𑐣𑑂𑐴𑐵𑐥𑐵𑑄𑐐𑐸 𑐩𑐔𑐵 𑐔𑐶𑐣𑐵𑐏𑑃 𑐰𑐵𑐔𑐣 𑐨𑐶𑐜𑐶𑐫𑑀 𑐢𑐾𑐢𑐾𑐧𑐮𑑂𑐮𑐵 𑐎𑐵𑐳𑐵 𑐖𑐸𑐂𑐐𑐸


𑐣𑑂𑐴𑐵𑐥𑐵𑑄𑐐𑐸 𑐩𑐔𑐵 𑐔𑐶𑐣𑐵𑐏𑑃 𑐰𑐵𑐔𑐣 𑐨𑐶𑐜𑐶𑐫𑑀 𑐢𑐾𑐢𑐾𑐧𑐮𑑂𑐮𑐵 𑐎𑐵𑐳𑐵 𑐖𑐸𑐂𑐐𑐸

𑐩𑑀𑐴𑐣𑐷𑐫𑐵 𑐮𑐳𑐟𑐵𑐫𑑂 𑐣𑐾𑐰𑐵𑑅 𑐊𑐔 𑐜𑐷 𑐚𑐾𑐮𑐶𑐨𑐶𑐖𑐣 𑐰 𑐐𑑂𑐮𑑀𑐧𑐮 𑐣𑐾𑐥𑐵𑐮 𑐣𑐾𑐚𑐰𑐬𑑂𑐎 𑐣𑐾𑐥𑐵𑐮𑐨𑐵𑐲𑐵 𑐩𑐔𑐵 𑐔𑐶𑐣𑐵𑐏𑑃 𑐰𑐵𑐔𑐣 𑐢𑐾𑐢𑐾𑐧𑐮𑑂𑐮𑐵 𑐖𑐸𑐂𑐟𑑂𑐫𑑄𑐐𑐸 𑐡𑐸 𑑋 𑐩𑐳𑑂𑐟𑐫𑐾𑐟 𑐣𑐾𑐥𑐵𑐮𑐨𑐵𑐲𑐵𑐫𑐵 𑐩𑐴𑐟𑑂𑐰 𑐳𑐷𑐎𑐾𑐐𑐸 𑐁𑐖𑑂𑐖𑐸 𑐣𑐵𑐥𑑄 𑐄𑐐𑐸 𑐎𑐵𑐳𑐵 𑐖𑐸𑐂𑐟𑑂𑐫𑑄𑐐𑐸 𑐏𑑅 𑑋 𑐄𑐐𑐸 𑐢𑐾𑐢𑐾𑐧𑐮𑑂𑐮𑐵 𑐴𑐮𑐶𑑄𑐣𑑂𑐫𑑄𑐎𑑄𑐫𑐵 𑑑𑑓 𑐡𑑃 𑐎𑑂𑐰𑐫𑑂 𑐟𑐎𑐫𑐵 𑐩𑐳𑑂𑐟𑐫𑐾𑐳𑑄 𑐧𑑂𑐰𑐟𑐶 𑐎𑐵𑐫𑑂 𑐡𑐂 𑑋 𑐄𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐧𑑂𑐰𑐟𑐶 𑐎𑐵𑐫𑐾𑐟 𑐩𑐳𑑂𑐟𑐫𑐾𑐳𑑄 𑐔𑐶𑐣𑐵𑐏𑑃 𑐰𑐵𑐔𑐣 𑐫𑐵𑐣𑐵 𑐨𑐶𑐜𑐶𑐌 𑐡𑐾𑐎𑐾𑐩𑐵 𑑋 𑐠𑐸𑐐𑐸 𑐨𑐶𑐜𑐶𑐫𑑀𑐫𑐵𑐟 𑐐𑑂𑐰𑐳𑐵𑑅 𑐏𑐮𑑅 𑐣𑐾𑐰𑐵𑑅 𑐊𑐎𑐟𑐵 𑐀𑐨𑐶𑐫𑐵𑐣𑐫𑑂 𑐳𑐾𑐥𑑂𑐚𑐾𑐩𑑂𑐧𑐬 𑑓𑑐 𑐡𑐸𑐣𑐾 𑐕𑑂𑐰𑐫𑐾𑐩𑐵𑑅 𑑋 𑐩𑐳𑑂𑐟𑐫𑐾𑐳𑑄 𑐣𑐾𑐰𑐵𑑅 𑐳𑑄𑐳𑑂𑐎𑐺𑐟𑐶 𑐣𑐵𑐥 𑐳𑑂𑐰𑐵𑐥𑐸 𑐡𑐸𑐐𑐸 𑐰𑐳𑑅 𑐥𑐸𑐣𑐵 𑐣𑐾𑐥𑐵𑐮𑐨𑐵𑐲𑐵𑐫𑐵 𑑓𑑐 𑐣𑐶𑐳𑐾𑑄 𑑙𑑐 𑐏𑑃𑐐𑑂𑐰 𑐡𑐸𑐐𑐸 𑐣𑑂𑐴𑑂𑐫𑐵𑐐𑐸𑑄 𑐣𑐾𑐥𑐵𑐮𑐨𑐵𑐲𑐵𑐫𑐵 𑐔𑐶𑐣𑐵𑐏𑑃 𑐰𑐵𑐔𑐣 𑐫𑐵𑐣𑐵 𑐢𑐾𑐢𑐾𑐧𑐮𑑂𑐮𑐵𑐏𑐫𑑂 𑐧𑑂𑐰𑐟𑐶 𑐎𑐵𑐫𑐾𑐦𑐸 𑑋

𑐢𑐾𑐢𑐾𑐧𑐮𑑂𑐮𑐵𑐏𑐫𑑂 𑐧𑑂𑐰𑐟𑐶 𑐎𑐵𑑅𑐥𑐶𑐣𑐶𑐐𑐸 𑐮𑑂𑐫𑐫𑐾𑐖𑑂𑐫𑐵 𑐣𑐾𑐥𑐵𑐮𑐨𑐵𑐲𑐵𑐫𑐵 𑐴𑐣𑐾𑐧𑐴𑐥𑐶𑑄 𑐣𑐶𑐬𑑂𑐞𑐵𑐫𑐎𑐥𑐵𑐏𑐾𑑄 𑐖𑐸𑐂𑐐𑐸 𑐐𑑂𑐰𑐳𑐵𑐏𑐮𑐎𑑄 𑐣𑑂𑐴𑑂𑐫𑐠𑑄𑐐𑐸 𑐡𑐸 𑑋 𑐠𑐸𑐎𑑄𑐠𑑄 𑐣𑐶𑐬𑑂𑐞𑐫 𑐖𑐸𑐫𑐵 𑐩𑐳𑑂𑐟𑐫𑐾𑐟 𑐣𑑂𑐴𑐵𑐥, 𑐮𑑂𑐫𑐹, 𑐮𑐶𑐫𑐵𑑄𑐮𑑂𑐫𑐹 𑐖𑐎 𑐩𑐏𑐸 𑐥𑐧𑑂𑐮𑐶𑐎 𑐨𑑀𑐚 𑐎𑐠𑑄 𑐦𑐾𑐳𑐧𑐸𑐎 𑐰 𑐫𑐸𑐟𑑂𑐫𑐸𑐧𑐫𑑂 𑐡𑐎𑐮𑐫𑑂 𑐀𑐥𑑂𑐰 𑐳𑑂𑐰𑑅𑐐𑐸 𑐰 𑐫𑐫𑐾𑐎𑐸𑐐𑐸 𑐕𑐩𑑂𑐴 𑐕𑐩𑑂𑐴𑐳𑐶𑐟 𑐳𑐶𑐬𑐥𑐵𑐫𑐵 𑐧𑑂𑐫𑐰𑐳𑑂𑐠𑐵 𑐫𑐵𑐣𑐵𑐟𑑅𑐐𑐸 𑐡𑐸 𑑋 𑐣𑑂𑐴𑐵𑐥 𑐮𑐵𑐩𑑂𑐴𑐳𑐶𑐟 𑐣𑐷𑐡𑑂𑐰 𑐟𑐎𑐵, 𑐮𑑂𑐫𑐹 𑐮𑐵𑐩𑑂𑐴𑐳𑐶𑐟 𑐗𑐶𑐣𑑂𑐫𑐵𑐡𑑂𑐰 𑐰 𑐮𑐶𑐫𑐵𑑄𑐮𑑂𑐫𑐹 𑐮𑐵𑐩𑑂𑐴𑐳𑐶𑐟 𑐗𑐶𑐡𑑂𑐰 𑐡𑐵𑑃 𑐳𑐶𑐬𑐥𑐵𑐫𑐵 𑐑𑑀𑐲𑐞𑐵 𑐖𑐹𑐐𑐸 𑐡𑐸 𑑋 𑐀𑐠𑐾𑐴𑐾 𑐦𑐾𑐳𑐧𑐸𑐎 𑐰 𑐫𑐸𑐟𑑂𑐫𑐸𑐧𑐫𑑂 𑐄𑐟𑑂𑐎𑐺𑐲𑑂𑐛 𑐣𑐶𑐩𑑂𑐴𑐳𑐶𑐟 𑐩𑑂𑐴𑐟𑐶𑑄 𑐗𑐶𑐡𑑂𑐰 𑐟𑐎𑐵 𑐧𑐷𑐐𑐸 𑐐𑑂𑐰𑐳𑐵 𑐐𑑂𑐰𑐫𑐵𑐟𑑅𑐐𑐸 𑐡𑐸 𑑋

𑐠𑐸𑐎𑐶 𑐧𑐵𑑄𑐧𑐵𑐮𑐵𑐐𑐸 𑐔𑐶𑐣𑐵𑐏𑑃 𑐰𑐵𑐔𑐣 𑐨𑐶𑐜𑐶𑐌 𑐣𑐾𑐰𑐵𑑅 𑐊𑐔 𑐜𑐷 𑐚𑐾𑐮𑐶𑐨𑐶𑐖𑐣𑐥𑐵𑐏𑐾𑑄 𑐟𑐎𑑄 𑐥𑑂𑐬𑐱𑐵𑐬𑐞 𑐫𑐵𑐫𑐾𑐐𑐸 𑐐𑑂𑐰𑐳𑐵 𑐡𑐸 𑑋

𑐠𑐸𑐐𑐸 𑐖𑑂𑐫𑐵𑐗𑑂𑐰𑐫𑐵 𑐳𑑄𑐫𑑀𑐖𑐣 𑐥𑑂𑐬𑐖𑑂𑐰𑐮 𑐱𑐵𑐎𑑂𑐫 𑐣𑐵𑐥𑑄 𑐣𑐾𑐰𑐵𑑅 𑐊𑐔𑐜𑐷 𑐚𑐾𑐮𑐶𑐨𑐶𑐖𑐣 𑐰 𑐐𑑂𑐮𑑀𑐧𑐮 𑐣𑐾𑐥𑐵𑐮 𑐣𑐾𑐚𑐰𑐬𑑂𑐎 𑐥𑐸𑐔𑐮𑑄 𑐫𑐵𑐫𑐾𑐟𑑂𑐫𑑄𑐐𑐸 𑐡𑐸 𑑋

𑐠𑐥 𑐖𑐵𑐣𑐎𑐵𑐬𑐷𑐫𑐵 𑐣𑐶𑐟𑐶𑑄 𑐠𑐣 𑐎𑑂𑐮𑐶𑐎 𑐫𑐵𑐣𑐵𑐡𑐶𑐳𑑃