𑐱𑐶𑐎𑐵𑐐𑑀𑐫𑑂 𑐣𑐾𑐥𑐵𑐮𑐨𑐵𑐲𑐵 𑐥𑑂𑐬𑐱𑐶𑐎𑑂𑐲𑐞, 𑐀𑐣𑑂𑐟𑐬𑐎𑐺𑐫𑐵 𑐥𑐸𑐲𑑂𑐥𑐴𑐶𑐬𑐵 𑐟𑐸𑐮𑐵𑐢𑐬𑐮𑐶𑐳𑐾


𑐱𑐶𑐎𑐵𑐐𑑀𑐫𑑂 𑐣𑐾𑐥𑐵𑐮𑐨𑐵𑐲𑐵 𑐥𑑂𑐬𑐱𑐶𑐎𑑂𑐲𑐞, 𑐀𑐣𑑂𑐟𑐬𑐎𑐺𑐫𑐵 𑐥𑐸𑐲𑑂𑐥𑐴𑐶𑐬𑐵 𑐟𑐸𑐮𑐵𑐢𑐬𑐮𑐶𑐳𑐾

𑐣𑐾𑐰𑐵: 𑐀𑐣𑐮𑐵𑐂𑐣 𑐣𑑂𑐫𑐸𑐖 | 𑑒𑑐𑑗𑑖 𑐁𑐲𑐵𑐝 𑑒𑑓, 𑐳𑑀𑐩𑐧𑐵𑐬 𑑑𑑖:𑑒𑑒:𑑓𑑕

𑐣𑐾𑐰𑐵𑑅 𑐀𑐩𑐾𑐬𑐶𑐎𑐣 𑐡𑐧𑐹𑐫𑐵 𑐐𑑂𑐰𑐳𑐵𑐮𑐫𑑂 𑐡𑑃𑐫𑑂 𑐡𑐳𑑄𑐠𑐾𑑄 𑐠𑐸𑐐𑐸𑐳𑐷 𑐣𑑄 𑐣𑐾𑐰𑐵𑑅 𑐨𑐵𑐫𑑂 𑐳𑑂𑐫𑐣𑐾𑐐𑐸 𑐖𑑂𑐫𑐵𑐗𑑂𑐰𑑅𑐫𑐵 𑐱𑐸𑐬𑐸𑐰𑐵𑐟 𑐕𑐐𑐹 𑐖𑑂𑐫𑐵𑐗𑑂𑐰𑑅 𑐐𑑂𑐰𑐳𑐵𑑅 𑐐𑑂𑐰𑐫𑐵𑑅 𑐖𑐸𑐮𑐵𑐂 𑑖 𑐟𑐵𑐬𑐶𑐏𑐎𑐸𑐣𑑂𑐴𑐸 𑐣𑑂𑐴𑑂𑐫𑐵𑐎𑐹𑐐𑐸 𑐡𑐸 𑑋

𑐡𑐧𑐹𑐫𑐵 𑐥𑐸𑐮𑐵𑑄𑐩𑑂𑐴 𑐣𑐵𑐫𑑀 𑐱𑑂𑐬𑐰𑐞𑐎𑐸𑐩𑐵𑐬 𑐱𑑂𑐬𑐾𑐲𑑂𑐛𑑄 𑐄𑐮𑐾𑐖𑑂𑐫𑐵 𑐫𑐵𑐣𑐵𑐡𑐷𑐐𑐸 𑐄𑐐𑐸 𑐖𑑂𑐫𑐵𑐗𑑂𑐰𑑅 𑐌𑐬𑐾𑐐𑐞 𑐬𑐵𑐖𑑂𑐫𑑄 𑐗𑐵𑐫𑐵𑐡𑐷𑐩𑑂𑐴 𑐴𑐮𑐶𑑄 𑐣𑐾𑐰𑐵𑑅 𑐡𑐧𑐹𑐫𑐵 𑐥𑐸𑐮𑐵𑑄𑐩𑑂𑐴 𑐰𑐬𑐶𑐲𑑂𑐛 𑐮𑑂𑐫𑐹 𑐣𑐵𑐫𑑀 𑐡𑐫𑐵𑐬𑐟𑑂𑐣 𑐱𑐵𑐎𑑂𑐫𑐫𑐵 𑐣𑐵𑐫𑑀𑐳𑐸𑐂 𑐣𑑂𑐴𑑂𑐫𑐵𑑅𑐐𑐸 𑐏𑑅 𑑋

𑐩𑐹𑐥𑐵𑐴𑐵𑑃𑐥𑐶𑑄 𑐥𑐸𑐲𑑂𑐥𑐴𑐶𑐬𑐵 𑐟𑐸𑐮𑐵𑐢𑐬 𑐰 𑐡𑐫𑐵𑐬𑐟𑑂𑐣 𑐱𑐵𑐎𑑂𑐫𑐥𑐶𑐣𑑂𑐟 𑐱𑑂𑐬𑐰𑐞𑐎𑐸𑐩𑐵𑐬 𑐱𑑂𑐬𑐾𑐲𑑂𑐛𑑄 𑐰 𑐡𑐧𑐹𑐫𑐵 𑐮𑑂𑐫𑐹 𑐣𑐵𑐫𑑀 𑐱𑑂𑐬𑐡𑑂𑐢𑐵𑐎𑐩𑐮 𑐟𑐵𑐩𑑂𑐬𑐵𑐎𑐵𑐬𑑄 𑐏𑐵𑐡𑐵 𑐎𑑂𑐰𑐏𑐵𑐫𑑂𑐎𑐵 𑐮𑐳𑐎𑐸𑐳 𑐫𑐵𑐣𑐵𑐡𑐷𑐐𑐸 𑐏𑑅 𑑋

𑐣𑐾𑐥𑐵𑐮𑑄 𑐱𑐶𑐎𑐵𑐐𑑀 𑐗𑐵𑐫𑐵 𑐔𑑂𑐰𑐣𑐵𑐡𑐷𑐩𑑂𑐴 𑐩𑐹𑐥𑐵𑐴𑐵𑑃 𑐎𑐵𑐛𑐩𑐵𑐜𑑁𑑄 𑐮𑐾𑐜𑐶 𑐖𑐾𑐳𑐶𑐳𑐫𑐵 𑐥𑐸𑐮𑐵𑑄𑐩𑑂𑐴 𑐥𑑂𑐬𑐾𑐳𑐶𑐜𑐾𑐣𑑂𑐚 𑐰 𑐳𑑂𑐰𑐣𑐶𑐐𑑅 𑐀𑐔𑐵𑐬𑐫𑐵 𑐴𑐵𑐩𑐵 𑐥𑐸𑐲𑑂𑐥𑐴𑐶𑐬𑐵 𑐟𑐸𑐮𑐵𑐢𑐬𑐫𑐵 𑐩𑑂𑐴𑐳𑐷𑐎𑐵 𑐡𑐧𑐹𑐫𑐵 𑐥𑐸𑐮𑐵𑑄𑐩𑑂𑐴 𑐣𑐵𑐫𑑀 𑐎𑐾𑐱𑐬𑐩𑐵𑐣 𑐟𑐵𑐩𑑂𑐬𑐵𑐎𑐵𑐬𑑄 𑐧𑐶𑐫𑐵𑐡𑐷𑐐𑐸 𑐏𑑅 𑑋

𑐣𑐾𑐰𑐵𑑅 𑐎𑐎𑑂𑐲𑐵 𑐳𑑄𑐔𑐵𑐮𑐣𑐫𑐵 𑐎𑐖𑐶 𑐖𑐸𑐣𑐸𑐎𑐩𑐮 𑐟𑐵𑐩𑑂𑐬𑐎𑐵𑐬𑑄 𑐣𑐾𑐰𑐵𑑅 𑐨𑐵𑐫𑑂 𑐳𑑂𑐫𑐣𑐾𑐐𑐸 𑐐𑐸𑐎𑐠𑑄 𑐣𑑂𑐴𑑂𑐫𑐵𑐎𑐵 𑐫𑑄𑐎𑐾𑐐𑐸 𑐢𑐿𑐐𑐸 𑐧𑐵𑐬𑐾 𑐕𑐟𑑂𑐰𑐵𑑅𑐔𑐵 𑐣𑐸𑐐𑑅𑐏𑑃 𑐟𑐫𑐵𑐡𑐷𑐐𑐸 𑐏𑑅 𑑋

𑐄𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐩𑐹𑐥𑐵𑐴𑐵𑑃 𑐥𑐸𑐲𑑂𑐥𑐴𑐶𑐬𑐵 𑐟𑐸𑐮𑐵𑐢𑐬 𑐣𑐵𑐥 𑐣𑐾𑐥𑐵𑐮𑐫𑑂 𑐑𑐬𑐾𑐮𑐸 𑐄𑐡𑑂𑐫𑑀𑐐 𑐰 𑐩𑐶𑐳𑐵 𑐣𑐾𑐟𑐺𑑂𑐟𑑂𑐰 𑐰𑐶𑐲𑐫𑐎 𑐀𑐣𑑂𑐟𑐬𑐎𑑂𑐬𑐶𑐫𑐵 𑐖𑑂𑐫𑐵𑐗𑑂𑐰𑑅 𑐣𑑄 𑐖𑐹𑐐𑐸 𑐏𑑅 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐳𑐨𑐵𑐣𑐵𑐫𑑀 𑐡𑐫𑐵𑐬𑐟𑑂𑐣 𑐱𑐵𑐎𑑂𑐫𑑄 𑐣𑐾𑐥𑐵𑐮𑐨𑐵𑐲𑐵 𑐳𑑂𑐫𑐣𑐾𑐐𑐸 𑐰 𑐳𑐫𑐾𑐎𑐾 𑐩𑐵𑑅𑐐𑐸 𑐁𑐰𑐱𑑂𑐫𑐎𑐟𑐵 𑐧𑐵𑐬𑐾 𑐢𑑂𑐰𑐵𑐠𑐸𑐂𑐎𑐵𑑅 𑐡𑐷𑐐𑐸 𑐏𑑅 𑑋 𑐖𑑂𑐫𑐵𑐗𑑂𑐰𑐮𑐫𑑂 𑐱𑑂𑐬𑐰𑐞𑐎𑐸𑐩𑐵𑐬 𑐱𑑂𑐬𑐾𑐲𑑂𑐛𑐥𑐵𑐏𑐾𑑄 𑐡𑐧𑐹𑐫𑐵 𑐐𑐟𑐶𑐰𑐶𑐢𑐶 𑐧𑐵𑐬𑐾 𑐢𑐵𑐬𑐞𑐵 𑐟𑐫𑐵𑐡𑐷𑐐𑐸 𑐏𑑅𑐳𑐵 𑐖𑐸𑐣𑐸𑐎𑐩𑐮 𑐟𑐸𑐮𑐵𑐢𑐬𑑄 𑐎𑐎𑑂𑐲𑐵𑐫𑑂 𑐧𑑂𑐰𑐟𑐶 𑐎𑐫𑐵𑐡𑐷𑐥𑐶𑑄 𑐰 𑐖𑑂𑐫𑐵𑐗𑑂𑐰𑑅 𑐟𑐵𑑅𑐮𑐵𑐎𑐵𑐡𑐷𑐥𑐶𑐣𑑂𑐟 𑐳𑐸𑐨𑐵𑐫𑑂 𑐡𑐾𑐕𑐵𑐫𑐵𑐡𑐷𑐐𑐸 𑐏𑑅 𑑋

𑐱𑐸𑑂𑐲𑐩𑐵 𑐱𑑂𑐬𑐾𑐲𑑂𑐛 𑐰 𑐰𑐶𑐰𑐾𑐎 𑐱𑑂𑐬𑐾𑐲𑑂𑐛𑐥𑐶𑐣𑑂𑐳𑑄 𑐣𑑂𑐴𑑂𑐫𑐵𑐎𑐵𑐡𑐷𑐐𑐸 𑐄𑐐𑐸 𑐖𑑂𑐫𑐵𑐗𑑂𑐰𑑅 𑐱𑐶𑐎𑐵𑐐𑑀 𑐥𑐧𑑂𑐮𑐶𑐎 𑐮𑐵𑐂𑐰𑐾𑐬𑐷𑐫𑐵 𑐎𑐎𑑂𑐲𑐫𑑂 𑐖𑐹𑐐𑐸 𑐏𑑅 𑑋

–𑐳𑐸𑐐𑐟 𑐬𑐟𑑂𑐣 𑐳𑐶𑐣𑑂𑐡𑐸𑐬𑐵𑐎𑐵𑐬

Leave a comment