𑐮𑐶𑐥𑐶 𑐐𑐸𑐠𑐶𑐫𑐵 𑐣𑐵𑐫𑑅 𑐥𑐡𑐫𑑂 𑐥𑐸𑐮𑐵𑑄𑐩𑑂𑐴 𑐴𑐾 𑐣𑐵𑐫𑑅 𑐣𑐶𑐬𑐘𑑂𑐖𑐣 𑐟𑐧𑑅𑐫𑐵𑐟 𑐮𑑂𑐫𑐮


𑐮𑐶𑐥𑐶 𑐐𑐸𑐠𑐶𑐫𑐵 𑐣𑐵𑐫𑑅 𑐥𑐡𑐫𑑂 𑐥𑐸𑐮𑐵𑑄𑐩𑑂𑐴 𑐴𑐾 𑐣𑐵𑐫𑑅 𑐣𑐶𑐬𑐘𑑂𑐖𑐣 𑐟𑐧𑑅𑐫𑐵𑐟 𑐮𑑂𑐫𑐮

𑐣𑐾𑐰𑐵: 𑐀𑐣𑐮𑐵𑐂𑐣 𑐣𑑂𑐫𑐸𑐖 | 𑑒𑑐𑑗𑑖 𑐨𑐵𑐡𑑂𑐬 𑑒𑑒, 𑐁𑐂𑐟𑐧𑐵𑐬 𑑑𑑖:𑑔𑑘:𑑑𑑔

𑐣𑐾𑐥𑐵𑐮 𑐮𑐶𑐥𑐶𑐫𑐵 𑐣𑑂𑐴𑐹𑐐𑐸 𑐖𑑂𑐫𑐵𑐳𑐣𑐵 𑐥𑐸𑐔𑑅𑐫𑐵 𑐮𑑂𑐫𑐖𑑂𑐫𑐵 𑐫𑐵𑐫𑐾𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐥𑐸𑐮𑐵𑑄𑐩𑑂𑐴 𑐣𑐵𑐫𑑅 𑐣𑐶𑐬𑐘𑑂𑐖𑐣 𑐟𑐧𑑅𑐫𑐵𑐟 𑐴𑐾 𑐴𑐵𑐎𑐣𑑄 𑐥𑐡𑐫𑑂 𑐮𑑂𑐫𑑅𑐐𑐸 𑐡𑐸 𑑋

𑐣𑐾𑐥𑐵𑐮 𑐮𑐶𑐥𑐶 𑐐𑐸𑐠𑐶𑐫𑐵 𑑑𑑗 𑐎𑑂𑐰𑑅𑐐𑐸 𑐟𑑅𑐩𑐸𑑃𑐖𑑂𑐫𑐵 𑐖𑑂𑐫𑐵𑐗𑑂𑐰𑐮𑐫𑑂 𑐠𑐸𑐎𑐠𑑄 𑐖𑑂𑐫𑐵𑐳𑐣𑐵 𑐥𑐸𑐔𑑅 𑐮𑑂𑐫𑐫𑐾𑐐𑐸 𑐖𑑂𑐫𑐵 𑐖𑐹𑐐𑐸 𑐏𑑅𑐳𑐵 𑐖𑑂𑐫𑐵𑐗𑑂𑐰𑑅 𑐐𑐸𑐠𑐶𑐫𑐵 𑐖𑑂𑐫𑐵𑐎𑐹 𑐫𑐾𑑃𑐫𑐵 𑐟𑑂𑐫𑑅𑐬𑐫𑑂 𑐔𑑂𑐰𑑄𑐐𑐸 𑐳𑐵𑑅𑐣𑐣𑐷𑐂 𑐖𑐹𑐐𑐸 𑐏𑑅𑐳𑐵 𑐖𑑂𑐫𑐵𑐗𑑂𑐰𑑅 𑐣𑑄 𑐐𑐸𑐠𑐶𑐫𑐵 𑐣𑐵𑐫𑑅 𑐣𑐶𑐬𑐘𑑂𑐖𑐣 𑐟𑐧𑑅𑐫𑐵 𑐴𑐾 𑐳𑐨𑐵𑐥𑐟𑐶𑐟𑑂𑐰𑐫𑑂 𑐣𑑂𑐴𑑂𑐫𑐵𑑅𑐐𑐸 𑐏𑑅 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐐𑐸𑐠𑐶𑐫𑐵 𑐕𑑂𑐫𑐵𑐘𑑂𑐖𑐾 𑐥𑐰𑐶𑐟𑑂𑐬 𑐎𑐳𑐵𑑅 𑐣𑑄 𑐰𑐵𑐬𑑂𑐲𑐶𑐎 𑐥𑑂𑐬𑐟𑐶𑐰𑐾𑐡𑐣 𑐣𑑂𑐴𑑂𑐫𑐧𑑂𑐰𑑅𑐐𑐸 𑐏𑑅𑐳𑐵 𑐡𑐵𑑄𑐨𑐬𑐷 𑐄𑐟𑑂𑐟𑐩 𑐳𑐵𑐫𑐩𑐶𑑄 𑐁𑐬𑑂𑐠𑐶𑐎 𑐮𑑂𑐫𑐵𑑅𑐔𑑅 𑐣𑑂𑐴𑑂𑐫𑐧𑑂𑐰𑑅𑐐𑐸 𑐏𑑅 𑑋 𑐀𑐠𑐾𑐴𑐾, 𑐣𑐾𑐥𑐵𑐮 𑐮𑐶𑐥𑐶 𑐐𑐸𑐠𑐶𑑄 𑐣𑐾𑐥𑐵𑐮 𑐮𑐶𑐥𑐶𑐫𑐵 𑐥𑑂𑐬𑐔𑐵𑐬𑐥𑑂𑐬𑐳𑐵𑐬 𑐰 𑐥𑑂𑐬𑐧𑐡𑑂𑐬𑑂𑐢𑐣𑐫𑐵 𑐣𑐶𑐟𑐶𑑄 𑐣𑑂𑐴𑑂𑐫𑐵𑐎𑐾𑐐𑐸 𑐖𑑂𑐫𑐵𑐗𑑂𑐰𑑅𑐫𑐵 𑐰𑐶𑐲𑐫𑐳 𑐐𑐸𑐠𑐶𑐫𑐵 𑐣𑑂𑐰𑐎𑐹 𑐀𑐣𑐶𑐮 𑐳𑑂𑐠𑐵𑐥𑐶𑐟𑑄 𑐣𑑂𑐴𑑂𑐫𑐧𑑂𑐰𑑅𑐐𑐸 𑐏𑑅 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐖𑑂𑐫𑐵𑐳𑐣𑐵 𑐥𑐸𑐔𑑅 𑐮𑑂𑐫𑐫𑐾𑐐𑐸 𑐗𑑂𑐰𑐮𑐫𑑂 𑐀𑐣𑐶𑐮 𑐳𑑂𑐠𑐵𑐥𑐶𑐟𑐫𑐵𑐟 𑐣𑑂𑐰𑐎𑐹, 𑐥𑐰𑐶𑐟𑑂𑐬 𑐎𑐳𑐵𑑅𑐫𑐵𑐟 𑐕𑑂𑐫𑐵𑐘𑑂𑐖𑐾 𑐰 𑐄𑐟𑑂𑐟𑐩 𑐳𑐵𑐫𑐩𑐶𑐫𑐵𑐟 𑐡𑐵𑑄𑐨𑐬𑐷 𑐮𑑂𑐫𑑅𑐐𑐸 𑐏𑑅𑐳𑐵 𑐬𑐩𑐾𑐱𑐩𑐵𑐣 𑐥𑐶𑐫𑐵, 𑐄𑐡𑐾𑐣 𑐣𑑂𑐴𑐹𑐳𑐵𑐫𑐩𑐶, 𑐰𑐶𑐩𑐮𑐵 𑐩𑐵𑐣𑐣𑑂𑐢𑐬, 𑐎𑐩𑐮𑐟𑐵𑐬𑐵 𑐟𑐸𑐮𑐵𑐢𑐬, 𑐰𑐶𑐎𑑂𑐎𑐷 𑐧𑐖𑑂𑐬𑐵𑐔𑐵𑐬𑑂𑐫, 𑐮𑐸𑐩𑐶𑐣 𑐟𑐵𑐩𑑂𑐬𑐵𑐎𑐵𑐬 𑐰 𑐖𑐐𑐟 𑐥𑐵𑐟𑑂𑐫𑐵𑐫𑐵𑐟 𑐖𑑂𑐫𑐵𑐳𑐣𑐵 𑐥𑐸𑐔𑐮𑐫𑑂 𑐡𑐸𑐖𑑅 𑐎𑐠𑑄 𑐮𑑂𑐫𑑅𑐐𑐸 𑐡𑐸 𑑋

𑐐𑐸𑐠𑐶𑐫𑐵 𑐣𑑂𑐴𑐹𑐐𑐸 𑐖𑑂𑐫𑐵𑐳𑐣𑐵 𑐥𑐸𑐔𑑅 𑐮𑑂𑐫𑐫𑐾𑐐𑐸 𑐣𑐶𑐟𑐶𑑄 𑐥𑑂𑐬𑐵𑐖𑑂𑐘𑐥𑐶𑑄 𑐥𑑂𑐬𑐖𑑂𑐘𑐵𑐩𑐵𑐣 𑐱𑐵𑐎𑑂𑐫 𑐰 𑐬𑐵𑐖𑐾𑐣𑑂𑐡𑑂𑐬 𑐱𑐵𑐎𑑂𑐫 𑐡𑐸𑐖𑑅 𑐡𑐹𑐐𑐸 𑐣𑐶𑐬𑑂𑐰𑐵𑐔𑐣 𑐎𑐩𑐶𑐚𑐷 𑐣𑑄 𑐣𑐷𑐳𑑂𑐰𑑄𑐐𑐸 𑐏𑑅𑐳𑐵 𑐄𑐐𑐸 𑐣𑐶𑐬𑑂𑐰𑐵𑐔𑐣 𑐎𑐩𑐶𑐚𑐷𑐫𑐵 𑐳𑑄𑐫𑑀𑐖𑐣 𑐎𑐶𑐬𑐞 𑐱𑐵𑐎𑑂𑐫𑑄 𑐫𑐵𑐣𑐵𑐡𑐷𑐐𑐸 𑐏𑑅 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐐𑐸𑐠𑐶𑐫𑐵 𑐰𑐶𑐢𑐵𑐣 𑐳𑑄𑐱𑑀𑐢𑐣 𑐫𑐵𑐫𑐾𑐐𑐸 𑐮𑐶𑐳𑐾𑐮𑐶𑐳𑐾𑑄 𑐁𑑅𑐫𑐵 𑐎𑐵𑐬𑑂𑐫𑐎𑐵𑐮𑐫𑑂 𑐣𑐾𑐥𑐵𑐮 𑐮𑐶𑐥𑐶 𑐥𑑂𑐬𑐧𑐬𑑂𑐡𑑂𑐢𑐣𑐫𑐵 𑐣𑐶𑐟𑐶𑑄 𑐣𑑂𑐴𑐹𑐎𑐠𑑄𑐫𑐵 𑐥𑐮𑐵𑑅 𑐣𑑂𑐴𑑂𑐫𑐵𑐎𑐾𑐐𑐸 𑐏𑑃𑐫𑐵 𑐖𑐵𑐣𑐎𑐵𑐬𑐷 𑐴𑐵𑐎𑐣𑑄 𑐣𑑂𑐴𑐹𑐩𑑂𑐴 𑐣𑐵𑐫𑑅 𑐖𑐸𑐂𑐟 𑐟𑐵𑑅𑐮𑐵𑑅𑐩𑑂𑐴 𑐣𑐶𑐬𑐘𑑂𑐖𑐣 𑐟𑐧𑑅 𑐣𑑄 𑐠𑑅𑐐𑐸 𑐣𑐸𑐐𑑅𑐏𑑃 𑐟𑐫𑐾𑐐𑐸 𑐗𑑂𑐰𑐮𑐫𑑂 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐷𑐐𑐸 𑐏𑑅 𑑋