𑐩𑑄𑐐𑐮 𑐐𑑂𑐬𑐴𑐫𑑂 𑐖𑐷𑐰𑐣𑐫𑐵 𑐳𑐩𑑂𑐨𑐵𑐰𑐣𑐵


𑐩𑑄𑐐𑐮 𑐐𑑂𑐬𑐴𑐫𑑂 𑐖𑐷𑐰𑐣𑐫𑐵 𑐳𑐩𑑂𑐨𑐵𑐰𑐣𑐵

𑐰𑐿𑐖𑑂𑐘𑐵𑐣𑐶𑐎𑐟𑐫𑑂𑐳𑑄 𑐩𑑄𑐐𑐮 𑐐𑑂𑐬𑐴 𑐟𑐬𑐮 𑐬𑐹𑐥𑑄 𑐔𑑂𑐰𑐣𑐵𑐔𑑂𑐰𑑄𑐐𑐸 𑐮𑑅𑐫𑐵 𑐀𑐳𑑂𑐟𑐶𑐟𑑂𑐰 𑐮𑐸𑐂𑐎𑐾𑐰𑑄 𑐩𑑄𑐐𑐮𑐫𑑂 𑐖𑐷𑐰𑐣 𑐳𑐩𑑂𑐨𑐵𑐰𑐣𑐵 𑐡𑐸 𑐮𑐵 𑐢𑐫𑐵𑐐𑐸 𑐔𑐬𑑂𑐔𑐵 𑐳𑐸𑐬𑐸 𑐖𑐹𑐐𑐸 𑐡𑐸 𑑋 𑐕𑐸𑑄 𑐤𑐶 𑐤𑑂𑐫𑐰 𑐩𑐵𑐬𑑂𑐳𑐶𑐳 𑑅 𑐩𑐵𑐬𑑂𑐳 𑐊𑐎𑑂𑐳𑑂𑐥𑑂𑐬𑐾𑐳 𑐀𑐬𑑂𑐧𑐶𑐚𑐬𑐫𑑂 𑐡𑐸𑐐𑐸 𑐕𑐐𑐹 𑐬𑐵𑐜𑐵𑐬𑐫𑐵 𑐐𑑂𑐰𑐵𑐴𑐵𑐮𑐶𑑄 𑐩𑑄𑐐𑐮 𑐐𑑂𑐬𑐴𑐫𑑂 𑐮𑑅𑐫𑐵 𑐀𑐳𑑂𑐟𑐶𑐟𑑂𑐰 𑐮𑐸𑐂𑐎𑐹𑐐𑐸 𑐏𑑅 𑑋

𑐠𑑂𑐰 𑐀𑐢𑑂𑐫𑐫𑐣𑐫𑐵 𑐣𑐾𑐟𑐺𑐟𑑂𑐰 𑐫𑐵𑐣𑐵𑐔𑑂𑐰𑑄𑐐𑐸 𑐂𑐚𑐮𑐶𑐫𑐣 𑐣𑐾𑐱𑐣𑐮 𑐂𑐣𑑂𑐲𑑂𑐚𑐶𑐔𑑂𑐫𑐹𑐟 𑐀𑐦 𑐊𑐳𑑂𑐚𑑂𑐬𑑀𑐦𑐶𑐖𑐶𑐎𑑂𑐳𑐫𑐵 𑐥𑑂𑐬𑑀𑐦𑐾𑐳𑐬 𑐬𑑀𑐧𑐬𑑂𑐚𑑀 𑐌𑐬𑑀𑐳𑐾𑐃 𑐠𑐣 𑐕𑐐𑐹 𑐟𑑅𑐢𑑄𑐐𑐸 𑐥𑐸𑐏𑐹 𑐡𑐫𑐾𑐦𑐸𑐐𑐸 𑐳𑐩𑑂𑐨𑐵𑐰𑐣𑐵 𑐡𑐸𑐐𑐸 𑐏𑑃 𑐢𑐵𑑅𑐐𑐸 𑐡𑐸 𑑋 𑐥𑑂𑐬𑑀𑐦𑐾𑐳𑐬 𑐌𑐬𑑀𑐳𑐾𑐃 𑐩𑐵𑐬𑑂𑐳𑐶𑐳𑑄 𑐥𑐟𑑂𑐟𑐵 𑐮𑐐𑐾 𑐫𑐵𑑅𑐐𑐸 𑐮𑑅 𑐴𑐾 𑐖𑐹𑐐𑐸 𑐡𑐵𑐰𑐷 𑐫𑐵𑐳𑐾𑑄 𑐠𑑂𑐰 𑐕𑐐𑐹 𑐥𑐸𑐏𑐹𑐫𑐵 𑐳𑑂𑐰𑐬𑐹𑐥𑐫𑑂 𑐔𑑂𑐰𑐣𑐵𑐔𑑂𑐰𑑄𑐐𑐸 𑐏𑑃 𑐢𑐵𑑅𑐐𑐸 𑐏𑑅 𑑋
𑐮𑑅 𑐮𑐹𑐳𑐵𑑄 𑐁𑑅 𑐟𑐸𑐬𑐸𑐣𑑂𑐟 𑐴𑐾 𑐀𑐣 𑐖𑐷𑐰𑐣𑐫𑐵 𑐳𑐩𑑂𑐨𑐵𑐰𑐣𑐵 𑐧𑐵𑐬𑐾 𑐕𑐸𑑄 𑐢𑐵𑐫𑐾𑐩𑐦𑐂𑐐𑐸 𑐏𑑃 𑐰𑐿𑐖𑑂𑐘𑐵𑐣𑐶𑐎𑐟𑐫𑑂𑐳𑑄 𑐢𑐵𑑅𑐐𑐸 𑐡𑐸 𑑋

𑐰𑐿𑐖𑑂𑐘𑐵𑐣𑐶𑐎𑐟𑐫𑑂𑐳𑑄 𑐩𑑄𑐐𑐮 𑐐𑑂𑐬𑐴𑐫𑑂 𑐖𑐷𑐰𑐣 𑐀𑐣𑐸𑐎𑐸𑐮 𑐥𑐬𑐶𑐳𑑂𑐠𑐶𑐟𑐶 𑐩𑐡𑐸 𑐢𑐎𑐵𑑅 𑐤𑐵𑐥𑐵𑑄 𑐣𑐶𑐳𑐾𑑄 𑐢𑐫𑐵 𑐰𑐫𑐵𑐔𑑂𑐰𑑄𑐐𑐸 𑐏𑑅𑐳𑐵 𑐁𑑅 𑐀𑐣 𑐮𑑅 𑐮𑐹𑐐𑐸𑐮𑐶𑑄 𑐏𑑀𑐖 𑐖𑑂𑐫𑐵 𑐕𑐥𑐮𑐵𑑅 𑐤𑑂𑐫𑐵𑑅 𑐰𑑄𑐐𑐸 𑐏𑑃 𑐢𑐵𑑅𑐐𑐸 𑐡𑐸 𑑋 𑐰𑐿𑐖𑑂𑐘𑐵𑐣𑐶𑐎𑐟𑐫𑑂𑐳𑑄 𑐢𑐵𑑅𑐐𑐸 𑐡𑐸, ‘𑐩𑑄𑐐𑐮 𑐐𑑂𑐬𑐴𑐫𑑂 𑐮𑑅 𑐡𑐸𑐐𑐸 𑐏𑑃 𑐮𑐵 𑐳𑐷𑐡𑐟, 𑐟𑐬 𑐠𑐸𑐮𑐶𑑄 𑐴𑐾 𑐀𑐣 𑐖𑐷𑐰𑐣𑐫𑐵 𑐳𑐩𑑂𑐨𑐵𑐰𑐣𑐵 𑐡𑐸 𑐢𑐫𑐵𑐐𑐸 𑐣𑐶𑐲𑑂𑐎𑐬𑑂𑐲 𑐟𑐎 𑐠𑑂𑐫𑑄𑐎𑐾𑐦𑐂𑐩𑐏𑐸 𑑋’

𑐄𑐩𑐶𑐳𑑄 𑐢𑐵𑑅𑐐𑐸 𑐡𑐸, ‘𑐏𑑀𑐖𑐎𑐬𑑂𑐟𑐵𑐟 𑐖𑐷𑐰𑐣𑐫𑐵 𑐳𑐩𑑂𑐨𑐵𑐰𑐣𑐵 𑐡𑐸 𑐢𑐫𑐵𑐐𑐸 𑐏𑑃 𑐟𑐎 𑐩𑐠𑑂𑐫𑑄𑐣𑐷 𑑋 𑐟𑐬 𑐮𑑅 𑐡𑐸 𑐢𑐫𑐵𑐐𑐸 𑐟𑐠𑑂𑐫𑑄 𑐢𑐵𑑅𑐳𑐵 𑐁𑑅 𑐏𑑀𑐖 𑐐𑐸𑐏𑐾 𑐥𑐵𑐏𑐾 𑐤𑑂𑐫𑐵𑐎𑐾𑐐𑐸 𑐢𑐫𑐵𑐐𑐸 𑐕𑐐𑐹 𑐡𑐶𑐱𑐵 𑐧𑐶𑐄𑐐𑐸 𑐡𑐸 𑑋’ 𑐩𑑄𑐐𑐮𑐫𑑂 𑐮𑑅 𑐡𑐸 𑐢𑐫𑐵𑐐𑐸 𑐟𑐠𑑂𑐫 𑐩𑑄𑐐𑐮𑐫𑑂 𑐤𑐵𑐥𑐵 𑐰𑐵 𑐁𑑅 𑐖𑐷𑐰𑐣𑐫𑐵 𑐳𑐩𑑂𑐨𑐵𑐰𑐣𑐵 𑐩𑐵𑐮𑐵𑐔𑑂𑐰𑑄𑐥𑐶𑑄 𑐱𑑀𑐢𑐎𑐬𑑂𑐟𑐵𑐟𑐫𑑂 𑐣𑐶𑑄𑐟𑐶𑑄 𑐕𑐐𑐹 𑐴𑑂𑐰𑑅𑐟𑐵𑑅 𑐖𑐸𑐫𑐵𑑅 𑐥𑐶𑐴𑐵𑑄 𑐰𑑅𑐐𑐸 𑐡𑐸 𑑋 𑐟𑐬 𑐠𑐸𑐎𑐶𑐫𑐵 𑐣𑐶𑑄𑐟𑐶𑑄 𑐁𑑅 𑐮𑐸𑐂𑐎𑐹𑐐𑐸 𑐥𑐸𑐏𑐹𑐫𑐵 𑐧𑐵𑐬𑐾 𑐐𑐴𑐣 𑐀𑐢𑑂𑐫𑐫𑐣 𑐫𑐵𑐫𑐾𑐩𑐵𑐣𑐷, 𑐀𑐮𑐾 𑐖𑐎 𑐩𑐾𑐐𑐸 𑐕𑐸𑑄 𑐣𑐶𑐲𑑂𑐎𑐬𑑂𑐲 𑐥𑐶𑐎𑐵𑐫𑐾𑐦𑐂𑐐𑐸 𑐏𑑃 𑐱𑑀𑐢𑐎𑐬𑑂𑐟𑐵𑐟𑐫𑑂𑐳𑑄 𑐢𑐫𑐵𑐔𑑂𑐰𑑄𑐐𑐸 𑐡𑐸 𑑋