𑐗𑐷𑐐𑐸 𑐳𑐵𑐴𑐶𑐟𑑂𑐫𑐫𑐵 𑐀𑐢𑑂𑐫𑐫𑐣


-𑐬𑐵𑐖𑐾𑐣 𑐩𑐵𑐣𑐣𑑂𑐢𑐬

𑐬𑐵𑐖𑐾𑐣 𑐩𑐵𑐣𑐣𑑂𑐢𑐬

𑐗𑐷𑐐𑐸 𑐣𑐾𑐰𑐵𑑅 𑐳𑐩𑐵𑐖𑐫𑑂 𑐳𑐵𑐴𑐶𑐟𑑂𑐫𑐫𑐵 𑐏𑑃 𑐮𑑂𑐴𑐵𑐂𑐥𑐶𑑄 𑐫𑐎𑑂𑐰 𑐡𑐸 𑑋 𑐨𑐵𑐲𑐵 𑐩𑑂𑐰𑐵𑑅𑐳𑐵 𑐖𑐵𑐟𑐶 𑐩𑑂𑐰𑐵𑐂 𑐢𑐎𑐵𑑅 𑐳𑐕𑐶𑐡𑑃 𑐣𑑂𑐴𑑂𑐫𑑅 𑐢𑐫𑐵𑐟𑑅𑐐𑐸𑐮𑐶𑑄 𑐮𑐵 𑐩𑐳𑐶𑐄, 𑐡𑐎𑑂𑐰 𑐨𑐵𑐲𑐵𑐥𑑂𑐬𑐾𑐩𑐷 𑐴𑐾 𑐗𑐷𑐠𑐵𑐫𑑂 𑐳𑐵𑐴𑐶𑐟𑑂𑐫𑐎𑐵𑐬 𑑋 𑐠𑐸𑐎𑐶𑑄 𑐨𑐵𑐲𑐵 𑐩𑑂𑐰𑐵𑐎𑐮 𑐰𑐵 𑐩𑐩𑑂𑐰𑐵𑐎𑐮, 𑐰 𑐩𑐾𑐐𑐸 𑐴𑐾 𑐠𑐵𑐳𑐫𑑂 𑐰𑐶𑐰𑐾𑐔𑐣𑐵 𑐫𑐵𑐫𑐾, 𑐟𑐬 𑐠𑐸𑐎𑐶𑐫𑐵 𑐮𑐧𑑅 𑐠𑑂𑐰 𑐴𑐾 𑐢𑐵𑐫𑐾 𑐎𑐶 𑐗𑐷𑐐𑐸 𑐳𑐵𑐴𑐶𑐟𑑂𑐫 𑐣𑐾𑐥𑐵𑑅𑐫𑐵 𑐩𑐵𑐢𑑂𑐫𑐩𑐶𑐎 𑐎𑐵𑐮𑐫𑑂 𑐖𑐎 𑐩𑐏𑐸 𑐠𑑂𑐰 𑑒𑑑𑐐𑐹𑐐𑐸 𑐱𑐟𑐵𑐧𑑂𑐡𑐷𑐂 𑐣𑑄 𑐄𑐮𑐶 𑐴𑐾 𑐟𑑅𑐩𑐶, 𑐳𑑄𑐏𑑂𑐫𑐵𑐟𑑂𑐩𑐎 𑐬𑐹𑐥𑑄 𑐴𑐾 𑐖𑐎 𑐕𑐵𑐫𑑂 𑐩𑐖𑐸𑐂𑐩𑐵 𑑋

𑐳𑐬𑐎𑐵𑐬𑐷 𑐳𑐸𑐰𑐶𑐢𑐵 𑐎𑐫𑐵𑑅 𑐧𑑂𑐰𑐮𑑄𑐐𑐸 𑐐𑑀𑐬𑐏𑐵 𑐰𑐵 𑐁𑑅𑐫𑐵 𑐣𑐾𑐥𑐵𑐮𑐷 𑐨𑐵𑐫𑑂𑐫𑐵 𑐳𑐵𑐴𑐶𑐟𑑂𑐫 𑐢𑐸𑑄𑐎𑐵𑑅 𑐣𑐾𑐥𑐵𑑅𑐫𑐵 𑐳𑐕𑐶 𑐰 𑐣𑐷𑐳𑑂𑐰𑑄𑐐𑐹 𑐨𑐵𑐫𑑂 𑐩𑐢𑑂𑐫𑐾 𑐡𑐎𑐮𑐫𑑂 𑐟𑑅𑐩𑐶𑐐𑐸 𑐳𑐵𑐴𑐶𑐟𑑂𑐫 𑐡𑐸𑐐𑐸 𑐨𑐵𑐫𑑂 𑐗𑐷𑐐𑐸 𑐴𑐾 𑐏𑑅 𑐢𑐎𑐵𑑅 𑐎𑐣𑐾𑐧𑐮𑐫𑑂 𑐗𑐷𑐟 𑐐𑐬𑑂𑐰 𑐖𑐸𑐂 𑑋 𑐟𑐬 𑐕𑐐𑐹 𑐣𑑂𑐴𑑂𑐫𑐳𑐮𑑄 𑐗𑐷𑐟 𑐡𑐸𑐣𑐾𑑄 𑐡𑐸𑐣𑐾𑑄 𑐎𑐸𑐟𑐶𑑄 𑐣𑑂𑐫𑐵𑐣𑐵𑐔𑑂𑐰𑐣𑐷 — 𑐗𑐷𑐳𑑄 𑐳𑐵𑐴𑐶𑐟𑑂𑐫𑐫𑐵 𑐀𑐢𑑂𑐫𑐫𑐣 𑐫𑐵𑐣𑐵𑐔𑑂𑐰𑐣𑐵𑐐𑐸 𑐡𑐸 𑐮𑐵 ?𑐠𑐣 𑐳𑐵𑐴𑐶𑐟𑑂𑐫 𑐢𑐂𑐐𑐸 𑐴𑐾 𑐕𑐸 𑐢𑐎𑐵𑑅 𑐣𑑂𑐴𑑂𑐫𑐳𑑅 𑐟𑐫𑐾𑐦𑐸 𑑋

𑐩𑐣𑐹𑐟𑐫𑑂𑐳𑑄 𑐳𑐵𑐴𑐶𑐟𑑂𑐫 𑐢𑐎𑐵𑑅 𑐔𑑂𑐰𑐫𑐾 𑐳𑐳𑐵𑑄𑐣𑐶𑐳𑐾𑑄𑐫𑐵 𑐠𑑂𑐰 𑐣𑑂𑐴𑑂𑐫𑐳𑑅𑐫𑐵 𑐥𑐸𑐰𑑄𑐐𑐸 𑐮𑐶𑐳𑑅 𑐁𑑅𑐟𑐎𑑄 𑐩𑐮𑐹𑐣𑐶 𑑋 𑐕𑐸 𑐳𑐵𑐴𑐶𑐟𑑂𑐫 𑐏𑑅 𑐕𑐸 𑐩𑐏𑐸 𑐀𑐮𑐾 𑐕𑐵𑐫𑑂 𑐳𑐵𑐴𑐶𑐟𑑂𑐫 𑐔𑑂𑐰𑐂 𑐀𑐮𑐾 𑐰 𑐕𑐵𑐫𑑂 𑐩𑐣𑐹𑐟𑐫𑑂𑐟 𑐫𑐂 𑐀𑐠𑐰𑐵 𑐩𑐫𑐂 𑐢𑐂𑐐𑐸 𑐕𑐮𑐦𑐮 𑐔𑐬𑑂𑐔𑐵 𑐥𑐬𑐶𑐔𑐬𑑂𑐔𑐵 𑐰𑐶𑐱𑑂𑐰 𑐣𑑂𑐫𑑄𑐎 𑐴𑐾 𑐖𑐸𑐫𑐵𑐔𑑂𑐰𑑄𑐐𑐸 𑐡𑐣𑐶 𑑋 𑐠𑐣 𑐳𑐵𑐴𑐶𑐟𑑂𑐫𑐫𑐵 𑐥𑐬𑐶𑐨𑐵𑐲𑐵 𑐧𑐶𑐂𑐐𑐸 𑐎𑐸𑐟𑑅 𑐫𑐵𑐫𑐾𑐩𑐏𑐸 𑑋 𑐀𑑅𑐥𑐸𑐎 𑐳𑐵𑐩𑐵𑐣𑑂𑐫𑐟𑑅 𑐖𑐷𑐰𑐣𑐫𑐵 𑐀𑐬𑑂𑐠𑐥𑑂𑐬𑐎𑐵𑐱 𑐫𑐵𑐂𑐐𑐸, 𑐩𑐵𑐣𑐰 𑐳𑐨𑑂𑐫𑐟𑐵𑐮𑐶𑐳𑐾 𑐳𑑂𑐰𑐵𑑅𑐐𑐸 𑐨𑐵𑐫𑑂𑐫𑐵 𑐩𑐵𑐬𑑂𑐦𑐟 𑐣𑑂𑐴𑑂𑐫𑐧𑑂𑐰𑐂𑐐𑐸 𑐠𑐷𑐠𑐷 𑐰𑐶𑐢𑐵𑐫𑐵 — 𑐐𑐠𑐾𑐎𑐶 𑐩𑐴𑐵𑐎𑐵𑐰𑑂𑐫, 𑐔𑐶𑐣𑐵𑐏𑑃, 𑐄𑐥𑐣𑑂𑐫𑐵𑐳, 𑐣𑐶𑐧𑐣𑑂𑐢, 𑐣𑐵𑐚𑐎 𑐂𑐟𑑂𑐫𑐵𑐡𑐶 — 𑐳𑐶𑐬𑑂𑐖𑐣𑐵𑐟𑑂𑐩𑐎 𑐎𑐮𑐵𑐟𑑂𑐩𑐎 𑐮𑐾𑐏𑐣𑐫𑐵𑐟 𑐳𑐵𑐴𑐶𑐟𑑂𑐫 𑐢𑐵𑑅𑐳𑐵 𑐥𑐵𑐂𑐩𑐏𑐸 𑑋

𑐠𑑂𑐰 𑐢𑐂𑐐𑐸 𑐮𑐵 𑐣𑐶𑐟𑐵𑐣𑑂𑐟 𑐧𑑂𑐰𑐣𑐵𑑅 𑐠𑐸𑐂𑐎𑐾𑐟, 𑐃 𑐕𑑂𑐫𑐵𑐫𑐾𑐟, 𑐣𑑂𑐴𑑂𑐫𑐂𑐥𑐸𑐎𑐾𑐟 𑐰𑐵 𑐕𑐸𑑄 𑐨𑐔𑐵 𑐳𑐫𑐾𑐎𑐵𑑅 𑐥𑑂𑐬𑐾𑐬𑐞𑐵 𑐎𑐵𑐫𑐾𑐟 𑐩𑐏𑐸𑐮𑐵 ? 𑐳𑐵𑐴𑐶𑐟𑑂𑐫 𑐢𑐂𑐐𑐸 𑐄𑐮𑐶 𑐴𑐾 𑐩𑐏𑐸 𑐮𑐵 ? 𑐟𑐬 𑐳𑐵𑐴𑐶𑐟𑑂𑐫𑐶𑐎 𑐎𑐺𑐟𑐶 𑐖𑐎 𑐧𑑂𑐰𑐣𑐵𑑅 𑐰𑐶𑐱𑑂𑐰𑐫𑑂 𑐟𑐟𑑅𑐢𑑄𑐐𑐸 𑐬𑐵𑐖𑐷𑐣𑐶𑐎 𑐥𑐬𑐶𑐰𑐬𑑂𑐟𑐣 𑐴𑑅𑐐𑐸 𑐀𑐮𑐾 𑐬𑐵𑐖𑐣𑐷𑐟𑐶𑐎𑐬𑑂𑐩𑐷𑐟𑐫𑑂𑐳𑑄 𑐔𑑂𑐰𑐩𑐶𑐥𑐶𑑄𑐟 𑐣𑑄 𑐎𑑂𑐬𑐵𑐣𑑂𑐟𑐶𑐫𑐵 𑐳𑑄𑐰𑐵𑐴𑐎 𑐢𑐎𑐵𑑅 𑐣𑐵𑐮𑐵𑐎𑐵𑑅𑐐𑐸 𑐗𑐷𑐳𑑄 𑐧𑑂𑐰𑐣𑐵𑐔𑑂𑐰𑐣𑐵 𑑋 𑐐𑐣𑑄 𑐡𑐾𑐳𑐫𑑂 𑐰𑐣𑐾𑐧𑐮𑐫𑑂 𑐰𑐶𑐡𑑂𑐰𑐵𑐣𑐟𑐫𑑂𑐳𑑄 𑐀𑐣 𑐔𑑂𑐰𑑄𑐥𑐶𑑄 𑐳𑐵𑐴𑐶𑐟𑑂𑐫𑐎𑐵𑐬𑐟 𑐣𑐵𑐥𑐮𑐵𑐫𑐾𑐐𑐸 𑐂𑐔𑑂𑐕𑐵 𑐫𑐵𑐂 𑑋

𑐥𑐹𑐬𑑂𑐰𑐷𑐫 𑐱𑐵𑐳𑑂𑐟𑑂𑐬𑐫𑐵 𑐁𑐢𑐵𑐬𑐫𑑂 𑐳𑐵𑐴𑐶𑐟𑑂𑐫𑐫𑐵 𑐏𑑃 𑐮𑑂𑐴𑐵𑐂𑐥𑐶𑑄𑐳𑑄 𑐮𑐶𑐳𑐵𑐮𑐶𑐳𑐵 𑐎𑐫𑐵𑑅 𑐢𑐵𑐂𑐐𑐸 𑐕𑐟𑐵 𑐏𑑃 —“𑐳𑐵𑐴𑐶𑐟𑑂𑐫𑐳𑐒𑑂𑐐𑐷𑐟𑐎𑐮𑐵𑐰𑐶𑐴𑐷𑐣𑑅 𑐳𑐵𑐎𑑂𑐲𑐵𑐟𑑂𑐥𑐱𑐸𑑅, 𑐥𑐸𑐔𑑂𑐕𑐰𑐶𑐲𑐵𑐞𑐴𑐷𑐣𑑅 𑑋” 𑐀𑐠𑐰𑐵 𑐳𑐵𑐴𑐶𑐟𑑂𑐫, 𑐳𑑄𑐐𑐷𑐟 𑐰 𑐎𑐮𑐵 𑐩𑐡𑐸𑐩𑑂𑐴 𑐣𑑂𑐴𑐶𑐥𑑄 𑐩𑐡𑐸𑐩𑑂𑐴 𑐥𑐱𑐸 𑐠𑐾𑑄 𑐏𑑅 𑑋 𑐀𑐠𑐾 𑐢𑐵𑐫𑐾𑐧𑐮𑐫𑑂 𑐗𑐷𑐐𑐸 𑐳𑐩𑐵𑐖𑐫𑑂 𑐮𑐵 𑐳𑐵𑐴𑐶𑐟𑑂𑐫 𑐫𑑅 𑐢𑐵𑑅𑐥𑐶𑑄 𑐩𑐣𑐹𑐟 𑐟𑐳𑐎𑑄 𑐩𑑂𑐴𑑀 𑐖𑐎 𑐏𑐣𑐾𑐡𑐸 𑑋 𑐳𑐵𑐴𑐶𑐟𑑂𑐫𑐫𑐵 𑐳𑐦𑐹 𑐣𑑂𑐴𑑂𑐫𑐔𑑂𑐫𑐵𑐎𑐮𑐎𑐶 𑐖𑐶𑑄 𑐩𑐠𑐹 𑐢𑐎𑐵𑑅 𑐣𑑂𑐴𑐵𑐫𑑂 𑐎𑐫𑐾𑐎𑐸𑑄𑐎𑐷𑐥𑐶𑑄 𑐖𑐎 𑐮𑐸𑐂 𑑋

𑐀𑐠𑐾𑐳𑐵 𑐄𑐥𑐶𑑄 𑐢𑐵𑐠𑐾𑑄 𑐥𑐱𑐸 𑐴𑐾 𑐖𑐎 𑐮𑐵 ? 𑐀𑐠𑐾 𑐩𑐏𑐸𑐳𑐵𑑄 𑐠𑐸𑐎𑐶𑑄 𑐳𑐵𑐴𑐶𑐟𑑂𑐫 𑐢𑐂𑐐𑐸 𑐩𑐵𑐣𑐰 𑐳𑐨𑑂𑐫𑐟𑐵𑐫𑐵 𑐕𑐐𑐹 𑐀𑐨𑐶𑐣𑑂𑐣 𑐀𑑄𑐐 𑐢𑐎𑐵𑑅 𑐠𑐸𑐂𑐎𑐵𑐧𑐶𑐂 𑑋 𑐀𑐠𑐾 𑐴𑐾 𑐏𑑅𑐳𑐵 𑐳𑐵𑐴𑐶𑐟𑑂𑐫 𑐢𑐂𑐐𑐸 𑐧𑑂𑐰𑐣𑐵𑑅 𑐰𑐵𑑄𑐕𑑂𑐰𑐫𑐾𑐐𑐸 𑐖𑐸𑐮 𑐮𑐵 ? 𑐠𑐠𑐾 𑐠𑑅𑐟 𑐩𑐣𑐹 𑐡𑐫𑐾𑐎𑐷𑐐𑐸 𑐳𑐵𑐴𑐶𑐟𑑂𑐫𑐥𑑂𑐬𑐟𑐶 𑐗𑐷𑐐𑐸 𑐢𑐵𑐬𑐞𑐵 𑐠𑐠𑐾 𑐟𑐸𑐔𑑂𑐕 𑐖𑐸𑐂 𑐮𑐵 ? 𑐴𑐵𑐣𑑄 𑐩𑐾𑐐𑐸 𑐏𑑃 𑐳𑑂𑐰𑐵𑐂 — 𑐧𑑂𑐰𑐣𑐵𑑅 𑐰𑐵𑑄𑐕𑑂𑐰𑐫𑐾𑐐𑐸 𑐴𑐾 𑐖𑐹𑐳𑐵 𑐠𑐸𑐎𑐶𑐫𑐵 𑐀𑐢𑑂𑐫𑐫𑐣 𑐕𑐵𑐫𑑂 ?

𑐠𑐸𑐎𑐶𑐫𑐵 𑐮𑐶𑐳𑑅 𑐧𑐶𑐂 𑐣𑑂𑐴𑑂𑐫𑑅 𑐏𑑃 𑐰𑐂, 𑐳𑐵𑐴𑐶𑐟𑑂𑐫 𑐀𑐢𑑂𑐫𑐫𑐣 𑐢𑐂𑐐𑐸 𑐕𑐸 ? 𑐀𑑅𑐥𑐸𑐎 𑐢𑐵𑐫𑐾𑐐𑐸 𑐏𑑅𑐳𑐵 𑐳𑐵𑐴𑐶𑐟𑑂𑐫𑐫𑐵 𑐀𑐢𑑂𑐫𑐫𑐣 𑐢𑐂𑐐𑐸 𑐕𑐸𑑄 𑐰𑐶𑐱𑐾𑐲 𑐮𑑂𑐫𑐫𑐵 𑐟𑑅𑐐𑐸 𑐳𑐵𑐴𑐶𑐟𑑂𑐫𑐶𑐎 𑐎𑐺𑐟𑐶 𑐰𑐵 𑐄𑐎𑐶𑐫𑐵 𑐀𑑄𑐱, 𑐐𑐠𑐾 𑐎𑐶 𑐩𑐴𑐵𑐎𑐵𑐰𑑂𑐫, 𑐄𑐥𑐣𑑂𑐫𑐵𑐳, 𑐧𑐵𑐏𑑄 𑐰𑐵 𑐔𑐶𑐣𑐵𑐏𑑃𑐫𑐵𑐟 𑐧𑑂𑐰𑐣𑐵𑑅 𑐠𑐸𑐂𑐎𑐵𑑅 𑐄𑐎𑐶𑐫𑐵 𑐰𑐶𑐱𑑂𑐮𑐾𑐲𑐞𑐵𑐟𑑂𑐩𑐎 𑐟𑐴𑐮𑐫𑑂 𑐟𑐎 𑐰𑐣𑐵𑑅 𑐀𑐢𑑂𑐫𑐫𑐣 𑐫𑐵𑐫𑐾𑐐𑐸 𑐰 𑐄𑐎𑐶𑐫𑐵 𑐨𑐵𑐰 𑐥𑐶𑐖𑑂𑐰𑐫𑐾𑐎 𑐥𑑂𑐬𑐟𑐶𑐎𑐺𑐫𑐵 𑐰𑐵 𑐳𑐩𑐷𑐎𑑂𑐲𑐵 𑐔𑑂𑐰𑐫𑐾𑐐𑐸 𑐔𑑂𑐰𑐫𑐾𑐦𑐸𑐩𑑂𑐴 𑐖𑐸𑐂𑐐𑐸 𑐏𑑅 𑑋

𑐠𑐠𑐾 𑐖𑐸𑐮 𑐎𑐶 𑐰 𑐕𑐐𑐹 𑐠𑐵𑐫𑑂 𑐰𑐶𑐱𑐾𑐲 𑐰𑐵 𑐨𑐵𑐫𑑂 𑐰𑐶𑐱𑐾𑐲𑐫𑐵 𑐳𑐵𑐴𑐶𑐟𑑂𑐫𑐫𑐵 𑐡𑐸𑐐𑑂𑐫𑑄𑐐𑐸 𑐖𑑂𑐘𑐵𑐣 𑐡𑐸𑐩𑑂𑐴 𑐩𑐣𑐹 𑐖𑐸𑐂, 𑐰𑑄 𑐳𑐵𑐴𑐶𑐟𑑂𑐫𑐫𑐵 𑐢𑐵𑐬 𑐥𑑂𑐬𑐰𑐺𑐟𑐶 𑐠𑐸𑐂𑐎𑐵𑑅 𑐳𑐴𑐷 𑐰𑐵 𑐐𑐮𑐟 𑐢𑐵𑐫𑐾𑐦𑐂 𑐀𑐮𑐾 𑐨𑐰𑐶𑐲𑑂𑐫𑐫𑑂 𑐰 𑐠𑐵𑐫𑑂 𑐰𑐵 𑐨𑐵𑐫𑑂𑐫𑐵 𑐳𑐵𑐴𑐶𑐟𑑂𑐫𑐫𑐵𑐟 𑐕𑐐𑐹 𑐎𑑂𑐰𑐵𑐟𑐹𑐐𑐸 𑐮𑑃 𑐎𑑂𑐫𑐣𑐾𑐦𑐂 𑑋 𑐐𑐸𑐩𑑂𑐴𑐳𑑂𑐫𑐵𑑄 𑐢𑐵𑐂, 𑐳𑐵𑐴𑐶𑐟𑑂𑐫 𑐢𑐂𑐐𑐸 𑐳𑐶𑐬𑑂𑐖𑐣𑐵 𑐏𑑅, 𑐠𑐸𑐎𑐶𑐫𑐵 𑐀𑐢𑑂𑐫𑐫𑐣 𑐖𑐸𑐂𑐩𑐏𑐸, 𑐠𑑂𑐰 𑐮𑐵 𑐡𑑂𑐫𑐰𑑄 𑐧𑐶𑐄𑐐𑐸 𑐖𑐸𑐂 𑑋

𑐏𑑅, 𑐎𑐵𑐮𑐶𑐡𑐵𑐳 𑐧𑑂𑐰𑐣𑐵𑐟𑑅𑐩𑑂𑐴 𑐩𑐏𑐸, 𑐣 𑐗𑐷 𑐣𑐵𑐟𑐶𑐰𑐖𑑂𑐬 𑐴𑐾 𑐳𑑂𑐎𑐹𑐮 𑐰𑐣 𑑋 𑐀𑐠𑐾 𑐳𑐵 𑐣𑑂𑐴𑑂𑐫𑐵𑐩𑑂𑐴𑐳𑑂𑐫𑐵𑑄 𑐣𑑂𑐴𑑂𑐫𑐵𑐐𑐸 𑐔𑑂𑐰𑑅𑐳𑐵𑑄 𑐳𑐵𑐴𑐶𑐟𑑂𑐫 𑐖𑐸𑐂𑐐𑐸 𑐖𑐹𑐳𑐵 𑐳𑐵𑐴𑐶𑐟𑑂𑐫𑐫𑐵 𑐀𑐢𑑂𑐫𑐫𑐣 𑐕𑐵𑐫𑑂 𑐫𑐵𑐫𑐾𑐩𑐵𑐮 ? 𑐳𑐵𑐴𑐶𑐟𑑂𑐫𑑄 𑐗𑐷𑐟 𑐳𑐩𑐵𑐖𑐫𑐵 𑐀𑐰𑐳𑑂𑐠𑐵, 𑐀𑐣 𑐡𑐂𑐐𑐸 𑐰𑐶𑐲𑐩 𑐥𑐬𑐶𑐳𑑂𑐠𑐶𑐟𑐶, 𑐩𑐵𑐣𑐰 𑐳𑑂𑐰𑐨𑐵𑐰, 𑐔𑐬𑐶𑐟𑑂𑐬, 𑐩𑐵𑐣𑐰 𑐖𑐷𑐰𑐣𑐫𑑂 𑐨𑑀𑐐𑐾 𑐩𑐫𑐵𑐳𑐾 𑐩𑐐𑐵𑑅𑐐𑐸 𑐠𑐠𑑂𑐫𑐵𑑅𑐎𑑂𑐰𑐠𑑂𑐫𑐵𑑅𑐫𑐵𑐟 𑐣𑑂𑐴𑐵𑐫𑑂𑐎𑐣𑐫𑑂 𑐠𑐾𑑄 𑐎𑑂𑐫𑐣𑐵𑐧𑐶𑐂 𑑋

𑐂𑐟𑐶𑐴𑐵𑐳𑐫𑐵𑐟 𑐳𑐵𑐎𑑂𑐲𑐷 𑐟𑐫𑐵𑑅 𑐩𑐵𑐣𑐰𑐷𑐫 𑐳𑑄𑐰𑐾𑐡𑐣𑐵 𑐰𑐵 𑐨𑐵𑐰𑐣𑐵𑐫𑐵𑐟 𑐩𑐣𑐹𑐟𑐫𑑂𑐟 𑐩𑑂𑐴𑐳𑐷𑐎𑐵 𑐧𑐶𑐂 𑑋 𑐀𑐮𑐾 𑐩𑐣𑐹𑐫𑐵𑐟 𑐀𑐗 𑐨𑐵𑐰𑐥𑐹𑐬𑑂𑐞, 𑐳𑐴𑐫𑑀𑐐𑐷 𑐀𑐠𑐾 𑐢𑐂𑐐𑐸 𑐩𑐸𑐎𑑄 𑐳𑐨𑑂𑐫 𑐡𑐫𑐾𑐎𑐵 𑐧𑐶𑐂 𑑋 𑐳𑐵𑐴𑐶𑐟𑑂𑐫 𑐢𑐂𑐐𑐸 𑐣𑑂𑐴𑑂𑐫𑐵𑐩𑑂𑐴𑐳𑑂𑐫𑐵𑑄 𑐧𑑂𑐰𑑄𑐳𑐵𑑄 𑐄𑐎𑐶𑐫𑐵 𑐔𑑂𑐰𑐩𑐶𑐟 𑐳𑐷𑐩𑐶𑐟 𑐡𑐫𑐵𑐔𑑂𑐰𑐣𑐷 𑑋 𑐕𑐩𑑂𑐴𑐾𑐳𑑂𑐫𑐵𑑄 𑐔𑑂𑐰𑑅𑐐𑐸 𑐳𑐦𑐹 𑐰𑐶𑐱𑑂𑐰 𑐥𑐬𑐶𑐰𑐾𑐱𑐫𑑂 𑐢𑐵𑐫𑐾𑐐𑐸 𑐏𑑅𑐳𑐵 𑐮𑐏𑑁𑑄 𑐮𑐏 𑐥𑐵𑐛𑐎𑐫𑐵𑐠𑐵𑐫𑑂 𑐠𑑂𑐫𑐣𑐵𑐔𑑂𑐰𑐣𑐷, 𑐄𑐎𑐶𑑄 𑐄𑐩𑐶𑐐𑐸 𑐨𑐵𑐰𑐣𑐵, 𑐳𑑀𑐔 𑐰 𑐖𑐷𑐰𑐣𑐫𑐵 𑐮𑐎𑑂𑐲𑑂𑐫 𑐴𑐾 𑐴𑐶𑐮𑐵𑐧𑐶𑐂 𑑋

𑐀𑐠𑐾 𑐢𑐵𑐫𑐾𑐧𑐮𑐫𑑂 𑐄𑐮𑐶 𑐩𑐕𑐶𑐳𑐶𑐫𑐵 𑐣𑐸𑐐𑑅 𑐟𑑂𑐫𑐵𑐎𑐾𑐩𑐵𑑅𑐐𑐸 𑐏𑑅𑐳𑐵 𑐠𑐩𑑂𑐴𑑄 𑐕𑐸 𑐔𑑂𑐰𑐫𑐵𑐔𑑂𑐰𑐣𑐵 𑐰 𑐳𑐶𑐂𑐩𑐵𑐮, 𑐥𑐵𑐫𑑂𑐕𑐶 𑐏𑑅 𑐮𑐵𑐎𑐶 𑐩𑐏𑐸, 𑐀𑐮𑐾 𑐠𑐸𑐎𑐶𑑄 𑐳𑐩𑐵𑐖𑐫𑐵𑐟 𑐮𑑃 𑐎𑑂𑐫𑐣𑐷 𑐮𑐵𑐎𑐶 𑐩𑐎𑑂𑐫𑐣𑐷, 𑐴𑐵𑐣𑑄 𑐠𑐸𑐎𑐶𑐫𑐵𑐟 𑐳𑐩𑐵𑐖𑑄 𑐳𑑂𑐰𑐷𑐎𑐵𑐬 𑐫𑐵𑐂 𑐮𑐵𑐎𑐶 𑐩𑐫𑐵𑐂 𑐢𑐂𑐐𑐸 𑐣𑑄 𑐖𑑂𑐘𑐵𑐣 𑐡𑐫𑐾𑐩𑐵𑐮 𑑋 𑐠𑑂𑐰 𑐡𑐎𑑂𑐰 𑐳𑐵𑐴𑐶𑐟𑑂𑐫𑐫𑐵 𑐀𑐢𑑂𑐫𑐫𑐣𑑄 𑐖𑐎 𑐮𑐸𑐏𑐵 𑐔𑐵𑐫𑐾𑐎𑐵 𑐧𑐶𑐂 𑑋

𑐁𑑅 𑐳𑐵𑐴𑐶𑐟𑑂𑐫 𑐢𑐂𑐐𑐸 𑐕𑐩𑑂𑐴 𑐟𑑅𑐢𑑄𑐐𑐸 𑐖𑐵𑐟𑐫𑐵𑐩𑑂𑐴 𑐰𑐵 𑐖𑐸𑐖𑐸 𑐰𑐵 𑐳𑑅𑐳𑐶𑐄𑐩𑑂𑐴𑐾𑐳𑑂𑐫𑐵𑑄 𑐔𑑂𑐰𑑅𑐐𑐸 𑐖𑐸𑐂𑐰𑑄 𑐡𑐎𑑂𑐰𑐳𑑂𑐫𑐵𑑄 𑐧𑑂𑐰𑐣𑐵 𑐴𑐾 𑐧𑐶𑐂𑐩𑐵𑑅 𑐢𑐂𑐐𑐸 𑐧𑐵𑐢𑑂𑐫𑐟𑐵 𑐩𑑄𑐟 𑑋 𑐧𑐖𑐵𑐬 𑐟𑑅𑐢𑑄, 𑐩𑐣𑐹𑐟𑐫𑑂 𑐣𑑂𑐴𑑂𑐫𑑅𑐣𑐾 𑐠𑑅 𑐫𑑅𑐐𑐸 𑐎𑐫𑐵𑑅 𑐧𑑂𑐰𑐣𑐾𑐐𑐸 𑐩𑑁𑐎𑐵 𑐡𑐸 𑑋 𑐀𑐖𑑂𑐫𑐵𑑅𑐧𑐮𑐫𑑂 𑐕𑐩𑑂𑐴 𑐔𑑂𑐰𑐩𑐶𑑄 𑐠𑑅𑐐𑐸 𑐔𑑂𑐰𑐳𑐵 𑐠𑐵𑐟𑐫𑑂 𑐮𑐵𑑅 𑐮𑐵𑐎𑐶 𑐩𑐮𑐵𑑅 𑐢𑐎𑐵𑑅 𑐳𑐖𑐐 𑐖𑐸𑐂𑐩𑐵𑑅𑐐𑐸 𑐧𑐵𑐢𑑂𑐫𑐵𑐟𑑂𑐩𑐎 𑐀𑐰𑐳𑑂𑐠𑐵 𑐰𑑅𑐐𑐸 𑐡𑐸 𑑋

𑐳𑐸𑐫𑐵𑐟𑑄 𑐩𑐫𑐫𑐾𑐎 𑐀𑐠𑐰𑐵 𑐩𑐣𑐹𑐟𑐫𑑂𑐟 𑐐𑑂𑐬𑐵𑐴𑑂𑐫 𑐴𑐾 𑐩𑐖𑐸𑐂𑐎 𑐔𑑂𑐰𑐫𑐵𑑅 𑐠𑐸𑐎𑐶𑐫𑐵𑐟 𑐎𑐫𑐵𑐧𑐶𑐄, 𑐀𑐠𑐰𑐵 𑐥𑑂𑐬𑐱𑑄𑐳𑐵 𑐴𑐾 𑐫𑐵𑐣𑐵𑐧𑐶𑐄 𑐢𑐂𑐐𑐸 𑐁𑐐𑑂𑐬𑐴 𑐟𑐫𑐾𑐐𑐸 𑐄𑐔𑐶𑐟 𑐖𑐸𑐂𑐩𑐏𑐸𑐟 𑑋 𑐠𑐖𑑂𑐫𑐵𑑅𑐐𑐸 𑐀𑐰𑐳𑑂𑐠𑐵𑐫𑑂 𑐳𑐵𑐴𑐶𑐟𑑂𑐫 𑐀𑐢𑑂𑐫𑐫𑐣𑐫𑐵 𑐁𑐰𑐱𑑂𑐫𑐎𑐟𑐵 𑐏𑐣𑐾𑐡𑐫𑐵𑐰𑐂 𑑋 𑐗𑐷𑐐𑐸 𑐣𑐾𑐰𑐵𑑅 𑐳𑐵𑐴𑐶𑐟𑑂𑐫 𑐏𑑂𑐫𑐮𑐫𑑂 𑐦𑐸𑐎𑑂𑐎 𑐧𑑂𑐰𑐣𑐷𑐥𑐶𑑄 𑐴𑐾 𑐔𑑂𑐰𑐂𑐥𑐶𑑄 𑐠𑐾𑑄 𑐏𑐣𑐾𑐡𑐫𑐵𑐔𑑂𑐰𑐣, 𑐠𑑂𑐰 𑐕𑐐𑐹 𑐀𑐥𑐰𑐵𑐡 𑐖𑐸𑐂 𑑋

𑐩𑐏𑐸𑐳𑐵 𑐔𑑂𑐰𑐫𑐾𑐐𑐸 𑐢𑐂𑐐𑐸 𑐀𑐖𑑂𑐫𑐵𑑅𑐐𑐸 𑐎𑐮𑐵 𑐏𑑅 𑐐𑐸𑐎𑐶𑐫𑐵 𑐣𑐶𑑄𑐟𑐶𑑄 𑐰𑐶𑐱𑐾𑐲 𑐀𑐢𑑂𑐫𑐫𑐣, 𑐟𑐵𑐮𑐶𑐩 𑐰 𑐳𑐿𑐡𑑂𑐢𑐵𑐣𑑂𑐟𑐶𑐎 𑐖𑑂𑐘𑐵𑐣 𑐩𑐵𑑅 𑑋 𑐠𑐣 𑐠𑐵𑐫𑑂 𑐕𑐵𑐫𑑂 𑐔𑑂𑐰𑐫𑐾𑐐𑐸 𑐢𑐂𑐐𑐸 𑐣𑑂𑐴𑑂𑐫𑐳𑑅 𑐗𑐷𑐐𑐸 𑐣𑑂𑐴𑑂𑐫𑐥𑐸𑐂 𑐎𑐟𑐵𑐣𑐵𑐔𑑂𑐰𑐣𑐾 𑐫𑑅, 𑐠𑐸𑐎𑐶𑐫𑐵 𑐠𑑅𑐟 𑐴𑐾 𑐔𑐶𑐟𑑂𑐟 𑐧𑐸𑐗𑐾 𑐖𑐸𑐂𑐐𑐸 𑐮𑐶𑐳𑑅 𑐩𑐡𑐸𑐟𑐮𑐾 𑐰 𑐩𑐣𑐹 𑐔𑑂𑐰𑐩𑐶 𑐖𑐸𑐂𑐩𑐏𑐸 𑑋 𑐔𑑂𑐰𑐫𑐾𑐐𑐸 𑐢𑐂𑐐𑐸 𑐖𑐵𑐐𑐶𑐬 𑐏𑑅 𑐣𑑄, 𑐩𑐏𑐸 𑐣𑑄 𑑋 𑐄𑐎𑐶𑑄 𑐣𑐎𑐷 𑐩𑐣𑐎𑐷 𑐢𑐂𑐐𑐸 𑐫𑐎𑑂𑐰 𑐢𑐫𑐵𑐠𑐾𑑄 𑐠𑐵𑐫𑑂, 𑐨𑐵𑐫𑑂 𑐰 𑐰 𑐩𑐣𑐹𑐫𑐵 𑐏𑐸𑐧𑐷𑐫𑐵 𑐏𑑃 𑐖𑐸𑐮 𑑋

𑐐𑐸𑐩𑑂𑐴𑐳𑑂𑐫𑐵𑑄 𑐔𑑂𑐰𑐫𑐾𑐐𑐸 𑐴𑐾 𑐖𑐶𑐐𑐸 𑐖𑐷𑐰𑐣 𑐖𑐸𑐮, 𑐠𑐸𑐎𑐶𑑄 𑐖𑐶𑐟𑑅 𑐳𑐩𑑂𑐥𑐣𑑂𑐣𑐟𑐵 𑐧𑐶𑐄𑐳𑐵𑑄 𑐩𑐧𑐶𑐄𑐳𑐵𑑄 𑐩𑐔𑑂𑐰𑐳𑐾 𑐔𑑂𑐰𑐣𑐾𑐩𑐦𑐸 𑐢𑐎𑐵𑑅 𑐢𑐂𑐐𑐸 𑐠𑑅 𑐡𑐸𑐣𑐾𑐫𑐵 𑐰 𑐔𑐵𑐴, 𑐬𑐵𑐐 𑐀𑐠𑐰𑐵 𑐡𑐶𑐎𑐵𑑄 𑐡𑐶𑐎𑐾𑐩𑐦𑐂𑐐𑐸 𑐖𑑀𑐱 𑐮𑐸𑐂𑐎𑐷, 𑐰𑑄 𑐔𑑂𑐰𑐫𑐾𑐐𑐸𑐥𑐵𑐏𑐾 𑐠𑑅𑐟 𑐦𑑂𑐫𑐵𑐫𑐾𑐦𑐟 𑐢𑐵𑑅𑐳𑐵 𑐰 𑐳𑐦𑐮 𑐔𑑂𑐰𑐩𑐶 𑐣𑑄 𑐖𑐸𑐂𑐦𑐸 𑑋 𑐏𑑅, 𑐖𑐷𑐰𑐣 𑐏𑑃𑐩𑑂𑐴𑐾𑐳𑑂𑐫𑐵𑑄 𑐔𑑂𑐰𑐂 𑐢𑐵𑐂, 𑐡𑐸𑐏 𑐨𑑀𑐐𑐾𑐫𑐵𑑅𑐩𑑂𑐴𑐾𑐳𑑂𑐫𑐵𑑄 𑐡𑐸𑑅𑐏𑐫𑐵 𑐏𑑃 𑐔𑑂𑐰𑐂 𑐢𑐵𑐂, 𑐥𑑂𑐬𑐾𑐩𑐫𑑂 𑐢𑑀𑐏𑐵 𑐣𑑅𑐩𑑂𑐴 𑐩𑐣𑐹 𑐎𑐰𑐶 𑐖𑐸𑐂 𑐢𑐎𑐵𑑅 𑐢𑐵𑐫𑐾𑐐𑐸 𑐔𑐮𑐣 𑐫𑐎𑑂𑐰𑐠𑐵𑐫𑑂 𑐡𑐸 𑑋

𑐟𑐬 𑐨𑐵𑐰𑐣𑐵 𑐴𑐾 𑐖𑐎 𑐡𑐫𑐾𑐰𑑄 𑐐𑐵𑑅 𑐮𑐵 𑐳𑑂𑐫𑐵𑐔𑐸𑐐𑐸 𑐳𑐶𑐬𑑂𑐖𑐣𑐵 𑐫𑐵𑐫𑐾𑐟 ? 𑐩𑐣𑐫𑑂 𑐡𑐸𑐣𑐾 𑐡𑐎𑑂𑐰𑐳𑑂𑐫𑐵 𑐏𑑃 𑐡𑐂 𑑋 𑐳𑐸𑐫𑐵 𑐩𑐡𑐂, 𑐣𑑅𑐳𑐵𑑄 𑐡𑑂𑐫𑑄𑐳𑐵𑑄 𑐠𑐩𑑂𑐴𑑄 𑐴𑐾 𑐔𑐵𑐫𑐾𑐎 𑐰𑐵 𑐩𑐔𑐵𑐫𑐾𑐎 𑐏𑑃 𑐰𑐫𑐵𑐔𑑂𑐰𑐣𑐷 𑑋 𑐀𑐠𑐾 𑐏𑑅𑐳𑐵 𑐡𑐎𑑂𑐰𑑄 𑐕𑐵𑐫𑑂 𑐔𑑂𑐰𑐩𑐶 𑐖𑐸𑐂𑐩𑐏𑐸 𑐮𑐾 ? 𑐔𑑂𑐰𑐫𑐾𑐟 𑐨𑐵𑐫𑑂 𑐩𑐵𑑅 𑑋 𑐕𑐩𑑂𑐴 𑐔𑑂𑐰𑐩𑐶𑐫𑐵 𑐮𑐵𑐐𑐶 𑐨𑐵𑐫𑑂 𑐴𑐾 𑐕𑐐𑐹 𑐖𑐎 𑐰 𑐴𑐟𑐶𑐫𑐵𑐬 𑐏𑑅 𑐐𑐸𑐎𑐶𑑄 𑐫𑐵𑐣𑐵𑑅 𑐰𑑄 𑐮𑐏𑑁𑑄𑐮𑐏 𑐥𑐵𑐛𑐎𑐫𑐵 𑐣𑐸𑐐𑐮𑐫𑑂 𑐬𑐵𑐖 𑐫𑐵𑐂, 𑐰𑐫𑐵𑐟 𑐠𑑅 𑐢𑐂𑐠𑐾 𑐫𑐵𑐎𑐷, 𑐫𑑅𑐩𑑂𑐴 𑐡𑐫𑐾𑐎𑐷, 𑐩𑐫𑑅𑐩𑑂𑐴 𑐡𑐫𑐾𑐎𑐷 𑑋

𑐕𑐩𑑂𑐴 𑐠𑑅𑐐𑐸 𑐩𑐶𑐏𑐵𑑄 𑐩𑐏𑑄𑐩𑑂𑐴 𑐥𑐵𑐟𑑂𑐬 𑐠𑐣𑐵𑑅 𑐰𑐫𑐵𑐐𑐸 𑐣𑐶𑐗𑑂𑐰𑑅 𑐥𑑂𑐫𑐗𑑂𑐰𑑅 𑐰𑐬𑑂𑐞𑐣 𑐫𑐵𑐣𑐵𑑅 𑐰𑐫𑐵𑐟 𑐣𑐶𑐟𑐵 𑐳𑑂𑐰𑐟𑐵 𑐏𑑃 𑐣𑐰𑐵𑐎𑐵𑑅 𑐎𑐵𑐫𑐾𑐐𑐸 𑐣𑑄 𑐩𑐡𑐸𑐩𑑂𑐴 𑐧𑐶𑐂𑐐𑐸 𑐣𑑄 𑐩𑐡𑐸𑐩𑑂𑐴 𑐧𑑂𑐰𑑃𑐩𑐶𑐫𑐵𑐟 𑐁𑐎𑐬𑑂𑐲𑐞 𑐫𑐵𑐫𑐾𑐐𑐸 𑐀𑑅𑐥𑐸𑐐𑐸 𑐖𑑂𑐫𑐵 𑐩𑐏𑐸, 𑐄𑐎𑐶𑐫𑐵𑐟 𑐳𑑂𑐫𑐮𑐵𑑅𑐐𑐸 𑐨𑐵𑐲𑐵 𑐴𑐾 𑐩𑐵𑑅 𑑋 𑐣𑐾𑐰𑐵𑑅 𑐨𑐵𑐳𑐫𑑂 𑐔𑑂𑐰𑐂𑐥𑐶𑑄𑐟 𑐮𑐵 𑐀𑐠𑐾 𑐠𑐠𑐾 𑐢𑐵𑐫𑐾𑐩𑐖𑐶𑐄, 𑐟𑐬 𑐰𑐶𑐱𑑂𑐰𑐫𑑂 𑐏𑑃 𑐮𑑂𑐴𑐵𑐫𑐾𑐐𑐸 𑐏𑑅𑐳𑐵 𑐰𑑂𑐫𑐵𑐎𑐬𑐞 𑐎𑑂𑐰𑐵𑐩𑐟𑐹𑐩𑑂𑐴 𑐰 𑐩𑐵𑑅𑐠𑐵𑐫𑑂 𑐩𑐵𑑅𑐐𑐸 𑐱𑐧𑑂𑐡 𑐴𑐫𑐾𑐩𑐳𑑅𑐩𑑂𑐴 𑐔𑑂𑐰𑐩𑐶 𑐖𑐸𑐂𑐩𑐏𑐸 𑑋

𑐠𑐸𑐎𑐶𑐫𑐵 𑐮𑐵𑐐𑐶 𑐣𑑄 𑐀𑐢𑑂𑐫𑐫𑐣 𑐮𑐵 𑐩𑐵𑑅𑐐𑐸 𑐴𑐾 𑐖𑐸𑐮 𑑋 𑐳𑐵𑐴𑐶𑐟𑑂𑐫 𑐀𑐢𑑂𑐫𑐫𑐣 𑐕𑐵𑐫𑑂 𑐫𑐵𑐫𑐾𑐩𑐵𑐮 ? 𑐣𑑂𑐴𑐵𑐥𑐵 𑐣𑑂𑐴𑑂𑐫𑐵𑐩𑑂𑐴𑐳𑑂𑐫𑐵𑑄 𑐣𑑂𑐴𑑂𑐫𑐵𑐐𑐸 𑐔𑑂𑐰𑐫𑐵𑑅 𑐩𑐴𑐵𑐎𑐰𑐶 𑐰𑐵 𑐩𑐴𑐵𑐣 𑐣𑐵𑐚𑐎𑐎𑐵𑐬 𑐴𑐾 𑐖𑐸𑐫𑐵𑐰𑑄𑐳𑐵𑑄 𑐁𑑅 𑐳𑐵𑐴𑐶𑐟𑑂𑐫 𑐢𑐂𑐐𑐸 𑐕𑐐𑐹 𑐥𑑂𑐬𑐟𑐶𑐳𑑂𑐠𑐵𑐥𑐶𑐟 𑐥𑑂𑐬𑐵𑐖𑑂𑐘𑐶𑐎 𑐰𑐶𑐲𑐫 𑐖𑐸𑐂𑐢𑐸𑑄𑐎𑐮 𑑋 𑐴𑐬𑐾𑐎 𑐢𑐫𑐵𑐠𑐾𑑄 𑐰𑐶𑐱𑑂𑐰 𑐰𑐶𑐡𑑂𑐫𑐵𑐮𑐫𑐫𑑂 𑐳𑐵𑐴𑐶𑐟𑑂𑐫 𑐀𑐢𑑂𑐫𑐫𑐣 𑐀𑐢𑑂𑐫𑐫𑐵𑐥𑐣 𑐖𑐸𑐂 𑑋 𑐩𑑂𑐴𑑀 𑐰𑐵 𑐫𑐎𑑂𑐰 𑐴𑐾 𑐰𑐶𑐡𑑂𑐫𑐵𑐬𑑂𑐠𑐷 𑐖𑐹𑐳𑐵𑑄 𑐀𑐣 𑐳𑐵𑐴𑐶𑐟𑑂𑐫𑐫𑐵𑐟 𑐀𑐢𑑂𑐫𑐫𑐣 𑐫𑐵𑐫𑐾𑐐𑐸 𑐰𑐶𑐲𑐫 𑐡𑐫𑐾𑐎𑐵𑐟𑑅𑐐𑐸 𑐖𑐸𑐂 𑑋

𑐨𑐵𑐲𑐵 𑐳𑐾𑐰𑐵 𑐫𑐵𑐫𑐾𑐐𑐸 𑐨𑐶𑑄𑐐𑐸 𑐩𑐟𑐶𑐂 𑐖𑐎 𑐰𑐫𑐾𑐰𑑄 𑐰 𑐳𑐵𑐴𑐶𑐟𑑂𑐫𑐎𑐵𑐬 𑐖𑐸𑐂𑐦𑐂𑐩𑐏𑐸 𑐀𑐣 𑑋 𑐳𑐶𑐬𑑂𑐖𑐣𑐱𑐶𑐮 𑐮𑐾𑐏𑐣 𑐢𑐂𑐐𑐸 𑐕𑐐𑐹 𑐎𑐮𑐵, 𑐱𑐶𑐮𑑂𑐥, 𑐰𑐶𑐖𑑂𑐘𑐵𑐣 𑐀𑐮𑐾 𑐥𑑂𑐬𑐵𑐖𑑂𑐘𑐶𑐎 𑐰𑐶𑐲𑐫 𑐣𑑄 𑐏𑑅 𑑋 𑐀𑐗 𑐳𑐵𑐴𑐶𑐟𑑂𑐫𑐫𑐵 𑐏𑑃 𑐮𑑂𑐴𑐵𑐂𑐥𑐶𑑄, 𑐔𑑂𑐰𑐂𑐥𑐶𑑄, 𑐀𑐗 𑐢𑐵𑐫𑐾 𑐳𑐩𑐵𑐮𑑀𑐔𑐎 𑐖𑐸𑐂𑐥𑐶𑐣𑐶 𑐮𑐵 𑐳𑐵𑐴𑐶𑐟𑑂𑐫𑐫𑐵 𑐀𑐢𑑂𑐫𑐫𑐣 𑐎𑑂𑐰𑐵𑐩𑐟𑐸𑐳𑐾 𑐩𑐐𑐵𑑅 𑑋
𑐳𑐵𑐴𑐶𑐟𑑂𑐫𑐫𑐵 𑐀𑐢𑑂𑐫𑐫𑐣𑐫𑐵 𑐏𑑃 𑐮𑑂𑐴𑐵𑐫𑐾𑐧𑐮𑐫𑑂 𑐠𑐸𑐎𑐶𑐫𑐵𑐟 𑐣𑐶𑐟𑐵 𑐥𑑂𑐫𑐟𑐵 𑐟𑐐𑐶𑐩𑐫𑑂 𑐟𑐫𑐵𑑅 𑐏𑑃 𑐮𑑂𑐴𑐵𑐫𑐾𑐩𑐵𑑅 𑑋

𑐣𑑂𑐴𑐵𑐥𑐵𑑄 𑐕𑐩𑑂𑐴 𑐧𑑂𑐰𑑃𑐩𑐶𑑄 𑐳𑐵𑐴𑐶𑐟𑑂𑐫𑐫𑐵𑐟 𑐠𑐸𑐂𑐎𑐾𑐐𑐸 𑐏𑑅𑐳𑐵 𑐳𑐵𑐴𑐶𑐟𑑂𑐫𑐫𑐵 𑐧𑐵𑐬𑐾 𑐁𑐢𑐵𑐬𑐨𑐹𑐟 𑐖𑐵𑐣𑐎𑐵𑐬𑐷 𑐟𑐫𑐵𑐟𑐫𑐾𑐩𑐵𑐮, 𑐩𑐏𑐸𑐳𑐵 𑐏𑐸𑐬𑑂𑐥𑐵𑐎𑑀 𑐧𑐶𑑃𑐜 𑐢𑐵𑑅𑐐𑐸 𑐏𑑃 𑐠𑐾𑑄 𑐖𑐸𑐂 𑑋 𑐩𑐾𑐐𑐸 𑐔𑑂𑐰𑐂𑐩𑑂𑐴𑐾𑐳𑑂𑐫𑐵𑑄 𑐣𑐶𑐟𑐵 𑐏𑑃𑐫𑐵𑐟 𑐳𑐩𑐵𑐣𑐣𑑂𑐟𑐬𑐎𑐠𑑄 𑐀𑐢𑑂𑐫𑐫𑐣 𑐫𑐵𑐣𑐵𑐰𑐣𑐾𑐩𑐵𑑅 — 𑐕𑐐𑐹 𑐨𑐵𑐲𑐵𑐫𑑂 𑐡𑐎𑑂𑐲𑐟𑐵 𑐡𑐫𑐾𑐩𑐵𑐮, 𑐀𑐣𑑄 𑐠𑑅 𑐕𑐸 𑐰𑐶𑐢𑐵𑐫𑑂 𑐔𑑂𑐰𑐫𑐾𑐟𑑂𑐫𑐣𑐵 𑐄𑐎𑐶𑐫𑐵 𑐳𑐿𑐡𑑂𑐢𑐵𑐣𑑂𑐟𑐶𑐎 𑐖𑑂𑐘𑐵𑐣 𑐡𑐸𑐐𑑂𑐫𑑄𑐎 𑐴𑐾 𑐩𑐵𑐮 𑑋

𑐀𑐠𑐾 𑐴𑐾 𑐠𑑁𑑄 𑐎𑐣𑑂𑐴𑐫𑑂𑐫𑐵 𑐀𑐠𑐰𑐵 𑐳𑐩𑐳𑐵𑐩𑐫𑐶𑐎 𑐔𑑂𑐰𑐫𑐾𑐐𑐸 𑐢𑐵𑐬, 𑐱𑐿𑐮𑐷 𑐀𑐮𑐾 𑐳𑐩𑐵𑐖𑐫𑐵 𑐧𑐵𑐬𑐾 𑐖𑐵𑐣𑐎𑐵𑐬 𑐖𑐸𑐂𑐐𑐸 𑐕𑐩𑑂𑐴 𑐔𑑂𑐰𑐩𑐶𑐫𑐵 𑐮𑐵𑐐𑐶 𑐟𑐳𑐎𑑄 𑐁𑐰𑐱𑑂𑐫𑐎 𑑋 𑐰𑐫𑐵𑑄 𑐮𑐶𑐥𑐵 𑐳𑐵𑐴𑐶𑐟𑑂𑐫 𑐏𑑂𑐫𑑅𑐫𑐵 𑐧𑐵𑐬𑐾 𑐖𑑂𑐘𑐵𑐟𑐵 𑐰𑐵 𑐰𑐶𑐖𑑂𑐘 𑐖𑐸𑐂𑐐𑐸 𑐏𑑅𑐳𑐵, 𑐀𑐠𑐰𑐵 𑐳𑐩𑐵𑐮𑑀𑐔𑐎 𑐎𑐠𑑄 𑐩𑑂𑐰𑐵𑐫𑐾𑐐𑐸 𑐏𑑅𑐳𑐵 𑐰𑐫𑐵 𑐮𑐵 𑐨𑐵𑐲𑐵, 𑐱𑐿𑐮𑐷, 𑐥𑐹𑐬𑑂𑐰𑐷𑐫 𑐳𑐵𑐴𑐶𑐟𑑂𑐫 𑐱𑐵𑐳𑑂𑐟𑑂𑐬 𑐰 𑐂𑐟𑐶𑐴𑐵𑐳, 𑐥𑐱𑑂𑐔𑐶𑐩𑐷 𑐳𑐵𑐴𑐶𑐟𑑂𑐫𑐫𑐵 𑐂𑐟𑐶𑐴𑐵𑐳, 𑐳𑐵𑐴𑐶𑐟𑑂𑐫𑐶𑐎 𑐳𑐶𑐡𑑂𑐢𑐵𑐣𑑂𑐟𑐟, 𑐀𑐮𑐾 𑐧𑑂𑐰𑐩𑐶𑐥𑐶𑐣𑐶𑐐𑐸 𑐩𑐣𑑀𑐰𑐶𑐖𑑂𑐘𑐵𑐣𑐫𑐵 𑐰𑐶𑐲𑐫𑐫𑑂 𑐥𑐵𑐬𑑄𑐐𑐟 𑐩𑐖𑐸𑐳𑐾 𑐩𑐐𑐵𑑅 𑑋

𑐕𑐸 𑐗𑐷 𑐡𑐎𑑂𑐰 𑐠𑐸𑐎𑐶𑐫𑐵 𑐣𑐶𑑄𑐟𑐶𑑄 𑐟𑐫𑐵𑐬 𑐡𑐸 𑐮𑐵 ?𑐩𑐢𑐵𑐳𑐾 𑐩𑐐𑐵𑑅 𑐗𑐷𑐐𑐸 𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫 𑐏𑑂𑐫𑑅𑐫𑐵 𑐏𑑃 𑐮𑑂𑐴𑐵𑐫𑐾𑐧𑐮𑐫𑑂 𑐳𑐵𑐴𑐶𑐟𑑂𑐫 𑐀𑐢𑑂𑐫𑐫𑐣 𑐫𑐵𑐫𑐾𑐩𑐵𑑅𑐐𑐸 𑐰𑐶𑐲𑐫 𑐁𑑅 𑐣𑑄 𑐏𑑅𑐠𑐾𑑄 𑐎𑐫𑐵𑐔𑑂𑐰𑑄𑐐𑐸 𑐩𑐡𑐸 𑑋 𑐣𑑂𑐴𑐵𑐥𑐵𑑄 𑐮𑐵 𑐣𑐾𑐰𑐵𑑅𑐟𑐫𑑂 𑐡𑐸𑐣𑐾 𑐣𑐾𑐰𑐵𑑅 𑐳𑐵𑐎𑑂𑐲𑐬𑐟 𑐴𑐾 𑐎𑐩 𑑋 𑐄𑐎𑐷 𑐳𑐵𑐴𑐶𑐟𑑂𑐫 𑐧𑑂𑐰𑐣𑐷𑐥𑐶𑑄 𑐗𑐣𑑂 𑐎𑐩 𑐖𑐸𑐂𑐐𑐸 𑐖𑐸𑐮 𑑋 𑐀𑐮𑐾 𑐔𑑂𑐰𑐩𑐶𑐥𑐶𑐣𑐶 𑐢𑐵𑐫𑐾𑐐𑐸 𑐢𑐵𑑅𑐳𑐵 𑐄𑐩𑐶 𑐠𑐩𑑂𑐴𑑄 𑐔𑑂𑐰𑑅𑐐𑐸 𑐖𑐎 𑐴𑐾 𑐧𑑂𑐰𑑄𑐳𑐵𑑄 𑐳𑑂𑐰𑐷𑐡𑑃 𑐣𑑂𑐴𑑂𑐫𑑅 𑐔𑑂𑐰𑑅𑐐𑐸 𑐰 𑐁𑑅 𑐔𑑂𑐰𑑅𑐐𑐸 𑐥𑐵𑐂𑐐𑐸 𑐖𑐸𑐂, 𑐀𑐮𑐾 𑐕𑐩𑑂𑐴𑐳𑑂𑐫𑐵𑑄 𑐩𑐾𑐩𑑂𑐴𑐳𑐶𑐐𑐸 𑐧𑑂𑐰𑐣𑐾𑐐𑐸 𑐔𑐮𑐣 𑐣𑑄 𑐎𑐩 𑐖𑐎 𑐏𑐣𑐵, 𑐎𑑂𑐬𑐶𑐫𑐵 𑐥𑑂𑐬𑐟𑐶𑐎𑑂𑐬𑐶𑐫𑐵 𑐩𑐰𑑅𑐐𑐸 𑐮𑑂𑐫𑐵𑐏𑑄 𑑋

𑐀𑐮𑐾 𑐔𑑂𑐰𑐫𑐵 𑐔𑑂𑐰𑑄𑐥𑐶𑑄𑐳𑑄 𑐣𑑄 𑐣𑑂𑐫𑐫𑑂𑐡𑑃 𑐣𑑂𑐴𑑂𑐫𑑅 𑐔𑑂𑐰𑐫𑐵𑐟𑑅𑐐𑐸 𑐰𑐶𑐲𑐫𑐰𑐳𑑂𑐟𑐸, 𑐰𑐵𑐟𑐵𑐰𑐬𑐞, 𑐔𑐬𑐶𑐟𑑂𑐬 𑐔𑐶𑐟𑑂𑐬𑐞 𑐰 𑐳𑐣𑑂𑐡𑐾𑐱 𑐖𑑂𑐰𑐣𑐵𑐰𑑅𑐐𑐸 𑐏𑐣𑐷𑐧𑐮𑐫𑑂 𑐄𑐩𑐶𑐳𑑄 𑐩𑐾𑐩𑐾𑐐𑐸 𑐨𑐵𑐫𑑂𑐫𑐵 𑐳𑐩𑐎𑐵𑐮𑐶𑐣 𑐳𑐵𑐴𑐶𑐟𑑂𑐫𑐫𑐵 𑐀𑐢𑑂𑐫𑐫𑐣 𑐫𑐵𑐫𑐾 𑐀𑐮𑑂𑐕𑐶 𑐔𑐵𑐫𑐵𑐔𑑂𑐰𑑄𑐐𑐸 𑐫𑐠𑐾 𑐳𑐶𑐂𑐡𑐸 𑑋 𑐳𑑄𑐎𑑂𑐲𑐶𑐥𑑂𑐟𑑄 𑐢𑐵𑐫𑐾𑐐𑐸 𑐏𑑅𑐳𑐵 𑐀𑐥𑐰𑐵𑐡𑐫𑐵𑐟 𑐟𑑂𑐰𑑅𑐟𑐵 𑐁𑑅 𑐥𑐶𑐡𑐣𑐵𑐔𑑂𑐰𑑄𑐐𑐸 𑐳𑐵𑐴𑐶𑐟𑑂𑐫𑐶𑐎 𑐎𑐺𑐟𑐶𑐟 𑐡𑐸𑐣𑐾 𑐟𑐳𑐎𑑄 𑐩𑑂𑐴𑑀 𑐖𑐎 𑐩𑐾𑐩𑐾𑐐𑐸 𑐨𑐵𑐫𑑂𑐫𑐵 𑐳𑐶𑐬𑑂𑐖𑐣𑐵𑐮𑐶𑐳𑐾 𑐧𑑂𑐰𑐴𑐮𑐫𑑂 𑐧𑑂𑐰𑐴 𑐮𑑂𑐰𑐵𑐎𑐵𑑅 𑐡𑐣𑐵𑑅 𑐎𑑂𑐫𑐣𑐾𑐦𑐹𑐐𑐸 𑐏𑐣𑐾𑐡𑐸 𑑋

𑐠𑐸𑐎𑐶𑐫𑐵 𑐎𑐵𑐬𑐞𑑄 𑐣𑐾𑐰𑐵𑑅𑐟𑐫𑑂𑐳𑑄 𑐩𑐧𑑂𑐰𑑄𑐐𑐸 𑐮𑐵 𑐢𑐵𑐫𑐾𑐩𑐏𑐸, 𑐕𑐵𑐫𑑂 𑐢𑐵𑑅𑐳𑐵 𑐩𑐧𑑂𑐰𑑄𑐥𑐶𑑄𑐳𑑄 𑐡𑐎𑑂𑐰𑑄 𑐩𑐧𑑂𑐰𑑄, 𑐧𑐵𑑄𑐮𑐵𑑅𑐐𑐸 𑐧𑑂𑐰𑐣𑐵𑑅 𑐧𑐵𑑄𑐩𑐮𑐵𑑅𑐐𑐸 𑐩𑐧𑑂𑐰𑑄𑐐𑐸 𑐖𑐸𑐂 𑐢𑐎𑐵𑑅 𑐢𑐵𑐫𑐾𑐐𑐸 𑐁𑐢𑐵𑐬 𑐮𑐸𑐂𑐎𑐾 𑐠𑐵𑐎𑐸𑐣𑐶 𑑋 𑐧𑐬𑐸 𑐐𑐿𑐬 𑐣𑐾𑐰𑐵𑑅𑐟𑐫𑑂 𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫𑐫𑐵 𑐀𑐢𑑂𑐫𑐫𑐣 𑐫𑐵𑐂𑐥𑐶𑐣𑐶𑐐𑐸 𑐮𑑂𑐴𑐵𑐟𑐶𑐂 𑐗𑐷𑐐𑐸 𑐳𑐦𑐹 𑐠𑑂𑐫𑐣𑐷𑐧𑐮𑐫𑑂 𑐢𑐵𑑅𑐳𑐵 𑐗𑐷𑐐𑐸 𑐡𑐸𑐳𑐵𑐏𑑃 𑐄𑐩𑐶𑐳𑑄 𑐳𑑂𑐰𑐳𑑂𑐰𑑄 𑐴𑐾 𑐳𑐶𑐂𑐎𑐾𑐦𑐸 𑑋 𑐗𑐷𑐳𑑄 𑐣𑑂𑐴𑑂𑐫𑐵𑐎𑑂𑐰 𑐡𑑂𑐫𑑅𑐣𑑄 𑐮𑐸𑑄 𑐳𑐶𑐫𑐵𑐟𑑅𑐳𑐵𑑄 𑐄𑐩𑐶𑐎𑐾 𑐗𑐷𑐐𑐸 𑐳𑐵𑐴𑐶𑐟𑑂𑐫 𑐮𑐣𑐵𑐳𑑂𑐰𑐫𑐾𑐐𑐸 𑐩𑐵𑐥𑐎 𑐡𑐸 𑑋

𑐀𑐖𑐹 𑐔𑐵𑐫𑐵𑐥𑐹𑐐𑐸 𑐏𑑃 𑐩𑐏𑐸𑐮𑐵 𑐎𑐶 𑐗𑐷 𑐠𑐥𑐵𑐫𑑂𑐖𑐶 𑐳𑐵𑐴𑐶𑐟𑑂𑐫𑐫𑐵 𑐢𑐣𑐷 𑐖𑐸𑐫𑐵𑑅 𑐣𑑄 𑐡𑑃𑐫𑑂 𑐧𑐵𑐳𑑅𑐐𑐸 𑐳𑐦𑐹 𑐥𑐶𑐡𑐣𑐵𑐔𑑂𑐰𑑄𑐳𑐵𑑄 𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫𑐫𑐵 𑐀𑐢𑑂𑐫𑐫𑐣 𑐫𑐵𑐫𑐾𑐐𑐸 𑐠𑐵𑐫𑑂 𑐩𑐡𑐸 𑑋 𑐢𑐵𑐠𑐾𑑄, 𑐗𑐷𑐠𑐵𑐫𑑂 𑐳𑐵𑐴𑐶𑐟𑑂𑐫 𑐀𑐢𑑂𑐫𑐫𑐣 𑐫𑐵𑐫𑐾𑐐𑐸 𑐐𑐣 ? 𑐣𑑂𑐴𑐵𑐥𑐵 𑐡𑐸𑐐𑐸 𑐕𑐐𑐹 𑐢𑐂𑐐𑐸 𑐣𑐾𑐥𑐵𑐮𑐨𑐵𑐲𑐵 𑐎𑐾𑐣𑑂𑐡𑑂𑐬𑐷𑐫 𑐰𑐶𑐨𑐵𑐐 𑐏𑑅, 𑐐𑐸𑐐𑐸𑐎𑐶 𑐁𑑅 𑐀𑐣 𑐣𑐵𑑄 𑐖𑐎𑐫𑐵 𑐳𑐵𑐴𑐶𑐟𑑂𑐫𑐫𑐵 𑐀𑐢𑑂𑐫𑐫𑐣 𑐀𑐢𑑂𑐫𑐵𑐥𑐣 𑐖𑐸𑐫𑐵𑐔𑑂𑐰𑑄𑐐𑐸 𑐏𑐣𑐾𑐡𑐸 𑑋

𑐀𑐣 𑐁𑑅 𑐩𑐾𑐩𑐾𑐐𑐸 𑐀𑐢𑑂𑐫𑐵𑐥𑐣 𑐧𑐵𑑄𑐮𑐵𑑅 𑐟𑐬 𑐳𑐵𑐴𑐶𑐟𑑂𑐫𑐫𑐵 𑐀𑐢𑑂𑐫𑐫𑐣 𑐎𑑂𑐰𑐵𑐟𑐸 𑐩𑐖𑐹 𑑋 𑐰𑐶𑐲𑐫 𑐡𑐎𑑂𑐰 𑐡𑐸, 𑐟𑐬 𑐰𑐶𑐡𑑂𑐫𑐵𑐬𑑂𑐠𑐷𑐥𑐶𑐣𑐶 𑐳𑐵𑐴𑐶𑐟𑑂𑐫𑐫𑑂 𑐬𑐸𑐔𑐷 𑐩𑐡𑐸𑐐𑐸 𑐢𑐵𑐫𑐾 𑐮𑐵 𑐰𑐵 𑐀𑐣 𑐣𑐾𑐟𑐺𑐟𑑂𑐰𑐫𑐵 𑐎𑐸𑐬𑑂𑐳𑐶𑐂 𑐔𑑂𑐰𑐣𑐷𑐥𑐶𑑄𑐳𑑄 𑐳𑐵𑐴𑐶𑐟𑑂𑐫 𑐩𑑂𑐴𑐩𑐳𑐶𑐄𑐐𑐸 𑐢𑐵𑐫𑐾 𑐮𑐵, 𑐀𑐣 𑐳𑐵𑐴𑐶𑐟𑑂𑐫𑐫𑐵 𑐀𑐢𑑂𑐫𑐫𑐣 𑐏𑐸𑐳𑐶𑐂 𑐳𑐬𑐵𑐡 𑐫𑐵𑐫𑐾 𑐠𑐾𑑄 𑐖𑐎 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐠𑑂𑐰 𑐏𑑃 𑐳𑐸𑐫𑐵𑐟𑑄 𑐥𑐔𑐾 𑐩𑐖𑐹𑐳𑐵 𑐀𑐣 𑐰𑑄𑐐𑐸 𑐳𑑂𑐰𑐷𑐡𑑃𑐫𑐵 𑐡𑐸𑐣𑐾 𑐐𑑂𑐰𑐩𑑂𑐴𑐾𑐳𑑂𑐫𑐵𑑄 𑐳𑐵𑐴𑐶𑐟𑑂𑐫𑐫𑐵 𑐰𑐶𑐲𑐫𑐫𑑂 𑐱𑑀𑐢𑐥𑐟𑑂𑐬 𑐔𑑂𑐰𑐮 𑐢𑐎𑐵𑑅 𑐳𑑂𑐰𑑅𑐳𑐵 𑐐𑐵𑑅 𑑋

𑐀𑐣 𑐧𑑂𑐰𑑄𑐎𑐷𑐐𑐸 𑐰𑐶𑐲𑐫𑑄 𑐰𑐶𑐱𑑂𑐰 𑐳𑐵𑐴𑐶𑐟𑑂𑐫𑐫𑐵𑐟 𑐐𑐸𑐮𑐶 𑐎𑑅𑐑𑐵𑑅 𑐢𑐂𑐐𑐸 𑐩𑐾𑐐𑐸 𑐏𑑃 𑐡 𑐴𑐾 𑐡𑐣𑐶 𑑋 𑐣𑐾𑐥𑐵𑐮𑐨𑐵𑐲𑐵𑐫𑑂 𑐳𑑂𑐣𑐵𑐟𑐎𑑀𑐟𑑂𑐟𑐬 𑐖𑐸𑐫𑐵𑐰𑑅𑐥𑐶𑑄 𑐀𑐮𑐾 𑐣𑐾𑐥𑐵𑐮𑐷, 𑐀𑑄𑐐𑑂𑐬𑐾𑐖𑐷 𑐨𑐵𑐫𑑂𑐫𑐵 𑐳𑑂𑐣𑐵𑐟𑐎𑑀𑐟𑑂𑐟𑐬 𑐖𑐸𑐫𑐵𑐰𑑅𑐥𑐶𑑄𑐎𑐾 𑐏𑑃 𑐮𑑂𑐴𑐵𑐫𑐾𑐧𑐮𑐫𑑂 𑐄𑐩𑐶𑐳𑑄 𑐳𑐵𑐴𑐶𑐟𑑂𑐫𑐫𑐵 𑐐𑐸𑐐𑐸 𑐰𑐬𑑂𑐴𑐶𑑄𑐐𑐩 𑐡𑐺𑐲𑑂𑐫 𑐗𑐷𑐟 𑐧𑐶𑐂, 𑐄𑐎𑐶𑑄 𑐳𑐟𑑂𑐫 𑐄𑐮𑐵𑐎𑑂𑐫𑑄 𑑋𑐀𑐖𑑂𑐫𑐵𑑅𑐐𑐸 𑐀𑐰𑐳𑑂𑐠𑐵𑐫𑑂 𑐣𑐶𑐐𑐹 𑐰𑐶𑐎𑐮𑑂𑐥 𑐡𑐣𑐶 𑑋

𑐎𑐶 𑐰 𑐎𑐾𑐣𑑂𑐡𑑂𑐬𑐷𑐫 𑐰𑐶𑐨𑐵𑐐𑐫𑑂 𑐰𑐶𑐥𑑂𑐮𑐰 𑐴𑐾 𑐫𑐵𑐣𑐵𑑅 𑐀𑐣𑐫𑐵 𑐎𑐵𑐫𑐵𑐥𑐮𑐚 𑐫𑐵𑐣𑐵𑑅 𑐴𑐵𑐣𑑄 𑐳𑐵𑐴𑐶𑐟𑑂𑐫 𑐀𑐢𑑂𑐫𑐫𑐣 𑐫𑐵𑐫𑐾𑐐𑐸 𑐠𑐵𑐫𑑂𑐫𑐵 𑐬𑐹𑐥𑐫𑑂 𑐰𑐶𑐎𑐵𑐳 𑐫𑐵𑐫𑐾𑐐𑐸 𑐎𑐶 𑐩𑐏𑐸𑐳𑐵 𑐩𑐾𑐐𑐸 𑐴𑐾 𑐐𑐣𑑄 𑐳𑐵𑐴𑐶𑐟𑑂𑐫𑐫𑐵 𑐴𑐾 𑐖𑐎 𑐀𑐢𑑂𑐫𑐫𑐣 𑐫𑐵𑐫𑐾𑐐𑐸 𑐕𑐸𑑄 𑐠𑐵𑐫𑑂 𑐡𑐫𑐾𑐎𑐾𑐐𑐸, 𑐐𑐣 𑐣𑐶𑐩𑑂𑐴 𑐥𑑂𑐫𑐩𑑂𑐴 𑐴𑐾 𑐔𑑂𑐰𑐣𑐵𑑅𑐳𑐵𑑄 𑐳𑐵𑐴𑐶𑐟𑑂𑐫𑐫𑐵 𑐳𑐶𑐬𑑂𑐖𑐣𑐵, 𑐀𑐢𑑂𑐫𑐫𑐣, 𑐰𑐶𑐱𑑂𑐮𑐾𑐲𑐞, 𑐳𑐩𑐵𑐮𑑀𑐔𑐣𑐵 𑐫𑐵𑐣𑐵𑑅 𑐗𑐷𑐐𑐸 𑐨𑐵𑐫𑑂𑐫𑐵 𑐳𑐵𑐴𑐶𑐟𑑂𑐫𑐫𑐵𑐟 𑐰𑐶𑐱𑑂𑐰𑐳𑑂𑐟𑐬 𑐴𑐾 𑐩𑐏𑐸𑐳𑐵𑑄 𑐩𑐾𑐥𑐶𑐣𑐶 𑐣𑑂𑐴𑑂𑐫𑑅𑐣𑐾 𑐧𑑂𑐰𑐫𑐾𑐧𑐴𑐐𑐸 𑐟𑐎 𑐫𑐵𑐣𑐵𑑅 𑐥𑐬𑐶𑐩𑐵𑐬𑑂𑐖𑐣 𑐰 𑐰𑐶𑐎𑐵𑐳 𑐫𑐵𑐣𑐵𑐫𑑄𑐎𑐷 𑑋 𑐨𑐰𑐶𑐲𑑂𑐫 𑐗𑐷𑐐𑐸 𑐮𑑂𑐴𑐵𑐟𑐶𑐂 𑐡𑐸, 𑐩𑐏𑐸𑐳𑐵 𑐗𑐶𑐡𑑃 𑐣𑐷𑐡𑑃 𑐮𑐶𑐥𑐵 𑐗𑐷𑐐𑐸 𑐨𑐵𑐫𑑂𑐫𑐵 𑐍𑐳𑐟 𑐳𑐵𑐴𑐶𑐟𑑂𑐫 𑐢𑐂𑐐𑐸 𑐥𑐶𑐣𑐾 𑐧𑑂𑐰𑐫𑐾 𑐮𑐵𑐫𑐎 𑐴𑐾 𑐣𑑄 𑐩𑐖𑐸𑐫𑐵𑐰𑐣𑐷 𑐮𑐵 𑐢𑐂𑐐𑐸 𑐐𑑂𑐫𑐵𑑅𑐔𑐶𑐎𑐸 𑐡𑐸 𑑋