𑐳𑐟𑑂𑐫𑐩𑑀𑐴𑐣 𑐰 𑐢𑐬𑑂𑐩𑐵𑐡𑐶𑐟𑑂𑐫 𑐥𑐵𑐛𑑂𑐫𑐎𑑂𑐬𑐩𑐫𑑂 𑐡𑐸𑐠𑑂𑐫𑐵𑐂𑐐𑐸 𑐫𑐮 𑐩𑐾𑐫𑐬𑐫𑐵 𑐄𑐡𑑂𑐑𑑀𑐲


𑐳𑐟𑑂𑐫𑐩𑑀𑐴𑐣 𑐖𑑀𑐱𑐷 𑐰 𑐢𑐬𑑂𑐩𑐵𑐡𑐶𑐟𑑂𑐫 𑐢𑐬𑑂𑐩𑐵𑐔𑐵𑐬𑑂𑐫𑐫𑐵𑐟 𑐥𑐵𑐛𑑂𑐫𑐎𑑂𑐬𑐩𑐫𑑂 𑐡𑐸𑐠𑑂𑐫𑐵𑐎𑐾𑐐𑐸 𑐄𑐡𑑂𑐑𑑀𑐲 𑐫𑐮 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑐵 𑐩𑐾𑐫𑐬 𑐔𑐶𑐬𑐶𑐧𑐵𑐧𑐸 𑐩𑐴𑐬𑑂𑐖𑐣𑑄 𑐫𑐵𑐣𑐵𑐡𑐷𑐐𑐸 𑐡𑐸 𑑋 𑐁𑑅 𑐰𑐂𑐐𑐸 𑐱𑐿𑐎𑑂𑐲𑐶𑐎 𑐳𑐟𑑂𑐬𑐫𑑂 𑐰𑐫𑐾𑐎𑐥𑐶𑑄 𑐥𑐵𑐛𑑂𑐫𑐎𑑂𑐬𑐩𑐫𑑂 𑐡𑐸𑐠𑑂𑐫𑐵𑐂𑐐𑐸 𑐩𑐾𑐫𑐬 𑐩𑐴𑐬𑑂𑐖𑐣𑑄 𑐣𑑂𑐴𑑂𑐫𑐠𑐣𑐵𑐡𑐶𑐮 𑑋 𑐩𑐵𑐟𑐺𑐨𑐵𑐲𑐵 𑐥𑐟𑑂𑐬𑐎𑐵𑐬𑐷𑐟𑐵 𑐡𑐶𑐰𑐳 𑐴𑐣𑐾𑐐𑐸 𑐗𑑂𑐰𑐮𑐫𑑂 𑐰𑐫𑑂𑐎𑐮𑑄 𑐁𑑅 𑐰𑐂𑐐𑐸 𑐱𑐿𑐎𑑂𑐲𑐶𑐎 𑐳𑐟𑑂𑐬𑐫𑑂 𑐣𑐾𑐥𑐵𑐮𑐨𑐵𑐲𑐵𑐫𑐵 𑐳𑑂𑐎𑐹𑐮 𑐔𑐵𑐫𑑂𑐎𑐾𑐐𑐸 𑐥𑑂𑐬𑐟𑐶𑐰𑐡𑑂𑐢𑐟𑐵 𑐟𑐎𑑄 𑐥𑑂𑐰𑑄𑐎𑐵𑐡𑐶𑐮 𑑋 𑐳𑑂𑐠𑐵𑐣𑐶𑐫 𑐳𑐬𑐎𑐵𑐬𑐫𑐵𑐟 𑐧𑐣𑑂𑐢𑐣𑐫𑑂 𑐟𑐫𑑂𑐟 𑐳𑐬𑐎𑐵𑐬 𑐥𑑂𑐬𑐾𑐬𑐶𑐟 𑐖𑐸𑐐𑐸 𑐟𑐎𑑄 𑐩𑐾𑐫𑐬 𑐩𑐴𑐬𑑂𑐖𑐣𑑄 𑐡𑑂𑐰𑐥𑑄 𑐧𑐶𑐫𑐵𑐡𑐶𑐮 𑑋 𑐳𑑄𑐰𑐶𑐢𑐵𑐣 𑐥𑑂𑐬𑐡𑐟𑑂𑐟 𑐀𑐣𑐸𑐱𑐸𑐔𑐶 𑑘𑐫𑐵 𑐱𑐶𑐎𑑂𑐲𑐵 𑐀𑐢𑐶𑐎𑐵𑐬 𑐮𑐵𑐎𑐵𑐎𑐵𑐫𑑂 𑐟𑑂𑐫𑑄𑐐𑐸 𑐣𑑂𑐴𑑂𑐫𑐠𑑄𑐳𑐾𑑄 𑐩𑐾𑐫𑐬 𑐩𑐴𑐬𑑂𑐖𑐣𑑄 𑐳𑐎𑐮𑐳𑐶𑐟 𑐳𑐔𑐾𑐟 𑐖𑐸𑐂𑐟 𑐂𑐣𑐵𑐥 𑐫𑐵𑐣𑐵𑐡𑐶𑐮 𑑋

𑐏𑐰𑐫𑑂 𑐢𑐬𑑂𑐩𑐵𑐡𑐶𑐟𑑂𑐫 𑐢𑐬𑑂𑐩𑐵𑐔𑐵𑐬𑑂𑐫𑐫𑐵 𑐗𑑂𑐰𑐵𑐟𑐵 𑐖𑐰𑐫𑑂 𑐥𑐞𑑂𑐜𑐶𑐟 𑐴𑐾𑐩𑐬𑐵𑐖 𑐱𑐵𑐎𑑂𑐫𑐫𑐵 𑐗𑑂𑐰𑐵𑐟𑐵

𑐣𑐾𑐰𑐵𑑅 𑐥𑐟𑑂𑐬𑐎𑐵𑐬 𑐬𑐵𑐲𑑂𑐚𑑂𑐬𑐶𑐫 𑐡𑐧𑐹 𑐰 𑐩𑐵𑑄 𑐨𑐵𑐫𑑂 𑐥𑐸𑐔𑑅𑐫𑐵 𑐩𑑄𑐎𑐵𑑅 𑐐𑑂𑐰𑐳𑐵𑐮𑐫𑑂 𑐥𑑂𑐫𑐎𑑂𑐰𑑅𑐐𑐸 𑐩𑐵𑐟𑐺𑐨𑐵𑐲𑐵 𑐥𑐟𑑂𑐬𑐎𑐵𑐬𑐷𑐟𑐵 𑐡𑐶𑐰𑐳 𑐴𑑄𑐐𑐸 𑐏𑑅 𑑋 𑐢𑐬𑑂𑐩𑐵𑐡𑐶𑐟𑑂𑐫 𑐢𑐬𑑂𑐩𑐵𑐔𑐵𑐬𑑂𑐫𑐫𑐵 𑐧𑐸𑐡𑐶𑑄  𑐣𑐵𑐥𑑄 𑐰𑐫𑐾𑐎𑐮𑑄 𑐥𑐶𑐠𑐣𑐵𑐡𑐷𑐐𑐸 𑐩𑐵𑐟𑐺𑐨𑐵𑐲𑐵 𑐣𑐾𑐥𑐵𑐮𑐨𑐵𑐲𑐵𑐫𑐵 𑐣𑑂𑐴𑐵𑐥𑐵𑑄𑐐𑐸 𑐥𑐟𑑂𑐬𑐶𑐎𑐵 𑐧𑐸𑐡𑑂𑐢 𑐢𑐬𑑂𑐩𑐫𑐵 𑐮𑐸𑐩𑐣𑑂𑐟𑐷 𑐎𑐠𑑄 𑐠𑑁𑑄𑐫𑐵𑐐𑐸 𑐡𑐶𑑄𑐫𑐵𑐟 𑐩𑐵𑐟𑐺𑐨𑐵𑐲𑐵 𑐥𑐟𑑂𑐬𑐎𑐵𑐬𑐷𑐟𑐵 𑐡𑐶𑐰𑐳 𑐎𑐠𑑄 𑐡𑐧𑐸𑐫𑐵 𑐥𑐴𑐮𑐫𑑂 𑐴𑐣𑐵𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐫𑐮𑐫𑐵 𑐥𑐹𑐔𑑂𑐰𑑅𑐫𑑂 𑐢𑐬𑑂𑐩𑐵𑐡𑐶𑐟𑑂𑐫 𑐢𑐬𑑂𑐩𑐵𑐔𑐵𑐬𑑂𑐫𑐫𑐵 𑐗𑑂𑐰𑐵𑐟𑐵𑐫𑑂 𑐳𑑂𑐰𑐵𑑄𑐩𑐵 𑐡𑐾𑐕𑐵𑐣𑐵 𑐡𑐶𑐰𑐳 𑐴𑑄𑐐𑐸 𑐏𑑅 𑑋 𑐩𑐹𑐥𑐵𑑃𑐴𑐵 𑐎𑐠𑑄 𑐖𑑂𑐫𑐵𑐗𑑂𑐰𑐮𑐫𑑂 𑐩𑐾𑐫𑐬 𑐩𑐴𑐬𑑂𑐖𑐣 𑐗𑐵𑐫𑐵𑐡𑐷𑐐𑐸 𑐏𑑅 𑑋

𑐩𑐵𑑄𑐨𑐵𑐫𑑂 𑐥𑐸𑐔𑑅𑐫𑐵 𑐣𑐵𑐫𑑅 𑐴𑐾𑐬𑐵𑐬𑐟𑑂𑐣 𑐱𑐵𑐎𑑂𑐫, 𑐣𑐾𑐥𑐵𑐮 𑐥𑐟𑑂𑐬𑐎𑐵𑐬 𑐩𑐴𑐵𑐳𑑄𑐑𑐫𑐵 𑐄𑐥𑐵𑐢𑑂𑐫𑐎𑑂𑐲 𑐡𑐶𑐮𑐶𑐥 𑐠𑐵𑐥𑐵𑐩𑐐𑐬, 𑐁𑐡𑐶𑐰𑐵𑐳𑐷 𑐖𑐣𑐖𑐵𑐟𑐶 𑐥𑐟𑑂𑐬𑐎𑐵𑐬 𑐩𑐴𑐵𑐳𑑄𑐑𑐫𑐵 𑐣𑐵𑐫𑑅 𑐜𑐞𑑂𑐜 𑐐𑐸𑐬𑐹𑐒, 𑐩𑐢𑐾𑐳𑐷 𑐥𑐟𑑂𑐬𑐎𑐵𑐬 𑐳𑐩𑐵𑐖𑐫𑐵 𑐣𑐵𑐫𑑅 𑐩𑑀𑐴𑐣 𑐳𑐶𑑃𑐴, 𑐢𑐬𑑂𑐩𑐵𑐡𑐶𑐟𑑂𑐫 𑐢𑐬𑑂𑐩𑐵𑐔𑐵𑐬𑑂𑐫𑐫𑐵 𑐨𑑁 𑐧𑐾𑐏𑐵𑐮𑐎𑑂𑐲𑑂𑐩𑐷 𑐣𑐾𑐰𑐵𑑅 𑐥𑐵𑐴𑐵𑑃𑐎𑐠𑑄 𑐗𑐵𑑅𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐡𑐧𑐸𑐫𑐵 𑐣𑐵𑐫𑑅 𑐱𑑂𑐬𑐷𑐎𑐺𑐲𑑂𑐞 𑐩𑐴𑐬𑑂𑐖𑐣 𑐳𑐨𑐵𑐣𑐵𑐫𑑅 𑐖𑐸𑐫𑐵𑐡𑐷𑐐𑐸 𑐏𑑅 𑑋 𑐩𑐴𑐬𑑂𑐖𑐣𑑄 𑐢𑐬𑑂𑐩𑐵𑐡𑐶𑐟𑑂𑐫 𑐢𑐬𑑂𑐩𑐵𑐔𑐵𑐬𑑂𑐫 𑐣𑐾𑐥𑐵𑑅𑐫𑐵 𑐣𑑂𑐴𑐵𑐥𑐵𑐩𑑂𑐴 𑐩𑐵𑐟𑐺𑐨𑐵𑐲𑐵 𑐥𑐟𑑂𑐬𑐎𑐵𑐬 𑐢𑐎𑐵 𑐣𑑂𑐴𑑂𑐫𑐠𑐣𑐵𑐡𑐶𑐮 𑑋

𑐩𑐵𑐟𑐺𑐨𑐵𑐲𑐵 𑐥𑐟𑑂𑐬𑐎𑐵𑐬𑐶𑐟𑐵 𑐡𑐶𑐰𑐳 𑐣𑐾𑐰𑐵𑑅 𑐥𑐟𑑂𑐬𑐎𑐵𑐬 𑐬𑐵𑐲𑑂𑐚𑑂𑐬𑐶𑐫 𑐡𑐧𑐸 𑐧𑐶𑐢𑐶𑐰𑐟 𑐬𑐸𑐥𑑄 𑐐𑐛𑐣 𑐖𑐸𑐂𑐢𑐸𑑄𑐎𑐵 𑐢𑐬𑑂𑐩𑐵𑐡𑐶𑐟𑑂𑐫 𑐢𑐬𑑂𑐩𑐵𑐔𑐵𑐬𑑂𑐫 𑐣𑐾𑐥𑐵𑐮𑐨𑐵𑐲𑐵𑐫𑐵 𑐣𑑂𑐴𑐵𑐥𑐵𑐩𑑂𑐴 𑐥𑐟𑑂𑐬𑐎𑐵𑐬 𑐖𑐎 𑐩𑐏𑐸 𑐩𑐵𑐟𑐺𑐨𑐵𑐲𑐵 𑐥𑐟𑑂𑐬𑐎𑐵𑐬𑐶𑐟𑐵𑐫𑑂 𑐣𑑂𑐴𑐵𑐥𑐵𑐩𑑂𑐴 𑐥𑐟𑑂𑐬𑐎𑐵𑐬 𑐢𑐎𑐵 𑐮𑐸𑐩𑑄𑐎𑐵 𑐧𑐸𑑃𑐡𑐶𑑄 𑐴𑐣𑐾𑐐𑐸 𑐖𑑂𑐫𑐵 𑐣𑑂𑐴𑑂𑐫𑐵𑐎𑐸𑐐𑐸 𑐏𑑅 𑑋 𑐳𑑂𑐠𑐵𑐥𑐣𑐵𑐫𑐵 𑐩𑐾𑐐𑐸 𑐡𑑃𑐫𑑂 𑐡𑐧𑐸𑐮𑐶𑑄 𑐩𑐵𑐟𑐺𑐨𑐵𑐲𑐵 𑐥𑐟𑑂𑐬𑐎𑐵𑐬𑐶𑐟𑐵𑐫𑐵 𑐣𑑂𑐴𑐵𑐥𑐵𑐩𑑂𑐴 𑐰𑑂𑐫𑐎𑑂𑐟𑐶 𑐖𑐸𑐂𑐩𑐵 𑐢𑐎𑐵 𑐀𑐣𑐸𑐩𑐵𑐣 𑐣𑐵𑐥𑑄 𑐁𑐡𑐶𑐰𑐵𑐳𑐷 𑐖𑐣𑐖𑐵𑐟𑐷 𑐳𑐎𑐮𑐮𑐶𑐳𑐾 𑐳𑐴𑐮𑐴 𑐧𑑂𑐫𑐵𑐎𑐵 𑐩𑐵𑐟𑐺𑐨𑐵𑐲𑐵 𑐥𑐟𑑂𑐬𑐎𑐵𑐬𑐶𑐟𑐵 𑐎𑐠𑑄 𑐴𑐣𑐾𑐐𑐸 𑐱𑐸𑐬𑐸 𑐫𑐵𑑅𑐐𑐸 𑐏𑑅 𑑋 𑐣𑑂𑐴𑐵𑐥𑐵𑑄𑐐𑐸 𑐡𑑃

𑐢𑐬𑑂𑐩𑐵𑐡𑐶𑐟𑑂𑐫 𑐢𑐬𑑂𑐩𑐵𑐔𑐵𑐬𑑂𑐫 𑐥𑐟𑑂𑐬𑐎𑐵𑐬𑐶𑐟𑐵 𑐡𑐶𑐰𑐳 𑐎𑐠𑑄 𑐣𑑂𑐴𑑂𑐫𑐵𑑅𑐐𑐸 𑐏𑑅𑐳𑐵 𑐩𑐾𑐐𑐸 𑐡𑑃 𑐣𑐶𑐳𑐾𑑄 𑐩𑐵𑐟𑐺𑐨𑐵𑐲𑐵 𑐥𑐟𑑂𑐬𑐎𑐵𑐬𑐶𑐟𑐵 𑐡𑐶𑐰𑐳 𑐢𑐎𑐵 𑐴𑐣𑐾𑐐𑐸 𑐱𑐸𑐬𑐸 𑐖𑐸𑐐𑐸 𑐏𑑅 𑐳𑐵 𑐠𑐸𑐐𑐸𑐳𑐶 𑐥𑑂𑐫𑐡𑑃 𑐎𑑂𑐰𑐔𑐵𑑅𑐐𑐸 𑐖𑐸𑐮 𑑋 𑐣𑐾𑐥𑐵𑑅𑐫𑐵 𑐂𑐟𑐶𑐴𑐵𑐳𑐫𑑂 𑐣𑑂𑐴𑐵𑐥𑐵𑐩𑑂𑐴 𑐣𑐾𑐥𑐵𑐮𑐨𑐵𑐲𑐵𑐫𑐵 𑐥𑐟𑑂𑐬𑐎𑐵𑐬 𑐢𑐬𑑂𑐩𑐵𑐡𑐶𑐟𑑂𑐫 𑐠𑑁𑑄 𑐳𑐶𑐧𑐾𑑄 𑑙𑑐 𑐡𑑃 𑐣𑑂𑐴𑑂𑐫𑑅 𑐴𑐾 𑐣𑐾𑐥𑐵𑐮𑐨𑐵𑐲𑐵𑑄 𑐥𑐟𑑂𑐬𑐎𑐵𑐬𑐶𑐟𑐵 𑐣𑑂𑐴𑑂𑐫𑐵𑐎𑐵𑐡𑐶𑐐𑐸 𑐏𑑅 𑑋 𑐠𑐸𑐎𑐶𑐫𑐵 𑐥𑐸𑐲𑑂𑐚𑐶 𑐩𑐵𑐟𑐺𑐨𑐵𑐲𑐵 𑐥𑐟𑑂𑐬𑐎𑐵𑐬𑐶𑐟𑐵 𑐳𑐩𑑂𑐩𑐾𑐮𑐣𑑄 𑐫𑐵𑐫𑐾𑐢𑐸𑑄𑐎𑐸𑐐𑐸 𑐩𑐴𑐬𑑂𑐖𑐣𑑄 𑐣𑑂𑐴𑑂𑐫𑐠𑐣𑐵𑐡𑐶𑐮 𑑋

𑐀𑐠𑐾𑐴𑐾 𑐩𑐵𑑃𑐨𑐵𑐫𑑂 𑐥𑐸𑐔𑐫𑐵 𑐣𑐵𑐫𑑅 𑐴𑐾𑐬𑐵𑐬𑐟𑑂𑐣 𑐱𑐵𑐎𑑂𑐫𑑄 𑐢𑐬𑑂𑐩𑐵𑐡𑐶𑐟𑑂𑐫 𑐢𑐬𑑂𑐩𑐵𑐔𑐵𑐬𑑂𑐫 𑐮𑐸𑐩𑑄𑐎𑐾𑐐𑐸 𑐢𑐿𑐐𑐸 𑐣𑐾𑐰𑐵𑑅 𑐟𑐫𑑂𑐐𑐸 𑐖𑐎 𑐩𑐏𑐸 𑐳𑐎𑐮 𑐁𑐡𑐶𑐰𑐵𑐳𑐷, 𑐖𑐣𑐖𑐵𑐟𑐶𑐟𑐫𑑂𑐐𑐸 𑐣𑐶𑐟𑐶𑑄 𑐖𑐸𑐐𑐸 𑐣𑑂𑐴𑑂𑐫𑐠𑐣𑐵𑐡𑐶𑐮 𑑋 𑐢𑐬𑑂𑐩𑐵𑐡𑐶𑐟𑑂𑐫𑐫𑐵 𑑑𑑑𑑘 𑐡𑑃 𑐧𑐸𑐡𑐶𑑄𑐫𑐵 𑐮𑐳𑐟𑐵𑐫𑑂 𑐧𑑂𑐫𑐵𑐐𑐮𑑄 𑐧𑑂𑐫𑐵𑐐𑐮𑑄 𑐴𑐣𑐵𑐰𑐫𑐵𑐔𑑂𑐰𑑄𑐐𑐸 𑐧𑐸𑐡𑐶𑑄 𑐰 𑐡𑐶𑐰𑐳𑐫𑐵𑐟 𑐩𑐵𑑃 𑐨𑐵𑐫𑑂 𑐥𑐸𑐔𑑅 𑐰 𑐣𑐾𑐰𑐵𑑅 𑐥𑐟𑑂𑐬𑐎𑐵𑐬 𑐬𑐵𑐲𑑂𑐚𑑂𑐬𑐶𑐫 𑐡𑐧𑐸 𑐣𑐵𑐥𑑄 𑐴𑐣𑐵𑐐𑐸 𑐣𑑂𑐴𑑂𑐫𑐠𑐣𑐵𑐡𑐶𑐮 𑑋 𑐢𑐬𑑂𑐩𑐵𑐡𑐶𑐟𑑂𑐫𑑄 𑐄𑐧𑐮𑐫𑑂𑐫𑐵 𑐩𑐵𑐟𑐺𑐨𑐵𑐲𑐵 𑐥𑑂𑐬𑐎𑐵𑐱𑐣 𑐥𑑂𑐬𑐟𑐶𑐧𑐣𑑂𑐢 𑐫𑐵𑐣𑐵𑐟𑑅𑐐𑐸 𑐀𑐰𑐳𑑂𑐠𑐵𑐫𑑂 𑐣𑑄 𑐨𑐵𑐲𑐵 𑐔𑐾𑐟𑐣𑐵 𑐰 𑐬𑐵𑐲𑑂𑐚𑑂𑐬𑐶𑐫 𑐔𑐾𑐟𑐣𑐵 𑐀𑐢𑐶𑐧𑐺𑐡𑑂𑐢𑐶𑐫𑐵 𑐣𑐶𑐟𑐶𑑄 𑐣𑐾𑐥𑐵𑐮𑐨𑐵𑐲𑐵𑑄 𑐧𑐸𑐡𑑂𑐢 𑐢𑐬𑑂𑐩 𑐣𑐵𑑄𑐫𑐵 𑐥𑐟𑑂𑐬𑐶𑐎𑐵 𑐎𑐮𑐎𑐟𑑂𑐟𑐵 𑐰𑐣𑐵 𑐥𑑂𑐬𑐎𑐵𑐱𑐣 𑐫𑐵𑐣𑐵𑐡𑐷𑐐𑐸 𑐣𑑂𑐴𑑂𑐫𑐠𑐣𑐵𑐡𑐶𑐮 𑑋 𑐰𑐫𑐾𑐎𑑅𑐫𑐵 𑐡𑐾𑐣𑐫𑐵𑐟 𑐔𑑂𑐰𑐕𑐵𑐫𑐵 𑐖𑐎 𑐩𑐐𑐵𑑅𑐐𑐸 𑐧𑐬𑐸 𑐄𑐐𑐸 𑐮𑑃𑐥𑐸 𑐖𑑂𑐰𑐣𑐵 𑐣𑑂𑐴𑑂𑐫𑑅𑐣𑐾 𑐰𑑄𑐳𑐵 𑐖𑐎 𑐰𑐫𑐾𑐎𑐫𑐵𑐟 𑐢𑐵𑐠𑐾𑑄 𑐮𑐸𑐩𑑄𑐎𑐾𑐐𑐸 𑐖𑐸𑐂 𑐢𑐎𑐵 𑐱𑐵𑐎𑑂𑐫𑑄 𑐣𑑂𑐴𑑂𑐫𑐠𑐣𑐵𑐡𑐶𑐮 𑑋

𑐡𑐧𑐸𑐫𑐵 𑐣𑑂𑐰𑐎𑐹 𑐳𑐸𑐬𑐖𑐰𑐷𑐬 𑐧𑐖𑑂𑐬𑐵𑐔𑐵𑐬𑑂𑐫𑑄 𑐰 𑐡𑐧𑐹𑐫𑐵 𑐫𑐮 𑐎𑐔𑐵 𑐕𑑂𑐫𑐵𑐘𑑂𑐖𑐾 𑐬𑐵𑐖𑐾𑐱 𑐧𑐖𑑂𑐬𑐵𑐔𑐵𑐬𑑂𑐫𑑄 𑐮𑐳𑐎𑐸𑐳 𑐰 𑐳𑐸𑐨𑐵𑐫𑑂 𑐡𑐾𑐕𑐵𑑅𑐐𑐸 𑐏𑑅𑐳𑐵 𑐡𑐧𑐸𑐫𑐵 𑐩𑐹𑐕𑑂𑐫𑐵𑐘𑑂𑐖𑐾 𑐳𑐸𑐣𑐶𑐮 𑐩𑐴𑐬𑑂𑐖𑐣𑑄 𑐣𑑂𑐴𑑂𑐫𑐵𑐎𑐸𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐣𑐾𑐥𑐵𑐮𑐨𑐵𑐲𑐵 𑐥𑐟𑑂𑐬𑐎𑐵𑐬 𑐣𑐵𑐥‌ 𑐨𑐵𑐲𑐵𑐳𑐾𑐰𑐷𑐟𑐫𑐾𑐐𑐸 𑐧𑐵𑑄𑐮𑐵𑑄𑐐𑐸 𑐴𑐾 𑐳𑐴𑐨𑐵𑐐𑐶𑐟𑐵 𑐡𑐸𑐐𑐸 𑐏𑑅 𑑋