𑐣𑐾𑐥𑐵𑐮 𑐳𑑄𑐳𑑂𑐎𑐺𑐟𑐶 𑐏𑑅𑐎𑐶 𑐣𑐾𑐰𑐵𑑅 𑐳𑑄𑐳𑑂𑐎𑐺𑐟𑐶?


𑐰𑐶𑐖𑐫𑐎𑐺𑐲𑑂𑐞 𑐱𑑂𑐬𑐾𑐲𑑂𑐛

𑐰𑐶𑐖𑐫𑐎𑐺𑐲𑑂𑐞 𑐱𑑂𑐬𑐾𑐲𑑂𑐛

𑐣𑐾𑐥𑐵𑐮 𑐳𑑄𑐰𑐟𑑂 𑐢𑐂𑐐𑐸 𑐣𑐾𑐰𑐵𑑅𑐟𑐫𑑂𑐐𑐸 𑐖𑐎 𑐳𑑄𑐰𑐟𑑂 𑐩𑐏𑐸𑑋 𑐠𑐠𑐾 𑐢𑐎𑐵𑑅 𑐣𑑂𑐴𑑂𑐫𑐵𑐎𑑂𑐰 𑐨𑐵𑐲𑐞 𑐧𑐶𑐄𑐳𑐵 𑐣𑐾𑐰𑐵𑑅 𑐖𑐣𑐩𑐵𑐣𑐳𑐫𑑂 𑐖𑐎 𑐩𑐏𑐸, 𑐐𑐿𑐬 𑐣𑐾𑐰𑐵𑑅 𑐖𑐣𑐩𑐵𑐣𑐳𑐫𑑂 𑐣𑑄 𑐠𑑂𑐰 𑐣𑐾𑐰𑐵𑑅𑐟𑐫𑑂𑐐𑐸 𑐖𑐎 𑐳𑑄𑐰𑐟𑑂 𑐏𑑅 𑐢𑐎𑐵𑑅 𑐡𑐂𑐔𑑂𑐰𑐣 𑑋 𑐄𑐎𑐠𑑄 𑐴𑐾 𑐢𑐵𑐥𑐹 𑐥𑐶𑐴𑐵𑑃 𑐰𑐂𑐐𑐸 𑐰 𑐎𑑂𑐬𑐶𑐫𑐵 𑐥𑑂𑐬𑐟𑐶𑐎𑑂𑐬𑐶𑐫𑐵 𑐖𑐸𑐂𑐐𑐸 𑐖𑐸𑐫𑐵 𑐔𑑂𑐰𑑄𑐐𑐸 𑐡𑐸𑑋 𑐀𑐠𑐾 𑐴𑐾 𑐁𑑅 𑐳𑐵𑐫𑐵𑑅, 𑐩𑐟𑐫𑐵𑑅, 𑐫𑑃𑐫𑐵𑑅 𑐣𑑄 𑐣𑐾𑐰𑐵𑑅𑐟𑐫𑑂𑐐𑐸 𑐖𑐎 𑐏𑑅 𑐢𑐂𑐐𑐸 𑐀𑐨𑐶𑐰𑑂𑐫𑐎𑑂𑐟𑐶 𑐠𑐷𑐠𑐷 𑐳𑐘𑑂𑐔𑐵𑐬 𑐩𑐵𑐢𑑂𑐫𑐩𑐫𑑂 𑐏𑐣𑐾𑐡𑐸𑐐𑐸 𑐡𑐸 𑑋

𑐗𑐷𑐳𑑄 𑐣𑐾𑐥𑐵𑐮 𑐨𑐵𑐲𑐵, 𑐣𑐾𑐥𑐵𑐮 𑐳𑑄𑐰𑐟𑑂, 𑐣𑐾𑐥𑐵𑐮 𑐮𑐶𑐥𑐶 𑐢𑐂𑐐𑐸 𑐏𑑃𑐐𑑂𑐰𑑅 𑐴𑐾 𑐕𑑂𑐫𑐮𑐵 𑐰𑐫𑐵𑐔𑑂𑐰𑐣𑐵𑐐𑐸 𑐡𑐸𑑋 𑐗𑐷 𑐀𑐐𑑂𑐬𑐖𑐥𑐶𑐳𑑄 𑐣𑑄 𑐄𑐎𑐠𑑄 𑐴𑐾 𑐕𑑂𑐫𑐮𑐵 𑐰𑐫𑐵𑐔𑑂𑐰𑑄𑐐𑐸 𑐏𑑅 𑑋 𑐬𑐵𑐖𑑂𑐫 𑐥𑐎𑑂𑐲𑐫𑐵 𑐡𑐺𑐲𑑂𑐚𑐶𑐎𑑀𑐞 𑐳𑑂𑐰𑐫𑐾𑐐𑐸 𑐏𑑅𑐳𑐵𑑄 𑐥𑐘𑑂𑐔𑐵𑐫𑐟 𑐎𑐵𑐮𑐫𑑂 𑐳𑐵𑐫𑐵𑑅, 𑐫𑑃𑐫𑐵𑑅, 𑐧𑐸𑑃𑐐𑑅𑐡𑑂𑐫𑑅𑐫𑐵 𑐖𑐵𑐟𑑂𑐬𑐵 𑐠𑐸𑐖𑑂𑐰𑑅𑐐𑐸 𑐥𑐬𑑂𑐰𑐫𑐵𑐟 𑐐𑐸𑐐𑐸𑑄 𑐖𑐵𑐟𑐶𑐰𑐶𑐱𑐾𑐲𑐮𑐶𑐳𑐾 𑐩𑐳𑑂𑐰𑐵𑑅𑐳𑐾𑑄 𑐣𑐾𑐥𑐵𑑅𑐫𑐵 𑐴𑐾 𑐥𑐬𑑂𑐰 𑐎𑐠𑑄 𑐎𑐫𑐵𑑅 𑐥𑐵𑐛𑑂𑐫𑐳𑐦𑐹 𑐰 𑐳𑐘𑑂𑐔𑐵𑐬 𑐩𑐵𑐢𑑂𑐫𑐩𑐫𑑂 𑐣𑑄 𑐣𑑂𑐴𑑂𑐫𑐧𑑂𑐰𑐫𑐵 𑐰𑐫𑐵𑐔𑑂𑐰𑑄𑐐𑐸 𑐗𑐷𑐳𑑄 𑐏𑑅 𑑋 𑐨𑐵𑐫𑑂 𑐕𑐐𑐹𑐫𑐵𑐟 𑐣𑐾𑐰𑐵𑐬𑐷 𑐰𑐵 𑐣𑐾𑐰𑐵𑐬 𑐢𑐎𑐵𑑅 𑐖𑐵𑐟𑐶𑐐𑐟 𑐟𑐵𑐫𑐾𑐎𑐹𑐳𑐵𑑄 𑐳𑑄𑐳𑑂𑐎𑐺𑐟𑐶𑐫𑐵 𑐳𑐰𑐵𑐮𑐫𑑂 𑐳𑐬𑐎𑐵𑐬𑑄 𑐡𑐾𑐫𑑂𑐫𑐵 𑐴𑐾 𑐩𑐹𑐮𑐢𑐵𑐬𑐫𑐵 𑐳𑑄𑐳𑑂𑐎𑐺𑐟𑐶 𑐎𑐠𑑄 𑐎𑐫𑐵 𑐰𑐫𑐵𑐔𑑂𑐰𑑄𑐐𑐸 𑐏𑑅 𑑋 𑐥𑐱𑑂𑐔𑐶𑐩𑐩𑐵 𑐡𑐾𑐄𑐜𑐵 𑐮𑐵 𑐕𑐸, 𑐟𑐵𑐩𑐵𑐧𑐟𑐫𑑂𑐐𑐸 𑐮𑑂𑐴𑑀𑐳𑐵𑐬 𑐟𑐎𑑄 𑐖𑐣𑐩𑐵𑐣𑐳𑑄 𑐧𑐵𑑄𑐮𑐵𑐎𑑂𑐎 𑐩𑐳𑐶𑐄 𑑋 𑐠𑐸𑐎𑐠𑑄 𑐩𑐾𑐥𑐶𑐣𑑂𑐟 𑐰𑐴𑐶𑐥𑑂𑐎𑐬𑐞𑐫𑑂 𑐮𑐵𑐎𑐵𑐟𑑅𑐐𑐺𑐸 𑐣𑑄 𑐏𑑅 𑑋

𑐣𑐾𑐥𑐵𑑅𑐫𑐵 𑐄𑐧𑐮𑐫𑑂𑐫𑐵 𑐃𑐫𑐵 𑐩𑐹𑐮𑑂𑐫𑐵𑑄𑐎𑐣 𑐫𑐵𑐟 𑐢𑐵𑑅𑐳𑐵 𑐟𑑂𑐬𑐶𑐱𑐹𑐮𑐷𑐫𑐵 𑐖𑐮𑐰𑐶𑐡𑑂𑐫𑐸𑐟 𑐁𑐫𑑀𑐖𑐣𑐵𑑄 𑐳𑑂𑐰𑐣𑐶𑐐𑐮𑐫𑑂 𑐴𑐫𑐵𑑅 𑐩𑐟 𑐔𑑂𑐫𑐵𑐎𑐵𑐟𑐮, 𑐟𑐬 𑐰𑐴𑐾 𑐥𑐵𑐰𑐬𑐴𑐵𑐄𑐳𑐫𑐵 𑐔𑑂𑐰𑐫𑑂𑐜𑐵𑑃 𑐜𑐵𑐫𑐵 𑐧𑐳𑑂𑐟𑐷𑐂 𑐟𑐎𑑄 𑐩𑐟 𑐠𑑂𑐫𑑄𑐎𑐵𑐟𑑅𑐐𑐸 𑐩𑐡𑐸𑑋 𑐥𑐘𑑂𑐔𑐵𑐫𑐟 𑐎𑐵𑐮𑐫𑐵 𑐀𑐣𑑂𑐟 𑐎𑐵𑐮𑐫𑑂 𑐖𑐎 𑐩𑐏𑐸, 𑐧𑐴𑐸𑐡𑐮 𑐰𑐫𑐾𑐢𑐸𑑄𑐎𑐵𑑅 𑐣𑑄 𑐖𑐹𑐐𑐸 𑐮𑐵 𑐠𑑂𑐰 𑐴𑐾 𑐏𑑅 𑑋 𑐰𑐶𑐎𑐵𑐳 𑐦𑐸𑐎𑑂𑐎 𑐳𑑂𑐰𑐣𑐶𑐐𑐮𑐫𑑂𑐴𑐾 𑐎𑐾𑐣𑑂𑐡𑑂𑐬𑐶𑐟, 𑐱𑐵𑐳𑐣 𑐣𑑄 𑐢𑐵𑐟𑑂𑐠𑐾𑑄 𑐮𑐵 𑐳𑑂𑐰𑐣𑐶𑐐𑐮𑐫𑑂 𑐖𑐎 𑐡𑐸, 𑐐𑐵𑑄𑐐𑐵𑐩𑐫𑑂 𑐀𑐣𑐫𑐵 𑐴𑐾 𑐛𑐵𑐮𑐹𑐟𑐳𑐾𑑄 𑐥𑑂𑐬𑐢𑐵𑐣 𑐥𑐘𑑂𑐔 𑐂𑐟𑑂𑐫𑐵𑐡𑐶 𑐖𑐸𑐫𑐵𑑅 𑐱𑐵𑐳𑐣 𑐔𑐮𑐾 𑐫𑐵𑐂𑐐𑐸𑑋 𑐂𑐩𑐶𑐟 𑐩𑐵𑐮 𑐴𑐾 𑐢𑐵𑑅𑐳𑐵 𑐖𑐎 𑐖𑐶𑐮𑑂𑐮𑐵𑐫𑐵 𑐥𑐸𑐮𑐶𑐳 𑐥𑑂𑐬𑐱𑐵𑐳𑐣𑐫𑐵 𑐐𑑂𑐰𑐵𑐴𑐵𑐮𑐶 𑐎𑐵𑐂𑐐𑐸𑑋 𑐥𑐘𑑂𑐔𑐵𑐫𑐟𑐫𑐵 𑐣𑐾𑐟𑐵𑐟𑐳𑐾𑑄 𑐔𑐸𑐣𑐵𑐰 𑐰𑐮 𑐎𑐶 𑐳𑑂𑐎𑐸𑐮𑐫𑑂 𑐟𑐫𑐾𑐟 𑐖𑐳𑑂𑐟𑐵𑐥𑐵𑐟𑐵 𑐧𑐶𑐫𑐵𑑅 𑐨𑑀𑐚 𑐎𑐫𑐵𑑅 𑐰𑐣𑐷𑐐𑐸𑑋 𑐐𑐵𑑄𑐐𑐵𑐩𑐫𑑂 𑐛𑐵𑐮𑐹 𑐖𑐸𑐫𑐵𑐔𑑂𑐰𑑄𑐥𑐶𑐣𑐶 𑐩𑐳𑑂𑐟 𑐖𑐎 𑐩𑐏𑐸, 𑐨𑐔𑐵 𑐢𑑂𑐫𑐧𑐵 𑐡𑐸𑐥𑐶𑐣𑐶 𑐩𑐳𑑂𑐟 𑐣𑑄 𑐩𑐵𑐢𑑂𑐫𑐩𑐶𑐎 𑐱𑐶𑐎𑑂𑐲𑐵𑐫𑐵 𑐣𑐶𑐟𑐶𑑄 𑐖𑐶𑐮𑑂𑐮𑐵 𑐳𑐡𑐬𑐩𑐸𑐎𑐵𑐩 𑐰 𑐄𑐔𑑂𑐔 𑐱𑐶𑐎𑑂𑐲𑐵𑐫𑐵 𑐣𑐶𑐟𑐶𑑄 𑐫𑐾𑑃𑐫𑑂 𑐰𑐂𑐐𑐸𑑋 𑐠𑐸𑐥𑐶𑑄 𑐖𑐵𑐐𑐶𑐬 𑐣𑐫𑐵𑑅, 𑐣𑐾𑐟𑐵𑐐𑐶𑐬𑐷 𑐫𑐵𑐣𑐵𑑅 𑐠𑐣 𑐴𑐾 𑐳𑐾𑐚𑐮 𑐖𑐸𑐂𑐐𑐸𑑋 𑐠𑐸𑐐𑐸 𑐥𑑂𑐬𑐰𑐺𑐟𑑂𑐟𑐶 𑐣𑑂𑐴𑑂𑐫𑐵𑐣𑐵 𑐴𑐾 𑐟𑐸𑑄 𑐰𑐫𑐵𑐔𑑂𑐰𑑄𑐐𑐸 𑐳𑑂𑐠𑐶𑐟𑐶𑐂 𑐴𑑂𑐫𑐹𑐥𑐵𑑅 𑐩𑐵𑐌𑐰𑐵𑐡𑐷 𑐖𑐣𑐫𑐸𑐡𑑂𑐢𑑄 𑐴𑐫𑐵𑐧𑐶𑐮 𑑋 𑐣𑐾𑐥𑐵𑑅𑐫𑐵 𑐐𑐵𑑄𑐐𑐵𑑄𑐫𑐵 𑐴𑐵𑐮𑐟 𑐴𑐾 𑐴𑐵𑑅𑐣𑐵𑑅 𑐩𑐡𑐸𑐥𑐶𑑄 𑐩𑐣𑐹𑐟𑐫𑑂 𑐧𑐳𑑂𑐟𑐷 𑐖𑐸𑐫𑐵𑐔𑑂𑐰𑑄𑐐𑐸 𑐂𑐮𑐫𑑂 𑐩𑐵𑐌𑐰𑐵𑐡𑐷𑑄 𑐳𑐎𑐳𑐶𑐟𑑄 𑐠𑐣𑐵𑐰𑐶𑐮 𑑋 𑐂𑐥𑐶𑑄 𑐴𑐾 𑐳𑐴𑐵𑐬𑐵 𑐖𑐸𑐫𑐵 𑐧𑐶𑐮 𑑋 𑐠𑐸𑐎𑐶𑑄 𑐡𑐾𑐳𑐫𑑂 𑐐𑐵𑑄𑐐𑐵𑑄𑐫𑐵𑐥𑐶𑑄 𑐴𑐵𑐣𑑄 𑐕𑐎𑑂𑐰𑑅 𑐳𑑂𑐰𑐣𑐶𑐐𑐮𑐫𑑂 𑐰𑐫𑐾𑐐𑐸 𑐖𑐎 𑐩𑐏𑐸, 𑐠𑐷𑐠𑐷 𑐰𑐬𑑂𑐐, 𑐖𑐵𑐟𑐶, 𑐮𑐶𑐒𑑂𑐐, 𑐥𑐾𑐱𑐵𑐫𑐵 𑐩𑐣𑐹𑐟 𑐩𑐹𑐮𑐢𑐵𑐬𑐷𑐎𑐬𑐞 𑐰 𑐳𑐱𑐎𑑂𑐟𑐷𑐎𑐬𑐞𑐫𑐵 𑐮𑑃𑐥𑐸𑐂 𑐣𑑂𑐴𑑂𑐫𑐵𑑅 𑐰𑐮 𑑋 𑐠𑐸𑐎𑐶𑑄 𑐡𑐫𑐵𑐔𑑂𑐰𑑄𑐐𑐸 𑐬𑐷𑐟𑐶𑐠𑐶𑐟𑐶 𑐳𑑂𑐠𑐶𑐟𑐶𑐫𑐵𑐟 𑐨𑐟𑐵𑐨𑐸𑐒𑑂𑐐 𑐫𑐵𑐣𑐵𑐴𑐮 𑑋

𑐥𑐘𑑂𑐔𑐵𑐫𑐟𑐷 𑐎𑐵𑐮𑐫𑑂 𑐟𑐎 𑐣𑐾𑐰𑐵𑑅𑐟 𑐳𑐟𑑂𑐟𑐵𑑄 𑐧𑐾𑐡𑐏𑐮 𑐖𑐹𑐳𑐵𑑄 𑐳𑐟𑑂𑐟𑐵𑐣𑐵𑐥𑐴𑐾 𑐥𑑁𑑃𑐛𑐾𑐖𑑀𑐬𑐷 𑐀𑐬𑑂𑐠𑐵𑐟𑑂 𑐮𑑂𑐴𑐵𑑅 𑐮𑑂𑐰𑐵𑐎𑐵𑑅 𑐩𑑂𑐴𑐶𑐟𑐾𑐦𑐸𑐥𑐶𑑄 𑐩𑐣𑐹𑐟 𑐖𑐸𑐫𑐵 𑐔𑑂𑐰𑑄𑐐𑐸 𑐏𑑅 𑑋 𑐳𑐬𑐎𑐵𑐬𑑄 𑐐𑑀𑐬𑐏𑐵𑐥𑐟𑑂𑐬 𑐥𑐶𑐎𑐵𑐮, 𑐴𑐵𑐣𑑄 𑐩𑐞𑐶𑐬𑐵𑐖 𑐄𑐥𑐵𑐢𑑂𑐫𑐵𑐫𑑄 𑐳𑐩𑐵𑐖 𑐢𑐵𑑅𑐐𑐸 𑐣𑑂𑐴𑐶𑐥𑑁 𑐥𑐶𑐠𑐣 𑑋 𑐟𑐬 𑐣𑐾𑐰𑐵𑑅𑐟 𑐣𑑄 𑐕𑐸 𑐎𑐩? 𑐗𑐷 𑐦𑐟𑑂𑐟𑐾 𑐧𑐴𑐵𑐡𑐸𑐬 𑐳𑐶𑑄𑐴𑑄 𑐣𑐾𑐥𑐵𑐮𑐨𑐵𑐲𑐵 𑐥𑐟𑑂𑐬𑐶𑐎𑐵 𑐢𑐎𑐵𑑅 𑐣𑑂𑐴𑐶𑐥𑑁 𑐥𑐶𑐠𑐣𑐵𑐡𑐶𑐮 𑑋 𑐄𑐎𑐶𑑄 𑐳𑐬𑐎𑐵𑐬𑑄 𑐧𑐾𑐡𑐏𑐮 𑐫𑐵𑐟 𑐗𑐷𑐟 𑐣𑑄 𑐠𑐵𑐫𑑂 𑐩𑐵𑐮 𑐢𑐂𑐐𑐸 𑐕𑐐𑐹 𑐩𑐵𑐐 𑐀𑐮𑐾 𑐗𑐷 𑐣𑑄 𑐩𑑂𑐴𑑀 𑐩𑐖𑐹 𑐢𑐎𑐵𑑅 𑐏𑑃𑐫𑑂 𑐣𑐵𑐥 𑐢𑐾𑑃𑐫𑑂𑐢𑐾𑑃𑐫𑑂 𑐧𑐮𑑂𑐮𑐵𑐫𑑂 𑐰𑐣𑐾𑐐𑐸 𑐩𑐾𑐐𑐸 𑐫𑐵𑐣𑐵𑑅 𑐣𑐶𑐐𑐹𑐥𑑂𑐬𑐰𑐺𑐟𑑂𑐟𑐶 𑐗𑐷𑐎𑐾 𑐣𑑂𑐴𑑂𑐫𑐵𑐣𑐵 𑐰𑐫𑐵 𑐔𑑂𑐰𑑄𑐐𑐸 𑐏𑑅 𑑋 𑐐𑐸𑐧𑐮𑐾 𑐳𑐟𑑂𑐟𑐵 𑐣𑐵𑐥 𑐮𑑂𑐰𑐵𑐫𑐾𑐟 𑐡𑐾𑐫𑑂𑐫𑐵 𑐠𑐷𑐠𑐷 𑐨𑐵𑐫𑑂 𑐰 𑐖𑐵𑐟𑐶𑐫𑐵 𑐳𑐰𑐵𑐮 𑐥𑐶𑐡𑐣𑐷, 𑐄𑐧𑐮𑐾 𑐳𑐎𑐳𑐶𑐫𑐵𑑄 𑐏𑑃 𑐣𑑂𑐴𑑂𑐫𑐣𑐠𑐵𑑅 𑐄𑐟𑑂𑐥𑐷𑐜𑐶𑐟 𑐖𑐵𑐟𑐶 𑐰 𑐳𑑄𑐳𑑂𑐎𑐺𑐟𑐶𑐫𑐵 𑐥𑐎𑑂𑐲𑐫𑐵 𑐣𑑂𑐴𑑂𑐫𑐮𑐸𑐰𑐵 𑐣𑑄 𑐣𑐾𑐰𑐵𑑅𑐟 𑐴𑐾 𑐖𑐸𑐫𑐵𑑅 𑐥𑐶𑐴𑐵𑑃 𑐰𑑅𑐐𑐸 𑐏𑑅 𑑋

𑑒𑑐𑑔𑑖 𑐳𑐵𑐮𑐫𑑂 𑐥𑐘𑑂𑐔𑐵𑐫𑐟𑐷 𑐰𑑂𑐫𑐰𑐳𑑂𑐠𑐵 𑐎𑑂𑐰𑑅𑐡𑐮 𑑋 𑐠𑐸𑐎𑐷 𑐩𑐹𑐮𑐟𑑅 𑐣𑐾𑐰𑐵𑑅𑐟𑐫𑑂𑐐𑐸 𑐴𑐾 𑐟𑑅𑐢𑑄𑐐𑐸 𑐫𑑀𑐐𑐡𑐵𑐣 𑐡𑐸𑑋 𑐖𑐣 𑐁𑐣𑑂𑐡𑑀𑐮𑐣𑐫𑐵 𑐳𑐬𑑂𑐰𑑀𑐔𑑂𑐔 𑐎𑐩𑐵𑐞𑑂𑐜𑐬 𑐣𑑄 𑐐𑐞𑐾𑐱𑐩𑐵𑐣 𑐳𑐶𑑄𑐴 𑐴𑐾 𑐖𑐸𑐫𑐵𑐡𑐷𑐐𑐸 𑐏𑑅 𑑋 𑐠𑑂𑐰𑐫𑐵𑑄 𑐮𑐶𑐄 𑑒𑑐𑑒𑑒 𑐳𑐵𑐮𑑄 𑐣𑐶𑐳𑐾𑑄 𑐡𑐶𑐣𑐵𑐔𑑂𑐰𑑄𑐐𑐸 𑐣𑐾𑐥𑐵𑐮𑐨𑐵𑐲𑐵𑐫𑐵 𑐳𑐩𑐵𑐔𑐵𑐬 𑐨𑐵𑐖𑐸 𑐴𑐬𑐶 𑐱𑑂𑐬𑐾𑐲𑑂𑐛𑑄 𑐴𑐵𑐎𑐣𑑄 𑐬𑐾𑐜𑐶𑐫𑑀 𑐣𑐾𑐥𑐵𑐮𑐫𑑂 𑐡𑐸𑐴𑐵𑑃 𑐗𑐵𑐫𑐵𑑅 𑐣𑑂𑐴𑑂𑐫𑐵𑐎𑐵𑐡𑐶𑐮 𑑋 𑐠𑐸𑐮𑐶 𑐖𑐸𑐂𑐰𑑄 𑐴𑐾 𑐳𑐎𑐳𑐶𑐫𑐵𑑄 𑐩𑐶𑐏𑐵 𑐟𑐐𑑂𑐰𑐮 𑑋 𑐩𑐣𑐹𑐟𑐳𑐾𑑄 𑐠𑑂𑐰 𑐣𑑂𑐴𑐵𑐥𑐵𑑄𑐣𑐶𑐳𑐾𑑄 𑐡𑐸𑐐𑐸 𑐏𑑃 𑐴𑐾 𑐥𑐸𑐣𑐳𑑂𑐬𑑂𑐠𑐵𑐥𑐶𑐟 𑐫𑐵𑑅𑐐𑐸 𑐏𑑅 𑐢𑐎𑐵𑑅 𑐩𑐠𑐸𑐂𑐎𑐹 𑑋 𑐣𑐾𑐰𑐵𑑅 𑐨𑐵𑐫𑑂𑐫𑐵 𑐖𑐎 𑐳𑐩𑐵𑐔𑐵𑐬 𑐕𑐵𑐫𑑂 𑐖𑐶𑐩𑐶𑐐𑐸 𑐨𑐵𑐫𑑂 𑐐𑑂𑐰 𑐢𑐂𑐐𑐸 𑐖𑐸𑐫𑐵 𑐰𑐮 𑑋 𑐣𑑂𑐴𑐵𑐥𑐵𑑄 𑐮𑐵 𑐏𑑃𑐫𑑂𑐧𑐩𑑂𑐴𑐹𑐟𑐫𑑂𑐐𑐸 𑐠𑑅𑐐𑐸 𑐨𑐵𑐫𑑂 𑐣𑑄 𑐡𑐾𑐳𑐫𑑂 𑐔𑐮𑐾 𑐖𑐸𑐫𑐵𑐔𑑂𑐰𑑄𑐐𑐸𑐺 𑐳𑐎𑐳𑐶𑑄𑐐𑐸 𑐨𑐵𑐫𑑂𑐏𑑅 , 𑐠𑑅𑐐𑐸 𑐴𑐾 𑐨𑐵𑐫𑑂 𑐣𑑄 𑐩𑐵𑐮 𑐢𑐎𑐵𑑅 𑐳𑑄𑐳𑑂𑐎𑐺𑐟 𑐨𑐵𑐫𑑂 𑐟𑐫𑐾 𑐴𑐮 𑑋 𑐀𑐣𑑄𑐮𑐶 𑐠𑐷𑐠𑐷 𑐩𑐾𑐩𑐾𑐐𑐸 𑐨𑐵𑐫𑑂 𑐣𑑄 𑐰𑐮 𑑋

𑐠𑐸𑐮𑐶 𑐖𑐸𑐂𑐰𑑄 𑐱𑐵𑐳𑐣𑐫𑑂 𑐱𑐵𑐴𑐟 𑐟𑐬 𑐣𑑂𑐴𑐵𑐥𑐵 𑐱𑐵𑐳𑐣 𑐔𑐮𑐾 𑐫𑐵𑐫𑐾 𑐢𑐸𑑄𑐎𑐹𑐥𑐶𑑄 𑐬𑐵𑐞𑐵𑐟 𑐣𑑄 𑐕𑐸𑑄 𑐎𑐩 𑐩𑐖𑐹, 𑐂𑐩𑐶𑐟 𑐠𑐵𑐫𑑂 𑐐𑑂𑐰? 𑐢𑐎𑐵𑑅 𑐢𑐂𑐐𑐸 𑐴𑐿𑐳𑐶𑐫𑐟𑐫𑑂 𑐠𑐾𑑄 𑐴𑐿𑐳𑐶𑐫𑐟𑐫𑑂 𑐡𑐸𑐥𑐶𑑄 𑐣𑐾𑐰𑐵𑑅𑐟 𑐳𑐬𑐎𑐵𑐬𑐷 𑐲𑐜𑐫𑐣𑑂𑐟𑑂𑐬𑐫𑑂 𑐡𑐸𑐣𑐾 𑐮𑐵𑐣𑐵𑑅 𑐳𑐟𑑂𑐟𑐵𑑄 𑐣𑑂𑐴𑐵𑐥𑐵 𑐐𑐶𑐣𑑂𑐟𑐷𑐴𑐾 𑐩𑐫𑐵𑐳𑐾𑑄 𑐥𑐹𑐬𑑂𑐞𑐟𑑅 𑐰𑐴𑐶𑐲𑑂𑐎𑐬𑐞𑐫𑑂 𑐮𑐵𑐎𑐵𑐟𑑅𑐐𑐸 𑐨𑐵𑐲𑐵 𑐳𑐬𑐴 𑐖𑐹 𑐰𑐣 𑑋 𑐠𑑂𑐰 𑐴𑐾 𑐥𑑂𑐬𑐰𑐺𑐟𑑂𑐟𑐶 𑐣𑑂𑐴𑑂𑐫𑐵𑐣𑐵 𑐰𑑄𑐧𑐮𑐫𑑂 𑐁𑑅𑐟𑐎 𑐠𑑂𑐫𑑄𑐧𑐮𑐫𑑂𑐩𑑂𑐴𑐶 𑐐𑑅 𑐣𑐾𑐥𑐵𑐮 𑐳𑑄𑐳𑑂𑐎𑐺𑐟𑐶𑐫𑐵 𑐣𑐵𑐩𑑄 𑐣𑐾𑐰𑐵𑑅 𑐳𑑄𑐳𑑂𑐎𑐺𑐟𑐶𑐫𑐵𑐟 𑐣𑐵𑐮𑐵𑐟𑑅𑐐𑐸 𑐠𑐵𑐳𑐫𑑂 𑐣𑐾𑐰𑐵𑑅 𑐳𑑄𑐳𑑂𑐎𑐺𑐟𑐶 𑐩𑐸𑐎𑑂𑐎𑑄 𑐣𑐾𑐰𑐵𑑅𑐟𑐫𑑂𑐐𑐸 𑐖𑐎 𑐳𑑄𑐳𑑂𑐎𑐺𑐟𑐶 𑐖𑐹𑐰𑑄𑐐𑐸 𑐏𑑅 𑑋 𑐳𑐏𑐾 𑐎𑐩𑐮 𑐠𑐵𑐥𑐵𑐫𑐵𑐟 𑐢𑐫𑐵𑑅 𑐗𑐚𑑂𑐚 𑐳𑐘𑑂𑐔𑐵𑐬 𑐩𑐵𑐢𑑂𑐫𑐩𑐫𑑂 𑐟𑐫𑐾𑐎𑐾 𑐩𑐦𑐸𑐐𑐸 𑐏𑑅𑐳𑐵 𑐰 𑐩𑐵𑐌𑐰𑐵𑐡𑐷𑐫𑐵𑐎𑐾 𑐖𑐣𑐫𑐸𑐡𑑂𑐢𑐫𑐵 𑐬𑐵𑐥𑐟𑐵𑐥 𑐡𑐸𑐐𑐸 𑐂𑐮𑐫𑑂 𑐴𑐾 𑐬𑐵𑐲𑑂𑐚𑑂𑐬𑐶𑐫 𑐳𑑄𑐰𑐟𑑂 𑐢𑐎𑐵𑑅 𑐑𑑀𑐲𑐶𑐟 𑐫𑐵𑐎𑐾 𑐩𑐦𑐸𑐐𑐸 𑐏𑑅𑐳𑐵 𑐣𑐾𑐥𑐵𑐮 𑐳𑑄𑐰𑐟𑑂𑐫𑐵 𑐁𑐣𑑂𑐡𑑀𑐮𑐣 𑐣𑑄 𑐁𑑅 𑐄𑐥𑐮𑐧𑑂𑐢𑐶𑐴𑐷𑐣 𑐖𑐸𑐮 𑐢𑐎𑐵𑑅 𑐗𑐷 𑐴𑐵𑐮𑐵 𑐔𑑂𑐰𑐣𑐾𑐩𑐵𑐮𑐷𑐐𑐸 𑐖𑐸𑐂 𑑋

𑐰𑐵𑐳𑑂𑐟𑐰𑐫𑑂 𑐫𑑃𑐫𑐵𑑅𑐧𑐮𑐫𑑂 𑐎𑐸𑐩𑐵𑐬𑐷𑐫𑐵 𑐬𑐠𑐫𑐵𑐟𑑂𑐬𑐵, 𑐧𑐸𑑄𑐐𑑅𑐡𑑂𑐫𑑅𑐫𑐵 𑐖𑐵𑐟𑑂𑐬𑐵𑐫𑐵 𑐂𑐟𑐶𑐴𑐵𑐳 𑐳𑑂𑐰𑐫𑐾𑐐𑐸 𑐏𑑅𑐳𑐵 𑐠𑑂𑐰 𑐣𑐾𑐰𑐵𑑅𑐟𑐫𑑂𑐐𑐸 𑐩𑐏𑐳𑐾𑑄 𑐣𑐾𑐥𑐵𑑅𑐫𑐵 𑐬𑐵𑐖𑑂𑐫𑑄 𑐣𑑂𑐴𑑂𑐫𑐵𑐎𑐵𑐰𑐫𑐵𑐔𑑂𑐰𑑄𑐐𑐸 𑐖𑐵𑐟𑑂𑐬𑐵 𑐏𑑅 𑑋 𑐠𑑁𑑄𑐎𑐣𑑂𑐴𑐫𑑂𑐫𑐵 𑐨𑐵𑐳𑑄 𑐢𑐵𑐫𑐾𑐐𑐸 𑐏𑑅𑐳𑐵 𑐠𑐸𑐥𑐶𑑄 𑐳𑑂𑐚𑐾𑐚 𑐳𑑂𑐥𑑀𑐣𑑂𑐳𑐬𑑂𑐜 𑐏𑑅 𑑋 𑐀𑐗 𑐳𑐵𑐫𑐵𑑅𑐫𑐵𑐟 𑐣𑑄 𑐖𑐸𑐖𑐸 𑐰𑐵 𑐄𑐧𑐮𑐫𑑂𑐫𑐵 𑐬𑐵𑐖𑑂𑐫𑐫𑐵 𑐄𑐬𑑂𑐡𑐷𑐎𑐠𑑄 𑐣𑑂𑐴𑑂𑐫𑐵𑑅𑐐𑐸 𑐥𑐬𑑂𑐰 𑐎𑐠𑑄 𑐎𑐫𑐵𑐟𑑅𑐐𑐸 𑐡𑐸𑑋 𑐥𑐘𑑂𑐔𑐵𑐫𑐟𑐷 𑐱𑐵𑐳𑐎𑐟𑐳𑐾𑑄 𑐠𑐸𑐎𑐶𑐫𑐵𑐟 𑐔𑐬𑑂𑐔𑐵 𑐫𑐵𑐫𑐾𑐐𑐸 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐴𑐸𑐣𑐶 𑐣𑑄 𑐠𑑂𑐰 𑐴𑐾 𑐴𑐸𑐣𑐶𑑄 𑐏𑑅 𑑋 𑐣𑑂𑐴𑐵𑐥𑐵𑐫𑐵 𑐱𑐵𑐳𑐎𑐟𑐳𑐾𑑄 𑐫𑐵𑐣𑐵𑐠𑐎𑐹𑐐𑐸𑐮𑐶𑑄 𑐱𑐵𑐳𑐎𑐷𑐫 𑐡𑐺𑐲𑑂𑐚𑐶𑐎𑑀𑐞 𑐟𑐫𑐵𑑅 𑐴𑐾 𑐂𑐩𑐶𑐳𑑄 𑐠𑐸𑐎𑐶𑐫𑐵𑐟 𑐧𑐝𑐵𑐰𑐵 𑐧𑐶𑐄𑐐𑐸 𑐏𑑅 𑐢𑐂𑐐𑐸 𑐠𑐸𑐂𑐎𑐾𑐟 𑐠𑐵𑐎𑐸 𑐩𑐖𑐹 𑑋 𑐠𑑁𑑄 𑐎𑐣𑑂𑐴𑐫𑑂 𑐐𑐸𑐮𑐶 𑐐𑐸𑐮𑐶𑑄 𑐣𑐾𑐰𑐵𑑅𑐟𑐳𑐾𑑄 𑐣𑐾𑐰𑐵𑑅𑐟𑐫𑑂𑐐𑐸 𑐖𑐵𑐟𑑂𑐬𑐵𑐫𑑂 𑐐𑐸𑐬𑑂𑐖𑐸 𑐥𑐮𑑂𑐚𑐣𑐫𑐵 𑐣𑐵𑐩𑑄 𑐐𑑀𑐬𑐏𑐵𑐫𑐵 𑐥𑐮𑑂𑐚𑐣 𑐐𑐣𑑄 𑐰𑐮 ? 𑐢𑐵𑐫𑐾𑐐𑐸 𑐫𑐵𑐣𑐵 𑐰𑐫𑐵 𑐔𑑂𑐰𑑄𑐐𑐸 𑐡𑐸𑑋 𑐟𑐬 𑐥𑐺𑐠𑑂𑐰𑐷 𑐣𑐵𑐬𑐵𑐫𑐞 𑐱𑐵𑐴𑐫𑐵 𑐴𑑅𑐟𑐵𑑅 𑐮𑐶𑐥𑐵 𑐎𑐸𑐩𑐵𑐬𑐷 𑐖𑐵𑐟𑑂𑐬𑐵 𑐳𑐬𑐎𑐵𑐬𑐷 𑐖𑐵𑐟𑑂𑐬𑐵 𑐖𑐸𑐫𑐵𑑅 𑐣𑐾𑐰𑐵𑑅𑐟𑐳𑐾𑑄 𑐮𑐵 𑐕𑐐𑐹 𑐎𑐠𑑄 𑐰𑐴𑐶𑐲𑑂𑐎𑐵𑐬 𑐫𑐵𑐣𑐵𑐔𑑂𑐰𑑄𑐐𑐸 𑐏𑑃 𑐗𑐷𑐳𑑄 𑐮𑑂𑐰𑑅𑐩𑑄𑐎𑐾 𑐩𑐖𑐶𑐄 𑑋 𑐎𑐸𑐩𑐵𑐬𑐷 𑐖𑐵𑐟𑑂𑐬𑐵𑐫𑑂 𑐢𑐶𑐩𑐾, 𑐣𑐵𑐫𑑂𑐏𑐶𑑃 𑐧𑐵𑐖𑑄 𑐠𑑂𑐫𑑄𑐐𑐸 𑐮𑐵 𑐟𑐵𑑅 𑐃 𑐴𑐾 𑐩𑐡𑐸𑐣𑐶 𑑋 𑐮𑐵𑐏𑐾, 𑐳𑐰𑑅 𑐨𑐎𑑂𑐎𑐸, 𑐥𑐸𑐮𑐸𑐎𑐶𑐳𑐶𑐫𑐵𑐟 𑐎𑑁𑐱𑐶𑐟𑑀𑐲𑐵 𑐏𑐵𑐣𑐵𑐩𑐵𑐬𑑂𑐦𑐟 𑐐𑑂𑐰𑐵𑐴𑐵𑐮𑐶 𑐧𑐷𑐐𑐸, 𑐂𑐥𑐶𑑄 𑐠𑐵𑐣𑐵𑐫𑑂 𑐴𑐵𑐖𑐶𑐬 𑐖𑐸𑐫𑐵𑑅 𑐎𑑂𑐫𑐣𑐾𑐩𑐵𑑅𑐐𑐸 𑐰𑑂𑐫𑐰𑐳𑑂𑐠𑐵 𑐮𑐵 𑐥𑐘𑑂𑐔𑐵𑐫𑐟𑐎𑐵𑐮𑐫𑑂 𑐖𑐸𑐫𑐵𑐔𑑂𑐰𑑄𑐐𑐸 𑐏𑑃 𑐏𑑅 𑑋 𑐠𑑂𑐰 𑐣𑑄 𑐳𑑂𑐚𑐾𑐚 𑐳𑑂𑐥𑑀𑐣𑑂𑐳𑐬 𑐏𑑅 𑑋 𑐴𑐵𑐣𑑄 𑐮𑐵𑐏𑐾 𑐰 𑐳𑐰𑑅𑐨𑐎𑑂𑐎𑐸𑐫𑐵 𑐧𑐵𑐏𑑄 𑐣𑑄 𑐬𑐵𑐖𑐎𑐸𑐮 𑐣𑐵𑐥𑐴𑐾 𑐳𑑂𑐰𑐵𑐣𑐵𑐔𑑂𑐰𑑄𑐐𑐸 𑐡𑐸𑑋 𑐎𑐸𑐩𑐵𑐬𑐷 𑐡𑑂𑐫𑑅𑐫𑐵 𑐬𑐵𑐖𑑂𑐫𑐫𑐵 𑐳𑑄𑐬𑐎𑑂𑐲𑐎 𑐴𑐾 𑐖𑐸𑐮 𑑋 𑐠𑐸𑐖𑑂𑐰𑑅𑐐𑐸 𑐥𑐎𑑂𑐲𑐫𑐵𑐟 𑐡𑐸𑐰𑐵𑐮𑐵 𑐩𑐳𑑂𑐰𑐫𑐾𑐎 𑐗𑐷 𑐳𑐴𑐷 𑐣𑐶𑐲𑑂𑐎𑐬𑑂𑐲𑐫𑑂 𑐠𑑂𑐫𑐣𑐷 𑐩𑐏𑐸 𑑋 𑐟𑐬 𑐠𑐸𑐎𑐶𑐫𑐵𑐟 𑐢𑐬𑑂𑐩𑐣𑐶𑐬𑐥𑐾𑐎𑑂𑐲 𑐖𑐸𑐂𑐢𑐸𑑄𑐎𑐹𑐐𑐸 𑐎𑐾𑐣𑑂𑐡𑑂𑐬𑐷𑐫 𑐬𑐵𑐖𑑂𑐫 𑐳𑐟𑑂𑐟𑐵𑐥𑐵𑐏𑐾𑑄 𑐀𑐮𑐐 𑐟𑐫𑐵𑑅 𑐥𑐬𑐩𑑂𑐥𑐬𑐵 𑐴𑐣𑐾𑐟 𑐂𑐩𑐶𑐟 𑐥𑐵𑐴𑐵𑑃 𑐖𑐎 𑐡𑐫𑐾𑐎𑐵𑑅 𑐱𑐎𑑂𑐟𑐶𑐱𑐵𑐮𑐷 𑐣𑐾𑐰𑐵𑑅 𑐐𑐸𑐠𑐶 𑐥𑑂𑐬𑐵𑐢𑐶𑐎𑐬𑐞𑐥𑐵𑐏𑐾𑑄 𑐴𑐾 𑐖𑐵𑐟𑑂𑐬𑐵 𑐥𑐬𑑂𑐰 𑐣𑑂𑐴𑑂𑐫𑐵𑐎𑐾𑐩𑐵𑑅𑐐𑐸 𑐠𑑁𑑄𑐫𑐵 𑐁𑐰𑐱𑑂𑐫𑐎𑐟𑐵 𑐏𑑅 𑑋

𑐠𑐠𑐾 𑐖𑐹𑐐𑐸𑐮𑐶𑑄 𑐗𑐷𑐐𑐸 𑐥𑐸𑐮𑐵𑑄𑐐𑐸 𑐐𑑁𑐬𑐰 𑐣𑑄 𑐎𑐵𑐫𑐩 𑐖𑐸𑐂𑐐𑐸, 𑐣𑐾𑐰𑐵𑑅 𑐳𑑄𑐳𑑂𑐎𑐺𑐟𑐶 𑐩𑐹𑐮𑐢𑐵𑐬𑐫𑐵 𑐳𑑄𑐳𑑂𑐎𑐺𑐟𑐶 𑐢𑐂𑐐𑐸 𑐎𑐠𑑄 𑐣𑑄 𑐥𑑂𑐬𑐳𑑂𑐟𑐸𑐟 𑐖𑐸𑐂𑐐𑐸, 𑐂𑐟𑐶𑐴𑐵𑐳 𑐣𑑄 𑐮𑑂𑐫𑐣𑐷𑐐𑐸 𑐀𑐮𑐾 𑐗𑐷𑐐𑐸 𑐳𑑂𑐰𑐵𑐩𑐶𑐟𑑂𑐰 𑐣𑑄 𑐎𑐵𑐫𑐩 𑐖𑐸𑐂𑐐𑐸 𑐮𑑃𑐥𑐸 𑐗𑐷𑐳𑑄 𑐮𑑂𑐫𑐫𑐾𑐩𑐵𑑅𑐐𑐸 𑐡𑐸 𑑋