𑐟𑑂𑐬𑐶𑐔𑐣𑑂𑐡𑑂𑐬𑐫𑑂 𑐔𑐶𑐚𑑂𑐫𑐵 𑐧𑑂𑐫𑐵𑐥𑐵𑐬


𑐫𑐾𑑃 – 𑐠𑐣𑐫𑐵 𑐟𑑂𑐬𑐶𑐔𑐣𑑂𑐡𑑂𑐬 𑐎𑐮𑐾𑐖𑐫𑑂 𑐖𑐸𑐫𑐵𑐔𑑂𑐰𑑄𑐐𑐸 𑐳𑑂𑐣𑐵𑐟𑑂𑐟𑐎𑑀𑐟𑐬 𑐟𑐴𑐫𑐵 𑐥𑐬𑐷𑐎𑑂𑐲𑐵𑐫𑑂 𑐔𑐶𑐚𑑂𑐫𑐵 𑐰𑑂𑐫𑐵𑐥𑐵𑐬 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐠𑑂𑐰 𑐎𑑂𑐫𑐵𑐩𑑂𑐥𑐳𑐫𑑂 𑐖𑐵𑑃𑐔 𑐧𑐶𑐄 𑐰𑐫𑐵𑐔𑑂𑐰𑑄𑐥𑐶𑑄 𑐰𑐶𑐡𑑂𑐫𑐵𑐬𑑂𑐠𑐷𑐟𑐫𑑂𑐟 𑐖𑐵𑑃𑐔 𑐴𑐮𑐫𑑂 𑐠𑑂𑐫𑑄𑐎 𑐴𑐾 𑐔𑐶𑐚 𑐠𑑂𑐫𑑄𑐎𑐾𑐐𑐸 𑐖𑑂𑐫𑐵 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐖𑐵𑑃𑐔 𑐧𑐶𑐄𑐰𑑅𑐩𑑂𑐴 𑐰𑐶𑐡𑑂𑐫𑐵𑐬𑑂𑐠𑐷𑑄 𑐐𑑂𑐰𑑅𑐎𑐹 𑐢𑐵𑐮 𑐰𑑅𑐎𑐹 𑐴𑐾 𑐔𑐶𑐚 𑐧𑐷𑐐𑐸 𑐰 𑐖𑐵𑑃𑐔 𑐧𑐶𑐫𑐵𑑅 𑐥𑐬𑐷𑐎𑑂𑐲𑐵 𑐴𑐮𑑄 𑐥𑐶𑐴𑐵𑑄 𑐰𑐮 𑐎𑐶 𑐢𑑂𑐫𑐧𑐵 𑐎𑐵𑐫𑐾𑐐𑐸 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋

𑐖𑐵𑑃𑐔 𑐴𑐮𑑄 𑐥𑐶𑐴𑐵𑑄 𑐰𑐫𑐾𑐰𑑄 𑐔𑐶𑐚 𑐎𑐵𑑅𑐩𑑂𑐴 𑐰𑐶𑐡𑑂𑐫𑐵𑐬𑑂𑐠𑐷𑐫𑐵𑐎𑐾 𑐎𑐮𑐾𑐖 𑐥𑐬𑐶𑐳𑐬𑐫𑑂 𑐴𑐾 𑐢𑑂𑐫𑐧𑐵 𑐎𑐵𑐫𑐾𑐐𑐸 𑐫𑐵𑐂 𑑋 𑐁𑐂𑐟𑐰𑐵𑑅 𑐠𑐠𑐾 𑐴𑐾 𑐎𑐮𑐾𑐖 𑐥𑐬𑐶𑐳𑐬𑐫𑑂 𑐔𑐶𑐚𑑂𑐫𑐵 𑐢𑑂𑐫𑐧𑐵 𑐎𑐫𑐵𑐔𑑂𑐰𑑄𑐐𑐸 𑐏𑑄𑐩𑑂𑐴 𑐕𑐩𑑂𑐴 𑐥𑑂𑐬𑐟𑑂𑐫𑐎𑑂𑐲𑐡𑐬𑑂𑐱𑐷𑑄 𑐢𑐵𑑅𑐎𑐠𑑄 𑐰𑐶𑐡𑑂𑐫𑐵𑐬𑑂𑐠𑐷𑐟𑐫𑑂𑐳𑑄 𑐣𑑄 𑐧𑐵𑐬𑑂𑐐𑐾𑐣𑐶𑐒 𑐫𑐵𑐣𑐵𑑅 𑐢𑑂𑐫𑐧𑐵 𑐧𑐷𑐐𑐸 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐁𑐂𑐟𑐰𑐵𑑅 𑐱𑐶𑐎𑑂𑐲𑐵 𑐰𑐶𑐲𑐫𑐫𑐵 𑐥𑐬𑐷𑐎𑑂𑐲𑐵𑐧𑐮𑐫𑑂 𑐣𑑄 𑐠𑐠𑐾 𑐴𑐾 𑐏𑐸𑐮𑐾𑐁𑐩 𑐔𑐶𑐚𑑂𑐫𑐵 𑐢𑑂𑐫𑐧𑐵 𑐎𑐵𑐫𑐾𑐐𑐸 𑐖𑑂𑐫𑐵 𑐫𑐵𑐣𑐵𑐔𑑂𑐰𑑄𑐐𑐸 𑐏𑑅 𑑋

𑐥𑑂𑐬𑐟𑑂𑐫𑐎𑑂𑐲𑐡𑐬𑑂𑐱𑐷𑑄 𑐢𑐵𑑅𑐎𑐠𑑄 𑐔𑐶𑐚𑑂 𑐧𑐶𑐄𑐥𑐶𑑄𑐳𑑄 𑐥𑐬𑐷𑐎𑑂𑐲𑐵 𑐴𑐮𑑄 𑐥𑐶𑐴𑐵𑑄𑐰𑑅𑐮𑐶𑐳𑐾 𑐔𑐶𑐚 𑐎𑐵𑑅𑐩𑑂𑐴 𑐰𑐶𑐡𑑂𑐫𑐵𑐬𑑂𑐠𑐷𑐟 𑐳𑑅𑐟𑐵𑑅 𑐕𑐩𑑂𑐴𑐾𑐳𑐶𑐎𑐾 𑐗𑐶𑑄𑐣𑑂𑐫𑐵𑐳𑑅–𑐣𑐶𑐡𑑂𑐰𑑅𑐫𑐵 𑐮𑑂𑐫𑐵𑐏𑑄 𑐢𑑂𑐫𑐧𑐵 𑐩𑐵𑐮 𑐢𑐫𑐵𑐔𑑂𑐰𑑄𑐐𑐸 𑐏𑑅 𑑋 𑐰𑐶𑐡𑑂𑐫𑐵𑐬𑑂𑐠𑐷𑐟𑐫𑑂𑐳𑑄 𑐣𑑄 𑐠𑐩𑑂𑐴𑑄 𑐐𑑂𑐰𑑅𑐎𑐹 𑐔𑐶𑐚 𑐎𑐫𑐵𑐐𑐸 𑐏𑑅 𑐰 𑐮𑑂𑐫𑐵𑐏𑑄 𑐣𑑂𑐫𑐵𑐳𑑅, 𑐡𑑂𑐰𑑅𑐕𑐶 𑐖𑐎 𑐢𑑂𑐫𑐧𑐵 𑐧𑐷𑐐𑐸 𑐫𑐵𑐣𑐵𑐔𑑂𑐰𑑄𑐐𑐸 𑐏𑑅 𑑋

𑐠𑐠𑐾 𑐴𑐾 𑐱𑐶𑐎𑑂𑐲𑐵 𑐰𑐶𑐲𑐫𑐫𑐵 𑐖𑐵𑑃𑐔 𑐧𑐶𑐫𑐵𑐰𑑅𑐩𑑂𑐴 𑐕𑐩𑑂𑐴 𑐰𑐶𑐡𑑂𑐫𑐵𑐬𑑂𑐠𑐷𑑄 ‘𑐖𑐶𑑄 𑐮𑐵 𑐣𑐶𑐎𑐹 𑐖𑐎 𑐔𑐶𑐚 𑐎𑐫𑐵𑐐𑐸 𑐏𑑅, 𑐄𑐎𑐶𑑄 𑐣𑑂𑐫𑐵𑐳𑑅 𑐖𑐎 𑐧𑐷’ 𑐢𑐫𑐵𑐔𑑂𑐰𑑄𑐐𑐸 𑐏𑐣𑐵𑐐𑐸 𑐄𑐩𑑂𑐴 𑐥𑑂𑐬𑐟𑑂𑐫𑐎𑑂𑐲𑐡𑐬𑑂𑐱𑐷𑑄 𑐎𑐣𑐵𑐡𑐷𑐐𑐸 𑐡𑐸 𑑋 𑐠𑐠𑐾 𑐔𑐶𑐚 𑐠𑑂𑐫𑑄𑐎𑐾𑐐𑐸 𑐖𑑂𑐫𑐵 𑐫𑐵𑐣𑐵𑐔𑑂𑐰𑑄𑐥𑐶𑑄𑐳𑑄 𑐠𑑅𑐥𑐶𑑄𑐟 𑐰𑐶𑐡𑑂𑐫𑐵𑐬𑑂𑐠𑐷 𑐫𑐸𑐣𑐶𑐫𑐣𑐫𑐵 𑐡𑐸𑐖𑑅 𑐖𑐹𑐐𑐸 𑐏𑑃 𑐣𑑄 𑐢𑐫𑐵𑐔𑑂𑐰𑑄𑐐𑐸 𑐏𑑅 𑑋 𑐄𑐩𑐶𑐳𑑄 𑐫𑐡𑐶 𑐥𑐵𑐳 𑐫𑐵𑐫𑐾𑐐𑐸 𑐏𑑅𑐳𑐵 𑐠𑑅𑐥𑐶𑑄𑐳𑑄 𑐩𑐶𑐮𑐾 𑐫𑐵𑐣𑐵 𑐧𑐷𑐦𑐸 𑐢𑐎𑐵𑑅 𑐣𑑄 𑐏𑐸𑐮𑐾𑐁𑐩 𑐎𑐣𑐵𑐔𑑂𑐰𑑄𑐐𑐸 𑐏𑑃 𑐄𑐩𑑂𑐴 𑐥𑑂𑐬𑐟𑑂𑐫𑐎𑑂𑐲𑐡𑐬𑑂𑐱𑐷𑑄 𑐎𑑄𑐐𑐸 𑐡𑐸 𑑋