐫𑑂𑐎𑐮𑑄 𑐁𑑅𑐫𑐵 𑐡𑐶𑐣𑐫𑑂 𑐧𑑂𑐮𑐵𑐎𑐧𑑀𑐬𑑂𑐜𑐫𑐵 𑐱𑐶𑐎𑑂𑐲𑐵 𑐖𑐎 𑐔𑐮𑐾𑐩𑐖𑐸𑐂𑐐𑐸 𑐢𑐵𑐳𑐾𑑄 𑐱𑐶𑐎𑑂𑐲𑐵𑐫𑐵𑐟 𑐥𑑂𑐬𑐵𑐰𑐶𑐢𑐶𑐎 𑐰 𑐳𑐶𑐥𑑄 𑐖𑐵𑑅𑐐𑐸 𑐫𑐵𑐫𑐾𑐐𑐸 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐷𑐐𑐸 𑐡𑐸 𑑋

𑐱𑐶𑐎𑑂𑐲𑐵𑐩𑐣𑑂𑐟𑑂𑐬𑐷 𑐥𑑀𑐏𑐬𑐾𑐮𑑄 𑐕𑐐𑐹 𑐥𑑂𑐬𑐳𑑄𑐐𑐫𑑂 𑐢𑐫𑐵𑐡𑐷, “𑐁𑐢𑐵𑐬𑐨𑐹𑐟 𑐱𑐶𑐎𑑂𑐲𑐵 𑐩𑐎𑐵𑐂𑐥𑐶𑐣𑑂𑐳𑑄 𑐬𑐵𑐖𑑂𑐫𑐫𑐵 𑐳𑐸𑐰𑐶𑐢𑐵 𑐟𑐎𑑄 𑐎𑐵𑐫𑐾 𑐏𑐣𑐷𑐩𑐏𑐸 𑑋 𑐄𑐮𑐶 𑐖𑐎 𑐩𑐏𑐸, 𑐂𑐩𑐶𑐳𑑄 𑐧𑐿𑑄𑐎 𑐏𑐵𑐟𑐵 𑐟𑐎𑑄 𑐔𑐵𑐫𑐾𑐎𑐾 𑐡𑐂𑐩𑐏𑐸 𑑋”