𑐀𑐩𑐾𑐬𑐶𑐎𑐵𑐫𑑂 𑐣𑐾𑐰𑐵𑑅 𑐧𑐵𑐬𑐾 𑐎𑐵𑐬𑑂𑐫𑐱𑐵𑐮𑐵


𑐀𑐩𑐾𑐬𑐶𑐎𑐵𑐫𑑂 𑐣𑐾𑐰𑐵𑑅 𑐧𑐵𑐬𑐾 𑐎𑐵𑐬𑑂𑐫𑐱𑐵𑐮𑐵

𑐫𑐾𑑃 – 𑐀𑐩𑐾𑐬𑐶𑐎𑐵𑐫𑐵 𑐎𑑂𑐫𑐵𑐮𑐶𑐦𑑀𑐬𑑂𑐣𑐶 𑐬𑐵𑐖𑑂𑐫𑐳𑑂𑐠𑐶𑐟 𑐚𑑀𑐥𑐵𑐣𑑂𑐐𑐵 𑐣𑐵𑑄𑐫𑐵𑐐𑐸 𑐱𑐴𑐬𑐫𑑂 𑐣𑐾𑐰𑐵𑑅𑐟𑐫𑑂𑐐𑐸 𑐮𑐶𑐥𑐶, 𑐳𑑄𑐐𑐷𑐟, 𑐴𑐸𑐮𑐵𑐥𑑂𑐫𑐵𑐏𑑄 𑐁𑐡𑐶 𑐰𑐶𑐲𑐫𑐫𑐵𑐟 𑐎𑐫𑐵𑑅 𑐕𑐐𑐹 𑐎𑐵𑐬𑑂𑐫𑐱𑐵𑐮𑐵 𑐖𑐸𑐮 𑑋 𑐖𑑂𑐫𑐵𑐗𑑂𑐰𑐮𑐫𑑂 𑐣𑐾𑐥𑐵𑐮 𑐮𑐶𑐥𑐶 𑐰𑐬𑑂𑐎𑐱𑐥, 𑐣𑐾𑐰𑐵𑑅 𑐥𑑂𑐫𑐵𑐏𑑄, 𑐳𑑄𑐐𑐷𑐟 𑐧𑐵𑐬𑐾 𑐣𑑂𑐰𑐔𑐸 𑐰 𑐧𑑂𑐰𑐖𑑂𑐫𑐵 𑐮𑐶𑐳𑐾𑑄 𑐠𑐷𑐠𑐷 𑐣𑐾𑐰𑐵𑑅 𑐎𑐮𑐵𑐫𑐵 𑐣𑑄 𑐧𑑂𑐰𑐖𑑂𑐫𑐵 𑐖𑐹𑐐𑐸 𑐏𑑅 𑑋 𑐫𑐵𑐒𑐔𑐾𑐣𑑂𑐩𑐵 𑐁𑐬𑑂𑐚𑐳𑑂 𑐊𑐞𑑂𑐜 𑐩𑑂𑐫𑐹𑐖𑐶𑐎𑐫𑐵 𑐐𑑂𑐰𑐳𑐵𑐮𑐫𑑂 𑐖𑐹𑐐𑐸 𑐄𑐐𑐸 𑐖𑑂𑐫𑐵𑐗𑑂𑐰𑑅𑐫𑐵𑐟 ‘𑐩𑑂𑐫𑐹𑐖𑐶𑐎𑐵 𑐩𑐣𑑂𑐜𑐷 𑐣𑐾𑐥𑐵𑐮’ 𑐢𑐂𑐐𑐸 𑐣𑐵𑑄 𑐧𑐶𑐫𑐵𑐟𑑅𑐐𑐸 𑐏𑑅 𑑋

𑐖𑑂𑐫𑐵𑐗𑑂𑐰𑑅𑐫𑐵 𑐣𑑂𑐴𑐵𑐥𑐵𑑄𑐐𑐸 𑐳𑐟𑑂𑐬𑐫𑑂 𑐨𑐵𑐖𑐸 𑐳𑐸𑐨𑐵𑐲𑐬𑐵𑐩 𑐥𑑂𑐬𑐖𑐵𑐥𑐟𑐶𑑄 𑐀𑐣 𑐳𑐴𑐨𑐵𑐐𑐷 𑐖𑐹𑐥𑐶𑑄𑐟 𑐬𑐘𑑂𑐖𑐣𑐵 𑐮𑐶𑐥𑐶 𑐳𑑂𑐫𑐣𑐵𑐡𑐷𑐐𑐸 𑐏𑑅 𑑋 𑐄𑐎𑐷 𑐠𑐷𑐠𑐷 𑐀𑐩𑐾𑐬𑐶𑐎𑐷 𑐣𑐵𑐐𑐬𑐶𑐎𑐟𑐫𑑂𑐳𑑄 𑐣𑑄 𑐬𑐹𑐔𑐷 𑐟𑐫𑐵𑑅 𑐮𑐶𑐥𑐶 𑐳𑑂𑐫𑐣𑐵 𑐎𑐵𑑅𑐐𑐸 𑐏𑑅 𑑋 𑐀𑐠𑐾 𑐴𑐾 𑐨𑐵𑐖𑐸 𑐥𑑂𑐬𑐖𑑂𑐰𑐮𑐬𑐟𑑂𑐣 𑐰𑐖𑑂𑐬𑐵𑐔𑐵𑐬𑑂𑐫𑑄 𑐔𑐔𑐵𑐥𑑂𑐫𑐵𑐏𑑄 𑐳𑑂𑐫𑐣𑐵𑐡𑐷𑐐𑐸 𑐏𑑅 𑑋 𑐣𑐶𑐐𑐹𑐐𑐸 𑐳𑐟𑑂𑐬𑐫𑑂 𑐳𑐸𑐨𑐵𑐲𑐬𑐵𑐩 𑐥𑑂𑐬𑐖𑐵𑐥𑐟𑐶𑑄 𑐣𑐾𑐥𑐵𑑅𑐫𑐵 𑐳𑑄𑐐𑐷𑐟 𑐧𑐵𑐬𑐾 𑐣𑑂𑐰𑐔𑐸 𑐧𑐶𑐫𑐵𑐡𑐶𑐮 𑑋

𑐣𑑂𑐰𑐔𑐸 𑐮𑐶𑐥𑐵 𑐥𑑂𑐬𑐖𑐵𑐥𑐟𑐶𑐫𑐵 𑐥𑐸𑐔𑐮𑑄 𑐢𑐶𑐩𑐫𑑂, 𑐢𑐵𑑅, 𑐣𑐵𑐫𑑂𑐏𑐶𑑄, 𑐎𑑂𑐰𑑄𑐔𑐵𑐏𑐶𑑄 𑐰 𑐩𑐐𑑅𑐏𑐶𑑄 𑐠𑐵𑐣𑐵𑑅 𑐣𑑂𑐴𑑂𑐫𑐧𑑂𑐰𑑅𑐐𑐸 𑐏𑑅𑐳𑐵 𑐥𑑂𑐬𑐖𑑂𑐰𑐮𑐬𑐟𑑂𑐣 𑐰𑐖𑑂𑐬𑐵𑐔𑐵𑐬𑑂𑐫𑐫𑐵 𑐥𑐸𑐔𑐮𑑄 𑐔𑐔𑐵𑐥𑑂𑐫𑐵𑐏𑑄 𑐣𑑂𑐴𑑂𑐫𑐧𑑂𑐰𑑅𑐐𑐸 𑐏𑑅 𑑋𑐖𑑂𑐫𑐵𑐗𑑂𑐰𑐮𑐫𑑂 𑐣𑑂𑐴𑐶𑐔𑑂𑐕𑐶𑐫𑑄𑐎𑑄 𑐣𑐾𑐰𑐵𑑅 𑐧𑑁𑐡𑑂𑐢 𑐳𑑄𑐳𑑂𑐎𑐺𑐟𑐶𑐫𑐵 𑐠𑐷𑐠𑐷 𑐴𑐮𑑄𑐖𑑂𑐰𑐮𑑄 𑐰 𑐎𑐶𑐥𑐵 𑐧𑑂𑐰𑐖𑑂𑐫𑐵 𑐣𑑄 𑐖𑐹𑐐𑐸 𑐏𑑅 𑑋 𑐖𑑂𑐫𑐵𑐗𑑂𑐰𑐮𑐫𑑂 𑐁𑐥𑐵𑐮𑑄 𑐰𑐶𑐡𑐾𑐱𑐷𑐟 𑐳𑐴𑐨𑐵𑐐𑐷 𑐖𑐹𑐐𑐸 𑐏𑑅 𑑋