𑐣𑐾𑐰𑐵𑑅𑐟𑐫𑑂𑐳𑑄 𑐫𑐵𑑅𑐐𑐸 𑐱𑐿𑐎𑑂𑐲𑐶𑐎 𑐁𑐣𑑂𑐡𑑀𑐮𑐣


𑐣𑐾𑐰𑐵: 𑐀𑐣𑐮𑐵𑐂𑐣 𑐣𑑂𑐫𑐸𑐖 | 𑑒𑑐𑑗𑑖 𑐨𑐵𑐡𑑂𑐬 𑑒𑑑, 𑐱𑐣𑐶𑐧𑐵𑐬 𑑑𑑒:𑑐𑑒:𑑓𑑗

𑐳𑐵𑐣𑐸𑐬𑐵𑐖𑐵 𑐱𑐵𑐎𑑂𑐫
𑐣𑐾𑐰𑐵𑑅 𑐁𑐣𑑂𑐡𑑀𑐮𑐣𑐫𑐵 𑐥𑑂𑐬𑐵𑐬𑐩𑑂𑐨𑐶𑐎 𑐂𑐮𑑄𑐣𑐶𑐳𑐾𑑄 𑐴𑐾 𑐣𑐾𑐥𑐵𑐮𑐨𑐵𑐲𑐵𑑄 𑐱𑐶𑐎𑑂𑐲𑐵 𑐎𑐵𑐫𑑂𑐡𑐫𑑂𑐩𑐵𑑅𑐐𑐸 𑐏𑑃 𑐠𑑂𑐰𑐮 𑑋 𑐐𑐸𑐐𑐸 𑐖𑐵𑐟𑐶𑐫𑐵 𑐐𑐸𑐐𑐸 𑐨𑐵𑐲𑐵 𑐖𑐸𑐫𑐵𑐔𑑂𑐰𑐣 𑐄𑐐𑐸 𑐴𑐾 𑐨𑐵𑐲𑐵𑑄 𑐖𑑂𑐘𑐵𑐣 𑐧𑑂𑐫𑐹𑐳𑐵 𑐫𑐵𑐎𑐣𑑄 𑐖𑑂𑐘𑐵𑐣 𑐠𑐸𑐂𑐎𑐵 𑐎𑐵𑐂 (𑐴𑐺𑐡𑐫; 𑑑𑑑𑑐𑑒𑑅𑑘𑑗) 𑐢𑐫𑐵𑐐𑐸 𑐣𑐾𑐥𑐵𑐮𑐨𑐵𑐲𑐵𑐫𑐵 𑐥𑑂𑐫𑑄𑐐𑑅 𑐠𑐵𑑄𑐩𑐢𑑂𑐫𑐾 𑐕𑐩𑑂𑐴 𑐩𑐵𑐲𑑂𑐚𑐬 𑐖𑐐𑐟𑐳𑐸𑐣𑑂𑐡𑐬 𑐩𑐮𑑂𑐮𑐫𑐵 𑐳𑐶𑐡𑑂𑐢𑐵𑐣𑑂𑐟 𑐏𑑅 𑑋 𑐠𑐸𑐎𑐠𑑄 𑐣𑐾𑐥𑐵𑐮𑐨𑐵𑐲𑐵𑐫𑐵 𑐥𑐸𑐣𑐬𑑂𑐖𑐵𑐐𑐬𑐞 𑐎𑐵𑐮𑐣𑐶𑐳𑐾𑑄 𑐴𑐾 𑐱𑐶𑐎𑑂𑐲𑐵𑐫𑑂 𑐩𑐵𑑄𑐨𑐵𑐫𑑂𑐫𑐵 𑐁𑐰𑐱𑑂𑐫𑐎𑐟𑐵𑐫𑐵𑐟 𑐎𑐫𑐵𑑅 𑐔𑐾𑐟𑐣𑐵 𑐠𑐣𑐾𑐐𑐸 𑐖𑑂𑐫𑐵 𑐖𑐸𑐮 𑑋 𑐠𑑅𑐐𑐸 𑐩𑐵𑑄𑐨𑐵𑐫𑑂 𑐣𑐾𑐥𑐵𑐮𑐨𑐵𑐲𑐵𑑄 𑐄𑐔𑑂𑐔 𑐱𑐶𑐎𑑂𑐲𑐵𑐫𑑂 𑐟𑐎𑑄 𑐧𑑂𑐰𑐣𑐾 𑐡𑐫𑑂𑐩𑐵𑑅 𑐢𑐿𑐐𑐸 𑐩𑐵𑐐 𑐢𑐬𑑂𑐩𑐵𑐡𑐶𑐟𑑂𑐫 𑐢𑐬𑑂𑐩𑐵𑐔𑐵𑐬𑑂𑐫 𑐰 𑐫𑑀𑐐𑐰𑐷𑐬𑐳𑐶𑑄 𑐎𑐳𑐵𑑅𑐥𑐶𑐳𑑄 𑐫𑐵𑐣𑐵𑐰𑐣 𑑋 𑐬𑐵𑐞𑐵𑐎𑐵𑐮𑐫𑑂 𑐣𑐾𑐥𑐵𑐮𑐫𑑂 𑐄𑐔𑑂𑐔 𑐱𑐶𑐎𑑂𑐲𑐵𑐫𑐵 𑐰𑐶𑐎𑐵𑐳 𑐩𑐖𑐹𑐐𑐸𑐮𑐶𑑄 𑐄𑐧𑐮𑐾 𑐄𑐔𑑂𑐔 𑐱𑐶𑐎𑑂𑐲𑐵𑐫𑐵 𑐣𑐶𑐟𑐶𑑄 𑐨𑐵𑐬𑐟𑐫𑐵 𑐠𑐷 𑐠𑐷 𑐱𑐴𑐬𑐫𑑂 𑐰𑐣𑐵 𑐧𑑂𑐰𑑄𑐰𑐣𑐷𑐐𑐸 𑐏𑑅 𑑋 𑐢𑐬𑑂𑐩𑐵𑐡𑐶𑐟𑑂𑐫 𑐢𑐬𑑂𑐩𑐵𑐔𑐵𑐬𑑂𑐫 𑐎𑐮𑐎𑐟𑑂𑐟𑐵 𑐫𑐸𑐣𑐶𑐨𑐬𑑂𑐳𑐶𑐚𑐷 𑐧𑑂𑐰𑐣𑐵𑐔𑑂𑐰𑑄𑐐𑐸 𑐂𑐮𑐫𑑂 𑐧𑑄𑐐𑐵𑐮𑐷 𑐁𑐱𑐸𑐟𑑀𑐲 𑐩𑐸𑐏𑐬𑑂𑐖𑐷 𑐀𑐣𑐫𑐵 𑐨𑐵𑐂𑐳 𑐔𑐵𑐣𑑂𑐳𑐮𑐬 𑐖𑐹𑐐𑐸 𑐖𑐸𑐫𑐵𑐔𑑂𑐰𑐣 𑑋 𑐁𑐱𑐸𑐟𑑀𑐲 𑐩𑐸𑐏𑐬𑑂𑐖𑐷 𑐕𑐩𑑂𑐴 𑐩𑐵𑐟𑐺𑐨𑐵𑐲𑐵 𑐀𑐣𑐸𑐬𑐵𑐐𑐷𑐩𑑂𑐴 𑐰𑐶𑐡𑑂𑐰𑐵𑐣 𑐏𑑅 𑑋 𑐰𑐫𑑂𑐎𑑅𑐫𑐵 𑐴𑐾 𑐎𑐸𑐟𑐮𑑄 𑐎𑐮𑐎𑐟𑑂𑐟𑐵 𑐰𑐶𑐱𑑂𑐰𑐰𑐶𑐡𑑂𑐫𑐵𑐮𑐫𑐫𑑂 𑐩𑐵𑐟𑐺𑐨𑐵𑐲𑐵𑐫𑐵𑐟 𑐕𑐐𑐹 𑐩𑐹 𑐧𑐶𑐲𑐫 𑐎𑐠𑑄 𑐩𑑂𑐫𑐵𑐚𑑂𑐬𑐶𑐎𑐣𑐶𑐳𑐾𑑄 𑐀𑐣𑐶𑐰𑐵𑐬𑑂𑐫 𑐬𑐸𑐥𑑄 𑐥𑐵𑐛𑑂𑐫𑐎𑑂𑐬𑐩𑐫𑑂 𑐟𑐂𑐐𑐸 𑐖𑐸𑐮 𑑋 𑐄𑐐𑐸 𑐰𑐶𑐱𑑂𑐰𑐰𑐶𑐡𑑂𑐫𑐵𑐮𑐫𑐫𑑂 𑐧𑑂𑐰𑐣𑐵𑐔𑑂𑐰𑑄𑐥𑐶𑑄 𑐣𑐾𑐥𑐵𑐮𑐷 𑐰𑐶𑐡𑑂𑐫𑐵𑐬𑑂𑐠𑐷𑐟𑐳𑐾𑑄 𑐣𑐾𑐰𑐵𑑅 𑐨𑐵𑐫𑑂𑐫𑐵𑐟 𑐣𑑄 𑐨𑐬𑑂𑐣𑐵𑐎𑐸𑐮𑐬 𑐰𑐶𑐲𑐫𑐎𑐠𑑄 𑐩𑐵𑐣𑑂𑐫𑐟𑐵 𑐧𑐷𑐎𑐾𑐐𑐸 𑐣𑐶𑐟𑐶𑑄 𑐨𑐵𑐂𑐳 𑐔𑐵𑐣𑑂𑐳𑐮𑐬𑐫𑐵𑐠𑐵𑐫𑑂 𑐜𑐾𑐮𑐶𑐐𑐾𑐱𑐣 𑐰𑐣 𑑋 𑐠𑑂𑐰 𑐜𑐾𑐮𑐶𑐐𑐾𑐱𑐣𑐫𑐵 𑐣𑐾𑐟𑐺𑐟𑑂𑐰 𑐢𑐬𑑂𑐩𑐵𑐡𑐶𑐟𑑂𑐫 𑐢𑐬𑑂𑐩𑐵𑐔𑐵𑐬𑑂𑐫 𑐴𑐾 𑐫𑐵𑑅𑐐𑐸 𑐏𑑅 𑑋 𑐟𑐬 𑑑𑑐𑑓𑑘 𑐡𑑃𑐫𑑂 𑐄𑐐𑐸 𑐰𑐶𑐱𑑂𑐰𑐰𑐶𑐡𑑂𑐫𑐵𑐮𑐫𑑄 𑐣𑐾𑐥𑐵𑐮𑐷 𑐨𑐵𑐲𑐵𑐫𑐵𑐟 𑐩𑐵𑐣𑑂𑐫𑐟𑐵 𑐧𑐶𑐮 𑐣𑐾𑐥𑐵𑐮𑐨𑐵𑐲𑐵𑐫𑐵 𑐥𑐵𑐛𑑂𑐫𑐳𑐥𑐹m 𑐩𑐡𑐸 𑐢𑐎𑐵𑑅 𑐣𑐾𑐥𑐵𑐮𑐨𑐵𑐲𑐵𑐫𑐵𑐟 𑐨𑐬𑑂𑐣𑐵𑐎𑐸𑐮𑐬 𑐰𑐶𑐲𑐫𑐫𑐵 𑐬𑐸𑐥𑐫𑑂 𑐡𑐸𑐩𑐠𑑂𑐫𑐵𑐎𑐮 𑑋 𑐠𑐸𑐎𑐶𑑄 𑐁𑐴𑐵𑐟 𑐖𑐹𑐩𑑂𑐴 𑐢𑐬𑑂𑐩𑐵𑐡𑐶𑐟𑑂𑐫 𑐢𑐬𑑂𑐩𑐵𑐔𑐵𑐬𑑂𑐫 𑐄𑐔𑑂𑐔 𑐱𑐶𑐎𑑂𑐲𑐵𑐫𑑂 𑐣𑐾𑐥𑐵𑐮𑐨𑐵𑐲𑐵 𑐧𑑂𑐰𑑄𑐎𑐾𑐟 𑐥𑐵𑐛𑑂𑐫𑐳𑐥𑐹m 𑐡𑐫𑑂𑐩𑐵𑑅 𑐢𑐎𑐵𑑅 𑐣𑐾𑐥𑐵𑐮𑐨𑐵𑐲𑐵𑑄 𑐳𑐥𑐹m, 𑐥𑐟𑑂𑐬𑐥𑐟𑑂𑐬𑐶𑐎𑐵 𑐥𑐶𑐎𑐵𑐫𑑂𑐐𑐸 𑐫𑑀𑐖𑐣𑐵 𑐎𑐠𑑄 𑐴𑐾 ‘𑐧𑐸𑐡𑑂𑐢𑐢𑐬𑑂𑐩 𑐰 𑐣𑐾𑐥𑐵𑐮𑐨𑐵𑐲𑐵’ 𑐥𑐟𑑂𑐬𑐶𑐎𑐵 𑐥𑐶𑐎𑐵𑐮 𑑋 𑐠𑐸𑐎𑐠𑑄 𑐣𑐾𑐥𑐵𑐮𑐨𑐵𑐲𑐵𑐫𑐵𑐟 𑐄𑐔𑑂𑐔 𑐱𑐶𑐎𑑂𑐲𑐵𑐫𑑂 𑐡𑐸𑐠𑑂𑐫𑐵𑐎𑐾𑐐𑐸 𑐀𑐨𑐶𑐫𑐵𑐣 𑐣𑑂𑐴𑑂𑐫𑐵𑐎𑐾𑐟 𑐣𑐾𑐥𑐵𑐮𑐨𑐵𑐲𑐵𑑄 𑐥𑐟𑑂𑐬𑐶𑐎𑐵 𑐥𑐶𑐡𑐣 𑑋
𑐠𑐸𑐎𑐠𑑄 𑐴𑐾 𑐣𑐾𑐥𑐵𑐮𑐨𑐵𑐲𑐵𑐫𑐵 𑐥𑑂𑐫𑑄𑐐𑐠𑐵𑑄𑐩𑐢𑑂𑐫𑐾 𑐩𑐾𑐩𑑂𑐴 𑐫𑑀𑐐𑐰𑐷𑐬𑐳𑐶𑑄 𑐎𑐳𑐵𑐫𑐵 𑐎𑐰𑐶𑐟𑐵𑐫𑑂 𑐣𑑄 𑐣𑐾𑐥𑐵𑐮𑐨𑐵𑐲𑐵𑐫𑐵𑐟 𑐰𑐶𑐱𑑂𑐰𑐰𑐶𑐡𑑂𑐫𑐵𑐮𑐫𑐫𑑂 𑐩𑐵𑐣𑑂𑐫𑐟𑐵 𑐎𑐵𑐫𑑂𑐣𑐸 𑐢𑐿𑐐𑐸 𑐂𑐣𑐵𑐥 𑐫𑐵𑐣𑐵𑐟𑑅𑐐𑐸 𑐡𑐸 𑑋 ‘𑐣𑐾𑐥𑐵𑐮𑐨𑐵𑐲𑐵 𑐖𑐶𑐬𑑂𑐞 𑐖𑐹𑐐𑐸 𑐀𑐮𑑂𑐳𑐶 𑐩𑐔𑐵𑐳𑐾 𑐨𑐶𑑄𑐎𑐾𑐣𑐸, 𑐨𑐵𑐬𑐟𑐶𑐫 𑐱𑐵𑐳𑑂𑐟𑑂𑐬 𑐨𑐰𑐣𑑄 𑐩𑐵𑐣 𑐠𑑂𑐰𑐂𑐟 𑐧𑐷𑐎𑐾𑐣𑐸’ (𑐫𑑀𑐐𑐳𑐸𑐢𑐵; 𑑑𑑐𑑗𑑐𑑅𑑑) 𑑋 𑐠𑐸𑐎𑐠𑑄 𑐣𑐾𑐥𑐵𑐮𑐨𑐵𑐲𑐵𑐫𑐵 𑐥𑐸𑐣𑐬𑑂𑐖𑐵𑐐𑐬𑐞 𑐎𑐵𑐮𑑄𑐣𑐶𑐳𑐾𑑄 𑐴𑐾 𑐣𑐾𑐥𑐵𑐮𑐨𑐵𑐲𑐵 𑐧𑑂𑐰𑐣𑐾 𑐡𑐫𑑂𑐩𑐵𑑅𑐐𑐸 𑐱𑐿𑐎𑑂𑐲𑐶𑐎 𑐩𑐵𑐐 𑐣𑐾𑐰𑐵𑑅 𑐁𑐣𑑂𑐡𑑀𑐮𑐣𑐫𑐵 𑐩𑐹 𑐩𑐵𑐐𑐎𑐠𑑄 𑐰𑑅𑐐𑐸 𑐡𑐸 𑑋 𑐎𑐮𑐎𑐟𑑂𑐟𑐵 𑐰𑐶𑐱𑑂𑐰𑐰𑐶𑐡𑑂𑐫𑐵𑐮𑐫𑐫𑑂 𑐣𑐾𑐥𑐵𑐮𑐨𑐵𑐲𑐵𑐫𑐵𑐟 𑐡𑐫𑑂𑐟𑑂𑐫𑑄𑐐𑐸 𑐩𑐵𑐣𑑂𑐫𑐟𑐵𑐫𑐵𑐟 𑐬𑐵𑐞𑐵 𑐳𑐬𑐎𑐵𑐬𑐫𑐵 𑐰𑐶𑐬𑑀𑐢𑐫𑐵 𑐎𑐵𑐬𑐞𑑄 𑐩𑐡𑐸𑐐𑐸 𑐏𑑅 𑑋 𑐨𑐵𑐂𑐳 𑐔𑐵𑐣𑑂𑐳𑐮𑐬 𑐁𑐱𑐸𑐟𑑀𑐲 𑐩𑐸𑐏𑐬𑑂𑐖𑐷𑐫𑐵 𑐣𑐶𑐬𑑂𑐡𑐾𑐱𑐣𑐫𑑂 𑐎𑐮𑐎𑐟𑑂𑐟𑐵 𑐰𑐶𑐱𑑂𑐰𑐰𑐶𑐡𑑂𑐫𑐵𑐮𑐫𑑄 𑐀𑐣 𑐧𑑂𑐰𑐣𑐷𑐥𑐶𑑄 𑐰 𑐥𑐬𑐶𑐎𑑂𑐲𑐵 𑐧𑐷𑐂𑐥𑐶𑑄 𑐣𑐾𑐥𑐵𑐮𑐷 𑐰𑐶𑐡𑑂𑐫𑐵𑐬𑑂𑐠𑐷𑐥𑐶𑑄 𑐰 𑐨𑐵𑐬𑐟𑐫𑑂 𑐔𑑂𑐰𑑄𑐥𑐶𑑄 𑐣𑑄 𑐣𑐾𑐥𑐵𑐮𑐷 𑐰𑐶𑐡𑑂𑐫𑐵𑐬𑑂𑐠𑐷𑐥𑐶𑑄 𑐡𑐸𑐐𑐸𑐮𑐶𑑄 𑐀𑐩𑐶𑐳𑑄 𑐣𑑄 𑐠𑑅𑐐𑐸 𑐴𑐾 𑐩𑐵𑐟𑐺𑐨𑐵𑐲𑐵 𑐣𑑄 𑐕𑐐𑐹 𑐰𑐶𑐲𑐫 𑐫𑐵𑐣𑐵𑑅 𑐧𑑂𑐰𑐣𑐾𑐐𑐸 𑐩𑑁𑐎𑐵 𑐧𑐷𑐐𑐸 𑐏𑑃 𑐥𑐶𑐎𑐵𑐮 𑑋 𑐣𑐾𑐥𑐵𑐮𑐫𑐵 𑐁𑐥𑐵𑐮𑑄 𑐥𑐬𑐷𑐎𑑂𑐲𑐵𑐬𑑂𑐠𑐷 𑐰 𑐰𑐶𑐡𑑂𑐫𑐵𑐬𑑂𑐠𑐷𑐟𑐫𑐾 𑐩𑐵𑐟𑐺𑐨𑐵𑐲𑐵𑐫𑐵 𑐬𑐸𑐥𑐫𑑂 𑐣𑐾𑐥𑐵𑐮𑐨𑐵𑐲𑐵𑐫𑐵𑐟 𑐣𑑄 𑐡𑐸𑐠𑑂𑐫𑐵𑐎𑐾𑐐𑐸 𑐏𑑃 𑐖𑐹𑐧𑐮𑐫𑑂 𑐄𑐐𑐸 𑐃𑐫𑐵 𑐣𑐾𑐥𑐵𑐮𑐫𑐵 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷 𑐔𑐣𑑂𑐡𑑂𑐬𑐱𑐩𑑂𑐱𑐾𑐬 𑐬𑐵𑐞𑐵𑑄 𑐣𑐾𑐥𑐵𑐮𑐫𑐵 𑐰𑐶𑐡𑑂𑐫𑐵𑐬𑑂𑐠𑐷𑐥𑐶𑐣𑐶 𑐣𑐶𑑄𑐟𑐶𑑄 𑐰𑐵 𑐕𑐸𑑄 𑐣𑑄 𑐎𑐵𑐬𑐞𑑄 𑐣𑐾𑐥𑐵𑐮𑐫𑐵 𑐐𑐐𑐸𑑄 𑐨𑐵𑐲𑐵 𑐡𑐸𑐠𑑂𑐫𑐵𑐎𑐾𑐐𑐸 𑐖𑐹𑐳𑐵 𑐐𑑀𑐬𑐏𑐵𑐨𑐵𑐲𑐵 (𑐣𑐾𑐥𑐵𑐮𑐷 𑐏𑐳𑐨𑐵𑐲𑐵𑐫𑐵 𑐄𑐐𑐸 𑐃𑐫𑐵 𑐣𑐵𑑄) 𑐕𑐟𑐵 𑐧𑐵𑐴𑐾𑐎 𑐣𑐾𑐥𑐵𑑅𑐫𑐵 𑐩𑐾𑐐𑐸 𑐕𑐸𑑄 𑐣𑑄 𑐨𑐵𑐲𑐵 𑐡𑐸𑐠𑑂𑐫𑐵𑐎𑐾 𑐩𑐟𑐾 𑐢𑐎𑐵𑑅 𑐍𑐥𑐔𑐵𑐬𑐶𑐎 𑐬𑐸𑐥𑑄 𑐴𑐾 𑐰𑐶𑐬𑑀𑐢 𑐖𑐹𑐐𑐸𑐮𑐶𑑄 𑐎𑐮𑐎𑐟𑑂𑐟𑐵 𑐰𑐶𑐱𑑂𑐰𑐰𑐶𑐡𑑂𑐫𑐵𑐮𑐫𑐫𑑂 𑐩𑐵𑐟𑐺𑐨𑐵𑐲𑐵𑐫𑐵 𑐬𑐸𑐥𑐫𑑂 𑐥𑐬𑐷𑐎𑑂𑐲𑐵𑐬𑑂𑐠𑐷𑐥𑐶𑐳𑑄 𑐣𑐾𑐥𑐵𑐮𑐨𑐵𑐲𑐵 𑐎𑐵𑐫𑑂 𑐩𑐏𑐣 (𑐱𑑂𑐬𑐾𑐲𑑂𑐛; 𑑑𑑑𑑐𑑙𑑅𑑑𑑐) 𑑋 𑐣𑐾𑐰𑐵𑑅 𑐱𑐿𑐎𑑂𑐲𑐶𑐎 𑐁𑐣𑑂𑐡𑑀𑐮𑐣 𑐎) 𑐍𑐥𑐔𑐵𑐬𑐶𑐎 𑐰 𑐏) 𑐀𑐣𑑁𑐥𑐔𑐵𑐬𑐶𑐎 𑐮𑑃𑐫𑑂 𑐣𑑂𑐴𑑂𑐫𑐵𑐰𑐣 𑑋
𑑓.𑑔.𑑑 𑐍𑐥𑐔𑐵𑐬𑐶𑐎
𑐰𑐶𑐡𑑂𑐫𑐵𑐮𑐫 𑐰 𑐰𑐶𑐱𑑂𑐰𑐰𑐶𑐡𑑂𑐫𑐵𑐮𑐫𑐫𑑂 𑐣𑐾𑐥𑐵𑐮𑐨𑐵𑐲𑐵 𑐧𑑂𑐰𑐣𑐾 𑐡𑐫𑑂𑐩𑐵𑑅𑐐𑐸 𑐀𑐨𑐶𑐫𑐵𑐣𑐫𑐵𑐟 𑐍𑐥𑐔𑐵𑐬𑐶𑐎 𑐱𑐿𑐎𑑂𑐲𑐶𑐎 𑐀𑐨𑐶𑐫𑐵𑐣 𑐡𑐸𑐣𑐾 𑐀𑐢𑑂𑐫𑐫𑐣 𑐫𑐵𑐫𑑂𑐐𑐸 𑐖𑐸𑐂 𑑋 𑐣𑐾𑐥𑐵𑐮𑐨𑐵𑐲𑐵 𑐁𑐣𑑂𑐡𑑀𑐮𑐣𑐫𑐵 𑐕𑐐𑐹 𑐀𑐨𑐶𑐫𑐵𑐣 𑐣𑐾𑐥𑐵𑐮𑐨𑐵𑐲𑐵 𑐣𑑄 𑐰𑐶𑐡𑑂𑐫𑐵𑐮𑐫 𑐟𑐐𑐶𑑄𑐩𑐫𑑂 𑐧𑑂𑐰𑐣𑐾 𑐡𑐿𑐐𑐸 𑐧𑑂𑐫𑐰𑐳𑑂𑐠𑐵 𑐫𑐵𑐎𑐾𑐐𑐸 𑐏𑑅 𑑋 𑐣𑐾𑐥𑐵𑐮𑐨𑐵𑐲𑐵𑑄 𑐩𑐵𑐟𑐺𑐨𑐵𑐲𑐵𑐫𑐵 𑐍𑐥𑐔𑐵𑐬𑐶𑐎 𑐱𑐶𑐎𑑂𑐲𑐵 𑐎𑐵𑐫𑑂𑐟 𑐥𑑂𑐬𑐖𑐵𑐟𑐣𑑂𑐟𑑂𑐬 𑐰𑐫𑑂𑐢𑐸𑑄𑐎𑐵𑑅 𑐖𑐎 𑐳𑐦𑐮 𑐖𑐸𑐮 𑑋 𑐣𑐾𑐥𑐵𑐮𑐨𑐵𑐲𑐵 𑐁𑐣𑑂𑐡𑑀𑐮𑐣𑐫𑐵 𑐣𑐶𑐬𑐣𑑂𑐟𑐬 𑐩𑐵𑐐𑐫𑐵 𑐎𑐵𑐬𑐞𑑄 𑐣𑐾𑐥𑐵𑐮𑐨𑐵𑐲𑐵𑑄 𑐰𑐶𑐡𑑂𑐫𑐵𑐮𑐫𑐫𑐵 𑐥𑑂𑐬𑐵𑐠𑐩𑐶𑐎 𑐟𑐐𑐶𑑄 𑐧𑑂𑐰𑐣𑐾𑐐𑐸, 𑐣𑐾𑐥𑐵𑐮𑐨𑐵𑐲𑐵𑐫𑐵 𑐩𑐵𑐢𑑂𑐫𑐩𑑄 𑐴𑐾 𑐰𑐶𑐡𑑂𑐫𑐵𑐮𑐫 𑐳𑑄𑐔𑐵𑐮𑐣 𑐫𑐵𑐫𑑂𑐐𑐸𑐣𑐶𑐳𑐾𑑄 𑐣𑐾𑐥𑐵𑐮𑐨𑐵𑐲𑐵𑐫𑐵 𑐊𑐩.𑐊. 𑐰 𑐥𑐶.𑐊𑐔.𑐜𑐶 𑐟𑐎𑐫𑐵 𑐰𑑂𑐫𑐰𑐳𑑂𑐠𑐵 𑐠𑑁𑑄 𑐡𑐫𑑂 𑐢𑐸𑑄𑐎𑐮 𑑋 𑐣𑐾𑐥𑐵𑑅𑐫𑐵 𑐰𑐶𑐱𑑂𑐰𑐰𑐶𑐡𑑂𑐫𑐵𑐮𑐫 𑐩𑐡𑐸𑐣𑐶𑐧𑐮𑐫𑑂 𑐴𑐾 𑐰𑐷𑐬𑐐𑐘𑑂𑐖𑐫𑐵 𑐣𑐾𑐥𑐵𑐮 𑐬𑐵𑐲𑑂𑐚𑑂𑐬𑐶𑐫 𑐰𑐶𑐡𑑂𑐫𑐵𑐥𑐷𑐛𑐫𑑂 𑐣𑐾𑐥𑐵𑐮𑐨𑐵𑐲𑐵 𑐡𑐸𑐠𑑂𑐫𑐵𑐎𑐾𑐐𑐸 𑐎𑐸𑐟𑑅 𑐥𑑂𑐬𑑀. 𑐣𑐵𑐬𑐵𑐫𑐞𑐧𑐴𑐵𑐡𑐸𑐬 𑐩𑐵𑐣𑐣𑑂𑐢𑐬𑑄 𑐫𑐵𑑅𑐐𑐸 𑐏𑑅 (𑐱𑑂𑐬𑐾𑐲𑑂𑐛; 𑑑𑑑𑑐𑑙𑑅𑑙) 𑑋 𑐣𑐾𑐥𑐵𑐮 𑐬𑐵𑐲𑑂𑐚𑑂𑐬𑐶𑐫 𑐰𑐶𑐡𑑂𑐫𑐵𑐥𑐷𑐛𑑄 𑐧𑐷.𑐊. 𑐳𑑂𑐟𑐬𑐫𑐵 𑐥𑐬𑐷𑐎𑑂𑐲𑐵𑐫𑐵 𑐣𑐾𑐥𑐵𑐮𑐨𑐵𑐲𑐵𑐫𑐵𑐟 𑐡𑐸𑐠𑑂𑐫𑐵𑐎𑐵 𑑑𑑐𑑗𑑒 (𑐰𑐶𑐳𑑄 𑑒𑑐𑑐𑑙) 𑐫𑑂 𑐥𑐬𑐷𑐎𑑂𑐲𑐵𑐫𑐵 𑐎𑐾𑐣𑑂𑐡𑑂𑐬 𑐕𑐐𑐹 𑐫𑐾𑑃𑐫𑑂 𑐡𑐫𑑂𑐎𑐵 𑐣𑐾𑐥𑐵𑐮𑐨𑐵𑐲𑐵𑐫𑐵 𑐥𑐬𑐷𑐎𑑂𑐲𑐵 𑐎𑐵𑑅𑐐𑐸 𑐏𑑅 𑑋 𑐠𑐸𑐐𑐸 𑐥𑐬𑐷𑐎𑑂𑐲𑐵𑐫𑑂 𑐡𑐎𑐮𑐫𑑂 𑐣𑑂𑐴𑐵𑐥𑐵𑑄 𑐄𑐟𑑂𑐟𑐷𑐬𑑂𑐞 𑐖𑐹𑐥𑐶𑑄 𑐎𑐿𑐮𑐵𑐱𑐬𑐵𑐩 𑐱𑑂𑐬𑐾𑐲𑑂𑐛, 𑐎𑐸𑐘𑑂𑐖𑐧𑐴𑐵𑐡𑐸𑐬 𑐬𑐘𑑂𑐖𑐶𑐟𑐎𑐵𑐬, 𑐥𑐹𑐬𑑂𑐞𑐎𑐵𑐖𑐷 𑐟𑐵𑐩𑑂𑐬𑐵𑐎𑐵𑐬 𑐰 𑐮𑐎𑑂𑐲𑑂𑐩𑐷𑐨𑐎𑑂𑐟 𑐖𑑀𑐱𑐷 𑐏𑑅𑐳𑐵 𑐥𑐬𑐷𑐎𑑂𑐲𑐵 𑐳𑑄𑐔𑐵𑐮𑐣 𑐫𑐵𑐫𑑂𑐐𑐸 𑐖𑑂𑐫𑐵 𑐥𑐹𑐰𑑄𑐎𑐹𑐥𑐶𑑄 𑐥𑑂𑐬𑑀. 𑐣𑐵𑐬𑐵𑐫𑐞𑐧𑐴𑐵𑐡𑐸𑐬 𑐩𑐵𑐣𑐣𑑂𑐢𑐬, 𑐦𑐟𑑂𑐟𑐾𑐧𑐴𑐵𑐡𑐸𑐬 𑐳𑐶𑑄𑐴, 𑐩𑐵𑐢𑐰𑐮𑐵𑐮 𑐎𑐬𑑂𑐩𑐵𑐔𑐵𑐬𑑂𑐫, 𑐥𑐹𑐬𑑂𑐞𑐧𑐴𑐵𑐡𑐸𑐬 𑐊𑐩.𑐊., 𑐥𑑂𑐬𑐾𑐩𑐧𑐴𑐵𑐡𑐸𑐬 𑐎𑐳𑐵𑑅, 𑐐𑑀𑐰𑐬𑑂𑐢𑐣𑐮𑐵𑐮 𑐩𑐵𑐳𑑂𑐎𑐾, 𑐳𑐶𑐡𑑂𑐢𑐶𑐔𑐬𑐞 𑐱𑑂𑐬𑐾𑐲𑑂𑐛 𑐰 𑐔𑐶𑐟𑑂𑐟𑐢𑐬 ‘𑐴𑐺𑐡𑐫’ 𑐏𑑅 𑑋 𑐟𑐬 𑐰𑐶𑐡𑑂𑐫𑐵𑐥𑐷𑐛𑐫𑐵 𑐥𑑂𑐬𑐩𑐵𑐞𑐥𑐟𑑂𑐬𑐫𑐵𑐟 𑐣𑐾𑐥𑐵𑐮 𑐳𑐬𑐎𑐵𑐬𑑄 𑐩𑐵𑐣𑑂𑐫𑐟𑐵 𑐩𑐧𑑂𑐫𑐹 𑑋 𑐣𑐾𑐥𑐵𑐮 𑐳𑐬𑐎𑐵𑐬𑑄 𑐳𑑄𑐔𑐵𑐮𑐣 𑐫𑐵𑐣𑐵𑐔𑑂𑐰𑑄𑐐𑐸 𑐊𑐳.𑐊𑐮.𑐳𑐷. 𑐧𑑀𑐬𑑂𑐜𑐫𑐵 𑐥𑐬𑐷𑐎𑑂𑐲𑐵𑐫𑑂 𑐣𑐾𑐥𑐵𑐮𑐨𑐵𑐲𑐵𑐫𑐵𑐟 𑐠𑐵𑐫𑑂 𑐩𑐧𑑂𑐫𑐹𑐣𑐶 𑑋 𑐄𑐎𑐶𑑄 𑐨𑐵𑐲𑐶𑐎 𑐁𑐣𑑂𑐡𑑀𑐮𑐣 𑐫𑐵𑐣𑐵𑐔𑑂𑐰𑑄𑐥𑐶𑐣𑑂𑐟 𑐄𑐧𑐮𑐫𑑂 𑐡𑐎𑐮𑐫𑑂 𑐣𑑂𑐴𑐵𑐥𑐵𑑄 𑐣𑐾𑐥𑐵𑐮 𑐳𑐬𑐎𑐵𑐬𑑄 𑐎𑐵𑐂𑐐𑐸 𑐊𑐳.𑐊𑐮.𑐳𑐷 𑐧𑑀𑐬𑑂𑐜𑐫𑐵 𑐥𑐬𑐷𑐎𑑂𑐲𑐵𑐫𑑂 𑐣𑐾𑐥𑐵𑐮𑐨𑐵𑐲𑐵 𑐡𑐸𑐠𑑂𑐫𑐵𑐎𑐾𑐐𑐸 𑐎𑐸𑐟𑑅 𑐡𑐎𑐮𑐫𑑂 𑐟𑑅𑐢𑑄𑐐𑐸 𑐁𑐰𑐱𑑂𑐫𑐎𑐟𑐵 𑐰 𑐄𑐐𑐸 𑐃𑐫𑐵 𑐩𑐴𑐟𑑂𑐰𑐥𑐹𑐬𑑂𑐞 𑐖𑑂𑐫𑐵 𑐖𑐸𑐮 (𑐱𑑂𑐬𑐾𑐲𑑂𑐛; 𑑑𑑑𑑐𑑙𑑅𑑙) 𑑋