𑐰𑐶𑐡𑑂𑐫𑐵𑐬𑑂𑐠𑐷 𑐰 𑐎𑐮𑐾𑐖


#𑐳𑐸𑐬𑐾𑐱 𑐩𑐵𑐣𑐣𑑂𑐢𑐬

𑐳𑐸𑐬𑐾𑐱 𑐩𑐵𑐣𑐣𑑂𑐢𑐬

𑐊𑐳𑐃𑐃𑐫𑐵 𑐮𑐶𑐔𑑂𑐰𑑅 𑐥𑐶𑐴𑐵𑑄 𑐰𑐫𑐾𑐰𑑄 𑐱𑐶𑐎𑑂𑐲𑐵 𑐏𑑂𑐫𑐮𑐫𑑂 𑐩𑑀𑐴𑐣𑐶 𑐱𑐸𑐬𑐸 𑐖𑐸𑐂 𑑋 𑐠𑐷𑐠𑐷 𑐐𑑂𑐬𑐾𑐜 𑐴𑐫𑐵𑑅 𑐥𑐵𑐳 𑐖𑐹𑐥𑐶𑑄 𑐥𑑂𑐫𑑄𑐐𑐹 𑐮𑐵𑐏 𑐰𑐶𑐡𑑂𑐫𑐵𑐬𑑂𑐠𑐷𑐟𑐫𑑂𑐟 𑐳𑐵𑐮𑐾𑐐𑐸 𑐮𑐵𑐐𑐶𑑄 𑐦𑐸𑐎𑑂𑐎 𑐴𑐾 𑐎𑐮𑐾𑐖𑐟𑐫𑑂𑐳𑑄 𑐖𑐶𑐎𑑂𑐰 𑐧𑑅 𑐥𑐶𑐎𑐫𑐵𑑅 𑐖𑐵𑑅 𑐰𑐵𑑄𑐕𑑂𑐰𑐫𑐾𑐐𑐸 𑐩𑑁𑐳𑐩 𑐣𑑄 𑐠𑑂𑐰𑐴𑐾 𑐏𑑅 𑑋 𑐠𑑂𑐰 𑐂𑐮𑐫𑑂 𑐰𑐶𑐡𑑂𑐫𑐵𑐬𑑂𑐠𑐷𑐟𑐫𑑂𑐟 𑐁𑐎𑐬𑑂𑐲𑐶𑐟 𑐫𑐵𑐫𑐾𑐫𑐵 𑐮𑐵𑐐𑐶𑑄 𑐎𑐮𑐾𑐖𑐟𑐫𑑂𑐳𑑄 𑐠𑐖𑑂𑐫𑐵𑑅 𑐠𑐖𑑂𑐫𑐵𑑅𑐐𑐸 𑐏𑑃 𑐥𑐶𑐟 𑐴𑐂 𑐎𑐶 𑐰𑐶𑐡𑑂𑐫𑐵𑐬𑑂𑐠𑐷𑐟𑐫𑑂𑐳𑑄 𑐩𑐵𑑄𑐀𑐧𑐸𑑄 𑐢𑐵𑑅𑐐𑐸 𑐏𑑃 𑐟𑐎 𑐴𑐾 𑐩𑐣𑑂𑐫𑑃𑐳𑐾 𑐰𑐴𑐾 𑐎𑐮𑐾𑐖𑐫𑐵 𑐢𑐵𑐥𑐹 𑐮𑐶𑐄 𑐮𑐶𑐄 𑐧𑑂𑐰𑐵𑑃𑐫𑑂 𑐰𑐣𑐷 𑑋

𑐄𑐎𑐶𑑄 𑐠𑐖𑑂𑐫𑐵𑑅𑐐𑐸 𑐀𑐰𑐳𑑂𑐠𑐵𑐫𑑂 𑐐𑐣 𑐎𑐮𑐾𑐖𑐫𑑂 𑐧𑑂𑐰𑑄𑐳𑐵 𑐖𑐷 𑐢𑐎𑐵𑑅 𑐔𑑂𑐰𑐵𑐂𑐳 𑐫𑐵𑐫𑐾𑐐𑐸 𑐖𑑂𑐫𑐵 𑐟𑐳𑐎𑑄 𑐠𑐵𑐎𑐸 𑑋 𑐕𑐾𑑃𑐫𑑂 𑐫𑐡𑐶 𑐨𑐔𑐵 𑐧𑐵𑑄𑐮𑐵𑐎 𑐐𑐵𑐂𑐜 𑐫𑐵𑐫𑐾𑐐𑐸 𑐰𑑂𑐫𑐰𑐳𑑂𑐠𑐵 𑐩𑐖𑐸𑐮 𑐢𑐵𑑅𑐳𑐵 𑐰𑐶𑐡𑑂𑐫𑐵𑐬𑑂𑐠𑐷𑐟𑐫𑑂𑐳𑑄 𑐰𑐶𑐖𑑂𑐘𑐵𑐥𑐣𑐫𑐵𑐟 𑐴𑐾 𑐩𑐹 𑐁𑐢𑐵𑐬 𑐡𑐫𑐾𑐎𑐷 𑑋 𑐀𑐮𑐾 𑐄𑐎𑐶𑐫𑐵 𑐴𑐾 𑐮𑐶𑐄 𑐮𑐶𑐄 𑐰𑐣𑐵𑑅 𑐎𑐮𑐾𑐖 𑐔𑑂𑐰𑐵𑐂𑐳 𑐫𑐵𑐂 𑐐𑐸𑐐𑐸 𑐥𑐵𑐫𑑂𑐕𑐶 𑐴𑐾 𑐖𑐸𑐂 𑐢𑐂𑐐𑐸 𑐕𑐸𑑄 𑐐𑑂𑐫𑐵𑐬𑐾𑐣𑑂𑐚𑐷 𑐩𑐡𑐸 𑑋

𑐐𑐸𑐮𑐶𑑄 𑐰𑐶𑐡𑑂𑐫𑐵𑐬𑑂𑐠𑐷𑐟 𑐮𑐵 𑐠𑐖𑑂𑐫𑐵𑑅𑐥𑐶𑑄 𑐣𑑄 𑐥𑐶𑐴𑐵𑑄 𑐰𑐂 𑐐𑐸𑐥𑐶𑑄 𑐎𑐮𑐾𑐖𑐫𑐵 𑐧𑐵𑑄𑐮𑐵𑑅𑐐𑐸 𑐨𑐰𑐣 𑐖𑐎 𑐳𑑂𑐰𑐫𑐵𑑅 𑐴𑐾 𑐩𑐏𑑂𑐏 𑐖𑐸𑐂 𑐰 𑐖𑐶 𑐮𑐵 𑐠𑐣 𑐴𑐾 𑐧𑑂𑐰𑐣𑐾𑐐𑐸 𑐢𑐎𑐵𑑅 𑐖𑐶𑐡𑑂𑐡𑐷 𑐫𑐵𑐂 𑑋 𑐠𑑁𑑄𑐎𑐣𑑂𑐴𑐫𑑂𑐫𑐵 𑐎𑐮𑐾𑐖 𑐨𑐰𑐣 𑐐𑐸𑐐𑐸𑑄 𑐦𑐵𑐂𑐨 𑐳𑑂𑐚𑐵𑐬 𑐴𑑀𑐚𑐮 𑐳𑑂𑐰𑐫𑐵𑑄 𑐎𑐩 𑐩𑐖𑐹 𑑋 𑐄𑐎𑐶𑐫𑐵 𑐔𑐩𑐎 𑐡𑐩𑐎𑑄 𑐴𑐾 𑐰𑐶𑐡𑑂𑐫𑐵𑐬𑑂𑐠𑐷𑐫𑐵𑐟 𑐃𑐃 𑐥𑑄𑐎𑐵 𑐧𑐷 𑑋 𑐐𑐸𑐮𑐶𑑄 𑐰𑐶𑐡𑑂𑐫𑐵𑐬𑑂𑐠𑐷 𑐠𑑅 𑐫𑑅𑐩𑑂𑐴 𑐥𑐵𑐳𑐵 𑐐𑐣 𑐰𑐣, 𑐖𑐶 𑐣𑑄 𑐀𑐣 𑐴𑐾 𑐰𑐣𑐾 𑐢𑐵𑐂𑐥𑐶𑑄 𑐣𑑄 𑐥𑐶𑐴𑐵𑑄 𑐰𑐂 𑑋

𑐠𑑂𑐰 𑐥𑐹𑐬𑐵 𑐴𑐾 𑐃𑐃 𑐥𑐣𑐷𑐐𑐸 𑐃 𑐏𑑅 𑑋 𑐟𑐬 𑐎𑐮𑐾𑐖 𑐔𑑂𑐰𑐵𑐂𑐳 𑐫𑐵𑐫𑐾𑐧𑐮𑐫𑑂 𑐀𑐨𑐶𑐨𑐵𑐰𑐎𑐫𑐵 𑐁𑐬𑑂𑐠𑐶𑐎 𑐀𑐰𑐳𑑂𑐠𑐵 𑐕𑐸 𑐡𑐸 𑐢𑐂𑐐𑐸 𑐏𑑃𑐫𑐵𑐟 𑐣𑑄 𑐰𑐶𑐡𑑂𑐫𑐵𑐬𑑂𑐠𑐷𑐟𑐫𑑂𑐳𑑄 𑐢𑑂𑐫𑐵𑐣 𑐧𑐷𑐩𑐵𑑅 𑑋 𑐕𑐵𑐫𑑂𑐢𑐵𑑅𑐳𑐵𑑄 𑑑𑑐 𑐎𑐎𑑂𑐲𑐵 𑐧𑑂𑐰𑐣𑐵𑐔𑑂𑐰𑑄𑐐𑐸 𑐂𑐮𑐫𑑂 𑐟𑐎 𑐀𑐨𑐶𑐨𑐵𑐰𑐎𑑄 𑐐𑐸𑐮𑐶 𑐢𑑂𑐫𑐧𑐵 𑐏𑐬𑑂𑐔 𑐫𑐵𑐂𑐐𑐸 𑐏𑑅, 𑑑𑑑 𑐫𑑂 𑐰𑐣𑐾𑐳𑐵𑐟𑐎𑐶 𑐄𑐎𑐶𑐫𑐵 𑐀𑐣𑐸𑐥𑐵𑐟 𑐀𑐣𑐸𑐩𑐵𑐣 𑐴𑐾 𑐫𑐵𑐫𑐾 𑐩𑐦𑐫𑐾𑐎 𑐥𑐵𑐫𑐾𑐢𑐸𑑄𑐎𑐷 𑑋 𑐰 𑐴𑐿𑐳𑐶𑐫𑐟 𑐀𑐨𑐶𑐨𑐵𑐰𑐎𑐫𑐵𑐎𑐾 𑐡𑐸 𑐮𑐵𑐎𑐶 𑐩𑐡𑐸, 𑐠𑑂𑐰 𑐣𑑄 𑐢𑑂𑐫𑐵𑐣 𑐧𑐷𑐩𑐵𑑅𑐐𑐸 𑐰𑐶𑐲𑐫 𑐖𑐸𑐂 𑑋

𑐰𑐶𑐖𑑂𑐘𑐵𑐥𑐣𑐫𑐵 𑐔𑐩𑐎 𑐡𑐩𑐎𑐫𑑂 𑐖𑐎 𑐧𑑂𑐰𑐵𑑃𑐫𑑂 𑐖𑐸𑐮 𑐢𑐵𑑅𑐳𑐵 𑐠𑑂𑐰 𑐥𑐎𑑂𑐲𑐫𑐵𑐟 𑐢𑑂𑐫𑐵𑐣 𑐧𑐷 𑐏𑐣𑐷 𑐩𑐏𑐸 𑑋 𑐱𑐶𑐎𑑂𑐲𑐵𑐰𑐶𑐡𑑂𑐟𑐫𑑂𑐳𑑄 𑐢𑐵𑐂, 𑐥𑐝𑐵𑐃 𑐧𑐵𑑄𑐮𑐵𑑅 𑐮𑐵𑐎𑐶 𑐧𑐵𑑄𑐩𑐮𑐵𑑅 𑐢𑐂𑐐𑐸 𑐏𑑃𑐫𑐵 𑐣𑑂𑐴𑐵𑐥𑐵𑑄𑐐𑐸 𑐣𑐶𑐬𑑂𑐢𑐵𑐬𑐞 𑐰𑐶𑐡𑑂𑐫𑐵𑐬𑑂𑐠𑐷 𑐠𑐩𑑂𑐴𑑄 𑐴𑐾 𑐫𑐵𑐫𑐾𑐩𑐵𑑅 𑑋 𑐫𑐡𑐶 𑐰𑐶𑐡𑑂𑐫𑐵𑐬𑑂𑐠𑐷 𑐠𑑅 𑐴𑐾 𑐧𑐵𑑄𑐮𑐵𑐎 𑐧𑑂𑐰𑐣𑐷𑐩𑑂𑐴 𑐖𑐸𑐮 𑐢𑐵𑑅𑐳𑐵 𑐰𑐫𑐵𑐟 𑐎𑐮𑐾𑐖 𑐣𑑂𑐴𑑂𑐫𑐵𑐐𑐸 𑐖𑐹𑐳𑐵𑑄 𑐩𑐟𑐮𑐧 𑐡𑐂 𑐩𑐏𑐸 𑑋 𑐰𑐶𑐡𑑂𑐫𑐵𑐬𑑂𑐠𑐷 𑐩𑐧𑑂𑐰𑐣𑐷𑐩𑑂𑐴 𑐖𑐸𑐮 𑐢𑐵𑑅𑐳𑐵 𑐰𑐫𑐵𑐟 𑐣𑑂𑐴𑑂𑐫𑐵𑐐𑐸 𑐴𑐾 𑐎𑐮𑐾𑐖𑐫𑑂 𑐟𑐫𑐵 𑐧𑐶𑐄𑐳𑐵𑑄 𑐰𑑄 𑐧𑐵𑑄𑐮𑐵𑑅𑐐𑐸 𑐮𑑂𑐫𑐵𑑅 𑐴𑐫𑐾 𑐦𑐂 𑐩𑐏𑐸 𑑋

𑐧𑐵𑑄𑐮𑐵𑑅𑐐𑐸 𑐢𑐵𑑅𑐐𑐸 𑐎𑐮𑐾𑐖𑐟𑐫𑑂𑐳𑑄 𑐧𑐵𑑄𑐮𑐵𑑅𑐥𑐶𑑄 𑐴𑐾 𑐖𑐎 𑐰𑐶𑐡𑑂𑐫𑐵𑐬𑑂𑐠𑐷 𑐎𑐵𑐂 𑑋 𑐀𑐥𑑂𑐰𑑅 𑐣𑐩𑑂𑐧𑐬 𑐴𑐫𑐵𑑅 𑐊𑐳𑐃𑐃 𑐥𑐵𑐳 𑐖𑐹𑐥𑐶𑑄 𑐰𑐶𑐡𑑂𑐫𑐵𑐬𑑂𑐠𑐷𑐟𑐫𑑂𑐟 𑐢𑑂𑐫𑐧𑐵 𑐴𑐾 𑐧𑐶𑐫𑐵𑑅 𑐣𑑂𑐫𑐵𑐣𑐵 𑐎𑐵𑐂 𑑋 𑐖𑐧 𑐰𑑄 𑐎𑐵𑐂𑐥𑐶𑑄 𑐰𑐶𑐡𑑂𑐫𑐵𑐬𑑂𑐠𑐷𑐟 𑐴𑐾 𑐧𑐵𑑄𑐮𑐵𑑅𑐥𑐶𑑄 𑐏𑑅𑐳𑐵 𑐰 𑐎𑐮𑐾𑐖𑑄 𑐥𑐶𑐎𑐵𑐂𑐐𑐸 𑐮𑐶𑐔𑑂𑐰𑑅 𑐀𑐰𑐱𑑂𑐫 𑐴𑐾 𑐧𑐵𑑄𑐮𑐵𑐂 𑑋 𑐠𑐸𑐎𑐶𑐫𑐵𑐟 𑐎𑐮𑐾𑐖 𑐴𑐾 𑐧𑐵𑑄𑐮𑐵𑐣𑐵𑑅 𑐧𑐵𑑄𑐮𑐵𑑅𑐐𑐸 𑐮𑐶𑐔𑑂𑐰𑑅 𑐰𑑅𑐐𑐸 𑐏𑑅 𑐢𑐵𑐫𑐾 𑐦𑐂 𑐩𑐏𑐸 𑑋 𑐠𑑂𑐰 𑐮𑐵 𑐧𑐵𑑄𑐮𑐵𑑅𑐥𑐶𑑄 𑐰𑐶𑐡𑑂𑐫𑐵𑐬𑑂𑐠𑐷𑐟 𑐰𑑄𑐐𑐸 𑐖𑐸𑐫𑐵𑑅 𑐎𑐮𑐾𑐖𑐫𑐵 𑐮𑐶𑐔𑑂𑐰𑑅 𑐧𑐵𑑄𑐮𑐵𑑅𑐐𑐸 𑐥𑐶𑐴𑐵𑑄 𑐰𑑅𑐐𑐸 𑐏𑑅 𑑋

𑐠𑐸𑐎𑐶𑑄 𑐎𑑂𑐫𑐣𑐷 𑐎𑐶 𑐎𑐾𑐰𑐮 𑐎𑐮𑐾𑐖𑑄 𑐖𑐎 𑐰𑐶𑐡𑑂𑐫𑐵𑐬𑑂𑐠𑐷𑐫𑐵𑐟 𑐧𑐵𑑄𑐮𑐵𑐎𑐷𑐐𑐸 𑐩𑐏𑐸 𑑋 𑐧𑐬𑐸 𑐰𑐶𑐡𑑂𑐫𑐵𑐬𑑂𑐠𑐷𑑄 𑐎𑐮𑐾𑐖𑐫𑐵𑐟 𑐧𑐵𑑄𑐮𑐵𑐎𑐵 𑐧𑐷𑐐𑐸 𑐏𑑅 𑑋 𑐧𑐵𑑄𑐮𑐵𑑅𑐥𑐶𑑄 𑐰𑐶𑐡𑑂𑐫𑐵𑐬𑑂𑐠𑐷𑐟 𑐴𑐫𑐵𑑅 𑐎𑐮𑐾𑐖𑑄 𑐠𑑅 𑐧𑐵𑑄𑐮𑐵𑑅 𑐢𑐎𑐵𑑅 𑐰𑐶𑐖𑑂𑐘𑐵𑐥𑐣 𑐫𑐵𑐂𑐐𑐸 𑐏𑑅 𑑋 𑐄𑐎𑐶𑑄 𑐰𑐶𑐡𑑂𑐫𑐵𑐬𑑂𑐠𑐷𑐟𑐫𑑂𑐳𑑄 𑐠𑐸𑐂𑐎𑐾𑐩𑐵𑑅, 𑐧𑐵𑑄𑐮𑐵𑐫𑐾𑐩𑐵𑑅𑐐𑐸 𑐎𑐮𑐾𑐖 𑐩𑐏𑐸, 𑐧𑐵𑑄𑐮𑐵𑐫𑐾𑐩𑐵𑑅𑐐𑐸 𑐮𑐵 𑐳𑑂𑐰𑐫𑐩𑑂 𑐠𑑅 𑐏𑑅 𑑋 𑐫𑐡𑐶 𑐠𑑅 𑐧𑐵𑑄𑐮𑐵𑐟 𑐢𑐵𑑅𑐳𑐵 𑐎𑐮𑐾𑐖 𑐕𑐐𑐸𑐮𑐶𑑄 𑐧𑐵𑑄𑐮𑐵𑐂 𑑋 𑐧𑐵𑑄𑐮𑐵𑑅𑐥𑐶𑑄 𑐰𑐶𑐡𑑂𑐫𑐵𑐬𑑂𑐠𑐷𑐟𑐫𑑂𑐐𑐸 𑐎𑐵𑐬𑐞𑑄 𑐎𑐮𑐾𑐖 𑐧𑐵𑑄𑐮𑐵𑐂𑐐𑐸 𑐏𑑅 𑑋

𑐠𑑁𑑄𑐎𑐣𑑂𑐴𑐫𑑂 𑐟𑑅𑐢𑑄𑐐𑐸 𑐰 𑐣𑐵𑑄𑐖𑐵𑑅𑐐𑐸 𑐢𑐵𑑅𑐐𑐸 𑐎𑐮𑐾𑐖𑐟𑐫𑑂𑐳𑑄 𑐰𑐶𑐡𑑂𑐫𑐵𑐬𑑂𑐠𑐷𑐟𑐫𑑂𑐟 𑐧𑐷𑐐𑐸 𑐣𑑂𑐴𑐵𑐥𑐵𑑄𑐐𑐸 𑐐𑑂𑐫𑐵𑐬𑐾𑐣𑑂𑐚𑐷 𑐏𑑅, 𑐠𑐣 𑐧𑑂𑐰𑐣 𑐢𑐵𑑅𑐳𑐵 𑐰𑐶𑐡𑐾𑐱 𑐰𑐣𑐾𑐟 𑐀𑑅𑐥𑐸𑐂 𑑋 𑐀𑐣 𑐨𑐬𑑂𑐣𑐵 𑐖𑐹 𑐰𑐣𑐷𑐥𑐶𑑄 𑐰𑐶𑐡𑑂𑐫𑐵𑐬𑑂𑐠𑐷𑐟𑐫𑑂𑐐𑐸 𑐣𑑂𑐴𑐵𑐥𑐵𑑄𑐐𑐸 ‘𑐎𑐣𑑂𑐳𑐬𑑂𑐣’ 𑐣𑑄 𑐰𑐴𑐾 𑐖𑐸𑐫𑐵𑐔𑑂𑐰𑐣𑐷 — 𑐠𑐣 𑐧𑑂𑐰𑐣𑐵𑑄 𑐰𑐶𑐡𑐾𑐱 𑐰𑐣𑐾 𑐏𑐣𑐷 𑐮𑐵𑐎𑐶 𑐏𑐣𑐷 𑐩𑐏𑐸 ? 𑐗𑐷𑐐𑐸 𑐎𑐮𑐾𑐖𑐟𑐫𑑂𑐐𑐸 𑐱𑐶𑐎𑑂𑐲𑐵 𑐠𑑅𑐐𑐸 𑐡𑐾𑐱𑐫𑐵 𑐳𑐾𑐰𑐵 𑐫𑐵𑐂𑐥𑐶𑑄 𑐖𑐣𑐱𑐎𑑂𑐟𑐶 𑐟𑐫𑐵𑐬 𑐫𑐵𑐫𑐾𑐐𑐸𑐥𑐵𑐏𑐾 𑐩𑐏𑐸 𑐰𑐶𑐡𑐾𑐱𑐫𑐵 𑐳𑐾𑐰𑐵 𑐫𑐵𑐂𑐥𑐶𑑄 𑐖𑐣𑐱𑐎𑑂𑐟𑐶 𑐟𑐫𑐵𑐬 𑐫𑐵𑐫𑐾𑐐𑐸𑐥𑐵𑐏𑐾 𑐮𑐎𑑂𑐲𑐶𑐟 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋

𑐐𑐸𑐐𑐸 𑐎𑐮𑐾𑐖𑐫𑑂 𑐧𑑂𑐰𑐣𑐷𑐥𑐶𑑄 𑐐𑑂𑐰𑑅𑐩𑑂𑐴 𑐰𑐶𑐡𑑂𑐫𑐵𑐬𑑂𑐠𑐷 𑐰𑐶𑐡𑐾𑐱 𑐰𑐣𑐾𑐟 𑐳𑐦𑐮 𑐖𑐹𑐐𑐸 𑐡𑐸, 𑐄𑐎𑐶𑐫𑐵 𑐴𑐾 𑐁𑐢𑐵𑐬𑐫𑑂 𑐎𑐮𑐾𑐖𑐟𑐫𑑂𑐐𑐸 𑐣𑑄 𑐳𑐦𑐮𑐟𑐵 𑐣𑐵𑐥𑐾 𑐫𑐵𑐫𑐾𑐐𑐸 𑐖𑑂𑐫𑐵 𑐖𑐸𑐂 𑑋
𑐠𑐸𑐎𑐶𑐫𑐵 𑐡𑑀𑐲 𑐎𑐮𑐾𑐖𑐟𑐫𑑂𑐟 𑐧𑐶𑐫𑐵𑑄 𑐩𑐖𑐶𑐄 𑑋 𑐡𑑀𑐲 𑐬𑐵𑐖𑑂𑐫𑐫𑐵𑐐𑐸 𑐴𑐾 𑐏𑑅 𑑋 𑐕𑐵𑐫𑑂𑐢𑐵𑑅𑐳𑐵𑑄 𑐮𑐏𑑁𑑄 𑐟𑐎𑐵 𑐏𑐬𑑂𑐔 𑐫𑐵𑐣𑐵𑑅 𑐡𑑃 𑐡𑑃 𑐟𑐎 𑐁𑐏𑑅 𑐧𑑂𑐰𑐣𑐵𑑄 𑐣𑑄 𑐧𑑂𑐰𑑄𑐥𑐶𑑄 𑐰𑐶𑐡𑑂𑐫𑐵𑐬𑑂𑐠𑐷𑐟𑐫𑑂𑐟 𑐧𑐵𑑄𑐮𑐵𑑅𑐐𑐸 𑐬𑑀𑐖𑐐𑐵𑐬𑐷 𑐬𑐵𑐖𑑂𑐫𑑄 𑐧𑐷 𑐩𑐦𑐸 𑑋

𑐄𑐎𑐶𑑄 𑐠𑑅𑐥𑐶𑑄𑐳𑑄 𑐧𑑂𑐰𑐣𑐵𑑄 𑐴𑐵𑐳𑐶𑐮 𑐫𑐵𑐣𑐵𑐐𑐸 𑐳𑐷𑐥𑐫𑐵 𑐳𑐡𑐸𑐥𑐫𑑀𑐐 𑐫𑐵𑐫𑐾𑐐𑐸 𑐏𑑅𑐳𑐵 𑐠𑑁𑑄 𑐰𑐶𑐡𑐾𑐱 𑐰𑐣𑐾𑐐𑐸 𑐧𑐵𑐴𑐾𑐎 𑐩𑐾𑐐𑐸 𑐰𑐶𑐎𑐮𑑂𑐥 𑐰𑐶𑐡𑑂𑐫𑐵𑐬𑑂𑐠𑐷 𑐰 𑐀𑐨𑐶𑐨𑐵𑐰𑐎𑑄 𑐏𑑄𑐎𑐵𑐔𑑂𑐰𑑄𑐐𑐸 𑐩𑐡𑐸 𑑋 𑐁𑐏𑑅 𑐧𑑂𑐰𑐣𑐾𑐐𑐸 𑐢𑐂𑐐𑐸 𑐴𑐾 𑐰𑐶𑐡𑐾𑐱 𑐰𑐣𑐾𑐟 𑐏𑑅 𑐢𑐂𑐠𑐾𑑄𑐖𑑂𑐫𑐵𑑅𑐐𑐸 𑐠𑐸𑐂𑐎𑐵 𑐁𑑅 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐥𑑂𑐫𑑄𑐐𑐹 𑐮𑐵𑐏 𑐰𑐶𑐡𑑂𑐫𑐵𑐬𑑂𑐠𑐷 𑐕𑐎𑑂𑐰𑐮𑑄 𑐥𑐵𑐳 𑐖𑐹𑐐𑐸 𑐠𑑂𑐰 𑐂𑐮𑐫𑑂 𑐳𑐸 𑐐𑐣 𑐧𑑂𑐰𑐣𑐾𑐐𑐸 𑐢𑐂𑐐𑐸 𑐀𑐣𑑂𑐫𑑁𑐮 𑐰𑐶𑐡𑑂𑐫𑐵𑐬𑑂𑐠𑐷𑐟𑐫𑑂𑐟 𑐮𑐵 𑐡 𑐴𑐾 𑐡𑐸, 𑐣𑐵𑐥𑑄 𑐎𑐮𑐾𑐖𑐟𑐫𑑂𑐟 𑐣𑑄 𑐠𑑂𑐰𑐴𑐾 𑐂𑐮𑐫𑑂 𑐳𑐸 𑐳𑐸 𑐰𑐶𑐡𑑂𑐫𑐵𑐬𑑂𑐠𑐷 𑐖𑑂𑐰𑐣𑐾 𑐩𑐵𑐮𑐷 𑐢𑐂𑐐𑐸 𑐢𑐾𑑄𑐢𑐾𑑄𑐧𑐮𑑂𑐮𑐵𑑅 𑐣𑑄 𑐡𑐸 𑑋

𑐧𑐵𑑄𑐮𑐵𑑅𑐥𑐶𑑄 𑐰𑐶𑐡𑑂𑐫𑐵𑐬𑑂𑐠𑐷 𑐴𑐫𑐾 𑐦𑐟 𑐢𑐵𑑅𑐳𑐵 𑐦𑐮𑐵𑐣𑐵 𑐰𑐶𑐡𑑂𑐫𑐵𑐬𑑂𑐠𑐷 𑐖𑐶𑐩𑐶𑐐𑐸 𑐎𑐮𑐾𑐖𑐫𑑂 𑐧𑑂𑐰𑑄 𑐰𑐮 𑐢𑐎𑐵𑑅 𑐰𑐶𑐖𑑂𑐘𑐵𑐥𑐣 𑐫𑐵𑐫𑐾 𑐡𑐂 𑑋 𑐀𑐮𑐾 𑐰𑐴𑐾 𑐰𑐶𑐡𑑂𑐫𑐵𑐬𑑂𑐠𑐷𑐫𑐵𑐟 𑐳𑑂𑐰𑐫𑐵𑑅 𑐩𑐾𑐥𑐶𑑄 𑐰𑐶𑐡𑑂𑐫𑐵𑐬𑑂𑐠𑐷 𑐄𑐐𑐸 𑐎𑐮𑐾𑐖𑐫𑑂 𑐧𑑂𑐰𑑄 𑐰𑐣𑐷 𑑋 𑐁𑐏𑐶𑐬 𑐰𑐶𑐡𑑂𑐫𑐵𑐬𑑂𑐠𑐷𑐟 𑐎𑐮𑐾𑐖 𑐳𑑂𑐰𑐫𑐵𑑅 𑐩𑐏𑐸 𑐰𑐶𑐡𑑂𑐫𑐵𑐬𑑂𑐠𑐷 𑐴𑐾 𑐳𑑂𑐰𑐫𑐵𑑅 𑐎𑐮𑐾𑐖𑐫𑑂 𑐨𑐬𑑂𑐣𑐵 𑐖𑐹 𑐰𑐣𑐷𑐐𑐸 𑐮𑐵𑐣𑐵𑐔𑑂𑐰𑐣 𑑋 𑐠𑐸𑐎𑐶𑑄 𑐣𑑄 𑐠𑑂𑐰𑐴𑐾 𑐢𑐵𑐂 𑐎𑐶 𑐩𑐹 𑐏𑑃 𑐰𑐶𑐡𑑂𑐫𑐵𑐬𑑂𑐠𑐷 𑐠𑑅𑐴𑐾 𑐏𑑅 𑑋

𑐫𑐡𑐶 𑐰𑐶𑐡𑑂𑐫𑐵𑐬𑑂𑐠𑐷 𑐧𑐵𑑄𑐮𑐵𑐟 𑐢𑐵𑑅𑐳𑐵 𑐄𑐥𑐶𑑄 𑐎𑐮𑐾𑐖𑐫𑐵 𑐮𑐶𑐄 𑐮𑐶𑐄 𑐖𑐸𑐂𑐩𑑂𑐰𑐵𑑅, 𑐎𑐮𑐾𑐖 𑐴𑐾 𑐄𑐩𑐶𑐐𑐸 𑐮𑐶𑐄 𑐮𑐶𑐄 𑐧𑑂𑐰𑐵𑑃𑐫𑑂 𑐰𑐂 𑑋 𑐴𑐬𑐾𑐎 𑐰𑐶𑐡𑑂𑐫𑐵𑐬𑑂𑐠𑐷𑑄 𑐠𑑅 𑐡𑐸𑐣𑐾 𑐠𑑂𑐰 𑐁𑐟𑑂𑐩𑐧𑐮 𑐰𑐶𑐎𑐵𑐳 𑐫𑐵𑐫𑐾 𑐦𑐟 𑐢𑐵𑑅𑐳𑐵 𑐎𑐮𑐾𑐖 𑐩𑐵𑐮𑐾𑐐𑐸 𑐖𑑂𑐫𑐵𑐫𑑂 𑐀𑐮𑐩𑐮 𑐖𑐸𑐫𑐵𑐔𑑂𑐰𑐣𑐾𑐐𑐸 𑐗𑑄𑐗𑐚𑐥𑐵𑐏𑐾𑑄 𑐄𑐥𑐶𑑄 𑐩𑐸𑐎𑑂𑐟 𑐖𑐸𑐂 𑑋