𑐕𑐐𑐹 𑐄𑐥𑐣𑑂𑐫𑐵𑐳𑐫𑐵 𑐕𑐩𑑂𑐴 𑐴𑐶𑐬𑑀 𑐥𑐵𑐟𑑂𑐬𑑅 𑐧𑐸𑑄𑐐𑐡𑑂𑐫𑑅


-𑐬𑐵𑐖𑐾𑐣 𑐩𑐵𑐣𑐣𑑂𑐢𑐬

𑐕𑐐𑐹 𑐄𑐥𑐣𑑂𑐫𑐵𑐳𑐫𑐵 𑐕𑐩𑑂𑐴 𑐴𑐶𑐬𑑀 𑐥𑐵𑐟𑑂𑐬𑑅 𑐧𑐸𑑄𑐐𑐡𑑂𑐫𑑅

𑐧𑐸𑑄𑐐𑐡𑑂𑐫𑑅 𑐕𑐩𑑂𑐴 𑐥𑐵𑐟𑑂𑐬 𑐖𑐸𑐂𑐦𑐂 𑐮𑐵, 𑐕𑐐𑐹 𑐄𑐥𑐣𑑂𑐫𑐵𑐳𑐫𑐵 ? 𑐖𑐶𑐐𑐸 𑐣𑑂𑐴𑑂𑐫𑐥𑐸𑑄 𑐖𑐶𑐟𑑅 𑐣𑑂𑐫𑐣𑐵𑐔𑑂𑐰𑐣 𑑋 𑐕𑐐𑐹 𑐖𑐶𑑄 𑐔𑑂𑐰𑐫𑐵𑐔𑑂𑐰𑐣𑐵𑐐𑐸𑐫𑐵𑐟 𑐄𑐥𑐣𑑂𑐫𑐵𑐳 𑐢𑐵𑐂 𑐮𑐵 𑐩𑐢𑐵𑐂 𑐮𑐵 𑐢𑐂𑐐𑐸 𑐴𑐾 𑐡𑐸𑐰𑐶𑐢𑐵𑑄 𑐥𑐶𑐴𑐵𑑄 𑐰𑐫𑐾𑐩𑐦𑐫𑐵𑐔𑑂𑐰𑑄𑐧𑐮𑐫𑑂 𑐴𑐵𑐣𑑄 𑐠𑑂𑐰 𑐣𑑂𑐴𑑂𑐫𑐳𑐮𑑄 𑐖𑐶𑐟𑑅 𑐑𑑂𑐰𑐵𑐬𑐵𑐑𑑂𑐰𑐵𑐬𑐵 𑐫𑐵𑐣𑐵𑐴𑐮 𑑋𑐖𑐶𑑄 𑐧𑐵𑑄𑐮𑐵𑐎 𑐳𑐶𑐄 𑐖𑐶𑑄 𑐔𑑂𑐰𑐫𑐵𑐔𑑂𑐰𑐣𑐵𑐐𑐸 𑐐𑐸𑐐𑐸𑑄 𑐂𑐟𑐶𑐴𑐵𑐳 𑐰𑐵 𑐢𑐬𑑂𑐩 𑐳𑑄𑐳𑑂𑐎𑐺𑐟𑐶𑐫𑐵 𑐀𑐣𑑂𑐰𑐾𑐲𑐞 𑐩𑐏𑐸, 𑐖𑐶𑐎𑐾 𑐥𑑂𑐬𑐩𑐵𑐞𑐶𑐟 𑐫𑐵𑐫𑐾𑐐𑐸 𑐕𑐸𑑄 𑐩𑐡𑐸, 𑐀𑐮𑐾 𑐳𑐸𑐫𑐵𑑄𑐟 𑐴𑐶𑐳𑑂𑐫𑐵𑐫𑐾𑐐𑐸 𑐰𑐵 𑐁𑐳𑑂𑐠𑐵𑐫𑑂 𑐑𑐵𑑅 𑐮𑐵𑐎𑐾𑐐𑐸 𑐣𑑄 𑐖𑐶𑐐𑐸 𑐀𑐨𑐶𑐥𑑂𑐬𑐵𑐫 𑐖𑐸𑐂𑐦𑐂𑐩𑐏𑐸 𑑋

𑐕𑐐𑐹 𑐰𑐶𑐱𑐸𑐡𑑂𑐢 𑐢𑐵𑐬𑑂𑐩𑐶𑐎 𑐰𑐶𑐲𑐫𑐰𑐳𑑂𑐟𑐸𑐫𑐵𑐟 𑐐𑐿𑐬𑐢𑐵𑐬𑑂𑐩𑐶𑐎 𑐎𑐠𑑄 𑐥𑐶𑐟𑐧𑑂𑐰𑐫𑐾𑐐𑐸 𑐀𑐮𑐾 𑐄𑐎𑐶𑐫𑐵𑐟 𑐢𑐬𑑂𑐩𑐰𑐶𑐬𑑀𑐢𑐷 𑐖𑑂𑐫𑐵 𑐩𑐏𑐸 𑐢𑐎𑐵𑑅 𑐢𑐫𑐵𑑄 𑐳𑐸𑐣𑐵𑑄 𑐥𑐟𑑂𑐫𑐵𑑅 𑐫𑐵𑐂𑐩𑐏𑐸 𑑋 𑐀𑐠𑐾𑐳𑐵𑑄 𑐖𑐶𑑄 𑐖𑐶𑐟𑑅 𑐟𑑅𑐡𑑃𑐟𑐎 𑐏𑐾𑐳𑑂𑐬𑐵𑐫𑐵 𑐡𑑂𑐫𑑅𑐣𑐾 𑐏𑐾𑐳𑑂𑐬𑐵 𑐫𑐵𑐣𑐵𑑅 𑐣𑑄 𑐰𑐵𑑄𑐕𑑂𑐰𑐫𑐵𑐟𑐫𑐵𑐐𑐸 𑐥𑐵𑐞𑑂𑐜𑐸𑐮𑐶𑐥𑐶𑐫𑐵𑐟 𑐔𑑂𑐰𑐟𑑂𑐫𑑄𑐎 𑐰𑐵𑑄𑐕𑑂𑐰𑐫𑐾𑐩𑐦𑐸𑐟 𑑋 𑐖𑐶𑑄 𑐖𑐶𑐟𑑅 𑐴𑐾 𑐣𑑂𑐴𑑂𑐫𑐳𑑅 𑐟𑐫𑐵, 𑐧𑐸𑑄𑐐𑐡𑑂𑐫𑑅 𑐴𑐾 𑐕𑐵𑐫𑑂 𑐖𑐶𑐐𑐸 𑐰𑐶𑐲𑐫 𑐮𑐾 ? 𑐖𑐶𑑄 𑐳𑐶𑐄, 𑐖𑐶 𑐰𑐶𑐰𑐵𑐡𑐬𑐴𑐶𑐟 𑐖𑐸𑐂𑐦𑐂𑐩𑐏𑐸, 𑐖𑐶𑑄 𑐳𑐎𑐳𑐶𑐟𑑄 𑐮𑐫𑑂𑐟𑐵𑐫𑐾𑐎𑐾 𑐦𑐂𑐩𑐏𑐸 𑑋

𑐀𑐠𑐾 𑐢𑐎𑐵𑑅 𑐳𑐸𑐫𑐵𑐟𑑄 𑐟𑑄𑐩𑑂𑐰𑐫𑐾𑐎𑐾𑐐𑐸 𑐖𑐶𑐐𑐸 𑐲𑐜𑐫𑐣𑑂𑐟𑑂𑐬 𑐣𑑄 𑐩𑐏𑐸 𑑋 𑐀𑐮𑐾 𑐐𑐣𑑄 𑐖𑐶𑑄 𑐠𑑂𑐰 𑐀𑐮𑑁𑐎𑐶𑐎, 𑐡𑐿𑐰𑐷, 𑐔𑐩𑐟𑑂𑐎𑐵𑐬𑐶𑐎 𑐀𑐮𑐾 𑐩𑐴𑐵𑐎𑐵𑐬𑐸𑐞𑐶𑐎 𑐥𑐵𑐟𑑂𑐬𑐫𑐵𑐟 𑐩𑐸𑐏𑑂𑐫𑐥𑐵𑐟𑑂𑐬𑐫𑐵 𑐬𑐸𑐥𑐫𑑂 𑐣𑑂𑐴𑑂𑐫𑐧𑑂𑐰𑐫𑐾𑐦𑐂 ? 𑐄𑐥𑐣𑑂𑐫𑐵𑐳𑐫𑐵 𑐏𑑂𑐫𑐮𑐫𑑂 𑐣𑑂𑐴𑐵𑐥𑐵𑑄𑐐𑐸 𑐥𑐮𑐵𑑅 𑐟𑐫𑐵𑐔𑑂𑐰𑐣𑐵𑐩𑑂𑐴𑐾𑐳𑑂𑐫𑐵 𑐠𑑂𑐰 𑐡𑐸𑐳𑑂𑐳𑐵𑐴𑐳 𑐴𑐶𑐳𑐶 𑐡𑐸𑐐𑐸 𑐏𑑃 𑐩𑐏𑐸 𑑋 𑐖𑐶𑑄 𑐖𑐶𑐟𑑅 𑐢𑐵𑐫𑐾 𑑋 𑐴𑐵𑐣𑑄 𑐢𑐵𑐫𑐾, 𑐫𑐵𑐣𑐵𑐳𑑂𑐰𑐫𑐾 𑐢𑐵𑐂𑐩𑑂𑐴 𑐖𑐶𑐐𑐸 𑐡𑐸𑐣𑐾𑐔𑑂𑐰𑑄𑐩𑑂𑐴 𑐔𑑂𑐰𑐩𑐶𑐫𑐵𑐟 𑐠𑑂𑐰𑐟𑐶 𑐧𑐵𑑄𑐮𑐵𑑅𑐐𑐸 𑐩𑐾𑐐𑐸 𑐥𑑂𑐮𑐚 𑐮𑐸𑐂𑐎𑐾 𑐦𑐂𑐩𑐏𑐸 𑐖𑐶𑑄 𑑋

𑐖𑐶𑑄 𑐕𑐸, 𑐦𑐸𑐂𑑃 𑐫𑐵𑐣𑐵𑑅 𑐴𑐾 𑐢𑐵𑐫𑐾, 𑐳𑐸𑐣𑐵𑑄𑐣𑑄 𑐦𑐂𑐩𑐏𑐸 𑑋 𑐠𑑂𑐰 𑐢𑐬𑑂𑐩 𑐏𑑅, 𑐳𑑄𑐳𑑂𑐎𑐺𑐟𑐶 𑐏𑑅, 𑐳𑑄𑐳𑑂𑐎𑐵𑐬 𑐏𑑅, 𑐁𑐳𑑂𑐠𑐵 𑐏𑑅, 𑐮𑑀𑐎𑐰𑐵𑐬𑑂𑐟𑐵 𑐏𑑅, 𑐀𑐮𑐾 𑐐𑐸𑐮𑐶𑐐𑐸𑐮𑐶𑐳𑐶𑐐𑐸𑑄 𑐮𑐵𑐐𑐶 𑐂𑐟𑐶𑐴𑐵𑐳 𑐣𑑄 𑑋𑐩𑐾𑐐𑐸 𑐏𑑃, 𑐠𑑂𑐰 𑐧𑐸𑑄𑐐𑐡𑑂𑐫𑑅𑐫𑐵 𑐥𑑂𑐮𑐚 𑐐𑐸𑐮𑐶 𑐬𑑀𑐔𑐎, 𑐬𑑀𑐩𑐵𑐘𑑂𑐔𑐎, 𑐬𑐴𑐳𑑂𑐫𑐩𑐫 𑐰 𑐢𑐵𑐬𑑂𑐩𑐶𑐎, 𑐄𑐎𑐶𑑄 𑐴𑐾 𑐠𑑂𑐰 𑐰𑐶𑐰𑐵𑐡𑐵𑐳𑑂𑐥𑐡 𑐣𑑄 𑐏𑑅 𑑋 𑐳𑑂𑐰𑐳𑑂𑐰𑑄 𑐰𑐣𑐵, 𑐧𑑂𑐰𑑃𑐧𑑂𑐰𑑄 𑐰𑐣𑐵, 𑐣𑑂𑐫𑑃𑐣𑑂𑐫𑑄 𑐰𑐣𑐵 𑑋 𑐕𑐠𑐵𑐫𑑂 𑐠𑐾 𑐩𑐾𑐠𑐵𑐫𑑂 𑐥𑐵𑑅, 𑐕𑐩𑑂𑐴𑐾𑐳𑐶𑐫𑐵 𑐏𑑃 𑐰 𑐩𑐾𑐩𑑂𑐴𑐾𑐳𑐶𑐫𑐵 𑐏𑑃 𑐮𑑂𑐰𑐵𑑅 𑑋

𑐖𑐶 𑐮𑐵 𑐏𑐳𑐸𑐂 𑐮𑐵𑑅𑐩𑑂𑐴 𑐎𑑂𑐰𑑅 𑑋 𑐧𑐵𑐏𑑄 𑐡𑐎𑑂𑐰 𑐥𑐵𑐫𑑂𑐕𑐶 𑐟𑐬 𑐧𑐸𑑄𑐐𑐡𑑂𑐫𑑅 𑐕𑐩𑑂𑐴 𑐴𑐾 𑐖𑐎 𑐀𑐮𑐩𑐮 𑑋 𑐣 𑐖𑐶𑑄 𑐰𑐫𑐵𑐟 𑐩𑐵𑐎𑑂𑐰 𑐳𑑂𑐰𑐫𑐵𑑅 𑐫𑐎𑑂𑐰 𑐥𑑂𑐬𑐵𑐠𑐩𑐶𑐎𑐟𑐵 𑐧𑐶𑐫𑐵𑐐𑐸𑐮𑐶𑑄 𑐮𑐵 𑑋 𑐖𑐶𑑄 𑐣𑑂𑐫𑐵𑐫 𑐫𑐵𑐫𑐾𑐦𑐂 𑐩𑐏𑐸𑐐𑐸 𑐖𑐸𑐮, 𑐠𑑂𑐰 𑐖𑐶𑐐𑐸 𑐴𑐾 𑐣𑐶𑐎𑑂𑐬𑑂𑐫𑑁𑐮 𑑋 𑐀𑐠𑐾𑐳𑐵𑑄 𑐴𑐵𑐬𑐾𑐩𑐔𑐵𑐫𑐵 𑑋 𑐔𑑂𑐰𑐫𑐵, 𑐴𑐸𑐫𑐵, 𑐔𑑂𑐰𑐫𑐵 𑐴𑐸𑐫𑐵 𑑋𑐧𑐸𑑄𑐐𑐡𑑂𑐫𑑅𑐫𑐵 𑐄𑐥𑐣𑑂𑐫𑐵𑐳 𑐧𑐸𑑄𑐐𑐡𑑂𑐫𑑅 𑐩𑐟𑐳𑐾 𑐔𑑂𑐰𑐫𑐾𑐩𑐦𑐂 𑐮𑐵 ? 𑐴𑐵𑐣𑑄 𑐕𑐐𑐹 𑐄𑐥𑐵𑐫 𑐰𑐮 𑑋

𑐧𑐸𑑄𑐐𑐡𑑂𑐫𑑅 𑐰𑐫𑐾 𑐣𑑂𑐴𑑂𑐫𑑅 𑐴𑐾 𑐄𑐥𑐣𑑂𑐫𑐵𑐳𑐫𑑂 𑐥𑐸𑐳𑐵 𑐟𑐫𑐵𑐧𑐶𑐄𑐳𑐵 𑐮𑐵 𑐏𑐾𑐮 𑐴𑐾 𑐏𑐟𑑂𑐟𑐩 𑐣𑐶 𑑋 𑐄𑐮𑐶 𑐣𑑄 𑐫𑐵𑐫𑐾𑐩𑐦𑐸𑐟, 𑐳𑐦𑐹𑐫𑐵 𑐣𑐵𑑄 𑐣𑑄 𑐧𑐸𑑄𑐐𑐡𑑂𑐫𑑅 𑐴𑐾 𑐩𑐵𑑅 𑐖𑐶𑐟𑑅, 𑐖𑐶𑐐𑐸 𑐧𑐵𑐏𑑄 𑐴𑐾 𑐧𑐸𑑄𑐐𑐡𑑂𑐫𑑅𑐫𑐵, 𑐟𑐬 𑐰𑐫𑐵𑐟 𑐖𑐶𑑄 𑐖𑐶𑐐𑐸 𑐬𑑄𑐐𑐩𑐘𑑂𑐔𑐫𑑂 𑐴𑐫𑐾𑐐𑐸 𑐩𑐹𑐬𑑂𑐏𑐟𑐵 𑐴𑐾 𑐖𑐸𑐂 𑐢𑐂𑐐𑐸 𑐖𑐶𑑄 𑐳𑐶𑐄 𑑋𑐗𑐷𑐳𑑄 𑐢𑐫𑐵𑐔𑑂𑐰𑐣𑐵 𑐧𑐸𑑄𑐐𑐡𑑂𑐫𑑅 𑐢𑐫𑐵𑐩𑑂𑐴, 𑐎𑐬𑐸𑐞𑐵𑐩𑐫, 𑐎𑐬𑐸𑐞𑐵𑐣𑐶𑐢𑐵𑐣 𑑋 𑐧𑐸𑐡𑑂𑐢 𑐖𑐸𑐫𑐵𑐰𑐣𑐾𑐦𑐸𑐩𑑂𑐴 𑐖𑐸𑐫𑐵𑑅 𑐣𑑄 𑐖𑐐𑐟𑐳𑑄𑐳𑐵𑐬𑐫𑐵 𑐄𑐡𑑂𑐢𑐵𑐬 𑐫𑐵𑐣𑐵𑑅 𑐖𑐎 𑐰𑐣𑐾 𑐢𑐎𑐵𑑅 𑐢𑑂𑐰𑐐𑐶𑐣𑐵𑑅 𑐣𑑄 𑐐𑑄𑐐𑐸 𑐔𑐮𑑂𑐮𑐵𑐫𑐵 𑐕𑑂𑐫𑑄𑐐𑐹 𑐴𑐾 𑐩𑑂𑐴𑐫𑑂 𑐴𑐶𑐣𑐵𑑅 𑐔𑐵𑑄𑐣𑑂𑐴𑐶𑑄 𑐐𑐠𑐾 𑐫𑐵𑑅𑐳𑐵 𑐕𑐩𑑂𑐴 𑐕𑐩𑑂𑐴 𑐀𑐖𑑂𑐘𑐵𑐣𑐷, 𑐀𑐣𑐵𑐠𑐫𑐵 𑐬𑐎𑑂𑐲𑐵 𑐫𑐵𑐫𑐾 𑐢𑐎𑐵𑑅 𑐥𑐶𑐫𑐵𑐔𑑂𑐰𑑄𑐩𑑂𑐴 𑑋

𑐀𑐖𑑂𑐫𑐵𑑅𑐩𑑂𑐴 𑐥𑐵𑐟𑑂𑐬 𑐖𑐶𑐩𑐶 𑐩𑐹𑐥𑐵𑐟𑑂𑐬 𑑋 𑐀𑐮𑐾 𑐖𑐶𑐐𑐸 𑐩𑐔𑐵𑐥𑐴𑐐𑐸 𑐠𑐬𑐠𑐬𑐏𑐵𑑅𑐐𑐸 𑐮𑑂𑐴𑐵𑑅 𑑋 𑐔𑑂𑐰𑐔𑑂𑐰𑑄 𑐰𑐣𑐵 𑑋 𑐴𑐵𑐣𑑄 𑐩𑐖𑑂𑐖𑐵𑐐𑐸 𑐏𑑃 𑑋 𑐧𑐵𑐏𑑄 𑐣𑑂𑐫𑑄𑐥𑐶𑑄𑐳𑑄 𑐣𑑄 𑐠𑑂𑐰 𑐏𑑃 𑐰𑐵𑑅𑐔𑐵𑑅 𑐖𑐸𑐂, 𑐥𑐹𑐰𑑄𑐎 𑐧𑐵𑐏𑑄 𑐣𑑂𑐫𑐣𑐾𑐧𑐮𑐫𑑂 𑐧𑐸𑑄𑐐𑐡𑑂𑐫𑑅 𑐫𑐎𑑂𑐰 𑐮𑐶𑐥𑐵 𑐟𑐶𑐣𑐶 𑐢𑑂𑐰𑐡𑐸𑐂 𑑋 𑐧𑐵𑐏𑑄 𑐧𑐸𑑄𑐐𑐡𑑂𑐫𑑅𑐫𑐵 𑐴𑐾 𑐏𑑅, 𑐀𑐣 𑐧𑐸𑑄𑐐𑐡𑑂𑐫𑑅 𑐡𑐸, 𑐟𑐬 𑐡𑐺𑐲𑑂𑐫𑐫𑑂 𑐏𑐣𑐾 𑐖𑐎 𑐩𑐡𑐸 𑑋 𑐄𑐎𑐶𑑄 𑐴𑐾 𑐖𑐶𑐐𑐸 𑐄𑐥𑐣𑑂𑐫𑐵𑐳𑐫𑑂 (𑐰𑐵 𑐄𑐥𑐣𑑂𑐫𑐵𑐳 𑐩𑐏𑐸𑐐𑐸, 𑐕𑐶 𑐫𑐟𑑂𑐠𑐾 𑐢𑐫𑐵𑐡𑐶𑐳𑑃) 𑐩𑐹𑐥𑐵𑐟𑑂𑐬 𑐡𑐫𑐾𑐎𑐵𑐟𑐫𑐵𑐩𑑂𑐴 𑐧𑐸𑑄𑐐𑐡𑑂𑐫𑑅 𑐳𑐶𑐢𑐫𑐾𑐟𑑂𑐫𑐫𑐾𑐎𑐵𑑅 𑐖𑐎 𑐡𑑄𑐰𑐂 𑑋

𑐕𑐩𑑂𑐴 𑐀𑐧𑑀𑐢 𑐧𑐵𑐮𑐎𑐫𑐵 𑐬𑐸𑐥𑐫𑑂 𑑋 𑐣 𑐰 𑐊𑐬𑐶𑐳𑑂𑐚𑑀𑐚𑐮𑐫𑐵 𑐴𑐶𑐬𑑀, 𑐣 𑐱𑐾𑐎𑑂𑐳𑐥𑐶𑐫𑐬𑐫𑐵 𑐴𑐾 𑐴𑐶𑐬𑑀 𑑋 𑐣 𑐰𑐶𑐮𑐶𑐒, 𑐣 𑐀𑐣𑐰𑐶𑐮𑐶𑐒, 𑐣 𑐚𑑂𑐬𑐵𑐖𑐶𑐎, 𑐣 𑐎𑑂𑐮𑐵𑐳𑐶𑐎𑐮, 𑐣 𑐊𑐥𑐶𑐎 𑐣 𑐊𑐣𑑂𑐚𑐶𑐴𑐶𑐬𑑀 𑑋 𑐟𑐬 𑐖𑐶𑐐𑐸 𑐮𑐵𑐐𑐶 𑐢𑐵𑑅𑐳𑐵 𑐴𑐶𑐬𑑀 𑐴𑐾 𑐖𑐸𑐫𑐵𑐧𑐶𑐂𑐩𑐵𑑅𑐐𑐸 𑐡𑐸 𑑋 𑐖𑐵𑐟𑐎𑐫𑐵 𑐥𑑂𑐫𑐳𑑅𑐟𑑂𑐫𑐵 𑐧𑐵𑐏𑐣𑐫𑑂 𑐴𑐶𑐬𑑀 𑐧𑑀𑐢𑐶𑐳𑐟𑑂𑐰 𑐴𑐾 𑐏𑑅, 𑐳𑐴𑐳𑑂𑐬𑐨𑐹𑐖 𑐮𑑀𑐎𑐾𑐱𑑂𑐰𑐬𑐫𑐵 𑐬𑐸𑐥𑐫𑑂 𑐖𑐹𑐳𑐵 𑐎𑐬𑐸𑐞𑐵𑐩𑐫 𑐣𑑄 𑐴𑐶𑐬𑑀 𑐠𑐾𑑄 𑐖𑐸𑐂𑐐𑐸 𑐖𑐸𑐂 𑑋

𑐟𑐬 𑐠𑐣 𑐕𑐸𑑄 𑐩𑐳𑐶𑐄𑐩𑑂𑐴, 𑐣𑐔𑑂𑐔𑐵𑐩𑑂𑐴 𑐩𑐔𑐵 𑐕𑐩𑑂𑐴 𑑋 𑐟𑐬 𑐰 𑐴𑐾 𑐴𑐶𑐬𑑀 𑐖𑐸𑐂𑐩𑐵𑑅 𑐖𑐶𑐐𑐸 𑑋 𑐖𑐶𑑄 𑐖𑐶𑐟𑑅 𑐴𑐾 𑐠𑐸𑐂𑐎𑐵, 𑐰 𑐴𑐶𑐬𑑀 𑐩𑐏𑐸𑐳𑐵𑑄 𑐩𑐣𑐹 𑐳𑐨𑑂𑐫𑐟𑐵𑐫𑐵 𑐕𑐐𑐹 𑐴𑐶𑐬𑑀 𑐳𑐶𑐳𑑂𑐚𑐩𑐫𑐵 𑐥𑑂𑐬𑐟𑐷𑐎 𑐢𑐵𑑅𑐳𑐵 𑐏𑑅 𑑋 𑐴𑐶𑐬𑑀𑐂𑐣𑐫𑐵 𑐂𑐖𑑂𑐖𑐟 𑐧𑐔𑐾 𑐫𑐵𑐫𑐾𑐟 𑐟𑐸𑐫𑐸𑐩𑑂𑐴 𑐳𑐮 𑐐𑐫𑐵𑑅 𑐰𑐂𑐩𑑂𑐴 𑐴𑐶𑐬𑑀 𑐮𑐵 𑐩𑐏𑐸, 𑐟𑐬 𑐣𑐾𑐥𑐵𑑅𑐫𑐵 𑐮𑐏𑑁𑑄𑐮𑐏 𑐖𑐣𑐟𑐵𑐫𑐵 𑐥𑑂𑐫𑐵𑑅𑐔𑐵𑑅 𑐮𑑄𑐎𑐾𑐟 𑐰𑑅𑐩𑑂𑐴 𑐰 𑐴𑐶𑐬𑑀 𑐩𑐏𑐸𑐳𑐵 𑐕𑐸 𑐖𑐸𑐂 ? 𑐧𑐸𑑄𑐐𑐡𑑂𑐫𑑅 𑐠𑐣 𑐕𑐩𑑂𑐴 𑐱𑐵𑐬𑐷𑐬𑐶𑐎 𑐳𑐸𑐐𑐛𑐣 𑐡𑐸𑐩𑑂𑐴 𑐧𑐮𑐱𑐵𑐮𑐷 𑐥𑐸𑐬𑐸𑐲 𑐮𑐵 𑐩𑐏𑐸, 𑐟𑐬 𑐎𑐬𑐸𑐞𑐵𑐣𑐶𑐢𑐵𑐣 𑐮𑐵 𑐏𑑅 𑑋

𑐰 𑐨𑐩𑑂𑐧𑑅 𑐣𑑄 𑐖𑐶𑐩𑐶 𑐴𑐶𑐬𑑀, 𑐣𑐶𑐥𑐟𑐶𑑄𑐔𑐵𑑄 𑐖𑑂𑐰𑐣𑐎𑐶 𑐥𑐶𑐔𑐶𑐎𑑂𑐎 𑐰𑐣𑐾𑐦𑐸𑐩𑑂𑐴 𑑋 𑐠𑐣 𑐴𑐶𑐬𑑀 𑐢𑐂𑐩𑑂𑐴 𑐴𑐶𑐬𑑀𑐫𑐵 𑐩𑑂𑐴𑐐𑑅 𑐖𑑂𑐰𑐣𑐵𑑅 𑐩𑐏𑐸, 𑐖𑐐𑐟𑐳𑑄𑐳𑐵𑐬𑐫𑐵 𑐎𑐮𑑂𑐫𑐵𑐞 𑐫𑐵𑐫𑐾𑐟 𑐰𑐫𑐵𑐔𑑂𑐰𑑄𑐐𑐸 𑐡𑐸, 𑐰𑐫𑐵𑐟 𑐥𑐣𑐾𑐟 𑐳𑐎𑐳𑑂𑐫𑐵𑑄 𑐮𑐵𑐏 𑐎𑑀𑐳𑐶𑐳 𑐫𑐵𑐂, 𑐡𑐎𑑂𑐰 𑐟𑑂𑐫𑐵𑑄𑐐𑑂𑐬𑐵 𑐥𑐸𑐮𑐷, 𑐴𑐶𑐬𑑀 𑐖𑐎 𑐟𑑂𑐫𑐵𑐂, 𑐕𑐵𑐫𑑂𑐢𑐵𑑅𑐳𑐵 𑐰𑐫𑐵𑐎𑐾 𑐧𑐮 𑐩𑐡𑐸, 𑐱𑐳𑑂𑐟𑑂𑐬 𑐀𑐳𑑂𑐟𑑂𑐬 𑐩𑐡𑐸, 𑐨𑐷𑐩𑐎𑐵𑐫 𑐱𑐬𑐷𑐬 𑐣𑑄 𑐩𑐡𑐸, 𑐟𑐬 𑐰𑐫𑐵𑐎𑐾 𑐣𑐾𑐥𑐵𑑅𑐫𑐵 𑐖𑐣𑐟𑐵𑐫𑐵 𑐢𑐬𑑂𑐩𑐬𑐎𑑂𑐲𑐎 𑐖𑐹𑐐𑐸𑐮𑐶𑑄 𑐄𑐩𑐶𑐐𑐸 𑐳𑐵𑐠𑐫𑑂 𑐖𑐶 𑐡𑐣𑐾𑐩𑐵𑑅 𑐢𑐂𑐐𑐸 𑐕𑐐𑐹 𑐥𑑂𑐬𑐟𑐶𑐖𑑂𑐘𑐵 𑐡𑐸, 𑐀𑐢𑐶𑐲𑑂𑐛𑐵𑐣 𑐡𑐸, 𑐰𑐷𑐬𑑂𑐫 𑐡𑐸 𑑋

𑐄𑐎𑐶𑑄 𑐮𑐵 𑐰 𑐨𑐶𑑄𑐡𑑂𑐫𑑅𑐠𑐾𑑄 𑐱𑐎𑑂𑐟𑐶 𑐡𑐸𑐩𑑂𑐴 𑐢𑐎𑐵𑑅 𑐎𑐫𑐵𑐴𑑅𑐐𑐸 𑐩𑐏𑐸, 𑐰𑑄 𑐟𑐵𑐴𑐵𑐟𑐫𑑂𑐟 𑐳𑐸𑐎𑐹 𑐮𑐵𑐣𑐵𑑅 𑐦𑑂𑐫𑐟𑐸𑐣𑐵 𑐔𑑂𑐰𑑄𑐩𑑂𑐴 𑐐𑑀𑐬𑐏𑐣𑐵𑐠𑐫𑐵 𑐖𑑃 𑐟𑑂𑐰𑑅𑐠𑐸𑐮𑐾 𑐢𑐵𑑅𑐐𑐸 𑐩𑐡𑐸 𑑋 𑐰𑐫𑐵𑐐𑐸 𑐱𑐵𑐮𑐷𑐣 𑐄𑐥𑐳𑑂𑐠𑐶𑐟𑐶𑑄 𑐴𑐾 𑐐𑑀𑐬𑐏𑐣𑐵𑐠 𑐡𑐣𑐷, 𑐗𑐬𑐬𑐬𑑂𑐬 𑐰𑐵 𑐰𑐂 𑑋 𑐱𑐶𑐲𑑂𑐫 𑐡𑐣𑐾𑐰𑑄 𑐴𑐾 𑐣𑐾𑐥𑐵𑑅𑐫𑐵 𑐳𑐩𑐳𑑂𑐫𑐵 𑐖𑑂𑐫𑐣𑐷 𑑋 𑐀𑐖𑑂𑐫𑐵𑑅𑐩𑑂𑐴 𑐰 𑐴𑐾 𑐏𑑅 𑐴𑐶𑐬𑑀, 𑐰 𑐴𑐾 𑐏𑑅 𑐧𑐸𑑄𑐐𑐡𑑂𑐫𑑅 𑑋
𑐧𑐸𑑄𑐐𑐡𑑂𑐫𑑅 𑐢𑐵𑐮𑐎𑐶 𑐁𑑅𑐫𑐵 𑐨𑐵𑐳𑑄 𑐢𑐵𑐫𑐾𑐐𑐸 𑐏𑑅𑐳𑐵 𑐴𑐶𑐣𑑂𑐡𑐹 𑐰 𑐧𑑁𑐡𑑂𑐢𑐟𑐫𑑂 𑐩𑑄𑐎𑐵𑑅 𑐎𑐠𑑄 𑐴𑐣𑐵𑐟𑑅𑐩𑑂𑐴 𑐢𑐵𑐂 𑑋

𑐠𑑂𑐰 𑐡𑑂𑐫𑑅𑐫𑐵𑐟 𑐴𑐶𑐬𑑀 𑐰𑐵 𑐥𑐵𑐟𑑂𑐬 𑐟𑐎 𑐴𑐾 𑐣𑑄 𑐡𑐫𑐾𑐎𑐵𑑅 𑐔𑑂𑐰𑐫𑐾𑐐𑐸 𑐟𑐬𑐰𑐵𑐬𑐫𑐵 𑐢𑐵𑐮𑐫𑑂 𑐣𑑂𑐫𑐵𑐳𑐶𑐰𑐣𑐾𑐐𑐸 𑐠𑐾𑑄 𑐖𑐸𑐂 𑑋 𑐖𑐶𑑄 𑐳𑐶𑐄, 𑐣 𑐖𑐶𑐐𑐸 𑐏𑑃 𑐴𑐶𑐣𑑂𑐡𑐹𑐟𑐫𑑂𑐟 𑐫𑐂, 𑐣 𑐧𑑁𑐡𑑂𑐢𑐟𑐫𑑂𑐟 𑑋 𑐩𑑂𑐰𑐵𑑅𑐳𑐵𑑄 𑐩𑑂𑐰𑐵𑑅𑐳𑐵𑑄 𑐧𑑂𑐰𑑅 𑐦𑐫𑐾𑐐𑐸 𑐖𑑂𑐫𑐵 𑐖𑐎 𑐖𑐸𑐂, 𑐠𑑂𑐰 𑐣𑑄 𑐖𑐶𑑄 𑐳𑐶𑐄 𑑋 𑐀𑐮𑐾 𑐩𑐔𑑂𑐰𑐫𑐾𑐐𑐸 𑐮𑐵 ? 𑐠𑑅 𑐧𑐸𑐡𑑂𑐢𑐢𑐬𑑂𑐩𑐫𑐵 𑐰𑐶𑐡𑑂𑐫𑐵𑐬𑑂𑐠𑐷 𑐖𑐹𑐐𑐸𑐮𑐶𑑄 𑐄𑐏𑐾𑐥𑐵𑐏𑐾 𑐨𑐔𑐵 𑐢𑐾𑐔𑐸𑐮𑐷𑐐𑐸 𑐀𑐠𑐰𑐵 𑐄𑐎𑐶𑐫𑐵 𑐱𑑂𑐬𑑀𑐟𑐳𑐵𑐩𑐵𑐐𑑂𑐬𑐷𑐫𑐵 𑐁𑐢𑐵𑐬𑐫𑑂 𑐣𑐸𑐐𑐮𑐫𑑂 𑐕𑐥𑐵𑑅 𑐕𑐵𑐥 𑐡𑐫𑐾𑐎𑐾𑐢𑐸𑐣𑐷𑐐𑐸 𑑋

𑐩𑐏𑐸 𑐢𑐵𑑅𑐳𑐵𑑄 𑐖𑐶 𑐥𑐹𑐬𑑂𑐰𑐵𑐐𑑂𑐬𑐴𑐷 𑑋 𑐠𑑂𑐰 𑐎𑐬𑐸𑐞𑐵𑐩𑐫 𑐴𑐾 𑐏𑑅, 𑐧𑑀𑐢𑐶𑐳𑐟𑑂𑐰 𑐴𑐾 𑐏𑑅 𑐢𑐂𑐐𑐸 𑐏𑑃𑐫𑑂 𑐖𑐶 𑐰𑐶𑐱𑑂𑐰𑐳𑑂𑐟, 𑐀𑐢𑑂𑐫𑐫𑐣 𑐳𑐵𑐩𑐵𑐐𑑂𑐬𑐷𑑄 𑐣𑑄 𑐢𑐫𑐵𑐔𑑂𑐰𑐣 𑐰𑐫𑐵𑐟 𑐣𑐵𑐠 𑐏𑐮𑐫𑑂 𑐮𑐶𑐥𑐵𑐟𑐶𑐣𑐶 𑐴𑑅𑐐𑐸 𑑋 𑐀𑐮𑐾 𑐴𑐶𑐣𑑂𑐡𑐹𑐟𑐫𑑂𑐟 𑐐𑐠𑐾 𑐩𑐣 𑐟𑐫𑐾𑐐𑐸 𑐮𑐾 ? 𑐄𑐩𑐶𑐳𑑄 𑐮𑐵 𑐖𑐶𑐐𑐸 𑐮𑐵𑐦𑑅𑐥𑐶𑐂 𑑋 𑐩𑐐𑑂𑐫𑐵𑑅 𑐢𑐵𑐢𑐵𑑄 𑐖𑐶 𑐐𑑂𑐫𑐵𑑅 𑑋 𑐢𑐬𑑂𑐩𑐡𑐬𑑂𑐱𑐣𑐫𑐵 𑐮𑑂𑐫𑐵𑐏𑑄 𑐧𑑂𑐰𑐣𑐵 𑐳𑑂𑐰𑐫𑐵𑐧𑐮𑐫𑑂 𑐧𑐸𑑄𑐐𑐡𑑂𑐫𑑅𑐫𑐵𑐟 𑐮𑑀𑐎𑐾𑐱𑑂𑐰𑐬, 𑐎𑐬𑐸𑐞𑐵𑐩𑐫𑐫𑐵 𑐬𑐸𑐥𑐫𑑂 𑐴𑐾 𑐖𑐎 𑐧𑑂𑐫𑐵𑐏𑑂𑐫𑐵 𑐫𑐵𑐣𑐵𑐟𑑅𑐐𑐸 𑐮𑐸𑐂𑐎𑐵, 𑐫𑐎𑑂𑐰𑐳𑑂𑐫𑐵𑑄 𑐰𑐫𑐵𑐟 𑐮𑐶𑐥𑐵 𑐟𑐶𑐣𑐶 𑐩𑐕𑐶𑐣𑑂𑐡𑑂𑐬𑐣𑐵𑐠 𑐢𑐵𑐫𑐾𑐐𑐸 𑐫𑐵𑐣𑐵𑐴𑑅𑐐𑐸 𑐢𑐎𑐵𑑅 𑐏𑐣𑐵 𑑋

𑐠𑑅𑐩𑑂𑐴𑐾𑐳𑑂𑐫𑐵𑑄 𑐣𑑄 𑐀𑐣 𑐡𑑃𑐫𑑂𑐡𑐳𑑄 𑐖𑐸𑐂𑐐𑐸 𑐖𑐵𑐟𑑂𑐬𑐵𑐫𑑂 𑐣𑑂𑐴𑑂𑐫𑐵𑐠𑐵𑐫𑑂 𑐣𑑄 𑐧𑑁𑐡𑑂𑐢𑐟𑐫𑑂𑐳𑑄 𑐴𑐾 𑐖𑐎 𑐥𑐸𑐖𑑂𑐫𑐵𑐣𑐵𑐔𑑂𑐰𑑄𑐐𑐸 𑐏𑐣𑐵 𑑋 𑐄𑐎𑐶𑑄 𑐠𑑂𑐰 𑐣𑑂𑐴𑐵𑐥𑐵𑐣𑐶𑐳𑐾𑑄 𑐴𑐾 𑐧𑑁𑐡𑑂𑐢 𑐳𑑄𑐳𑑂𑐎𑐺𑐟𑐶𑐫𑐵 𑐴𑐾 𑐡𑑂𑐫𑑀𑐟𑐎 𑐏𑑅 𑐢𑐎𑐵𑑅 𑐖𑐶𑐟𑑅 𑐢𑐵𑐫𑐾𑐟 𑐠𑐵𑐎𑐸 𑐩𑐖𑐹 𑑋 𑐟𑐬 𑐧𑐵𑐏𑑄𑐫𑐵 𑐁𑐢𑐵𑐬𑐫𑑂 𑐢𑐵𑐫𑐾𑐐𑐸 𑐏𑑅𑐳𑐵 𑐠𑐸𑐎𑐶𑐫𑐵 𑐧𑐵𑐏𑑄𑐫𑐵 𑐥𑑂𑐬𑐶𑐮𑑂𑐫𑐸𑐜 𑐀𑐠𑐰𑐵 𑐡𑐎𑐮𑐫𑑂 𑐥𑐸𑐮𑐵𑑄𑐐𑐸 𑐢𑐵𑐫𑐾𑐮𑑂𑐰𑑅𑐐𑐸 𑐱𑑂𑐬𑐺𑑄𑐏𑐮𑐵𑐣𑐶𑐳𑐾𑑄 𑐎𑐩𑐳𑐾𑐎𑐩 𑐧𑐵𑐏𑑄𑐫𑐵 𑐣𑑂𑐴𑐵𑐥𑐵𑑄𑐐𑐸 𑐧𑐕𑐶 𑐴𑐶𑐣𑑂𑐡𑐸 𑐰𑐵 𑐰𑐿𑐲𑑂𑐞𑐰𑐟 𑐮𑐶𑐳𑐾 𑐳𑑂𑐰𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋

𑐀𑐖𑑂𑐫𑐵𑑅𑐐𑐸 𑐀𑐰𑐳𑑂𑐠𑐵𑐫𑑂 𑐎𑐩𑐳𑐾𑐎𑐩 𑐖𑐶𑑄 𑐐𑐣𑐟𑐎 𑐔𑑂𑐰𑐫𑐾 𑐢𑐎𑐵𑑅 𑐢𑐫𑐵𑐟𑐫𑐵𑐐𑐸 𑐡𑐸 𑐀𑐣 𑐟𑐎 𑐰𑐣𑐾𑐠𑐵𑐫𑑂 𑐖𑐶𑑄 𑐰𑐫𑐵𑐟 𑐧𑑁𑐡𑑂𑐢 𑐢𑐎𑐵𑑅 𑐥𑑂𑐬𑐳𑑂𑐟𑐸𑐟 𑐫𑐵𑐫𑐾𑐩𑐵𑑅𑐐𑐸 𑐀𑐰𑐳𑑂𑐠𑐵 𑐩𑐡𑐸𑐐𑐸𑐮𑐶𑑄 𑐖𑐶𑑄 𑐐𑐠𑐾 𑐏𑑅 𑐀𑐠𑐾 𑐴𑐾 𑐢𑐎𑐵𑑅, 𑐧𑑁𑐡𑑂𑐢 𑐢𑐎𑐵𑑅 𑐧𑑂𑐰𑐫𑐾𑐐𑐸 𑐎𑐸𑐟𑑅 𑐩𑐫𑐵𑐳𑐾 𑐣𑑂𑐴𑑂𑐫𑐧𑑂𑐰𑐫𑐵 𑑋 𑐧𑐸𑑄𑐐𑐡𑑂𑐫𑑅 𑐳𑐸 𑐮𑐾 𑐳𑐵 ? 𑐐𑐸𑐩𑑂𑐴𑐾𑐳𑑂𑐫𑐵𑑄 𑐐𑐸𑐩𑑂𑐴 𑐖𑐸𑐂, 𑐰 𑐖𑐶𑑄 𑐨𑐵𑐮𑐵 𑐩𑐎𑐫𑐵 𑑋 𑐰 𑐖𑐶𑐐𑐸 𑐮𑐵𑐐𑐶 𑐕𑐩𑑂𑐴 𑐥𑑂𑐬𑐟𑐷𑐎 𑐖𑐎 𑐴𑐾 𑐏𑑅, 𑐖𑐶𑐩𑐶𑐟 𑐠𑐖𑑂𑐫𑐵𑑅𑐩𑑂𑐴 𑐕𑐩𑑂𑐴 𑐡𑑂𑐫𑑅, 𑐳𑐴𑐵𑐬𑐵 𑐰𑐵 𑐩𑐳𑐶𑐴𑐵 𑐩𑐵𑑅 𑐢𑐂𑐐𑐸 𑐄𑐟𑑂𑐎𑐚 𑐂𑐔𑑂𑐕𑐵 𑐀𑐮𑐾 𑐀𑐖𑑂𑐫𑐵𑑅𑐩𑑂𑐴 𑐡𑑂𑐫𑑅 𑐴𑐫𑐾𑐐𑐸 𑐠𑐣𑐫𑐵 𑐖𑐣𑐟𑐵𑐫𑐵 𑐀𑐳𑐷𑐩 𑐀𑐨𑐶𑐮𑐵𑐲𑐵𑐫𑐵 𑐩𑐹𑐬𑑂𑐟 𑐬𑐸𑐥 𑐴𑐾 𑐖𑐎 𑐏𑑅 𑐧𑐸𑑄𑐐𑐡𑑂𑐫𑑅 𑑋

𑐕𑐐𑐹 𑐴𑐵𑐮𑐸𑐳𑐶𑐣𑐾𑐳𑐣𑐫𑐵 𑐎𑑂𑐰𑐵𑐟𑐸𑐐𑐸 𑐰𑐵 𑐟𑐵𑐎𑐸𑐐𑐸 𑐬𑐸𑐥 𑑋 𑐴𑐫𑐵𑑄 𑐟𑑂𑐰𑑅𑐟𑐮 𑑋 𑐰𑐵 𑐐𑐵𑐎𑐵𑑄 𑐟𑑂𑐰𑑅𑐟𑐮 𑑋 𑐱𑐵𑐫𑐡 𑐰 𑐗𑐶𑑄𑐣𑐶𑐡𑑃 𑐟𑐎𑐫𑐵 𑐴𑐵𑐮𑐸𑐳𑐶𑐣𑐾𑐱𑐣 𑐰𑐵 𑐳𑑂𑐎𑐶𑐖𑑀𑐦𑑂𑐬𑐾𑐣𑐶𑐫𑐵𑐫𑐵 𑐮𑐶𑐔𑑂𑐰𑑅 𑐖𑐎𑑄 𑐏𑑅𑐮𑐵 ? 𑐁𑑅𑐫𑐵 𑐨𑐵𑐳𑑄 𑐳𑑂𑐰𑐫𑐾𑐧𑐮𑐫𑑂 𑐠𑐖𑑂𑐫𑐵𑑅𑐠𑐖𑑂𑐫𑐵𑑅𑐐𑐸 𑐏𑑃 𑐮𑐸𑐫𑐵𑐰𑐂 𑑋

𑐟𑐬 𑐣𑑂𑐴𑑂𑐫𑐵𑐐𑐸 𑐴𑐾 𑐢𑐵, 𑐠𑑂𑐰 𑐧𑐵𑐏𑑄 𑐢𑐵𑐠𑐾𑑄 𑐐𑐸𑐮𑐶 𑐥𑐸𑐮𑐵𑑄𑐐𑐸 𑐖𑐸𑐂 𑐢𑐎𑐵𑑅 𑐀𑐣𑐸𑐩𑐵𑐣 𑐫𑐵𑐫𑐾𑐐𑐸 𑐠𑐵𑐫𑑂 𑐩𑐡𑐸𑐣𑐶𑐳𑐵𑑄 𑐠𑐥𑐵𑐫𑑂𑐖𑐶 𑐳𑐸𑐣𑑂𑐡𑐬, 𑐀𑐬𑑂𑐠𑐥𑐹𑐬𑑂𑐞 𑐴𑐵𑐮𑐸𑐳𑐶𑐣𑐾𑐱𑐣𑐫𑐵 𑐎𑐮𑑂𑐥𑐣𑐵 𑐫𑐵𑐫𑐾𑐐𑐸, 𑐀𑐠𑐰𑐵 𑐠𑐥𑐵𑐫𑑂𑐖𑐶 𑐟𑑅𑐢𑑄𑐐𑐸 𑐩𑐶𑐳𑐣 𑐖𑑂𑐰𑐣𑐵𑑅 𑐄𑐮𑐶 𑐟𑐵𑐥𑐵𑐎𑑂𑐎 𑐰𑐣𑐵𑑅 𑐠𑐩𑑂𑐴𑑄 𑐔𑐵𑐴𑐾𑐖𑐹𑐐𑐸 𑐠𑐖𑑂𑐫𑐵𑑅𑐐𑐸 𑐳𑐩𑐵𑐢𑐵𑐣𑐫𑐵 𑐄𑐥𑐵𑐫𑐫𑐵𑐟 𑐖𑐐𑐟𑐳𑑄𑐳𑐵𑐬𑐫𑐵 𑐎𑐮𑑂𑐫𑐵𑐞𑐫𑐵 𑐴𑐾𑐟𑐸𑐎𑐠𑑄 𑐳𑐵𑐧𑐹𑐟 𑐴𑐫𑐾𑐐𑐸 𑐠𑐖𑑂𑐫𑐵𑑅𑐐𑐸 𑐳𑐸𑐣𑑂𑐡𑐬 𑐳𑐵𑐴𑐶𑐟𑑂𑐫𑐫𑐵 𑐣𑐶𑐬𑑂𑐩𑐵𑐞 𑐫𑐵𑐫𑐾𑐦𑐸𑐥𑐶𑑄 𑐗𑐷 𑐣𑐾𑐰𑐵𑑅𑐟 𑐎𑐩 𑐎𑐮𑑂𑐥𑐣𑐵𑐱𑐶𑐮 𑐖𑐸𑐂 𑐮𑐵?

𑐳𑐸𑐫𑐵𑐟𑑄 𑐠𑐠𑐾 𑐢𑐵𑐫𑐾𑐧𑐮𑐫𑑂 𑐩𑐫𑐫𑐾𑐦𑐸, 𑐟𑐬 𑐰 𑐗𑐷𑐐𑐸 𑐳𑑄𑐳𑑂𑐎𑐵𑐬 𑐰 𑐧𑐸𑑄𑐐𑐡𑑂𑐫𑑅 𑐢𑐂𑐩𑑂𑐴 𑐳𑑄𑐳𑑂𑐎𑐺𑐟𑐶 𑐎𑐠𑑄 𑐕𑐩𑑂𑐴 𑐳𑐸𑐥𑐬𑐩𑐵𑐫𑑂𑐣 𑐏𑑅 𑑋 𑐀𑐠𑐾 𑐢𑐂𑐐𑐸 𑐗𑐷𑐠𑐵𑐫𑑂 𑐣𑑄 𑐰 𑐡𑐸𑐳𑐵 𑐖𑐶𑐄, 𑐰𑐵 𑐗𑐷 𑐡𑐎𑑂𑐰𑐳𑑂𑐫𑐵 𑐖𑐶 𑐣𑑄 𑐠𑐠𑐾 𑐖𑐸𑐂𑐡𑐸𑐳𑐵 𑐖𑐶𑐄 𑐢𑐂𑐐𑐸 𑐩𑐟𑐶𑐂 𑐰𑐂𑐩𑑂𑐴 𑐬𑑀𑐮 𑐩𑑀𑐜𑐾𑐮 𑐏𑑅 𑑋 𑐟𑐬 𑐰 𑐳𑐸𑑄 𑐩𑐶𑐳𑐵𑐫𑐵 𑐥𑐬𑑂𑐳 𑐮𑐸𑐚𑐾 𑐫𑐵𑐣𑐵𑐫𑑄𑐎𑐹𑐐𑐸 𑐮𑐶𑐟𑐎𑐵𑐫𑐾𑐟 𑐧𑑂𑐰𑐫𑐵𑑅 𑐧𑑂𑐰𑐫𑐵𑑅 𑐮𑐵 𑐖𑐸𑐂𑐩𑐏𑐸, 𑐧𑐬𑐸 𑐣𑑂𑐴𑑂𑐫𑐵𑐧𑐮𑐾𑑄 𑐖𑐐𑐟𑐫𑑂 𑐳𑐸𑐫𑐵𑐟𑑄 𑐐𑐣𑑄 𑐕𑐸𑑄 𑐡𑐸𑐏 𑐖𑐸𑐮 𑐮𑐵 𑐢𑐎𑐵𑑅 𑐧𑐶𑐔𑐵𑑅 𑐫𑐵𑐣𑐵𑐔𑑂𑐰𑐣𑐷, 𑐎𑐬𑐸𑐞𑐵𑐔𑐶𑐟𑑂𑐟𑑄 𑐰𑐫𑐵𑐐𑐸 𑐄𑐡𑑂𑐢𑐵𑐬 𑐫𑐵𑐣𑐵𑐔𑑂𑐰𑐣𑐷 𑑋

𑐗𑐷𑐐𑐸 𑐩𑐣𑐫𑑂 𑐣𑑄 𑐐𑐣𑑄 𑐎𑐶 𑐐𑐣𑑄 𑐕𑐩𑑂𑐴 𑐕𑐩𑑂𑐴 𑐧𑐸𑑄𑐐𑐡𑑂𑐫𑑅 𑐡𑐫𑐵𑐔𑑂𑐰𑐣𑐷, 𑐧𑑁𑐡𑑂𑐢𑐟𑐫𑑂𑐳𑑄 𑐧𑑀𑐢𑐶𑐔𑐶𑐟𑑂𑐟 𑐢𑐵𑐂𑐐𑐸 𑐠𑐾𑑄 𑑋 𑐠𑐸𑐎𑐶𑐫𑐵𑐟 𑐗𑐷𑐳𑑄 𑐧𑐵𑑄𑐮𑐵𑑅𑐐𑐸 𑐩𑐣, 𑐰𑐔𑐣 𑐰 𑐎𑐬𑑂𑐩𑑄 𑐩𑑂𑐰𑐵𑐎𑐾𑐩𑐵𑑅𑐐𑐸 𑐡𑐸, 𑐐𑑂𑐰𑐵𑐎𑐾𑐩𑐵𑑅𑐐𑐸 𑐡𑐸 𑑋 𑐀𑐖𑑂𑐫𑐵𑑅𑐩𑑂𑐴 𑐧𑐸𑑄𑐐𑐡𑑂𑐫𑑅 𑐗𑐷 𑐡𑐸𑐣𑐾 𑐩𑑂𑐰𑐵𑐎𑐾𑐦𑐸𑐳𑐵 𑐗𑐷𑐳𑑄 𑐣𑑄 𑐖𑐐𑐟𑐫𑐵 𑐄𑐡𑑂𑐢𑐵𑐬 𑐫𑐵𑐫𑐾𑐐𑐸 𑐖𑑂𑐫𑐵𑐫𑑂 𑐥𑐮𑐵𑑅 𑐣𑑂𑐴𑑂𑐫𑐵𑐎𑐾𑐦𑐂 𑑋 𑐗𑐷 𑐡𑐎𑑂𑐰𑑄 𑐧𑐸𑑄𑐐𑐡𑑂𑐫𑑅 𑐖𑐸𑐂𑐦𑐂, 𑐖𑐸𑐂𑐦𑐸 𑑋 𑐖𑐶𑐐𑐸 𑐥𑐵𑐟𑑂𑐬 𑐧𑐸𑑄𑐐𑐡𑑂𑐫𑑅𑐫𑐵 𑐠𑑂𑐰 𑐴𑐾 𑐳𑐣𑑂𑐡𑐾𑐱 𑐖𑐸𑐂 𑑋 𑐣𑐸, 𑐗𑐷 𑐣𑑄 𑐧𑐸𑑄𑐐𑐡𑑂𑐫𑑅 𑐖𑐸𑐂 𑐣𑐸 𑑋